BLACK AND WHITE-15

BLACK AND WHITE-15

"Eng buaina nge in lo neih leh tak a?" kan chhan lawk loh avang chuan Tintin-a bawk chuan a ti leh a, kan ţhian ho chu min en kual a, a hrilhhai hmel khawp mai. 

"Hmeichhia buaina mai mai mawle, ngaipawimawh duh suh" Sensiarin a lo tih chuan, "Vanram, kha hei hi ei rawh" a ti a, a eitur ken lai chu min hmeh bel chawt chawt a, "Buaina lo nei tawh suh u..Vanrami hi lo hau lo ula, ka nupui duat lai a nih hi" a ti vel a, ka lo ner nang a, "A ni lo mi?" a tih chuan nui ve bawk mah ila rilru a nuam zan lo. Thartei khan nu Ruati te a hmuh tir chuan ka chhe vek a ni mai. 

"Ei la i ei zawhah kan kal dawn nia, i chau a mi i va ngui ve?" ka bianga chul thuak paha a tih chuan, "Thla kan la nasa em a, chauh na tham alawm. In duh leh kal hmasa ula, car ah i chuang ve dawn chuang hleinem" ka lo ti a, "Kan lo zui ang che u" a ti deuh tlat a, ka hnial duh lem lo. 

"Tawlh phei teh" a tih chuan ka tawlh ve mai a, ka bulah rawn ţhu lutin ka malchunga ka bag dah chu hnunglamah a dah sawn a, ka malchungah a kut a dah a, a ngaih a ţha chiah lo aniang, "In lo inhau a ni lo maw?" a ti leh a, lu kan thing nar nar hlawm mai. 

"Zuali, Vanrami hi in biak duh loh leh chuan in chhungte thlengin ka rawn phin darh dawn a nia aw, ka nupui a ni tawh a, ka duh dan danin a thlavang ka hauh thei tawh" a ti khur khur a, a nui mang bawk si lo, a fiamthu leh fiamthu loh hi hriat a har ţhin a nia. 

"Ngah nge kan biak duh loh ngawt ang a? In innei dek dek a i ţan nghal hlur a" fiamthu a Zualin a lo tih chuan, "Ani bak nupui ka nei dawn lo a, a thlavang hauh chu ka tih theih ve tawk. A sam zai khat pawh a bo ţhen tur a ni lo" a ti vel a, ka ţhiante chuan an ning deuh aniang min chhuahsan ta daih a. 

"Tuman an hau lo che maw?" min ngaihtuah hmel taka tih pahin ka khabe ah a dawm a, ka hmel enchian tumin min kuai dak a, "Hau lo e...min hauh nachhan tur an nei hleinem" ka lo ti a, "An hauh che chuan i hmaah ka ding zel ang. Nang chu ka phen ah thlamuang deuhin awm rawh. I duh leh ţhu la, i duh leh inbingbilet la, i duh leh bungbu la, i hmaa ding tur pasal i neih tawh hi" a ti a, a va han ţul teh duah lo ţhin tak. 

"Ka hmaa ding tur ka pasal hian min ti lungngai lo se a ţha a ni mai" awmze nei deuh a ka tih chuan, "I hmui hi a lo nalh a nih hi Vanram" a ti leh ta daih a, ka mit aţanga a mit lasawnin ka hmui chu a en a, "I thlasik hmui rep la reh fel chiah lo hian a ti lang sexy" a ti leh a, ka hmui en reng chung chuan a nui suk a, hei hi a nia a ţawng duh ţhin dan chu. Thu mak pui pui lo chu a kâ aţang hian a chhuak ngai meuh lo. 

"Ka hmui a rep ngai hlawl lo" ka tih lai chuan sawi pawh ka sawi zawh hmain uar zetin ka hmuiah chuan a fawp a, reilote ka chhan let ve hnuah a awmah chuan ka nam a, a tawp duh der lo. Ţawng ka tum lahin ka aw a chhuak thei bawk si lo a, ka tum nasat poh leh a tan chuan a remchang ting a ni mai. Midangin thawm an rawn neih hnuah a inla hrang ve chauh a, thaw ham ham chunga ka hmui huh ka tuai fai chu a ngaihdan a ni lo aniang min rawn hnaih lehin ka hmui hnuai lam chu a pet leh kher a, ka kut a man bet nghal daih bawk. 

"Kha kha eng nge awmzia?" tih paha ka tal deuh laih chuan ka kut chu nghet lehzuala man betin nui chung hian min en a, "A huh khan a mawi zawk. Pasal nei tawh i nih kha, zak mah ta che Pi Vanram" a ti a, min koh dan avang chuan ka hmui ka lo tih pawrh khum a, a nui chhuak ta hawk a. 

