BLACK AND WHITE-11

BLACK AND WHITE-11

(HIV chungchang hi doctor ka zawt a, chuti chung chuan tih dik loh ka nei maithei. Zir chian loh chuan hriat a har ve a, tih dik loh ka lo nei palh a nih pawhin min hrethiam dawn nia. A/N)

Result nghakin Bena nen kan ţhu ve ran a, ka zam lutuk chuan ka kut ţang ka khal neuh neuh a, kan in en fuh apiangin min thlamuan nan ni awm takin tawi tein min lo nuih ţhin a, kei ang bawkin a zam ve tih ka hai lo. 

"Ka chau" hmui phun a ka tih chuan, "Hnunglam kha ngheng rawh, hahdam deuhin ţhu la i zia mai ang" min ti a, midang tlem te awm ve te chuan rilru hah hmel pawh an pu ve lo. Kei erawh ka hlauin ka zam takzet a ni. 

"Tunlai chu ka chau thei lutuk hrim hrim. Ka ni deuh nghulh zel. Ka thil tawn avang hian chaw ka ei thei bawk si lo. Khawi aţanga kai nge a nih tih mawlh mai hian rilru a luah a" ka ti leh a, a nundan ngaihtuah chuan he natnain a luhchilh hi awm ti tawk an awm tho ang. Mahse, hmeichhia a kawm tam lo a, chu chu a ţhiante ngei pawh hian an hrechiang. A inthlahdah ve vak lo a, a ruihin a rui tawp a, a biak awmchhun chu keimah chauh ka ni ţhin. Aizawl a kan awm lai khan min lerhsan ve zawk tih loh chu hmeichhia vanga buai kan nei mang lo. 

"Ka hre lo le..amah pawn a hre lo" a lo ti ban charh a, hlauthawng deuhin awm ve tho mah ila keimah indahţhain, "Han puh tur pawh in hre miah lo amaw?" ka ti hram a, lu a thing a, beidawnna ti zual tu mai a ni.

"A hahthlak a ni" tih hap pahin ka hnunglam bang chu ka lu in ka tauh dat a, mit ka chhing zui nghal zat bawk. 

"Thil reng reng hi a chhia emaw, a ţha pawh ni se kan tawrh ve theih, kan chan ve tur vek a nia" Benan a tih pawh chuan ka chhang tawh lo. Engkim hi kan ta vek a ni tih chu ka pawm teh meuh mai, mah se natna rapthlak lutuk ni a kan ngaihin ka bialpa a luhchilh meuh chuan ka tliak hnawp a ni ber. Ni tam tak hnu, ka inpeih hnuah ti hian ka thisen ka endik tir veleh chu a ni a, kai tur saah ka in ngai. Mahse, ka zep lo, ka hlau a ni. HIV berkher hi chu ka chan ve turah ka dah ngai lo. 

"Pathian pawi ka sawi awm ka hre si lo a" ka ti chhuak sap a, Bena chu ka hrilh hranpa pawh a ni lo, keimah leh keimah ka inbia a ni ber. Inkhawm ka ţhulh ngai mang lova, ka pawi an sawi nasa viau a nih loh chuan tumah ka haw ngai bar lo. Tintin-a nen a kan khawsak ţhin dan chu a dik lo tih ka hria, mah se kan chunga thil thleng mek hi kan phu bik lo. Kan inkawp mawl ve tawp a, hetiang thil hi vawikhatmah kan dil ngai bik lo a sin. 

"Vani...i harh em Vanram?" Bena min ko ri chu ka hre ruai ruai a, ka lo muhil lehpek a ni ngei ang. Muangchangin ka mit ka meng riai riai a, chawhnu lam dar 2 a lo pel tawh. Tunlai chu ka zawi a, ka chau nghulh reng mai a ni. Ka thil tawn hi a zo zai ve tawh em a, ka ke hmanga ka la kal thei te hi mak ka ti zawk. 

"Ka lo mutthlu aniang. Min ko tawh em ni?" ka tih chuan lu a thing a, "I taksa a chak lo sia, ka ngaih a ţha lo a" inthlahrun hmel tak hian a lo ti a, "Kai reng chung hian a negative theih tho tiraw? Ka kai na lo la rei lo ta se kai miah lo angin ka lang thei em?" ka ti leh a, ka zam luatah ka kut phah chu ka nuai tawk tawk a, ka mangang tawh takzet a ni. 

"Hiv kai aţanga thisen a test a positive test a lan chhuah hi kar hnih aţanga thla thum inkar ani. Rilru nawm loh phah nan hmang lo la, Tintin-a aţanga i kai a nih chuan a lang chhuak thei tawh ang" a ti a, min hnem lo ve khawp mai. 

Ka result ka hriat ve meuh chuan ka ţhutna aţangin ka tla tawp lo chauh a ni. Tintin-a natna ka hriatchhuah ţum ai pawh khan min ţhawng nasa daih awm e. Ka hmangaih a, HIV positive a ni ve ta mai khan min deng na takzet. Amaherawhchu, mahni in hmangaihna hi a nasa aniang, ka result chuan min deng na zual bik tih hi zep kher ţulin ka hre lo. 

