BLACK AND WHITE-12

BLACK AND WHITE-12

"Thil dang ngaihtuah tawh suh. Keipawh atthlak zawngin ka che tawh lo ang" awmze nei zet a tih pahin ka pum bawk chu a melh leh a, "Eng nge awmzia?" tiin ka hre lo der ve tlat. 

"Ka awm tawh ang" a tih leh pawh chuan hrethiam angin ka la awm duh chuang lo. 

"Khawiah maw i awm ang?" ka ti he haw a, hmalam enin a khabe ruh kual chu a tuai nauh nauh a, nuam a ti lo a, a inthlahrung ve deuh niin a lang. 

"In bulah, in nunah" a ti a, a ţawng zawi si, a thusawi chu ka hre thei chang chang chauh a ni.

"Hmeichhe sual ka ni lo a, nangmah ang tho ka nih ve bawk avangin i awmdan kha ka hrethiam. Pawm thiam a har tih ka hria a, ka kai ve hlau a min hnar i ni tih pawh ka hria alawm. HIV vanga min hnar i tum a, he natna mai bakah vanduaina a ka ngaih naute in min pawt zawm leh a, kan chunga thil thleng hian awmzia a nei vek. Keipawh hian ka la pawm thiam reng reng hleinem, ka zir mek a nih hi. Keimah ang hian ti ve rawh, pawm thiam zir la, i natna i pawm hunah chauh i thinlung takin naute nen hian min pawm thei ang. A nih loh chuan kap tu i nei reng tho ang" a kut a vawn pah hian ka ti a, a inthlahrung dui chu a khawngaihthlak zawk. 

"Ka pawm cheu lawm" a ti ve tak nain, "Nau ka pai avang chauh a min lo pan i nih kha. Counselling kal ţha la, pawm thiam zir rawh. He natna hi kan nunpui a ngai tawh a, kan khua angah chuan kan la inhrechiang si, miin hriat thawi hun pawh an la nei ang, chutiang hunah chuan a hlauhawm zia hlir hrilh ang che" ka ti chu min en phawk khawp mai. 

"A hlauhawm tawh lo ti a inzirtir zawk tur" tiin min lo hnial a, ka ngaihdan a ni vak lo. 

"A hlauhawm loh zia kan inzirtir tlut tlut a, kan hlau lo mah mah tawh a nih hi. Rin loh deuh deuhin an kai a, tupawh kan inthlahdah vek tawh. Kei ngei pawn ka kai a, a kai a te ka sawisel na a ni lo. Mahse, inenkawlna damdawi a awm tawh hnuah pawh tun hma ang reng khan he natna hi hlau ila chu hetiang em em hian kan ramah ringawt pawh HIV+ an tam lo ang. Kan ngam leh lutuk a kan pung thur thur a nih hi. A hlauhawm loh zia sawi tlut tlut hian awmzia a nei ber lo, damdawi tello phei chuan a hlauhawm lutuk alawm" ka ti ve tlat a, mi huat thu sawi mah ila pawi ka ti tehchiam lo. Mahni chunga a thlen ve chiah hian a na in thawk a pik a, kan hlau ngawih ngawih mai a ni. A hlimchhawnah phei chuan thihna kan hnaih bik riauin a hriat a, mahni insitna a nasa bawk. Ka hriat hlim aţangin tun thleng hian ka chaw eina thleng bik hi ka sil a, a hrangin ka dah thlap zel. Chutiang khawp chuan ka inkiltawih a, rilru hian a keng tel ve hrim hrim. Ka la pawm theih zan bik loh vang te pawh a ni maithei. 

"I thusawi kha chu engpawh nise, lo inpawm thei lo pawh ni ila tun aţang chuan in nunah ka tel ve tawh ang" a ti nghet churh a, a tih tak zia a mitmengah pawh a lang thei a ni. 

"Ka nu te hnenah engmah ka la sawi ve lo a, nang chu an hre vek tawh. An pawm thlap che a, kei ai ngawt chuan i phur a rit lo zawk alawm. Ka chhungte hian engtin nge min dawn sawn dawn tih hre lo mah ila hrilh ngei ka tum a, a nih nih ka ni tawh mai aniang chu" ka tih chuan, "An pawm thei lo che a nih chuan ka ru mai ang che" a lo ti thuai a, a inpe zo leh tawh khawp mai. Naute vang bawk a ni. 

"Min ru ringawt mah la ka chhungten min pawm tho a ngai alawm. Chanchin hrilh hriat ve hma a thil tih tawp ka duh lo a, puitling ka ni tawh. Engkim ka hrilh hnuah chauh ka awm zel dan tur ka ngaihtuah ang. I chhungte phei chuan kohhran lam hriattir an duh tawh a, ka inpeih hun an nghak mek. Diktak chuan ka tan pawh a inthlahrunawm ve tawh a, ka hrilh har tawh lo ang" ka tih rualin Sensiari leh Daizaui an rawn inzui lut a, mi pakhat, ka hriat ngai mi pawh ni lo a tel ve bawk. Eitur an rawn chawi lut a, a sa bawk aniang a khu vat vat mai. 

