BLACK AND WHITE-LAST

BLACK AND WHITE-25 LAST

Nau nei tur a min nawr luh lai te chu engmah ka hre mumal lo, ka harh ţha a, engmah ka hre lo thung. Doctor te nurse ten theihtawp an chhuah tih ka hria a, naute ţap ri ka hriat chuan ka chhing sawk a, ka ţap zui hlawp hlawp a, tu mitmei mah ka veng seng tawh lova, tu hmai eng mah ka zah zo tawh lo. Ka chau takzet a, ka rilru mumal lo lutuk avang chuan thil thleng vel te chu ka mang hriat ruai a, nikhaw hre lovin awm em lo mah ila mi â ang maiin ka awm ang tih chu chiang sa a ni, ka harh chhuah meuh chuan khum pangngaiah ka mu tawh a, ni 4, inrinni a ni a, ka fanu pianni a ni bawk. Khua a la var lo deuh a, cabin ah min dah aniang ka hawikual ruai a, ka khum bulah khum dang inhung a lo awm tawh lo. 

"Vani, i ţha em?" u Mama'n a lo ti a, ka hmuh phaka awm te chu tlem te chauh an ni. A mal te te a ka enkual hnu chuan lukham chu ka kham leh hnawk a, tuman engmah min la hrilh lo. Tintin-a, ka pa pasal ngei chu a hmel hmuh tur a la awm lo chung pawhin tuman engmah an la sawi lo cheu a, an ka aţangin Tintin-a hming a la ri lo hrim hrim. Chuti chung chuan a chungah thil eng emaw a thleng tih ka hre thei a, hmeichhia te hian hriattheihna mak tak kan nei a, kan zawmpui, kan pasalte ngei a nih phei chuan kan rin hriat dan hi thutik a lo ni nge nge ţhin. Nau ka neih lai zawng leh tun thlenga mumal lo leh vai ruai a ka awm reng nachhan pawh Tintin-a chungah thil ţha lo a thleng ni a ka hriat vang a ni. Khati khawp khan a fa lo pian hun tur hi a nghakhlel a, tun thlenga a hmel hmuh tur awm miah lo hian chhan ţha tak a nei ang tih chu mi â ber pawhin an hria ang. 

Doctor a lokal a, ka chhungte nen an inbiak hnuah min chhuahsan leh a, ka banah chuan hriau a invit bur vu a, hmeichhe dang ang ka ni ve tawh lo, ka nau nei pawh buaipui ka ngai bik a ni. 

Ka chau lutuk chu ka lo muhil leh a ni ngei ang ka harh chuan ni a lo eng uar tawh a, ka awmna cabin chhungah chuan ka nu, min hringtu nu ngei leh ka u mai bakah u Mala te an lo awm a, midang hmuh tur an awm tawh lo. Ka mutthilh hlan te, rilru mumal ka put loh lai tein an lo bo ţhen zel a, tunah chuan ka chhungte, ka thisen zawmpui te chiah a ni lo awm tawh ni. U Mala a lo la awm ve hram hram bawk. 

"I harh deuh em? Vani" ka nu chu a rawn kun hniam a, ka chalah dawmin min en vang vang a, a hmel chu a dik mawlh lo a ni. 

"Sawi tlang rawh u...engmah zep lovin min hrilh tlang vek rawh u" tham ţiaka ka tih rualin ka u ber chu cabin chhung aţangin hmanhmawh deuhin a pen chhuak hlawk hlawk a, u Mala'n min rawn hnaih thuai thung. 

"Vani, vanduaina hi tu te chungah pawh a thleng thei a, hmanni deuh a khawthlang lama thil thleng te kha i hria em? An inneih tuk lawkah a pasalin a nupui nau pai lai mek a boralsan a nih kha. Kan chungah hian thleng thei lo a awm miah lo a nih hi" a tih chuan, "Eng nge i sawi awmzia?" lu thin deuh nawk pahin ka ti a, ka inbengkang uaih chu, "Khaih..in dim rawh" tiin u Mala chuan min nam mu a, ka thin a phu dup dup a, ka awmdan chu ka sawi thiam lo, ka vai riai reng a ni ber. 

"Nu...eng nge i sawi awmzia? Khawiah nge Laltinkhuma?" ka ti vin hlak a, thil lawmawm a thleng lo tih ka hria, ka haider a, a awmna chauh ka hre duh a ni. 

"Mami, Tintin-a chu" harsa tih hmel zet hian a ti a, a chawl zui dat a, "Tintin-a a awm tawh lo" ka nu'n a tih leh rualin u Mala chu ka khum lo lamah a inher a, ka kâ pawh ka chip thei lo, zawi hnawkin ka mutna dan ngaiin ka mu reng a, inchung var chu ka melh tlawk tlawk a, "Naute pian hnu lawk khan....a fanu pian hnu hnu lawkah khan a chatthla a" ka nu aw chu ka hre ruai ruai chauh tawh. Fa ka neih hun mawlh kha a sin a nghahhleh ni. 

"Nizan khan a lo haw ngei a, a phur luatah a tlan chak deuh a ni ang, engmah kan hmu ve lo a, mit a hmu tu te chuan a tlan chak an ti. A accident hlauh a, damdawiin an rawn thlen chuan engmah a hre tawh lo. Nau nei mai tur i ni si a, an hrilh duh lo che a nih kha" ka nu'n a tih chuan, "A tawh rih...a ngai tawh rih lo" ti a ka u'n a lo khap ri ka hre leh a, mit ka chhin rual chuan ka bek a lum thla pup a.

