BLACK AND WHITE-9

BLACK AND WHITE-9

"Vani, lo ţhu teh" pindan a luh tlang nghal mai ka tum laia ka nu'n min auh takah chuan ka ding leh rih a, an lam a ka inher rualin Mary a mitmei zauh a, ka nau chu a tho nghal nalh a, kawngkapui a khar tak tharhah ngat phei chuan eng emaw a thleng leh ngei dawn a nih hi ti rilruin ka peih lo lawk ngei mai.

"Lo ţhu lawk rawh" ka nu bawk chuan a ti leh a, a landan chu a dam thlap a, chiai angin a awm lova, rilru natna nei hmel pawh a pu lo. Hetianga hahdam deuh a ka putea nen min hmuh dun theih hun hi a nghak ni ah ka ngai. A inpeih tawh ang a, ka putea pawh a ko a nih hmel. 

Ka ţhut ruala ka nu'n, "Engtia tih tur nge i nih ka hria a, man tir che a, jail a hun hman tir che pawh ka duh" a tih chuan phawk zetin ka en a, ani erawh chuan ka putea chu a melh ran a, a hmelah engmah a langchhuak lo nain a puan bah hmawr a ţham khawm nasat danah a rilru a nain hrehawm a ti ru hle tho ang tih chu a hriat. 

"Ka fanu a ni a, kei hi i u ka ni. Engtin nge ka fanu hi i it theih? Lo it ta tehreng pawh ni la engtin nge a chhiat vek theihna tur thil i tih theih? Kan ring che a, keiman ka awmpui ang i tih pawhin lawm takin kan lo pawm a, rilru chhia i put kan ring ngai lo. Ka nute hnen ai chuan a putea hnenah awm se a him ang kan ti a, helamah rilru nuam deuh a kan awm laiin ka fanu hi nawmchen nan i lo hmang vel maw? Eng nge i hriat a? Hmaichhana min hmuh duh loh ka hlauh avangin phone ah khan engmah ka sawi ţha duh lo a, tunah hian man tir thei reng che ka ni. Kan sawichhuah vaih chuan in chhungkua pawh in darh vek ang. Kha thil i tih nachhan kha ka zawt lo che, a chhan chu tupawn kan hre vek. Engati nge lem i chan char char? Helama rawn awm i duh nachhan kha eng nge? Vani bawk em ni?" ka nu chuan a ti khawl khawl a, ka putea chu a ţawng chhuak mai lo, eng hmel nge a put hre turin amah pawh ka en peih lo. 

"Sawi ta che..engkim sawi vek rawh" vin deuh ţhaka ka nu'n a tih leh takah chuan, "Hna ka neih vang" bul zet hian a lo ti a, ka thin a rim nghal ţung mai, zahna leh inthlahrunna pawh a la nei eih lo. 

"Hna i neih vang ngawr ngawr a ni lo tih kan hre tlang vek tawh alawm. Vani tih ţhaih tumin mi? Nge i itna a la reh lo zawk?" ka nu'n chang fek fawk a a tih chuan keimah zawk ka lo ip chawih thei. 

"Ka fanu chunga pawi lian lutuk i khawih chung pawhin i nupui fanauten an hriat hlauin ti hian a rukin ka ko hram hram che a, chhanna mumal pawh min pe duh lo. Ka nu leh pa te hrilh phei ila chu tar a hnu lamah an ţap tlawk tlawk dawn a sin. Chuti ni lo se chu Vani'n engkim a sawi rual khan ka rawn hmu nghal ang che. Lokal lo tur a ka insum nasat zia i hre kher lo ang. Ka fanu nun i ti chhe vek tih i hria em? Helama i hna tur chu enfiah pawh a ngai lovang, hna pe tu che chu bia la, i thawh theih loh thu hrilh ang che. Kan khuaah hian lokal tawh reng reng suh" a ti zui buan buan a, ka nu hi nu nasa ve tak a ni. Ka putea dan anga a hrem tir lo hi mi chuan hria se mak an ti maithei, mahse a hmangaih zia hre tu tan chuan a mak lem lo. 

