BLACK AND WHITE-10

BLACK AND WHITE-10

Pindan kawngkhar a rik rawk rualin rang lutukin ka ţhu chhuak a, ka tha khur nasa lutuk chu thunun hleihtheih a ni lo. Ka chhungril nain min ti â nghal vek lo chu a mak zawk. Ka thil ken lai en reng chunga muangchanga a rawn pen luh lai chuan khum aţangin ka lo chhuk ve a, inhmachhawn in kan ding ran a, intih pachan tumin ka kut ka hum ruh nasa. A hmel ka hmuh takah erawh ka mittui ka dang zo ngang lo a ni. 

"Sawi fiah rawh" ka ti sep a, thil dang ka sawi thei lo. Ka taksa insangmar nasa lutuk avang chuan ka lehkha ken lai chu ka ţham khawr vek tawh a, lehkha a inziak hrethiam lo tur khawp a mawl chu ka ni bik tlat lo. 

Lehkha min laksak tum a a che vut chu, "Sawi vat ta che" ka lo ti vin tuar a, ka khabe te chu a sai hlawk hlawk mai, ka thin a rim a, chu ai mah chuan ka chhungril natna hi a thuk daih zawk. 

"I hmuh ang kha" tih ringawtin min chhang a, ka mittui chuan ka khaw hmuh a ti phe ruai a, a hrehawm takzet a ni. Tunah tak hi chuan nikhaw hre lo a tluk tawp a harhchhuah tawh loh ka duh ber. 

"Tintin, HIV a nih hi..i positive maw?" ka ti tham ţiak a, ka mittui chu ka khabe thlengin a luang thla a, ka ţah chhuak lutuk ţap thei bawk si lo chu ka thaw hlawp hlawp a, ka awm a insep nasa a, ka mang ruai bawk. 

"Min chhang ta che" au khum leh tuar pahin a awmah ka chum vak a, a che dawt a, min melh ran reng ringawt a, a mitmengah chuan engmah a hmuh theih loh. Ka hrethiam lo a ni zawk mah. 

"Khawi aţanga i kai nge? A nih leh kei hi? Ka kai ve dawn tihna mi? Engtin nge ka awm ang? Hmeichhe hrang hrang i awmpui ţhin em ni?" ka ti mawlh mawlh a, a awm zawn chu ka melh tlawk tlawk a, ka lu te a hai mum mum thei mai.

"Ka hre lo" zawi te a a tih chuan, "Engmaw i hriat loh? HIV+ ka nih ve leh ve loh i hre lo maw?" ti a zawhna mawl mang tak ka zawh chuan a lo bu nghut a, ka mitah pawh min en ngam tawh lo. 

"Tawp tawh ang" zawi ruih hian a ti leh a, chu thu tawi te chuan na takin min chhun a, ka thaw chhuak thei dawn lo tak tak hialin ka hria. 

"Tintin" ka tih rualin, "Ti tawp tawh ang" zawi te, khauh zet si hian a lo ti leh a, ka chhungril tawt lutuk leh ka thawk hleihtheih loh avang chuan ka kâ pawh ka chip thei lo. Ka biang huh hliam tuai tawk pahin hrilhhai zet hian ka melh ngawt ngawt a, a mitmeng thuk takah chuan eng nge a ngaihtuah ve ka hre lo. Chutih rual chuan hetiang thil, natna rapthlak lutuk vei ve thei dinhmun a ka din laia min kalsan a tum hi ka hrethiam thei lo. 

"I kai ve loh phei chuan min hlat rang ang che. Min hmu tawh suh, he pindanah hian lo lut leh tawh suh" ka dara a dawm rual chuan rang zetin ka inla hrang a, ka hua a, ka hmangaih tho si. Tun a thil thleng mek hi mumang mai mai ni se ka ti rum rum a, mahse a tak tak vek a ni. 

"I lo mak hle mai" ka aw chu a ri chhuak chang chang chauh a, ţawng ţha hleithei lo mah ila ka chhungril a mangang a, awmdan tur ber pawh ka hre tawh lo. 

"Kal tawh rawh" a tih chuan ring deuhin ka thaw chhuak kawk a, "Eng nge i hriat a? Min ngaihtuah miah nange? I chunga thleng mek ang hi ka chungah pawh a thleng ve thei tih hre ta che? Min hmangaih miah lo zawk em ni? Min chhang rawh..min lo hmangaih ve reng reng em?" tih chiam chiam pahin a awm ah chuan ka nam leh ţhin a, engmah a sawi tawh lo. 

"I hur herh man tuar ve thei reng ka nih lai hian engkim tih tawp vek i tum maw? Eng mihring nge i nih a? Min khawngaihna chhe te mah i nei nange?" vin zet a ka tih leh pawh chuan ngawi ngul hian min en reng ringawt a, a luhlul zia hre tu tan chuan a manganthlak lehzual a, ka pik mup mup a ni ber. 

