BLACK AND WHITE-17

BLACK AND WHITE-17

"Sikul i kal leh tawh em ni?" ka pi thil ei chu ka enin ka bu nghat a, thei hrisel tur deuh ka hawn sak a, "A va thlum tui e" a ti vang vang reng a, a lawmawm ve hrim hrim. 

"Khawiah nge Tinkhuma?" ti a min zawh leh chuan, "Dawrah a kal a, a lo haw ţep tawh ang. Tunlai chu ţhahnem a ngai ve a" ka ti a, khum a ke a hlang tur chu ka pui a, a nghen turin lukham leh blanket ka dah sak a, ţhu mu deuh a a awm hian nuam a ti ber zel.

"A va lawmawm ve..ţhahnem a ngai peih ngai lo a, i lo awm ve hnuah dawr a hawng ţha peih chauh a nih dawn chu. Vani, duat viau ang che aw" ngenngawl taka a tih chuan, "Aw le...a fel ve sawt lutuk a, ka duat alawm" ka lo ti leh mai a, min hmaizah ve a, rui deuh a rawn haw chang pawh a nei ngai tawh lo. 

"Ţawngţaipui tam rawh aw. Pathian hi a haw tlat a, nang tal i ţawngţai tam a ngai a nia, kohhran bel tlat la, a zah mai ang che. Nangmah aţangin Pathian a hmu daih thei a nia aw" a ti dam thlap a, a ţawng zawi viau nain thawm dang a awm lova, a thusawi chu chiang takin ka hre vek thei a, zawm ka tum tlat bawk.

"A dik alawm...Pathian hian a ensan bikah a ngai a, a duh anga thil a thlen loh vang mai mai a nih hi. Nakinah Pathian tello a a awm theih loh zia a la hre mai ang" ka ti a, chhung inkhawm a tel loh dan phet a zawng a, mut dawn a ka ţawngţai te hian min tibuai lo a, min khap ngai hauh lo nain ţawngţai a ngaihnep zia a ti lang fo mai. A demawm bik loh a, kan duh anga thil a kal loh hi chuan Pathian hi a awm ta lo emaw tih mai awl tak a ni. 

"A â mai mai emai, Pathian awm zia a hriat vang zawk a nih chu. A chungah thil ţha lo a thleng a, Pathian ka ring lo a tih chuan Pathian ka mamawh a tih naah ngaihsak rawh. A nun a tuihal zawk a nih hi" a tih chuan ka ngaihdan a her danglam lawih a, chutiang zawng chuan ka lo ngaihtuah ngai lo. 

"Kaihruai tu leh pui tu tur a mamawh vang chauhin Pathian ka ring lo a ti. Pathian awm zia a hria a, a ring em em bawk. Amah a kal ngaihna a hre tawh lo zawk a ni. Ka khawngaih ţhin mange" a ti chuai raih a, hmalam en ran chungin a kut ţang a ti che zeuh zeuh a, Tintin-a tak hi chu a kalsan hreh khawp ang. A rilru ti hrehawm tu leh thih a hreh chhan pakhat a nih ve ka ring. 

"Ka thiam dan ang ang a puih ka tum dawn nia" ka ti ta ringawt a, a khua a har viau nain tih tur dang a awm ve reng bawk si, ngaihtuah ru deuh chungin ka chhuahsan a, u Zira leh u Rinhlua an awm tawh lo a, an hnathawhna hmun ve veah an kal leh tawh a, ţawng tlem ve ve an ni bawk a inchhung a reh phah hauh lo nain a nuam lo. An awm kha chuan buaina khap dai tu ber an ni ţhin a, tunah chuan mi ngaih a ho te tur pawh hi a so sang vak zel. Tintin-an ka thlavang a hauh ţhin hi U Din-in a haw takzet ţhin bawk. A lal tawh si a, thinrim tawpkhawkah lo chuan tih let ve ngam pawh a ni ngai lo. 

"Tunlai chu Tintin-a a thawkrim ve deuh a, a lo haw tlai bakah a hah ţhin si a, vawk chaw lo zu pe mai rawh. Sensiari a lo la haw bawk si lo" ka nu'n a lo ti nghal a, ka kawng na reng ţhin avanga rit chawi ka harsat lai tak a ni. 

"Aw le...chhum sa a awm em ni?" ti a ka zawh chuan, "Chhunah ka chhum vek alawm. Thim hmain zu pe la i tan pawh a awlsam ang. Dini a nuamsam lo a, pek kep nghal mai rawh aw" vin hauh loin a ti na a ka la na ve reng. 

Kawmthlang ah ka chhuk a, a hmun a remchan avangin kan vawkin bul chiahah u Mala te hian vawkin an sa ve a, an mamawh loh tehreng nen, U Dini'n, "Naupangin mamawh an ngah, khawmpui dawn a an thawmhnaw lei nan pawh a ţha" a ti deuh tlat a, ka nu a lawm viau thung. Hetiang hian ho te te a ka nu lawm zawng siam a thiam lutuk tlat. 