"I ti mak hle mai...i fanu pianni ah berkher maw min kalsan a?" tih ringawt hi ka rilruah a awm a, na ah rau rau pawh a na bik lutuk tlat a ni. "Pa ţha ber ka ni ang a, ka fa chu ka veng him tlat ang i ti a ni lawm ni?" ka rilru bawk chuan ka ti leh a, ka ţap chhuak hawk a, "Eng nge awmzia? Tun a thleng mek hi eng nge ni a? Hmalam kan pan a, hma kan sawn ve zel a sin" ka ti mawlh mawlh a, ka au ti tih tawh a ni ber. Engtin nge ka fanu a awm a ka hre lo a, min chelh bet tu an awm tih zawng a ni ka hriat chu. 

"Nu, ngati nge ka chungah hian vanduaina hlir a thlen bik? Ka hrethiam thei tawh lo, tun ţum chu a mah mah tawh deuh a ni. Ka hrethiam thei tawh thlawt lo" tiin ka au tuar tuar a, aw rawl tawp tawpin ka ţap zui a, "Vani, insum rawh...i taksa a chak lo lutuk a nia, thisen i hloh hnem a, hetianga i awm chuan a pawi lutuk dawn" ka nu'n a lo ti lawm lawm a, "Thi ve daih mah ila eng nge pawi? Engkim ka tuar vek tawh. Chuti chung chuan a dam zawngin engkim ka thlir ţhin. Mahse a ni em em tawh lo, Tintin-a lehzel maw? A fanu pawh hmu hman lovin maw a kal a? Hei hi eng nge awmzia? Kan chunga thil thleng mek hi eng entirna ber nge ni a? Eng nge hetiang thil hi a thlen kher a ţulna?" mumal lo zetin ka la ti chiam chiam a, ka au ri leh ka ţap ri te chuan cabin chhung an luahkhat vek a, ka tal nasa tih pawh ka hria, ka nu leh u Mala ten min dawm bet tlat lo se la chu ka tlanchhuak daih tawh ang. 

Ka inbengdaih theih hnuah meuh chuan ka chau lutuk chu ka thaw hle hle a, ka insut leh hraih ţhin a, che leh vak duh pawh ni ila tha engmah ka nei tawh lo. Ka tha neih zawng zawng a zo tawh a, ka taksa hnuai lam a na em em bawk. Doctor leh nurse in min buaipui lai pawh ka hre mumal lo a, cabin chhung chu a reh tlawk tlawk a, ka nuin min lo hnaih leh rual chuan, "Ka thi ve duh..hetiang teh hrep a na tawrh ai chuan ka thi ve zawk mai ang" ka lo ti leh a, ka tal tawh lo a, ţawng pawh ka ţawng ring thei tawh lo.

"Chhel takin le...nang chu i chhel em kha. Vanduaina hi midang ta tur bik a ni hleinem, kan tawrh ve tur tho a nia, vanduai bikah in ngai duh reng reng suh" ti a ka nu'n ka sam a chul lai chuan naute ţap ri ka hria a, ka chhing sawk a, a hmel ka hmu ngam tawh hlawl lo a ni. Vanduaina hi ka chunga thleng turah ka ngai a, chutih rual chuan ka chunga vanduaina a thleng ngun bik lutuk hi ka hrethiam thei lo a ni. 

"Nu, ka thi ve zawk mai ang" beidawng zet a ka tih leh chuan ka nu insut ri ka hria a, ka chunga thil thleng zawng zawng avang hian dam zel ka chak tawh lo. Fiahna pawh nise a lutuk mah mah a ni. Engtin nge Tintin-a telloin kan awm theih ang? Keimah chauh a kan fanu enkawl chu ka zuam lo a ni. 

"Nurse ka ni ve tho a, keiman ka buaipui thei mai ang. Doctor nen pawh khan kan inhre ţha a, a ngaihtuahawm loh ang. A bulah ka awm ang a, ka veng mai ang" ka u ţawng lang lang ri chuan min ti harhin ka meng riai riai a, engtia rei nge ka mutthilh hre lo mah ila darkar tam a nih ka ring lo, ka chau takzet a, ka meng peih ţawk ţawk chauh a ni. 

"A chhungte khan an dilin ka hria, Zira an nghak duh bawk si a, vawiin chuan an vui hman kher lovang. Chutianga chhe nasa a ni lova, zanin te chu a tlaivarpui theih lutuk. Zira awmna a hla bawk si nen, an dil chuan an phal em em ang. Phal loh ngawt chi pawh a ni lo a" a ti leh a, ka u phone be ri avang ringawt pawh chuan ka lo ţap leh a, engkim hian a awm tawh loh zia min hriattir a, tuna ka tawrh ai na hi a awm leh theih tawh ka ring lo. Vanduaina avanga chhungkua a nunna chan ta mai te, chhungkaw zinga pakhat chauh damchhuak te pawh an awm tih ka hria, mahse mi vanduaina hi inhnem nan a hman chi si loh, kei aia vanduai an awm tih hrereng mah ila vanduai ka inti vawng vawng em a ni. 

"I lo harh tawh maw? Haw ang aw" ka u'n a tih chuan ka ţim sawk a, "Lo haw leh vat rawh aw" tiin ka thlah a, "Ka lo haw vat ang" a ti a nih kha. A lo haw dan hi ka hmu ngam dawn em ni?

"Engtin nge ni ang aw? Amah a chak lo si a, car pahnih chu a awm a, pawnah Rinhlua leh Sawmtea te an awm a, kan zawn chhuak ang nge kan pawm chhuak ang?" ti a u Mama'n ka u a rawn lai te pawh chuan an hmuh lohin ka puan sin lai chu ka ţham bet ngawt ngawt a, pangngai deuh a an ţawng thei te chu mak ka ti. "In hmangaih lo em ni? Hrehawm in ti ve miah lo em ni?" ti a ankhum buan buan tak ka nap a, ka rilru chu a chiai in a mumallo takzet a ni. 

