BLACK AND WHITE-7

BLACK AND WHITE-7

"Ka rui lo a nia aw" ka mut zangthal lai chuan min kuahna a thlahdul deuh a, "I tum tak tak tiraw?" zawi te hian ka ti a, a lo bu nghat a, damdawi kan inpek lai khan dim light ka on a, a hmel thutak zet chu chiang deuhin ka hmu thei a ni. 

"Ka sim loh chuan ka chan dawn che a" ka mitah tak en chung hian a ti a, a sawi dik lo chuang lo. Ruihhlo hian kan inkar a ti hla ve zel a, hmangaih viau mah ila ţhen mai duh chang ka nei ve rum run fo mai. 

"A dik chiah..i sim loh chuan engtik ni ah emaw min la chan ngei ang" ka tih chuan ipik ve hmel zet hian a thaw hawk a, a thutak lutuk chang hi chuan Tintin-a a ang ţhin lo. Min mut hnaih lehzual a, a ban chu ka lukham theih turin a dah a, "I damloh kha" ti mah ila, "Chuvang chuan min duat rawh" a ti daih a, nui hak chung hian ka kuah let ve a, a taksa sa in min ur lum ham ham mai.

"Muhil leh tawh rawh" chauh hmel zet a tih pahin ka tukhumah a dawm a, ka chal a fawp zui vang vang a, ka mut a chhuak tawh bik lo. Vawt a tih lutuk hlauin ka kuahna chu ka ti nghet a, "Min chan i duh loh chuan tun ang hian rui lovin awm reng rawh. Ruihhlo tello pawhin khawvel hi a hrehawm lutuk chuang lo a nia" ka ti sap sap a, hmeichhia ten chhe lo leh pa an tih sup sup ţhin ka bialpa a ni meuh kha chu ka hlim a, tumah hrilh ngam lo mah ila ka intithei viau ţhin. Mahse, ruihhlo a tel miau chuan chhe lo eng ang mah se awmzia a awm lo. Inhau bap bap ţhin mah ila sim a tum tak tak a nih chuan theih tawpin ka pui ang. Ka hmangaih a, keipawhin chan ka duh bik lo. 

"Ka tum mek a nih hi..ruihhlo tello chuan mit leh hnarkua pahnih ve ve chiah i nei tawh. Ruihhlo nen kha chuan pali ve ve i nei a" ka bianga dawm paha a tih chuan tum barin a ke ka tlawh a, "Ka hmu phir char char che i tihna mi?" ka ti let a, a nuih a za viau mai. 

"Ka hmu chiai zel che" a ti vel a, a thutak lehpek tawh lo tih hriain ka ngai haw duh bik lo. 

"Aww...tum bur reng suh Vanram, phir nuaih mah la ka mitah chuan i ţha ber tho tho" tih pahin ka kawngah bawk a kuah leh a, "Min kalsan suh aw..chan che ka duh lo. Ka kut hi chelh reng ang che" zawi te tak tak hian a ti na a min ngenngawl khawp mai. 

"Nangpawn min kalsan bik suh. Chak deuh deuhin tlan tawh lo la, rui chungin bike khalh tawh lo bawk rawh. Kei aiin i thi hmasa ang tih ka hlau a nia aw" ka tih chuan, "Ka thih san phal lo che ka tih kha" zawi ruih hian a lo ti ve leh zat a, "Thihna kawngkhar a min nawr liam luih an tum chuan ka invuan bet tlat ang. Ka kut an phuar leh ka inseh tang ang a, nangmah chiahin khawvel ah hian ka awm tir lo ang che" a tih zawm leh a, a ngaihţhat thlak ţhin a nia. Pathian zarah a hrisel a, damloh mang a nei ngai lo. Bike khalh pawh thiam a in ti, a ruih poh leh a confi emaw tih mai tur a nia, chuti chung chuan ka ngaihtuah lo thei lo a, a reh vang vang te hian ka hlauthawng ţhin. 

"A nih chuan insiamţhat vat a ngai a nih chu. Nuam i ti bik lo tih ka hria alawm" ka tih chuan, "A dik" a lo ti vat a, "Eng nge hmuh hrehawm i tih ber ţhin?" tiin ka lo zawt leh nghal zat a, ka mitah min en a, a khua a sik vang nge a mitmeng te chu a ni ruih maiin ka hria. 

"Mitmeng" a ti deuh sup a, mak ka ti angreng. "Tu mitmeng? Keimah maw?" ka tih chuan, "Mi mitmeng. En ngai en tlawk tlawk ho pawhin min hmuh tawh chuan an mitmu dum lai hi a che rulh zel. Ka awm ve naah tu mitmeng mah a dik ngai lo. Ţhu ngil awt mah se ka kal kual tawh chuan an mitmu a vir pawp pawp tho" a ti pek a, thawm chhuah hlau takin ka nui a, tumah hian an ring miau lo.

