NUTHLAWI I HMUSIT MAW?

NUTHLAWI I HMUSIT MAW?

(He thawnthu hi a tak behchhana ka ziah a ni)

'I chhe lo e. Ka lo leng tawh dawn' ka message dawn chu ka chhiar nui var var a, kan la inhmu hauh lo chung hian kan inbe nel ve em em a, 'i chhe lo' ti a min chhaih fiam zuk chang a tam hle ţhin. 

'Min hmuh hunah chhia min ti ngawt ang' tiin ka chhang let a, reilote hnuah a message a rawn thleng leh nghal a, 'I mizia hian min hip zawk' a rawn ti. Min hriatchian tawh hmel khawp mai. 

Hriat a mual mual chu a nei tawh ang. Hnam khat kan nih avangin kan hnam pual group ah kan awm dun a, a tirah chuan group ah eng eng emaw sawiin kan nawi ho ţhin a, amah hian min rawn be pawp hmasain thla hnih pum hlum chu kan hmel tak la inhmu lovin kan inbe ve tawh a, thlalak kan inthawn nasa hle thung. 

Lalthanpuia a ni a, kawm a nuamin ka lawm zawng a sawi thiam a, zan rei tak tak thlenga kan inbiak pawhin ka ning ngai lo. Ngaihzawng ka nei ngai lem lova, thuk zawk a min biak a tum chang a chhan let dan ka thiam lo lutuk te hian a nuih a ti za viau ţhin. Ngaihzawng fum fe tak sawi tur la nei lo tan chuan a harsa a, chhan let loh ţum ka ngah ţhin khawp mai. 

"A lo be leh tawh che a ni maw?" ka ţhiannu, ka kawm ve ber Mapuii chuan min melh ralh a, "Niang chu mawle..a thlalak i la hmu lo tak tiraw? Eng nge ang i tih?" ti a zawh pahin ka ţhiannu lamah chuan ka tawlh hnai a, Thanpuia dp chu ka en tir a, "Hmuh nang mawle...min hmuh rawh ka tihin i zak zel alawm. Khawi teh, ka lo enchiang teh ang" tih pahin phone min chhuh sak a, thlalak chu hnai set sawtah a bih a, a chang leh a zoom thul, hmuh hmaih neih a hlauh hmel takzet a ni. 

"A chhiat hran lem loh hi. In kal thui tawh em? In inbiak nasat danah inngaizawng ang chu in ni tawh mai ang a" nui var var chunga a tih chuan, "Teuh lo mai. Biak chu kan inbe nasa a, ngei ngei turah ka ngai tawh. Mahse, kan la inngaizawng lo. Inhmuh hma chuan ka duh bik lo" ka ti ve tlat a, a hmel landanah chuan min chhaih te pawh a ang. 

"Lo len a duh a" ka ti leh hap a, "Len tir la a ni mai alawm. Kawm nel rawh, ngaihzawng nei lova awm reng rual pawh i nih tawh loh hi. Eng hnathawk nge?" ti a min lo zawh chuan, "Police ka ni e chu a tia" ka tih veleh, "A ţha lawm...duh ve tawp mai rawh. Hmeichhe tan chuan pasal hlawh nei ngei neih a ţha. Thil man a to zel a, indap chawp tur ringawt a pasal neih ai chuan thla tin a lo lut dawn tih hre sa ran a neih a ţha zawk. Fin thiam ve a ngai a nia aw" a ti nghal zung zung a, ka zak ru angreng viau thung. 

"Inngaihzawn hma hawt a chutiang lo sawi te chu a" ka ti hlak a, a nuih a la za em em zui a, "A ngai ve alawm. In inah lentir la, inhmu rawh u. I duhzawng a lo nih phei chuan a ţha a ni mai alawm" a ti then a, "Ka nau nen chiah kan awm si a, min zuam phah viau lo ang maw?" ka tih chuan, "Teuh lo mai, inhmuh puiah a sawm dawn tho che a, pawn lama inhmuh ai chuan inchhunga inhmuh a him zawk" a ti deuh tlat a, ka lo aw ve ta nge nge a. 

Thingtlang khaw pakhat a piang leh seilian ka ni a, chhungkaw khawsak pangngai tak kan ni. Ţhian ka kawm tam lem lo nain phak ang tawk tawkin kohhranah ka inhmang ve a, zaipawl ah hial ka tel ve ţhin a ni. Hei vang hian kan khuaa chuan min hre lo tu an tlem viau ta ve ang. 

Ka ţhiannu Mapuii hi kan khuaa pastor a lo awm ţhin an ni a, school kan kal dun a, kan inkawp chawt ţhin. Kan khua aţanga an pem hnu pawh khan nu leh pa phone aţang tein kan la inbe zui ve reng a, rei a daih lo thung. Kan inbiak loh vang vang hnuah facebook kaltlangin kan inbe thar leh a, inpawh deuhin kan inkawm zui leh mai a, zirna ka chawlhsan tawh thu ka hrilh chuan Aizawl a eizawnna dap turin min ti a, min buaipui a inhuam zia thlenga a sawi takah chuan hma kan sawn ve theih nan a Aizawl awm chu ka chat ta et et a. 

Vanneihthlak deuhin ka ti dawn nge ka nauin pawl 10 a zawh ve takah chuan ka nu leh paten Aizawl lama zir chhunzawm tir an duh thu an sawi ta zeuh zeuh a, hostel a dah an rilruk laiin keichuan ka awm pui theih thu ka hrilh a, awm awl tawp aiah inhlawhna dap ve ka chak zia te, ka nau pawh ka enkawl thuai theih ka inrin thu thlenga ka sawi takah chuan kan unau a in luah chu an remti ve ta nge nge a ni. 

Mapuii hnena ka hrilh chuan a lo phur takzet a, min buaipui nasain tun a kan inluah lai mek pawh hi ama min hmuh sak a ni. Engpawh huamin Aizawlah kan chhuk ve rawih a, Mapuii bawkin dawr nghah tur te min zawnpui a, rual kawm thiam tak a nih avangin ţhian a ngah a, a zarah liau liau dawr nghah tur pawh ka hmu ve mai a, ka ţhiannu hnenah hian lawmthu sawi sen loh ka ba a ni. 

"Ka ti tak tak a nia aw Ramte, a lo len duh phawt chuan phal takin len tir rawh. A hnu lam zel kha chu i duhthlanna a ni tawh a" Mapuii chuan a lo ti leh a, Thanpuia chu, 'Zanah i lo leng dawn nia' tiin message ka thawn ve ta nge nge a, a lo aw rang khawp mai.

Zanah chuan a rawn kal ta ngei a, thalak nen danglamna a awm tehchiam lo. A hmel a ţha vur lo nain hmel vantlang tak chu a ni. A palian a, zu ka in ve zeuh zeuh ti siin a fai vang a, tuman "a chhe e" an tih vawng vawng ka ring lo. 

Keimah mai bakah ka nau pawh a be ve zeuh zeuh reng a, ka laih chhiat viau laiin mipa zawk na na na chu a pangngai phian a, thingpui ka lum sak te chuan, "Thingpui i lum tui hle mai" a lo ti a, kei, lai deuhin ka lo nui thung a, thil ho te te sawiin a leng ve reng a, a haw dawn chuan dar 10 a hnai thuak tawh. 

