BLACK AND WHITE-16

BLACK AND WHITE-16

"Viral load a ngai a, Vanrami nen hian kan chhuak lawk dawn a nia" tiin tukţhuan eikham ah Tintin-a chuan a chhungte a hrilh ve a, ka nu lahin a lo hrethiam lo, "Sensiar, viral te chu a lar hluai tawh tihna a ni lo mi? In inneih video a chhuak tawh em ni a? Viral tawh sa load load a ngai em ni?" a ti a, a ţeu hlar mai. 

"Eng eng emaw hi chu i hre ve mawle, i hre kim ngai mang si lo. I hriat vek hma chu min hau ziah suh ka tih fo kha. Kan natna avang hian viral load reng a ngai, ka sawi vek tawh" Tintin-an a tih chuan, "A va buaithlak ve, a chang leh damdawi lak a ngai i tia, pahnih a kal kher a ngai em ni?" a lo ti leh chu ka thaw hak a, kan in lo nawm zia ka hrechhuak uar uar mai. 

Ni e, kan in kha boruak a ipik ka ti ţhin, mi chhungkua ka awt ţhin a, an hlim hmel bik tiin vuina tur ngawt ka zawng ţhin. Mi chhungkua ah ka han mo ta cheng a, kan in aia a nawm bikna reng ka hre lo. Kan inah kha chuan ka inthlahrung ngai lova, ka ei chak zawng apiang ka lam ngam a, duh hun hunah ka chhuak a, hreh miah lovin ka haw leh a, mi in a inthlahrung deuh a awm nen chuan a in thlau lutuk ringawt. Mahni in aia nuam a lo awm hauh lo tih ka zirchhuak nghal pang mai. 

"Kan pahnih a kal kan tum chuan a ngai tihna a ni mai. Vanrami hi i en hrang nghal ringawt aw, ka duh miah lo a nia" Tintin-a chu a rukin ka kheuh zeuh a, thil dang vang a ni teh chiam lo, U Dini'n min hek nasat vang a ni. Ka mo tirh aţangin ka mopui nu in min mil lo nghal pang mai. 

"Kal rawh u, rei reng reng suh u" a tih hnuah kan chhuak a, "Ka nu hian eng nge a hriat le? Inneih dawn a a phur nen inneih zawh rualin a danglam nghal vek. U Rinhlu, nimin a kan chhuah hlan khan eng thil chiah nge thleng a?" tiin pawn a lo awmchhun kan pro pastor ber chu a zawt a, motor a lo hru fai hliau hliau lai chu a tawp chawt a, kan lam lo hawi pah hian, "An ţhut mai mai kha mawle" a ti ban charh a, ka pasal thinchhe ve tak chuan kutthlak mai duh hmel te pawh a pu alawm. 

"An ţhut ve bawk lohin, kan chanchin an sawi em ka tihna a nih chu. Kan rawn haw khan an danglam daih a, ngati nge hetiang hian an awm a?" a ti leh a, u Rinhlua chuan, "Inleng te chuan an zawh ngei kha, ka ngaithla hran lo" a lo ti leh a, "Ka chhir awk dawn che em mawni le, engmah zawh tlak loh. I kal leh hmain hrilh rawh aw, an mo te ah rau rau thlei bik an neih dawn chuan Vanrami te inah makpa chhungkhung angin ka awm dawn a nia. An zak viau ang" tih leh a bike dahna lam pan a rual a, "Hrehawm ti suh Vani, a nuam i ti mai ang" tiin u Rinhlua chuan min hnem a tum ve ngial a, nuih luih pahin ka bu nghat a, a thusawi khan rilru a tih nawm phah chuang lo reng reng. 

Kan tih tur ang ang te kan tih zawh hnuah restaurant ah kan chawl a, "Kan rei lutuk ange a inthlahrunawm" ti mah ila, "A ho mai mai, an awmdan kha a dik lo, u Dini khan sawi a nei chiang alawm" a ti a, min bia ni pawhin a lang lo. 

"Ngawih san mai mai rawh. Khatianga i tih vak khan ka tan a nuam lo zawk a nia, a sawi dik chiah alawm, kan natna ang hi tuman an nei ve duh hleinem" ka tih chuan, "Duh vanga nei kan ni lo" a ti nghut a, a mitmeng chu a hriam hraih a, a thinrim a nih ringin ngawih ka chuh ta zawk a. 

"Ka pi chiah hi a dik. U Rinhlua hi chu a chut mual mual ringawt a, sawisel leh fak luam a nei ngai lo. U Zira hi dik a tih lamah a ţang a, midang hi an buaithlak tlang. Hlau lo la, tim dui reng suh. Zah lo chuang lo bawk la, zah tak chungin i dik naah chuan chhang let hreh suh" inla puitling deuh hian a ti ve duah a, "Laltinkhum, zahmawh lawm pa" tih riin a zui zat a, a va inhmeh lo ţhin tak. 

Kan lam panin hmeichhe pakhat a rawn kal phei zan zan a, ka hriat zawng a ni lem lo. Lu lian lam, sam sei deuh, ngo vang mai a ni. Kan dawhkan bulah chuan dingin Tintin-a darah a beng dat a, "Pawnchhe zawrhna group ah khan zahmawh kan sawi chiahin i rawn lang ţhin. Eng nge in tih a?" zangkhai vah hian a ti a, keichu min hria angin a awm lo. 

"Thil kan ei a nih hi..i hmu lo mi?" ka pasalin a lo tih chuan, "Ehe...hei hi innu chu tihna mi?" a ti a, min kawk va bawk. 

"Nih hi...hmelţha i ti em?" intihtheih hmel zet hian a ti a, "Hmelţha ele...awii ha kan inkawmna a rei tawh nen a hmel pawh ka lo la hre ve hleinem. Karleh ah ka haw dawn a, ka haw hmain chaw ei khawm ang u aw" a ti zat zat a, "Kan nu hi dil la" nuih paha ka pasalin a tih chuan, "A phal sa ah ka ngai, i rawn tel loh chuan i chak lo ngawt ang. Buai vang liau liauin inneih naah ka lo tel thei lo a, chaw eikhawm hunah chuan kim ţhap ang u" a ti a, Tintin-a darah chuan a kut a dah reng a, a ngaizawng ta mai emaw tih tur a ni. 

"Pa ka nih ţep tawh hi, chaw eikhawm hman pawh ka ni tawh lo. Zan reiah diaper ka thlak turh turh ţep tawh" a tih chuan phawk fe hian, "Ehe...in puk lawk tihna mi?" a lo ti leh a, in ngam tlak hmel viau si chanchin a va hre lo em em ve mawle. 

"Puk lawk lo ila kan inneih niah biakin an kalh nang. Hall ah kan inkutsuih, mipui pawh yma ţhutthleng ah an ţhu" tiin a ruh lang rawtin a hrilh a, "Ngati nge tuman min hrilh ve loh a, pawnchhe zawrhna group ah lah chutiang an sawi bawk si lo. Thlalak kha chu ka hmu ngei a, ka lo chik lo reng reng. Innu hmel takngial pawh ka hre lo a nia. Aaa...engpawh chu nise chaw eikhawm naah chuan lo tel ve ang che" a ti leh tawh a, a ninawm reuh mange. 

Tintin-an chunu a en rual chuan aw ka lo thian kharh a, aw then dan pangngai a ni lo, strict deuhin a ni ka aw chu ka lo then ni. Ka pasal pawh a hawisawn vat a, a key a man tlat alawm. 

"Nupui neih tawh chuan chhungte nen a chaw eikhawm bak a rem tawh lo. Min sawm lui duh suh u" a ti a, min rawn enin a nui a, ka lo melh vak thung. 

"I over vel emai, Ben-a ka rawn kal tir tho ang" a tih chuan, "Ka lokal thei lo ang a tih kha" tiin ka lo inrawlh a, "Ka pi te inah alawm" a la ti ngam nia!

"Khawi hmun pawh nise ka dam ţha lo a, a chhuak thei lo" ka ti hmak a, dawt ka sawi lo, ka kawng leh hnung zang te a na ut ut reng a, inchhung boruak a hrehawm bawk nen, mahniin ka awm peih teuh lo. 

"Hnawk nghal reuh hle mai" duhdah zet a a tih chuan, "Vawikhatmah lo sawm tawh suh u" ka ti ve ngat a, min ei loh hmel zet hian a meng kual ralh a, "Kan sawi ţha ang" tih leh kalsawn a rual a, a awm vel danah chuan ka chhan dan kha ka inchhir lo telh telh, a phu tawk chiahin ka chhang ka ti mai, ka hmai zah bik vak nachhan tur ka hre lo. 

"Ţhian i nei maksak thei si, mood a ti off vek" vin hlar a ka tih chuan, "Bena ţhiannu a nih kha. Ka ţhiante chuan i hmel mai bakah i phone number thlengin an by heart vek. Min zui nasa ho phei chu maimitchhingin in inah an kal thei vek tawh" a ti a, ka tum bar reng avang chuan nui ruh ruh chungin soup a suak a, "Aahhh ti rawh le, ti tau lo la, naute ril a ţam a nia" a ti vel a, mi mit kan lak hmain ka ang a, a nih loh chuan a tawp san leh dawn chuang lo.

"I thikthu a chhiat hian i lawmawm...ka thinrim ngai lo, ka lawm daih zawk" zangkhai deuh a a tih chuan ka lo ner nang a, "Ka ti tak tak, engahmah min ngai lo la i thikthu a chhe dawn lo. Min hmangaih a nih kha Vanram" inringtawk zet hian a ti a, "Chu te chu chiang sa alawm. Hmangaih lo che ila ka nei nang che. I chhungte sual sual nen" ka ti a, ka hmui ka chip nghal hmak, ka ţawng sual chiang lutuk tlat.

