BLACK AND WHITE-20

BLACK AND WHITE-20

"I duh chuan chhuak rawh ka dang lo ang che. I vei reng a lu i ti hai" puanin ka inkhuh nghal thawk a, "Ţawng kha kha reng suh ka rawn zuan ang che aw" a tih chuan, "I duh leh min rawn zuan rawh. Kei aiin naute hi a na zawk ang" ka lo ti a, chhuat dungah a vei tawn sek a, a phone lah a ri ngun malh malh bawk si, a ţhiante nen tih tur an lo nei lawk leh liam tawh a nih hmel. Min hlauh vang chauh a chhuak lo mai mai a ni. 

"Ka kal dawn a nia ka rei lo ang" a ti leh tawh a, ka inkhuhna puan chu ka theh hlim a, rum zet a melh chung hian, "I duh leh kal rawh. Hmeichhia te kha va awm pui leh la, keipawh ka duh dan danin ka awm ve ang. Ka haw a nih pawn min rawn hruai suh ang che" ka ti hlak hlak a, ka ţhu chhuak a, helmet a ban uaih tawh a, ka thusawi avang chuan a kut a la let leh riai riai a. 

"Tu hmeichhia mah ka awmpui lovang. Chu an zai leh tawh chu, inhnuaiah chhuk rawh" min ti a, lu ka thing ve tlat a. Bena hnenah pawh inchhung nuam a tih loh thu a lo sawi a, mahse keimah vang tal pawhin a awm tur a ni. A nupui ka ni a, keimah chiahin min hnutchhiah reng thei bik lo. 

"I luhlul ve zek a, ka rei lo ang ka ti mawlh mawlh alawm le" a ti bul bul reng a, "Rei dawn lo mahla chhuah reng a ţullo. Nilengin i chhuak a, zanah te chuan inah awm ve ta che. Nupui i nei ve thawr ringawt a, i mawhphurhna i hlen zo lo lutuk mai" ka tih chuan khumah a rawn ţhu a, kan inbiak loh lai te chuan sana a melh leh zauh ţhin a, a hmanhmawh tawh hmel viau mai. 

"I zin thawveng chak em?" a ti chhuak phawng a, thil dang min zawt ta daih chu mak ti viau mah ila, "Chak e..mahse ka chawl thei nang. Chawlh ka dil zing mawlh mawlh lutuk a ka inthlahrung tawh zawk" ka lo ti a, "Chhuanlam siam rawh. I chawlh theih chuan Rinhlua bulah kan zin dawn nia. Khung ho cham chhung khu chu in ah awm lo teh ang" nin hmel zet hian a ti a, ka phur leh riau tawh. U Rinhlua hi thingtlang khaw pakhatah a awm mek a, a awmna khaw nawm zia a sawi ve nasa si, chhuanlam tur ka ngaihtuah lai chuan, "Ka rei lo ang aw" tih leh thawh a rual a, "I va phakar ve, i lenchhuah duh vang a ni maw zin pui a min sawm?" ka ti lang lang a, nui ruh ruh chung hian a hnar a tuai zauh a, min chhan ngaihna pawh a hre tawh lo. 

"Ka pi chhuanlam mai rawh. Mikhual kan la ngah ti la, zaninah lo be fel la, chawlh i lak belh theih chuan naktukah kan kal dawn nia" inthlahrun hmel fe hian a ti a, helmet khum paha min nuih tlawn vel te chuan ka lo la melh nasa mai. 

"Tun angah te chuan zin an phal dawn lo. U Rinhlua phei chu a kal leh tawh a, sumo in kan kal ve dawn mi?" ti a ka zawh chuan phone ah pah hian, "Ka pa ka lo dil ang" a ti sam mai a, min chhanna chu ka duhkhawp lo niin a hria aniang, "Bike in kan kal dawn nia, muangchangin ka khalh ang. Mikhual ho an haw veleh kan haw leh dawn nia. Dawrah pawh kal ka duh, kan zin dawn chuan bike check a ngai" a ti a, khum lamah a rawn phei leh a, rawn kunhniamin ka biangah a dawm a, "Boruak dang kan mamawh ve ve...kan inpawh lehzual nan pawh" tiin ka beng zawnah a phun sup sup a, ka beka a fawh zauh hnuah min chhuahsan lui ta tho a. 

Chhuanlam tur ka dap kual a, hreh deuh chungin ka bia a, "Mikhual kan la ngah angreng a, ka dam hleithei bawk si lo a" tih velin chhuanlam ka siam kual duah a, ka insawi awk teuh viau nghe nghe a ni. Sawrkar school a nih lem loh avangin min lo pawm sak leh mai a, ka thawhna school hi an khirh ve viau tho a, mah se nau ka pai tih an hria a, chipchiarin hre lo mah se damdawiin a ka kal ngun zia an hre bawk a, mi damlo na na na lo phal loh bur chi niin an hre lo aniang ka dilna chu an lo pawm a, zawm vat vat tura min duh thu an sawi tel thung. 

