BLACK AND WHITE-23

BLACK AND WHITE-23

(Ka'n sawi lawk lawk...Vani nau neih hun tur a tawp lamah ka tarlang a, a awm lo in ti maithei. Mahse, february thla hnu lamah khan ni leh thla a liam zel a tih khan ka ziak lang si a, a awm ang thei tura ka tih zawk a ni tih min lo hriat sak dawn nia aw)

U Rinhlua inleng ţhang ho, a pawh zual deuh te chu zanriah eikham rualin an lo lut sap sap a, "Eng tham a ni lo na a" tiin kan hawn tur an lo keng a, a inthlahrunawm zawk. Lawmthu sawi kan thiam vak bawk si lo; Tintin-a chuan kan hawn tur ho zingah a dah nghauh nghauh a, keiin ka thiam dan tawkin lawmthu ka sawi a, eng kan nih loh nen duhsakna kan dawng nasa a, an zahawm khawp mai. 

Kan in ep chiaha miten thlai min lo pek ve chuan, "A ngai tawh lo..a tam tawh" u Rinhluan a lo ti a, ka melh hrâk a, a ngawi zui dâk a, lo lak tawp aiah lo hnar der ve a tum a, a ţawngkam thiamnain a tlin hlawl lo a ni. Polite a tum lutukna polite lo deuh angin a lang daih a, ngawi tawp se a fuh zawk. 

"Tlangval Rinhlua ţhin hi a...i ta tur pawh ni lo te chu ngah nge i lo hnar ve ringawt? Kan hawn vek anga...kan ei tlut tlut mai dawn alawm. Ka nu phei chuan hawn hmaih neih a hlau nasa a nia, lawmthu lo sawi mawlh mawlh rawh u a tia, awm ve phei se chu mittui nen lawmthu a sawi ang chu" nui chunga Tintin-an a lo tih chuan kan inleng te ho pawh an nui dar dar a, "Vanram, thingpui tui tawkin lum sak rawh. Chhang pawh kan lei kha, hei an zarah chawhmeh te kan hawn ţeuh dawn a nia" a ti zui zat a, a ni tak tak a, an nei bik hauh lo a, thar ţha vak lo te pawh a awm, u Rinhlua chhungte kan nihna laiah an neih ang ang min pe khawm ve a, hei ringawt pawh hi a lawmawm lutuk ringawt. 

Thingpui an in laite chuan min fak ve mawlh mawlh a, u Rinhlua phei chu an fak nasa zualin a fel zia ngawt mai an sawi a, pro pastor term hi kum 3 lai a nih ve nain he khuaah hian kum khat leh a chanve vel bak a awm tawh dawn lo a, an ngaih tur zia te sawiin an ti ti mam mam a, u Rinhlua tan tak pawh a lawmawm ve ang. 

Inleng te haw hnuah mu turin kan inbuatsaih a, kan bungrua chu kan tlangvala chuan a endik vel a, hawn hmaih kan neih a hlau a ni ber. 

"Lo haw sek ka duh lo a, helai hmun hi ka rawngbawlna a ni miau a. A hman remchang apiang lo zin zeuh zeuh rawh u aw" a tih chuan ka khawngaih angreng. Tlangval a ni a, Tintin-a nen hian inchhangbung an ni. A la upa bik lo a, a zir zawh hnu hnu khan hna a hmu har lo a, kum tam pawh a vei hmaa pro pastor a ni thei mai kha amah pawh hian mak a tih thu an sawi fo a, u Rinhlua anga vannei hi an tam hran lo khawp mai. Pro pastor chu ni lo se tlangval lenchhuah nuam ti rual a la ni ve a, helai hmun a mahni a awm ngawt ngawt chu hrehawm tih chang a ngah ve viau ang. 

"Benben-a awmpui la...eng nge i chak ber tih pawn 'thingtlanga ar huan siam' a tih ziah kha" Tintin-an a lo tih chuan kan nui hak hak hlawm a, ar huan siam chu a dangdai hle mai. Naupang tih takah u Mala fapa Benben-a hi chuan thu mak pui pui a chhak chhuak leh ţhin. 

"A nu leh paten an phal lo ang. Bakah Benben-a berkher chu a bo ngun awm emai" a lu tuai pahin u Rinhlua chuan a ti charh charh a, "Emergency light lianpui i neih a, in inzawng reng ang a ni mai lawm. School pawh a chhe hran lo an tih kha, kumthar lamah hruai thla daih rawh. Lunglen a hre hleinem" a lo ti a, mutna ka siam lai chuan an unauin Benbena chanchin an sawi dun a, Maggie leh Bawihpuia hming an lam tel zeuh zeuh bawk a, keiin u Dini ka lo ngaihtuah daih thung. Min la haw reng angem tih thlengin ka ngaihtuah a, min huat chhan ber hi hriatchian ka la chak reng bawk. 

