KEIMAH, THINGTLANG NULA S2-13

KEIMAH, THINGTLANG NULA S2-13

Sangkhuma leh Fawnvela te nen a ar kan puah laiin, "Ehe" tih hlut pahin Fawnvela a ding hluai a, "Ka hre chhuak" tih leh paha a kut a thin chuan a kut a ar hmul kai chu Sangkhuma hmaiah a bet thlawp a, a lu a thin nawk hnuah pawr zetin, "Fawnvel, i va mawl ve, hrechhuak mah la i kut huh kha thing kher mah ta che, ka hmaiah ar hmul a kai hi, rimchhe si" a ti hluk hluk a, a hmai chuan a koki a nul thuak thuak a, "Fawnvela hi chu i kutah a kai hnem bik ţhin hrim hrim, chaw i ei lahin buh mal a kai ţeuh zel a, tunah lah ar hmul a bet leh lûk a" ka ti ve a, tlaia ei tur chawhma lamah kan puah der tawh a nia, phur fal tak chu kan ni. 

Kan thusawi chu a thengthawngah a thawk lo tih hriat takin, "Niminah ka nu'n sachek a hralh zo lo, va la ang u. Nizanah a thar a siam leh daih a, a bâng kha eiturin a dah alawm" phur zet hian a ti daih a, "Ar hi kan puah zawh phawt lohin" ka lo tih chuan a ţhu leh a, hmanhmawh deuhin ar hmul chu a pawt sawk sawk a, "Sangkhum, ar hi an bawp a mum nalh thei a sin" a ti thul, Sangkhuma lahin, "I lu a nih chu" a ti hmuk a, "Thil kan tih ho reng rengin pakhat tal a ti tau ve ziah" ka tih chuan an ngawi ve ve a, an sachek chan loh hlau an hmanhmawh bawk a kan zo rang khawp mai. 

Inchhunga kan dah luh hnua chhuah lehnghal mai kan tum chu ka nu'n, "Ti zo law law ta che u" a lo ti vin ţhak a, "Sachek kan la lawk dawn" Fawnvelan a ti lauh a, naupang ang maiin kan tlanchhuak leh tur te chu kan insu nawk nawk a, tuizem tuia kut kan sil thuak thuak hnuah Fawnvela te in lam kan pan a, nu Mawisacheki lo la chhuak lo hlauh se a ţha ngawt ang. 

"Hman ila chu Fithangi puanpho lai hi ka en nileng ang mawle" an inzawn kan thlenin Fawnvelan a ti lung lung a, kawta Fithangi puanpho chuan ner nang chungin kan lam a rawn hawi a, "Min tlawn tum vel lo mai teh, thawmhnaw bal i su vek tawh emaw ka tih ho kha khum hnuai kilah i lo hnawh vek a, maimawm ril te a lo kai hman alawm" a ti hlak hlak a, "A pa zawk...maimawm ril kai ngei kha han ha ila, ramhuai pawn min zuam lo bik" a ti liam satliah a, Fithangi chu kalpelin inchhungah kan lut a, nu Mawisacheki pawh a lo la awm kiau mai. 

"Nu, Remkalami thlah nan khawmaw nimina i sachek hralh bâng kha han ţheh huk teh" Fawnvelan a ti thar thar a, "I zakthei lo e a, thatchhe si, a tui pawh i hawp tawh dawn lo" a lo ti daih a, "Naaa...ka inhlawh anga smart tv leina tur ka tuak ang ka tihin i thin a rim a, hna ka thawh loh leh i thin a rim tho a" a tih bui bui hnuah, "Ka nu hi chu a maksak thei a nia, 'smart tv lei ila wifi pawt ve ang u' kan tia, 'ka duh lo, korean film ka en thei lo ang' a ti tlat mawle. 'Remote a te si ka hum thiam lo' te a tia, damchhungin LG tv hnung pawng kan en dawn a nih hi. Kum tawp lamah phei chuan ben nun chawp a ngai tawh ang" a ti leh hluk hluk a, "I chhe ziap zuap, tunhma te chuan tv pawh kan nei pha ngai lo, thingfak nen mi in ah tv en tur a kan kal pawhin kan phun nawi ngai lo, kan neih chhun hi lungawi deuhin en ve mai mai rawh" a lo ti zek a, "Nu Mawisachek, naktukah Aizawlah ka kal tawh dawn a, kuttin hnawih leh sam siam te ka zir dawn" ka lo tih ve chuan, "I thiam chuang lo vang" a ti hmak a, sachek kan ei dawn lo niin a lang. 

"Chawhmeh ţhing mai mai pawh i ui a nia" lungawi lo deuha Fawnvelan a tih chuan, "La rawh u, ei ţeuh ula, e hnuk rawh u" a ti deuh kher a, bucket lianpui khaiin a chhuak nghal daih lehnghal a, a inthlahrunawm duh a sin aw.

"Ka e hnuk kher lo vang" tih pahin Fawnvelan dekchi a hawng ruk ruk a, "La lo mai rawh" ti mah ila, "A phal tihna a nih kha, a zawrh tur te chu din pawh kan din hnaih ngam hleinem. A ven tlat loh chuan a phal tihna a ni mai" a ti a, dekchi lian ber chu chawikangin, "A hralh zo dawn chuang lo, hei chu la phei vek ang u, a sehhmeh a ni leh mai" a ti bur mai si a, nu Mawisacheki hlau chung chungin dekchi chawia Fawnvela chhuak chu kan zui a, "Eng nge i ken chhuah kha?" Fithangin a lo tih chuan, "Vawkpui" a ti vak a, dekchi lek kual vel paha, "Nguk..nguk" ti lehin a nui kur kur a, "Chaw lo ei ve rawh aw Fithang" ka lo ti thung a, "Hrilh ţha ve mai la" Sangkhuman a tih chuan, "Sachek ka keng chhuak tih a hrereng alawm, 'ngah nge min zawh kher ni? Mipa diktak chuan kan nupuite kan fiam zuk zuk zel" a ti a, a hlim ve tehreng nen Sangkhuman, "I meng ang ker a" a lo ti kher a, a ţawng duh tawh loh phah vek. 

Tlaia Puipuii leh Nunhlimi te lo kal chuan, "Insiampui i ngai em?" an ti ve ve a, "Nizanah ka insiam peih vek tawh" ka tih chuan, "I phur tawh awm hle mai" an ti hlawm a, hawlh zawt zawt ang vel ka ni, Aizawl an tih ringawt pawhin a hmuna awm angah ka in ngai der tawh. 

