KEIMAH, THINGTLANG NULA-8

KEIMAH, THINGTLANG NULA-8

"Ehe...u Valdik, ha lem i vuah a ni maw?" ka tih rual chuan a hmui a hup chawih a, a kâ chhung a thi bawk si, a ha ringawt a ngaihtuah bawk si chu a che buai vek tawh a, ka khawngaih letling zawk. 

"A tla tih i chiang maw?" ti a zawh pahin ka kun leh a, lung ţhenkhat chu ka dah sawn a, en kual ve ngial mah ila ha awm ang ka hmu hauh lo. 

"A mak ve e...i kun turh laiin khapa khan a rawn su che a, helai lung an dahkhawm hi i bawh ngei bawk a, mahse ha ka hmu lo. A tla lo aniang khawmaw han ţhen teh" ka tih lai chuan a tho sawk sawk a, a hmui hup reng chung chuan, "Tumah hrilh suh" a ti a, ka lo bu nghat a. 

"Hrilh dawn nang...i ha chu a tla lo, i ui lutuk na lamah a tla emaw i ti a nih kha. I ha dang nen a rawng a in ang vek aniang ha lem i vuah tih ka hre lo reng reng" ka tih leh chuan, "Miin an hriat chuan nangmah i ni mai" a ti a, a kâ chhung thi leh a na dang chu hria ang pawhin a awm lo. 

"I ha chu a awm em han liak chhin teh, i lo dawlh daih ange aw. Kan ţhenawmpa pawn a ha lem a dawlh palh a an buai em kha" ka ti nawn leh a, deusawh ka tum pawh a ni lo, a hma ka ngaih vang a ni zawk mah. 

"Aw..a awm" a ti a, kawngsir ah chil a va chhak a, thisen a ni zawk mah ang chu. 

"Ka hmui chhung lam a pilh aniang a thip lutuk, hmun dangah na ka nei lo. Ha lem kha i sawichhuah chuan ka hek ve dawn che a nia" tiin min vau leh a, a khabe vel te chu a la sen nuan a, a hmui bawk chu hup lehin min vau na ni awm takin min kawk zauh a, hmanhmawh deuhin a kalsawn zui nghal a, nula ve si ha lem han vuah. Mak ka ti emai Remmawii chu ka hrilh ve tho ang. 

Quarter ka thlen dawnah chuan ka hmai ka tuai thuak thuak a, ka thawmhnaw te thlengin ka siam ţha a, ka kal tawh lo ang ka ti ve ţhin tak nain kal ngei ngei ngaiin ka awm leh ţhin. Pastor pawh ka hmu ngun tawh viau nain ka hmuh dawn apiang hian phurna mak deuh ka nei ţhin a, a mit lak ka la tum nasa tih chu ka insiamţhat chiam danah hian a hriat mai awm e. Pathian thu thu a ni tak na a kurtai hian pumkhatah min la siam lo ang tih pawh a sawi theih loh. 

Kawngkhar inhawng sa chu ka kik mawi leh a, Sensiari zawkin min lo chhawn a, inchhung ka luh rualin cooker a lo phit chiah lehnghal. Pastor pawh hahdam hmel deuhin a lo ţhu a, zingkar ah lehzel pawh a hmelţha vawr reng mai. 

"Lawk aw Kalkurtai, dawrah ka va kal lawk ange lo ţhu rawh, thingpui kan in dawn nia" a lo ti sawk sawk a, bawm a enkual dan dan hnuah min chhuahsan daih a, henu awmdan hi a chang chuan hun thawl min pe emaw tih mai tur a ni. 

"Kurtai in va heh sawt ve" ka ti nghal thawr a, a ep chiahah ka ţhu a, ka kurtai ken lai chu ka bulah ka dah fel than bawk. 

"Engzat nge in la neih?" a lo ti a, "A la awm ve nual. Kan khua angah chuan kurtai hralh a har alawm. Ka putea ten min lo thawn lui tlat zel si a, loh theih loh a zawrh a ngai a nih hi" ka ti duah a, keimah chiah ka nih takah chuan ka zak ve deuh a, reilote ka en zawk ngam chauh a, ka hawi sawn leh ţhin a, a nawm dan a zahthlak an tih ţhin kha ka hrethiam ve ta viau mai. 

"I hmanhmawh em? Vawk chaw i pe tawh em?" a tih leh chuan, "Ka piin a lo pe mai ang" ka ti a, pastor bul a awm hi a nawm rualin sawi tur a vang thei e...min hnawh tu a awm tlat zel. 

"An dam ţha maw?" a lo ti leh daih a, "Kan vawk nge ka pi te?" ti a ka lo zawh let chuan, "An vaiin....heh" a ti a, za lo deuhin a nui a, a nui mawi rapthlak lehnghal a. 

"An damţha...vawk phei chu ngaihtuah duh suh, an ei a, an mu tawp a, miin an hnaih hlekin an bengchheng em em zel a a ni mai" boruak tih zangkhai tum hian ka ti a, "A nih chu" a ti ban charh a, a bul a lehkhabu chhah zet mai chu lain a hmai zawnah a lek kang a, a keu rual chuan, "Sensiari lo nghak la thingpui in rawh" a ti leh a, a hmel ka hmu thei tawh lova, lehkhabu chhiar ang deuhin awm ve bawk mah se a chhiar loh zia ka hmu chiang khawp mai. 

"U Rinhlu" ka tih chuan lehkhabu dah sawn miah lovin min rawn thlek a, "I lehkhabu chhiar lai kha a letlingin i keng a nia aw" ka tih leh chuan a nui hul hak a, min en reng chungin muangchangin lehkhabu chu a her a, "I chhiar loh te chuan chhiar angin awm kher mah ta che" ner nang nang chung hian ka lo ti a, "Sawi tur tam deuh awm se tiraw?" a ti a, lehkhabu chu khup thawkin a bulah bawk a dah leh a, kan ngawi zui rauh rauh a, ţawngtlem lutuk chi nih hi a lo hrehawm dawn ka ti ta alawm, a hna nen a inrem bawk si lo, hrehawm tih chang a ngah dawn lutuk tlat. 

"Kurtai i heh sawt emai sawi tur i hre vat ang. Zunthlum te i lo nei ange aw" ka tih laiin, "Palai hmel i hmu tawh em?" min lo ti a, ka ngawi chiang ngang mai. 

