KEIMAH, THINGTLANG NULA (FINAL SEASON) 15

KEIMAH, THINGTLANG NULA (FINAL SEASON) 15

"Nute, Msa a lo len loh chuan lo haw la min lo insiam pui teh, ken duh ka ngah lutuk a insiam ngaihna ka hre lo" tiin dawr a Nutei awm ka va phone a, ka pi Binladari dawrah pawh ka la kal hman lo. Ka pa leh Zochhura an la reh vang vang nain an lo haw har ka ring lo. Park a kan len dawn phei chuan insiam vat vat ka duh. Buhzem ka ti fai a, ka me vekin ka inhre lehnghal a, sana a kal duak duak mai. 

"A lo leng dawn...tunah chuan Sangkhuma nen dawr kawtah kan ţhu mai mai, vur kan ei, nu Ţhuami dawra tlangval chawl ve pakhat lu ka mehsak a, tlaiah pawisa ka pe ang che. Ţha i tih ang ang kha keng tawp rawh" a rawn tih hnuah, "Aieng bur hnih ka hralh bawk" a ti a, a ţha khawp alawm. "Nih leh zanah tal min insiampui ang che, tlaiah ka leng dawn si ei ka rel dawn" tih leh phone dah ka rual a, sana enin dar12 a ri chiah chiah. Chawhmeh siam thar vek a ngai a, len hmaa ka tih zawh hman ngei ngei a ngai bawk. 

"Dal kang leh hluah i la a ni mai alawm" tih pahin thirbel inkhai ka la thla a, tlaia ka awmdan tur ngaihtuahin ka nui var var reng bawk a, a theih hram chuan laih loh ka tum tawh ang. Thingkung hnuaiah ka ţhutpui mai mai ang a, sava an rawn hram hlauh leh an hming ka lo phuahchawp ang a, a awih leh vek dawn a, a nuam dawn lutuk ringawt. 

Dal ka sil hnuah mei ka nun a, tui ka chhuang hmasa te te a, gas a kan dawn pawhin tui lum hmasak phawt a ngai zel, gas ka ren loh chuan ka nu'n a rem remin min vawm a ni mai. Kalvari in min rawn phone in, "My friend, ka thinrim zia hi, u Rinchuta nen pindanah a rukin kan inhau a, bung deuh deuhin min chhang char char" a rawn ti nghal zung zung a, "Engati nge in inhauh a?" ka tih chuan, "Ka buai vang mawle...a haihawt si, a thil zawng hi a tei kual reng kher zel a, hmun ka phiah lai laiin a rawn vei sek a, ka thinrimin a keah ka hawl sak nawk nawk kha" a ti bawrh bawrh a, buaina an nei ve reng mai a ni. 

"I thinrim chhan a ho thei emai, chhangchhiat i ngeih lo a nih kha" ka tih chuan, "Tunah a titau mek, u Rinchuta thinrim chu a buaithlak lutuk, ţawngtlem sa nak laiin 'ka ţawng lo tawp ang' a tia, a ţhu tum bur mai. Fate kan nei ve duah tawh a, pa berin a 'ka ţawng lo tawp ang' tih te chu zia lo deuh a sin" a ti hlak hlak a, dal vil paha bia ka ni bawk nen ka thlan nasain, "Awii...khawlum lai lehzel chuan inhau lo teh u. Ţawng tum lo pawh nise zawhna zawt char char la a chhang awm che emai my friend, MHIP hruaitu i ni tawh ang chu tih nak laiin ngatinge ho te teah in lo la inhauh reng a?" ka ti a, ka thlan chu ka hru leh ţhin a, kan in hi chu a lum ve chiang a ni.

