BLACK AND WHITE-13

BLACK AND WHITE-13

Man hlanna hun kan hman zawh chuan a tam zawk an awm khawtlai a, ei leh in kan siam ve miau a, mi te ang bur burin ti thei lo mah ila ka nu'n theihtawp a chhuah ve ka tih tawh kha, ka ţhiante ho pawh an phur sarh vek a, an hmel hmuh a nuam khawp mai.

"Ka peih tawh lo, ka inthlak ang a ka lo chho leh ang...lo chhoh lehna chi a nih chuan" Tintin-an a tih chuan, "Lo chho leh vat ang che" U Zaii zawkin a lo ti a, nilengin a kekawr vangin a buai a, anni pawh ţhui sa lei ve mai tur hi a nia. 

"Vanram, ka lo chho leh ang aw" a ti deuh kher a, a ţawng hre pha ho chuan nui var varin min rawn melh hlawm a, mi zinga kan han awm chiah chu kan danglamna a lang bik lo. 

"Eitur in order vek chung pawn nu Puii hi chu thingpui min lum tir char char tho a, khawiah nge ka fapa te kha a awm? Kan rawn thlen hlimah min laksak a, ka la hmu leh reng reng hleinem" Daizauin a rawn ti lut lang lang a, apron a hreng a, ani hi chu thil tih khawm a awm tawh chuan a buai thei ber hrim hrim. 

"Vani, in kawt a limbu tui leh kuhva awm ruih saw tu ta nge?" ţhenawmpain a tih chuan, "Ka zawrh lai a nih kha. Limbu tui phei chu thil ei zawhah a ţangkai, a thak leh thak loin ka siam thei a, a bottle sawn a lei theih bawk. Kuhva pawh vawihnih ka la nawn tawh, hralh thei cher cher tak ka ni" Daizauin a lo ti a, remchang a lo zawng ve hman ziah. 

"Nang lah hi a hun leh hmun a zir hian zawrh tur i hre zel a, in pa in a thawk bawk si, pawisa in nei phian ang" patling ho chuan an ti a, an fiam zui laih laih a, "Pawisa nei ila thil ka zuar nang. Ka neih loh vangin a rem rem ka zuar a nih hi. Nei lo tak ka ni, min dawr ve ru aw" a ti let thak a, an nui huah huah a, kuhva an lei sak dawn aniang an inzui chhuak ţham ţham mai.

"Field ah khuan tournament a awm leh dawn a, Daizaui chuan vur sen a siam leh nasa ang chu. A inhralh thei leh khawp ang" inchhunga awm ve ho pawh chuan an la ti laih laih a, kan veng field hi lun lutuk tawh lo mah la tournament ho lam deuh hi chu a la awm ve ţhin a, intihhlimna satliah ang deuh a ni, ţhalaite tan an ti ţhin a, kan veng hnaih deuh a mi bak an tel ngai meuh lo. Mahse, a en tur hian an lokal khawm ve nasa ţhin a, chu chu Tintin-a te leh Daizaui ten nuam an tih ber ţhin a ni. 

"Vanmalsawm" a rawn nui lut vur vur a, hepa nui hmel hi chu hmuh a nuam ţhin, a mawi a, midang nui aiin a nelawm bik emaw tih tur a ni. 

"Khawiah nge i bik bo char char a? Tintin-a te kha i rawn hmu em?" ka lo ti lehnghal chul a, helama a pa te inah a awm a, veng hran daih a nih vangin a lo haw hnuah ka la hmu mang lova, ka buai ve bawk nen, tun hi fumfe taka kan inhmuhna hmasaber a ni hial awm e. 

"Ka kekawr kap a dik lo a ka inthlak dawn a tih kha. I va nalh ve a" min ti a, hmeichhe naupang kum 2 mi a pawm a, pakhat a kai bawk a, a u Vanneihi fate ve ve an ni. 

"Vawiin ni angah te chuan ka nalh ve bawk ang chu, ţhu teh, i sang si a, miin an en duh lutuk che" fiamthu a ka tih chuan, "Pawnah Daizaui thil zawrh lai ka vil a, nileng deuhthaw in ka vil. Ka rawn lut zawk mai mai a nih hi" a ti a, a ţhu duh chuang lo. Tintin-a ai pawhin a sang zawk a, a taksa a lian bawk nen, mi en a hlawh khawp mai. Hman a Tintin-a ţhianţhaber boralta, Boomer nen an in an em vang te pawh aniang, phir an ni miau alawm le. 

"Boomer-a fapa i lo hruai em?" ka tih rualin, "Bawiha chu pawnah a awm" a lo ti ve chiah a, kan han nui leh rih ţhin a, "I rawn chhangchhe hle tak tak mai. Naupang pathum i hruai a, Daizaui thil zawrh vil a ngai bawk si. Ka hmu lawk lo che pawh hi a awm e. U Vanneihi a lokal em?" ka tih leh chuan, "Naa...an pa mawng a khawihli. Hmun hnih laiah lehnghal, hei hian zingah a lo ţham sak kher bawk a" tih pahin a naupang kaih lai chu a melh zawk a, a nui zui hawk hawk a. 