"In sawifel thei em?" a ti leh a, Puitea chungchang a hre ve a ni khawp ang. Thu ho te pawh kan khuaah chuan a darh nghal vek zel. Mahse, kan chhungkua chuan tumah kan hrilh si lo a, amah Puitea bawk aniang chu. 

"Awii...i ti awm ang lo emai. Eng palai mah an lokal lo. Kan khua angah pawh nupui pasal neih kan hmanhmawh chung tawh bik hleinem. Tun hma ang kha a ni tawh lo" ka ti zung zung a, Puitea mai mai chu a chak lo khawp ang. 

"Ka hresual a nih dawn chu" a ti boh a, "Aw i hresual" rang zet a ka lo tih chuan a phu deuh zawkin ka hria, ka ţawng ring bawk em a ni. 

"Ih maw ka hrilh tawp ang che. Kan khuaah hi chuan engpawh a lar hluai zel. Mi chanchin sawi peih deuh deuh an tam a, ka chanchin ngat phei chu sawi peih tak an ni. In rel hlum theih se chu i rawn awm ve hma daih khan ka thi tawh ang. Chawhmeh nei lo deuh pawn chaw ei laiin mi an rel a, an chaw ei a tui sawt zel. Kan khaw mite hian chawhmeh ţha an mamawh ve vak hleinem, mi han rel zeuh se la, chaw hlang pawh an dawlh zawt zawt mai a ni. Nang pawh an thusawi apiang lo awih zel mah ta che" ka ti zat zat a, ka ţawng nem lo hle bawk. 

Ka duh ang ka sawi zawh chuan min en vang vang a, "Khaia...i va au ring ve" a lo ti charh a, "Ka au chiah pawh a nih loh kha...mi thusawi apiang i awih a min zawt nghal zel alawm. Pasal nei rual pawh ka la nih loh hi. An kâ a kua a an duh duh an sawi ve tawp zel a nih kha lo awih tawh reng reng suh" ka la ti vin hlak hlak a, min en reng chung hian, "Ka hau hleinem che" a ti boh a, ka lo thaw hak a. 

"Bialpa i nei em?" a ti leh tawh a, hmun dang a melh nghal daih lehnghal. 

"Nei nang aw...vawikhatmah bialpa ka la nei lo" ka tih chuan, "Bialnu ka neih i ring em?" a ti a, a zawhna lah hi chhan a harsa thei mai sia aw. A ţhut dan a siam rem a, ţhutthleng nghenchhan ah chuan a ban a hlam a, sir lam min chhawn ta daih a, hma lam ngawt a en bawk. 

"Engati nge khati khan i ţhut daih a" ka tih chuan, "Ka thiam dan a nia" a lo ti a, "Ka zawhna chu?" tih zawm lehin min en duh tawh ţhak lo bawk a, mi maksak ve tak chu a ni. 

"Bialnu i neih leh neih loh te chu engtin nge ka lo hriat daih theih ang a? Ka zawh apiang chein thu dangah i pakai daih zel a" ka ti niah niah a, ka kawm berin ka lam a hawi duh tak lohah chuan a nuam duh lo khawp mai. 

"Ka pian hnu ah chuan ka nei tawh" a tih veleh, "Ka ring reng a..la nei lo tawp chu i ni dawn lo hrim hrim" ka lo ti thuai a, "Umm..pastor ka nia, hul hak reng bik hi zahthlak chang a awm a" a tih leh sup sup takah chuan, "Awii..keichu kan inbiak rei chuan ka bo vek zel. I sawi awmzia pawh ka hre lo" ka ti chuai raih a, pastor in nupui an nei deuh zel an ti ngei a, nei lo bik nih hi hrehawm a ti ve em mawni ka ti rum rum tawh mai.

"Thlaler nen a kan in an na i hria em?" a tih leh chuan, "Hre lo..eng nge thlaler nen a in in anna chu?" tiin ka lo zawt let a, "Kan ro" a ti bul hmuk a, "Tuman min tlawh pawh lo. Ka chik che a" a tih lai mekin, "Ka rei em? Nu Zari a lo ti ti leh luam a" Sensiarin a rawn ti lut a, a va han hun lo tak aw. Pastor u Rinhlua pawh a ţhu ţha a, inhnaih lutuk lo mah ila kan inhmachhawn leh ran tawh a, Sensiari chu kan lo be lo ve ve a, kan pahnih pawh chu kan in en leh tawh lo. 

Sensiari ngawt chu kan lo en ve ve aniang inkhaibawr ţeuh chung chuan kan ţhutna lam a rawn hawi a, "Engati nge khati taka min melh rum a? In lo inhau em ni? In va tum dun nasa em em ve. U Rinchut, i pawi ka sawi em ni a?" a ti mawlh mawlh a, za lo deuh hian a nui zui a, kan ti ti a rawn ti khaihlak miau alawm. 

"Kei hi, ka piin rei min lo ti tawh ang" tih leh thawh ka rual a, pastor u Rinhlua pawh en leh tawh chuang lo chuan kurtai ka la a, Sensiari lamah chuan pheiin, "Hei in kurtai tur aw. Pawisa min la pe lo a" ka tih zawm leh a, ka lai ve lutuk chu ka che buai nuaiin ka hria. 

"Kurtai te chu kan la ngah lutuk alawm. Vani te khan an hawn ţhen zawk a, inleng kan nei deuh reng chung pawhin kan ei zo hleithei lo. Tun ţum chu kan lei lo mai dawn em maw ni" a lo ti daih a, zahthlak ve tak chu a ni. U Rinhlua lahin kan nei tawh lo a ti bawk si. 

"A awm tawh lo" tih pahin u Rinhlua chu a tho a, choka ah chuan a rawn phei ve a, "A zo vek tawh" a ti mawl tawp a, Sensiari a hawi â nasa khawp mai. 

"Khawiah nge? Nizan chuan a la tam hle kha" a lo ti a, harhchhuak thut ni awm takin a inher a, chhuar a hawn rawp hnuah kurtai bawm ni awm tak a la chhuak a, a en chiah chu a lo ruak huai tak tak a, dawt a sawi lo a nih hmel. 