Result ka hriat hmaa ka thu ngaihthlak te khan keimahah awmzia an nei lova, result ka hriat hnuah pawh a hmui phun chu ka hmu thei ruai ruai, a thusawi erawh ka bengah hian a lut mang lo. Damdawi nen a in enkawl zui reng ka ngai tawh dawn a, engtik aţangin damdawi ka ei ţan dawn tih erawh engmah ka hre lo. Engmah tak tak ka hre lo a nih ber chu. 

In ka thlen meuh chuan ka zawi chhe hneh viau tawh. Ka nu hlau chung chungin Ben-an min zui lut a, "Khawiah nge i kal bo vang vang?" a lo ti bak hlak mai. Bena a tel ve vang te pawh aniang. 

"Ka chhuak lawk a nih kha. Bena ţhu rawh, thingpui te kan in dawn a nia" ka ti mawi ve a, damdawiin a kan awm chhung khan engmah kan ei lo tih ka hrechhuak chiah.

"Aw le" a lo ti ve mai a, inthlak hmasa lovin ka ţhu ve rih a, pangngai hmel taka lan a ngai ţhin hi a buaithlak lai chu a ni. Chhungril lam a nat lutuk chuan nuih luih ringawt pawh a harsa tih te ka hrechhuak thar a, ka result kha rilruah a awm ran reng a, mi pangngai ni ve tawh lo a inhriatna ka nei a, ngaihtuahna mumal pawh ka pu thei lo. 

"I thingpui chhuan kha en ta che..a hmaah i ding reng a, eng nge i ngaihtuah a?" vin zet a tih pahin ka nauin min nam sawn dawrh a, thingpuife ka thlak leh thlak loh pawh ka hre lo. Mahse, ka nau bawk chuan, "Thingpuife i thlak lawk sa em ni? A liam nasa lutuk. Maksak deuh deuh hian awm tawh lo teh" min ti a, thingpui bel chu silhmunah la pheiin tui a khawh tir rawk rawk a, "Tlem ka tih belh loh chuan kan indaih lo ting tang ang. Kal sawn mai teh" tih leh min nam sawn a rual a, inpui lamah bawk chuan ka phei leh a, Bena pawh zum dakin a lo la ţhu ve reng mai. 

"Tunlai hi i â hi he ka ti" rinhlelh hmel deuhin ka nu chuan min melh a, "I cher ropui mai bawk si. I damlo em ni a?" a tih zawm leh a, fate an cher kawk kawk chuan tu nu mah an ngaih a ţha thei lo ang. 

"Ngaihtuah ka ngah ve em alawm" ka tih chuan, "Ve lutuk che hian, school ah naupang i zirtir a, in lamah lah tunah chuan hahdam deuhin kan awm tir tawh che a, khatiang hmel pu tur khawp khan eng dang nge i ngaihtuah?" a lo ti a, ngawih san mai ţha zawk a ka hriat laiin Mary zawkin, "Hau nghal vak vak zel lo la, harsatna a neih pawh a a hrilh ngamna turin awm zawk ta che. In vin khur khur reng hlawm a, inchhung boruak hi a hrehawm lutuk, ka ning" a ti hlak hlak a, thingpuite chu ka in tui lo. A thlum tih chiah ka hria a, a rim takngial pawh ka hre thei lo. 

"Doctor pan i ngai a nih kha. Anxiety emaw depression te hi i nei aniang, nge nau i pai zawk?" a tih rualin ka nu chu phawk deuhin ka en a, rei pawh en ngam lovin Bena ka en leh a, ani pawh a hawi phawk khawp mai. Tunah ka result ka hre chauh a, nau pai thei chi zia zang ka ni lo hrim hrim. 

"I ngaih a ţha lo mai mai a nih kha" pangngai thei ang ber hian ka ti a, ka ngaihtuah let ngial a, tun dinhmunah tak chuan thui deuhin engmah ka ngaihtuah thei lo. 

Ben-a haw tum chu ka zui chhuak a, pawnah kan ding dun ran a, a lo len rei deuh avangin khua a thim lek lek tawh. Khaw thim leh ka nun hi a inhmeh ta berin ka hria. 

"Thlamuang deuhin awm rawh. HIV positive te hi an thi kher ngai lo. Damdawi ei ţhat chuan mi pangngai ang chiahin nun a hman theih. Thil ţha lo lam ngaihtuah lo la, Tintin-a pawh chanchin ka lo hrilh ang" a tih chuan, "A ngai rih lo" ka lo ti vat a, bangbo zet a min en chuan, "Ţul ka tih hunah keiman ka hrilh mai ang" ka ti a, kan ngawi zui rauh rauh a. 

"Tintin-a nen a kan nun hian rawng a nei ve lo. Eng rawng mah a pawl pha lo. Mi chu an hlim a, an nun hian rawng mawi deuh a chhuah a, an êng bik riau ten ka hre tawh. Keini chu kan chul rup a, black and white, a dum leh var paw phuk ang chauh a lang, mawina nei ve lo leh rawng dang ten a pawlh ve loh kan ang ber" tiin kan ngawih reng hnuah ka phun sap sap a, hahdam tumin kan in bang chu ka ngheng a, ka hahdam awm pawh ka hre chuang lo. 