"Lehkha zir tawh lo mai rawh. Helamah lo awm la, sa sat leh mai la, i ngaihawm ve alawm" ka tih chuan, "Ka duh tawk ţep tawh. Helamah alawm hna ka zawn dawn. Hnam dang kar a awm leh mahni hnampui ngei te bula awm chu a in nawm hleih lutuk" a ti a, ngaihţhatthlak loh khawp a chik a min en vang vang hnuah, "I damţha em?" a ti ţha leh rih a, ka lo bu nghat ringawt a, kan chanchin a hre ve lem lo. 

"A nih chuan nau pai i hua a nih dawn kha" a tih laiin Sensiari a lokal a, a lo haw hnuah pawh an inhmu ngun tawh viau nachungin an mit a intawng chiah chu aw thian kharh chungin Vanmalsawma zawk a hawisawn hmasa a, a hrawk bawk che ralh hian chil a lem a, melh tur a zawng kual rual mai. Sensiari pawh a bang chuang lo, a hmui a pet a, a kawr ban chu pawt fan vakin a ţham khawm a, Vanmalsawma chu melh loh hram dan a zawng a, an nula tlangval ve ve tawh tho si a, an lai dun lutuk chu hmuhnawm tak a ni. An inhmu khat em a, tunhma pawh khan hetianga laih tlat chang hi an nei ţhin. 

"Ka lai e in ti vel elo?" tih pahin Tintin-an Sensiari a kuah chawt a, makeup a hman leh hman loh pawh a ngaihtuah lo, a tih fo danin a hnarah a tuai sak nawk nawk a, han tal ve bawk mah se a kuah bet hneh lutuk tlat. 

"I va han rei lo em em ve, inthlak lovin hmun dangah i kal a ni lo maw?" ka tih chuan, "Kekawr thlak chhung a rei lo e" a lo ti a, a kekawr ka en chiah chu midang ka en kual nghal. 

"Tunah chuan manhlan naah mipa an smart zaih tawh zel. I kekawr hak khan i khup pawh a khuh phak loh kha" zawi te si, mangang deuh hian ka ti a, tshirt pangngai tawp a la ha zui. 

"Jumble sale ah ka pe vek ka tih khan ka fiamthu lo. Ka kekawr kha an ţhui sual a, hak tur ka nei lo tak tak. A tlai tawh tho a a pawi dawn mi?" nuam lo tih hmel tak hian a lo ti a, "A pawimawh chin a zo tawh sia" ban charh hian a ti leh a, tunlai chin dan a ngaipawimawh lo ve bawk si, a duh dan dan hian a kal tawp tawp mai a ni. 

"Tintin, i fatu em ni?" an rawn ti fiamthu ta chiah reng a, "Kan khua hi ka lo la dah ho mah a ni" a ti a, Vanmalsawma naute pawm lai chu na zet a a piai hnuah inthlak tur bawkin naute ţap bai bai chu a kalsan a, "Nupui tur te man hlan ni em a han fatu chu, Tintin-a hi chu a tlawmngai mah mah ţhin" Vanmalsawma chuan a lo ti zauh a, a ngaih a sam ve em a, a che awlsam thei bawk si, tih tur ţul ang kan tih zawh tawh avang maiin duh duh a awm theihah a ngai a, a hah phah dawn a nih kha. 

Zanah chuan Sensiari leh Zuali bawk an awm tlai a, ka pindanah bawk inkawmin ka huphurh thar zia ka sawi chu nui pat pat chungin an lo ngaithla a, "Huphurh vak duh suh. A ni puat mai ang, Thartei hi awm ţha duh se chu mi chei a thiam mawle, kan han inchei tir tur a nia, pasal i neih dawn meuh chuan ka ngai ve reuh" Zuali chuan a ti sap sap a, keipawh ka bang chuang lo. Ngei viau mah ila kan pali ngawt hian kan inkawm a, school kan kal lai aţang tawhin ţhian dang kan kawm ngai lo kha a nia, pasal ka neih dawn laia kan ţhian pakhat lek kim lo chuan a ti nuam lo vek thei a, han kim thei ila a nawm dawn nen. 

"Keipawn ka ngai ve reuh. Kan lungngaih chang te, kan hlim chang te hian ţhian hi an pawimawh a, kim thei ila chu tun ai hian kan hlim zawk ang. Nakinah ka lo sawm chhin ang, kan sawm har lutuk a, in inneih tawh dawn ber chuan a tih dik loh kha lo theihnghilh sak daih ila ţha tur a nia" Sensiarin a ti niah niah bawk a, a tello in kan awm thei viau emaw kan tih laiin a dawnah meuh chuan kan lo ngai vek a nih hi. Ţhian chu hetiang hi a ni mai, rin ai daihin kan inzawmna hi a lo thuk ţhin. 

