KEIMAH, THINGTLANG NULA S2-11

KEIMAH, THINGTLANG NULA S2-11

"Ka sawi chu i hrethiam tiraw Remkalam? U Zira a nih chhung chu hmeichhe lakah bak ven a ngai lo. I ven hneh leh a rinawm a ni mai, u Zira te ang chu a nei tu a zir a ni mai a" a ti dap dap a, "Bawng anga khalh kual ngai reng te chu ka peih bik hleinem. Duhna lama khalh kual loh veleh hnim peh tur a zawng kual nghal zel dawn tihna a nia. Ka rilru a hah anga ka pitar vat mai dawn a sin" ka tih chuan, "A ni viau mai" a ti a, kawngdawmin a ding ngawi reng a, a la dam chiang lo a, ni lo se chu hna ka pe ţeuh ang mawle. 

"Maski hi eng nge a an?" a ti leh daih a, "Ka la man chat lo nain ruih nei a ang ţhin ka ti. Mahse a fel teh mai a nia aw, aieng min zawrhpui dawn" ka tih hnuah, "My friend, sam kir zuna uai hi a na aniang Maski-a zuna ka uai chin hi chu ka chhuk leh thei tawh lo reng reng" ka ti leh a, nur nanga min en chung hian, "Pasal pahnih i nei thei dawn miah lo a nia aw, Aizawla i kal veleh i duh zawk thlang ngei ngei ang che" a ti leh tawh a, nui vur vur chunga kawh zauh pah hian, "Yeasi kul rai, nei lo ve ve mah ila ka awm theih tho chu ka ring" ka ti a, bialpa ka nei ve ţan chiah a, inngaihzawnna boruak enjoy hmaa inneih nghal ka duh bik lo reng reng. 

"Nunhlimi lah hi min lo call leh tawh" tih pahin ka la a, "Pawnah ka chhuak a, hmanhmawh deuhin ka lo call che. Puitea lo len reng ţhin vang aniang Valpuii zu rim nam chhurin a rawn lut a, Valdiki te nupa inkarah i inrawlh min tia, ka pasal hlui nu leh a nau an awm ve bawk sia ka zak lutuk. Sangkhuma te sawm ula lo kal rawh u, a ang nasa teh mai nia, nang ai pawhin a rapthlak zawk" a rawn ti zung zung a, a dah lehnghal daih a. 

Kalvari hnenah ka hrilh chhawng ve a, naute pa chhungten naute awmpui ve an tum thu thlenga ka sawi hnuah, "Valpuii nasat sawt zia hi aw..a va han rui hma reng reng ve mawle. Sangkhuma bia la a hman chuan in pahnihin kal rawh u, Fawnvela leh Fithangi chu sub centre a kal an tumin ka hria" a tih takah chuan Sangkhuma ka bia a, "Thing eh tur ka ngah viau nain ka lo kal zuai ang" a ti hlauh a, Kalvari te in aţanga ka kal dawn chuan, "In lo insual hlauh ange aw mah se Nunhlimi kha chhan tlat ang che. Ka nu leh pate haw tawh se chu na chung chung pawn ka lo zui ve tur che a nia" a ti a, ţhianten min mamawh na na na chuan aieng ka siam rih lo mai ang. Nunhlimi phei chu nun bul a ţan ţha leh dawn chauh lehnghal a, tuman an tihchhiatsak ka remti tawh dawn lo reng reng, a khawngaihthlak rei tawh emai. 

An in pengah Sangkhuma ka lo nghak a, a lo thlen chuan, "U Valdiki te unau hi an chapo e, Valpuii pawh hian hmeithai an nih vangin a zuam a ni ngei ngei ang. Puitea ker kawr pawh hi sawisak hrep tlak mawle" ka lo ti hlak hlak a, "Ni tho mah se tumah ka sual dawn lo aw. Ka sam hi en rawh, tan chhiat belhchhah chi a ni miah lo a nia, thu awih a ngai" a ti nghal zung zung a, "Engpawh nise kal phawt ang" tih leh kal ka rual a, ka hnungah min zuiin inchhung kan lut chu an lo ngui bar hlawm mai. 

"Lo ţhu rawh u" Nunhlimi nuin a tih laiin Valpuiin, "Hei, i ţhiante pawh hian an hria ang. An innei chiah a, inah pawh awm hman lo vin ni leng ţhakin Puitea a rawn mu ziah a, hetiang chuan tupawh nei se an lungawi lo vang. Nuthlawi tih takah mipa lêm vel i thiam riau aniang" a ti bawrh bawrh a, "Nunhlimi chunga ţuan nghal ringawt lo vin Puitea zawt hmasa ta che, lo leng rawh an ti hmasa ngai hleinem, amah zawk a kal ziah a, heta ân chiam chiamin awmzia a nei lo, i ti mualpho mai mai" ka lo ti a, thinrim a ka sawi loh nen, "I ţan a nih kha, nuthlawi a nia, mipa a ngam zia kan hre vek alawm" a tih chuan, "Nangmah chiahin i hria a nih chu. Nuthlawi a nih vang hian khawlai pawh a chhuak ţha ngam lo ţhin zawk. I duh duh sawi ve ringawt suh, i rui a nih kha" ka ti a, a hmel a dur nghal khap a, a rui tehreng nen, "Ka rui lo" a la ti tlat zui a, ben vir nawk a nia ka duh ni. 

"I rui chiang emai, rui lo la mi inah buaina i siam ngam lo vang. Puitea thiam loh a ni lehnghal a, mi hi nangmahni ang vekah ngai suh u, tiraw Sangkhum?" ka tih chuan Sangkhuma a lo bu nghauh a, mi nasa tih takah Valpuii chuan, "Khanglang che chuan, engtin nge kan awm? Kan nundan chhete pawh hriat i nei em ni? Ka hnuk hrep mai tur che a sin" a ti khar khar a, a ngei turin ngeiawm deuhin ka lo nui lui a, "I ngam chuan min han hnuk teh, in nundan hi hre lo turah min ngai suh" ka tih veleh, "Lalnunhlimi angah hian min ngai em ni a? Valdiki nen an inneih hnuah pawh Puitea a la thlem heuh heuh a, a tawm pui a" a tih lai te chuan Nunhlimi a lo insut hraih a, a nu lah mi hau chi a ni mang bawk si lo, nu dam lutuk a nih bakah inngaitlawm deuh mai a ni a, a pasal hlui chhungte an awm bawk si, Nunhlimi zak hmel, rilru nat hmel bawk si a a mittui tla ka hmuh chuan ka ling phat mai. 

