KEIMAH, THINGTLANG NULA (FINAL SEASON) 13

KEIMAH, THINGTLANG NULA (FINAL SEASON) 13

Kalvari te awmna khua a zin tumin rilru kan siam fel a, ka nu leh pate ka la dil lo thung. Nutein a ţhianpa thar chanchin a sawi reng a, a hlim em avangin Sangbollywoodi ka la hrilh duh lo. Fithangi pawh Fawnvela pute inah la awmin an ko duh lo a, inhmuh falna hun a awm loh em avangin Fawnvela nen pawh engmah kan la sawi duh leh lo. Nutei chhungten thawm an rawn nei reng a, ani lah a luhlul si, an vau pawhin awmzia a awm lo. Tunah phei chuan Msa nen an inbe tlut tlut lehnghal a, kan khua nuam a ti zualin haw tumna rilru a pu tawh lo. Ka nu leh paten an sawipui ngial pawhin awmzia a awm lo a ni ber. 

Vawiin chu tih tur a tam avangin amah chiahin dawrah ka kal tir a, Sangkhuma nen an ţhudun ruk ruk dawn a nih hmel. Ka ute thil thawn tur buaipui pahin aieng ka siam a, ka zin hma a tihfel duak ka duh vang a ni. "Ka patea thingphur ka zui a, haw veleh ka rawn phei ang" Fawnvelan a ti bawk a, ka nu a feh daih bawk si, keimaha khawhar deuha ka awm laiin kawngkhar an rawn kik karh karh a, mahni a ka awm chuan ka inkharphui ve tlat zel. 

"Lo lut rawh" ka tih vak hnuah kawngkapui lam ka pan a, ka hawn ruala Msa ka hmuh chuan, "Lo lut reng reng suh" ka ti nghal thawr a, ka ngei deuh chi khan a la nui zui. "Mitthi ina kan kal zan khan in in hi Nutein min kawhhmuh a" a ti vel a, lo luh leh a tum chu ka nam pawp a, a tawlh dawrh mai. Tawnzau leh kekawrbul chiah a hak avangin a taksa rang ruai chu a langsar lehzual a, a sual hmel si, mahni chiaha awm lai phei chuan inlengah ka duh lo. 

"I lo luh luih vaih chuan MHIP hruaitute ka hrilh dawn a nia aw, kan khua i chhuahsan nghal vang vang mai ang, i duh mi?" ka ti khar khar a, inchhung aţanga chhuakin kawngkhar ka nam khar nghal hmak bawk. "In veng ţung suh engtinmah ka ti dawn lo che u Remkalam" a tih te chuan, "Khatin mi ko ve ringawt suh, kei aia naupang nazawngin min u thei hleinem. Haw vang vang la tih tur te zawng ve rawh" ka ti hrep a, pa Khawtea te in lam ka hawi phei a, bathlarah pa Khawtea nupui nu Zonuni lo dingin 'puih i ngai em?' tih melh tak hian min lo melh a, puana a lu tuamin tuthlawh a hum a, a hnathawk zo hlim a nih hmel. Msa lah en tawp a sual hmel tawp, en chet chet a sual hmel chet chet chi a ni bawk nen, nu Zonunin min puih inhuam hmel taka min en reng chu mak ka ti hran lo. 

"Nih leh ka u lo ang che, i phal chuan ka lo leng Remkalam" ţha deuha a tih pawhin, "Ka phal lo, i duh leh Nutei awm hunah lo leng rawh" ka ti hmak a, nu Zonuni ka melh leh zeuh a, ani pawh inring rengin a lo la ding a, puih ka ngaih chuan ka au vak mai dawn a ni. "Phal hram hram rawh i hmelţhat em kha, engtinmah ka ti dawn hleinem che, i hmelţha a ka rim ve chak che alawm ngati nge i phal loh tlat" a ti bui bui a, naupangchhia tak a ni. "Hmelţha kan tih zawng zawng kan rim seng lo" ka tih chuan, "In khuaah nangmah bak hmelţha tih ka nei lo, u Remkalam, i hmel hi a dangdai e" a lo ti a, tlem chuan ka lawm ve deuh a, ka la intih hlauhawm duh tho avangin ka nuih loh nan ka aw ka thian kharh a, "Min tih thinrim chuan ka au vak dawn a nia aw, saw kan ţhenawmnu saw i hmu em? Kungfu black belt a nih saw. I haw loh chuan a rawn zuang phei nghal a ni mai" ka tih veleh nu Zonuni chu a en ve a, chhing tuia puan bihin kawr par lar deuh a ha a,lan naupan duh reng reng a ni bawk a a hmui pawh a hnawih sen hlar mai. "In ţhenawmnuin min kungfu hnuah chauh len i phal dawn tihna mi?" tiin a nui zui hawk a, "I haw loh chuan a kungfu zawk ang che, buaina i siam luih tlat phei chuan a samurai che nga, ka phal lai hian haw vat rawh" ka tih khar khar laiin, "Naaa...ka hlau lo, ka lo len theihna tur a nih chuan min kungfu mai rawh se" a lo ti daih a, beidawnthlak tak a ni. 

"Ngati nge min hmuh kher kher a?" ka tih chuan, "Khuanu zawt rawh" tiin pawisawi loh hmel zet hian a nui a, ka lungawi phah der si lo. "Nutei awm hunah lo leng rawh ka tih ka tih kha" ka tih leh chuan, "I ţhiannu kha ka duh hleinem" lu thin pah hian a ti a, beidawng deuha ka thawk halh hnuah, "I lo leng thei lo a nih chu. Bialpa neih lai renga inleng neih ka duh lo, haw vang vang rawh" ka ti ve thung a, a hrethiam pek lo aniang, "Ka hmuh che khan ka duh nghal che" a ti daih a, "Ka bialnu i nih chuan fel min ti viau ang" a tih leh chuan, "Awi...uak" ka lo ti vak a, "Eng nge awmzia?" a tih veleh, "Uak uak" ti lehin, "I bialnu ka ni peih bawk lo" tih leh inher ka rual a, inchhunga luhsanin kawngkhar ka kalh hmak bawk a, Nutein a duh tehreng nen ka biak ţhat chuan min haw mai ang. Inngaizawng tawh se chu thuhran a nia, an inngaihzawn hma a lo kawm ka duh lo, mahni a awm laia inchhunga hruai luh phei chu ka duh lo lehzual. 

"U Remkalam, ka beidawng dawn lo a nia aw. Pawna sipai kawr inkhaiah hian i thil tur ka dah" pawn aţanga a rawn tih leh pawhin ka chhang duh lo a, a kal ta aniang a reh zui vang vang mai. Kawngkhar a rawn rik leh chuan, "Lo len a ngai lo ka tih kha" ring zet hian ka ti leh a, "Remkalam, ka lo len khat em hi" rawn ti tu chu Fawnvela a ni. Rang deuhin ka va hawnga, Fawnvelan mak tih hmel zeta, "Ngati nge khatia i au chiam a? Rawn len tum an awm em ni? Principal a ni em? In inhau em ni?" a tih zung zung lai te chuan ka la hawi kual zuk zuk a, "Msa kha rawn len a tum a, luh ka phal lo a nih kha. Fawnvel, lo lut teh, thil mak deuh ka hrilh ang che" tih leh inher ka rual a, ka hnathawh lai ngaihven zui lo vin ţhutthleng seiah ka ţhu hnawk a, tihdan min ngaihtuahpui ngei ngei a ngai ang. 