"A va mak em em...nizan a pu Duhawma te thingpui ka lum sak kha chuan a khatin a la awm ngei si a" a ti niah niah a, pastor lah chuan ngaipawimawh lo zet hian, "Pawisa i hman ban chuan Kalkurtaii hi kurtai man pe rawh" a lo ti a, thupha chawi luam pahin Sensiari chuan pawisa min pe a, awmze nei deuh a u Rinhlua a melh zauh chu ka lo hmu hman tho. 

"Ka haw phawt mai ang" ti a u Rinhlua ka en chuan zawi tein a lo bu zauh a, ka chhuak ta chu rilru a buai ve angreng viau mai. Haw kawngah chuan pastor nen a kan thusawi te kha ka ngaihtuah let a, "Ka chik che a" a tih lah khan a sawi zo hman mang si lo a, min lo chik viau tak tak ang a, min duh ve deuh em mawni tih mai te a awl a, chutiang em chu ka beisei ngam bawk si lo, thlaler nen meuh a intehkhin tawh chuan eng emaw chu a awm ngei ngei dawn tih ka chiang. 

"A lian ber ka la chung pawhin engtin nge i bun tawh loh theih le?" ka piin a lo ti lang lang a, ka pu ke lamah a ţhu a, puan pheikhawk ni awm tak a keng ran bawk. 

"Ka ke a lian em a ka bun tawk an zuar ve loh a nih kha" ka pu chuan a lo ti mai a, "I ke hi chu a hranpa liau liau a uluk deuh a chawm ni awm tak hian a lian a" a ti a, ka pu kerekah dawmin a en vang vang a, "A turu lutuk hi e...mihring chu nise chaw a heh viau ang, inbuan pawh a chak ang ka ring. I ke zungpui lah hi a chuk a nat hmel si" a ti deuh duah a, ka pi ngei zawng hi ka ni ang tih ka hlau ţhin, mi a sawichhe thiam si, a duhtawkin min han sawichhia se la chu ka inawkhlum duh hial ang chu. 

"Chawhmeh ţhing kha lo chhuang lum rawh" ka pi'n a tih laiin u Lalhuma a lo lut a, a ruih hmel chhar chhar khawp mai. Ţhutna lam pan ve nghal mai lovin kawngkapui bulah a ding a, a kut lah chu hmalamah a suih at a, ka pi leh pute lam chu hawiin a ri lovin a nui vur vur a, "Lo ţhu rawh Lalhum, khati seng sung a insiamchhiat kher a ngai hleinem. I rui pek a ni maw?" ka piin a lo ti a, u Lalhuma pawh a tum zui bar a. 

"I mak ka ti ka pi, ka nui a nih kha. Mi nui ţha hle hle lai i insiamchhia tih ngawt zel mai" a ti a, ţhutna lam chu a pan a, "Tunah ka pi Dari makpa tur a lo ţhu ang" tih pahin a ţhu a, a nui zui kur kur a, ka va han ten tak aw. 

"Zu in tawh suh...kha i puam nasa lutuk, i mit pawh i biangin a hliah vek tawh alawm. I hnar phei kha chu sa angin han ser ve chiah se maw...an sat chhuak hnem dawn lutuk. Amah a lên tir vang vang tham lawih hnar i neih tawh kha" ka piin a tih chuan, "Niang chu..hnar a len chuan kan hnar ring nge nge alawm. Thlawhna ri te chu nep te, ka'n hnar tak tak hi chu maw ka pi Dar, indopui a chhuak ta emaw an ti chawk a nia" a ti a, ka pu a lo nui hawk hawk a, ka pi erawh a nui ţha duh der lo. 

"I nun a ho lutuk emai. Zu hian mihring a tih chhiat theih zia hrereng chung hian in in lui zel tho a" a ti a, u Lalhuma lah chuan, "Tunlaiah chuan a fak mawi chin an tam tawh. I la hre lo mai mai a nih kha" a lo ti a, "Eee...zu fakmawi ţhin i hriat phawt chuan min lo cho zel rawh. Zu vanga chhungkaw kehchhia an tam zia hrereng chunga an la fakmawi tlat hi ka haw riau a nia" ka pi chuan a ti a, ka nu kha zu vangin naupangtein a boral a, ka hrechhuak veleh nawlh ţhin. 

"Chutianga i cho ngam zel dawn a nih chuan hrilh chi i nih loh tawp chu. Ka pi Dari hi chu i pui ve e, vanramah pawh kal la a thu pawl i nih nghal ka ring. Rulin a chuk ţum che pawh khan nuih lamah a kal daih a ni lawm ni? Mi chuan rul tur an thihpui a, Pi Dari chuan a rui ringawt an tih che kha. Pui ve tak chu i ni, fa te chu i nei ve ngei bawk si a, ka pu zawk a rai daih lo hi mak ka ti ţhin a sin" a ti luam a, nui tet tet chungin chawhmeh ka chhuang a, u Lalhuma hian a sawisa hnehsawh ber ţhin mai.

"Mi dawt phuahchawp mai mai chaw tak khukin khuk pui hlut zel suh ka tih ţhin kha" ka piin a tih chuan, "A thinrim tak tak chuan a thlawk thei an ti bawk che. Pi Dari thinrim chu a khu muai muai a a thlawk thut zel an ti. Hei vang hian alawm i makpa nih ka chak em em" a ti a, ka lo ner nang nang a, "Lalhum, i duh duh sawi ve ringawt zel suh. Tui tin khat pawh khai zo lo hi chu pasal tlak in ni lo hrim hrim" ka ti a, kuangkuah at chungin a nui huah huah a, pawisa chu ngah ve am mah se Lalhuma te ang hi chu ka nei lul lovang. 