"I hma i va sial ve, hmeichhe inzuar i awmpui ţhin em ni?" ka tih leh chuan a ngaihdan a ni bik lo tih hriat zetin a rum chhuak hawk a, tih tur leh sawi tur ber pawh min ti hre tawh lo. Ani lah hian engmah a sawi ţha duh mang bawk si lo. 

"Damdawiinah kal ang..keimah chuan ka ngam lo. Tunah hian damdawiinah min kal pui rawh" ngenngawl zet a tih pahin ka pan hnai a, ngam leh ngam lovin a tshirt hmawrah ka vuan a, min chik ve a nih phawt chuan ka tha khur nasa lutuk chu a hre ve thei ngei ang. 

"I kai lo ang kal tawh rawh" ka insum thei tawh lo chu ka ţap chhuak hawk a, a kawr ţham ngawt ngawt chung hian ka kut awl lamin ka kuah a, ka chal chuan a awmah ka nawr a, min kuah let ve miah lo te chuan min ti na lehzual a, min vilh ngut ngut a ni ber. Ka beidawng lutuk chu awm ngaihna pawh ka hre lo. 

"I kai ve kher lo thei, i tana ţha tur zawk a nih hi" ka dar tawn tawnah a dawm a, hnung lama min nam let rual chuan ka hmai ka hup a, naupang lungchhia ang maiin ka ţap tawp hleithei lo. 

"Ţap tawh lo la" a tih rual chuan muangchangin ka kut ka la thla a, ka mittui luang te chu ka hru buai peih tawh lo. 

"Engin nge ti danglam che? He natna hian i thluak thlengin a khawih chhia em ni a? Natna hi ka lo nei ve maithei, kan awmdun dan ngaihtuah phei chuan nei ve thei reng ka ni. Thu chiang pawh i hriat hmain min hnungchhawn i thlang maw? Lo nei ve ta ila keimah chiahin ka tuar dawn tihna mi?" ka ti tuar tuar a, a chhungte an awm hnaih leh hnaih loh pawh ka ngaihtuah thei tawh lo, ka â thei mai dawnin ka hre hial a ni. 

"Nangmah i ni hlawl lo, ka hriat ţhin kha chu ni la hetiang mai mai hian inţhen i rawt lovang. Ka tello a awm thei ngai lo khan kan inkar tih tawp i duh ta mai chu a nia, hmeichhe dang an awm ve zawk em ni?" ka tih chuan lu a thing a, a sam te chu a pawr fap a, ani pawh a chauh hmel lutuk tlat. 

"Nih leh ka tello in i awm thei ang maw?" beidawng zet a ka tih leh chuan, "Ka tum ang" tiin min chhang a, ka result pawh hre hmasa lova hetianga min ti hi ka hrethiam thei hlawl lo. 

"Ka test ve phawt loh chuan kan inţhen lovang, ka thei rih lo. Hetiang thu ngaithla tur hian ka lokal lo. He natna hi ka nei ve a nih phei chuan kan inţhen lovang" mumal lo zet hian ka ti nawk nawk a, tlawm ka inti. Kan awmdan ngaihtuahin kai ve thei dinhmunah ka ding tih a hria, chu ringawt pawh chuan ti hlauin min ti na tawh, chuti chung chuan min hel a, min hel a, inţhen a duh bawk a, a rilru buai lai mah ni se min hmangaih ve miah lo em maw ni tih mai a awl rum rum alawm. 

"Tumah ka hnaih duh lo" tih pahin a kut phah hlai hlup chuan ka biang a dawm a, ka mittui min hruk sak laia a hmel tak ngul mai te chu hmuh hrehawm ka ti. Hetiang hian Tintin-a a awm ngai lo. A mitmengah lah chuan a ngaihtuahnaa thil awm pakhatmah a lanchhuah tir lo a, HIV+ a ni a, inţhen a duh. Chuzawng chu ka hriat awmchhun a ni. 

"Tumah ah chuan min chhiar tel ve tihna mi? Min nghak rawh, damdawiinah min kal pui rawh. Keimah chauh chuan ka hlau alawm. Lo kai ve ta ila engtin nge ka awm ang. Ni lo, lo kai ve ta ila tih pawh a ngai lo ka kai dawn chiang sa. Keimah chauhin engtin nge ka hmachhawn theih ang? Kan pahnihin kan tuar dun mai ang chu" ngenngawl zet a tih pahin ka biang a dawmna kut chu ka vawn hnan a, a hmelah chuan min khawngaihna chhe te mah ka hmu lo. 