"A sat lai hian ei ila kan ti sia, nakinah in sawizawm mai dawn nia" nuam lo tih hmel fe a Sensiarin a tih chuan ka lo nui liam mai a, Daizaui leh lo tel thar pa erawh inhmachhawnin an ding ran mai. 

"Chatuan, kan inkawp chuan hma ka sawn thei lo tiin min kalsan a, tunah eng nge i nih tawh a?" cho zet a Daizauin a tih takah chuan an dinna lam kan hawi ţhap mai. 

"Ka inhlawh ţhin" Chatuana a tih pain a tih chuan, "Awwii...awiii...awiii engmah i nih bik tawp loh chu. Chhungkaw mumal ka neih loh avangin i chhungte khan min ngaithei lo a, min sit a, min hnar dan i ngaihtuah a nih kha. Mahni fate nihna hre hawt lova mi fate hmuhsit hi a ţha lo reng a sin. Nang aia ţha mistiri pasal ah ka nei" a ti a, naupangchhia viau mah se rilru an la peng a, hetiang hi tunah tak chuan kan mamawh. Boruak uap churh chuan min ti pik zual mai mai. 

"I nei a ni mai lawm...ngah nge min koh luh kher? Mi rawng hnawih laklawh lai lai a" Chantuana'n a tih chuan, "Eng nge i nih tawh ka hre chak alawm. I nu lah khan si hlawrh hlawrh chung hian lehkha in thiam zia leh mi fate a awh bik loh zia a sawi hlarh hlarh reng a, chhungkaw mumal nei lo, zilh loh fa te min tih ţhin kha. Zilh nasat fa pawn rawng i hnawih a nia, i nu khan min hmusit reng reng tawh suh se. Zilh loh fa hian a eikhawp a thawk chhuak ve thei. Mihring hi kan ngai reng lova, hmasawn zawng leh hnung tawlh zawnga kal thei vek kan ni. Keini ang hi awm lo ila dinhmun sang deuh angin in lang thei lo tawp ang. Ka thinrim hi ka an chakna a rei tawh lutuk, ka hmu fuh che a ka ang a nih hi. Mi hausa hi mi rethei vang chauhin an ropui, nu leh pa nei te hi nu leh pa nei lote vang chauhin an lang zahawm. Hre reng tawh ang che u" a ti salh salh a, kan tlangvala chu a ngawi reng mai. 

"A daih hmain lo ei rawh u..i zilh nghek tawh kha u Daizau, a hrereng tawh ang" Sensiarin a lo tih chuan, "Hre leu luau lovang" a lo ti hmak a, Chatuana ngaihdan a ni lo aniang, "Zu dawr a card i den ţhin vang a nih kha an duh loh che. Sumdawn i thiam dawn tih an hre hleinem. Mi i sawisel hmain nangpawh in en let hmasa rawh" tih paha chhuah mai a tum chu, "Mi bulah saw zilh loh fa sawn ka sazu a hmu tawh ti zel ang che" tiin a au zui a, Tintin-a chu min enin a nui a, ka lo nuih let ve a, a ţha phian mai. 

"Awii...min hmuhsit theih zia chu. Anu in pheikhawk min pe a, a savun a khawk vek tawh. I bun duh loh leh i nu i pe dawn nia a tia, ka ţap tawp. Khata ţang khan rilru ka siam a, mah se lehkha ka zir peih miau loh avangin engmah ka la ni chuang lo. Mizo te hi chu sawrkar hnathawk kan hmu sang a, tunah pawh min la hmu sang vak lo maithei a ni. Ka thin a rim a, ka hau ve hrim hrim chak a nih kha. Engmah la ni lo mah ila kolasib ah na na na chuan kei aia thil hralh thei an vang viau ang. Duh ngat ila chu ka pasal pawh ka hralh daih tawh ang" a ti a, a rilru a na ve viau a nih hmel e. 

"Keipawh sang deuh zir ka tum a dawr ka hawn daih hi. Hmeichhia hi chu kan vannei a, chhiat loh phei chuan engmah ni lo mah ila pasal ţha deuh kan hmu thei tho" fiamthu a Sensiarin a tih chuan, "Chutiang a ho e...chhe lo deuh deuh pasal chhe deuh nei an tam emai. Keichu hmangaihna ka dah sang ber, kan in hmangaih phawt chuan hausa lo mah ila kan hlim tho ang" a ti a, Sensiari zawkin awmze nei deuhin min rawn melh a, a pasalin vawi tam tak sumdawng tawh lo turin a ti a, sum tello chuan hlimna a awm lo tiin a hnial zel tho. Daizaui mizia leh a nun hi hringnun mumallo zet entir tu ţha tak a ni. 