Tintin-a lo haw hun nghakin bathlarah ka ding reng a, inleng pawh an haw rem leh tawh a, chhungkua chauh a kan awm hi chuan inchhunga awm a peihawm loh em a, chuvang a pawn a awm chu ka ni pakhat. 

"Ka peih bik lo alawm mawle lal nu Ruat. In ţhu hnur hlawm a, in chinai liah ban mai mai pawh in paih peih loh vang a nih kha in thau em em. Ţhutthlengah te khan in lo tat ange, paih tur pawha in tho peih lo a nih chuan liak zo vek rawh u. Engkim ka ti hman bik lo, ka kuhva hralh ban hi bel tur ka zawng dawn. Naktukah chuan a hmel a mawi lo vek tawh anga, zaninah hralh zawh a ngai" Daizauin a rawn ti chhuak lang lang a, min hmuh rual chuan, "Ninawm" a ti leh hlak bawk. 

"I thin an ti rim leh tawh a ni maw?" tiin ka lo fiam a, "Niang chu...panhnah them paih turin min tir reng hlawm a, anni ve lem kuhva an hmawm thawih a, nutling ve si meizial an zu hlat hlat a, an ţhu thluang duai a, ke arh tarhin an si hlat hlat a, ka ning zo zai tawh lutuk. Kuhva ka hralh zo bawk si lo, ka mood a off teh mai a nia" a ti bawrh bawrh a, "A zia lo hle mai. Kuhva heh deuh chu ni ila ka leisak tur che a nia" ka lo ti mawi ve a, kho ah a la awm ruih mai. 

"I lo chik ve em?" a tih chuan, "Engmaw?" ka lo ti thuai a, "Nu Ruati te unau hnar hi a inang hlawm tawp. Hnar ngul an nei vak lo a, bakah an hnarkua hi a lian hlawm. Thil dangah an danglam tehreng nen an hnar kher kher hi chu in ang tak a ni, naupanlaia ka marble hman thiam kha an hnar kua ah hian a leng zan ang. Ţawngthu chhe loah lo inhloh palh pawh nise hnar hmanga inzawn an ngai ang ka ring. An hnar hi a common lo e" a ti a, a nui hak hak a, marble hman thiam han sawichhuah kher kher, a maksak ve hrim hrim. 

"Kekawrte hi ka zuar nasa a, naupang blanket tiat lawih pawh ka zuar tel ţhin. Mahse, nu Chhuangi saw chu a kekawrte hak tawk an la siam chhuak lo. Ţhui chawp zel a ngai. Hmanah Tintin-an a sawi alawm. Thawmhnaw aiin a kekawrte in puanthan a heh zawk a ti" nui har har chung hian a ti a, keipawh ka nui ve ta nge nge a, a lian awm rem rem hle mai. Nu Chhuangi hi thau luah, mawng lian zet mai a ni a, a mawng ang tiat nei hi ka la hmu lo. An sawi takah chuan a nih duh hmel khawp mai. 

"An sual lutuk hi keichu ka ngei a, an inla piangthar tho si. Zanin tlai phei kha chuan Nu Maremi ţawngţai kha a ţap vel a, ka awih lo nasa, ţap chunga ţawngţai ruah ruah ho hi a tam zawk chu an nunah Pathian hmel a lang ngai lo. Nu Maremi pawh a ţawngţai zo a mi a rel lehnghal. Pathian pawh hian mak a ti ve ngawt ang. Kekawrte lian-i lah saw mi hi a hau ve vak vak a, a ke ţang te min hiah tir vel mawle. A kar zawng zawngte kha hiat rawh a tia, ke em inhiah tir hi chu ka la na ve thlawt. Kan pa pawh a hnung bak ka hiah sak ngai lo a nia" a tih laiin Tintin-a a rawn tlan lut a, gate inhawng sain ka lo dah thlap a, bike a hun fel hnuah a khar veleh thlap thung a, inchhung a lut tlang mai lovin kan bulah a rawn ding ve a, "Zanin chu an tlem deuh a mi? Daizau, i hralh zo thei nange?" helmet phelh pah hian a ti a, kuhva chu a chuang hnem ve bawk em a ni. 

"Hralh zo thei lo, Kekawrte liani saw alawm, a ke thak min hiah tir reng a, mi awm lai laiin min tir a, ka kuhva thlengin an ten vek aniang" lungawi lo deuh hian a lo ti a, mi awm lai em em a ke thak inhiah tir chu a ti mak ve bawk a ni. 

"I hmel en hian ei leh in chu hralh thei vak chi i ni lo hrim hrim. Pi Dingi dawr bulah Bena te an la awm han lei luih tir rawh" a tih hnuah keichu min rawn en a, "Min lo nghak tiraw? Enteh Daizau, ka nupui hi chuan min duat thiam a sin, i tluk lo ve chiang" a ti vel a, zu rim a nam leh ham ham tawh a, a phur tawkin a in leh tawh tihna a ni mai. 