"I zu rui mumang kha rawn sawi chhuak phawng phawng suh" tih pahin ka ding a, Sangkhuma insual tum lo lahin ka kawr hmawrah a lo pawt nghal vat a, Valpuiin, "Ka sawi dik chiah alawm, nuthlawiin pawisak an nei lo, Nunhlimi vangin ka ute nupa an inţhen" a tih chuan, "Ehe" tih vak pahin ka hawi let a, hmanrua ka hmu mai bawk si lo, a vawmna tur aieng lo keng ila ţha tur. 

Ka phone a ka vawm chuan a chhiat ka hlau bawk si a, a remchang ber Sangkhuma phone ken lai chu laksakin Valpuii ka vawm pawp a, a rui lutuk a ţhut hnawk rualin Sangkhuman, "Remkalam, ka phone" sin zeta tih vak pahin ka mawngtamah a ţham a, ka dingdihlip nghal auh mai. Ka mawngtama a ţhamna lah chu thlah mai lo vin, "A chhia anga sin" tih pahin a sawi a, ka mawng che det det chuan min nghawng a, ka thin a rim tehreng nen ţawng pawh ka ţawng thei tawh lo. 

"Lalremmawi, mi nasa nu" Valpuiin a tih laiin, "Va chhar vat rawh" tih pahin Sangkhuma chuan ka mawng bawk a sawi leh a, ka inher leh vut a, "Ka mawng a nih kha, i mawng pawh a ni lo" ka ti a, a chhipah ka phone in ka chhu chawrh a, ka hau a min enin a khap fuk fuk a, Nunhlimi pasal hlui nau chu insum zo lo vin a rawn nui chhuak ta nge nge a, Sangkhuma nena kan inkarah hi chuan mawngin hmun a chang thuk ka ti mai, kan chanchin sawi dawn chuan mawng sawi tel zel a ngai, ka ning tlat. 

"Nangnu kha haw rawh, i haw loh chuan i chak lo ang. Tuman an tih let ve loh che avang hian an hlau che emaw ti suh, he in hi i zu rui thinrim inhrikthlakna hmun tur a ni lo" tih paha panhnaiin Sangkhuma phone chu ka chhar a, awm hnaih phei chuan zu rim a nam huam mai. 

"Ka thu thu, hemite chhung chungah hian ka lung a awi lo" a tih leh lai chuan a kawrah ţhamin ka pawt tho a, a dawih si, khawih pawh min khawih ve ngam lo, "Chhuak teh, aieng siam ka ngai, ka hman tawh lo" tih leh pahin ka pawt chhuak dawr dawr a, a pai khat khat reng a, a vaupung chiang a na, min ban ve ûak ûak nain ham rem ber ka hmaiah pawh a ham ngam lo. 

"I rawn luh leh chuan i chak lo ngawt ang aw, i duh leh Puitea va ankhum rawh" ka tih hnuah inchhungah ka lut a, Nunhlimi nu chu a meng ngui lap a, a la ngawi reng a, ka khawngaih nufa e, Valpuii te hi chu an awm ang angin awm ve ila min zuam ngam lo a ni mai. 

"Kha i phone" tih paha Sangkhuma a phone ka pek chuan a lo en dik vat a, a hma inrin rûak a hmuh chuan a thle bur a, a ring fân vak chung hian awki sang deuhin, "Umhhhhh" a ti deuh chiam a, "I nu'n i sam a meh leh i hlauh vang maiin i inrawlh duh lo a, tihngaihna dang ka hre hleinem. Valdiki lah kha a zakthei lo ropui si" ka tih chuan, "Hnial ve vak vak lo vin kutthlak a tum hunah ka dang mai dawn alawm. Min nghak lo vin ka phone in i vawm a nih kha" a lo ti a, Nunhlimi pasal hlui nu leh a nau chu ka la hria a, anni chuan min hre tawh lo a ni maithei a ni mi zu rui âng chu engahmah an ngaih loh thu sawiin Nunhlimi nu pawh an ţawng thlamuan zawk a, keichu, "I ţhiannu thlavang i rawn hauh a, i fel hle mai" min ti a, a lawmawm angreng. 

Kan haw lamah Sangkhuman min hau char char a, ka ning lutuk chuan, "Sam nalh loh hlauh vang maia ţhiante thlavang pawh hauh ngam lo, khatiang hmeichhe zu rui te chu mipa zawkin ţha deuhin khap nghal la chu buaina a siam vak lo vang, i ngawi reng a, i ţhu tlat a" ka ti buan buan a, "Ka mawngah i la ţham zui" ka ti leh a, "I mawng lo ţham tur remchang a awm hleinem" a tih chuan, "Min sik mai ta che" ka ti vak a, "Ngati nge mawng i neih kher? Nei lo la ka ţham nang" a tih leh chuan, "Dawih emai, nalh loh hlaua ţhiante tana ding ngam lo. Keipawh hi miin min sawisa hrep mah se i ţhu tlat tho ang" ka ti hmarh hmarh a, "Hnek a ni mai hnek, an âng sâwi bawi bawi mai ang" a ti a, ka awih lo nasa lutuk ringawt. 

"Ka be peih tawh lo che" tiin ka kal hlawk hlawk a, "Aww...sawi tur ka hre hleinem mawle. Nunhlimi chu Kalvari leh nangmah ang a ni ve lo a, kawm tho mah ila inpawh deuh anga a thlavang hauh ka hreh deuh alawm" a tih pawhin ka ding duh tawh lo. 

"Thinrim lo la aieng ka zawrhpui ang che" a tih takah chuan ka ding ve ta nge nge a, "Min zawrhpui loh chuan ka kawm tawh lo ang che" ka tih veleh min kuah thawk a, "Zawrhpui dawn chiang e, mahse hlawh tlem tal min pe ve ang, lu ka meh tir duh" a ti ţalh a, Sangkhuma hi chu min puih ve pawhin phût a nei zel a, han thinrim dawnin a telloin ka awm thei bawk si lo, zuar kan tam leh pawisa ka ngah hma a ni mai. 

In ka thlen veleh ka nu'n, "I tih tur ti thuai thuai rawh, aieng siampui i ngai em? A ngaih loh chuan i nu Mawisacheki nen kan feh dawn a nia" a lo ti zung zung a, "Siampui ka ngai lo, in duh leh feh rawh u" ka ti a, ka nu a awm loh chuan duh duhin ka awm thei tihna, duh leh mu chung ten aieng ka chawk kawi ang a, ka hahdam ting a ni mai. 

"Buh i her zawh apiangin em ti fai ziah rawh ka tih kha" tih pahin a beng thak thak a, "Hei, a vai a tam lutuk alawm, em hman lawr duah ka phal bawk si lo" a ti leh a, "A ngai ngawr ngawr kan hmang a a ţha lo" ka lo tih chuan, "Aieng lo siam ţeuh ang che. I zir hma thei lo ange" a ti leh daih a, miin an han fak chiah chu min tuipui leh hle sia, 'i thiam loh chuan ka vua ang che' a ti leh dawn a nih hi. 

