BLACK AND WHITE-14

BLACK AND WHITE-14

"Inleng an awm tawh lo bawk a chhung inkhawm nei ila chaw ei teh ang u. Shooting in tia mi? In neih leh dawn phei chuan kan tlai lutuk ange" pa berin a tih takah chuan hmun danga ţhu te pawh an lokal khawm a, "In hmanhmawh viau chuan ka nu'n hun hmang suh se aw" Tintin-an a lo ti zauh a, nghawk pawp mah ila awmzia a awm tawh lo. Nu ber chuan, "Laltinkhum, ţawngţai hi hne viau suh. Mit lo chhin ve bak tih tur i nei hleinem. Thil ţha tih hi i hlau a, tun thlenga i la dam nachhan pawh hi kan ţawngţaina vang tih hre ta che. Nu leh pa ţawngţaina hian thil a ti thei a sin. Chhung inkhawm hman dawn apiangin i phun ziah ringawt a, i duh leh i beng lo hup la a ni mai alawm" a ti leh hlawih hlawih tawh a, an inhnial reng chung hian an in nufa viau tho mai anni pahnih hi chu. 

"A nih leh i duh chen chen ţawngţai rawh. Ţawngţai leh mi rel chu i hobby alawm. Tunlai nu tam tak hi chuan ţawngţai leh mi rel nuam in tia, biakin chhunga in ţawngţai kha pawn lama mi in rel hian a that leh vek" nu ber meng rum lutuk tawh ka hmuh chuan Tintin-a bawk chu ka sik leh vak a, hetianga a nu a hnial pung pung hian keimah zawkin nuam ka lo ti lo. 

"Hey, nu te zah nachang hre ve rawh. Buaipui ngai ber hian mi dik lohna i sawi zuah zuah zel mai" u Mama'n a tih chuan, "A dik lo tih i hre ve a ni maw?" tiin a lo zawt let khauh a, "Ngawi mai mai rawh. Keimahni avang chauh a mawi i nih hi. Awm lo ila chu tuman an uksak peih lo ang che" meinei zet hian u Mama chuan a ti leh a, Sensiari pawn ani hi chu a hlau ţhin reng a ni.

"Ve lutuk a, i duh leh awm lo la, i awm leh awm loh kha kan tan ţangkaina pakhatmah a awm lo. Keichu mi zawng zawngin ka sualna an hria, a ruka i thil tih dik loh hi ka sawi chhuak ve palh ange aw" Tintin-a chuan a ti khur khur tawh a, zu rim a nam mang bawk si lo, boruak a nuam lo zo vek tawh. 

"Nu leh paten thil kan sawi a, in inhnial zui a ni nghal zel a, in naupanlai kha a ngaihawm telh telh dawn a nih hi. U zawkten naute dawm tumna in nei lo, naupang zawk lahin ute zah nachang in hre lo. Inhnial buai reng rual pawh in ni tawh lo. Mama pawh insum ţhin la, Mala ngat phei chu in fate pawh an lian uaih tawh a, insiamţhat in ngai nasa a nia" tiin ka pa a lo inrawlh a, a ngawi reng chung pawh a a hming a ri ve chu u Mala a lo ner nak a, "Khawimaw Tintin, ka chaw ei tur chu min han lak teh. Ka ril a ţam tawh emai hei ka irh uk uk tawh" kan pi chuan a lo ti ve bawk a, a upa be tawh a, a beng a chhet deuh bawk avang hian an inhnialna chu hria ang pawn a awm ve lo. Mi chuan Tintin-a pi bik an ti fo ţhin. 

"In tih dawn chuan ti vat vat rawh u, ka pi ril a ţam tawh hi. Kan hrem tel ve zel, Vanrami pawh a ril a ţam tawh ang" a tih hnuah ka pi beng bulah chuan ring deuh tak hian, "Ka nu Ruati ţawngţai zo se kan ei dawn a nia. I chaw tur bik kan chhum hman lo a, ka rawt kawi sak mai ang che" a ti a, ka pi pawh a bu ve nghat nghat mai.

"Ruati, chham duah suh aw, ka irh ka irh tawh" ka pi'n a tih takah chuan a nu enin Tintin-a chu a kiai suk a, hnehna chang inti hmel te pawh a pu alawm le. 

A ţawngţai hmain sana ka en a, kan Amen rualin ka en leh a, minute 15 a tling lo deuh. An vau lawk viau chung pawha hetiang a nih chuan hmanhmawh miah lova a ţawngţai phei chu a rei viau ang. 

"Lokal rawh le Vani, chaw ei siam ang" nui var var chungin Sensiari chuan min hui zauh a, u Mala te chhungkua an lo tel ve bawk nen, kan ţhahnem khawp mai. 