"Pi Vanrami, i hming chiah chu hria se miin ţawngţai dam thei emaw an ti ang che a, damlo na deuh deuhin an rawn pan sup sup ang che" tiin min fiam zui a, "I zak lo emai, nangpawh pu Tinkhuma i nia, i hming chiah chu hria se a thihna a rei tawh em an ti zel ang" ka lo ti ve a.

"Zanin ah chuan ka mu mai mai tawh dawn lo aw" a ti chiah chu ka nui tawp hmak a, rum zet a ka melh lai chuan, "Miin i mu mai mai a i hman lutuk an ti zel a, buai ka duh, tun ang lai a hman lutuk chu a zahthlak" a ti a, inti zei deuh a mit a siai lai te chuan ka lo uak der a, a nuih a za viau mai. 

"Nupui nei reng chunga mut mai mai te chu mipa tan tih chi a ni lo. Pu Vana tih lungawi loh a hlauhawm a, khawtlangin min dem te ka hlau. Zanin atana ka thuvawn i hre duh em?" a tih chuan, "Eng nge?" ka lo ti vat a, "Nupui te bula mut mai mai loh. Ka thuvawn hi keimah bawkin zanah ka sawi zau ang" a ti a, ka nui ve ta hak hak a, zan hmasa lam ka mutthilh san hma lutuk kha a lungawi zan lo a nih hmel.

"Tintin, lo chhuak tawh rawh kal dawn tawh ang u" an rawn tih takah chuan midangin min hmuh hmain min fawp leh zauh a, ka thil inna bur ruak nen hmanhmawh deuhin a chhuak a, a ţhiante lam pan phei pah chuan "Nupui la nei ve lo ho hi ka hmu mawh thar riau. Ka faten velh ţah tur an duh vat dawn, nei vat vat teh u" a ti lung lung a, fate a tih takah chuan kan naute hming tur kha hrechhuak lehin ka nui sak a, Boomer tan chuan ka ti ngei ngei ang. 

In kan thleng chu inleng an lo la tam ngang mai. U Mala nupui u Dini'n min lo dawng sawng a, kan chhungte bik chu an hmel ka en chiang a, danglam a awm loh danah Thartein engmah a la sawi lo tih ka hrethiam. 

"In va rei ve...kan hah tawh teh mai a nia aw" Thartei chuan a lo ti a, kil khatah a ţhiannu nen khan an lo ţhu dun a, an hahdam hmelin keichu min en deuh bik ni te'n ka hria a, hmanrua nei ţha zawk lo se chu ka runluih sak ang mawle. 

"Han inthlak rawh u, intifai ula chaw ei pawh an peih tawh kha" pa ber chuan a lo ti leh a, kan inleng te chu zanriah rawn ei ve vek tur an nih ka ring. 

Pindanah kan chho a, kan ţhiante an awm ve bawk avangin hmanhmawh deuhin kan che zung zung a, taksa chauh leh chet zung zung ngai chu a inrem lo khawp mai. Nau ka pai tih ka hriat hma khan insawiselna ka neih awm ka hre hauh lo a, ka inhriat hnu hi chuan insawiselna neuh neuh ka nei ve reng mai. Ka thin a chhia a, rilru no thut chang ka nei a, inthunun harsa tih chang ka ngah bawk. 

Tintin-a inbual hlanin Sensiari chuan min kheuh hrang a, "Thartei ka lo ti ti pui ang. Tintin-a lo hrilh rih lo phawt la, a hriat chuan a ti chhuak lehnghal duh dawn a, buaina engmah a awm loh nan Thartei ka lo sawipui phawt ang" a ti a, ka lo remti ve mai a, amah vêk chuan, "Eng nge a duh chiah ka hre lo. I hlim hmel a hmu thei lo nge Tintin-a hi a la beisei tih pawh ka hre lo a, a huat tlat chhan che hi Tintin-a bak puh tur ka hre lem lo. A tlawmngai laklawh pawh a ni maithei a, ka nute thawn ve lo turin ka hrilh ang a, a tih luih tak leh keiman ka hrilhfiah tawh mai ang. Nang chu ti hian awm tawp rawh" min ti leh a. 

Zuali pawn min rawn fin vein, "Henu hi ka hrethiam lo, a chang leh ngaihdam min dil a, a chang leh sual a chhuah leh a, zilh deuh rawh. Inven reng ngai chung chuan kan kawm peih lo che ti rawh. A naupangchhia viau nain vau deuh loh chuan a ngam pa telh telh ang. Phone inkhawih sak phei chu tih loh tawp tur a ni" a ti a, dik ka lo ti viau mai. 

