BLACK AND WHITE-8

BLACK AND WHITE-8

"I dam deuh tawh thoin ka hria a Vani chungchang hi sawipui che ka duh a, tun hma ang em khan i bei nasa tawh lo bawk a, i ngaithla thei ang tiraw? A ţhawng dawn che a nia" ka u ţawng mawlh mawlh chu kan lo en ţhap a, kan naute, a te pahnih tih loh chu kan kim ţhap a, a rukin ka kut ka hum ngawt ngawt reng mai. 

"Eng thil nge ni a?" ka nu chuan a ti ban charh a, a awki ah chuan zamna a tel a, min rawn melh ralh rual chuan chil ka lem khalh a, chipchiar taka keimah ngeiin ka hrilh fiah a ngai dawn a ni. 

"Nu, engtin mah awm suh aw...Vani Aizawl a a awm lai khan ka putean a pawngsual ţhin a" ka nu dawm ran chunga ka u'n a tih chuan ka pahrawn zawkin, "Engmaw i sawi?" a lo ti vut a, ka nu erawh chu a ding nghal hluai mai. 

"I putean eng thil maw a tih?" keimah zawk min en chung hian a ti a, zam ru tak chungin ka tep chap a, ţawng pawh ka ţawng chhuah hmain, "Sawi ta che mawle" vin zet a tih pahin ka nu chuan min pan hnai a, ka samah a ţham nghal chawt a nih chu mawle!

"Thlah rawh..kan sawi hi a tak tak alawm. Inbengdai rawh, a dam zawnga i lak loh chuan nangmah bawkin i tuar leh dawn a nia, insum hram hram rawh" tih hlawp hlawp pahin ka u chuan ka nu bawk chu a rawn dawm leh a, awmzia a awm lo nasa mai. 

"Lokal teh, i thil tum hi hre lo turah min ngai em ni a? I putean i hriat laia i bialpa a sawisel avangin heta a lo awm ve tur i duh lo a nih kha. Kal rawh..i hmel hmuh pawh ka peih lo" tih chiam chiam pahin ka nu chuan ka ţhutna aţangin min hnuk thla a, ka lu a na ut ut tawh a, duh ila chu tharum ah chuan ka hneh lutuk tlat mah se ka nu a nihna hian min dal a ni. 

Chhuatah ka ţhu hnawk a, ka ţah khat tehreng nen tun ţum zet chu ka mittui ka dang thei bik lo. Pawngsual tuar tu zawk heti hian ka nu ngeiin kut min thlak chu a nia!

"Engati nge i la ţhut reng? I pa lah i mil lo, i putea, Aizawl i awm chhung zawnga tuam hlawm tu che i ngaithei lo leh a, sawi teh, tu nge hetianga ti tura hrilh che?" vin zet a tih leh pahin min kek dak a, ka hmaiah a beng sawk mai. 

"Duh tawk rawh ka tih kha nu" ka u in a lo tih ve lahin, "Lo inrawlh suh" a ti chhum hmak a, ka duh lo chunga ka pindan a min hnuh luh dan te chu sawichhuah dan ka thiam lo, ka mang vek a, sawi chhawn tur hre lo khawpin ka awm a ni ber. 

Khum a ka ţhut hnawk rual chuan ka hmaah a ding a, a thinrim lutuk chu a awm a insep dawrh dawrh a, a thaw a hah mai hlauin ka lo ţang ţeuh thei hial a ni. 

"I putea heta a lo awm loh dan zawngin dawt i sawi kual vel amaw? I u thleng thlengin dawt i hrilh tihna em ni? Tunge hetiang hian ti rawh ti che?" a ti hlak hlak a, "A mak e...i insum loh chuan nangmah bawkin i tuar dawn ka tih kha. Vani hian dawt a sawi lo, kut pawh thlak tawh suh. Kut i thawh duh a nih rau rau chuan ka putea lokal hun nghak rawh" ka u in a tih lai chuan insut hraih pahin ka biang huh hlap chu ka tuai fai a, ka thinrim leh rilru na lutuk chu ka sa pup pup mai. 

"Tu hnenah mah dawt ka sawi lo. Ka putea aiin i fanu ngei i ring lo zawk a, hetiang hi a ni dawn tih ka hre lawk vek alawm. Ka putea ngei pawhin, 'A natna a chhuak ang a, thawhah a a thih nghal loh leh a rin loh lutuk avang chein a hnawtchhuak duh hial ang che' tih zawngin min sawi ţhaih fo alawm" ka ti tham ţiak a, ka nu'n min rawn hnaih leh a tum lai chuan ka ding uaih a, ka u leh ka pahrawn ten an lo dang bet vat a, ka hmaah Mary a ding thung. 