"I hma i va sial em em ve" tih leh pahin a kut chu ka paihthlak sak a, "Nangmah chiah i inngaihtuah a nih kha. Natna i nei tih i hriat rual khan i rilruah ka awm ve reng reng em? I la pawm thiam loh vang mai khan kei hi min tawrh tir ve dawn tihna mi? Mahni hmasial leh lutuk mai" ti a ka vin leh nghek takah chuan, "He thil hi hmachhawn awlsam ka tih bik i ring em?" vin deuh lek lek hian a ti ve a, "Ka rilru a buai, ka mangang lo bik lo. Ngaihtuahna mumal pawh ka neih theih loh lai hian min nawr lui suh" a ti vin tuar a, dik ka ti tho bawk si. Tih tur ber pawh ka hre lo, ngawi rengin ka ding hle hle a, ka chhungril tawt lutuk chuan min hnawh hlum thei mai dawnin ka hria. A kut chelh tlat tura min tih aţang khan kum em pawh a la liam lo, inţhen hlau zawk pawh amah hi a ni ziah. Mahse, tunah inţhen duh zawkah a ţang a, chupawh buaina a tawh vang chauhin. 

"Kal tawh rawh, damdawiin ah chuan kal la, he natna hian a luhchilh ve lo che a nih chuan vawikhat mah min hmu tawh suh. Kei aia ţha i phu alawm, hre daih tur zawk ka nia" ka mit a en reng chung hian a ti a, a natna hian a insit tir a, engmah lo ang maiah a in ngaih tir vek tih hre tho mah ila ka kuah nawn leh ngawt a, a taksa lum chu ţum dang zawng aiin ka thlahlel tih hrereng chungin a inla hrang tho!

"Kal rawh, Pathian hi a awm a nih chuan he natna hi pe ve lo che rawh se. Nang tal chu him rawh, ka ţawngţaina a nih chu. I nei ve a nih chuan Pathian hi vawikhatmah ka be leh tawh ngai lovang" a ti a, min kalpelh pahin ka hnungah a nam a, ding reng mah ila engmah a sawi tawh lo. Ka vai riai reng a, ka taksa a zawi a, ka rilru na lutuk chu ka tliak hnawp a ni ber.

"Ka lo lut dawn a nia" tih thawm kan hriat rualin kawngkhar a inhawng a, Sensiari lo dak dek dekin ka hmel a hmuh rual chuan, "Ehe...in inhau em ni a? Eng nge awmzia Tintin? Vani?" a ti nghal chul mai. 

"Vanrami kha han thlah rawh" thupe aw zeta a tih hnuah chhuat a lehkha tla chu a chhar a, lukham hnuaiah bawk a dah leh a, lehkha mai mai chuan Sensiari ngaih a ti ţha ve lo aniang, "I hau pek em ni a? I thinrim hian ti pung pung zel suh. Hmeichhe dawm nachang pawh hre lo, lokal rawh Vani, ka thlah ang che. He mihring hi be tawh miah suh" tih hlak hlak pahin ka banrekah a chelh a, ka ţhianţhaber kut nem thepin ka taksa a deh rual chuan ka mittui bawk a tla leh a, min zawt se Tintin-a remtihna la hmasa lo chuan ka sawi ngam awm der si lo. 

"Lokal rawh he mihring lu lawk lutuk avang hian ţap duh mah ta che" thinrim zet a a tih chuan Tintin-a mu pawh a inbeng kang uaih mai. 

"Han ţawng leh teh Lawmnasangzual, mahni lo mah a rilru buai nak laiin, tumah ka mamawh lo che u. Min hlat vek rawh u, kawmthlangah ka vawr thla dial mai tur cheu sin. Tuman min hnaih suh ang che u" a ti khur khur mai. Sensiari chuan a hrethiam kher lo ang a, kei chuan tenawmah a in ngai tih ka hria. A kai ve lo te pawhin an hrethiam kher lo ang, HIV hi chu a kai tu te bawk hian rilru a nghawng nasat zia an hrethiam ang. 

"Ve pung pung che hian a..tho la vawkin zu sil rawh. John leh Linda te pawh chaw i la pe lo. I rilţam loh vang ngawtin rilţam ve lo turah i ngai a, i unaute khu zu buaipui vat ang che. Kal ang Vani" tih leh pindan aţanga min hruai chhuah a rual a, nu Ruati chu lo awm kher lo se la ţha tur a nia. 

"Ka thlah lawk dawn a nia, Tintin-a khi han kaitho rawh. Tunlai a awmdan hi a dik lo reng reng. Gospel camping a awm leh dawn a, lut leh rawh se" Sensiarin a tih chuan, "Vawi sawm lai a lut tawh a kan beidawng zel chu a nih hi. Mi zawng zawngin speaker aiin thusawi a thiam tawh ang an ti vek alawm. Bible chang lah a hre rapthlak si, speaker hmelhriat loh pawh a nei tawh mang lovang. Ti khian awm mai mai rawh se, mu hnur se la, a dawr luah man ka pek sak dawn lo reng reng. A man pek dawnah bike chhia siam leh tlut tlut se la a ni mai. Thawveng si, nun ho bawk si, a chhe zawnga si hlir a ni mai" a tih bawrh bawrh hnuah, "Vani, i ţap em ni?" a ti ta daih a, ka hlauh ruk ang chiah. 