"Het" a lo ti vat a, nui miah lo a min en takah chuan, "Ka thinrim a duh aiin ka ţawng thui a nih kha" ka ti a, ka sawi tum a ni lo tak tak alawm. 

"An sual hran lo, ka hriatah i chanchin a chhe zawngin an sawi ngai lo. Din ramhuaiin a fuih pawrh a nih kha" a lo ti a, ning viau siin ka hriatah a fak leh ang lawi a, hepa maksak lutuk hi hriatthiam loh chang ka ngah mai. 

"Ka nu'n a ţhiannu te lo a feh puiah min sawm a" zawi tea ka tih chuan, "Ka lokal ve ang" a ti a, kal suh pawh min ti lo. Diktak chuan chhuk leh chho a tam thei lutuk a, motor a thlen theih a ni ngai si lo, Pathian zarah kut hnathawh ngai miah lovin ka seilian chho a, ka hreh ngawih ngawih. 

"Min dil sak rawh, Vani hruai ve suh ti la, ka nuam lo ropui sia, dam ţha ver vawr ila chu ka hreh lo. Na nei chung chuan a huphurhawm emai" ka ti niah niah a, ka sual vang a ni hran lo, naupai laia na hi chu a na bik tlatin ka hria. 

"Ka sawi ang a, a remtih loh chuan ka lokal ve ang. Ka paw char char mai ang che. Inhauh vak chuan nangmah bawkin nuam lo i ti leh ang" a ti a, a dik khawp mai. 

"Ka hah vek tawh...damdawi hian min hneh ţhin bawk si. Kan natna hi kal pah mai mai a la har tlat a, nau ka pai lehzel bawk nen, dam ţha tal ila ţha tur" ka ti vang vang a, U Dini hi a mona a rei tawh a, fanu an chiaha an en a ni. Ka nu phei chuan a thu a khawi a ngil a zawm chang a nei a, a duh phawt chuan a fuih hneh khawp ang. 

"Kan sawi dawn nia" a ti leh mai a, ka kalna apianga buaina a awm zel mai hi Pathian hnen a vui chang te ka nei ve a, ka nun hian rawng a neih ve a phal lo ah te ka ngai a, ka nun hi chu a hrechiang apiangin an awt lovang. 

In kan thlen chuan an lo awm kim ţhap tawh a, thil tih chhung a rei a, restaurant ah kan chawl kawi bawk nen, ka pa takngial pawh office a lo bang fel der tawh. 

"In va rei em em ve" ka nu'n a lo ti nghal pang a, "Kan thu lo e...kan duh dan danin kan ti thei hleinem. Nang aiin kan ning zawk" ka pasalin a lo tih khalh a, u Dini te nufa pawh an lo awm leh ran tawh. 

"Eng emaw han sawi ila i pawr nghal vak zel a, thil sawi ve ngam pawh a ni ngai lo" ka nu'n a tih chuan, "Ee....ngam loh i nei lo. A nulat lai phei chuan a huaisen lutuk a tuman an rim ngam lo an tih che kha. Ngaihtuah ta che, tunah pawh kan veng mihlim ho boss i nih hi" Tintin-an a lo ti a, ka nuih a za angreng. 

"A mihlim ang zawng hian min hmer ziah suh Laltinkhum" vin zet a ka nu'n a tih chuan, "Mihlim alawm i nih. Lamtualah phei chuan i ke a vir thei" uangthuang zet a tih pahin a jacket a hlip a, u Zira a lo nui chhuak ve hawk hawk mai. 

"Hetiang hi a nia min tih duh dan chu. Thu ţha engmah a hrilh theih loh, hauh theih pawh a ni lo, an awm awmin awm rawh se" tih pahin ka nu chuan a enkual dan dan hlawm a, pui tu a zawng ni awm tak a ni. 

"Nimin aţang tawhin thinrimna i la zawng char char a, Vani pawhin hrehawm a ti anga sin. Lo a feh puiah te i lo sawm a" Tintin-an a tih chuan ka lo chhing sawk, pawi tak a ni. Tun tut tut a sawichhuah kher a ţullo a sin mawle. 

"Hna hahthlak thawh tur a awm chuang hleinem, chawhmeh te kan hawn ve anga, thlai thar ei te pawh a chakawm alawm. Mahnia kal tawp aiah ka sawm a nih kha" a ti a, hnar a lian duh khawp mai. 

"Nakinah kan sawi dawn nia" Tintin-an a tih chuan ka thaw huai a, diktak chuan an in a mo hi ka hreh em em lo a, ka nu pawh ka hriatchian sa a nih vang leh min duhsak tak tak ţhin tu ni a ka hriat vangin ka huphurh lem lo, fuih kawi awlsam tak a ni tih ka lo hre ngai hauh lo. 

Zanriah kan ei te chu kan inmelh ralh ralh hlawm ringawt a, Tintin-a ber chuan ka duh ang ka ei ngam loh hlauin ka chawhmeh duhzawng min suah sak a, ei ţeuh turin min ti reng a, midang hriat a min ngaihsakna a ti lang chu a lawmawm viau rualin ngaih loh lamah an ngaih ka hlau tho bawk si, ka nun hi chu a hahthlak tih bak sawifiah vak ngaihna ka hre lo. 

"Ka pi chu chaw a ei thei em?" u Mama'n a ti ve mial a, "Tlem chu a ei a, vawiin chu a nuam lo zual deuh a, a ţha leh mai ang" tiin ka nu'n a lo chhang thuai a, an sawi hmangah chawhnu lamah kha chuan a ţhu chhuak peih tawh mang lo a, ka ngaihtuah angreng. Naktukah chuan zing nilum a ai leh peih beisei phawt ang. 

Pindan a kan lut chu ka ţhu hnawk a, ka chau a ni. U Dini'n engamah hmaa min huat ngawt chhan hi ka hre lo a, ka nu pawh min belchiang hmasa lova mi thusawi apiang a awih zel hi ka hrethiam lo bawk. Sensiari nen tet te aţanga inkawm kan ni a, ka mizia chu hre tur a nia sin. Ka en ngai ka en tlawk tlawk lai chuan ka bulah rawn ţhu ve in min kuah a, "Ka bulah hian awm reng rawh aw" ril raih hian a ti a, a ngenngawl viau bawk. 

Min kuah beh tlat avanga a ban ka lo vawn lai chuan, "Min kalsan daih chuan mihring ka nih ve na ka theihnghilh mai ang" a ti leh a, a hrethiam, inchhung boruak hrehawm lutuk leh buaina inmung tup tup hi a hrethiam chiang a ni. 

"Ka tawrh tur alawm..hetiang mai mai vanga ka kalsan che a nih chuan nupui tih hming pu tlak ka ni nang. Ka nghak ang a, ka dik zia an hriat hunah chuan ţhat an chhuah chhawm ve zel mai ang" ka ti a, raino rilru no lai a ni bawk nen, mahni inkhawngaihna a nasa ve tho bawk si, mittui a hnai leh der tawh.

"Ka tihpalh aw" a ti zawi ruih a, ka lo thaw hak ringawt a, min zah lo zet a ka hriat laia min ngaihtheih lohna an lantir sak sak ngam te chu mak ka ti lutuk tlat a ni. Mi mitmei veng ţhang ka ni a, ka mi huat tawpkhawk pawh nise an tih ang hian ka ti ve ngam kher lovang. 

"Ka hrehawm i duh lo takzet a nih chuan nangmah tal hi insiamţha rawh. Zu hi thlah hmak la, kan nupa kan hlim chuan thil dang chu ka tuar thei ang" ka ti sap sap a, a ngawi reng a, ţum dang ang bawkin a thei ngei dawn em tih a hriatchian hma loh chuan thu min tiam lo tawp ang. 

"I thei angem?" ka ti nawn leh a, "Ka tum ang" a tih chuan lu ka thing a, "Khatiang mai mai kha ka duh tawh lo. Tih tak tak a hun tawh a nia Tintin, kei leh i fa lo piang tur avang tal pawh hian ti ngei ngei rawh. Pathian pawh i hlau lo em ni?" ka ti a, "Pathian ka ring ve tawh hleinem Vanram" a ti chu chem hriam taka chhun ang mai ka ni. 

"I beidawng tih ka hria alawm, mahse Pathian hi rin loh nachhan aiin rin nachhan tur i ngah zawk. Keipawn ka dem ţhin alawm, chuti chung chuan Pathian hi ka ring lo ngam lo" ka tih chuan min kuahna a thlah dul deuh a, "Ring duh tawh suh, Pathian a awm lo" bung zet hian a ti a, chhungril hi a rum vawng vawng reng mai a ni. 

"In ngaihtuah chiang rawh" ti mah ila min kuahna a thlah a, "Khumah sawn va bawk rawh" a ti daih a, inhnial zel ai chuan tiin a sawi ang chuan ka bawk a, ka chau a, awm hahdam ka duh hrim hrim. 

"Damdawiin a kan awm laia ka kawng a na i tih zeuh kha ka la hria" tih pahin ka kawr a hlim a, ka kawng chu min hmeh sak a, "In dan daih i chak em?" ti a min zawh chuan, "In pui chang tu tur i nih hi, chutiang sawi ve tawh suh" ka lo ti a, kawngka kan khar phui loh avangin naupang ho thawm ri ţak ţak hriat tur a la awm a, inchungah an lo chho leh tawh a ni ngei ang. U Dini pawh a la awm ve dawn tihna a ni a, ka nu hlim hmel ka hmu leh dawn lo tihna a ni bawk. 

"Ka sawi ang khan awm rawh. Ka nu leh pate hi zah la, i dik naah chhang let hreh chuang suh. I ngawih reng chuan an zuam ang che. Nang leh naute tan hna ka thawh a ngai a, i bulah ka awm reng hman kher lovang, nangmaha i hmachhawn hun a thleng ngei ngei ang Din ramhuaii a awm ve chhung chuan" a ti duah a, ka ngaihtuah a, ka nun hi a nuihzatthlak zawk. Pathian ring lo tu pasal ka nei a, hiv+ ka ni a, ka pasal chhungten min millo nghal ringawt bawk a, ka nu min zilhna bawk kha bengah a ri nawn leh ţhin. A sawi ang kha a thleng dik zel a, thu ka awih loh man chu ka tuar zel a nih hi. 