"Au Mami" ka hawichhuak chiah chu kan in piah deuhah Mary a lo ding a, "Lo len ka tum a, nu Ruatin vawk chaw a pe a ti che a" ring deuh hian a ti leh a, "Lo awm rawh ka lo chho vat ang" tiin ka au let a, lo chhuk ve rawh tihna ang vel a ni, a rawn tlan thla a, bucket ka khai tur chu, "Khawi ka lo khai ang" tih pahin ka kut a beng per lawp a, ka vawk chaw siam sa chu vawk chaw kuangah a chhung a, "Pek vek an ngai a nia aw an pali hian" ka tih chuan min rawn enin a thaw halh a, a lungawi chiah lo niin a lang. 

"Tukin ah ka nuam lo zual i tih avangin rawn kan che ka tum a, damlo chung chungin vawk chaw an pek tir tho che tihna mi?" a ti pek a, mitmeiin ka lo khap vat a, "Shhh..ţawng zawi rawh" ti a zawi sap a ka hrilh hnuah ka hmui zawnah ka kutzungchal ka dah a, kan in lamah a hawi chho zawk a, chutah nur nang chungin keichu min rawn en leh a, "An ti mah mah ve em a ni. Mo tih vanga inchhawr vak vak kher te chu a sual thlak e. An awm ang hian awm ve la chu mo sual an ti che ang a, anmahni mai bakah khawtlangin an dem rawn che ang a, mi tam zawk hi chuan mo neih kan thiam hlawl lo" a ti a, ngawi rengin bucket ruak chu ka la a, U Dini te vawk chaw tur ka siam leh mawlh mawlh a, a chang chuan thawh lawk a haw nal nal ka chak ve ţhin. Ka nu a lo thinrim ngei anga, chutih rual chuan ka duh lo chung chu haw leh turin min nawr lui chuang lovang. Mahse, ka haw a nih chuan Tintin-a hian awm ngaihna a hre dawn lo a, a chhungte a dem ang a, a nun a beidawng lehzual ang a, thil pawi zawk a thlen ka hlau a ni. No dik deuh anga lan ka duh lo bawk a, mi pawn an tawrh theih chu ka tuar ve thei em em ang ka ti ve tlat a ni. 

"Mo dinhmun hi ka la hrethiam vek lo nain a harsat hmel ka ti ţhin. Mi fa duat lai sal chhawr a chhawr tawk an awm a, mo te ti hrehawm hreh hauh si loin mo te hnen aţangin thil ţha ţha hmuh let an in beisei a, an duh loh zawnga an awm ve zeuh leh mo sual tiin an sawi darh leh chiam a, hmeichhiain mo tih hming kan put tel tawh chinah chuan dinhmun hi a hniam nghal ngawih ngawih mai a ni" a la ti hlak hlak a, "Chutiang em em chu ni bik love. Tunlaiah mo duat an intih hmuh tawh alawm. Kan changkang ve tawh a, mo te chungah tumah an sual duh tawh hleinem" ka tih chuan, "Duat viau che se la chu nuam lo chung chungin vawk chaw an pek tir lo ang che. In ah chuan awm la hahdam deuhin i mu ang a, hna i thawh kan phal teuh lo" a ti a, "Mahni in leh mi in te chu khaikhin chi pawh a ni hleinem. Ka duh lo chung chu engmah min tih luih tir thei bik lo, min ngaihtuah lutuk a nih kha" ti mah ila a ang zui hlak hlak reng tho a, min khawngaih lutuk vang vek a ni. 

Inah kan inzui chho a, veranda ah ka nu'n buh a lo thlei a, a bulah u Dini a ţhu bawk. Biak loh tawp aiah, "Khua a thim dawn ruai tawh a, hmuh a har tawh awm e. Naktuk kan chawl alawm, dah rawh keiman ka ti mai ang" ka ti mawi ve a, "Ka thlei loh te chuan zanin tlai thlak tur pawh a awm hleinem. Tukinah tu nge chaw chhum a? Buhfai thlei sa a awm loh chuan sawi tur a nia, chhunah en nachang kan hre bik si lo a" meinei deuh hian a ti a, "Sensiari" ka tih chuan, "Hei pawh hi a mawl hi he lutuk mai. Tun chinah chuan sawi ziah tawh rawh u" tih pahin a ţhap sawk sawk a, nuam lo duh ţhin tak a ni. 

Kan unau a kan din ve reng lai chuan Tintin-a a lo haw a, "Vanram, gate min lo hawn sak lawk. Thil ka lo hawn che" a rawn ti lauh a, phur deuhin gate ka hawng a, rawn tlan lut thuaiin helmet a phelh rual chuan ka nu te lam a hawi a, a ner nawk a, engmah phei chu a sawi lo.