"Tintin-a bawkin a hau aniang chu. Tunlai chu tupawh min ning vek alawm. A pindana ka pa lut pawh zu no a a lo vawm kha, plastic a ni hlauh a, ni lo se chu a pawi viau ang chu. Chhungte rilru tih hah bak thiam a nei lo, ka hne a nia. Kolasib khaw chhunga veng tin in a hming an hre lehnghal a, a chanchin ţha lam sawi tur an hre hlawm bawk si lo, zah te pawh a zahthlak" Sensiari chuan a lo ti veleh a, hetianga an sawi bawng bawng hi chuan khawngaihna chin ka nei ţhin. A rilru chhiat loh zia ka hrechiang a, a natna ngaihtuah chuan tuna a awmdan pawh hi ka dem hran lo, inţhen a rawt kher erawh ka hrethiam thei lo. 

"Tuk tin a la intih sek peih chuan ngaih ti ţha phawt ang kan ti ţhin a, mahse tunlai chu a inti sek peih lo. A mu zawi nguai reng ringawt a, i pi phei chuan ţawngţai dam thei koh a rawt tawh a nih kha. A tawm rei peih lovang, khawlai rap lovin a awm thei hleinem" nu Ruati chuan a ti liam mai a, pawnah kan chhuak a, garage a awm ve ngai lo a bike pawh a inkhuh ţha thlap a, lak chhuah ngai loh tih hriat takin a khuhna chu a paw phuk bawk. 

"In inhau em ni a?" Sensiari chuan gate bulah min dinpui leh rih a, ngawi rengin ka en a, chhan pawh ka chhang thei lo. Sawi tur ka hre lo a ni mah zawk. 

"Bialnu dang a nei em ni? Thartei a inrawlh em?" a tih leh chuan lu ka thing a, "Tumah an inrawlh lo" tih chiahin ka chhang a, a hriatthiam loh hmel khawp mai. 

"Nih leh eng nge in inhauh chhan ni a? I mittui a tla reng bawk si a" a tih leh chuan, "Inţhen a duh a" ka ti leh tawp a, a nui chhuak hak mai. 

"Ve lutuk hian a" tih pahin an in lamah chuan a hawi let a, chutah keichu min rawn en lehin, "Be duh miah suh. Nghak tawp la, ni hnih pawh a ţhen thei lovang che. Mawl bet but lutuk mai, nawr nawk nawk tlak mawle. Kan naupanlai pawn in lak tlat lai a neih ţhin kha, khatiangah khan ngai tawp rawh" a ti ve ngial nain thudik tak hre tu tan chuan ho deuh a ngaih theih a ni lo. Kan buaina tawh hi a serious lutuk tlat, keipawh ka bang lo thei, kai ve thei reng ka ni. 

Ka pindan chhung ka luh rual chuan ka chhungril a tawt leh up up a, ka awm zawn ka ţham a, a zia deuh beiseiin ka thaw chhuak halh halh a, awmzia a awm lo kher mai. Ka hmangaih loh vang ni lovin inţhen satliah chu ni ila tun ai hian ka zia deuh maithei, natna kai ve thei dinhmuna ka ding chuan min hnawh tawt tel a, khumah chuan ka tlu sawp niaih mai. 

A rilru buai dan tur te hriatpui vek lo mah ila kan dinhmun mek ngaihtuah hian min hnungchhawn tlat hi hriatthiam a har a, natna ka kai ve loh nan Pathian hnenah lo dil pawh nise ka lo kai tawh reng a nih chuan awmzia a awm lo. Lukham kuahin ka insut feih feih reng a, min ţhen lo tura ka ngenna te khan amahah awmzia a nei lova, ka mittuiin a ti danglam zo tawh lo. 

A tawp nan tak tak tiin ka call a, dimte a thawk la chungin ka ngaithla reng a, min chhang duh lo. A insawi anga a ngaihtuahna a buai deuh a nih pawhin hetiang thil hi chu ti lo tur a nia sin. 

"Au Mami, chaw ei ka siam a nia" ka nau au lang lang chuan suangtuahna aţangin min kai harh a, engtia rei nge ka mut tawh ka hre lo. Muhil lo mah ila engmah ka chik lova, ka let mawl tawp a ni ber. Chhungte bula tih lan vek chi ni hek lo le, chaw ei turin ka tho chhuak a, ka chhungten ka hmel an hmuh chuan an ngaih a ţhat hmel chiah loh. 

"I damlo nge i ţap? I lo haw aţangin i la mu char char a, i nuam lo em ni a?" ka nu'n a lo tih chuan, "Ka lu a na deuh a" tih chiahin ka chhang a, ka aw pawh a la khur deuh. 

"Chaw eikham veleh damdawi i ei dawn nia. Pi Dingi dawrah ka thil lei sa ka theihnghilh daih a, ka bawr lutuk a ni. I peih hunah min zu lak rawh aw" a ti leh a, ka nu hian min lo chik awm lo ţhin ka ti, ka danglamna pawh engmah a hre lo chu a nia. Mi te nu ang chu nise ka lu a na ka ti kha a awih hauh lo ang. 