"A thleng nawn tawh lo ang vawi engzat nge ka tih?" ka putean a tih chuan, "Tikhan min chhang suh" a ti vin hlar a, "Ka hriat hlim khan rawn kal chilh nghal mai che ka duh rualin chhungkaw mualpho theihna a ni tih ka hre tel a, hmana thil thleng tawh khan nghawng ţha lo a nei tih ka hria. Thudik chiah lo sawiin ka ko thei ţawk che a, phone a sawi vek theih ni se chu kan inchhung i rawn rah leh ka phal hauh lo ang. Tunah hian chiang deuhin ka hrilh ang che, kan khuaah hian eng hna pawh thawk dawn la heta i awm ka remti lo ang a, i u ang pawn min en tawh suh. Tun a kan inhmuh hi a tawpna ni rawh se. Mihrang ang ah min ngai tawh ang che" a tih zawm leh a, pindanah lutin envelope hlai hlup mai hi a rawn la chhuak a, hnaih pawh hnaih duh lovin ka putea lamah a vawm phei a, a lo chhar rual chuan, "Kha kha ka koh chhan che a ni pakhat. Nang nen hian engmah tih dun ka duh tawh lo. Ka hlawh hi tam viau lo mah se nitin a eitur kan neih chuan a tawk. I duh leh nangmahin thawk la mah se ka sawi tawh ang khan kan inchhung hi rawn rap leh tawh suh. Ka faten an tawrh ai chuan ka rethei zawk mai ang. Pathian zarah kan nghei bik lo ang. Min ngaihsak ang tak khan awm tawh lo la, lehkha pawimawh ho kha a kim leh kim loh en la, min rawn hnaih leh tawh suh" a tih leh chuan ho ka ti ru viau mai. Phone ah hau se la, lehkha pawimawh te chu thawn hmak mai se la ţha tur a nia. Ka hmuh turin a ko kher kher a, awm a ti nuam lo leh zo vek. 

"Vani hnenah hian ngaihdam dil tur pawhin ka ti dawn lo che, a chhe vek tawh a, i thil tih kha ngaihdam tlak a ni lo. Mikhual pindanah lut la, i thawmhnaw leh lehkha pawimawh dang pawh a awm nual ang. Keini lo chinfel theih pawh a ni lo. A vai sawn la vek la, in hnim hnai tawh lo ang. I thil tih kha a rapthlak lutuk a, sawi tur pawh min ti hre lo. Zam map lova Vani lam i la hawi ngam te hi a mak ka ti. Inchhung a lo luh rual khan i khup zal zal ang chu tih nak laiin a ţhut fel thlengin i en zui a nia, kha kha alawm ka hmuh duh chu. Inchhirna leh inthiam lohna pakhatmah i nei lo. Kan chhungkuaah hian venthawn tur tam bik lutuk lo se emaw, Vani mualpho ve dawn lo se la chu a tawp rat thlengin ka nawr let ang che ka ti a nia. Mizo te hi chu kan la inhrechiang a, an man che chuan engtin tin emaw miin an hriat leh tho ka ring. Ka nu leh paten an hriat phei chuan an kun tlawk tlawk mai ang. Thil thleng tur chu a thleng zo vek tawh a, Vani hian a sawi chhuak har a i vanneih pui a nih hi" ka nu'n a tih leh takah chuan ka putea chuan en pawh min en tawh lovin zawi supin ngaihdam min dil a, ka nu a ti thinrim zual sauh thung. 

Mikhual pindan lamah a nawr phei rawk rawk a, vin zui khar khar reng mah sela a hmel a natna langchhuak chu ka hmuh hmaih chuang lo. A na ve bawk ang, a pianpui unau neihchhun a ni miau a. Chum deuh dawt dawt mah se la hrehawm a ti tho tih a hriat reng mai.

"Zakthei lo e...ka nu chu ni ila ka nu leh pa te an tar tawh tih te, ka nau i nia tih te mai mai chu ngaipawimawh lovin ka man tir hmak ang. Tun hnaia thleng a nih loh vang maiin a nih tur ang ang a ni tawh an ti ringawt a, hetiang hi alawm ka ngei chu. A tuar tu tan chuan tun lawk a thleng ang a ni tho ang. Mualpho hlauh vang mai mai a misual chhuah zalen te chu a, a nupui fanaute pawn hria se a pawina pakhatmah a awm lo. Ka thu lo ve ropui sia, ka nu chu ni ila ka che na khawp ang. I hmuh tur kherin a ko lehnghal a, a thil tih dan hi a mak ve hrim hrim" ka nauin a ti hlak hlak a, a thinrimna hi a awm ve tho mai. Beisei ngam chiah lo mah ila hremna eng emaw tak chu an pek ve ka ring a nia. 

"Inzawmna chhut chah tih mai mai, thisen inzawm hi englai mahin inzawmna a chat thei lo. Hun a rei a, kan inpawh leh tho zel. Jail ah tang mualpho se la, zak deuhin awm ve se la ţha tur a nia. Ruihhlo ti ten harh chiang mang hlei lova thil an ru leh zeuh ţhin hi chu ka la hrethiam thei deuh a, pawngsual berkher hi chu ka hrethiam thei lo. Hremna na ber an phu alawm" a tih leh lai chuan ka nu a lo let a, "I duh leh va inthlak tawh rawh. Ngaihdam a dil che beisei suh, duhdah deuhin a dil che anga i na mai mai zawk ang. Ti sawn in la chhuak se la, vawikhatmah rawnkal tawh suh se. A bungrua te saw ka khawih peih lo" a tih takah chuan phur lo deuhin pindanah ka lut a, ka nu te an awm emaw awm lo emaw, ka putea a awm ve tawh chuan pindan hi ka kalh ngei ngei zel. 

