BLACK AND WHITE-18

BLACK AND WHITE-18

Tintin-a lo haw chu ka lo chiau au vat a, mi pawh an tam tawhin ka pi ruang pawh chu an kil bial laih a, khaw danga kan chhungte ho pawh ka pa leh u Mama ten an hrilh kual zung zung a, u Zira a lo haw thei dawn lova, ruang a nan hman a inbeisei lo a ni, u Rinhlua erawh chuan rawn haw ngei a tum a, "Zanah ka lo thleng thei mai ang" a ti a, a awmna a hla lutuk lo bawk a, a rawn ngaipawimawh khawp mai.

"I inbual nghal duh em? Tui lum i duh pawn a awm a nia, inbual nghal la a nuam zawk mah ang" ka lo ti zung zung a, min en dan chu ka hrethiam lo, a lungngai takzet tih chu a hmelah a lang vek a, a mitmeng ber chu hriatthiam a har takzet a ni. Ka darah a hmer salh a, min chhang lem lovin ka pi ruang awmna lam chu a pan phei a, Tintin-a an hmuh meuh chuan ka pi ţhiante leh amah ngaina der ve tu te chu an ţap uar ngang mai. 

Anmahni hmuh chian theihna laiah ka ţhu veleh rih a, Tintin-a chuan ka pi biangah a dawm vang vang a, a ţap lova, a bul vela mite chu hmu ang pawhin a awm lo. Ka pi ngawt chu a en a, a tana a nat dan tur zia ka hriat pui a, ka hnem thiam lo zawk a ni. 

Inchung lama a chho chu ka zui chho a, pindana ka luh ve chuan ţhutthlengah thatchhe deuhin a lo ţhu zawi hnawk a, a en ngai a en tlawk tlawk bawk. 

"A eitur ka siam hlanin a nia, ka inring hman bik lo. Ka nu'n a dawm hlum a, ka hriat veleh ka lo be nghal che a nih kha" inthlahrung ru tak hian ka ti a, a bulah ka ding a, ka hmaa thawmhnaw ro seng hlim, ka la thleh fel loh ho chu ka khawih pah a, ka thlep chuang lem hlei lova. 

"I inbual nghal dawn em?" ka tih leh chuan a ţhutna aţangin a tho a, ka zawhna pawh chhang ta lo chuan beer a phawrh a, a kawl tih ka lo hre lo reng reng. A che vel chu ka en reng a, a ţhutna ngaiah bawk ţhu lehin beer chu a in a, meizial a zu pah bawk a, ka khap chuan a thinrim ka hlau bawk si, ka awmdan chu a laklawh vel vek a ni ber. 

Zanah u Rinhlua a lo thleng a, Tintin-a pawn beer a in ţeuh tawh. A inbual a, inbual zawhah a in lehnghal a, ka pi bula a awm tlem lutuk chu ka ngaihdan a ni lo deuh a, "Tun bak i hmu tawh dawn lo. Naktukah an vui ang a, ka pi hmel hmuh tur a awm tawh dawn lo a sin. Pindan chhunga beer in tluk tluk reng lo hian ka pi bulah zuk awm ta che" tiin ka hau a, a lo ner nawk a, "Pathian i rin em kha, ţawngţai la a dam leh mai ang" elsen zet hian min ti a, a hmel te chu nelawm loh tak a ni. 

Ka mangan tawpah u Rinhlua ka ko a, mi hmuh laia phun ser ser ka duh loh deuh avangin mi tlem deuh na laiah ka kalpui a, "Tintin-a khi beer a in char char a, han khap teh. Nang chu a hlau deuh ang che. I rawn thlen hma zawng kha chuan ka pi bulah a awm ve a, midang nen a in rawn thlen huk rual khan inchungah a chho a, a in zawm leh a, mi pawn mak an ti mai ang" ka ti sar sar a, ka ngenngawl hle bawk. 

"Kan Tinkhuma hi chu aw" a ti a, inchunga a chho chu hmanhmawh deuhin ka zui chho a, a tuar thiam lo tih hre tho mah ila hetiang em em tur chu a ni lo. U Rinhlua nen a pindana kan lut min lo hmuh rual chuan ngeiawm deuh hian a nui a, Pathian lakah bawk a thin a rim leh tawh a ni ngei ang. Ka pi hi a neih hlu ber pawl a ni a, a laksak miau a, ani ang rinna lama der dep lutuk tan chuan a dam zawnga lak a har ve bawj ang, mahse a awmdan hi a dik lo tlat a ni. 

"Inhnuaiah chhuk rawh Tinkhum" u Rinhluan a tih chuan, "Ka mu dawn" bul zet hian a ti a, "Chhuk rawh ka pi an khung bo ţep tawh" pakhatin a tih leh chuan ka lo thaw hak a, ţawngkam thiam lo ber hi ka pawh buai ngam ber a ni bawk si, pro pastor meuh chuan a dam zawnga thil sawi a thiam tur a nia sin le. 

