BLACK AND WHITE-19

BLACK AND WHITE-19

Zing a ka harh ve meuh chuan Tintin-a a lo awm tawh lo a, khawiah nge a awm ang ka tih rilruk laiin bathroom kawngkhar a ri rak a, inbual zo hlim tih hriat zet hian a rawn chhuak a, "Zanah i inbual tawh a ni lawm ni?" ka lo ti vat a, "Ka duh khawp lo" a ti a, a lu chu dim lo zet hian a hru tawk tawk a, "Chaw ei lovin ka kal dawn a, mamawh i neih chuan min rawn hrilh mai dawn nia" a ti leh tawp a, a inthlak zui nghal a, a awmdan chu ka hrethiam lo lehpek khawp mai. 

"Nangmah chiah i inngaihtuah niin ka hria. I awm loh phei chuan ka tan a hrehawm dawn tih i hre lo mi? Bakah vawiin ang te chu dawr hawnna chi pawh a la ni hleinem. Keipawh ka la chawl dawn a nia" ka tih chuan a ner nawk a, "Ka pi a awm tawh hleinem" a ti zawi sup a, khuma ţhu chung chuan ka en reng ringawt a, ka lawm lo tih a hre chung pawhin a che a buai phah eih lo. 

"Ei chak i nei em?" a inpeih thlap tawh hnuah a ti leh a, "Ei chak ka neih i ring em? I awmdan hi ka haw lutuk ringawt. Midang i ngaithei lo hi chu ka hrethiam, an zir lo a, an endan che a dik lo a, ka hrethiam vek. Keimah lehzel min be ţha peih lo hi ka thin a rim, ka ngei hluah hluah che" ka ti hrep a, a thaw chhuak hawlh a, ka bulah rawn ţhu vein ka hnungah dimtein a dawm a, "Ka haw ve lo che" a tih rual chuan a awmah na deuhin ka nam a, a nui chhuak ta hawk a, hetianga a nui hmel hi ka pi boral hnuah ka la hmu leh lo, tun hi a vawikhatna chiah a ni. 

"Naute nen hian eichak in nei em?" a ti leh a, uang zet a ka dul a melh zauh hnuah keichu min rawn en leh a, "Hna ka thawk anga in duh chu ka lei zel ang. Hrehawm lo ti suh in tan vek a nih hi" a ti dam thlup a, a kut awl lamin ka sam a chul thuak a, nui ve bawk mah se a mitmeng thuk taka natna inphum chu ka hmu thei a, ka pi hi a sun takzet a, a sun dan a danglam thung. 

"I duh chuan kal rawh..chhunah ka lokal ve ang. I awm loh chuan ka awm peih bik lo" ka ti a, diktak chuan ka hreh vak tawh hran lo. An awm ang zelin ka awm ve ang ka ti tawh a, theihtawpin ţhat ka chhuah a, an lawm zo chuang lo a nih chuan ka ţha lui peih lo. Anmahni ang chiahin ka awm ve ang a, engtinmah min ti ngam lo mai ang tihna rilru ka pu ve tawh tlat a ni. 

"I lokal duh phawt chuan min lo hrilh la ka lo hruai ang che. In luah tur kan zawng bawk ang" a ti chu ka ţhu ngil ngawt a, mak ti zet a ka en tlawk tlawk lai chuan, "Kan awm thei ang" nghet charh hian a lo ti leh a, "Ka pa'n a remti dawn mi? Nangchu nu leh pa kianga awm reng tur alawm i nih" ka tih chuan, "Chhuak ila u Mala te chhung rawn lut leh rawh se" a ti nghut a, a lungawi loh zia a lang reng a, a rilru hi a buai ve viau ang ka ring.

"Ka pa'n a remti teuh lo mai. Ka pi pawn chhuak tura a duh loh che kha. Keimah min puh ang a, chhungkaw ţhiat darh tu min leh dawn a sin" ka ti deuh chul a, "Chutiang chuan tu nge ti che?" a lo ti khauh a, ka ngawi ta reng a. 

"Chutiang chuan an ti che mi?" khauh deuh zawk hian a ti nawn leh a, "Ti love...mah se kan chhuak a nih chuan chutiang chuan min sawi ang. Ka nu te mai bakah mi zawng zawngin min hmu dik lo vek ang. Ka pi boralna hian a la nghawng nasa lutuk che a nih hi, in ngaihtuah ţha la, thil awmzia i hrethiam mai ang" ka ti a, "Hman aţang tawhin kan inchhung hi nuam ka ti ngai lo. Ka nih theih loh pui nih tir min tum a, ka tlin lo. Ka runluih kual vel mai mai a, keimah tak tak ka nih lohna a rei tawh. A ţha ber an duh a, ka nihna angin min pawm duh lo. An duh ang ni tur chiahin min duh" a ti thum dût dût a, a thusawi chu uluk deuhin ka ngaithla a, hnem dan ka thiam vak si lo, ka kuah ta ringawt a. 

