KEIMAH, THINGTLANG NULA (FINAL SEASON) 11

KEIMAH, THINGTLANG NULA (FINAL SEASON) 11

"Lu meh i thiam lo emai i bawng kam bawl pawh kha dawt tho aniang, a bawl leh tak tak chuang lo ang" lungawi loh hmel zeta a tih lai chuan ka lo en reng a, la inthlahrung viau tho mah ila, "Ka bawng kam bawl zawrh lai berkher hi chuan a ti beidawng lo tawp ang che. I chhum rei poh leh a hmin a ni mai" ka ti a, nuih vak tuma zau deuha ka ang tawh chu rum zeta min melh avangin, "Ha" ka ti hman uk tawh na a nui leh lo vin ka ham ta zawk a, ka hralh loh chuan Sangbollywood-i thin a ur dawn emai. 

"Engzat man nge?" a tih hmuk rualin a man zat ka hrilh a, pawisa min pe mai dawn emaw tih laiin, "Tui lo ta se engtia tih tur nge?" a ti leh a, min puih theih tak mialin tiin Nutei ka melh a, "Hmh" tih pahin a hawi sawn hmak bawk si, "Kan tui tih zawng a in ang lo a, tui i tih loh chuan ka tan tih vak ngaihna a awm lo. Keichu engtin pawn siam ila tui ka ti vek, a hel hian ka ei thei lo a a ni mai" ka tih chuan, "Lady Dianas Inn ah an zuar ve em?" a lo ti leh a, ka ngei tawh khawp mai. "Lady Dianas Inn ah bawng kam bawl an zawrh i ring em ni?" ka ti vak a, ngeiawm deuha nui chung hian, "I thil zawrh fak nan i hman ziah kha, aieng i fak apiangin Lady Dianas Inn ah an zuar i ti bawk a, i zawrh chhuah tawh chu an zuar ve zel turah ka ngai" a ti vel a, chimawm ve tak a ni. 

"I ţawngthei sawt emai kan khua i ngeih a nih kha, hei chu lei ve rawh aw khai khat chiah a awm tawh" tih leh dawhkan a dah ka rual a, "Ka ei ngai lo a, siam ngaihna pawh ka hre lo" a ti hman zet na a, "Ka dawr mai ang che" a ti leh ta zawk a, "Hnam tin te duh rawn a nih hi, i inchhir lo vang" ka ti a, pawisa lak pah a, "Ka bawng kam bawl zawrh hi a tui dan a universal, kan rama hnam dang rawn zin ho pawh hian an ram lamah an khai haw hnuk zel" ka tih leh chuan a nuih a za viau mai. "Pasal panga pawh nei la i sumdawn an remtih phawt chuan hneh deuhin i chawm thei dawn a nih hi" a ti a, bawng kam bawl chu a khawih leh zeuh ţhin a, nu Mawisachekin lo siam sak ve tawh mai rawh se. 

"Sangbollywood-in archangkawm a nei dawn a, nakinah kan rawn zawrh leh ang che, kan rawn pu lut vu vu ang, chaw ei tui" ka ti a, Nutei ka kaichhuak chiah chu, "Enteh my friend, Sangbollywood-i hi chawhmeh ka zawrhpui char char a, tlemte tal hlep ve ka duh. Nakinah ka bia ang a, tlem tal min hlep tir ve dawn loh chuan ka zawrhpui tawh dawn lo" a dara kuai chungin ka ti sar sar a, "Ni reng e...principal phei chuan i zawrh apiang a lei zel a, duh tak tak ni la i hralh sak hnem dawn lutuk" a lo ti ve a, "Awii..my friend, keichu fuihpawrh chi ka ni miah lo a nia, ka ti tak tak zel" ka tih chuan, "I hlawkna tur ka duh vang a nih hi. Customer kan la nei miah lo lehnghal a, chawi belh a dawr kan luah vaih chuan a zahthlak viau ang aw" a ti kha kha a, keini ang tan chuan nalh duh apiang an hlu, intuai hlarh hlarh ho hi ngei thei pawh kan ni tawh lo. 

Karkhat a liam leh hnuah pawh min rawn pan an la awm chuang lo a, naupang sam vawi hnih ka tan tawh a, chalsam chiah a nih vangin a to thei bawk si lo, kei aiin Sangkhuman hna a ngah zawk a, a thar an dawr a nih loh pawhin a hlui chhia an rawn siamţhat tir a, dawr khar a chawhmeh zawrh ve daih te ka duh ut ut zel. Nutein, "Remkalam, customer kan neih veleh a ţha thei ang ber a lo dawn sawn tur aw, VIP treat a treat tur, hotel changkang mangkhenga thleng angah kan inngaih tir dawn nia" a rawn ti sar sar a, lehkhaphek a a thil ziah chu min hmuh tirin ka en ngial pawhin ka hrethiam lo, "I thai kawi nuai ringawt a, eng nge awmzia?" ka tih chuan, "Kan dawn sawn dan tur map a nih hi. Tereuhtea ka thai bial hi Sangkhuma a nia, a lian lam hi keimahni" a ti a, min han hrilhfiah viau mah se ka hrethiam chuang lo. "Customer dawn sawn dan tur map a ngai hleinem, dan siam la a tawk mai alawm" ka tih chuan, "Ka duh lo, mi entawn theih turin engmah kan ti lo ang, kan pahnih chiaha kan hriatthiam theih tur hi a ţha ber" a ti deuh bur bawk si a, hrethiam lo mah ila hrethiam awmin ka awm hmiah hmiah a, ka rilru a hre thei chuang lo. Ngaihdan ţha deuh ka nei ve bawk a, "My friend, tihdan ka hria" phur deuha ka tih chuan tum bar a min rawn enin, "Eng nge?" a ti bung nghat a, "Sangkhuma rawn dawr tute hi lo thlem ţhin ang. Dawr hawng ve uk si a tih tawp leh vat ka duh bik miah lo a nia, kan fak vak vak chuan min dawr awm emai" tih pahin a map siam chu ka thai chhia a, "Hetiang map tih vel ai chuan Sangkhuma customer te lo thlem a ţha zawk. Chuan, i sawi ang khan hotel changkang deuha thlengah kan inngaih tir bawk ang" ka ti zung zung a, min en vang vang hnuah, "Sangkhuma customer chu patling leh putar te an nia, hmeichhia an vang e" a ti ban charh a, a bana ka ben sawk hnuah, "Patling hian pawisa an ui lo zawk, mi pawh an dawn khat. Nu Ţhuami customer te pawh kan thlithlai tel ang" ka ti a, nu Ţhuami phei chu thingpui dawr nei tih takah customer a ngah a, tlangval an tam ber ţhin thung. Primary leh middle sikul zirtirtute an awm ve leh zeuh zel bawk. "Aw le...nu Ţhuami kan hrilh lawk ang a, amah vanga customer kan ngah viau leh a thlawnin a sam kan tih kir sak ang a" a tih chuan nui chungin kan in en reng a, "All go" ka tih veleh kan bu nghat nghat a, a ţha dawn lutuk tlat. Sam siam ka zirna Lanfeli pawhin sa chi hrang hrang, vawt deuh deuh chi zuar ţeuh chungin hna a thawk char char tho alawm le. 