A haw lai pawh ka hre lo, thlang lama motor ri chu ka putea turah ka ngai ringawt a, hremna tuar se tun ai hian ka hlim zawk angem ka hre lo, ka bialpa lah hrilh ngam a ni der si lo. 

"Vanram, Daizaui pheikhawk zawrh lai ka lei sak che a, khawiah nge kan in pek ang. Lalnu Puii kha ka paltlang zuam lo min sik ang" phone ah a rawn ti lung lung a, ka bun tawk pawh a hre dawn em maw ni.

"Ka hre bik lo..duh leh pi Dingi dawrah lo awm la, thil lei pahin ka lo kal ang" ka ti zuai raih a, ka awmdan chu a hrethiam a ni ngei ang, "I va ţawng thatchhe ve..eng nge thleng?" a rawn ti nghal thawr mai. 

"Ka chau deuh a, nachhawkna te ka ei anga a zia mai ang" ka tih chuan, "I chauh chuan i thinchhiat daih zel kha. I chauh poh leh i vin alawm nang te chu. Sawi teh, eng nge thleng? Puibawihi khan a hau che mi?" aw zangkhai zet hian a lo ti leh a, "Min hau mah se min chhan ngam nang" ka ti vin hlar mai. Thup neih chuan lem kan chang reng mai a ni. 

"Chhan ngam lo e..kha i vin thei tawh bawk a lokal rawh aw. A zuar tu Daizauin duhtawk in a herh kual theih a tia, mahse a savun a chang emai ka herh ngam lo" a tih leh takah chuan Daizauin a bum tih ka hre nghal mai. 

"Lo herh reng reng suh i herh chhia ang. Ka inthlak anga ka lokal nghal" tih leh phone dah ka rual a, in aţanga ka chhuak chuan Daizaui ka la tawk zui. A bawr lehpek khawp mai. 

"Tintin-an i pheikhawk tur a leisak che kha" tih pahin a lo nui var var a, a sam lah chu serthlum rawngin rual lo nuaihin a lo colour a, a dum leh serthlum rawng a inpawlh nuk a, amah a ngo em em bik bawk si lo, mai ţawih lam tawh te pawh a ang dawn dawn alawm. 

"I bum pek em ni a? Daizauin duh duhin a herh kual thei a ti a tia, a savun a chang a ti tho bawk sia" ka tih chuan, "Ka sawi a hresual a nih chu. A savun a chang nain han bun chiah hian duh duh danin kan ke kan herh kual thei ka tia lawm. Savun chang ve si ah chuan rubber chapal bun ang chiah a ni mai. I ke kha engtin pawn dah la ke na leh kham a siam ve lo. A savun ah damdawi a tel a, a nalh lutuk zu bun chhin rawh" a ti zung zung a, sawi tur ka hre ve leh tawh meuh lo. 

"Eng nge i ah bawr luk a?" ka ti ta daih a, "Pakhat hi sa rep a nia, pakhat hi chu thawmhnaw vel. Thil chi hrang hrang hi zuar ila inhralh a nuam ber. Sa rep in duh ve em? Vawksa phei hi chuan mut a ti chhuak ve lo, a thau pawh duh duh zat a ei theih" a tih lai chuan ka hnunglam a thlek a, "E..nu Puii a awm a ni maw? Sa rep hi ka va zawrh ange" a tih leh hnuah ring leng lawng a "Nu Pui, tar ve thei lo nu. Nang hi chu i hmelţha veng reng mai" tih leh ka nu lama tlan phei a rual a, a ak rit bawk aniang a tlan ţuang ţuang mai. 

"A hahthlak mange" tih sap pahin kan inbul kawng chhuk ah ka chhuk a, Daizaui hi chu khawi hmunah pawh awm se eizawnnaah a buai ve lovang. 

Pi Dingi dawr a ka luh rualin, "Han bun chhin teh" a lo ti nghal a, pheikhawk ka hmu chu ka sa zak mai.

"Laltinkhum, i bun tawk em ni i lei a? Khatiang engtin nge ka bun theih ang? Mahni bialnute pheikhawk bun tawk pawh hre lo nep zel zul lutuk mai" ka ti vin hlak hlak a, pheikhawk pawm run chung hian pawisawi lo awm takin min en a, "Daizauin a size a te a tia, a lian ber ka la" a ti thum dut dut mai. 

"A size ah buai lovin ka ke hi mitthla ta che" tih paha a hmai zawna ka ke ka lek chhuah chuan ka pet dawn emaw a ti aniang a lo indang nasa mai. Ka putea vanga mood fuh loh sa nen ka thin a ti rim hlur thei. 