"Pathianah innghat tawp mai ang, tih theih dang kan nei lo" ka tih chuan a inla hrang rang khawp mai. 

"Pathian ka ring ve lo ka tih tawh kha. A awm takzet a nih chuan amah ka rin theih nachhan tur min hmuh tir rawh se" a ti ram hmuk a, "Tintin, Pathian hi awm lo se tun ai hian kan chan a chhe lehzual ang" ka ti dek dek chu, "Tuna kan chan aia chhia eng nge i hriat?" a ti fiah hrawk a, ka ţhut hnaih a, ka kuah nawn leh a, a thin a rim bawk aniang a thinphu a rang lutuk ringawt. 

"Kalsawn rawh, Pathian i ti ţuah hum reng ringawt mai. Thlei bik nei Pathian hi engatanmah ka ti love" a ti leh nek a, min nam sawm a, khuma helmet let ngât chu a ban vut a, a chhuak nghal nulh bawk a. 

Keimahin ka ţhu ngawi reng a, mittui vangin ka khawhmuh a fiah lo ruai a, tunah tak chuan keipawh hian ţawngţai ngaihna ka hre lo. Ka patean min pawngsual ţhin a, chu chu Pathianin ka chunga a thlen a phal. Hiv+ ka ni a, chu pawh Pathianin a phal tho. Pasal ka nei a, kan inneih hlim hlawt aţangin ka pasal chhungten min hua a, Pathian hi dem ve duh ta ila dem nachhan tur ka ngah ringawt. Hei vang tak hian rinna lama der dep ve tak ka pasal hi ka dem hauh lo. Pathianin kan chunga ro a rel dan hi a fair hlawl lo alawm. Mahse, thil ţha tam tak min tih sak ka ngaihtuah tel tlat ţhin avang hian Pathian hi ka dem thei lo a ni. 

Inhnuaia ka chhuk chu Sensiari chiahin min lo bia a, ka nu ute ho chuan min en hrek hrek a, min biak an tum lem hlei lova. Ka nu zawkin, "I va nawm loh hmel ve" a ti ve mial a, "Nizan ka muhil thei lo a" tiin chhuanlam ka siam a, min kalsan zui mai a, "I nawm loh viau leh tukţhuan eikhamah i mu daih dawn a nia. Inleng an awm leh awm si a, nuam lo chung chung a ţhut ve reng chu a ninawm duh emai" ka ni in a lo ti ve bawk a, ka pa leh a unaute ho hi chu an dam dap hlawm mai. 

"Rinhlu, vawk chaw zu pe rawh. Tintin-a kutah kan dah ve bawk a, enkawl pui lo phei ila chu chaw an nghei ngun ngawt ang" ka nu'n a tih chuan, "Dawr lamah a insawrbing ve deuh a, in duh chuan ti ral daih rawh u. Sensiari khan talh in duh thu a sawi tawh a, khawngaih mah se a hriat lohin talh ula, in tan pawh a hahdamthlak a ni mai" ka lo ti a, min en ţhap a, u Rinhlua phei chuan mak min tih hmel lutuk ringawt.

"Vawk vulh te chu ţangkai deuh a sin. Chaw nawi mai mai kan pe a, talh meuh chuan pawisa a lo lut ve ţeuh a" hrilhhai hmel taka ka nu'n a tih leh chuan, "Kan buai phah em a, vawk chaw pe reng tur chuan nangpawh i khawngaihthlak a, hna nei deuh vek kan nih avang hian kan indaih bawk si lo a" ka ti a, an inphut kual reng hlawm a, Tintin-a an hauh phah loh leh an rel chiam phah zel bawk a, vawk vang a buaina kan neih chang a tam lutuk tawh, chuvanga sawi ve chu ka ni. 

"Vani sawi hi a dik chiah. Vawk vulh in duh a, a hlawkna tel in duh a, tuman chaw in pe peih lo. Ti ral hmak ila, Dini te hian an duh leh man belh leh zawk se, keini chuan vulh ve tawh lo ang u" tiin ka pa'n min lo thlawp a, ka nu erawh a lawm vak lo tih a lang reng mai. 

"Keiman ka ti vek mai ang. Ka fate hi awm mai mai lo se ka duh a, chuvanga chaw pek tir ţhin chu ka ni. Tintin-a pawh kaihthawh hma chu a mu thei a, zingah tho ve se, awm tawp lovin eng emaw ti ve se ka duh vang chauhin vawk chaw pe turin ka tir lui ţhin a, in pe peih lo emaw in hman lo a nih chuan keiman ka pe thei lutuk. Tumah ka tir tawh lo ang che u" a ti hlak hlak a, kan in hi chu ramhuai buk a ni ringawt.