"In lamah chuan ka buaipui thei ang. Rei a ţhu thei dawn lo a, aaa...indim viau a ngai ang" ka u chuan a ti leh a, "Vani, na i nei em?" u Rinhlua chu a rawn kun hniam a, a mit sen ram mai ka hmuh chuan ka khabe a sai dar dar a, ka ţah leh mai loh nan ka hmui hnuai lam chu ka pet fan fan a, "Hahdam rawh aw" a tih leh rual chuan ka hmui pehna chu thlahin ring zetin ka thaw chhuak hawk a, ka ţap chu a ni leh mai. 

In lamah min phur haw a, ka na ka hre chang tawh lo a, naute pawh ka ngaihsak thei lo. Engtin nge a awm? Enkawl zui ngaiin a awm em? tih te pawh engmah ka hre lo, ka ţap khur ngawt ngawt reng a, Tintin-a hmuh ka duh a, ka hreh em em bawk si. 

Bena te hoin kawtah min lo chang a, ka u in min dawm ding a, "Min lo kuah rawh...ding chawl vang vang la, muangchangin kan lut dawn nia" a tih ri te chu zai ri chuan a hliah khuh lek lek a, mang ruai chungin ka hawi kual a, tu te mai pawh chuan lainat hmel zet hian min lo en a, min khawngaih ang, mi vanduai te chu kan khawngaihthlak alawm. 

Inchhung kan lut chu ka nghilh deuh dupin ka hria, boruak a danglam em a ni. Zai ri a tawp rualin ţap ri a ring zual sauh a, Tintin-a an zalhna lam chu ngam leh ngam lovin ka en a, ka lainat lutuk chu awm ngaihna ka hre lo. Tih hmasak ber tur pawh hre lova ka u kuaha ka din reng lai chuan, "Vani, sawlaiah sawn i ţhutna tur kan siam a, hawh, lokal rawh" Zualin a rawn ti a, "Zual, ka hrethiam lo reng reng. Engtin nge a nih theih? Ka chau lutuk, a na bawk si" mumallo zet hian ka lo ti nawk nawk a, ka khawhmuh a phe leh zo tawh a, Tintin-a pawh ka hmu chiang leh thei tawh lo. 

Boruak chu ka kham ta lo mai emaw tih tur hian ka thaw te a mumallo a, boruak ka hip nasat deuh leh ka taksa a lo na ve zel bawk si, la mu mai mai tur ka nih laiin hetiang hi a thleng ta si a, min buaipui inhuam berin nau ka neih zawh ruala haw lo thei lovin min siam ta chu a nih hi. 

Ka ţhutna tur bika an lo siamah chuan ka ţhu a, Tintin-a bul chiahah a ni. A hmel chu ka en a, insum zo lovin ka ţap leh a, ka pum ka dawm pah vang vang a, ka taksa hi na kher lo se duhtawka ţah ka chak ka ni. Mu leh mal hre lo lek a ka tal chiam lai khan na ka hre hauh lova, tunah chuan ka taksa leh rilru, a vai hian na lo lai pawh a awm tawh lo. A hmai chu a duk ve a, a lu an tuam bur bawk a, a lungawithlak loh takzet a ni. 

Ka en ngawih ngawih reng a, tui deuh a muhil ang mai a ni. Ka tleirawl chhuah hlim hlawt aţanga ka kawp chawt reng kha a ni a, mipa dang an leng lo. A sual ber lai pawhin ka zui duan duan reng a, ka nu'n ţhen tur a min ti reng chung pawhin ka vuan lui tlat a, siamţhat tumin ka bei hram hram zel a, tuman an rinloh laiin pasalah ka nei a, heti maia a kal hi ka hrethiam lova, ka na takzet a ni. Ka hmangaih a, keimah ka inhmangaihna aia nasain ka hmangaih a, ka thu chu nise a nunna hi ka nunna nen ka thleng daih tur..chuti khawp chuan Tintin-a hi ka hmangaih a sin. 

Tintin-a kut vawt vek tawh ka vawn reng lai chuan ka ep chiaha ţhu ka pa chuan a chal a rawn dawm leh vang vang ţhin a, patling pah nise a mittui a hru leh zeuh ţhin. Tintin-a hi a duat a, ani pawh hian a pa hi a ngai a, mi zawng zawngin an in pafa bik mange an tih ţhin a ni. 

"Tintin, i awm loh chuan keimah chauhin engtin nge kan fanu hi ka enkawl theih ang?" tiin ka phun leh sap sap ţhin a, ka nawm loh zual em avangin ka u in pindanah min hruai lut a, khumah ka mu leh rih a, "C-section em a ngai lo a i vannei hle mai. Hiv level kha sang viau se chu C-section a nau neih a ngai dawn a, chutiang lo chuan ţha deuhin i nei thei a" tiin thu dang a sawi a, ka rilruah chutiang a leng lo thung. 

"Nau neih lai leh a hnu lamah i mamawh ang zelin damdawi an pe ang che tiraw? Engmah hlauthawng suh aw..naute pawh damdawi an pe tawh a nia" a tih leh chuan ka lo bu nghat a, "In enkawl ţhat chu a ţha a sin. Neih hmain an endik vek a, neih pangngai a nei theiah an ngai che a ni mai a, naute pawh a ngaihtuahawm miah lo ang. C-section a ngai ang tih ka lo hlau lutuk a" a ti leh a, ka chhang tawh lo. Ka damdawi hi ka thlah vek anga ka thi ve daih mai dawn em mawni ka ti zawk hial a ni. 