"Ka pi chaw tur tui tawkin ka'n siam ange aw. Vanram i duh ve em?" choka a ka pi rawn kuah luh pahin Tintin-a chu a au lung lung a, mitmeiin ka lo khap vat a, pasalten min ngaihsak viau hian an chhungten an lo ngaithei lo ve ţhin a, a theih ang anga inven ka duh ti ila a dik ber ang. Ka u hrehawm zia ka hrechiang a, ka u anga awm ve ka duh lo. 

"Thlalak laiin in lai vel ţut ange aw..kan en ţhup dawn che u nia" ti a Sensiarin min fiam chuan Tintin-a zawkin, "Keichu ka lokal lo ang" a ti a, kan en phawk khawp mai. 

"Nang ber i kal loh te chuan a tih theih dawn hleinem. Tih tur dang engmah i nei chuang hleinem" Sensiarin ban charh a a tih chuan, "Vanramin kal ve a phal hleinem. Thlalak naah i tel ve lo ang a tia, nupuite bula din theih loh ai chuan kal loh a ţha zawk" a ti vel a, kan chhang buai peih tawh lo. 

Kan ngaihsak lo deuhin a hria aniang ka pi a ţhut fel tir hnuah min rawn en a, "Nangmah vangin ka tho hma a, min hau nghal char char bawk a, ka ma nghal daih dawn che em maw ni le" nui miah lo hian a ti a, a unaute nuih a za viau thung. Sensiari tih loh chu mipa vek an ni a, an unau an tam bawk. Mahse, tumah hi ka nel hlawm lo a, biak hmasak ngam pawh ka nei lo. Pakhat hi pro pastor tling thar a awm a, hei ngat phei hi chu kan naupanlai chuan ka be ve tawh, kan puitlin hnu hian kan inbiak awm ka la hre lo. Ka'n en kual vel ţhin a, chaw ei chu thih hreh in ka hreh ti ila dawt ka sawi lo ang. U Zira lah phaiah a awm char char a, a lo haw ve chhunah pawh ka hmu ngai mang lo a nia, hriat ngai loh in a mo ang mai ka ni. 

"Lo ţhu rawh le Vanram, i ei ngam angem? Hrai i ngai em?" Tintin-an a ţhutna bula chair ruak ben thuk paha a tih chuan rum zetin ka lo melh a, min tih tlangnel a tum luatah min ti zak lehzual vek. 

"Dawhkanah kan leng dawn lo a" an tih rualin ka ţhu uk tawh chu ka tho leh a, an lo nui tat tat hlawm a, "Nang chu i leng...ţhu tawp rawh" tih pahin Tintin-a chuan min pawt ţhu leh a, "Ka pi nen a kan inkarah hian thlamuang deuhin ţhu rawh" a ti vel a, saruh lian mangkheng min suah sak zui zat bawk. 

"I mawl em ni?" zawitea ka tih chuan, "Saruh i khel ziah kha, a ti bet kher i duh bawk a, hei a ti a bet ţeuh mai, khel rawh a zahthlak loh. In in chu nise i chuh nghal dawn tih ka hria" a ti sauh sauh a, a sawi dik tak tak a, saruk han khel hi nuam ka ti ţhin a, khel laklawh laiin ka thlengah te hian ka thlauh ri leh bawl ţhin. 

"Dawr hi nitin hawng la, ţhahnemngai ve deuh tawh ang che. Thla a vei zung zung a, Vani pawn naute a nei vat ang a, in buai loh nan nangman ţhahnem i ngaih a ngai a nia" ti a an zilh chuan a ngawi ve reng a, "Ţhahnem ngaih nachang a hre liai luau lovang. Nung mawl tawp, hrehawm pawh tuar tawp, amaha a kian hun nghak tawp a nia, hmasawn tumna hi Tinkhuma hringnunah a bet ve lo reng reng. Pheikhawk pawh hi a ni lo zawng hlirin bun tawh se a ţha ang, a hma lam tur hi a hnung lamah dah sela, hmalam pana kal tumna a nei lo" nu berin a tih ve takah chuan, "Pakhatna ka nih ve pawh a complain duh nu ka nei a, hmasawn ngaihna a awm lo. Vanram, hmanah pakhatna ka ni ve a, cycle ka duh vangin. Ka nu hian a awih lo a zirtirtute bulah ka paper nen a kal. Chutiang khawpa mi dik chu a nia, CM a nih hunah phei chuan mizo mipui bik te dawt sawi a khap dawn. Pawisa aiin dikna a dah lal ang a, zoramin hma a sawn chak dawn lutuk ringawt. Pheikhawk hma thlawk thei hlir kan bun ang" a ti let ve a, an chhungte ho hian ngaiah an nei tawh ni awm tak a ni, an ei mawp mawp a, an nui lova, an ngaihsak lova, an nufa chuan an inmelh leh zauh ţhin a, hetiang reng reng a hun hman chu a hrehawm viau ang. 

"Awii...i thil min pek hi a sak lutuk" tih pahin saruh chu ka khel a, ka hmaah an intlar ţhap bawk si, midang hmuh laia khel ngang ngang chu ka zak ve reng. 