"A tawk tawh i hmet thiam lo emai min hmet na zual vek ang" nui hak hak chunga tih pahin ka mu zangthal a, "Va inbual hmasa rawh keichu ka lum nghal zel a, a hmanhmawhthlak loh" a tih takah chuan ka tho tharh a, ka kal tur chu ka mawngah a la beng zui. 

"A na lutuk Laltinkhum, kha kha eng vang nge?" ka mawng dawm chunga ka hawi let chuan a lo ţhen suk a, "A nalh tihna a nih kha" a ti a, tawi tein lei ka chhuah a, bualin lamah ka kalsan ta daih a, inbual pah te chuan ka ngaihtuah ţhin a, ka nu thusawi a thleng dik zel ka tih kha a ni tak tak. En ringawt chuan mi hi hriatchian an lo har a nih hi, ka nu pawn i hrawn hunah i hre mai ang a ti tak alawm. 

A inbual zawh hnua a rawn mut ve chuan phone ka lo la en a, Zuali nen kan inbia a, kan inchhung boruak a hriatthiam thu a rawn sawi chuan, 'I lokal laiin engmah a thleng ngai hleinem' ka ti mai a, 'In awmdanah ka hre vek. Keichu a mak ka ti, in in haw sa bawk si lo. Kan hlimna min tihchhiatsak duh tu hi an awm zel a, fimkhur a va han ngai tak' a rawn ti leh a, Tintin-an "Phone kha dah teh" a tih sek avangin ka chhang zui ta lo. 

"Keng kung mai, kawr va ha ta che" ka tih chuan, "Phelh leh tho a ngai" a ti vel a, ner nang nang chung hian ka mut hnaih a, "Kha kha..min ngaithei lo hmel deuh a awm chungin min hnaih hmasa" a ti bul bul a, min lo kuah tho sia. 

"Hetianga mut hi a nuam alawm...zing thawh hma a ngai si, mutthilh ka duh" tih paha amah ka en chuan, "Nupui ka nei ta bawk a Johny leh Linda-i te unauin chaw an ei hma ziah tawh dawn a nih hi" nui suk chung hian a ti a, "Min nei hi chu i vannei mawle" tiin ka lo fiam let a, a sawi ang tak takin ani chu a lum leh vek tawh.

"I zia deuh tawh em? Na i la nei em?" min ngaihtuah hmel taka a tih chuan, "Na chu a awm reng a, tawrh hrehawm a ni lo" ka mutdan siam rem pah hian ka ti a, ka tho kang deuh a, a awm lum nuam deuhah chuan ka bei hle hle a, "Hetiang hian a nuam" ka tih lai chuan ka samah a lo chul a, a lungphu dat dat ri chu ka ngaithla kar a, inchhung boruak chu engpawh lo nise ka bula a awm chuan a thla a muang ve a ni tih ka hre thei. Anu hi a hnial pung pung ţhin tak nain thinrimin a hnial ngai mang lova, a awki chu eng ang pawn lo san se a chhaih fiam chang a tam zawk. Ruihhlo a duh viau nain a rilru hi a chhe hlawl lova, ţanpui ngai a en liam thei ngai lo, kei ai mahin mi ţanpui a peih zawk. Mipa fel tak a ni, a famkim bik lo tih a ni mai. 

"Mu ang..zingah ka kaitho ve dawn che a nia" ka tih hnuah ka let thla thak a, ka mut zangthal rual chuan min lo hnaih a, ka biang a dawm chiah chu a tih tur lo hre nghalin ka mit ka chhing a, uar fahran a min fawh chuan ka lo chhang let thuai a, ka pasalah hian ka lungawi a, a sual ber lai pawha mipa dang aia ka thlan a ni ţhin, mahse tih ngai lo ţhin phei se chu nun hi a famkim ang a, rawng mawi deuh kan chhuah ve thei ni mai tur. 

Zing ka thawh ruala ka hriat hmasak ber chu ka nu ang thawm a ni. Inhnuaiah a la chhuk bik lo ni awm tak a ni. Inchungah an mu ngai der si lo a, a fate tu emaw ber a hau a ni ngei ang. Pindanah ka tlan lut leh a, Tintin-a muttui lai chu ka sawi nawk nawk a, thatchhe zet a, "Minute 5 chiah" a lo tih chuan, "A ţullo, tho vat rawh chaw ka chhuang ang a vawk chaw kan pe dawn nia. A mak e...meng teh Johny-a te unau ril a ţam tawh ang" ka ti chul a, a mit te chu ka keu a, a harh thei chuang lo. 

"I muhil der a nih kha" vin hlak a ka tih chuan, "Muhil der lo ka meng thei rih lo. Lo zu chhuk rawh ka rawn zawm ve ang che" a ti a, rizai in a la inkhuh nghal daih zui. 

"I hre khawp ang" tih leh kawngka lama inher ka rual a, min au zui lo hrim hrim. Hetiang em em a mihring zing thawh hreh ka hre ngai lo. 

Ka chhuah rualin ka nu nen kan la intawk chat zui a, min melh ralh a, "I va tho hma ve" a ti hmuk a, min kalsan nghal daih a. Mihring hi ţhatnain an hneh theih tih hriain ka um zui a, ka sual loh zia ka hriattir hmasak a ngai a ni. 

"Ka pi eng nge a an?" ka ti a, "Tukin chu nilum ai tur pawn a tho peih lo" a lo ti ve mai a, "Thingpui i pe tawh em? Keiman ka lo pe dawn mi?" ka ti leh a, choka ah kan inzui lut a, thingpui a la lum lo a nih hmel engkim a inremna ngaiah a lo la inrem thlap. 

"Aw..han lum teh. Chhangthawp kher ka ei chak a tia, i pe tel nghal mai dawn nia. Tual ka phiat dawn a keipawh min lo siam kep rawh" a tih chuan, "Thingpui lum zawhah ka lo phiat ang. Tih tur vak a awm dawn chuang lo a" ka ti a, "Rawngbawl a ngai" a ti tawi tak a, ka dang leh der tawh. 

"Keiman ka lo pui ang" mit nuai chât chât chungin Sensiari a lo lut a, a la ham bai bai mai. 

"Thingpui chu min rawn pe mai rawh u" ka nu chuan a lo ti leh a, a chhuak zui nghal a, a nuam lo ţhin khawp mai, tuk ţha kan nei hleithei dawn lo a nih hmel. 

"Hrehawm i tih ka hlau a, thawh kan hre mang si lo a, ka nu min kaihthawh hun ka nghah chuan dar 7 vel daih a ni leh dawn a, alarm ka set a, nangmah vang liau liauin ka tho hma" la thophang deuh hian Sensiari chuan a ti mual mual a, dawhkan kilin a ţhu a, a zawi khawp mai. 

"A ngai kher chuang hleinem mah se i lo thawh ve hian a nuam. Thingpui ka'n lum ang, chawhmeh siam tur pawh ka hre lo" ka ti zung zung a, thingpui bel ka chhuang a, bai tur leh eng ilo vel a awm takin tiin fridge ka hawng leh a, ka phili buai lutuk chu ka inkhawngaih zawk. 

"Ka nu hian a duhsak theih tehreng che nen a danglam thut a, nizan chu ka ngaihtuah nasa mai. Eng emaw hriat nei lo se chu hetiang hian a awm lovang, hriat a nei a nih loh pawhin hek tu che an awm aniang" a ti a, a ham zui leh bai bai a, "A ni maithei, rin loh dan deuhin a awm a, mahse a ţha veleh mai ang. Min ngaina ve ţhin a, min haw rei thei tak tak lovang" ka ti a, ka rilru tak tak ka sawi leh sawi loh pawh ka hre lo. 

"Thil danglam a thleng leh a nih loh chuan a haw rei lo ang che. Tintin-a hi khuahkhirh la, a chhuah tam leh a rui leh hma a ni mai, mipa chu an puitling har a i hriat vek kha. Innei mah ula a rilru a puitling thut dawn miah lo a nia, a kum a la nau ve bawk nen, i zir viau a ngai ang. Engmah ni lo mah se hmeichhia hel tu a nei ve reng a, hmeichhia in an zir chuan mipa hi an nem hma a nia aw, han mutpui mai an hreh ngai vak lo. Chu chu hrereng rawh. Nupa nih avang ngawt hian ngaih tih ţhat vak tur a ni chuang lo" a ti malh malh a, "U Dini hi a fel em?" dawhkan a chawhmeh dah pahin amah chu ka en a, ka zawhna chu mak a ti deuh niin a lang.

"Aw..fel ve e" a ti ban charh a, "Ka nu nen phei chuan an in nufa a, u Mala nen an inneih hian kum 21 chiah a la nia, ka nu hi nu ang tak takin a en ve a, mi hausa fanu, engmah ti ngai lo a nih avang khan a rawn mo hlim phei chuan a tlaw lutuk. Nangpawn i hriat ve vek tho kha, ka nu hian engkim a zirtir ţhin a, la naupang viau mah ila ka hre pha ve. Nufa tak tak ang an ni mai, ka nu a duat thiam bawk si. Keimah nen hian en hranna a nei lo. U Dini pawh hian a ngai a, entirnan: ka nu hian duat viau che sela chu a thik ang che, chutiang vel chu a ni" a tih zawm leh a, min huphurh em em chhan chu ka hre ta mai. Mipa an tam a, midang pawh hian nupui nei se ka chunga a tih ang tho hian a tih ve ring, a mopui te tumah min ngaithei lovang. 