Kan mut rualin ka pasal chuan min kuah leh chawt tawh a, ruah a sur cherh cherh bawk nen, mut a nuam riau. Kan haw na tur ka ngaihtuah a, "Ruah a sur chuan kan haw thei dawn mi? Bakah kawng a nal phei chuan min tlukpui ange aw" ka ti a, a nuih a za viau mai. 

"Zingah chuan zan lama ruah sur kan hre leh tawh lo ang. Ka tlukpui phal reng reng lo che" a ti a, min kuah nghet sauh a, kan zin hnuah zu a la in leh miah lo a, bag ah beer chu ka hmu a, mahse a awm ngai ngaiin a la awm reng a, zanah erawh a mu tlem ţhin viau maithei a ni.

Zingah chuan ni a sa leh tawh a, khua a cheng lo bawk a haw kawngah harsatna kan tawh kan ring lo ringawt a, "Tukţhuan eikhamah haw rawh u" kan thleninpa berin a tih tak tlatah chuan rawng ka bawl a, tlai rawngbawl ngai lo turin ka siam hnem lui a, haw san dawn meuh chuan ka khawngaih thar riau a, hna ka ngah phah a ni. Chawhmeh ţhing ka chhuan lum leh zung zung hnuah tukţhuan kan ei a, kan hawn tur pawh kan thawh hmain a lo thawn fel diam tawh a, keini nupa lahin a thawm pawh kan lo hre lo, inthlahrunawm ve duh tak a ni. 

"Nu Duhi fanu sawn a star deuh chein ka hria. Vanramin min star laia min en ţhin dan ang khan a en ve che" Tintin-an fiamthu a a tih chuan rum deuhin ka lo melh a, "I zak em? Nangmah a nih kha min star hmasa aw. I piangthar der vel a, i zu in ka sawisel pawn 'a suak alawm ka in. Zu rim a nam a, zu a ni lo' i tih tlat zel kha. Kan ţhenawm tlangval senior pawn 'Tintin-a chu a star lai vel che kha khawtlang tana a ţangkai ve lai ber a ni. A ţangkai zui lem hlei lova' a ti vek aw" ka ti zat zat a, a lo nui a, dik a ti ve aniang min hnial zui lo. Mahse, "Star tu nei ngai hlei lo ka star meuh che chuan i inbual ngun em kha. I nu pawn pi Dingi dawrah 'tunlai chu kan sahbawn a hek lutuk a' a ti ţhin" a lo ti veleh a, ka melh vak a, ka thinrim poh leh a nuih a za emaw tih tur a ni. 

Kan chaw eina ka tih fel lai pawhin, "Bike hnungah khawng auhin i ţhu a, min vuan hreh si, i hlauh deuh leh i bawpin min chep vak a, ka tlan muan phah ţhin. I hlauh poh leh i chep na. Engmah ka zawt ngai lo che a, a ruk a ka care ţhin zia che chu maw...na i neih leh neih loh pawh i rim aţangin ka hre thei" a ti a, inchhuan hmel deuh a nui chung hian a dak deuh vah a, "A va han awihawm loh tak" ti a ka lo phun chu, "Mai mai a...i message type dan aţangin i mood ka hre thei vek. Kei anga hrechiang che leh ngaihsak tel tu che an awm lovang" a ti vel a, tuna a sawi hi chu a dik a, thil dang chu a phuahchawp vek. 

"Message chu engtin nge a type a? A mood a chhiat chuan a hawrawp a chhia em ni?" u Rinhluan a lo tih ve chuan beidawn hmel zet hian a thaw chhuak hluai a, "Ni mai mai lo. A bung deuh te a awm ve a, min chhan hmuk hmuk chuan Vanrami chu a lungawi lo a ni maw ka ti ţhin. A thinrim viau phei chuan full stop a tam a, a lungawi deuh chuan emoji a tam a, min chhang hmuk hmuk lo bawk a" tiin a hrilhfiah a, min melh pah zeuh zeuh a, ka nin tawpah phei chuan hmun ka phiah san ta daih a. 

"Hriat a har ve dawn a nih chu. Hmeichhia hi chu hriatthiam theih an ni lo..an lung a awi loh pawn sawi dawt si lovin thil dang hmangin an lan tir ţhin an tih kha. Eng hmanrua tak hmang ang maw?" tih nuah nuah pahin u Rinhlua chuan lu a thing a, Tintin-a awmna zawn ka phiah lai chuan min lo kheuh zeuh a, "Nu Duhi fanu chu? Tlangval Rinhlu" a ti zui zat a, "Ti tawh suh" zawi tein lo ti ve bawk mah ila nui ruh ruh chungin a u chu a en a, nuam a ti bik ţhin a nia. 