Inleng ve lem han thlah loh tawp chu ka tih avangin kawt ah ka zui chhuak a, a kal mai dawn maw ka tih laiin a ding leh rih a, "Ramte, ka sawi kha aw..keichuan ka duh che a, nitin deuhthaw ka hrilh che a, min duh ve lo mahla ka bansan dawn chuang lo che. Ka nghak tlat ang che" a tih chuan ka nuih a za tlat a, han nuih dawnin a thutak angreng phian bawk si.

"Vawikhat chiah kan la inhmu a chutiang chuan i sawi nghal thei maw?" ka lo ti a, "Aw...kan inhmuh hma aţangin ka duh che ka tih tawh kha. I mizia ka duh hmasa a, tunah ka hmu che a, i hmel lah ka duh chi tak a lo ni lehzel a" fiamthu ti tak deuh a a tih chuan ka nui chhuak hak a, "I over emai, min ti zak dawn alawm le. Hmelţha em em pawh ka nih loh hi" ka ti niah niah a, haw der nasa viau mah ila a ruk tak chuan ka lawm a, a thusawi chu ka ring hmak bawk. 

"Ka mitah chuan i ţha alawm. Min duh ve phei la chu ka lo leng ngun ngawt ang" a ti a, a nui hmel chu a ngaihawm a, hmuh a nuam takzet a ni. 

"Nakinah" tih zawngin ka chhang a, min nawr lui lova, min nghah theih thu a sawi hnuah min haw san a, inchhung a ka lut te chu ka sa pup pup a, ka ni deuh muai muaiin ka hria. 

Sawi tawh ang khan ngaihzawng ti a sawi tur ka la nei lova, lem deuhin pahnih chu ka nei ve tawh a, kan nih dan ka hre lo ang bawkin kan inţhen lai pawh ka hre lo a, chutiang vel chu a ni. Chuvang chuan ka fimkhur a, thil chinchang hre zawk Mapuii chu ka be leh ta ringawt a, "Awiii...nghah che a inhuam chuan a dawhthei ve thawhkhat a nih chu. A duh tak tak bawk che a, nangmah hmu miah lo chung che paw'n a be reng peih che a nia. Hun ţha pe ve chhin rawh...nuam i lo ti phian thei a, i hlim phah viau maithei a sin" a rawn ti siam siam a, min phur pui hmel lehpek khawp mai.

"Nia...diktak chuan maw mipa ka ngaihsak ngai miah lo a nia, ani hi chu rilruah a cham ve veng veng zel a, ka sawithiam lo, keimah pawh hi ka inhrethiam zo zai tawh lo. A message tawi te pawh hian ka mood zawng zawng a thlak danglam vek thei a" ka tih lai chuan min lo pawt chat a, "I duh a nih kha. In inhmuh hma aţang khan i duh ve tawh zawkin ka hria. I inpawm duh lo mai mai a, i hlauthawng a, mahse i duh chiang alawm" a lo ti zung zung a, a sawi takah chuan a dik hmel riau bawk. 

"I rilru put hmang hrilh nghal duh suh. Mipa chu han induhkhum te hi a nuam ve a, ngawi vang vang rih la, a zawh che pawhin ka inngaihtuah dawn ti zel la, kar khat hnu velah i hrilh chauh dawn nia" a tih chuan a ţha dawn riauin ka hre leh bawk a, keimah chauh chuan engmah ka ti thei lo a, rilru ka siam thei rih lo a ni. 

Nitin min lo bia a, ka ţhiannu min hrilh angin kar khat hnuah a rilru ang chiah ka put ve thu ka hrilh a, a lawm lutuk chuan inhmuh a rawt nghal a, keiin lo leng turin ka hrilh thung. Zan pawh nghak zo lovin a duty zo chu ka hnathawh naah a lo peng kawi a, mahni chiah a ka awm tawh avangin inpawh takin kan inkawm a, "I ril a ţam em?" a ti deuh reng a, a ţam loh thuin chhang ve bawk mah ila eitur a lam lui ta tho a, "Zanah chiah i lokal dawn emaw ka tia" ka tih chuan, "Zanah ka lokal ang. Dawr hi ka khar pui phawt ang che" a lo ti a, mipa ka ngainat loh nen ani hi chu a dan a dang. A bula awm nuam ka ti a, ka hlim veng veng a, vannei ka inti bawk. 

Zanah pawh a lokal leh ngei a, a bialnu ka ni ta bawk a dawr a ka nau kal hlanin min fawp ve zan a, ka thiam lem loh avangin ka lo dawh tawp a, a nuih a za viau nghe nghe a ni. 

Kan inkawp chho ve zel a, kum 1 lai kan inzui hnuah pawh han inhne tih vel hi kan nei ve ngai lo. Hunpui hmang tur a kan haw tur te kha a huphurh ngawih ngawih zawk a, ka pa lahin haw turin min ti bur mai si, "Lo let leh vat rawh aw" tiin min thlah a, mahni khua mah nise Thanpuia tello chuan keipawn nuam ka ti bik lova, kum a thar rualin ka nau nen bawk kan chhuk leh a, min lo hmuak thlap a, zanriah a rawn ei ve nghal bawk. 

Mipa a ni bawk a kan pahnih chiaha kan awm chang hi chuan mi han chul thuak thuak te, min thlem te a ching ve a, thinrim lek lek chang pawh a nei ve. Mahse ka hnial zel a, min nawr lui ţalh ngai bik lo. Insum thei ka va'n ti ţhin tak. 

Kum hnih lai kan inzui ve hnu chuan min duhna ai mahin ka duhna chu a nasa tawh zawk awm e. Message a inbiak tlut tlut ang kha kan ti tawh lova, kei lah nilengin dawrah ka awm a, kan inbe reng hman ţhin lo a ni. Ka hmuh loh hlek chuan ka ngai em em zel a, a lo len loh zan te hian ka khua a harin keimah zawkin ka be hmasa fo a, "Min ngai lo" ti a ka thinrim der ve te hian zaidam deuhin min thlem a, a thinrim ve thei lo emaw tih turin a awm ţhin. Hmeichhia chuan thinchhiat riau chang te kan nei a, vin phar dawr dawr mah ila min nuih liam mai mai zel a, "Karkhat hnuah a reh leh mai ang" a ti fiamthu vel mai mai a, dawhthei ka tiin vannei ka inti ţhin. 

Inkawp rei ve viau tawh si han inhauh bur bur leh inţhen lailawk ang te hi kan nei ve ngai lo a, kan tluang leh lutuk chu chang chuan ka ngaih a ţha lo zawk ţhin a, Thanpuia erawh chu a awm ngaiin a awm tawp a, ka ngaihţhat lohna ka sawi chhuah chuan inneih a rawt mai ţhin. 

A fala awmdun chang kan nei lo thei lo a, keimah zawkin ţhen ka hlau tawh tih a hria nge ni min thlem heuh heuh hnu a ka duh loh hi chuan a thinrim mai zel a, ni hnih ni thum lai te min be duh lo zui a, "Min hmangaih lo a, min ring lo bawk. Min hmangaih tak tak ni la ka duh min pe em em ang. Keichuan i tan engpawh ka ti vek a, i hlim loh hlauin theihtawp ka chhuah ţhin. Thil pakhat chiah ka phut ve a, chumi lek pawh chu min tih sak thei lova" a ti fo a, "Ka hmangaih che" ti eng ang mah ila awmzia a awm tawh ngai lo. 