"Kalvari te an lo kal ve thei dawn em?" ka nu'n a tih lai mekin u Rinchuta a rawn lut hlawl a, "E...Rinhlua chu, sawi lai mek mekin, in nu a lo kal ve thei dawn em?" ka nu'n a lo ti leh a, "Naute nen chuan a lo kal thei lo. Remkalami thlahna chawhmeh suak turin min tia, zanah lo leng rawh se a ti bawk a, phone ah ka be thei lo vek a ti leh a, aaa...a ti deuh duah mai" inthlahrun hmel tak hian a ti charh charh a, "Keimah min rawn hrilh se i lo kal kher ngai lo vin ka rawn tir mai tur a nia, i buai awm tehlul nen, khawiah nge Fawnvela leh Sangkhuma te pawh hi an awm ni?" ka nu'n a ti hluak hluak a, u Rinchut but buta bulah chuan a zaidam ve hle mai, Fawnvela ten inhnuaiah zu an in tih ka hre kar a, mahse ka sawi kher lo ang. 

"Aaa...rawn kal zawk te chu a har hleinem" a ti a, ka nu'n, "I fapa eng nge a an?" a lo tih chuan, "A ţha...a nu a chhun a a lu a lian tulh mai" a ti pek a, a fiamthu ve ngei aniang a nui ruh ruh a, "U Rinchuta inlak zei sawt zia hi, ka zo lo, ka thal tawp chak ţhaks" nui har har chunga ka lo tih chuan, "Umm ţhaks" a ti a, ka nu meuh pawh a nui ve hak hak mai. 

"U Rinchut but but, Kalvari hi a lu a lian i ti ve hrim hrim tiraw?" ka tih chuan, "Umm..hmai hlai hi chu an tukhum a zuih mawh a, an lu a lang lian nge nge" a ti dam thlup a, "Mahni nupuite lu lian han tih" Nunhlimin a lo tih ve chuan, "Nupuite an nih vang maiin lu lian sa a hmuh tet tlat theih loh, lu lian chu lu lian a ni mai" a ti fiamthu a, kan lo nuih dar dar lai chuan, "A ţha..nuih hian hriselna a chhawm a nia" lo ti lehin a nui ve vur vur reng a, fa an han nei chiah chu fiamthu pawh a duh sawt khawp mai. 

"Rinhlua sawi kha a dik chiah alawm, taksa a nalh lo lai chu hmuh nalh chawp har deuh a sin" ka nu'n a tih chuan, "A dik chiah, kan kawppuite taksa nalh lo lai hmuh nalh ţalh tum lo vin a nalh lo ang anga pawm mai tur, damchhunga nalh lo tur a nia, a tir aţangin pawm hmak ila damchhung a daih mai" a lo ti ve leh a, "Nih leh kan mawina lo chuai ta se" ka tih ve chuan, "Khawvelah engmah kumhlun tur a awm lo, kan nihna ang anga kan inpawm chuan chuai tih thumal hi kan dah vul chûk ngai lo" a ti daih a, "Awi..u Rinchut but buta ril sawt zia hi, what very u Rinrila" ka lo ti duai a, "Ka sawi kha hriat reng tur" a tih hnuah ka nu hmaah a chawhmeh suahna tur a va dah tawp a, ka nu pawh a nui a nui mai. 

"A inthlahrunawm viau nain Kalkurtaiin Remkalami thlahna chawhmeh a ei ve chak tlat sia" tih pahin min rawn en a, "An siam tui hmel sia, i rawn hlawhtling haw lo ange aw. Ţha deuhin i han awm dawn nia, hmalam chauh en la, thle kual mai mai suh, tung ût reng rawh" a ti ve ngial a, ka nu lahin, "A dik lutuk tlat" a lo ti ve nghal zat a, "A va nuam ţhin, tui hlang tawp ai chuan awmzia a nei ţhin alawm tiraw?" ti phawr phawr chunga Fawnvela lo lutin u Rinchuta a hmuh chuan a hmui chip hmak a, Sangkhuma rawn kal pai lui vel pawh a kal ngil nghal âwt âwt mai. 

"U Rinhlu, Remkalami kan thlah dawn sia, kan hey tonight a" bah nawka Sangkhuman a tih chuan Fawnvelan, "Zan a la ni lo" a lo ti sup a, "Leh si a, kan hey evening zuai a" ti lehin lei a chhuah zawk a, che lo vin a ţhu zui hle hle a, "In ţhiannu hi in ngai dawn si a, fim karin a bulah awm zawk ta che u. In ruih bo daih te chuan a bula awm lo ang in ni dawn a sin" vin hauh lo hian a lo ti a, hei tak hi a nia u Rinchut but buta danglamna chu, a nelawm a, a fel tehreng nen rui chunga pal lui ngam an awm mang lo reng reng. Fawnvela leh Sangkhuma meuh pawh kan bula an awm tual tual angin a bulah an awm ve ngam lo, an ruih chuan an zah tlat zel, a zilh ngun tawh vang a ni pakhat bawk ang. 

"Zanah in lo leng dawn a nia, tengtere tui hawp tur tui deuh kan nei" a tih hnuah ka nu hnehah, "A nih leh aw pi Nemte, a lawmawm lutuk e. Tui deuhin lo eikhawm rawh u" a ti a. 

In aţanga a chhuak chiah chu ka nu'n, "In mak ngawt alawm, mi 10 velin chaw kan eikhawm tawh dek dek chuan in rui ve hman ziah" a ti nghal chat a, "Zu a awm tawh chuan ruih mai loh chu tih tur a vang e" uangthuang zeta Fawnvelan a tih laiin, "Remkalami kan ngai dawn lutuk a harhfimin kan thlah ngam lo" Sangkhuman a lo ti a, kan hrilh ve der si lo chaw ei dawnah u Lalhuma leh pu Taipuia te, Setanic Nicky-a te an rawn lang hlawl mai. 

Kawngka bulah an ding tlar ţhâm a, an rui tawh tih an rim aţang ringawt pawhin a hriat theih. Ka nu chawhmeh chawk mek chu melh zuk zuk chungin u Lalhuman, "Tui kan lo in" a ti lauh a, a chil a la lem ralh zui a, an va han vir tak. Sa rim an hre thei a nia aw. 

"In rawh u, Lalhum, chaw kan chhum ţeuh mai, Remmawii hi naktukah Aizawlah a kal tawh dawn a, chaw ei ve nghal daih rawh u" ka nu'n a lo ti ngei bawk a, "A pawi miah lo, ticket in ti fel tawh em ni?" tih pahin tlangnel deuhin an lo lut a, inthlahrung dêkin an awm tawh lo, tui pawh bottle chawpin an dawlh lo chauh tawh zawk a ni. "I pa Ditean vawiinah a ti fel a, naktuk, tukţhuan eikhamah kan khua aţangin an chhuak ang" ka nu'n a tih chuan, "A va ngaihawm dawn vung vung ve" tih pahin ka nu a din hnaih a, chawhmeh chu a en chiang vel a, "Meizial ţawn tur a awm hunah min lo phone mai dawn nia aw" a ti leh a, ka nu fian ken lai chu laksakin chawhmeh a tem a, a inthlahrung rei lo thei si, u Zira vel vang khan ka la ngei riau mai a ni. 