"Kan buaina kha u Dini vang a nih i ring deuh em ni?" tiin min zawt leh a, "Ka hre lo le, sawi chi a nih leh nih loh ka hre lo a--" ka tih lai chuan min lo pawt chatin, "Ka bulah chuan sawi vek rawh, a chhuak tawh dawn lo tih i hria alawm. Hriat sual i neih chuan ka lo ti dik ang" a ti a, ka nu a awm leh awm loh ka en leh te te a, "Ngawi rawh thingpui a so dawn, nakinah ka hrilh ang che" ka ti ve thung a, ka nu a awm lo nain thingpui ka buaipui hmasa leh a, ka pi ta tur bik chu tray ah ka dah hrang a, Sensiari ka pek hnuah, "Ka nu leh ka pi ka va pe lawk ang" ka ti a, kal mai ka tum chu, "Ka nu ta tur kha chu dah rawh, keiman ka lo pe ang" a ti a, ka hnial buai lem lo. 

Ka pi pindan chhung chu a lo la thim khup a, khumah a mu bam a, a khawngaihthlak reuh hle. 

"Ka pi, tukverh saw ka hawng eng duh angem?" kun hniam chunga ring angreng taka ka tih chuan, "Hawng lo ang current on zawk rawh" a ti a, a ţawng a fiah angreng a, thawk khat chu a veng deuh alawm. 

"Stool ah hian thingpui leh chhang ka dah a nia aw...i in peih ang tiraw?" ka tih chuan, "Aw ka lo in ang. Nakinah i hman hunah min rawn kawm ang che aw" a ti a, a khua a har hmelin ka kawm ngei tur thu ka hrilh hnuah ka chhuahsan a, tih tur ka ngah khawp mai. 

Rawngbawl pah chuan Sensiari hnenah, "U Dini chu sawiselna em em ka nei lo. Min ngaithei vak lo em mawni aw ka ti mai mai mawle. Naupang lah kha engtinmah ka ti mang bawk si lo a, khataţang khan ka nu pawh hian min haw deuh niin ka hria" ka ti sap sap a, "Naupang i hau a tih khan keipawh mak ka ti. Kan chungah hi chuan a sual ngai miah lo a, ka hre tawh bik lo le. A ngaithei lo che a nih chuan a lang chhuak vat mai ang. Thu vaivir thiam deuh te hi an awm ve ţhin a, u Dini tak pawh hian fuihtu a lo nei ve pawh a ni maithei a, mahse sawi tak ang khan ka nu nen hian an in nufa ve lutuk a, a thik che a nih pawn a awm lutuk tho. Dawt a a hek che a nih chuan a dik lo hul hual a, hrehawm tih phah nan hmang duh suh, thudik chu a langchhuak zel a, ka nuţa te, ka pa pawh a ni tho, thudik lamah kan ţang vek zel. A dik lo zawk a nih chuan amah leh amah a inti chhe dawn tihna a ni mai. Mo puite ngaithei miah lo mihring hi an awm ve a, chutiang chi chu a lo ni ve pawh a ni maithei" a ti duah a, "Aaa...duat rawn a ni ve ţhin a, a demawm loh chu. Bakah misual tak a ni pawn ka hre lo, kan la awm dun tam loh vang mai mai a nih hi. Hun a rei ang a, kan la in ngai viau maithei a sin" ka ti leh ta daih a, mopuite hek anga ka lan loh nan a sawi mai mai ka ni. Engtikahmah kan inkawmngeih theih ka ring lo a, Sensiari sawi hmangah min ngaithei lo tial tial dawn tih ka hre thiam ve vek. 

"Nia..in la inkawmngeih ve mai ang. Ka nu phei chu a thinrimna a hre rei ngai lo, tun ang hian thinrimna a neih chuan a lanchhuah tir a, a rei tak tak ngai lo" a ti a, rawng kan bawl dun mawlh mawlh a, ka nu ka ngai thar riau mai. Inhnaih viau mah ila ka kal thei si lo a, kan in lamah kal ngat ila chu an thinrim lehzual dawn lutuk tlat. Mo dinhmun lo hahthlak zia ka hre ve chiah. An ni vek kher lo a, a tam zawk chuan vawikhat tal hrehawm tih ngawih ngawih chang kan nei vek ang. 

Tintin-a lo tho chhuak chuan ka pi a zawng hmasaber a, "A tho peih lo" kan tih rualin ka pi pindan lam a pan a, a rawn chhuak leh chuan, "A chaw tur bik kha lo siamsak rawh ka ril a ţam tawh a ti" a ti a, a hlauthawng deuh niin a lang. A pi ve em em kha a ni miau a. 

Keipawh ka che vat a, ka pi chaw ka siam lai chuan u Dini lo lutin, "Artui innei tiraw? Tukin chu thawh kan hai a, naupang tiffin tur pawh ka siam hman lo. Artui inneih chuan lo kan sak lawk la" a rawn ti veleh a, "Keiman ka lo kang ang. Vani chu hei ka pi chaw tur a siam a, chubakah thawh hlim aţang khan a kut a la awl lo hrim hrim" Sensiarin a lo ti a, u Dini chuan, "Hei Vani tan hian a awlsam alawm. Artui kan zawk zawk a ni mai, ka pi chaw tur siam pah hian a awlsam mai" a ti a, ka chaw siam lai bulah tiffin ruak a rawn dah rawk rawk a, min tham lovin min zahna pakhatmah a nei lo. 

Ka thinrim chu ka insum thei lo thut a, kal mai a tum lai chuan rang deuhin ka inher a, "I fate tiffin ka siam nachhan tur ka hre lo" chang khel khawl hian ka ti a, min en rang khawp mai. 

"Thawh lo hai pawh ni ula dawr a awm a, pawisa in nei a, artui lei turin i fate zing a mi tu emaw ber tir la, siamsak ve mai la, i ti thei reng alawm. Thawh i hai avanga i fate tiffin lo siamsak ka ba bik love" ka ti hmak hmak a, ţhat nain an hneh theih tih hrereng mah ila tunah chuan ka thin a rim ve em a, buai leh luih pah ila pawi tihna ka nei lo. Ţha te tein sawi se chu ka hrethiam, tiffin lah a rawn vawm lo chauh a ni a, ka thinin a tuar bik lo a ni. 

"Thil harsa pawh a nih loh kha. Ka pi chaw ei siam pahin siamsak ve rawh ka ti mai alawm" a tih chuan, "A harsat loh vang a nia nangmah khan heta lokal kher lovin ti zung zung rawh ka tih. Ka pi ei ang hi an duh ve mi? Bai vel hi an duh ve a nih chuan a thun tawp theih alawm. A thak ve deuh a" ka ti ve ngat a, min melh ram ram lai chuan ka inher hmak a, ka pi chaw ei tur ka siam zawm leh a, "U Din, keiman ka lo kang ang. Artui lei sa kan nei alawm" tiin Sensiari a lo inrawlh vat a, ka nute chuan duh duhin min ti kawi se pawi ka ti lo, mo ka ni a, hrehawm chu ka tawrh tur a ni. U Dini lehzelin min chhiahhlawh chei hi ka tuar thei bau lo. 

"Ka rin ai daihin i kawl hrawng. Nizan zankhua in ka kawţha lo ka tlan a, ka che zung zung peih hleinem. Ni lo se helamah ka rawn phei pui teuh lo" a tih rualin ka nu aw ka hre zui zat a, ka thinrim em vang aniang hlauhna pakhatmah ka nei lo.

U Dini chuan thil awmzia a lo hrilh zung zung a, ka hriat ve lai ngeia a sawi ngam chu mak ka lo ti lehpek tawh. "A buaithlak a nih hi, kan thu hi kan duh tlang si a" ka nu chuan a ti halh a, ka pi thleng tur chawiin choka aţang chuan ka chhuak a, ka nu leh ka mopui nu chu ka hmu lo der ve ve. 

"Ka lak bân ho kha va la mai teh" pindan chhunga ka luh ruala ka tih chuan dawhkan a lo hung ţha sawk sawk a, kal nghal mai lovin, "Ka pi, chaw tlem tal ei rawh aw" zaidam deuh hian a ti a, ka pi mu chu dimtein a tung tho a, a ţhutrem tir hnuah, "Lo ţhutpui lawk rawh. Ka nu te hian an ngaihven lo em maw ni, ka pi hi nidang a ang lo riau a nia Vanram" a ti a, din chhuah pahin mangang zetin a lu a tuai vut a, keipawhin ka pi pang chu ka lo dek a. 

"A khua a sik lo, chaw hi ei se la a zia mai ang. An tui vel kha va la phawt teh" ka ti a, Tintin-a chhuah hnuah ka pi kuah ran chung chuan, "A hrehawm tak tak a ni ka pi" tiin ka phun sap a. 

Ni a liam ve zel a, inchhung boruak a pik tulh tulh emaw tih tur a ni. Ka pi lah a dam thei bawk si lo, "Ka pi, khawiah nge i mawza lum zawng zawng kha? Hei i ke a vawt thlur a, ka lo bun tir ang che" Tintin-an a ti lung lung a, thingpui kenga ka nu rawn lutin, "Ka thi tawh dawn a tia a a ţhiante a lo sem zo vek a nih kha" a ti chu kan inmelh hrek hrek hlawm mai. 

"A thi lovang, tlang hrileng a kai a nih hi. Ka pi lehzel a thih chuan a pawi ngawt ang" Tintin-a chuan a lo ti a, min bia ni chiah pawhin a lang lo. Nghet zet a a kut hum ruh chung hian pindan aţangin a chhuak a, ka nu chhuah ve hnuah ka pi mutna bulah ka ţhu a, a kut cher riak mai vawn pah chuan, "Ni e ka pi, thi miah suh aw. Buaina dang ka duh tawh lo, kan nupa tan awm ve reng rawh" ka ti sap sap a. 