"Khatiang in duat tihna a ni lo emai. Ka pasal chu amah a chaw ei ka phal reng reng hleinem, ka hrai thlap zel. Inbual a duh pawhin chawhtawlh lianpuiah ka ţhuttir a, ka bual ţhin. Naute sahbawn bak ka hmang ngai lo" a lo ti ve zat a, hemite pahnih hi chu a ngaih pawh an in ngai a sin aw. Tintin-a hian a unaute a hmangaih ang chiaha a hmangaih ve ka ring, chutiang vel chu a ni. 

An pahnih chuan awmze nei deuhin an inmelh a, ka ding tum bur reng chu min rawn en ve ve a, "Vanrami pawh hi ka duat a nia. Ice cream pakhat a tih pawn sawm(10) chuang ka lei ţhin. Vanram, min lo pawm han ti teh, ka paw nghal che a ni mai" a ti a, Daizaui a lo nui har har a. 

"Ka pasal pawh ka duat alawm...night bus a tih rualin puk kawngkhar ka hawng nghal ţhin" Daizauin a tih chuan nui chung hian, "In va han over dun tak aw" ka lo ti a, "Kha, a nui mai alawm" Tintin-a chuan a lo ti ve vat a, chutah min rawn kuahin a awm si chatin min pawm bet a, Daizaui pawh a lungawi hmel khawp mai. 

"I nupui hlim loh chu i hlau ve hle mai maw? Ţha deuhin awm la i hlim a ni mai. Sawm zuheh-a te hi zui duan duan reng suh. He pa hi chu a ngaihna a awm hlawl lo. A thla pawh hrang se zu hmunah bak hmuh tur a awm chuang lo ang an tih kha a nia. In inzui zel chuan amah angah hian i chhuak ve mai ang" tiin a zilh ve a, "Lo ţawngţaipui ve rawh" ka tih chuan lungawi loh hmel zetin Tintin-a a lo rum nghut a, "Ka mamawh lo" a ti chu Daizaui a ner nasa mai. 

"Ve lutuk che hian, Pathian aia thiltithei zawkah i in ngai a ni maw? Pathian hian veng lo che sela chu hmuh tur pawh i awm tawh nang. I zu in ţhin te kha Pathianin mal a sawm avanga thih pui lo i ni lo, insiamţhatna hun a la siam sak mai mai zawk che a nih hi. Mihring siamţhat nan khaw dur a ngai kan tia biakinah pawh kan sak ziah hi. Chhing duar duarin kan sa a, khaw dur a lo thlenin kan lungawi leh ngai mang si lo. I chunga vanduaina thleng ţhin ai chuan Pathian pawi i khawih zat hi a tam tawh fe zawk tih hre tawp rawh. Pawi kan khawih apiangin Pathianin ţekin min den tir se emaw current in min shock tir zel sela chu kan kal kak ţhai hlawm ang u. Kan sual hi min puan sak hlawm zel phei sela chu pawn chhuak ngam pawh kan awm tawh nang. Chuvang chuan maw Laltinkhum, ţawngţai ka mamawh lo ti vel lo khan ţawngţai hle hle rawh, nang phei chu zing ţawngţai inkhawm thlengin kal vek rawh, chutiang khawp chuan thupha chawi i ngai nasa. Keimah mai ni lo ram pum ţawngţaipuina a sin i mamawh" a ti deuh nek a, Tintin-a takngial pawn chhan ngaihna a hre tawh bik lo. 

"Ka kuhva hi hralh zawh ngei ngei a ngai a, nidangah ka rawn zilh leh ang che. Vani ringawt chuan a siamţha zo lo che a nih hi. Nakinah khaw dur ka rawn kal ang lo inring rawh. I awm khaw loh na chuan i nasa lo viau ang aw" ti a a vau hnuah min kalsan a, pawn a a chhuah hnuah gate chhungah a kut a rawn zen lut a, hawlh kalh rak rak pahin, "Vani, kha mihring kha a awm ţha duh lo a nih chuan min hrilh zel ang che. Ka rawn phin darh vek mai ang" a ti leh hram a, Daizaui ber hi ka thlamuanpui ţhin a, a zawng zawng hrilh ngam lo mah ila Tintin-a chungchangah chuan ani hian tih dan a hre ber ţhin. Daizaui a an tawh chuan ka pasal hi a ngawi dâk zel. 

Inchhunga kan inzui lut chu min lo en ţhap a, Tintin-a zawk chuan, "Pa, inbe lawk ang" zaidam tak hian a ti ve mial a, ka pa ţhu hle hle lai chu a pawm tho nawlh a, a tih ziah dan a ni. Thahrui a ngah si a, ka pa ding hle hle lai te hi a chawi kang nawlh zel. Ka pa hian a duat hle bawk. 