"Kan hrilh dawn nia..ka nuten an hriat chuan a chi loh. Ka nu phei chuan a hau hrep mai ang che" Sensiarin a tih laiin u Rinhlua a lo lut a, hmeichhia kan tam em avangin a lai deuh niin ka hria. 

"Hmanhmawh deuh ula hunserh hman an duh" a ti a, a chhuak lehnghal a, Olivia te ho an lo nui tet tet mai. 

Tintin-a inbual zawh ve hnuah kan chhuk a, "A ţullo" ka ti chung pawhin, "I pasal ka nih hi" a ti a, ka darah a kuah lui tlat a, miin min han chhaih ve te chu engahmah a ngai lo. 

"Tintin-a chu nupui neih nuam i ti dawn riau mai" an lo tih te chuan, "Duh ber neih te chu nuam e le" a ti mai a, ka ngaihbel nge Thartei lo ner nak chu ka hmu thei a ni. 

Hun remchang ka hmuh veleh Thartei chu keimah ngeiin ka hmachhawn a, "Hetiang thil hi eng vanga ti nge i nih?" ka ti nghal thawr a, tham loh hmel zet a min en te chuan thin a rim nghal hlur thei. 

"Ka hrilh che kha...nuam i ti bik lo ang ka tih kha. I hlim bik dawn lo ka tih mawlh mawlh kha. Kan naupanlai aţang tawhin ka chanai tur engkim i nei vek zel. Miin an fak ber zel che a, ţhianhoah pawh a mal bik ka ni ziah. Tintin-a lah ka beisei ruk reng laiin nangmah thoin i nei a, i duh leh rilru buai min ti rawh, mahse ka tawp san dawn lo" a ti salh salh a, a zam lo kher mai. A rilru a buai tak tak emaw tih mai tur a ni. 

"Ka hlimna chu dal zel pawh ni la nuam i ti bik chuang lo ang. Mi hlimna tihchhiatsak tu te hian eng hlimna mah an nei ngai lo. Dik lo deuh a thil i tih zel chuan kei hian tuar mah ila inchhir tur chu nangmah i ni. Ţhianţha emaw ka lo ti ţhin che a, mahse i ni miah lo. Chhan neiin kan bulah i awm ve a, i duh i hmuh theih nan chiah keini ho hi min kawm a, kan vai hian min hmang ţangkai mai mai a ni. Keini lahin kan ring thlap zel che a, i lo fing khawp mai" elsen zet hian ka ti a, hun ţha ka pe tawh a, a la insiamţhat duh chuan loh avangin ţhat ka chhuah luih zel nachhan tur ka hre tawh lo. 

"Ka fin zia chu i hre zel mai ang" a ti a, ngeiawm zet a nui chung hian a kalsawn a, ka thlir zui reng a, midang a fin ve takah chuan a nui hmel kha a danglam vek a, ka hmuh laia a nuih dan ang kha a ni tawh lo. 

Choka a ka luh ve chuan U Dinin, "Min lo pui rawh, sil tur ka dah zinga a te zual deuh kha lo sil la, bel vel hi chu pawnah a ni mai. Thartei te hoin sil rawh se. Niminah ka faten i pawi an sawi em ni?" a lo ti a, min hmu tu awm se chu hawi phawk min ti viau ang. 

"Sawi lo e...ka bulah pawh an awm hleinem. Nimin phei kha chu kan buai lehzual a, tumah kha ka ngaihven tak tak hman lo a" ka tih chuan, "I makeup vel an lo khawih niin ka hria a, a thin a rim lutuk an ti che a, naupang pawh ka lo hau ang. Mahse, hei hi api te in a nia, kan inpui ve a nia, nitin deuhthaw an kal ţhin. Heta an lokal ka phal tawh lovang tih zawngin ţawngkam lo nei tawh suh" a ti ta mai a, ka nui tawp. 

"Engmah ka sawi hleinem" nuih hak paha ka tih chuan, "Ka fiamthu lo a nia. Mala fate chu Tintin-a fate ve tho an ni. Ka nute pawh hian naupang ho hi an ngaina a, engtinpawn awm se an sawisel ngai lo. Hauh an ngaih chuan keiman ka hau a, midangin an hauh pawn ka fate thlavang hi ka hauh ngai reng reng lo. Beng hrep mah la an thiam loh a nih phawt chuan ka huatpui lo ang. Mahse, he inchhunga an luh ve i khap a nih chuan a pawi khawp ang" a ti deuh hmak hmak a, ka va han hrethiam lo tak. 

"A mak e U Din, chutiang chuan ka sawi reng reng hleinem. Athuhrimah, niminah naupang ka hmu lo a, makeup pawh ka nei tam lo, pakhatmah a chhe lo bawk. Inchhungah hian rorel ka tum lo a, inkal dan sa hi thlakthleng tumna ka nei lo. Thu dik lo i hre palh a nih chu" ka ti a, ka vin hauh lo bawk. 