Chaw kan ei te chu an han bar lian hlawm khawp a, an chaw ei hnuhnunna ber tur emaw tih tur a ni, an kuttum aia lian lian an barin ka hria, chaw ei kham hnuah pu Taipuia phei chuan, "Vawikhat bar a chaw no khat zel bar ang ka ni" a ti hial a, kan lawm ve hman nen, "Arsa ah chaw a la tel zui a, Remkalami thlah nan chaw hlang kan ei" a ti daih a, Sangkhuma leh Fawnvela erawh ka pa a awm miau avang leh an ruih lutuk loh avangin an zia a zawi rih khawp mai. 

U Ziran min lo phone rualin bathlarah ka tlan chhuak a, "Min lo va be hma ve" ka tih ruala inchhung lam thawm ri nasa lutuk avang chuan, "Rel bulah i awm em ni?" a rawn ti kher a, "Sawi mai mai teh" ka tih veleh, "In ka thleng kha ka nu'n a lo zawng che a, ka ruala haw turah a ngai che" a lo ti vel a, "Awii...in unau in la zei leh lutuk hi chu ka zak ngat ngat zel, ka thih hma phah ang tih te a hlauhawm" uar zeta ka tih chuan a nui hawk hawk a, "Min awm bo san vang vang dawn sia, ka ngaih a ţha lo. Kan inhmuh leh hunah dawt sawi leh sawi loh test na ka pai ang, rilru a nuam deuh hlek ang" a rawn ti leh tawh a, ka ning ve chiang e. "U Zirbawnga hi chu ninawm riau chang i nei, i over dan hi a upa tawh, i ûver tlat tawh" uar zet hian ka ti a, a haw duh mang bawk si lo, a thinrim duh miau loh chuan thinrim mah ila ka hah thlawn a ni mai. 

Nicky-a a rawn chhuak a, en pawh min en lo vin kawngpui lam a pan nghal a, keipawh u Zira nen a kan inbiak zawh hnuah inchhungah lut lehin Puipuii leh Nunhlimi te nen hmun kan ti fai a, Sangkhuma lahin a khat tawkin, "Ka ngai dawn che" a ti deuh reng a, ka pa chu awm lo se a ţap ang ka ring. 

"Remmawii sam siam zir ve tur chu ka nuih a za e...ar bawm tiat lawih hian i sam a rawn puk haw leh ange" u Lalhuman a ti ve ngei a, "Ka la ngei che a nia aw u Lalhum, kâ nei tih vanga han ţawngtheih" ka tih chuan, "Ka kâ a nia, ka duh leh ka ţawng ang. Ka hmang ţangkai ve a ni mai alawm, Pathian thilthlawnpek hi chu hman ţangkai hle tur" a lo ti a, ka tûm nghal hmuk a, Maski a reh vang vang bawk si, awm a ti nuam lo. 

"Zan a rei hmain Kalvari chu va tlawh ve zuai rawh, naktukah i peng hman dawn miah lo a nia" ka nu'n a tih takah chuan ka tho nalh a, ka ţhiante pawh an lo tho ve nghal sap sap a, Puipuiin ka banah a kuah a, ţawng kan inchuh bap bap a, kan in aţanga kan chhuah chuan kawngdunga setanic Nicky-a lo vei tawn sek kan hmu hmasaber a, "A ât a chhuak leh tawh aniang" tiin Puipuii lah chuan min kuah nghet sauh a, "Nicky" kan ti dek dek a, "Min cho lo chawngkawr lian viau ang" a lo ti khur khur a, a ât a chhuak leh tawh tak tak aniang. 

"Ehe...i va pa rem rem ve le, an cho lo chawngkawr lian viau ang che" Fawnvelan a tih takah chuan kan dinna lamah lo pheiin, "Chianga leh Lalpa-a phakar lutuk hi chu ka la dawi letling ang mawle, hmalamah pawh kal duh se an back char char mai ang, min hlau viau rawh se" a la ti chhur chhur a, "Dawi chhin la, an hlau viau ang che, nang chu i pa alawm" lo ti lehin a kuah thuk a, "Lo kal rawh, leng vang vang ang" ti a a sawm leh hnuah kan kal zawm leh a, Puitea te in lamah kualin thlanmual peng kan thlen chuan setanic Nicky-a a inla pa lehpek a, thawm a reh tehreng nen pawt tu awm ang mai hian thlanmual chhuk thlakna lamah a petek phei nawlh a, "Ka hman lo, in ninawm" a ti hmuk a, kan lawm rawn hawiin kan en reng tih a hriat veleh nasa zeta pai leh khut khutin lei si dawn dawnin a kun a, "Ka hman lo ka tih chu, min ngai viau suh u" a ti leh a, a eu thut a, hnung lama âwn duai chung a kan lama a ban rawn phar dârh pah hian a che deuh sawk sawk a, "Heng ho hi min pawt tlat mawle, zanin chu min ngai a nih hi, ka unaute ho hi in hmu ve thei em? An mit te hi an bengah a awm daih a, an dangdai a nia" a tih meuh chuan, "Awii..tlan ang u, tu tu emaw thlarau kan hawn hlauh ange" tih leh tlan ka rual a, midang pawh ka hnung lamah rawn tlan vein, "Ka hlau" an tih loh leh, "Ka rap" an ti a, ka uang a ni reng sia. "In va tlan chak ve" ti deuh reng chungin setanic Nicky pawh kan din tawh hnuah kan lamah a rawn tlan ve ţuang ţuang a, a unaute chu kan tel lo chuan a lo hlau hle mai. 

Kalvari te ina kan lut chu a lo phul hlut a, "In kim vek, a nuam e, leng reng rawh u" a tih chul laia kan hah thaw hluam hluam chu u Rinchutan, "Thaw dim rawh u, naute a harh ang, a beng a var a nia" a lo ti hmanhmawh a, "Awii...u Rinchut but buta pawh hi i over dan a phanchang tawh, i ûver ka ti, heta kan thaw hi pindan aţangin a hriat hlawl loh ang" uar zet hian ka lo ti a, "Puitling thaw hluam hluam chu naupang tan chuan thlipui ang vel aniang chu" a ti ve nghal zat a, a ruk a a nui chu hmu mah ila ka melh rum tho. Fa an neih hnu hian uan dan chintawk a hre hlawl lo, mitmu aia hnarkaw zau te pawh kan ang alawm le. 

"Thingpui ka lum dawn aw" phur zeta Kalvari in a tih chuan, "Tunah pawh kan zun a chhuak reng tawh a" zawitein Sangkhuman a lo ti a, "Zunin a awm alawm, in in loh chuan in leng rei lo palh ang, Remmawii a awm bo daih dawn lehnghal" a ti zung zung a, kan ţhu ţhap a, Nunhlimi leh Puipuii te chuan Nicky-a ngawt chu an en a, "Tengtere kha hawp tir rawh" u Rinchutan a lo ti ve reng bawk a, thingpui kan in hmasa te te a, chumi hnuah tengtere tui kan hawp leh a, a tawpah a tak leh a mu kan ei a, manhla vang vang tak a ni. Ţhial reng a tan ka ak rui bawk a, tengtere mu hi chu ţhial reng mah ila a te lutuk a a hne theih loh. 

