BLACK AND WHITE-24

BLACK AND WHITE-24

Kan ti nek nek a hunpui kan thleng leh dawn ta reng mai. Boruak a vawt leh var tawh a, rai puar bawk, thawmhnaw hlui lianpui hak bawk chu Tintin-an, "Snowman duat bik, thawmhnaw lum hak tir thlap i ang" min ti ţhin a, thla min laksak fo a, status ah a dah a, a caption a mak thei si, huat theih ni bawk si lo, lawmawm chuang miah lo a ni ţhin a, kailawn a ka chhuk emaw ka chho te hi ka tluk hlauin min kai a, a chang leh min kuah a, kei ai mahin a fimkhur zawk emaw tih tur a ni. 

"I ke hi a vung ve deuh a nih hi..a na em? Ka lo hmet ang aw" phur hmel tak a tih pahin khuma ka mu hle hle lai chu ka ke a hmet a, "Na chu ka ti miah lo. Ka nu hian nau ka paiin ka vung nasa thei lutuk a tia, ka chhun aniang. A vung nasa lo hlauh zawk a, min ti hrehawm lo" ka tih pawh chuan, "Ka lo hmet ang, ka tih ve theih tawk a nih hi" tiin ka ke hmeh pah chuan a nui suk suk reng a, a rilruah naute chiah a awm leh tawh a ni khawp ang. 

"Naute kan nei ang a, ka intuaihnum leh lawk loh phei chuan hmeichhe dangin an nei daih mai che anga" fiamthu a ka tih chuan, "I ta alawm ka nih" a ti a, a thutak phian mai. 

"Pasal lerh neih ka hlau ber mai" ka tih leh chuan, "Chutiang mi i nei hleinem" a lo ti ve zat a, "Ka la nei lo ang tih a sawi theih loh" cho zet a ka tih leh chuan ka mitah chiang deuhin a en a, "Keimaha i lungawi chhung chu pasal lerh i nei lovang" a ti nghet charh a, "Min ring tawp rawh" a ti leh a, chhang let lo mah ila ka rin zia a hria a, rintlak a awm a tum bawk ang. Sensiarin a sawi fo chu, "In nupa hian mi te aia ţhat bikna in nei lo, in inrintawnna ang erawh hi chu mi tam tak neih theih loh a ni" tih hi a ni. Min ring a, keiin ka ring bawk a, kan haw rual loh changa a lo haw har pawhin ka bia a, engamah hmain "I leng em ni? Zu i in em ni?" ka ti ngai lo, ka rin nasat poh leh a thutiam bawhchhiat mai mai harsa a ti dawn tih ka hre miau a ni. 

Inhnuaia kan chhuk dawn laiin kailawnah Benben-a a lo tlanchho a, blanket ni awm tak lian vak lo hi a keng a, "Anu'n hei hi i nu Vanin dahţha rawh se a ti" a tih chuan ka lo la vat a, naute rizai a ni tih ka enchian rualin ka hre nghal bawk. 

"Ka lawm e aw.." ka tih hnuah Tintin-a ka pe a, "Khumah han dah rawh...nakinah ka dah ţha ang" ka tih chuan phun nawi lovin a kal ve mai a, "Hawh ka kai ang che..apatean a kai ziah che sia" tih leh ka kut a kaih a rual a, Benben-a nen kan inkai thla a hmu chu u Mala meuh pawh a lo nui vur vur mai. 

"Ţha i ti em? Kan nuin a neih hun a la hla deuh na a kan khung bo reng tho a, pho se la nakina inzawn chawp a ngaih loh nan ama'n kawl rawh se. Kan hmang ţangkai tawh dawn chuang lo a ti a" a lo ti a, "Ţha lutuk ringawt. Tikhan lei a ngai lo tihna a ni mai. In lo la dahţha a a lawmawm" ka lo ti var a, "Dini chu thil uluk chi a ni bawk a a la ţha viau ang. A chim lim a, a uikawm bawk a" tiin a nui hawk hawk a, "A lawmawm hle mai" ka ti nawn leh a. 

U Dini a lo leng khat a, kan la inbe hleithei lo bawk a, biak ka tum reng a, sawi tawh ang khan a rul tawk bakin min chhang ngai lo. Tuna thil min rawn pe hlawl pawh hi ka beisei chhin ngam loh a ni. Eng rilru puin nge min pek ka hre lo a, amah lahin engmah a sawi ngai bawk si lo, a tih sual an hre chhuak a, ka nu'n a kam khat hlak a, ka nu te laka mark ţhat nan nge min duhsak vang hrim hrim a min pe a nih ka hre lo. Naupang pawh a hma aiin an lokal khat a, engmah kan sawi duh lo a, kan zawt lo bawk a, Sensiari phei chuan, "Ngai a awh leh emaw a lungawi lo a nih chuan a lungawi hunah an lokal leh tlut tlut mai ang" a ti mai a, keimah ber hi ngaihţha deuhin ka awm thei lo a, lungawi tlang vek ila tih hi ka duhthusam a ni. Chhungkua tih darh ka tum lova, lungrual tlang vek ila ka duh zawk. U Dini pawh keichuan ka haw tawh miah lo. 

