BLACK AND WHITE-21

BLACK AND WHITE-21

"Ar lu kha i va hlau ve" u Rinhlua mu tur chu ka mutna aţangin ka lo nuih sang a, "Hlauh zawng a in ang lo" bul zet hian a ti a, tum burin pindanah a lut a, tlangval a pumpa ar lu han hlauh em em mai chu a mak ve hrim hrim, a thi tawh lehnghal, a nung chungin a vulh reng ngam tho si. 

"Vanram, engtin nge kan dah ang? Ka rawh leh dawn mi? Min rawn awmpui ve tal la" tiin a au lung lung reng a, ka hre lo der hmak. Hmeichhe dang chungchang ka zawh a sawi ţha duh ngai mang si lo, ka ngei riau a nia. 

"Vanram, i muhil tawh mi?" a rawn ti leh a, "Muhil lo...nangmah khan ti ve rawh. Zantin inah awm rawh ka tih pawh a min lensan ziah tu i nih kha. Mahnia ar puah mai mai a har lo lutuk" ka ti tlat a, "Chupawh nise ka hmuh phakah tal rawn ţhu rawh" thupe aw zet hian a ti leh a, ka ner nawk a, rizai chuan ka inkhuhţha sauh sauh a, mahni lo mah a nat ve nak laiin, amah hian engmah a ti thei hlawl lo.

"Thartei hi ka block dawn a nia" ka tih chuan, "Block rawh an vai khan block vek rawh" uar zet hian a ti a, a thinrim lo thung. Lo thinrim pawh nise a ti lang ngam kher lovang. 

"Block sawi chuan i ţeu hlar mai alawm" ka ti lui ve ngat a, na pawh a sawi theih loh, kan sawi chhuah lai a ni bawk a tiin ka mutna aţang chuan ka tho a, choka lamah bawk ka phei leh a, a lo insil fai diam tawh a, ar chu a la rawh lo thung. 

"I rilţam em?" a lo ti daih a, "Ţam ve tho e" ka ti liam satliah a, naupai lai ka ni bawk a, ei ka thei sawt viau. Midang hi an nih ve leh ve loh ka hre lem lo. Keichu ka ei duh ngai loh thleng thlengin ka ei a, mak ka inti zawk. Ka nu ka zawh lahin Pathian awmpuina i chan vang a nih kha a ti ringawt a, vawikhatmah ka zawt nawn leh tawh lo. 

"Thartei chu ka block tak tak dawn a nia" ka tih chuan, "Block la" chhuar aţanga eitur phawrh pah hian a ti a, "Thil awmdan i hre ve nual tawh a, amah vanga ka buai zia hrereng chunga i la be ţha thei hi alawm mak ka tih chu. Keimah vang tal hian hlat ve ta che" vin lek lekin ka ti a, sawichhuah takah chuan thin a rim leh hlur tawh.

"Ka be ţha kher lo" tih pahin eitur min pe a, dawhkan kil a ka ţhut rual chuan a rawn chhawp belh a, "Thingpui ka lum dawn em?" a ti zui zat a, ngaihtuah hmel taka min en lai chuan rum zetin ka lo en let a, a hawisawn rang nasa mai. 

"Be ţha kher lo la thlalak thlengin a thawn nang che" ka tih leh chuan, "I va ninawm e aw" a ti bul bul a, "I awm ang hian an pasal te awm ve se tu hmeichhia mah an lawm lovang" ka ti hmak a, "A nih chuan ei rawh ancheh nu" min ti a, a la nui deuh zui a, min nuihtlawn te mai mai chu hnehsawh tawh tak a ni. 

"Thartei berkher a ni hi ka hua. Inbe satliah pawh ni lo chaw eikhawm ang chuti khati a tia, thlalak thlengin a thawn thei che a, in inkarah eng nge lo awm hman a?" ka tih leh chuan, "Engmah" tih chiahin min chhang a, ka lo thaw hak a, a hming ringawt pawh ka haw vek tawh.

"Nupui nei chunga hmeichhe dang i la bia a nih chuan kei aiin i duh zawk tihna a ni mai. Inţhen i duh em ni a?" ka ti a, ka hmelma ve berin pawh deuh a a be thei hi ka palzam mai mai thei hlawl lo. 

"Duh ila chu kan zin lo ang. Hmeichhe dang leh inţhen ka duh lo ve ve. Sawi sek suh" tum bur hian a ti a, eitur pawh chu ei mai lovin a keng reng a, ka hmaah a ding ran bawk. 

"Inţhen i duh loh chuan be lo mai ta che" vin zetin ka lo ti leh a, a phone chu dawhkanah ka dah bur a, "Be lo e..nangmah bak ka duh lo. Chu chu hre tawp rawh. Thinchhe hlik hlek si" nuihza aw zet a tih pahin a rawn kun hniam a, chhan tum a ka an zuau lai chuan min rawn fawp a, a banrekah ka lo dawm vat a, min thlah mai dawn maw tih nak laiin min fawp uar zel a, keimah zawk ka inla hrang hmasa ta nge nge a. 