"Ka nei ang che...engpawh thleng se ka nei ang che. Mi tih loh dan pawh a ni lo. Min hmangaih tak tak chuan ka duh ang hi min pek ve a ngai" tih zawng a min thlem te a ching chho a, a chang leh, "Ka nauin nupui neih a tum a, han innei fel phawt sela ka chhungte ka bia ang" a ti thul, ka duh loh chuan a thinrim a, "Min hmangaih lo" tiin inţhen pawi ti lo awm deuhin a awm zel bawk si, kei lahin inţhen ka hlauin a tello a awm tur angin ka indah chhin ngai lo hrim hrim a, ka ngam lo a ni ber. 

"Mi pawn an ti fo a, tunlaiah tuman pawi an ti vak tawh hleinem. An hmangaih miah lohte pawh an mutpui thei zel a, nang chu ka hmangaih che a, ka nupui tur i ni" a ti fo ţhin a, ka hmangaih em avangin ka hnial reng thei lova, kan chesual ve ta a ni. 

Thanpuia tan chuan vawikhat kha a lo tawk hauh lova, hun remchang a awm chuan sex kan hmang ta zeuh zeuh a, kan inlaichinna chu ka la thutak sawt viau bawk. Ka thikthu a chhia a, chutiang bawkin amah pawh. Mipa dang nen min rinhlelh avanga inhauh chang kan ngah sawt viau a, zu a ruih chang phei chuan, "In mu dun tawh em?" han tih mai te a ching a, kan inkar a buaina neuh neuh awm reng avang chuan nupui pasal neih hmaa sex hman ţhat loh zia ka hriatchhuah phah a ni. 

Nikhat chu dawr a Mapuii a lo len laiin ka luak a chhuak thut a, ka hmui hup tlat chungin bathroom ka pan a, ka luh rual rualin ka luak nghek a, ka awmdan ka hriatthiam loh viau laiin Mapuii chuan, "I rai aniang" a lo ti a, chiang deuhin min en a, a ngaih a ţhat loh hmel kher mai. 

"Ka zawt thui lo ang che. Nula i nia, i tan a ţha tur leh ţha lo tur chu i hria. In test la, i lo rai a nih chuan innei rawh u" a ti leh a, kan lo chesual ve tawh bawk nen, Mapuiin chutianga a tih takah chuan ka hlauthawng a, test kit ka lei haw a, Mapuiin tih dan tur min hrilh lawk vek bawk a inthlak hmasa lovin bathroom ah ka lut tlang a, keimahin ka ti ve thei mai a, ka rai tih ka hriat chian meuh chuan ka mit sulh a, ka mang ruai mai. 

"Ka zun a chhuak lutuk a nia" pawn lam aţanga ka nauin a rawn tih takah chuan ka harh kawk a, test kit chu ka kekawr ipteah ka thun sawk sawk a, ka hmai ka tuai leh thuak thuak hnuah ka chhuak ve chauh a, Thanpuia chuan min nei duh ngei dawn tih ka hria, mahse engtin nge ka nu leh pate hnenah ka sawi ang. 

Zanah ka nau hriat lohin phone ka hmang a, Thanpuia chu dawr a lokal kawi turin ka hrilh a, hmaichhan ngei a hrilh ve ka duh a ni. Kan inbe zui reng a, min ngaih thu a sawi te chuan tlemin rilru a nuam deuh a, "ka mualpho ve zuai ang a, kan inneih hnuah a reh chhawm ve mai ang" tihna rilru ka pu a ni. 

Dawr ah chuan a lokal ta ngei a, ka rilru a hah zia ka lo sawi hmasa a, "Engati nge? Buaina i tawk em ni?" a lo ti thuai a, "Aih, chutiang a ni lo" tiin ka pehhel lui zel a, ka rilru hah zia ngawt a ni ka sawi ni. A dawhtheih loh tawpah, "Sawi la, ka pui dawn che alawm" khauh deuh tak hian a ti a, "Nau ka pai" ka ti chiah chu min en tlawk tlawk a, sawi tur a hre bik hauh lo. 

Kan ngawih vang vang hnuah, "Ka awih lo" a ti hul deuh hak a, ka lo chek tlak a, nuih a za duh lo kher mai. 

"A ni miau sia lawm le. Inveng ve reng mah ila inven sen loh hun a awm ţhin. Niminah ka test a, ka chiang vek rawh" ka ti fak fak chung pawhin, "Test ţha leh rawh" tih leh thawh a rual a, "Khawihah nge i kal dawn?" ti a ka au zui pawh chu min chhang tawh lovin dawr aţang chuan a chhuak nul nul a, ka ţhu hnawk a, a awmdan khan rilru a tibuai lehzual a, hlauhnain ka khat tawh a ni ber. 

"Kha" tih hmuk pahin counter ah test kit a rawn theh thla a, ka lo nui chhuak hak a, "Min ring lo a a hranpain i lei leh ngat tihna mi?" tiin ka ţawng el ve a, ka thusawi chu hre lo ang hmiahin, "Test ţha leh rawh ka lo en ve ang" a ti deuh hmuk a, min pawt tho zui nghal a, ngei viau mah ila ka test ţha leh a, result pawh a ngai tho a  ni. 

"I lungawi tawh em?" test kit chu counter chungah ka hmet bet rawp a, a en ve chiah chu hmuh thiang lo hmu ang mai a ni. Kan chesual fo a, hetiang hi a la thleng thei tih a ngaihtuah ngai lo em maw ni?

"Engtin nge kan tih ang? Ka rilru a hah a nia, kan khaw mite chuan hria se mak min ti khawp ang. Kohhran ah ka inhmang a, zaipawl ah te ka tel a, aizawl a awm tak vangin nau a pai a min ti ngei ngei ang. Innei nghal mai ang, i naute inneihna pawh a rei veleh tawh a" ka ti mawlh mawlh a, rei deuh chhung chu min ngaihsak lo, a rilru a buai ve tih ka hria a, ka be lui sek bik lo bawk. 

"Mualpho i hlauh chuan mi hriat hmaa i tih tlak a ngai a nih chu" a ti chiah chu a hmaiah ka beng teuh kher mai. Mi ngaihven kan hlawh loh nan insehruh ţeuh chungin ka insum hram hram a, ka kut ka hum ruh tlat a, ţawng pawh ka ţawng chhuak thei lawk lo. Min pui tur leh mawhphurhna la tur ni a ka rin Thanpuia berkherin chutianga min ti chu ka hua a, ka na ngawih ngawih a ni ber. 

"Eng nge i sawi ţhin kha?" ka ţawngchhuah theih hnua ka tih chuan, "Ka thusawi zawng zawng chu ka la hre vek. Ka nei dawn lo che ka ti lo bawk. I hlauthawng a, mi mitmei i veng a, chutiang a nih chuan ti tla daih la a ni mai alawm" a ti a, a awmdan chu ka hrethiam lo kher mai. 

"Nangmah hian ti tla turin min duh nge duh lo?" ka ti ram hmak a, mahni lo mah a rilru hah sa nak laiin, thin a rim hlur a, ka ipik hluah hluah a ni ber e. 

"Kha kha chu i duhthlanna a ni. I pai tlang a, inneih i duh a nih chuan min nghah deuh rih a ngai ang" a ti a, "Engmah ka ngaihtuah thei rih lo" ti a chhuanlam siam zuiin min haw san a, custormer lo lut leh pawh chu ka ngaihsak thei tawh lo, ka ţah a chhuak a, ka ţap thei bawk si lo, mi min nuihzat dan tur thlengin ka ngaihtuah kai nghal vek a, rilru a hah duh takzet a ni.