"Ka hmu duh tawh lo" a ti hap a, beer bawk chu a in leh a, laksak tumin u Rinhlua chuan a kut a lek chhuak uaih a, chhuh luih sak em lovin, "Dah teh a rimchhe tu ru si" ner nang nang chung hian a ti ta zawk a. 

"Nangmah kha chhuk rawh. Ka pi ka hmu duh tawh lo, ka mu dawn. A chiang em?" a ti nghut nghut a, rum zet hian u Rinhlua chu a melh a, "Nakinah i inchhir ange aw. Awmzia a awm tawh loh hnua i inchhir chuan--" a ti chiah chu, "Enge ka inchhir chuan?" a lo ti leh hmanhmawh a, u Rinhlua chu a ngawi vung vung a, "Awmzia a awm tawh loh hnua ka inchhir chuan eng nge?" Tintin-a a tih leh chuan, "Awmzia a awm lo ang" a ti zawi sup a, a riat nawi ta vel mai mai a, hahthlak bet bet tak a ni. 

"Vani, ka chhuk phawt ang a ka ni te pahnih ka rawn tir ang" a ti ta ringawt a, Tintin-a chu a kawk zauh a, "A letling zawng hlirin i awm. Khatiang kha i in reng chuan ramhuai te i la hmu ang" tiin a sawi ţhaih a, pakhat lahin a lo hlau lo nasa, in chhang bung ve si hi an in puitlin hleih a sin aw. 

U Rinhlua chhuah hnuah pawh min la be chuang lova, ka biakin a rul tawkin min chhang a, a chang leh min ţawng el a, ka thin a rim ve lek lek ţhin. Ka chauh deuh avanga khum lam ka pan lai chuan ka nu ute pahnih an lo lut a, thim hlimah an rawn thleng chauh a, an la pawr fap mai. Ka ni te ho an lokal dawn maw tih nak laiin, anni hi chu ka beisei hauh lo.

"A va mak ţhin ve..engati nge kawhmawh bawl zawng hlir a i khawsak ţhin a? Tunah phei chuan ţhalai ho deuh chiah an awm tawh a, inhnuaiah awm ta che. Hetia inkhung bo daih hi zah pawh i zak lo mi?" ka nu Chhuangi chuan a ti nghal hlawih hlawih a, Tintin-a a ngawi reng thung.

"Zahpuiawm leh lutuk mai. I pi khu a damlai pawn duat nachang i hre lova, zan khat lek a bula awm chu a har viau em ni? Pawisa i mamawh chang chiahin i be sawm peih. A ngaihtuah a a hmangaih tehreng che nen, nangmah vangin rilru nuam lo deuhin a thi ang" nu Chhuangin a tih leh hmarh hmarh lai te chuan Tintin-a chu a ngawi ngul a, a chhang let lova, a hmel landanah chuan engmah a hriat theih loh. 

"Tun hma, in naupanlai aţang tawhin buaipui ngai ber i ni reng a, hauh pawh kan hau ngun che. Thu i awih ve duh ngai lova, i unaute nen hian in anna pakhatmah in nei lo. In puitling chho a, a zia ve mai ang kan tih laiin ruihhlo bawihah i tang leh a, i pi hi a mangang ţhin a sin. Nitin min rawn bia a, Tintin-a tan ţawngţai rawh u a ti reng a, nang lahin ţhat i tum mang si lo. I unaute hi en ta che, tuman ruihhlo an khawih lo a, buaipui ngai pawh an awm lo. Zah nachang hre ve tur chu i ni. Chutah i rilru a puitlin hma hmain nupui i nei ve ringawt a, nangmah chauh pawh buaipui i ngaih tawh tehreng nen. Nangmah hmangaih tu ber i pi ruang pawh kil peih lovin pindanah zu i la in zui a, ţhalai ho an zai ţhap ţhap lai a hetianga i tawm bo daih chuan miin engtin nge an ngaih ang che? An sawi zui luih luih mai dawn che a sin. Englai pawh a chhungte rilru ti hah zawnga khawsa reng ringawt mai" nu Maremi chuan duhthaw zet hian a lo ti ve bawk a, Tintin-a chu za lo tih hriat zet hian a ţhen suk a, an ţawngkhum nasa bawk a a mitmeng chu a alh but but tawh a ni ber. Tunah chuan a thinrimna a hmelah a lang chhuak ve ta alawm.