"Eng nge a?" phawk deuh a la tih pah hian ka bulah a rawn ţhu ve a, a hah bawk aniang a thlan hluam mai. Ka bula fan chu on in Fawnvela lamah ka nawr phei a, a kawr hak lai phelhin chhuatah a vawm thla tawp a, fan chu inchhemtirin a chhing zui vang vang mai. Msa nena kan inbiak dan ka sawi zung zung a, "Umm...umm" a lo ti zel a, ka sawi zawh veleh, "A ngaizawng che a nih chu" a ti a, ka phu nasa viau a ni. "Awii...Fawnvel, keichu ka duh thei lo e...Nutein min ngei vek ang" ka tih chuan, "I ngaihzawn ve loh chuan ngei nachhan tur che a nei lo. A ngei che chuan ka chhan ang che. I nu hnenah i dil tawh em?" a ti ta daih a, "La dil nang...ka nghak che u, min dil pui loh chuan keimahin ka dil ngam lo ka tih kha" ka tih veleh, "Ka dil pui ang che. Kalvari chu kan hrilh lawk lo ang maw?" a lo ti leh a, "Hrilh lo ang, kan ţhawng thut dawn alawm. Sap ho pawn 'surprise' an tih ţhin hi. Min hmuh hlima a hmel awmdan ka hmu chak tawh teh mai a nia" ka ti a, ka phur leh viau tawh. 

"Kan cham rei hman dawn lo ţheuh a, Nutei hi a lo kal ve angem?" a tih chuan, "A duh leh duh loh a ni mai. A nute lahin min lo be reng a, ka inthlahrung zawk. Mi haw duh lo chung haw rawh tih chi a ni mang si lo a" ka tih zung zung laiin, "Lo kal ve lo se ka ti" a ti daih a, Nutei haw duh lo ai mahin Fawnvela chu mak ka ti tawh zawk. "Ngati maw? Kan ţhian ve tho a nih hi Fawnvel, bakah naupanlai anga ţhianho a inkawm hrang daih rual kan nih tawh loh hi lulian" ka ti chiam chiam a, "I lu aia ka lu a len bikna ka hre lo, i lukhum ka thawl ziah, lulian min ti lo mai teh" a ti deuh hluk a, "Hmeichhia chuan sam kan ngah alawm, Nutei chu ngati nge lo kal ve lo se i tih a?" ka tih chuan, "Nupa buaina te a awm hi, kan ţhianho chiaha awm ka chak vang alawm zin tura ka sawm che u. Kalvari han chah dawn ila a chhangchhe ropui si, Nutei bulah engmah ka zep chuang lo nain original friendship hi a hlu, in hriatthiam angin thil a hrethiam ve lo, min hriatthiam angin Nutein min hrethiam ve lo ang" a ti duah a, "In en hran a ţha hleinem, kan ţhian zingah a tel tawh a a hrethiam awm che e bakah inkawmhrang rual kan nih tawh lo ka tih kha" ka lo tih leh chuan, "Inkawmhrang a nih loh hi, in ngaihawm ka ti mai alawm. Fithangin a biak ţhin pa ka hriatchhuah dan chu a phone ka en sak aţangin a nia, ka dawp a, ngaihdam min dil pahin a sawi vek. Facebook aţangin kan inhria a, kan inkawm phawt a, kan inbe chho zel a a ti. Mipa zawk pawn ngaihzawng ka nei lo a nia" a ti nang nang a, han hnem vak ngaihna ka hre lo chuan a malah ka beng thlawrh a, "Naupangtein in innei ve ringawt a, a tirah pawh 'in in hrechiang si lo enthla phawt rawh, phone ah chiah in inbia a, inhrechiang lo a inneih ngawt tur a ni lo' kan tih kan tih kha. I khawngaihthlak sia i chawh bawk sia" ka tih chuan ka mal a ri ve thlawrh thung a, "Ka rin ber che vangin ka hrilh che a, awmze nei loah min hau vak vak suh, ka ţhen reng hi. Biak nei lo mah se ka ţhen tho ang, a ninawm emai. Ka youtube channel a a lan ve na zawng zawng pawh ka delete vek tawh" a tih veleh ka tho nalh a, aieng ka chawh kawi sa chu lain a ţhutna lamah ka chawi phei leh a, "I ţhen dawn tak tak chuan i inchei hlarh reng a ngai dawn a nih chu, hna thawk nasa viau mahla intuaihnum ve rawh, khawi i hmai lo dawh rawh" ka tih chuan phawk deuhin min en a, "Eng nge?" ka lo ti ve thung a, "I uikawm tehreng nen tunah lem a thlawna min hnawih i tum a" a ti a, a hmai a rawn dawh hnai surh surh tho. "Aw..i nalh loh ka hlau a nih hi, kan zin dawn lehnghal, ro deuh ka kalpui peih hleinem" ka tih chuan kan nui dun hak hak a, ka hnawih sak chhung zawng a hmui pet chungin thuawih deuhin a dawh a, "U Remkalam" Sangbollywoodin a rawn ti lut leh lauh tawh bawk. 

"Khawiah nge i kal?" ti a zawh pahin nur nangin ka en a, em a phur a, kawrfual eng lar deuh, a kerek thleng rak khawpa fual a ha a, bengbeh rih hmel deuh, chhawng nasa deuh a beh bawk. Bollywood lam ngaisang tih takah ngun a bun leh chheng tawh a, a ngo lo nain a hmel a chhe lo a, inchei pangngai deuh se chu Ramnghinglova hian a chang teuh lo. "Chawhmeh ka zuar, bawng kam bawl ka chah leh a, min zawrhpui leh rawh aw. U Fawnvela chu a va ţang ve, u Fithangi a tlan tih ka hria a nia aw" tih zung zung pahin a em chu a nghat a, a inhralh zo tawh aniang engvak mah a awm tawh lo. 

"Fithangi tlan chu engtin nge i lo hriat leh tawh a Sangbollywood? Hei aieng hi inhnawih ve rawh i kawr hak nen pawh a inrem khawp ang" Fawnvelan a tih chuan, "Ka nu leh u Valdiki ten thil an hre thei e...anmahni tawp hi world news. U Remkalam, aieng kha inhnawih ve i phal em?" ti a min zawh pahin min rawn hnaih nghal ruak a, "In ren lo ţhin, khawi keiman ka hnawih ang che" ka ti a, ka hnawih laiin Fawnvelan, "Sangbollywood, pu Lungmuana te mikhual kha i la star em?" a ti deuh thawr a, mitmeiin khap mah ila a hre lo der hmak. "Star ang chu...amah kha ka duh chi. Chumai a ni lo, khawvel leh van chung zawng zawnga hmeichhe awm ve te duh si, a ţhat dan kha a universal" a ti a, a hmai chu hnawih harsa khawpin a ţawng pah chuan a che nasa a, "Awm mai mai rawh Sangbollywood, ka hnawih lo tawp mai tur che a nia" ka tih laiin Fawnvelan, "Nutein a phone number a nei tawh bik a nia aw, hman zanah mitthi inah kan kal ho bawk. I nuten an hrilh tel lo che mi?" a lo ti thung. 