"I chaw ei a tui nange?" ka thleng a chaw khawrh sa ka kut a ka thai neuh neuh laiin ka nau zawkin a lo ti a, "I khawih i khawih ringawt a, i melh deuh tlawk tlawk bawk si, i ei tui loh chuan kham daih rawh. Damdawi i ei dawn chuan an tui leh dal tal kha hawp lui la, a dang kha chu ei lui duh lo mai rawh" tih leh pahin chik deuhin min en a, thil awmzia a hrethiam a nih ka ring. 

Dar8 velah pi Dingi dawr a kal turin ka chhuak a, ka ke pen chu a sakin tha a tho lo khawp mai. Keimaha ka awm chuan ka ţap zel a, ka chhungte ngaihţhat loh ka hlau bawk si. 

"Vanram" ka hawi let chiah chu hnunglamah Ben-a a lo ding ran mai. 

"I ţha maw?" zawi sup a tih pahin min rawn pan hnai a, Sawmtea ka hmu tel ve hauh lo. Min zawhna chu aih ti a chhan chak viau mah ila harsa ti tak chung hian ka nui lui a, "Ţha e" tih zawngin ka chhang a, a awih hmel chiah lo.

"I ţha tak tak em?" a ti nawn leh kher a, ka lo bu nghat a, "Ţha lo ila min hmu nang" ka tih chuan, "I hmanhmawh em?" a lo ti leh daih a, lu ka thin rual chuan ka kut a chelh a, a nur nghal nang mai. 

"Khai a..i kut a vawt hle mai. I damlo em ni?" min ngaihtuah hmel lutuk hian a ti veleh a, "Aih..taksa na ka nei lo" ka tih rual chuan a thaw nghal hawk mai. 

"Biak che ka duh a, hei khum rawh miin an hmu palh ang che" tih leh a lukhum min khum tir a rual a, "Min zui dawn si a" a ti ban charh bawk a, ka nu'n a ţawngkhum ţhin dan avang hian Bena hi chuan mi hmuh a min zui a hreh tlat tawh. 

"Khaw nge kan kal dawn?" ka tih chuan, "Kan inhmu fuh laklawh emai khulai lawkah khuan kal ang. Sawmtea pawh a awm" a ti a, "Tintin-a a awm ve em?" ti a ka lo zawh leh chuan a ner nghal nawk mai. 

"Mi hrang a ni tawh" zawi te, chang zet si hian a ti a, "I nu'n a hau lo ang che tiraw? Saw lai deuhah sawn bike ka dah a" a tih zawm zat a, "Hau lo ang..bakah boruak hip ka mamawh alawm" ka tih chuan ka mit a en ran chung hian a nui suk a, "Kal ang le" a tih rualin bike dahna lam min pan pui a, eng emaw hriat a nei a nih ka ring. 

"Rawn lawn rawh" bike a tih nun rualin ka lawn ve nghal mai a, buaipui ngai lutuk a ka awm lo hi chhel ka in ti. Thil rapthlak tak tak ka tawng fo a, ka rilru a na ngun tawh a, chu chuan chhelna min pe ti ila ka sawi sual lo ang. 

"I ţap nasa a ni maw?" Ben-an a tih leh chuan, "Hriat i nei tiraw?" ka lo ti a, "Maithei" tih zawngin min chhang a, a tlan chak deuh avangin a kawngah ka kuah a, tlan chak hi chu an tih ţhan a ni a, khap mah ila awmzia a awm ngai lo. Ben-a hnunga ka bei reng lai chuan ka mittui bawk a tla leh a, a hriat hlau takin ka insut hraih a, ka biang ka tuai thuak hnuah rang zetin a kawngah bawk ka kuah leh a, a ţhiante, tun a kan tlan mekna te, engkim hi Tintin-a nen a kan sulhnu leh amah min hriatchhuah tir tu vek a ni a, aaaa...engkim hian min hnawh a, ka tawt up up reng a ni ber. Damdawiin kal lah ka sawi ri ngam der si lo.

"Vanram"

"Ummm" 

"Ka chik ţhin che a, i ţah ve tawh chuan i na hle tihna. A dik em?" a lo ti leh khauh a, "A dik maithei. Tupawh hi theihtawpin kan inti pachang ve ţhin a, mi hmuh a ţah kan duh lo a, mahnia khawl khawm thil tam tak kan nei ţheuh a, ţhiante takngial pawh hrilh ngam loh thuruk kan kawl vek. Mahniin kan tuar a, chinfel kan tum a, mahse, kan na tawpkhawk a nih chuan kan ţap ţhin. Tumah kan bang lo, rilru na hi taksa na aiin a rapthlak zawk an ti fo a, hlim deuh anga lang ţhinte pawh hi a ruk tak chuan rilru na tawpkhawk avangin an rum ve vawng vawng maithei, an ţap fo bawk ang. Mahse, a pawi hleinem tiraw? Mihring te hi lei hmanga siam leh din kan ni a, steel hmang a siam kan ni hleinem. A chang chuan kan ţah ve te a ngai a, mittui hmanga kan inpaih thawl ve te pawh a ngai alawm" ka ti mawlh mawlh a, keimah leh keimah ka in hnem chawp a ni ber. 