"Thil i ruk an hlau a nih chu" ka tih chuan, "Ruk ka nei a nih chuan Puii fanu a ni mai" a ti a, nui lui tih hriat zet hian a ţhen sak a, ka nu in hria se chu a haw leh viau ang. 

"Tupawh hian ruihhlo ti ţhin te hi chu kan hmu pangngai ngai thei lo hrim hrim a" ka tih leh chuan, "Tumah an demawm loh. Ka haw hran lo, ka pangngai miau lo" a ti a, a aw ri a tawrhna leh a hmel a natna langchhuak chu ka hria a, ka hmu bawk a, sawi ve tur pawh ka hre tawh lo. Keichuan ruihhlo ti lo tam tak aiin ka ring zawk a, thil a ruk awm pawh ka la hre lo. Thawhchhuah a neih ve hma pawhin thil a ruk palh hlauin a chhungte hian pawisa an pe char char zel a, rukruk chungchangah berkher chuan hming hliauna a la nei lo. 

"Sim mah la rei deuh chhung chu i tawrh a ngai tho ang. Mi kan hmuh pangngai loh lak lawh tawh chu hmuh ţhat nghal a har a, chu chu i hriat ve a ngai" ka tih chuan ipik hmel zet hian, "Ka hria" a ti hap a, kan ngawih zui vang vang hnu chuan ka mut dan ka siam rem a, khum lu lamah tawlh chhoin ka kuah bet leh a, hmeichhia zawk hi pangchang zawk kan ni fo a, keimahni chauh hi hnem ngai emaw kan in ti ţhin. Kan inkhawngaih lutuk ţhin te, tuar bik riau a kan inhriat ţhin avang te, kan buaina kan hmuh len bik lutuk ţhin avang te hian mipa pawh hian hnem tu an mamawh ve ţhin tih kan hre lo fo. Ka awm zawnah ka kuah bet a, "I tum chuan i thei alawm...engmah ni lo mah ila i kut ka vawn chhung chu miin en endan cheah buai suh. Kan ţang dun ang a, engkim a pangngai leh vek mai ang" tiin ka thiam dan ang angin ka hnem ve a, ka thil paltlang tawh zozai te avangin ka chhel a, rilru no lutuk chi ka ni lo hlauh a, ho mai mai a ţap ţhin leh no duai chi chu ni ila ka puih theih pawh ka ring lo. Tunah pawh hian hmachhawn a huphurh zia a lang reng a, ka inti chhel lehzual ang a, ka pui thei em em ang. Ani pawh hian a ti lui dawn tih ka hria, hrehawm a tih viau pawhin a lantir leh chuang lo ang. Hmaikawr a vuah leh ang a, thawveng leh enghelh nei ve miah lo angin a awm leh tho ang. 

Zinga ka harh meuh chuan ka bulah Tintin-a a lo mu tawh lo. Thawm a chhuah miah lo a, khawvar dawn hnaih a muhil chauh ka nih avangin ka mu nghet viau a nih ka ring. Ham bai bai chunga ţhut chhuah pahin ka hmai ka tuai a, paper tereuhte ka tuai thla nawlh mai. Ka en rualin dawhkana ka bookmark dah chhuah kha a ni tih ka hre nghal chat bawk. A ban lutuk lo a, ka chal ah a lo inbel va tih pawh ka hre reng reng lo. 

"I hnar nasa emai ka haw san daih che. I thlawh chhuah ka hlau a tukverh pawh ka khar thlap" tih zawng a inziak a, tukverh lam ka en vat a, a lo inkhar tak tak. Thu mawi hnai deuh te hnutchhiah ve tur a nia, zing a nih meuh chuan hmaikawr a vuah leh tawh ang ka tih reng kha. 

'Eng nge i an?' tiin message ka thawn hram a, min chhan let hun nghakin ka ţhu ran a, sana ka en zeuh zeuh a, school chawlh a nih avangin ka tho nghal peih lem lo. 

'Ka ngai che. I hnar thlawrh thlawrh ri kha ka bengah a cham' ka zawhna pawh chhang lovin a rawn ti a, nui tho mah ila, 'Eng nge i an?' ka ti nawn leh ngat. Na a neih te hian ka hriat a hlau a, ka rilru hah a hlau ve ngei ţhin, chuti a nih rual chuan min ruih khum reng tho a, mi mak tak chu a ni ve. 

'Vanram fang reng reng natna nei a let leh i hre tawh em? Ka dam vek tawh' a rawn ti a, teh duah ţhin hian. 

'A ţhat chu..i la nat viau chuan ka lo kan ang che ka ti deuh a, Sensiari a awm phei chuan ka hmu pah duh a' ka ti chiah chu, 'Ka khua a la sik ser ser a' a rawn ti leh daih a, ka nui hak mai. Mi fiam kual vel hi nuam a tih ber a nia, thil tam tak a ngaihtuah ve ţhin a, chumi ven nan chuan a ti ni berin ka hria. 