"I eitur kenlai kha min tat lo maw?" ti a zawh pahin ka bek a dawmna lai chu ka tuai a, engmah a kai lo.

"Ka kut lehlamin ka keng. I ril a ţam chuan ei vat vat rawh" a lo ti a, ngawi rengin ka ei ve mai bawk a, hmeichhia hi chu ho teah kan thinrim a, ţawngkam khat chauh pawhin min ti lungawi leh thei a, mahse tun ţum chu ka la duhkhawp lo, ka lung a awi lo ve em a ni. U Rinhlua chu awm lo se la ka hau nasa khawp ang. 

"Ka be tawh lo ang" amah bawk chuan a ti leh a, ka hmaa ţhut pahin min melh ralh a, a hawisawn nghal daih a, a inthlahrun ve hmel nasa. 

"Zu in pui ziah pawh a ngai lo. A hran ve vein in in thei. Aaa...nangpawh zu in a ţul tawh lo, sim hmak la a ţha a ni mai" kut vai chung meuh a ka tih chuan a lo nui hawk hawk a, "Chuan min ngaidam em?" a lo ti khauh a, ka thaw chhuak halh a, "Aw..tun chauh ka ngaidam ang che. I be leh a nih chuan hrilh lawk lo chein ka haw san ang che. Ka tlan dawn ka tihna a nih chu" chiang khel khawl a ka tih chuan a lo ner sawk a, "Naa..tuk tin kan tlan dawn nia, a tawk mai em? Exer la la a tawk viau a ni" a ti a, nur nanga ka en lai chuan nuihza insum tih hriat zet hian a hmui a liak zauh a, aw then kharh pahin a hawi sawn a, lungawi loh viau pawn a ho leh vek zel. 

"Ka uang lo a nia aw...i ngam chuan be leh rawh, ka thutak zia i hre mai ang" ka tih chuan, "I chau em? I ban te hi a na vek lo maw?" tih pahin min rawn ban a, ka bân chu a hmet vel a, "Phakar chhuah miah suh. I lo hre lo der leh vel ange, hmaichhanah ngei ka hrilh che a, ka sawi ang chuan ka awm bawk ang" ka ti kha kha a, "A mak...duhtawk tawh teh. Ka hria, ka hre vek. Nang aia duh ka nei lo. Ka ta i ni reng dawn, keipawh ka damchhung chuan i ta ka ni mai. Case hi khar tawh teh, a khamawm" a ti bul bul reng mai. 

"Nangmah zawng zawng hi ka ta vek i ni mai" nui sanga a tih chuan ka nur nang a, "Hmeichhe dang leh inţhen tih thumal inanna i hria em?" a tih leh chuan, "Hre nang..eng nge?" ka lo ti thuai a, "E le...ka duh lo ve ve" a ti a, a fiamthu ho lutuk ah chuan za deuhin amahin a nui hawk hawk a, "Hmeichhe dang leh zu in anna i hria em?" ka tih ve chuan, "Vanramin a haw ve ve" a lo ti a, "Hre lo der daih suh. I hnaih chuan ka ţhen dawn che. Chu chu an in anna a nih chu" ka ti ve ngat a, "Ka uite duat nen a in in anna i hria em?" a ti veleh a, lu ka thin rual chuan, "Tlan daih mah ula ka ko leh zel che u" ti fuh inti zet hian a ti a. 

"Chhimbuk leh in nupa in anna in hria em?" pindan aţangin u Rinhluan a rawn ti ve a, beisei loh deuh a thawm a rawn nei chu kan nupain kan in en ha a, "Zanah in meng kur. Bengchheng reng lo khan mu rawh u" a rawn ti leh a, "Kan zawt che mi?" fiamthu a Tintin-an a tih chuan, "Mu rawh u ka beng a kham" a ti a, a ri lo hian Tintin-a chu a nui a, rin aiin a phun chiar zek a, mahnia a awm ţhan vang aniang, sana ka en a, dar10 a lo pel duai tawh a, "A tlai tawh a nih hi" zawi tein ka ti a, puar na tham lawih ka ei leh te te hnuah ka pasal chu ka mut san a, a hna a la zo lo miau a, a zawh hun hunah lo mu ve mai teh se. 

Chhuat ri rengin min ti harh a, pen thawm a ni. Ka meng duh lo lui ngial a, a kal kual reng avang chuan ka tho ta nge nge a, Tintin-a erawh a la muttui khawp mai. 