"I damloh a hlauh vang liau liau a sawi lo a nih hmel a, a ngaihtuah vang che a nih chu. Au Mami kutthlak thei khawpa i taksa a chak a nih rau rau chuan a sawi duh chu sawi zawh tir vek rawh. Kei takngial pawn ka putean a endan dik loh zia ka hmu thiam a, nang phei chuan i hmu chiang lehzual zawk turah ka ngai a sin le. Au Mami hi sawichhuah tir ka tum nasa a, ka putea pawh ka fak lui ziah, chuti chung chuan a zep tlat a, a sawi duh lai hian sawi tir vek rawh" ka nauin a tih chuan mak tak maiin an ngawi ţhap a, keipawh ka bang bik lo. Engmah a hrethiam lo emaw ka ti ţhin a, ka putea te hnen a awm a duh thu a sawi te khan pawi ka ti viau a nih kha, min lo rinhlelh vangin lem a lo chang mai mai a, ka nau ât loh zia ka sawi vek tawh, thil mak a ni lo. 

"Ka putea hi i ngaih anga mi fel a ni lo" ka nu mitmeng ling hlar mai chu ngam leh ngam lovin ka melh a, tukverh bulah ka pahrawnin a dawm bet a, min huat zia a hmelah a lang chhuak thei hial a ni. 

"Ka pite bula reilote ka awm hnuah min rawn hruai a, a tirah kha chuan an fel lutuk. Ka awm rei a, ka putea min en dan kha a danglam tial tial a, min si chet a din tlat te, ţul lo deuh a ka ban chul thuak te a hrat a, min biak apiangin midang hmuh ve si loh hian ka hnungzang a chul kher zel bawk a, a chet dan khan ka awm ti nuam lo viau mah se nangmahni ang bawk hian rilru sual a put ka ring bik lo a, amah ka rin em avangin ngaihţhat lohna em em ka nei ngai lo. Mahse, ka pi Liani te nufa an khaw lama an zin ţum khan engkim a danglam ta vek a, ka putea nen chauh kan awm a, inchhung a reh ruih a, a khawharthlak deuh avang leh ka awm a nawm loh deuh avangin chaw ei khamah ka mu daih nghe nghe. Ka muhil dawn siar siar tihah ka putea a lo lut a, ka eng nge na min zawt a, ka lu na a reh theih loh thu ka hrilh hnuah min chhuahsan leh a, pindan kawngka kalh tum a ka thawh rualin damdawi leh tui nen a lo lut a, 'Naktuk class kal ngei ngei i ngai si a, damlo thei i ni lo. Damdawi hi ei la muhil rawh' a tih te khan lo ei malek ila ţha tur. Nachhawkna pangngai aia a te te kha rinhlelhna engmah ka nei lova, a chhan pawh ka putea kha ka rin em vang a ni. Ani lah chuan nachhawkna awzawng min lo pe lo, tum nei sa ranin ka pi Liani damdawi ei ţhin, mut duhna kan tih mai, ruih theih chi kha min lo pe a, kei lah kha engin nge min mawlh ka hre lo, ka vanduaina tur ai te pawh aniang, kawngkhar kalh tum a tho si kha ka putea chhuah hnu lawkah ngaihţha deuhin ka mu leh mai a, ka muhil har lo kher mai" ka sawi zawm thei tawh lo chu ka chawl a, inpet ruh tlat chung hian ka nu bawk chu ka melh ran a, a hmel a la danglam chuang lo. Ka u erawh chu a hma ang bawkin a mittui a lo tla leh tawh a, ka mi rin em em ka putea ngeiin mutthilh theihna damdawi min pe chu a awihawm loh mai bakah a lungchhiatthlak takzet a ni. 

"Ih maw nu, i awih lo zawk ang. Muhil nghet viau mah ila ka taksa danglamna kha ka hre thei a, ka harh chuan ka chungah ka putea a lo bawk a" ka ti tham ţiak a, ka ţap chhuak zui hawk bawk. Ka u pawh a insum leh thei tawh lo a, Mary pawh a bang bik lo. Ka nu hmaa ka vanduaina tawh dan ka sawi ve tak vang aniang a hma zawng aiin ka rilru a no a, ka u bula ka sawi ţum nen khan a in ang lo. 

"Ka tal thut a, awmzia a awm lo. A pa lian a, mipa a ni bawk nen, ka damdawi eiin ka tha a ti zawi vek bawk si, theih tawpin sual let ve mah ila awmzia a awm ngang lo a ni" ka ti a, keimah zawk hi ka thaw a hah mai dawnin ka hria. Kha zan kha rilruah a thar leh a, mitthlaah engkim a rawn in lar leh chuai chuai a, ka duh lo lutuk chuan lu ka thing nawk nawk a, ka awmdan chu hrethiamin ka u in khumah min ţhuttir a, ka nu pawh chuan engmah a sawi veleh tawh lo. 