'Chhunah ka lokal ang' ka ti a, min chhang tawh lem lo. Sensiari zawk ka bia a, in a a awm dawn leh dawn loh ka zawt a, 'Dawr piah chiah kha an siam dawn a, a bengchheng dawn emai inah ka awm ang' tiin min lo chhang ve mial a, ka lawm lutuk chu ka zuang tho zawt lo chauh a ni. 

'Van khi ka ta ni lo mahsela, nang ka kianga i awm a, ka ta i nih chhung chuan...vannei ka ni mai' Tintina status chu ka chhiar nui vur vur a, ka chhanlet hmain ka nu'n min la ko zui. 

"Nizanah thawm i va nei rei ve..i tho leh em ni?" pindan aţanga ka chhuah rualin a lo ti nghal a, rinhlelhna mitin min en ka ti mai, a meng khui mai. 

"Ka lu a na a, damdawi ka ei a nih kha" ka ti liam mai a, pindan chhunga kan ţawng kha chu a hre pha kher lo ang. 

"Tintin-a a lokal leh ange aw..ka hrilh che kha, eng emaw a thlen chuan ani aiin i mualpho dawn. Mipa chu reilote an mualpho a, a reh leh mai. Hmeichhe mualphona chuan damchhung a daih a, a nghawng tawh ţhin. Ka thusawi hi hrereng rawh, i zawm duh lo lui a nih chuan i la inchhir ang. Neih tlak chu nise innei daih mah ula pawi ka ti lo, mahse Tintin-a te ang mipa hi siamţhat theih an ni lo. Thawnthu leh film ah i cheng lo tih hre reng rawh. Thil tak tak a nih hi, thawnthu nen a inang thei lo" a ti leh duah tawh a, a tep chap hnuah a meng phawk hra a, a hmui a hup zui chawt bawk si, Mary nen a awmdan mak lutuk chu kan en reng ringawt.

"Korean ho tih dan i la ve deuh a ni maw?" ka pahrawnin a lo tih chuan, "Ka ha lem awmna hi a kaw daih alawm. Ka dawlh palh em maw ni le? Vani hre hru vang vek a ni, ang lo thei lovin min siam a, ka ha lem kha ka dawlh a nih chuan a pawi thui viau ang" a ti leh hlak hlak tho a, hman deuh khan a na a tia, a nghing bawk a, a tawrh peih loh tawpah a phawi tir a, a ţo thei tawh si lo kha ha lem a vuah a, a lan sarh deuh vang a ni pakhat bawk. Ka thinrim hman tehreng nen ka nu ha lem bo chuan ka nuih a ti za tlat a, lei lam ka bih tlat chung pawhin ka nui tih a hre tho aniang, "Nui reng reng suh..nangmah vang a nih liau luau hi. Pindanah va en teh, khawiah nge ka dah? Ka haihawt bawk si, nizan khan ka ngaithei lovin ka la thla pek em ni?" a ti mawlh mawlh reng a, ka pahrawn pawh pindan lamah a phei vat a, ha lem nen a a lo let chuan ka thaw huai mai. 

"Thingpui lum rawh" ka nu'n a tih leh tak hmukah chuan choka ah ka lut a, "Nang chu lehkha zir rawh, thingpui pawh i u in a lo pe mai ang che" zaidam deuhin Mary bulah a ti leh ang lawi a, Tintin-a vanga min hua nge a nih a min hmangaih lo bik ve hrim hrim pawh ka hre lo. Ka pahrawn nen an inneih hnu kha chuan awki pangngai leh dam deuh a min biak awm pawh ka la hre lo. 

"Inchhung hrehawm i tia, pasal i neih hnuah i hrehawm dawn bawk a, nang hi chu i piang vanduai ve ngawt mai. Thu awih la chu hetiang thil hi a thleng lo tur a nia" thingpui ka pek laia ka nauin a lo tih chuan, "Nang lehzel chu lo buai ve lo teh. In vaia min beihrawn hian hrehawm ka ti lehzual. Ka nu leh ka pahrawn hi a tawk viau a ni" ka ti let a, darthlalang a inthlekin ka sam ka tuai zauh a, ka hah hluah hluah reng mai. 