"Kalvari tlanga chawlh hahdam te pawh ka chak ve tawh alawm mawle. I hmel lah hi a ţha reuh si a, mi hausa fa, khawpuia awm, inchei ve hliau hliau reng ţhin chu ni la i ţha lar ve hat ang chu. Lian lo mah la i hmelţha emai, ti ila i te chhe chuang lo. I hmelţha a nia aw Bawihte zam reng reng suh" min han ti vel a, "A â viau nain a hmel hi a chhe lo a nia. Tlemin han fing ve deuh se chu pasal ţha deuh a nei tawh ang. A ât vang alawm nangni ho hian in ngaihzawn mai mai ni" ka pi in a lo fiamthu ve zat a, ka puin, "Rawng pawh i bawl em ni? Chaw ei ve nghal la" a lo tih zeuh chuan, "Pawi hleinem..keini ang ei chu kezungpui tiat lek a ni mai a, i ke zungpui tiat lek" a ti kher a, ka piin ka pu ke len zia a lo sawi zo chiah bawk nen kan nui ta dar dar a. U Lalhuma hi chuan min duhsak ve a, sawi lawk miah lova sa min rawn leisak thut chang te a nei a, kan duh lo ti eng ang mah ila a dah tawp a, a haw san daih zel. Min duhsak tu na na na chu duhsak let an lo awl aniang, ka pi takngial pawn a hau vak ngai lo. 

Ţukţhuan eikhamah ka piin, "Tunlai khaw chin a hriat si loh a, ni sat lai hian buh tlem pho rawh" a ti a, tar hi chu an thla a phang hma ţhin si a tiin ka pho chhuak a, ar ka ko a ni ringawt. Ar berkher hi chu vawk aiin buaithlak ka ti zawk a, an ek pawh a uih ka ti zawk. Vulh tawh lo ang ka tih lahin ka piin a remti tlat lova, tunah pawh a no hruai lai kan nei a, a kawlh em em mai lehnghal. Ka pi kutah ka dah deuh tawp mai. 

Bathlar aţangin ka veng a, youtube a zai ka ngaihthlak laiin Remmawiin min lo call a, ka la chiah chu, "Kalvari" a rawn ti ţuau mai. 

"Eng nge? In inentir tawh mi?" ka lo ti thuai a, "Aw..min zai dawn, a nat hlima ka lo sawi nghal lo kha ka inchhir tawh. Doctor in, 'na chu sawi nghal zel tur' a tia, sawi har lo ila chu zai lova tihdan te pawh a awm thei a, ka tuarchhel leh lutuk a a pawi vek a nih hi. Enteh...doctor han hmelţhat zia chu maw a bulah chuan kei takngial pawh ka lang chul ve rup thei. A kut tin pawh pastor ang chiah kha a ni mai, a fai dan chu darthlalang ah pawh a hman theih ang. Awii...hmu ve la ka ti a sin aw" a rawn ti bawrh bawrh a, a kalna apiangah hmelţha a hmu thei zel a, a vannei angreng. 

"In lo haw har awm mange" ka ti hnual raih thung a, Remmawii tello chuan engmah a nuam lo. 

"Ka hre bik lo, min zai har dawn lova, damdawiinah awm rei a ngai lo bawk an ti. Kan lo haw har lutuk lo ang, ka nu lah hi a zahthlak thei si, bus ah kan chuang a, a din apiangin a din chhan a zawh loh leh chhuk a tum a, a phun peih bawk si, doctor in a na i sawi har lutuk min tih te khan ka nu zawkin min hau hrep a, an nui tawp alawm. 'Lalremmawi, i ţawng theih tehreng nen i mawng na te chu sawi vat tur alawm' a tih loh leh, 'Ani hi chu naupanlai pawh a ek tang ţhang a nia, kan buai fo mai, chutiang turah chuan a ngai aniang' te a tia, kei lah ka tuai ve puak reuh bawk sia, ka zak tak tak a ni" a rawn ti leh zung zung a, chhan pawh ka chhan hmain, "Hei bus a lo thleng chiah. Chhukna hmun tur kan hrechiang tawh a, ka nu pawh a buai tawh lo ang" a ti leh a, phone chu a tawp zui nghal a, anni nufa inzui chu an chhangchhe dawn hle mai. 

Tlaia Fawnvela leh Sangkhuma te lokal chuan buhfai no khat ve ve an rawn keng a, ka piin a lo melh rum nasa mai. Tim daia an ţhu chu, "Chaw in rawn ei duh chuan sawi hma rawh u ka ti mai alawm. Buhfai rawn ken kher a ngai hleinem, in nu leh paten a uikawm e min ti dawn a sin" tiin a hau a, an melh ralh a, Fawnvela zawk chuan, "Pi Darin lo keng rawh a ti ka ti lo. Tunlai chu chaw ka heh a, ka inthlahrung ve a nih hi. Mu chungin no chanve vel ka ei thei a, ţhu chung chuan no khat ka ei ang. Ka chaw ei a tui em vang zawk alawm pi" a ti nuah nuah a, "Keichu no khat ai tam ka ei thei a, mahse no khat chiah ka lo keng" Sangkhuman a lo ti ve thung a, ka pu nuih a zat viau laiin ka pi chu a la tum nasa lutuk ringawt.

"Laktlak loh dun per pur lutuk mai. Hnathawk ţha peih mang si lovin in chaw ei a tui ve em em a, lehkha in zir peih tawh lo a nih rau rau chuan a ţul ţul thawk ve lawp lawp ta che u. Hetiang in nih chhung chuan tuman makpa atan an duh lo ang che u" a ti deuh hrep a, "Buhfai kha hawn leh ula, Pi Darin 'chaw in rawn ei dawn a nih pawhin buhfai ken kher a ngai lo a ti' ti ang che u" a ti a, an lo bu nghat nghat a, "Vawk chaw zu pe rawh u" vin zet a a tih leh takah chuan an tho sawk sawk a, "Kal ang u...api Dari vawk zu duat ang u' tih pahin Sangkhuma chuan min namchhuak a, vawkin kan thlen chuan an hahdam huai niin a lang. 

"Hmanhmawh lo ang u..meizial zu mai mai ang" Fawnvelan a tih chuan meizial zu lo ber Sangkhuma a ţhu hmasa ber a, "Ka nghei tawh dawn" an bula ţhut ve paha ka tih chuan ka hauin min lo en a, "Pastor vang a mi?" an ti rual deuh ţhawt a, ka nuih a za angreng. 