"Ka ti harh che mi?" u Rinhluan a tih lai chuan Tintin- bawk ka en leh a, "Kha kha chu hnek chawrh mah la a harh lo ang" a lo ti leh a, "Ka inphih fai anga rawng ka lo bawl ang" tih leh thawh chhuah ka rual a, ka zi mar al al a, ka taksa chu nimin lam ai mahin a na emaw tih tur a ni, ka bawp pawh a rawl ţhum mai. 

"Bai chu siam a ngai lo ang, nu Duhi te khan kan lo suah ang che u an tia, sa ka siam anga a tawk mai" tlangnel deuh hian ka ti a, ka la nel lutuk lo nain u Mala leh u Mama angin ka hlau lem lo a, ka ti lui thei zel. 

"I duh duh siam rawh" a lo ti mai a, chaw ei dawhkan kilin a ţhu a, purun nen a hmazawnah ka ţhu ve a, "Thingpui ka chhuang a, kan in dawn a nia" ka tih chuan, "Ka in tawh a, ka lo in leh ange" a ti kher a, min ţawng el chuang miah lo nain nuam lo duh tak a ni. Dar7 a pel fel der tawh lehnghal. 

Thingpui ka pek hnuah pawh kan la ngawi dun reng a, "A cheina tur an dah hi duh angin a mawi lo ţhin a" a ti ban charh a, phone ngawt a en avangin game a khel a nih ka ring. 

"Eng game nge i khelh a?" biak tlangnel tuma ka tih leh chuan, "Homescape" a lo ti a, ka tho uaih a, a game khelh lai chu ka enchiang ngat a, inchhung a lo chei nasa mai. Khum dah tur ber a lo thlang kual a, "Duhthusam a nalh a awm lo ţhin a" a ti chu insum zo lovin ka nui chhuak a, a rawn hawi chhuak ve nghal a, pawisawi lo hmel zetin min la en zui. 

"Mipa khelh chi deuh i khel turah ka lo ngai a" ka tih chuan a nui tawi tak a, "Ţhenawm nula in min kawhhmuh a, rin aiin a lo nuam a" a ti a, a zah hmel khawp mai. 

"Nuam ang...game ho deuh a lang si addictive deuh hi a awm ve alawm" ka ti ta vel mai mai a, phone chu dawhkanah a dah a, a khel chhunzawm duh ţhak lo. 

U Rinhlua chhuah hlanin Sensiarin min lo call a, ka lak rual chuan, "A nuam em?" a rawn ti nghal a, a nawm thu ka lo hrilh vat a, "Ih maw, ka nu te ho thlan a an kal hlanin Thartei a lokal a, u Dini nen chiah kan awm sia, ka awm ve tih a hre lo aniang, 'tu emaw awm lo chu nuam i ti em?' a ti lang lang a, choka aţangin ka hre pha vek sia. A ngawi zui daih a, an thusawi engmah ka hre lo zui a, a ho viau nain ka rawn hrilh ve mai mai che. Thartei leh u Dini hian thil tam deuh an sawi dun ţhin ang. Thartei bul ţan vek a nih ka ring. U Dini rilru a hruai kawi a, pakhat lahin ka nu a fuihpawrh veleh chhawng a" a ti a, thawm dang hriat tur a awm lo nain a ţawng zawi sar sar khawp mai. 

"Ka nu te chu thlanah an va kal hma ve" ka lo ti daih thung a, "Nia..ka ni a haw dawn a, tukţhuan ei hmain kal lawk ang an ti a nih kha. U Dini pawh hi ka la sawipui tho ang ka tia, ka nu fuih ru reng lo tur tein ka hrilh ang a, a nih loh chuan inchhung boruak a hahthlak reng dawn a, a ninawm zo zai tawh emai. Hetiang teh nuaih hian kan la awm ngai lo. A ti lui zel a nih chuan u Mala ka hrilh tawh mai ang. An nu hi a duat viau nain a dik lohna a hriat chian chuan a ţan ngai lo. Nangni chu ti khan lengkual vel mai mai rih ula, in lo haw hunah chuan boruak a danglam deuh tawh ang" a ti zung zung a, ţhianţha neih hi chu a thlamuanthlak ţhin a nia. 

"Mi hlimna hmu thei miah lo ho hi chu an mak ngawt alawm. Ţhian leh ţhian inkarah ngat phei chuan mak ka ti lehzual. Ţhiante an hlim poh leh kan hlim a ni ngai a, Thartei hi chuan ka hlimin hrehawm a ti daih a, min tihchhiat dan a zawng ran a, chhungkua thlengin a luh chilh duh tawh a nih hi. Amah bawk hian hrehawm a la ti dawn alawm" ka ar sa kan chawh rak rak pah hian ka ti a, a zakthei lo lutuk te chu mak ka ti zawk. Tunhmain hetiang em em a ni ngai lo. 