"Ka ngaihtuah vang zawk che a nih chu. Nang chu ni ila mi pangngai ka ngaizawng ang a, inchhunga hrehawm tawrh reng ai chuan ka nawm sak ve nan pasal ka nei ang. Naupang zawk thingpuite min pe a, i lal loh em hi. An huat turin awm tawh suh, a nih loh chuan i chep tial tial ang" min en ran chung hian a ti a, a awki ah chuan in deusawhna a tel lo a, min ngaihtuah vang a ni tak tak tih hre mah ila, "In thisen zawmpui ngei in dang chep duh a nih chuan ti rawh u. Mahni in pawh hahdam nan ka hmang ve thei lo a, nuam in tih phawt chuan min ti hrehawm reng rawh u, ka tuar vek mai ang" ka ti ve ngat a, a lo chek tlak a, "Chutiang zawngin ka sawi lo" nuam lo tih hmel takin ti ve bawk mah se chhang lovin ka chhuahsan tho. Ka nau takngial pawn min zah vak tawh loh chhan chu thu ka awih loh vang a nih rualin ka nu vang pawh a ni tel. 

'Zanah ka lokal ang. Ka nute hrilh lawk duh kher suh, ka ngaihtuah chiang a, kan pa hian a hriat loh theih chuan hre lo se ka tia, chhuanlam dang siamin ka lokal dawn a, ka nu chu hrilhfiah ka tum ang a, a theih ngang loh leh tih dan dang kan zawng dawn a nia' ti a ka nu message min rawn thawn chu, 'Aw le' tih chiahin ka chhang a, chhel inti viau mah ila a hun a thlen meuh chuan ka thin a phu leh zawih zawih tawh. Ka nu'n a hriat huna a awmdan tur thlengin ka ngaihtuah kai a, hlauhna bawk a rawn let leh tawh a nih hi. 

Sensiari te in lam pana ka kal laiin Daizaui nen kan intawk a, a inkhai bawr leh ţun tawh. Hmu lawk sa ila chu ka hel daih ang mawle. Thawpik lai chuan Daizaui ang mi thawveng lutuk hi chu ka hmu chak chiah lo. 

"Khaw nge i kal dawn?" ka ti tho a, min be bawk si lo a, biak loh tawp chu a nuam lo emai. 

"Ka tlan chhin a, mahni chuan buai a na, sumdawn ka duh bawk si, a buaithlak emai ka haw leh dawn" a ti hem mai. 

"Engmaw? In inhau em ni? Ngati nge i tlan a?" ka ti deuh chul a, buaina an nei tih pawh ka lo hre lehpek lo chu a nih hi, a bengvar loh theih khawp mai. 

"Ka sumdawng hi min sawisel reng a, kan inhau ve deuh. Ka tlan ve chhin a, nizan chu Sensiari te inah ka riak. Ka in ngaihtuah chiang a, naute buaipui leh sumdawn bawk nen, tlan hi tih mai mai a lo ni lo. Chuvang chuan ka tlan leh peih lo, ka haw leh dawn" a ti charh charh a, amah pawh a ngui ve deuhin ka hria. 

"Ka lo hre reng reng hleinem. Haw leh rawh, nupa nih tawh chuan inţhen a ţha hleinem. Intih thiam loh chang chu a awm tur a nia, inţhen lo turin Pathian hnenah in intiam tawh kha" ka tih chuan, "Nia, kan pa hnenah pawh ka fiam che ka ti mai ang. A thin a rim ve deuh a, ka chhuak dawn ka tih pawn min ui lo. A lo la thinrim leh naute in a ngai che ka ti mai aniang chu. Ngati nge school i kal loh a? Inrinni pawh a ni si lo a" a ti a, min thlek deuh ha a, ka khawngaih ve ţhin. A nu a nikhua lo a, lehkha pawh a zir rei thei lo. Nun siam hunlai tak te kha zu dawr a a tal tam hunlai a ni a, patling ho nen card an deng ţhin. Mi inah te a awm kual mai mai a, Sensiari ten an khawngaih avangin an bulah an awm tir a, lehkha thiam lo leh mawl mang taka seilian na na na chu a buaithlak chang a tam, chuti chung chuan an dawm zel a, pasal pawh Sensiari te hnen aţanga nei a ni. 

"Vawiin chu chawlh a nia, inpa chu haw leh i dil hreh em? Ka kalpui dawn che mi?" ti ve ngial mah ila, "Hreh love le..in thlen hma aţangin thawm ka nei ang a beng a chhi hru mai ang. Bakah ka tlan chhin alawm..ka haw hreh lo. Taka, kekawr ka la thar a sin" a ti leh tawh a, kalsan nghal daih a chakawm rum rum mai. 

"Jeans a nia, a fan thei a, hak a nuam lutuk. A lei tawh ho phei chuan mutpui pawh a hrehawm loh an ti. Ti to deuh rawh an tia, mahse thil zawrh to vak hi ka duh ve lo a, pian a ti lang nalh bawk si, i lei ve duh em? Min dawr ve la..i ba dawn nia, nang chu i rintlak emai" a tih zawm zel a, chhuanlam eng eng emaw siamin ka kalsan thei hram. A sumdawn zel chuan kan duh miah loh thil kan kawl ruih thei mai ang. 