"Ka hriatdan tak ka sawichhuak hleinem. Ka duh dan leh thil nih phung ka hrilh che a nih chu. Midangin hria se chu an ngaihdan a ni lo khawp ang, Tintin-a pawh a lawm chuang lo ang" a tih laiin, "Engmaw ka lawm loh chhan tur?" fiah zet hian a rawn ti a, choka luhna bulah kuangkuahin a lo ding reng tawh chu niin, kan lo hmu hauh lo. 

"Engmah a ni lo" U Dinin a tih chuan, "I sawi zawt zawt kha. I duh dan leh thil nih phung i hrilh a ni lawm ni?" tham loh hmel fe hian a ti a, a nui tel kher te chu u Dini tan chuan a ngeiawm viau ang. 

"Kan thusawi zawng zawng i rawn hre hman lo ni turah ka ngai" u Dinin a tih chuan, "Ka nupui thlavang hauh turin a vaia ka hriat kher a ngai lo" a lo ti let a, u Dini che lai chu a tawp chawt mai. 

"Chu, eng chin chiah nge i hriat ngai a?" a ti a, midangin an endan a dik lo a, an monu pawh hian engahmah a ngai tawh lo a nih ber hi.

"Ka nupui hriatchian a tawk" a ti a, a vin hauh lo nain a thusawi chu chhan let harsa tak chi a ni. 

"Ka sawi vek lo mai ang. Nimin lama thil thleng a ni e. Naupang a ngaihtheih loh vangin ka rilru a na ve deuh a nih kha" U Dinin a tih leh chuan, "A ngaihsak hman lo zawk a nih kha. Ka nupui hi a ţul chuan keiman ka hau mai ang, lo inrawlh ve suh u. Ka sawi lawk sa a nih chu" a ti nghut nghut a, u Dini pawhin a chhang let ta bik lo. Ka rilru a kal sual laklawh nge ka rin tawh loh lutuk vang pawh ka hre lo, Thartei a inrawlh ka ring tlat a, hlimna min thlen ţhin tu ka ţhiannu kha min ti chhe vek thei tu a ni der tawh. Kan hmelma te hi zawn chiam an ngai lo, kan hmuh phak, kan ban phakah hian an lo awm reng zel. 

"Ka lo tih pui ang che" tih paha ka bula Tintin-a rawn ding chu, "A ngai lo kalsawn rawh" ka ti a, nam sawn tum ngial mah ila ka namsawn zo lo. 

"I ţap elo?" min ngaihtuah hmel fe a tih pahin a rawn kun hniam a, lu ka thing ne ne a, "Ţah nachhan tur ka nei lo" ka ti ve tak nain ka rilru a na takzet a ni. Rilru no thut chang ka nei bawk nen, min zah lo lutuk a u Dinin min chhuahchhal sak sak ngam te khan min ti na a, an vai hian engahmah min ngai lo vek niin ka hria. 

"Chhan awm lovin i mittui a tla tihna mi? Kha a luang kawi nguai alawm, jordan lui chu nep te, ţap tawh suh le" a ti a, u Dini a la awm ve bawk nen, inthlahrung deuh hian a insut hraih a, hmeichhe ţah belh ti a sawi tur ka ni lo, a tawpkhawkah lo chuan ka mittui a tla ngai lo, kan boruak tawn mek leh ka mood inthlak chhen hi a inrem hlawl lo a ni. 

"Ţap suh..naute hian hrehawm a ti ang" tih zawngin min thlem a, a kut phah hlai hlup chuan ka biangah dawmin ka chalah a fawp zauh a, midang mitmei a veng ve tawh lo. 

"Nakinah kan sawi dun dawn nia" a ti dam thlap a, "U Din, hrechiang lovin engmah sawi ve tawh suh aw, buaina kan duh lo. Lungawi lohna i neih chuan keimah zel min hrilh tawh rawh. Dam tumin kan bei ţan chauh a nih hi, natna belhchhah thei kan duh rih lo" khauh zet hian a tih zawm leh a, a sawi zo chiah, kan beih hram hramna hi engmah loah an chantir ka hlau ţhin. 

Inleng awm lai reng pawn u Dini chuan nu Ruati, ka nu ti tawh mai teh ang, a bek bawr sar sar reng a, a thusawi hre pha lo mah ila kan nupa min hek dawn tih chu chiang sa a ni. Ka ngaihven duh lo lui tlat a, thiam lohna ka nei lo miau a, inrawlh sek ka tum bik lo. 

Inleng an haw a, kan ţhiante pawhin min haw san zo tawh. U Dini leh u Mala te nupa an la awm a, an fate chu ţhutthlengah an muhil bâm hlawm mai. 