"Nutei chuan engtin nge a neih theih bik?" rang zet hian Sangbollywoodi chuan a ti a, keimah zawk min en reng bawk a, "Hmanni ah ka dil a min pe phal hleinem. 'Ka biak duh loh tur hnenah phone number ka pe ngai lo' a tia nih kha. Bollywood aiin pasalţha a thlang tihna mi u Remkalam?" a ti leh zat zat a, a lungawi loh hmel khawp mai. "Ka hre tawh bik nang amah zawt mai la, bakah Ramnghinglova i neih kha" ka tih chuan, "Hmm...a ţul leh ka kawp mai ang chu. Nutei chu min hrilh ve tal awm, chawhmeh ka zawrh nasat vangin tunlai ka hmu tam thei lo cheu a, dawrah nitin ka lo kal tawh ang. Naktukah principal te school ah ka zuar dawn. I lo kal ve duh em?" a ti a, lu ka thing zet tawh nain, "An phal em ni?" ka ti leh hnuhnawh a, "Phal ang chu...naupang hmuh loh turin office ah kan zuar mai dawn alawm. An chawlh laiin kan kal ang a, aieng i keng ve ang a" phur tak hian a ti a, Fawnvela ka en a, engmah sawi loin min lo en ve vel mai mai a, "Nia...ka peih leh ka zui ang che" ka ti chu a lawm khawp mai. "Ka kal dawn...Nutei chu zanah ka rawn hmu ang, mikhualpa phone number ka dil ve dawn. Pasalţha in a neih theih laia neih loh bik chu a zahthlak" a ti a, em chu lain nui awr awr chungin a chhuak a, Fawnvela ka melh rum ve thung. 

"Nutei kha sawi kher mah ta che nuam a tih ve rih em hi" ka ti nghal a, a ngaipawimawh lo ropui si, "A ho emai...ka hrilh loh te chuan Msa hian a zar char char che anga principal in in inngaizawng emaw a ti leh dawn a sin a chhaw em hi. I chanchin min zawt ziah ka tih kha aw, mitthi in kan kal tukah pawh khan min chhuahchhal" a tih chuan, "Engvangin?" ka lo ti thuai a, "Remkalami a zaithiam i tia a zaithiam loh tawp kha a ti. Kan hriat miah lohin nuih a lo insum char char aniang" a ti chu ka nui duai a, "Awii...what a funny thing, ka zai rin poh leh min ţhut hnaih ka ti reng a ni, a lo ngaithla reng a nih dawn chu, a che duhawm thei e keichu ka thi ţhaks Fawnvel" ka ti a, nui vur vur chungin Fawnvelan a kutzungpui min hmuh zauh a, "Hmanniah 'Fawnvel nupui nei rual ka ni tawh em?' a tia, in la inngaizawng si lo a, 'Aih' ka lo ti daih. Nu Partei rawn zin leh hmain inngaizawng ngei ngei ang che u. Zanah ka lo kal ang, i nu chu kan din dawn nia" tih leh thawh a rual a, "Awm lo ta la engtin nge ka awm ang le? Tunlai chu chhandamtu i ni ringawt" ka ti hram a, ani lah a intithei, "Chhandamtu hian nupui ka ţhen tih hre rawh, kan inţhen dan a mak si, lungleng deuh chunga thinrim tel a ngai a, ka sawi peih tawh lo e a" a ti a, a kal nghal nul nul a, belchiang loin nupui a nei ve ringawt a a ti sual der a nih hi. 

Zanah ka ţhiante lo thlen hmain principal a lo thleng a, "Naupang hoin min rawn ken sak a, ei ve rawh" tih pahin sweet min pe ţeuh a, principal in min pek a nih vang aniang sweet dang aiin a thlum hmel. Nutei lahin, "Tlaiah Sangbollywood in min rawn bia a, min hau hrep, Fawnvela vang vek" a ti leh ţhin a, a insawh tau nghawng nghawng reng mai. "Zoram, engtikah nge i awl ang?" ka pa'n a lo ti ve khauh a, choka lama awm ve reng principal chuan ţhut pawh ţhu rih lo hian, "Inrinni a ni mai, ngati nge?" a lo ti vat a, "Ka ramkal naah min zui ve la ka ti, i tlu sual tawh em lo ang chu" fiamthu a ka pa'n a tih chuan, "A pawi hleinem, ka zui ang che" a ti a, min en reng chunga ka bula rawn ţhuin ka beng bulah, "Pangpar ka lo hawn ang che" a ti ve ngei a, ka duh thei a nia. 

"Nakinah leilet ah te ka la hruai ang che, nuam i ti viau ang. Ngawi te kan dawh ţhin a, hunawl i nei tlem em alawm mawle" ka pan a tih chuan, "Ka hna hi ka bansan mai dawn mi?" a lo ti fiamthu a, ka nu leh pate chu an nui hak hak a, hei hi u Zirbawnga nen an danglam ve na a ni leh a, sawi tur hre lo viau si hian ka nu leh pate a kawm thiam a, an ngaina viau a ni. A lo len loh hlek chuan "Zorama" an ti reng mai. "Inrinni ah i nu Nemtei hoin ramah kan kal dawn a nia, Remmawiin in lo nghak se, duh leh zanriah i rawn ei ve nghal daih ang a" ka pa'n a tih leh chuan, "A hun te lo thleng phawt se, tih tur a awm loh chuan ka zui ve ang che. Vangvat a awm angem?" a ti a, vaihlo zial pahin ka nu a lo nui leh hak hak a, ka pa'n, "Awm tawh lo e...vangvat te chu a hlauhawm hleinem, hman deuh pawh khan i nu Nemtei" a ti hman chiah tihah ka nu'n a luah a thleng ken laiin a khawng chawrh a, vaihlo pawh a baw nual mai. Principal lahin mak a ti tih a hriat reng, a nui hmel a bo hmak a, phawk hruin min en a, "Kha thil kha sawi ve ziah suh" ka nu'n a tih veleh principal hnenah, "A malah vangvat a kai a, midang awm laia inhlim a hreh sia, a zuan vak vak hnuah leiah a tal tawp tawp an ti. Ka pa sawn a kaih emaw a tia, an buai nasa alawm, ka nu chu a che chhe thei lutuk" ka ti sar sar a, a nuih ka rin tehreng nen min en reng chungin, "I chhun a nih chu" a ti daih a, a sual thiam emai a thingpui no a lian khawp ang. 

