BLACK AND WHITE-22

BLACK AND WHITE-22

"Lo han ngaihven teh hei Vanrami a buai vek alawm. Engmah a sawi thei lo" a tih hnuah ka darah bawk a rawn dawm leh a, "Engtin nge Thartei chu a awm?" a ti a, harsa ti tak chung hian, "A ţhiannu'n min lo bia a, damdawi a ei ţeuh a ka kaitho thei lo a ti. Nichinah kan inhau deuh a, i inchhir ngawt ang min tia, keimah vang aniang" ka ti nawk nawk a, ka tha te a khur a, ţhiante chunga hetiang thil a thlen meuh chuan zam chhiat a awl khawp mai.

"An inhau a, Thartein damdawi a ei a nih chu. Han ngaihven teh, chanchin rawn sawi leh vat la" a ti a, an inbiak zawh hnu chuan ka bulah a lo ţhu a, kan thawm hre vek chu u Rinhlua pawh a rawn tho chhuak leh a, "A va ei peih zawk ve. Thih pui tur chuan ei ţeuh a ngai a nga" a ti ban charh a, hei pui hi a pastor ve thei ngût ange maw. 

"Chutiang sawi a hun loh chu" Tintin-an a lo tih chuan, "Ka sawi tum zawk chu dam nan a an siam damdawi kan hmang sual nasa lutuk hi a ţha lo. Ţhenkhatin ruih nan, ţhenkhatin an nunna tih tawp nan an hmang a, damlo damdawi mamawh ngei ngei te tan pawh damdawi lei a ti nuam lo zo vek tawh ang. Lehkha tello chuan an tih deuh tlat tawh hi, kan nun hi a kawi sawi ve bawk alawm" a ti duah a, kan piah deuhah chuan chanchin ngaichangin a ţhu ve ta reng a. 

A khat liam ngang aniang amah vêk chuan, "Tunlai ţhalai tam tak hi chuan damdawi mum hi an chana hmawm thawih thawih a, an vai ruai reng mai, an harh lo" a ti leh a, Thartei ngawt rilruah a awm a, Tintin-a phone chu ka en sek a, ka block na erawh ka phelh duh chuang lo. 

Rei fe kan nghah hnuah Sensiarin a lo call a, ka lak rualin speaker ah ka dah a, "A thi hlawl lo, a ţhiannu nen spicy noodles an lo ei, an si hluam hluam mai" a rawn ti nghal thawr a, min bum tihna a ni maw. 

"An va mawl ve..kei hetah mangang em emin ka awm a, ka rilru a buai a, ka zam chhe nghal der a, intihderna chi pawh a ni hleinem" lungawi lo zet hian ka ti a, "Damdawi ei lovin spicy noodles a ei. A rui deuh e tih lohah chuan a harh ţha a, Thartei a nih chhung chu a intihlum lovang. A rawn vau leh che a nih pawhin ngawihsan hmak rawh. Ţullo ah ka hah phah lutuk a a ţhiannu nen ka han hauh hrep kha" a ti hlak hlak a, ka hlauhthawnna kha thinrimnain a thlakthleng a, Thartei chu ka haw leh hlur tawh. 

"Ka tha te a khur hman alawm. Keimah vanga intihlum turah ka ngai a, ka inthunun zo lo ţep a ni. A ţhiannu lah khan mangan hmel deuhin min rawn bia a" ka tih chuan, "Mawl hek che mawle...Thartei te chu i hrechiang alawm. Tunah ngat phei chuan a danglam nasa tawh a, a fiam kual mai mai che a nih hi. A lo biak leh che pawhin a thusawi engmah awih tawh suh" a ti a, kan inbe zo chu ka thaw huai a, ka zak ru hle bawk. 

Tintin-a te unau lah chuan min en reng a, thil pawi deuh ka ti sual emaw tih tur a ni. "Mr. Noodles a awm kha, va ei ve mai rawh. I â chiat chuat emai, va ei ţeuh rawh" Tintin-a chuan uar fahran hian a lo ti a, "Kan inhau ka tih mawlh mawlh kha mawle..min vau vak a, nang pawh ni la i awih ve tho ang" lungawi lo zet a ka tih chuan, "Ka finfiah thlap hma chu ka awih lo ang. Video call te pawh a theih a, a hun takah hmang ţangkai ta che" min ti deuh nek a, ka melh ram ram chung pawhin a la tum bur mai. 

"Sensiari i tirh danah i awih ve tho a nih kha" ka tih leh chuan, "Awih lo..ka phone aţangin Thartei i block a amah ka be thei lo zawk a nih kha. Be thei ila chu ka finfiah nghal ang" a lo ti a, "Ka phone pawh a awm a" ka ti leh hram a, "I khur dur dur tawh a chutiang ka ngaihtuah si se hman bik lo" a ti vin hlur a, eng chu nge maw a huat em em ni. 