"Chutiang zawng chuan ngaihtuah suh. Hmangaihna a tel chuan a chul rup reng lo ang. Rilru siam nan hmang zawk rawh. Black and white hi i nun nen tehkhin lo la, hmasawn nan hmang rawh. A dum leh a var hi a chhia leh a ţha, a dik leh dik lo tehkhin nan hmang zawk la, in result in hre ve ve tawh a, natnain a luhchilh ve ve tawh che u. Puanzar pahnih awm ta se, a dum leh a var ni bawk se, a dum lamah nge a var lamah in kal zel dawn ngaihtuah zawk la, nang chuan i la ngaihtuah thleng pha lo maithei, i rilru a buai em a ka dem lo che. Mahse, i nu sawi anga nau i lo pai tak tak a nih phei chuan, i fa kha khawi lam zawkah nge i kal pui ang? Amah a a kal theih hunah khawi lam nge i pan tir ang, kawng dik lamah nge dik lo lamah? A dum leh a var hi i nun nen i tehkhin dawn rau rau a nih chuan ka sawi ang hian tehkhin zawk rawh. Tintin-a angin tawm bo daih lo la, engkim hrechiang la, nau i lo pai tak tak a nih chuan naute thlenga a nghawng hmain in enkawl ang che. Nau pai chuan fimkhur a ngai lehzual an tih kha. I ven nghal loh chuan a pawi thui thei ang. Nau pai lai, nau neih lai leh hnute pek ten an kai ve thei an tih kha" a ti ve duah a, a sawi dik vek. Ka chet zung zung a ngai a, chutiang a nih rual chuan nau pai tur ang chuan ka la indah chhin duh chuang lo. 

"Ka kalsan dawn che aw..mamawh i neih chuan lo sawi la, Tintin-a pawh i be vat dawn nia. Ani pawn damdawi a ei a, a pawm thiam thuai ang" tiin min hnem a, ka dar a hmer vang vang hnuah min ngaihtuah hmel tak chungin min kalsan a, inchhungah ka lut nghal peih lo chu ka dinna ngaiah ka ding zui reng a, mi tam tak tan hian khawvel hi a fair lo a, chung ho zingah chuan keipawh ka tel ve. Ka kum a la tam bik lo a, ţhalai ka nih angin intihlim rual, vanglai chen rual lek ka la ni. Ka natna tawrh tawh zawng zawng hi a tam tawh em a, ziah chhuah sen pawh a ni kher lo ang. Pathian han dem dawn ila a tello a ka awm theih loh zia ka hrechiang tho si. 

"Vani, i mu tawh em?" phone aţanga Sensiari aw ka hriat rualin sana ka en a, dar 12 a hnai thuak tawh. Ka la muhil miah lo bawk. 

"Ka mu tawh a, ka la muhil chiah lo" ka tih chuan, "Tintin-a a lokal em?" mangang aw deuh hian a ti a, keipawh ka hlauthawng nghal.

"Kal lo...vawiinah kan inbe lo hrim hrim" ka tih rualin, "Khawimaw phone kha han la teh" tih ri ka hre zui nghal a, a rik rawk rawk hnuah Nu Ruati aw ngei maiin, "A ţhianten an hmu bawk si lo a, khawiah nge a kal ang le? A lokal lo tak tak maw?" min rinhlelh hmel taka a tih chuan, "Kal lo...hmuh pawh kan inhmu lo" ka lo ti a, thil dang chu ka zawt ngam lo. 

"Tlangval a nia, leng bo ngai lo pawh a ni lo a, mahse vawiinah a pindan ka ti fel a" tih zawng a sawi, a ngawi zui daih a, nu Ruati meuh pawhin sawi tur a hriat loh chuan eng emaw hriat an nei tihna a ni mai. Tintin-a a nih chhung chu a fimkhur seng dawn lo. Mipa dang ai mahin a che pawlawh zawk. 

"Vani, naktukah eng nge i tih dawn? Inrinni a ni tho a, ka lo leng ang aw. In ah i awm ang tiraw?" Sensiari zawkin a rawn tih chuan, "Aw... awm ang" tiin ban charhin ka lo chhang a, "Ka lo leng dawn nia. Tintin-a pawh a lo haw hunah ka lo hrilh ang che. Muttui aw" tih leh phone dah a rual a, ngawi rengin ka ţhu hle hle ringawt. Ka rilru a la harh thei meuh lo. 

Khawvar rualin ka harh a, darkar tam ka mut pawh ka ring lo. 'A lo haw tawh aw..ngaihtuah suh' ti a Sensiari chanchin min lo hrilh na pawh hmuh tur a awm a, ka chhang let lo. 