Kan ti ti nak nak laia naute ţap ri kan hriat chuan, "Dam dam..bang rawh le..ţah loh tur" tih pahin a ţhutna aţangin u Rinchuta a tho a, pindan lamah a kal nghal dawr dawr a, "My friend, in pa hi" ei lo tawka ka tih chuan, "Ka ning tak tak a ni, naute a chet tawh chuan a buai vek zel. La in entir sa a ţha ang" a lo ti tan tan a, "Zanrei a naute in thawm a neih rual rualin a tho ve nghal zel a, nizan phei chu kan mut hlanin current a awm lo a, khum lu a kan hmeh ên dah ţhin kha ban a tumna lamah ka hnarkua te a kawm a, a zei lo si, amah zawk hi enkawl dan awm se ka ti a nia" a ti leh hlak hlak a, "My friend, ka ngai dawn che. Tunlai ka taksa chak loh vangin ka mittui a tla hleithei lo zawk a" ka lo ti fiamthu daih a, "Keipawn ka ngai dawn che e" a tih rualin ţhu reng chungin kan inkuah vang vang a, inhmu lo in awm thei dawn tho mah ila lung a leng duh khawp ang. "U Zira nge Maski i ngaih zawk min rawn hrilh vat ang che" ka beng bula a tih chuan, "Yeasi kul rai...ka ngaih zawk zawk ka nih pui hmak ang" ka lo ti a, "Ka chhuang lutuk che" tih pahin ka hnungah a beng thak a, min chhuan nachhan ka hre lo reng reng. 

Rei deuh kan len hnua haw tuma quarter aţanga kan chhuak chu Sangkhuman min kuah ve thung a, "I taksa ah hian tuin nge electric hrui zam a? Kan tawh rual chein kan ţek chhak chhak zel a" inti zei zeta a tih chuan Fawnvela nen an nui ham ham a, zanin chu ţhiante atchilh zawngin a thawk leh dawn a nih hmel. Vawikhatna chauh pawh a ni tawh lo.

"Sangkhum, i harh fim hnuah min hmu ngam lo leh ange aw" ka tih chuan, "Hmelţha na na na hmuh an hlauhawm ngai lo" a lo ti vel a, "I chhe seng sung a nih chu" ka tih lahin, "I hmelţha êt âwt a nih chu" a lo ti nghal vat a, ka ngawihsan rih a, zingah ka chhaih dawn khawp mai. 

"Nangni pahnih hi in lo inngaizawng daih ange aw, ţhianţha inngaihzawn daih chu inţhen hnuah inhaw chuang si lo vin an inkawm peih tawh lo ţhin a nia. Sangkhum, i ruih vang maiin ţhiante hmu hmelţha tlat suh" tih hlak hlak pahin Nunhlimin Sangkhuma a pawt dawrh a, kan bana kuah ve vein kan inkarah a kal a, "I ti ang lo e...Sangkhuma ai chuan hmeichhia ka duh, chutiang khawp chuan ka duh lo aw" ka tih veleh Sangkhuman, "Remkalami aiin Fawnvela ka duh, ve mai mai cheu chuan" a lo ti vin ve hlur a, Fawnvela a kuah rualin, "Isss" an ti vak a, nui lui vak vak chungin kan hmaah an kal a, ka ţhiante ni lo se chu ţhing ka ti viau ang.

Ka awm bo san rih hlawm dawn avangin zan dang aiin an leng rei a, min haw san hnuah ka nu nen ka ken tur ho kan endik leh a, "Aizawlah chuan ho huat huat suh ang che. Bus ah muthlu lo la, mipa aiin i zirlaiah rilru pe nasa zawk ang che" tiin min chah thlap a, "Ka lerh hmel e...mipa a rilru pe reng turin min ngai bik lo la" ka tih chuan, "I lerh vang alawm ka ngaihtuah em em che ni. Thiam lo a i lo haw chuan i mualpho nasa ang aw" tiin min vau a, "Kan khuaa mualpho chu a zahthlak loh ve chiang e...ka rawn haw meuh chuan maw..maimitchhing chung pawn mi ka chei thiam ang" pawr zeta ka tih chuan a bu nghat a, a lungawi hmel khawp mai. 

"Kalkawnga i hak tur vel dah chhuak rawh" a tih hnuah min chhuahsan a, ka mut a la chhuak chuang lo bawk a tiin phone ka en hmasa a, Maski-a message a tam mai. 'In inkawtah ka awm' tih hlir a la ni zui a, a lo kal dawn tho chuan a huna lo kal ve mai tur a nia.

'Lo awm rawh, ka nu a mutthilh veleh ka lo chhuak ang' ka ti a, darthlalang hmaah dingin ka sam ka tuai thuak thuak a, ka nu nghah pahin kalkawnga ka hak tur ka la chhuak a, eitur pawh ka lei thlap tawh, sumo ka ruih loh nan ka nu hriat lohin acid ka lei tel a, zinkawng nen a inrem deuh chana leh nihawichi te, thei den te pawh ka theihnghilh loh nan ka dah chhuak thlap tawh. Aizawl ka thlen veleh ba ka ţhing nghal dawn a, zir vat vat ka duh chuan hahchawl hman ka ni dawn lo. 

Ka pum a nuam lo angreng a, ka ril a ţam mang si lo va, ka pum a ri leh ţhin a, kawphits tur angin ka awm a ni ber, ka tengtere tui hawp a ni ngei ngei ang. Nuam lo viau mah ila ka nu te thawm neih loh hnuah thawmdim deuhin ka chhuak ţham ţham a, kal dan pawh a mawi thei lo, bangah ka beh thut duh hmel lutuk ringawt. 

Pawna ka chhuah chuan zawite a, "Helamah" tih pahin a ban a lo vai a, a thim lai deuh a a awm chu pan hnai vatin, "I lo va kal tlai ve" ka ti nghal a, "Ka rilru a pm lo aw" a tih chuan, "Eng nge i duh a?" ka ti leh a, "Naktukah i nute awm laiin ka enliam ve ngam lo maithei che a" zawite tho hian a lo ti a, "I ho ve chiang e...in en liam tawpin tu pawi mah a sawi theih hleinem" uar zeta ka tih chuan, "Ţawng zawi rawh" a lo ti vat a, "I pi a dam tawh mi?" ka tih leh chuan, "Damlo, mahse ka hmu duh che a" a tih hnuah ban charhin, "I ngaihawm dawn em a" a tih zawm a, a hmel ka hmu chiang thei bawk si lo, a nguai viau ang ka ring. "Haw tawh rawh" ka lo tih chuan, "Inhmu thei lo mah ila biak theihin awm ţhin rawh aw, i chauh a, inbiak i peih loh chuan sawi tawp zel la, mahse peih lo rei suh. I awmna hmun apiangah hlim deuhin awm zel la, mahse cham hlen duh khawpin nuam ti suh. I lo haw leh hun tur ka lo thlir reng dawn a nia, lo let leh vat rawh aw" a ti sup sup a, "Thiam ngei ngei turin zir bawk la" a tih leh chuan, "Ruang thlahin min thlah lo la a dik a ni mai. Ka zir rei lo ang, i rin aia hmain ka lo haw leh dawn" ka ti a, ka khawngaih reuh angreng, kan la inngaizawng chuang lo bawk a, ni a liam ang a, a khawharna hi a reh vat mai ang. 