"Ngatinge i thinrim ve ringawt a?" ner pah nang nang chung hian ka ti a, "Aw..Mr. Noodles saw spicy noodles eiin va ei la a nih chu. Thartei bum theih a awm reng reng, i danglam nghal vek. Nang aiin dah pawimawh tawh suh, nangmah kha indah pawimawh ber la, in duat la a tawk" a ti a, Thartei thil tih kual vel dan zawng zawng ka hrilh hre ve vek tawh a, a haw thar leh vel ni awm tak a ni. Ka buai phah chiam kha a duh lo a ni maithei bawk. 

"Nangmah vang vek zawk a nih hi" ka ti ta ringawt a, za lo zet hian a nui hawk a, "Ka hre lo a, a hranpain ka sawm ngai lo bawk. Ti hian tawp rawh se, Thartei hi a hming pawh kan sawi ri tawh lo ang" nghet charh a a tih takah chuan ka ngawi ta hle hle a, U Rinhlua chuan aw a lo thian ve kharh a. 

"Mu mai ang u" zawi tein a lo ti ve a, Tintin-a zawk chuan a melh rum ngang mai. 

"Thu ţha deuh i sawi dawn maw tih nak laiin. Nang pui hi kohhranin hun an pek che hian eng nge i sawi ve ţhin a? I ding chhuak a, ban hla i thlang nghal tawp zel ang a" a ti fiamthu a, a rukin ka lo nui pât pât a, a tih duh hmel tak tak miau alawm. 

"A hunah Pathianin min pe zel mai" a tih chuan, "A rawn hrilh ţhin che mi? Pathianin min pe in tih hi ka hrethiam ve lo reng reng. I mumangah i hmu nge a rawn hrilh ru che? I nau hi mi zawng zawng aiin ka haw bik a ti ţhin em?" meinei zetin a lo ti a, a hmel ka en a, u Rinhluan Pathian hming a lam chu a thinrim hle tih a lang reng mai. 

"A haw bik hleinem che. Nangmah liai luau hian i zir lo a, i khauphar thawven a, buaina i tawh lahin kuttum a chinfel i tum a, i theih loh chinah Pathian i dem leh a, engkima lungawi tum zel hi ring tu zia a ni. Chu chu hrereng tawh rawh" dam thlup a a tih chuan, "Puppet em ni kan nih a? A duh dan danin min ti kual vel ang a, a thu thuin kan awm ang a, min tihdan apiang chu lungawi deuhin kan lo tuar zel ang maw?" a ti khur khur a, a awki pawh a ring sâwtin kawng kalin an hre pha hial ang tih tur a ni. 

"I bo pil lo chauh tawh a nih hi. A kum a kum zu i in tawh a, Pathian duh zawng engmah i ti ngai lo chung hian Pathian lak aţangin thil ţha hlir i beisei em ni?" tiin u Rinhlua chuan a zawt let khauh a, Tintin-a chu a ding hluai a, a inpet ruh nasa mai. 

"Hiv+ in ni..kan hre vek. Ka pi in a boralsan leh che a, chu lo thil duhawm lo engmah a thleng hleinem. Pathian hian a hrem nasa lo zawk ngawt che a sin. Pathian pawi i sawi nasat zia ngaihtuah chuan rap hrual tawp tawp che mah se vui thei i ni lo. Liau luau che hian hrilh fin theih loh" a ti a, u Rinhlua meuh a ţawng ve duah tawh chuan a rilruin a vei ve hle tihna a ni. A nau, a thisen zawmpui a ni a, ani lah pro pastor lai a ni tawh si, rilru nat vawng vawng chang a ngah ve viau ang. 

"Nangni chu enkawlna in dawng ţha alawm. Tupawn an duhsak cheu a, kei ve hi chu maw, ka lu leh ka hnung hi khuang a nih hi. 'Luhlul si, thil ngen reng mai, tirh i har bik, i pa'n a duhsak bik che, i luhlul lutuk hi i ngeiawm' tih vang mai maiin kut min thlak a, kut min thlak ţhin tu tam zawk hi ka nu leh pate an ni lo. Nangni chu an chul hliau hliau cheu a, ran duat takin an duat cheu a, ka chuang bik ziah. Khawi khawiah emaw an hruai cheu a, keichu ka pi bulah min dah ţhin. Ka nu pawh a bang chuang lo, bazar a a hruai dawn cheu pawn, 'Nang chu pawi i khawih ang' a tia, ka pi bulah min dah ziah. Engkim hi ka thiam loh vekah puh miah suh Lalrinhlu" a la ti hluk hluk reng a, a thinrim chu a inhumruh nasa tawh a, tunhma lam thil a sawichhuah vang te pawh a ni mahna a insehruh nasa a, a insum nasa ve viau tho tih chu en mai pawhin a hriat theih. 