In a ka haw chu ka nauin chaw ei a lo peih diam tawh a, "Ka puar lutuk a, ka ei chak rih lo" ka tih chuan chik deuhin min lo en a, engmah phei chu a sawi lo. 

Pindanah ka lut tlang a, khum ka thlen rual chuan ka mittui a tla a ni nghal der mai. Rizaiin ka inkhuh a, zawi te tein ka insut feih feih a, ka nauin a hriat ka hlau si, ka lungchhe lutuk chu ka awm te a insep dawrh dawrh a, thawk pawh ka thaw hleithei lo. Ka insum hram hram avang chuan ka pangngai leh thuai a, pindan a ka nau a lo luh ve chuan, "I damlo em ni? A lum tehreng nen i inkhuh tlat a" a rawn ti a, ka rizai sinlai pawh hlim a tum chuan lo pawt beh tlat pahin, "Ka khua a sik deuh a, a zia leh vat mai ang" ka ti tham ţuak a, "I aw te chu a va dik lo ve. Nachhawkna i ei tawh em?" a tih leh chuan ka ei tawh thuin ka chhang a, biak luih chi niin min hre lo aniang a chhuak veleh mai a.

Mut hmunah chuan thil tam tak ka ngaihtuah a, ka nu leh paten hria se engtin nge an tih ang tih mai mai te chu rilruah a awm reng a, Thanpuia lah a reh vang vang bawk si. Ka ipik lutuk chu ka thaw chhuak leh halh ţhin a, ka chhungte ka ti zak dawn hle mai. Thil thleng thei engkim, a chhe lam leh a ţha lam thlengin ka ngaihtuah kim vek a, chutiang a ni chung chuan vawikhatmah nau tih tlak lam ka ngaihtuah lo. Ka dul thep thlar mai chu ka chul a, tunah chuan hmuh tham a la ni kher lovang, mahse thil ka lo ti sual tawh a, vawikhat pawi ka khawih tawh avang ngawtin pawi lian zawk ka khawih thei tawh lovang. 

Mak tak maiin ka rilru a fim kar reng a, rilru buai, ngaihtuahna fim lo avanga tih tlak mai duhna rilru ang kha ka nei ve lo hrim hrim a, chhia leh ţha ka hria a, chu chuan min pui nasa hle. Diktak chuan Thanpuia khan lawm taka a lo dawnsawn ka ring a, a mitmengah khan phurna te a langchhuak ang chu ka tih laiin mak tihna hlir ka hmu a, ka hrilh rual a a meng tal tap mai te kha mitthla ah a awm zui reng a, thil thleng thei a ni tih hrereng a khati taka a pawm thiam lo kha mak ka ti a ni. 

Dar1 bawr velah min lo call a, ka lo la mutthilh loh avangin ka lo chhang ve mai a, "Vawiin khan mak ka ti lutuk a" a rawn ti nghal thawr a, a ţawng danah a ruih zia a hriat theih bawk. 

"Zu i in phah vel tihna mi?" lungawi lo taka ka tih chuan, "A ni mai ang chu. Ka nu hi in enkawl reng ngai a ni rih a, kan la innei thei lo" a rawn ti nawi leh vel a, ka nui hak a, ka nuih a za hauh lo thung.

"Ka nei tho ang che..ka hmangaih che lawm. Min nghak rawh ka ti mai a nih hi. Ka chhungten eng angin nge an dawn sawn dawn a la hriat loh a, ka nu phei chu a hrilh chi rih loh" bah deuh nawk hian a ti leh a, a chhungte hi Aizawl ah an awm bik lo a, ni lo se chu inhriatchian lehzual nan pawh ka leng ka leng ve tawh awm e. A nu chu a damlo tak tak reng em tih pawh hriat theih a ni lo. 

"Engpawh thleng se keichuan ka nau pai hi ka ti tla dawn lo. Ka chhungte pawh ka hrilh ang a, i chhungten an hriat ngei ngei a ngai dawn" ka ti tlang ve hrâk a, "Aw le" a ti ban charh a, a rilru chu a buai ve tak tak niin ka hria. 

Ka chhungte hnenah chuan ka hrilh ta ngei a, min hau nasa viau mah se tih theih engmah a awm tawh si lo, ka nu chuan, "In sawiselna i neih chuan kan hnenah lo awm rih la, reilote chhung chu i nau pawh amahin a awm ve thei mai ang" tiin min han sawm ngial a, ka lo hnial fithla ţhak a, ka nu chu ka ngai lo pawh a ni lo, hun harsa ka tawh lai ngat phei chuan ka nu aia ngaih ka nei ngai lo. Mahse ka mualpho nasa dawn em a, ka haw ngam tlat lo a ni. Zaipawl a ka lo tel pui ţhin te, kohhran a ka rawngbawl pui ţhin ho te hmu ta ila eng nge ka sawi ang? Ka zak em a, um lohin ka tlanchhia a ni ber e. 

Mizo dan angin engkim kan ti ve vek a, Thanpuia pa pawhin, "An la innei ang chu" a lo ti a ni awm e. Mapuii phei chuan pawi a ti lutuk a, "Duh ve rawh lo ti sek lo che i la ţha tur aw...mipa pangngai chu nise emaw hmangaih tak tak che chu ni sela a nei em em ang che. Chhuanlam a zawng reng lo ang" a ti leh ţhin a, a inchhir thu ngawt a sawi a sawi a, ka lo be ţha leh ţhin te chu min hau fo a, "Hrem ve rawh, be lo vang vang la, a awm thei dawn chuang lo" a ti a, Mapuii sawi ang tak tak hi a ni. 

Thanpuia chu a reh leh vang vang ţhin a, biak tum reng mah ila a duh hunah lo chuan a biak theih ngai loh. Ka nun a mipa awmchhun a nih miau avangin min rawn biak a, a rawn tlawm dem a, ngaihdam min dil hi chuan ka lo ngaidam a, ka ring leh mai zel a, min hau min hau ţhin mah sela ka hmangaih a, a tlawm lutuk chang phei chuan ka khawngaih tlat zel a, miin nau an han pai a, harsatna an tawk a, "naute pa hi" be miah suh kan tih changa an lo be leh ţhin te hi tunah chuan ka hrethiam ve tawh. Engang pawn hua ila insum a harsa lutuk tlat a ni. 

Rilru hah reng reng a ka awm ţhin avangin ka taksa a chak lo em em a, ka thawhna aţangin ka bang a, "zawi zawiin thawh tur ka dap leh mai ang" ka ti a ni. Ka nau chuan Thanpuia laktlak loh zia a sawi reng a, "Tunlai phei chu zu a in nasa lutuk an tih kha. Ţhen daih rawh, Pathian zarah naute chu nangmah pawn i enkawl thei em em ang" a ti ve hlak hlak ţhin a, Thanpuia hnen a inţhen ka sawi lahin a lo duh lo bur zel a, reh vang vang pawh nise inţhen ka sawi chuan kan inah a rawn kal nghal mai ţhin.

"Thanpuia hian ngaihzawng a nei em ni?" Mapuiin a rawn tih chuan ka nghing ve dawt a, "Ka hre nang...inah ka awm tawp a, engmah ka hre hleinem" ka lo ti a, ka naupai lai pawh thla 4 lai a ni ve tawh a, ngaihzawng min neih san duh ka ring lo a ni. 