"I thil tawn mek te avang khan ţap la, tlukchhiat phah nan hmang suh. I mittui luang kha a kian hunah chuan inchhuang takin hawi chhuak la, hnehtu i nihna lantir rawh. Thinlung na meuh pawhin a tihchhiat zawh loh mihring chu tam tak awh rawn, ani chuan a paltlang tawh bik a an tih ţhin te hi an ni ţhin" a tih hnuah a nui chhuak hawk a, a taksa che chuan min nghawr dat mai. 

"Ka nu sawi tam ber ka hrilh chhawng che a nih chu. Ţap la, ţap bawrh bawrh la, i ban hunah meuh chuan a ti na tu che kha i kal pel mai mai thei tawh ang a ti ţhin. Na hian dam hun a nei a, hun a duh rei deuh a nih pawhin i dam dawn tih hre tawp rawh a ti ziah bawk. Ka tana a sawi a ni lo, a ţhiante hnena a sawi ka hre ve ţhin" tiin a intlawhkhalh nghal zung zung a, Tintin-a nen a inţhen hlen turah riak ka in ngaih phah a, ka lo la ngaihtuah hauh lo. Kan pahnih a inţhen hlen tur ang hian ka la indah chhin ngai lo. 

Ben-a min kalpuina chu Tintin-a nen a kan kal fo na a ni. Midang awm lohna lamah min ţhutpui a, sawi tur a hre mai lo chu ka lam lo hawiin nelawm deuh hian a nui a, Sawmtea angin a ţawngtam ve lem lova, Tintin-a ţhianpa a nih vang hrim hrim hian phawk deuh chang chu a nei ve tho. 

"Sawi duh i neih chuan sawi rawh Ben-a. Hetah hian ka awm reng hman lo a nia, ka rei lutuk chuan ka nu'n min lo hau ang" ka tih takah chuan, "Damdawiina kan kal ţumin miin thisen an lo test sup sup a" tiin bul a ţan a, a mitkhur thuk deuh dak chu chiang zetin ka lo en a, sawi nuam a ti chiah lo tih a lang reng mai.

"Fiamthuin test ve ang u, a thlawn te chuan a ţha alawm kan ti mai a, kan intlar ve a, kan thisen kan hip chhuah tir ve a" a ti leh a, "I ţah duh chuan heti hian ti rawh" a ti leh ta daih a, ka lukhum hma chu a kuai kun a, "Ka hmuh i duh loh takin" a ti sup a, a hmel pawh ka hmu thei tawh lo. 

"Hrilh che ka tum hauh lo. In inkar a inrawlh tumna ka nei lo bawk. Tlaia an in aţanga Sensiari nen a in rawn inzui chhuak kha hmu lo che ila chuan engmah ka hrilh lovang che. Mahse tlaiah khan ka hmu che a, i taksa ah khan eng thahrui mah a awm lo emaw tih tur a ni. Mitthi kal thei te pawh i ang" tih pahin a nui hawk a, "Sawmtea nen chuan kan fihlim. Tintin-a pawhin hlauhthawnna a nei lo. A hlauthawng lo ber zawk maithei. Mahse a result chu i hre tawh ah ka ngai i awmdan aţang khan" a ti leh a, min en liam vel mai mai zel emaw ka lo tia, min lo chik hle tak tak a nih dawn hi. 

"Thil dang vanga ţap te pawh ka ni thei a" ka tih leh chuan, "Ni lovang...Tintin-a chanchin hre lo la mitthi kal thei ang chiah i ni nang. I inhmu lo a nih kha, i dâng vek alawm. Khatiang khan ka la hmu ngai lo che" a ti a, a sawi dik lo hauh lo. Tintin-a natna mai bakah keimah thlenga nghawng thei thil a ni. Min ţhen bawk. 

"Keipawh ka tel ve thei a, natna in min lo luhchilh ve reng tawh thei. Ka taksa ah engmah a la langchhuak lo a, han dam loh te, rinhlelh awm thei thil keimahah engmah a la awm lo. Mahse, Tintin-a berin a kai chuan keipawhin ka kai ve thei. Chu chuan min ti hlau a, chhungril thlengin min ţham a, ka tha khur te hi a reh hleithei lo. Miin lo hre ta se min en dan a dang ang a, tam takin pawm thiam tawh viau mah ila pawm thiam ve lo pawh an la tam. Min en hrek hrek ang a, Tintin-a lahin tawrh dun aia inţhen a duh zawk miau avangin keimaha chung zawng zawng chu ka tawrh angai ang a, sawi sen pawh a ni lo. Nikhaw hre lo a ka tlu tawp lo te hi mak ka ti zawk" ka ti mawlh mawlh a, ka mangang lutuk chu ka phili chung ni maiin ka hria. 