"Ha i nei ţha alawm...zam suh, khel ngawng ngawng rawh" nuihza aw zet hian a lo ti a, ka pawt fat fat a, ka sehthlak meuh chuan a pawi zo vek tawh. A ri rawk a, "Aiah...karei ka nu...a na lutuk" ti vang vang tu ka pi chu inthlahrung deuhin ka en phawt a, a piah chiahah u Zira ţhu lo phei se chu a chair chawpin ka nghawk tlu anga, chhuatah a let thla tawp ang chu. 

"Nangmah vang" zak deuh a tih pahin Tintin-a thlengah ka saruh lian pui chu ka nghat chawrh a, awmdan tur ber pawh ka hre lo, ka rilru leh che vel chu a buai zo vek tawh. Ka pi lam bawk chu hawi lehin, "A na em? Awii a sak lutuk a, lo ei loh tawp tur a nia" ka ti deuh chul a, ka ţawng rin loh avangin a hre thei lo thung.

"A zahthlak loh Vani, keipawh ka mikhual naah ka thlen in pa ka nghawk sawk tawh alawm. Inţhut hnaih bawk, saruh khel bawk, a ti a fei bawk chuan chetsual a awl a nia" kan pro pastor-a chuan a lo ti ve khauh a, ka zak lutuk chu ka thlan hluam thei nia!

"Min han kaitho teh u, ka insawn duh. Hetah hian ka ţhu duh tawh lo" ka pi, tar â tawh lamin a tih leh lek phei chuan hnar a lian lehzual a, kham daih a mawi bawk si lo, "Eizawm mawlh mawlh rawh a ho lutuk" an ti tak nain chaw lem a sak duh ţalh ţalh khawp mai. 

Pindan a kan lut chiah chu mittui a hnai kuar mai, ka zak lutuk chu ka vei tawn sek a, khuma Tintin-a ţhu chu, "Khatianga saruk lian te chu ka tlangnel deuh hnuah te min pek tur che a nia. Tlem a tlemah ka pi ka nghawk khaw lo lo chauh a nih kha. Kan kim lai tak a ni lehnghal a, awii ka zak lutuk" tiin ka hau pah mawlh mawlh a, min en reng a, a hmel a nuihzatna langchhuak te chu ka hmuh hmaih lo. 

"I tlangnel hnuah khatiang kan hmeh tawh kher nang. Mo hlim hi chawhmeh tui lai ber a nia, tukin anga tui kha kan hmeh leh i lo beisei elo? I hmelţhat nen i va zakthei lo reuh e" min ti a, ka pan phei a, a bula ţhut pahin a malah ka chum vak a, ngaihtuah chet chetin ka zak chet chet ti ila a dik ber ang. 

"Ka zak emai ah...ka tlangnel deuh na sa a nia, ka chesual miah lo ang ka ti ve a" tih paha khum lu lam ka nghen ve chuan min lo kuah a, a kut pakhat a ka dul chul chung hian, "Anu hi a zak ve vel a nih chu, i pian hunah meuh chuan chaw ei lai pawn dawhkanah a ke a hlang ngam tawh awm sia, engmah lah hi i hre ve mang si lo, i lian har si, lo chhuak vat vat mai la" a ti dam thlap a, ka rai tih a hriat meuh chuan inhmuh apiangin ka dul a en a, ţhang nghal vak vak turah a ngai a, amah bawk hi a inti lunghnur chawp leh ţhin. 

"Vanram, a hming tur i ngaihtuah tawh em?" a tih chuan, "Mipa nge hmeichhia a nih dawn kan la hre hleinem" ka lo ti a. 

"Mipa a nih chuan Laltinkhuma Jr. ti ila, hmeichhia a nih chuan Laltinkhumi Jr. a ni leh mai" a tih chuan a sam buk laiah na lo tein ka ţham a, "Thil ni lo lo hi sawi ţhin suh. I hming hi nalh i ti lova nangpawh i phun i phun alawm" ka tih takah chuan min kuahna kut chu a la sawn a, a ţhutdan chu siam remin ka dara thatchhe deuh a a lu nghat chung hian min kuah a, "Mipa a nih chuan Remlalfaka, hmeichhia a nih chuan Remlalfaki" a ti leh mauh mai a, nalh ka ti tehchiam lo khawp mai. 

"Chutiang hming te, i mak thei ka ti" ka tih chuan, "Boomer khan a sawi ţhin a, a dam rei dawn lo tih a inhria a, a natna kha a hrechuang. 'Ka thih hnuah fa i nei chauh awm si a, mipa a nih chuan Remlalfaka ti la, hmeichhia a nih chuan Remlalfaki ti rawh. Mawi lo deuh angin a lang na a awmzia a nei thuk a, ngaihtuah chian chuan a mawi a nia' a ti ţhin. A fapa kha Vari chhungten a hming an sa a, ka fa hmasaber hming tur chu a duh dan thlap min hrilh sa vek. Tupawh inrawlh tum se ka phal lovang. Boomer hriat reng nan a duh ang takin ka ti ang" nghet churh hian a ti a, a hmel hmu lo mah ila a aw ah chuan a tih tak zia a hriat theih. 