"Hriatna ka nei tlat a ni. Facebook a an thlalak dah velah pawh an lang dun ngun alawm" a tih rualin phone ka phawrh a, ka en ve chiah chu thin a so ve bulh bulh mai. 

"Thanpuia chuan min block daih a nih hi" ka ti a, ka ţhiannu hmuhah chuan pangngai deuh anga awm ka tum a, na ka ti ru em em tho si. 

"Kha maw...a nei tih a chiang reng mai. A nun a va thlahdah sawt em em ve mawle. Nang lahin nau i pai a, la innei lo mah ula a nupui ang mai a en chang che a nei a, keichu a nu leh paten an rawn ngaihsak lo lutuk che te hi a mak ka ti. Naute lah kan duh lo an ti chuang bawk si lo a, chhungkaw mak sak tak an nih hi" a ti bawrh bawrh a, "Misual sual tawn fuh chu a lo hrehawm a nih hi. Damlai hremhmun a ni ringawt" ka ti chuai raih a, nau pai lai ngat phei chuan hmangaih a duattu kan thlahlel ve a, chu chu Thanpuia aţang hian ka dawng tawh ngai lo. 

"Ngaihzawng i nei a ni maw? An sawi vek a nia aw, facebook ah min block bawk a" inchhung a rawn luh rualin ka lo ti nghal a, ka nau a awm lo a, tuition pein a chhuak daih a, sawidunna hun tak a ni. 

"Awihawm loh" a ti liam puat a, a hmel landan chu a pha deuh dui bawk. 

"Facebook ah khan ngati nge min block?" ka tih leh chuan, "Nimin a chaw kan eikhawm khan ţhianten ka phone an lo khawih a, an block palh che aniang. Ngaihzawng ka nei lo, min ngaizawng deuh tu pakhat chu a awm a, niminah pawh a lokal ve a, ka ţhiante nen an inhre ţha sia, lokal loh mah se pawi ka tih loh nen" thutak deuh a a tih chuan ka ring leh ţan nghal der tawh a, "I ţhiante chuan siam danglam pawh nise siamţha leh rawh" ka tih eqchuan a siam veleh mai bawk a, a insawifiah a, a ţhianpa hial min biak tir takah chuan rin loh theih a ni leh tawh lo. 

"An rawn sawi mai kha maw..min ngaizawng a, khatiang hmeichhia kha ka duh lo nasa. Duh ila chu an tam lutuk. Hmeichhe nasa deuh chu an hlauhawm" a ti a, min tih lawm nan ka ke te a hmet a, hmin zan lo mah ila ka chhuahchhal zui ta bik lo a, "A lo dik a nih chuan kan inţhen ang" ka tih te chu pawm deuh angin a awm a, "Kan hah deuh avangin zu chu ka in nasa, ka pawm thlap. Mahse, ngaihzawng ka neihsan lo ang che. Nei chu ni ila ka rawn kal reng tawh nang. Ka ngaihven peih tawh lo ang che chu" a ti a, nau ka pai hma kha chuan a nute nen hian kan inbe ve zauh ţhin a, chawhmeh pawh min rawn thawn kep chang te an nei ve ţhin. Nau ka pai hnuah erawh an reh hmak a, ka ţhat leh ţhat loh takngial pawh min rawn zawt ngai lo.

"I nu eng nge a an tawh?" keimah zawkin ka ti a, nau ka pai hlim aţanga damlo tawh kha a nia, natna serious lutuk a nih loh chuan dam tawh turah ka ngai. Mahse, Thanpuia chuan, "A la ngai reng. Ngaihtuahawm a ni lova, a dam e tih tur a ni lo bawk a" a ti a, han piak pawh tawp mai te ka duh a, heti ringawt chuan miin min zawh pawhin chhan dan tur ka hre ţhin lo. Chhungte lakah a inthlahrunawm bawk si. Rilru hahdam lai ka nei meuh lo a ni. 

"Kan pahnih chungchang hi in la sawi leh miah lo em ni? I lokal a, i duh duh hunah i rawn riak a, mi pawn mak min ti lutuk ang. Ka nu leh pate phei chuan hria se min hau nasa ang" ka ti a, ka hmaizah peih tawh bik lo. 

"Sawi leh lo, ka nu a nuam lo reng rih a, lo sawi chhuah sek a nuam bik lo alawm. Ţul an tih hunah an rawn sawi ve mai ang" a ti deuh hmuk a, "Ka dul a lian ve zel a, chhuak hlek ila hmelhriat ten chanchin min lo zawt a, sawi tur hriat loh tawp chu nuam lo ve duh deuh a nia" ka tih chuan, "Kan innei dawn ti la a tawk a ni mai" a ti liam puat a, a inthlahrung ve deuh nge riak loin a haw a, in a thlen hnuah reilote min bia a, a hma ang khan min thlahlel tawh lo tih chu a awmdanah a hriat reng mai. 

"Mipa ţhenkhat hi chuan hmangaih tu an neihin lawm nachang an hre lo. Bum tur emaw an ti zel a, an hmangaihna kha an hmang ţangkai a, nawm chen nan an hmang a, an hne hnuah an kalsan leh a, an lo rai palh a nih phei chuan an tlanchhe dawr dawr a, mawhphurhna la ngam hi an tam lo a sin. Mi fa duatlai an ti chhia a, an rilru thlengin an hliam tih pawh an hre tawp nang, an hre duh lo zawk nge pawh ka hre lo inchhir ang pawhin an awm lova, an sim chuang bawk lova, hmeichhia hi kan fin ve a ngai lutuk tlat. Min hmangaih ve a nih chuan tuman min ti lui lovang. Min ţhen phah nan an hmang lo bawk ang. Inţhen a min vau tu chuan min hmangaih tak tak lo tihna a ni mai. Chhiat vek tawh hnu a inţhen tho ai chuan kan chhiat vek hma a inţhen ka duh daih zawk ang" ka nauin a ti zat zat a, ka chhang let lem lo nain ka ngaithla ran a, hmangaihna khan ka mit a ti del a, a thusawi leh a intiamna zawng zawng te kha ka lo ring vek a, ka lo va'n â tak. A thusawi ngat phei chu tun thlengin ka la ring zel chu a nih hi. 

"Mipa leh hmeichhe dinhmun a inthlauh vang tak te hian hmeichhia hi fimkhur lehzual tur kan nia. 'Ani lo chu' tih tlat loh tur. Kan tana ţha lo tur a ni tih hriat chuan kalsan ngam mai tur. Mipa pakhat chiah an awm lova, mipa tam tak zinga min ti chhe hreh lo tu leh min ti na hreh lo tu lo thlan tlat chu a atthlak emai. Ka hma hun ka hre lo nain keichu nangmah ang hian ka awm ve lo ang. Sex hman ka duh loh avanga inţhen hial duh tu chu na chung chung pawhin ka ţhen lui ang. Ka na ang a, ka dam leh mai ang a, ka hma hun a êng thung ang" a ti nghat nghat a, a upa ve deuh tawh bawk a nau ka pai hlim khan engkim ka sawi chhuak a, â min ti a, nep min ti hle bawk. Mahse, ka hmangaih em alawm le. Keimah intheihnghilh ţhakin ka lo hmangaih a, kha kha ka tih sual a ni. 

Nikhat chu hmeichhe pakhat hian min lo bia a, "Thanpuia bialnu ka ni" a rawn ti. Ka rilru a na ngun tawh bawk a engtinmah ka awm tawh lo. Ka chawhmawlh zo vek tawh a ni ber.