"Ţhen lo tur che a kan tih kha. Result a hriat khan a pawm thiam lo a, i hming a lam nghal ti ila i awih kher lo maithei mah se a ni miau sia" a tih chuan lukhum hma chu ka nawr chho a, Ben-a chuan lainat hmel deuhin min lo en ran mai. 

"Kan in a kan inzui luh thlengin a rilru a mumal lo. 'Pathian, i awm tak tak a nih chuan Vanrami veng him ang che' he thu hi sawiin a phun sup sup reng a, a vei kual reng a, a result hriatpuitu nih kha thil nuam a ni lo" a tih lai chuan ka mittui a luang leh ngiai ngiai tawh a, "Khawi aţanga a kai nge a nih i rin? Hmeichhia a kawp kual ţhin em ni?" ţah aw ţuau a ka tih chuan lu min thin khum nghut pah hian, "Manuni hi hmeichhia amah hnaih lui ngam tu awm chhun a ni. Hmeichhe dang a kawm kan hre lo. Amah tak pawn engtia kai thei nge a nih a inhre lo" a ti a, keimah ang bawkin a beidawn hmel kher mai. 

"Ka hlau takzet..ka thisen hi ka test tir ve ngam kher angem ka hre lo. Ka rap a, ka ţih a, ka bula awm tur ber lah a inkhung bo a, a inkharkhip tlat tawh a, engkim hi a tawp vel vek. Hetiang reng a nih chuan ka thi thei mai ang Ben-a" mangang lutuk a ka tih chuan, "I thi lo ang. HIV hi thihpui ngei ngei theih natna an ti tawh ngai lo. Damdawi a awm a, a vei te nen hian kan inkalpel mai mai tawh tih hre ta che" vin lek lek a a tih chuan, "Natna chauh a ni lo. Ka rilru a na tel bawk a nih hi. Keimah chauhin engtin nge ka hmachhawn ang? Ngaihtuah chiang rawh, a rapthlak a sin" ka lo ti a, a thaw hawk a, "Ka pui ang che" a ti zui hap a. 

"Damdawiin ah ka hruai che ang a, Tintin-a inpeih hma chu ka pui ang che. A rilru tur hi nangpawn hriatthiam tum la, i kai ve a hlau a, Pathian a ti reng a, a tan pawh a dil lo. I kai ve loh nan a ni. Hetiang hi a ni reng dawn lo, a pangngai leh thuai ang. Chu hun chu nghak tawp rawh. A buaipui theih hma che chu keimah ka awm alawm. Min ring rawh, ka pui ang che" a ti nghat nghat a, "Min hlau lo em ni?" ka tih chuan a nuih a za viau mai. 

"Zirtirtu ve lai i nih kha, a hlauhawm lohna an sawi nasat tawh hi. Ka hlau lo che, Vanram" tih pahin ka kut a vuan ngat a, "He natna hi kai an tam tawh si. Ka lo en liam mai zel a, mahni chunga a tlak meuh chuan hlauin ka ip chawih chawih a nih hi. A hlauhawm lohna aiin a hlauhawm zia te hi in zirtir leh tawh ila HIV+ hi kan tlem sawt angem tih thlengin ka ngaihtuah tawh. Keichu ka lo kai ve a nih chuan ka rilru ringawt pawh hi ka thihpui hma viau maithei a ni" ka ti a, hrehawmna leh rilru natna ten a lo luhchilh hrep tawh chu ni lo ila tunah hian buaipui ngaiin ka awm tawh ang. Chuti khawp chuan ka hah a ni. 

"I thi lovang ka tih tawh kha. I lo kai ve palh a nih pawhin nunpui thiam dan in zir ang a, in thiam hunah chuan engkim a pangngaiin a kal leh tawh ang" a ti a, kan awmna hmun aţanga haw kan tum meuh chuan dar9 a lo ri der tawh. 

"Zu in mi ka duh lo ti pang pang tu khan nichin khan an pa zu in tur a laksak. Zu in mi rau rau ah pawh duh bik a nei tihna. Min duh lo ve hrim hrim tihna a ni mai" ti a Sawmtea ţawng lung lung chu ka hre pha a, Ben-a ang hian tun a kan thil tawn mek hi a ngaihven ve hmel lem loh. 

"A pasal hian e kei aiin zu a heh fe zawk. Intihhlum pawh tum se hmanraw dang a zawng lovang, zu chhia hmangin a intihlum ang. Chutiang khawp chuan zu a duh. Rui lo a thih tum lo chi a nia a neih. Keiin ka ngaihzawn ve lahin zu in mi ka duh lo a ti vel a, a pasal hian harhfim a rorelna hmachhawn a tum lo" tiin a au lung lung reng a, a ruih chilh leh pek a nih hmel. 