Rin loh deuhin Sangkhuma customer hmasaber chu kan ţhenawmpa, pa Khawtea a ni. Nutein zaizirin pan hnai turin min hrilh a, Sangkhuma hnena, "Ka pheikhawk hi ţhui kual zai zai la maw, tlema thawm nei lo deuh turin a hnuai hi thlak bawk rawh aw. A chhawm sa hi chu a ring leh lutuk a nupuite hriat lohin a chhuah ruk theih loh" ti a a nuih hawk hawk lai chuan lo kheuh zeuhin, "Pa Khawte, i dul hi a cute e" tih pahin a dul kiar lungah chuan ka pen keuh a, a lawm hmel vur vur khawp mai. "Remkalami ţhin hi a, mipa diktak chu an dul a kiar tur a ni an tih ţhin kha, mipa dulkiar pasal a nei reng rengin lukham an chhawm tel tawh ngai hleinem, an pasalte dul an ring mai alawm" a ti a, a nui huah huah reng a, "Pa Khawte, hawh i hmai facial ang, ka tlawm ang che, nangchu lang naupang reng chi i nia, hmai i facial phei chuan i arbawm tah mai mai pawh an kal pel hleithei lo ang che" ka tih chuan min en vung vungin, "Engzatin nge i facial a?" a ti a, ka lawm hman tawh nen a man zat ka hrilh hma hmain, "A ho emai...sahbawn sen a hmai phih a ţha ber, sahbawn sen a awm chhung chu man chawi a hmai tuai tir ka mamawh lo" a ti vei duah a, a ţawng lung lung chu ring ti viau mah ila beidawng lo a, "Hmai tan a ţha alawm...tar harna a nia, lo kal rawh, i hmai chuar tawh te hi kan lo pawt mar vek ang" ka tih takah chuan, "Hmai chuar a reh thei tak tak em ni?" a ti ve ta a, "Reh thei e...i hmai a la chuar vak lo nain a chuar tur lai bik hi ka lo pawt mar ang" ka ti a, a man zat ka hrilh nghal bawk a, "Han ti chhin ila" a tih veleh kan awmna lamah ka kai phei a, Nutei lo dingdihlip auh auh chu ka nuih ru sak a, a zuang vak vak chak tih ka hrethiam mai. 

Pa Khawtea mu zan chu lukham kham nuam deuh zawk tur ka kham tir a, a chhip zawna ka ţhut hnuah Nutein, "Khawlum lai hian customer kan ngaihsak zual a, lum an ti ve ngai lo" tih pahin tui a lo phuh kual sang sang a, "Ka thawmhnaw kha a huh lutuk ang e aw" pa Khawtean a tih chuan, "A huh lo tur tawk chiaha tui a phuh a thiam alawm. I hmai hi ka facial zawh meuh chuan maw i vun a thawp sap ang a, mawi deuhin a nal tliang hlarh mai ang, uluk deuha mi hmai ka facial chuan an hmaiah tho leh thosi takngial pawh an fu thei ngai lo, an tawlh thla nghal zel" ka ti zung zung a, a mit chhing tura ka tih rualin nghet deuhin a chhing a, a hnar bik chu a lianin a thap zual bik a, nuai fe tham a ni. "I mit i chhin chiah khan rose par a inbual angah i inngai em?" tih pahin Nutein pangpar lem a rawn hnim tir de de a, "Hotel changkangah pawh hei aia ţha hian an lo dawng sawng bik miah lo ang che" a tih leh chuan, "Ka hnar rawn hawlh rawn hawlh suh, a za a nia ka hahchhiau mai tur a sin" pa Khawtean a tih tak khur khurah chuan pangpar chu la sawn vatin beidawn hmel deuhin a ding a, kan dawr angah chuan han inenkawl ţhat vak a har ve bawk a ni. 

"Nih leh pa Khawte, i hmai kan facial zawhah a thlawnin i lu kan lo suk sak ang che, nuam i ti viau ang" Nutein a tih leh chuan, "Ka duh lo, kun tho a ngai ang a, ka bengah tui a lut ang" a ti deuh tlat a, ani hi chu a hranpa a tih lawm tum chiam lo a customer tlem laia min pan tura thlem leh tawp chi a nih hmel. "I thiam tak tak maw Remkalam? Pawisa ka chawi dawn si a, uluk tak khan ti rawh aw" pa Khawtean a tih chuan, "Hmai ka facial sak reng reng chu an hmai a nal han zel. Ruah an do lai taka vaivuta an lo theh palh pawn an hmaiah vaivut a bet ve thei ngai lo" ka ti zung zung a, a hmaiah hi bal lang lo chi a ni hrim hrim a, ka sawi uar mah mah tih a hre dawn lo reng reng. 

Kan tih zawh veleh darthlalang hmaah ţhuin uluk tawkin a hmai a tuai hlarh hlarh a, a chang leh a biangah bengin darthlalang hnaih zetah a kun phei a, che lo va a in en leh vung vung hnuah, "Pawisa ka ui leh si" a ti mawle! "A theih loh pa Khawte, i hmaiah khan eng eng emaw ka bel ţeuh tawh, pawisa min pek phal loh chuan i hmai kha ka ziat tawk tawk dawn a nia, ka ziat khawk pawp pawp ang" ka lo ti nghal a, Sangkhuma ţhutna lamah Nutei tlanpheiin chemte nen a rawn phei leh a, ka bulah rawn ding nghal chatin, "Kan ziat hreh miah lo tak tak a nia aw pa Khawte, i hmaia kan thil bel kha a man a to lutuk" a ti ve bawk a, a ruka in en a rem chiah loh avangin kan inkheuh zeuh a, "A ho ve e...i hnawih neuh neuh a, i tuai puat puat a, i hru reh leh zel a, pawisa ka la chawi dawn zui" a tih chuan, "Hmai facial na reng rengin hmai a kumkhaw bel chi a chhawm tel ngai lo, hmai ţhatnain ka nuai a nih kha. Pawisa min pek loh chuan customer care ah ka hek dawn che" ka ti tan tan a, Nutein min nghawk zeuhin, "Customer care ah tak chuan i hek thei lo ang" a ti a, ka ngaihtuah vang vang hnuah, "Pawisa min pek loh chuan Yma ah ka hek dawn che" ka ti ta zawk a, ka hek duh tak tak ang mawle. 

"Kha, ka pe em em ang che. Fiamthu hi ngai thutak viau zel suh" tih pahin pawisa min pe a, cheng10 hlir a ni a, chhiar paha ka rem thlap hnuah, "Pawisa leh a kaihhnawih ah kher kher chuan fiam chi ka ni lo, ka thin a rim hma thei teh mai a nia" ka ti a, pawisa lam a nih tawh chuan fiam ka dawl lo tlat zel. Pa Khawtea kal zet tawh chu, "Pa Khawte" ka ti lauh a, a rawn hawi let veleh, "Kan lawm e...hmangaihna puak pawp aw" tih pahin ka nui sang a, "I chhe hei hui" tiin a inher hmak a, a kal kak zui ţuang ţuang a, a liam chiah chu Nutei nen kan inkuah chung chung mai alawm. 