Ka phone ri chu ka en vat a, Tintin-a hming ka hmuh chuan ka thaw hak a, a sawi ho leh awm ropui mai sia. 

"Vanram, rehearsal neih tur kha i theihnghilh ang e. Pastor zin a lo haw chiah a, naktuk zingah lokal rawh u a ti" a rawn ti ve mial a, kan pastor hi thil ţulah a zin thut a, kan mangan hman viau nghe nghe a nih kha. Hun a insiam thei dawn a nih hmel.

"A ţhat hlauh chu...zingah kan inhmu dawn nia" ti a dah nghal mai ka tum chu, "Min va ngai lo ve" a rawn ti a, "I kekawr chu eng nge a chanchin?" ka lo ti daih thung. 

"A zo tawh ang..ka nu'n a ngaihven dawn. Hei i khum turah Bena leh Vanmalsawma te an mu hmasa a nia" a tih chuan ka lai dawn dawnin ka hria, pasal ka nei dawn chu a ni sia, a mak e. 

"Mu mai mai teh se" ka tih chuan, "Naute khan min ngai em? Nangni pahnih hi in induh tlat, a hun hma hian ka ru daih mai ang che u" a rawn ti vel a, naute hi a thupui ber a ni ringawt tawh. 

"Tintin-an hma a sawn zel hi ka lawm e" kan inbiak zawh rualin Zuali pawhin a lo ti a, kei tluka lawm an awm lo maithei a ni. 

"Nau pai lo ila chu tun ang hian hma a sawn chak lo maithei a ni. Naute hian a ti danglam vek ni maiin ka hria. Nu leh pa kan ni dawn a a ti deuh reng a, fel lohna tam tak nei mah se pa ţha tak a nih ka ring" beiseina sang tak nei chung hian ka ti a, naute a pawm tur vel te chu mitthla ah a lang uar uar thei. 

"Ni dawn chiang e, Tintin-a te chuan naute a duh alawm. Inchhangbung kan ni chung hian keipawh tun thlengin min la naute chei a, khalam ah kha chuan lungngai suh. Naute hian mi pa a awt bik miah lovang" Sensiarin a ti a, buaina kan ngah em a, ka tum loh deuhin thuruk nei ru ran chungin pasal ka nei dawn a nih hi. Kan inneih hmain ka putea min tih dan kha ka hrilh vek ang ka ti ţhin a, mahse ka sawi chhuak a nih chuan Tintin-a bawk hi a buai leh ang a, hmalam pan a tum ve lai mek a ni bawk nen, ka pawt ding leh ang tih ka hlau a ni. Engtik niah emaw chuan ka la hrilh tho ang, hriat ve a phu alawm. 

Zinga rehearsal kan nei chu kan buai nawk nawk kher mai, kan lai dun si, a chang leh ka chham tur min chham khalh a, a chang leh kan chham rual a, pastor meuh pawh a insum thei mang lo chu a ni. 

"Biakin ah chuan ti sual miah suh u aw" min ti a, min han tih ţhat tir leh a, zam luatah Tintin-a chu a dang a awk vel a, Bena ţhahnemngai lutuk in pastor a lo pui ve bawk. Ka bula ding Zuali chu a hmai hupin a nui khur dat dat reng a, a hawichhuah meuh chuan a mittui a lo tla phang mai. 

"Thu chham kher ngai lo se aw" Tintin-a chuan a ti ta ringawt a, "Ka lo haw hma lo ang tih a hlauhawm hle mai. A tla chawp chuan ti ila lar na tham tur chu a nih hi mawle" tiin pastor pawh a nui ve reng a, pa phawk tak a ni ve hrim hrim. 

"I chham zawh hnu chuan ngawi ve mai la, ka chham hunah i lo chham ve zel a nih kha" ka tih chuan, "Naa..ka buai vek. Ka lo ang ve ringawt zel. Vanram, innei leh lo mai ang" a ti a, a nui duh mang bawk si lo, pastor chuan phawk deuhin a en a, "Ka chham peih lo, ţawng rin a ngai dawn si. Innei lo mai teh ang" a ti leh a, min kalpelh tum mek pastor fanu pawh a ding dat mai. An pafa chuan mak an tih hmel viau a, a uang mai mai tih hriain keini chuan engahmah kan ngai lem lo. 

"Thutak ve teh" ka tih hlak hnuah, "Nui miah lova i fiamthu kha midangin an hrethiam ve lo" a ma hriat phak tur tawk lek hian ka ti leh a, rei ngial kan beih hnuah kan ti dik ve thei hram a, thaw a veng huai mai. 