"Zoram, keini chhung chu kan ri pawp pawp a kan inhaw ngai lem lo a nia aw, i nu Nemtei hian tharum a ngah a, a thawh hreh lem lo bawk a" ka pa'n a ti fiamthu kual vel mai mai tawh a, "Awmphaw nena rawn len a ngai ange aw nu Nemte?" ti a principal in a fiam ve chuan ka nu a nui uar uar a, an inpawh poh leh ka hlim a ni mai. "Aieng hi burah hian ka suak chhuak anga lo chhin zel rawh aw" ka tih veleh bur chhin lak pahin, "Aw le miss" a ti vel a, "Hmm..min han ko duat vel a" ka tih chuan, "I zin daih dawn sia" a lo ti a, ka zin tur hi a vei em em mai a ni. "I nu saw ka fuihpawrh dawn em mawni" fiamthu a tiin a nui ve suk a, "Ka zin tur chu i va huphurh awm ve" ka tih veleh, "I ngaihawm ve reuh ang" a lo ti a, ka chhan hma hmain, "I nu leh pi Binladari ka rim tlut tlut mai ang, nu Mawisacheki nen" a ti a, zawi tea kan ti ti melh melh laiin Sangkhuma leh Fawnvela an lo lut a, Sangbollywood in a rawn zui bawk. 

"Ei ei ei...an ţhu dun vel. In va inhnaih ve, in va in magnetic tawh awm ve" Sangbollywoodin a ti lang lang a, "Nu Nempachang, Dawnfuha pianchamah kan kal si lo a, Kalvari te nupa an lawm lo lutuk a, Fithangi a tlan daih bawk si, khawhar hnemah zan khat vel lek riak turin kan zin dawn" Fawnvelan a ti nghal thawr a, ka nu'n, "A ţul lo" a lo ti hmak mai. "Eng nge a ţul lohna? Mi te pawh khawngaih ve la" a tih laiin Nutein, "Keichu ka lo kal ve lo ang" a ti hlauh a, "Chu, Remkalami a zin pawhin Nutei a awm dawn tho a, Kalvari te nen kan inhmu khat alawm. I fanu ang tho a nia, ka nu leh nu Lawmtei te chuan an phal. Remkalami pawn aieng zawrh tur a siam ţeuh hi, Kalvari in a zawrhpui dawn a, kan chamrei dawn chuang lo a phal ve mai la mawh...sumo chuan man vel chu kan intum thei vek tho a, khawhar deuh a kan awm hi min khawngaih lo mi mawh" Fawnvela chuan a ti leh ngang ngang a, "I va han chhe zet zawt tak" ka nu'n lo ti mah se, "In phal tiraw pa Dite? Kan cham rei lo tak tak ang. Kalvari a chhangchhe tawh sia, pastor nupui tih takah a zin hman ve bawk si lo, nupui ţhen hlim an inkhung tlawk tlawk ngai hleinem" ala ti tho a, principal nen thil dang kan sawi tawh hnuah pawh Fawnvela chuan a la dil char char a, Sangkhuman a pui bawk. 

"An phal loh hmel" principal in a ti sup a, a lawm hmel daih zawk. "Fawnvela leh Sangkhuma te i la hrechiang lo a nih kha" ka lo ti ve thung a, chutah rem leh rem lo va a bana kuahin ka lamah ka kuai hnai lehzual a, "Naktukah Sangbolywoodi rualin school ah aieng ka lo zuar dawn" zawite hian ka ti a, "A ţul lo" a ti tak nain, "Ka zin dawn a pawisa ka mamawh alawm, i hmelhriat thil zuar i zahpui ţhin a ni maw?" ka tih takah chuan, "Lo zuar rawh" a ti a, "I van fel tak" ka tih hnuah amah sawi deuh nawk nawk pahin ka meng zuk zuk a, nuihzat hmel deuh hian a hmui a pet a, lehlam a hawi nghal daih bawk. 

"Kan lo haw hunah min tir char char dawn nia, leilet rawh in tih pawn kan let mai ang, tractor pawh kan khalh hreh lo, pa Dite, i thing put ai kan pu vek bawk ang a, meizial thlengin kan sem chhawk vek ang che u, zan khat chiah a ni mai" Sangkhuma leh Fawnvela ten an la ti ngang ngang a, "In va han ninawm tak" ka nu'n a tih leh, "Ninawm min tih chuan phal tawh mai la" Fawnvelan a lo ti a, Fithangi bialpa ve deuh kha a hmu duh chiang lutuk. 

"An bengchheng emai Zoram bathlarah ţhu daih ang" tih pahin a ţul tur ka la khawm a, ka aieng dahna chawhtawlh ka pawm chhuak hmasa ber a, thil dang chu principal in min ken puiin bathlarah kan ţhu chhuak daih a, aieng leh bur vel dah nan kan hmaah stool kan hung thluah bawk. "I duh leh dil ve la a ni mai alawm. Keimah min dil daih suh ka pe ve dawn chuang lo che" ti a inchhung aţanga Nutei ţawng ri chu kan hre pha a, "Min pe ve rawh ka ti mai alawm ka be dawn ka ti hleinem. Min pek loh chuan hmelma enin ka en tawh ang che" Sangbollywoodin a ti ve thung. 

"Msa phone number an indil a nih chu. Khapa kha an duh ve em em a, a rapawm tehreng nen, hmui bengbeh a beh te kha i hmu em?" uar zeta ka tih chuan a lo nui hawk a, ka hawi kual a, pa Khawtea te bathlara nu Zonuni lo ding ka hmuh chuan ka phu zawk mai. "Eng nge a?" principal in a lo ti thuai a, "Msa ai mahin ţhenawmnu saw a hlauhawm lehzual. Bathlara ka awm tawh chuan min rawn en nghal zel, eng emaw deuh hlekin awm ila chu naktukah mi zawng zawngin an hre nghal a ni mai" ka ti zung zung a, kan men rei leh a meng rei ve a ni mai. 

"En ve lo mai rawh" a ti a, ka biangah dawmin min kuai her a, hmalam ka en tawh hnuah pawh ka biang a dawmna chu a thlah chuang lo, nu Zonunin min en reng awm sia. "Huiham...Fawnvela leh Sangkhuma te ninawm zia chu" ti a ka nu a rawn chhuah tak thutah chuan ka biang chu a beng thlawrh a, a kut a la sawn nghal a, a thip vang vang mai. "Nu Nemte, thosi in nei" lai deuh rut hian a ti a, chutah keichu tim daia min rawn enin eng emaw sawi tum niawm tak hian a ang zuau a, engmah phei chu a sawi lo. 

"Agarbati ka rawn la ang" ka nu'n a ti ve mai a, a luh veleh a malah ka chum pawp a, a na bawk aniang a kun vang vang mai. "Min ben dawn pawn na lo deuh hlekin min beng ve ta che Zochhur" ka ti tuar a, "Engmaw engmaw?" tih pahin a ţhu ngil a, "Zochhur ka ti, khati em em a na a inben tur a ni hleinem hmeichhia ka nih hi, i lai thei si, kan inah te chuan a magnetic chi vak lo, in inah chauh ka biangah dawm tawh rawh. Awii...what a very chhur" ka ti vang vang a, mipa ben leh hmeichhe ben chu a inthlau lutuk tlat. 