"Mu dawn hnai ang u, Vani te pawh an chau ang" ka pain a tih chuan, "Vani, chhung tin hian kal phung leh tih dan bik kan nei a, i zawm thei angem chu ka hre lo, mahse kan chhung zingah i tel ve tawh a, zawm ve ngei ngei a ngai ang aw. Tumah hian kan ti hrehawm dawn lo che a, kan kalphung zawm ve hi i tih tur chu a ni mai" awmze nei zet hian ka nu chuan a lo ti a, "Ka hria alawm" ka ti sap a, ka zak ru angreng khawp mai. 

"Naupang hi ninhlei rual lek an nia, i pawi an sawi chuan hau la, heta an lokal chu khap duh suh" a ti leh chiah chu Tintin-a zawk a ding hluai a, mitmeiin lo khap vat mah ila, "Mu ang Vanram, pawimawh a awm tawh lo" tih leh ka kut a chelh a rual a, "Vani hian lokal tawh suh u a ti maw?" hriatthiam loh hmel zet a u Ziran a lo tih chuan, "Chutiang deuh chu" tiin ka nu chuan a lo chhang a, u Mala ngaihdan a nih loh hmel khawp mai. 

"Chutiangin a ti awzawng lo. U Dini dawt phuahchawp a nih kha. In hriatchian duh leh naupang ho saw kaitho ula zawt rawh u. Ţawngthei lo tumah an awm hleinem, an sawi thiam vek tawh. U Din, i fate ho saw kaitho la va zawt chiang ta che, ngatinge Vanrami ngawt i mawhpuh a?" ka pasal chuan a ti khur khur a, boruak a ţang leh at tawh a, buaina in min zui nghal mai chu a mak a, a awihawm loh rum rum zawk. Thartei thil tih vek bak a nih ka ring lo. 

"Mit a hmu tu ngeiin a sawi a ni e. Mi pakhat chauh pawh an ni lo. An hmuchiang a, an hrechiang bawk" u Dinin a ti chiah chu Tintin-a chuan min thlah a, naupang ho mutna lamah chuan a pen phei pawk pawk a, a unaute ho pawh an ding uaih hlawm tawh. Buaina a awm mai ang tih hlaua thaw dep dep a ka en reng lai chuan naupang ho chu, "Hey, tho teh u, i nu hnenah sawn va insawifiah rawh u" tih pahin a sawi nawk nawk a, a ţhen lah dim lo zetin a pawt tho lawp a, "Laltinkhum, mut tir mai mai rawh. I rui lehpek tawh em ni?" u Mala'n a lo tih te chuan, "Lo inrawlh suh i nupui khan thudik hre rawh se" vin zet hian a ti tuar a, u Rinhlua va kal hnai chu a lo nam sawn dawrh a, naupang ho chu kaitho zawm lehin chhuatah a din khawm tir a, an mit an nuai a, an ţap pur hlawm mai. 

"Apate, tlem tlemin ka zung" u Mala leh u Dini te fa te ber, Bawihpuian a tih chuan, "Chutiang sawi a hun lo, i nu saw thudik va hrilh rawh u" a lo ti leh a, pakhat lahin ţap ţuauin, "Ka zung tam tial tial a nia" a lo ti a, zun a cheh tak tak. Rilru dawih chi, hrisello zet mai a ni a, kan ri hlut kha a zo lo a nih hmel. 

"Tintin, i va nasa em em ve. Naupangin an hlauh chuan duhtawk mai ta che. Vani hnenah khatiang khan ti tawh suh kan tia ţha deuhin kan hrilh mai alawm" ti pahin u Dini chu a kal phei a, a fapa dawm ran chung chuan, "Hauh pawh kan hau hleinem. Hetiang a nih chuan nangmahni zawk hi in awm reng thei nang. Thinrim a kan sawi loh miah loh pawh i haw zel a nih chuan engtin nge nia nga? Hmanlai ang phei kha chu nise in inkhung hran a ngai ang chu" a ti leh chiah chu Tintin-a chuan a kawr awmah a ţhamin a pawt nawk a, a kut a lek uaih a nih chu! 

Ka chhing sawk a, an buai zui luai luai a, kut em chu a thlak lo. "Laltinkhum, ka nupui kutthlak i tum maw? In buaina a ho tehreng nen engati nge khatianga i khawsak chiam?" tiin u Mala pawh a inrawlh ve tawh a, u Dini a ding ngawi ran thung. A ţawng hnem em a, thinrim pawh nise kan natna kha a thawi pawhin sawichhuak lo se a ţha tur. Hiv+ kan nih avanga min hmuhsit rukna a ti lang nghal der chu a nih hi. 