"I va hre rei ve" u Rinhlua chuan a ti ban charh a, ka lo mitmei vat a, engmah a hrethiam lo. Ka tih dan zelin a lo ti ve a, Tintin-a ka melh leh a melh ve a, eng emaw tal sawi leh rawh tih tum ka ni a, ka hlawhchham ţhak. 

"Ţhu leh teh..i din uaih reng chuan min tum dawt ang tih te pawh a hlauhawm" a kut vai paha a tih chuan, "Ka mu dawn..nangpawh pindanah lut tawh rawh" a lo ti a, a kal ve nghal mai a, a mu dawn maw tih laiin Bible nen a rawn chhuak a, Tintin-a pawh a hawihai nasa mai. 

"Bible hi la teh" a ti a, Tintin-a chuan a lo la ve mai a, "Tikhan, Bible keng chung khan Pathian a awm lo, min haw bik han ti leh teh" a tih chuan ka pasal chu a ngawi reng a, "Ti rawh..Bible a nih kha, a seh dawn hleinem che. I nupuiin nau a pai mek a, i fa lo piang tur hian eng kawng nge zawh se i tih? Aa...chulam chu ngaihtuah a ngai lo, ti tura ka tih che chu ti phawt rawh. Sawi rawh...kan naupanlaiin ka piin min zirtir ţhin kha, Bible hlutna pawh a sawi nasat ţhin kha, chupawh chu ngaihtuah duh suh, sawi tawp mai rawh" tih zawngin a nawr a, hrilh ngaihna ka hriat tawh loh, ka ţawngţaipui tawp ţhin kha a ni a, a hmangaih em em naute leh ka pi tawk tarhah a hmang a, tih dan a thiam angreng. 

"Eng thil teh hrep nge i duh a?" sehchilh zet a ka pasalin a tih chuan, "Pathian a awm lo..awm pawh nise min haw bik aniang i tih ţhin kha. Chu chu sawi nawn leh turin ka duh che" a lo ti sam et a. 

"Phiangsen che hian..eng angah nge i in ngaih a? Naute leh ka pi i hmang ţangkai maw?" a ti vawt ruih a, a thusawi tawp lamah chuan a nui pah hawk a, a nuihsawh a ni zawk mah ang chu. 

"Naute a la piang lo a, ka pi a boral tawh. Hman ţangkaina an awm hleinem. Pathian i dem ve ngawt a, a awm lo i ti vei rawk a, i hlau hle tho chu a nih kha" tih pahin u Rinhlua chuan Bible chu a laksak a, an unau chuan an indin chilh ran a, upa zawk na na na chu a sang zawk a, Tintin-a sa a ţha zawk thung. An insual mai ang tih te ka hlau hman dawn dawn a, mahse u Rinhlua hi ka hrechiang a, Tintin-a a insum zo dawn lo ni a a hriat chuan a tlawm zawk hreh hauh lo ang. Inrawlh ve lovin ka ngawi reng a, ka inrawlh ve na hun a ni lo, kei aia sawi thiam zawk leh Pathian hnaih reng tu zawk hian hrilh rawh se. 

"Zu hi nghei hmak rawh kan ti lo. Mipa i ni a, i nun duh dan leh i ţhian kawm te ngaihtuahin i nghei hmak thei dawn lo, a chiang sa vek. In tlem la, zawi zawiin nghei tum rawh kan ti. En hrang bik ni a i inhriat phei chuan insiamţha rang rawh. Anni aia i hlawhtlin chuan i nin khawpin an zar hneh ang che. Pathian hnaih la, tun hi i dinhmun chhiat lai ber ni bawk rawh se. Hmalam pan la, hnungtawlh leh tawh ngai suh. Hetiang bak hian ka sawi thiam lo, ziak ila chu ziah tur ka hre ţeuh ang" a ti a, a tawp lam a nawi leh ka ring reng a(h).

"I hawrawp a chhe emai ka chhiar peih lo" Tintin-an a lo ti a, sawi nawi dan a zawng a nih chuan a ning hle tawh tihna a ni mai. 

"Nichina Vani hnena i sawi ang chiah khan nangmah kha in hmangaih rawh, i nihna ang ang khan in pawm la, indah hmasaber rawh. Chumi hnuah midang hmangaih a pawm thiam dan te, dah pawimawh dan te zir leh zawk rawh. Nangmah i inhmangaih loh chuan midang hmangaih dan i thiam lo ang" a tih chuan, "Ve che hian...nang a bialnu pakhat pawh la nei lo khan hmangaihna chunchang sawi ve ringawt suh. Pathian hmangaihna bak i la tem ve tawp nang" duhdah zetin a lo ti a, u Rinhlua chuan chil a lem khawlh a, a ngawi ta reng a. 

"Eng nge i la tih?" Tintin-a zawkin a tih chuan, "Sawi tur ka ngaihtuah" a ti a, ka nui chhuak hak a, kan thutak tlang viau nain ka insum thei hlawl lo a ni. Tintin-a nen kan inhnial lai khan a ngawi reng a, a sawi zawh tak te kha a ngaihtuah khawl a ni maithei a ni. 