"A fanu te hi an la upa vak lo a, naute ang chiahin ka en" a tih veleh "Nangmah ang rual saw? Bai ka suah khan ka hmu alawm" a lo ti leh a, "Ţhian angin ka en" a ti a, mipa na na na chuan hriatthiam chin chu a nei ve alawm. 

"Hmelţha i ti em? An hmelchhiat loh hlawm saw?" ti a Tintin-an a zawh leh chuan, "An hmel ka hmuh vek hnuah nau leh ţhian angin ka en" a ti a, nui tet tet chungin a ţhutna aţang chuan a tho a, "I awmna khuaah hian ţha tih ve deuh i nei em?" pakhatin a lo tih leh chuan, "Ka phek en" a ti leh mai a, "Nula te rim ve la" ka lo ti pek a, a kal zet tawh chu a ding chawt a, a rawn hawi let rang nasa mai. 

"Mahni inah pawh sawi tur a vang a, mi inah sawi tur ka hre ve lo. Biakin ah sawi tur a awm leh a, min ngaihtuah suh u" a ti a, tawi tein a nui a, pindanah a lut daih a, kan nupa chuan kan in en hau mai. 

"Kohhranin nawr lui se a nei mai ang" Tintin-an a tih chuan ka nui hak a, thleng vel ka sil zawhah kan insiam a, kan kal dawn a ka phur nen kan haw tur chu ka phur lo kher mai. Hetah nuam sa deuhin kan awm a, rilru pawh a hahdam a, Tintin-an zu a in lo bawk nen, a nawmna bak sawi tur a awm lo. Kan haw ang a, boruak a lo la ngai reng a nih phei chuan mutthilh lai chiahin kan hahdam ang a, kan harh rual rualin kan ipik lehnghal churh dawn tihna a ni mai a, diktak chuan ka haw chak hlawl lo. 

"Hei ka lukhum ka chhar a, tlangval Rinhlua hian a lo keng ve ringawt aniang khum haw daih rawh. A nuam deuh ang" tih pahin lukhum hma thlawk min khum tir a, "A khum duh lo ang maw? Kan hawn daih chuan khum tur a nei lo ange" ka tih chuan, "Pathum vel a la awm...ka lukhum hlir" uar deuh hian a ti a, in aţang chuan hreh deuhin ka chhuak a, Tintin-an bike a lak hlan chuan kawtah kan lo ding a, nu Duhi leh nu Piangi ten min rawn fin ve vat a, reilote chauh la inhre mah ila ka ngai a, ka haw san hreh viau mai. 

Kan hmaah bike a rawn ding dat a, thawmhnaw kan thawn tel avangin bag tereuhte ah tlem te chauh ka khai a, haw lam chu a hrehawm tawh lo ang. 

"Tintin, lo zin leh vat rawh u aw. In nupa hian kan ngai dawn teh mai che u a nia" nu Duhin a tih hnuah Nu Piangi chuan, "Dik chiah, i ti ti te pawh kan la ngaithla kham hleinem. Vani a chawlh leh veleh in lo zin leh dawn nia. Kha, ka zial khawl a, hei hi hawn rawh" a ti a, Tintin-a jacket ipteah vaihlo zial a khung sak mawlh mawlh a. 

"Ekhai...i va ti lawmawm ve. Ka zuk apiangin ka ţap ang tih te pawh a hlauhawm alawm. Ka ngai dawn mai cheu sia" Tintin-an a tih chuan an lo nui leh uar uar tawh a, "Lo zin leh vat ula a ni mai. Rinhlua chu ngaihtuah lo mah ula in lo zin leh a ngai. Kan lo thlir reng ang che u" an ti a, kan invai liam lai chuan hlim hmel kan pu ţeuh a, lung a leng veng veng thung. 

"Ka bialnu te pahnih chu an va ngaihawm dawn ve" Tintin-a takngial pawn a ti ve a, Boomer kha a ţhianţhaber a ni chungin a ngaih thu hi ka bulah vawikhat chiah a la sawi a, tun ţum chu a lung a leng ve hle a nih hmel, anni pahnih kha chu kan hmu reng a, an lo lutchhuak reng a, an felin fiamthu an duh bawk si, an ngainatawm ve em a ni. 

In kan thlen chuan gate a lo inhawng huai a, bike ri a hriat rualin phur deuhin Benben-a a lo tlanchhuak a, "Gate hi ka hawn a nih hi aw" a ti a, ka bag khai lai chu te viau mah se min lo laksak thuai a, u Mala fate hi an fel tak tak a ni, anmahni phu lovin fa an nei fel ka ti dawn nge pawh ka hre lo e a. 

"Engmah kan lo hawn lo che u a nia" kan tih chuan, "Ar in lo hawn reng...nakinah kan talh dawn" a ti a, ar kan hawn awm ka hre hauh lo. 