"Mary, i lo leng elo? I va fel ve a" zangkhai deuh hian a ti ta zawk a, "Sensiari i rawn phur haw nghal nange? Vawiin chu a va rawn haw har ve, rawng pawh kan la bawl mumal hman hleinem" ka nauin a chhan hma hauhin ka nu zawkin a lo ti a, "Ke a nei alawm..amahin a rawn haw ve mai ang chu. In ah nilengin in awm a ngah nge rawng in bawl hman loh? U Dini te pawn an inah chaw an ei ngai mang lova, helama an ei reng duh chuan rawng tal bawl ve tur alawm. Phut nei ran hian che suh u" Tintin-a chuan a ti let zek a, u Dini pawh a hawi nghal hra mai. 

"Phut nei ranin kan che lo, i u Dini hi a dam ţha lo a nih hi. I u Mala lah a hnaah a buai a, naupangin engmah an la hrethiam tak tak bawk si lo, ngaihsak tu pawh a nei lo a nih hi" ka nu'n a tih ve takah chuan Mary'n nuam lo a ti aniang, "Au Mami, naktukah ka lo leng ang" tih leh kal a rual a, dan hman pawh a ni lo. 

"Vanrami pawh a nuam lo, a insawisel nasa. Thlei bik in neih viau dawn chuan Vanrami oui tur nula ka ruai hmak ang aw" Tintin-a chuan a ti a, ka nu thinrim hmel chu a hlauhawm takzet a ni. A meng kûl a, a mitmeng a rum bawk si, en ţhat ngam pawh a ni lo. 

"Laltinkhum, Vani hming kan sawi ri reng reng lo. I u Dini a dam lo a rawng kan bawl mumal hman lo ka ti mai a nih kha. In rilru a kawi emai tih ngaihna pawh ka hre lo che u" vin lek lek hian a ti a, "Rawng chu ka bawl mai ang. Buai chuan mi tam deuh eitur siam a buaithlak, hun a heh bawk. U Din, in in lamah ei ziah tawh rawh u" a ti nghut nghut a, min din hnaih takah chuan zu rim ka hria a, rui vak lo mah se a lo in leh hman a nih hmel.

"I va han zakthei lo tak e aw. I u te nupa hi kan fate ve tho an nih hi. A thuphungin thil ka sawi a, Vani ka tih chhanah i ngai ringawt a, vawk chaw ka pek tir a ni mai a, thil dangah ka phut hleinem" ka nu'n a tih chuan a hmel a inthlak hlawk a ni ber, a danglam nghal vek. 

"Vawk chaw i pek tir maw?" a ti vawt raih a, a kut a ka vawn rualin ka vawnna chu a thing thla a, "Tukin ah a damlo ka tia ka sawi ka sawi kha. Eng nge i hriat a?" a ti vin tuar a, "Tintin" ka lo tih chuan, "Inrawlh suh" bung zet hian a ti a, "Vani ka tirh mai lohin ti tur dang an awm hleinem" ka nu'n a ti chiah chu an ţhutna lamah helmet a vawm ri bur a, u Dini nen chuan an ţe ţhat a, ka pa pawh a rawn tlanchhuak rang nasa mai, u Mama'n a rawn zui bawk. 

"Eng nge thleng a? Tinkhum, i rui pek elo?" ka pa'n a tih chuan, "Vani vawk chaw ka pek tir a, chu chu a hua a nih hi" aw khur dar darin ka nu'n a lo ti a, a hlau hle ni tur a ni a awm a dawm vang vang mai. 

"Vani te chu a damlo a ni lawm ni? Tukin ah pawh khawsik chungin a nih kha a kal. Ngati nge vawk chaw i lo pek tir a?" ka pa chuan a ti ta daih a, mi dik a ni a, ka pa hi chu sawiselna tur ka hre lo reng a ni. 

"An lo haw tlai ţhin si a, Dini a damlo bawk si, Vani ka tirh mai loh chuan ti tur an awm lo. Ka thiam loh a nih chu" inthlahrun hmel tak hian ka nu chuan a ti a, "U Dini damlo bak i hmu thei lo. Engati nge Vanrami hi in ngaih theih loh viau a? Tunah hian sawi nghal vek rawh u, in huat bik tlat chhan ka hre duh" Tintin-a chuan a ti bur a, hnunglama a bag ah laiah chuan ka pawt a, hnuh sawn tum mah ila a theih thlawt loh. 

"Kan haw reng reng lo, ka en hran loh lutuk vanga tir ka ni. Mikhual angah chuan ngai ila engti tur mahin ka tir ngam lovang" ka nu'n a tih chuan, "A thleng nawn leh a nih chuan Vanrami te inah kan chho ang. Ka nupuiin hrehawm a tih ai chuan makpa chhung khung angin ka awm mai ang. Zak ve hrim hrim rawh u. Kal ang Vanram" tih leh ka ban a kaih a rual a, inchhungah chuan min hnuk lut a ni ber. 