"Ngati nge what a very i tih zel a? Thi ta ila engtin nge i tih ang? What a very thi min ti dawn mi? I tuar loh hmel dawn e" a ti ve duah a, kan han in nel tak tak chu sawi tura a lo khawl lawk sa zawng zawng a sawi emaw tih mai tur a ni tawh. "Thihna em emah te chuan ka ti bik nang" ka tih laiin a ipte aţangin meizial a rawn phawrh a, "Aw haw wow" ka tih veleh, "Shhh" tih pahin a hmui zawnah a kutzungchal a dah a, "Mei i zu ngai lo emaw ka tia" ka tih chuan, "Fawnvela min tih hmuh a nih hi. Tlawn khat hi ni hnih ka ring" a ti ta mai a, Fawnvela mai mai chu, an inkawmngeih ka ti reng a ni. 

"Kha agarbati chu, Zoram, i hmazawnah khan vit bur la, thosi a tlem deuh ang" ka nu'n a rawn ti a, principal in a lak veleh a lut leh daih a, "Thil i va sawi tawh ngai lo ve" agarbati hmawr hliau paha a tih chuan, "Eng thil maw?" ka lo ti he haw a, "Star tih vel" zawi te hian a lo ti sup a, ka nui duai mai. "I va hre chak awm ve" ka tih hnuah, "Kha leh chen kha ka umzui che a, tunah chuan min umzui ve a hun tawh" ka ti leh daih a, min rawn en nghal vut a, sawi fuh ka va han inti tak. "Ka umzui dawn che maw?" nuihza aw zeta a tih chuan, "Dawn e le..min umzui leh umzui loh chu i thu thu a ni mai" ka ti a, inchhunga kan awm laia ka tih ang khan rang deuhin ka mit ka khap leh a, "Khatin ti ziah suh" tih pahin ka mit a rawn khawih a, "I tih hmasak ber phei chuan i mit i deh emaw ka ti" a la ti zui. 

Bura aieng kan thun zawh vek hnuah ding chhuakin a zi mar ar ar a, "Hey, i zin hunah tu nge ka rim ang?" tiin ka sam a rawn beng phe tel kher a, "I nu leh pi Binladari ka rim dawn i tih kha" ka tih chuan, "Nula mawle" a ti leh daih a, ka tho rang khawp mai. "I ngam awm lo e" nui chunga ka tih chuan, "Ngam ve tho e" a ti dam thlup a, "Nula i rim dawn maw?" nui hauh lo hian ka ti tawh a, a che chu tawp hmakin ngawi rengin min en a, vau zam der nan aieng ka chawhna fianpui ka ban nghal zat a, "Kan khuaa i rawn awm hlim aţangin Zoram Zoram ka tia, reilote ka zin bo chhungin nula rim i tum maw Zochhur?" tih paha fianpui ka lek chhuah chuan a lo in dang nghal a, "Nula chu han rim vaih teh aw, Sangbollywoodi leh Nutei ka enthlak tir dawn che a nia, min phatsan tu reng reng damin an chhuak ngai lo, i die a ni mai aw Zochhur" ka tih chuan a lu a bu zeuh a,pawi a sawi lo lutuk hi chu han fiam kual vel a nuam mawle. 

"Ka haw tawh dawn" a tih chuan ka nui duai a, fianpuiin ka vau zam der a nih hi. "Naktukah vawk chaw min lo pek pui la ka zin daih dawn sia" ka lo ti ve thung a, min chhan hma hmain inchhung aţangin Sangbollywoodi a rawn chhuak a, "Nutei saw tih takzetin ka hua, mipa phone number a nei ve dek dek a a ui ţung ringawt a, u Zoram, u Remkalami hian thingpui a lum sak tawh che em?" a tih takah chuan thingpui kan la in lo tih ka hre chiah. "Awii...what a very theihnghilh chiang ţhak, Zochhur, la haw suh thingpui ka lum ang che" ka ti a, Sangbollywoodi chu namsawnin inchhungah ka tlan lut nghal a, ka nu hnena, "Thingpui va lum rawh rawn ti ta che" ka tih chuan, "In ti ti puar dawn aniang chu ka ti mai" a lo ti a, a ngeiawm ve khawp mai. 

Thingpui chhuang nghalin bathlara kan chetna hnu ka ti fai pah a, stool chawi luh ka tum chu principal in min lo dangin, "Hei chu ka lo ti ang" a ti a, a chawi lut nghal daih a, Sangbollywoodin, "Principal hi zar buai hneh viau lo la chu tun ang hian in la inhnaih miah lo ang tiraw?" a la ti zui. "Ramnghinglova pawh i zar buai hneh a nang aiin u Nobawihi a duh zawk tho alawm" ka tih chuan, "Ramnghinglova mawl lutuk hi chu" a tih hnuah, "Naktuk chu aw, chuan u Zochhura bulah sawn 'Sangbollywoodi dawr ve rawh' ti ang che. Kan hralh zawh vek phei chuan nu Ţhuami dawrah thil kan ei dawn a nia, muttui aw my friend, ka nuten an rel che chuan ka hrilh zel ang che" a ti a, chhuna Msan i thil tur ka dah a tih kha ka hrechhuak zawk a, "I thingpui chhuan a so" an tih vangin ka en rih lo a, nakinah a rukin ka enchhin ang. 

"Zanin lum zia hi aw...Sangkhuma leh Fawnvela te ţawng peih lutuk vang vek. An thaw lumin inchhung a luah khat hneh lutuk" tih pahin ka nu chu puanin a inzap a, "Remkalam, kan zin thei aw" Fawnvelan a tih chuan ka phur ngang mai. "Zanin aţangin ka insiam nghal ang" ka ti a, principal pawh ka ngaihven tawh lo, min han umzui ve chhin teh se. Mipa hi chu han chhaihkual deuh ila an rilru a hriat mai, ka lerh hma bawk a hetiang kawngah hian ka zei ve riau. 

Aieng min pack pui nasa bawk a no lian deuhah thingpui ka pe ta bik lo a, "Muri kan nei a sin, in duh em?" ka tih chuan an aw vek a, dawhkan bula thingrem inhung chungah principal chu a ţhu a, muri pek pahin a bulah ka ţhu ve a, "Vawk chaw pek dawnah min rawn hrilh dawn nge ka rawn zawt dawn che" a tih chuan nuih vak pahin ka bengah ka sam ka zep a, "Min rawn zawt rawh, ka hun neih dan tur ka hre lo" ka ti chu a mithmul a kan ralh a, a nuih a za viau mai. 

A haw tur pawh bathlar aţangin ka thlir liam thlap a, zantin deuhthaw leng turin ka sawm ţhin si a, a hmeh en battery a hek dawn emai a pianchamah hmeh en leh battery ka pe ang. Inchhung ka lut chu, "Nu Nemtei hian u Zochhura hi a be ţha thei e, a mangang tawh aniang. Remkalam, i nu pawn a manganpui tawh che a nia aw, nei vat rawh" tiin Nutein min lo chhaih a, "Chuti ngawtin pasal neih a awlsam hleinem, awlsam se chu ka nei ang a, ka ţhen ţeuh tawh bawk ang" ka ti a, pindanah lut nghal daihin hruk puan leh inthlakna vel ka la khawm a bualin ka pan leh nghal a, principal hian min duh chiang mai, a awmdan aţang hian rinhlelh rual a ni lo.