Ka nu engtinmah a awm lo bawk a ţawng chhuah hunlai tak alawm tiin ka inti pachang lui a, ka mittui bawk chu hru hul lehin, "A pawi tur ang chu a pawi vek tawh tih hre mah ila ka putea kha min khawih lo turin ka la ngen tho a, ka chet hlek leh min man bet tlat zel bawk si, ka damdawi ei khan rilru a ti fim lo a, chiang lo ruai mah ila min vauna kha ka la hre vek. 'Tunah hian i nu a zual a, puitling ho chu kan buai ru khawp mai. Doctor te an mangang ţan a, in unau hnenah engmah a sawi ngam lo, nang hi a hre tu awm chhun i ni. I pa a boral tawh a, i nu pawh thi thut thei dinhmunah a ding mek. I sawichhuak a nih chuan i nu i that der thei a, nangpawh i mualpho nain damchhung a daih tawh ang. I pi Liani lahin i thlavang a hauh dawn miah lo, a pasal puh chhe tu lakah chuan a che na khawp ang. A tawp rat thlengin a nawr let ang che. I mualpho ang a, a chhan an zawt che ang a, ka hming a lan veleh zel phei chuan i nuin a tuar ber ang' tih zawngin min vau a, i nunna kha ka kut a innghat ang riakin a sawi" tiin ka nu chu ka en a, ka mittui chuan ka khawhmuh a ti phe zo a, a hmel pawh ka hmu chiang thei lo. 

"MA ka zir khan ka la upa bik reng reng hleinem. Kum 22 vel chauh ka la ni ve a, i natna hmang berkher phei chuan vau zam ka awl lutuk tlat. Ka pa a awm tawh lo a, nang lehzelin min kalsan chuan kan chan a chhe dawn lutuk tih ka hrethiam pha ve tawh. Ka sawi chuan min thih san daih ka hlau alawm nu" ngenngawl zet a tih pahin ka biang leh hnar chu ka tuai tawk a, ka mittui a hul hleithei lo. Ka ţah a chhuah lutuk avang chuan ka khabe te chu a sai dar dar a, ka nu ka en a ka rilru na tlat chu ka hrethiam lo. Tunah pawh hian ka kum25 na tur ka hmang mek chauh a, MA ka zawh hnu lawkah private school ah ka thawk ve mai mai ka tih tawh kha, a te chin bak ka zirtir ve lo a, rilru puitling lo chi leh a dawih chi ka ni bawk nen, vau zam ka awlin ho te teah ka rilru a na mai zel. 

"Rei deuh chhung chu rilru mumal ka pu thei lo a, hlauhna in ka khat a, mipa bula ka awm te hian tu hriatpui si lohin ka ip ru chawih chawih ţhin. Ka pi Liani lah a chhuak peih chi, inkhawm, committee ti reng chi a ni a, an fate lah chuti bawk. Inchhunga engmah ti peih lo, kţp a a kul a tai a inhmang chi an ni. Thil chi hrang hrang an zir lawr dun a, nalh deuh deuhin an chhuak a, hnatlang, hla zir an ti reng a, an thawmhnaw takngial pawh an su peih lo. Tumah khan min ngaihsak tak tak lo a, inah an awm tlem bawk si. An awm loh hlanin ka putea khan min sual lui ţhin a, min vau vak vak mah sela ka ţang ve nasa ţhin. Kut min thlak chang te a nei a, min phuar beh chang pawh a nei. Ka taksa a duk awm te kha a nupui fanaute chuan an ngaihven lova, ţum khat ka pi Lianin min zawh ve chuan ka putea bawkin class a intihbuai pui ka neih thu a hrilh nghal zung zung a, keimah zawk min hau a, min ngaihven zui peih chuang lo. An buai buaiin an buai a, keiin a rukin na ka tuar a, min khawih dawn apiangin sual let ve ziah mah ila awmzia a awm lo. Ţum khat chu kan inchai buai laiin ka pi Liani a lo haw a, min man chhuak dawn emaw tiin ka lawm hman viau, mahse ka putea chuan a sawi mam leh thei zel a, ka pi Liani lah min ngaihsak tehchiam lo tu a ni bawk nen, banga min nawr bet ran tu ka putean, 'ka phal lo chung chhuah luih a tum a ka dang bet a nih hi. Amah lo nghak tu a bialpa pawh kha i hmu lo maw?' tih zawnga a sawi chuan, 'thu awih tawh rawh' min ti a, a duh tawk der a, ka mihring hriat tawh a zawng a lemchang thiam ber mai ka putea chuan a bum hneh lutuk tlat. Rinhlelh awm khawpin min khawih ngun lo bawk a, fimkhur thiam tak a ni. Nangmah leh ka naute thlengin min vau nan a hmang bawk nen, a thisen zawm pui ngei pawh khawih duh tu chuan pawi sak engmah a neih ka ring lova, ka nauten an tawrh hlauin ngawih ka thlang a nih kha. Naupang te chauh ka la ni a, ka rilru dawihna zawng zawng nen, ka sawi chhuak ngam ngang lo a ni. Tunah tlemin ka upa ve ta deuh a, ka sawi chhuak ngam ta chauh a, min ring lo a nih chuan hmanah pawh khan sawi ila min ring chuang lo ang. Ka rilru mumal lo lutuk kha mi â ang maiah ka in ngai a, ţhiante hmuh a hlim luih a lo ngai veleh zel nen, a hrehawm zia in hrethiam phak lo ang" ka ti bawrh bawrh a, ka nu chu a meng tal tap tawh a, tu zawk nge rin tur a hre lo ni berin ka hria. Ka putea in lak fel der thiam zia hre tu tan chuan a mak lem lo. 