"Min nawr lui suh, ka peih lo a nia" a ti a, bedsheet a pawt pharh a, chhuat a ka mut bu phah sa chungah chuan a phah a, "I kawchhungah hian tulum a lut aniang" pakhat chuan a lo la ti hram a, "Va mu mai mai teh" a ti hluk a, bedsheet chu amahin a phah mawlh mawlh a, keipawh ka ţhutna ngaiah ka la ţhu reng. 

"Inhawng la..tulum ni lovin Pathian a rawn lut mai ang. Zu ah khan eng thil ţha mah a awm lo. Hmelchhiat leh ât chiah i hmabak" u Rinhluan a tih leh chuan, "Ninawm e aw" tih pahin a rawn hawi let a, chhuatah a ţhu tung ut bawk nen, a awmdan chuan nuih te lam lam a ti za. 

"Nichinah an ţawngkhum ţhin dan che i sawi a, i insiamţhat loh chuan khang ho mai bakah khan, hmelchhe bawk â bawk tih an belh leh ang a, i lu leh hnungzang mai bakah i mawng thlengin khuangah an hmang mai ang" a ti chu Tintin-a a meng nur nang a, a ngaihdan a ni lo leh hle tawh. 

"Tintin i hnar kha kg engzat nge an la ti mai tur a sin" nui suk chung hian a ti a, chhuata Tintin-a ţhu tung chu a mawngah a tlawh zauh a, "Inrinni tuka ser tham lawih hnar neih i duh loh chuan zawi zawiin sim ang che" tiin a fiam leh a, nui ruh ruh chungin pindan lam a pan a, ka thawveng huai mai. Bible zah nachang a la hria a, Bible keng chung meuh chuan Pathian a zah lohna thuna chhakchhuak ngam lova, a thinrim leh beidawn em vang chauh a Pathian dem mai mai a ni tih a hriat reng. A nun a tuihal ruk lutuk vang a ni thei bawk. 

"Tlangval Rinhlua sawi tur hre ve lutuk kha mak i ti ve em?" a ti deuh hu a, phawk deuhin min en a, "A damloh changa 'i eng nge na?' an tih pawn 'na' tih bakin a chhang ngai lo. Eng nge a hriat le?" mak tih hmel taka a tih leh chuan, "A vei lutuk che a nih kha. Vei viau lo che sela chuan khatiang em em a tam sawi tur a hre lo tawp ang. I ţhat loh a hlau a, a khat liam ve a nih kha. Nangmah hmangaih tu ho che hian hremhmun a i tlak kan hlau alawm maw" fiamthu ti tak deuh hian ka ti a, a nui ţha duh miah lo. 

"I bo hlen hlau tu vek kan nih hi...kan hau che a, kan zilh che a nih chuan kan hmangaih che tihna a ni mai. Hmangaih lo che ila chu a nung chungin hremhmunah lum lut dawn mah la engtinmah kan awm lovang, kan en tawp che anga, a lum muang emai kan tia nga kan vawm lut lui duh zawk ang che. Mahse, kan hmangaih che a, hremhmun a i kal hlauin theihtawp kan chhuah tlang a nih hi" ka tih chuan, "Mu mai mai teh..tlangval Rinhlua ang mai" a lo ti hluk a, "Ka hre pha a nia" pindan lam aţanga a rawn tih chuan kan nui dar dar a, boruak pawh a nuam leh ta viau a, Tintin-a kha a thinrim viau dawn maw tih laiin a inthunun thei hlauh a, u Rinhlua hi chu a zah ve em a ni. A fel ber a, kan hlau lo ber bawk mah se a zahawm tlat. 

Zing ka harh rualin ka tho nghal a, Tintin-a chu ka kaitho duh hran lo. Zanah ka ke sa lutuk vangin ka harh a, a sa a, a za bawk ka ti mai, a mut luih theih hlawl loh a, fan a awm bawk si lo nen, tui vawtin ka sil ţhin a, awmzia a awm bawk si lo. Tihngaihna kan hriat loh tawpah chanchinbu hlui kan zawng a, min zah sak a, inthlahrung viau mah ila amah berin, "Ka lo zap ang..mutthilh tum rawh" a ti tlat si a, ka mutthilh thlengin ka ke a zap a, ka naupai vang a nih ka ring chiah lo, nau ka pai hma pawn ka ke a sa fo a, thlasik ah pawh ke hmawr lawr chungin ka mu ziah. Chu chu a hrechiang a, a mut a chhuah viau hnuah pawh a zap lui zel a, ni lo se chu ka kaitho hma ve ang ka ti a nia, u Rinhlua pawh a lo tho leh daih tawh. 

"Thingpui i lo in tawh em?" ka ti nghal a, "A hang chuan ka in a" a ti a, a thlum a la beisei deuh ni a hriain ka chhuang thuai a, gas ka herh hniam hnuah inphihfai turin bathroom ah ka luh san a, a in tawh tho a, ka hmanhmawh vak peih lo. 