"Principal hi facial tih sak ve la" Sangkhuma pheikhawk siam kan en dun reng laiin a rawn ti chhuak phawng a, "Aa...principal chu engmah ka tih sak thei rih lo ang, a lu ka meh sual vang khan a la hel tlat a" beidawng zeta ka tih chuan, "A hel reng ang chu...mi'n 'tlemte chauh paih rawh' an ti mawlh mawlh a i nawr kawlh ţalh a, tunge lungawi ang?" Sangkhuman a lo ti bawrh bawrh a, "Ka duh dan a ni bik hleinem, ka ti sual palh liau liau a nih kha, mipa lu meh man tih saw menu aţang sawn thaichhiat a ngai" ka khup beng thak thak chung hian ka ti a, inhralh a har nak laia paih ţhen a ngai leh zel chu bei a dawng ve rawih thei tak tak a, remchang hmasaberah Aizawl ka kal ang a, ka zir belh leh ang ka ti rilru a ni. 

"Zanah principal a lo leng dawn a, ka haw hmain vul tawkin ka inchei ang" ka chawn zut thuak thuak chunga ka tih leh chuan Nutein, "Hawh, sam colour na i dah rei tawh deuh deuh ho kha mix ila sam colour ang" a lo ti a, "Aaa...ka phal lo" ka tih veleh ka darah min rawn nam sawkin, "Ka phal lo ti reng reng suh, khatianga mi sam i colour sak chuan court ah an khing duh ang che" a tih hnuah phur tawkin, "Sam rawng inang chiah kan nei dawn alawm, forever friendship my friend" a ti leh a, min nuih sang bawk si, ka ngaihtuah vang vang hnuah, "Aw le my friend" ka ti ve ta nge nge a, ka ring chiah lo nain aman a ti vek a, ka samah min hnawih sak hmasa bawk a, "I sam hi a chhe khawng uai tawh a, tlemte chiah ka hnawih ang aw" a tih chuan, "A ngai bik lo, ka lei sa vek kan hmang a, min huphurh bik suh" ka lo ti vin hlar a, "Min puh leh si vaih" ti chungin a hnawih ta tâwk tâwk a, a thinrim lo nain a na khawp mai. A samah ka hnawih sak ve bawk a, ţhiandun a sam rawng inang chiah put chu a chakawm ve hrim hrim. Kan tih zawh hnuah Sangkhuman, "A la bang kha ka chhipah hian han tat ve teh u" a rawn ti a, chhun eitur min lei bawk si a, hnial buai lo vin Nutei sama ka tah bang chu ka lo tah sak ve a, a sam a dum ţha emai ani chu a langsar ve vak lo maithei a ni.

Kan nghah vang vang hnuah kan su fai a, a huh laiin a hriat em em lo na a kan han chhem ro chiah chu, "Ehe...my friend, kan sam rawng chu sawifiah a va har dawn ve" ka ti hluai a, a lar hle a tih bakin sawifiah vak ngaihna a awm lo. Ngawi rengin darthlalangah kan in en vang vang a, nui huk huk chunga Sangkhuman, "Zanah in eng thei dawn a nih kha" a tih laiin, "Ka nu'n min hau ngei ngei ang" ka lo ti ve thung a, "Eng em em nge i mix a?" Nutei hnena ka tih leh chuan, "Min puh bik suh ka tih vek tawh kha. A bang nawi zawng zawng kha ka mix vek, a rawng pawh ka en chuang lo, tlemte chauh ka hnawih ang ka tia i duh lo vel a, ka sam aiin i sam a lar zawk a nih kha" a lo ti hlak hlak a, principal in a sawisel ngei ngei ang. 

"Awii....ka sam rawng ang hi thawmhnawah pawh a la awm lo reng reng, puanthanah takngial pawh ka sam rawng ang hi ka la hmu lo. Khawvelah a la awm lo hrim hrim" tih niah niah pahin ka sam chu ka zut a, a chhe pherh phurh bawk si, ka tih danglam leh chuan a bung hmuk hmuk tawh emaw a nia nga, ka dum a nih loh chuan ka put reng rih a ngai a ni mai. "A tuiek rawng tih dawnin a ni bawk si lo, a hring chiah bawk si lo a, a sen a han pawl pha mang si lo, dumde rawng han tih tur a ni bawk si lo a, keipawn ka sawi thiam bik lo, rawng inhal ka chawhpawlh kual aniang" Nutei lah chuan a ti vel mai mai tawh a, rawng inhal pawh nise hetiang em em hi chu thil awmdan tur a ni lo, rawng hrang hrang hian hming a nei ve ţheuh tak nain kan sam rawng hi chuan hming a nei ve lo, sawi pawh ka sawi thiam lo. 

Kalvari in min lo la video call zui, "Sangkhum, ka my friend-i a thin a rim tawh lo aniang hei min rawn video call" ka ti lang lang a, ka la zui nghal a, "My friend" ka tih rualin Dawnfuha nen an rawn lang a, thawm dang a ri tel nak nak bawk. "Ehe...i sam chu eng nge awmzia? Sam lem i zuar em ni?" a rawn tih chuan ka nui lui hak hak a, ka ţah a chhuak viau thung. "Nutei nen kan colour a, kan su zo chiah a nih hi" ka ti a, mak a tih hmel khawp mai. "Nakinah phei chuan tun ai khan a lar lehzual dawn tihna mi?" a tih chuan nui lui chung bawk hian ka bu nghat nghat a, "A va rapthlak em em ve...dum hmak rawh, principal nen in nih hma chu nalh tum ve ta che" a ti bak hlar tawh a, "Nalh ka tum vanga sam colour ka nih hi" tim daiin ka lo ti thung a, a hmui hupin Dawnfuha a lo nui kur kur reng mai. 

"Khatin lo nui ve vak vak suh" tih pahin Kalvari in zawi tein a luah a nam a, "Ka rilru a hah ve deuh a ka rawn bia che a nih hi. Sangkhuma te an awm ve em?" a tih leh chuan, "Awm e...Nutei nen an awm a, Fawnvela a awm lo" ka tih rualin ka hnungah Sangkhuma leh Nutei an rawn ding a, Kalvari a nui nghal hak hak bawk. "In va han lar hlawm em em" a tih laiin, "Ngati nge i rilru a hah a? U Rinchuta chhungte lam bawk em ni?" ka lo ti thung. "Ni lo e...Dawnfuha hi mawle...nichinah ţhenawmnu a rawn leng a, a nutei hi anganwadi a thawk a nia, thil sawi a lo nei aniang min rawn hrilh a" a ti a, hlauthawng deuha, "Eng nge a sawi?" ka tih chuan, "Dawnfuha vanga anganwadi a kal duh loh phah an awm nual an ti a nih hmel. A harh em a, kan hau nasa lutuk hi a khawngaihthlak zawk. Mi faten wadi kal an hreh phah a tih lam zawnga sawi te a awm a, ka inthlahrung bawk si, Dawnfuha ka rilru natpui tho bawk si, huiha, ka ning" a ti hap a, Dawnfuha lah chu a nu thusawi ngaithla ve ang pawn a awm lo, a biang dawmin a la nui vur vur reng a, diklohna a nei emaw tih mai tur a ni. 