"I mawza pawh i bun tawk chuang lo a nih kha kha i kezungpui a lawr tut a lawm" a tih takah chuan rang deuhin ka dah thla a, a ţhiante pahnih nui put put chu lai deuhin ka melh reng ringawt. Amah chiah ka en a, school a ka mawza bun kha thlak lovin ka bun tlang law law kha a ni a, a hmawr a pawp tih ka lo hre hauh lo. 

Zahzelah, "Ka ke tin sei vang a nih hi" ka ti nawi niaih a, pheikhawk chu chhuh sakin ka bun nghal bawk a, ka thawl nasa mai. A hnunglam awl duai chu en vung vung pahin, "Umm..i thawl deuh a nih kha..kan thleng dawn nia" a ti duh lek chauh a, ka thin a rim ut ut zel. 

"Thawl deuh a nih loh hi...ka thawl duai a nih hi en ta che. Tun thlenga ka pheikhawk bun tawk pawh i la hre lo hi mak ka ti" vin tak bawk a ka tih leh chuan, "En ringawt chuan hriat a har ve a, thinrim suh Daizaui ka be nghal" tih leh phone phawrh a rual a, ka kut lek kan uaih chu lo man betin a bulah min pawt ţhu zui zat a, ka lungawi lo tih hriain min kuah bet hneh ngang mai. 

A in ring char char hnuah kan Daizaui chuan, "Eng nge Laltinkhum, hei sarep ka zuar alawm nu Pui hmelţha-i te inah" a lo ti ta chiah a, "I pheikhawk zawrh hi a bun tawk lo. Min bum a ni maw?" fiamthu a pakhatin a tih chuan, "Ka bum awzawng lo che. Dawt var ka sawi ngai lo. A len leh a te deuhin thleng la a ni mai alawm. Ninawm per pur lutuk" a rawn ti hrep mai. 

"Ka herh chhin a a savun hi a khi phuk tawh a, i va dawheh ve Zuarzau" a tih leh chuan, "Enga? Zuarzau te min tia law?" a rawn ti pawr ngang mai. 

"A savun a khi ka ti" a tih veleh, "Aw i tih chhiat a nia lei tel ang che. Ka chawi dawn lo hrim hrim. Chawi belhin thil ka zuar ngai lo. A size te chu tunah ka rawn pe nghal ang che. Kha pawh kha lei rawh i tih chhiat man chu i chawi tur a ni. A savun chu herh chi a ni lo tih mawlh mawlh pawn i herh lui a, i chawp khawp ang. Nu Pui sarep hi lo en ru aw..pi Dingi dawrah ka zu kal lawk. A zat ka chhinchhiah a nia" a ti buan buan mai. Phone a dah rualin Tintin-a te ţhian ho chu an nui ta hawk hawk a, "Â si...sumdawng duh tho bawk si" Sawmtea chuan a ti zauh a, kei chuan â ka ti ve hauh lo. A eizawnna awm a hria a, pawisa ah phei chuan fing tak a ni. A rik huau huau a a ngaihsam ang hi a ni lo, pawisa ah kher chuan a fir lutuk tlat. Purse ka ken theihnghilh ţum pawn pawisa hman sak zawk ka dil a, cheng10 bak min pe phal lo. A ngei duh tu tan chuan ngeiawm tak tur a ni. 

"Hei a size kimin ka lo keng. Thawmhnaw zingah ka dah tel hlauh a, ti hian Vani chuan thlang rawh se. Khawimaw i herh chhiat chu ka lo en chhin mawl muk" a rawn luh ruala tih nghal zung zung pahin pheikhawk chu min phih thlak sak a, a enkual dan dan hnua a him pial tih a hriat chuan a thaw huai huai niin a lang. 

"Ka tih der e te min han ti vel a, min ti hlauthawng hman hle mai. Ka thil zawrh lai berkher hi chu naupangin an en ringawt pawh ka phal lo. Vani, thlang vat vat rawh ka hmanhmawh, i nu pawn lo haw vat rawh se a ti. Kha pheikhawk ţhatna chu ka sawi tawh kha, ka sawi nawn peih tawh lo ka kâ a kham" a ti zung zung a, bun lawr pawh a inthlahrunawm tawh zawk. 

"Mi i fak der nasa thei si, kan Daizaui hi chu a hah thei viau ang" Sawmtean a lo tih leh chuan, "Inhralh dawn chuan a ngai..mi tih loh dan pawh a ni lo. Than meihawl-in kawr “”eng vut a ha chhin phei chu thim zinga kawr inkhai tawp a ang a, i sap zaih mai ka tih tho kha. Sumdawng rilru hi chhe deuh a sin" a ti a, dawr chhung chu Daizaui aw hlirin a khat a ni ber. 