Naupang tv en lai chu a off sak hmak a, "Haw phei rawh u, chaw va ei ula in duh leh lokal leh zawk rawh u" khauh zet hian a ti a, an in en hrek hrek a, Benben-a chuan, "Apate, kan inah chaw kan ei dawn mi?" a ti ha mai. 

"Dawn dawn...chaw chauh lo pawh in inah hlir ei tawh rawh u" uar fahran hian a ti a, muangchangin an tho a, an chapal ţheuh an bun hnuah an tlanchhuak a, "Nu, apatean in inah chaw ei tawh rawh u a ti" Benben-a chuan a ti lang lang a, an thin a rim leh hlawm khawp ang. 

"An rawn thinrim ange aw" zawi tea ka tih chuan, "Ka hlau lo nasa...an duh leh hmanrua nen pawh rawn lut rawh se, Din ramhuaii hi rawn kal sek lo se boruak a ţha a ni mai" ring zet hian a ti a, "Thu rawn neih tum, inrawlh ve tum tlat, phun ser ser ching an awm chinah chuan boruak a ţha thei lo, vawikhatmah rawn kal tawh suh se" a awki ngai chiah hian a ti leh a, u Mama a rawn lut rang nasa mai. 

"Duhtawk tawh rawh..naupang thlenga hmer tel an ngai em ni? I ti mah mah aw" a ti a, keichu nuam lo tih hmel deuh hian min en a, Tintin-a a melh rum viau thung. 

"An phu tawk a nih kha. Ka duh tawk ang, a ninawm tawh. A dik lo zawk tih hriat reng i ţan tlat chuan i hre khawp ang aw. Inthlang leh hunah ka in candidate ve dawn i ti lehnghal a, min tih thinrim chuan ka vote lo ang che" a ti a, choka lama inher pahin a nui suk a, kan boruak hi fiamthu a lak a tum leh tawh niin ka hria. Engpawh tawk ila nuih pui theih chin neih zel a ngai a ti fo a, u Mama pawh a hawihai leh viau tawh. 

"Vanram, lokal rawh se. Tlangval lai lai a upa a an thlan tlin pa kha hnaih vak suh, kum 50 rim a nam tawh. A san vak chuan a taksa ah khan hnim a ţo thei tawh" tiin choka aţangin Tintin-a a rawn au lung lung a, huat vak theih ni hek lo le, u Mama pawh a nui tawp. 

"In a ka awm laia ka nu'n vawk chaw pe tura a tirh che chuan min lo ko la, keiman ka lo ti ang. Nuam lo chung chung chuan engmah ti duh suh" a ti ve mial a, kan nupa a kan in a kan chhoh daih a hlau aniang, anni tan a mualphothlak dawn em a, a awm ve tho. 

Choka a luh paha, "Ngati nge khatianga u Mama i fiam vak a?" ka tih chuan nui chung hian min rawn en a, "Ka fiam loh te chuan min hau dawn sin" a ti sam et a, a thil hawn a phawrh mawlh mawlh bawk. Sunhlu te, tengtere hmin pack sa thlap te leh thei chi hrang hrang a inpawlh nawk mai. 

"Engatan em em nge i tih a?" ka ti hluai a, "Ele..i ei atan" a ti then a, "Awii...a va tam em em ve. Ka ei seng nang" ka tih chuan, "I vannei reng a sin, ei chak i sawi apiangin i ei sen loh khawp a tam ka lei ziah. Hmeichhe pasal nei fuh tawh vek vek hi chu vannei tak an ni" min ti let daih a, fak chawp a ngai lo reng reng. 

"Zu rim i nam" a mit a en ran chunga ka tih chuan, "Nam ang chu...zu hian rim a nei miau alawm" a lo ti leh mai a, "In loh tum rawh ka tih kha..i mak ve e, nang tal chu insiamţha teh" ka ti a, danglamna a awm mang hauh lo nain a rim a nam ringawt pawh hian rilru a hrehawm ţhin. 

"In loh aiah tlem ka in. Vawilehkhat a nghei hmak a harsa a, hrethiam ve la" tih leh fridge hawn a rual a, chawhmeh a phawrh ruih mai.

"Ka in tlem tial tial anga ka nghei ang i tia, i in tam tial tial zawk ange aw" ka tih chuan, "A tlem leh tam chu ka hrethiam ve, lungngai suh, ka nghei hmak ţep tawh" a ti tak nain ka ring zo lo ţhin. Ka hui pap rual chuan min rawn en leh a, "A va mak pap pap ţhin ve" a ti a, rum zet a ka lo melh chuan fiamthu ka thawh emaw tih mai tur a ni, a lo nui hawk a, "Thei hi i ei nghal duh em? Ka lo siamsak dawn che mi? A thlum nge a hangin i duh? A thur hian mi?" a ti zung zung a, "Ka nuih a za lo" fiah zet a ka tih chuan, "Aw..za su..hmeichhe za deuh chu an hlauhawm" tiin ka thusawi a lo kaih lek a, ka vawm chawrh lo chauh a ni. 