"Vawikhatmah ti leh tawh suh, a thleng nawn leh a nih chuan jail ah ka dah ang che" a ti a, Tintin-a chuan inpet ruh ţeuh chungin a kut a hum ruh a, thinrim vanga a bek pawng ţalh ţalh te chu a hmuh chian theih hle. 

Inbengdaih tum ni awm takin a mit a chhing tlat a, keichu ka inrawlh duh lo hrim hrim. Pawi nasa zawk a thlen ka hlau a ni. Am zetin boruak a hip a, thawk chhuah hawk pah hian, "Sawi rawh u..Vanrami sawn lokal tawh suh u a ti cheu em?" naupang ho bula a tih chuan lu an lo thing nar nar a, Bawihpuia bawk chuan, "Lo leng ziah rawh u a ti" a ti a, chutiang pawh chuan ka ti chuang lo. Ka be lo hrim hrim a, a hlauh luatah dawt a sawi a nih ka ring. 

"Apatea te kan hmu lo. Chuan monu pawh kan hmu lo, thlalak lai chiahin kan hmu" an upa berin a lo ti ve bawk a, "Monu sawn a hau cheu em?" Tintin-an a tih leh chuan, "Hau lo, kan hmu lo" an lo ti leh a, "Nih leh kan pindanah in kal em?" a ti veleh a, "Kal lo reng reng" an ti chu ka thaw huai mai. 

"Kan pindanah in kal lo a, monu sawn a hau lo bawk che u tiraw?" a tih leh chuan an mi lai, Benben-a chuan, "I â ni apate, api in mi pindanah luh tawp loh tur a ni vek" a lo ti a, Tintin-a chuan min en kual a, u Dini ah a tawp chat a, "Sawi duh i la nei em?" deusawh hmel zeta a tih chuan hnuai lam a bih a, a zah hmel khawp mai. 

"Aw le" u Rinhlua chuan a ti hluai a, pro pastor ber a ni a, thubuai a rem dawn niang ti a kan en ţhap lai chuan, "Muttui ule...inhau tawh lo ang ule" a ti a, Tintin-a meuh pawhin nuihza insum zetin a hmui hnuai lam a pet a, u Rinhlua hi chuan sawi tur a hre thlawt lo a ni. 

"In ho hle mai..Vani pawh a zahawm lutuk alawm. Niminah an innei a, vawiinah buaina in siam sak nghal a, u Dini pawh chuti chuan an ti ti ser ser lovin i fate zawh hmasak tur che alawm. Ţul hawt loah kut in inthlak ţhelh a nih kha. Tun hnuah chuan ching tawh miah suh u, miin engpawh sawi rawh se, midang in rin chhiat hmain thudik zawng hmasa rawh u" u Ziran a ti a, u Zira leh u Rinhlua te hi ţul tawpah lo chuan an inrawlh ngai lova, an pahnih a an ţawng chhuah ve tak vang aniang u Mala pawhin engmah a sawi zui tawh lo. A naupang lam an ni chung hian an ute meuh pawhin an zah tlat. 

Pindana kan luh rual chuan, "Thartei vek aniang" ka ti chhuak sap a, a kawr a phelh hnuah Tintin-a chu khumah a lawn kai a, "In ţhiannu Thartei maw?" hriatthiam loh hmel taka a tih chuan ka lo bu nghat a, "I hlim bik lo ang min ti alawm. Ka hrehawm theih nan chuan engpawh a ti duh ang. Rawng kan neih ve a duh hleinem, ka nun hi chul rup reng se a duh a, ka hlim ve a phal lo" tih paha khuma ka mu ve chu min lo kuah a, "Engmah hlau suh, i hlim ang. Hmun chul rupah pawh awm la hlimna leh rawng mawi deuh ka zawn sak tho ang che" a ti a, a biangah chuan dawmin ka nui lui a, "Chutiang tur chu a ni. Tun aţang chuan a var lamah chauh kal tawh ang aw. Rawng var hian eng rawng pawh a cheimawi a, chuvang chuan rawng var lamah chauh min kal pui la, khawiahmah min pen san suh aw" ngenngawl zet a ka tih chuan a biang ka dawmna kut chu lain a fawp vang vang a, "Ka peng lo ang, i kalna zel ah ka kal tawh ang" a ti zawi ruih a, buaina tawk zo chiah mah ila ka hlim veng veng mai. 