"In lei tawh chuan ka bun tawk awmchhun hi ka la mai ang" ka tih chuan, "Vanrami hi chu a sial ve e..a zaithiam a, a ke te hi a puam ţalh mai ni" Tintin-an a lo ti pek a, dawr chhunga awm ho zawng zawng mit chu ka ke ah a fu leh vek tawh. Ka ke hi a chhah a, pheikhawk pum ka tawk chiah chiah ka bun chuan a awm tun zel hrim hrim. 

"A ke in a zai hleinem mawle...i inhmeh lutuk Vani, i ke hnung a nawt pilh ve dawn lo a, pheikhawk bun lo ang chiah i niang. Band aid free pheikhawk a nih kha" tih pahin Daizaui chuan pheikhawk chu a khawm rawk rawk a, engmah sawi tawh lova a chhuak ve ngei chu thil mak tak a ni. 

"Min tih zah phet tum ziah suh" Tintin-a mal a chum ţawlh paha ka tih chuan, "Min ngaih poh leh i kutthlak a na mai. Min ngaih tak tak chuan tunah min lo chum leh ang" a ti daih a, kut a tawrh peih tawh loh vang a ni tih ka hai bik lo. 

"Ka rei lutuk chuan ka nu'n min lo hau ang" ka tih veleh, "Ţhenna ram khawvel tak hi a" a ti hulh a, ţhutthleng nghenchhan ah chuan a ban kham phei duaiin hriatthiam harsa deuh hian min melh a, tunlai tak phei chu kan inhmu zing a, kan pahnih chauh a rei tak tak awmdun chang te pawh kan ngah. Chuti chung chuan min ngai ve em em reng a, a lawmawm let ling zawk. Zu lah a nghei hmak lo tih hre tho mah ila ka hriatah chuan a rui bur bur tawh mang lo a, zawi zawi a hma a sawn zel hian hlimna min siamsak ve ţhin. Ka hmangaih em a ni. 

"Pi Ding, kuhva ro thlum ang kha i nei em?" Thartei aw ka hria chu ka ţhu ngil nghal awt ni berin ka hria. Thudik ka hriat hnuah ka hmu lo vang vang a, buaina dang ka ngah avangin ka hel rih a ni zawk mah. Dawr hmaah a ding a, a rawn dah luh ruala min hmuh chuan a meng tal tap mai. A dawih nghal dui ni maiin a lang. 

"Thartei ve si ngati nge i hlui rup mai. Ka hmu black and white vek che. Inbual ve ţhin ta che" tiin Sawmtean a lo fiam a, Sawmtea zu in hi Thartein inbual ve ţhin rawh a tih ziah vang a fiam let ve a ni pakhat ang. 

"I zak lo e a Malsawmzual, a ţhing rim i nam hum hum zel kha" Thartein a tih chuan, "A ţhing rim ka nam hman lo aw. Zu hi ka thiar zo chak lutuk a an siam daih hleithei hleinem Thar bal" a lo ti veleh zat a, chhang tawh lem lovin Thartei chuan min rawn en a, "Thil ka hria a, in ka thlen veleh ka lo bia ang che. Zep tlat tur a ka tih che kha" a la ti ngam tho a, a lo dawih lo tawp a nih hi. 

"Min lo be ngei ngei ang che" cho zet a ka tih rual chuan ngeiawm deuh hian a ţhen sak a, a kuhva lei a lak hnuah awmze nei deuh a min melhin a kalsawn zui nghal a, ka mipa ţhutpui te lah chuan, "Hmeichhe ho tak hi chu in thu a ho thei si. Zep rawh in tia in sawi leh zel a, ţawngthei lo mah ula zaizir pawn mi thuruk in sawi peih tho ang" an ti a, an ngai ho khawp mai. 

"Daizaui pawn hmeichhe pakhat phone in a hau a, a ang buan buan a, a mi biak lah kha vanduaina a tawh vanga beng ngawng a lo ni sia, a beidawn em kha. Beng ngawng han khin reng chu a hreh bawk si, mitdel, ţawngthei lo leh bengngawng hi chu mihring nih ve chuan a hrehawm viau ang. Hmusit duh tawk lah an awm zel a, kan ngaihtuah phak baka a hrehawm ka ring. A nuihzat tu te hi chu Pathian hian a en liam mai mai ka ring lo. Tu chungah pawh a thleng thei a, keichu an fakawm ka ti a sin" Bena chuan a ti ve ngei a, rei pawh awm lovin haw ka duh thu ka sawi ta daih a. 

Dawr aţangin kan inzui chhuak a, kawng a kal pah chuan ti lui tih hriat deuh hian min nek leh ţhin a, "I ninawm" ka tih lahin ka sawi angin a lo sawi ve zel bawk si, ka pheikhawk ken lai chuan ka vaw lo chauh a ni. 

Kan mi tawh apiang lah chuan vawikhat min hmuhna ang maiin min en duh a, mi kan tawh apiangin Tintin-a chu a kun zel a, phawk viau mah se a ruih loh chuan boruak a ngam vak lo. 