"Tukinah quarter ah ka kal a" tiin thil awmdan vel ka sawi a, ka sawi chhung zawng uluk deuhin an lo ngaithla a, ka sawi zawh veleh, "Kan tih reng kha. Kei aia chhe lo pawhin an ngaizawng ang de de dei dei i ti vel a, a rilru i la peng laklawh tawh a nih kha. Thinlungin a thlan tawh chuan e...hmel mai mai chu engmah a ni lo. Keipawh Fithangin min hmangaih a, ka chhiat lai ber a ka video call pawn min en ngawih ngawih zel tho" Fawnvela chuan a ti duah a, Sangkhuman, "Nia" a lo ti ve charh bawk a, "Rin aiin a rilru ka la hma" ban deuh taka ka tih chuan, "Hmangaihna hi second khat chhung lek pawn a piang thei tih hre ta che. Mahse ka awih em em lo. Vawikhat inhmuh naah a inhmangaih nghal theih te an tia, vawikhat inhmuh naa inhmangaih nghal tur chuan hmelţhat a ngai awm emai. Nih loh pawn min hmu tute hmelţha tih zawng kan nih a ngai tal ang. Pastor nen chuan in inhmu ngun e...thla khat ai tam mah a reply lo chung chein message i thawn peih a, a biak ve hnuah che lah in inbe tlut tlut a, in ngainatna tham chu a ni ve tawh alawm" Fawnvelan a lo ti leh a, an sawi ang hi ni tak tak se la chu a nuam viau ang. 

"Zingkarah khatiang kha a sawi a, nilengin a reh leh ang lawi a" ka ti a, vawk lah chu an bengchheng nasa tawh a, ti ti pawh a muk thei tawh lo. 

"Pastor a nihna laiah a mawi chin leh a awm tawk a zawng ve nasa dawn tih hrereng rawh. Inngaizawng mah ula Sangkhuma te ang hian in awm ve thei dawn miah lo a nia. Dawhtheih te pawh a ngai ang" Fawnvelan a tih lai mek chuan, "Eng nge in la tih a? Vawk chaw pe turin in chhuk a ni lawm ni? An rilţam an rak an rak tawh kha. Tho ula vawk chaw pe rawh u" ka pi'n a rawn ti hlak hlak a, tukverh lamah kan hawi chho a, ka pi pawh a rawn dak thla ve ran mai. 

"Ţhep ţhawp cheu chuan, min en reng lovin che ta che u" vin zet a a tih leh takah chuan kan tho sap sap a, vawk chaw kan pek fel hnuah pawh Sangkhuman, "I pi hi chu a den ve e. Patling bawraw deuh deuh ai pawn ka hlau zawk. Bin Laden-a unaunu Bin Ladar-i ni awm tak a ni ka pi Dari hi chu" a la ti nuah nuah a, tukverh lamah ka hawi chho leh vat a, ka pi a lo awm tawh lo hlauh e. 

"Remmawii call ang u" tiin kan insawi phur a, vawkin bul aţang bawk chuan kan video call a, "Awiii...awiii...awiii...ka zak lutuk. Bus a kan chuan laiin ka nu'n ka pa a bia a, ring leng lawngin chanchin a hrilh a, a ek a tang ngun sia, a mawng na pawh kha chutiang turah chuan a lo ngai a, a lo ni si lo a kan buai phah dawn a nih hi a ti kher bawk sia, bus a chuang zawng zawngin min nuih vek. Ka nu hi chu a buaithlak thei e, a zah loh vang maiin zak lo ve turah min ngai a, conductor in a phone biak laia bus fare a lo dil te khan min nghak ta che phone ka biak hi a tia a vin hrep a, ka u tello chuan ka zui chhuak tawh dawn lo reng reng" a rawn ti nghal zung zung a, ţawng ve na hun a awm ngai lo reng reng. 

"Keini pawh ka pi Bin Ladar-in min hau char char" Sangkhuman a lo ti ve bawk a, "Tu nge Bin Ladar-i" a rawn ti hu a, ka pi a ni tih kan sawi chuan ring fahran hian a nui khek duai a, "A inhmeh dan chu. Nem pachangi nen hian nufa ni awm tak an ni. Ka lo haw hun chu aw...Aizawl return ka ni dawn bawk a ka inchei parh nasa ang chu" a tih hnuah pastor nen a kan chanchin chu ka sawi ngai lovin mi pahnih chuan an insawi chhuak a, Remmawii phur lutuk chu a meng pawng hlawt hlawt reng a ni ber. 

"All go a nih chiah chu" a ti hluai a, a awmzia kan hre ve der lo, "Awm mai mai aiah sam tan ka zir char char ang a, ka lo haw veleh ka tan sak ang che. Eng inkhawm mah kan ţhulh tawh lo bawk ang. A nuam cher cher ang chu aw, diktak chuan pastor hi hmelţha ka ti ve reng a, i duh em avangin ka kian mai mai che a nih hi aw. Lo inbe ziah rawh u...a duat viau che chuan ka lo haw hunah ka kokichhuan ang" a ti a, phone chu a hmaah a tung ni awm tak a ni, a ţhutdan a siamrem lai chuan a bu lâwp a, "Lalremmawi, thawveng em em reng suh. I u in amahin rawng a bawl a, mipa zawk lehnghal. Eng nge i phone ah hian awm a i buaipui char char a? Chaw ah i ring duh em ni? Phone hi ka eitir dawn che mi? Dah la che rawh, che zung zung rawh" nu Nem pachangi ngei mai chuan a ti buan buan a, "Phone kha i ei dawn a nih loh chuan i u va pui rawh" tih pahin a nam bu leh lawp a, Remmawii tum nasa lutuk hmel chu a khawngaihthlak zawk. 

"Phone berkher te chu engtin nge ka ei theih bik ang a? Hei hi a nia bialpa ka neih ngam loh nachhan chu. Tun a min tihdan te kha ka bialpa ka biak lai chu nise ka zak dawn lutuk. Ţawng per nasa thei ropui si" a ti bul bul a, Nem pachangi a lo la awm hnai aniang, "Remmawi, eng maw i sawi? A ţawng per i ti mi? Ka ha nget bawk em ni i sawi leh a? I hmai va phih mai ta che" a lo ti leh chiam a, "Aw..ninawm i ha a nget si. I ţawng khan mei a nei lo, rim a nei" a ti hlak a, men pur chungin a nu awmna lam ni awm tak a hawi a, "I pianchamah, ka nu ka nu duhtak chu tih kha ka status ziah a, ka damloh lai em em te chuan min duat ve deuh la. Min nam vak vak khan tluk ka hlauh luatah mawng lam pawh a lo ţang ve zel a, a na alawm" lungawi lo tih hriat zet hian a ti a, keini lah a rukin kan inkheuh a, kan nui tat tat hlawm tawh a, Remmawii kan biak zawh meuh chuan khua a tlai ruih tawh.