Ka hmuiah chuan duhthlup a min fawh pahin ka kawr chhungah a kut a zen lut a, ka dang duh tawh bik lo. Ka chhan let ve rual chuan a duhthaw sauh a, ka hmui hnuai lam chu a pet leh ţhin a, nuam ka ti ve tih a hriat chuan ka kâ chhungah a lei a rawn hawl lut a, thawk a rang a, kan taksa a danglamna awm chu kan inhriatsak tawn ve ve. Ka khabe leh nghawng velah a fawp thla zel a, ka insum zo lo chu ka rum chhuak hial a, a nupui ni tawh mah ila a ta ka nih zia a lan tir nawn leh a, ka duh ang takin a fimkhur hle bawk. 

Zing ka harh chuan dar6 chiah chiah a ni a, thawh ka hai tawh bik love. Thlan nen a mut chu tiin zanah khan ka inbual a, zingkar a inbual a ngai em love. Hmai ka phih a, mahni chauh a thawh chu hreh viau mah ila Tintin-a a la mu tui em a, ka kaitho duh ta lo. 

Ka nu leh ka pi te chiah an lo la tho a, min hmuh rual chuan, "Thingpui siam sa a awm, va inthlit ve mai rawh" a lo ti a, a lungawi chiah lo niin ka hria, ka ngaihbel mai mai a ni thei tho bawk. 

"Sensiari lah hi kaihthawh hma a mu a, nula pumpa duh chen chen mut tur a ni ngai lo. Hetiang chuan pasal a neih hunah hrehawm a ti lutuk dawn a sin" tih hlak hlak pahin inchung panna kailawnah a pen chho hlawk hlawk a, ka pi nen kan ţhu dun ran a, ka ipik ru lutuk chu ka thaw leh halh ţhin a, mi chhungkua hi thil ho te hmangin kan ti buai vek thei tih ka lo hre ngai hauh lo. 

"A nuam i ti em? Keini chhung chu kan vin reng mai a nia" ka piin a tih chuan a beng bulah, "Aw..nuam e..nuam ka ti lutuk" ring deuh hlek hian ka ti a, "Ka sam hi han khuih teh, ka lu lei hi a thak ţhin a, Tintin-a a awm loh chuan tuman min khuih sak peih tak tak ngai lo a" a ti a, thingpui ka in sawk sawk a, ka pi sam ka khuihsak hnuah pawh ka nu te chu an lo la chhuk lo a, rilru a nuam lo duh khawp mai. 

Naupang an rawn tlan lut ţak ţak a, Benben-a chiahin min bia a, midang chuan min melh ralh a, min be lovin min kal pel mai a, "Anute ka ril a ţam" Benben-an a tih chuan ka tho tharh a, a nutei tur ka nih leh nih loh pawh ka hre lo, keimah bak midang an awm si lova, keimah min koh naah ka ngai tawp. 

Thingpui ka chhuan leh laiin Tintin-a a rawn lang ve hlawl a, hnunglam aţangin min kuah hlu hlu a, a hmui chuan ka beng leh nghawng vel te a nul kual a, "Kalsawn rawh i nu te an lo lut thut ang" ti mah ila, "Pawnah a awm leh daih tawh ang" a ti then a, "Teuh lo mai, Sensiari kaitho turin a kal a, a lo la let lo" ka tih chuan a nui hawk a, Sensiari hnenah eng eng emaw a sawi ka nih ka ring a, ka ngaihtuah dan chiah hian Tintin-an a ngaihtuah ve ka ring bawk. 

"Tintin, ka sam min han khuih sak teh. Olive ol hi min hnawih sak la" ka piin ring deuh taka a rawn tih chuan, "A beng aiin a aw a ţha a. Ka pi hi a nulat lai chuan a zaithiam teh a nia aw" intithei fahran a a tih chuan, "I pi hi i ngai berin ka hria" nui var var chunga tih pahin ka inher a, a nghawng a ka kuah rual chuan ka kawngah min lo kuah ve a, "Aw ka ngai. Ani pawh hian min ngai. Midangin min rin miah loh lai pawha min ring tlat tu a nia. Ka neih hlu ber a nih hi" a ti a, "Nih chuan ka tan pawh a hlu ve tihna a nih chu. Va kal rawh va khuih sak rawh" ka tih chuan, "Thingpui min lo siam kep la aw. Ka nupui duhtak leh kan naute hi an hlu bawk a" uang zet hian a ti a, ka kawng a dawm reng chung chuan a ţhu hniam a, ka dul chu a fawp a, "Biru reng lo hian lo chhuak vat ang che. Keichu min ngaihtuah duh suh, i nu hi rawn chhun em em la a tawk mai" a ti a, chhanna ngaithla ni awm takin ka dul zawnah chuan a beng a dawh a, chutah pawisawi loh hmel zet a min rawn en in, "Anu chu a hmelţha a, anu bak ka chhun duh lo a ti a nih chu. Keichu hmelchhia min ti aniang" a ti vel a, "Nangmah bak a chhun lo ang che. Kei aiin i hmelţha daih zawk" ka lo ti a, ka dul chu fawp nawn lehin min kuah zui a, a lu ah ka lo chul a, a pian hma hauhin a pa nen a kan inkar ti nghet tu a ni thei a, lo piang tawh se ka ti kher mai. 