"I thu vek alawm...i phal lo chung chu tumah an inrawlh lo ang" ka tih chuan a rawn dak chhuak a, min en chiang lutuk chu ka lai der lek lek a ni. 

"Nangpawh mipa dang melh phal a ni lo. Damdawiin kal a ngai reng dawn a, Dinosaur a awm kha" a tih chuan, "Engtin maw?" ka lo ti vat a. 

"Dinosaur a ni lo mi? Tu nge vun inlip lek lek khawp a upa tawh lo leng ţhin kha a hming kha?" a ti vel a, a hre reng sia.

"U Dino-a a nih kha. Hre lo der vel lo mai teh, hmuh tur a tam lo lutuk" ka tih chuan, "Aw..khapa nen khan in lo inhmu leh ange. Ka phal reng reng lo a nia, zung bun hi bun mai mai lovin i chalah bel theih se ţha tur" a ti a, ka zungbun chu a khal nauh nauh a, "Inneih tawh ber te chuan thikthu tih chhiat vak a ngai hleinem" ka lo ti then a. 

"Ngai ele...hmangaih lo che ila thikthu ka ti chhe peih lovang. Zungbun hian a hrilhfiah vek, ka ta chauh i nih hi" a ti a, kan ţhiante an rawn kal tak avangin a inla hrang a, "A hmuna inchei chawp ai chuan kan hmai bik hi chu hetah chei ang" Zualin a ti nghal lang lang a, min chei tu tur te a rawn hruai bawk a ka lo remti ve mai. 

"Mo thar a che sual nasa a ni maw?" Bena ten an tih chuan ka zak thar leh a, Sensiari hnen aţangin an lo hre vek tawh a nih hmel.

"Nu ber pawh a che zual alawm. Mo a nei tih hre lovin Tintin-a pindan kawngkhar a beng ri dawm mai" Sensiari chuan a lo ti leh zauh a, an nui ham ham reng a, ka tan tak chuan a nuihzatthlak ve vak lo. 

"Tintin, beer i duh angem? Kan keng a sin" an tih chuan, "Vawiin leh nimin kha chu Vanrami nen a kan ni pawimawh a nia, ka in lo tlang ang. Nimin pawh khan ka in lo" intithei deuh a min rawn en pah hian a ti a, ka lawm ve viau tho mai. Mahse, "Duh chuan a in lo thei reng a, a sim duh lo a" ka lo ti a, a hnar a tum dat a, a hawisawn zui daih a, ka nui ru var var mai.

"Keichu biakin kawt a thlalak kha a tawk ka ti reng a sin mawle...a hranpa a chhuah leh vel hi a peihawm tawh loh e. Nakin zel atan a pawimawh viau nain ka chau, bakah ka chesual leh khut ang tih ka hlau" ka hmai an chei lai te chuan ka la ti mawlh mawlh a, ka chetsual nasat zia hre tu te vek an ni bawk a an nuih a za kher mai. 

"Kan bulah te chuan a ho emai. A ţha ve alawm...in faten an han en let leh anga maw, in lo van hmelţha em em an tih tur khawpa mawiin ka chei ang che u" min chei tu chuan a ti a, min hnawih beh hluak ngai lo a, thiam ka tih zawng a ni. Makeup pawh hi a uchuak leh lutuk chu a mawi lo zo vek zawk zel. 

"Kan pro pastor hi a chhe lo reuh e. Sensiar, in unauah chuan a palian ber lo maw?" min chei tu tho, sam vel min khawih sak tu Olivia-in a tih chuan, "Ka ute hi chu mipa vek an nia, an lian hlawm hrim hrim. Tintin-a pawh hi ft6 a tling lo deuh a ni mai a. A mak e ka ti, tunhma khan mizo mipa an tê an nia, tunlai mi hi chu mizo pawh an lian ve tawh. Ka ute pawh hi an ţhang vak vak ringawt mai a ni. Police leh sipaiah lut vek law law se ţha mai tur a nia" a ti fiamthu a, "I sawi dik chiah. City police ho te hi Aizawl kal changa hmuh fuh ve pawn an bula din a inthlahrunawm zawk. Mizo hi kan lo lian ve tawh ka ti. Mipa pawh hmeichhia pawh, tun hma ang ngawt chu a ni tawh bik lo. Mahse, i u pastor-a chu chhe lo ka ti tho tho" a ti a, a nui har har a, "Pastor em chu a la ni lo. Pro pastor alawm. Star duh suh, u Rinhlua te chuan hmeichhia leh uite chu engahmah a ngai lo" a ti a, a nui zui hak hak a, mipa ţawng mawh lutuk a nia, tukin ka chetsual laia zak lo tur a min lo hrilh ve pawh kha mak ka ti viau reng a nih kha. 