"Nang ni ang em em a chham sual nasa ka la hre ngai lo. A tak tak a thlen hun a in tih sual chuan in zak viau ang aw, fimkhur hle rawh u" tiin Zuali chuan min hrilh lawk a, Tintin-a te ţhiandun chuan an vei ve tawh lem lo aniang Parmawii chanchin ngawt an sawi leh tawh. 

Zuali nen a mo kawr kan ha zaih chu kan nalh ve viau mai. Kan hmai chu an chei nasa lutuk lo a, makeup hman lutuk inhmeh lo chi ve ve kan ni bawk nen, kan han duh tawk khawp a, darthlalang hmaa din kan inchuh rap rap reng mai. 

"Tintin-a kekawr hi an ţhui fu tawh em le..i hre mial em?" Zualin a tih chuan, "Fu lo se chu a sawina a rei tawh ang. A fu tawh aniang, awii keichu ka huphurh e..han khawih teh hei ka kut a khur nghal ringawt" tih paha ka kut ka pek chuan a lo vuan vat a, "A nih hi mawle..hall ah a nia, a zia deuh ang. Fimkhur hle ula a ţha a ni mai. Pi Vani i ni tawh dawn chu a ni sia" a ti a, nui hak hak chung hian min han kuah leh rih a, midang hriat ve loh tur hian, "Thartei pawh a lokal ve dawnin ka hria, thla kan la ho thei ang. Vawiin hi i ropui ni ber a nia, kan tel kim theih chuan a ţha a ni mai. A thil tih kha chu vawiin atan theihnghilh sak rih rawh" min ti a, ka lo bu nghat nghat a, tunah hian a la pawr mai mai a, nakina hrehawm ti tur chu amah tho a ni. 

"Hmalam in pan zel niin a lang. I hringnun a la chul em?" in lak hran pah hian a ti a, ka kut a la vuan reng thung. 

"A var ka hak hi...a var lamah ka kal tawh tihna a ni mai. Rawng dang pawn min rawn zawm ve zel mai ang, black and white kan tih mai ţhin, rawng hmuh tur awm miah lova tan reng chu ka duh tawh lo, ka kalsan tawh a, hma ka sawn tawh a, let leh ka duh lo bawk" ka tih chuan chhuan hmel deuh hian min en a, engmah phei chu a sawi lo. 

Kan kal a hun meuh chuan ka nu'n min pawt ding a, "An va chei nasa em em che ve, inchei lo pawn i nalh dawn tho a sin. I u ka thlah tawh a, vawiinah nang ka thlah leh dawn che a, inhnaih dawn viau mah ila ka huphurh riau mai" a ti a, ka inchei vang ni miah lovin ka naupai leh ka natna te, damdawi ka la zawh chiah loh avanga ka landan la dik chiah lo chuan a ti lungawi lo zawk tih ka hria. 

"Nitin ka lo leng ang" ka ti ve rawk a, "A ţul reng reng lo" a ti nghal hlar mai. 

"Tunah chuan kal a hun tawh a, nakinah ka hrilh dawn che nia" a ti a, biakin kan thlen meuh chuan ka tha te hi a zawi vek mai niin ka hria. Hall chhungah Tintin-a chuan min lo nghak a, a lam ka pan lai chuan, "Lalpa, eng nge thleng zel ang le. Kan hringnun hian rawng a nei ve zel ang che rawng nei lo ah bawk kan let leh ang" ka ti rilru mawlh mawlh a, engkim mai hi Pathian kutah ka dah a, ţha a tih ang zel a min rel sak ka ring a ni. Ka ring a, ka ring takzet a, chuvanga nungdam a la awm chu ka ni. 

Inneih hunserh kan ţan a, rin aiin mi an tam a, kan han ding bik te chu zam a awl lehzual a, Zuali min hrilh ang chiahin ka fimkhur khawp mai. Tintin-a dang awk leh thut avang chuan hnunglam aţangin nui ri ka hria a, melh rum chi a ni tawh mang si lo, thudik ka sawi chuan ka dang a awk zel a tih kha ka hrechhuak a,mahse a zam vang a nih hmel zawk. A rui bawk si lo, a zak ve khawp ang. 

Hall aţanga kan chhuak te chu min insiamchhiat khum duh pawl an awm a, kan daih zai a, kan kim khawp mai. Ţhian hoin thla min lak pui chuan Thartei pawh a lo tel ve a, ka lo nuih sang a, min melh zawk ringawt a, thlalak zawhah a kal lehnghal mai a, tumah min be hran lo. 