Buai lai laiin u Zira lahin min lo call sek a, 'innei ang' a ti leh dawn emaw ka tih laiin hmeichhiain, "Hello" a rawn ti sin zêt mai. "Eng nge a?" ka tih chuan, "U Zira nen hian in inbe ţhin em ni?" a rawn ti sin leh rât a, kolasib nula bawk aniang chu. 

"Min rawn be ţhin" ka ti a, a ngawih vang vang hnuah, "Amah zawkin a lo be ţhin che maw? Phone ah hian Remsiali tih hlir a ni mai" a rawn tih chuan, "En la, amah zawk hlirin a nih kha min bia" ka ti hmak a, tunge a nih pawh ka zawt duh lo. Kalvari khan a sawi dik chiang mai. Zirbawnga pawh hi 'min nei rawh' a ti dut dut reng a, a pattern pawh Kalvari in harsa a tih tehreng nen hmeichhiain an hawng thei tho a nih hi. 

"Aw ka hmu a, ka hria che angem le?" a rawn tih leh chuan, "Hre lo ang, kan khua a hla lutuk" ka ti liam puat a, chu nu mai mai chu tu nge niang le? 

"Inhriat tawhna kan nei em?" a rawn ti leh a, "Awii...i ţawng dan kha ngaihthlak a har e...i hrawk an zai em ni a?" ka tih chuan, "Min hre ngai em?" a ti daih a, "Min bawl min bawl lo khan ţawng pangngai mai mai teh u Zirbawng" ka tih chuan a nui hawk a, a va tenawm mai mai tak. 

"Sek ţul a aw tih sin vel a ngai em ni? Buai lai laia han inbawl" lungawi lo zeta ka tih chuan, "Fiah che ka tum a nih kha" a ti a, a la nui hawk hawk reng a, "Eng ber nge fiah i tum? Hmeichhe tak tak pawh nise ka lo hau hrep ang a, ka be tawh lo bawk ang che" ka tih chuan, "I rilru hriat ka tum a nih kha" a ti leh a, "I tum a ho emai, buai lai laia khatianga rawn tih vel a ţul lo" ka ti a, a hmel awmdan tur zawng zawng ka ngaihtuah a, ka ten lek lek alawm le. 

"Eng nge i tih?" a rawn tih chuan pawr zet hian, "Aieng ka siam" ka ti a, "Min nei mai rawh" a ti leh tawh, ka kham zozai lutuk. "Duh hun huna neih theih ka ni bik lo, vawikhat chiah ka piang ve tho dawn, ka duhdanin ka awm phawt dawn" ka tih chuan, "I hah em kha" a ti a, "Hah e...hah lai laiin min rawn bawl lehnghal a" ka la ti a, "Min nei la i tih ai ti vek tur robot ka leisak ang che" tih zawngin min thlem a, "Min ngai mawl emai, film a mi ang hi a takah a awm vek lo" ka tih hnuah, "Ka nu'n a duh lo che a, ka duh loh ve che chuan i nasa lo khawp ang aw" ka ti kha kha a, "Damlai thla i nei em Remsial?" a rawn tih phei chuan ka thin a rim hluah hlauh tawh. "Ka hre nang...ngati nge ho deuh deuh min zawh char char a? Aieng siam lai laia damlai thla i nei em han tih" vin zeta ka tih chuan, "I damlai thla tal ka duh alawm Rs" a rawn ti a, lu thin vut pahin ka per vak a, "Engmaw i sawi kha? Eng nge RS chu?" thinrim zeta ka tih chuan, "RS chu Remsial tihna, i damlai thla tal ka duh" a rawn ti nawn leh a, "Inţhen i duh mi? Ka piantirh aţangin inkohduat ka la duh ngai lo, inbiak tawh loh i duh mi a?" ka ti khar khar mai. 

"Chill...ka uang a nih kha" a rawn tih leh chuan, "Engtin maw min koh leh a, a chang leh RS i tia, a chang leh chill i tia, khatin mi ti mai mai suh" ka ti a, a nui vel nia mawle. "Chill te chu hming a ni reng reng lo" a tih veleh, "RS pawh ka hming a ni lo" ka ti vak a, "Chill chuan awmze hran daih a nei alawm. Aaa...Remsial, ka ngaihzawn dan che hi ka ngai che" a rawn ti leh daih a, "Aaa...min ngaihzawn dan hi i ngaihawm loh" ka lo ti ve a, "Lunglenna bo ţhakin min rawn fiam ziah suh. Ngaihawm tur tawk chauhin i thusawi laklawh lai ten tawp ve daih la, i sawi duh zawng zawng i sawi nghal vek zel a, ka ning" ka tih chuan, "Ka sawi duh na na na ka sawi lohin" a ti leh zel a, "U Zir, diktak chuan ka hmuh tirh che khan ţawng mawh deuh, chum ţawng chawp ngai, kheuh nuih chawp ngai i ni emaw ka tia" ka ti ta thlawt a, "Chutianga i tihin i hah dawn a sin" a lo ti ve zel a, ka dawhtheihna hi pawt fan ngawng ngawng mah ila a tlin lo leh ţhin.

"Upat lama mize thlak thut ţhin ho hian min hip lo teh mai a nia aw" ka tih chuan, "Min fak vak vak a, i hrawk bawk ka duh i ti reng a, nangmah vangin dâk chung hlirin thil ka ei, tui ka in lahin ka dak a, ka ţawng pawn ka dak. Eitur hul leh tlang ţha deuh hlek dak chunga ka ei phei chuan hrehawm ka tuar nasa ţhin aw. I hlim nan ka ti vek" a rawn tih chuan ka nui vak a, "Awii..what a very hrawk bawk chhuang, i dak nasa awm sia i ring a kham ţhin ngawt lo maw? Chhuata thil tla i zawnin i dak tho em?" ka ti a, "I nui ve ta hram alawm. I nuih theih nan ka rawn uang a nih kha. Mahse hriatchhuah ka nei" a rawn tih chuan, "Engmaw?" ka lo ti vat a, "Ka phone aţangin hmeichhiain lo bia che pawh nise i rilru a na dawn lo a ni maw?" thutak deuha a rawn tih chuan, "Ka thin a rim miau chuan 'ngah nge ka rilru a nat ngawt ang? Keichu ka kawp ve thiam hleinem" ka ti a, rin ai daihin ka zei alawm le. "Mipa dang i kawm kha ka hrereng alawm. Lukir buk deuh, cher si, taksa aia rilru lian, mi bialnu ngaihzawn ching" a rawn ti deuh kher a, "Khatiangin mi fate an sawichhe ringawt ngai lo. I ţawngthei sawt emai" ka tih chuan, "Min nei tawh la ka ti khawp mai" a ti leh tawh a, "Ka hman rih lo aieng ka siam phawt dawn" tih leh phone dah ka rual a, a che hlek a 'innei ang' a ti zel a, ka ning tawh. 