"Tintin, Vani nen hian in inbe ţha vak lo emaw ka tia, a bulah i tawlh leh hrut hrut tho sia. A thu hrimah, in va chhe dun ve" chiang kel kawl a min en chung hian a ti a, hrilh ve chi a ni vak lo, tum loh deuhin a sawi chhuak ţhin a, thuruk hrilh ka sim tawh. 

"I hmel kha en ve la" Tintin-an a lo tih chuan, "Ka chhiat ang ang hian ka mum kâng alawm. In cher ka tihna a nih chu...in tla kuam mai. In mitmeng te kha damdawi ti nasa deuh in ang. In danglamna hi chu ka hre lutuk" a ti a, ngaihţhat loh hmel tak hian min en a, hria se chu Daizaui te ang chuan min hlau hle maithei a ni. 

"Hringnun a chul rih a nih hi. Rawng kan nei ve ţep tawh ang" fiamthu ti tak deuh hian ka lo ti a, "Hringnun in rawng bik a nei hleinem. Hringnun hi chu a chen thiam thiam vanneihna a ni mai. Tun hma chuan movie leh thlalak te hi black and white vek, en ninawm khawp a ni ţhin a, tunah chuan colour a nei vek tawh. Hma an sawn zel tihna a ni mai. Hmasawn tum lo ho hringnun hi a chul rup a, hmasawn tum a bei ţang ţang te hringnun hian rawng a nei ţhin" a ti ve teh mial a, a hmaa eitur inchhawp chu lungkham neih loh hmel zet hian a ei a, nu leh pa hmangaihna dawng lo, a tal tal a tal ve tawp a ni a, chuti chung chuan a nun hi awh chang ka ngah ţhin a sin. 

Daizaui chhuah hnu lawkah Tintin-a pawh a ding ve a, "Kalna tur ka nei a, ka sawi kha aw. Ka awm reng tawh ang ka tih kha. Engpawh thleng se keiman mawhphurhna ka la ang" a tih hnuah min chhuahsan a, min ti lungngai em em tu ka naupai lai chuan hmalam min pan tir dawn a nih hmel. 

"I nu te hrilh ve la, innei ula a ţha a ni mai. Naupang chhe zawk zawk pawh in ni tawh lo a, in natna avanga inneih mai ţha kan tih laiin nau i lo pai lehzel bawk nen, i nute pawn an hnial ka ring lo" Sensiari chuan a ti ţha leh tawh a, ka u bawk ka mamawh leh dawn a ni. Ka nu hian a ringin a duat ber a, a bengdai ţhin tu ber a ni. 

"Ehe...ngati nge Madiki hian min lo call a? Aizawl ah khan an in kan luah kher a, min ti buai ngun lutuk. A lo zin lahin zu min zawn tir te a tum a" ti niah niah chungin a la a, speaker a on rualin a ri nghal chuah chuah mai. 

"Sensiar, inah i awm em? Vanrami leh Laltinkhuma min tih dan kha ka lawm lo aw" a rawn ti leh lang lang a, a ruih chilh a ni khawp ang.

"Engtin nge an lo tih che?" a tih chuan, "HIV+ turah min ngai a nih kha. Ka khing dawn a nia, police ka phone anga FIR ka theh lut dawn. Vawih lo vawih a inpuh mah a na alawm le, min rawn tih dan kha ka lawm lo khawp mai. Mahni lo mah a hlauh ve nak laiin a chhe berah min puh a" a ti a, Sensiari chuan thupha a chawi ngial nain kan chhaih thinrim emaw tih zawk tur a ni. "A ti tak tak lovang" tiin a dah ta ringawt a.

Kan biak chhan ka sawifiah chuan, "Zawng buai duh suh u...awmzia a awm tawh chuang lo. Midang kai darh lo turin fimkhur ula a ni mai. Nangmahni in enkawl ţha bawk ula, Pathian hnaih nan a hman pawh a ţha. Thil dang a ngai lo" a ti a, ke in kan haw dun a, ka ngaihbel nge kan mi tawh te reng reng chuan min en bik deuh tlatin ka hria a, awm a nuam thei lo.  

Karkhat a liam leh meuh chuan ka u ka ko a, zanriah eikhamah ka huaisenna zawng zawng sawmkhawmin ka rai thu leh HIV+ ka nih thu chu maimitchhing chungin ka sawi a, a reh vang vang a, tumah ka hmuh theih miau loh avangin ka nu insut ri chu ka hriat awmchhun a ni. 