"Ka pi thlan chu engtia chei maw in tih?" U Malan thutak deuh zawka a tih leh chuan, "Ka siam tir vek tawh a, pangpar dah a ni mai" kailawn a lo chhuk pahin Tintin-a chuan a ti lauh a, "Mawi deuhin kan chei ang chu" a tih zawm leh a, hunpui a lo thlen dawn meuh chuan ka pi a ngaihawm thar khawp mai. Ka pa ka ngai em em ţhin bawk. 

Ka ngaihtuahna hria niawm takin ka pasal chuan, "Vani te unau leh Sensiari te nen kan chei anga ni mai. Anni pawh kumtin a pa thlan an chei a, kal ho ila a nuam ang" a ti leh a, tuman an sawi buai lo. Ka nu'n, "Ka lokal ve ang" a ti a, midang chu an inrawlh lem lo. 

"Ruaiţheh ni chu sa thau hlir ka ei ang" Benben-an a tih chuan ka lo nui hak a, kan naupanlai pawh khan ruaiţheh kan chak ţhin hle a, kan nghahhlelh ber pawl a ni ţhin. Kan ţhianhoin kan ei a, keini aia u hret, Tintin-a leh Boomer te ho khan min ti buai chiam zel a, kan tleirawl ve hnu thleng khan mi tih buai an ching a, keini lerh hre rual tawh kha chuan haw tak tak si lovin kan han haw der vel a, nuam kan ti ru hle tho ţhin a nih kha. Kawtah mei kan chhem a, Tintin-a te ţhian ho an lokal chuan anmahni ngei chuang hauh si lo khan kan lo vin nghal vak vak zel a, kan kiangah khan rei an awm ngai lova, an awm ve chhunah kha chuan kan phur harh zel. An ţhian ho zinga mi star ve deuh kan neih phei chuan an kalsan rualin kan khua a har nghal veng veng zel a, veng dangah an leng a, an lo let hun nghakin rei deuh kan ţhu a, ar kan kan ve lahin a tirah phur lo viau mah ila an ţhian ho an lo tel ve chinah chuan kan ri teng tung ţhin. Khang hunlai kha a lo nuam ber mai. Tunah chuan Boomer a boral tawh a, an ţhian dangte pawh addict ţawng deuh te, zirtirtu te leh khawlaia la rui thle mai mai te, nupui fanau nei tawh te an ni fur tawh a, zirtirtu kher lo hna dang nei te pawh an awm a, sumo driver thlengin an awm. Tintin-a ang rual vel leh a aia u awrh te an nih hlawm avangin an la upa bik lova, nupui fanau nei si, tlangval kham lova ngaihzawng nei ta sawi tur an awm bawk. Hei hi a ni hringnun chu....ţhian ho rau rau pawh kan thlen chin a in ang ngai lo. A hniam leh a sang kan awm ngei ngei ţhin. Hringnun hi chu a chên thiam thiam vanneihna a ni mai. 

"Eng nge i ngaihtuah vung vung a?" ka hmai zawna kut a vai rual chuan ka khap fak a, nui ruh ruh chung hian min lo en a, "I khawng ta mai emaw ka tia" ti a min lo fiam chuan, "Hmanlai ka ngaihtuah" ka ti a, ka kalsawn a, rang deuhin hmunphiah ka chuh a, zahzelah hmun ka phiat ta daih a. 

Bena leh Sawmtea an lo lut a, picnic bawk an sawi leh a, ka nu'n a lo remti lo nasa mai, "Tun angah phei chuan chetsual a awl. Zu in rui leh emaw te a nia nga, nawm chen hrep hnua chetsual leh phei chu pawi deuh a sin. In pahnih pawh kha kal ve suh u. In a in awm peih loh leh Tintin-a dawrah leng ula, picnic tih vel te chu sawi pawh sawi ri tawh suh u" a lo ti let zêk a, an nui tawi tak mai. 

"Nia kumthar lamah a pawi miah lo..fimkhur mah ila mi fimkhur loh kan tuar thei a" Tintin-an a tih chuan a ţhiante chuan ei loh hmel deuh hian an en a, mahse Bena zawk chuan, "I tih dan dan a ni mai. Kan sawm lui lo ang che. Sawmtea hian a chak em a, ka kalpui dawn mawni ka ti mai mai mawle" a ti hlauh a, "Sawmtea te chuan hnathawh leh inkhawm tih loh chu a chak em em vek alawm" ka nu'n a lo ti fiamthu a, Sawmtea ang hi ţhalai zingah kan tam viau maithei a ni. 