"He thu hi khawiahmah chhuak lo se ka duh ber. Ka nau a nih vang ni lovin hmeichhia ka nih vang zawkin Vani hi ka ring lo thei lo. Mi kan huat vang mai maiin tu hmeichhia mahin kan mi huat kha pawngsual tu ah kan va puh ngawt lovang. Hmeichhe tam tak, Vani tawn ang tawng, sawi chhuak ngam lo an tam dawn lutuk. Mahniin an tuar tlawk tlawk ang a, ţhenkhat lahin inchei duh dah vang kan ti leh ringawt zel a, Vani hi vawikhat pawh duhdah taka a inchei ka hre ngai lo. Naupan tet aţang tawhin khua a lum viau chang pawn keinin kawr bah mai mai kan hak laiin a ni chu a zak a, tshirt pangngai a ha reng a, kekawr lah a bul tui a hak awm ka hre ngai lo. A bialpa chu thuhranah dah ila, pawngsual hi hmeichhe nungchang leh incheina vang ngawt a ni lo. Chutiang chu nise he thil hi naupang thlengin an tuar lovang. Pawngsual a thlen na chhan chu pawngsual tu rilru dik loh vang a ni mai. Incheina leh nungchang a puh ngawt chi a ni lo. Hmeichhia chuan kan mawi tih zawng kan ha ang a, duh duh danin kan inchei ve ang a, kan thaw a pik deuhin duh leh zan boruak kan hip ve ang a, kan hlim chang pawhin khawlaiah kan nui ve bawk bawk ang chu. Tumah hian pawngsual kan phu hleinem" ka nute en ran chung hian ka u chuan a ti veleh a, sawi loh pawh ka la ngah a, ka u in min sawi sak thung. Min khawih reng loh thu leh a khat tawk, rinhlelhawm lo tur tawk a min khawih ţhin thu te, midang awm loh lai remchang a a hman ţhin thu te a sawi vek a, ka nu chu a zawi deuh hnawk a, a tlu mai dawn emaw tiin ka hlauthawng hman viau a, ka ding leh hluai nghe nghe a ni. Mahse, a bula dawhkan inhung chu a nam a, ka pahrawnin tum buau in a kuah ve bawk a, a rilru a insual nasa hle a ni tih ka nu hmelah chuan a lang reng mai. 

"Tunhma a i dinhmun ngaihtuah chuan Vani'n engmah a sawi ngam ngai lo kha a awm ve tho mai. A ngaihtuah vang che leh chhungkaw mualpho a duh loh vang te, Mary te hoin an tawrh ve a hlauh vang te a ni. A tihsual lian ber chu a ruk a min hrilh mai lo kha a ni ber a, tunah i dam deuh ni a hriain min hrilh a, Mary Aizawl awm ve hmain ti hian ka sawi chhuak ta a nih hi. I fanu in pawngsual a tawk a ni tih hi i awih loh luih tlat chuan hmeichhia i ni ve hi mak ka ti ngawt ang. Nu i ni leh zel hi mak ka ti lehzual ang. Mi hi kan landan ang ngawt kan ni lo, mi tam zawk hian hmaikawr kan vuah a, kan nihna diktak chu hun thawl leh remchang te, kan ngam zawng bula kan awm te, mahni chauh a kan awm chang leh miin min hmuh loh lai te hian a langchhuak ţhin. Ka putea hi i hmangaih tih ka hria alawm, mahse, kan mi hmangaih ber te pawh hian thil an ti sual ve thei tih hriat tur" ka u chuan a ti fak fak a, an hriat loh hlau ni awm takin thumal tin te chu a lam chiang fek fawk hle. 

"Tuar dawn pawh ni ila engati nge a hlimchhawnah i sawi vek loh?" ka nu chuan a ti chhuak thei hram a, thawk a harsat hmel lutuk avang chuan tim daiin ka melh a, ka inhumruh nasa lutuk leh ka taksa ţang nasa lutuk chuan min ti chau vek thei hialin ka hria. 