"Khawi aţanga i kai nge?" fiah fel taka ka u in a tih chuan ka hriat loh thuin ka chhang a, "Ka putea a ni mai alawm. Tintin-a ti dawn ila hetiang tur khawp hian a ţawng si lo a" Mary'n a lo ti veleh a, ka men rualin ka nu'n phone a chuh nghal rawk rawk mai. Ka putea ai mahin ka pi Liani a lo thinrim zawk a, an venga blood donation a awm thu leh an fate pawn thisen an pek ve thu te, ka putea ngei pawhin tun hnai maia thisen a test thu te chu vin zetin a lo sawi chiam chiam a, "Kan in a a awm ţhin vang ngawtin kan hnen aţanga kai a ni kher lo. A nun a thlahdah vang zawk a nih kha. A bialpa nen an inzui nasa a, chutaţanga kai te pawh chu a ni thei. Chubakah awlsam deuh a inkaichhawn theih pawh a ni lo, min ngai mawl viau suh u" a rawn ti hrep a, chhang tawh lem lovin ka nu chuan phone a dah a, puh tur reng reng ka hre tawh lo. 

"A bul ber chu thuawih loh rah a ni mai" a ti ban charh a, a hmel a thlaphanna chu a bo hleithei lova, mak ka ti hran lo, fate meuh an positive chuan thlaphan a awl khawp ang. 

"Nau i pai lehzel bawk nen, mipa dang lak aţanga i kai a nih loh chuan Tintin-a bak puh tur ka hre lo. A zahthlak emai mi hmai eng pawh kan hmu ngam dawn lo a nih hi. Ka hrilh ka hrilh che a, thu ţha hi i nin khawpin ka sawi. I rai tih hi ţhenawm khawvengte chuan hria se 'a rai har zawk ngawt alawm' an ti ang che. Chuti khawp chuan in inzui nasa a, pindanah pawh riah tir suh, nupa in la ni lova, a tawk chin hre rawh u ka ti fo, ka thu zawm duh lovin i duh dan ngatin i kal a, hei hi a ni mai a hrin chhuah chu. Inchhir eng ang mah la awmzia a awm tawh lo, i natna hi dam leh thei chi a ni lo bawk. Ka thusawi awihin inveng ţha la chu hetiang teh hrep hi i chungah a thleng lovang. I pi Lianin a hmuhsit zia che te kha i hria em? Khatiang chiah kha mi hmuh dan tur che a ni. Inngaizawng tih vanga awm dun tum reng ringawt, a tawk chin hriat ve te a ţha ngai. Nu leh pa thuawih lo chu an indawmkun tlawk tlawk ţhin reng a sin" a ti hlak hlak a, ka thuruk ka sawi chhuak chiah chu ka nu'n min lo hmangaih zia ka hria a, keimah avanga a mittui tla te chu hmuh hrehawm tak a ni. 

"A pawi emai...nau pai ringawt la chu thuhran a nia, i positive tel kher bawk si, vanduaina a thuah hnih leh lutuk a, engtia han tih chi nge pawh ka hre lo. In enkawl viau i ngai dawn a nih kha, school ah pawh thawk tawh rih lo mai rawh" ka u chuan a ti hial a, a hui leh pap ţhin a, tumah ka chhang ngam lo. 

"Mizo dan anga kan tih ve a ngai ang. Inrawn khawm a ngai a nih hi, kohhran lam pawh hriattir a ngai ang a, pawn chhuah pawh a peihawm loh. Inhauh chiam lahin awmzia a nei tawh mang si lo. A pawi hma hian a hunlai khan thu awih la ţha tur, lo innei ta pawh ni ula Tintin-a te in a mo chu hrehawm i ti khawp ang. A nu leh a farnu an lal si, a pi buaipui ngai lutuk a awm bawk a, pasal neih hi tih mai mai a ni lo. Tintin-a lah a laktlak bawk si loh, anni ang mipa hi siamţhat theih tak tak an ni ngai lo ka ti fo alawm. I nei chiah ang a i hre mai ang. In thawnthu chhiar te, in thil en te hian in rilru a hruai kawi hneh lutuk a, a tak ramah chuan Tintin-a te ang mipa hi an ţha tak tak thei lo, lo ngai reng rawh" a ti a, keipawh hian pasal tur atana ka ngaihtuah meuh chuan a huphurhawm ka ti ve tho a, nau lo pai kher lo ila chu ka nei kher lo maithei. Tunah chuan tih ngaihna a awm tawh lo, ka tlai zo vek tawh. 

"A nih nih an ni tawh anga a ni mai. Mi hi an landan ang ngawt an ni ngai lo a, in chenchilh chiah hian mize diktak a langchhuak ţhin. Nu Ruati ngei pawh hi i rin ang a ni kher lo maithei a nia, a mo te hian an sawisel fo a, a fate anga a hmangaih theih loh che phei chuan hrehawm i tuar ve nasa dawn tihna a ni mai" ka u chuan a lo ti ve bawk a, ka hlau zo vek tawh. 