"Ruang phum tawh te chu an lo let hun kan nghak tlat ngai hleinem. Kal la, lo haw leh vat rawh" a ti nawn leh a, ka lo haw vat ang ka ti tawh bawk si, a lungngai angreng bawk si a, sawi tur ka hre lo chuan, "Aieng kha fridge ah ka dah a, i inhnawih duh chuan ka nu i lo dil mai dawn nia. Ka pi Binladari dawrah pawh ka la khai ţeuh kha aw" ka ti a, a nuih a za viau mai.

"A hralh zawh hunah pawisa ka la anga i nu ka lo pe ang. Lut tawh rawh, in enliam ringawt a pawi dawn loh chuan naktuk zingah kan inhmu dawn nia" a ti a, "I sam kan pawt ngil hman dawn ta lo a nih hi" ka tih chuan, "I lo haw veleh i pawt ngil dawn nia" nui hawk chung hian a ti a, ka kut rawn vuanin a hum vang vang a, "A khawharthlak dawn hle mai" a ti leh sup a, "Lut rawh" ti tho siin ka kut a thlah chuang bawk si lo, "I ţawngkam leh i chezia a inmil lo a nia aw, lut tura min duh chuan min thlah ta che" ka tih veleh min thlah a, "Kal rawh le" awki dam deuha tih pahin zawi tein kan in lamah min nam a, kan in mangţha hnuah keimah zawk ka kal hmasa a, thawmdim tawkin kawngka ka hawng ve tak nain ka nu hmel ka hmu chu ka au nasa kher mai. 

Ka awm dawm chung meuh a, "Awiii....ka nu chu min ţhawng nasa ţhaks, ka phu zawk tih i hria em? Ka hmel a mak viau lo maw" tiin ka nuih tlawn hak hak a, "Zan rei lam boruak a nuam viau em ni?" a ti ngei a, "Aw...oxygen hlang a ni mai" tih fiamthu paha ka nui chu rum zeta min melhin, "Nui chai suh" a ti ram hmarh a, ka nui zawi tial tial a, chutah, hlau chung chunga en chung hian, "Ka ding mai mai, thil pawi engmah ka ti lo" ka ti zawi sap a, "Va mu rawh, mut hnuah vawikhatmah chhuak tawh suh ang che. I chhuah leh vaih chuan tuizem chungah mutna ka siam sak che ang a, mu chungin i oxygen huau huau dawn nia" ngeiawm zeta a tih hnuah pindanah a lut a, tu emaw ka hmu tih a hrechiang viau ang.

Ka pum a rik leh rualin inthiarna lamah ka tlan phei a, u Rinchut but buta tengtere thawh dan hi a dik dawn lo riau. Rei fe ka ţhut hnuah ka chhuak a, kawphits damdawi ka zawng nghal a, ka mut hlana an lo insiamrem loh phei chuan ka buai phah viau ang.  

Zing dar5 velah ka nu'n min rawn kaitho a, "Tho rawh, i ţhiante an lo kal tawh" a tih chuan, "Aizawl" tih pahin ka tho a, pindan aţanga ka chhuah ruala ka ţhiante lo ţhu ţhap ka hmuh chuan, "Awhaw wow, nangmahniah hna ka lo va thawk nasa ve, in thawh hma phah vek mai a ni maw?" intithei zet hian ka ti a, "Sa kan ei leh duh vang zawk a nih hi, chaw kan lo ei dawn" Sangkhuman a lo ti hmuk a, "Fawnvela leh Sangkhuma te khan 'kan lu a na' an ti, nachhawkna zawn sak rawh" ka nu'n a rawn ti ve bawk a, "Nizana in zu in a nih kha. Tuar mai mai rawh u" Puipuiin a lo ti hlak a, nachhawkna ka zawn sak laiin u Lalhuma leh pu Taipuia te pawh an rawn lang hlawl a, "Vawiinah ration a awm dawn a, laksak in ngai em?" beisei nei zeta pu Taipuian a tih chuan u Lalhuman, "Chaw ei manah kan cut mai ang a" a lo ti a, "In u Nemtei in pui char char zel a, in duh hun hunah lo ei rawh u, mi hrang pawh kan ni lo va, chaw ei man a ngai hleinem" ka pa'n a lo ti dap dap a, inthiarna lam bawk ka pan leh hnuah thingpui ka lum a, ka siam zawh hnuah pum nuam lo chung chungin ka sem a, ka nu ka hrilh ngam bawk si lo, a ruka tawrh a ngai a nih hi. U Lalhuma ber lah chu thingpui a in rualin a uak ţhawt a, "In lo mai teh ang" tih pahin tukverhah a theh chhuak a, zingkarah pawh zu lo chu an in hleithei tawh lo a nih ber hi. 

Midang an chet suau suau laiin ka insiam a, "Chaw a ei theih tawh a nia aw" Puipuiin a rawn tih chuan sana ka en a, dar7:30 chauh a la ni. Maski lahin message min lo thawn leh der tawh a, 'Pi Binladari te in pengah ka awm tawh, sumo a la ding lo' tih zawng a ni a, a bei hma khawp mai.

Chaw ei laiin Fawnvelan, "Aizawlah i awm ang a, i induh ringawt ange aw. Aizawl pawh kawngchhe lai chu kan khua aiin a khu fe zawk" a ti tûn tûn a, "Video a awm a, vairamah pawh awm la nitin a inhmuh theih, tunlaiah lung a leng thei tawh lo" pu Taipuia pawhin lo ti vein tlai lama an bar len theih nen, zingah chuan chaw an ei hleithei der lo, hei vang hi a nia chawhmeh tui an duh em em ni. 

Chaw ei kham veleh pindan aţangin ka ken tur ho ka dah chhuak a, "Ehe...Remkalam, i thawmhnaw zawng zawng i keng vek em ni a? Bag lian pui pui a puar ul a, suitcase a ni bawk a, engtia rei nge awm i tum a?" Sangkhuman a lo ti hlut a, "Ka thiam hma chu ka awm dawn" tih bakin ka chhang peih lo, thil ho deuhah a buai vak zel a, a hrisel ţhat poh leh a au ring. 