"A buaithlak, insual mai rawh u" u Rinhlu-an a lo ti a, beidawn hmel zet hian min enkual hlawm a, inhauh vak a thiam ve si lo, a chhungte hi hahthlak min ti ve khawp ang.

"Engmaw i sawi a?" ka nu'n a lo ti a, "Insual mai rawh u. Inhauh reng ai chuan insual ula, a chak ber kha thu ber mai rawh se" a ti a, ka ni a lo nui hak hak a, "Rinhlua hian tih ngaihna a hre tawh lo che u a nih hi. In buai dan hi a rapthlak, a zah pawh in zak lo em maw ni, Rinhlua nihna te hi ngaihtuah tel ve ula, a chhungte chanchin hi mi bulah pawh a sawi ngam nang" a tih chuan u Rinhlua a lo bu nghat nghat a, "Siam sual an nih hi" a ti hmuk a, vawk chaw pe tur chuan a kal a, chhungkaw buai tak zawng kan ni. 

"Vani, naupang ho kha an ril a ţam tawh ang. Ei hmasa se la, keini chu a hmanhmawh thlak loh" U Dini chu a khuh zui kharh kharh a, puan a bât hlun a, damlo hmel a pu pawn ka hre lo. 

"Nia..an duh leh ei hmasa rawh se, keichu a hnung berah pawh ei ila a pawi lo, ka ril a ţam lo lutuk" hrethiam lo awm tak hian ka ti a, min melh ralh hnuah ka nu ute chu a melh leh a, a fate chu a buaipui tur alawm. Amah vang hian buai reng lo ila chu phun nawi lovin a fate ho hi ka buaipui em em ang, mihring ve tho ka ni a, tun dinhmunah chuan ka buaipui chak hlawl lo. 

"I u Dini a damlo a, va siam sak lawk mai rawh" Nu Chhuangin a lo ti a, "A nih chuan an rualin ka ei ang a, vawiin chu Tintin-a dawrah ka han kal ve teh ang. Amah chiaha a awm chu ka ngaihtuah riau" ka ti a, anmahni ho chu ngaipawimawh lo ang deuhin ka awm a, choka ah ka lut zui nghal a. 

"Maggie, min rawn pui rawh" an hriat tur kherin u Dini te fa upa ber chu ka ko lui ngat a, a rawn tlan lut vat a, "Eng nge ka tih dawn?" a ti nghal bawk a, chaw ei siam lai te chuan min be siam siam a, ka ngaina nghal der mai. Naupang rilru thianghlim na na na hi chu huat tum viau mah ila a theih loh. 

Naupang ho nen a kan chaw eina chu ka ti fel a, ka sil vek bawk a, choka aţang chuan ka chhuak a, ka pa leh ka nite ţhut naah chuan pheiin, "Tintin-a hnen a kal chu in remti em? Ka pi boral thut hi a tuar angreng bawk si a, amah chuan ka ngaihtuah a" u Dini te ho hriat phak tur chuan ka ti leh a, "I duh chuan kal rawh. Inleng chu an awm leh ngei ang a, mahse i u Dini leh Sensiari an awm alawm" ka pa chuan a lo ti bauh a, "Nih chuan ka insiam anga ka kal nghal mai ang. Mahse, vawiin chu a la pawimawh bawk si a" ka ti leh hnuhnawh a, ka lo ngaihtuah chiang lo a, vawiin chu in a la awm ngei ngei ngai chi a ni. 

"Ni e...vawiin chu chhuah na chi a la ni lo. In chhuah bo diak chuan miin mak an ti ang che u. Tintin-a pawh lo haw se a ţha khawp mai" ka ni in a tih chuan, "Ani chu a duh duhin awm rawh se. Tuman mi pangngai ah an ngai chuang hleinem" nu Chhuangin a ti kher a, ka sa phat mai. 

"Nangmahni khan mi pangngai ah in ngai lo zawk a nih kha. Awm lo ula chu vawiin te hian a chhuak teuh lo mai. Ka pi vanga a natna pawh in hmu thei hleinem. Tuar ve miah lo chhuahin in chhuah a, awmngaihna in ti hre hleinem. A chhungte berin inhmuh dik loh tlat chuan ţhat a har dawn lutuk a sin" ka ti ve ta bawrh bawrh a, Sensiari chuan aw a thian kharh a, a lam ka hawi rualin mitmeiin min lo khap a, tunah tak chuan an vaiin min hauh rawn mah se ka hlau lo, chutiang khawp chuan an chungah ka lawm lo ve a ni. 