"I naupai chu thla engzat nge ni tawh?" ţha deuhin a rawn ti a, thla 6 a nih thu ka lo hrilh a, ka khum zawn a almirah inhung a darthlalang ah chuan ka inthlek a, ka cher zia chu a rapthlak zawk. Ka inhlau lek lek zawk a ni.

"Ka khawngaih lutuk che a, ani lah hian min lo be zel bawk sia, a chhungte nen pawh kan inpawh a" a rawn tih chuan, "In inbe ţhin em ni?" ka lo ti thuai a. 

"Aw..an khuaah zirtirtu in ka awm ţhin a, kan inhre lutuk alawm. A chhungte pawn tih ngaihna an hre tawh bik lo chu a nih hi. Lo tuar hram hram rawh aw...i rilru ti hah lo la, i lamah ka ţang tlat a nia" a rawn tih leh te chuan a lem riauin ka hria a, min duhsak tak tak nise Thanpuia bialnu ka nia a rawn ti lo tawp ang. 

"In inngaihzawnna a rei tawh em?" ka ti a, a rei tawh thu a sawi hnuah, "Bialnu a nei tih ka hre lo reng reng a, nau i pai tih phei chu niminah ka hre chauh a. Thanpuia chu thuhran, a chhungte lehzelin an zep kha nuam lo ka ti lutuk a, ka inthiam lo tak tak a ni" a ti a, awih lem lo mah ila ka lo aw liam ve zel a. 

Thanpuia nau nupui hian engkim a hre ve bawk a tiin ka bia a, a bialnu rawn inti in min rawn biak dan ka sawi chuan, "A zakthei lo e. Rempuii a nih kha. Thanpuia te khuaah chuan a awm ţhin ngei alawm, sawrkar hna a thawk bawk a, diktak chuan Thanpuia chhungte pawh hian nang aiin an duh zawk ang. Mahse, amah zawk hian a zar buai char char a, inah a len chilh a, rawng a bawl sak a, a riak hreh lo bawk. A chhungte bulah pawh a hek ţhin che a, a chhe zawng hlirin a sawi che. A rawn biak leh che pawhin a thusawi kha awih chin tur lo hre tawh rawh" a ti bawrh bawrh a, chuzawng chu a  ni ka hriat duh chu. 

Thanpuia chu ka be lo vang vang a, kan in a a lokal pawhin ka be hmasa ngai lova, min biak leh a rul tawkin ka chhang a, ka nau chu ţul tawpah lo chuan min chhuahsan lo turin ka hrilh thlap bawk. Ka na takzet a, engahmah ngai lo anga awm te chu harsa ka ti a, ka mamawh a, ka ngai takzet bawk. Mahse, min bum a, nau ka pai hnuah pawh min neih loh dan a zawng ţang ţang a, chumai chu duhtawk lovin ngaihzawng a la nei zui a, a ti lutuk tawh tlat a ni. Hetiang a ni chung pawha ka harhchhuak zo lo a nih chuan eng hamţhatna mah dawng tlak ka ni lovang.

"Ka pasal pawh a la ni em hleinem le" tiin ka inhnem ţhin a, a awmdan te chu rilru siam phah nan ka hmang bawk a, doctor lahin, "Mi chu nau an paiin an rit tulh tulh a, nang chu i zang tial tial a" min ti a, a hlauthawng em em zel a, "In enkawl ţha rawh" tiin min chah fo a, rilru ber a dam loh chuan taksa chu duat hliau hliau mah ila awmzia a nei mawh khawp mai. 

Ka nu leh paten pawisa min rawn thawn reng a, chung mai mai te chu ka inthlahrung a, mi dawr nghak a inhlawh chi ka ni tawh si lo, Mapuia pawh tibuai duh tawh lovin ka theih ang angin tih tur ka dap khawm ve a, ka nau leh ka nuten min khap viau mah se "Ka tuar rei tawk tawh alawm. Harhchhuah a hun tawh, ka indawmkun reng a, ka tawm tlawk tlawk chuan eng hmasawnna mah a awm thei lo" ka ti ve tlat a, rilru ka siam fel tawh a, hawilet tawh lo turin a ni bawk. 

Nau pai nen, hrisel loh bawk nen chuan tih tur a vang khawp mai. Thawmhnaw te ka la a, inah ka kawl ve a, ka nauin college ah a keng ve ţhin bawk a, engtham mah ka la lut lo chung pawhin bansan ka tum chuang lo. Ka nauin min khawngaih viau chang te hian, "Min khawngaih duh suh. Hmalam ka pan loh te chuan hmusittu ka ko khawm mai mai a ni dawn a sin" ka ti ve tlat a, vawikhat ka ti sual ngei a, ka chhe ta vek emaw tiin ka kun tlawk tlawk a, mi aia hniam zawkah ka inngai bawk. Tunah chuan rilru ka siam fel tawh a, hmangaihtu tan a tawrh pawh harsa kan tih laiin min hmangaih miah lo tu tan a tawrh ngat phei chu ka tum tawh lo. Ka thil tih sual kha indelh beh tir lova hmalam pan ka tum a ni. 

Kum tawp a kan khuaa kan haw chiah chu ţum danga ka haw nen a in ang lo takzet a ni. Ka chanchin an sawi thar leh a, tunhma a min be ţha em em ţhin tu te khan min hnungchhawn a, "Sawn a pai" tih te chu min sawi duh dan a ni. Hrehawm ti viau mah ila ka inti chak lui a, Thanpuia leh a bialnu te pawn min rawn inbiak chhawk zak zak reng a ni ber e. 

Ka nu leh pate chuan in enkawl ţha turin min hrilh reng a, anni pawn an ei ngam loh a tui ţha ţha min ei tir a, nu leh pate aia min hmangaihtu an lo awm hauh lo. Ka thil tih sual te pawh sawichhuak tawh lovin min pawm thlap a, Thanpuia ţhen hlen ka duh thu te, ngaihzawng a neih thu thlenga ka sawi te chuan min hau lovin min zilh malh malh a, ka tum a ruh phah sawt reng a ni. 

Ka nu ten phallo viau mah se kan khua chu nuam ka tih loh em avangin ka nau rualin Aizawl ah ka chhuk leh a, engtin nge a lo hriat ka hre lo, Thanpuia a lokal nghal a, a bawrchhawrin zu a in nasa tih a hmuh nghal mai theih a, tunhma chu pha lo tak a ni. 

"I induh sawt lutuk a" a ti a, a rui bual a, ka nau phei chu Thanpuia rawn luh rual khan pindanah a lut daih a, a hmu peih hlawl lo a ni. 

"Ka induh leh duh loh te chu i tan a ţangkai vak tawh hleinem" ka tih chuan a ngaihdan a nih loh hmel khawp mai. 

"Ka dik lo tih ka hria alawm. Ka innghah tir che a, Rempuii a inrawlh bawk a" a ti hman chauh tihah chuan ka lo pawt chat a, "Thiam thu sawi a ngai tawh lo. Ka tuar nasa a, mualpho leh zahna ka tawrh nasat lai takin ka bula awm lovin ngaihzawng i nei a, ka dawhthei lutuk a min zuam a nih hi. Diktak chuan  miin min sawi sep sep lai te khan i phur chang chauhin min bia a, ka hrethiam zel che a. Tunah chuan ka thei tawh lo, a tuar nasa zawk ka ni a, ka tuarchhuak ţep tawh maithei a, ka la tuar dawn chauh maithei bawk. Mahse, i hnen a let leh tumna ka nei tawh lo. Kha leh chen kha min lo bum tawh a, hmalam pan tum a rilru ka siam veleh min bum tumin rawn let tawh suh" ka ti ve ta hmak a, a landan chu ka en a, lung a awi lo a, ka khawngaih takzet bawk. Mahse, a hnen a ka let leh chuan a ngai ang bawk kan ni leh dawn tih ka hria a ni. A nu leh paten kei aia duh zawk an nei a, nau ka pai chung pawhin min neih ngam miah loh hi. Mawhphurhna hlen zo lo, mipa nep tak chu a ni ve hrim hrim. 