"Aw..chutiang vel chu. Keichu ka ning tawh. Boruak pawh a zia ve mai ang ka tia ka dawh a, ngawih ka chuh hram hram a, a so sang zel si a, ka insum peih tawh lo. An vaiin ka zawt chhuak vek ang. Ka nu pawh ka zawt dawn tho. Keimaha ka ti fel thei lo a nih chuan mipa ho ka pun ang a, a nih loh chuan kan inhaw ţham reng hlawm mai ang" a tih chuan ka lo pawm pui thlap a, "U Rinhlua chu a lo fel em? A be ve che maw?" nui chung hian a rawn ti leh a. 

"Aw...fel e, nizanah ar kan talh a, hei ka siam mek. Ar lu lah chu a hlau nasa mai, min vawm nan a hmang alawm" ka ti a, kan nui dun hak hak a. 

"Hlauh zawng hi a inang lo thei a nia. A lu ai mahin a ke a hlau a, ar hi a hlau hranpa pawh a ni lo, kan han talh chiah hian a lu leh a ke a hlau tlat a, ka nu'n a naupanlai aţangin a ni tawh a ti. A lo duat thiam che u chuan a ţhat chu. In duh chen chen cham ula, in lo haw chuan boruak a zia tawh ang ka tih kha, nangphei chu rilru hah thei pawh i ni lo a, i hriselna in a tawrh loh nan ka tih theih ang ang ka lo ti ve ang" a ti dap dap a, ka awm a nuan huai a, ka rit phurh ţhenkhat a kiam ta ah ka ngai. 

Nu Duhi a lo luh avangin kan inbiakna chu kan ti tawp a, bowl a lo chawi a, a khu vang vang a, a la sa viau a nih hmel. 

"Min lo suah tak tak pawh ka ring lo a, i va ti lawmawm tak" ka ti mawi ve a, dawhkana bowl hun pah chuan, "Ruak lo law law mai rawh. Ti hian ei ula, nakinah ka lo lam leh mai ang" a ti a, a hawikual thuak hnuah, "Khaw nge midang?" a ti leh a, "Saw a mut hnur saw" tih pahin Tintin-a mutna lam chu ka kawk a, "Awii ka lo hmu reng reng hleinem. Keini pawh nizan kan meng rei deuh a, thawh kan hai a, ka va phei phawt ange. Tukţhuan kan ei vat loh chuan keini chhung chu kan buai chhe der a ni mai" a ti a, a kal tur chu lawmthu ka hrilh nawn leh a, a bai min rawn suah chu ka hnim a, a rimtuiin ril a ti ţam nghal raih raih mai. 

Tukţhuan kan eikham hnuah kan intifai a, kalna tur bik em em pawh nei lovin kan nupa chuan kan chhuak ve thawr a, "Kha khawi lamah nge in kal dawn?" ti a lo au lang lang chu kan en vat a, nu Piangi a lo ni. Batharah buh a lo ţhap a, a lu a tuam hlun bawk a, min lo nuih sang mai. 

"Kan han kal kual vel mai mai ang e" ka tih chuan, "Ni a sa awm e..tlai daiah chhuak chauh ta che u. Tun a in chhuah chuan in chau lutuk ang" a ti tak nain, "Tunah kan en thuak ang a, tlai daiah kan kal leh anga" ka ti tlat a, ka enkual chak miau alawm.

"I lerh dawn tlat a dik lo" min nuih pah hian Tintin-an a lo ti a, nu Piangi pawh a nuih a lo za ve hle. 

"Nangpawh tlai daiah buh ţhap chauh ta che" fiamthu a ka tih chuan a nui hak hak a, u Rinhlua awmna khua chu a nuamin ţhenawm pawh a nei fel a, sawi tawh ang khan theih se chu ka awm hlen daih duh ang. 

"Ka chau der...ka rawl lutuk a thui pawh ka kal thei lo" tih pahin kawng sir a ţhutna tur an siamah chuan ka ţhu a, thlifimin min chhem dai nghal sang sang a, a reh viau nain hah a dam viau thung. 

"Tlai daiah a nuam ang. Kan kal leh dawn nia" a ti a, min si chetin ka bulah a lo ţhu a, "I biang pawh a sen leh hlar tawh a nih kha" nui vur vur chungin min rawn thlek a, "Kal teh" ka tih hlak rual chuan ka kut a vuan a, a hum zui vang vang a, "Engkim hi Thartei vanga dik lo vek a nia" tih pahin a darah lu ka nghat a, "Ka phone a lo khawih a, time a set danglam a, ka thawn ang deuhin message a inthawn a, chu chu u Dini te a hmuh aniang, ka finfiah thlap lo nain ka sawi ang hi a nih ngei ka ring. Thil dang puh tur ka hre lo, ka nu pawh, u Dini pawh, tunhma zawngin ka chungah an sual ngai lo. Thartei hian ka hlim ve a phal hlawl lo a, chuvang chuan min tih chhiat dan leh ka hrehawmna tur a zawng char char a" ka ti sep sep a, ka kut hum reng chung chuan a kut lehlamin min kuah a, "Tihpalh aw" a ti zawi ruih a, amah en tumin ka thlek a, a hmel chu a thutakin ngaihdam min dil mai mai lo tih a hriat a, Thartei te nen zu an lo in ho vel ţhin chu a inthiam lo ve tak tak a nih hmel. 