Chaw ei kham rualin ka nu'n, "Kuhva zu lei rawh" a ti leh tawh a, in a ka awm chuan mahni a hun hman ka nei ngai mang lo. Ka naute an awm ţhup pawn a tirh kual ber ka ni tho. 

Beisei loh deuhin Pi Dingi dawrah Tintin-a a lo ţhu a, kan inhmuh lohna a la rei loh nen ka hmu cher lutuk chuan lung a ti awi lo. Min melh zawk a, hnuai lam a melh nghal daih a, min biak tum hmel a pu lo kher mai. Kuhva ka lak hnuah pawisa ka pe a, a bulah ka ţhu lui ngat a, ka pawisa duh tawh bik lo, amah ang chiah ka ni ve tawh tho alawm. 

"Kan awmdan hian awmzia a nei lo, i hria tiraw?" ti a zawh paha a lam ka haw chuan en pawh min en lo hian, "Damdawiinah eng nge i tih?" a lo ti a, Bena mai mai chu a. 

"Engtin nge ka kal tih i hriat?" ka tih leh takah chuan min en ve ta nge nge alawm. 

"Daizauin a hmu che u. Bena nen in kal. Sawi rawh, eng nge i tih?" lungawi loh hmel zet hian a ti nghut nghut a, "Ka kal a ni mai" ti a ka chhang phei chu a meng dur khap mai. 

"Dawr a inhauh i duh loh chuan ţha deuh a ka zawh lai che hian sawi rawh. Damdawiinah eng nge i tih?" a ti nawn leh a, hrechiang viau lo ila chuan a thinchhe lutuk chu ka hlau ngei ngei ang. 

"Daizaui chu a va vak zau ve. I tih ang chiah kha ka ti ve, i nih ang chiah kha ka ni ve bawk" tih leh thawh ka rual a, "Hetah chuan ka sawi tam lo ang. Min hmuh duh hunah min hrilh dawn nia" ka ti a, min thlir zui reng tih hre ru reng chungin ka kalsan a, ti khawp khan ka ngen nasa a, inţhen a ti lui a, tikhan ka chanchin a hria a, harsa deuh a ka hrilh a ngaih ka rin laiin awlsam deuhin ka sawi a, kha kha a tawk. Tuna kan awmdan hi a dik ber lo tih ka hrilh hriat kha a tawk chiah bawk. Min ngaihtuah tak tak a nih chuan amah zawkin min rawn pan tawh mai ang. Inţhen duh tu zawk chuan siamţhat hna a thawk turah ka ngai. 

"Vanram" ka ding dat a, min rawn umzui ngei alawm. Muangchangin ka inher a, min hnaih ngam lo aniang min din hlat emai. 

"Ka hman rih lo, keipawh ka mumal bik lo" tih pahin ka hawikual zuai a, tumah ka hmuh tak lohah chuan, "Ka inrin sa avang chauh a ka ke a ding thei leh kal thei ka nih hi. Inring lawk sa lovin hria ila chu tunah hian hmuh tur ka awm kher lovang. Chuti chung chuan nangmah ang thoin ka rilru a buai a, thil dang ka ngaihtuah thei lo. Ka ngaihtuahna hi thlur khat chauhin a kal rih a, pangngai deuh a kan sawi dun theih hunah kan inhmu dawn nia. Ka nu a awm, min zui rih suh" ka tih zawm leh a, a rilru na hmel chu chiang takin ka hmu thei a, a beidawng ve ngawih ngawih tho tih pawh ka hria. He natnain min chiahpiah hneh tawh lutuk hi chu ka hne ngawt mai. Ţhalaite ah hian a hluar lehzual emaw tih tur a ni. Kan hlau tawh lo lutuk a, kan pung thur thur chu a nih hi. Ka lo en liam a, ka ngaithla liam mai zel a, mahni ngei min den ve meuh chuan awm ngaihna awm lo khawpin rilru a ti buai a, taksa thlengin a ti chau vek thei chu a nih hi. 

"Nang chu a ngai ve lo ka tih kha" a ti zuai ruih a, ka lamah a kut a rawn phar a, rang lutuk hian a la let leh a, "A ngai ve lo ti eng ang mah la awmzia a awm tawh lo. A pawi tur ang chu a pawi vek tawh" ka tih lai chuan a insehruh a, a beidawng hmel kha thinrimna in a thlak thleng a, a rilru nat zia erawh a thup thei ngang bik lo a ni. 

"Nang lehzel..a va ţullo ve" a thaw chhuak zui hawk a, ka mittui a hnai leh uar tawh. Khawlai a kan mualpho hma a kal mai a ţha zawkin ka hria a, "A tlai tawh...a pawi vek tawh. Tun aţang chuan kan dam chhungin HIV+ kan ni tawh ang. A nih phawt le, i inpeih hunah min lo be dawn nia. Chumi hma chu ka rawn be lo ang che" ka ti a, ka thusawi hre phak tur awm ang an awm leh awm loh enin ka hawi kual leh thuak a, a la reh tlawk tlawk avang chuan ngaihţha deuhin Tintin-a chu ka kalsan a, ka chhungril ipik lutuk chuan min uai rit nulh thung.