"Pindanah a awm" pawnah Sensiari a lo awm a, Tintin-a awmna min lo hrilh nghal nain, "Ani chu ka hmu ngun tho a, nangmah nen a inkawm ka duh zawk mah" ka tih chuan ka lam a lo hawi a, a hmelah chuan engmah a langchhuak lo. 

"Min huat chhan ka hre duh a" ka ti ban charh a, ka u a lokal hmain engkim chingfel vek ila ka hahdam a ni mai. Chhungkua kan buai deuh a nih pawhin ţhiante nen a kan inkar a fel a nih chuan inhnem na tur ka nei dawn a, diktak chuan ka nu hian min hmangaih ve pawhin ka hre tawh lo a, belh tur leh rin tur dang ka zawng ruai reng a ni ber. 

"Kei aiin i hre zawk daih ang chu" a bula ka din rual chuan a kawrlum ipte zen pahin hmalam a melh daih a, inchhunga nu Ruati au lang lang chu pawnah lo chhuakin min rawn ti buai ang tih ka hlau kher mai. 

"Ka hre lo..min huat chhan tal min hrilh la, chuan ka lo insawifiah anga" ngenngawl zet hian ka ti a, ka ipik zia leh a der mai mai ni lova min duhsak tu, ka biak phak a awm reng tur ka duh zia chu hria se a theih ang angin min hrilhfiah vek ang. 

"Sawi tur vak pawh a awm lo" a tih deuh hmak lai chuan a banah ka vuan chawt a, phawk hra hian min en a, ka chet dan teh thut chuan a ti hrilhhai niin a lang. 

"Inbihruksiak reng ka peih tawh lo. Kan inhel tawn zak zak a, min be duh bawk si lo. Buaina dang ka ngah lutuk. Ţhianţha a min ngai ve ţhin a nih chuan engkim sawi vek rawh" ka ti khawl khawl a, ka vawnna chu thing thla in veranda a ţhutna an dahah chuan a ţhu a, ka beidawng duh bik lo. A bula ka ţhut ve rual chuan a thaw hak a, min ning deuh niin ka hria. 

"Khati khan min ti suh aw Laltinkhum. Ruihhlo zawng zawng ka sim vek dawn i tia, kan lawm ve nen. First day aţangin i thin a chhe nghal em em ringawt a" nu Ruati au ri bawk chu kan hre leh nghal zat a, "First day" lo ti ve in Sensiari chu a nuih a za khawp mai. Kei erawh ka ţhu ngawi kar thung. 

"Engtinmah ka ti lo che. Nangmah a nih kha, thingpui ka in lahin zu i pawlh tho ang i ti thul, trust hi a awm lo maw ka nu Ruat" Tintin-a chuan a ti ve a, "Ngah nge maw sapţawng an zeh tel sek ni. Tinkhuma lah hi ka nu awm ang zelin a awm thiam, a runluih deuh ţhin niin ka hria" Sensiari pawn a lo ti a, min bia ni pawhin a lang lo. 

"Mi hi hnial khur khur zel suh...ka khawng chawrh duh mai ang che" nu Ruatin a tih chuan, "Engin nge min khawn ang? Mi kan damlo ve a, i duh leh lapua in min vawm rawh" a lo ti let leh a, nu Ruati zawk chu kawngka bulah a ding a, Tintin-a ka hmu thei lo nain an ţawng kan hriat theih danah a awm hla bik lo ang. An lo chhuak ang tih ka hlau ber mai. 

"I damlo ve te hi a awihawm loh lutuk, dawr hawn peih loh vang mai mai. I mu tawp a nih loh chuan ka awih dawn chuang lo" nu berin a tih veleh, "Mut tawp ka tum a min la hau a nih hi" pakhatin a lo ti ve nghal zat a, "Dawr luah man te hi engtia tih nge i tum? I pe tawh reng reng em?" thutak deuh zawka nu Ruatin a tih leh chuan, "Dawr luah man ka ti mai ang. Lo buai suh" a ti hluk a, "I nau pawh i tluk lo, i nau zawkin a lehpel che" a la ti hram a, ka lo hne hlui tawh. 

"Naute an nia, ka in lehpelh tir a nih kha. Mipa te chuan hmeichhia kan dawm thiam alawm, kan khing kan khing ve ngai lo. Sensiari pawn min lehpel duai duai rawh se, ka hlawk zawk chuan a rilru a na dawn a, ka ip rih a nih hi" 

"Awii..Laltinkhum i thluak hi vawrh vir nasa viau zel lo teh. I nau i dawm thiam vanga in lehpelh tir i ni lo, dawr i hawn thatchhiat lutuk vang zawk a nih kha. Ti tawp vek la, ran vulh mai rawh" nu Ruatin a tih lai chuan, "Thluak ka vawrh vir te chuan ka thih loh pawn ka â mai dawn a sin. Mi i hau peih riau, nupui ka nei ang a, nau awm tur i neih hunah i zia ve mai ang" nuihza aw zeta a tih takah chuan kei pawhin a nu chu a chhaih lui vel mai mai tawh tih ka hrethiam a, Sensiari zawkin kawngkhar a va nam khar a, ka bulah bawk a rawn ţhu veleh a, inchhung thawm pawh a hriat mang tawh loh. 