Insuk ka tum chu "Keiman ka lo ti ang" tih pahin ka darah a dawm a, machine bulah ding tawh mah ila dim tein min nam sawn a, surf a bun ruih a, tui a dah leh lai chuan, "Hrehawm i ti ţhin em?" ka lo ti nawn leh a, a thil tih lai chawl meuhin min en a, hriatthiam loh hmel deuh a, "Engmaw?" a tih chuan, "I nun dan thlak hlawk a ngai hi. Kan inneih hmain i zalen ţhin si a, tunah lah dawr a i kal a nih loh chuan inah i tawm chawt a" ka ti leh a, nuam lo a ti mai ang a tih chang ka ngah mai. 

"I awm chuan a nuam vek" nui suk chungin ti ve bawk mah se, "Ka awih lo...hrehawm tih chang i nei tiraw?" ka ti leh chuan, "Nei ve e" a ti mai a, a thil tih lai a tih zawm leh a. 

"I duh chuan kal ve rawh" ka ti chu phawk deuhin min en a, "Khawiah maw?" tiin min lo zawt let a, "An sawm naah che khan" amah pawh en tawh lem loin ka ti a, suk tur dang la awm ho aţang chuan tlema lian deuh ka la chhuak a, "Ka kal lo ang" a ti chu a lam ka hawi rang khawp mai. 

"Engvangin maw?" ka tih rual chuan, "Ka hre lo" a ti a, a dar a kan uk a, a thil tih lai bawk chu a chhunzawm leh a. 

"Khap beh lutuk che ka duh bik lo. Hrehawm i tih chuan keimah thlengin min hne thuai dawn a, i duh chuan kal ve zeuh zeuh rawh, mipa i nia, ţhiante nen a intihhlim chu nuam i la ti dawn lutuk tho tih ka hria, i chhuah ve zeuh chu pawi ka ti lo, ka ring che alawm" ka tih chuan, "Ka duh lo" a lo ti leh tawp a, a thinrim emaw tiin, "Ngati nge?" ka ti a, lungawi lo turah ka dah fel vek tawh.

"Nuam chu ka la ti tho ang...ka ti reng zawk ang. Mahse nupui ka nei tawh a, tlangval lai ang reng khan ka awm thei tawh lo. Chu chu ka hre ve alawm. Chhuak tum lui tlat ila chu min dang thei lo ang, i hriat vek kha. Ka chhuak lui tho ang. Min khap vang ni lovin ka thuin ka chhuak lo" a ti a, a thaw huai mai. A ni tak tak a, ka pi boral hlimchhawnah pawh khan dan tum eng ang mah ila a chhuak lui tlat tho a nih kha, inţhen a ka vau chung pawhin a ţhiante hnenah a kal lui a, dan theih a ni lo. 

"I van fel" ka ti a, ka nui var var a, sawi tur vak pawh ka hre chuang lo. 

"Mipa ka nihna angin mawhphurhna hlen ka tum a nih hi. Hmeichhe rai lai, insawisel reng leh vung deuh bur chhuahsan lui duh khawpin ka sual lo" fiamthu deuh a a tih chuan, "Ka vung bur kher lo aw" ka lo ti a, ka ke ka en rual chuan a lo nui hawk a. 

"Tak taka, puih i ngai nasa tawh a, inthlahrung chi i ni ve tumhrang si a, ka chhuahsan lo che a nih hi. Hna chu hna a nia, hna thil ni lova ka chhuah chuan kan naute hian ka pawm a duh ve lo palh ang" tih pahin min rawn pan hnai a, hnunglam aţanga min kuahin ka dul puar luah tawh chu a chul a, "Mi kan hmangaih tak tak chuan insiamţhat duhna kan nei mai. In pahnih hian ka hmangaih cheu a, chuvang chuan theihtawp ka chhuah ang" a tih chuan min fan raih raih a, a tum tak tak zia ka hriat vang a ni. Mi luhlul ngang a ni a, a tum tawh chu harsa mah se a tum tlat bawk ang. 

"I hriat reng tur chu ka ring che tih hi a ni mai" tih pahin ka inher a, "Thil dang chu a ngai lo, ka ring che tih hrereng la, chuti chunga min bum duh a nih chuan i thu a ni tawh. Nuam i tih phawt chuan min bum la, mahse hmeichhe dang bulah i awm a nih pawhin ka ring che tih hre tlat la" ka ti nawn mawlh mawlh a. 

"Min ring thei ang. Nang lo hmeichhe dang duh ka nei hleinem, ka mamawh lo bawk a, chu chu nang pawn hrereng la" a ti a, ka sam hnawk niaih chu a hui a, ka benga a zeh lai chuan ka lo nuih a, "Ka hrereng ang..hmeichhe dang i mamawh lo" ka lo tih ve rual chuan ka hmuiah min fawp vawng vawng a, inhnuai bathroom a awm kan ni a, midang an lo luh thut hlauin ka nam a, a inla hrang ve mai a, "I ţha ber...Vanram" nui suk chung hian a ti a, ka chal a fawh leh zeuh hnuah a kalsawn a, "Suk tur an va dah tam reng reng mawle..inbual pahin su zel se a tam lo mai tur. Ka hrilh tawh ang su nghal zel tawh rawh se" tiin a ang zui hluk hluk a. 