"Lokal rawh u Zir, hetah i indah ang nge inchungah zawk?" Zuali chu ka lo en vat a, u Ziran a rawn zui lut a, "Hetah a ni mai bungrua ka ngah lo" a ti a, khum zawn a sofa ah chuan ţhuin a hmai a hup a, a kun zui daih a, thil ho te pawh hian lung an ti chhe vek tawh a, ka hmuh phaka awm lo law law turin ka duh. 

"Lo ngaihven che ka tum a, u Zira lo lut nen kan intawk a" a tih laiin ka nu a rawn lut ve a, u Zira a hmuh vanga rawn lut a ni tih hriat zetin u Zira bulah chuan a ţhu a, lungchhe zetin a ţap zui a. U Zira pawh mipa mah nise a mittui a dang thei bik lo, a awm ve alawm. Ni e, an thisen zawmpui a ni a, Tintin-a a ni bawk. A rilru ţhat zia an hre vek a, ngaina lo tu an tlem a sin. 

Ka u bulah lokalin a naute pawm lai en an tum chuan a hmai khuhna chu ka u chuan a lo hlim vat a, "A fanu pianni ah tak amah zawk a kal leh si a, hmuh pawh a hmu hman lo. Bawihte, i pa hi hetiang hian awm lo se chu a awi nasa ang che mawle...a pawm ning miah lo ang che" ka nu chuan a ti a, thawmhnaw lah a lei phur em em a, a lei khawl ruih a, a fanu in a thawmhnaw lei ngei a ha lai a hmu ve hman dawn ta lo a ni. Pindan chu ţap riin a khat a ni ber a, kei lah ka insum thei lo, a na em a, ţap vak vak mah ila a na hi a reh thei chuang lo ang. 

Fimkhur a ngaih deuh avangin naute chu ka u in a awm hlat pui a, buaina deuh emaw ngaihţhat loh tur a a awm phei chuan damdawiin a kalpui lehnghal tur a ni. Mahse, a pa ber hetiang hi a ni tawh si a, kan fanu chuan eng em a ti lovang. Naute lehzel thlenga tawrh tir chu Pathian pawhin a phal ka ring lo. 

Ţhalai ho an lokal khawm laiin keipawh ka ţhu chhuak veleh a, 'Hmana kan nunhlui a chul tawh hnu' tih hla an sa chu kan insum hleithei lo a ni. 

'I hlimthla te mai hi kan chan tawk

I anka biak leh mi chhang si lo' tiin thiam takin an zai a, kan be mawlh mawlh a, min chhang ve thei tawh si lo. Ko ko mah ila a eih tawh awm si lova, a na vawng vawng em a ni. 

Hla chu an la nawn a, thiam taka an zai ţhap ţhap lai chuan a kut bawk ka vuan leh a, min vuan let ve thei se chu khawvela mi hlim ber ka ni leh mai tur. 

'Kawl a ngui tlaini a her liam a,

Rial ang lo dai e, i run kaina

Zantlai bawh ar mah hi siang a lawi ţhin

Han hawi ve ang che i run kaina'

Sensiari chu khumah a bawk rawp a, Tintin-a chu kuahin a taksa chet nasat danah a ţap nasa hle tih a hriat a, an hla sak berkher chuan lung a ti chhe lehzual a ni ber. A tello chuan inchhung hi a dai duai tawh dawn a, nu leh pa leh unaute ti hlim tu ber a ni miau a ni. An hauh nasat ber a ni chung hian an hlimna thlen tu ber pawh Tintin-a tho a ni. 

💛💛💛💛💛💛💛

Tintin-a vuina hun an hman lai chuan a bulah ţhuin a biang vawt thlar chu ka chul a, tlaivara kan bula a awm min phal sak a, mahse nakin lawkah chuan lei hnuai thuk takah amah chauhin an zalh tawh ang a, ka ngaihtuah ringawt pawhin hrehawm ka ti, ka khawngaih em a ni. 

"Ngati nge ka lokal tir kher kher che le? Kal suh ti tlat ila chu hetiang hi a thleng awm tawp si lo a" ka ti leh ringawt ţhin a, awmzia a awm tawh der si lo. 

Ui chung chungin kan thlah liam a, kei a fanu ţap ri pawhin a kai tho zo tawh si lo a, ani chu kan ngaih em em ka pi bulah a kal ve tawh. Ka ţap bang hleithei lova, mi zingah pawh awm ve hman lovin pindanah min hruai lut a, dimtein khumah min muttir a, mi â ang mai a ni, ka ţap a, a chang leh ka chip leh hmak a, ka ţap leh a, chutiang chu ka awm dan ka sawifiah thiam dan ber a ni. 

Kan awmna pindanah a puan dawn ho leh pangpar tlem an rawn dah lut a, ka nu leh ka nu Chhuangi te an lo lut ve bawk a, khum zawn a sofa ah chuan an ţhu ta reng a. 

"Ka inhnemna ber chu maw ka u, Tintin-a hi a fel lai, Pathian a hnaih lai berin a kal a, a ruang chunga a ţhianpa thusawi kha i hria ang a, zu kan in a, kan piahah a ţhu ve reng a, fiamthu te a thawh a kan nuihpui dar dar reng a, zu in ve tur a kan tihin a duh lo a, far khat pawh a in lo a tih kha. Inkhawm a ţhulh ngai lo a, a kal ta rau rau a nih chuan Pathianin a sual a a tluk leh a hlau tiin ka inhnem a, a fel lai tak hian Pathianin a duh ka ti ve tlat" ka nu chuan a ti a, kan hmangaih te an han boral meuh hi chuan inhnemna tur kan zawng ruai vek a, ka nu thlir dan pawh hi a mak hran lo, a fapa thlarauin Pathian hnen a thlen loh a hlau ve a ni. 