"Tlangval Rinhlua aniang" Tintin-a chuan a ti liam satliah a, zo ar kha a vulh ngei a, thawm kan hre miah lo thei kha mak ka lo ti daih a, kan mut hlanin a lo thawk nasa hle mai. 

"I chau em?" Sensiarin ka darah min lo kuah a, ka chauh loh thu ka sawi lai chuan min thlek deuh a, min en vang vang hnuah, "I balh hmel tawp" min ti leh a, a nui zui hak hak a. 

"Tui lum a awm sa reng a, han inbual rawh u. Rinhlua chu a lo lawm em? A khua a har ve ruih ang a, hei vang hi a nia ka tlawh reng duh loh. Kan awmpui hman a nih loh chuan a khua kan ti har mai mai a" ka nu'n a lo ti siam siam a, mak ti deuh a ka en lai chuan ka beng bul teah, "Nakinah" tiin Sensiari a lo phun sap a, u Dini chuan min be lem lova, phone a hmet mawlh mawlh reng a, min en tura a lo hawi chhuah awm pawh ka la hre lo. 

Pindan pawh kan kalsan dan ngai ngaiin a la awm a, sofa ah kan thawmhnaw dahna bag an lo dah thlap a, Tintin-a chu a ţhu chawl rih a, "Inbual hmasa rawh" a tih avangin inthlakna tur nen bualin ah ka lut a, inbual pah te chuan ka ngaihtuah a, ka nu a lo ţha duam a, a unaute pawn min be lem lo nain min lo hau tawh em lo a, u Dini a la ngai reng thung a, kan zin hlan khan eng chiah nge thleng ka hre chak a, min kap run mai. 

"Vanram, i riak nghal dawn mi?" Tintin-a a tih takah chuan darthlalang hmaa ding reng lovin thawmhnaw ka inbel sawk sawk a, ka chhuah chuan a lo chek tlak tlak a, "Darkar khat a tling ţep" a ti a, a nur nang bawk. 

"I ho e a...thil tam deuh ka ngaihtuah alawm. Bakah hmeichhia chuan fai sar chunga darthlalang a in en te hi nuam kan tia, phun phun lo khan va inbual ve vat rawh" ka ti let a, a lo nui suk a. 

"Mi chhan let vak i hrat ţan riau. Kan fa pahnihna tur i pai hunah phei chuan i rap zat zat tawh ang ka ring" tiin min lo chhaih fiam a, "Hmanhmawh mang si lovin min tur vak ringawt a nih kha. Ar pawh talh dawn se u Mama te an awm tawh a, bakah ka nu'n a phal tawh dawn lo. Aaa...arsa hi ka hne tawh e" ka tih chuan a nui chhuak hawk a, "Arsa lo ei la a ni mai lawm" ngaihsam zet hian a ti a, a zawna towel inkhai chu a ban pah vut bawk a. 

"Bawngsa phei chu hmanni deuh a kan hmeh aţang khan ka ngei tlat a, a rim pawh ka hre peih lo. Chawhmeh sawisel a nuam lo a, sawi kher lovin ngawi rengin ka ei lo mai ang. Mahse arsa chu zanin tlaiah chuan an siam hman tawh lo ang tiraw?" ka ti mawlh mawlh a, "I buaina a ho" a lo ti duh lek chauh a, a ho reng bawk a, chuti chung chuan, "Aww..a ho vak hleinem. Sam ka khuih anga inhnuaiah ka chhuk dawn. Ka puih ve loh te chuan a nuam hleinem" ka ti tho a, "I thu thu le" a ti a, uangthuang deuh a ka mawng a ben thak hnuah nui hawk hawk chungin bualin ah a tlan lut a, ka nui ve ta ringawt a. 

Inhnuaia ka chhuk chu, "I chawl rih duh lo mi? Mu daih ta che" ka nu'n a lo ti a, mak ka ti lutuk chu ka hmelah a langchhuak hial maithei a ni. Hetiang em em hian mihring an danglam chak a, rilru an thlak hma tih ka lo hre ngai lo. Danglam thei kan ni takmeuh chung hian ka nu awmdan hi chu mak tih loh rual a ni lo. 

"Zanriah ei hun a ni vat dawn a, ka mut chuan thawh leh a peihawm loh zawk ang. Ka mu zawi duh ting tang lo mai" tiin ţha deuhin chhang ve bawk mah ila a awmdan chuan rilru a ti nuam lo zawk. 

"In zinna chu a nuam maw?" ka pa'n a lo ti veleh a, ani pawh a office tawh aniang a la smart zaih a, kan thlen hlim khan ka hmu ve hauh lo bawk. 

"Nuam a ni mai...u Rinhlua chu a ngaihtuahawm loh lutuk, a ţhenawmte an fel a, nu leh pa ai an awh zo ngawt ang" ka ti ve ngial a, ka sawithiam chiah bik lo. 