"Eng chungchangah nge ni a?" a kawr pawh mar paha a tih chuan, "A tam mai..inbia ang" a ti leh a, "Mahni pite ruang pawh ţhutpui peih lo, in a awm ngei ngei a ngaih pawh a chhuak lui tlat, chhungte zahna tur hlir a khawsa lui tlat chung hian inthlahrunna pawh i nei lo a nia. I pi boral hlimchhawn a la ni a, i khawsak dan hi mi pawn em em a an ti ang. Lenchhuah rengna hun pawh a la ni lo. Mizo in dan kan nei a, chhungte thu i awih loh chu thuhran, kan mizo dan pawh i zawm duh lo" nu Chhuangin a tih hlak hlak lai chuan ka pa bawk chu hnunglam aţangin a chawi kang a, an pindan lamah a phei pui a, rit a tih zia a hmelah a lang vek chung pawhin an pindan bulah chiah a nghat a, loh theih lohin ka pa chuan pindan chhungah a zui lut ta nge nge a, hei hi a nia Tinkhuma ze pakhat chu, a duh chu neih emaw tih hlawhtlin emaw a tum tlat ţhin. 

"I pa kha eng ber nge sawipui a tum a?" tiin ka nu'n min zawt ve thung a, dar ka kan ak a, "Ka hre lo" tih chiahin ka chhang a, "A pa aiin an lian vek tawh si a, a pa hi an chawi kang nawlh nawlh zel mai a ni. An puitling viau tawh dawn emaw tih pawh hian naupang ang maia khawsak chang an la nei a, keichu Mala thleng hian ka hmu puitling tak tak thei lo reng reng. An naupanlai kha mitthla ah a lang leh ţhin" ka ni in a ti a, ka pa chhungte ho chu an nui dar dar a, ka nu lam ve thung chuan keimah chiah min ngaihven a, Tintin-an ka pa a koh hran chhan kha an hre duh a ni. 

"Thil eng emaw sawi dun in nei em ni? Ngatinge a zia a thlak leh thut a? I pa lah a be ngai der si lo" nu Chhuangin a lo ti ve leh a, "Engmah kan sawi dun lo" tih chiahin ka lo chhang leh a, Tintin-a te chu kan ngaichang ţhap a ni ber. 

Ka pa nen an rawn inzui chhuak a, ka pa hnunga kal chung chuan keichu min rawn nuih suk a, a phal ni turah ka ngai. Ka pa chuan, "A la hun lo viau nain Tintin-a hian Rinhlua awmna khuaa zin min dil a, a pi a ngai bawk si, an nupa hian zin thawveng rawh se. Rawn buai lo cheu in ka phal sak a, boruak dang hip an mamawh a, sawi buai lo mai rawh u" tiin ka ngaihdan chu a nem nghet a, ka la chawl thei dawn bawk nen, ka phur kher mai. 

"Inchhungah kan buai si a, Dini damlo nen, ka ute lah han che thei chi vak an ni tawh lo a, Vani a lokal ve kher a ngai em ni?" ka nu'n a tih chuan, "Vanrami nen hian innei lo mah ila ka pi a thi dawn tho. In buai ngai rengin in buai dawn, mo nei lo ah in ngai mai rawh. A hlutna i hrethiam chuang lo" Tintin-a zawkin a lo ti a, a rukin ka nui sak, a sawi dik tlat alawm. 

"Huiham...a hahthlak a nih hi, in awm awmin awm teh u" ka nuin a ti ta ringawt a, "Sawi hma ula chu Rinhlua rualin Vani chu a kal thei ang mawle. Bike ah chuan a hahthlak ang, naute tan a pawi thei lo maw?" ka ni in a lo tih ve chuan, "Kawng chhia a tam lo a, muangchangin ka tlan pui mai ang. Keimah zawk hian a pawi ka hlau ber ang" a ti a, naute hi chu a hmangaih ve em a ni. 

Zing thawh veleh aţangin kan insiam a, "Kal pahin damdawi lak a ngai ang aw. Kan sawi ang a, cham chhung daih tur kan dil dawn nia" a lo ti a, damdawi tello a kan awm thei tawh lo ringawt pawh hi ngaihtuah chian chuan ka na veng veng zel. 

"Nizanah Daizauin nu Chhuangi kekawrte len zia a sawi a" ka tih chuan a lo nui hawk a, "Rinhlua zawt rawh. Blanket suka suk tham lawih mawle. Rinhlua phei chuan a naupanlaiin anu Chhuangi i kekawrte in buk ka lo sa a ti ţhin" a ti a, a sawi uar lui tih hre tho mah ila ka nuih pui hak hak a, "Engati nge zin i rawt thut a?" a lam hawi meuh a ka tih chuan, "E le..min ţhen ka hlau. Haw i tum thut thut tawh sia" a ti a, thlang lam hawiin a nui ruh ruh a, ka thinrim lutuk chang chuan haw daih ka chak ţhin tak tak alawm. 

Kan chhuak tur chu ka nu leh pa leh Sensiari te chiahin min thlah a, ka pi kha keipawhin ka ngai. Damlo chung pawh khan a thawh peih phawt chuan ka school kal tur te, Tintin-a dawr kal tur te kha a thlir liam thlap ţhin a, a hmun ruak hi a zau ve em a ni. 