"Ţhat tum lo mihring chu hmuh ţhat luih har deuh a sin. A unaute pawh an fel a, kan hau reng hleinem. In nupa hian insiamţha rawh u. Reilote chiah kan la awm chhung hian thil kan hre ţeuh hman tawh" min ti let a, ka lo nui hul hak a, rapthlak tih hmel zet hian min en ve thung a, ka rin ai daihin an nasa. 

"In inneih zan aţangin he in a mo i chak loh zia i ţhiannu i hrilh a ni lawm ni?" nu Maremin a ti chiah chu ka nghing dawt a, ka vir zawk a ni ber. 

"Engtin maw?" ka tih rualin Sensiarin, "Eng nge awmzia?" a lo ti ve chat bawk a, Thartei thil tih kual vel kha a rukin an lo hre daih tawh tihna a nih chu. 

"Duh tawk rih rawh u..chaw ei dawn ang u mi an lokal ţep tawh ang" ka pa'n a lo ti ve tak nain Sensiari chuan, "Eng nge in sawi awmzia chu? Vani hian engmah sawi a nei hleinem" a la ti tho a, U Dinin nu Chhuangi a kheuh ru zeuh chu ka hmu ru reng a, Thartei nen eng eng emaw an sawi dun ţhin tihna a ni mai. 

"Engmah a ni lo..a ho lutuk. Sawi a neih loh chuan a ţha a ni mai alawm. Inhau tawh lo teh ang u, hmanni deuh aţang khan nitin deuhthaw kan la inhau" mei nei deuh hian u Dini chuan a ti kher a, sawi tawh ang khan Thartei hian a duh zawng chu a ti lawm thiam a, a inrin tir thiam bawk. Amah hrechiang tu keipawh min bum theih chuan ka nu te ho mai mai chu a bum thei dawn lutuk tlat. 

"Ni e..a ninawm tawh lutuk, chuvang chuan in hriat ang ang chu pai ru reng lo khan sawi chhuak vek ula, Vani pawn thudik a sawi mai dawn alawm. A ruk a hre ran, a ruk vek a midang hrilh bawk, hetiang ringawt a a kual a kual chuan inrem a har awm e" Sensiari bawk a ni. Min rawn pan hnaiin ka bulah a ding a, keipawn a hma angin ka hlau tawh lo. An thu hriat hi dawt a ni miau a, thudik chu a la lang chhuak dawn tho tho. Dawt chiang lutuk vanga ka zam nachhan tur ka hre lo a ni. 

"Kan hrechiang kan tih chuan duh tawk mai rawh u. Finfiahna thlengin a awm vek. Sawi duah a ngai lo, kan hmu vek tawh a, insawifiah a ţullo. Theihnghilh hmak chi zawk a nih kha. Chaw ei va siam rawh" ka nu'n a lo tih pawh chuan, "Finfiahna in neih chu min hmuh ve ula, keichu ka hne tawh. Kan inhau reng te, boruak ţang ut reng te hi ka ning tawh. Ka pi kan sun zo chiah a, a thlarau pawh in zah ve lo mi? Ţhenawm khawveng te pawh an zahawm a, mak min ti ru viau ang. Kan hlim lo hlawm lutuk hi a ninawm hrim hrim. In duh leh hau mai ula, in awmdan hi a dik bik lo alawm" a ti a, engmah hre ve lo ka ni te phei chu an hawihai khawp mai. 

"Nakinah kan la sawi dawn nia. Chhan awm lovin tumah kan haw tawp ngai hleinem. Mo pui ka nei dawn e ka tia kei phei chu ka phur a, mahse kan chhungkua a lo sawi dan kha a dik lo a" u Dini chuan a ti dam thluam a, min zah lo lutuk chu ka nuih te lam lam a za. Ka awm ve reng a, awm lo ang hmakah min ngaiin ka chanchin an sawi bawrh bawrh a, engahmah min ngai lo tihna a ni mai. 

"Aw..kan chhungkua a lo sawi dan chu sawi reng ta che u. In sawi duh lo tlat a nih chuan Thartei hian thu vai vir a thiam a, amah vangin kan ţhian ho pawh kan inhaw kumkhua ţep tih in hre ve mai mai dawn nia" Sensiari chuan a ti a, choka ah a lut nghal daih a. 

"Insawifiah ka tum lo in ngaih ngaihin min ngai rawh u. Dawt aiin thudik a tlo zawk a, nakinah a lo lang chhuak mai ang. Tunah tak chuan insawifiah mah ila in awih chuang lo ang" tih leh kailawn a chhoh ka rual a, min haw tawh tho tho a, an mitmei ka veng peih bik lo. 