CONT...BLACK AND WHITE-16

"Viral load a ngai a, Vanrami nen hian kan chhuak lawk dawn a nia" tiin tukţhuan eikham ah Tintin-a chuan a chhungte a hrilh ve a, ka nu lahin a lo hrethiam lo, "Sensiar, viral te chu a lar hluai tawh tihna a ni lo mi? In inneih video a chhuak tawh em ni a? Viral tawh sa load load a ngai em ni?" a ti a, a ţeu hlar mai. 

"Eng eng emaw hi chu i hre ve mawle, i hre kim ngai mang si lo. I hriat vek hma chu min hau ziah suh ka tih fo kha. Kan natna avang hian viral load reng a ngai, ka sawi vek tawh" Tintin-an a tih chuan, "A va buaithlak ve, a chang leh damdawi lak a ngai i tia, pahnih a kal kher a ngai em ni?" a lo ti leh chu ka thaw hak a, kan in lo nawm zia ka hrechhuak uar uar mai. 

Ni e, kan in kha boruak a ipik ka ti ţhin, mi chhungkua ka awt ţhin a, an hlim hmel bik tiin vuina tur ngawt ka zawng ţhin. Mi chhungkua ah ka han mo ta cheng a, kan in aia a nawm bikna reng ka hre lo. Kan inah kha chuan ka inthlahrung ngai lova, ka ei chak zawng apiang ka lam ngam a, duh hun hunah ka chhuak a, hreh miah lovin ka haw leh a, mi in a inthlahrung deuh a awm nen chuan a in thlau lutuk ringawt. Mahni in aia nuam a lo awm hauh lo tih ka zirchhuak nghal pang mai. 

"Kan pahnih a kal kan tum chuan a ngai tihna a ni mai. Vanrami hi i en hrang nghal ringawt aw, ka duh miah lo a nia" Tintin-a chu a rukin ka kheuh zeuh a, thil dang vang a ni teh chiam lo, U Dini'n min hek nasat vang a ni. Ka mo tirh aţangin ka mopui nu in min mil lo nghal pang mai. 

"Kal rawh u, rei reng reng suh u" a tih hnuah kan chhuak a, "Ka nu hian eng nge a hriat le? Inneih dawn a a phur nen inneih zawh rualin a danglam nghal vek. U Rinhlu, nimin a kan chhuah hlan khan eng thil chiah nge thleng a?" tiin pawn a lo awmchhun kan pro pastor ber chu a zawt a, motor a lo hru fai hliau hliau lai chu a tawp chawt a, kan lam lo hawi pah hian, "An ţhut mai mai kha mawle" a ti ban charh a, ka pasal thinchhe ve tak chuan kutthlak mai duh hmel te pawh a pu alawm. 

"An ţhut ve bawk lohin, kan chanchin an sawi em ka tihna a nih chu. Kan rawn haw khan an danglam daih a, ngati nge hetiang hian an awm a?" a ti leh a, u Rinhlua chuan, "Inleng te chuan an zawh ngei kha, ka ngaithla hran lo" a lo ti leh a, "Ka chhir awk dawn che em mawni le, engmah zawh tlak loh. I kal leh hmain hrilh rawh aw, an mo te ah rau rau thlei bik an neih dawn chuan Vanrami te inah makpa chhungkhung angin ka awm dawn a nia. An zak viau ang" tih leh a bike dahna lam pan a rual a, "Hrehawm ti suh Vani, a nuam i ti mai ang" tiin u Rinhlua chuan min hnem a tum ve ngial a, nuih luih pahin ka bu nghat a, a thusawi khan rilru a tih nawm phah chuang lo reng reng. 

Kan tih tur ang ang te kan tih zawh hnuah restaurant ah kan chawl a, "Kan rei lutuk ange a inthlahrunawm" ti mah ila, "A ho mai mai, an awmdan kha a dik lo, u Dini khan sawi a nei chiang alawm" a ti a, min bia ni pawhin a lang lo. 

"Ngawih san mai mai rawh. Khatianga i tih vak khan ka tan a nuam lo zawk a nia, a sawi dik chiah alawm, kan natna ang hi tuman an nei ve duh hleinem" ka tih chuan, "Duh vanga nei kan ni lo" a ti nghut a, a mitmeng chu a hriam hraih a, a thinrim a nih ringin ngawih ka chuh ta zawk a. 

"Ka pi chiah hi a dik. U Rinhlua hi chu a chut mual mual ringawt a, sawisel leh fak luam a nei ngai lo. U Zira hi dik a tih lamah a ţang a, midang hi an buaithlak tlang. Hlau lo la, tim dui reng suh. Zah lo chuang lo bawk la, zah tak chungin i dik naah chuan chhang let hreh suh" inla puitling deuh hian a ti ve duah a, "Laltinkhum, zahmawh lawm pa" tih riin a zui zat a, a va inhmeh lo ţhin tak. 

Kan lam panin hmeichhe pakhat a rawn kal phei zan zan a, ka hriat zawng a ni lem lo. Lu lian lam, sam sei deuh, ngo vang mai a ni. Kan dawhkan bulah chuan dingin Tintin-a darah a beng dat a, "Pawnchhe zawrhna group ah khan zahmawh kan sawi chiahin i rawn lang ţhin. Eng nge in tih a?" zangkhai vah hian a ti a, keichu min hria angin a awm lo. 

"Thil kan ei a nih hi..i hmu lo mi?" ka pasalin a lo tih chuan, "Ehe...hei hi innu chu tihna mi?" a ti a, min kawk va bawk. 

"Nih hi...hmelţha i ti em?" intihtheih hmel zet hian a ti a, "Hmelţha ele...awii ha kan inkawmna a rei tawh nen a hmel pawh ka lo la hre ve hleinem. Karleh ah ka haw dawn a, ka haw hmain chaw ei khawm ang u aw" a ti zat zat a, "Kan nu hi dil la" nuih paha ka pasalin a tih chuan, "A phal sa ah ka ngai, i rawn tel loh chuan i chak lo ngawt ang. Buai vang liau liauin inneih naah ka lo tel thei lo a, chaw eikhawm hunah chuan kim ţhap ang u" a ti a, Tintin-a darah chuan a kut a dah reng a, a ngaizawng ta mai emaw tih tur a ni. 

"Pa ka nih ţep tawh hi, chaw eikhawm hman pawh ka ni tawh lo. Zan reiah diaper ka thlak turh turh ţep tawh" a tih chuan phawk fe hian, "Ehe...in puk lawk tihna mi?" a lo ti leh a, in ngam tlak hmel viau si chanchin a va hre lo em em ve mawle. 

"Puk lawk lo ila kan inneih niah biakin an kalh nang. Hall ah kan inkutsuih, mipui pawh yma ţhutthleng ah an ţhu" tiin a ruh lang rawtin a hrilh a, "Ngati nge tuman min hrilh ve loh a, pawnchhe zawrhna group ah lah chutiang an sawi bawk si lo. Thlalak kha chu ka hmu ngei a, ka lo chik lo reng reng. Innu hmel takngial pawh ka hre lo a nia. Aaa...engpawh chu nise chaw eikhawm naah chuan lo tel ve ang che" a ti leh tawh a, a ninawm reuh mange. 

Tintin-an chunu a en rual chuan aw ka lo thian kharh a, aw then dan pangngai a ni lo, strict deuhin a ni ka aw chu ka lo then ni. Ka pasal pawh a hawisawn vat a, a key a man tlat alawm. 

"Nupui neih tawh chuan chhungte nen a chaw eikhawm bak a rem tawh lo. Min sawm lui duh suh u" a ti a, min rawn enin a nui a, ka lo melh vak thung. 

"I over vel emai, Ben-a ka rawn kal tir tho ang" a tih chuan, "Ka lokal thei lo ang a tih kha" tiin ka lo inrawlh a, "Ka pi te inah alawm" a la ti ngam nia!

"Khawi hmun pawh nise ka dam ţha lo a, a chhuak thei lo" ka ti hmak a, dawt ka sawi lo, ka kawng leh hnung zang te a na ut ut reng a, inchhung boruak a hrehawm bawk nen, mahniin ka awm peih teuh lo. 

"Hnawk nghal reuh hle mai" duhdah zet a a tih chuan, "Vawikhatmah lo sawm tawh suh u" ka ti ve ngat a, min ei loh hmel zet hian a meng kual ralh a, "Kan sawi ţha ang" tih leh kalsawn a rual a, a awm vel danah chuan ka chhan dan kha ka inchhir lo telh telh, a phu tawk chiahin ka chhang ka ti mai, ka hmai zah bik vak nachhan tur ka hre lo. 

"Ţhian i nei maksak thei si, mood a ti off vek" vin hlar a ka tih chuan, "Bena ţhiannu a nih kha. Ka ţhiante chuan i hmel mai bakah i phone number thlengin an by heart vek. Min zui nasa ho phei chu maimitchhingin in inah an kal thei vek tawh" a ti a, ka tum bar reng avang chuan nui ruh ruh chungin soup a suak a, "Aahhh ti rawh le, ti tau lo la, naute ril a ţam a nia" a ti vel a, mi mit kan lak hmain ka ang a, a nih loh chuan a tawp san leh dawn chuang lo.

"I thikthu a chhiat hian i lawmawm...ka thinrim ngai lo, ka lawm daih zawk" zangkhai deuh a a tih chuan ka lo ner nang a, "Ka ti tak tak, engahmah min ngai lo la i thikthu a chhe dawn lo. Min hmangaih a nih kha Vanram" inringtawk zet hian a ti a, "Chu te chu chiang sa alawm. Hmangaih lo che ila ka nei nang che. I chhungte sual sual nen" ka ti a, ka hmui ka chip nghal hmak, ka ţawng sual chiang lutuk tlat.