Bike a tih nun rualin a hnungah ka ţhu a, bag ka pawm bawk a, kan bawr lutuk lo hlauh a a zia phian mai. Bag lian vak lo chiah keng mah ila kan thlen meuh chuan taksa a na viau ang. 

A tlan chhuak mai dawn emaw ka tih laiin ka pi ţhutthleng bik, bathlar a ni lum a ai apianga a ţhutna ţhin chu a en vang vang a, "En rawh Vanram, sawtah sawn tiang nen a ţhu a, ka chhaih thinrim chang chuan min hawlh zawt zel, min hawlh na phal ngai lem hlei lova. Heng ho hian ka pi min hmangaihna zatve pawhin min hmangaih pha lovang. Kalsan daih ang aw" fiamthu ti tak deuh hian a ti a, ka nu unaute a sawina bawk a nih hmel.

Ka nu leh pate chuan, "Tluang deuhin in kal dawn nia, chanchin min lo hrilh zel ula aw" tiin min vai liam a, kan tlanchhuah hnu chuan min chhan dan tur hre tho mah ila, "Tintin, ka pi kha i ngai em?" ka ti a, a ngawih vang vang hnuah, "Tehreng mai" a ti sup a, awm hnaih deuh hlek lo ila chu a ţawng ka hre pha hauh lo ang. 

Damdawi kan lak zawh hnuah kan chhuak leh a, u Rinhlua pawh kan hrilh lawk thlap a, "In lo thlen hunah ar in talh dawn nia, ka vulh ve alawm" a ti a, kan kal tur chu a phur rualin ar a talh ngam tlat lo. Sensiari chuan thi suk a nei niin a sawi a, in awm ve chuan nuam a ti sawt ang a tih avangin ka phur lehzual a, helama kan chhungkaw buaina hi tlanchhiatsan vang vang ka chak a ni. 

U Rinhlua awmna khua kan lut chiah chu kawngsirah bike a ti ding a, "Engati nge i din?" ka ti thuai a, min chhang lem lo hian, "Chhuk hrih teh" a ti hluk a, a ngaihna hre lo deuh chung hian ka chhuk ţuah ţuah a, tlan muang viau mah ila ka taksa a kham ţhum mai. 

"I motor rui tlat hi chu a buaithlak ngawt mai. Ka taksa hi na lo lai pawh a awm lo" ka zi mar ţalh ţalh a, "Engati maw i din?" ka tih leh chuan, "Kawng ka hre tawh lo" a ti hem mai. Meizial a ţan a, phone a hmet zui mawlh mawlh a. 

"Kal tawp la mi kan zawt mai dawn alawm. Pro pastor chu zawn hmuh a har tawp nang. A khua chu kan thleng a hei a intar vek a" ti mah ila, "Biak phawt loh chuan ka hre lo" a ti tlat a, a luhlul si, a thu a duh bawk si, "I tih tihin ti teh" ka ti ta ringawt a. 

"Kan lo thleng chiah. Khaw tawn tirhah kan awm a, engtia kal tur nge?" a ti lung lung a, u Rinhlua a bia a nih hmel. 

"In kawtah lo awm rawh ka rawn tlan risk dawn a nia, kan bo chuan min rawn zawng ve tawh mai rawh aw" a ti chu ka lo nui chhuak hak a, "Aa..min zawng hman ang. Min hmuh zawh loh leh khawtlang i pun mai dawn alawm" tiin a fiam zui a, u Rinhlua chuan tak tak emaw a ti leh tho ang. Ţawngkam a thiam loh mai bakah ţawng bung chi, ţawng nem vak lo chi leh ţawngkam ţha pawh nei vak lo a ni a, Tintin-a nen an indawr tak tak hi chu tunhma pawn kan nuihpui nasa ţhin. Pakhat lahin fiam nuam a ti em em a, a hna leh a mizia hi a inhmeh hlawl lo alawm. 

"Kal ang le..i cham hlen daih ka hlau angreng" uangthuang deuh a tih pahin min nuih suk a, ka lo ner nawng thung a.

Mi zawt chawp takmeuhin u Rinhlua in chu kan thleng a, kawtkaiah a lo ding a, kekawrbul leh tshirt a ha tawp a, a bulah naupang an lo ding khawm lai bawk. 

"Kan lo inkhel a, hei ka ţhiante" a kawng pawh thleng mang lo naupang ho chu a kawk zauh a, bag ka lak kan rual chuan min lo chhuh vat a, "Ruak khan chhuk rawh" a ti mawl tawp a, Tintin-a pawh a rawn hawi let rang khawp mai. 

"Tumaw ruak a chhuk tir i tum?" a ti a, U Rinhlua chuan, "Vani" a lo ti mai a, "Ka nupui hi ruak a chhuk tir i tum maw?" a ti lui leh kher a, bag min laksak fel diam tawh a, a sawi awmzia hrethiam tlang mah ila a fiam chak a ni chek ang chu, "Mi nupui ve te ruak a han chhuk tir tum" a ti leh a, "Aw ruakin, bag tello in" tiin u Rinhlua chuan a lu thak lo pui a hiat a hiat mai. 