"Dawnfuha a kha a chiang amaw?" ka tih zet tawh hnuah a ngaihdik loh hlauin, "A chiangkuang amaw?" ka ti leh a, Kalvari a meng rum nasa, "Chiangkuang e...wadi a an zir pawh a thiam vek tawh, a rilru a chak mah nak laia, naupang dang velh a hrat em a tih a ni mai, thil dangah sawiselna tur a awm lo" a ti nghal zung zung a, "Dawnfuh, goat thleng in zir tawh kha, g.o.a.t kha sawi rawh le" a tih leh chuan Dawnfuhan, "G.o.a.t gatch" a lo ti lauh a, "A for p.p.l.e apple" a tih leh chuan ka thaw halh a, "A,b,c,d,u,s,e...eis,i,j,y,m,m,o,o,p" ti a a zai leh chiah phei chuan, "A rilru chak dan a va dik chiah lo ve" ka ti ta nge nge a, "Naupang a nia, a zir tir chiah a, a la sa dik nghal thei bik nang. A chian chu a chiang khawp mai, wadi kan kal dawn apiangin i ţhiante vel suh aw ka tia, aw a tih ve thlap pawhin lo sih ruk zeuh te, hmuh loh laia lo ham zeuh te, an sam a keh zeuh te a ching a, ka sawi duh ber zawk chu naupang a nia, puitling ţhankin uai tawhin an khing an khing hi ka khawngaih ţhin" a ti malh malh a, Dawnfuha lah a â phuang si a, nu tan chuan a khawngaihthlak duh viau ang. 

"I rai laiin iron i ei overdose vel a nih kha" tiin Sangkhuman a lo fiam a, "Khatin min fiam min fiam suh u, tunlai chu u Rinchuta Aizawlah a zin a, rawngbawlna lam tho a nia, keimah chiah ka ni bawk sia maw...hrem ve ka tum a ka hlawhchham a nih hi" a tih chuan, "Engati nge?" ka lo ti thuai a, "Hrem nan brick ka thiar tir pur pur a, a ti hleithei lo, a kekawr hak a mar lutuk nge a dul a kiar lutuk zawk ka hre lo, a ţang deuh a, 'eih' a tih rualin a vawih zel a, 'i mawng a rawl ang dah mai rawh' ka ti ringawt a nih hi. Brick han thiar se a taksa tan pawh a ţhat ka ring a, ţhenawmte hian in an sa a" a rawn ti duah a, kan lo nui dar dar mai. 

"U Rinchuta lo haw hunah hrem tir mai rawh" ka tih chuan, "U Rinchuta pawhin 'ka hrem ngun lutuk a keimah hian ka hne tawh, ka hremna hmun ka hmuh ringawt pawhin ka luak a chhuak' a ti. Ţhenawmte hian kel an vulh a, a bo an hlauh tehreng nen hmanniah a lo kai chhuak a, a bo daih bawk a, kan chawi alawm. A kum ngaihtuahin heti em em tur hi a ni lo" beidawn hmel zeta a tih laiin Sangkhuman, "Iron overdose vang a nih kha" a lo ti leh a, kan nuih dar dar laiin Kalvari a tum hmak thung a, "Kel chu amah chiahin a kai lo, mipa naupang pathum an tel ve a, Dawnfuha aiin an lian vek tawh, thil hrethiam rual vek tawh an ni chungin keimahni chiahin kan chawi. U Rinchuta hian midang a ngaidam nghal zel a" a tih chuan Sangkhuman, "In fapain mi kel a ti bo a, nangmahni zawk ngaihdam ngai in nih chu, ngaidam tu tur zawk in nih loh tawp chu" a lo ti leh hmanhmawh a, "My friend, Sangkhuma hi chu engahmah ngai suh, mahse a sawi dik chiah" ka ti a, buaina an tawh chuan Dawnfuha vang a ni zel tawh a, a hahthlak tak tak a ni. 

"Engpawh nise lo zin vat ula a ni mai. Principal nen chuan in ţha zel em?" a rawn ti ta daih a, "Min ring bur tawh lo tih lohah chuan ţha a ni mai. Min rawn be khat lutuk a sawi tur ka ngah tehreng nen. Ka lu min meh rawh a tia, tlemte chiah paih a duh vang khan ka fimkhur lutuk na lamah a ni lo lai lai ka paih a, a beidawgin min nawr kawlh tir ringawt a nih kha" ka tih chuan a nui vak a, kan inrin loh lai taka nui a ni bawk a kan phu zuk thei alawm le. "Inzirna zel a ni mai, i meh sak leh hunah chuan i ti sual tawh lo ang" a ti tak na a, "Midang hlir ka pan tawh dawn a ti. Engmah a zep ve tawh si lo a, ka pa hriat ve theih tura thu mak deuh deuh sawi te a ching a, nangmah vangin ka khua a har ngai lo te a tia, ka pa a lai thei zuks my friend" ka tih leh chuan a lo nui bu nghawng nghawng a, a rilru a hah tak tak lo aniang a nui thei emai. "U Rinchuta aiin a phuhchhuak raw ţhin a ni maw?" a ti a, lo buk nghat pahin, "Aw...phuhchhuak raw fe zawk, thu khuh a nei ve lo, u Rinchuta aiin a naupang zawk a, a â zawk bawk. Ka sam chu a ţhing viau mi?" ka ti a, ka chul pah thuak thuak a, "Hey lo kal teh hei lukhum eng thei" tih pahin Dawnfuhan a nau kawr awmah a ţham a, a pawt nawk a, chutah min rawn kawk lehin, "Hei lukhum eng thei" ti lehin Kalvari in a lo nam sawn hma hlauh zawk a, "Khatin i nau pawt vak vak mah ta che, a na anga sin" a ti vin hlar mai. "Lukhum eng thei in khum emaw a ti a nih kha" tih pahin a fanu samah a chul hliau hliau a, "I chhangchhe emai maimitchhing chungin bia che ila chu kan bo huih dawn a nih hi" nui hak hak chunga Nutein a lo tih ve chuan, "I haw dawn ta em? Eng nge in chanchin ni zel?" a rawn ti a, a titau vel a, a hre ve leh duh tho si. 

"Lo haw rawh an ti reng a, ka la hnial zel a, ka haw chak vak lo. Kolasib ah tih tur ka nei chuang lo a, helama hlawh neia Remkalami puih a hlawk zawk. Ka chhungten nitin min rawn bia, a chang chuan ka la duh lo ţhin. Lo haw rawh tih bak an sawi ngai chuang lo. Miin mak an tih an hlau a, 'a ţhiante khuaah hna a thawk ti rawh u' ka tih kha. Ngai ve tawh tho mah ila ka haw rih dawn lo reng reng" a ti zat zat a, an chhungkaw buaina a ni bawk a keimah ang thoin Kalvari pawhin a sawipui zui bik lo. Reivak lo kan inbiak hnuah eirel hma a duh vangin kan inbiakna kan ti tawp a, darthlalang a ka in en leh chuan ka sam chu hmuh loh der hram hram ka tum a, a langsar ber a ni tho bawk si, ka hmai ka chei lai te chuan Sangkhuman, "Current pawh thim se i sam ringin duhtawkin i inchei thei dawn tho a nih kha" a lo ti fiamthu a, a sam lar zia a hmu ve awm tho sia, kan pathuma darthlalang hmaa kan han ding tlar ţhap chu Nutein, "Kan lar e...The Lars kan ni mai" a ti a, kan han nui ho leh dar dar rih a, Sangbollywood-in a awt ve viau ang. 