"Kun zel kher mah ta che..i rui hmel pawh i hmuh tir ngam chuan ngah nge i rui lo hmel i hmuh tir ngam loh ang?" ka tih chuan, "Nangmah zawk hi i zak palh ang. Kalsan tur che ka nih laiin ka kalsan phal si lo che a" a ti zawi sup a, tlangval pathum rui phual mai kan tawk lehnghal a, Tintin-a hming an lam rual chuan a banah ka kuah bet nghal. 

"Buaina emaw ruihhlo emaw ka duh tawh lo a nia" ka tih chuan a ding dat a, tlangval ho pawh chu kan piah lawkah an ding ve. 

"Ngati nge i din?" tih paha a hmel en tuma ka dah deuh chuan a lo kiai suk a, "Mi â nu" a ti leh sup a, a chek zui tlak mai. 

"I zui ţhin te an nia ka fimkhur alawm. Tlai aţangin an rui leh em em tawh a, heng ho hian an sawm lungleng leh ang che tih ka hlau" ka tih chuan, "Vanrami bakin ka lung a len love" a ti deuh nghut a, tlangval ho lam chu hawiin, "Kalsan vat teh u hei ka bialnu hian a hlau che u a nia" uangthuang deuh hian a ti leh ang lawi a, an phun nak nak ri chu ka hre reng a, mahse hetiang ho hi chu chhan loh a ţha ber. 

Thlang lama a nu kal kan hmuh chuan, "Ka nu Ruat, i dul zawnah khan eng nge i paipawn a?" tiin a nu dul kiar chu a au el a, nu Ruati chu a lo hawi chho vut a, Tintin-a nen min hmu duh chu mak a tih vak hmel loh. 

"Dawr i khar lehpek tawh elo? I va han nikhua lo em em ve...nikhatah darkar10 tal chu hawn tum ve rawh ka tih che kha. Vani, khapa kha lo hau ve ngei ngei ang che. Ka kham a nia" a ti lang lang a, anni nufa hi chu hetiang reng hi. Pakhat lah chhaih kawlh awlsam, pakhat lahin chhaih kawlh nuam a ti bawk. 

"I mo tur a nih vang ngawtin tir nghal lo la" tih paha Tintin-an min kuah chuan, "Lo hau rawh tih mai mai tir a ni em ni? Vani kha han thlah la, zu in suh. Rawn haw tlang nal nal ang che. A nih loh chuan kan inbuan ang" a ti a, nui huau huau chung hian a kalsawn a, Tintin-a zu nghei hi chuan nu Ruati pawh a ti lawm ve chiang a ni. 

"I chhungte ti hlauthawng a ti mangang zawngin awm tawh suh aw. Tunah pawh zu i nghei a, an lawm em em a, nghei nghal hmak chu a har dawn tih an hre ve. A hma ang khan rui bualin haw tawh lo la, i laka an phut hi a tlem a nia" amah en chunga ka tih chuan, "I sawi ang zelin le. Nghei hlen ka tum ang. Ka duh takzet che a, ka â rei bawk. Hlim i phu ve tawh alawm. I hlimna tur a nih chuan nghei hmak ka tum" a ti a, a mitmenga a tih tak zia leh min duhna langchhuak te chu ka hmuh hmaih bik lo. Ţhen theih loh, ţhen dawn a min ngaihsak vak chi kha a ni ve hrim hrim. 

"Kal phawt ang...i tum chuan i thei a nia" ka ti leh hram a, kan inbul kan thleng a, kan inkawt a U Dino-a lo tei kual vel a hmuh chuan a ding chiang ngang mai. 

"Saw pa sawn eng nge a lo tih ve ziah?" bul zet hian a ti a, ka chhan lawk lohah chuan, "Min chhang rawh" a ti leh hmuk a, tim dai hian ka en a, a mitmeng te chu a hma ang kha a ni tawh lo, a rum ul ni maiin ka hria. 

"Ka nu a lo kan aniang" zawi te tak tak a ka tih chuan a ner sawk mai. 

"Doctor, an patient te kan zui thlap thlap peih an awm lovang. In inkawt a nih avangin engtin mah ka ti lovang. A dik lo zawnga in inkawm chuan in chak lo ang, i hria em?" thinrim hmel pu chung hian a ti khur khur a, a thikthu te lah hi a chhia, a awm ve tho. Mipat hmeichhiatna lama kan fihlim tawh loh chuan thikthu hi a chhe duh bik niin ka hria. 

"Inchhungah a lo lut anga thingpui a in anga, a haw leh mai dawn alawm. A dik lo zawnga kawm dan pawh ka thiam lo. Min va ring chhe ve" ka tih takah chuan, "Puibawihin kei aiin a duh zawk dawn a" zawi sup hian a ti a, zu a nghei a a insit zo vek tawh a nih hi. Inthlahrun nachang pawh a hre tawh. 