Min call nawn leh ka rin viau laiin message ah, 'inneih lai bik lo kha chu ka uang a nih kha. Dan bawhchhe suh'' a rawn ti a, u Zirbawnga pawh hi kan bulah a awm tam a, a dik lo chho ţanin ka hria. 

Aieng ka siam zawh hnuah ei ka rel a, ka nu rawn haw rualin tlem ka khai chhuak a, ka pi Binladari dawrah ka dah lui awm tho emai. Maski pawhin vawkchaw pe turin min lo nghak reng tawh ang. U Zira lah khan dan bawhchhe suh a ti ve ngei a, dan bak bawhchhiat tur dang a awm chuang hleinem le. 

Ka pi Binladari te in pengah a lo awm tawh tak tak a, a inthlahrung thei si, min nghah reng pawhin min rawn phone buai ngai lo. "I siam zo thei em?" ka thlen rualin a lo ti nghal a, "Siam zo e le..tlem hi ka pi dawrah ka dah ang a, a dang chu kan zuar ang" tih paha chhuk nghal mai ka tum chu, "Fimkhur rawh" a ti a, min dawm nghal a, ka hnungah kalin a tih dan ngai bawkin min veng leh reng tawh a, Maski-a bula awm chuan kan tlu mai mai dawn lo a nih hi. 

Dawr thlen hmain ka zuang a, dawr hmaa ţum tharh paha, "Ka pi" ring zeta ka tih chuan, a phu zawk a, a meng phar nasain a âng phuau kher bawk sia, a mak reuh lutuk ringawt. "I va phu nasa ve, ka pi ka ti ringawt a nih kha" nui sâwng chunga ka tih chuan, "Ka la beng harh ang che, khati chiam chiama rawn au a ngai em ni? Tar kan nih tawh hi, min barakhaih hlum mai anga sin" a ti vin hlak hlak a, ka hmaihnawih siam zawrh tir ka duh miau avangin ka la nui tho a, "Khatin ding keh hui reng suh, i meng bial kul lehnghal a, miin an perh pawp mai tur che a sin" a tih chuan, "Ka pi, aieng ka lo dah aw" ka ti a, min melh rum ngang mai. 

"A ţul tawh lo, pawisa min dil leh tlut tlut anga" a ti hmuk a, "I hralh chuan dil ngai lo vin min pe ang chu" ka tih rualin a hmui peh pahin min tin leh uai tawh a, "Fiam i dawl lo si" ka ti leh vel a, ka pi Binladari tlawn reng hi ka ning tawh, ka tlawn loh chuan duh angin ka hralh tam thei dawn bawk si lo. "In hralh zawh chuan i hman tur ka pe dawn che alawm" ka tih takah chuan, "Dah rawh" bul zet hian a ti leh a, "A nuam e..ka aieng siam hi thil dang zingah ka khai ve thei ang maw?" phur zeta ka tih chuan,"Inthlahrun hmel deuhin khai rawh" a ti kher a, a phal laiin ka khai vat a, per thei ang bera ka nem hnuah, "Ka pi, en rawh hei a inthlahrun hmel lutuk" tih pahin ka kawk a, a lung a awi aniang a bu nghat a, "I khai zawh chuan vawk chaw zuk pe rawh" a ti a, ka aieng an inthlahrun tehreng nen ka pi hi a inthlahrung lo reng reng. 

"Maski pawh a din reng tawh saw" tih pahin Maski ka kawk a, "Ehe...Masiki, i lo tel ve leh a ni maw? Vawk chaw in pek zawh veleh thingpui ka lum sak ang che" a ti leh bik tawh a, ka lo ner nang nang chu min rawn hmuh veleh, "I hmaihnawih siam hi ka ngeih lo, a thlawnin inhnawih ila ka ngeih deuh mahna" a ti vel a, "Nakinah hman veleh i sam ka tan ang che aw" ka tih chuan uar zet hian, "Ka duh tawh awkawng lo" a ti chiam a, "Awhaw wow...i va uar tan tan ve...i hmaa thil awm kha i chuk dawn emaw ka tia lawm" ka ti a, nui uar uar chungin ka tlanchhuak a, kawmthlang lama kan chhuk lai chuan Maski hnenah, "Ka pi hi han thi palh se chu e....ka ţap ang. Lo tho leh mah se ka ţap tho ang. A awm hian a awm ve chiang e" ka lang lang a, ka pai khut ruala min rawn dawm nghalin, "Fimkhur rawh" a ti leh tawh a, "Awii nang chu min warning reng mai, Maswar-a i ni ringawt tawh alawm" tiin ka nui har har reng a, a chang chuan khawvel hi a nuam riau alawm, vawkin rim pawh a thiang kâk zel. 

"I ngawi reng a" ka vawk chaw siam pa pek pah hian ka ti a, kan thlen thlak aţangin engmah a la sawi lo, ka ţawng apiangin a lo nui a, ti ti pui a har tlat zel. "Ţawng ve la" ka tih takah chuan, "Vawk ha kuh hi an awm lo ang tiraw?" a ti ban charh a, ka en hau a, ka hmui pawh ka chip thei lo, vawk chaw a chhun zawhah bucket ruak min rawn pein, "Vawk ha hi kuh ta se hmalamah nge sir lamah a lawr i rin? Sir lama a lawr fur chuan mi tam deuh lawng kar an ang viau maithei a" a ti leh a, "I ngaihtuah ve ngai em?" a tih chuan, "Chutiang naupang thawnthu ka ngaihtuah ngai lo, mihring hian engati nge mei kan nei loh tih ang vel a ni" tiin ka lo ţawng el a, "Mak ve deuh a sin" a tih leh chuan, "A mak ang" ka tih hnuah, "Maski" ka ti leh hluai a, min rawn en leh veleh, "Hawh, i sam pawt ngil chhin ang" ka lo ti a, chhan pawh min chhang lo. 

"I sam pawh ngil i duh lo mi?" ka tih leh chuan, "Miin an ring lo zel che sia" tih pahin min rawn pan hnai a, buara fai ka phah saah chuan ţhuin keipawh ka ţhu ve nghal a, "An uang a nih kha, rilru ka pek tak tak chuan ka ti sual ngai lo" ka ti a, ka thlem tak tak ang a, Sangkhuma leh Maski sam chu ka khawih thei hrim hrim ang. 