"I damlo em ni?" pindan chhunga Daizaui lo lut chu ka lo en a, "Dam e...ti ila ka taksa a na ţhum mai" ka ti liam mai a, a hmel ka hmu chiang chiah chu ka ţhu ţha rang nasa mai. A mit hnuai chu a duk deuh a, a hmai pawh kuttin hriam deuh a hamna ni awm takin a pilh thluah mai. 

"Inpa nen in insual em ni?" ti a ka zawh chuan khumah a rawn ţhu ve a, "Teh nang aw...kan pa te chuan min sual ngam teuh lo mai" a ti a, a nui deuh a, a hmel enchian tumin a kawrah ka lo pawt lawp thung. 

"Engati nge i hmai hi? I nu nen in inhmu em ni? Damlo chungin zu a la in tho em ni a?" ka ti leh a, "Ni lo...ka pawisa ba nu nen kan inchhang pawr deuh a, ţawngkamin a daih lo tihna a nih hi. Nu nasa lutuk kha a ni ve a, a rui bawk si, ba ka va ţhing kha kan inhnial a, nu tling ve ve si kan insual chiam a, a mawi lo khawp mai, tunlaiah nutling insual an tam dawn loh nen, ran pawh kan tluk lo" a ti chuai raih a, bedsheet chu a tuai a tuai a, a nghawng te pawh a pilh tel alawm le. 

"Mitin hian buaina kan lo nei vek a nih hi" ka ti halh a, fihlim tur a kan ngaih te hi a tuar nasa ber ber an ni duh chawk. A inthup thiam apiang te hi mi hlim leh vannei bikah kan ngai a, tupawh hian hmai kawr kan vuah ti ila ka sawi sual lo ngawt ang. 

"Nei e...bakah nizan kha chu ka thin a chhia. In a a awm loh reng avangin zanrei lam tawhah ka kal a, ka nu zu rui nen kan intawk bawk si a, pasal a thlak leh tawh a, a pasal thar lah kha ka nu ai mahin a rui a, miin min zah lo lutuk te hi ngaihtuah chian chuan an demawm miah loh, ka nu hian a zir lo em a, kei lah engmah ka ni bik bawk si lo, zah tlak kan ni lo ve e" a ti a, ani leh ni lo angin a thutak a, a zuai ve raih mai. A hlim lo takzet a ni. 

"A ba a nih chuan a pe tur che alawm" tiin thil dang sawi pui ka tum a, "Ni reng e. Mi ţhenkhat hi chu an sual khawp, neih loh vanga sumdawng kan ni tih hrereng chung hian bat ral tum tlat te an awm a, mahni ba hre lo der daih ţhin te, dil hrehawm khawp a lo thinrim ţhin te, sumdawn hi a hahthlak a sin aw" a ti vang vang a, ka hrethiam khawp mai. 

"Enteh Vani, vanduai bik riauah i inngai ţhin niin Sensiarin a sawi a, chutiang chuan ngai tawh suh. Khawvelah kan awm a, mihring kan ni miau a, engpawh kan chungah a thleng thei alawm. Hrehawm tih vanga thih theih chu nise nang aiin ka thi hmasa zawk ang. Vanduai ber emaw kan intih lai hian keini aia vanduai an awm zel a nia" a ti leh a, a sam uai hnuang chu a bengah a zep a. 

"Vanduaina hi mihring min ti chhel tu a ni a, beiseina hi kan dam chhan a ni. Hlawhchhamna hi tumruhna min neih tir tu a ni a, harsatna kan tawh chiah hian mi dinhmun kan hriatthiam phah a, lungngaihna hi hlimna min thlakhlelh tir tu a ni. Kan nun a chinfel harsa khawp buaina lo thleng ţhin hi Pathian min hnaih tir tu a ni a, engmah ti thei lo khawp a kan kehchhiat a, kan chauh hian mihring mai kan nih zia kan hre nawn leh ţhin" a ti a. 

Tawi te a nui chung hian ka lo bu nghat a, "A dik alawm" ka ti zui sap a. 

"Vanduai ber emaw kan in tih pawh hian keini aia vanduai an awm ve zel a, khawvelah hian ber a nih theih loh. Buaina leh harsatna te hi chona ah ngai la, nang chu in nuam takah i la awm thei a, kut ke kim i nei a, hna i nei bawk a, chenna tur in nei lo, piangsual leh kut dawh te hi an tam a sin. I lo hnual mai ang tih ka hlau a, bei ţang ţang lovin i tawp san mai ang tih te ka hlau a, i beidawn ka hlau bawk a, chuvang chuan ka rawn hmu che a nih hi" a ti leh deuh duah a, "Ka lawm lutuk ringawt. Ka beidawng ngei alawm. Buaina hi a inmung tup tup reng a, hmachhawn dan pawh ka hre zo zai tawh lo. Tintin-a lah mi â ang maia khawsak chang a nei a, amah leh amah a inhloh mek zel a, keipawh min hriat loh lek lek chang te a nei a, thawh lawk a inţhen ang tih mai te a chakawm ţhin" ka lo ti ve a, Thartei chungchang kha chu a hriat ka rin tawh tho avangin ka sawichhuak duh lem lo.