"A mak a sin aw...khua a thim chiah hian Remmawii ka ngai zual ziah mawle. Kei aiin a thla chauhin a upa a, chuti chung chuan u zawk chan a chang thiam a, ka nu ang maia awm chang a nei bawk a, lo haw thuai thuai se ka ti emai" ka ti a, mipa pahnih pawn min lo zawm ve thuaiin Remmawii an ngaih zia an sawi ve bul bul reng a, min zin san chiah hian a tello a ka nun ruak zia ka hrechhuak a, ho mai maiah ka insual pui tawh hauh lo ang. 

Zanriah eikhamah ka ţhianten min haw san a, an haw dawnah, "I khawhar kan hlau a, Bin Ladar-i hlau chung chungin kan lo leng tlut tlut a nih hi. Zanah pawh i khua a har chuan min lo bia a, pastor i bia a nih pawhin gospel deuh a ngai chuang lo a nia" an ti ve thlap a, a chang chuan mi pangngai an ang ve ţhin a nia. 

Zanah pastor min lo biak hun ka nghak reng a, Remmawii lahin whatsapp ah group a rawn siam a, group hmingah chuan, 'Chhungkaw pawnchhia' a ti hem mai. Sangkhuma bawkin mak a lo ti leh tawh aniang, 'Group hming chu le(h)' a rawn ti a, Remmawii chuan, 'Puanchhia alawm kan nih. Chhungkaw chhehchhawl aiin chhungkaw pawnchhia ho hi kan hah lehzual zawk' tiin a hrilhfiah a, tlaia a nuin a tihdan kha a pal dai thei ngang lo a nih hmel, 'Chhungkaw chhehchhawl ho aiin chhungkaw pawnchhia ho hi min chhawr nasa zawk. Duh hun hunah min hau a, tih tur a awm hlek chuan tu pawh mai hian min melh nghal vek zel' a rawn ti leh a, ka ţhiante be chung rengin pastor chu a last seen ka en pah zauh zauh a, min lo biak loh chuan ka be bik miah lo ang ka ti ve tlat a, ka nghak a, ka beisei ran thung. 

'Thlaler nen a kan in anna kha i la hria em?' a rawn tih meuh chuan dar 10 a hnai leh thuak tawh. Inbiakna hun a tam tehreng nen min hel rei ve khawp mai. 

'Hria e...kan ro i tih kha' ti a ka chhan let chuan, 'I van hre rei thei' a rawn ti a, min biak takah chuan ka ngaihtuahna a kal thui leh viau tawh a, min duh a nih phawt chuan midang anga langsarin inkawp ve thei lo mah ila pawi ka ti lo tih thlengin rilruah a rawn lut a, a tan ka inhuam thui leh tawh viau a ni. 

'Tukin a i sawi chauh a nia, theihnghilh na hman a la awm hleinem' ka tih takah chuan, 'Group ah thu ţha deuh an rawn dah a, i chhiar ve duh em?' a ti leh ta daih a, phur vak lo chungin aw ka lo pawh a, a reh vang vang hnuah, 'Mi i hmangaih avang ngawtin thlak danglam tum duh suh, a hmangaih che a, a ngaipawimawh che a nih chuan amah zawk a inthlak danglam mai ang' tih hi min rawn thawn a, a hnuaiah, 'Thawn chhan che ka nei lo' a ti lehnghal zat bawk a, ka lawm ve hman tawh tehreng nen. 

Mi chu nise, "Nangmah vangin ka inthlak danglam alawm. Zan inkhawm ngai miah lo kha ka inkhawm ve zeuh zeuh tawh a, meizial ka nghei bawk a" an ti duh maithei, mahse keichu ka zak tlat a, 'A ţhat hi' tih zawngin ka chhang a, a duh khawp lo viau maithei a ni. 

'In nawrluihna hian awmzia a nei mawh khawp. Duhthlanna pawimawh ve na lai a nia' a rawn tih leh chuan, 'Ni chiah e...duh lo chung a in nawrluih chu sawt pawh a sawt thei lo' ka ti ve a, ka ţhiante bulah ka ho em em a, pastor bulah erawh ka la thutak ve rih lutuk tlat. 

'Kan inhmuh hmasak ber ţum kha i la hria em?' a tih leh chuan, 'Aw...khawlai ah a nia, pu Duhawma nen in ni bawk a, keini Remmawii nen kan ni thung a, ka kuah bet nasa lutuk kha min nuih nghe nghe a' ka ti a, ka hriatchian tehreng nen, 'Kurtai i lo zawrh ţum kha a ni lo maw?' a ti heu mai. 

'I ti ang lo e...kha te chu khawlaia kan inhmuh hnu alawm' ka ti a, inhmuh hmasak ber naa in hmangaih nghal an tih ang chu a ni lo ve chiang khawp mai min hmuh hmasakberna pawh a hre tawh lo a nih zawk hi. 

'Ka hmuh hmasakber che khan engah vak ka ngai lo che a' a rawn ti leh a, a va han lawmawm loh ţhin tak e aw. A ţawngkam thiam loh luatah thu lawmawm loh deuh deuh ka dawng reng bik mai. Amah leh a rilru chhiat loh zia hrechiang viau tawh lo ila chu nat veng veng chang ka ngah viau ta ve ang. 

'Ka hria alawm...ka hming pawh i hre har a' ka lo ti ve zat a, engtin pawn min ti se ka mi biak hi pastor u Rinhlua a nih phawt chuan nuam ka ti em em reng tho ang.

'A nih chu' tih chiahin min chhang let a, engtinmah ka va ti tawh lo a, a ni pawh a reh vang vang a, muttui tih lek chu ka thawn tho ang ka tih laiin amah zawkin, 'Min lo biak min lo biak hnu khan eng emaw vangin ka chik che a' a rawn ti a, 'Engvangin maw min chik?' tiin ka chhang let rang khawp mai. 

'Eng emaw vangin ka chik che' tih zawngin min chhang leh a, a sawi duh loh danah pu Duhawma te an inrawlh ka ring hmak tawh. Pastor in a pawh ve hmasak ber te an nia, eng emaw a sawi tih a chiang reng tawh. 