"Vani, thla hmasa i period em?" ka nu'n a lo ti lehpek a, ka ngaihtuah vang vang hnuah lu ka thing a, ka nu ai mahin ka hlauthawng zawk awm e. 

"Hmeichhia chuan period mumal loh chang kan ngah alawm" ka ti ve tak nain Ben-a thusawi kha ka hrechhuak uar uar mai. A va mak zo zai tak aw...ka dil chhuah ni miah lo vanduaina hian min duh bik emaw tih mai tur a ni. Min ei zo lek lek tawh chu a nih ber hi. 

"I danglam ka ti reng a ni. Nitin deuhthaw ka sawi a, i nin khawpin ka hau che a, i vanglai i hmang ţan mek chauh a ni a, nau i pai a nih hlauh chuan nangmah hi i inchhir ber ang. I nu ka ni a, i danglamna hi ka hai lo. Ka thusawi zawng zawng te, ka zilh ţhinna che te khan awmzia a nei lo tihna a ni mai. Keini chuan engmah kan sawi ve tawh dawn lo. Puitling tawhah i in ngai a, i thu i duh bawk a, i duh duhin ti rawh. Ţha i tih dan danin nung rawh" a ti bawrh bawrh a, ţhutthleng bulah ka ding a, a nghenchhan tlang chu ka zut ka zut a, tun ang reng a thih chak lai hi ka la nei ngai lo. Chhel viau mah ila ka tuar zo lo lek lek tawh chu a nih hi.

Thih hi hahdamna a nih takzet chuan...chu chu ka thlahlel ber mai. Khawvel hi chu a hrehawm em a, ka hahdam chak tawh a ni. 

Sensiari lokal pawh nidang angin ka lo ngaihven ţha peih lo, khumah kan ţhu dun a, a mit a sen râm a, zawh ngai lovin a awmdanah engkim ka hre vek. Tintin-a nen hi chuan an unauah rau rau pawh an inpawh bik em a, keipawh ka unaute hi HIV+ lo ni ta se ka ţap ve tho ang. Hriatchian mang hlei loh ten an kai chu kan en liam thei zel, mahse keimahni mai bakah kan hmangaih tak te chunga a tlak ve meuh chuan tuman kan tuar thiam ngai lo. 

"Tintin-a chanchin i hre tawh em?" a tih chuan ka lo bu nghat a, "A mak i ti ve em? Tukin ah a nin khawpin ka zawt a, in aţangin a chhuak daih a, puh tur ber a hre si lo. A nih leh nang ve hi? Nang chu i ţha tiraw?" lungchhe deuh hian a ti a, inzepin awmzia a nei tawh lo. Mahni chauh a tawrh ai chuan a zia deuh ang chu. Lu ka thin rual deuhthaw in min rawn ţhut hnaih a, tunah chuan ka natna chauh lo pawh buaipui tur dang ka nei leh tawh. Ka nu thu ka lo zawm lo kha aw ka ti rilru vawng vawng a, puitling viau tawhah in ngai mah ila kan thu a kal ai chuan keini aia tawn hriat ngah tawh nu te thu zawm hi a lo ţha nge nge zel tih ka hriat phah nasa khawp mai. Ka putea vanga ka buaina tih loh, ka buaina dang zawng zawng hi chu ka thu awih loh rah vek a ni. 

"Kan hriat hma khan i hre daih tawh tihna mi? Nangpawh i fihlim lo maw?" mak tih hmel taka a tih leh chuan lu ka bu leh ringawt a, inchhirna hlirin ka khat a, awmzia a awm tawh der si lo. 

"Eng nge in awmzia hi? Khawi aţanga in ţan nge ni a? Engtinmah in awm lo mi? Awii..engtin nge in ţhut mai mai theih a? Ka rap lutuk hi sawi ngaihna pawh ka hre lo" a ti deuh chul a, "Ka rap lo bik lo...nang aiin ka rap zawk daih ang. Tih vak ngaihna a awm tawh lo a nih hi. Ngaihtuah chiang lova nawmchen rah a nih hi. Keini chauh ni lo mi tam tak hian fimkhur nachang an hre lo, kan la kai phawk phawk ang" ram hmak a ka tih chuan min lo en ran a, ţawng tumin a ang leh zuau ţhin a, sawi tur a haihchham ve tho a nih hmel. 

"Engtin nge a nih theih le? Khawi aţanga in kai nge ni ang a?" mangang zet hian a ti a, a ţhu bet hleithei lo a ni ber. 

"Ka hre lo" tih bakin chhan ngaihna ka hre lo. Ka putea han puh dawn ila thil ni thei a ni lo. Ka putea aţang chuan kai ila hman hmanah a langchhuak tawh ang. Amah lahin insawiselna pakhatmah a nei lova, kan in a a lokal ţum pawn naupang zawk zawk tawh lo mah ila thisen ka pe tiin intithei deuhin a la sawi a, ka putea aţang chuan a ni thei lo hrim hrim. Chumai bakah thla hmasa ka period lo lehzel a, chu chuan min ti buai tel bawk. Chhungte thu aia ka thu ka ngaihpawimawh a ka dah lal zawk vang a nih tawh ber hi. Ti hian ka rum tlawk tlawk tawh mai aniang chu. 