"Huat let ve ka duh lo a, amah vanga Sensiari ten min biak duh loh reng hnuah pawh ka la be hram hram a, inneih ni te khan a lokal loh hlauin kan buai a, hrehawm a tih kan hlau tel bawk a, kan ţhian ho kan kim lo mai anga kan ti a a lokal ve theih dan tur kan zawng a, kan inţhianţhatna hian ngai a awh leh theih nan theihtawp kan chhuah. Thil thleng tawh chu kan hre lo der anga tih thlengin kan sawi. Mahse, ţhatna a hneh theih loh mihring hi an lo awm ve tak tak a nih ka ring hmak tawh. Ţhat kan chhuah a, sual bawkin kan ţhatna a rul let a, naupangchhia viau mah se mihring ve tho ka ni a, tunah chuan huat loh duh viau mah ila ka haw lo thei tawh lo. Min ti chhe hneh em a, amah vangin rilru hah reng rengin hun ka hmang a, ani aia huat ka nei a nih pawhin an tam lo ngawt ang" ka ti sap sap a, ka sawi zawh rual chuan ka chhipah a fawp zauh a, ka mit ka chhing ta daih a. 

"Ka hmu tawh lo ang. Ka be tawh lo bawk ang" a ti a, ani pawh a ţawng ring hran lo, nuam lo a tih zia hre turin amah ka en kher a ngai tawh lova, "Ka ti tak tak" a tih leh hnua ka kut a fawh vang vang lai chuan tawitein ka nui a, a ti tak tak tih ka hria a ni. 

"Ka bulah awm reng rawh aw..ka ta ni reng rawh ka tihna a nih chu" min kuah ngheh salh paha a tih chuan, "Min hmangaih chhung chuan i ta ka ni reng ang" ka tih zet tawh hnuah, "Hmangaihna hian ken tel a ngah tih hre tel la" ban charhin ka ti leh a, thawk a la hawk a, "Ka hria" a ti hap a, ka duh zawng leh duh loh zawng hrilh nawn a ngai tawh lo, a hrechiang lutuk tlat. 

"Inţhen pawh ni ila awm thei lo zawk tur i nih kha" ka tih leh chuan, "Ka ngaituah ngai lo. Inţhen ta ila engtin nge i awm ang? Hetiang zawhna hi min zawt la chuan ka hre lo tih bak chhanna ka nei lo. Kan inneih hnuah ngat phei chuan i tello a awm tur angin ka la indah chhin ngai lo" a ti ve duah a, ka nuih a za angreng. 

"Kan inţhen thei lo ang" a tih leh chuan, "Min hmangaih phawt chuan thihna bakin min ţhen lovang" ka lo ti ve a, "Sawi tawh suh" a ti hluk a, ka pi vang hian thihna hi a haw lehzual a, ţawngthuchhelo ah amah ai hian lo thi hmasa ta ila, mitthi ang chiah a ni ve ang. Chutiang vel chu a ni, ka tello a a awm theih loh zia chu keimah ngei hian ka hrechuang a, chuvanga inţhen ngam viau anga awm pawh ka ni. 

Kan chawlhna hmunah chuan awm rei lovin kan haw leh thuai a, in kan thlen meuh chuan ka chau tawh khawp mai. 

"Khaw nge Rinhlua hi a awm a?" min zawt pawh ni chuang lova a phun sup hnuah "Tlangval Rinhlu" a ti lauh a, pindan a en a, a awm lo aniang tukverhah a dak chhuak a, "Tlangval Rinhlu" ring zet hian a ti leh a, "Khawiah nge maw a kal ve ni?" tih pahin ka lamah a rawn inher a, ka nuam lo hmel a hmuh chuan min pan hnai vat a, "Lo kal rawh..khumah sawn va mu la i peih leh tlaiah ka chhuah pui leh ang che" tih leh min kaihthawh a rual a, hreh viau mah ila u Rinhlua khumah min muttir a, min veng ni awm takin ka bulah a ţhu ve run bawk. 