Mi an tlem deuh hnu chuan, "In ţhing mang e aw. Vani, ngatinge thu i chham paha i insawi kher zel a? Laltinkhuma lahin a dang a ti awk a" nu Ruatin a rawn ti kher a, "Kal mai mai teh. Duh vanga awk a ni hleinem. Inneih thlalak lai lehzel chuan min rawn hau miah suh" Tintin-an a lo ti a, hauh bur tih takah nupui neih ni pawn an hau tho chu a nih hi. Ka lo nui hak hak a, ţhiante an tam bawk nen, ka nui reng a, inneih ni hi kan hlim ni ber a ni ang tih a hlauhawm, lungngaihna in min zui ka hlau a ni. Vanduaina hi ka keng tel tlat niin ka hre tawh a, awm a nuam hleithei lo. 

Thla kan lak zawh meuh chuan mi an tlem tawh bawk a, "Vanram, ka duat ngawt ang che. Ngaihtuah dang i nei a nih kha, paih bo vek rawh" a rawn ti khauh a, ka hmaah a ding a, vawiin na na na chu a nalh khawp mai. 

"Engtia rei nge min duat peih ang?" dak deuh vaha en chunga ka tih chuan, "Ka nupui i nih chhung ka duat peih ang che. Kei hian ka zir loh avanga min ţhen a nih chuan i kalna apiangah ka umzui che ang a, neih let che ka tum ang. Chutiang ni lo, chhan ho te avanga min ţhen a nih chuan ka ko tawh lo ang che. Mipa dang vang a nih leh lek phei chuan kan inchhunga i rim a nam pawh ka phal lovang" a ti a, a thusawi leh kan awmdan chu a inhmeh hlawl lo, "Awii..a hun leh a hmun te hi thliar ve deuh teh" ka tih chuan, "Tuna i thu hriat zawh chiah sawi tu kha i pasal Laltinkhuma a ni. Sawina hmun: Biakin kawt. Hrereng ang che. Mipa dang vanga min ţhen a nih chuan i sam zai thlengin ka pe let vek ang che" a lo la ti ţalh a, a vei ngang a nia nge. 

"Hmeichhiain pasal kan neih tawh chuan kan lerh ve peih tawh ngai hleinem. Mipa bawk hi alawm ngaihtuahawm chu, in chhuak a, in rui a, hmeichhe dang nen" ka tih lai chuan, "Rui lo a zu in hi a har a, ka sim nghal hmak thei lo a nih pawhin dimte in ka in ang. Zu tlem ka in vang ngawtin ka ţhen dawn lo che a, zu tlem ka in avanga nangmah zawkin min ţhen a nih chuan" a ti a, a ngawi zui vang vang a, ka mitah tak a en a, a fiamthu nge a thutak tih pawh a hriat theih loh. 

"Chuan eng nge?" ka lo ti hmanhmawh a, "Ele...ka ko leh ang che" a ti then a, a nui zui hawk hawk a, a awm a ka chum dat lai chuan, "Tawi khawmuang vak tawh lo teh ang u. Mo hruai nen, eeee...khaw thim hnuah bak chaw kan ei hman lo ang" an rawn tih takah chuan midang kan zawm ve a, "Tintin-a chu i fatu tawh em lovang chu tiraw?" tiin an lo chhaih fiam a, tih theih loh tur a kan ngaih hi a ti leh nulh zel a, a nupui neih ni ngei pawh hian fatu tel ve mah se la amah hrechiang tu te chuan mak an ti vak chuang lo ang. 

Kan inthlak laiin ka nu a lo lut a, "Ti thuai thuai rawh u aw" tih pahin ka bulah a lo ţhu a, "I duh ber i nei tawh a, engmah ka sawisel tawh lovang. A pawimawh ber chu tawrhchhel a ni tih hria la, hrehawm eng ang mah se i tawrh chhuah hma chu lo haw suh" a tih chuan ka bo angreng khawp mai. 

"Eng nge awmzia?" ka lo ti he haw a, "Tuar ngat ngat la, i tawrh chhuah hunah i duh leh i lo haw dawn nia" nui deuh chunga a tih chuan ka hrethiam chiah. Ka tawrh chhuah chuan haw tumna ka nei dawn lo tih a hriat vang a ni. 

"Min chhaih kual vel em ni a?" ka tih chuan, "Nu Ruati khu i nu a ni tawh a, keimah ang chiahin en rawh. A hauh che pawn a hmangaih vang che a ni mai. Ka hnenah rawn vui sek lo la, i vuina thu zawng zawng ka ngaithla vek dawn lo tih hre bawk la, nawmsak nan chauh pasal i nei lo, hrehawm tawrh telh huamin pasal i nei. Chu chu hrereng rawh" a ti a, thil dang a sawi tawh lo. Kan insiam lai chu min lo en reng a, mizo te pawh hian inneihna hi kan ti hautak ve tawh khawp mai. Thuam chhawm ah thleng hian kan in el tawh niin a lang. Mi hausa tan chuan buaina tur a awm miah lova, an neihin a tlin phawt chuan engpawh chhawm se ka sawisel lo. Mahse, keimahni avang hian mi rethei ten hrehawm an tih ka hlau ţhin a, kan hriat miah lohin keini aia rethei zawkte hi kan lo dang chep reng ang tih te a hlauhawm. 