Bathroom aţanga ka chhuak chu min lo en vung vung a, ka ngaih a ţha lo leh hman ţep tihah, "Vani, i va uak khat ve" min ti a, ka chil ka hak lo chauh a ni. 

"Kan awm ho tam lo a, i hre lo mai mai a nih kha. Bakah a hrehawm zual lai kha buaina ka ngah lai a nia, ka buaina te khan a hliahkhuh nge pawh ka hre tawh lo e a. Tunah pawh a la hrehawm tho a, insawiselna neuh neuh chu ka nei reng" ka ti duah a, a lo bu nghat nghat a. 

"Naute kha a ngaihtuahawm em? Ka sawi awmzia chu" a ti a, a ngawi daih a, ka lo nuih sak a. 

"Doctor ka rawn pah reng a, damdawi ka ei ţha bawk a, nau ka pai tih ka hre har lo a, Pathian zarah eng em a ti lo turah ka ngai. Keichuan ka veng thei lo a, Pathianin min ven sak em em ang, theihtawpa in enkawl hi ka tih ve theih tawk a ni mai" ka ti a, hmai te ka hruk hul hnuah thingpui ka siam a, naute min ngaihtuah pui ve ringawt pawh hi a lawmawm. Ngaihtuah pui tu ka nei tlem a, "I ţha em? Naute a ţha em?" ti a min zawt tu phei chu tlem te chauh an ni. 

"Neih hunah fimkhur a ngai ang a tiraw? Pawngpaw san tawp chi a ni dawn lo a ni maw?" a tih leh chuan, "Awii..i sawi dan a mak thei e. Khalam kha chu doctor kutah ka dah tawp. Neih dawnah chuan doctor ber chu ka natna hrilh vek a ngai ang a, lehkha an hmu vek dawn bawk a, tihdan an hre mai ang. Keipawn ka hre ve nual tawh" ka ti a, chawhmeh siam tur ka dah chhuah hnuah chaw ei dawhkan chu ka kil ve a. 

"Engtikah nge in haw dawn?" a ti mai chu a inthlahrunawm duh a sin. A ţawngkam a nem ve vak bawk si lo, fiamthu a khat ropui si, nui miah lova kan haw hun tur min zawt chu a nuam hlawl lo. 

"Chawlh ka nei tam lo a, naktukah chuan haw ngei ngei a ngai tawh ang" ka tih chuan, "A va reh dawn ve..ka ţhian bengchheng ber lah kan ei daih si a" a ti a, a hmel landan a ngai reng a, a fiamthu nge fiamthu lo tih pawh a hriat theih loh. 

"Ţawngţai tam rawh aw. Beidawng lova i dil char char chuan chhanna i la hmu ang. Nangmah i pawimawh ber rih" a ti a, ka nui a, ka chhang lo thung. 

Tlai daiah Tintin-a nen kan lengchhuak a, boruak a nuamin a reh ruih mai bawk si, rilru thlengin a thiang kâk ni berin ka hria. Ni a sa lem lo bawk a hnim chungah kan ţhu a, ral lehlam hla tak chu kan thlir vang vang a, ruah sur tur ni awm takin tlang te chu chhumin a bawk lûk a, a lunglenthlak a, thil tam tak ngaihtuah a awl takzet a ni. 

"Ruah a sur dawn aniang a" ka tih chuan, "Tunlai khaw awmdan chu sawi lawk theih a ni tawh lo" a lo ti a, a dik ve reng mai. A mumallo a, ruah a sur dawn emaw tih laiin ni a sa leh uar a, ni a sa reng dawn emaw tih laiin ruah a rawn tla leh thut a, chutiang vel mai mai chu a ni.  

"Hetia en mai chuan a lang hring nghalh vek a, a hmunah sawn kal ta ila engtin nge a awm ang le? En ringawt a a nawm hmel ang hian a nuam tak tak angem le?" ka ti sap sap a, "Damin i rawn let lo maithei a ni" ka pasal chuan a lo ti a, lungawi lo zetin amah chu ka en a, pawisawi loh hmel deuh hian min lo en let a, "I va han romantic lo ve tak" ka tih chuan, "Ehh...va kal chhin ila, kei aiin i romantic lo ang aw. Thingkungah kan bet dun vûng maithei a ni" a ti a, lunglen a hnawt ţiau vek thei alawm le. 