Ngaihdam min dil nasa a, "Min biak loh chuan zu ka in char char ang" ti a min vau chuan ka ngaihdan a ni lo deuh a, "Lo let ta ila min nei dawn em ni?" ka ti let a, neih tlak a nih loh zia hrereng mah ila a rilru ka en duh a ni. 

"Min nghak rawh ka tih tawh kha" a la ti zel a, nau ka nei lek lek tawh a, a tir aţang khan min nghak rawh a la ti char char a, hei hi a nia neih tlak a nih loh na chu. 

"Ti hian tawp tawh rawh se. Rempuii chu nei la, keipawn hmalam ka pan ang. Fa pakhat lek te chu Pathian zarah keimahin, i puihna tello in ka pawm thei em em ang" ka ti ve ngat a, rethei te mah ni ila a puihna ka mamawh loh zia hre ve rawh se. 

Kan awmdun lai reng chuan a bialnu Rempuii chuan min lo call a, ka lak rualin, "Thanpuia a lokal em?" a rawn ti nghal a, min duhsak deuh anga awm chung renga a lokal leh kal loh min zawt ngam te hi zak lo ka ti lutuk. 

"Aw..a lo haw dawn" tih leh phone dah ka rual a, "Rempuiin a ngaihtuah che a nih chu, haw tawh rawh" ka ti mawl tawp a, amah pawh ka en duh tawh lo. Ka rilru a la na reng a, a dam mai mai dawn lo tih chiang takin ka hria a ni. 

Rempuii bawk chuan message in, 'Ngaihzawng a nei a, kan buai reng mai' a la rawn ti tak deuh deuh a, thlalak nen lam min rawn thawn zui a, a em em deuh chu a ni. 

'A lo haw dawn ka tih tawh hi. Hetiang lehzel min rawn hrilh suh, engkim ka ti tawp vek tawh' ka ti a, ka block duh lem lo. Hmalam ka pan ang a, tun aia dinhmun san hun te ka la nei ve ang a, chumi hun chu hmu se ngei se ka duh a ni. 

Thanpuia phone zawk chu a ri ta reng a, "Ka lokal leh ang" tiin min haw san a, ka thaw chhuak hluai a, Rempuii sawi kha a dik tak tak a nih chuan mipa lerh tak a lo nih hi. Ka lo inbum tir rei lutuk hi a thiam loh a nih rualin ka thiam loh pawh a ni tel ve, ka ring mawl tawp a, a chanchin engmah ka chhui zui lova, a chhungte reilo te te min biak tir ve te khan ka lawm em em a, a ruk chuan mawl min ti hlawm viau maithei a ni. 

Rempuii chuan Thanpuia bialnu a tih chu a phone number thlengin min rawn thawn a, 'Lo be ve teh' te a rawn tia, engahmah ka inrawlh ve duh ngai lo. Ka rilru a tawp tawh a, ka hawisan tawh a, na chung chung pawh a hmalam pan ka thlang tawh a, an buai buaiin buai rawh se tiin ka en liam thei tawh a ni. Ka nau leh Mapuii ten min fuih ve reng a, ka rilru na leh hrehawm chu ka taksa ah a langchhuak nasa a, zan ka mut ţhat lohna chin pawh ka hre tawh lo. 

Nau neih hun a lo thleng a, ka nu leh Mapuiin min buaipui vek a, Thanpuia chhungte chuan engmah an rawn sawi lo. A nau nupui khan a rawn en ve a, chuzawng chu a ni mai. Thanpuia pawh a lokal a, nuam a ti lo aniang a haw thuai a, ka lokal leh ang a ti tak nain a rawn inlan tawh lo. 

Hnathawh an ngaih ve tho avangin naute thla khat a tlinin ka nu'n min haw san a, Mapuii erawh a hman chang apiangin a lokal a, ka tih sual aţangin thil tam tak ka zirchhuak a, ţhianţha hlutna pawh ka zirchhuak tel chiang khawp mai. 

Ka nau mawlh mai chu kan ti buai a, class kal a duh a, lehkhazir a duh bawk a, naute a tlei loh deuhin a lo mangang ve ţhin si, lehkha zir hleihtheih loh chang a ngah khawp mai. 

Keimah chauh a in ka nghah laiin Rempuii a rawn lang hlawl a, engtin nge kan in a hriat ka hre lo, naute kawr a lo keng a, a inthlahrung viau ang chu tih nak laiin, "Thanpuia a damlo a, tunlai chu ka buaipui char char. A nute lah hian ka kutah an dah tawp a, engkimah min ring a, a hahthlak tak tak a ni" a ti zat zat a, a nau nupui hnen aţangin a dam loh thu chu ka hre tawh a, ka ngaihsak duh lo lui a ni. 

"Lo dam vat rawh se" ka tih chuan, "Dam mai ang. A bialnu lah kha a zakthei lo, a rawn be reng a, a dam loh ţum te khan rawn buaipui teh a tum a, ka remti lo a nih kha. A nuten an remti lo ve tho bawk a ka inthlahrung peih lova, lo inrawlh teivet suh ka tih takah kha chuan a reh zui ve vang vang a, amah Thanpuia bawk hian a lo be leh ţhin a" a ti ham ham a, mi pangngai tak chu nise hetiang thu hi ka hnenah a sawi hauh lovang, hmeichhe nasa ve tak chu a ni phawt mai. 

"Ka inthiam lo lutuk a, mahse kan laklawh chho zel a, Thanpuia lahin min rawn be ve reng bawk si. Hetiang hi kan thleng ta rup a, puih i ngaih chuan sawi zel la, kan inpui tawn zel dawn nia. Kan la inkutsuih lo nain kan cheng dun tawh a, inthlahrung chuang miah suh" a ti zat zat ngam a, a ngaithla tu tan a na ang tih lam a ngaihtuah tawh lo. Ka hriat loh a hlau maithei zawk a ni. 

A haw hnuah ka fapa chu ka en a, dimtein a luah ka tuai a, "Engkim kan tuar dun ang a, i la nuamsa ve em em ang" ka ti sap sap a, mipa laktlak loh lutuk avangin ka nun a chhe vek a, mahse nunhlui a chen reng ka tum lo. Ka fapa nen hian nun thar leh kawng thar zawh ka duh a ni. 

Rempuii block si lovin Thanpuia zawk ka block a, in luah tur dang ka zawng bawk. A lo tel ve reng a nih chuan hmalam kan pan thei lo ang. In luah tur ka hmuh rualin kan insawn a, ka nuten "A ngai lo" an ti tak nain tih tur ka zawng kual leh a, ka fapa thla thum a tlin chuan ka vahchhuahpui der tawh. Keimah chauh ka ni tawh lo a, ka fapa mamawh thleng a ka nute tum tir chu ka ngam ngang lo a ni. Ka naute ho zirna a hautak a, mi hausa kan ni bawk si lo, ka fapa mamawh lei nan tal hna ka thawh a ngai ka ti ve tlat a ni. 