"I â emai...mo neih man a nih hi. Awm lo mah ila Sensiarin a su dawn tho a, school kal loh lai pawh a ka chhawk loh te chuan a nuam hleinem. Bakah ka nu leh pate hi an upa ve tawh a, mahnia an thawmhnaw hak lai suk tir chu khawngaih pawh i khawngaih lo mi? U Dini takngial pawn kan hman loh changin a la suk sak a nia" ka lo ti a, a ngawi reng hnuah, "Keiman ka lo su ang. Khatiang luah tawhah te chuan chet vel a hrehawm loh mi?" min ti let a, "Hetiang tura Pathian lawk sa kan nia, hmeichhia chu awmnem zawk mah ni ila mipa in theih loh leh harsa tura in ngaih hi kan ti thei mai zel. Machine nen ţangkawp phei chuan ka su thei ringawt" ka ti ve tak nain min pui char char a, a harsa zawng zawng a ti vek ang a ni mai. 

Insuk pho pah te chuan kan ti ti a, ho te teah kan nui vak vak a, min haw em em ţhin tu ka nu'n hmuhnawm tih hmel deuh a min lo en te chuan boruak a ti nuam lehzual a, insawisel reng mah ila rilru ber a nawm a, ka hlim phawt chuan ka tuar thei zel a, a va hrehawm e tih ngawih ngawih chang ka nei ngai tawh lo. An vai hian min duat em em vek a, ka pa leh Tintin-a phei chuan miin rai laia ei a ţha an tih ang hi min hawn sak reng mai. Zingah kan nupa in tawi te te kan kal ţhin a, haw lamah diakkawn ah thingpui kan in a, in kan thlen veleh rawng kan bawl leh a, chu chu kan hun hman dan tlangpui a ni. 

Ka nu takngial pawn ka chetsual palh a hlau ve a, indim turin min hrilh vek a, ka nu duhsakna ka dawng ve ta hi nuam ka tih ber te zinga mi a ni. Mo te hian duhsakna kan dawn rau rauah pawh nu te duhsakna hi kan ngaihlu bik ţhin a nih ka ring. 

💛💛💛💛💛💛💛

Kumthar kan chuangkai a, a vawt zual sauh emaw tih tur a ni. Zing walk tur pawhin ka tho peih tawh lo a, tho tlai chuang lo mah ila khawlaiah ka chhuak ngam tawh hlawl rih lo. Inah ka awm chawt a, school ţan hun tur chu ngaihtuah ringawt pawhin ka huphurh run mai. Kan inpawh tlan viau hnu hi chuan an mizia te ka man chho a, kan sual loh miau chuan tumah an sual reng bik lo a, ţhatna a hneh theih loh mihring hi chu awm ve bawk mah se ka chhungte hi chu chung ho zingah chuan an tel ve lo. Ka nu ber hi tawh khirh deuh angin lang mah se a rilru a nem ru zek a, a lawmna a chhiain tih lawm har lo ber pawl a ni. Kan inpawh tlan hnu hi chuan in a awm nilen tluk a nuam tih ka nei tawh lo. 

"Vani, kan thil rawn lei hi lo en teh" ka nu'n a tih chuan choka aţangin ka tlan chhuak a, nau puan a lo ni. 

"Ka enchiang chak lutuk. Thingpui ka chhuang a, ka va siam law law lawk ang. Nangni pawn in in duh tawh ang..dar1 a pel leh tawh a" ka ti a, "A va mak ţhin" ti a ka pa a lo nuih lai chuan choka ah ka tlan lut a, Tintin-a a awm lo a, bike siam ngai hmanhmawhthlak a awm avangin tukţhuan eikham rualin a chhuak a, ka hmuh tir ve chak tawh lutuk ringawt. 

Tray chawi chunga ka phei leh chuan ka dahna tur an lo hung rem sawk sawk a, "Han en teh...ţha i ti em?" ka nu bawkin a lo ti leh a, thingpui in pahin ka enchiang a, "In van lei ţha ve..nau neih dawnah ka ngaihtuah chauh ang ka lo tia, ti hi chuan thlamuang deuhin a awm theih dawn a nih hi" tiin ka fak ve luam a, an lawm ve hmel khawp mai. 

Tintin-a lo haw chu ka lo hmuh tir ve a, pindanah kan awm tawh a, nau puan a en zawh chuan dawhkanah a dah a, "I chau em?" ti a zawh pahin ka pan hnai a, a bula ţhut ka tum chu ka banah a vuan a, a mal chunga min ţhut tir lai chuan, "Ka rit tawh a sin" ka ti nang nang a, ka ţhut fel rual chuan ka kuah ta tho a. 