"Thingkunga beh kher a ngai awm lo e" ka tih chuan, "Mi kal ngai lohna a nih chuan rul te, sakei te a awm lo ang tih tu nge sawi thei? Rul leh sa pui tih vel chu hmachhawn aiin bihruk emaw tlanchhiat ka duh zawk" a ti a, "Engati maw?" ka lo ti leh a, min nin hmel deuh hian a thaw chhuak hluai a, "E le...ka hneh dawn loh vang mawle. Chempui leh silai nen pawh ka cho chhin ngam lo. Intawk thut mah ila a tlanchhiat theih chuan tlanchhiat ka duh tho tho. Min seh ve uk siin min ei zo lo ting tang a, kan dam ve zel tho a nih chuan nu ho in fate tih ţhaih nan tak min hmang mai dawn a sin" a ti a, a hawisawn hmaa a nui hmel chu ka hmu hman a, min fiam nan hrim hrim a sawi uar leh tawh tih a hriat reng mai. Nui lo mah se ka awih chuang lo ang, ka hrethiam pha ve tlat. 

"Pathian zara kan dam a nih chuan fa kan la nei vat dawn a, ho lutuk tawh lo teh. Thutak i pai tam lo lutuk te hi a manganthlak" ka tih chuan a nui hawk a, ka fa pa ngei chu a ni ve si alawm. 

"I phunchiar sawt si" a ti a, min hlat zawnga a tawlh daih chu hrethiam lo zetin ka lo en a, "I haw duh tawh mi?" ka tih chuan, "Duh mai mai lo..ka mu dawn" tih leh mut a rual a, ka malchungah lu a rawn nghat nghal zat bawk. 

"I va han ho mai mai tak. Ka ngaihtuah mai mai zel a, ka pi khan naute hi a hmu ve hman ta si lo a, mitthi tawh te hian van aţangin min rawn hmu thei tak tak angem le? A awmna hmun aţangin a rawn en ve tho angem le?" ka ti niah niah a, a ban pahnihin ka taksa chu a kuah bet a, ka dul zawnah a hmai a phum tlat bawk. 

"Hmu thei ang...a pian niah tukverh bulah kan pawm dawn nia, van aţanga hmuh chiah theih turin" naupangchhia zet hian a ti a, ka dul zawnah a thaw lum ham ham a, ka pasal a ni tawh nain ka hmangaih em a, a thil tih hote pawh hi ka taksain a hria a, ka la danglam fo mai. 

"Mihring hi in kalsan vek tur kan nih rualin kan hmangaih deuh leh min hmangaih tu ni bawk an kal ve meuh chuan hriatthiam a har ţhin. I tawrhna pawh kha a âwm lutuk alawm mah se nakin lawkah naute kan nei dawn a, mahni inhloh ţhak khawpa sun chu a ţha lo. Inţhen lo thei lo a kan awm phei chuan naute hi fahrah a ni der dawn a sin" ka tih chuan a zangthal thawk a, "Chutiang chu a thleng lovang" khauh zet hian a ti a, a sam khawih sak pahin tawitein ka nui a, a hmangaih ka tih tawh kha. 

"Ka ţhen dawn lo che. Thihna bakin min ţhen thei lo ka tia ka sawichian tawh kha" a ti leh a, ka la ngawi reng a. 

"Ka fa hi khawvela naupang vannei ber a la ni ang. Khawvel êng a lo hmuh ve ţan tirh aţangin kan hmangaih ber a ni nghal ang a, zan a mut theih loh hunah kan inpawm chhawk ang a, mutthilh a awlsam theih nan hla kan sak sak ang a, dim deuhin kan awi ang a, naupan laia kan ei ve phak loh, a tui tui kan eitir ang a, kal kan zirtir ang a, tuman an tihnat emaw a mittui an tih tlak ka phal lo ang a, ţawng a thiam tirh a a thusawi hmasaber ber chu damchhungin kan chhinchhiah thei hial ang chu. Fa kan neih belh leh a nih pawhin ka fate ho chu an sual emaw an fel emaw thlei bik nei lovin angkhat vekin ka en ang. Midangin duat bik an neih ka rem ti lo bawk ang. Duhsak bik an awm chuan naupang rilru a kal sual a, khalh ngil a har tawh. Ka rilru ang hi mipa zawng zawngin an pu ve kher lo thei a, keimah ang hian an fa lo piang tur an nghakhlel vek lo maithei bawk. Mahse, keichuan ka nghakhlel a, pa ni turin ka inpeih tawh, pa ţha ni turin ka tih theih ang ang ka ti vek ang"

A hmel thutak zet chu ka en a, ka mitah min lo en vein ngaihawm deuh hian a nui a, "Ka ti tak tak" a ti sup a, rawn inbeng kang zauhin ka hmuiah a fawp a, a mut ngai bawk chuan a mu leh a. 

"I fa chu a ţha ber i duhsak a ni maw?" nui var var chunga ka tih chuan, "Nu leh pa te chu an ni vek ang. Fate tan chuan a ţha ber an duhsak ţhin ang. Fate hmangaih lo tawp mihring hi an awm a nih chuan an nun a tluang hauh lo ang. Keichuan a pian hma aţangin ka hmangaih a, ven him duhna ka nei nghal bawk. Thil dangah chuan ka sual, ka zep lo. Mahse, kan fa lo piang tur hian, 'ka pa aia pa ţha ka tan a awm lo' a tih theih turin ka awm ang" a ti a, a uang lo ve tehmial a, heti khawpa hmangaih tu pa a nei hi a vannei a, nakinah amah ngei hian a vanneih zia chu a la hre chho zel mai ang. 