"Customer ka nei rei lutuk a nidang aiin ka tlai a, ka tihpalh lutuk, tur chiam chi an ni si lo a, in lo buai em?" Sensiarin a rawn ti lut sawk sawk a, "Teuh lo mai..hei rawng kan bawl dawn chauh. Inthlahrung duh reng reng suh" ka lo ti fiamthu a, "Ka inthlak anga ka rawn pui nghal ang che u. Zanah ka inbual mai ang" a ti a, min chhuahsan lehnghal a, ka nu pawh a buh thlei fai sa nen a rawn lut a, u Dini a la tel ve zel chu mak ka ti viau mai. 

"Naupang chu an haw tawh a, keichuan hetah kan pa ka lo nghak ang" a ti vel a, thingpui bel lain a chhuang zui rak rak a, vawt tih hmel deuhin a inkuah hlun reng mai. 

Ka nu chuan damdawi bawm a hai rak rak hnuah nachhawkna a phawrh a, u Dini pek pahin, "Kha, nachhawkna hi ei rawh" a ti zui zat a, "I eng nge na a?" ka lo tih ve chuan min melh ralh a, "Ka hritlang" tih bakin min chhang lo. 

"Ka pi i ngaihven em?" tiin Tintin-a chuan min zawt ta daih a, "Aw, ka awm reng a, thei ka hawn sak a" ka lo ti var a, "A chaw tur bik i chhum tawh chuan siam sak tawh mah la a pawi lo" sana en pah hian a ti a, ka che zui nghal a, ka nu hian mi ngaihsak a thiam vak lo nge ka hre lo, ka pi pawh hi rin aiin a ngaihsak lo a, Tintin-a erawh chu a pindanah a lut zut reng mai. 

"I phone a ri" ka tih rualin keimah zawkin ka en ta tho a, hmeichhe hming ka hmuh chuan, "Keiman ka chhang ang" ka ti hmak a, a lawm hmel em em mai lehnghal. 

"Hello" ka tih rualin, "Tintin-a ka lo bia" a rawn ti a, "Ti hian sawi mai rawh ka lo hrilh ang" ka ti ve hmak a, buaina dang neih ka peih tawh lo a, polite lo nih pawh pawi ka ti lo zawk. Tintin-a lehzelin min ti na a nih chuan ka tuar zo tawh lovang. 

"A bialnu ka nia, lo hrilh rawh, min rawn be rawh se" a ti chu ka ţek chhawk ni maiin ka hria. A hming chu ka en nawn leh a, ka hriat ngai a ni lo. Phone lah chu a dah zui daih lehnghal a, ka pi chaw tur chu ka siam sawk sawk a, "Eng nge a sawi?" a tih pawh chuan ka chhang lo. Ka nu te an awm ve miau a, i bialnu ka tih chuan u Dinin min hmusit lehzual lutuk ang. 

Antui vel bowl a ka suah chhuah lai te chuan ka kut a khur a, ka awmdan chu ka sawithiam lo, kei hian depression emaw anxiety te ka lo nei rengin a nia ka rin ni. 

"Eng nge a sawi Vanram? I awmdan a dik lo" chang zet a a tih leh rual chuan, "Nakinah" ka ti hmak a, ka pi pindan lamah ka phei zui nghal a, "I va peih hma ve...nang meuhin min siam sak chu a tui leh dawn mange" ka piin a lo ti chu ka mittui a tla ringawt nia! 

"Ei ţeuh rawh aw" aw khur chung hian ka ti a, ka siamsak zawh chuan ka thaw hak a, khum bulah ka ţhu nghal hnawk a, ka chau takzet a ni. 

"I damlo em ni? I eng nge na a? Hna i thawk nasa lutuk em ni? Ngawi rawh ka dam ang a, Ruati bulah nula awmpui tur zawng turin ka hrilh dawn a nia" a ti sawk sawk a, ka hmai ka hup a, ka insut zui hlawp hlawp a, boruak a hrehawm em a, ka pi ngaihsakna awka ka hriat meuh chuan ka insum zo lo a ni. 

"Ngati nge i ţah?" ka pasal chuan ka hmai hupna kut chu lak sawn a tum a, ka lo ţang ve tlat a, "Nichin a i biak nu khan eng nge a rawn sawi?" dam thlup hian a ti leh a, hmu lo mah ila ka hmaah a ţhu ve tih ka hre thei. 

"Eng nge a rawn sawi han sawi teh. Kan pahnihin kan be dawn nia" a ti a, ka la chhang chuang lo. 

"Innu kha i vel pek em ni? Tinkhum, puitlin zir rawh ka tihna a rei lutuk tawh. Ka hrilh ngun zo zai tawh che, i zawm duh lo reng reng mai" ka piin a lo ti ve a, "Ţap tawh lo la ţha deuhin sawi teh" ngenngawl zet hian a ti leh a, ka hmai ka la hup reng a, theih chu nise bo vang vang rih ka chak khawp mai. 