"Ka dul hi a puar luah hunah chuan ka kal ţuang ţuang ang a, min iai mai lo ang maw?" fiamthu a tih pahin a ban chu a khawih zauh a, min rawn enin a ner suk a, "Iai lo e..danglam hlawk mah la Vanrami i nih chhung chu ka ta alawm i nih" a lo ti ve zat a, ka bulah a rawn mu ve a, ka dul chu lungawi hmel deuh hian a chul a, "Hei pawh hi ka ta tho a nih hi...ka fanu, tuman an ti na ngai lovang" nghet charha a tih chuan, "Fanu i ti ringawt a, i hrethei em ni?" ka lo ti a, "Hria e...ka fanu a nih hi" a ti a, a mut dan chu siam remin ka kawr a hlim a, ka dulah chuan a fawp vang vang a. 

"Ţhang vat vat la, lo piang vat rawh aw..anu hian min hau reng a, ka tlawn reng mai" a tih chuan ka lo nui hak a, "Tintin, i fanu hian engtin nge i chanchin sawi se i duh? Apa chu a rui ţhin a ti se i duh angem?" ka lo ti a, "Apa chu min veng tu a ni, tumah a hlau lo, min vel tu apiang a vel ve ang ti se ka duh" tiin fiamthuin min lo chhang let a, a ti duh tak tak tho maithei a ni. 

"In pahnih hian ka khawvel in nih hi" a ti a, ka dul fawh leh pah chuan ka awm lamah a kutin a rawn zen chho a, "Kalsan teh...u Rinhlua a lo haw ang" tih pahin ka nam a, awmzia a awm lo kher mai. A hmui chuan ka dul chu a nul kual a, ka awm bawr a khawih pah reng a, ka thawk pawh a rang ve nghal mai. 

Nuam ti ve tho mah ila, "Duh tawk teh" ka la ti tho a, sawi lo ang chiah ka ni, ka hmuiah duhthaw zetin a rawn fawp a, ka taksa chu a chul kual ruai reng a, min fawhna ka chhan let rual chuan rawp zetin min fawp zui a, thil thleng zel chu sawizui chi ni pawhin ka hre lo.

U Rinhlua a lo haw chuan ka inbual zo chiah a, lu ka tuam bur a, ngunthluk fe a min en chuan ka ngaih a ţha lo hman a, a hawisawn rualin a nghawng a kawk zauh a, ka nghawng chu ka khawih ve thuai a, min en tawh miah lo chung hian, "A dam mai ang" a ti a, sawi tur a hre hlawl lo aniang pindanah a lut nghal daih a, ka nghawng a sen a ni chiang mai, na deuhin fawp suh ka ti mawlh mawlh a, Laltinkhuma vang vek a ni. U Rinhlua reng reng pawh chu hmuh loh der ve mai tur a nia, a hmuh pawn ngawi mai se la, ka zak zo vek tawh. 

Pindana ka luh chuan Tintin-a nen an lo ţhu dun a, keipawh ka fimkhur lo, bathrobe chiah ka ha a, ka taksa a khuh bo hneh viau thung. Thawmhnaw kan dah miau avangin, "Ka'n inthlak lawk ange" inthlahrung deuh hian ka ti a, u Rinhlua chu a tho tharh a, rang zet hian a chhuak a, ani pawh a che lai zo vek tawhin ka hria. Min ngaizawng hauh lo nain ka inbual zo min hmu thut a, ka nghawng a lo sen bawk nen, thil hrethiam rual a ni tawh chung pawhin ani ang mi lerh lo lutuk chu a che buai nghal der mai. Bialnu chu nei se a zei hrut hrut viau tho maithei, mipa hi chu an mak em a, zei lo deuh tura kan ngaih te hi an lo zei zek zel. 

Inthlak pahin Tintin-a chu ka hau mawlh mawlh a, min ning deuh aniang towel a la a, min chhuahsan ve daih a, keimahin ka phun hlak hlak reng a, nu Duhi bai lah kha ka kham lo, ka ei leh chak a, ka dil ngam tawh bawk si lo, ngaihtuah zawng ringawt pawhin pum a ri raih raih thei alawm. 

"U Rinhlu, nu Duhi hian bai min suah leh angem le?" anţam then pahin ka ti ta nge nge a, Tintin-an kan leng leh dawn nia a ti tak nain vawiin atan chuan ka peih tawh ţhak lo. 

"Tukinah min suah kha..i eizo em ni?" a lo tih chuan, "Chhunah khan ka ei zo daih" tim daiin ka ti a, "Ka dil ngam tawh hleinem" a ti hmuk a, Tintina chu ka en ve thung a, min la hmu lo der zui. 

"A siam dan tal va zawt teh. A tui em a, kan haw leh hunah pawh kan siam ve duh ang" ka tih chuan, "Ka dil ngam bik lo" a lo ti a, "Aww..dil rawh ka ti hleinem. A siamna tur kan nei ve tho a, siam dan va zawt rawh ka ti mai alawm" ngenngawl zet hian ka ti a, ka duhzawng hi chu duh ve kuang kuang thei tak mai ka nia, haw mah ila rilruah a awm reng tho ang. 