Ka insilfai zawh hnuah, "Awii...Nute keichu a nuam ka ti e...a nuam a ni tawp mai. Customer tlem lai taka ka hlim hi ka inthiam lo, inthiam loh vanga hlim loh theih a ni ngawt si lo a" ka ti lut a, inhru hul thuak thuakin khumah ka mu nui zui var var a, ka hlim lutuk tihngaihna hre lo chu ka hui leh pap ţhin, principal in message a 'I zin hlanin nula ka rim ang tih chu cham rei suh, a theih phei chuan zin suh tihna' a rawn tih phei chuan, "Oh my aiwa" ka ti hluai a, ka lam a lo hawi tih hre lo vin Nutei ka nghawk chawrh a, eng thawm emaw a chhuah awk a, ngaihven tuma ka thawh meuh chuan a lo mu kawm hlun tawh. 

"Engati nge? Khawilai nge ka nghawk fuh?" tih paha a dar ka khawih chuan, "Ka awmah...a na lutuk Remkalam" a ti ţawk ţawk a, "A ni maw? Tunlai chu a boruak san lai a nia, ka hlim lai chuan ka bul hnaihah awm lo mai rawh kan la innghawk khaw lo mai ang a zia lo emai" ka ti chel chul tawh a, buaipui nasat ka tum nen, "Mu teh" a ti hlak a, 'aih' tih chi ni tawh hek lo, tihnat belh hlau deuha a bula ka mu chu min lo kuah chawt mai. Principal kha ka la chhang let lo a, chhan let ka tum lo bawk. Min umzui ve thung rawh ka tih khan ka ti tak tak miau alawm. 

"Ngati nge Kalvari hmu tura i lo zin ve dawn loh a?" ka ti ta nge nge a, Nutei chuan min mut hnaih sauhin, "Remkalam, keichu rilru lam natna eng emaw ka vei ve a nih ka ring. Inthlahrun tlat chang te ka nei. Bakah Msa a awm a, kan inkawmnel ve ţan chiah a, zin san nghal ka duh lo Sangbollywoodin a star ropui si" a ti sep sep a, "Chuan maw...ka sawi ngai lo nain mal ka inti ve ţhin a, Kalvari leh Puipuii ten pasal an nei a, nangin principal i nei a, Sangkhuma leh Nunui an inbe tlut tlut a, Fawnvelan nupui a nei bawk a, kan khua a ka awm lahin ka chhungte hmuha inlak pa ka tum luatah kan venga mite zawng zawngin 'mipa a nia' min tih phah a, tuman min ngaizawng duh lo. Msa hi ka duh chi a nia, mal deuhah inngai lo ila chu ka be ţha nghal hawrh miah lo ang, mahse ka khawhar a hnem a, ka ngainat chi, amah hrim hrim hi ka duh chi a ni bawk sia, ka biak char char phah a nih hi. Reilote inbiak loh pawn ka khua a har nghal zel. Ka khawhar zual lai taka min be duh tu awmchhun a nih vang aniang, a landan ang hi a ni miah lo a nia aw, tuman in belchiang duh lo a, a la naupangchhia ve lutuk, a rilru a chhe miah lo ang" a ti leh malh malh a, chhan ngaihna pawh ka hre lo, ka chil ka lem leh khalh zel ringawt a, "Sangkhuma a awm loh chuan dawrah kan inkawm tam ve thei deuh ang a, inhriatchian zel nan inkawm tam ka duh. Ka lo kal ve lo ang, bakah ka tel lo in a nuam zawk ang. Naupanlai aţanga inkawm chho char char leh puitlin hnu chauha inkawm hi chu a inang thei lo, Kalvari te nen in inhmu khat si a, in ţhianho in kal rawh u" a tih takah chuan, "Kan en hrang bik miah lo che a nia aw. Sangbollywoodi ang deuh hian min rawn pawh a, rawn tlangnel thiam thiam a ni mai. Kawm duh loh bik kan nei ngai lo, Sangbollywoodi te hi kan hau kan hau nain kan duhsak tho a nia, min rawn nelna a la rei lo a, hmelhriat enin kan en ngai lo, mahse tunah chuan kan ngaina vek tawh" tiin ka ţawng thlamuan a, "Nang chuan min enhrang lo a, ka hria alawm. Mahse midang hian ip deuh chang an neiin ka hre ţhin a, Msa lah kha an huphurh ropui sia" a tih leh chuan, "I ngaihdan mai mai a nih chu. U Lalhuma leh pu Taipuia thleng hian tumah kan huphurh ngai lo. Msa pawh an hrechiang ang a an kawmngeih mai ang" ka ti a, keimah ber hian ka ngaithei lo thung a, Msa awmdanin a zir lo miau a, pangngai deuhin awm se tuman kan huphurh lo tawp ang. 

Zinga ka harh chuan ar pawh a la khuang lo ang. Vawk chaw pe tur mai maiin tukin ang hian ka la tho phur ngai lo. Nutein min lo la kuah a, a mang a chhiat tehreng nen min kuah tlaivar ţhak a, a thusawi kha a ti tak tak aniang, a ruka a rilru a lo hrehawm ţhin phei chuan a zia lo emai haw tura nawr chi pawh a ni tawh lo, kan hmuh phaka a awm phawt chuan a nuam tih dan dana awmtir rih tawp chi a nih hmel. "Nu, i tho tawh em?" tih pahin bang ka kik keuh keuh a, "Nu Nempachang i tho tawh em?" ka ti leh chiah chu, "Lalremmawi, khatin mi han ko leh vaih teh, i zin lo chiang khawp ang aw" a rawn ti khar khar mai. "I thawh chuan eih ve mai la, mahniin ka tho hma peih hleinem" ka tih chuan, "Ninawm lutuk thingpui va lum rawh" a ti a, phone ka hmet eng a, a la hma khawp mai. 

Phone hum chungin pindan aţangin ka chhuak a, nizan khan ka en zui tawh miah lo a, principal in flying kiss thla lem a siam sak kha min lo thawn chu niin, mei ka nun laia ka nu lo tho chhuak chu lo en ranin, "Engati nge khati kel kul a min en?" a tih veleh, "Nu, ka au vak chak" ka ti a, hmunfiah a chuh nghal rawk rawk mai. "Va au rawh...i au vak chak leh pawnah chhuak la va au rawh. Zingkar aţangin i mumal lo nghal a, i zin tur phur in min runluih vel em ni a?" a ti khar khar a, min vaw dawn emaw tih laiin thuk bul vel a rawn hawl daih a, ka thaw huai mai. 

Thingpui kan in zo chu, "Thing va thiar lut rawh" a ti lehnghal ringawt a, "Vawk chaw pek ka tum a sin" ka tih chuan, "An la mu, kaitho rih lo ang, thing va thiar lut phawt rawh" a ti daih a, "A awihawm loh ve chiang e...thing min thiar luh tir i duh vang mai mai a nih kha, ni lo se chu peih lo mah ila min tir leh daih tawh ang" ka ti a, min hauh hmain ka chhuak nghal a, thing tuah tur chu ka thiar ţuih ţuih a, ka phun pah reng bawk. Thing pawm ţun chunga bathlar lam ka pan laiin tu emaw hi a rawn faifuk a, ka hawi let rang nasa. Kawngpuia principal lo ding ka hmuh rualin ka inher let leh hmak a, theihtawpa ringin ka faifuk let ve thung. Thing chu bathlarah ka dah rih a, ka hmai sir lam chiah a hmuh theih tura insiamremin thing la khawm tur angin ka awm lui a, rin ang ngei ngei a, "Huih" a rawn tih chuan en pawh en lo vin, "Huih huih" ka lo ti let a, a rawn chhuk ta nge nge alawm. 