Naupaw chungin nepnawi ka sem kual ţhin a, a hahthlak takzet. Min pui tu tur ber mipa in min phatsan meuh chuan naupai lai aţang tawhin a chhe zawng a min sawi duh tu an awm a, min hrilh zel duh tu an awm bawk. Tlangin min sel a, kan tihsual lai tak kha sawi nuam an ti ber a, rilru a nat mai bakah a zahthlak a, inkiltawih viau mah ila a thei theiin min sawi ti ila a dik ber ang. 

Nau kan han nei a, kan chhungte chu naute hmel an hmuh rualin an dam huai a, dam ve lo mi tam tak an awm thung. Ei leh in leh kan mamawh zawng kan lei ve theih nan a theih tawp a hna ka thawh laiin ţhenkhat chuan min sel chhunzawm reng a, anni aia ka dinhmun a hniam zawk zia hrereng chungin ka chanchin chhe lai sawi lovin an awm thei lo. Ka fapa vangin ka tuar hram hram a, ni lo se chu hmuh tlak ka awm tawh bik kher lo maithei. 

Thanpuia te lahin boruak an nei reng a, Rempuii hnen aţangin ka hre ţhin. Keichuan hmalam ka pan a, Pathianin ka ţap ri a hria a, ka mittui tla a hmu a, na taka min siam tute chu an hlim bik reng a phal lo aniang tuk ţha pawh an nei thei meuh lo. Thanpuia zu in nasat sawt zia thlengin ka hre ve zel a, a nau nupui phei chuan ngaihzawng neih a ching tih te, vawihnih vel chu zu vanga damdawiin a an kal pui tawh thute a rawn sawi ţhin a, ka ngaithla liam mai mai thei tawh a, ka la hmangaih reng chung pawhin be miah lovin ka awm thei tawh a ni. A tello a ka awm theih zia lo hre daih tawh ila chuan a pawi hma khan ka kalsan daih tawh tur. Inchhir a sawt lova, nunhlui ka thlak danglam thei lo. Ka hma hun erawh keimahah a innghat a ni. Ka mittui ti tla ţhin tu te kha tunah chuan an mittui a tla ve tawh a, kei ai mahin an lungngai tawh zawk emaw tih tur a ni. A nu leh pate thlengin an mangang tawh a, keichu ka nu leh pate an thlamuang viau thung. 

Bawihtea pawh a lian ve zel a, ka hnathawh naah ka hruai ţhin a, kan inkuah chawt avangin tuman an la thei meuh lo. A mamawh ang ka lei ve thei zel a, Pathian zarah engmah kan thlachham bik lo. Ka nu leh paten in luahman an tum mai bakah hna ka thawk rim a, pawisa pawh ka khawl thei ve viau mai.

Mi te selna chu min ti chak tu ah ka hmang a, mahni intheihnghilh ţhak a midang ka hmangaih ţhin kha ka inchhir a, siamţhat theih a nih tawh loh avangin mahni inhmangaih ka zir thar leh a, Thanpuia ka ngaihna pawh a reh ve tial tial a, Bawihtea kum 1 a tlin meuh chuan a der ni lovin ka nui leh thei tawh a ni. 

Ka nun hi a harsa a, kawng chhuk leh chho hlir a ni a, chuti chung chuan mi tam takin ka nunah zir tur an hmuh thu an sawi ţhin. Ka tum a ruh a, ka zak lo der a, remchang apiang ka zuar a, nilenga ţhut hman mang loh chang te ka nei ţhin. Ka chauh viau chang pawhin, "Fapa ka nei a, a nawm sak leh nawm sak loh chu ka kut a innghat a ni. Ka thawhrimna hian rah ţha a la chhuah ang" tiin ka infuih ţhin a, luhai a tluk tawp chang te ka nei ţhin. Chutiang a ni chung pawh chuan ka thawk zel a, ka fapa in rual a awh mawlh ka hlau a, mi fate neih anga ţha a nei ve thei lo a nih pawhin a hlimna tur tawk chu ka leisak ve zel thei tur a ni ka ti a, pa neih loh hrehawm ti miah lova siam ka tum bawk. 

Ka fapa in kum thum a tlin meuh chuan dawr lian vak lo ka nei ve thei tawh a, ka hahdam ve thei deuh chung pawhin ţhahnem ka ngaih luatah hmun awl remchang a awm phawt chuan bazar lun zawkah te ka inpho chhuak a, Pathian nen a hmalam ka pan meuh chuan hma ka sawn dawrh dawrh mai a ni. 

Mi tam tak, ka tawn ang tawn a, ka tawrh ang tuar ve te an beidawn hian pawi ka lo ti ţhin a, a hlimchhawnah chuan kan na lutuk hi kan tliak hnawp a, a rei a, hmalam pan duhna tak tak kan neih chuan engmahin min dang zo tawh ngai lo. Hmeichhiain hmalam pan tuma a beih tawh chuan ralthuam engmah nei lo mah se thil a ti thei a, sang takah a inhlang kai thei a, mi te hmuhsit leh sel luai luai kha mi te awh rawn a ni thei a ni. 

Nuthlawi ti a min sel ţhin tu te hi enliam chin neih an ngai a, nuthlawi aia laktlak loh tur hi a tam zawk an ni. Mipa ţhenkhat lahin nuthlawi tih hming kan put chuan min han zuam nghal ngawt zel a, a pawi reng reng lo. Huat a lak a ngai lo, kan zuamawm loh zia hmuh tir mai tur. Nuthlawi hmuhsit ching tam zawk hi an thil tih ţhat zawt ila, sawi tur an nei tam lovang, khawhar in kal ţhin, thlan lai ve tawh an ni maithei tih chauh a ni. 

Nuthlawi te hi tam takin an han sel ngawt a, eng nge an thlawi chhan? Eng thil chiah nge an lo paltlang? Nuthlawi nih hi an duhthlanna em ni? Engmah an hre lo, hre turin an ngaihven lova, an ngaithla peih lo bawk. Nuthlawi chu easy leh khaw lo tak tur anga ngai an la tam a, anni vek e phei chu ka ti lo, na ve thei miah lo anga ngai tawk te an awm ţhin. Tawrhna nasa lutuk avanga chawmawlh tawh, natna avang tliak hnâwp tawh, engmahin a tihnat zawh tawh loh tura ralthuam nen a ding chhuak leh kan ni maithei a sin. 

Nuthlawi mai mai min ti tawk an awm fo a, ka nuih liam mai ţhin. Ka chan tur a ni tih ka hria. Amaherawhchu, nuthlawi ka nih avang hian hmeichhia ka nih ve na a bo lo a, hma hun êng tak ka neih hi thawklehkhatah a thim nghal mup bik lo. Mi tam takin an tih theih hi nuthlawi ni chung hian ka ti ve thei a, nu leh pa nih ka fawm bawk avang hian ka chhel bawk. Min hmusit tawk chu lo awm bawk mah se ka thawnthu ka hrechiang a, ka hnual phah ngai lo. Hmalam pan tumin ka bei sauh sauh zawk a ni. 

Nuthlawi i hmusit maw? Han belchiang deuh teh, mihringin a paltlang theih a i rin loh, ţahpui tham khawp a runthlak thawnthu hrilh tur che a lo nei maithei a sin. 

A TAWP TA.