"Ka pasal nu pawh hi mi chuan a ka ah pawh zen ila min seh lovang an tih khawp a pawn lang a fel a nia, amah vangin ka ţap zawih zawih fo alawm. A awlsam dawn lo tih hre tawp rawh" min ti a, min zilh zui malh malh a, a haw meuh chuan a tlai ruih tawh. 

Biak hmasak pawh ngai lovin Tintin-a zawkin chanchin a rawn ngaihven a, "Min hau nasa lo" ka tih chuan, "A ţhat chu..eng nge in an? Na in nei em?" a rawn ti vel a, mi pahnih ang maiin min be tawh. 

"Nei lo e...ka nu hian engtin nge hma a lak zel dawn ka hre lo a, inneih an ti a nih chuan fel deuh a i awm a ngai ang. A nih loh chuan ka nei dawn lo che" awmzia a awm tawh loh hnuah ka ti ţha leh a, "Aw kan insiamţha ang chu" a ti liam puat a, ka nu thusawi kha ka ngaihtuah phah rauh rauh a, a hma lawk pawn a insiamţha a, rei deuh chhung a nghei thei alawm ka ti ta vel mai mai a, chu lo inhnem na tur ka nei lo. Beisei a sang lo khawp mai. 

"Daizaui pawn hmalam pan tum lo apiangte hringnun a chul a tih kha. Hmalam kan pan loh chuan a ngaiah kan tang reng mai ang" ka tih chuan, "Ka rawn pan hmasak ţum che khan hmalam pan tumin ka rawn pan che. Nang leh naute nen a hmalam pan turin" a ti a, a thutak ve viau nain thlemna hi a do zo lo leh ţhin a, chu chu min ti mangang tu pakhat a ni. 

Rei tawk fang kan inbiak hnuah kan in mangţha a, a insiamţhat theih phawt chuan kan hma hun hi a thim bik lo. Kan beih fan fan chuan mi awh khawp a nupa hlim kan ni thei a ni. Keimah ka fel chuan nu Ruati pawh a sual bik ka ring lo a, Sensiari lah ka ţhiannu a ni a, an in a lawi luh chu ka huphurh vak lem lo, ka huphurh ber zawk chu Tintin-a bawk a ni. Ruihhlo hi chu a tur a na em a, sim tum pawh an tlu leh ruai ruai zel chu a nih hi. 

Ka nu chu a che nghal zung zung a, ka rin dan vel a ni. A nghah khawmuan ka ring lo a, ni reilote chhungin a ti fel vek. Kan chanchin hria apiangte chuan mak tih hmel deuhin min zawt ţhin a, ka naupai thu bak khawtlang chuan an hre lo. Kawng a ka kal te hi min pawt ding chawt chawt hlawm a, "In innei dawn em?" tih chu zawhna ka dawn tam ber a ni. 

Palai hmel pawh kan hmu har lo a, ţhian atana pasal tur te nau em han hman chu ka hreh ve bawk si a, Zuali ka din pui dawn a ni. Thartei chuan chanchin a rawn ngaihven duh eih lova, hmuh pawh ka hmu ngai lo. Man hlan hun tur thlenga kan sawi fel hnuah Sensiari leh Zuali te an lo leng a, ka ţhian kawm ber te an ni bawk a ka nu pawn a lo be ţha khawp mai. 

Pindanah lutin kan inkawm a, "Ţhian a ka ţan chak nen aw...Tintin-a kher hi neih ngai lo se ţha tur" Sensiari chuan a ti bai bai reng a, tih theih lah chu ka nei bik lo ropui mai si. 

"A theih tho ang mawle...a thiang lo an ti em ni? Hetiang lam hi ka hriat loh zawng a nia" Zualin a tih chuan kan hriat bik loh thu kan hrilh a, ka naupai laiin ka taksa a nghawng ţan bawk nen, ka insawisel ve reng a, ţhiante vin khar khar chang te ka nei ţhin. 

"Pasal neih chuan ho te te a tlan a thiang lo a nia aw. Hmeichhe tlan reng chu an zahawm lo. Mipa pawn ngaiah an nei ve thei a, chuvang chuan inti paukhauh la, infuih la, rilru nat chang i neih pawhin tlan duh reng reng suh" tiin Zuali chuan min zilh ve malh malh a, "Vanmalsawma pawh a phur ngang mai. An awmna a hlat tehreng nen ka lokal dawn a tih kha. Helama a pa te inah a awm ang a, a u Vanneihi fate a awm pur pur anga a ni mai" lo ti vein Sensiari a nui hak hak a. 