"Khaw nge motor i dah ţhin? Bike hi a dah ve theih angem?" thutak deuh zawka a tih leh chuan, "Aw, tikhan dah la nakinah ka hruai ang che" a ti a, "A va hlat hmel ve" tiin Tintin-a pawh a nui ve hawk hawk mai, boruak dang hip chu kan ngeih tlang dawn a ang. 

"Nimin tlaiah ah ka let a, rawnkal tum tho chu ka rual khan rawn kal ula ţha tur. Vani, i chau em?" inchhung luh pah chuan a ti ve mial a, "Chau lo e" ka lo tih chuan, "He raipuar nu hi phur lo ila chu ka lo thleng hma ang. A tlan chak theih loh a, kan rawn tlai a nih hi" Tintin-an a lo ti fiamthu a, kan inbual fai a, kan thlen tlai tehreng nen chaw pawh a lo la chhum lo. 

"Chhum zat tur ka hre lo a" a ti mai a, Tintin-a nen chiah kan kal dawn tih a hriat chuan hriat ve awm tak a nia, ar pawh chaw ei khamah talh zawk mai ang kan ti ta ringawt a, u Rinhlua chuan chaw ţhing a ei a, inkhawm turin a insiam zui a, a palian si a, a inchei meuh chuan a zahawm khup mai. 

"Chaw min lo ei san mai rawh u" a ti zet a, a ei tawh tih a hre chhuak leh si aniang, "Ka ei tawh tak alawm" amah vek chuan a ti leh a, kan han nui leh rih ţhin, kolasib lama kan inchhung ai ngawt chuan boruak pawh a nuam e. 

Rawng kan bawl laiin nu valai deuh mai pakhat hi, "I inkhawm dawn nange?" tih hlut pahin a rawn lut a, a hmelhriat ngai pawh ni lo kan lo awm daih chu a meng zau kawk a, a mak ti hmel chu bo leh vatin, "Rinhlua turah ka ngai cheu a" a ti leh thuai a, "A naute kan nia, ani chu inkhawm turin a kal tawh" ka lo tih takah chuan, "E...a ni maw? A nu leh pa chiah ka la hmu a, ka hre lo palh che u a nih chu. In ţhenawm maiah hian kan awm a, Rinhlua hi a fel khawp mai. In cham rei dawn em?" a ti deuh luam a, zo zial a fawp zui vang vang a. 

"Cham rei lutuk lovang, kan lokal ve zawk mai mai a nih hi" ka ti a, Tintin-a chuan phone a khawih daih a, phawk ve viau si hi nu te rual meuh han kawm chu a thiam tlat lo.

"Cham ve reng rawh u. Kan khua chu a nawm dawn hmel em?" a tih chuan, "Nuam ang...kan lo thleng deuh chiah a, len kualna hun pawh kan la nei lo a, mahse a nuam ngawt ang ka ring" phur deuh hian ka lo ti a, "A boruak a dang zar mai, thli thaw ri pawn 'a nuam' a ti" Tintin-an a lo tih ve chuan kan inleng nu chu a nui uar uar a, Tintin-a khupa dawm pah chuan, "Tu zawk nge Rinhlua nau?" a ti leh rih a, Tintin-a ka kawh rual chuan a malah a beng thlawp a, "In zia a va inang lo ve" a ti hluai a, ka pasal chuan min rawn en a, a nuih a za ve viau mai. 

"Rinhlu, i inkhawm nange?" ti lang lang chungin nu pakhat a rawn lut ve a, min hmu chu kan inleng hmasa zawk ang bawkin a hamhaih khawp mai. 

"Piangi teh hlawl chu, lokal teh hei Rinhlua naute an nih hi" a lo ti zung zung a, Tintin-a dinglamah a ţhu ve chat a, a lai takah ka pasal chu lai deuhin a ţhu a, Piangi a tih nu chuan thleng a keng a, vaihlo leh zo zial lehkha ka ti mai, a awm ruih a, zial sa pahnih vel a awm bawk. 

"Nu Piang ti mai ru aw, kei hi nu Duh min ti ula, Rinhlua hi a hna a zahawm tehreng nen fate rual lek a ni si a, Rinhlu kan ti bawl bawl zel a, han pu vaih ila a thin a rim zawk ang. Piangi pawh hi ţhenawm lawka awm a ni a, kan pahnih hian inkhawm loh zan chuan Rinhlua inah hian kan leng ţhin a, zanin pawh a inkhawm lo emaw kan tih vanga rawn lut kan nia" nu Duhi chuan a ti zung zung a, an fel hmel khawp mai. 

"Rinhlua bialnu te in ni maw? Rinhlua bialnu 1 leh 2 in ni mai. Pastor leh pro pastor ho bialnu chu nu ho an nia, biakinah lam pahin in ngei zawngte in nek her sawk sawk ţhin em?" Tintin-an a tih chuan, "Awii he nau hi ka duh lutuk" an ti a, an nui har har a, keipawh ka lo nui ve hak hak mai. Ka thusawi kha ka thlak leh, kei aiin nu ho kawm a lo thiam zawk daih a nih hi. 