"Tintin, ka lu a thak nasa tawh hei olive ol pawh a ro zo dawn" ka pi in a rawn tih leh takah chuan a tho nalh a, "Olive ol ti ziah suh olive oil ti ve mai rawh, oil te chu ro pawh a ro thei hleinem" a ti phei lung lung a, "Phiar kak kher a ngai lo, i bakilh te hi a par chuai hi. Phiar kâk a bakilh kilh vel kher te chu, ka pi, pasal min um san i tum a mi?" ka pasal bawk chuan a ti leh a, ka pi ţawng erawh ka hre thei vak lo. 

"Ka phal reng reng lo aw...pasal i um chuan ka rawn um ve ang che. I lerh phah zel dawn chuan puan pheikhawk leh bakilh mawi pawh ka lei tawh lo ang che" a ti a, a pi a chhaih vel dan ngaithla reng chung chuan chhangthawp ah butter ka tat a, keimahin ka nui ka nui mai. 

"Ka thun chiang viau ang" tih pahin choka ah a lo lut leh a, phone a rawn keng a, naupang ho eitur ka chhawp sak lai chuan, "Vanram, ka phone i ak em?" a rawn ti a.

"Ak nang...pindanah a la awm aniang, ngati nge?" ka lo ti var a, "Ka pi mawle..a phone tui a zo a" a ti chu ka hrethiam lo angreng. 

"Phone tui a?" ka tih chuan a ner nawk a, "Recharge a ngai. A hman theih tawh loh chuan a phone tui a zo tihna a ni mai. A sawi thiam ve dan a nih chu" a tih takah chuan ka nui a, ani pawh a lo nui ve a, thingpui a in ve hnuah phone la tur chuan inchungah a chho a, ka nu leh Sensiari pawh an rawn inzui thla ve chhat chhat mai. 

"Thingpui a awm aw" ka lo ti a, nui var var chungin Sensiari chu a bu nghat a, hmun ka phiah zawm leh mai a, "Vani, engtik thleng nge chawlh i neih?" ka nu'n a lo tih chuan, "Tunkar ka chawl thei, engati nge?" ka ti he haw a, "Ka ţhiannuin an lo a feh puiah min sawm a, lokal ve ang che aw" a ti a, min en ran bawk nen, hreh viau mah ila phur âwm taka lang chung hian, "A va nuam dawn ve..kan kal dawn nia" ka ti a, chhungril lam chu a ţap nghal rawih rawih mai. 

"Chaw nawi a tam a, vawk chaw chhum a la ngai lo ang. Tinkhuma hman hunah vawk chaw zu pe rawh u aw" a ti leh a, ka lo aw veleh mai a, mo ka nih miau avangin ka tih tur a ni. 

"Vawk vulh hi a buaithlak, Tintin-a lahin a kawmngeih tawh a, inneih hma te khan sa dang lei vak ngai lovin talh ang u kan ti ve a, a phal tlat lo. Nu, vawk hi chu ti ral ila vulh tawh lo ang u. Vani'n hna a nei a, Tintin-a lah dawrah a buai a ngai tawh a, kan enkawl hman lo. An nupa tibuai zual tu tur mai mai" Sensiarin a tih chuan, "In enkawl peih loh leh keiman ka enkawl anga a ni mai" a ti a, a lungawi loh hmel lutuk chu a nuam lo zawk. Keimah vangah ka ngai a, nizan aţang khan a dik thei tawh lo hrim hrim. 

"Kan peih lo pawh a ni hleinem, kan hman lo alawm" Sensiari chuan inthlahrun hmel tak hian min en a, ka bawlhhlawh ruh sa paih turin ka chhuak daih thung. 

"Vawk vulh mai mai buaina tham a tling lo. Thatchhiat vang bak a ni lo. I ute nupa pawhin zingkarah an ti hman vek. Awm mai mai hi an tan a ţha lo zawk" inchhung ka luh leh laiin nu Ruatin a lo ti a, ngawi rengin ka kalpel a, choka ah tih tur ka zawng a, a vang hrep lehnghal. Hmarcha te ka rawt ta vel mai mai a, hlim luih ka tum a, khatiang teh nuaih kha kan boruak ni mah se nuih luih ka tum tlat a, hriat loh der ka tum bawk, a chhan ber chu beiseina ka neih vang a ni. Vawiin ang reng hi a ni dawn lo, naktuk hian eng nge a rawn ken dawn kan hre miau lo a. 

CONT..