"U Rinhlua sawi ang khan zu i in a nih pawhin i in tam tawh lo ang a, tunah hian kohhran in min la phuar ve ve mah se kohhran kan bel tlat tho ang. Dan thianghlimin innei thei lo mah ila kristian chhungkua kan din thei tho a, ka pi thusawi kha kan zawm ngat phei chuan chhungkaw awhawm tak kan la ni thei" ka tih chuan, "Ka tum tawh tak tak ang" a lo ti a. 

"I chiang chiah maw? I sawi mai mai lo tiraw?" phur zet a ka tih chuan, "Ka tih theih loh tur ka sawi ngai lo, i hriat vek kha. Bakah chhungkua ka nei thuai dawn a" tih pahin amah en a ka kun chu a kut phah lum vung vung chuan ka biangah a lo dawm a, "Tintin, ka ring che. I ti thei tih ka hria alawm. Ka ring lutuk che" ka ti mawlh mawlh a, ka lawm hmel a hmuh chuan a lo nui ve suk a, ka biang a dawmna chu thlahin a inbeng kang a, dimtein ka hmuiah bawk chuan a rawn fawp leh a, naupang thawm chu hre lo ila a inla hrang lawk lo maithei a ni. Phun bul bul chungin a tho a, ka ruak huai mai. “”

"Tunah tak chuan kan hringnun hi saw tiang saw a ni tawh" ka bula a rawn ţhut ve rual chuan ral lehlam hring dup chu ka kawk a, "A hring ve tawh" ka ti a, a banah chuan kuahin lungawi deuhin ka ngheng a, "Rawng nei loah chuan let tawh miah lo ang aw. Hma sawn zel ila, kan hringnun hi a kalkawng a ngil purh lo a nih pawhin hring reng tho rawh se. Harsa chung chung pawhin a var lam ah kal lui zel ila, a harsa lai kan pelh fel meuh chuan nu leh pa tam tak angin kan hahchawl der der thei tawh ang" ka tih lai chuan ka chhipah a khabe a lo nghat a, kan awmdan chu a nuamin pawisa tam tak pawn thleng min dil se ka phal kher awm lo e. 

"Khawvela kan awm chhung chuan Pathianin hrehawm tam tak kan tawrh a phal a, kan hmangaih ngawih ngawih te kan chân pawh a phal a, natna kan tawrh a phal a, amah kan pan a, a angchhunga kan tluk luh chuan natna min pe tu bawk hian min lo ti dam leh ţhin. Vannei bik, duh apiang nei thei, engmah chân ve ngai lo, na ve ngai miah lo han ni ta chiah ila, Pathian kan hlat ang a, kan mihring puite hriatthiamna kan nei lo bawk ang. Hun thim leh hrehawm kan tawrh chang hian kan tuar thlawn tawp ngai lo, eng emaw zir chhuah kan nei ţhin a, a hma aiin kan paukhauh sawt ţhin. Pathian laka vui leh a awm lo ang maia ngaih chang te a awm ţhin a, chutiang hun a lo thlen pawh chuan Pathian vek hian a awm zia min hriattir leh ţhin a, kan tana ţha tur zelin ro a rel ţhin tih hria ila kan hahdam mai" ka ti malh malh a, ka thusawi chu a ngaihthlak leh ngaihthlak loh pawh ka hre lo, keimah zawk hi ka hahdam a, ka hlim veng veng mai. 

Inkai rialin inlam kan pan a, u Rinhluan mikhual a nei tih hre tu ho chuan min lo be luam hlawm a, kan haw hun tur te min zawt a, an felin an bengvar hlawm khawp mai. 

"Khawpui a chengte hi an inpawh vak tawh lo a, kan khua pawh hi kan ni ţan tawh. Aizawl ang em chuan a la pui ve lo nain a mi chengte hi tun hma ang khan kan inpawh tawh lo. Kan naupanlai kha chuan a la nuam viau a, a danglam chak tak tak a ni. Mitinin changkan lam kan pan a, kan inpawh lo tial tial a, ţhianţha ngah ve deuh tur chuan dinhmunin a zir a ngai te an ti mai mai tawh a, thingtlang mi te nun hi ka awt letling tawh zawk. Hmasawn hi a ţha a, changkan pawh a ţha, mahse changkanna in a ken tel thil ţhenkhat hi chu ţha ka ti lem lo. U Rinhlua pawh zawt rawh, kan khua ai chuan tuna a awmna khua hi nuam a ti daih zawk ang. A mi cheng te an fel si, kan u a awm chhung chu zin fo tur a ni, ka zawng chhang riau" ka tih chuan a lo nui hawk hawk a. 