"I inpeih hunah min hrilh la, damdawiin ah chuan ka hruai ang che. Engmah hlau suh, i chhel em kha. Engpawh lo thleng se i hmachhawn thei dawn tih ka hria. Chuang rawh le" a ti dam thlup a, pi Dingi dawr thleng min thlah a, ka nu thil theihnghilh ka lak hnuah kan in lama ka kal chu min thlir zui a, ka liam dawn a ka hawilet pawhin a lo la awm. 

"Kal tawh rawh" ka tih chuan, "Ka sawi kha aw" tiin min rawn au a, a kut pakhata a awm a khawih chuan a sawi tum chu lo man thiamin ka bu nghat a, tlem chuan ka thla a muang deuh. 

Zing ka thawh veleh ka inbual a, school kal turin ka insiam nghal a, rilru na chung chunga nunphung pangngai zawh tho ngai si hi alawm hrehawm chu. Hei vang hi aniang mi tam tak kan inthup ţhin. Mi zawng zawng hmaa kan natna tih lan a nuam miau si lo a. 

In aţanga ka chhuah rualin horn pe ri ka hria a, chhak lam ka hawi vat a, Bena a lo ni reng mai. Min lo nuih var var pah hian, "Ka thlah ang che" a ti a, bike hnung chu thlek vutin zah hmel deuh hian a hmui a seh a, a zawn ka thlen rualin, "Ka ţhian i ni ve tho a, eng nge?" a lo ti nghal thawr mai. 

"Engmah ka sawi hleinem" ka tih chuan, "Tintin-a phalna thlapin ka thlah dawn che. Bus a chuan nuam i ti vak lo niin ka lo hria a" a ti leh ta daih a, bawr deuh a Daizaui rawn in ak chuan min melh no lo khawp mai. 

"Nangni pahnih chu khawiah nge in kal dawn a?" rinhlelh hmel deuh a min en chung hian a ti a, "Vanrami ka thlah dawn" Ben-an a lo tih chuan, "In lo inthlah nasa lutuk ange aw. Tunlai chu Tintin-a a reh daih a, Boomer-a boral khan hetiang chiah hian a awm a, rilru hahna a nei a ni chiang. Ben-a reng reng pawh hi in veng a hlat nen i lo va kal peih zawk ve. In in ngaizawng em ni a?" a ti khawl khawl a, min ti zak lek lek zawk alawm le. 

"Kal mai mai teh Daizau, i duh duh sawi ringawt zel suh. Tintin-a chu lo ngaihven ţha la aw" Bena nen a kan tlanchhuah hnu chuan ka hawi let a, Daizauin min lo thlir zui vang vang mai. Inhau reng ţhin mah se Tintin-a hi chu nuţa tak tak anga a a en a ni miau a ni. Boomer ang chiah khan. 

Beisei loh deuhin Tintin-a kan tawk a, ka ip chawih a, ka taksa a ţang nghal ţeuh bawk. Pindan chhung a thim em avang leh ka ţah reng vang te, mu leh mal ka neih loh lutuk avang te khan ka lo en chiang lo va, Ben-a bike hma lawka a din takah chuan a mit hnuai dum val kalh te, a mitkhur thuk dak mai te leh a hmai cher deuh te chu ka hmu thei a, chem hriat taka vih zawt ang mai ka ni. 

"Dawr ah ka lo awm ang" Ben-an a tih chuan tawi tein a nui a, chutah kei chu hriatthiam harsa zetin min melh a, a mitah chuan engmah ka chhiar thei lo. Ka haw viau emaw ka ti dawn a, a hmel ka hmuh takah chuan ka huat loh zia ka hria a, tun a a landan tak phei chu a khawngaihthlak lutuk ringawt. Keimah ang chiahin a mu tlem ve tho tih a hriat theih. 

"Kal tawh ru" tih chiah a sawi ve a, min en leh vang vang hnuah min tlan pel hmasa zawkah a ţang leh a, a tlan liam chiah chu Bena kawr ka lo ţham nasat zia ka hrechhuak chiah. 

"Tikhan a zia chho mai ang...nilengin pindanah a inkhung a, hmasawnna a awm lo. Dawr a kal turin ka ti lui a nih kha. In zia chho leh mai ang" tiin min hnem ve mawlh mawlh a, school ah pawh a der hlirin ka nui a, tuman natna thuk tak ka nei tih an hrethiam lo. 

Hunawl ka neih apiangin ka in ngaihtuah a, ka tih vat loh chuan keima tan a pawi zawk thei tih hriain Bena ka be ta nge nge a, "School kal loh niah min tih pui rawh. Ka inpeih hauh lo nain ka tan a ţhat zawkna turin" ka ti a, a lo inhuam khawp mai. Engpawh thleng se pawm thiam ka zir a ngai dawn a, hei tak hi a ni harsa ţhin chu. Kan chunga thil thleng, a hlimawm lam ni lo hi chu tupawn pawm thiam harsa kan ti ţhin. Ka bialpa ber natnain a luhchilh tawh a, a nih nih kan ni tawh mai aniang chu. 

CONT....