"Ka lo thlen rualin ka hahdam vek zel" tiin min kuah let a, ka ring a, amah phei chu ka zawt duh hauh lo nain a ţawng lai hian zu rim a nam leh nam loh ka lo ngaichang ţhin a, tunhma a nun ţhin dan zawng zawng nen, ring tho mah ila hlauhthawnna a awm lo thei lo a ni. Tun thlenga a in lo thei hi thil mak a nih rualin a chhungte leh kei ngei pawh a tan kan ţawngţai nasa em a, ama tumna mai bakah kan ţawngţaina hian a pui ka ti lo thei lo. Hma hun a sawi lawk theih miau loh avangin nakinah a in leh tho ang ka ti ngawt thei lo a, tun hun zel hi nuam deuhin hmang ila ka duh ber mai. Lungkham kan ngah lutuk chuan kan hahdam thei ngai lo. 

"Ka lo ngai hman che a" ka tih chuan, "Keipawn ka ngai che a" ka awki ang chiah hian a lo ti ve a, kan nui dun hak hak a, a fel a, eng buaina mah a awm ngai lo a, ka nat a hlauh mai bakah a theih ang tawkin min hmangaihna a lantir ve ţhin a, hei bak bak a awm chuang lo. Hringnun hi a famkim rih a ni ber. 

"U Rinhlua a a lo haw dawn emaw ka tia, mahse a thei leh lo a, hawn tur thlai vel pawh ka siam vek tawh a ti a sin mawle. Mahse a lo thawn dawn thoin ka hria" tiin ka hrilh ve a, krismas dawnah khan u Zira nen an lo haw a, u Rinhlua tak phei chu rei a awm lo. Hna avangin kan inţhen darh nuai rih a, "Nau i neih hunah lo haw kan tum ang. Tinkhuma fa chu kan hmuh chak ber a nia lawm" an ti ve ve a, a ni takah lo haw thei lo pawh nise a hnu lamah an lo haw kan ring tho a, fate ngai chi tih takah ka nu aiin ka pa hian an lo haw hun a nghakhlel ţhin a, chhungkua kan inpawhin kan inpumkhat lehzual tawh a, chuvang chuan keipawhin kan kim ţhap lai hi a nawm lai ber a ni ka ti ve tawh. 

School kan lut ţan veleh tawh a, vawt viau mah se ka kal ve hram hram reng a, ka rit tawh si, ka che zung zung thei tawh lo a, school kal pawh hrehawm ka ti viau tawh. Bike ah pawh ka chuang ngai tawh lo a, Tintin-a dawrah peng kawi mah ila auto rickshaw emaw taxi thoin ka haw ţhin. A chang leh Sensiari nen kein kan haw a, diakkawn aţangin kan in a hla lo bawk a ke a kal chhung a rei tehchiam lo. 

"Vanram, lo ţhu teh" dawr a ka luh rualin min lo hui zauh a, Sawmtea leh hmeichhe pakhat lo awm ve chu ka melh zauh hnuah ngaihţha lo ru takin a bulah chuan ka ţhu a, an thutak hlawm em a, thil dik lo a awm leh ta mai emaw tih tur a ni. 

"In va ti ti muk hmel ve" ka tih chuan, "Hrilh tur che kan nei a" Tintin-a bawk chuan a lo ti leh a, "Eng nge a?" tih nghal vat paha a lam ka hawi chuan, "Ben-an nupui a nei dawn" a ti a, a nui ve ta nge nge a. 

"Engtikah? In lo tum der vel a ni maw?" lawm lo hmel taka ka tih veleh Sawmtea chuan, "March thla tirah. A nupui neih hmain ţhian ho chaw eikhawm kan ti ve a, lokal ve thei la kan ti bawk. I thei lo ta a nih pawhin Tintin-a hi chu a lokal a ngai ang" nui chung hian a ti a, ka la hawihai angreng hle a, lo hriat thawi engmah kan nei bawk si lo nen, a awihawm lo rum rum mai. 

"Tu nge a neih dawn a?" ka tih leh chuan, "I hre lo ang...hmar veng a mi a nia, an inkawpna a la rei lo..kum pawh a la tling tawp nang..mahse a fel a, nurse a ni bawk a" Sawmtean a lo ti zung zung a, hna a neih phei chuan Bena tan a ţha lutuk ringawt. 