Tintin-a te inah chuan ka lawi lut ve ta ngei a, ka kal fo na, ka tal tamna hmun mah nise mo anga luh meuh chuan engkim a danglam a, ka zak thar riau ten ka hria a, ka ni deuh huih mai.

Chaw a ei theih an tih hnuah pawh ka ţhutna ngaiah ka la ţhu a, Tintin-a chu a kal kual leh sek tawh. A ţhiante hoin min rawn chim hnu phei chuan an bengchheng dar dar hle a, Daizaui pawh inti nalh deuhin a tei sek mai. 

"Mi ei zawh lamah kan ei dawn nia, an la tam emai a peihawm loh" an tih chuan ka lo pawm thlap a, "Pu Tinkhuma a nih hi. Pu a tel chiah phei chuan i hming hian ka pu, ka pa pu daih tawh min hriatchhuah tir ţhin" Tintin-a kuah thuk paha Sawmtean a tih chuan kan lo nui dar dar a, a ni erawh a meng nur nang mai. 

"Khalai ah khan kuhva ka dah a, a bula pawmah khan pawisa in thun tawp dawn a nia. A chung chiahah khan cctv a awm" tiin Daizaui pawh a au lang lang a, a buai khawp mai. 

"Tintin-a chu nupui i nei hma bawk a tlangval te i lo kham lo ange aw" patling pakhatin a rawn tih chuan, "Hma vak a mi? Nupui neih hun tur kum bi tuk a awm chuang hleinem" a lo ti a, a chhang thiam thei si, chupa pawh chuan a chhaih zui tawh lo. 

Chaw te kan eikham ve hnua a ţul ang ang kan tih zawh chuan chau zetin pindanah kan lut a, kan ţhiante pawn min la ţawiawm ve zel a, pindan chu an lo zauh a, bungrua an thlakthleng bawk nen a hma aiin a lang thar a, duhthusamin a lian ţha bawk a, a nuam khawp mai. 

Tintin-a chuan fiamthuin, "Mu tawh ang u" a ti deuh sek a, tumah chuan engahmah an ngai lem hlei lova, ţhiante awm laiin ka inbual a, an haw hnuah a inbual ve thung a, a inbual zawh hnua a lo mut meuh chuan ka lo muhil lek lek tawh. Ka chau bawk a ni. 

"I muhil a mi? I van intithei" min kuah paha a tih chuan, "Mutthilh mai mai intihtheihna tham a nih loh chu" ka lo ti a, photoshoot tih vel an sawi bawk nen, mutthilh vat ka duh chu ka saisir a, "I thil neih i chhuang" min ti leh tawh.

"Ka mut a chhuak a nih hi. I ngaihtuah ka hria a nia aw...ka peih teuh lo" ka lo ti hlar a, "Doctor pawn a sawi vek. I hriat ve vek kha" ka tih zawm leh a, "Chupawh nise khalam kha hawi kher suh" a tih tak tlatah chuan ka mu zangthal leh a, "Naute hi a buaithlak, hnawk ka ti phal si lo a" ka dul a chul pah hian a ti a, ka hmuiah a fawp zui zat bawk a, beisei a nei tih ka hrereng a mah se ka ngam tlat lo. Mak tak a ni. Ka tim deuh dui a, min dang tu a awm a, eng nge a nih ka hre lo. Naute leh doctor thusawi ka chhuanlam tlat a, a inla hrang ve ta nge nge a. 

Khaw en rualin ka ţhu chhuak nghal luau a, amah bawk chuan phak chuap hian, "Mu mai mai rawh ni pawh a la chhuah loh hi. I helhhawlh a nih kha" min lo ti a, mo thar tuk a thawh hai nghal chu ka duh miah lo. 

"Min thawh pui rawh aw" tih paha amah ka en chuan, "Zak der vel suh" a ti a, meng mang lo chung hian a nui a, "I ute ho an awm kim vek bawk si. Ka nel vak hlawm hleinem. Min thawhpui loh chuan i chak lo ngawt ang aw" ka tih khar khar lai te chuan hre lo ang hmiahin a mit a chhing tlat a, ka hnungzang a chul a chul thung a. 

"I nu a tho hma thei si, ka thawh khalh hman loh pawn a rual tala ka thawh loh chuan mak min ti ve tho ang" ka ti leh a, Tintin-a hi a tho tlai ber zel a, Sensiari pawh an duat viau nain zingah an kaitho hma ziah tho. 

"Mu rawh nakin deuhah kan tho dawn nia" a tih chuan ka mu veleh mai a, min lo kuah leh mah se ka bet tawh meuh lo. Ka nghawng zawna a thaw lum ham ham chu ka hre thei a, inchung enin ka mu meng kar a, a thawk lak danah a muhil leh tawh a nih ka ring. 