"I phur tawh a nih kha a, phone ringawtin in inbia a, in inhmu tur chu i helhhawlh tawh viau ang. A duh ang zan a hna ţha a neih veleh innei ngei ngei rawh u" kan ti a, kan infiam zui bawrh bawrh a, ka pindan chhung aţanga nui thawm a chhuak leh chu ka nute pawn mak an tih ka ring. Ka pindan chhung bik hi chu a ngui ruai reng a, ţhiante ka hruai luh pawhin hlim thawm hriat tur a awm ngai lo. Pasal ka neih dawn meuh chuan huphurh viau mah ila ka nun hian rawng a nei ve ţanin ka hria. 

"Boomer-a fapa lah hi a khawngaihthlak. A nu'n a nulat san hma si, Vanneihi lahin pasal a nei tawh bawk si. Boomer-a ţhian hlui te leh Tintin-a te, Vanmalsawma te bak hi ngaihsak tak tak tu pawh a nei lovin ka hria. Vanneihi hian a theihtawp in a ngaihsak na a pasal te in aţang chuan duh ang thalin a ngaihsak thei si lo a" Zualin a tih chuan ka lo thaw halh a, Vari nun khaw lo chho hi chu a pawi ngawt mai. 

"Pasal neih hi chuan mi a phuar ve alawm. Ka ngaihtuah ţhin a, hmangaih ber te kan neih chuan hlim deuhin kan awm tawh ang a, chutiang khatiang chu ka ti ang a tih vel hian duhthu kan sam vak vak a, kan duhthusam lo hlir hi a thleng ţhin thung a. Pasal neih hian hrehawmna a inţan chiah an tih hi a dik ka ring. An chhungte mai bakah kan pasal te ngei mitmei kan ven a ngai tawh dawn a, a hrehawmna lai ngaihtuah chuan neih loh mai te pawh a chakawm rum rum zel" Sensiarin a tih chuan, "Min sawi ţhaih lo teh" tih hlak pahin ka nghawk sawk a, a nur nang mai. 

"A ni tak tak alawm. Pasal nei tawh reng reng hian a nawmna aiin a hrehawmna sawi tur an hre tam zawk" a tih chuan, "Mihring chu kan phun chiar alawm. Mahni inhmangaih ţheuh kan nia, kan chhungten min hauhna aiin kan pasal chhungten min hauhna kha na kan ti zawk tlat ţhin a, chutiang te pawh chu a ni pakhat. Engkim hi a nawmna lai leh a hrehawmna lai a awm vek alawm" Zualin a lo tih chuan dik ka ti phian a, misual hi chu an awm ve hrim hrim a, sawisel tur zawng hrim hrim an awm bawk. Mo in a pasalte in kha in anga a neih a, a pasal nu leh pate kha nu leh pa tak ang chiah a a pawm a, an ni'n an lo pawm bawk chuan buaina tur a awmin ka hre lo. Hei hi a harsa lai ber a ni bawk. 

"Sawi tawh lo ang u, Vani a lo lawi duh lo palh ang. Lawi dawn a ruaiah a rilru a let thut ang tih a hlauhawm" tiin Sensiari chuan min fiam a, ani hi chu Tintin-an theihtawp a a duat ve a ni a, thik enah pawh ka en lo, ka thik ka ring lo bawk. 

An haw hnuah Thartein min rawn biak a tum ve hlawl a, mak ka ti lutuk chu chhan mai nachang ka hre lo hial a ni. Vawihnih a lo call naah ka chhang ve hram a, "Hei i pasal tur te nen kan awm ho" a tih chuan engahmah ka ngai lo, mak ka inti zawk. Tintin-an a ngaihsak loh zia ka hriat vang te pawh a ni mahna le. 

"Aw lo kawm hlim rawh u" ka lo ti mai a, hmeichhia a duh miah loh te nen an awm ho avang ngawt a lo tih tauh vel kha ţul ka ti lo, buaina tur dang kan ngah a, ka buaipui hman lo. Bakah a naupangchhia emai. Ti tau peih leh lutuk hi chu mipa pawn an ngaithei lo. 

"A tlangval rei tawh dawn lo emai kan han hrai rui ange" a tih leh chuan, "Kha kha chu a thu thu. Chatthla hmak mah se ka dem lo ang che. Kan duh lo chung tuman min pe lui thei lo" ka lo ti leh a, min chhan ngaihna a hre lo aniang a reh zui vang vang mai. 

"I va inti puitling vel ve" ban charh a a tih chuan, "Ka inlak puitlin ka hre lo. Fb ah i bia a, tuman chhang lui turin an ti lo, a chhang lo reng bawk che. Chuvang chuan a rilru ka hria a, awm ho ţhap mah ula ka ngaih a ţha. Nang chu i rintlak loh a ka hrevek tawh mah se Tintin-a kha ka ring. Zu pawh chutiang tho chu, a in vak a nih pawhin nang chu ka dem lo leh hlauh thung ang che. A in chuan a duhthu ngei a in a ni mai. I lo hrilh dawn nia" ka ti a, a hrilh tak tak pawh ka ring chuang lo. 