"Nitin zantin an inhau a, ka kham a nia. Tintin-a che hlek se ka nu'n a hau a, pakhat lahin a thinrim tur tawk leka chhaih a thiam bawk si, nileng daih sawi tur an hria ang, ti sawn rak mai mai rawh se" a ti hlak hlak a, ka zawhna erawh min la chhang lo thung. 

"Ka thil sawi kha" ka lo ti zauh a, min melh zawk hnuah hmalam bawk a en leh a, "Hman hmanah khan min zawt fiah tur a lokal daih tawh tur che alawm. Ka awm ang zelin i awm a, i reh vang vang a, ka hua che hi engahmah ngai lo i ang. Min lo ngaina vak lo a nih hi ka ti tawh a" a tih takah chuan chawp leh chilhin beiseina ka nei nghal a, ka zang nghal hawk ti ila ka sawi sual lo ber ang. 

"Hriat ka duhna a rei tawh alawm. Diktak chuan miin min lo rel pawh nise ka thlavang i hauh zawk ka ring ţhin a, ka sawi anga thil an sawi a nih pawhin awih miah lo tur i nia. Eng ber nge min huat chhan hi ka hre duh" ka ti leh phawng a, "A tam mai" zawi sap hian a ti a, insi riala kan han ţhut dun leh meuh chuan a landan ang ngawt hian min haw tak tak bik lo tih ka hria. Kan inţhianţhatna hi naupanlai aţanga inţan tawh a ni a, kan inhrechiang a, keimahni a dik lo awm pawh sawi lo mah ila inhriat sak chang kan nei ţhin. 

"Thartei nen hian in inkawm vak ngai lo emaw ka tia, in lo inkawm nasa hle si a" a tih chuan a ruka a lo leng ţhin hi a hria emaw tiin ka hlauthawng hman a, mahse amah bawkin, "Aizawl a kan awm lai khan in lo inzui nasa viau a nih hmel. Thil i lo sawi nasa emai" a ti leh a, mitmeng thutak deuhin min melh kal bawk nen, Thartei a sawi daih chu mak tihna in ka khat a ni ber. 

"Engmah ka sawi reng reng lo. Tintin-a vel hi a tirah khan ka zep a, ka pawm vek. Nangpawh ka hrilhfiah che a, min hrethiam vek. I hriat hnu kha chuan engkim ka hrilh zel tawh che a, i bulah lo ka mimal nun ka sawi vak lo. Tuma bulah ka rel lo bawk che. Min zawtfiah hmasa lo a min haw ringawt hi ka dem ve tho che" ka ti fak fak a, ka thusawi chu a hriat kim loh ka hlau khawp mai. 

"Min rawn zawh fiah hun alawm ka nghah. I awm thei ka tih nak laiin" a ti daih a, hemite unau hi chu an maksak ve a ni. A nu leh a pa an chhun pawh ka hre tawh lo e a. 

Min huat nachhan a sawi chiah chu a mak tih bak sawi tur ka hre lo. Thartein Zuali sawi anga a sawi kha Sensiari chuan Thartei sawi ang vekin a sawi thung a, "A vaiin Thartei sawi vek maw?" ka ti nawn leh ngat reng a ni. A lo bu nghat a, dawt a sawi lo tih a hmelah a lang vek bawk. 

"Thartei maw?" ka tih nawn leh chuan nin hmel deuh hian, "Aww...Thartei ka tih kha. Dawt min hrilh a nih chuan tunah pawh ka chhuahchhal nghal ngam" a lo ti a, Thartei nen an thusawi a inang chiah a, pakhatin Zuali a puh a, pakhatin Thartei a puh thung. Tintin-a leh Zuali chungchang a sawi ve lo a tih a ni mai. 

"Mahse Thartei chu a ni dawn mi? A fel a mi pawh a rel ngai si lo a" ka tih niah niah lai chuan, "Chuvang chu alawm a thusawi ka awih vek reng ni. Mahse tunah chuan ka awih tawh lo. Eng emaw hriat ka nei a. Lokal har viau lo la chu ka hrilh ve daih tawh ang che" a lo ti a. 