"In haw dawnah kan zawt dawn nia" u Rinhlua zawkin a lo ti a, tun a ei chak haw dawn a zawh chauh te chu a. 

"Hetah pawh kan siam ve ang chu. Thlai i ngah a, ka nu'n a hawn tir ţeuh che a, siam vat loh chuan a chhe mai ang" ka tih chuan nui miah lo hian, "I vir" min ti pek a, ka en hau a, a inthiam lo leh si aniang, "I rawp ka tihna" a lo ti leh a, an unau chuan an in en a, an hmel a nuihzatna langchhuak chu ka lo hmuh hmaih bik lo, "In ei ve duh lo mi? Bai tello chuan chaw ei a har a sin" ka ti leh a, an in mitmei a, Tintin-a zawk chu a ding hluai a. 

"Nupuite berin an eichak miau chuan zah a sawi theih loh a nih hi" tih deuh hluai pahin a chhuak a, u Rinhlua nen chiaha kan awm chu sawi tur a vang khawp mai.

"A hrehawm zual a reh a i rawp huam a nih kha. Chu chu an sawi ţhin dan a nia" tiin amah zawk chuan min be hmasa a, "Ka hre bik lo le..mahse bai tui hi ka ei khat a, tukin a nu Duhi min lo suah kha bai ka ei tawhah chuan a la tui ber ang. A siam dan ka hre ve chak a" ka ti niah niah a, "Hmar bai chu tui deuh a nia" nui suk chungin a lo ti a, an va inzawt chhuak thei ngut ange maw? Nu Duhi chuan a lo hrilh mai ang a, Tintin-a zawkin a hriat sen loh ka hlau a ni. A ngaithla uluk vak dawn lo tih chu hriat sa a nia, tlem a zawng a hriat pawn a ţha hrim hrim. 

Nu Duhi nen an rawn inzui lut a, Tintin-a chuan dekchi a chawi a, "Hei, nu Duhin an bai zawng zawng a pe vek che" phur fahran hian a ti a, hnar a lian duh ngei mai. 

"Nau i pai a, ka lo hre lo alawm. Naupai rawp hi chu a hrehawm a sin. Ei chak kan neih leh kan chak huam huam a, ka hrethiam che alawm. A vaiin la phei mai rawh ka ti a nih kha, a siam dan pawh ka hrilh tho ang che, rawng ka bawl zo tawh alawm" a ti dam thlap a, dekchi chu ka ruak sawk sawk a, "A ngai lo" a ti tak nain ka silfai sak leh thlap a, Tintin-a leh u Rinhlua te naupang an inkhelhpui laiin keini'n rawng kan lo bawl a, nu Duhi chu a felin a ti ti siam siam reng a, bai tui dan te min hrilh a, ka nu bula awm ang mai ka ni. 

"Ka khup ruh a na reng a, feh thei chi ka ni tawh lo a, ka fate pahnihin hna an nei tawh tho bawk a awm mai mai turin min hrilh ţhin a, mahse nu tan chuan awm mai mai a lo har a, tih tur a awm loh chuan a hrehawm mah zawk a, in bul hnaiah chuktuah huan ka siam ve a, naktukah i lo en dawn nia" a ti siam siam a, "Tehreng mai" ka lo ti var a, fiamthu te a thawh a, pahnih chauh mah ni ila kan nui uar uar reng a, a phawk bawk si, inleng an ngah thei viau ang.

Tintin-a te lo haw chu thingpui an duh leh duh loh ka lo zawt vat a, "A lum emai" an ti a, tui vawt an in a, an thlan hluam a, an tlan nasa viau a ni phawt ang. 

Nu Duhin min haw san hnuah chawhmeh ka chhuang lum a, vil paha gas bula ka ding chu, "I va siam tui hmel ve" tih pahin hnunglam aţangin min rawn kuah a, u Rinhlua inbual pawh a inleih ri phur phur mai. 

"Tui vak lo ang in ei peih lo maithei a ni" uang zet a ka tih chuan a nui hawk a, "I siam a nih chuan a tui vek ang" a ti a, "Nichin khan i inbual ting tang a i thlan leh tho si. A zawnin vawihnih i inbual dawn tihna a ni mai" thlek deuh chunga ka tih chuan a rawn kun hniam a, ka darah a khabe nghatin, "Nichinah pawh ka thlan tho alawm" awmze nei zet hian a ti a, hmalam ka hawi hmak rual chuan nui chung hian ka nghawng a fawp zauh a, "Ka nu Chhuangi naktukah a haw ang a, ka nu Maremi a cham thung dawn a nih chu. Karleh lama haw a tum aniang" a ti a, chutiang chen chen ka chawl thei lo hrim hrim. 