"Ţap tawh suh...kan pahnihin kan be dawn nia ka tih kha. Ţap lo la..sawi dun zawk teh ang" tih pahin ka kut chu lak sawn a tum leh a, naupang thlem takin a ni min thlem ni. Eng nge a chhan ka hre lo, kei lah chu ka ţah a chhuak telh talh a, nau ka pai vanga ka danglamna ah ka ngai. 

"Phone ka va la ang" a ti a, pen ri chu ka ngaithla reng a, kawngkhar a rik rak rualin ka kut ka la thla a, ka mittui chu tuaifaiin khumah, ka pi bulah ka ţhu ve a, min lo en uluk nasa mai. 

"Tinkhuma kha a rui em ni?" a tih chuan lu ka thing a, ka nui lui bawk a, a harsa ţhin a ni. 

"A hau che em ni? Ruati leh bawk nge Dini? I rilru ti na tu an awm em ni?" a ti mawlh mawlh a, ka biang a lum leh pap a, ka mittui a tla reng mai, ka ţahbelh lo a sin mawle. 

"Tuman min hau lo" ka ti tham ţiak a, a hriat phak pawh ka ring lo. 

"Mala a lo lut kawi a nih chuan min rawn hmu turin i hrilh dawn nia. A nupui hi zilh ve teh se" a ti a, damlo chung pawn u Dini vanga kan boruak chhia hi a hrethiam ve vek tho. 

"Le...eng nge a sawi han sawi teh le" a phone min pek pahin a ti a, ka hmaah a ţhingţhi a, a kut chu ka malpuiah a nghal a, ngunthluk fe hian min en a, min zirchiang ni awm tak a ni.

"A bialnu ka ni a ti" ka tih chuan a lo chek hluk a, "A tih tur hriat loh thlak e. Call leh rawh, i hriat laiin ka lo bia ang" tih leh pahin ka biang a rawn tuai tâwk a, ka ţah ve pawhin ka pasal hi chuan min dim vak ngai chuang lo. 

Ngaihţhat nan ka call leh a, "Tintin, ka lo zin dawn ka tih kha i hre lo mi? Ka lo thleng tawh, zanah lokal ang che" a ti zat zat a, a aw lah chu ngaihthlak a hrehawm em em mai lehnghal.

"Ka nupui bulah ka bialnu angin i insawi a, hei kan buai phah lek lek alawm" tiin ţha deuhin a hrilh ve mial a, chunu lah chu a nui nasa mai.

"Ka chanchin i hrilh ngai miah lo a ni maw? Lo hrilh tawh rawh, nang ang chu duh ila pasal ka neihna a rei tawh ang" a ti chiah chu phawk deuhin Tintin-a ka melh a, ngaihawm deuh hian min lo nuih a, "Nang te chuan mipa hrim hrim i duh hleinem. I bialnu a lo tel ve em? Kan nu ai pawn a thikthu a chhia a, a tel ve ang tiraw?" fiamthu a tih pahin ka biang bawk chu a rawn tuai leh a, a sawi takah chuan ka hre lutuk ringawt. 

A hming a save dan chu ka en nawn leh a, Baby muah muah-i tihin a lo dah a, Baby biang no deuh-i tih ang zawngin ka lo ngaihruat a, a ni teuh lo. An ţhian ho group, muah muah tih group a awm ve a ţhiannu kha a ni ngei ngei ang. Ka hmu tawh a, phone a a hming a save dan hi ka lo ngaihven ngai hauh lo thung. 

"Vanrami chu lo hrilh rawh, mo kan rawn lawm ţha leh dawn a nia. Min lo dawng sawng ţha viau ang che u" thawveng zet hian a ti a, "Hei i ţawng a hre vek" min en paha a tih chuan kan biak nu chu a nui awr awr a, "A thikthu a chhe emai naupai hri a nih kha. Zanah lokal la, mo lawm ţhat leh dan tur vel kan rel dawn nia" a ti a, an inbiak zawh hnu chuan nui ruh ruh chung hian min en a, "Min chhaih chak tih ka hrereng" ka lo ti ringawt a, "In inhau reng a, inchhung a hrehawm em alawm" ka ti leh a, ka riat nawi ta vel mai mai a.

"Baby-i a nih kha...a bialnu nen an lo zin a nih hmel. I hre lo mi?" ti a min zawh chuan, "Hria" ka ti chhum hmak a, Aizawl a kan awm lai khan Baby hi chu vawithum vel lai ka putea te inah khan a rawn hruai ve tawh. 