"Ka nu duhzawng ka duh ve kher hleinem. Mawl leh lutuk mai, kal rawh ka lo bia ang che" tih paha a awm a ka nam chuan ka kut a lo vuan a, "Ka sawi kha aw...min thlah miah suh ka tih kha i la hria em?" ngenngawl zet hian a ti leh a, hepa hi chu a buaithlak chang a tam ve a ni. 

"Ka hria...engkim ka hre vek. Min ring la a ni mai" ka tih chuan, "A lo hawi, a hmuh lai hian ka muah chawrh dawn che maw ni le" a lo ti a, nui hak hak chungin ka kalsan thei hram. 

U Dino nen inchhung kan luh thlengin min en zui a, a dinna ngaiah a ding reng. A lo lut ve ngam chiah si lo a, nuam lo a ti ru ve khawp ang. 

"I rei lutuk a, phone i la thei bawk si lo. Pu Dino khan a nghak rei tawh che" ka nu'n a lo ti nghal a, U Dino chuan nuih hak hak pah hian, "Rei lo e..ka lo thleng ve deuh chiah" a lo ti thuai a, ţhutthleng a a ţhut rualin phone la turin pindanah ka lut a, missed call a lo tam ngang mai. Thartei hming pawh ka hmu. 

"Hei pindanah ka dah daih alawm" ka nu hmuh tir paha ka tih hnuah U Dino bulah ka ţhu ve a, min rawn rim a nih chuan a nula rim hun a mai ve ngawt mai. Rawng kan bawl mek tawh a, chaw ei hun bawr vel a nula rim daih chu a dangdai ve thlawt. Ka ngaihtuahna chu hria ni awm takin, "In vengah ka lokal remchang em a ka lo tlawh mai mai che" a lo ti a, tawi tein ka nui a, ani hnenah hi chuan han sawi vak tur ka hre lo. Ka nu hi chuan a zah a, a doctor a nihna angin a pu thlap a, kei erawh chuan ka lo biak hrep tawh hnu a nih avangin ka u a, ka zahna ka lantir ve vak ngai lem lo. 

"Lo leng ziah rawh...i reh rei lutuk a kan ngaih a ţha lo mai dawn alawm" tiin ka nu lah chu a nui reng a, min duh pui leh lutuk hi a ninawm lek lek ţhin. Pathlawi mah nise nu te tan chuan Tintin-a ngawt ai chuan a duh awm zawk a, mahse a neih tur a ni tlat lo. 

"Ka buai ve deuh a, zan a chhuah lah khaw vawh zual lai kha chuan a peihawm loh a" a ti charh charh a, hmelţha ve viau mah se a ţawng dan te chu a patling ka ti tlat tawh. 

Ka phone hum lai chu a nghawr chur chur reng a, message leh call ah chuan Tintin-a hming bak hmuh tur a awm lo. 'A haw ţep ang' tih chauh ka thawn a, ka lerh lem lo a, mipa dang nen min hmu dun khat a, ka ngaihzawng hlui nen min hmu dun chiah chu awm ngaihna a hre lo a nih ber hi. 

U Dino haw hnuah Thartei ka bia a, "I lo rintlak loh hle mai. Duhsakin thil ka hrilh che a, i lo hrilh vek tih kar hmasa khan ka hre chiah. Min hel nasa ka ti reng a, thil hrilh chi pawh i lo nih tawp loh hi" a rawn ti nghal bawrh bawrh a, ka thin pawh a rim thei lo, ka nui tawp.

"Zawk zamah che hian. Sensiari hnen aţanga thudik ka hriat vek tawh avangin ka hel char char che a nih kha. I thil tihah Zuali i puh hmin hmak a, sawi pawh ka sawi peih lo. Min duhsak ang deuh a awm siin ka chhiatna tur i ti char char. Sensiari nen min in huat tir phawt hnuah Tintin-a nen min in huat tir leh i tum a nih kha. I thil tih tum dan ka hrethiam vek tawh. Fb a Tintin-a be tu pawh kha nangmah i ni tih nen lam kan hria. Ka ngawih mai mai laiin a pawr zawkah ţang reng reng suh" ka ti ve ta salh salh a, ka nu'n min ngaihven deuh ni a hriain phone chu pindanah ka luh pui daih. 

"Insawifiah ka tum lo, engkim i hriat chuan a ţha a nih chu. I duh duh kha ring teh. Duhsak man i awm lo emai, i hlim chiah em kan hria ang chu" a ti a, phone a dah zui hmak a, ka thinrim chuan ka call nawn tlut tlut a, a la duh tawh ţhak lo. 

'In inah ka lo la kal tho ang' tiin message ka hnutchhiah a, a seen a min chhang duh chuang lo. 