"Tih pui i ngai em?" a rawn ti nghal a, a mit a nawm loh apianga a tarmit vuah ţhin bial kulh mai kha a vuah leh tawh a, "Ngah nge kawr var i rawn hak vawk chaw kan pe dawn ka tih kha? Thing hi inchhungah ka dah lut dawn, hei bak a ngai tawh lo, ti ve duh lo mai rawh" ka ti a, nu Zonuni zing tho an bathlar a rawn chhuak chu ka hmu leh hman chiah chiah a, "Remkalam, nimin chhun a lo kal kha tu nge?" a rawn tih chuan Msa thil min pek tum kha ka hrechhuak leh chiah, ka ngaihsak lo ve chiang a nia. "Ka hre ngai bik lo" ka ti daih a, 'E' a ti ve mai ang chu tih nak laiin, "Khatiang rang riai ruai chu hnaih reng reng suh, buaina a rawn siam dawn emaw ka lo tia" a ti a, a sawi thui hmain ka lut daih a, kan Zochhuran a hriatthiam loh ka beisei. 

"Zochhur, lo lut la thingpui lo in ve rawh" ka ti lang lang a, ka nu'n, "Khatin ko mah ta che, mawl leh lutuk, inthup ve deuh ţhin rawh ka tih kha" a lo ti leh hman a, ka chhan hmain Zochhura a lo lut a, kawngkapui bula ţhutthleng seiah fel thanin a ţhu a, a inha var lutuk chu a ţhutna lai bik a eng phet phetin ka hria. "I va tho hma ve Zoram?" ka nu'n a lo tih chuan, "Remkalami nen vawk chaw pek kan tum a" a ti tawp mai sia, ka nu'n min en rualin ka inher hmak a, "I tho hma ka ti reng a ni" min la ti zui. 

Thingpui ka pek laia Zochhuran, "Dar engzatah nge i thawh?" a tih chuan ka nu zawkin, "Awi awi awi...a tho hma lutuk, a thawh te chuan ar pawh an la hnar bawrh bawrh ang chu" a ti kher a, "I ninawm emai aw NPCh" ka ti a, a la hriatthiam loh hmel em em zui, Nempachang tihna a ni reng sia. Zochhura hmazawnah ţhuin a thingpui in chu ka nghak a, "Vawk chaw ka nei a, thingpui in zawhah ka va la ang" a ti a, min umzui tawh tu zawk tur a ni bawk a ka hnial duh miah lo a, vawkchaw lak ngai lo a min rawn pek zawk theih chuan a hahdamthlak dawn lutuk. 

"Pu Ropuia te hi an tho tawh angem le? Nimina i buh pho kha her tir a ngai ang a, i uten kan nei lo an rawn ti leh tawh a" ka nu'n a tih chuan, "Aizawlah buhfai ţha deuh deuh lei tur a tam a lei ve mai rawh se, leilet buh thawn reng kher a ngai lo a hek, hlawh an nei ve ve" ka lo ti tan tan a, Zochhura awm ve mah se a ho, ka ute hi chu ka ben chakna a rei tawh, ka beng ngam lo mai mai a nih hi. 

Zochhuran chaw nawi a lak hlanin ka nu'n min khak ta chiah a, "An ninawm em alawm, mipa hi chu an tlaw leh lutuk a, a awm awm ei ve mai mai ang hmiang" ka ti a, "Min han chhang leh teh" tih pahin suankual a lek uai a, "Chhang" tih leh bathlara tlanchhuah ka rual a, min um leh peih der si lo. Zochhura lo thlen rualin kawmthlangah ka chhukpui a, "Vawk chaw pek hi a ninawm teh mai a nia aw. Tunlai tak chu ka pi Binladari a dam ţha zawk a, a dam ţhat loh phei chuan ka pek kep vek zel" ka ti zung zung a, vawkin kan thlen thlak rualin an lo ri nghal teng tung a, "Awii...in bengchheng lutuk Reuben ka pe dawn reng cheu lawm. Stephena lah hi chuh helh thei si" tiin ka hau nghal a, ka thusawi an hrethiam mang si lo, ka hah ţun zel. 

An chaw tur ka siam nghal mawlh mawlh a, ka zawh veleh, "Ka siam sa hi Stephena chaw kuangah khan lo chhung la, Reubena ei tur ka lo siam leh nghal ang" tih pahin a dinna lamah bucket ka khai phei a, a ke bula ka nghah rualin a lo khai ve nghal mai nain ka let leh hnuah, "Khawi zawk nge Stephena?" a rawn ti a, vawk chaw min la pek pui lo tak alawm. "A te zawk kha Stephena a nih kha, Reubena pawh pe la a pawi chuang lo a inang vek" ka ti a, belpui ung khek khuk aţangin Reubena chaw tur ka suak chhuak zui nghal a, ka kun chiah tihah a ri bur a, ka hawi chhuak lehnghal a, vawk an bengchheng zual sauh a, bucket leh vawk chaw baw nuai chu ka hmu ngei, Zochhura hmuh tur a awm ve lo. 

"Awii...ka duh thei lo, khawi hmunah nge i in transfer Zochhur?" ti a au chul chungin vawkin lamah ka phei a, kan vawkin hi a kan euh avangin hnuai lam ka bih vat a, a lo awm ngei bawk. Vawk chaw kuanga a vawk chaw chhun tum a tawlh thlu ang a, hnuai lamah a tawlh tlang daih tih hriat reng, vawk ek zinga tawlh thla a nih vangin a bal nuan a, a rimchhe viau bawk ang. 

A chet ţuah ţuah laia, "A na em?" ka tih chuan a ngawi reng a, a tlak hlim aţang tawhin thawm a la chhuah eih lo. Ka nu te pawh mihring len lohna tawk tura sak tur a nia, vawkin an sak hlim aţang tawhin, "A sang mah mah ang in zei lo lutuk, vawk chaw pe tu tur ber ka nia, ka tawlh vaih chuan ka tawlh tlang daih dawn a nia" ka ti mawlh mawlh a, an ti lui tlat a, tui nen a huh chiau pur tawh ţhin si, mi pawn an dang vek zel a, keini ai aia vawkin ban sang pawh an tam, tuman hma lam kaw huauin an ti ngai lo, vawk chaw pe tu tana him turin an tia, kan in leh a chheh velah hi chuan inring renga awm a ngai, kan vawkin pawh a him lo. A chaw kuang awmna hi chu a pawn deuh avangin a kaw lai a dang a, a tlak theih loh, chaw kuang awm lohna lam daihah a ni kan Zochhura chu a tawlh thlak tlang daih ni. 