"Ni chiah e..keipawh ka lo ngaihtuah a, a fel tawh lutuk in rawn tih khan kan lo lawm ve em em a, krismas lai te khan, 'Tintin-a chu thlemna a do zo lo leh mai angem aw?' kan lo ti ve vang vang zel a, Pathian hian a chhe lam chauh ni lo a ţha pawh a duh ve a, Tintin-a pawh hi a tan a duh tawh a ni mai. Ţha leh pangngai deuh a ka be hman lo erawh pawi ka ti, min haw deuh chung hian a thi angem aw te ka tia" nu Chhuangin a tih chuan, "Teuh lo mai...Tintin-a hi ka hrechiang a, tumah a haw rei tak tak ngai lo" ka nu'n a lo ti vat a. 

Hei hi a ni ka sawi fo ţhin leh mi pawi sawi ka hreh nachhan chu. Kan nunna ah hian thu kan nei lo a, zankhat mit chhin tawk thut thei vek kan ni. Mi an thih tawh hnua inchhir hian awmzia a nei tawh ngai lova, tu chungah pawh ţhat chhuah ila inchhirna tur kan nei lo a ni mai. 

Thla thar kan chuang kai a, Bawihtein thla khat a tlin ni chiah leh Tintin-a thih cham a ni. March ni 4 ah Bawihtei a piang a, ka hmangaih berin min kalsan ni a ni bawk a, he ni hi damchhunga ka theihnghilh tawh loh tur a ni. 

Tintin-a khan a ţhianţhaber boral ta Boomer-a duh ang ngeiin kan fanu hming hi Remlalfaki ti a sak a duh a, min hrilh lai khan nalh ti lo viau mah ila Remlalfaki tiin a hming kan sa a, ka unaute zawkin min fiam nan tak an hmang a, keini chu kan lungawi khawp mai. Amah kan hmuh ringawt pawh hian a pa te ţhian dun kan hrechhuak zel dawn tihna a ni. 

Ngai ka la awh hleithei lo a, "Pathian hi a awm ka ring lo lek lek tawh a ni" tiin ka sawi hial a, mahse u Rinhlua berin, "Engvangin? I hmangaihin a kalsan vang che in maw? Pathian hi awm lo tak tak pawh nise mihring chu kan thi vek dawn tho a" a ti a, pawm thiam ka tum buai peih lo, engtikahmah ka pawm thiam thei dawn chuang lo. 

Nitin ka ngai zual deuh deuh a, a sulhnu hmuh reng te hi hrehawm tih chang ka ngah a, ka nu te hian phal phei se chu kan in lama haw daih mai ka duh hial a ni. Ţawngţai chak miah loh chang ka nei a, khati khawpa nasa khan ka ţawngţai a, kohhran ka bel hram hram a, chuti chung chuan ka hmangaih berin min kalsan tho a tihna rilru ka pu ţhin. Mahse, u Rinhlua sawi ang deuh khan, tuarna leh hrehawmna, thihna ten kan chunga thla a zar hian Pathian hi a awm loh kan ring fo a, amaherawhchu, Pathian a awm kan rin loh avang ngawtin kan tawrhna leh thihna te hi a bo phah dawn chuang lo. Pathian kan rin luih tlat a, tawrhna phena malsawmna lo inphum ru ţhin te kan hmuh thiam chuan engkim, kan nunna thleng hian Pathian thu vek a nih zia kan hmu chhuak zawk ţhin. Ka vanduai takzet a, Pathian a awm lo, kristian ka ni tawh lo pawh ti ila tuman min dem ka ring lo. Mahse, ka tawrhna phenah hian thil tam tak a awm tih ka hria a, fanu duhawm tak ka nei a, ka nu tihdan takah Tintin-a kha a fel lai takin a kal a, kei aia vanduai lehchhawng an tam zia ka hre ran bawk. Ka rilru a na a, ka thin a rim bawk a, chuti chung chuan Pathian pawi sawi ka hlau em em tho a ni. Amahah ka innghat a, min enkawl dawn tih ka hre bawk. 

Kan ţhenawmnu hian min pui nasa a, "Nikum hmasaah ka fapa a boral a, a kum lehah ka pasal a boral leh a, mahse ka vui lo, ka pasal leh ka fapa kha keimah hian boralsan ta zawk ila an â thei hial ang. Kei ang hian an tuar thiam ve dawn lo" a ti a, engkim hi chhan neiin a thleng a, mihring ang zawng chuan a harsa alawm, mahse, awm hmun a insawh insawh emaw, ka nunna lak ve tawp bak tih theih ka neih loh zia te, keimah leh keimah ka intihdam theih loh zia ka hriatna te hian Pathian bawk min hnaih tir leh ţhin a ni. 

"Bawihtei chu thla khat lai a ni ve tawh a" Sensiari chuan a ti fiamthu a, ţhutthlengah ka ţhutpui a, ani erawh chhuatah a ţhu tung a, Bawihtei kut chu vuanin a en vang vang a, a nui lui thei bik lo tih a lang reng mai. 

"Kawr puk luih kha hak tir ula, a dawn nual kha" u Ziran a lo tih chuan, "A la ha thei teuh lo mai" ka lo ti a, ka fanu chuan min en kiau a, amah ka en hian Tintin-a hmuah ka in ngai ţhin. 

"A pa a chhun zawk a nih hi...a len deuh hunah Vani a chhun ve na lai pawh a lang chho mai ang" ţhenawmnuin a lo ti a, "Niang chu..a pa a ang telh telh emaw tih mai tur a ni. Fa hmasaber hi chuan an pa te an chhun zawk tlangpui an tih kha" ka nu'n a lo ti a, Sensiari ţhutna bulah chuan dingin a rawn kun hniam a, Bawihtei chu a chhaih zui a, "A pa chu dam se aw...tuman kan pawm chang lo ang mawle. A hauh ţung ang a, lawm chu sawi loh, kan fak thlengin a phal lo maithei a ni. Amah ber khan a fak thiam leh nasa dawn mai si a" ka nu'n a tih leh chuan, "Khatiang zawng khan ţawng tawh suh. Bawihtei te chu a pa'n a lo thlir reng tho alawm tiraw?" lawm pahin Sensiarin a lo ti vat a, ka en ka en ţhin a, a pa pawh a hmu hman lo hi ka lainat ngawih ngawih ţhin. Han in awm se an inhmeh dawn tehlul nen. 