"Engtin pawn awm se a mamawh lai tak che a ni tih hre tawp la, chhuahsan reng reng suh. I chhuahsan a nih chuan tun ai hian a bawraw lehzual ang a, nangmah bawkin hrehawm i ti ang. Hetianga a awm chhan hi kal ngaihna a hriat tawh hlawl loh vang zawk a nih hi. Ţanpui la, kawng dik zawh pui tum leh zawk rawh. Inhnuai a awm ho, mi chanchin sawi peih deuh ho khu chu an fel hlawm em a, an hnen a ţanpui ngen pawh a inthlahrunawm zawk. Mi nazawngin an pawh ngam miah loh khawpa mi fel kan tih ang kha an ni a" mei nei zet hian a ti a, "Kan awmdan tur chu Pathian thu thu ni tawh teh se. Keimah chauh chuan kal ngaihna ka hre tawh bik lo. Thi ila a hahdam zawk ang te ka ti vel mai mai" ka tih chuan, "I â emai. Dam tum tlat zawk tur...Tintin-a chu keipawn ka lo hau ve ang. Lokal rawh, tawm reng bik suh. Inleng ţhenkhatin i awmna min zawt zeuh zeuh a nia, i chet zung zung chuan i hmingţha dawn tihna a ni mai. I tawm bo tlat chuan miin ngaihdan an nei ang a, i chhungten a chhe lama i chanchin an sawi pawn an awih vek mai ang. Tih tauh hun a ni rih lo, thui deuh thlir thiam a ngai. An rel che pawh a miin 'Vani chu chutiang a ni lo' an tih theih turin awm zawk ta che" ti a min fuih pahin ka malah a beng thlawrh a, "Tho vat rawh chhuk ang" a ti zui zat a. 

Sam ka ţawn a, u Dini leh ka nu unaute ho hmu peih lo ru tak chungin ka chhuk ve hnak hnak a, Tintin-an min lo la call zui. 

"Hello" ka tih chuan Thartei ngei mai hian, "Vawiin chu in pa dawrah ka leng a, ka lo pui lo mai ang che u" thawveng zetin a rawn ti a, a aw aţang ringawt pawhin ka hrechiang, a tham deuh chhal a, hriat a awl bik lutuk ringawt.

"A ţha alawm" ka lo ti mai a, "Tintin-a chu a buai deuh a, tunah tak phei chuan a ţhian te ho nen kan ni nuaih mai. Naktukah picnic kan tum a, i lokal ve duh em?" a ti leh zel a, "Kal lo mai ang ka hman ve lo a" pangngai thei ang ber hian ka lo ti leh a, ka na lai hmuh a chak ber a, Thartei hmuh leh hriatah hi chuan na lo anga lan ka tum ve tlat. 

"In pa hi amah chiaha kal tir i tum maw? I ngaihtuah lo mi? A phone te hi i en ngai em? Hmeichhe be tu a nei nual a nia, in la buai ang tih ka hlau" min ngaihtuah awm tak hian a ti vel a, "A duh phawt chuan kal rawh se, intih harh a mamawh alawm" ka tih chuan, "I van ngaihtuah lo zawk em em. Keichu ni ila ka phal miah lo ang mawle. Group kan siam a, hmeichhia kan tam mai. Kan in ang lo e, a nupui ni ve ta ila ka rilru nawm loh tur zia chu" a ti a, min bawl a tum ve khanglang em maw ni. Tintin-a message thlenga a en ka ring lo bawk. Mahse, a phone aţangin min rawn call ngei si. 

"Zu kan in a, chhun aţanga zu in chu a nuam vak lo. Dawr chhung hi a lum lo hlauh a, ni lo se chu ka luak barh barh tawh maithei a ni. Tupawh mai hi kan ruih tawh chuan ngaih a lo sam a nih hi" awmze nei zet hian a ti leh a, nghet zetin ka kut ka hum ruh a, a hriat laia danglam loh hram hram ka tum tlat a, ka rilru a na takzet thung.

"Kan buai deuh a, nakinah ka rawn bia ang" tih leh phone dah ka rual a, ka haw san daih tak tak dawn em maw ni le. 