Bag leh suitcase vel midangin min kensak a, kut ruaka chhuak ka ni bawk a ka phone ri chu ka en thuai a, Kalvari a lo ni. "My friend" ring fein ka ti nghal a, "I kal tawh em? Lo haw lehnghal mai rawh" a rawn tih chuan, "In aţangin ka chhuak chiah alawm, sumo ah pawh ka chuan hma a ka haw leh daih ten. Ka ngai dawn tho che a, mahse tun ţum chu ka phur teh mai a nia" ka ti lang lang a, "Mahse ka khua a phits a, a hrehawm emai" ka tih leh chuan, "Damdawi i ei em?" a rawn ti a, "Vawihnih ka ei tawh, nizanah pawh ka mut ţhat loh phah. Kalkawnga ka buai ka hlau e" ka tih chuan, "Damdawi i ei chuan a zia mai ang" a ti a, min ngaih tur zia sawia min biak reng hnuah kan in mangţha a, ka lung a leng nghal. 

Ka pi Binladari te in pengah sumo a lo awm tawh a, amah pawh a awm. Ka thlen ve rualin ka pi Binladari chuan min kheuh zeuh a, midang hmuh loh turin ka kutphahah eng emaw min rawn hmeh bel chawt chawt a, 'a thil zawrh lai midang ei a phal loh chin min pai ve dawn a nih hi' ti a ka phur ve tawh tehreng nen ka en chian chuan khawmhma pack a lo ni a, cheng10 man bak a ni lo. Lungawi vak lo chunga a lam ka hawi chuan, "Dahţha rawh" a lo la ti zui a, ka awm bo vang vang dawn a, khawmhma chauh inpek phal te chu a lawmawm loh emai. 

"Min lo be ngei ngei rawh, nitin kan inbe dawn nia" an tih sap sap laiin ka ţhiante zingah ngawi rengin Maski a ding ve a, ka en tih hria niawm taka a min rawn en ve rualin a nui suk a, "Lut vat ta che Remmawi" ka nu'n vin zeta a tih chuan a lu a lo bu zauh a, "Khalh chak suh aw, i cusitomer te i phur rui ange" driver hnenah ka pi Binladarin a lo ti ve bawk a, tuman customer an ti ngai lo. Ka pa thung chuan, "Ka thu hrilh che kha hrereng la" a ti a, thil dang a sawi lo. 

Sumo chhunga ka lut chiah chu ka lung a leng deuh thut a, a wholesale in a rawn kal ka ti mai, ka ţhiante leh ka chhungte, Maski ten min thlir ţhap bawk si, "Nu, naktukah ka kal leh si mai ang" darthlalang tih hniam paha ka tih chuan, "Thil ni lo lo sawi suh, darthlalang nen khan ka ben chilh ang che ange aw" a ti khar khar a, "I luak tak hlauhin polythene i keng em? Zin dawn chuan inrin thlap tur a nia aw" ka pi Binladarin a tih laiin ka ţhianten, "Lo haw leh vat rawh aw" an lo ti ve thung a, ka kut ka dah chhuah rualin an lo vuan sap sap a, u Lalhuma leh pu Taipuia te pawhin min chibai ang lawp lawp a, sumo a tawlh riai riai rualin ngawi renga lo ding ve Maski meuh pawhin a ban a vai ve a, kan tlan chhuah ruala ka ţhianten, "Tluang deuhin aw" an tih laiin ka nu'n, "Nghathu kha lehkhain ka fun a enchiang rawh u aw" ring zetin a ti ve thung a, ka hmuh theih chhung chu ka dak chhuak a, an lang te tial tial a, ka hmu thei lo chiah chu ka ţah a chhuak nghal. 

Kalkawngah ka buai dawn lo emaw ka tih tawh hnuah ka pum a rawn na leh a, ka dawm vat a, reh mai tura ka ngaih laiin a na zual zel a, a rei deuh hnuah phei chuan ka lu te a ti haiin ka hria. U Rinchut but buta tengtere tui ka hawp vang vek, damdawi kha ka lo ei ţeuh lo a ni. Hrehawm ka tih lutuk hnuah driver hnenah, "Kan chawl ţep tawh em?" ka ti ta tawp a, "Aw, chawl ţep, i ril a ţam deuh tawh em ni?" a ti hlauh a, pum lamin ro a rel meuh chuan lung pawh a leng thei tawh lo. 

Theihpatawpin ka ip a, sumo chhunga hahdam deuha thil ei tum kha engmah ka ei thei lo. U Rinchuta hlir mitthlaah a awm a, tengtere tui a tih ri kha bengah a cham reng bawk a, ka haw hlur mai a ni. Sumo a din ruala chhuk nghalin midang hmuh loh turin ka kal hrang daih a, zung tur ang deuhin ka awm a, ka luhna piahah midang an lut ve bawk si, kua a phits lai chuan mahni in ngei hi a lo ngaihawm ber mai. 

Aizawl kan thlen chuan ka thawveng huai a, u Bawihan min lo hmuakin sumo aţanga ka bungrua kan lak thlak hnuah taxi kan chang a, "I chau em? I va pawr pheng phung ve" a lo ti ve luam a, grape juice ka in avang maia biakin thlenga wheelchair a min nawr kha ka la theihnghilh thei lo. 

Ka buai leh hlauin, "Damdawi dawrah kal hmasa ang" ka ti tlat a, "Nakinah" a ti tak nain a chhan ka sawi chuan min hruai vat a, Aizawl chu mi an tam bawk si, damdawi dawr pawh a tlar dul a, neih loh pawh an nei ve vak lo vang. Ka damdawi duh ang kan lei hnuah ka ei nghal a, "Zin dawnah te chuan tengtere tui hawp mah ta che. Lo kal rawh" a ti a, min kalsan daih a, awlsam deuhin kawng a kân a, kân ve ka tum laiin motor a lo tlan leh hman bawk si, ring deuha, "U Bawih" ka tih chuan a rawn hawi vut a, "Kawng ka kân ngam hleinem" ka tih leh chuan a nghak a, tum burin a rawn let leh a, "Aizawla i awm chuan kawng kân i thiam ngei ngei a ngai. Khawlaiah au vak vak suh, kan khua ang a nih loh hi, miin an nuih dawn che a sin" a ti hluk hluk a, ka bana kai chungin kawng min kân pui a, Aizawlah ka zin khât a, kan khaw hnaih ve deuh Kolasib pawh ka kal zeuh zeuh ringawt a, thlen rual rualin ka insiamrem nghal thei bik lo. Motor a tam bawk si, ring deuha ka koh mai loh chuan tihngaihna a awm lo. 