Pu Lungmuana te mikhual hmuh tumin an in lamah kan va peng kawi leh rih a, kan tih fo danin kawngpui aţangin kan thlir a, rin ang ngeiin an mikhualpa chu pawnah a rawn chhuak eih lo. Karkhat chhung kan chang tawh a, kan la changchhuak thei rih lo. Sangkhuma erawh a phur ve tehchiam lo a, a mumangah Nutei a la hmu ţhin si a, Nunui pawh a be hleithei tawh lo. "Nutei hian ka mumangah chiah zun a nei" a ti ziah tak nain a mumang loah pawh hian a duh deuh thoin ka hria. 

In kan thleng chu engkhaw sawi set set lo vin ka nu'n kho ruakin min lo vawm ringawt a, a meng rum ul a, a hmui a pet fuat lehnghal. "Ka rawn haw ringawt a engmah ka sawi loh kha" min vawmna lai tuai paha ka tih chuan, "I sam kha eng nge awmzia? Vawi engzat nge i sam ti chhe tawh suh ka tih? Khatiang hler hlur a lar pu chung chuan khawm pawh i inkhawm dawn em ni? Kţp ah te hian inhmang ve rawh ka ti fo a, kţp a inhman aiin sam tih danglam i ngaipawimawh zawk a" a ti hlaih hlaih a, ka hnunga Nutei ding chuan ka kawrah a pawt a, ka nu'n a hmu vek tawh na a a ding langsar duh ţhak lo. 

"Kţp ah te chuan a tawk chauhin ka inhmang alawm, a zawng zawngah ka tel ve hman lo a nih hi. Khawhar in a ka kal apiangin thingpui ka sem ziah bawk a, hnatlang an kohin ka hnatlang lo ngai lo bawk aw. Ka sam mai mai hian ka engtih mah a dal lo" ka ti ve ngat a, sam lem emaw a tih ka rin nen a nih loh zia a hre ve tlat. "Kţp ah i tel khat tawh lutuk, drama zir peih hle si vawikhatmah i zir tawh ngai lo" a tih chuan, "Part chhia chhia min pe a ka tel peih tawh lo. Mipa tam tak an awm laiin keimah berkher Elvis lemah te min ţan tir an tum a, ka peih hleinem. Ţum dangah pawh a lang lo chiah bak min hmang ngai lo, lang lo tura drama chan tu nge duh bik ang?" ka lo ti ve hlak hlak a, ka pa'n, "Sam colour mai mai chu nakinah a reh leh mai ang. Chawhmeh chhuang lum tawh rawh u" a lo ti hlauh a, a reh dawn lo nasa ropui sia, nitin ka nu thin a rim leh dawn a nih hi. 

Zanriah eikham veleh Nutei nen hmun kan ti fel zung zung a, tlai lamah thleng ka sil a, ani'n zing lamah a sil ve thung a, inpuiah ka nu leh paten tv an en thung. Ţhutkhawmna pindan hi inpui kan ti mai zel a, kan khaw tihdan bik nge midangin an ti ve tho ka hre tawh bik lo le. "I phone" tih pahin pindana ka awm chu Nutein phone min rawn pe a, principal a lo ni. "Hello" ka tih veleh, "I duh sawi rawh" a rawn ti nghal thawr a, "Eng ka duh maw? Eng nge awmzia?" ka tih chuan, "I duhzawng" a ti leh tawp a, "I inah Sangbollywood-in thil a rawn zuar em ni? A bel lui che em ni a?" pawr zeta ka tih chuan, "Pi Binladari dawrah ka awm" a rawn ti a, sawi ve nghal mai tur a nia, min be bo hmasa phawt zel. 

"Bhujia lo lei rawh, a papawr chhawmah rau rau khan a lian lian lo thlang bawk la" ka tih chuan, "Nutei kha zawt ve rawh" a rawn ti a, Nutei hnena, "Eng nge i duh ve?" ka tih veleh, "Pi Binladari dawrah a awm ti tel rawh" a rawn ti leh hmanhmawh a, "A hre vek tawh, lo ngawi mai mai teh" ka tih hnuah Nutei chuan, "Jalebi a la neih chuan ka duh, thil thlum ka ei chak" a lo ti a, "Jalebi chu a zo daih tawh ang, nu Ramtiamin a dah tlem thei emai" ka ti tak na a, "Jalebi a ni mai thil thlum ka ei chak a ti" principal bulah ka ti tho a, "A to, chini bar mai rawh se a in ang reng" a rawn tih chuan, "Hmm...a bam ţhaks, khatianga ti tur te chuan min zawh loh mai tur alawm. Keipawn engmah ka ei duh lo" ka tih veleh lo nui hawk hawkin, "Ka uang mai mai a tih kha" a rawn ti a, ka chhan hma hma a, "Fiamthu a nih kha fiamthu" a rawn tih leh chuan, "Hmh...what a not joke, i fiamthu a joker lo emai, lo kal mai mai teh" tih leh phone dah ka rual a, a lu ka meh sual vang khan thinrim angin a awm ngai hauh lo a, min biak dan ngai renga min be chung hian min meh nawn tir a tum hauh lo thung. Nutei eitur leisak ve lo tur ang ten a rawn awm vel a, Nutein a neih ve dawn loh chuan ka nei bik lo ang, chutiang ţhaks chu a ni mai. 

"Principal a lo leng dawn a nia" ka nu leh pate hnena ka tih hnuah lo hmuah tumin Nutei nen bathlarah kan ţhu chhuak a, ka nu'n, "Lalremmawi, i lu kha tuam rawh, i sam kha khuh bo vek rawh" a ti lauh lauh tak nain a awm ang angin ka awm tir lui tho a, a chhiat tawh sa nen, tuam kawihsawih belh chi pawh a ni tawh lo. 

Ip lian vak lo khaia principal lo chhuk chu, "Ehem...aiwa" tiin kan lo chhaih a, a lai ve deuh nge mawni kun ngul chungin min rawn pan a, kan zawn a rawn thlen veleh ip chu ka malchungah rawn theh thlain, "Thingpui min lum thei" a ti nghal ringawt a, ka tho nalh a, "Inchhungah lut ang u" tih leh luh ka rual a, min rawn zui lut nghal tih ka hria, choka lamah ka phei tlang a, dawhkana ip ka dah rual chuan, "Khaia" a lo ti hluai a, ip ka dah sual emaw ka ti hman, mahse min lo kawk va mai. "Eng nge?" ka tih veleh, "I sam rawng chu a dangdai hle mai" a ti ban charh a, ka nu'n, "A duh mak thei tak tak a ni. A sam a tih danglam reng rengin pangngai takin a ti ngai lo, mi aia uchuak hlir hian a ti bik a" a tih hlak hlak lai te chuan min en vung vung a, "I tih laiin a khu rum rum em?" tih pahin principal chuan ka sam hmawr a rawn khawih a, a la hmet hrual zui. "Khu rum rum kher lo, ngati nge? A mawi lo viau em ni? Ka ti dum daih duh angem?" ka tih chuan, "Mawi i tih dan danin ti rawh" a ti dam thlup a, dawhkan kil a ţhuin a thil lei chu a phawrh a, "Pa Dite, hei kuhva ka rawn lei che" tih pahin ka pa ţhutna lamah kuhva a vawm phei a, tlangnel tawh tak a ni. "Fawnvela te in aiin in in a nuam zawk" a ti ţhin a, hunawl a neih chuan sawm lo mah ila a rawn lang leh nawlh zel. 