"Tintin-a lahin ka hre lo tih chiahin min chhang zel bawk si. Hmeichhe dang lakah ka fihlim a ti bawk si. A inchiu ngai bawk si lo, zu in aţangin a kai theih awm ka hre bawk si lo. Ti hian damchhungin damdawi in ei a ngai tawh ang a, in thlah vaih chuan in chhe nghal rawk rawk ang a, a hlauhawm loh kan tih fo rual hian a hlauhawm a sin. Pawngpaw zuam ngawt chi a ni lo. Ka rilru in ti hah emai" a tih lai chuan a banrekah ka lo hmer sawk a, phawk hra a min en chuan, "Engkim i hre vek tawh a, min pui rawh aw. Ben-a hian a hre bawk a, mah se i bulah hian ka thla a muang zawk ang" tiin ka lo ngen a, sawi buai lovin a remti nghal mai. Engkim ka sawi ta vek a, hrehawm a tih zia hai rual a ni lo. 

A ngaihthlak zawh vek hnuah "Ka pui ang che" a ti a, ka thaw hak ringawt a, ka ţhianţhaber a awm chung hian ka rilru hahna a kiam thei chuang lo. Ka inchhir lutuk tih mai loh chu sawi tur pawh ka hre tawh lo. 

Tintin-a chuan min be leh ta chuang lo a, min hmuh a la inpeih lo ah ka ngai. Ka rilru thawven hun pawh nghak lovin Sensiari chuan engkim min tih pui a, ka nu'n a ring sual lo, nau chu ka pai ngei alawm. Ka hre chiah chu thinur nain ka khat a, paih nghal mai ka duh rum rum. Ka vanduai zia ka ngaihtuah a, khawvel hrehawm zia zawng zawng nen. Ka chenna khawvel hi ka fa chenna tur atan ka duh ve lo. Ka tliak hnawp a, ka tlu sawp nuaih a, vawikhat pawh ka ţawngţai lo. Vanduaina hlirin min bawm bik a, ţawngţai châkna ka nei hlawl lo a ni. 

Doctor min pan pui a, ka chhungte ka hrilh ngam bawk si lo. A rukin school ka chawl a, Sensiarin engkim min tih pui vek. Nu Ruati pawh a ţawngthei viau nain a fapa a tel ve miau a, min buaipui a, chanchin sawi turin ţhenawmte inah vawikhatmah a lut lo. Counsellor hnenah min kal pui a, thu ţha leh zawm tur tam tak min lo hrilh ţhin a, chutianga thla khat meuh min buaipui hnu chuan keichu ka zia viau tawh. Nau ka pai avang khan mu leh mal ka nei lo reng a, Tintin-a biak chakna pawh ka nei lo hial a ni. Damdawi lak reng kan ngai tawh dawn a, nu Ruati phei chuan, "Nau i pai rau rau chuan innei mai rawh u" tih thlengin a sawi kai tawh. Keichu ka la inzep ţang ţang a, ka nu ngaihţhat nan ka period der a, rinhlelh hmel deuhin min en ţhin mah se engmah ka sawi ngam lo. 

"A hahthlak a ni" Sensiari hmazawnah ka ţhu a, damdawi ka ei tirh khan ka zo lo deuh a, tunah chuan a zia tawh viau. Dawr kawngka khar turin a tho leh rih a, rawn ţhut leh pahin tui in tur min pe a, min lainat tih ka hria, a sawi lo mai mai a ni. 

"Nang chu i zia tawh em hi. Tintin-a hian a pawm thiam lo zawk a, ani aiin i chhel daih zawk, i puitling zawk bawk. Mipa hi chu an puitling har a, bakah nang lehzelin i lo kai ve hi a pawm theih loh chhan a ni pakhat a, amah a indem a, a inthiam lo a, a duh loh vang che a inla hrang a ni pawn ka hre lo" a ti dap dap a, "Ka hrethiam alawm. Ngaih viau chang nei mah ila inbiak rih loh hi a pawi chuang lo. Naute chungchang hi chu lo zep tlat ula, a pai tu ngei pawh min ti beidawng zual tu a nih chuan Tintin-a phei chu inthiam lohna a neih tir nasa lehzual ang a, kan natna hi pawm thiam phawt rawh se. Hun a mamawh a nih hi" ka ti a, ka chhungte phei chuan hria se kan buai leh nasa viau ang le. 

Ka ngaihtuahna hria ni awm takin, "I chhungte hi engtikah nge i hrilh dawn?" a ti khauh a, "Ka hre lo le...thu lawmawm a ni lo a, hrilh a huphurhawm. Lo fimkhur ila chu hetiang buaina hi ka tawk awm tawp si lova, inchhirin awmzia a nei bawk si lo. Kohhranin min phuar ang a, mi te hriat ve lohin natna ka pai reng bawk ang a, fimkhur hmasa ila chuan ka pumpelh thei ni mai tur" ka ti chuai raih a, ka hmai ka tuai puat a, a hrehawm tih thumal hian ka awm mek dan hi a hrilhfiah thei ber ang. 