Mipa ho chuan, "In inchei rei emai kan lo zu chhuk ang" an ti a, a ţhiante an chhuah diah diah laiin Tintin-a chuan min rawn hnawih a, min chei lai chu hnai deuhah a en a, "Chei nasa lutuk su aw..min thlawh bo san daih palh ang. Ka nupui hi ka la duh ve a nia" uangthuang zet hian a ti a, midang an ner nang nang lai chuan nui chung hian ka dulah na lo tein a ţham zauh a, min chhuahsan zui ve nghal a, hetiang reng hi a ni lo ang tih ka hlau ţhin. 

Kan chhuak ve chuan kan pro pastor, u Rinhlua kan tawk a, tumah min en lem lova, min be lova min kalpelh mai a tum chu Sensiari a uang chak tlat aniang, "U, lo ding lawk" tiin a han au ding leh ring a, kan lam a rawn hawi lai chuan kan lo en ţhap a, mipui hmaa thusawi ţhin mah nise hmeichhe hlang hmaah meuh chuan a zah hmel hle. 

"Hei...tu emaw te te hian a star teh mai che a nia" nui pat pat chunga a tih chuan u Rinhlua pek chuan, "Dam rawh se" a lo ti hem mai. A inher vut a, a pindan lam panin a pen zui pawk pawk a, a zak lehpek khawp ang le. 

"Star duh suh u ka tih reng kha. A ţawngţaisak daih mai tur che a nia" tiin a uang zui a, Tintin-a ui kai chungin min lo nghak a, mak pawh ka ti hran lo. A uite hi Aizawl a kan awm lai aţanga a neih tawh a ni a, a duat ve khawp mai. A hming pawh 'ka enchimloh-i' tih ngat a ni. 

"Chhungkua a thla kan lak ni tur a ni sia, ka enchimloh-i a tel ve ngei ngei a ngai" a lo tih chuan ka bu nghat a, a duat zia hriain ka sawisel sak lem lo. Car a chuan a huphurh deuh a, "Ka rui zel sia, thlalak thlengin ka ti buai thei" a ti bul bul reng a, motor a rui tlat hi a mak ve ngawt mai, bike in a tlan pur pur ţhin tho si.

"Ka enchimloh-i kha Olivia ten pawm se, nang chu ka phur mai ang che" Sawmtean a ti hlauh a, "Ka bike hi ka keng thei tho a" ti ve bawk mah se tuman an remti lo. Vanmalsawma pawn a pa bullet, nalh ve tho mah se patling deuh mai hi a rawn keng ve a, Sensiari nen an inphur dawn a nih hmel. 

"In la kal lo maw? Ka nang hman chiah chiah che u a nih hi. Ka ţhiannu nen hian lo tel ve kan tum a, kan len loh takin scooty kan keng, pi Dingi dawr kawtah kan dah" Thartein a rawn ti phawr phawr a, keichu nui chunga min rawn en in, "I mit ti kham zawngin ka awm lovang. Nizana min hrilh kha ka la hre vek alawm" a ti a, ka bangbo angreng khawp mai. 

"Eng nge ka hrilh che?" ka lo ti he haw a, ka ţhiante pawh chuan min en ţhap a, a nuam lo duh nasa mai. 

"Naaa...midang hriatah chuan sawi lo ang. Min vau lawk nasa bawk a ţha deuhin ka awm ang. Min lo biak khan a tlai tawh viau nain hei, Philo-i pawh hi a la awm a, a hre ve vek" a ti leh a, hrilhhai ru angreng tak hian Tintin-a ka en a, a hrethiam bik lo aniang a hmui tih sawi zauh pah hian a dar a lo kân ûk a, ka biak loh zia ka hrechiang nasa mai si, a kal thui sawt khawp mai. 

"I vau tak tak em ni? Engtin nge i tih? Ngati nge i vau kher a? In ngaihdam tawn tluka hlu a awm lo a sin. Ţhian chu kan intihtauh khum a, kan in ngaidam leh mai a" car a kan luh ruala Zualin a tih chuan, "Ka vau awm pawh ka hre lo" ka ti ban charh a, midang awm ve vek laiin a rawn sawi bawk si, ka tih ni miah loah ka zak chem chem mai. 

"Min vau a tih kha. Hlauthawng duh suh, Tintin-a nen chuan in innei fel tawh a, tuman an chhuhsak dawn hleinem che" a la ti tak deuh deuh a, "Ngatinge kei aiin Thartei in rin zawk zel a? Ka vau lo ka tih mawlh mawlh kha" vin lek lek a ka tih chuan, "Tintin-a a duh ve zia i hre vek tawh a, niminah a lokal ve bawk si, i ngaih a ţha lo a nih ka ring deuh a" a lo ti a, ka nui hul hak a, ţhatna a hneh theih miah loh mihring hi an awm angem tih hi ka inzawt fo ţhin. 