"Ka van hre lo bik em em. An lawmpuiawm chu...nau ka neih hnuah law law innei se a ţha ang. Chaw ei khawm naah kal ve thei dawn lo mah ila inneih naa kal a chakawm alawm. Inneih niah tu nge dinpui a tum a?" ka ti leh zel a, "Tintin-a kha...kan sawi rukna a rei tawh a, palai ka tir tawh mai dawn te a tia, ţhianho a kan awm chang chuan kan sawi ve reng. An inrem tlan a, thu chiang a awm hma chu Benan engmah sawi lo turin min ti a, chuvanga hre lo mai mai chu i ni. In pa chu lokal ve rawh se aw..a dawn hnaihah kan hrilh leh che ang a" Sawmtea bawk chuan a lo ti a, "Tehreng mai...Bena pawh a tlangval lo ţep tawh a, chaw eikhawm chu inphu ve alawm. Ka dang dawn lo hrim hrim" ka kut pahnih phar chhuak meuh a ka tih chuan kan nui dar dar a, "Rengtekawnah a nia, hei Rosy te inah hian" tih leh pahin Sawmtea chuan a kalpuinu malah chuan a beng thak a, "Aw le...a la hla emai, a dawn hnaihah kan sawi leh dawn nia" ka ti a, Bena ka lawmpui zia pawh ka sawi nawn leh a, a nu nen chiah an awm a, anu lah thawmhnaw la a zin chhuah chang a ngah zawk a, a khua a har ve alawm. Nupui nei se ani pawh a nun a siam chhawm ve mai ang. 

Dam chuan ni hi a lo kal chak khawp mai. January thla aţangin March thlaah kan zuang dawrh emaw tih tur a ni. Nau ka neih thla a ni tawh a, tupawh mai chu an fimkhur a, eitur ţha apiang min pe mawlh mawlh reng a, nau puan leh mamawh dang te pawh kan chhawp chhuak vek tawh a, damdawiin a lut mai thei turin kan inpeih tawh a ni ber. 

Zanah chuan hma deuhah ka mu a, muhil lem lo mah ila mut hi nuam ka ti ve hrim hrim. Khuma rawn lawn ve pahin, "Naktuk chu ka kal ve thei ang maw?" a ti a, an ţhianhoin chaw eikham an tum kha an la tum ve zel a, naktuk hi nise an ti a ni. 

"Aw..kal rawh. Engtinmah ka la awm chuang lo a, i kal hlanin engmah a thleng nang" ka tih chuan, "I neih laia awm ka duh. Nurse ho chu ka dang thei lo, mahse ka fa chu keiman ka pawm hmasaber ang" a ti a, "I pawm hmasaber ang. Naktukah ka nei ngei dawn tih thu a awm lo. Engtinmah ka la awm lo tak tak a, buaina ka tawh laia min pui ţhin tu chu Bena a nia, chuvang chuan kal ngei rawh. A zahawm alawm" ka tih chuan a thlamuan hmel huaiin ka hria. 

Ka bulah chuan a bawk a, ka sam hui kian pah hian, "Engpawh thleng se ka hmangaih reng dawn che u tih i hria tiraw? Nang leh naute hi, ka ngaihpawimawh ber leh ka hmangaih ber in ni reng ang. Chuan maw Vanram, chhungkaw hlim deuh nih reng kan tum ang a, thiam lo deuhin ro i rel zat zat reng a" a fiamthu a, "Ka tan chuan a hmasaber in ni reng ang" zawi ruihin a ti leh a, ka chal, ka biang leh ka hmuiah te chuan a fawp mawlh mawlh a, naupang lawm takin min lawm niin ka hria. 

"Ka hria ka hria...awm hla tawh teh" tih mawlh mawlh pahin a hmaiah chuan ka nam a, "Ka ngai che a, ka awm hlatsan phal teuh lo mai che" uangthuang zet hian a lo ti a, "A nih leh ţha deuhin min kuah la" ka tih rual chuan a mut dan a siam rem a, min kuah zui hlu hlu a. 

"Nau neih hi a na lutuk an ti zel a, ka huphurh tak tak a ni" ka tih lai chuan dimtea ka dul a chul pahin, "I tawrh ai tuar thei ila chu a na zawng zawng kha keiman ka lo tuar vek mai tur a nia" a ti a, nui var var chungin amah chu ka en a, "Mahse maw..an sawi fo chu, naute kan hmu chiah hi kan dam sawng sawng zel an ti a sin. Keipawh a na zawk ang a, reiloteah a dam leh mai ang. Min pui turin i awm reng dawn bawk a" ka tih chuan, "Awm dawn e..i koh phakah ka awm reng ang. Ka chhuang dawn lutuk che ka tih tawh kha, i bulah ka awm lo phal dawn lo reng reng" a ti a, zan rei deuh thleng kan ti ti a, ka pi thlengin kan sawichhuak a, a ngaih zia leh a fa chu hmu ve hman se a tih zia a sawi chuan ka khawngaih takzet a ni. 

"Ka pi in hma ka sawn dan hi hmu se chuan a lawm nan pawisa min pe ru leh ţat ţat ang a" a ti a, kan muhil har bawk a zinga ka harh chuan dar7 a lo ri der tawh. 