"Khatiang zawng khan ţawng tawh suh. A nih tur ang a ni vek tawh a, inchhir a kun tlawk tlawk ai chuan hmalam pan a ţha. I chhungte bulah pawh zep duh tawh suh, a langchhuak vat dawn a, i dul kha nakinah chuan eng thawmhnaw mahin a hliah bo zo lo ang a, an hre dawn tho tho. Chu ai chuan tunah hrilh la, a ţul leh ngaihdam dil la. An hmangaih che a, lam ţang i neih belh leh dawn tihna a ni mai. I zia hawk zawk maithei a sin" tiin min fuih a, ka nu hmel ka mitthla a, ka huaisenna hian a tlin thlawt lo. 

"Aaa...innei mai teh u" ka ngawih reng avang chuan a ti leh a, "Tintin-a hi zia deuh se innei ve tawp mai rawh u. Dawr a nei a, nangin hna i nei bawk a, in buai bik lo ang. Keini pawh kan awm a, kan chhungkuain kan hre vek tawh bawk a, innei vat ula a ţha ber ang" a tih chuan, "Chupawh nise ka chhungte hrilh tho an ngai alawm" ka lo ti vat a, Sensiarin min chhan leh hmain Tintin-a a rawn lut hlawl mai. 

"Inah i awm reng emaw tia, khaw nge i kal dawn?" a lo ti hu a, "Tak tak a ni em?" tiin keimah zawk min en daih thung. 

"Eng tak tak maw? Khaw nge kal i tum? Ka pa'n inah awm rawh a tih che kha. Khatiang ber bur kha chuan chhuak rih lo mahla a pawi lo a sin" Sensiarin a tih leh chuan, "Lo ngawi teh" a ti hluk a, keimah bawk chu min lo en lehin, "Tak tak a ni em?" a ti leh a, "Engmaw?" ka ti tham ţiak a, a hmel a dik bawk si lo, a mitmeng te chu a phelh phung a, a sam a pawr bawk si, a landan chuan min ti zam a ni. 

"Ka nu'n a sawi..i rai a mi?" vin lek lek a a tih chuan chil lem khalh pah hian ka bu nghat a, ka bula ţhutna awlah a rawn ţhu hnawk mai. Kan hmaa dawhkanah chuan a kiu nghatin a chal a dawm a, a sam a ţham bet tlat bawk. 

"Tintin, in ngaihtuah harh tawh rawh. Hrehawm tuar nasa zawk Vani pawh a chhel em hi. Nangmah zawk hi khur ah i tang tlat a, a thim lam i pan tlat a, a eng lam pan tawh ta che. Tunah phei chuan naute a tel ve tawh hi. Harh la, mipa i nih angin i tih tur chu ti rawh" Sensiari zawkin a lo ti leh a, keichu ka ngawi tlat a, engmah ka sawi thei lo, Tintin-a hrehawm ti lutuk chu ka en tlawk tlawk a, ka kha a chih tlat. 

"Damdawi i ei em?" a ti zawi sup a, ka lam a lo hawi a, a chauh hmelin a mitmeng te chu a ngui riai a, a meng khup lap mai. 

"Ka ei char char" tih chiahin ka chhang a, ipik hmel zet hian a thaw chhuak hawk a, kan sawi dun theihna hun ţha niin a hria aniang Sensiari a chhuak nalh bawk. Kawngkhar a inkhar rual chuan ka kut a chelh a, a lum nghal vang vang a, min thlah miah suh ti ţhin tu zawk khan hetianga min chelh lohna hi a rei tawh khawp mai. 

"Min ngaidam rawh" a ti zuai ruih a, lu thin pahin ka kut a vawn loh lam zawk chuan a biangah ka dawm a, ka kutzungpui ka tih chet rual chuan a mit a chhing a, a thaw zui ham ham a, "Pawm thiam zir rawh" ka tih rual chuan a meng a, ka mit ah tak min en a, ani hi haw tur chu ka ni, ka haw thei miah lo hi mak ka inti a, nep ka inti bawk. Mahse, haw ngawih ngawih mah ila awmzia a awm tawh chuang bawk si lo, kan nun hi a chul rup reng a ni ber mai. 

"Ka tihpalh...ngaihtuahna mumal ka nei lo. Pathian ka dem ka inhaw bawk. Keimah hi ka inhua" mumal lo zet hian a ti nawk nawk a, "Thudik sawi hunlai tak a nih hi. Kei lo hmeichhe dang mutpui i nei em? I neih chuan sawi rawh, hriat ka duh takzet. Tun a thudik i sawi chuan ka ngaidam vek ang che. Khawngaihtakin thudik min hrilh rawh" ngenngawl zet a ka tih takah chuan zep ţul a ti tawh lo aniang, "Madiki" a ti sup a, ka mitah pawh en ngam lovin hnuai lam a bih zui daih bawk. 