"Khawimaw i meizial chu min lo ţheh la, nula zial aiin nu ho zial ngei hi a tui zawk ang" a ti vel a, nu Piangi chuan phur deuh hian a pe a, "Kha...nakina i zuk tur pawh ka zial sak dawn che nia. Kan vaihlo lei ţhin hi a tui a sin. I zawng chhang ang" a lo ti sauh sauh a, chaw ei ka peih hnuah pawh ka rawt ngam lo, an inthlahrun phah ka hlau si a, ril a ţam chuang lo bawk a an piah deuhah ka ţhu ve rih a, nupa kan ni tih an hriat chuan, "Awii..in inhmeh emai. In hmelţha dun si, fa pawh nei ula a hmelţha viau ang nu leh pa chhun tur a nei ţha dawn si a, Rinhlua te unau hi an lo hmelţha a nih hi. In lian ţha bawk si, in unau za hian kan khuaah rawn awm vek ula chu nula mai bakah nu ho in kan rim luih luih dawn che u a nih hi" an ti luam a, fiamthu an duh bawk a kan nui reng mai. 

U Rinhlua lo haw chuan, "Chaw in ei tawh em?" a ti pek a, lu ka lo thing vat a, kan inlengte chu an inthlahrung aniang, "Haw teh ang..an chaw eina kan dal palh ang" tih leh thawh an rual a, ei daih tawh turah min ngai a ni khawp ang.

"Ei veleh zawk ula" u Rinhluan a lo tih chuan, "Nidangah le...naktukah bai tui deuh ka rawn suah dawn che u a nia" nu Duhi chuan a ti a, kan phallo chung an haw lui a, Tintin-a meizial tur pawh nu Piangi chuan a dah thlap a, ţhian pahnih kan chhar der mai. 

Chaw eikhamah kawmthlangah kan chhuk a, ar chu panga vel lai a lo vulh ve a, a man ngam ber tur Tintin-a kan nghak ran a, rei deuh kan ngawih hnuah u Rinhlua chuan, "An ek hi a uih i ti em?" a ti phawng a, min biak loh reng chu nuam lo a ti ve deuh ni tur a ni, "An in te hi a rimchhe thei a sin" a ti leh a, "Rimchhe khawp mai" ka lo ti a, ar in hi chu a rimtui mawh em a ni. 

"A lian ber hi kan talh dawn nia. In cham chhung chu a daih hrim hrim. Rivunga a nih hi, a bengchheng ber ţhin a" a tih chuan phawk fe hian ka en a, Tintin-an vawk hming a phuah a, u Rinhluan ar hming a phuah bawk a, unau na na na chu in an na lai an lo nei a nih hi. 

Ka awmdan a hmuh chuan, "A ninawm loh nan ka phuah fiam vel mai mai. Ka ţhian neihchhun te an ni ve a, thingtlang chu a reh ruih a, ţhalai an taima bawk a, tuna ka awmna khua ngat phei chu ţhalai awm mai mai hmuh tur an vang a nia" a ti ve duah a, ka lo bu nghat nghat a, Tintin-a a lokal chuan ar lian ber chu a man a, u Rinhluan, "Dim deuh rawh aw" a lo ti sek chu a ning deuh ni ngei tur a ni, "I bengchheng, kan talh dawn tho tho, talh dawn a ruai a duat vak a ţullo" a ti hluk hluk a, kan ngawi tlang thei hram e. 

Ar kan talh lai chuan a neitupa ber a awm ngam tlat lo a, Rivunga thi tur chu ka khawngaih ve reng. Ran reng reng hi han talh hnua sawngbawl tak tak hi chuan ei a chakawm loh vek zel a, keipawhin ka en rei duh bik lo. Khum pakhat chauh a awm avangin chhuatah mutna ka siam a, mut hahdam pahin Tintin-a phone zawk ka en vel mai mai a, Thartei message tam lutuk chuan ka mit a la nghal. 

'Chaw eikham a chakawm, rel tlang ang u' tih hi a thawn a, Tintin-a chuan, 'Kan nu'n a phal lo ang' tihin a chhang let a, 'Chhuanlam siam la, a hriat lohin a ni mai alawm' Thartei chuan a ti leh zel a, dar zat ka en a, rawng ka bawl lai vel kha a nih duh hmel, phone a hmet mual mual ka ti reng a ni. 

'Nupuite hnena dawt sawi ka duh lo, rilru a nuam dawn chuang lo' Tintin-a chuan a ti ve ţang ţang a, 'A ho emai..hmelhriat loh zinga awm tur i ni hleinem. I va uire dawn tihna pawh a ni lo a' Thartei chuan a la ti ngam a, 'Min tel ve suh u..nupuite bum chu a suah sual thlak' a ti a, 'Kan tel ve dawn tho tho che..i hman hun kan lo nghak ang' a rawn tih chuan a chhang let tawh lo. Thartei chu a la online vâng a, group ho te te, member tlem te te awmna a awm ruih bawk a, a phone ka en lohna a rei tawh a, a lo che na leh viau tawh a nih hmel.