"Ba ţhin ka ngai a nia" taxi kan chân leh laia ka tih chuan, "Khawiah? Aizawl pawh kal ngai hlei lo khawia ba nge i ţhin dawn?" a lo ti he haw a, "Lady Dianas Inn ah aieng ka zawrh tir a, an hralh nual ang, pawisa engmah min la thawn lo a, ka ţhing dawn" ka tih chuan, "Haw phawt ang" a ti daih a, ka pum a nawm loh vangin pawi ka ti vak lo. Taxi a phar a, kan ţhut luh rualin, "Ka inbual ang a, tlaiah min hruai leh mai rawh" ka ti leh a, "Vawiin tut tutah a ngai em ni? I rawn thleng hma bawk si lo" a tih chuan, "Ngai e...vawiinah pawisa ka lam anga naktukah ka thil zirna tur ka zawng kual dawn" ka ti bur a, kan khuaa haw ka chak nghal a, Aizawla awm rei ka tum lo, zirna tur ka zawng vat vat dawn. "Kan kal dawn nia, i inhuam phawt a hnu" u Bawiha pawhin a ti ve ta nge nge a, kan kalna hmun tur neitu hi u Mama bialnu hlui a ni tih a hre ve lehpek lo aniang chu, u Mama bula a awmna a la rei bik lo miau a ni. 

In kan thleng chiah chu ka ţhu hnawk a, ka uten ka bungrua leh chawhmeh vel an dah fel nghal sawk sawk a, an bulah hian ka hahdam daih zawk dawn a nih hi. U Bawihan a hrilh aniang u Mama pawhin, "Remmawi, vawiin tut tut a ba ţhin a ngai em ni?" a rawn ti ve a, ţhutthlenga ţhu der der chung hian ka lo en a, "Vawiin a ka ţhin loh te chuan a rei zel alawm, zir vat a haw leh vat ka duh. Tih tur tho tho te chu tih vat a ţha" ka ti tlat a, "Nih leh va inbual rawh, tui ka lum tawh" a ti ta nge nge a, u Rinchuta tengtere tui vangin ka chau zual a, phone pawh ka la en peih lo. 

Ka inbual dawn laia ka uten, "A tih tawh chu a ti tlat zel sia, pawisaah khua a hmu lo" min tih chu ka hre reng a, pawisa te chu thawhchhuah a har a, ka hahpui zia keimah bawkin ka hrechiang a, hei vang hian ba chu ba a ni tawp mai, pawisa hmuhna mumal tak ka neih hma chu inngaihdamna a awm thei lo, ka mamawh ve tho. 

Ka inbual zawh veleh thil ka ei a, ka pum pawh a zia deuh tawh. Ka insiam peih thlap hnuah phone ka en a, ka ţhiante mai bakah Maski leh u Zira te message thlengin a awm a, missed call a awm ţeuh bawk. Sangkhuma phei chuan, 'Aizawl i thleng a i induh nghal' a rawn ti hial a, u Rinchuta takngial pawhin min biak a tum a lo ni a, tengtere tui vang a ni ngei ngei ang, hrehawm ka tawrh phah nasa bawk a ka ankhum hrep ang mawle. An vaia, 'Zanah ka lo bia ang che..ba ka ţhing dawn' tih ka thawn hnuah pindan aţangin ka chhuak a, "Kal dawn chuan kal vat ang, an lo inkhar hman ang" u Bawihan a lo ti nghal a, kan inzui chhuak a, tlai lam boruak pawh Aizawl chu kan khua nen a rim a in ang lo reng reng. 

Step a kan chhoh laia, "Lalrindik, hrawkhrawl-liannu" ti tuar ri chuan min ti ding chawt a, "Awhaw wow" phur zeta ka tih rualin, "Duh leh ka ei ve ang, i siam a nih vang maiin i ta a ni bik lo. Ei tur a i siam na na na ka ei lohin" hmeichhia tho hian vin zetin a lo ti ve a, "Ka la siam zo hleinem, hah deuha ka siam laiin ţhu mai mai chungin lo ei bik suh" pakhatin a tih laiin, "Ka ei dawn lai tak chuan ka ding, ţhu chungin ka ei lo" pakhatin a lo ti thung a, "Kal teh ang, phir te an nih kha, i ţhian tur te" u Bawihan ngui bura a tih chuan ka phur ngang mai. A nuam ang chu aw. 

Kawngpui kan thlen chhoh veleh, "Kawngkhar an khar vek a, khua a lum tehreng nen an peih e...keichu ni ila ka inhawng dar vek ang" ka ti lang lang a, mihring hmuh tur an awm mang lo reng reng, in a ni mai. 

Scooter a phurh ka hrehawm tih hriain taxi thoin min kalpui a, bungrua kan nei lo bawk a bus ah kan chuang leh a, a tawt turu bawk si, invuan lo a ka din pawhin ka tlu thei lo. Kan chhuk hnuah u Bawihan, "Haw lamah phei chuan kha ai khan a tawt dawn a nia" a la ti zui a, "A tawt dan a hrehawm loh emai, duh ngat ila chu ka muthlh thei ang chu" ka lo ti vel a, ka nu ang deuh a nia, min melh rum reng mai. 

LPS market ah min luhpui a, u Maman a hrilh angin step ah bawk min chhoh pui leh a, "Aizawl hi ka ning, pawn chu sawi loh, building chhungah pawh step a awm a nia, taksa chauh nen a inrem lo" ka tih chuan, "Phun phun suh, naktuk nghak rawh kan ti kan tia lawm" a ti hluk a, ngawi mah ila ka lung a awi chuang lo.

Lady Dianas Inn kan thleng chiah chu, "Awhaw wow...what a beautiful thing" ka ti hluai a, thawmhnaw mawi deuh deuh an zuar a, sarang a aieng pack chu hralh theih ngaihna a awm lo a nih hi. "Lo leng rawh u" lo ti tu chu ka hre chiang lutuk, chawheh deuh kha. Chhangthawp tlang lianpui pawh ei se chaw a ei tel loh chuan a puar thei lo. 

"Pawisa ka lo lam dawn" ka tih chuan a nui keh hui a, "Aieng kha kan hralh vak lo a" a tih chuan, "Khawiah nge in dah a?" ka ti lauh a, u Bawiha chu a zak aniang a chhuak daih. "Pawnah sawn" a ti a, min kawhhmuhna lam chu ka en vat a, samţawnna nalh deuh deuh zingah an lo bawk ve ţhap a, ka khawngaih reuh lutuk. Ka chhiar nghal mawlh mawlh a, 20 in a kim lo. Counter ah ka let leh vat a, "20 chu in hralh ve saw" ka tih chuan, "A ni maw?" a lo ti he haw a, "Aw..ka chhiar thlap alawm, thawmhnaw angin a man a tam lo nain min pe tho rawh, mamawhna a sang tlat" ţha deuha ka tih chuan, "Ka lo gpay ang che" a la ti ţalh a, "Khatiang kha ka nei ve lo, pawisa in min pe mai rawh" ka ti ve thung a, ka hre laklawh tawh a, a la chhe chuang lo bawk a, an hralh loh ho pawh hawn ka tum lo. 