"Ngaihţhat lohna pakhatmah ka nei lo. Thartei a rintlak loh a nih pawhin Tintin-a hi ka ring alawm. Hmeichhe dang chu thuhran ni se la, Thartei berkher chu englaimahin hmeichhia angin a en thei lovang. A chetsual pui miah lovang, chu chu ka chiang ve tlat. A ruk a invau tih vel phei chu ka ti ngai lo hrim hrim" ka tih takah chuan ngawi rengin hmalam a en a, nuam a ti chiah lo niin ka hria. 

"Ngati nge i rin leh tak em em a?" insum zo lova ka tih chuan, "In inneih hma zan khan kan inhmu alawm. Sensiari pawh a tel a, Vani chu sawm ve lo mai rawh u a buai tawh awm sia a tia, a inpuang vek a, ţap chungin ngaihdam min dil a, ti tawh lo turin a intiam bawk a, kan ngaidam a, a tihsual pawh kan theihnghilh sak ang kan ti. Mi kan ngaidam a nih chuan an tih sual kan hrereng tawh tur a ni lo. A tel ve lo ber i ni bawk si a, i ngaih a la ţha lo a nih ka ring a" nuam lo tih hmel tak hian a ti ve a, kan bulah Olivia a ţhu ve tak nain kan sawi bawrh bawrh tho. 

"A hrethiam ber tu zawk ka ni ang chu. Inkawm khawm leh in tih pawn engmah ka sawisel hleinem. Bakah mi va vau pung pung chi ka ni lo hrim hrim. Tintin-a hian lo duh ve ta se, a rukin lo inkawp ta se, hrechhuak ta ila, keimah zawk hian Tintin-a ka thlah hmak ang. Chutiang chu ka mizia a ni. Thartei thil tih kan hriat hlim pawh khan ka rilru chu a na mah se vawikhatmah ka vau lo" ka ti hmarh hmarh a, Thartei hi a mak lutuk, mi rilru hneh a thiam a, lamţang a mi siam a thiam a, a duh zawng chu a ti lawm thiam lutuk tlat. An chhungkaw zia a ni ve a, mi hausa reng reng hian Thartei te chhungkua hi an duhsak tlat zel. A ute pawn an phu loh a ţha pasal an nei fur a, chutiang chi chu an ni. Zuali leh Sensiari a lo hneh leh der tawh a nih pawhin mak ka ti hauh lo ang. 

Kan thlalak na tur hmun kan thleng chiah chu Thartei a au chel chul reng a, Sensiari leh Zuali a ko bik reng a, Tintin-a a fiam zauh zauh bawk. An la inpeih lo bawk a tiin mo kawr ka hak zawh hnuah kil khatah ka ding a, Tintin-a te chuan thlalak nan a nalh tur lai vel an enkual a. 

"I mood a fu chiah lo a ni maw?" ka bula Vanmalsawma rawn ding chu tawi tein ka lo nuih a, "Ka mizia lo lutuk ang hlir a min lantir thei ţhian pakhat ka nei a a buaithlak a nih hi" ka tih chuan, "Dawt leh rul hi an dam rei lo. Dawt aiin thudik a langsar a, rul pawh hi a ruk chuan kan bulah an awm reng thei ang, mahse kan hmuh rualin kan that nghal deuh zel. A damlai na na na chuan nuam deuhin hun hmang rawh se. An la vawhlum thuai ang" a lo ti a, amah ka en laiin a ni chuan kan hma lawk a Thartei nui thler duai duai chu a en daih a, Sensiari te pawh an awm hla lo. 

"Nakinah chuan anmahni zawk sawn an la hlat ang. An thinlungah a thi hmak mai ang. Nang chu ngawi daih la, en tawp rawh" amah vek chuan a ti leh a, kan boruak a man nghal vek chu mak ka ti, ka hmelah a langchhuak leh tawh aniang. Sensiari hnen aţangin a hria a ni maithei bawk. 

"Kal ang le...chhungkaw thlalak chu han ti tak tak ila" tih paha Tintin-an a kut min pek chu ka lo vuan a, "Vani chu thla hnih hnu velah chuan helai hi a puar ve âk tawh ang a" ti a Vanmalsawman ka dul zawn khawih a tum chiah chu rang lutukin Tintin-a chuan a kut a lo benthlak sak a, a nuih danah khawih fuh a tum tak tak ni pawn ka hre lo, a fiam chak vang a ni leh pek ang. 

"Mi nupuite dul an thlek an thlek ngai lo. A khawih a khawih phei chu ka khap bur. I khawih chak viau leh lehkha ka zir ti ţuah hum reng lovin nei ve vat mai rawh" a ti deuh nghek a nih chu! Ka kut a kaih mai mai chu ho tham a ti aniang ka darah a kuah a, "Ka naute, hrehawm i ti tawh em? Thlalak zawh veleh kan haw dawn nia aw" tih pahin ka dul a chul a, a ţawng dam leh viau tawh tho si. A thinrim tak tak loh zia hriain Vanmalsawma pawh a nui ruh ruh reng a, an infiam dan hi a chang chuan ka hrethiam lo ţhin. 