"Rawn ti ziah suh...hetiang te chuan lengah pawh kan sawm ngam tawh nang che" ka pa'n a ti luam a, a kuhva rawn lei sak chu a ak hmak tho sia. "Pi Binladarin min bel ve ţhin bawk a" a tih chuan nui hawk hawk chungin ka pa'n a tih ţhin dan a lo zawt a, "Naktukah a hralh tlak tawh dawn si loh a, a dang lak lehna tur a awm dawn lo a nih hi a ti ţhin a, chutiang em a thlen loh nan chuan ka tia ka leisak hram zel" a ti a, ka nu pawh a lo nui ve put put mai. 

Thingpui kan lum laiin Sangkhuma leh Fawnvela an lo lut a, gas bula ka ding chu Sangkhuman min rawn kuahin, "Thingpui i inchak chuan min rawn ko mai ta che, i hah lutuk anga sin" a ti ta mai a, principal pawh a ţhu ţha nghal sawk sawkin ka hria. "Pa Dite, Sangkhuma leh Remkalami an inngaizawng" Fawnvelan a tih chuan ka nu zawkin, "Enga? Inţhen leh nghal rawh u" a lo ti bak nghal hlar a, Fawnvela hmel aţangin an uang tih ka hre reng a, ka nu hmel a tak ran thung. 

"Ngati maw nu Nemte? Naupanlai aţangin kan inkawm tawh a, anni aia inhrechiang tur an awm hleinem. I fanu a hmangaih miau te chuan" Fawnvelan a ti dek dek a ka nu lah chuan, "Lalremmawi, C. Sangkhuma kha i hmangaih em ni?" a ti nghal thawr mai a, ţhutthleng nghenchhan dawmin kan lam a lo hawi a, principal pawhin ngunthluk deuha min lo en vein a inngaihtuah muk hmel viau na a engmah a hriatthiam ka ring chuang lo. 

"Hmangaih han tih lemah hmangaih---" ka ti hman chauh a ka nu bawkin, "Va mu rawh...i â a nih kha" a lo ti ţeng leh hlar mai. "Nu Nemte, ka awmlai em em chuan min duh lohna lantir vak vak kher lo la, hlau chung chung chein kan sawichhuak ve a, Fawnvel, nangpawh sawi rih suh ka tih mawlh mawlh kha" Sangkhuman a ti bui bui tak na a, "I awmlaia ka duh loh zia che ka lantir lohin, a thawiin lantir ila i hrethiam leh tawp nang. I bialnute reng reng vui lo an la awm lo, ka remti lo reng reng. Yma hall bul a Parlawmi nen in inhau te kha ka hre vek, in inkawp ţhat lai reng pawhin tuman an fak ngai lo che a nia, ka remti lo tih hre tawp rawh" ka nu'n a ti tan tan a, ngaihsam hmel fe a Fawnvelan, "Nu Nemte, it is ok" a lo tih chuan, "It is not ok, ok?" duhthaw zet hian a lo ti leh a, "Naa..nu Nemte, nunhlui chu nunhlui a nia, ka bialnu hlui ten min dem chhan chu ka ţhen vang mai mai alawm. Remkalami te chu ka ţhen ngam teuh lo, kan inneih hunah phei chuan ka thaibawih ang, i thu thuin ka awm ang" Sangkhuman a tih chuan, "I ngam chuan han nei vaih teh, vawkin ah hlir a nia ka riah tir dawn che ni" a lo ti a, ka pa a nui hawk hawk a, Fawnvela pawh a insum nasa khawp mai. 

"Zoram, nang chuan a pawina i hre lo tiraw?" Sangkhuman a ti ta chiah a, "Chi dawn mi?" lo tih pahin ka nu a kawk zeuh a, "Nu Nemtei te chuan nakinah a remti leh mai ang, ani chu a fel alawm, a ang tun tun a a thin a rim tak tak ngai lo. Vawkinah riak dawn mah ila nupuiah ka nei tho ang" tumruh hmel zeta Sangkhuman a tih chuan principal in, "Khawi ka bhujia kha" a ti ta mai a, Nutein a seh hawng chiah bawk si, "Chei...bialpa a neih vang maiin i thil leisak tawh sa laksak leh i tum mai a" ti nang nang chungin min rawn en a, "Dikchiah...min leisak vek tawh kha" ka tih ve chuan, "Ka phal leh lo, min pe let leh rawh" a ti deuh hmuk a, ka nu lahin, "Laksak leh hmak rawh Zoram, an nikhua lo emai. Sangkhuma inrawlh chikim lutuk hi chu ka beng chak a nia, mi fate mai bakah an nu leh pate rilru thlengin a ti hah thiam a, in inţhen loh chuan ka vaw ve ve dawn che u a nia" a ti khar khar tawh a, rin aiin an boruak rawn ken luh chu a nuam angreng hle. Ka pa'n, "Insum ţhin teh...nuam lo an ti lutuk ang e" ti a a lo khap chuan, "Nuam lo an tihna turin alawm ka awm. Sangkhum, hlawh nei pawn kan duh lo che a nia aw" a ti a, tumah kan insum thei tawh lo aniang ka nu thlengin kan nui hak hak hlawm a, "Arek khawro pawh kan ruh tir ţawk che a nia, vawk chaw pe tur takngial pawhin i tlak loh" nui chunga ka nu'n a tih leh chuan, "I phallo chung i fanu hi ka ru ang a, tuktin kan nupain kan rawn runluih ţhin ang che" Sangkhuman a tih veleh principal in, "Bhujia chu va leisak ve rawh, ka lei sa hi ka la let leh dawn" tih pahin Nutei ken lai a pawt thla a, "Kan ei chak a kan chah ve che a" ka tih veleh a theih anga tam ţham chhuakin a ei zui bawrh bawrh a, ka nu meuh pawhin ka haua lo enin, "Khatin dawlh pawp pawp mah ta che, bhujia a nih kha, ehe...bhujia a lem nghal duak duak thei bik nia" a ti a, mak a tih hmel khawp mai. 

"Ser thur tui tawk ka zuar" Sangbollywood-i lahin a rawn ti lut lauh a, Fawnvelan, "Sangbollywood, Sangkhuma leh Remkalami an inngaizawng, in monu tur a nih hi aw" a lo ti leh nghal pang a, Sangbollywoodi a hawi phawk nasa khawp mai. "Ka awih lo emai a" a ti tak nain a hmelah a awih zia a lang vek tho a, Fawnvelan, "A ni reng...nimin tlai dar 3:30 khan an ni chiah" a tih chuan, "In va mawl ve...u Remkalam, principal i star em kha aw" a ti pek a, gas lam hawiin ka inher rang khawp mai. Tumah an ţawng lo a, an hmelah ka en ngam lo bawk a, midang hi chu ka zah hran lo, principal hriat laia a sawi kher kher chuan min ti weigt loss, min kawm duh tawh loh palh hlauin ka hnual nghal rawih mai. 