"Engati nge min nghah kher? Min ngei tawh lo a nih chuan min rawn pawh hmasa mai ta che" vin lek lek a ka tih chuan, "Ka ngei ţhin che alawm Thartei ka hriatchian hma kha chuan. Thil hriat ka neih hnu khan ka in ngaihtuah chiang a, ka ring chhe lutuk che em aw ka tia, mahse nangmah hian min rawn biak i tum miah lo a, ka awm ang angin i awm ve a, ka pawh hmasa duh bik lo che a nih kha. Diktak chuan dawr bul pawh an siam dawn lo, min lo biak khan ka phuahchawp mai mai a nih kha" a ti a, inrem a lo duh ve lutuk chuan min tih lawm rualin ka biak hmasak hun a nghak kher erawh a ţullo khawp mai. 

"Eng nge i thil hriat chu?" ti a ka zawh leh chuan, "Hman zanah Thartei te inah ka leng a, Zuali chu exam tur a neih vangin a lokal ve lo. Laptop ah movie kan en a, purple hearts kan en tawp hnuah eitur a siam hlanin ka u hnen aţangin message a dawng a, fb ah" a ti chiah chu ka ţhu ngil nghal awt mai. 

"Eng nge awmzia?" phawk hra a ka tih chuan, "Ţhian kan nia, a pawi lo turah ngaiin ka en ve mai a, 'Zing, chhun zan zawm hian min lo be lo teh. Ka phone a puak dawn' tih zawng a rawn thawn Tintin-a chuan. Mak ka ti lutuk khan ka en chiang a, ka u a nih ka ring lo rum rum zawk a, Thartei facebook account zawk chu ka en leh a, mahse keimahni'n kan hriat zawk hi a ni lo. Phuahchawp deuh a siam chawp mai mai niin ka hria. Ka hlauthawng a, ka en zel chuan min manchhuah hman ka hlau ve tho si a, ka u message ka delete hnuah engmah hmu lo angin ka awm a, min rinhlelhna pawh a nei kher lo ang. In a ka haw hnuah Thartei message rawn thawn tu kha ka phone aţangin ka enchiang leh a, ka u a lo ni tak tak a" a ti a, a hun ka zawt a, Tintin-a phone ka en zan leh Thartein Sensiari leh Zuali te thinrim chhan ka hrilh ang che a tih zan kha a ni. Fake account aţanga rawn be tu pawh kha Tintin-a phone ah khan ka hmu ngei a, message zawng zawng thlengin ka chhiar a, ka bialpa chuan a reply na delete nachang a lo hre ve thlap a nih chu. 

"Facebook a account a siam chawp chu i hmuh a ring aniang, a ringhlel che a nih dawn chu" ka ti a, a dawt sawi thup nan ka bulah dawt dang a sawi a, a nihna kha Zuali a rawn puh let vek a nih ber chu a. 

"Engtin nge min ringhlel tih i hriat?" a tih chuan, "Khami zan khan min rawn bia a, Zuali vek a nih kha a ti alawm. A tukah a lokal a, engkim min hrilh a, Zualin Tintin-a a ngaizawng angin a sawi bawk a" ka tih chuan za lo tih hriat zet hian a nui hawk a, "Tunhma, kan venga an lo awm ve hmain buaina kan nei ngai hleinem. Keichu laptop a ka thil hmuh avang khan ka hmu dik hleithei tawh lo. Zuali berkher phei chuan engmah a sawi ngai lo. Keini MA kan zo a, kan duh tawk der a, Zuali te chu a la zir ngat ngat a, a rilruah thil dang a leng lo. Mipa ngat phei chu a ngaihtuah lo nasa ropui lutuk. Thartei vekin alawm engkim min hrilh ni. Tintin-a message kha hmu kher lo ila chu tun thleng hian rinhlelhna ka la nei bik nang. Ka rinhlelh thu pawh Zuali chu ka hrilh a, mak a ti ve tho. Pathianni a Thartein a biak che pawh khan Zuali nen chuan kan inkheuh zeuh a, a be thut che kha mak kan ti deuh a" a tih leh lek phei chuan ka var kuar mai. Keimah vanga khatianga awm kha an ni emaw ka tia, Thartei vang zawk a lo ni reng sia, ka zangkhai hawk nain mak ka tihna a bo hleithei lo. 

"Min rawn be nghal mai lo chu mak ka ti e. I van lo induh thei em em" ka ti ta ringawt a, "Nangpawh i ni tho alawm. Ka ngei che chuan a chhan min zawh chung chung ka ring a, min lo biak sek a, i insawifiah te ka ring a, ka reh a i reh ve hmak a, ka nghak ngat ngat che a nih hi. Thartei sawi kha a dik lo tak tak tiraw? Rilru chhia i pu ngai lo tiraw?" a ti ţha veleh a, kan inrintawnna a tlem sawt khawp mai. 

"Teuh lo lutuk, i bialpa ka ngaizawng ngai lo a, vawikhatmah ka rel ngai lo bawk che. Thartei hi ringhlel lo la chu lokal lo mah ila nangmah zawk hian min la be duh chuang lo ang" naupangchhia zet a ka tih chuan a nui mai mai a, engmah phei chu a sawi tawh lo. 