"Vau chi tinrengin min vau a ka ngam lo ka tih tawh kha. Ka rilru dawih zia chu i hria alawm. Sawi ka tum ve nasa a, mah se ka ngam ngang lo a ni. I damlo reng a, a khat tawkin damdawiinah i lut reng a, tunah pawh hetiang i nih chuan hmanah khan lo hrilh nghal ta che ila chu ka putea sawi ang khan i awm tak tak maithei a sin" ka la ti tho a, dawhkan a vawnna kut te chu a khur deuh dar darin ka hmu. 

"Keimahni ho vang chauh a sawi lo a ni. Amah chiah in ngaihtuah se chu a sawi daih tawh ang. Ka pi leh pute phei chuan hria se ka putea zawk hi an man tir duh hial ang chu. Ka pi Liani hi eng ang pawn nasa se tih theih a nei dawn lo reng reng. Mahse, thil thleng tur ang chu a thleng zo vek tawh a, chhungkua kan ni bawk nen, kan tlangzarh vak chuan kan na tlang leh ang a, ka putea bia la, i fate ho hi veng him tlat rawh. An hmaah ding zel tawh rawh" ka u in a tih chuan, "Lo na tlang mah ila eng nge pawi? Kan sawi chhuah chuan tam takin an hlawk pui maithei a sin. Pawngsual hi ruihhlo kan do anga do a ngai tawh a nih hi" Mary'n a lo ti vat a, pindan chhung chu a reh zui vang vang mai. 

"I putea chu ka bia ang" ka nu chuan a ti sap a, thil dang a sawi lo. Pawngsual hi do hneh theih a ni pawhin ka hre lo, keichuan ka chhungte venhim ka duh a, chhungtin te kan pawimawh na chin a awm ve. Inchhungkhur a thil thleng hi, ho te pawh nise ngaihven ţhat a, chik neuh neuh reng a ţul a ni. Kan fate nundan thlengin. Sum hian thil a ti thei tawh si a, tham theih tawk lah an awm reng bawk si, eng thil mah hi do hneh tak tak a awm thei lo a nih ber hi. 

"I putea chu ka bia anga keiman ka sawi pui ang..inrawlh tawh suh u. Vani nangpawh awm hahdam tawh rawh, tuman i duh lo chung an khawih tawh lo ang che" ka nu chuan mumallo zet hian a ti deuh nawk nawk a, min rawn melh a, min khawngaih ve niin ka hria, a pawimawh ber chu ka nu hian min ring tih ka hria. Chutih rualin ka putea hi a nau leh a ţhian a ni a, tih mualpho leh man tir tumna a neih ka ring lo. 

"Ţhu rawh...i chau ang hahdam rawh" ka nu te chhuah ruala tih pahin ka u chuan khumah bawk min nam ţhu leh a, "Engtin pawn ti se, thutlukna engpawh siam se vui suh aw. Ka nu hi dem suh. Lehlamah a fanu a awm a, lehlamah a nau a awm a, a laia a din rih a ngai a nih hi. I chungah engmah a thleng tawh lo ang. Hetah ka putea a rawn awm lo ang a, Mary pawh an inah a awm lo ang. Pawngsual hi a rapthlak takzet a, a tuar tu te hian tih theih kan nei tlem bawk si, boruak a alh hluai ang a, reilote tak tak chiah a ni leh ang. Engtia han tih chi nge maw a nih le?" tih zawm lehin beidawn hmel zetin ka bulah a rawn ţhu ve a, kan unau chuan kan ngawi zui rauh rauh mai. 

Tumah kan ţawng tawh dawn lo emaw ka tih hnuah, "Ka pa lah hi a ngawi reng a, a hawi kual rulh rulh ringawt a, ţangkai lo lutuk mai" Mary chuan a ti hlak a, "A tan inrawlh ve a nuam lo ang. Ka nu hian a hmangaih a, ka nu buaipui tur a a lo awm ve ringawt pawh hi a ţha. A ni lo zawnga a en che u chuan a pawi hmain in sawichhuak vat dawn nia. Ka nu'n a awih dawn lo ni a inhriat chuan rilru seng ve ula, finfiahna neih theih in tum ang a, inven sen loh hun a awm ţhin rualin tum chuan kan inveng ve thei lutuk a nia" tiin ka u chuan a khap dai nghal a, keichu ka ngawi reng tawh. Ka tha a zawi zo a, thil thleng zel tur ngaihtuahin rilru a phili ruai tho si, awmdan thiam a har a ni tawp mai. 

Ka u in min haw san hnuah pawh Mary chu ka bulah a la awm a, "Chanchin ka va ngaihven ange, tikhan lo awm rawh. Rilru kawm vak vak lo la, pawngsual i nih vang khan hmeichhia i nihna a bo phah lo a nia, i lo insit lutuk ange" a ti ve a, ka bu nghat a, ka chhang lem lo. 