"Engmah in hre lo" vawt raih a a tih rual chuan nu Chhuangi chu a lo ner nawk a, "Kan hriatchian em vang zawkin kan sawi. Nang hi chu englai pawh a chhungkaw ti buai tu i ni ţhin, i ni reng dawn bawk a nih hi" a tih chuan, "Chhuak rawh u" a ti hmuk a, kawngkhar lam a kawk a, "Laltinkhum, thu ţha sawi hian haw hlur zel suh" nu Maremin a lo ti leh a, "Chhuak rawh u ka tih chu. Ka ngaithla peih lo" a ti hrawk a, kawngkhar lam chu a la kawk reng a, a hmel pawh a hlauhawm takzet tawh. 

"Ka ngaithla peih lo, a chiang em?" fiah zet hian a ti leh a, "I rapthlak hle mai" nu Chhuangin a tih chuan, "Chhuak rawh u ka tih chu" a ti vin tuar a, a ding uaih tawh bawk. Khuma ka ţhu chu ka lo ding ve nghal a, ka pi thihna mai bakah a beer in avang chuan a rilru a fim tawh lo, pawi a khawih palh ka hlau a ni.

"Min vin ngam amaw? Min zahna chhete mah i nei lo Laltinkhum, i nu mai pawh ni lovin i nu ute kan nih hi. Inhnuaiah i pi ruang a awm a, chuti chung chuan zu i la in thei. I pi hi a der tal pawhin i ngaihsakna i lantir thei lo mi? A ruang takngial pawh i kil lui ve peih nange?" nu Chhuangin a tih rual chuan ka lo ţe ţhat a, Tintin-a chuan a kawr awmah a ţham a, hnek tum ni awm takin a tin uaih mai. Lo au ve nghal vat lo ila chu kut a thlak hman ngei ngei ang. 

"Tintin, duhtawk rawh" ka ti tuar a, nu Chhuangi chu a la tin uaih a, a hma zawnah a kut chu a hum ruh ngawt ngawt a, "Duh tawk rawh khawngaihin, lokal teh hetah lokal teh" tih hlawp hlawp pahin a banah ka pawt a, ka nu ute pahnih chuan rapthlak tih hmel zet hian an en a, an hlau tih erawh an hmel ah a hmuh theih. 

"Chhuak rawh u" sehchilh zet hian a ti leh a, a kut chu a dahthla riai riai a, nu Chhuangi a thlah fel hnuah pawh a thinrim zia chu a mit sem rum te, a bek ruh pawng ţawlh ţawlh ah te chuan a hmuh theih vek a, "Nu Marem, kal rih phawt mai rawh u" mangang zet hian ka ti a, min huat phah mah se pawi ka ti lo. A tuar ve takzet a, an ţawng duh dan kha a dik bik lo. 

An chhuah fel hnuah a ban ka vawnna chu ka thlah ngam chauh a, inhmachhawnin kan ding a, sawi tur pawh ka hre lo, han dem vak dawnin ka khawngaih tho bawk si. 

"Tikhan ka chhung te ho min hmuh dan chu i hre tawh em?" fiah zet hian a ti hrawk a, ka hlauthawng chu ka la thaw hlawp hlawp a, "An sawi ang kha i ni hleinem, i rilru a chhe lo a, ka pi hi i hmangaih takzet bawk a, ka hria che alawm. I landan mai bakah i chhungril kha ka hria, hmu lo mah ila ka hrechiang lutuk tlat" ka ti a, ka rilru no a chhuak a, ka mittui a tlak mai hlauin ka khap fak fak a, "Va mu hahdam rawh, mutthilh tum la, i harh meuh chuan i zia tawh mai ang" ka ti a, chhan pawh min chhang lovin min kalpel a, bathroom a a luh hnuah pindan aţang chuan a chhuak a, awm ngaihna pawh ka hre lo, a awmdan kha ka duh lo a, ka dem thei chuang si lo. Khawiah nge a kal dawn lah ka hre der lo. 

Ka taksa a nat em avangin ka mu a, ka tlaivar a nih chuan mi hmuhah ka tlu mualpho mai ang. Ka muhil dawn ţep tihah pindan kawngka chu tu emaw hian a rawn kik karh karh a, peih lo deuh a tho chhuak lehin ka va hawng a, u Rinhlua a lo ni. Pindan chhung chu a en kual thuak a, "Khaw nge Tintin-a?" a ti zui zat a, beidawng zet a lu ka thin chuan, "A va buaithlak ţhin" a ti ban charh a, hetiang hi a tih fo dan a ni, pawn lama hlimna zawn hi. 

"In ril a ţam takin sawhchiar ka lak kep cheu a" a ti a, a remchang laiah a dah a, lawmthu te ka hrilh hnu chuan, "In dang kan nei si lo a, a lo haw leh ang" a ti ve ngial a, "Aw..aw ka hria e" ka ti sawk sawk a, min chhuahsan chuan ka thawl huai zawk. Min hnem thiam chuang si lo a, a ruh lang rawt rawtin thil a sawi a, rilru a ti nuam lo zo vek zawk zel. 