"A ţhat nasat chu...ani pawn a fak ve khawp kha. A awmna khua hi a nuam reuh a sin" lungawi hmel tak hian a ti a, "Sensiari ka va pui ange" tih leh choka a luh ka rual a, puitling zinga awm hi harsa ka la ti, an ti ti ka zawm thiam vak lo a, ka chhungte ngat phei chu an kianga awmdan chin tawk ka la hre lo. Boruak kan neihna a la rei lo a, ka hriatchian vek hma loh chuan ka nu pawh ka la be tim tlat. 

"Khawiah nge u Dini?" hawi kual pahin ka ti lut a, amah chiahin a lo awm a, duh zawk tho mah ila midang hmuh tel inring a lut ka ni. 

"Bawihpuia ka va bual lawk ang a ti. Lo ţhu rawh...sa kan hmeh dawn lo a nia aw. Talh tur kan awm si lo a, tuna kan siam khawtlai leh chuan chaw kan ei har lutuk ang" nui rah rah chungin a lo ti a, "Sa chu ka hne" ka ti ve mai a, ţhutthleng ka pawt chhuak a, dawhkan kil chuan ka ţhu ve a. 

"Eng nge awmzia? Ngati nge chanchin engmah min rawn hrilh loh?" ka ti sar sar a, a ep chiah a ţhu ka ni bawk a ka ţawng a hriat chian theih nan a lamah ka kun a, "Ka nu bulah ka sawi vek. In boruak ka tih chhiat ka hlau a, engmah ka lo sawi duh lo a nih kha. Phone vel chungchang zawng zawng nen, ka hrilhfiah vek" a ti a, "Engtin nge i sawi?" zawite tho hian ka ti a, "A huat nachhan che ka zawt hmasa. Ka haw lo a tia, i awmdanah ka hre vek ka ti tlat a, 'Theihtawpin Vani chungah ţhat ka chhuah a, a nute hnen a chanchin a hrilh ngam hma pawhin a lo len apiangin ka lo thlamuan a, eitur ka siamsak a, amah vangin Tinkhuma pawh ka hau nasa ţhin. Ka khawngaih a, Tintin-a nen inru tawp mai se tih chang te ka nei a, theihtawp ka chhuah ve laia engamah hmaa ka mo peih lo a ti ringawt kha ka hua a, Dini lahin sawi tur a lo hre nasa mai sia' a tia, a awm ve tho ka ti. Chhung inkhawm naah pawh i hming lam lovin a ţawngţai ngai mang lo a, message lah kha i phone aţanga thawn chhuah ngei a ni bawk si a, U Dini lahin, 'A fel lo lutuk, a ţhiannu bulah chuti chuan a ti a' tih velin a lo sawi lehzel bawk che sia, ka nu hi a thinrimna pai thei lo, lanchhuah tir zel chi a ni bawk sia, boruak a dik loh phah nuaih a nih kha. Ka hrilhfiah a, a tir chuan a awih lo. Mahse, Thartei mizia leh kan lo buai hrep tawh dan thlengin ka sawichhuak a, tunah chuan a inthiam lo tawh ngawt ang. U Dini pawh a kamkhat alawm" a ti a. 

Amah vèk chuan, "Hrehawm i ti tawh lo ang. Keimah nen kan inkawmna a rei tawh a, Tintin-a nen in inkawp zui leh a, ka nu hian a en hrang ngai lo che a, nu sual tak a ni lo bawk. Message a hmuh a a rilru a nat nachhan pawh a en hran loh lutuk vang zawk che a nia. Tu thusawi mah awih tawh lo turin ka hrilh a, hrehawm i tih zia thlengin ka sawi lang a, i thiam loh a awm loh zia ka sawi hnu chuan 'ngati nge min hrilh vat loh?' te a ti vel mai mai a, Thartei leh u Dini vang a ni ber, a rukin thu an vaivir kual nasa lutuk a, keini lahin engmah kan hre ve si lo a, message chungchang te kha ka nu Chhuangin sawichhuak lo se chu tunah pawh kan la hre tawp nang, an lo hmu vek tawh a, an zep mai mai a nih kha. Vani pattern a hria a, a phone a khawih thei vek a, a rukin a lo khawih a, message pawh a inthawn chawp a nih kha ka tia, a awih duh lo tlat a, mahse a hma pawn u Dini te chuan Vanin naupang a hau a, kal pawh lokal tawh suh u a ti a tia, naupang te chuan min hau lo an tih vek kha ka tia, Thartei phei chuan dawt a sawi nasa lutuk, Tintin-a vangin Vani a ngei tlat a, keini pawn kan kawm duh loh phah reng kha, khami ţum pawh khan Vani bulah chuan Zuali sawi angin a lo sawi vek a ka ti bawk a, ka hrilhfiah vek hnuah chuan u Dini bulah, 'Thartei bawl kual theihin awm tawh suh' a tia, a hau alawm. U Dini a ngawi reng a, u Mala hrilhah a vau bawk a, u Dini chuan engmah a sawi ngam tawh lo ang. Thlamuang deuhin i awm thei tawh tihna a nih chu" a ti a, a nui var var a. 