"Ka tih der a" tiin Sangbollywoodi chu a nui hak hak tak na a tuman an awih tawh lo ang. Principal lahin, "Hun ka mamawh" a lo la ti zui a, ţawng ve lo se a dik thlap zawk ang. Ka inngaihtuah chiang a, mipa hmaa zam ngai lo, mipa tam tak lo rim zak zak tawh ţhin ka ni a, kei aia naupang lehnghal ţawngkam tawite avanga ka zam em em mai chu ka inthiam lo zawk a, zak viau mah ila zak miah lo anga inher lehin mak tih hmel deuha min lo en reng tu principal chu enin ka nui sak a, sawi tur ka ngaihtuah nasat nen sawi mai tur ka hre lo, ngeiawm deuhin ka nui ve laklawh tawh si a, ka an zuau zuau lai chuan engemaw ka sawi beisei ni awm tak hian a mithmul a lo kan ralh a, ka nu leh pa an awm ve bawk si, ka tihngaihna hre lo chuan, "Duh leh ka star ang che" ka ti hmak a, chutah ka nu leh pate lam hawiin, "Nangni pawh mu rawh u" ka ti leh a, gas lam hawiin ka inher leh hmak a, Sangbollywoodi ka la melh rum theihnghilh zui. 

"U Remkalami chu a bawn mawle...Lalwow-i a nih hi, i inrintawkna ang hi ka duh ve" tih paha Sangbollywoodin min rawn hnaih laiin ka nu'n, "Zahtheih loh vang mai mai a nih kha" a lo ti leh hman a, ka zah ve zia a hre der si lo. Sangkhuman, "Kan ni chiah a min ţhen lehnghal dawn tihna mi?" a lo ti ve chu remchangah lain, "Teuh lo...a teuh lo mai, ka nei mai che ni lo vin ka nei double dawn che, bhujia mai mai pawh ui ţung tu ai chuan i ţha daih zawk" ka ti chiam chiam a, ka kut phah thlengin a thlan vek tawh thung. 

"Kha i duh leh ei ve la" principal in a tih chuan inher ţha lehin, "Ka ei peih lo, i bhujia kha a hing" ka ti a, thingpui a so nasat tawh em vangin loh theih lohin gas lam ka hawi leh a, ka zah vanga ka tha khur deuh chu hriain Sangkhuman min tihpui zung zung a, Sangbollywoodi ka ngei em avang chuan, "I kut tin hnawih chu a va nalh ve" tih pahin a kut ka la a, thingpui bel hnaihah pawt pheiin a sa lai chu a kut hmawrin ka tawh tir a, a ţe nasa ngang mai, "Ei ei ei...." tih chiah a sawi hman a, ka sam thar chu a hmu ve ta nge nge aniang, "U Remkalam, i sam ang hi ka duh ve" a ti ta zawk a, kei lahin ka chhang ţha duh lo ngei a, min zui kual dat dat reng mai a ni. 

Principal haw tur chu Nutei thu angin bathlarah ka zui chhuak a, a kal nghal mai hreh aniang a ding dat a, kan ngawi tlawk tlawk dawn emaw tih laiin, "Bhujia kha i nu tih hlim nan a ka tih a nih kha" tiin ţawng hmasa zawkah a ţang ve ngei a, "Sangkhuma kha a hau nasa em a, a rilru ka la peng zuai" a tih leh chuan, "Ka bialpa i lo ţanpui tihna a ni maw?" ka ti a, inthiam loh hmel deuha a hmui hnuai seh chung hian a bu nghat a, "I rapthlak e a...ka tlawh thla daih dawn che em mawni le" ka tih chuan ding hmawr a inti aniang a tlak loh nan a tawlh hnung hrut a, kan ngawih leh vang vang hnuah, "Aaa...Remkalam, phir nuaih lo teh" a ti hap a, keimah zawk ka hrilh a hai khawp mai. "Eng nge awmzia?" ka tih chuan, "Bialpa i neih kha" tih paha min rawn hnaihin min nawk pah zauh a, "Pakhat i neih chuan pakhatah rinawm rawh sam engthei nu" min ti a, a nui pah hawk a, a la mawi em em zui. 

"Rinawmna vel hi eng nge i ngaihdan?" ka tih chuan, "Rinawm tur, chu chu a ni mai" a ti nghet charh a, ka duh chi vekin a khawsa bawk si, principal lakah chuan Sangkhuma chu a pheikhawk charna ang vel kha a ni mai. "Sangbollywoodi kha vawikhat tal ka lo beng lo a ni" zahzelah ti lehin ka sam ka tuai pah a, "A kut i ti kang hmin vek lo chauh a nih kha" a ti a, bel sa a a kut ka deh sak lai kha a lo hmu vek a nih hmel. "Engtia tih chi nge?" ka ti ta ringawt a, "Engber maw?" a tih chuan, "Ka star che tih i hre tawh sia engtia tih chi nge?" ka ti nawn leh a, "Chutiangah star te an rawn ngai em ni?" atthlak tih hmel zet hian a ti a, a nuih a za viau bawk. "Ka zak teh mai a nia aw...zak tak ka ni. Min kawm duh tawh lo mahla a pawi lo" ka ti zung zung a, ka zak ve em a ni. Ka thuruk ve liau liau Sangbollywoodin min sawi chhuah sak a, ni lo se chu a hre dawn miah lo a sin le. 

"A zahthlak loh e" ngaihsam hmel zeta a lo tih chuan, "A zahthlak loh maw?" ka ti he haw a, ka duhzawng ka lenchilh ngam ţhin tak na a ka zei hlawl lo a ni. Ka at huai a, fing phakar deuh ka ni lem lo a, zah ngawih ngawihna chi angah hian mi aiin ka zak ţhin bawk. Ka zahzumna lam leh mi zahzumna lam a inang vek lo ţhin thung. "Zahthlak nang...i bialpa zawk kha" a tih chuan, "Sangkhuma chu vengthawng suh, kan inkar a thiang zau lutuk, kan inngaihzawn dan a danglam a, engkim a leng vek. Inngaihzawn laiin nupui pasal nei mah ila kan insawisel lo ang, chutiang vel chu" ka ti duah a, "Eng nge awmzia?" tih pahin ka lam a lo hawi a, a kut pahnihin a kekawr ipte a zen daih tak nain a palian em a, ka cho chuang lo. Inti sek vak se chu min chhem hlum daih thei ang. Ka pi Binladari phei chu a dawr chawpin vairam thleng rak a chhem thlawk rawng rawng thei ang, a pawnfen phe vuai vuai bak kan hmu hman teuh lo. 