Rei tawk fang a reh vang vang hnuah a rawn lut leh a, "Ka nu'n engmah a sawi duh lo. Ka pa zawkin ka putea an biak thu a sawi a, nakinah kan la hre mai ang. Ka nu pawh a ţhawng a, nghak rih lawk ang. A inpeih hunah a la sawi em em ang" tih leh ka bula mut ve a rual a, mu meng kar reng mah ila phone takngial pawh ka khawih peih lo. 

Karkhat a liam leh hnuah pawh ka nu chuan engmah min la hrilh duh lo a, ka putea pawhin thawm a la rawn nei leh lo. Ka thawven hawk rualin thil thleng hriat chakna in ka khat a, ka pi Liani a reh hmak bawk nen, engmah a hre ve lo a nih ka ring. Hria se chu thil a ti leh rum rum tawh ang. 

Thil danglam em em thleng lovin hun kan hmang chho a, Tintin-a nen pawh kan inhmu ngun zualin kan inkar pawh a ţha. In ngaizawng na na na chu a fala inhmuh chang kan ngah a, inven sen loh chang pawh a awm ţhin. A mak maithei, pawngsual tawk tawh ka ni a, hlau awm tak pawh ka ni. Mahse, Tintin-a hi ka hlau tlat lo. Inkawp hlim ang maiin kan inhip tawnna a la nasa reng a, insum theih loh chang a awm ţhin a ni. A hlimchhawnah kha chuan ka hlau ve tho a, min kuah ringawt pawh ka ngaithei ţhin lo. Min nawr lui ngai lova, engmah hre ve lo mah se thinrim nan a hmang ngai lo. Kum a vei hnuah ka thla a muang veleh chauh a, amaherawhchu, ka thil tawn rapthlak tak kha englai mahin ka theihnghilh ngai lo. 

Valentine's day a nih chuan tlaiah kan inhmu ve ngei a, hruai pawh min hruai duh lovin min ko a, hetiang ni vel hi engah vak ka ngaih loh avangin thil pek pawh ka keng lo. Ben-a te inah min lo nghak a, inchhung ka luh chuan Sawmtea leh Ben-a chauh an lo awm leh lawi sia. 

"Eng nge awmzia? Zu in in a ni maw? Khaw nge Tintin-a?" ka ti lut bawrh bawrh a, khawvawt zual a reh ta bawk a meilum an lo ai tawh bik lo a, zu rim erawh a nam ţha hum hum khawp mai. 

"No khat bak a in lo" Sawmtea chuan a lo ti ringawt a, Bena zawk chuan a nghawk zauh a, "A in leh tawh maw?" ka tih veleh, "Tui no khat" a ti leh daih a, an chiang chiah tawh lo.

"Vanram" Sawmtea bawk chuan a ti leh hluai a, "Eng nge?" ka ti hmuk a, chutah meng phi deuh ruai chunga min lo enin, "Zu hi maw ruih nawi loh tur. A nuam tawk chiah a in hi Pathianin a phal a, mahse ruih nawi a phal lo" a ti ban charh a, lu a thing deuh nghut bawk a, a nawi hle tho si. 

"In mak e...ngati nge zu in in leh ţhin? Khaw nge Tintin-a?" ka tih leh chuan, "Ni ngawt mai..ngati nge kan in leh ţhin Bena? A tui lo si, keichu a drip ang zawng te hian awm se, khai hmiah mai ila ka duh ber a" Sawmtea zawk chuan a ti leh bual bual a, rum zet a ka melh takah chuan, "Ka sim dawn lawm Vanram, inchungah a awm. Kan sim vek ang" tih pahin min han nuih tlawn vel a, Bena thung chuan nuam lo a tih hmel viau mai. 

Kailawn lam pana ka phei lai chuan Bena zawkin, "Khawmaw no khat lek ka lo ti leh" a ti zauh a, "Tui no khat va in la a tawk" ka hriat phak ngei tur a Sawmtean a tih chuan ka nui tawp. 

Inchung zawl ka thlen rual chuan aw ka thian kharh a, min lo en sa reng avangin a phu eih lo. Thinrim hmel a pu zawk a, "I va tlai ve...darkar khat vel ka ding tawh" a la ti hluk zui. 

"Vday ah te chuan dawhthei ve deuh la mawle" ka tih chuan, "Duhzawng nghak ve lem si dawhthei tak ka la hre lo. Kan duh zawng chu lo thleng thuai thuai se kan ti vek" a ti vin leh hlur a, hnial a hrat si, a thin a chhe bawk si, tun hnai phei chu hahthlak tak a ni. 