"Ka sam a kir sa a, i pawh chhiat chuan a khawng vek ang a, ka samin ka lu a phuar ang, pawhfana ţawn reng ang ka ni dawn a" a ti charh charh a, "I sam pawh ngil i duh loh chuan aieng zawrh ve ka phal lo" ka tih takah chuan ka lam a rawn hawi vut a, "I hralh tam duh lo mi?" a ti ve thung a, "Ka tuina a nia, rilru ka pek chuan thiam pawh ka thiam. Ka la zir thei si lo a, ka pawt chak bawk sia" ka ti a, intih khawngaihthlak tumin ka maimitchhing a, mah se ka mengdere tho, "I mit a mim em ni?" a la ti daih zui a, tum bur chungin ka hawi sawn hmak a, zei loh hi sim theih se ka ti emai.

Vawkin aţanga kan chho chu ka pi Binladarin thingpui nen min lo chang a, "Kha, in fel bawk a in ţeuh rawh u, ţhenawm ten wadi chhang min pe ţeuh a, in ei duh em?" a lo ti zung zung a, "Vawk chaw kan pek sak char char che a, i chhang zawrh lai tal min ei tir ve la" ka tih chuan, "A thlum lutuk a hrisel lo" a ti daih a, a kawm sawt tak tak a ni. 

Thingpui no kan han la chiah chu, "Awhaw wow...heti leng lung te chu chaw kan ei thei dawn mi?" ka ti hluai a, "A hang a nih kha, thingpui hang a puar theih loh" a ti then a, tunhma a yma no kan tih ţhin lianpui khat pumin min thlit sak a, a la khu vut vut nain nghak dai lo vin chawl lo vin in nghal char char pawh ni ila in zawh hmain a dai diak hman tho ang. 

"Dawr chhungah hian lo in rawh u" a ti ve mial a, kan ţhutfel rualin kurtai min pe a, thingpui ringawt pawh puarna tham lawih a ni sia, wadi chhang chu kan ei tel ta lo mai. 

"Puipuii a ziaawm tawh a, zanin tlai bak vawk chaw pek a ngai tawh lo ang. Remmawi, i nu hian engati nge Zira hi a duh loh tlat a?" ka pi Binladarin a ti chiah chu ka thingpui in ka hak lo chauh a ni. Pangngai thei ang bera awm tumin thingpui ka in leh a, "Hetiang mi ka duh lo a ti fo a, a ti mak emai" a tih leh lai chuan mitmeia khap ka tum a, ka awmdan chu a en reng a, a hrethiam emaw tih laiin, "Engati nge thingpui hmuam pung chunga i men kuau a? I mitmu a che rulh rulh lehnghal a, a sat deuh leh chhak mai ta che, euh auh che hian" a la ti he haw a, thingpui ka lem ri khalh a, a thusawi thlak tir tumin, "Khatiang hmanlai thil sawi suh. Ih maw ka pi, nu Saitâwtin i kuhva tui loh zia a sawi nasa a nia aw. 'Sazu ei ban hlir a zuar' a ti che" ka ti daih a, a ni tak tak bawk a, a thinrim hlauin ka sawi duh lo mai mai zawk. Mi veng leh khuaah a ni ve em chu ka hre lo a, kan vengah chuan dawrkai ho hi an in er ţhâm mai a ni. 

"Saitâwti mai mai chu a, tâwt lutuk-i hi, vai chhang kawt ho chhang a lak phei chu a dah rei thei lutuk a a tawp lam ei ho kua a ţha lo ngei ngei. Mi hi a er leh lutuk a, ka kuhva fak lo an awm lo, a thlum dêp dêp zel an tih kha. A man san deuh tura min ti te an awm a nia, tumah an rui ngai lo" a ti khar khar a, a fak uchuak ve chiang a, a kuhva ka rui ngun lutuk ringawt. "Mahse i kuhva hi ka rui tawh" ka tih chuan, "Zei hek lo che, i ei thiam lo aniang chu" a ti daih a, Maski a nuih tak hawk hawkah chuan thla a muang huai mai. 

Ka pi Binladarin chaw eia min sawm takah chuan Maski-an, "Ka lo han haw ang a, zanah ka rawn sawm kawi ang che. In inah kan phei rual dawn nia" a ti hlauh a, tunah tak chuan kan pahnih a awm ka chak rih lo, min dawp palh ang. 

Maski kal veleh ka nu ka bia a, chaw ei chu a lo remti ve mai a, "Hmarcha an ngah lai tak aniang, rawn ţhâm haw rawh" a tih hnuah phone a dah a, "Saitâwti chu, a bekangsa (nutella) zawrh te hi a hlui lutuk a kan ro rap hnuah pawh a la nel an tih kha. A papawr zawrh te hi karkhat lai nisaah pho mah ila kan hnuah a lian ve thei hleinem, a te tial tial zel alawm" a la ti a, nu Saitâwti thusawi a hre chiah chu a rilru a na ve khawp mai. Chaw eia min sawm chhan pawh nu Saitâwti a rel duh vang tih ka hre vek. 

"A sawi uar deuh phei chuan, 'a tel zawrh te hi a mawm tawh lo, thirbela kan chhuan rei deuh chuan a phut vek zel' an tih kha" a ti a, a nui kar kar a, a mittui awm hlei lo a hru vel a, "Sam tan dan mawi deuh ka hria a sin" ka tih rualin a nui tawp hmak thung. A hlim lai ber ka chuh ve a, awmzia a awm leh dawn lo a nih hi. 

"Chawhmeh ka va ti lum ange, engmah lo hmawm suh, kuhva rah thlengin ka chhiar vek a nia" ti a dawra ka pi luh hnu lawkah u Lalhuma a rawn lang hlawl a, min hmuh veleh, "Pu Taipuia vek a nih kha" a ti nghal ringawt a, "Nangpawh i tel, in ţawngthei leh lutuk mai. U Lalhum, ka rin ve tehreng che nen zu man tur i duh vangin min lo sawichhia a, zu man aiin min ngaipawimawh lo zawk" thutak deuha ka tih chuan uar zet hian, "Ti ringawt" a lo ti per duai a, "Nobawihi leh a ţhenawm velah aieng min zawrhsak la engtinmah ka ti lo ang che. A nih loh chuan ka nu ka hrilh ang a, meizial pe tawh miah suh ka ti dawn a nia" ka tih takah chuan, "Kan zuar anga a ni mai lawm. Mahse pu Taipuia sawi vek a nih kha" a la ti ţalh a, "Zanah i zawrh tur lo lam ang che, pawisa min pek kim loh chuan ka damchhungin ka ţhing dawn che a nia aw" ka ti pâng páng a, "Yes boss" tih pahin a'n inkhengkhawng vel a, ding khawng auh chung hian min melh zuk zuk a, a thlawna meizial neih loh chu hlau tak a ni. 