Tintin-a ka kaitho a, pindan aţanga kan chhuah hnuah inbual turin inchung lamah a chho a, thla hmasa aţang khan kailawn zawh reng chu a ninawm ang an tih avangin ka pi pindan ţhinah khan kan mu a, chet vel a awlsamin inchunga han mut daih ai chuan nuam ka ti zawk. Zirtawpni a ni nain ka chawl tawh a, inah kan awm deuh ţhap a, Tintin-a kal tur insiam chuan ka pi pindan aţangin min au lung lung a, ka pa nuih kan ti za leh viau tawh. 

"Ka kal ang a, mamawh i neih chuan rawn sawi rawh aw. Biak theihin ka awm reng dawn a, eichak emaw mamawh i neih phawt chuan min hrilh ngei ngei ang che" a lo ti a, "Aw..kha te chu chiang sa alawm. Zu in suh aw...i nghei rei tawh em hi...i ţhianten an in sup sup pawhin in miah suh" ka ti a, "Min lo kuah phawt la" nui chung hian a ti a, a ban a phar duai a, ka kuah ve ngei a, rai len tawh chuan duh angin a inkuah tak tak theih tawh loh. 

"Ka in lo ang...ka intiam tawh kha. Thutiam chu thutiam a ni" inlak hran paha a tih hnuah a awm ah a kut a dah a, "Min ring thei ang" nui suk chung hian a ti leh a, zu a nghei hnu phei hi chuan ka hmu hmelţha lehzual a, tupawn an ti vek, hmaichhanah pawh an fak luam zel. 

"Naa..min ring suh pawh ti la ka ring dawn tho tho che. Kumkhua a ka pasal leh ka fate pa tur i ni miau a" ka tih chuan, "Pasal leh pa ţha ber tur mawle" tiin min lo fiam a, uang deuh a mit a siai vel te chuan a banah ka piai hlak a, pindan aţanga inkuah riala kan chhuak te chu min lo hmu tu te chuan kan hlim zia an hmu nghal thei ngei ang. 

"Tinkhum, fimkhur ang che" ka nu'n a tih rualin, "Yes boss" a lo ti lauh a, "I over ve chiang e...i chhuak tur hi i phur riau aw..in lam ngaihven nachang hre lek lo khan i lo awm ange" tiin Sensiarin a lo fiam ve bawk a. 

"Min ngai lutuk ţhin suh" a ti a, a tih fo danin Sensiari hnar chu a piai sak vak a, "Ka ning aw...rui ve lovin nangmah tawp kha lo haw leh ang che. I ruih vaih chuan Vani bulah sum chhuah rawh ka ti dawn nia" a ti hlak hlak a, a nui tet tet thung. 

"Mawiah rilru nuam deuhin i ţhiante bulah awm rawh. In lam ngaihtuah a ngai lo, lo haw lo la a tawk mai" ka pa'n a lo tih chuan intithei deuh a hawi vah chungin a chhuak a, ka zui chhuak ve vat bawk.

"Bye bye...in pahnihin...naute leh naute nu kha" bike a a thut vek tawh hnua a tih chuan, "Bye bye...rawn tlai hlek suh" ka ti a, a lo nui hawk a. 

"Tlai lo ang...ka kal aw, ka lo haw vat ang" a ti a, bike chu a ti nung zui a, eng nge ka hriat pawh ka hre lo, a lenchhuah khat tawh lutuk vang aniang a tlanchhuah hma chuan ka pan hnai a, rem lo deuh hian ka kuah a, "Nau neih dawn a ruaiah i naute ţha leh a ni maw?" nui chunga tih pahin ka hnung a lo chul a, "Ka ngai che ka tih tawh kha. Chuvang chuan lo haw har reng reng suh" ka ti leh a, ka inla hrang zui a. 

"Nang berin i tih te chuan ka lo haw har ngam nang. Zanriah ei kham veleh ka lo haw ang" a ti a, naupangchhia zet a a kutzungte ti pir vah chung hian, "Promise" a ti leh sup a, a thutiam a bawhchhe ngai lo tih hre tu ka ni bawk a, rilru a nuam huai huai mai. 

A tlan liam thlengin ka thlir a, ka hmuh theih loh hnuah gate khar felin inchhungah ka lut a, nilengin engmah ti mumal lovin kan awm a, ka pa'n committee a duh avangin chaw ei a rawt thuai a, zan riah ei lai aţangin keimahah nuam lo a awm ţan a, a nawm loh dan ka sawi thiam chiah lo, a na riai riai reng a, awm a ti nuam lo a ni ber. Ka hnunglam, ka kawng bawr vel hi a na reng a, fimkhur ngai bik ka ni bawk si, zanriah eikhamah ka nu ka hrilh ta nge nge a. 