"Sangkhuma nena kan inkarah chuan tupawh an leng vek. Inta neih burna policy kan kalpui ve lo" ti a ka sawifiah lai chuan a hriatthiam hmel vak lo a, mak a ti bawk si aniang a memg tal tap mai. "Inngaizawng mah ila inngaizawng lo enin kan in en a" ka ti kual leh vel a, eng emaw a beisei vanga min rawn ngaizawng der a ni tih ka sawi ngam der si lo. Fawnvela nen ruahmanna an nei ang a, min hrilh lehpek lo aniang. "Engtin pawn inngaizawng ula star vel kha a zahthlak loh. Nangmah lo pawn min star" a ti a, a lang tlang angreng bawk si, langtlang ka lo intih ve nen principal hian min dah nil ţhaks. 

"Min la kawm duh tho angem? Ka star palh mai mai che a nih kha aw" ka tih chuan, "Kawm duh e...keipawh bhujia kha ka tih luih a nih kha. Naktukah ka leisak leh ang che" a ti a, kan inrem ta aniang kan nui dun leh thei tawh tak nain ka la hmin zan chuang lo. "Lo star palh lo che ila engtin nge i tih ang?" ka ti leh ta nge nge a, "Kum khat tal inngaihtuah phawt ka ngai ang" a ti a, nui miah lo hian fiamthu a thawh ţhin si a, a fiamthuah ka ngaihsak mai. Tuman chutiang chen chen inngaihtuahna hun an mamawh lo tawp ang. 

"Remkalam" a tih leh takah, "Awiah" ka lo ti nem duai a, "Min star ringawt rawh, a nuam ve a, mahse ka bialnu nih chak duh suh" thutak zeta a tih chuan, "Engati nge?" ka lo ti thuai a, "I thi ve palh ang" a ti hem mai. "Awi...chutiang vak vak a han intih" ka ti nang nang a, "Ka sawi awmzia chu" a ti a, a ngawi leh daih a, sawi dan tur a ngaihtuah vel mekah ngaiin, "Thu khuh deuh rawh, thihna ti fawk fawk suh" ka tih chuan, "Mi ka ti lawm thiam lo, nuam i ti lo ang" a ti leh a, "Mi tih lawm kher a ngai hleinem, theihtawp kan chhuah chuan a tawk mai" ka ti a, kan pahnih tan chiaha sawi pawh ka ni chuang lo, theihtawp kan chhuah hian a hlu bik riau a ni. 

"Mipa hi chu an zei tlangpui a, nangpawh i tum tak tak chuan i zei tho ang, i awm ang cherh churh hi i ni teuh lo" nui hak hak chung hian ka ti a, ka fiam vel mai mai tawh a, thutak lo ila a zahthlak loh a ni mai. Min duh loh leh ka uang a kan tia nga, min duh leh lawmthu kan hrilh ang a, nichina ka zak chem chem kha ka fiamthu tak hnu hian a bo deuh tawh. Mipa an zei ka tih vang maiin, "Remkalam, ka hnawl che chu ka ti lo, mahse ka'n haw phawt ang e" tiin a uang ve ngei a, "Awii ha ka duh ţhaks" tih pahin ka nam nawk a, ka nui zui duai a, "Ka lo be dawn che nia" a ti a, a kal ta chu ka thlir zui vang vang a, vawikhatmah a lo hawi let lo nain a thinrim haw lo tih ka chiang ve khawp mai. 

Inchhung ka luh veleh ka nu'n, "Sangkhuma kha ţhen nghal ang che. Eng emaw palh a awm chuan in inţhianţhatna thlengin a chhia ang a, loh theih lohin a nu nen a kan inhauh a ngai ang a" a lo ti hlak hlak a, ka pa'n, "Mawiah i nu leh i nu Lawmtei inhau chu hmuh a chakawm alawm. Han innawr nawk nawk se la" lo ti vein a nui huah huah a, ka nu a lungawi loh hmel khawp mai. "In inţhianţhatna a chhiat a hlauhawm, Sangkhuma lah a chhungten an ţan ropui si a, i thiam naah pawh thiam loh an chantir vek dawn che, han nei vaih phei la chu i nasa lo viau ang" a tih tan tan laiin pindanah ka lut daih a, Nutein, "Kalvari ka bia a ka nuih a za, Dawnfuha hriat laiin Dawnfuha vanga a buaina a rawn sawi char char kha ka inchhir e a rawn ti" ti a lo nui hak hakin keiin principal nen a kan thusawi te ka hrilh ve thung a, "Theihtawp chhuah la chu a hnar phal miah lo ang che. Mipa chu hmeichhia an zei chuan an tlu ruai ruai zel mai a ni" a lo ti a, beiseina ka nei veleh deuh nain principal hi hriatthiam a har em a, ka beisei sang duh lo. 

"Principal in min duh phawt chuan lawmthu sawi nan sunday school ka kai kim ang" ka tih chuan, "I kai kim tawh loh kha" a lo ti a, "Kumthar lamah mawle...kumin chu a ngaihna a awm lo min la duh loh hi" tih pahin ka mu a, ka lo bia ang che a tih vang khan phone ka en leh ţhin a, Sangkhuma leh Fawnvela te takngial pawh an reh hmak mai, min rawn ţhawn dan teh thut kha keipawh ka hrilhhai hman a, ka beng dawn khawp alawm. 

Beidawn tawh dawn lamah, 'Ka mu ve dawn chiah a, muttui le' principal in a rawn ti a, han chhanlet chiam ngaihna a awm loh vangin, 'Muttui le' tih zawng ka thawn let a, zingah ka be dawn hrim hrim. 

Zingah hma tawkah ka harh a, a thawh ka la ring vak lo na a principal chu, 'Vawiin ah dawrah lo kawi rawh' tiin message ka thawn a, 'Ka hman chuan' tih zawngin min rawn chhang let a, a lo tho daih tawh a nih hi. 'Ka thuruk i hre tawh sia, ka message thleng hian a ni deuh huih mai' ka va tih chuan, 'Ni huih tawh suh Lalwow' min rawn tiin nui lem min thawn ţeuh bawk a, mak tak a ni, message min thawn hian tlar tinah a nui ziah. 

Dawrah Sangkhuma ka chhuahchhal a, "Kan tel ve loh chuan hma in sawn thei lo, a ninawm" a ti a, sawifiah deuh tura ka tih leh, "Fawnvela nghak mai rawh" a ti leh hmak a, lungawi lohna a nei leh tawh aniang. "Principal nghah ngai bawk, tukin chu Lalwow min rawn tih ve ngei kha, awi...ka thi teuh thei ţhaks" ka ti a, a nui hmel tur vel mitthla a ka hlim nen Sangkhuman, "Remkalam" lungawi lo aw tak hian a rawn ti a, a lam ka hawi chuan a pheikhawk siam lai chawl meuhin, "Nu Nempachangi hian min lo va duh lo awm em em ve, nizana min tih dan kha theihnghilh a har khawp mai aw" a ti a, tih lungawi loh chi ni hek lo, "Ka phu lo chein a hria a, chuvang alawm. A tak tak emaw a tia, khatia a tih mai loh chuan kan inţhen loh a hlau a, kei aia ţha i phu a tia" ka tih zung zung hnuah ka rilruin ka uang a ka ti a, Sangkhuma lah lo nui sukin, "Phu loh tak tak an awm hleinem" a ti ban charh a, lungawi deuhin pheikhawk a siam zawm leh a, customer an vang si, nalh deuha principal lo nghah bak tih tur ka nei rih lo a ni. 

CONT...