'Chuan engtin zel?' ka ti a, min chhan hun ka nghakhlel lutuk chu ka let kual sek a, puan sin ţhat ka tumna lamah bang ka tlawh ri bur a, ka pu hnar ri a tawk chawt rualin ka piin, "Kalvari" a rawn ti ţeng chuai a, an phu nasa a nih hmel. 

"Ka tlawh palh a nih kha..i vin thei si" ka ti hlak a, a hma aia vin mah hian, "Che sek suh, nichin aţangin i thawm ka hre tawh. Tih tur ka hrilh hma che hian muhil rawh" a ti a, a beng lah hi a var ve sia maw. 

"Ka muhil thei lo a nih hi" ka tih chuan, "Che lovin mu la i muhil mai ang. Zek zuk che hian, i che reng vei a nih kha. I thawm khan min ti muhil thei lo" a ti hlak hlak a, heti chung hian zantin ka hming lamin a ţawngţai ziah a, ka ngaih a ţha tho emai. Kei aia hmangaih tumah an nei lo. 

"Ai ah...ahh, nang a pawh chu mu ţha ve mai ta che mawle. In let sek suh, i kiuin ka hnarah i nghawk alawm" ka pi bawk chuan a ti leh hluai a, "Khai aw..a va zia lo ve. A na viau em? Mut dan ngai reng a mut chu pang a kham duh em alawm mawle" ka puin a ti dam thlup thung a, nupa inang lo ve tak chu a ni. 

"Na lo se a na ka ti dawn em ni? Jackie Chan-a en tawh miah suh. Nizan te khan i mang phan em maw ni? Midang ang i ni ve si lo, thawh at i hrat si. I ban i vai buan buan ziah mai. Tum loh deuhin min la vai khaw lo mai tur a sin. Chanchinthar puang ho hi an ţhu mai mai zel a, nang ang, chhun lama i thil en apiang mangphan a, zanlama chet chhuahpui ţhin tan chuan chanchinthar chiah en la a him ber ka tih ziah kha. Chanchinthar i en chuan zanah pawh ban vai buan buan lovin i mu ve mai mai zel. Bruce lee-a phei chu en reng reng suh, i au tel ruai ruai ang a, i rapawm dawn lutuk emai" tiin ka pi chu a ang zui hlak hlak a, kan inah na na na hi chuan amah aia thu an awm miau lo a ni. 

"Nileng zankhua a han ân ringawt mai chu i kâ te pawh a kham ve lo em ni? I ţawng ang zat hi ţawng ve ila chu kan chauh pui hnawk thei ang chu" ka puin a lo tih ve chuan, "Min duat reng ta che u..chauhpui hnawk tham khawp a tam ka ţawng a, ka che reng bawk a, ka hah a sin" a ti let daih a, "Hmm...hmhh...hmeichhia tak hi chu a. Tar pawh in danglam chuang lo a nih hi" ka pu chuan a ti a, "Tar hnuah mipa ah kan inlet daih bik hleinem mawle aw" pakhat lah chuan a lo ti leh ţalh a, chhan ţul a ti tawh lo aniang an reh zui vang vang a, keipawn pastor message chu ka chhiar leh ta daih a. Ka pi ân chhung kha chuan phone ka en ngam lo hrim hrim, thil a hre thei si. 

Min chik hnuah engtin zel nge a awm ka zawt a nih kha, 'Chik man i awm' tih zawngin min la chhang zui a, chhan let dan tur ka ngaihtuah fe hnuah, 'I rin aiin ka fel tihna mi?' ka ti a, nui lem ka dah ţeuh bawk a, fel min tih loh leh ka fiamthu ka ti thek mai dawn a ni. 

'I phak tawkah chuan fel e' a lo ti a, chhan let ka tum laiin a message bawk a lo thleng leh a, 'Bialnu neih ka chak hmel i ti em?' a ti hem mai! Kei lah ka uang chak tlat a, 'Chak hmel e...i lerh sawt riau' ka va ti ve nghal zat a, rin loh deuhin, 'I ring dik a nih chu' tiin min chhang a, dawnsawn dan thiam a har kher mai. 

'Bialnu neih i tum deuh tihna mi?' ka tih chuan, 'Kawppui nei lo a awm reng chu a mualphothlak a, ka mamawh alawm' a ti a, a mangang ve ţan tihna a ni thei mai angem le? Mahse, u Rinhlua hi midang ngaihdan ngaihven lem lo chi, Pathian leh kohhran pawi ka sawi loh phawt chuan ti a a duh dan dan a nung chi a ni ve in ka hria a, nupui duh ngawih ngawih, mangang tawh chu ni sela neih tur a vai dawn lo lutuk. A landan ringawt pawh hian hmeichhe tam tak a hip ngei dawn a, pastor a lo ni lehzel bawk nen, aaa...pastor phei chu ni lo se hmeichhiain an bawr nasa viau maithei, a nihna hian a phuar nasa ve em zawk a ni. Hetiang a ni chung hian Sensiari hnen aţangin ngaizawng a beiseitu a neih ve reng thu kan hre tawh a, mak pawh kan ti lo reng a ni. 

'Kan khuaah hmelţha an awm lo emai' ka ti a, ka thinphu lah chu a lo rang ve ringawt a, ka thaw chhuak leh halh ţhin a, keimah ka nih ka beisei deuh bawk si, ka nih ka ring chiah ngam bawk si lo lai vel chu thil nuam tak a ni lo. Ka phurna ai mahin ka hlauhthawnna a nasa zawk daih a ni. 

'Landan hi min hip tu a ni ve ngai lo. Thinlung a langsar ber dawn a, miin hmelţha an tih liam puat a, an nel zui theih loh hmeichhia ai chuan mi zawng zawng hahdamna thlen thei khawp a rilru ţha te hian min hip zawk ţhin' a ti ve a nih chu! Ka chhiar a, ka chhiar nawn leh ţhin a, he thu hi engtin nge a phuh chhuah ve theih zawk le tih chu ka zawhna lian ber a ni. 