Chaw ei turin inchhungah kan lut a, a lum tehreng nen puan sin hlun chungin Puipuiin tv a lo en a, min hmuh veleh, "Ka thil en hi ka thin a rim, misualnu a luck si, changtupa leh a unaupain an buaipui a, a kawp ve ve a, changtunu an ti khawngaihthlak lutuk alawm" a lo ti hlak hlak a, "Film chu a lem emai, changtute an fel famkim poh leh a lem. Mihring chuan lerh changte kan nei vek a, changtunute pawh hi vawikhat tal thil sual tih tir ve ţhin tur a nia" ka lo ti a, film leh thawnthuah hian fel deuh angin an chhuah kher zel a, a tak a ang lo vek zel alawm.

"Film i ngai ho thei lutuk a en pui i nuam lo, a lungchhiatthlak laiah pawh ka ţah loh phah ziah" tiin min puh daih a, chhung inkhawm kan hman thlap hnuah chawei kan siam a, "Ei thuai thuai ang, aieng pack zawh vek a zawrh a ngai" ka ti leh ţhin a, tun ang reng renga aieng zawrh phur hi ka la nei ngai lo, a turin min tur a ni ringawt. 

Chaw ei khamah a rukin, "Puipui, u Zira nge Maski min duhpui zawk?" ka ti dek dek a, "I lerh" a ti vak ringawt a, "Aww...keichu bialpa ka neih ve hma paw'n lerh min tih ţhin kha. Mi pahnihin a ruala vawikhat min ngaihzawn ve na a nia, min hrethiam ve ta che u" ka tih takah chuan, "Keipawh ni ila thlan tur ka hre miah lo vang. Hausak lamah chuan u Zira ka duh zawk ang a, mahse Maski hi a hmel leh mizia a ţha reuh a" a ti a, a ngawih vang vang hnuah, "Kawp pawp la, an hriatchhuah huna nangmah ţhen lo tu zawk nei hlen mai rawh" a ti a, a sawi dik phian mai, a tlo zawk zawk nei hlen daih ila a ţha phian ang, hmangaihna pawh charh chawp ngai lo vin a nghet deuh ang a, hmangaihna charh chawp ngai chu a buaithlak emai. 

"Pasal ka nei maithei a nia aw" a tih chuan ka nui vak a, ani a tum bur thung a, "Bialpa takngial pawh i neih loh vangin ţhianten bialpa an neihin i ti tau ziah a, khawia pasal mah i nei lo vang" uar zeta ka tih chuan, "Ka nei dawn reng, Aizawl a mi a nia, ka pite bula ka awm hmain kan inzui char char ţhin alawm. Kan inbe thar leh a, inneih kan duh tawh ve ve" a lo ti a, "Ka awih lo ve chiang e, inhmu miah lo vin tu nge innei ngai?" ka ti ţalh a, "Nui ţhaw reng lo teh. Bank ah a thawk a, u Zira angin a lo zin reng hman ve hleinem. Kan inneih chuan ţhianah ţang rawh aw" a ti ţan a, "In mak e ka ti keichu, bialpa pakhat in nei dek dek a pasal in nei nghal zel a, a ruala pahnih lai nei pawn ka la neih loh hi" ka ti deuh chiam a, "Nang chu lerh nuam i ti alawm" a ti then a, "Lerh mai mai te chu na hek lo, hahdam deuha duhzawng apiang biak te chu nuam deuh a sin" ka tih chuan a hmui a ti pawrh nasa khawp mai. 

"Aizawla ka ţhiante hi ka ngei a nia aw, hna ka thawh nasat lai, pawisa ka ngah lai kha chuan lenpuiah min sawm reng a, in khuaa ka awm hnu hian an reh diak mai a ni. Mipa ho chauhin min lo bia a, chuvang chuan nangmah hi ţhianah ţang rawh aw" a ti leh tawh a, "Aw ka ţang ang. Engtikah nge in inneih dawn?" ka tih chuan, "Aizawlah ka haw zuai ang a, kan sawi chiang leh ang chu. Ka pa pawh ka hrilh hmiah mai a sin. Bakah mi hian pasal nei la i hrisel deuh ang an tia, hrisel te chu tu nge duh lo ang" a ti vel a, ka pi Binladari awmpuitu apiangin pasal an nei zel a, pasal hmu zo lo ho hian rawn awmpui deuh reng se a ţha ang. 

"Engtikah nge i haw ang?" ka tih leh chuan, "Karthar chawhnu lamah aniang" a ti a, kei ka awm loh lehzel phei chuan kan khua a reh viau ang mawle. "I pasal tur chu a hmelţha em? In inneih dawnah ka chei ang che aw" ka ti a, a lo aw ve mai ka rin nen, "A teuh lo nasa uchuak lutuk, midang kan in chei tir ang. A hmelţha vak lo, hman deuh khan a accident a, a mit an ţhuina lai bawr velah khan hmul a ţo thei tawh lo a, mithmul a nei fumfe lo tih lohah chuan sawisel tur a awm lo" a ti a, ka phur dan a vual leh tût tawh. "I sawisel ber a ho e, mithmul lem ziah sak la a tawk a ni mai alawm" ka tih chuan, "Ni chiah e, accident vanga mithmul nei tlem a nia, inthlahchhawn thil a ni lo a" tiin a nui var var a, "In ngaihtuah ngun viau ang che. In inneih tawh hnua i tlan vaih chuan ka um belhchhah dawn che a nia" ka tih khar khar hnuah, "U Lalhum" ka ti lauh a, "Ka eih peih angem aw" a tih ri ka hre reng a, ka koh nawn leh hnuah bathlarah rawn chhuakin, "Mipa in ka zuar ang ka tih chuan ka zuar dawn a ni mai, titi tui laiin mi ko sek suh" a rawn ti chiam a, "Engtikah nge i lo lak dawn tih ka tum alawm" ka tih chuan, "Pu Taipuia chaw eikham ve hunah" a ti hmuk a, "Pawisa ti bo der tawh miah suh, min bum i tum leh chuan police ah ka kal tawh dawn a nia aw" tiin ka vau a, awmzia a nei khawp mai. 

"Kan khuaa police lo awm thar pa han inlak pa zia hi, Nobawihi in a man tur a rawn zawng phei chu a inla singham a nia aw...a ang lo si, sangam bak a ni pha lo" duhthaw zeta a tih chuan, "Singham ang teuh ber pu Sangam bulah ka hek che anga a ni mai" ka ti lui tlat a, hmanah zu manah ka pawisa a hmang daih a, 'ka ti bo' a ti tlat nain a tih bo loh zia ka hre vek. 