"Zep kher lo se chu a hma khan engkim kan sawifel daih thei tawh tur a nia" ka lo tih chuan, "Thil ti sual tu zawk an nia, ka nu bulah pawh zep turin an hrilh a ni mai. Sawi miah suh an tia nga, message te an hmuh ang a, an fuih pah reng ang a, ka nu Chhuangi ţawng duhthaw lutukin a sawichhuak a, boruak kan siamţhat theih phah ta hlauh a nih hi. La zep reng se chu kan la inhau bur bur reng dawn tihna a ni mai" a tih laia Tintin-a a lo luh chuan a ţawng tawp chawt a, kan pahnih chuan min en tawn zak zak a, "Sawm zawm ta che u. Eng nge in sawi?" lungawi loh hmel tak hian a ti a, "Kan rel che" Sensiarin fiamthu a a tih chuan a ner suk a, ka bulah a rawn ţhu ve a. 

"Naktuk hi Daizaui fapa piancham a ni leh der tawh" a tih chu Sensiari nen kan in en vat a, kan theihnghilh ve ve tihna a nih chu. 

"A pawi thei...ka theihnghilh hmin ţhak mawle. A ruka thil lei a ngai a nih chu. Kan lei loh chuan Daizauin min liak hrep a ni mai" Sensiarin a tih chuan kan nui ţha hlawm a, "Motor lem lian pui a chuan theihna tur ka leisak ang Lalbawihtea chu" Tintin-a chuan a ti a, "Pawisa i nei em ni?" ka tih chuan, "Ka dahran sak alawm" a ti mai a, heti taka Daizaui te nufa a hmangaih hi mak tih chang ka nei ţhin. Vawikhat chu ka zawt tawh a, "Keini lo chhungte ti a sawi tur a nei lo" tih zawngin min chhang kha a ni a, Daizaui te nufa hi chu a mawhphurh naah a ngai ve niin ka hria. Sensiari leh Tintin-an an ngaihsak ang hian an unau dangten tuman an ngaihsak ve lo. 

Ka nu chu kan boruak chhe ţhin deuh kha hre lo ang hmakin a awm a, min be mawlh mawlh reng a, ar a talh avangin Tintin-a a hau bawk. 

"Hria ila ka talh nang. Faten thil kan hriat loh viau chuan nu leh pa thiam loh a ni mai" Tintin-an a ti chu a ţeu hlar mai. 

"Chutiang te chu mi zawng zawng deuhthawin an hria. Thu pawimawh leh ţha kan sawiin i ngaithla duh ngai hleinem, i u Dinin nau apiangin i u Mala hnenah ran talh lo la, rannung hrim hrim ti na suh, fimkhur a ţha kan ti fo a, kan sawichhuah lai hi i ruih lai a ni ziah bawk. I ruih peih luatah pi pute duh loh thil i tih phah a nih hi" a ti hlaih hlaih mai.

"A rui ve ngai lo tlangval Rinhlua zawk pawn a hre hleinem" a lo ti leh zauh a, ka nu chuan a melh rulh a, "A chut alawm" a ti hmuk a, "Tun hnuah chuan theu leu mai mai tawh suh ang che..ka remti hlek lo a nia. Nupui rai puar i nei a, pa i ni ţep tawh bawk. Ar i talh pawh tih tawh nak laiin insual buai naah te i lo tel ange, i fa tana ţha tur a nih phawt chuan police ka man tir hreh lo che a nia" a tih zawm leh a, a thusawi chu a ti tak tak dawn lo tih hre mah ila ka nu a danglam ta chu ka hlim ru veng veng mai. 

"Ka fate bulah i pa chu police ka mantir a i tia nga a chhe thei ang berin min sawi leh tho ang. Mi sawichhiat lamah doctorate degree a nei an tih che kha" tiin a nu chu a lo chhaih fiam leh a, "In en rawh...zu reilote i nghei pawhin i hmelah a hriat. I ţha nghal vûk zel, in tawh reng reng suh. Hrehawm tawrh chhung a rei lo, i in leh vaih chuan i nasa lo viau ang" a ti khar khar ang, "Nasa nang...keini chu kan nasa ve lo" a ti a, fiamthua a nu a hnial leh peih tawh a nih chuan hma kan sawn tihna a ni mai. Tin, boruak inthlak hlawk hi sawi lo mah ila a hrethiam ve vek tih a lang reng bawk. 