'I sawi ţha hle mai. Ţawngkam i thiam lo sia, hetiang hi ka beisei hleinem' fiamthu a ka tih chuan, 'Ka sawi ang chiah hian ka pa'n a sawi ţhin a, ka theihnghilh thei lo' a rawn ti a, a pa thusawi a lo hriat chhawn lek a nih chu a. Mahse, a chhinchhiah a, a vawng reng a, tun thlenga a la sawichhuak a nih chuan ţha a ti ve hle tihna a ni mai. Landan aia thinlung a ngaihpawimawh zawk zia chiang takin ka hre tawh bawk.  

'Hmeichhia chu i la duh tho em?' ka ti a, a tlai tawh em a, min chhan let ka rin tawh loh laiin, 'Duh e...hmeichhe diktak chuan hahdamna a keng tel' a ti a, ngaihzawng nei ngai lo tih takah ka bo leh hu tawh a, kan boruak chu ka hrethiam lo a, ka nunphung ka hriatchian em avangin a sawi hmeichhia hi keimah ka nih leh nih loh ka hrechiang thei lo a ni. Ani lahin engmah a sawi chiang duh bawk si lo, duh viau siin a bialnu ni tur chuan tlin lohna ka ngah a, zir ngai leh insiamţhatna tur ka ngah zia ka hria, tunah chuan u Rinhlua pawh hian min rin ngam ka ring hauh lo. 

'Enteh hei hi a nuihzatthlak a sin' tiin James nono-a zai, "I hmangaihna ka hak" tih ngei mai chu ka thawn a, ka hah ru ţeuh a, thil dang sawi rih tur a ka duh vang a ni. 

'Kei ka ro a, nangin i lo hak a' a ti a, nui lem a dah ve ngei a, reilote kan infiam zui hnuah kan in mangţha a, a awmdan chu ka hrethiam lo takzet a ni. Mahni insitna ka neih nasat lutuk avangin a hmeichhe sawi kha keimah ka ni ang a ti a inngaihbel mai harsa ka ti tlat a, keimahah hian pastor hip thei tur ka zawng a, tihtak zet a amah ka duhna lo chu engmah ka hmu lo. Min duh let ve turin ka duh a, min duh let ve ka ring hauh lo thung. Phone a min be ve ringawt pawh mak ka tih tawh nen mak ka tih lehzual na turin a awm zel a, ka duhthusam a thleng ve ta a nih hi ti a han lawm chiamna turin engmah a sawi chiang chuang bawk si lo, kan boruak hi a nawm rualin a hahthlak na chin a awm ve tho a, ka lo ralkhat duh ve em em lai khan a ni chuan midangin ka chanchin chhia an sawi nasat em avangin min lo chik daih tawh a nih hmel a, en tawp chuan chhuan tur ka nei lo ngei alawm mah se min chik a nih chuan ka hausak ruk zia a hre ngei ang, mi hausa kan tehna a in ang lova, a tehdan a dik a nih phawt chuan a hmu thiam ang. 

Pastor u Rinhlua nen chuan zantin kan inbe ta ziah a, kan in ngaizawng lo, ani pawn engmah a sawi leh tawh lo. Chutiang a ni chung chuan min chik reng tho tih hriain ka fimkhur a, inkhawm ka taima thar hle bawk. Kţp ah ka inhmang leh ţan a, ka inkhawm apiangin thla la lo mah ila zantin kan inbiak miau avangin u Rinhlua chu ka hrilh ve ţhin. 

Remmawii pawh tluang takin an zai a, a lo haw tur thu a sawi chiah chu Fawnvela leh Sangkhuma te nen kan insawm khawm a, an inpengah kan lo awm ţhap a, Remmawii kan nghah lai te chuan pastor nen a kan inkar boruak min zawt leh tawh a, kimchang deuh a ka hrilh chuan, "A duh chiang che alawm. Pastor nupui i nih chuan meizial man min pe ziah ang che. Zuk ruk i chin lai zawng zawngin ka ţheh ziah che kha aw...theihnghilh miah suh" Fawnvela chuan a ti nghal a, "Awii...ani ang mi zei lo leh ţawngkam thiam lo lutuk hian min duh pawh nise min nei kher lo ang" uar fahran hian ka ti a, "Ţawngkam a thiam lo lutuk pawh a ni lo, a zei lo a, a ţawng tlem bawk a nih hi" Sangkhuman a lo ti ve a, engpawh chu lo nise quarter ah pawh min en ngam lo chung chungin thlaler nen a an ro dun zia a sawi a, ka insiamţha zel ang a, min duh thu a sawi hun ka nghak tawp mai ang, ka nghah chhuah zawh loh pawn vui thei ka ni chuang lo a, hma hun te hi hre lawk thei ila ţha tur. 

Kan zawnah sumo a rawn ding a, Remmawii kan hmu chiah chu kan ngawi ran a, kan en tlawk tlawk hlawm mai. Amah zawk chuan, "Hello my friend, mawng thar nen ka lo haw e" a ti a, a phur nasa mai a, a sam mawlh chu a ni kan mit la tu chu. 

"Awmhmun a keh hui reng lo khan chhuk ta che. Nang ni ho pawh kha, ding ang phuau reng lovin bungrua kha thiar thla sawk sawk rawh u" nu Nem pachangi chuan a ti zat zat a, Remmawii chu sumo aţangin a rawn ţum thla tharh a, a mawng a na deuh nge ni a ţhen chawk a, a nui zui lehnghal a. 

"I sam chu le...alice in wonderland ah an deuh i nei" Fawnvelan a lo ti a, a kir chiat a, a sam a sei lutuk loh vang aniang a hma lam chu a beng chungah a tawm chho vek a, a hnunglam pawhin a dar a thleng pha tawh lo. A sen thar bawk a, danglam tak a ni. A kir buk chuai mai ti ila ka sawi sual lo ber ang. A nalh lo hle bawk. 

"Ka sam hi maw...ka u bialnuin inzir nan min hmang a, pawisa ka chawi tir. Ka beng a lang vek sia maw...ka hawi te hi ka hawi chiang bik lutuk a, ka ţap nasa, pawisa min pe ţeuh alawm. Naktukah thingpui dawrah thil kan ei dawn nia" thawveng zet hian a ti a, kan inhmu leh ta chu a awihawm loh rum rum mai. Remmawii ber a awm tawh chuan ka buai rukna hi a kiang leh duak duak mai ang. 

CONT...