Maski lo kal veleh kan in lamah kan phei a, u Zira vel kha min zawh ka rin nen engmah a sawi lo reng reng. Ka nute pawhin Maski chu an chhungkaw chanchin an zawt lo hmak tawh a, aieng pack paha a man zat tur vel ka chhut laiin u Lalhuma leh pu Taipuia te pawh an lo lut a, "Kan ken tur chu rawn la thuai thuai rawh" u Lalhuman a tih laiin pu Taipuia chuan, "Min ken tir ţeuh suh, zu ruih phei chuan thil phal a awl si, mi kan pe anga a tawpah kan chawi leh si ang tih a hlauhawm" a lo ti ve thung a, "Pack 20 hi keng phawt rawh u" ka tih chuan, "10 ve vein in khai sem ang" u Lalhuman a lo ti a, polythene min dil belh a, 10 ve ve a an khai chuan hralh zawh hma an inbeisei aniang lungawi deuhin an khai chhuak a, an rilru a tein naupang ang chiah an ni tawh bawk si, an ti bo em lo vang chu maw. 

"I sam chu" aieng pack zawh rualin ka ti leh ţan a, "Aieng kan hralh zawh hunah" a tih chuan ka ţhut hnaih sauh a, "Tak tak maw?" ka tih veleh a lo bu nghat a, "Ni e...heng zawng zawng hi kan hralh zawh theih phawt chuan i pawt ngil dawn nia" a ti ta nge nge a, aieng chu ka en a, mi chuan hralh zawh an huphurh anga, keichuan ka huphurh hauh lo, "Ka chhut vek tawh a, heng ho hi kan hralh zawh chuan Aizawl ka kal thei chiang bal tawh" phur zeta ka tih chuan, "I kal dawnah inthlahna kan siam ang chu" a lo ti a, "Ka pawisa chuan ka phal lo. Engmah lei lo vin buhban chhum mai ang u" ka tih chuan, "Keiman ka lo lei ang" a ti a, a nuam ang chu aw. 

Zingah hma tawkah ka tho a, ka helhhawlh aniang darkar khat dan zelah ka harh alawm le. Chaw ei kham rualin Sangkhuma a lo thleng a, "I sam kha ka ning" ka ti nghal ringawt a, ka sam nalh loh lai vel min hriatchhuah tir zel a, ka hmu hne hlui tawh.

"Kan chhuak dawn bawk si, engtin emaw tal min tihsak teh" tih pahin ka hmaah, chhuatah a ţhu nghal thawr a, bangrela samţawnna ka dah khawm ţeuh chu banin a chhip a ţawn khawm ka tum a, a ţawn khawm hleihtheih loh. Ka tih ngaihna hre lo chuan ka ţawn kak a, a tukhum lamah ka ţawn bawk a, a in en vang vang hnuah lungawi hmel deuh a, "Umm" tih pahin a bu nghat a, "Hmun thumah i ţawn a ni maw? Mahse a pawi lo mai" a ti a, mawi lo deuhin a nu'n a mehsak leh tho sia, sam zuah man a awm lo emai. 

"Puipuiin pasal a nei dawn nia aw" ka tih chuan, "Tu?" a lo ti vat a, "Aizawl a mi a ti, ka la hrechiang bik lo" ka tih leh chuan, "Puipuii chu a changkang e...kan khua angah a mo thiam lo ang. Aizawla mi neih a tum hlauh a a zia khawp alawm" a ti then a, "Engtinmah i awm lo mi?" chik deuh a en chung hian ka ti a, "Awm nang aw...engtin vak nge awm se min tih a?" a ti heu mai. "I lo ngaihzawn ruk takin ka ti" nui hak hak chunga ka tih chuan, "Nahi teh suh ei, Aizawl nula ngaihzawn chu ka sim tawh. Ka bialnu hnuhnung ber kha Aizawl mi a nia, a inla changkang si, innei ang ka ti ve ringawt a, in chawhmeh a chhe thei awm emai a tia, ka ţhen chiang a sin aw" darthlalang a la in en reng chung hian a ti a, "Puipuii chu chutiang a ni ve nang" ka tih pawhin, "Duh zawng ka nei ve alawm le. Puipuii hi chu lum hlumah hlawh rawn han ti chiah se chu e...thih ngei ngei tumin ka lum ang" a ti a, a duh lo ve khawp mai. 

"Nih leh eng nge i hmeichhe duhzawng?" ka tih chuan, "Nangmah duh chuang si lo chein nangmah ang ka duh. Nang leh kei chu a chi loh, a rem loh dan a ril tlat" a ti a, ka pawm zawng tak a ni. "Min ngaizawng la chu ka ten viau ang che" ka tih veleh, "Nangpawh min ngaizawng la chu nupui tur ka zawng nghal ang" a lo ti ve a, "Kan induh tawn loh dan hi a nuam e tiraw?" ka tih chuan, "Nuam tak a ni, min duh loh dan hi ka duh chi" a ti a, kan nui dun hak hak reng a, Maski pawh lo thlengin zawrh tur kan insem a, Sangthirbela pawh a phur khawp mai. 

Nilengin kan zuar kual a, kan hralh tam lutuk lo thung. "Feh changa inhnawihah a ţha, vun rawng inthlak tur a veng" ka tih vang chauh a hralh kan ni. An vun rawng a lo inthlak tho a nih chuan ka thiam loh a ni tawh lo, an ngeih lo tihna a ni mai. 

 "Kan inhralh tlem e" Maski-an a tih laiin, "I sam kan pawt ngil har awm" ka lo ti a, "Khaw ţhenawmah zuar ila chu i hralh tam viau ang" a tih chuan ka ngaihtuah chiang a, scooter a chuan châk lo viau mah ila ka inhralh theihna tur a nih a, Aizawl kal vat theihna tur a nih chuan pawi ka ti tawh lo. Maski sam kir ka pawt ngil thei dawn bawk. 

"Naktukah a ni tawh mai" ka tih takah chuan a mitmeng a nung sârh a, "Min va phur châk awm em em ve" ka tih chuan, "Phur châk e..mahse min dêk tawh lo la" a ti nghal a, in kan thlen hnu lawkah Sangkhuma pawh lo thleng vein keini aiin a hralh hnem daih zawk a, cheng 100 min la laksak lui tlat zui a, Maski hian engmah a phut lo thung. 

Zingkar aţanga ka insiam ţan chu ka nu'n mak a ti deuh aniang, "Engati nge?" a ti reng a, "Vawiin chu Maski nen khaw ţhenawmah kan zuar dawn. Niminah ka inhralh tlem emai ţan lak a ngai" a tih chuan, "Fimkhur ula" a ti a, min khap tawh lo reng reng.