"Awm hahdam rawh...engmah ti ve tawh lo mai rawh" a ti a, ka na lai dawm a sofa a ka ţhu chu committee tuma insiam vek tawh ka pa chuan min rawn hmu a, "Eng nge awmzia? Na i nei em ni?" a ti a, "Aw...ka na lai ber pawh ka sawi thiam lo. A na a ni tawp mai" ka lo tih chuan ka nu hnenah, "Damdawiinah kal ila a ţha lo maw? In en tawp mai chu a ţha dawn em ni? Damdawi eitir tur ber a hriat bawk si loh a, nau a nei dawn hnai zawk te a ni lo maw?" a ti zung zung a, choka aţangin u Mama leh Sensiari te an lo tlanchhuak a, ka nu chuan u Dini a be bawk a, "Mama, kal pui mai u. A hma lama kal a ţha hrim hrim" ka pa'n a tih leh takah chuan u Mama pawhin a lo remti ve mai a, an insiam zui sap sap hlawm a. 

Aizawl angin khum indaih lo tih vel a la awm ve vak lo bawk a min lo admit nghal a, ka nu leh paten min hruai a, a hnuah Sensiari lokal vein min awmpui nghal a, "In kal hnu lawk khan Tintin-a ka bia a, a lo haw nghal dawn. A phur nasa mai, phone pawh off lovin a ţhiante bulah naute kan nei dawn a tia a au lung lung mai. A nui vak vak bawk a, keini ai mahin a nghakhlel zawk. Bena pawn min rawn bia a, chaw kan ei sawk sawk anga kan rawnkal ve ang a ti. An hmu thei dawn chuang lo che a, Tintin-a an rawn zui rih lo a ni awm e. Mahse, an lokal har lo ang. Tlaivar inpeih sa atin kan lokal ang an tih kha" a ti seuh seuh a, ka na lai te min zawt a, keichuan hrehawm ka ti ţan tawh. 

"A na ve mai mai emaw ka tia" ka ti a, ka vawikhatna tur a ni a, ka hrethiam chiah lo bawk nen, a hrehawm tih bak chu sawi ngaihna ka hre lo. 

"Tintin-a chu a va rei ve" ka ti leh ţhin a, Sensiari chuan phone a bia a, a biak zawh hnuah, "Lawk aw..Vani ka rei lo ang" tih leh tlanchhuah a rual a, sana ka en sek tawh a, "Min neih tir nghal mai tur a nia, ka ning lutuk" ka tih hlak hlak reng chuan ka khum bula mite nuih a lo za a, "12 hnu lamah chuan i nei ve thei mai ang" tiin min lo fiam a, an nei nghal mai ţhin emaw ka lo ti a, mah se hmeichhia kan in ang lova, doctor in min en zeuh zeuh reng bawk a, a hun a tihah chuan min nawr lut ve mai ang. Rilruin ka ţawngţai mawlh mawlh reng bawk a, ka fa hi keimah ang a nih ve loh nan ka dil a ni. 

"Sensiar, Tintin-a hi a va rei tawh ve" ka ti leh ţhin a, ka bulah a ţhu ngawi reng a, a hmel ka en chuan dik lo a awm tih ka hria, engmah a sawi duh bawk si lo. Ka awmdan chu hrehawm tak a ni, ka taksa a na a, hlauhthawnna hlirin ka khat leh tawh bawk si, "Lo thlen loh a hun tawh miah lo a nia" ka ti leh a, ţah aw takmeuhin ka ngen tawh a, hetiang hunah chuan Tintin-a ngeiin min awmpui turah ka ngai.

"U Daizau, engtin nge i rawn luh theih?" Sensiarin a lo ti hlau a, na tuar mek pawh ni ila Daizaui chu chiang zetin ka lo en a, a mit a bui lûk a, a sen ram mai bawk a, ţap hrep te pawh a ang alawm. 

"I nu bulah va kal ve tawh rawh. Vani chu ka lo awmpui ang. Rinhlua a lo haw dawn a, u Zira leh ka pa an inbe mek" Daizauin a tih chuan ka thaw thei lo mai dawnin ka hria, boruak ţha lo a awm chiang a ni. Midang chhungkua ni lovin kan chhungkua a thleng a ni ngei bawk ang. 

"Eng nge awmzia? Khaw nge Tintin-a chu? Na ka tawrh mek hi...buaipui ngaiin a awm em ni?" ka lo tih chuan an ngawi reng a, keipawh ka ţawng peih tawh bik lo, mahniin ka tuar a, Sensiari a chhuah hnuah pawh Daizaui chuan a nat leh nat loh min zawt a, thil dang a sawi duh chuang lo. 

Sana ka en ka en a, ka insum theih loh tawpah beidawng zet hian, "Tintin-a chungah thil ţha lo a thleng em ni? A va rei tawh ve" ka ti chuai raih a, Daizaui chuan a hmui a pet fan fan a, hrilhfiah chawp pawh ka ngai tawh lo, ka ţap miah lo te chu mak ka inti zawk. 

(Naktuk zanah a tawp ang)

CONT...