Zinga ka harh chuan ka bulah a lo mu ve tawh a, a mutna lamah chuan inlet thawkin a muhil hmel chu ka thlir a, a hahdam hmel a, rilru na ve thei hmel pawh a pu lo. A lo haw lai ka hre hauh lo a, ka muhil nghet leh viau tawh a nih ka ring. Ka khawngaih tlat hi a chhan pawh ka hre lo, ka kaitho ngam lova, thinrim chung bawk a a harh leh ka hlauh vang a ni. Rei ngial ka en hnu a a mut lohna lama ka saisir rual chuan hnunglam aţangin min lo kuah a, a taksa si chetin min pawt hnai a, a awm zawn chu a lum leh vang vang tawh a, "I muttui em?" thophang aw zet hian a ti a, "Aw...i lo haw har em?" ka lo ti ve nghal zat a. 

"Khawvar dawnah ka lo mu" tih pahin a khabe chuan ka dar a rawn nawk a, "Ka kaitho duh lo che a nih kha" a tih zawm leh a, "Muhil leh rawh, nakin deuhah ka kaitho ang che. Mut tlem lutuk chu a ţha lo" ka lo ti ve a, zan lama a awmdan avang khan ka hau duh miah lo a, a in ngaihtuah harh hunah amah zawk a inthiam lo mai ang. 

"I ril a ţam em?" dam deuh tak hian a ti leh a, "Ţam lutuk lo e...ka tho ţep tawh alawm" ka lo ti mai a, "Umm" a ti ringawt a, ka kawnga kuah pahin ka dul chu a chul hauh hauh reng a, engmah a sawi tawh lo thung. A mutthilh leh hnuah ka thawh san a, inhnuaiah chuan mi an lo tam lutuk tawh lo. Ţhalai phei chu hmuh tur an awm tawh mang lova, nu leh pa an awm nual thung a, ka pi ruang pawh chu an lo la kil laih a, ka nu phei chu a chauh hmel tawh khawp mai. 

"Vani, i tho nuam em?" Sensiarin a lo ti a, ka nawm loh zia hre tu a ni a, min ngaihtuah ve takzet a ni. 

"Aw..i mu miah lo mi?" ti a ka zawh chuan a lu a thing a, "Thingpui a awm a, va in rawh" a ti a, a mit a bui lâk a, a ţap nasa hle a nih ka ring. 

"Ka mu daih kha nuam lo chu ka ti ve, mahse ka taksa a chak lo lutuk a" ka tih chuan, "Kan hrethiam che alawm. U Mama leh u Rinhlua phei chuan kaitho suh u an tia. Mahse, thawm a awm reng a i harh ka ring tho a, an zai leh ţep tawh ang, an lokal khawm leh tak tak hmain va in ei puar vat vat rawh" a ti zung zung a, pawn ka chhuah rualin thingpui lum ho hmuh tur an awm nghal a, ka nu nen kan intawk chiah bawk. 

"Nizan i tlaivar ve em?" min ti a, puan lum a bat hlun a, a sam a lo ti kir chiat bawk. 

"Aih..ka mu hma lutuk. I sam kha engtik a i tih danglam nge a?" pangngai thei ang ber a lan tum chung hian ka ti a, "Nimin piahah daih tawh. Nizan khan lokal ka tum zet nain mi an tam dawn em a, boruak ka zawh loh ka hlau deuh a, che zung zung rawh aw, miin an chik ru ran dawn che a nia" a ti a, nui sang chung hian ka bu nghat nghat a, "Nizan ka mu daih bawk si a, vui lai chuan ruang ka kil ve ang. Nangpawh awm ve reng tawh rawh aw" ka lo ti a, a chhan hriat si lohin ka nu chu ka thlahlel thar riau a, ka ngai veng veng a ni ber. 

"Chaw ei a haw lawk a ngai a, ka lokal leh tho ang. Ka va lut ve ange" a tih hnuah inchhungah min luh san a, thingpui lum ho chuan min lo fiam bawrh bawrh hlawm a, nau ka neih hun tur te min zawt luam hlawm a, ka pi an ui zia min hrilh tawh an awm a, Tintin-an a tawrh leh tawrh loh te min zawt a, zawhna ka dawng maksak hlawm khawp mai. 

Ka pi kan vui zawh hnuah pawh Tintin-a chu kan be ţawng hleithei lo a, kan chhungte lokal ve ho chuan an zilh mawlh mawlh reng a, ka nu unaute ţawngkam leh ka pa unaute ţawngkam chu a dang hlak a ni. Ka pa unaute han ti ila mi pahnih bak an lokal thei lo a, ka nu te lam nen chuan inang lo tak an ni. Tintin-a an endan thlengin a danglam a, keimah min biak danah pawh an danglamna chu a hriat. 