"U Din, lum i tih tehreng nen puan kha bat hlun lo la, damlo ang a lan kher a ngai hleinem. I chet peih loh viau leh keimahnin kan ti mai dawn lawm" Daizauin a tih lai te chuan ka rilru chu dawr lamah hlir a awm a, Thartei sawi anga an awm tak tak a nih chuan a chak lo khawp ang. Zu chu in rawh se, a rilru na a chhawk theihna a nih phawt chuan pawi ka ti lo, hmeichhia an tel zel a nih chuan ka hrethiam thei bik lo. Chutiang khawpa rilru zau chu ka ni lo bawk. A phone thlengin a khawih tir a, hmeichhe dang anga nasa phei chu ni ila ka han kal chilh daih tawh ang. 

Tlaiah ka be leh a, Thartei bawkin, "Aw Vani" a rawn ti a, ka thaw hak a, pangngai thei ang ber hian, "Tintin-a kha phone pe teh, chah duh ka nei" ka ti a, ka awki a dam thlap nain ka kawchhung chu a alh but but a ni ber. 

"Inhnuaiah an awm a, bike pakhat an khawih laklawh a, a seat an vuah ţha dawnin ka hria. Inchungah chuan hmeichhia chiah kan awm" a tih rualin phone ka dah a, Bena ka call ta zawk a. 

"Tintin-a bulah i awm em?" ka ti nghal thawr a, "Aa..aw awm e" a ti ban charh a, "Hmeichhe ho nen zu in in em ni a?" vin lek lek a ka tih chuan, "In ti ila kan in ho lo. Keini chu inhnuaiah kan awm char char. Hmeichhe ho chu inchungah Sawmtea hoin an awm" bahlah miah lo hian a rawn ti a, dawt a sawi lo tihna a ni mai. Benan dawt a sawi chuan a ţawng zawng zawng a buai vek zel. 

"Thartei khan in thil tih thlengin a hre vek tho si. Inchungah an awm reng i ti tho sia" ka tih chuan, "Thartei tak chu a rawn chhuk zeuh zeuh. A rui phual tawh a, a ninawm tak tak a ni" a rawn ti a, "Tintin-a kha phone pe teh" ka tih rual chuan, "Kha Vani" a ti a, a ri rawk rawk a, ka pasal ngei mai chuan, "I lokal dawn emaw ka tia" a rawn ti a, zawk zamah hian a. 

"Lokal na tlak pawh a nih loh kha. Chhun aţangin biak che ka tum tawh, engati nge i biak theih reng reng loh a? Chanchin te chu nangmah zawk pawn rawn sawi tur alawm, ka ngaihtuah em em che a, i reh hmak a" ka ti nghal buan buan a, amah ka biak ngat phei chuan ka thin a rim lehzual. 

"Phone khawih hmanin ka la khawsa lo. Khatin au vak vak suh naute kha a hun hmain a pawk chhuak nawlh ange aw" ti a min rawn fiam pawh chuan, "Biak che ka tumin Thartein min lo chhang. Phone i khawih hman lo a nih pawhin midang khawih tir kher a ngai hleinem. Nupui i nei tawh a, awmdan tawk hre ta che. I dawr a hmeichhia khawi tur pawh i ni tawh lo" ka ti hlak hlak a, "Aw ka tihpalh phone chu ka han la ang. Ka buai a, phone ka ngaihven reng hman lo tak tak" a ti ve ngial a, ka thin a rim laklawh a, a ngaihdam dilna te chuan min hneh zo lo. 

"Hetianga i awm reng chuan ka haw daih ang. Zu in satliah chu ni la ka hrethiam, hmeichhia an tel zel a, zu hian hmeichhia a chhawm em ni a?" ka tih chuan a nui hawk a, "I duh leh lo han haw rawh. Rawn haw ve pahin ka lo lam ang che" a ti then a, "Ka fiamthu miah lo a nia. Inah i awm peih lo a ka hrethiam che. Zu i in pawhin ka hrethiam zel che. Hmeichhia an tel chuan ka hrethiam thei bik lo. I awm ang hian awm ve ila i duh lo dawn lutuk ringawt" ka ti hmarh hmarh a, "Ka bulah ka awm tir hleinem. Sawmtea an bia a, an lokal mai mai. Inhnuaiah hi chuan hmeichhia an awm lo" tiin a insawifiah a, "Ice cream rawn hawn ang che a lum" tih leh phone dah ka rual a, inpet ruh fat fat chungin phone chu ka hum ngawt ngawt a, an tum ang ngawtin ka pasal hi an thlem thlu thei dawn lo tih hre mah ila hmeichhe zu rui an tel ve tawh chuan rilru a nuam thei chuang lo. 