Pawisa min pek hnuah tihdan ka ngaihtuah a, sumdawn chuan zah lo der te a ngai ve ţhin bawk a tiin amah tih lawm nan a, "In dawrah hian thawmhnaw a van chikim em em, hnam tin inhmeh chi in kawl a nih hi. In thawmhnaw zawrh hian bialpa a chhawm ngei ngei ang" nui lui hak hak chunga ka tih chuan, "Ţhu rawh ţhu rawh, i dam em?" a ti ta chul a, "Aw...ka rei hman lo a, nidangah ka lo kal leh ang. Aieng chu ka lo la dah ang aw" ka tih leh chuan, "Dah rawh, langsar deuhah kan dah tawh dawn a nia" a ti a, "A ţhat chu, pawisa ka neih veleh ka lo dawr ang che. A nih loh leh aieng manah kan in cut ang a" ka ti a, "Awii" tih pahin uangthuang deuhin min rawn nam a, kan nui dun hak hak nain kan ti lui ve vein ka hria. 

Ka chhuah dawnah an thil zawrh chu ka en leh hram a, "Ka lo kal leh dawn chiang ţhaks" ka tih hnuah pawisa hum ran chungin lungawi deuhin ka chhuak a, kha kha a ni mai alawm. "Phul hlut zel suh, in la inhriatchian loh kha" u Bawihan a tih chuan, "Chaw pawh kan ei ho tawh" ka ti ve tlat a, tikhan an pawisawi miah loin pawisa ka la a, aieng ka la dah thei bawk a, ţha deuh a sin. Sumdawn chuan nuih der thiam te a pawimawh alawm. 

U Bawiha sawi ang chiahin bus chu a tawt leh pek khawp mai, ka hma a ding phei chu a te angreng si a, a thaw ve ţawk ţawk a, chunglamah invawnna a awm tho a, uai nelh se a tan chuan a nuam zawk ang. Ţhutna a awl veleh ka ţhu nghal tharh a, a chhuk tur apiang ten an ipte puar tawk tawkin min tauh leh chawrh zel a, a nuam chuang lo. A thawl deuh hnu a a laia ding pakhat phei chu hmanhmawh zual ten an su vir leh nawk zel a, bus a tawt tak tak chuan a lo nuam mawh a nih hi. 

Skulpuikawn aţangin kan inluahna veng lamah kein kan chhuk thla a, "Ka chau, ka ning" ka ti ţan a, "Phun suh i duh danin a nih hi kan awm" u Bawihan a lo ti vin leh hlur a, nakinah ka lo bia ang che ti mah ila u Zirbawngan min lo call tho. "In ka la thleng lo" ka ti nghal a, "Thlen a hun tawh hi, in chhia em ni?" a rawn ti heu mai. "Ka chhuak leh alawm, ka hrilh lawk che kha, aieng man la turin ka chhuak leh" ka tih chuan, "Pawisa duh lamah hi chuan kan inang reng" a rawn ti a, "Kan la hausa dawn tihna a nih hi" a tih leh chuan, "Ka chau lutuk a ka thluakin hna a thawk rih lo, nakinah ka lo be mai ang che" ka ti a, "Remsial, i ţha ve vung reuh sia, fimkhur rawh aw" a rawn ti hram a, ka u ka zui hnak hnak a, in kan thlen leh meuh chuan mitthi ang vel ka ni tawh, ka che thei tawh lo. 

"Chaw ei ila, ka nu'n 'inchungah lo han lenpui rawh u, a zirtur te chu hrilhfiah se la a ti" u Maman a la ti zui a, kei ai pawhin an au ring daih zawk a, ka hmu peih rih lo a sin mawle. "Pawisa ber ka la tawh tho a, naktuk zingah a ni mai" ka tih chuan, "Naktukah chuan Nutei i zui ve ang chu" an lo ti a, ţhutthlenga ka mu chu min tung tho lawp a, ka hah lutuk a ka chaw ei pawh a tui lo, u Rinchut but buta ka ngei ber mai. 

Chaw ei khamah pawh ka uten min awl a, u Mama nen inchungte inah kan leng ve thung a, hmeichhe pahnih an ti sia, pathum an lo awm. Ţhutthleng hran ţheuhah an ţhu a, a te berin a kut a lo kuangkuah ât a, an mak reuh tak tak a ni. 

"Lianpui, buaina in nei deuh em ni?" u Mama pawn a ti ve ta nge nge a, kawngka kan kik khan lut turin min sawm ve ngei a, tuman min be leh mang si lo va, mak deuh a ni. 

"Hemite pahnih bawk hi mawle, inphut reng reng hian an awm a, ka chhuahsan chhungin buaina an nei a nih hi" a tê ber, Lianpuii chuan a lo ti a, a upa ber a nih hmel thung. 

"In ţhian tur ka lo len pui dawn a, a bikin Nutei nen a zir dun tur an nia, tihdan tur te i lo hrilh ve loh chuan engmah kan hre ve si lo va" u Maman a tih chuan rin loh deuhin thlang lama ţhu, pa deuh thâng zawk chu a lo hawi chhuak a, "Keimah maw?" tih pahin a awm a kawk a, u Maman, "Ni e..Remmawii a nih hi, ka nau a nia, i zir ang kha a zir ve duh a. Remmawi, hei hi Rindiki a nia, Nute kan ti mah zawk a" a tih chuan min rawn en vang vangin, "I zir ve dawn nia" a ti a, mipa bawp khawkherh dan ni awm takin a ke dinglam chu a veilam malchungah a dah a, keipawhin ka lo en ve reng a, a aw leh a landan chu a inhmeh hlawl lo. 

A sam a pawr phung a, a bakilh ber lah chu a sam hmawrah a awm daih a, kamis lian hnuk a ke a, a kekawr hak pawh a lian thawkhat tih a hriat theih, chapal lian pui, tuboh ang deuh a bun bawk a, "Hei hi Nunu-i a nih hi. Puanţhui a zir thung a" u Maman a tih leh chuan, "Designing alawm" tih pahin pakhat zawk chuan kan lam a rawn hawi a, Nutei nen an hmel a inang deuh chiah chiah a, nui sanga, "I van hmelţha em em" a tih chuan lai deuhin, "Awii..ka hmelchhia" ka lo ti a, an nui dar dar a, "Hmeichhe ho tak hi chu a" Nutein a lo tih chuan phawk hrâin ka en a, an kum zat an sawi a, kei aiin kum hnihin an naupang a, "Lo ţhu rawh u Remmawi, nangpawh u Mama, ţhu ve rawh" Nunuin a tih laiin Nutein, "A inla fel mai mai a nih kha, min ham pilh hrup hi, dei duai mai" a lo ti hlak hlak a, "Ţhu rawh u" Lianpuii pawhin a lo ti ve a, an sawi hmangah Kolasib aţanga Aizawla in luah ve tho an nih hmel a, keimah ang chiah ţhian ka nei leh dawn a nih hi. U Zira pawh an hre ngei ngei ang, ka la zawt dawn khawp.

CONT...