Aieng chu bag ah ka khung khawm a, lukhum ka khum bakah nihliap ka keng tel a, a vawh palh takin ka tia kawrlum ka pai bawk. "Khati eng ung kha a ngai em ni? Aieng zuar tur si i va bawr ve, khatiang boot khup khuh te kha bun kher a ngai em ni? Engati nge i inchei chiam a?" ka nu'n a lo ti a, "Beautician an ţhing ngai hleinem, inchei nalh a ngai alawm" ka tih chuan, "Ung deuhin i rawn haw dawn tho tho, va inthlak leh rawh" a tih pawhin, "Ka duh lo e a" ka ti a, kekawr fan thei ha mah ila min phuar mawi a, boot sei nen a inrem thlap. Ka sam ka ţawn a, ka hmui ka hnawih sen hlar bawk a, bag lianpui ka ak a, aiengin hmun a awh tam lo nain tluk palh tak thuta inven nan thawmhnaw ka pai a, khawkar kawngah kan tang thut thei a, tiffin mai bakah chhang ka pai tel a, thingpui dawra chawlh ngai lo vin flask tereuhteah thingpui ka thun a, no pahnih ka pai tel bawk a, bawr lo chi pawh ka ni lo. 

"Lukhum parh nghawng khuh i khum tho a, engatan nge nihliap kha i tih?" a tih leh chuan, "Lukhum parhin ruah sur ah min veng thei hleinem. A remchang chang keng tawp ila theihnghilh neih a har ber. A lum chuan hmai phih te ka duh ang a, towel tê pawh ka pai" ka ti zung zung a, rum zeta min melh chungin a ner nâng a, "Aieng i zuar anga i lo haw lehnghal dawn. Bag hruia i khai kha eng nge?" a ti leh zel a, "Makeup a nih hi, hmeichhia chuan kan mamawh reng alawm. Polythene dumah ka dah tho a tuman an hmu lo ang" ka ti a, "I ţhing" min ti ringawt a, keichu zin naah pawh mi thil ţawm ai chuan bawr ka duh zawk daih. Ka chhuah dawnah pawh, "Miin an nuih leh dawn che a nih kha" a la ti hram a, "Mi nui mai mai a ho ve chiang e...ka sumdawnna an ti chhe pha lo. Anni nuih avang mai khan pawisa ka lak luh loh phah lo" ka ti a, inringtawk deuhin ka chhuak a, nihliap ka hawl pah a, ka pi Binladari te in peng a innghah kan tia, Maski a lo awm reng tawh. 

"I va chhe lo ve" a lo ti a, ani ve chu tshirt leh kekawr bul nen tawp a lo awm a, "Inchei ve ta che" ka tih lahin, "A lum dawn emai a peihawm loh" a ti ringawt a, "Bag ah khan aieng hlir i dah mi? I siam belh lo emaw ka tia" a lo ti leh a, "Teuh nang aw...thawmhnaw te thingpuite ka ak. Aieng chu a mawngah a awm" ka tih chuan hlauh hmel deuhin, phawk hrain min en a, "I cham dawn mi? Mahnia haw a va peihawm dawn loh ve" a ti nghal a, "Cham dawn nang...hma hun kan hre hleinem. Eng emaw a thleng thut thei a, inrin reng a ngai. Khawiah pawh tang ila rilţam loh nan eitur te ka keng a, ka zin vak ngai lo va zin ve chhunah ka pai ţeuh a nih hi, min en liam mai mai rawh" ka ti a, ban charh a, "Aw le" tih pahin ka bag min laksak a tum a, "A rit emai keiman ka ak dawn. Lei kha lo rap nghet viau ang che ka lawn dawn nia" ka ti zung zung a, lawn pawh a harsa, a tlan chhuah dawn chuan, "Khawilai ber nge ka vawn dawn? Ka bag a rit si, min thlauh ange aw, kawngchhe laiah pawh min phur sawt suh aw, kawng zawl ţha laia i tlan ang chiahin tlan rawh" ka tih chuan, "Min si lo vin ka kawrah pawt rawh. Min sik chuan a za zel" a ti a, "Awii...ka bag ah hi en la, sik loh che a har dawn teh mai a nia aw" ka tih lahin, "A ţul tawpah lo chuan ka nâk bawr vel kha si miah suh" a ti khur khur a, "Min dêk min dêk chuan ka thi dawn a nia aw" a la ti zui a, "Thlamuanna i chhawm lo ve chiang e" tih pahin a kawrah ka pawt de de a, a tlan chhuak chiah chu, "Ka duh thei lo" ka ti vak a, a ding rang khawp mai.

"Eng nge ni leh ta?" min nin hmel deuh a a tih chuan, "Tlan chak suh, nikhaw hre lo vin ka tla ange aw" ka tih chuan, "I duh dan thlapa kan tlan chuan thim hnuah bak kan thleng nang, engmah kan zuar hman lo ang" a ti deuh tlat a, "Chak si lo muang si lo vin tlan rawh" ka ti a, chhan pawh min chhang peih tawh lo. 

Chak lutuk lo vin a tlan ve par par a, "Aizawl a i kal daih chuan ka ngai awm che. Zir ngei ngei la ţha ka tihpui tho che a" a ti a, "Mi fate lunglen theih ziah hi aw" ka tih laiin, "Ka kualna lam apiangah lo thle ve zel suh, i bag nen phei chuan i rit a nia aw" a lo ti daih a, "Ka thle lo thiam hleinem, ka ţan zia aw, a kual laiah khan kual lo mai rawh" ka ti a, a kawr pawh ka ţham khawm tun tawh a, chetsual tawh chuan engtin pawn tlan se a hlauhawm tawh hrim hrim. 

"Kawng a chhe dawn a nia aw" ti a min hrilh lawk thlap chung pawhin, "Kawng ţha laia i tlan ang chiahin tlan rawh" ka la ti tho a, "A theih loh" a tih rualin kan sawt ta chiah a, "Awii...kan va sawt nasa ve, keichu ka duh thei lo" ka tih lahin min chhang lo vin a tlan mawp mawp a, "Ka ţhu hleithei lo a nia pawngpaw tlan mah ta che" te ka ti a, ka mit ka chhin lahin engmah ka hmu thei bawk si lo, ka men leh kawng ka hmu hlau bawk si, chet sual leh mawlh ka hlau chuan, "Ding rawh" ka ti vak a, a ding chiah chu ka thaw huai mai.

Scooter aţanga ka chhuk veleh,"Kan tlu dawn lo ka tih ziah kha" a lo ti a, "Kawng chhe lai bik chu kein ka kal mai ang" ka tih chuan, "A ngai lo a hahthlak. Lawn rawh ka tlukpui lo ang che" ti ve bawk mah se, "Aaa...ka chuang anga min nawr mai rawh" ka ti chiah chu min melh rum nasa khawp mai. 

CONT...