"Vani, hetah lokal teh" ka ni in min hui hauh a, phur lem lo takin a ţhutna lamah ka phei a, "Tukin a an thusawi kha eng nge awmzia? I ţhiannu bulah i chhungte i lo sawichhe tak tak em ni? I mo peih loh zia te i sawi em ni a?" a ti dam thlap a, "Teuh lo mai...chutianga thil sawi kual duah chi ka ni ve lo. Hrehawm ka ti hran lo a, lo ti pawh ni ila tu hnenah mah ka sawi lo ang" tiin dawt tlem ka belh a.

"Chu tak chu a nia, misual niin ka hre si lo che a, Dini lah hian i nu te ho bulah a sawi sar sar reng a, keini chu min hrilh ve ngam hauh lo a, i nute ho hi chuan an awih zel a, ka zawh chian ngial pawhin engmah an sawi duh lo. In inchhung hi a hahthlak emai hetiang chuan ka cham rei peih lo" a ti ve a, a fel viau nain ka ngawi tlat a, Sensiari leh Tintin-a tih loh midang bulah hi chuan engmah sawi chi a ni lo. 

"Tintin-a an ti nasa lutuk ţhin te hi ka lo na ve ţhin a, engpawh chu nise in nupa hian puitling ula, ţhahnem ngai ula, in hlawhtling chho zel a nih chuan an tlawn sup sup mai ang che u. Buaipui ngaia in awm chhung chuan tun a an endan cheu hian an en reng dawn che u. Nangmahni in pawimawh ber" a ti a, ka ni nen chuan kan ti ti zui zel a, u Dini chuan min rawn en leh zeuh ţhin a, ka ngaihbel nge kan thusawi chu a hriat ve chak hmel riauin ka hria a, Thartei leh amah vang vek a heng buaina zawng zawng hi lo irh chhuak a ni. Ka haw hlur mai. 

Tintin-a lo haw chuan choka a pan ding nghal a, ka zui lut a, dawhkanah ice cream chi hrang hrang a bun ruih a, "I ei vek tur a nih hi" a ti a, pakhat min pek bak chu freezer ah a dah lut a, chik deuhin ka en a, zu rim chu a nam ngei a, a rui lutuk lo thung. 

"Naktuk chu khawiah nge in picnic dawn?" amah en reng chunga ka tih chuan, "Ka kal ve hman lo ang" a lo ti mai a, "Thartei khan in picnic dawn niin a sawi a, i phone a lo chhang a, group thlengin in siam a ni awm a" ka ti a, a ice cream lo hawn chu ka ei a, ka dai sawng sawngin ka hria. 

"Phone ka la en lo" tih zawngin min chhang leh a, "Tunlai chu i bula awm a hrehawm. Engmah nuam ka ti lo. Ka ipik lutuk hi depression ka nei ang tih te ka hlau zawk" ka tih chuan, "Chuvang alawm ka inlak hran" bung zet hian a ti a, "Zan hnih khat lek chu kan in a riah chhoh ka duh, boruak dang hip ka mamawh" ka ti chiah chu min rawn en rang khawp mai. 

"A ţullo, u Dini te lawm i siam mai mai" a ti hmuk a, a lawm chiah lo niin ka hria. 

"Nih chuan min chhuahsan tawh bik suh" ka ti ve ngat a, hahthlak tih hmel zet a min en chung hian, "Vanram, hna ka thawk" a ti hulh a, a thaw zui hawk a.

"Zanah hna i thawk ngai hleinem. Zanah chuan chhuak tawh suh ka tihna a nih chu. Ka khuahkhirh lutuk che ni a i hriat a min ngaithei lo a nih chuan min ţhen mai rawh" ka ti a, hrehawm ti dawn tho mah ila inţhen pawi ti lo ni awm tak hian ka awm a, hmeichhe nasa a tawn fuh phei chuan sawn a thlak ang tih te a hlauhawm. Kan natna a lo ni lehzel nen, ka ngaihtuahna a kal thui thei lutuk a keimah leh keimah hi ka inti hrehawm zawk fo mai. 

"Inţhen sawi tei vet suh" a ti hrawk a, rum zet hian min melh khui a, a bag ah chuan beer a lo ak leh ţat tawh bawk. 

"I duh loh chuan zana i chhuah loh a ngai a nih chu. Min pawisa lo viau a nih chuan inţhen pawi ka ti bik lo. Rilru hah reng reng a pasal neih ai chuan pasal tel lova hahdam deuh a awm ka duh zawk. Fa pakhat pawm tlei chhung te chu a rei hleinem" ngaihsam hmel deuh hian ka ti a, thinrim ţeuh a min en lai chuan ka chhuahsan a, natna hian mihring a thlak danglam thei, chu chu keimahah hian a chiang khawp mai. 

CONT...