"Innu kha hau tawh reng reng suh. Nupui i nei tawh a, puitlin zir bawk rawh. Fa in nei thuai ang a, nangmah ber i puitlin theih loh chuan i nupui fanauten retheih chiah an hmasak tih hre rawh. Kan Tinkhuma meuhin fa a nei ve tawh dawn a, hmuh hman loh ka hlau emai" ka pi chuan a lo ti a, a thusawi inzawm lo lutuk avang chuan kan nui hak hak a, "I hmu hman dawn chiang. Nangman i pawm hmasa ber ang. Nurse ho tih loh chu ka dang vek ang. Ka piin a pawm hma chu tuman pawm suh u ka ti ang a" a ti a, ka pi lamah chuan a kut a lek chhuak a, a lu a tuai sak thuak hnuah a chaw ei lai chu hmuhnawm tih hmel deuh hian a en a, "Ka pi, mipa nge hmeichhia i duh zawk?" a ti leh a, ka pi pawh a nui ve ta nge nge a. 

"Mipa pawh hmeichhia pawh ka duh ve ve. An nufa a an hrisel ţhat chuan a tawk mai. In nu hi duat la, kohhran bel tlat ula" tiin ka pi chuan min hrilh ang chiah a hrilh ve a, "In inhmangaih thiam chuan eng natna pawh vei ula mite awh rawn in ni tho ang" a ti a, a thil ţhial lai a lem te te hnuah, "Chhungkaw din chu a awlsam a, chhungkaw hlim tak neih a har thung a, chhungkaw hlim nei tur chuan ţan rual a ngai, mi pakhat chauhin midang hlim theih nan a theihtawp a chhuah kha a tawk lo, kan vaia intih hlim tawn a ngai a, chhungkaw chakna ber chu ţan rual a ni mai. Tin, nupa nih tawh chuan kan fate lo chu midang an tel ve a rem lo. Mi pahnih chauh in nih a ngai a, midang in lak luh tel a thiang lo. Bumna hi nupa pawt ţhen tu pakhat a ni a, langsar deuh a ngaihzawng va neih emaw, a ruka midang mut pui lam a ni lo, i kawppuiin a hriat ve hlau a thil thup i neih chuan i bum daih tawh tihna a ni mai. Ka thusawi hi hrereng rawh u" a ti charh charh a, a duh ang a sawi zawh meuh chuan a chauh hmelin a chawl zui vang vang a, a hahdam hnuah muangchangin chaw a ei zawm leh a, a eikham chuan tui ka chhawp hnai a, Tintin-an a kut a sil sak a, a hmui thlengin a hrukfai sak a, "Dam vat rawh aw..naute pawm tur i neih ţep tawh hi" a ti a, an hmuh lohin nui var var chungin ka pum ka khawih a, a lo pian hunah meuh chuan he inchhunga cheng ve ho hian keimah thlengin min ngaina tel ve vek tawh mai ang. 

"I zia a dang riau, tunhma chuan hmeichhe dangin ka bialpa min tihin i fiah thlap zel. Nichin a i awm ang khan hrefiah hmasa lovin i thinrim ngai lo" pindan a kan nupa a kan awm hnuah nichin a thil thleng kha a sawi chhuak leh a, "Ka hre lo le...nau ka pai vang aniang, ka ngaihtuahna te hi a ti tawi vek aniang. Ho mai mai a ţah ka ching sawt bawk si" ka ti a, a nuih a za viau mai. 

"I ţap ka thlem hian mipa ka nihna lantirna hun ka neih ve phah alawm. I chhel leh lutuk a, i bialnu emaw intih chang te ka nei ţhin. Khatiang kha chu a nuam lo" uang thuang zet hian a ti a, "Kha patil nu khan min rawn bum kher a nih kha. Naupai hrehawm zual hi a pelh hunah chuan a hma ang khan ka chhel leh mai ang" ka tih laiin Sensiari a lo lut a, "Tintin, u Mala'n lo chhuk lawk teh a ti" a rawn ti a, tim daiin keichu min melh a, "Kal ve duh suh" a ti zui sap a, hmanhmawh deuhin a chhuak lehnghal a. 

"A thinrim aniang a" hlauthawng tak a ti chung hian Tintin-a chu ka hnaih vat a, min thlamuan tum ni awm takin min lo kuah a, "A hlauhawm loh. Annu thiam loh naah thinrim thei a ni lo. Lo awm rawh ka rei lo ang" a ti a, ka chhipah a fawp zui vang vang a, keimah vanga buaina neih reng te, a unaute nen a inhauh reng te hi a ning tawh angem le? Ţanpui ka ngaih reng chuan hnawk sak min ti thuai maithei a ni. 

"Ka lokal ve ang, sawifiah a ngaih chuan keiman ka sawifiah ang. Ka pi pawn chhungkaw chakna ber chu ţanrual a tih kha. Tun aţanga bul kan ţan a ngai alawm" tiin ka ngaihtuahna atthlak zet mai chu ka chet chhuah pui leh tawh a, ka nin tawh em vang a ni tel bawk. 