Pawn a Tintin-a lo chhuah ve rualin ka nu'n min lo call a, vin tawk a "Lo haw nghal rawh" a tih rual deuhthaw chuan ka ding chhuak ve nghal. 

"I u lokal a tum a, rawngbawl hma te a ngai. Chawhmeh siam sa a awm bawk si lo, zan a lokal tum kha chaw rawn ei a tum leh si a, sa te lei a ngai. Lo haw la Mary nen bazar rawh u" a tih zawm leh a, ka u lokal tur chu a phur hmel viau mai. 

"Ka lo haw ang" tih leh phone dah ka rual a, ka bialpa te unau chuan min en ran a, ka lai lek lek a ni. 

"Ka haw mai ang" ka tih rual deuhthaw chuan, "Ka damlo min lo kan dawn maw ka tia" lungawi loh hmel fe hian a lo ti a, "Ka nu'n min ko a" ka ti te chu a nur nang mai. 

"Ngatinge i lo tih khawtlai a?" tih pahin Sensiari ke ah zawi tein a chhir a, "Thil kan sawi dun alawm. Hman zana lo be vak tu che ka hmuh pawh kha reply lo ang deuhin i awm a, i reply tih ka hre vek" keimah zawkin ka lo ti a, ka thaw a veng deuh tawh a, mihring hi kan duh dan a thil a thlen a, kan hlim viau hian chhungril a kan naupanchhiatna hi a langchhuak ţhin. 

"Vawikhat bak ka chhang lo. In ţha tawh em nangni ţhian dun hi? In tihtauh khum bur bur tawh suh u naupang in nih tawh loh kha. Bible ah pawh in hmelmate hmangaih ula tih a inziah kha" a ti ve ngial a, kan lo ner nang nang ringawt. 

"Vanram, zanah ka lo leng dawn nia aw" a tih leh chuan rang lutukin, "A ngai lo" ka lo ti vat a, a ngaih a ţha lo aniang a chal a chuar nang mai. 

"I phal lo maw? Ka rui dawn hleinem" a ti a, lu ka la thing tho a, "Ka ute an lokal dawn a, chhungkaw chaw eikhawm an ti ve deuh aniang, nuam i ti lo ang. Ka lo bia ang che" tih leh inher ka rual a, zawhna min zawh leh hmain ka kal hmawk hmawk a, "Sawnu saw eng nge a hriat a?" a ti ri te chu hre pha reng mah ila ka hawi let tawh lo. Ka u rawn len chhan tur ber hi a hriat ka duh rih lo a, dam deuh a ka hrilh loh chuan a thinrim a chet buan buan ka hlau a ni. 

Rawng te kan bawl zawh hnuah ka u pawh a lo thleng a, a hmel a ngui nghiai mai. Ka nu'n phur sarh a a lo biak pawhin nui lui chungin a chhang a, a intihlim chawp tih a hriat reng mai. Keimah ang bawkin ka nu chu a en leh dauh dauh ţhin a, "Nu, i dam deuh tawh em? Eng nge i an zel?" tih zawhna chu a rawn thlen hnuah vawi tam a zawt tawh. Ka chunga thil thleng te kha awlsam deuh a sawichhuah mai har deuh a sin. 

"Ka zia ve zel chuan ka hria. Tih phut hi ka nei ţhin a, hei vang hian alawm Vani pawh ka rilru ti hah suh ka tih ţhin ni. Rilru a hah chuan taksa a dam thei lo" tiin ka nu chuan ka hming bawk a lam leh a, ka u nen kan inmelh ralh a, ka chungah ţhat chhuah ngai lo mah se ka khawngaih lutuk tlat. A hriselloh em avangin a kum aiin a lang tar a, a cher em em reng a, ka pa lahin min boralsan hma bawk si. Kan unau mai bakah ka pahrawn thleng hian a chawm vek zel a, ka nu ka chhawk duh vang a nia MA ka zawh ruala private school a ka thawh nghal ni. A hmai lah a duk nasa a, damdawi ei reng ngai a nih avangin a vun pawh a eng thei lo. 

"Chaw ei khamah thu pawimawh deuh hrilh tur che ka nei a nia aw" ka u'n a tih rual chuan lei lam ka melh thla riai riai a, "Eng chungchang nge ni a?" ka nu chuan a lo ti vat a, a aw a ngaihţhat lohna langchhuak ka hriat meuh chuan ka huaisenna zawng zawng te kha a bo zo leh vek tawh ni berin ka hria. Mahse, ka ti tawh laklawh a, engpawh thleng dawn se ka chunga thleng ang kha ka naute leh kan chhung hnaivai, ka putea hnaih tute chunga a thlen ve loh nan ka tih tlang ngei a ngai ang.

CONT...