"Nitin deuhthaw kan inhmu a, vawiin chiah min la nghak. I thin ka tih rim chuan ka haw leh mai ang" ti a ka fiam chuan, "A ngai lo. Vanram, i can buy myself flowers i ti ve em? I status ve em?" nui ruh ruh chung hian a ti a, hei pui, a thutak leh tawh lo. 

"Ti ve nang" ka tih veleh hnunglama kut a dah tlat chu rawn la chhuakin pangpar bawr nalh deuh hi a keng a, chocolate a tel zeuh zeuh bawk. 

"Ti ve la chu hei hi a thlawn a pe lo chein ka leichhawn tir ang che ka ti deuh a" nuihza aw zet hian a la ti a, min rawn pan hnaiin ka hmaah a ding a, "Chocolate tel hi a pawi lo tiraw? I ha a ţha tho a" a tih chuan a awmah ka nam sawk a, a nui chhuak ta hawk a. 

"I uang zel a, a romantic lo zo vek zel alawm. Min leisak chuan ţha deuhin min pe ve mai la" ka ti a, ka hnar ka tum deuh dat dat chuan a thle buk a, "Kha kha eng nge?" tih pahin mit ti zim sun hian min en a, "Zu i in leh in loh ka hnim kual a nih kha" ka tih veleh, "Eng rim mah i hre lovang. Zu hi maw a ten in ka ten" uar zet hian a ti a, ka nui pat pat mai. 

"Khawi pangpar chu?" ti a ban mai ka tum chuan a lu chungah a lek kang a, "Laltinkhum, chimawm viau zel lo teh" tih pah dingdihlip meuh hian ka ban ar ar a, "Min fawp phawt rawh" a ti bur mai. 

"Ninawm si" tih hlak pahin a darah ka dawm a, a sang si, keiman ka fawh hmasak ve chuan a buaithlak ţhin. Ka hmuiin a hmui a sik rual chuan a kut awl lamin ka hnungah a dawm a, uar zet hian min lo fawp let a, a ta bik ka nihna tih lan a tum ni berin ka hria. Pangpar ka ban thut rualin a inla hrang a, "I va phakar reuh e" a tih chuan, "Ka keng ve chak tawh alawm" ka lo ti vat a, a kiai suk mai. 

"Ka hmangaih che ti la" chimawm fahran a a tih leh chuan, "Laltinkhum, naupang ka nih tawh loh hi" ka ti hlak a, a hmel a nuihzatna langchhuak chu ka hmuh hmaih lo a, min chhaih a chak tih a hriat reng mai. 

"Naupang i ni tawh lo, hmangaih nei rual i ni tawh. Chuvang alawm ka hmangaih che ti la ka tih" a ti lehzel a, "Awii..i bula ka awm hi chuan ka thinrim hi ka inhampuar pup pup zelin ka hria" ka ti nang nang a, a nuih a za viau mai. 

"I la puar lo...Tintin, i engkim, i hming pum Tinkhuma tih thleng hian ka hmangaih vek ti rawh" a ti a, kan in en ren rawn a, amah zawk chu nui chhuak hmasaah a ţang leh a, "Sawi lo mah ila ka hmangaih che tih chu i hre vek alawm. Chuan zu i in lo a, ka lawm bawk a, pangpar leh chocolate nen, ka lawm, ka hmangaih bawk che" ka ti mawlh mawlh a, lungawi hmel zet a a nui chu hmuhnawm tak a ni. 

"Ka hmangaihna che hi a uchuak hret tawh a, indim deuh a ngai. Kha la rawh i tan liau liau a foreign aţanga ka chah a nih hi" fiamthu a tih pahin a thil min leisak chu min pe a, nuam ve tak a ni. 

Ka thil ken lai en a ka nuih var var reng lai chuan ka khabe ah dawmin min kuai dak a, "Kei aia i en ngun zawk dawn chuan ka paih daih ang" tih pahin a rawn kun hniam a, ka hmuiah a fawp leh vang vang a, hetianga min thlahlel tih hriat lutuk a min fawh hi chuan chhan let loh har ka ti ţhin. Ka chhan let rual chuan min fawp uar sauh a, mi inchungah kan awm tih pawh kan hre tawh lo. Bena pindanah kan inkawm zui a, "Vday gift ţawl a nih hi" tih pahin Bena khuma hmeichhe thil let bal chu a kawk a, "Hunpui dawnah an inţhen ziah a, vday dawnah an inţhen ziah bawk a, a vanduai vannei" ka tih chuan a ţhianpa a ngaihtuah aniang a nui ve hawk hawk mai. 

Dar7 velah Bena te in aţang chuan kan chhuak a, ţhutthlengah an lo muhil ve ve tawh a, kan thawm pawn a ti harh zo lo. Bike hnunga ka ţhut rualin a jacket ipte ka zen a, ka thil dawn kha kan inkarah ka pawm ţat bawk. 