Ni a liam a, thla pawh a liam ve zel a, Thartei nen kan inhmu khatin biakin ah takngial pawh inkhawm turin a lokal tawh ngai lo a, bike a an phur ka hmu vuai ţhin tih loh chu fumfe takin ka hmu ngai lo. An in a kal ka tum nasa a, "Awm mai mai rawh, ţhian kan ni ţhin a, inhauh vak vak a ţha lo. Thil sual ti tu a ni tih i hriain amah a inla hrang a, va khing zui vak duh suh. A tawp a inchhir tur pawh amah tho a ni. Tunah pawh a lung a leng tawh ngawt ang" Sensiarin a tih tlat avangin ka insum hram hram zawk a, Tintin-a lah chu a zia a dang leh daih tawh. 

Thartei ang thoin min hel dan a zawng a, phone a biak ka tum lahin biak hleihtheih a ni ngai lo. Zu a in leh tlut tlut tawh a, buaina pawh a tawk nasa. U Dino vang han ti ngawt dawn ila U Dino-a lo len hnuhnun ber pawh a rei tawh si. A ţhiante ka zawh lahin, "Ngawi rengin zu a in a, engmah a sawi ngai lo. A ţawng ve chhunah lah min vin nghek nghek a, biak loh a him zawk" an ti a, a ngaihna an hre bik vak lo. 

Sensiari lo leng chu Tintina chanchin ka lo zawt a, "Hepa awmdan hi ka hrethiam lo. A pindanah a inkhung char char zel a, zu a nghei tawh emaw tih laiin a in ţha leh a, ka nu pawn hau se a chhang let ngai tawh lo. Nidang ang chu nise ngeiawm deuh deuhin a chhang let ang a, a zia a inthlak hlak a, mi hran daih ang mai a ni" a sawi zawh rualin thawk a la halh a, ral lehlam hla tak thlir ang maiin a awm a, a beidawn ve zia a hmel ah chuan a lang chhuak hial a ni. 

"Kar hnih lai min hel tawh. Ka biak lahin ka buai a tih loh leh ka mut a chhuak a tia, a ţhiante a vin ang thoin keipawh min vin. Thartei a inrawlh i ring em?" ka tih chuan, "Ka hre lo le....naktukah inah a awm dawn. Kan inah lokal la, be rawh. Nang chu a namnul rei thei lo ang che" a tih chuan ka lo pawm nghal thlap a, a chhuah daih hlauin Tintin-a chu hrilh pawh ka hrilh lawk duh lo. 

A pindan chhung ka lut chiah chu ka ner nang nang mai. A hnawk lutuk chu awmdan thiam a har zawk. A mawza te pawh ceiling ah a bet lo chauh a ni. 

"Laltinkhum" tih pahin khum a bawkkhup a a mu chu a hnungah ka nam a, "Imm" tih chiahin min chhang a, thil dang a sawi lo. Khum bula no inhung chu ka ke hmawr in a tai tlu a, zu a lo in hman lehpek a nih hmel. 

"Inbia ang" ka tih chuan, "Sawi tur ka nei lo" a ti hmuk a, a che sawn duh eih lo. 

"Inbia ang ka ti a ni lawm ni. Tho rawh...tunah tho nghal rawh" tih pahin a tshirt ah ka pawt a, ka pawt na bawk aniang a ri ţhawt ţhawt mai. 

"Sawi tur ka nei lo ka tih kha" vin zet a tih pahin khumah a ţhu a, a bulah ţhu nghal tharh mah ila min ngaihsak duh lo. 

"Min hel char char chhan hi eng nge? Min be duh bawk si lo, hetianga i awm thut chhan hi hriat ve ka phu lo mi?" ka tih chuan, "Ka be peih lo che a ni mai" a ti a, min thawh san zui nghal a, "Khawnge i kal dawn?" ka lo tih leh chuan, "Ka inbual dawn. Ka lo lut tawh lo ang, haw rawh" tih leh pindan aţanga chhuah a rual a, min tih dan avanga ka rilru na chu ka tawt up up mai. 

Thawk chhuah halh pahin khumah chuan ka mu a, inchung chu ka melh tlawk tlawk a, a pindan thim deuh ruih chuan nelawmna pakhatmah a nei tawh lo. Saisir pahin lukham hnuai ka zen a, Tintin-a hi a mak ve a, paw lawh viau si hian lukham hnuai a thil dah a ngaithei ngai lo. Chuvang tak chuan lukham hnuaia ka thil dap fuh chu ka la chhuak a, chhun lai a nih avangin parda inzar phui mup mah se chiang deuhin ka hmu thei tho. 

Uluk leh chik deuh a ka en chuan ka mit sulh a, ka awmdan chu ka sawi thiam lo. Ka thil hmuh chuan min ţhawngin ka hmui ka hup a, ka tha khur nasa lutuk chu ka thunun thei lo hial a ni. 

CONT...