Kawngkhar a ri ţhuai a, ring leng lawng a, "Laltinkhum" tih riin a zui a, ka phu nasa lutuk chu a vawi hnih nan ka ţhu chhuak leh hluai a, ka lo muhil lehpek aniang sana ka en chuan dar 8 a lo ri ţep tawh. 

"I nu'n a ko leh tawh che, tho teh dar 8 a ri dawn" tih pahin ka sawi nawk nawk a, pawn lam thawm erawh a reh zui vang vang mai. Nu Ruati chu mo a nei tih a theihnghil em mawni le. Tintin-a kaithawh tum ngawr ngawr chu nise tunah pawh a la ri reng ang. 

"Lo zu chhuk rawh ka hmai te ka phih anga ka lo chhuk ang" a ti deuh tlat a, a mu ţha sauh sauh a, min ngaihtuah lo ve hle mai. 

"A ţhat chu..mu nileng ang che. Mood fuh loh sa nak laiin ka thusawi i hnial char char ringawt mai, i ngaihsak peih dawn loh chuan nupui neih loh mai tur che alawm. Vawiin pawh keimahin thla ka la ang, tel ve reng reng suh" ka tih chuan a mit nuai nauh nauh chungin a rawn tho ve a, mit lehlam chauh meng chung hian hnunglamah a inbeng khalh a, a la thle nguai mai. 

"Zing ka tho hma thei lo tih hre sa a min nei alawm i nih. Mi chu thlalak chhuah hma ten an tlan a, thla pawh kan lak hma hian i lo tlan daih ange aw. I pasal tello a i thawh hreh viau leh min lo nghak rawh. Ka inphih fai anga Johny leh Linda-i te unau chaw kan pe dawn nia" a ti a, a va han ropui lo tak. In duat der ve a awm lo, vawk chaw pek puiah min sawm nghal chu a nia. Ka thaw halh a, tunlai chu ka mood hi a inthlak reng hrim hrim. Rilru tet deuh chang te ka nei a, ka naupai vang ah ka ngai. 

"Tho ta si che" a mal a ben thlawp paha ka tih chuan, "A va mak" tih pahin a che thut a, ka nghawng ah a kuai bet a, a khabe in ka hmaiah a nawr nawk nawk a, "Phun peih leh lutuk mai. Mi zaidam tawpkhawk nei chi i ni. Min hmu fuh hi lawm hle rawh" a ti pah a, a khabe ah chuan hmul a ţo siar siar bawk nen, min thlah meuh chuan ka hmai a thip hlur thei. 

"Va ti vat vat rawh..thawh kan hai lehnghal, thawh pawh ka tho chhuak ngam dawn mi? Keimahin inhnuaiah ka chhuk ngam dawn der lo a nia" tiin ka tur leh a, a inphih fai zawh meuh chuan dar 8 a pel der tawh. 

"Kal ang" tih paha kal nghal mai ka tum chu min lo pawtin uar fe hian ka hmuiah a fawp leh a, hmanhmawh viau lo ila chu min thlah duh miah lo ang mawle. 

Inhnuai kan thleng thla chu an lo nui tet tet hlawm a, awmdan tur pawh ka hre lo. Step tawpah chuan ka ding a, hmalamah ka kut pahnih ka suih a, "Ngati nge khatia min en ţhup? Innei thar hlim in hmu ngai lo mi?" Tintin-a zawkin a tih chuan, "Ka nu hian a kaitho ţhang lutuk che a, nichin khan Vani a awm ve tih a theihnghilh a, Laltinkhum tih vak pahin kawngkhar a rawn beng vak a" nui hak hak chungin Sensiarin a lo ti a, mo a nei tih a theihnghilh aniang ka tih reng kha. 

"Kan ropui lo tlang e ka nuih a za" Sensiari bawk chuan a pi dar a a kut nghah pah hian a ti a, "I ti ve em? Pi" tiin a zawt nghal zat a, kan pi ber lah chuan, "Aw..tho nuam e. Ka hnungzang hi a la na deuh a, ka dar pawh kha han hmet teh" a lo ti daih a, an chhungkua hi hrechiang viau lo ila chu ka hawihai khawp ang. 

"Rawngbawl vak a ngai lo ang" nu berin a tih rualin patling pathum vel hi an lo lut a, hei hi chu ka beisei sa a ni. Zingkar a inleng te thingpui ka lum sak hman lo a, ka inthlahrung viau nain ka la che sawn ngam chiah chuang lo. Awmdan tur ber pawh ka hre rih lo, choka lam pawh ka hrechiang viau a, an thil dahna vel ka hre lo der tawp mai dawn em maw ni ka ti rum rum. 