"Vani, eng nge in an zel? Harsatna leh insawiselna em em in nei lo maw?" ka ni in a tih chuan, "Aw..kan zia ve zel a, damdawi ei pawh hi ngaiah kan nei thuai ang" ka ti a, an chhungkua hi an mak ve reng reng, kan natna hi an zep tlat dawn emaw tih laiin hria an awm nual a, zawhna ka hnem tawh, ka pa chhungte ho bawk hian min ngaihsak zawk. 

Mikhual kan ngah tho bawk a inriak kan nei lo a, mi haw rem hnuah pawh kan la ri laih laih mai. U Mala fate pawh an mut a chhuak bik lo aniang an meng ve reng a, an chhawnchhaih peih hlawm bawk a nuan an ti viau mai. 

Inchung aţangin Tintin-a helmel kengin a rasn chhuk a, an lo en danah buaina a hnai tih ka hre mai. Min ngaihtuah miah lova hetianga a awm hi keipawn mak ka ti ve tho a, ka pi an vui chiah a, in ngaihtuah fim deuh a mamawh ni a hriain khap ka tum lo thung. Lu kan sun dan a in ang lo ţhin a, chutiang turah chuan ka ngai thei zel. A tawp duh lo a nih chuan ngaihtheih loh chin ka nei dawn a, mahse zanin chiah chu chhuak zawk mah se pawi tihna ka nei lem lo.

"Khawiah nge i kal dawn?" an lo ti chiah reng a, "Ka leng dawn" tih zawngin a chhang a, keichu tawi te a min nuihin ka lu ah helmetin zawi tein a khawng a, "Ka rei lo ang" ka hmuh tur a hmui phun a a tih lai chuan, "Khawiahmah kal a ngai lo. Nizanah i chhuak bo daih tawh a, zanin chu inah awm rawh. I khawsak dan hi ka duh miah lo a nia Laltinkhum, zah te pawh a zahthlak alawm. Kan zingah i awm peih lo a nih pawhin pindanah tawm bo hmak mai la, mi hmuh tur a khawlaia chhuah kher kha ka remti lo" ka nu'n a ti khar khar a, naupang ho chu an hawi tang hra a, kan awm lohna lam zawkah u Dini chuan a nam phei rawk rawk a, ka nu bulah bawk a rawn ţhu leh chat a. 

"Min lo mutsan ru" ka nu thusawi chu hre lo ang hmiahin a awm a, kawngkapui lam a pan lai chuan, "Lo haw tawh miah suh. I len naah khan awm nghal ang che. Ka hne zozai tawh che, hauh sim theih loh, thu awih duh bawk si lo, inchhung aiin khawlai nuam i ti zawk alawm, lo haw a ngai tawh lo" ka nu'n a lo ti leh a, Tintin-a chu a ding chawt a, amah hi ni ve ila inchhungah ka awm peih bik kher lo maithei a ni, nu Chhuangi te lah meinei deuh deuhin an ţawng reng a, ka pasal hi a dik e ka ti hauh lo nain hriatthiamna chin ka nei ve tlat. 

Ka nu enin za lo zetin a nui suk a, "Aw le" a ti nghat a, a chhuak zui nghal a, ka umzui rang kher mai. 

"Kal lo mai rawh, veranda ah hian ţhu reng mai la, lo haw an phal tawh lo tak tak a nih chuan i tal buai ngawt ang aw" ka tih lai chuan gate a hawng huau a, "A ti mai mai a nih kha. Hlauthawng chiam zel suh" min ti a, bike chu gate pawn lamah a nawr chhuak a, gate khar leh a tum lai chuan, "Engtin nge nia nga? Lo haw tawh suh a tih che kha. U Mama te pawh an awm vek a, kawngkhar hawng duh lo ta se engtin nge i tih ang a?" ka tih chuan hahthlak tih hmel zetin min en a, "Vanram, kan inchhungah hian boruak a awm lo. Ka thih loh nan ka tlanchhuak dawn a nih hi. Ka lo haw leh ang, rei ka chhuahsan lo ang che" a ti a, a tlai deuh tawh bawk a khawlaiah chuan min kuah a, a awm zawnah nghet deuhin min pawm bet a, ka ngaihbel nge a thinphu te chu mumal lo riau hian ka hre tlat a, "Ka inven ve dan a nih hi. An thusawi ngaihthlak mai mai theih loh chin ka nei ţhin. Ka awm lui a nih chuan pawi ka khawih mai ang" tiin a inla hrang a, "Lo mu daih la, min lo nghak duh suh" a ti leh a, a hawi kual thuak a, rang zetin ka hmuiah a fawp leh zauh a, "An thusawi ngaithla lovin mu hmak rawh. Thu ropui an sawi lo ang, piangthar tawh sa pawh fel in ti lutuk ho vanga da leh an awm chawk a nia. Kohhranah pawh a nih hi, fel inti fal an awm chuan an zinga tel a nuam ngai lo. Chutiang chiah chu an ni mai, lo han mu la, ka lo haw vat ang" a ti duah a, a kal tur chu gate vuan ran chungin ka thlir a, nui chung hian a ban a vai zauh a, "Rei suh aw" tih pahin ka kut ka vai ve a, tun ang hun a min chhuahsan hi lawm lohna tham chu a ni ngei alawm mah se engkim ka hre ve a, an tih dan zawng zawngte ka hmu a, an thusawi ka ngaithla liam bik lo bawk a, keichu tuman min hau hran lo a, chuvang chuan ka awm thei. Ka pasal hi kei talin ka hriatthiam loh chuan tu nge hrethiam chuang ang?