"Ring lutuk duh suh, mipa pawh hmeichhia pawh, zu a tel tawh chuan duh loh dan deuh a khawsak a awl" a tih ve chuan, "Chutiang tur khawpa a in a nih chuan a thu ka tih tawh kha. A in ţhang a, hmeichhe dang it duhna rau a chang em lovang. Fimkhur nachang a hre turah ka ngai bawk" ka ti a, "Eng nge awmzia?" a ti hu a, kan chanchin a hre ve miau lo. 

"Puitling a ni tawh, a fimkhur loh rah chu amah bawk khan a seng dawn tih a hria" ka ti a, ka zilh nasa tawh a, thu a awih loh chuan inthiam lo tur chu amah tho a ni. 

"In la eng emaw vel emai, dah teh. Engmah ka sawi peih tawh lo, i hre mai ang" min ti a, min chhaih thinrim zo lo chu amah zawk a thinrim niin a lang. 

Ka dah ve mai a, ka mu zui nghal bawk. Ka taksa lah hi rai ve dang ho aiin a na emaw tih tur a ni a, damdawi ei hun bik ka nei bawk si, ninawm ve ţhin tak a ni. Tintin-a pawhin min rawn be ngei a, "Beer chiah ka in" a rawn tih chuan, "Haw rawh, tlem a thawven deuh tak vanga len vak vak tur tihna a ni lo" ka lo ti a, a chek tlak a, "Ka la thawveng chuang lo. Ka thawven theih loh vang zawk a nih hi" a ti a, ka sawi hnem tawh lutuk a, sawi tur pawh ka hre zo zai tawh lo. 

"I in duh pawn nangma pindanah in mai rawh. Thawven nghal vak i tum aniang chu, keipawh ti hian ka tuar mai alawm" ka tih chuan, "Vanram" a ti daih a, "Imm" tih bakin ka chhang lo. 

"Dino nen in nih lai khan Madiki kha inhnem nan ka hmang, ka pawm thlap. Ani chu a fihlim bawk. Khang lai khan he natna hi ka la nei lo tihna a ni mai. Ka sawi awmzia chu Madiki bak hmeichhe dang kawp ka nei lo a, thisen pek ngaiin ka la awm lo bawk. Ka rin ber chu accident ka ţanpui kha" rilru buai hmel fe a a tih chuan, "Tu accident maw i puih?" inben kan pah hian ka lo ti he haw a, ka ngaihtuah ngial pawhin ka hrechhuak zo tawh lo.

"Kha...bike accident kha. Hliam ka neih lai a nia ka hliam pawh a thi leh a, hmeichhe thisen kha ka hup bet a, ka kai nasa bawk" a tih takah chuan ka hrechhuak uar uar mai. 

"Awii...i ţhiante nen a in puih kha maw? I ţhiante chu an fihlim si a ni lawm ni?" ka tih chuan, "An buaipui ve miau lo. Bike an buaipui" a lo ti hmuk a, a ni teh tak ang, kha zan khan kan buai hle a nih kha. 

"Puh tur dang ka hre lo, thil ţha ka ti a, mi nunna ka chhan na lamah aids ka vei a nih chu" lungawi loh hmel lek lek a tih chuan, "Aids a la ni lo, HIV alawm. Tun a lungawi loh thar thutin awmzia a nei lo. Kha hmeichhia pawh khan keini ang bawk hian hrehawm reng rengin hun a hmang ve dawn tho a sin" ka lo ti a, pawi chu ka ti ve vawng vawng mai. 

"Min rulh let dan a mak hle mai" a tih leh chuan, "I rui a nih kha" ka lo ti tawh thung a, "Hetiang hunah tak hian alawm fimkhur ţul chu. An inzirtir ţhin pawh a ni reng a" ka ti dek dek a, "Mi thi chhawnga an leh laiin kutkawr lei tur kan zawng chawp dawn tihna mi?" a ti vin hlur tawh mai. 

"Awiii...i rui a nih kha Laltinkhum" ka tih veleh, "Rui lo, miin kan natna hi hre ta se keimah min dem ang a, i kai ve chhanah min puh ang a, a ni reng bawk. Thil ţha ka tih vang a kai ka ni tih sawi ila min endan a danglam angem? I nu min endan kha a danglam angem?" a ti mawlh mawlh a, ka nu hian a ngaithei tlat lo a ni. Tunah phei chuan a ngei lehzual. 