'I online reng a min chhang ve mai ta che' Thartei bawk chuan a rawn ti leh a, hmeichhe dang message pawh a tam, Thartein hmeichhiain an bia a tih khan dawt a sawi miah lo. Sual viau mah se kan khua ah chuan a langsar ve a, an hausak chu thuhran, amah hi a chhe miau lo a, Aizawl a kan awm lai pawn kan buai zeuh zeuh reng mai. Ani lah khawlai ngaina chi a lo ni veleh zel a, hmeichhia, amah ngaizawng ţhin te pawh a tam zawk chu zu in ve thei vek an ti. An inti changkang hlawm em em bawk. 

'Hmanni a kan thlalak kha ka la thawn lo che' tiin Thartei chuan thlalak a rawn thawn a, engtik ni a mi nge tih ka rin zawn thiam lova, tunhnai a mi a ni lo tih chu ka hria. 

'Tintin-a nen hian eng inzawmna nge in neih?' tiin ka insum theih loh tawpah ka chhang let a, keimah ka ni tih pawh ka chhan danah a hre nghal chat thei ang.

'Inzawmna hranpa em em kan nei a, kan inhaw lo bawk' a rawn ti a, min chhang duh dah lutuk te chuan thin a ti rim hlur thei. 

'In mu dun tawh em?' ka ti khawl a, rilru nat huam a zawt ka ni. 

'Chutiang thleng thleng a ka hrilh nachhan tur che ka hre lo' a ti a, zam lo haih haih tak a ni. 

'Min hrilh vek rawh. Nupa inkar thil a ni tawh a, inngaihzawn lai ang mai mai a ni lo. Ka pasal hi a lo rinawm lo a nih chuan neih zel ka tum lo. Thudik tak min hrilh la a tawk mai' ti a ka chhan letna chu a en ngei a, min chhang ve tawh lo thung a, engang pawn zep tum se Tintin-a hi a fimkhur thiam lo a, thudik chu a langchhuak dawn tho tho. 

Ka mu zet tawh chu ka tho leh a, choka a ka phei min hmuh rual chuan, "Ka zo ţep" a lo ti var a, "Thartei nen hian in inbe ţhin em ni a? Message hi delete ţhen i nei em? In thlalak te a lo thawn a, in lo va inhnaih awm ve" vin lek lek hian ka ti a, "Zu kan in ho zeuh zeuh. Chu zawng chu" a ti sam then a, "Zu in ho zeuh zeuh, thla la dun reng, inbe zui reng bawk tihna mi?" ngeiawm zet a ka tih chuan, "Kan inngaizawng lo. A chiang em?" a ti fiah hrawk a, ka la duhkhawp chuang lo. 

"Sensiari te bula min hek nasat zia te, amah vanga hrehawm ka tih ţhin zia te hrevek chungin engtin nge i la biak theih a?" ka ti a, pasalte chu kan lam ţang nghet turah kan ngai a, a khawsak dan hi ka haw hluah hluah mai a ni. 

"Ka be ngai hran lo, chhiar nawn leh rawh" tih chiahin min chhang a, "A biak che chuan i chhang let ziah alawm" ka ti hram a, "Min sawm a, ka hnar ţhin. Thil dang a awm lo" a ti hmuk a, "Hmeichhe dang message pawh ka hmu ţeuh. I whatsapp hi ka scan dawn a nia, bum kual mai mai theihah min ngai miah suh" ka ti fak fak a, "I duh duhin ti rawh" a ti liam puat a, "Pi Khirh" min la ti zui. 

"In inhau em ni?" u Rinhluan a rawn tih chuan, "Hei tal hi lo puah ve teh" tih pahin Tintin-a chuan u Rinhlua lamah eng emaw hi a vawm phei a, a lo dawng chat a, a enchiang a, ar lu a ni tih a hriat chuan a au ţhat a, ka lamah a rawn vawm phei leh a, "I la hlau reng a ni maw?" tiin Tintin-a chu a nui hak hak a, u Rinhlua hlau hmel zawng zawng nen, thinrim hleihtheih pawh a ni leh tawh lo. 

Ar lu ka dah let hnuah kut ka sil a, Tintin-a ka melh pah vak lai chuan tawi tein, uang zetin lei a lo chhuah a, kan mutna lamah ka phei nghawng nghawng a, a phone bawk chu ka en leh a, a lo lerh a nih vaih chuan a nasa lo khawp ang. 

Mut pahin Kolasib lam ka ngaihtuah a, awm ila chu kan inhau leh luai luai tawh maithei a ni. Khum nuam deuhah mu ţhin mah ila rilru hrehawm deuhin kan mu a, tunah lem chhuatah mu mah ila thla a muang a, kan tan chuan khawvel thar a ni ringawt mai.

CONT...