"Vani, thingpui han lum rawh. Tintin, nangpawh vawk chaw zu pe rawh" nu berin a tih leh takah chuan ka che thuai a, Tintin-a chu a phun tih ka hria, a thusawi ka ngaihven hman lo thung. 

Thingpui ka lum zawh chuan sugar tih inziah kulhna chu ngaihţha deuhin ka hawng a, no a fian khat leh a chanve zel ka pawlh hnuah an ţhutkhawm ţhupna lam melh zeuh zeuh pahin ka chawk rak rak a, nu Ruati lah hi nu han tih mai ka harsat dawn tlatin ka hria a, kan inhriatchian mai bakah a hming telin ka ko ţhang lutuk a, mi koh dan thlak thut ka harsat bawk nen, ka huphurh ber te zinga mi a ni. 

Tray chawiin choka aţang chuan ka chhuak a, rin ang ngeiin Tintin-a pawn vawk chaw a la pe lo. Thingpui ka siam kep tho bawk a, a tawp ber a ka pek ve chuan intihtheih hmel tak hian a lo la a, "Thingpui ka in vak ngai lo. Ka nupui lum ni lo phei se chu ka in lovang" a tih chuan nu ber a nui ţha duh miah lo. 

Ngaihţha deuhin an bulah ka ţhu ve a, kan inleng te chu thingpui an in rualin an tep chap chap ţhin a, "A thlum tui viau a ni maw?" lungawi hmel taka tih paha Tintin-an a in ve ziah chu a phuh chhuak rang nasa mai. 

"Awii..Laltinkhum, min phuh ţhelh a nih kha. A daih hun nghak ta che" nu berin a ti tuar a, pa ber, ka pa a nih mai chu, pawhin a in ve a, lem harsa a tih ve hmel tho mai. 

Ngaihţhat lohna ka neih miah loh laiin Tintin-a chuan, "Vanram" zawi te hian a ti a, a lam ka hawi phei chuan a thingpui no a kawk zauh a, hmui phun hian, "A al" a ti pah bawk a, ka bang bo khawp mai. 

"Lokal lawk teh, thil ka hrilh ang che" tih leh thawh a rual a, ka ţhutna aţang chuan dimte in min pawt tho a, choka ah min kuah lut a, "Kan thingpui in kha a al lutuk. Lei a chhah tup thei alawm. Eng nge i telh a?" a tih takah chuan, "A va mak ve..chini lo eng nge ka telh ang a?" tih pahin chhuar chu ka hawng a, sugar tih inziak kuau, bur lian ber chu a kawhhmuh a, Sensiari a lo lut ve chiah bawk. 

"Thingpui saw a al vek. Kan lo hrilh theihnghilh che a nih kha. Nimin piah khan ka nu'n a thun sual a, chini bur ah hian chi hraw a lo thun a" a tih takah chuan ka thingpui lum al tur zia chu ka hrethiam mai. 

"Ka hre reng reng hleinem, a ung ka ti deuh nain chini ung deuh a tam tho sia, enchiang mang hlei lovin ka telh a, a nuam lo e. Engtin nge ka tih dawn? Ka va zak tak" mangang zet a ka tih lai chuan Tintin-a a chhuak nulh a, nuam lo ti ru tak chung hian ka en zui a, "Bur kan lo thlakthleng a, Vanrami khan a hai a nih kha. Tuman kan hrilh si lo a, khawi thlum tui tawkin kan lo lum ţhat sak ang che u" tih pahin no a khawm a, kan thawh hmaa ka thinrimna te kha chu a bo leh vek tawh. 

"Aaa..tih sual zeuh hi chu a awm tur alawm. Inpawhna zel a ni ngai" an lo ti a, an in hne tawh bawk aniang an no chu an lo pe sawk sawk hlawm a, kan inleng zinga a upa deuh berin a lei a chhuah zauh zauh lai pawh chu ka hmu vek a, a nuam lo duh kher mai. 

"Lum sak leh mai rawh. Nangni pawh in chhun sual pawn thlak thleng leh mai ta che u. Ti kha chuan keini pawn kan hai reng mai ang" tih pahin Tintin-a chuan sil hmunah a no khawm ho chu a dah a, tui nen a chhuak leh a, thingpui so leh hma tui a intir hlawm dawn aniang.

"Lum leh mai rawh, i lum zawhah bur chhunga mi kha ka lo thlak thleng ang. Ka pi hian chi hraw kawl loh hi a ngaithei lo a, englai pawn kan kawl ţhin. Hei chini aw" Sensiari chuan ka hmaah bur pakhat a rawn chhawp a, zak ru tak chungin thingpui chu ka lum leh a, a rukin inleng te chu ka bih leh zawk a, an la awm kim ţhap. Tintin-a pawhin a thingpui pik chhuah tak kha a lo nawt fai hliau hliau mai. Thawh hai bawk, chet sual bawk, inthlahrunawm duh tak a ni. 

CONT...