"Danglam ang...i thiam loh a ni hleinem" ka tih chuan, "A ni alawm...i kai ve chhan chu keimah ka ni. Naute a awm veleh zel a, inthiam lohna hian min ei ral lo chauh tawh a nih hi. Nang tal chu fihlim la hrehawm tihna hi keimahah a bet reng lovang" a ti a, ka thiam dan danin ka hnem ve a, ka nun ti chhe tuah a in ngai a, mah se a thiam loh vek a ni chuang lo. Ka duh thu ngeiin ka mut pui a, nawm ka chen pui a, ka pindanah ka luh tir a, ka duhthlanna ngei hmanga ka tih a ni. Indem thei kan awm chuang lo. 

"Ka pawm vek tawh ka tih kha, pawm lo ila pasal a neih che ka tum lovang. I kaina ka hriat hma pawn ka pawm che a, i inthiam loh reng chuan nangmah i inti hrehawm mai mai. Ka sawi fo kha, rawng hlui lai bikah i la tang a nia, rawng dang chhuah turin hmalam pan rawh. Rawng var hian eng rawng pawh a kap eng a, rawng var lamah chauh kal tawh rawh" ka ti a, kan inzilh rei, ka mut theih meuh chuan dar 12 a hnai leh tawh. 

Ni a ding reng lo a, a kal ve bek bek zel a, hriat loh karin man hlan ni kan lo thleng reng mai. Ka thawhpuite ho an lokal kim vek thei a, an lokal kim loh hlauin school chawlh ni kan thlang a ni. Zuali nen inchei deuhin kan ţhu a, kan ţhutna bik pawh an cheimawiin ka nu leh ka u ten theih tawp an chhuah a ni. Hetah chiah hian alawm nu hmangaihna a lo lan leh chu. Min hmangaih lo bikah ka ngai ţhin a, mah se a duh loh deuh pasal a neih ka tum chung pawhin theihtawp a nalhin inchhung a chei a, engkim, kan khuaa kan hmuh theih a ţha ber vek min tih sak a, a khawih chet phal ngai loh pawisa a khawih che nual tih pawh ka hria, min hauh nasat ţhin avang leh ka bialpa a duh loh avang ngawt a ka nu ka sawisel ţhin kha ka inchhir a, a rukin ka zak chem chem mai. 

"Kawmchhak lawk a kal dawn a inchei chu ka ni huih mai" ka bula ţhut paha Tintin-an a tih chuan ka nghawk zauh a, "A dik lo mi? Kan inhnaih nen zanah te tih mai mai awm a nia. Awlsam deuh a tih theih rengah a hautak zawnga chet kan thlang tlat zel. Hetiang kan intih hmuh hi a ţha lo, mi rethei nek chepna pakhat a nih hi. Ka kekawr lah hi an ţhui sual a, ka pen sawi zel" a ti thum dut dut reng a, Bena pawh a nui ruh ruh reng mai. 

"Kha te chu inneih ni a hak tur an ti a ni lawm ni?" ka tih chuan, "Hak chi nang, chawpchilh deuhin a dang an ţhui dawn. Ka pen sawi zel ka tih chu. Mo neitu zawk ka kal zaw zaw dawn sin, i duh a mi?" nuihza aw zet a a tih chuan, "An va han ţhui sual nasa awm em em ve" tih pahin a kekawr chu ka melh a, "Melh kher suh, a lai taka ţhui thlak tur kha a sirah a awm. A inrin nasa tawh ang" a tih chuan ka nui ve ta nge nge a, a inhmeh ve hrim hrim.

"Laltinkhum, ţawng zuah zuah reng suh kan ţan ţep tawh ang. Ţhu ngil ta che, engati nge i ţhut he huih a?" nula senior U Zaiin a rawn tih chuan, "Ka kekawr hi ha ve chhin la" a lo ti then a, "Ka ţhut ngil rualin a ţet a ni mai. Ka inthlak leh lawk dawn mi?" pawisawi loh hmel fahran hian a ti leh a, kan nawi nak nak lutuk chu a nuihzatthlak zawk. 

"Kekawr pangngai rawn ha ta che. Inkhawm naa i hak ţhin te" U Zaiin a tih leh chuan, "Ka nun beidawn laiin kalvari kekawr chu jumble sale ah ka pe vek tawh" a ti leh then a, kan buai deuh niin an hria aniang min hmachhawn a ţhu te pawhin min en duh nasa tawh. U Zaii lah kan hmaah tawk a rawn kun bawk si, kan phur sur sur lehnghal. 

"Chutiang khawpa nasa a nun beidawn lai chuan nupui neih rih loh mai tur alawm" U Zaiin fiamthu a a tih chuan, "Pasal neih nachang hre lo hnen aţangin thurawn ka la dawn lo" a ti a, fel atin a ţhu a, Bena a lawm hmel khawp mai. Keipawh ka bang chuang lo, Tintin-a pangngai kha ka nei let mek zel a ni. U Zaii nen chuan engpawh sawi se a pawi lo, kan la ţan lo miau a. 

CONT...