"A kal lui tho em ni?" tiin inchhung ka luh rualin ka nu'n min lo zawt a, "Aw...ka pi thihna hian a nghawng ve em a, mahni a awm a mamawh a nih kha" ka lo ti chu an lo ner nawng hlawm mai. 

"Laltinkhuma hian nizanah kut min thlak a tum mawle. Fapa zu in mi ka nei ve, a ruih ber lai pawhin kut min thlak a tum ngai lo, ka hriatah awka vin a hmang ngai lo bawk. Laltinkhuma ve chu min vin pung pung a, kan hmaah a au tuar tuar a, kut min thlak a la tum zui. Nupui pawh nei se home ah dah rawh u, in hrem loh chuan a insiamţha dawn miah lo. Home ah mi thuhnuaiah awm se la, hrehawm a tawrh phawt loh chuan a insiamţha lo ang" nu Chhuangi chuan a ti zat zat a, a hma khan a sawichhuak nghal bik lo aniang a sawi chiah chu mak an tih hmel hlawm takzet a ni. 

"A buaithlak a nih hi...a thiam lo hul hual a, a thiamna sawi tur kan hre ngai lo. Mahse, tun ţum chu hrethiam rawh u. Api hi a hmangaih a, a thihna hi a tuar bawk a, awmngaihna a hre lo a nih ber hi. A tawrhna a lanchhuah tir dan a danglam deuh e tih a ni mai a, ka fapa a ni a, a tuar takzet tih ka hria e, in ţawngkam uluk ula, a nih loh chuan ani hi chuan tih phut a nei ţhin a, a rilru buai lai phei hi chuan ngawih chuh rawh aw..a zia veleh mai ang" ka pa'n a lo ti hlauh a, an thinrim laia ka pasal thlavang lo chauh chiam a rem chiah si lo, ka pa a rawn ţawngchhuak chu ka lawm kher mai. 

"Vani, thingpui va lum rawh" ka nu'n a tih chuan ka tho nalh a, lum sa a la awm nual a, an indaih ting tang dawn loh avangin tlem ka chhuan belh a, a awm sa ka chhuang lum pah bawk a, u Dini lo lut ve chu ka melh zawk a, thil dang ka tih san nghal daih a.

Kan ţhiante an haw tawh a, Daizaui leh a fapa an la awm thung a, tu emaw lo lut ve se ka tih laiin u Dini chuan, "Mo felin chhungkua an huikhawm a mo sual chuan an hnawt darh ţhin an ti em khah? Engpawh chu lo nise chhungkaw inpumkhat sa ţhen hrang tu ni suh aw. Rei tak chhung ka mo tawh a, Mala hi a upa ber a ni a, kan inneih hian ka la naupang. Kum14 lai kan innei ve tawh a, tun thleng hian keimah vangin chhungkua an la buai ngai lo. Tumah ka en hrang lo a, ka duhsak zia te, ka ngaihpawimawh zia te ka lantir awl lo a, i ţhiannu ngei Sensiari pawh hi zawt la, min sawiselna tur a hre lovang. Nang chu i rawn mo hlim hlawt, in inneih tuk aţangin buaina a awm nghal a, i pasal lahin i thlavang a hauh hlur a, a mit i ti del nghal pang a, a unaute, a nu leh pa ngei ngei pawh a haw ta vek emaw tih turin a awm a, ka nu'n feh puiah a sawm che a, inpumkhatna leh inpawhna zel a ni a, a lawmawm tehreng nen i pasal hnenah i phun a, tikhan Tintin-a chuan ka nu a ti chhuak lehnghal a, i pasal hi a phung lung chi a ni a, a lungawi lohna ngawih pui theih loh chin a ngah. I vui apiangin kan hre leh zel chu a nih hi. Tintin-a i la hrang tawh a, chhungkua an innghir ngho reng bawk a, naupang thlengin an tuar a, kan darh zel chu a nih hi" a ti a, zawi te te in a ţawng a, midangin a thusawi an hriat a hlau ni awm tak a ni. 