"Chawlh ka nei rei lo a, nuam viau mah se ka cham reng thei lo" ka ti a, min hrethiam khawp mai. 

Zanriah eikhama Thartein min lo biak chuan phone ka chhuah pui a, bathlar êng laiah ka ding a, a rui bual a, a ţawng pawh hriat a har hle. 

"Inpa phone i khawih a min block vel a" a ti a, hmeichhe pakhat a ţawng lang lang reng a, phone a hmang ve tho a nih hmel. 

"Nupa inkar thil a ni a, ka block chhan che i hrethiam pha kher lo ang" ka tih chuan, "Inpa nen khan kan inzui nasa. An zingah ka tel ve a, chaw eikhawm leh picnic an tih apiangin ka tel ve ziah" zam lo zet a a tih chuan, "Ka hria alawm. Ka zawt a, a sawi vek a, inţhen thlengin ka sawi. A duh lo a, ngaihdam min dil a, keipawn ka ngaidam. A thleng nawn tawh dawn lova, ani pawn a rawn be tawh lo ang che. Nangpawh khan lo be tawh lo la, tawp tawh rawh se" tiin ţha deuhin ka hrilh a, ka hau buan buan lo chu mak ka inti zawk.

"Tuar ber angin i awm a ni maw? Min ngaihtuah ve miah lo a nih hi. Sensiari leh Zuali pawh an ni tho, ka na ve a, mahse tuman in hmu thei lo" a ti a, a insut hraih a, a rui lungpuam ţap a ni ngei ngei ang. 

"Kan hmu alawm...mahse ka pasal a ni a, ngaihzawng anga i lo en ve a rem lo. Tintin-a pawh ka hrilh a, a be tawh dawn lo che. Chaw ei khawm naah pawh a lokal ve tawh lo ang. A intiam vek tawh a, ti hian engkim a tawp a ni mai. Nangpawh khan pawm thiam tum la, i ta tur chu nise tunah hian a nupui i ni zawk ang a, in awm dun ngei ang. Pathian hian kan tan a ruat a nei vek a, nangpawn ţha deuh i la nei mai ang. Mi pasal a ni lo, i ţhiannu pasal a nih hi. Lo biak tum tawh lo la kan ţha tlang a ni mai" ka tih chuan, "Vani, i hre viau ang aw. I inchhir khawp ang. Ka rilru zawng zawng hre vek chungin i nei a, i inchhir dawn alawm" a ti a, biak tlak ni a ka ngaih loh avangin phone ka dah a, nakinah a harh fim hunah ka la be leh tho ang. 

Mut tum a kan intin tuah laiin Thartei hnen aţang bawkin call ka dawng a, Tintin-a pawh choka ah a la ri rak rak reng mai. Pawn a ka chhuah leh chuan min rinhlelh ka hlau si a, awki nem vak lo hian "Hello" ka ti a, Tintin-a chu ka melh zawk a, min ngaihven lem lo. 

"Thartei hi intihhlum a tum a, ka lo be tawp che. Engmah pawh a hre tawh lo" ka aw hriat ngai pawh ni loin a rawn tih chuan ka ţhu ngil awt a, ka bedsheet ken lai chu ka hum ngawt ngawt a, "Eng nge awmzia?" ka ti chhuak thei hram a, ka tawt nghal vek miau a ni. 

"Ka hre bik nang...zan a mu thei ngai lo a, mutthilhna damdawi ang kha tam deuh a ei alawm. A chhungte an awm bawk si lo" mangan hmel zet hian a rawn ti a, ka ding hluai a, "Engtin nge kan tih ang. Awii...nichin khan kan inhau deuh a, khavang kha a ni angem?" ka ti chul a, Thartei luhlul zia ka hria a, a ruih lai, a rilru a fim loh lai phei chuan a ti duh ngei ngei ang, hrehawm deuh a ka awm a duh ber alawm. 

"Engtin nge in in hauh a? Engmah a sawi hleinem..damdawi a ei ţeuh a, hei a kawr ruak pawh a awm alawm. Ka kaitho thei lo a nia" a rawn tih leh chuan ka buai vek tawh. Ka lo la ngaihpawimawh zia leh ţhian anga ka la en zia ka inhrechhuak a, ka hlauthawng chu ka thinphu a rang a, ka chiai vek a ni ber.

"Ka hlauthawng emai damdawiin a kalpui dan ngaihtuah rawh. Awii...ka tihpalh lutuk aw engtin nge kan tih ang" ţap pur chunga ka tih lai chuan Tintin-an min rawn pan hnai a, "Ngati nge? Ngati nge?" tih mawlh mawlh pahin min kuah a, "Thartei" ka ti leh ţhin a, thil dang ka sawi thei lo. Ţhutthlengah min ţhuttir a, ka buai zawh vek tawh avang chuan Sensiari a be ta ringawt a. 

CONT...