"Pa dang a ngah alawm ti zawk rawh u. A pa hrereng chung siin, pa neih loh hrehawm ti miah lovin kan siam dawn a alawm. Kan awm chhung chu a lang mawi ber reng ang" u Ziran a lo tih rual chuan Bawihtei kawrah ka mittui a far a, Sensiari chuan a lo nuai fai vat a, Bawihtei ka pawm lohna lamin ka mit pahnih ka hup a, ka khabe a khur leh hlak hlak tawh a, ka nu a ţah rual chuan insum zo lovin ka ţap chhuak ve a, inleng an awm nual nain min hrethiam lutuk ang, thla khatna chauh alawm a la nih. A fanu ka en hian ţah loh a har ka ti ţhin, a mitmeng leh engkimah ka hrechhuak a, amah hmuh tur a awm tawh lo chu thuhran, a aw takngial pawh hriattur a awm tawh lova, a pian hun a nghahhlelh em em a fanu nen kan in awm chawt reng a, ka ngai em a ni. 

"Khawi, keiman ka lo pawm ange" Sensiarin a tih rualin, "A ril te pawh a ţam leh tawh lo maw? A fel ropui si a, a ţap khât bawk si. A hnute ka lo siam ang" Daizauin a lo ti zung zung bawk a. Bawihtei an lak rual chuan ka tho nalh a, bathroom ah tlan lutin chhuatah bang nghengin ka ţhu a, aw rawl chhuah meuhin ka ţap leh a. Tunah chuan ka hringnun hi a chul leh rup tawh a, rawng a nei leh tawh lo. Black and white ang chiah a ni leh tawh a, rawng mawi tak chhuak ţhin kha a hliahkhuh leh vek tawh. 

Nu Duhi leh nu Piangi ten min rawn be reng a, puanin an rawn khuh thlap bawk a, an ţah hla te kha ka la hre reng mai, "Kan khua aţanga in haw dawn lai kha ka hmuh hnuhnun na ber tur che a ni tih hria ila chu i tana hriat nuam tur hlir ka sawi mai tur" an ti a, chutiang chiah chu a ni. 

Kha zan kha ka bula a mut hnuhnun berna tur tih chu hria ila duat taka min fawh lai khan ka nam sawn lo ang a, ka pang te kha kham viau mah se lehlam ka hawi san miah lo tur. Taksa na mai mai chu dahţhain ka kuah tlaivar ţhak mai tur a nia. A ţhiante hnen a a kal dawn ni kha ka hmuh hnuhnun berna ni tur a ni tih chu hria ila chu min kuah rawh a tih khan nghet deuhin ka kuah ang a, ka thlah duh hauh lo ang. Ka ngai che a tih te khan ka bula awm turin ka chelh tlat zawk tur a nia, kei aiin a kal hmasa zawk dawn tih chu hria ila nasa lehzual zawkin amah ka hmangaihna ka lan tir ang a, hrehawm a tawrh ve ka phal hauh lo ang. Mihring te hian kan hma hun tur kan hre si lo a, hetiang thil kan chunga a thlen ve hi ka lo rin ngaih loh vang a ni. 

💛💛💛💛💛💛💛

Bawihtei piancham a ni leh ta reng mai, kum 1 a tlinna chiah a ni. A changkang tawhin lawm a hlawh a, min ti hlimtu leh inchhung boruak ti nuam tu ber a nih bakah a pa min hriatchhuah tir tu leh min ngaih zual tir tu a ni. 

Kan in lamah ka la haw chho lo a, ka nute chuan min lo hruai an tum ţhin, mahse helama ka nute hian an phal tlat lo a, ui taktein min ui a, min hruai lo mai turin ţah aw takmeuhin an lo ngen ţhin a, midangte hrethiam ţhin tak ka nu chuan a ti lui ngai lem lo. Bawihtei a lawm ve em avangin a lo leng ngun thung a, an inpaw ve lawp lawp zel. 

"Hei apatean a lo video call a nih hi" tiin Sensiari a phul hlut a, chhuat a balloon zinga Bawihtei ţhu chu a rawn pan hnai a, a lan theih dan turin phone chu a lek kang a, ka lo en ve vat a, u Zira a lo ni. 

"Bawihte, happy birthday aw" a rawn ti nem duai a, min hmuh ve takah chuan, "Phone en rawh...i ac ah pawisa ka rawn thun kha. Birthday lawm nan in lo hmang dawn nia" a ti leh a, u Zira hian min ngaihtuah thar riau a, a sawi ang tak tak khan rual kan awh a hlau a, ka duh lo chung chung Bawihtei mamawh lei nan thla tin pawisa min lo thawn ţhin. 

"A ngai lo a sin...cake pawh Sensiari hian a order a, thawmhnaw ka nuten an lei bawk si. Engmah a ngai lo mawle" ka ti nang nang a, "Pangpar lei nan tal i lo hmang dawn nia" a tih hnuah Bawihtei chu a chhaih zui a, thlan a ka kal dawn tih a hrechiang sa a ni. 