"Engtikah?" ka tih leh chuan a hma aia zawi mah hian, "Tun anga a ţâwn hma, a ţhat lai" a ti a, hawi sawn pahin a hmui hnuai lam a pet zauh a, a thusawi chu a inthiam lo leh niin a lang. 

"Zawh chian a ngai a nih chu" ka tih rual chuan min rawn melh a, "Ţul i ti kher lo maithei. Mahse ka vei et et tawh. Madiki chu ţha deuhin ka hrilh ang. A inven ve a ngai alawm. Tun hma ang ka ni lo, ka en liam mai mai thei tawh thlawt lo. Ka hlau lutuk hi hrilh zel mai a nia ka duh ni" ka tih leh chuan, "I la mumal bik lo a nih kha. A kai a nih chuan a inhre tawh ang. Hrilh duh suh, awmzia awm lo. I hlauhna chiah i la ngaihtuah a nih kha" a lo ti sup sup a, "Mumal lo mah ila hriatchian ka duh alawm. Min en ta che...amah vangin ka chhe vek a nih hi. Amah vang chiah alawm kan chhiat vek. Thudik hailan hun ka tih tawh kha, khawi i phone lo la rawh" ka tih tak tlatah chuan min pe lo ngam lo. 

A pattern pawh a lo la thlak lo a, screen ka tih en rualin kan pahnih a kan thlalak, ig a ka dah, kan thih hma zawng tih zawnga sapţawng ngei a caption ka dah ve ngat chu caption zawng zawng langin a lo lang a, ka dah rual khan a screenshot a, hriatreng atan tiin screen lock ah a hmang a, ţhen ka tum apianga a sawichhuah ţhin a ni. 

"Zawt kher lo la a pawi miah lo" a lo tih leh chuan kei, engkim hriat vek duh tawh lutuk chuan ka call lui tho a, chhungril aţang hian min nawr tet tet a, in awm ve ngai em ka hre lo, thil hriatchian chak lutuk avanga chhungril aţanga tur tu awm ang hi, nangmah vangin HIV kan positive phah tih kher pawh ka tum lo, eng nge a dinhmun hriat ka chak hrim hrim a ni. Chutiang khawp chuan kan kai chhan hi hriat ka duh a, ka nu ka chhun ve na lai a ni. Engkim hrechiang vek lo chuan ka awm a nuam ngai lo. Ngaihtuah tur dang a tam nen pawh in ti maithei, mahse, tam tak ka tuar a, vanduaina awm thei zawng zawngin min delh emaw tih mai tur a ni, ka tuar tlawk tlawk a, ţhiante puihna in ka la tuar ve thei zel a, ţah pawh ka ţap hnem tawh. Ngaihtuah tur tam tak zingah hian he natna min pe tu hi ka ngaihtuah tel lo thei lo a ni. 

"Laltinkhum, i va reh em em ve. Kan party ve zuk dawn mi?" thawveng zet hian a rawn ti lang lang a, a nui har har a, a ruih hmel hle bawk. 

"Keimah" ka tih chuan, "Awii...Vanram min ti ngai lo tu kha i ni maw? Eng nge i duh a? Tinkhuma kha ka hmu ngai lo aw" a rawn ti a, sawi dawt chu ka hreh ve tho a, min tur tu hi nasa viau lo se chu ka dah leh duh hial ang. Mahse, ka thei lo. Ka ti mah mah a ni maithei, ka dinhmun ngaihtuah chuan a awm lo miah lo. Kai mawl tawp nih ka duh lova, a chhan sawi tur awm se ka duh, a chhan ber hi alawm ka zawn ngat ngat chu. 

"Miin HIV positive an ti che" ka tih rualin Tintin-an phone a rawn ban a, sawi dan dang ka hre miau lo. Han dawp kual vel turin ka ţawngkam thiamna in a daih lo a ni ber a, ka mangang bawk. 

"Eng nga? Tu nge ti? Nangmah khan min rawn puh mai mai a ni lo maw? Krismas bawr vel pawh khan thisen pek ngai khawpin ka damlo a, ka positive awzawng lo, i thikthuchhiat vang a nih kha Vanram, FIR ka thehlut dawn" a rawn ti piap piap mai. Rang lutukin Tintin-a chuan a hmet tawp a, ka tih reng kha tih melh tak hian min melh a, ka zep lo, keipawh ka inchhir chawpchilh nghal. 

"Nangmah anga chet buan buan ka duh loh vang alawm ka inkhung hran. Thinrim thut a tih chi a ni lo, natna serious a nih hi. Kai tawh ber chuan kan kai chhan leh kan kaina zawn chuk chuk a ngai lo. Midang chhuahchhal nan a hman chi a ni lo. Kan kai a kan kai a ni mai, mi zawng zawng zawt chhuak vek mah la awmzia a awm tawh lo" zaidam deuh hian a ti a, ka pum a melh leh zauh ţhin a, naute chungchang min zawh a chak tih ka hria, a awmdanah a ngaihtuahna ka hre thei ruai a, a chet hmasak hun ka nghak thung. 

CONT....