U Rinhlua pawh naupang ho nen an lo inkhel leh a, min hmuh rualin, "Nu Duhi leh nu Piangi ten in hawn tur an lo dah kha aw" a lo ti var a, inchhunga kan lut chu min zui lut a, thlai leh zo buh ni awm tak a lo awm ruih mai.

"Bike ah kan phur thei dawn mawni le..Vanrami lah indim a ngaih lai a nia" tih bul bul pahin Tintin-a chuan a lu a tuai a, u Rinhlua chu a en ran bawk a, thu a awih ve hmel reuh lutuk ringawt. 

"An hre vek tho. Sumo emaw lirthei dang kal remchang thawn tur a awm mai ang. Ka nu ten an lo chang ve tawh anga a ni mai" tiin u zawk na na na chuan tih dan tur a ngaihtuah nghal zung zung a, mi a be kual a, ka nu te thlengin a be nghal vek a, a biak zawh chuan, "In thawmhnaw pawh kan thawn tel dawn nia, Vani tan a hahdamthlak deuh ang. Nge ni a Vani pawh hi sumo in a haw mak dawn mi?" a tih chuan pakhatin, "A ţullo" a lo ti bak hluk a, kan u chu a nuih a za viau mai. 

"Ka nu bawk chu" tih leh phone lak a rual a, a meng phawk deuh a, phone chu speaker ah dahin, "Han sawi ţha leh teh ngaithla ve teh se" a ti zui zat a. 

"Eng nge sawi ţhat leh ngai Lalrinhlu? In mawl bet but lutuk mai. Nichin khan ar kan talh a ei pawh kan la ei zo lo i ti em ni? Nang khan artui i kang ngam ţawk a, ar note pawh i talh ngam dawn lo. Tu nge talh? Tinkhuma em ni?" a ti a, a au in a au a ni ber e. 

"Ni mai e. Kan talh daih tawh" u Rinhluan a tih chuan, "Nu leh pa rawn nachang hre ve ta che. Hei an lokal si a ar ka talh tir dawn a sin te ti la, Tinkhuma lo midang talh tir tur zawng rawh te pawh kan ti mai dawn alawm" a rawn ti a, Tintin-a chu ka melh ralh a, ngaih a ţha lo nghal khawp mai. 

"Sensiari chuan a hria" a tih leh chuan, "Lawmnasangzuali te chuan pi pute duh loh zawng te chu a hre tawp nang. In â emai, nupuite rai laiin ar talh tur a ni hleinem" a rawn ti a, u Rinhlua chuan min rawn en a, ka hlauthawng hmel a hmu aniang, "Pathian aţanga chhuak a ni lo a, hmanlai pi leh pu te chu an thi tawh alawm. Vani ngaih i ti ţha lo ang" min hnem tum deuh hian a ti ve ngial a, "Pi leh pu te duh loh zawng hi chu tih loh a ţha. Thil pawi a thleng lo turah ngai phawt ila, i upa ber a, chutiang te chu hriat ve tur che alawm" ka nu'n a rawn ti leh a, "Ka lo hre tawh ang" a ti ban charh a, Tintin-a ber chu hlauhna em em pawh nei lovin a nui chhuak ta hawk a. 

"In mawl zo zai emai...rilru hahdamin ka awm ve hman lo" ka nu'n a tih chuan, "I buai em ni?" a lo ti a, a ti lui deuh niin ka hria. 

"Buai vang a ni hleinem...nangmahni ho hian hah inti dam lo a nih hi. Naute chu a ţha turah ngai ila, aaa...beisei phawt mai teh ang. I naute chu lo haw thuai rawh se" a ti a, min la hua angem le tih zawngin ka lo ngaihtuah nghal a, Sensiari nen kan la inbe leh miah lova, ani leh ni lo angin Thartei pawh a la reh vang vang. A lo chingfel thei em ang chu maw...ka sual loh zia leh rilru chhia ka put loh zia tal a lo hrilh hre ve em ang chu. 

"A thinchhia i ti em Vani?" u Rinhluan a tih chuan ka lo nui mai a, "A ti ang...ka nu te chu tupawn thinchhia an ti vek. Tlangval rual insual pawh a ţhelh ngam a nia, Vanrami tan hlauh loh ngaihna a awm lo" Tintin-an a lo ti fiamthu a. 

"A haw lo che" pakhatin a lo ti thung. Ka en nghal vat a, "Tuna min biak danah pawh khan a hriat. Runluih loin ţhat chhuah la, in ţha tlang a ni mai" tlang takin a ti a, a ţawngkam thiam loh ang ang hian a ţawng phawng phawng a, filter a awm ve lo. U Rinhlua sawi a nih chuan ka lo ring hmiah a, Tintin-a chu enin ka nui a, min lo nuih let ve a, kan hringnunin rawng a chhuah ve mek zel chu a nih hi. 

CONT...