"Nu, lo chhuk lawk teh ka che buai a nia" ka ti tuar tuar a, "Eng nge ni?" ka nu'n a rawn tih rualin ka pa hoin, Nutei te nen pindan lam tukverhah an rawn dak ţhap a, "Principal a tla daih, min rawn pui lawk mai rawh u" ka ti chu an pil nghal ţhap a, an rawn chhuk thawm ka hre thuai thung. Keichu Zochhura ngaihven tumin vawkin piah aţangin a tlakna lamah ka chhuk thla a, vawkek zingah chuan a awm tawh bik lo, a piahah lo ţhuin a en ngai a en tlawk tlawk a, "Zochhur" ka tih pawhin a che eih lo. 

"I tla na em? Kan vawkin khi maw ka nu duhdana an sak a nia, ka pa'n sak ţhat a ngai a tihna a rei tawh, a la hman lo a" ka ti zung zung a, sawi tur dang awm hek lo. "Ding rawh chho ang" ka tih pawhin a en ngai a la en reng a, "Chho vat ang school kal i ngai lo mi?" ka tih chuan muangchanga inherin min rawn en a, ţap mai tur te pawh a ang zawk. "Zoram, i tla na em? Helai hi a ninawm tak tak a ni keipawh ka tla lek lek fo mai, ka lo tihsual tir a" ka nu'n a tih takah chuan a tho a, ka nu chhan tuma a ka a ang chu a uak ţhat ţhat mai. 

"Ka ten" tih chiah a sawi, ka banah na tawkin a rawn hmer a, "A na..a na" ti mah ila min hmer na zual sauh a, kan chhoh hnuah pawh min thlah duh lo, ka nu te an awm lo bawk a, "Min zui phei rawh" a ti hmuk a, nuam lo ti chung chungin a in lamah ka zui phei a, kan mi tawh ten min biakin kan chhang lo ve ve bawk, kan vawkin leh ka nu vang vek. 

Inchhung kan luh chuan Human a lo lawm viau nain rang deuhin Zochhura chu bualin ah a lut a, min pawt lut ve zel bawk. Bucket chu kawkin, "Min leih pawp rawh" a ti a, a uak leh ţhat a, a va han ten awm em em. Bucket ah chuan tui a indawh khat vek bawk a ka chawi kang a, vawi leh khata ka han leih pawp chu ka chawn a rawn man a rawn man mai. A hmai leh a lu a tuai pawp pawp reng bawk a, bucket khat pawp a ka leih hnuah pawh bucket dang a kawk leh a, a bal zualpui ka leih fai hnuah zaizirin chhuak turin min hrilh a, bualin kawngkhar a khar nghal hmak a, ka haw nal nal. 

"A zahthlak thei e...vawkchaw vawikhat min pek pui dek dek a vawkin hnuaiah a tla tlang nghal ringawt a, keipawh ka bal vek" ka ti lut a, "Niang chu....nikhat tawp hun insiam a thawm ţhat a ngai a ni. I pi Dari lahin min hau ngun tawh, tunlai vawk chaw ka pe khat a, ka lo mangnghilh pek a ni" inthiam loh hmel deuhin ka pa'n a ti charh charh a, "Hman veleh Fawnvela leh Sangkhuma te nen in ti dawn nia" ka nu'n a lo ti a, inbual turin ka lut zui nghal a, kan Zochhura chu chaw a ei theih pawh ka ring lo, a zia lo emai. 

Inbual zawh hnuah, 'Eng nge i an?' tiin message ka thawn a, ka nu'n chaw ei turin min ko zui nghal a, kei tak pawhin chaw ka ei thei bik lo. Chaw ei khama hmun kan tih fel hnuah ka phone ka en leh nghal a, 'Ka uih' tih zawng a lo ni. 'Awii...kan thiam loh a nih kha. Ka pa'n kan siam ţha nghal dawn nia a ti' ka ti daih a, chumi hnuah, 'Vawk ek rim chu rim dang aiin a zia alawm, tuar hram hram rawh' ka va ti leh a, a insiam aniang a en lawk lo. Minute 5 vel ka nghah hnuah, 'In vawkin kha a skew emai vawkek ah ka tla daih alawm' a rawn ti a, ka nui ve ta nge nge a, nui lem ka va thawn ţeuh a, X hlang min rawn thawn thung. A nuih a za ve lo tihna a ni mai. 

Ka hriat tham tur lek hian, "A la kal lo deuh ang" ka ti a, in aţanga tlanchhuakin Zochhura inah ka tlan phei a, kawngka a lo kalh mek a, ka nang hman chiah chiah, min umzui zawk tur a nih laiin keiman ka pan leh a, kan vawkin vang vek. "Eng nge a?" a lo ti nghal a, chhuanlam tur dang ka hre si lo, "Ka rawn hnim dawn che" ka ti ta ringawt a, chahbi chu ak ţhain a ding rem ve mai bawk a, "Kut kawr ka lo nei hlauh a" ka pan hnaih laia a tih chuan, "Engatan?" ka lo ti vat a, "Chaw ei nan" a ti deuh hmuk bawk si, ngawi rengin ka hnim a, a rimtui inhnawih rim bak rim dang ka hre lo. 

"I hnarah a cham laklawh mai mai a nih kha vawkin leh a kaihhnawih rim engmah ka hre lo" ka tih chuan thawveng huai niawm tak hian a thaw deuh hawk a, "In vawkin ang kha mizoramah a awm ngai lo, ka hmuh vawikhatna" thutak deuha a ti chu ka ngawi hle hle a, han chhan vak ngaihna a awm lo. 

"Ka kal dawn...aieng i rawn zawrh dawnah min hrilh dawn nia" a ti a, kal mai a tum chu a banah lo vuanin ani pawhin min rawn en nghal vut a, sawi tur ka hre bawk si lo, naupangchhia ka nih tawh loh vangin atthlak deuh ka sawi ka hlau si, engmah sawi lo va han kal tir tawp ka hreh bawk si, engmah ka ka sawi tak lohah chuan min rawn thlekin a mithmul a kan ralh a, "Tlaiah vawk chaw min lo pek pui" ka ti chiah chu a kut a la let rang teh a sin. Ka nui vak a, "Ka uang a nih kha, boruak uap ţun kha ka ning em a, ka rawn kal hmain ka lo hrilh ang che. Paratha ka rawn ken dawn che nia ka kang thiam alawm" ka tih leh chuan a nui ve ta nge nge a, "Ka lo nghak ang che" a ti a, a kal rualin keipawh lungawi deuhin ka haw a, atta hmeh a nuai nghal char char ka ngai. 

Nutei hnenah, "Vawiin chu nangmahin dawrah kal leh mai rawh aw atta ka nuai dawn" ka ti a, a hriatthiam hmel vak loh nain, "Pawi chei lo, Msa a lo leng thei a ni mai" a ti a, a phur em em zawk a, Sangkhuma leh Fawnvela te chu ka la hrilh duh lo, min hau hrep dawn a ka ngaithla peih rih lo. Ka nu te chhuah hnuah ka chhang kan tur chu ka buaipui nghal a, a lungawina tur khawpa tuia ka kan ngei ngei a ngai ang. 

CONT...