"Khulai deuhah khuan ti hmasaber ang u kan tia. Naute nen in ni sia in hah palh ang" tih leh min pawm a rual a, "Vanmalsawm, ka enchimloh-i rawn kai thla ang che" thupe aw zet a a tih hnuah thlang lamah chuan min pawm thla a, mipa hoin min lo hmuh chuan an au nasa khawp mai. 

"A zahthlak thei e, keimahin ka kal ve thei reng alawm. Min dah thla mai mai teh" ka tih chuan, "Ka nupui leh ka naute hi an hah ka hlau alawm. Ka duat zia che hi aw Vanram" a ti a, min tawlh thluk pui ang tih te pawh a hlauhawm.

"I rawn pawm thla lai kha thla ka lo la a nia aw. Hah lutuk ang khan awm lo la, khatianga i hmel a awm kha chuan a nuihzatthlak daih ang" Aruatan a lo tih chuan, "Ka hah lo, tluk ka hlau a nih hi" a ti hluk a, keimaha min kal tir ve mai tur a nia. 

"I over leh lutuk a a buaithlak. Ka naupai hian min la uai rit reng reng hleinem" ka tih chuan, "I bengchheng, naupai leh pai loh a ni lo. Ka nupui ka ngaihsakna ka lantir ve dan a nih hi. Keichu hrehawm mah ila nang i hahdam chuan a tawk" a ti hlur a, chhan ngaihna pawh ka hre tawh lo. 

Kan chhuk thui bawk a a zawl chin kan thlen meuh chuan min nghat chawrh a, a khup dawmin a kun a, a taksa a la chak lo ve tho bawk si, am zetin a thaw chhuak leh hawlh ţhin a, a hnungah ka chul a, "Tui i duh em?" ka tih chuan a lu a thing ve tak nain Vanmalsawman a rawn pek chuan a in ţeuh tho. 

"In dim rawh...tlawm ah la lo la, ngai i awh leh ţep tawh ang. Damdawi ei ngai lovin kan ei thut hian taksain a zo lo ţhin a, damdawi a chak phei chuan" a ti a, phawk deuh a ka lo en lai chuan a kalsawn a, hepa hian a lo hre daih tawh em mawni le. 

Thla kan lak ţeuh hnuah kan chawl a, kan ţhu bial laih a, a laiah eitur kan dah hnuk a, a nuam ve reuh lutuk ringawt. 

"Ni tlak dawn hnaihah kan ti leh dawn a nia" Aruata chuan a ti a, kan lo pawm pui tlang vek. Thartei chuan, "Tun ang hun hi a hlimawm lai ber a nia. Naktuk aţang chuan Vani pawh delh rit tu i nei ve reng tawh mai ang. Tintin-a te chhung an fel hlauh a, mahse pasal han neih chiah hian min delh tu a tam ţhin a, vawiin na na na chu nuam deuhin hmang rawh" awmze nei deuh tak hian a ti a, "Kan duat dawn lutuk ringawt. Naupang kan nei bawk si lo a, ka ute an indang tawh bawk si, kan inah chuan tih tur vak a awm lo. Inchhung chet vel kan ti dun zel thei ang a, a nuam viau ang" tiin Sensiarin min lo chhan a, tawi tein ka nui a, Thartei ka en chuan ngeiawm deuh hian a lo nui a, eng ber nge a ngaihtuah ang le ka ti. Min thik ni berin ka hria. Ka pasal hi a ropui vak loh tehreng nen, naupai lo phei ila chu ka nei bik tawp nang. 

Thla kan lak leh chuan Thartei hmuh tur a awm ve tawh lo a, ka thawveng huai mai. Midang chuan min en ţhap a, lai viau mah ila a nalh dan tur an sawi ang chuan ka ti ve zel a, "Le, Tintin, fawp rawh le" an ti chiah chu ka tawlh hnung dawrh mai. 

"In hmuh vek laia chutiang tih ka duh lo e a" ka tih chuan, "Ti vat zawk teh ang..a rei zel" nin hmel deuh hian a lo ti a, boring a ti leh tawh a ni chek ang chu ka biang tawn tawnah a dawm a, a ţhiante lo au dual karah chuan min fawp hmiah mai. Tal chiam chi a ni tawh bawk si lo, ka dawh tawp a, kan bulah ka enchimloh-i a awm ve bawk nen, a nalh ve viau tho ang. 

A tawp nan chhungkaw kimin kan la ta ngei a, Tintin-an ka enchimloh-i a pawm a, ka pumchhunga naute nen, kim tak kan ni. 