"Ehe...Thartei an man a nih hi hei kan veng group ah an rawn post alawm. Damdawi a rui nasa ţhin ka ti reng a, a vawrh tel bawk avangin an man a nih hi" ka nu'n a ti lang lang a, ka chhang lem lo. Hrehawm min tawrh tir tumin theihtawp a chhuah a, amah vangin buaina ka tawk a, hrehawm pawh ka tuar nasa. Inţhianţhatna hi ka dah san em avangin ka ti let ve ngai lo a, ngawih ka chuh tlat a, ani a bawraw tial tial thung a, phuba chu Pathianin a la ta ah ka ngai. Ti hian ka sawi ngai lovin a nihna chu a nundan leh tun a thil thleng hian a tarlang vek tawh. 

Bawihtei piancham min lawmpui tumin mi an lokal khawm ţak ţak a, thil pek pawh a dawng hnem khawp mai. Amah lah chu a phurin ka malchunga ka din tir te chuan a su turh turh a, a la kal thei lova, a vak zat zat thei tawh thung a, kum khat naa kal nghal mai lo hi naupang dang pawh an tam a, chuvang chuan Bawihtei hi naupang dang aiin a chak lo zawk ka ti phal lo, a chum hran lo chung hian mi chuan, "A la lian dawn" an ti vek a, an thusawi chu ka ring ve tawp a, a sam lah chu a ţhain Sensiarin a chei peih bawk a, a lang mawi var reng mai. 

Tintin-a thih cham kum khatna a nih ve bawk avangin upa lam te pawh an lo chuang kai a, ka nu Chhuangi a lo zin bawk. Tintin-a a lo tih ţhin dan avang khan inthiam lohna in a khat a, a lo zin tlut tlut a, kan nufa chungah ţhat a chhuah nasain a awm tawh chuan Bawihtei pawh a chang chawt ţhin. 

"Tintin-a kum khat a nih lai thlalak leh Bawihtei thlalak ka dah kawp a, ka status a, an va in ang ve an rawn ti sup sup mai. Sawmtea ten a pa a chhun sia Vani a khawngaihthlak an rawn ti vel a nia aw" Sensiari chuan a ti a, a nui hak hak nain a mittui hnâm chu ka hmu thei a, kei aiin a tuar lo bik lo. Puitling kan nih hnu thleng hian Tintin-a khan naupang cheiin a la chei a, a duat bik a, ka hmaa a ding ţhin ang bawkin a nau hmaah hian a ding tlat ţhin. 

"Awii..ka lung a leng" a ti halh a, kan lung a chhe leh mai mai dawn tih hriain ka kalsan thuai a, inleng zingah chuan ka ţhu ve a, anni pawhin Bawihtei leh Tintin-a chanchin bak an lo sawi chuang lo. 

"Ehe...Zuali a lokal e...tun aţanga kum hnih a liam leh meuh chuan kan khua hian MCS nula kan la nei lo ang tih pawh a sawi theih loh" pa phawk zualte chuan an lo ti hlut a, Zuali chuan bawm tuam mawi lian pui a lo pawm lut a, Bawihtei a koh rualin ban vai tarh tarh chungin a lo nui a, an in awm nasa a, an in ngai khawp mai. 

"Tlaiah chuan thlan a kal i ti maw?" a tih chuan, "Aw...tlai lutuk lo ah ni se la. Chaw eitur an tam a, chaw ei hmain kal ang u. Bawihtei hruai ka duh a, kan tlai lutuk chuan a hritlang palh ang" ka ti a, a bu nghat nghat a. 

"Ka'n che zung zung ang a, tlaiah chuan catering an ti tiraw?" a tih leh chuan, "Aw..ka nuten a awlsam mai an tia" ka ti a, "A ţhat chu...pawnah sawn chhang vel ka dah a, Sawmtea te an lo thleng ţep. Thingpui vel kan buaipui ang a, kan kal dawn nia" a ti zung zung a, ţhiantha neih hi chu a thlamuanthlak ţhin. 

Ben-a te nupa pawh an lokal a, "Thlanah kan kal hmasa a" an ti a, Ben-a bik hian a tuar khawp mai. Tintin-a ang bawk khan a awm thiam lo a, zu a in nasa zual sauh a, an nu hian min kawm nel vein an pa awmdan hian a tih hrehawm thu min hrilh ve fo ţhin. A cher kuam tawh a, a thu em em bawk. 

Thingpui vel an sem zawh hnuah ka insiam a, an inzawh hun an nghah chhungin Bawihtei thawmhnaw pawh ka thlak a, "Apa bulah kal ang aw" a bianga dawm pah chuan ka ti a, a chalah ka fawp zui vang vang a. Awm ve se chu a fanu piancham pawh hi lawm hut hut lo mah ila kan famkim viau ang mawle. 

Sawmtea motor kan khalh tir a, a ho in thlanah chuan kan kal a, Sensiarin cake lian vak lo a ken chu ka melh zauh zauh reng a, "Zana zai tur chu ka dah hrang thlap alawm. Hemi hi thlan a mi turin ka siam tel tir a nih hi. A lian lo a, a man a to lo. Kum khatna a ni a, a hlu ve alawm" a ti a, ka pangpar ken chu ka en a, ka ţah loh nan ka hmui ka pet fan fan a, a thlanah pangpar nen ka kal fo ang tih ka ngaihtuah chhin ngai bik lo. Tun thleng hian min la ţhawng takzet a ni. 

"U Zira hian Bawihtei mamawh kan lei theih loh a hlau a, kan thei ti mah ila a ngaih a ţha tlat lo. Mi faten an neih ang chu nei ve zel turin a duh a, u Mala fate leh u Dini takngial pawn an thik ngam miah loh hi. Bawihtei hi a vanduai rualin a vannei a sin" tih pahin Bawihtei biangah chuan a piai a, "Hrethiam rual i nih hunah i pa chanchin ka la hrilh dawn che nia" nui sang chung hian a ti leh a, a pa'n a hmangaih zia leh ven him a tum nasat zia chu hria se chuan "Ka pa kha dam se aw" tih vawng vawng chang a ngah viau ang, hringnun kawng harsa tak a zawh chho ve dawn miau a ni. 