"Het" a lo ti vat a, nui miah lo a min en takah chuan, "Ka thinrim a duh aiin ka ţawng thui a nih kha" ka ti a, ka sawi tum a ni lo tak tak alawm. 

"An sual hran lo, ka hriatah i chanchin a chhe zawngin an sawi ngai lo. Din ramhuaiin a fuih pawrh a nih kha" a lo ti a, ning viau siin ka hriatah a fak leh ang lawi a, hepa maksak lutuk hi hriatthiam loh chang ka ngah mai. 

"Ka nu'n a ţhiannu te lo a feh puiah min sawm a" zawi tea ka tih chuan, "Ka lokal ve ang" a ti a, kal suh pawh min ti lo. Diktak chuan chhuk leh chho a tam thei lutuk a, motor a thlen theih a ni ngai si lo, Pathian zarah kut hnathawh ngai miah lovin ka seilian chho a, ka hreh ngawih ngawih. 

"Min dil sak rawh, Vani hruai ve suh ti la, ka nuam lo ropui sia, dam ţha ver vawr ila chu ka hreh lo. Na nei chung chuan a huphurhawm emai" ka ti niah niah a, ka sual vang a ni hran lo, naupai laia na hi chu a na bik tlatin ka hria. 

"Ka sawi ang a, a remtih loh chuan ka lokal ve ang. Ka paw char char mai ang che. Inhauh vak chuan nangmah bawkin nuam lo i ti leh ang" a ti a, a dik khawp mai. 

"Ka hah vek tawh...damdawi hian min hneh ţhin bawk si. Kan natna hi kal pah mai mai a la har tlat a, nau ka pai lehzel bawk nen, dam ţha tal ila ţha tur" ka ti vang vang a, U Dini hi a mona a rei tawh a, fanu an chiaha an en a ni. Ka nu phei chuan a thu a khawi a ngil a zawm chang a nei a, a duh phawt chuan a fuih hneh khawp ang. 

"Kan sawi dawn nia" a ti leh mai a, ka kalna apianga buaina a awm zel mai hi Pathian hnen a vui chang te ka nei ve a, ka nun hian rawng a neih ve a phal lo ah te ka ngai a, ka nun hi chu a hrechiang apiangin an awt lovang. 

In kan thlen chuan an lo awm kim ţhap tawh a, thil tih chhung a rei a, restaurant ah kan chawl kawi bawk nen, ka pa takngial pawh office a lo bang fel der tawh. 

"In va rei em em ve" ka nu'n a lo ti nghal pang a, "Kan thu lo e...kan duh dan danin kan ti thei hleinem. Nang aiin kan ning zawk" ka pasalin a lo tih khalh a, u Dini te nufa pawh an lo awm leh ran tawh. 

"Eng emaw han sawi ila i pawr nghal vak zel a, thil sawi ve ngam pawh a ni ngai lo" ka nu'n a tih chuan, "Ee....ngam loh i nei lo. A nulat lai phei chuan a huaisen lutuk a tuman an rim ngam lo an tih che kha. Ngaihtuah ta che, tunah pawh kan veng mihlim ho boss i nih hi" Tintin-an a lo ti a, ka nuih a za angreng. 

"A mihlim ang zawng hian min hmer ziah suh Laltinkhum" vin zet a ka nu'n a tih chuan, "Mihlim alawm i nih. Lamtualah phei chuan i ke a vir thei" uangthuang zet a tih pahin a jacket a hlip a, u Zira a lo nui chhuak ve hawk hawk mai. 

"Hetiang hi a nia min tih duh dan chu. Thu ţha engmah a hrilh theih loh, hauh theih pawh a ni lo, an awm awmin awm rawh se" tih pahin ka nu chuan a enkual dan dan hlawm a, pui tu a zawng ni awm tak a ni. 

"Nimin aţang tawhin thinrimna i la zawng char char a, Vani pawhin hrehawm a ti anga sin. Lo a feh puiah te i lo sawm a" Tintin-an a tih chuan ka lo chhing sawk, pawi tak a ni. Tun tut tut a sawichhuah kher a ţullo a sin mawle. 

"Hna hahthlak thawh tur a awm chuang hleinem, chawhmeh te kan hawn ve anga, thlai thar ei te pawh a chakawm alawm. Mahnia kal tawp aiah ka sawm a nih kha" a ti a, hnar a lian duh khawp mai. 

"Nakinah kan sawi dawn nia" Tintin-an a tih chuan ka thaw huai a, diktak chuan an in a mo hi ka hreh em em lo a, ka nu pawh ka hriatchian sa a nih vang leh min duhsak tak tak ţhin tu ni a ka hriat vangin ka huphurh lem lo, fuih kawi awlsam tak a ni tih ka lo hre ngai hauh lo. 

Zanriah kan ei te chu kan inmelh ralh ralh hlawm ringawt a, Tintin-a ber chuan ka duh ang ka ei ngam loh hlauin ka chawhmeh duhzawng min suah sak a, ei ţeuh turin min ti reng a, midang hriat a min ngaihsakna a ti lang chu a lawmawm viau rualin ngaih loh lamah an ngaih ka hlau tho bawk si, ka nun hi chu a hahthlak tih bak sawifiah vak ngaihna ka hre lo. 

"Ka pi chu chaw a ei thei em?" u Mama'n a ti ve mial a, "Tlem chu a ei a, vawiin chu a nuam lo zual deuh a, a ţha leh mai ang" tiin ka nu'n a lo chhang thuai a, an sawi hmangah chawhnu lamah kha chuan a ţhu chhuak peih tawh mang lo a, ka ngaihtuah angreng. Naktukah chuan zing nilum a ai leh peih beisei phawt ang. 

Pindan a kan lut chu ka ţhu hnawk a, ka chau a ni. U Dini'n engamah hmaa min huat ngawt chhan hi ka hre lo a, ka nu pawh min belchiang hmasa lova mi thusawi apiang a awih zel hi ka hrethiam lo bawk. Sensiari nen tet te aţanga inkawm kan ni a, ka mizia chu hre tur a nia sin. Ka en ngai ka en tlawk tlawk lai chuan ka bulah rawn ţhu ve in min kuah a, "Ka bulah hian awm reng rawh aw" ril raih hian a ti a, a ngenngawl viau bawk. 

Min kuah beh tlat avanga a ban ka lo vawn lai chuan, "Min kalsan daih chuan mihring ka nih ve na ka theihnghilh mai ang" a ti leh a, a hrethiam, inchhung boruak hrehawm lutuk leh buaina inmung tup tup hi a hrethiam chiang a ni. 

"Ka tawrh tur alawm..hetiang mai mai vanga ka kalsan che a nih chuan nupui tih hming pu tlak ka ni nang. Ka nghak ang a, ka dik zia an hriat hunah chuan ţhat an chhuah chhawm ve zel mai ang" ka ti a, raino rilru no lai a ni bawk nen, mahni inkhawngaihna a nasa ve tho bawk si, mittui a hnai leh der tawh.

"Ka tihpalh aw" a ti zawi ruih a, ka lo thaw hak ringawt a, min zah lo zet a ka hriat laia min ngaihtheih lohna an lantir sak sak ngam te chu mak ka ti lutuk tlat a ni. Mi mitmei veng ţhang ka ni a, ka mi huat tawpkhawk pawh nise an tih ang hian ka ti ve ngam kher lovang. 

"Ka hrehawm i duh lo takzet a nih chuan nangmah tal hi insiamţha rawh. Zu hi thlah hmak la, kan nupa kan hlim chuan thil dang chu ka tuar thei ang" ka ti sap sap a, a ngawi reng a, ţum dang ang bawkin a thei ngei dawn em tih a hriatchian hma loh chuan thu min tiam lo tawp ang. 

"I thei angem?" ka ti nawn leh a, "Ka tum ang" a tih chuan lu ka thing a, "Khatiang mai mai kha ka duh tawh lo. Tih tak tak a hun tawh a nia Tintin, kei leh i fa lo piang tur avang tal pawh hian ti ngei ngei rawh. Pathian pawh i hlau lo em ni?" ka ti a, "Pathian ka ring ve tawh hleinem Vanram" a ti chu chem hriam taka chhun ang mai ka ni. 

"I beidawng tih ka hria alawm, mahse Pathian hi rin loh nachhan aiin rin nachhan tur i ngah zawk. Keipawn ka dem ţhin alawm, chuti chung chuan Pathian hi ka ring lo ngam lo" ka tih chuan min kuahna a thlah dul deuh a, "Ring duh tawh suh, Pathian a awm lo" bung zet hian a ti a, chhungril hi a rum vawng vawng reng mai a ni. 

"In ngaihtuah chiang rawh" ti mah ila min kuahna a thlah a, "Khumah sawn va bawk rawh" a ti daih a, inhnial zel ai chuan tiin a sawi ang chuan ka bawk a, ka chau a, awm hahdam ka duh hrim hrim. 

"Damdawiin a kan awm laia ka kawng a na i tih zeuh kha ka la hria" tih pahin ka kawr a hlim a, ka kawng chu min hmeh sak a, "In dan daih i chak em?" ti a min zawh chuan, "In pui chang tu tur i nih hi, chutiang sawi ve tawh suh" ka lo ti a, kawngka kan khar phui loh avangin naupang ho thawm ri ţak ţak hriat tur a la awm a, inchungah an lo chho leh tawh a ni ngei ang. U Dini pawh a la awm ve dawn tihna a ni a, ka nu hlim hmel ka hmu leh dawn lo tihna a ni bawk. 

"Ka sawi ang khan awm rawh. Ka nu leh pate hi zah la, i dik naah chhang let hreh chuang suh. I ngawih reng chuan an zuam ang che. Nang leh naute tan hna ka thawh a ngai a, i bulah ka awm reng hman kher lovang, nangmaha i hmachhawn hun a thleng ngei ngei ang Din ramhuaii a awm ve chhung chuan" a ti duah a, ka ngaihtuah a, ka nun hi a nuihzatthlak zawk. Pathian ring lo tu pasal ka nei a, hiv+ ka ni a, ka pasal chhungten min millo nghal ringawt bawk a, ka nu min zilhna bawk kha bengah a ri nawn leh ţhin. A sawi ang kha a thleng dik zel a, thu ka awih loh man chu ka tuar zel a nih hi. 