"Engmah ka pe ve si lo che a a nuam lo" a dar a khabe nghah paha ka tih chuan min rawn thlek zawk a, reilote tak tak chauh a ni. 

"A ho..ka bula i awm chuan a tawk reng" a ti ve ngei a, "Tak tak maw? I lo lungawi lo ru vel ange" ka tih leh chuan a chek tlak a, "Teuh nang..ka bulah i awm a a tawk. Vanram, thlifim rawn thaw te hi a rimtui vek" a ti vel a, rei tak hnuah ka nui veleh hak hak mai. 

Ka nu nen erawh kan inbe khat khawp a, ka putea chanchin ka zawh a hlau aniang ka awm ve naah chuan nuam lo tih hmel deuhin a awm ţhin. Tintina hi ka la hrilh ve lo a, ka chhungten ţul an tih loh chuan ka hrilh rih lo ang. Lo innei dawn ta ila chu thuruk nei a pasal neih ka duh dawn loh avangin ka hrilh tho maithei. Zu a nghei vang vang a, inneih thlengin ka ngaihtuah kai leh hman der tawh. 

Diakkawn ah Daizaui kan hmu a, a inkhai bawr nasa mai. Balloon heart shape ngat hi a fawngah a seh kawh vu bawk a, Tintin-a chuan a en liam thei ngang lo aniang a zawnah a ding leh chat tawh. A thu hrimah, khua a thim vek tawh a, dawr inhawng pawh a tlem tawh, a bei rei angreng khawp mai. 

"Rit deuh deuh khai ziah suh ka tih kha Daizau, i ţhang thei lo ang" tih pahin a bag khai lai pakhat chu a pawh thlak sak a, a pawt na bawk aniang Daizaui pawh a tlu lek lek mai. 

A balloon seh kawh a lak thlak te te hnuah, "Rickshaw hman zel ka ui alawm. Vday te a ni sia, balloon tal hi kan pa pek ve ka duh bawk si. Bakah ka ţhan a kin daih tawh. Bag kha min hawn sak dawn mi? A pahnih hian in phur thei angem? In theih chuan bungrua ka lak belh duh a" inthlahrung lem lo takin a ti nghal zung zung a, nuih loh theih pawh a ni ţhin lo. 

"Vani a awm hi..pakhat hi ka lo phurh haw sak ang che. I duh leh lak belh la, i bawr viau leh rickshaw lo hmang haw rawh, ka lo chang ang che" Tintin-an a tih chuan, "Awii..i va han fel ţhin tak, min lo chang ngei ngei rawh aw. Happy Valentine's day" phur zet a tih pahin zuang euh chung hian Tintin-a biangah a piai ta mai a, min kalpel tu nula tlangval te pawh nui ţha in an lo hawi let sap sap mai. 

Daizaui zarah bawr deuhin kan haw a, zir chhuah ka nei bawk. Ni hi a sa reng lo a, chhum a zin chang te, ruah a sur chang te a awm ţhin. Mihring chu kan hlim a, kan lungngai leh ţhin a, engkim hi Pathianin kan tawrh a phal a, kan nat reng a phal lo thung. Ka lungngai a, ka ţap a, chutih rualin ruah sur a reh a, ka hlim a, ka nui leh a, khawvel a kan awm chhung chuan heng hi kan chunga thleng reng tur a ni. Mi tam takin an paltlang ngam lova, ni sat hun nghak chhuak zo lova an nunna la ta sawi tur an awm chawk. Mahse, chhel taka tuar tu te chuan chhum kara ni lo chhuak mawi tak an hmu ţhin. Kan nunah ruah a sur a, tam tak a ni ţhin, a baw hawk hawk ang a, chhum chhah zetin min hual vel ţhin bawk ang. Amaherawhchu, ruah leh chhumin a ngam loh ni eng mawi tak hi kan nghak chhuak zo lovang tih ka hlau ţhin. Pathian hian kan tawrh zawh loh tur khawp a natna nasa min pe ngai si lo a. 

Kan inkawtah ka nu a lo awm a, biak loh tawp aiah Tintin-a chuan, "Nu Pui, eng nge i an a?" a ti hram a, "Ka ţha" a tih hmak hnuah ka nu chu inchhungah a lut a, min duh pui lo ve thlawt a ni. Tintin-a nun hman ţhin dan en letin a demawm miah loh. 

"A makpa tur hi min ngam tlak mah mah a, chhan pawh min chhang ţha peih lo" a ti a, Daizaui bag lah chuan min ti buai, kan siam fel hnuah min haw san a, inchhung ka luh ruala ka putea ka hmuh chuan ka ding chawt mai. A phui mup a, inchhung chu a dum thim phui leh mup tawh. Kan inchhung hi a var ve siar tawh emaw ka ti a sin le. 

CONT..