"Hetiang boruak a awm hi ka ring bik lo. Ka hringnun hi a chul rup reng a ka ti fo a, pasal ka nei a nih chuan ka hlim ve deuh ang a, a chhungte lah ka hriat sa, mi fel chhungkua an ni a, keipawh ka hlim ang a, ka hringnun hian rawng mawi tak a chhuah ve tawh anga tih tein ka ţhiante bulah pawh ka sawi ve ţhin. Beiseina sang tak nei chungin ka lo lut a, englai mahin rilru chhia ka pu ngai lo. Mahse, i sawi ang khan kan inneih tuk aţangin buaina a awm nghal a, a chhan tak pawh ka hre bik lo. Miin thu dik lo an hrilh cheu em maw ni aw ka lo ti zawk a" ţha deuhin ka ti ve a, kuangkuah ât in min en a, "I lo awm hnu a kan boruak chu i hre vek alawm. A chhan i hre ngei bawk ang a, nangmah vangin Tintin-a a danglam a, i thlavang a hauh lutuk na lamah a nu leh pate pawh a zah zo tawh lo a, rilru hrehawm reng rengin an awm a, hetiang ringawt te chuan nuam pawh i ti em ni?" ti a min zawh laiin Daizaui a lo lut a, "Ka lo siam pui ang che i chauh hmel emai" a rawn tih laia u Dini lo ner nawk chu ka hmu reng a, amah vanga inţan zawk hi niin keichuan ka hria. 

"Kan chau tlang a nih hi" a lo tih chuan, "Ni e...nangpawh i chau ang, va haw tawh rawh. I awm ve reng a, engmah i ti chuang lo a, ţangkaina i nei chuang hleinem" Daizauin a ti a, ka lo ip chawih a, Daizaui lah chu zawi te tein a zai zui rat rat a, ani leh ni lo angin engmah a la sawi lo na a kan inleng ber, kan in a lut chhuak zut reng a ni a, kan boruak hi a hrethiam ve tih chu ka hre daih tawh.

"Kan nupain kan buai ber zawk ang chu. Mikhual an tam a, ei leh in engkim kan ngaihtuah a, rilru leh taksa a chawl lo a nih bet hi" a ti halh a, ka nu te chuan an fak leh khawp ang. 

"Chuvang tak chuan alawm va chawl hahdam rawh ka tih. Vani chu ka pui thei a, helam chu rawn ngaihtuah suh. I fel a, kan hrevek alawm" mei nei deuh hian a ti a, thingpui chu kan siam dun a, kan zawh hnuah, "U Dinin a sem khalh hma chein va sem vat rawh. Kan u Dini hi chuan a hmaa tih tur inchhawp reng hi a hmu thei lova, a sem lehnghal duh mai ang" nui har har chungin a ti tak nain a ţawngkam chuan mei a nei a, chu chu kan hrethiam tlang vek ang. 

Thingpui ka sem lai chuan Tintin-a chanchin bawk an lo la sawi a, in rel hlum theih chu nise a chhungte ngei hian an that daih tawh ang. Daizaui leh u Dini te an lo la chhuak lo a, an inhnial a ni maithei. No ruak nghah pahin an bulah chuan ka ţhu ve rih a, "Tunlaiah te chuan inpui changtu tur tih vel mai mai kan ngaipawimawh tawh hleinem. Fa naupang ber inhrang chang ta sawi tur an awm nawk a, in dan tir ula a puitling ve mai ang. In thlazar hnuaia a awm reng chuan engtikahmah a puitling lo ang" nu Maremin a tih chuan ka nu te lam chuan an pawm hmel khawp mai. 

"Keichu ka remti lo reng reng. Tintin-a hi buaipui ngai ber a ni a, a fel lo a, kan hre vek. Pathianin hna min pe ah ka ngai a, mi fate kan va buaipui reng thei lova, kan nau ngei hi kan bulţan na tur a ni a, Tintin-a hmuh kan a mi fate kan va vei daih a nih chuan in enfiah kan ngai a ni mai. Kan hnaih a awm, kan nau ngei hi, a ţhatna tur kan ngaihtuah duh lo a nih chuan mi fate phei chu kan siamţha thei dawn lo. A unaute chu an ngaihtuahawm loh, a sual ber zel hi alawm kan hnaih sauh sauh tur leh kan ţawngţaipui nasat ber tur chu" ka niin a lo ti ve thung a, "Amah ber a insiamţha duh lo a, tunah pawh hei a rawl bo leh daih tawh a, chhungte zahna thlen bak thiam a nei hleinem. Min hmangaih let ve lo tu, zah pawh min zah duh lo tu chu hnaih luih har deuh a sin" tiin nu Maremi chu a ţang tlat a, ka pa chu a ngawi reng tawh a, a ruk tak chuan a fapa chu a ngaihtuah ve viau ang. 