Tintin-a thlan kan thlen chuan ka ţhingţhi rawp a, pangpar lo la awm ho zinga a hlui deuh tawh te chu ka paih nghal mawlh mawlh a, a thlan hi kan tlawh ngun a, a bal hman lo a ni ber e. 

"I fanu piancham a nih hi aw...cake te kan lo keng a" tiin Sensiari chuan mi nung ang maiin a bia a, Bawihtei kut chu dawmin cake chu a zai tir a, mittui kan hru leh zauh ţhin hlawm a, a hmun ruak hi a zau em a, tuman an hnawh khat zo lo a ni. 

Tintin-a thlan chhak deuh a an ţhut ţhap hnuah pawh keini nufa chu a thlanah kan la awm a, "Khawvel aia nuam zawkah i awm tawh a, ka ngaihtuah lo che a nia. Ka pa te, ka pi leh Boomer te ho nen in awm ang a, i mal lo ang tih pawh ka hria. Keimahni zawk hian duhsakna tinreng dawn mah ila kan mal ngawih ngawih a, Tintin, i awm loh chuan engmah kan lo ni lo a nih hi" ka ti a, Bawihtei chu ka en ţhin a, thlana a pa hming inziak chu nautelem hum ţat chung hian a en ve dauh dauh a, "I fanu ka hmuh apiang hian awm ve la ka ti ţhin. Enkawl dun ila, hma a sawn dan te kan thlir dun ang a, i awmna aţanga i lo thlir ve chu ring tho mah ila Bawihtei i hmuh ruala i hlim hmel ka hmu ve chak ţhin" ka ti a, ka be mawlh mawlh reng a, ani erawh chuan min chhang ve ngai tawh lo. 

"Min kalsan khan ka hringnun a chul rup a, Bawihtei ka ngaihsak thei lo a, min tih hlim zawh ka rin loh vang a ni. Mahse, tunah chuan ka hringnun a rawng mawi tak awm tir tu a ni tawh a, amahah hian nangmah ka hmu tel ţhin" aw khur dar dar hian ka ti a. 

Kan duh anga thil a kal loh a, vanduaina ten kan chungah thla an zar hian kan hringnun hi rawng nei lo ang maiin a chul rup ţhin a, chutiang hunah chiah chuan beiseina a pawimawh ţhin. Vanduaina kan tawk mawlh mawlh a nih pawhin a phena thil awm kha beiseina nen thlir ila, kan tan a hun ţha, vanneihna kan tawn ve hun tur kan nghah thlen peih phawt chuan hringnun chul rup tawh pawh hian rawng mawi tak a chhuah leh mai ţhin. 

"Ka unaupa a nih hi. Tuman eng khaw kha a min ngaih loh laiin ani chuan 'ka u i ni' tiin a sawi reng a, min cheimawi a, ka fapa thlengin min hmangaih pui a, buaina ka tawhin ka ban phakah a awm reng ţhin. Ka tan chuan ani aia hlu leh min duhsak a, min hmangaih tu an awm chuang lo" tih pahin Daizaui pawn a thihchamah pangpar a rawn pe ve a, mittui hruk pahin a kalsan leh vat a, kan rualin a kal ve lo a, Sensiari te bula an pa ka hmuh chuan an lokal dun a ni tih ka hre nghal mai. 

"Min ngaihtuah miah suh aw...i awmna hmunah khan hlim leh thlamuang deuhin awm la, i tello chuan harsa ţhin mah se i fanu hi i duh ang ngeiin ţha deuhin ka enkawl ang. Kan hmangaih reng ang che ang a, i fanu hian i hlut zia leh i hmangaih zia a hre ngei ngei ang. Chutiang tur chuan ka zirtir dawn a ni. Nang chu kan hnenah awm ve tawh lo mah la kan thinlungah i awm reng ang a, i fanu thinlungah pawh hmun i chang reng ang" tiin ka thlah a. 

Kan haw lamah Sawmtea chuan K. Hminga hla pakhat, nalh ka tih deuh ţhin, He lunglen ruam thim a ta hi tih hla ngei mai kha a play a, nghet deuh a Bawihtei pawm bet chung pawn pawn lam ka thlir a. 

Tintin-a hi kan ngai ngawih ngawih a, min hnem zo an awm lo. Engpawh mai hian amah min hriatchhuah tir a, kan sulhnu te hi lunglenna kaitho tu mai a ni. Kan phal lo chungin thihna avangin kan thlah liam a ngai ta si a, khawhar taka a sulhnu chhui reng bak tih theih a awm tawh lo. Khawvelah reilote a lo zin a, hlimna tam tak min thlen a, amah awm tawh lo mah se kan thawk a tawp ve hma chu rilruah a châm zui reng tawh ang. 

Ka mit ka chhing a, ka ngaihtuahna kawm chung rengin zai chu ka ngaithla a. 

'Khuarel thihna koham chuan,

Kan ngaih lai thlanah a zalh ta,

Khuarelin hmelma ang min hliam si,

Aw hun, nang talin min hnem rawh'

Zai ri chu ka bengah a ri zawi tial tial a, ka fanu pawh ka awm nghengin a muhil a, ka hringnun a chul hlen loh nan a Pathianin fanu min pe hi ka lawm a ni. Kan khawharna zual pui hi hunin min la hnem a nga, chutih hunah pawh chuan Tintin-a hi kan hrereng tho ang a, keimahniah a riak ve reng tawh ang. Ani pawhin a awmna hmun aţanga min lo thlir ve reng ka ring tlat a ni.

A TAWP TA.