"A ngai lo...keimahin ka sawi fel thei ang" ti mah se ka zui lui tlat a, inhnuai kan thlen thlak meuh chuan an lo ţhu khawm leh ţhap tawh. U Mama zawk chu sual kan tih theih tehreng nen tun ţuma ka hmu chu ka thlamuanpui tlat a, mak tak a ni. 

"Tinkhum, tlaiah eng thil chiah nge thleng?" a lo ti nghal pang a, kan chhan hmain u Mama chuan, "Kan sawi ang kha a ni mai. A dik ber kawh chat tur an awm lo. Mahse, damlo chunga vawk chaw in pek tir kha chu a dik lo. Naupang hnar haw kha a ţullo bawk. An dik lo vek a, an inhria. Sawi zui a ţul tawh lo, nitin in inhau a a zahthlak. Ţhenawm khawveng te pawh zah ve rawh u" a lo ti nghal zung zung a, a sawi dik chiah, midang te tan en nawm kan ni ringawt. 

"Chiang deuhin ka hrilh ang che. Tun bak kan sawi tawh lo bawk ang. U Dini hian ka nu bula phun ser ser a ching a, Vanrami haw ngai hlei lovin a huat phah niin ka hria. Eng chiah nge an sawi chu ka hriatpui lem lo. In haw hunah in nu i zawt dawn nia. Vanrami hi a mil lo a, a ngaihtheih loh viau nachhan pawh hi nakinah zawt rawh. U Dini a lo lan apiangin buaina a zual a, ka nu a danglam ziah bawk. Dinin min fuihpawrh a, chutiang khatiang chuan min ti a ti kher lo mah se thil awmdan aţang hian mi â nileng lo chuan an man thiam vek ang. Chipchiar takin engmah i hre ve lo a, i hriatchian vek hma chu rawn thinrim lo bawk rawh. Amah avanga chhungkua kan buai reng ai chuan in hrang in chang tawh tho a lokal tawh lo zawk rawh u ka ti a nih kha" Tintin-a chuan a ti nghat nghat a, a vin hauh lo nain tun ţum chu a zahawm ve tlat. Thudik tak ţha deuh a a sawi vang a ni. 

U Mala pawh a ngawi hmak a, nupui ngam lo tih takah an nu chu a khap hneh chuang lo. Nitin a lokal a, naupang ho erawh tlemin an tim deuh a, tih tlangnel tum viau mah ila naupang chhawnchhaih hi ka thiam ve vak lo a, u Dinin an beng hriatah ka chanchin chhe lam hlir a sawi dawn tih chiang sa a ni a, min nel tak tak thei lo. 

Ka pi a na zual zel a, a natna ber sawi theih si lohin a chau tial tial a ni ber. Mi chuan, "A upa ve tawh a" min tih sak mai zel a, tar viau tawh mah se kan tan chuan a hlu takzet a ni. Kan nupa tan a hlu lehzual a, min zilh ţhin tu ber a ni a, hauh kan ngaih pawhin hmangaihna nen min hau ţhin. 

Damdawiina kan luh ve lahin reilote hnuah min chhuah tir leh ţhin a, ka pi phei chuan, "Damdawiin a kal ka duh tawh lo" a ti bur tawh a, in lamah kan in enkawl a, kan vengah doctor a awm hlauh a, a ţul chuan kan ko mai zel a, kan tibuai ţhin khawp mai. 

A dam nan theihtawp chhuah mah ila Pathianin chawl hahdam turin a duh tawh aniang ka school bangin ka pi eitur ka siam mawlh mawlh laiin a pindan aţangin ţap thawm a lo chhuak a, ka nu ngei a ni. A nat zual deuh hnu hi chuan nu te tih takah a awmpui chawt a, zanah pawh ka pi pindanah hian a riak mai zel. Min ko chel chul a, ka va luh ve meuh chuan ka pi chu a kal fel der tawh. A hahdam hmel a, tui deuh a muhil a ang a, cher viau tawh mah se a hmel hmuh a nuamin vanramah a kal ngei ang tih ka hria. Tintin-a ka hrilh huphurh takzet a ni. 

U Mama a che zung zung a, mipui an rawn pungkhawm har lo. Inchung lamah ka chho a, Tintin-a hnena ka pi thih thu ka sawi chuan a ngawi reng a, "Lo haw rawh aw...hei mi pawh an tam tawh a, an che nghal zung zung hlawm a, i hna kha kalsan la lo haw vat rawh" ka ti a, thil thleng thut chuan min ţhawng a, ka tha te a khur hial a ni. 

"Ka lo haw ang" tih chiahin min chhang a, a aw chu ka sawi thiam lo, tawrhna a tel a, hrehawm a tih luatah a var lama kal lova a dum lam bawk a min pen san leh ka hlau takzet a ni. "Ka sual ber lai pawhin min endan a danglam ngai lova, beiseina a nei tlat ţhin, ka pi ang hi tumah an awm lo" a ti fo a, a ngaih hlut berin kumkhua atan a kalsan tawh dawn a, a tuar thiam lo khawp ang. 

CONT..