"Ruati lah rilru hah reng rengin a awm a, Dini sawi hmangah tunlai chu chhungkua in buai deuh reng a ni awm a, nizan khan a rilru hah zia leh helam a ngaihtuah zia min hrilh ve melh melh a, hetiang a nih reng chuan in la darh tho tho ang" min hmu lo ni awm takin nu Chhuangi chuan a ti a, ka ni in min rawn en vat thung. 

"Dini reng reng pawh chu chutiang te lo sawi zung zung tur a ni hleinem. A bul aţanga engkim ka hriat vek hma chu tumah ka dem ve ngawt dawn lo. Eng nge buaina an neih chhan? Tu nge bulţan tu? Chutiang thleng chuan hriat a ngai. In hahthlak emai, tihngaihna tak pawh ka hre lo che u. In insawithiam vek awm si a" ka ni chuan a ti a, no ka khawm a, choka lamah ka phei leh ta daih a. 

"No kha chu ka lo sil ang. Kan u Dini ve lah hi mi hmuh lai chauhin a che peih a, choka ah tumah an lo luh hmel si loh a, tunah tak chuan engmah a ti peih lo ang" Daizaui chuan a lo ti leh kher a, a nui pah ar ar bawk si a, ka nui ve ta ringawt a. 

"Sawi awm leh awm loh hre rual i ni tawh a sin le. Fiamthu ka thawh e kan tih ve te hian nuihpui tlan theih a nih loh chuan fiamthu a ni lo tih hriat tur" a ti a, min chhuahsan zui nghal a, "Khanu khan a thik che a nih kha. Midang hian nupui nei ve chiah se, i chunga a tih ang hian a ti ve tho ang. U Dini te chu mi hausa fanu duat sual a nia, pawn lang chiahin a ţha, a rilru a chhe lutuk ringawt" Daizauin a tih chuan chhang let lem lo mah ila a sawi dik hmel khawp mai. Tuna a sawi ang chiah hi Daizaui ka hmuh dan a ni. 

Ka muhil dawn ţep tihah Tintin-a a lo haw a, sawi kher lo mah se a rui tih ka hria. Ţhutthlengah helmet a theh thla tawp a, a jacket chu hlipin duhdah deuh bawkin a theh hlawm leh tawp a, a che vel chu mu chungin ka lo en reng a, "Ka inbual anga ka rawn mu ang" a ti a, ka enreng tih a lo hre ran a nih hmel.

"Khawiah nge i kal a?" ka tih chuan, "Ka leng" tih bakin min chhang lo. Ka inbeng kang a, dim light hnuaiah chuan a hmel chu chiang deuhin ka hmu thei tho a, "U Dini vangin kan chhungte ho hian tuman min lawm lo a, nang lehzelin i zir loh chuan ka tan a hrehawm lutuk. Ka pi thih hlimchhawn a nih avangin ka hrethiam thei rih che a, i chhunzawm zel a nih a, kan kawng zawh lai aţanga min pen san a nih vaih chuan i bulah hian ka awm reng dawn lo a nia" tiin ka vau a, a nui hawk a, a ngeiawm lek lek mai. 

"A dum leh a var i tih kha, ka hria. Kawng ţha lam, a var lam zawh reng hi a lo har a nih hi" a ti deuh nghut a, towel inkhai chu ban vutin bathroom ah a lut a, beidawng zetin khumah chuan ka mu leh hnawk a, nupa ve lem siin kawng khat kan zawh dun thei lo a nih chuan kan hma hun a thim lutuk tlat. 

A inbual zo a lo chhuah leh hnu pawh chuan, "Ka nghak ang che. Tawp hun tur ka hrilh bawk ang che. A tawk tawh e ka tih hnu pawh a i tawp duh lo a nih chuan engtin pawn awm ila phun nawi hlek suh" ka ti a, min chhang lovin ka bulah a rawn mu a, inhnaih viau siin kan inhlat riau niin ka hre tlat a, eng emaw ka tih ve chu a ngai a ni. Sual nih hlawh dawn mah ila kan nupa tan hian ka tih ve ngei a ngai ang. Tun chinah chuan an awm ang angin ka awm ve tawh ang. A tuar tu ber nih reng hi ka kham tawh takzet a ni. 

CONT...