"A tawk tawh i hmet thiam lo emai min hmet na zual vek ang" nui hak hak chunga tih pahin ka mu zangthal a, "Va inbual hmasa rawh keichu ka lum nghal zel a, a hmanhmawhthlak loh" a tih takah chuan ka tho tharh a, ka kal tur chu ka mawngah a la beng zui. 

"A na lutuk Laltinkhum, kha kha eng vang nge?" ka mawng dawm chunga ka hawi let chuan a lo ţhen suk a, "A nalh tihna a nih kha" a ti a, tawi tein lei ka chhuah a, bualin lamah ka kalsan ta daih a, inbual pah te chuan ka ngaihtuah ţhin a, ka nu thusawi a thleng dik zel ka tih kha a ni tak tak. En ringawt chuan mi hi hriatchian an lo har a nih hi, ka nu pawn i hrawn hunah i hre mai ang a ti tak alawm. 

A inbual zawh hnua a rawn mut ve chuan phone ka lo la en a, Zuali nen kan inbia a, kan inchhung boruak a hriatthiam thu a rawn sawi chuan, 'I lokal laiin engmah a thleng ngai hleinem' ka ti mai a, 'In awmdanah ka hre vek. Keichu a mak ka ti, in in haw sa bawk si lo. Kan hlimna min tihchhiatsak duh tu hi an awm zel a, fimkhur a va han ngai tak' a rawn ti leh a, Tintin-an "Phone kha dah teh" a tih sek avangin ka chhang zui ta lo. 

"Keng kung mai, kawr va ha ta che" ka tih chuan, "Phelh leh tho a ngai" a ti vel a, ner nang nang chung hian ka mut hnaih a, "Kha kha..min ngaithei lo hmel deuh a awm chungin min hnaih hmasa" a ti bul bul a, min lo kuah tho sia. 

"Hetianga mut hi a nuam alawm...zing thawh hma a ngai si, mutthilh ka duh" tih paha amah ka en chuan, "Nupui ka nei ta bawk a Johny leh Linda-i te unauin chaw an ei hma ziah tawh dawn a nih hi" nui suk chung hian a ti a, "Min nei hi chu i vannei mawle" tiin ka lo fiam let a, a sawi ang tak takin ani chu a lum leh vek tawh.

"I zia deuh tawh em? Na i la nei em?" min ngaihtuah hmel taka a tih chuan, "Na chu a awm reng a, tawrh hrehawm a ni lo" ka mutdan siam rem pah hian ka ti a, ka tho kang deuh a, a awm lum nuam deuhah chuan ka bei hle hle a, "Hetiang hian a nuam" ka tih lai chuan ka samah a lo chul a, a lungphu dat dat ri chu ka ngaithla kar a, inchhung boruak chu engpawh lo nise ka bula a awm chuan a thla a muang ve a ni tih ka hre thei. Anu hi a hnial pung pung ţhin tak nain thinrimin a hnial ngai mang lova, a awki chu eng ang pawn lo san se a chhaih fiam chang a tam zawk. Ruihhlo a duh viau nain a rilru hi a chhe hlawl lova, ţanpui ngai a en liam thei ngai lo, kei ai mahin mi ţanpui a peih zawk. Mipa fel tak a ni, a famkim bik lo tih a ni mai. 

"Mu ang..zingah ka kaitho ve dawn che a nia" ka tih hnuah ka let thla thak a, ka mut zangthal rual chuan min lo hnaih a, ka biang a dawm chiah chu a tih tur lo hre nghalin ka mit ka chhing a, uar fahran a min fawh chuan ka lo chhang let thuai a, ka pasalah hian ka lungawi a, a sual ber lai pawha mipa dang aia ka thlan a ni ţhin, mahse tih ngai lo ţhin phei se chu nun hi a famkim ang a, rawng mawi deuh kan chhuah ve thei ni mai tur. 

Zing ka thawh ruala ka hriat hmasak ber chu ka nu ang thawm a ni. Inhnuaiah a la chhuk bik lo ni awm tak a ni. Inchungah an mu ngai der si lo a, a fate tu emaw ber a hau a ni ngei ang. Pindanah ka tlan lut leh a, Tintin-a muttui lai chu ka sawi nawk nawk a, thatchhe zet a, "Minute 5 chiah" a lo tih chuan, "A ţullo, tho vat rawh chaw ka chhuang ang a vawk chaw kan pe dawn nia. A mak e...meng teh Johny-a te unau ril a ţam tawh ang" ka ti chul a, a mit te chu ka keu a, a harh thei chuang lo. 

"I muhil der a nih kha" vin hlak a ka tih chuan, "Muhil der lo ka meng thei rih lo. Lo zu chhuk rawh ka rawn zawm ve ang che" a ti a, rizai in a la inkhuh nghal daih zui. 

"I hre khawp ang" tih leh kawngka lama inher ka rual a, min au zui lo hrim hrim. Hetiang em em a mihring zing thawh hreh ka hre ngai lo. 

Ka chhuah rualin ka nu nen kan la intawk chat zui a, min melh ralh a, "I va tho hma ve" a ti hmuk a, min kalsan nghal daih a. Mihring hi ţhatnain an hneh theih tih hriain ka um zui a, ka sual loh zia ka hriattir hmasak a ngai a ni. 

"Ka pi eng nge a an?" ka ti a, "Tukin chu nilum ai tur pawn a tho peih lo" a lo ti ve mai a, "Thingpui i pe tawh em? Keiman ka lo pe dawn mi?" ka ti leh a, choka ah kan inzui lut a, thingpui a la lum lo a nih hmel engkim a inremna ngaiah a lo la inrem thlap. 

"Aw..han lum teh. Chhangthawp kher ka ei chak a tia, i pe tel nghal mai dawn nia. Tual ka phiat dawn a keipawh min lo siam kep rawh" a tih chuan, "Thingpui lum zawhah ka lo phiat ang. Tih tur vak a awm dawn chuang lo a" ka ti a, "Rawngbawl a ngai" a ti tawi tak a, ka dang leh der tawh. 

"Keiman ka lo pui ang" mit nuai chât chât chungin Sensiari a lo lut a, a la ham bai bai mai. 

"Thingpui chu min rawn pe mai rawh u" ka nu chuan a lo ti leh a, a chhuak zui nghal a, a nuam lo ţhin khawp mai, tuk ţha kan nei hleithei dawn lo a nih hmel. 

"Hrehawm i tih ka hlau a, thawh kan hre mang si lo a, ka nu min kaihthawh hun ka nghah chuan dar 7 vel daih a ni leh dawn a, alarm ka set a, nangmah vang liau liauin ka tho hma" la thophang deuh hian Sensiari chuan a ti mual mual a, dawhkan kilin a ţhu a, a zawi khawp mai. 

"A ngai kher chuang hleinem mah se i lo thawh ve hian a nuam. Thingpui ka'n lum ang, chawhmeh siam tur pawh ka hre lo" ka ti zung zung a, thingpui bel ka chhuang a, bai tur leh eng ilo vel a awm takin tiin fridge ka hawng leh a, ka phili buai lutuk chu ka inkhawngaih zawk. 

"Ka nu hian a duhsak theih tehreng che nen a danglam thut a, nizan chu ka ngaihtuah nasa mai. Eng emaw hriat nei lo se chu hetiang hian a awm lovang, hriat a nei a nih loh pawhin hek tu che an awm aniang" a ti a, a ham zui leh bai bai a, "A ni maithei, rin loh dan deuhin a awm a, mahse a ţha veleh mai ang. Min ngaina ve ţhin a, min haw rei thei tak tak lovang" ka ti a, ka rilru tak tak ka sawi leh sawi loh pawh ka hre lo. 

"Thil danglam a thleng leh a nih loh chuan a haw rei lo ang che. Tintin-a hi khuahkhirh la, a chhuah tam leh a rui leh hma a ni mai, mipa chu an puitling har a i hriat vek kha. Innei mah ula a rilru a puitling thut dawn miah lo a nia, a kum a la nau ve bawk nen, i zir viau a ngai ang. Engmah ni lo mah se hmeichhia hel tu a nei ve reng a, hmeichhia in an zir chuan mipa hi an nem hma a nia aw, han mutpui mai an hreh ngai vak lo. Chu chu hrereng rawh. Nupa nih avang ngawt hian ngaih tih ţhat vak tur a ni chuang lo" a ti malh malh a, "U Dini hi a fel em?" dawhkan a chawhmeh dah pahin amah chu ka en a, ka zawhna chu mak a ti deuh niin a lang.

"Aw..fel ve e" a ti ban charh a, "Ka nu nen phei chuan an in nufa a, u Mala nen an inneih hian kum 21 chiah a la nia, ka nu hi nu ang tak takin a en ve a, mi hausa fanu, engmah ti ngai lo a nih avang khan a rawn mo hlim phei chuan a tlaw lutuk. Nangpawn i hriat ve vek tho kha, ka nu hian engkim a zirtir ţhin a, la naupang viau mah ila ka hre pha ve. Nufa tak tak ang an ni mai, ka nu a duat thiam bawk si. Keimah nen hian en hranna a nei lo. U Dini pawh hian a ngai a, entirnan: ka nu hian duat viau che sela chu a thik ang che, chutiang vel chu a ni" a tih zawm leh a, min huphurh em em chhan chu ka hre ta mai. Mipa an tam a, midang pawh hian nupui nei se ka chunga a tih ang tho hian a tih ve ring, a mopui te tumah min ngaithei lovang. 