"Khaw nge Thartei te kha" an tih laih laih lai chuan inthlak tumin car chhungah ka lut a, bag a ka phone dah chu ka en hmasaber a, dar zat en tum ka ni a, a lo dik lo nasa mai. Zuali lo lut ve hnenah chuan dar zat ka zawt ta ringawt a, "A la tlai chhe lo. In lamah rawngbawl tur an awm tho a, kan thlen chuan chaw a ei nghal theih ang. Thartei te chuan kan kal hmasa a, in lamah kan lo nghak ang che u an ti. An buai an ring deuh a" a ti zung zung a, "A ţha alawm" ka ti ve mai a, kan inthlak sawk sawk a, kan zawh hnuah Bena te kan hrilh a, Bena aiin Sensiari a lo lut hmasa zawk. 

"Vani, nizanah Thartei nen in in be tak tak em ni?" a rawn tih chuan bangbo deuh hian, "Be nang..a sawi leh em ni?" ka lo ti let a, "I message ka hmu a, screenshot thlapin min rawn thawn a, i dp vel te pawh engmah danglam a awm lo. Nizana in inbiakna ni awm tak a ni" a tih chuan, "Ka phone ka khawih lo reng reng. Tunah khan dar zat en ka tum a, mah se ka phone ah a lo in set dik lo a, chubak phone khawih hman pawn ka khaw sa lo" ka tih chuan, "Nizanah alawm ka tih" a ti nghat a, a lungawi loh hmel nasa mai. 

"Nizanah pawh ka muhil hma lutuk, Tintin-an a hria ang" ka tih chuan, "Nih leh engtin nge screenshot thlapin a neih theih a?" a lo ti a, amah ai mahin mak ka ti zawk tih a hre lo em maw ni. 

"Ka hre bik nang...phone hi ka dah tawp a, a lo khawih aniang chu. Pattern ka thlak ngai reng reng hleinem, phone ka thlak pawn a ngai zel ka hmang a, eng screenshot maw a thawn che?" ka tih chuan, "In inbiakna" a lo ti leh a, ka danglam leh vek tawh. Ka hik deuh mup ni berin ka hria. 

"Min ring leh tawh lo tihna em ni a?" ka tih chuan, "Kei angin ka nute hian an hrechiang ve lo che. Chu chu a ni ka buaina chu" tih pahin a thil dawn chu min hmuh tir a, zan lama kan inbiakna angin a lang tak tak. Engmah ka hrethiam tawh lo. Time hi a thlak danglam theih tih chu ka hria a, mahse ka ti ngai lo lutuk a ka chiang chuang lo. Ka mo chak loh zia vel ka sawi chiam a, hmeichhe lalna inchhung a nih thu te, hrehawm tawrh ngawt ngawt bak hmasak ka nei lo tih ten ka sawi a, keimah ka ang tak tak lutuk ringawt. Thartei chuan ka chhiat vek theih nan theihtawp a la chhuah tho a nih hi. 

"Thartei bulah hetiang hi i sawi dawn lo tih ka hria a, ka ring che alawm. Nimin leh vawiinah pawh i phone khawih na hun tam tak a nei a, nimin khan kan inah ka hmu bawk. In buai nak nak a in hmu ve lo a ni maithei" Sensiarin a tih chuan ka thla a muang suai suai mai. 

"Mahse, ka nute hian engmah an hre ve lo a, boruak a ţha lo tih pawh an hre lo. A pangngai vek turah an ngai a, ţhian hnai tak ni turah min la ngai reng. Nangmah nen pawh in la inkawm tur ah an ngai tho a, Thartei hian a hmuh tir a nih vaih chuan an thin a rim khawp ang. Ngaihdam min dil khan a insiamţha tak tak turah ka ngai a, mahse i hlim hmel a hmu thei thlawt lo a nih hi. Hei tunah pawh thil ţhing deuh a tih leh tawh hi. An bo hmak a, message min thawn nghal a, a rinhlelhawm ngawih ngawih alawm. Keichu min bum thei lo ang a, ka nu leh pate chu a bum thei ang" a ti leh chiah chu ka chiai nghal ti tih der a, pasal chhungte nen a boruak chhia neih ka duh reng reng lo. Theihtawp ka chhuah ang a, ka u angin ka tuar ve lo ang ka ti ve ţhin a, kan hringnunin awmzia a nei chho ţan a, rawng a nei ve zel bawk a, ka lawm ve hman tehreng nen Thartein a hmuh tir a nih chuan black and white ah bawk kan let leh ngei dawn a nih hi. 

"Kha hei hi ei rawh, nichin khan thil i ei tlem. Thei tui nen hian ei la, pum ruak chuan motor i rui ang" Tintin-an a rawn tih chuan ka ţhu ţha sawk sawk a, ka awmdan dik lo chu a hmu thiam tho aniang, "Na i nei mi?" tih leh ka pang deh a rual a, ka hlauh zia chu hria se min tlanbopui daih duh ang mawle. 

CONT...