Mut hmunah Sensiari thu min hrilh chu ka hrilh chhawng ve a, "Ka nu chu a rilru a nem alawm" a lo ti mai a, puan min sin ţhat tir a, ka lum loh hlau ni awm takin puan chhanah chuan min kuah a, ka chalah a fawp zauh a, "Muhil tawh rawh le i chau ang" zaidam deuh hian a ti a, ka chhing zui ve nghal mai a. 

Ni a liam ve zel a, hna ka zawm ve na pawh a rei veleh tawh a, ka dul pawh a lian ve tawh viau mai. Benben-a te unauin an lawm a, Bawihpuia ber hian a hrethiam lo a, thuhruk ka nei emaw ti a ka kawr keu thut te a ching a, a chang leh "Eng nge i ei?" min ti a, a chhunga awm pawh min zawt ngun tawh. Ball lianpui ka dawlh emaw tih chang a nei a, a uten gum an ham puar lahin, "Anu Vani pum chhungah khatiang kha a awm ve" a ti thul, kan nuih pui dar dar zel a, min nel deuh hnu phei chuan ka bulah a tap chawt a, a faten min ngainat viau rualin u Dini hian min ngaina hleithei lo a, a inthlahrung nge pawh ka hre lo, biak hmasak loh chuan min be ngai lo a, ka biak ve lahin a rul tawk lek lekin min chhang a, nuam lo tih chang ka la ngah nain ka nu berin min duhsak ve tawh a, a hma ai chuan nuam tawh tak a ni. 

Pathianni apiangin Tintin-a ka inkhawmpui a, damchuan chawhnu inkhawm thlengin ka ţhulh ngai lo. Ka inkhawm chuan inkhawm ve turah a ngai tawh a, hei vang tak hian ka nu chu a lawm a, min haw em em ţhin tu khan min fak awl lo a, Tintin-a hnenah pawh a vanneih zia a hrilh ta fo mai.

Zir chhuah ka nei a, mi hnen aţangin kan mi hmangaih leh kan ngaihven zawngte chanchin ţha lo lam kan hria a nih chuan zep lova sawichhuah tawp mai hi a lo ţha ka tia, chutiang chuan a ti a ti che a, i lo ti reng em ni han tih te pawi ka ti tawh lo. Dawt vangin mihring hi ho te a inhua a, inţhen hrang thei reng kan ni tih ka hrechhuak a, kan pawh deuh leh ţhianţha te emaw, kan mi ngainat zawngte an nih phawt chuan inhaw ringawt lo a sawidun phawt a ţha khawp mai. 

Bena leh Sawmtea te an lo leng zeuh zeuh a, ka pasal erawh ţul loah chuan a chhuak tawh ngai lo. A ţhiante hi chhuak tam chi an ni chungin kan inzawmna, kan inkar te a chhiat phah ai chuan a insum ve ţang ţang a, "I ning em?" ka tih pawhin, "Nilengin ka chhuak ţhin tho alawm" a ti mai zel a, nitin dawrah a kal a, school banah ka sawm kawi a, kan haw dun ţhin. 

Ka piangthar ţha e ka tihna ni lovin ka thiam dan ang angin Pathian thu ka hrilh ve ţhin a, ka ţawngţaipui bawk. A hming lam lova ţawngţai ka nei ngai lova, a hming ka lam a, a mutthilh hnua ka la mutthilh ve loh chuan ka ngaihtuahna ka kawm a, thil ţha lo deuh thlenga ka ngaihtuah chang phei chuan ka ipik hi ka ţhu hluai a, a muhil lai chu dimtein a kutah ka vuan a, ka ţawngţai ţhin a, chutianga ka tih chuan mak deuh maiin ka thlamuang huai zel. Ani pawh hian hma a sawn ve sawtin ka hria a, chhung inkhawm neih dawnin peih loh hmel a pu tawh ngai lova, tlanchhiat tumna a nei tawh ngai lo. Zawi zawiin ţhat lam a pan ve hret hret a, chu chuan min ti lawm ţhin takzet a ni. 

Awm dun tam na na na chuan kan in ngaina zual a, kan inkawmngeih sa bawk a kan in ngaina zual sauh a, naute lah hi kei aiin a ngaihven a, a thil tur a en ngai lo, naute thil tur ngawt a en a, "Vanram, hei hi han en teh. Hmeichhia leh mipa tan hak a rem ve ve. Hna ka thawk nasa bawk a, a mamawh tur na na na chu ka lei zel ang" zangkhai deuh a tih pahin a phone chu ka hmai zawnah a rawn lek kang a, ka lo en ve thuai a, "Thawmhnaw man to a ngai lo" a ban a ben paha a ka tih chuan, "Nalh kan tih zawng a nih chuan kan lei mai ang chu. Ka pa phei chu i khap thei lo ang aw" a ti a, phone chu en lehin a nui suk suk a, naute thawmhnaw mai mai pawn a ti hlim em em chu a ni phawt a, nau ka pai hi pawi tihna pakhatmah ka nei tawh lo. Vanduai naah ka lo ngai te kha ka inchhir leh hnuhnawh a, fa awt ngawih ngawih, pai thei lo an tam tehreng nen, vanduaina ni lovin Pathian malsawmna ka dawn vang a lo ni reng si a. 