"Kan buaina kha u Dini vang a nih i ring deuh em ni?" tiin min zawt leh a, "Ka hre lo le, sawi chi a nih leh nih loh ka hre lo a--" ka tih lai chuan min lo pawt chatin, "Ka bulah chuan sawi vek rawh, a chhuak tawh dawn lo tih i hria alawm. Hriat sual i neih chuan ka lo ti dik ang" a ti a, ka nu a awm leh awm loh ka en leh te te a, "Ngawi rawh thingpui a so dawn, nakinah ka hrilh ang che" ka ti ve thung a, ka nu a awm lo nain thingpui ka buaipui hmasa leh a, ka pi ta tur bik chu tray ah ka dah hrang a, Sensiari ka pek hnuah, "Ka nu leh ka pi ka va pe lawk ang" ka ti a, kal mai ka tum chu, "Ka nu ta tur kha chu dah rawh, keiman ka lo pe ang" a ti a, ka hnial buai lem lo. 

Ka pi pindan chhung chu a lo la thim khup a, khumah a mu bam a, a khawngaihthlak reuh hle. 

"Ka pi, tukverh saw ka hawng eng duh angem?" kun hniam chunga ring angreng taka ka tih chuan, "Hawng lo ang current on zawk rawh" a ti a, a ţawng a fiah angreng a, thawk khat chu a veng deuh alawm. 

"Stool ah hian thingpui leh chhang ka dah a nia aw...i in peih ang tiraw?" ka tih chuan, "Aw ka lo in ang. Nakinah i hman hunah min rawn kawm ang che aw" a ti a, a khua a har hmelin ka kawm ngei tur thu ka hrilh hnuah ka chhuahsan a, tih tur ka ngah khawp mai. 

Rawngbawl pah chuan Sensiari hnenah, "U Dini chu sawiselna em em ka nei lo. Min ngaithei vak lo em mawni aw ka ti mai mai mawle. Naupang lah kha engtinmah ka ti mang bawk si lo a, khataţang khan ka nu pawh hian min haw deuh niin ka hria" ka ti sap sap a, "Naupang i hau a tih khan keipawh mak ka ti. Kan chungah hi chuan a sual ngai miah lo a, ka hre tawh bik lo le. A ngaithei lo che a nih chuan a lang chhuak vat mai ang. Thu vaivir thiam deuh te hi an awm ve ţhin a, u Dini tak pawh hian fuihtu a lo nei ve pawh a ni maithei a, mahse sawi tak ang khan ka nu nen hian an in nufa ve lutuk a, a thik che a nih pawn a awm lutuk tho. Dawt a a hek che a nih chuan a dik lo hul hual a, hrehawm tih phah nan hmang duh suh, thudik chu a langchhuak zel a, ka nuţa te, ka pa pawh a ni tho, thudik lamah kan ţang vek zel. A dik lo zawk a nih chuan amah leh amah a inti chhe dawn tihna a ni mai. Mo puite ngaithei miah lo mihring hi an awm ve a, chutiang chi chu a lo ni ve pawh a ni maithei" a ti duah a, "Aaa...duat rawn a ni ve ţhin a, a demawm loh chu. Bakah misual tak a ni pawn ka hre lo, kan la awm dun tam loh vang mai mai a nih hi. Hun a rei ang a, kan la in ngai viau maithei a sin" ka ti leh ta daih a, mopuite hek anga ka lan loh nan a sawi mai mai ka ni. Engtikahmah kan inkawmngeih theih ka ring lo a, Sensiari sawi hmangah min ngaithei lo tial tial dawn tih ka hre thiam ve vek. 

"Nia..in la inkawmngeih ve mai ang. Ka nu phei chu a thinrimna a hre rei ngai lo, tun ang hian thinrimna a neih chuan a lanchhuah tir a, a rei tak tak ngai lo" a ti a, rawng kan bawl dun mawlh mawlh a, ka nu ka ngai thar riau mai. Inhnaih viau mah ila ka kal thei si lo a, kan in lamah kal ngat ila chu an thinrim lehzual dawn lutuk tlat. Mo dinhmun lo hahthlak zia ka hre ve chiah. An ni vek kher lo a, a tam zawk chuan vawikhat tal hrehawm tih ngawih ngawih chang kan nei vek ang. 

Tintin-a lo tho chhuak chuan ka pi a zawng hmasaber a, "A tho peih lo" kan tih rualin ka pi pindan lam a pan a, a rawn chhuak leh chuan, "A chaw tur bik kha lo siamsak rawh ka ril a ţam tawh a ti" a ti a, a hlauthawng deuh niin a lang. A pi ve em em kha a ni miau a. 

Keipawh ka che vat a, ka pi chaw ka siam lai chuan u Dini lo lutin, "Artui innei tiraw? Tukin chu thawh kan hai a, naupang tiffin tur pawh ka siam hman lo. Artui inneih chuan lo kan sak lawk la" a rawn ti veleh a, "Keiman ka lo kang ang. Vani chu hei ka pi chaw tur a siam a, chubakah thawh hlim aţang khan a kut a la awl lo hrim hrim" Sensiarin a lo ti a, u Dini chuan, "Hei Vani tan hian a awlsam alawm. Artui kan zawk zawk a ni mai, ka pi chaw tur siam pah hian a awlsam mai" a ti a, ka chaw siam lai bulah tiffin ruak a rawn dah rawk rawk a, min tham lovin min zahna pakhatmah a nei lo. 

Ka thinrim chu ka insum thei lo thut a, kal mai a tum lai chuan rang deuhin ka inher a, "I fate tiffin ka siam nachhan tur ka hre lo" chang khel khawl hian ka ti a, min en rang khawp mai. 

"Thawh lo hai pawh ni ula dawr a awm a, pawisa in nei a, artui lei turin i fate zing a mi tu emaw ber tir la, siamsak ve mai la, i ti thei reng alawm. Thawh i hai avanga i fate tiffin lo siamsak ka ba bik love" ka ti hmak hmak a, ţhat nain an hneh theih tih hrereng mah ila tunah chuan ka thin a rim ve em a, buai leh luih pah ila pawi tihna ka nei lo. Ţha te tein sawi se chu ka hrethiam, tiffin lah a rawn vawm lo chauh a ni a, ka thinin a tuar bik lo a ni. 

"Thil harsa pawh a nih loh kha. Ka pi chaw ei siam pahin siamsak ve rawh ka ti mai alawm" a tih chuan, "A harsat loh vang a nia nangmah khan heta lokal kher lovin ti zung zung rawh ka tih. Ka pi ei ang hi an duh ve mi? Bai vel hi an duh ve a nih chuan a thun tawp theih alawm. A thak ve deuh a" ka ti ve ngat a, min melh ram ram lai chuan ka inher hmak a, ka pi chaw ei tur ka siam zawm leh a, "U Din, keiman ka lo kang ang. Artui lei sa kan nei alawm" tiin Sensiari a lo inrawlh vat a, ka nute chuan duh duhin min ti kawi se pawi ka ti lo, mo ka ni a, hrehawm chu ka tawrh tur a ni. U Dini lehzelin min chhiahhlawh chei hi ka tuar thei bau lo. 

"Ka rin ai daihin i kawl hrawng. Nizan zankhua in ka kawţha lo ka tlan a, ka che zung zung peih hleinem. Ni lo se helamah ka rawn phei pui teuh lo" a tih rualin ka nu aw ka hre zui zat a, ka thinrim em vang aniang hlauhna pakhatmah ka nei lo.

U Dini chuan thil awmzia a lo hrilh zung zung a, ka hriat ve lai ngeia a sawi ngam chu mak ka lo ti lehpek tawh. "A buaithlak a nih hi, kan thu hi kan duh tlang si a" ka nu chuan a ti halh a, ka pi thleng tur chawiin choka aţang chuan ka chhuak a, ka nu leh ka mopui nu chu ka hmu lo der ve ve. 

"Ka lak bân ho kha va la mai teh" pindan chhunga ka luh ruala ka tih chuan dawhkan a lo hung ţha sawk sawk a, kal nghal mai lovin, "Ka pi, chaw tlem tal ei rawh aw" zaidam deuh hian a ti a, ka pi mu chu dimtein a tung tho a, a ţhutrem tir hnuah, "Lo ţhutpui lawk rawh. Ka nu te hian an ngaihven lo em maw ni, ka pi hi nidang a ang lo riau a nia Vanram" a ti a, din chhuah pahin mangang zetin a lu a tuai vut a, keipawhin ka pi pang chu ka lo dek a. 

"A khua a sik lo, chaw hi ei se la a zia mai ang. An tui vel kha va la phawt teh" ka ti a, Tintin-a chhuah hnuah ka pi kuah ran chung chuan, "A hrehawm tak tak a ni ka pi" tiin ka phun sap a. 

Ni a liam ve zel a, inchhung boruak a pik tulh tulh emaw tih tur a ni. Ka pi lah a dam thei bawk si lo, "Ka pi, khawiah nge i mawza lum zawng zawng kha? Hei i ke a vawt thlur a, ka lo bun tir ang che" Tintin-an a ti lung lung a, thingpui kenga ka nu rawn lutin, "Ka thi tawh dawn a tia a a ţhiante a lo sem zo vek a nih kha" a ti chu kan inmelh hrek hrek hlawm mai. 

"A thi lovang, tlang hrileng a kai a nih hi. Ka pi lehzel a thih chuan a pawi ngawt ang" Tintin-a chuan a lo ti a, min bia ni chiah pawhin a lang lo. Nghet zet a a kut hum ruh chung hian pindan aţangin a chhuak a, ka nu chhuah ve hnuah ka pi mutna bulah ka ţhu a, a kut cher riak mai vawn pah chuan, "Ni e ka pi, thi miah suh aw. Buaina dang ka duh tawh lo, kan nupa tan awm ve reng rawh" ka ti sap sap a. 

CONT...