"A chhun che chuan a hmelţha khawp ang" tih pahin a mut dan a siamrem a, ka malchungah a lu a nghat a, "Ka hmelţha hleinem" a sam kar a ka kut ţang rawlh luh pahin ka ti a, ka chhuk en ran bawk a, "I hmelţha alawm le...Tintin-an a umzui reng hmeichhia chu a hmelchhe thei lo" ka mit a chiang zet a min en chung hian a ti a, ka lai lek lek alawm le. 

"Nangmah chhun zawk che se la a ţha ang. I fel tawh bawk sia, chhun che pawh nise hrehawm a ti hauh lo ang tih ka chiang" ka tih chuan, "Zu hi nghei tuma rilru ka siam fel hma chu ka nghei ang ka ti ngai lo. Ka tih theih loh tur ka tiam ve zung zung ngai lo a, thutiam zung zung, rintlak si loh nih chu mipa tan chuan a zahthlak. U Rinhlua awmna khuaa kan zin khan rilru ka siam fel a, nghei ka tum ang ka ti a, ka nghei reng bawk. Ruihhlo ti te hian dem tur kan zawng ţhin a, tumah kan dem thei lo, kan duhthu a ti kan ni. Ruihhlo ti ho, a zawng zawng chuan ka ti lo, a tam zawk hi chuan ruihhlo in eng buaina mah a chingfel thei lo tih kan hre vek. Keimahni bak indem thei kan ni lo" thutak deuh a a tih chuan ka lo nuih var var a. 

"Khawngaihthlak deuh deuh chu an awm ngei a, ruihhlo ti lo phei se chu kan khawngaih lehzual viau ang. I sawi dik chiah, duhthlan theihna kan nei vek a, kan kawng zawh lam hi kan duhthlanna zel a ni. Tuman min nawr lui lo a, min thlem tawk an awm pawhin min pe lui lo. Chutih rual chuan, Kristian te hi chu puih ngai pui turin kan inring reng tur a ni. Puitu ţha neih loh vanga sim thei lo, sim duh si, kal ngaihna hre lo tam tak an awm ve tho a, an kalna tur kawng dik kawhhmuh hi kan tih tur a ni. Nangpawh kawng dik ka kawhhmuh che a, peng tawh reng reng suh" ka ti a, ka thusawi tawp lama ka fiamthu zeuh avang chuan nui chungin min en a, "Bawihte, anu hian sawi tur a hre ve sawt tak tak a ni. I lo pian hunah meuh chuan ka nu pawh a zilh ngam tawh ang" uangthuang deuh a tih pahin ka dul chu a khawih a, "Ka hmu chak tawh hle mai che" a ti zawi ruih a, ka dul chu a fawp zauh a. 

"Kumtharah i hmu mai dawn alawm" ka lo ti var a, kan dam a Pathianin rem a tih chuan March thla ah ka nei ang a, ni hi a kal chakin kan hnaih ve zel a, a huphurhawm rualin ka phur tawh takzet a ni. 

Tintin-a chuan, "Ni leh thla hi a kal muang e" a lo ti ve thung a, "Ka hmu chak tawh hle mai che" naute bulah bawk chuan a ti leh a, "Vanram, eng hmel nge a put ang le tiraw? A kut tereuhte khan min vuan ve ţang ang a, pawisawi lo deuhin min melh kiau ang a, a tal a tal ang a, chutiang chuan i ngaihtuah ve ngai em? A hmel tur awm ang te i mitthla ve ngai em?" zangkhai deuh hian a ti a, ka dul chu a chul a chul a, a fawp leh ţhin a, a lo pian hunah meuh chuan an in pafa dawn khawp mai. 

"Awm tir mai mai teh khatianga i tih reng chuan a mu thei lo ang" tiin ka khap der a, "A mut theih nan ka chul zawk a nih hi. Ţha deuh a i nei thei a nih phawt chuan ka chhuang ngawt ang che. Aa..i thei ang, Vanrami i ni miau a" a ti a, rawn tho kangin ka hmuiah a fawp zauh a, "I thei ngei ngei ang" tiin ka hmui zawnah chuan a phun sup a, "Nu ţha tak i ni bawk ang" a tih chuan, "Ka ni lutuk ang" ka lo ti ve zat a, he ka natna hian min up bet lo ang, Hiv+ mah ni ila ka fa tan a nu ţha tak nih ka tum dawn a ni. 

CONT...