"Nupa te chu a inhauh loh theih hleinem bakah a thil zawng hi a tei kual reng zel a, a bo na lai awmah khan zawn ve mai ţhin tur a nia. Nizan a lenna aţangin tengtere mu kan tur a rawn hawn ţeuh bawk a, ka ha a na vek tawh. Ar vulh lah hi tui inti hle siin a enkawl thiam lo a, a talh phal bawk si lo, hming a neih tir vek a, engtin nge maw hriat pawh a hriat hran zawk ni?" inzawm lo zet hian a rawn ti duah a, ka lo nui kar kar mai. "U Rinchuta hi chu a dangdai ve e" ka tih chuan, "U Rinchuta a dangdai lo ngai lo, hmanni pawh a ar vulh lai pakhatin chaw a ei ţha duh lo a, 'a titau e' a ti mai a, a buai nasat kha. 'Kan inhrethiam tawn' te a tia, ran reng reng hi lainat loh a nei bawk si lo, naupang leh ran nen kan chhangchhe lutuk ringawt" uar zeta tiin a nui ve ta nge nge a, "Hmanniah ţhenawm tlangval nen an chhuak a, a ipte ah a rit lutuk a scooter aţangin a lo tla daih lehnghal a, a sil rei alawm. Karkhat chhung vel chu a kal kak ţuang ţuang kha, scooter hi melh pawh a melh peih tawh rih lo" ti lehin a nui hak hak a, "U Rinchuta hi chu a all go lo ve e...a zei lo si, hmarcha thak pawh ei se a si thiam lo ang, vawikhat na reng reng chu a luah khan chhu pawp chhin teh, a thil thlir dan a danglam deuh ang" ka ti a, naupang au ri ka hre zui zat a, "Helamah lo bengchheng suh u" a tih hnuah, "Naupang hi an la te si, lian deuh tawh se ka rawn zinpui ang, ka ngaih theih zia che u in hre lo mai mai a nih kha" a ti leh a, "Awii...tunlai chu tumah ka ngai hman ve lo, bialpa ka nei thut maithei a, ka hman hunah min ngai chauh rawh, a nih loh chuan ka tan pawh a inthlahrunawm ve a" ka ti kual vel a, "Over thei viau suh Lalremmawi, bialpa sawi hian alh hluai i tum nghal zel" a tih chuan, "Ka alh chak e...min lo hal" ka ti a, uar zet hian kan nui dun a, a khekin ka khek a ni ber, Kalvari hi chu ka ngai ve chiang a ni. 

"Pasal i neih dawnah thurawn ka la pe ang che, engkim ka hre vek tawh a nia aw" a tih hnuah, "Hmanniah u Rinchuta hi tuikhurah a tla a, a hlau aniang tun thleng hian mumang ţha lo a la nei ţhin a" a ti leh daih a, ka ngaihtuah vang vang hnua, "Rulhlut hlo eitir rawh" ka tih chuan, "Chutiang ei ngai chi a ni lo. A hlauh vang alawm, 'ka mumangah tuiah ka tla ziah' a tia, harh vang lo hian a invai leh buan buan zel, ka khawngaih tak tak a ni. My friend, hrilh tur che ka ngah thei sia, phone a inbiak ringawt hi ka duhkhawp lo ţhin" a rawn ti duah a, "Same to you too, kan inbiak zawh hnuah ka sawi duh ber ka hrechhuak chauh zel" ka ti ve a, a pi te chanchin min zawt leh a, a pu phei chu a ngaihtuah khawp mai. 

"Principal chu eng nge a an dawn awm a?" a rawn tih chuan, "A zia a zawi lutuk, amah hrim hrim hian thawm a dim a, a hnar ve pawhin kan beng bulah thosi a rawn vi emaw kan ţhin. A zei lo a, a chhur bûr mai bawk a, lai thei tak a ni, min hmuh tawh chuan a lai lutuk hi a pen rual zel, a zah viau chuan a aw a ri chhuak thei lo ţhin" ka ti zat zat a, a lo nui uar uar mai. "In inmil viau ang, ka lawmpui che e...long live Remkalami" a tih chuan phur zet hian, "Same to you too" ka lo ti leh a, "Tlaiah park ah kan leng dawn nia aw, vawk chaw min pek pui lahin vawk ekah a tawlh thla daih a, mut kawr nen exer a la ţhin bawk. Nakinah ka la hrilh vek ang che, Zochhura chu a hmelţha teh mai a nia aw, thlalak ka lo thawn che kha" ka tih chuan, "Nia...a hmelchhe lo, mahse a fel leh fel loh ngaipawimawh zawk rawh" a ti ve ngei a, "A fel lutuk, 'ka nu'n hmeichhe bum turin min hring lo' ti chi a nia, dawt a sawi chuan a kaih er ngang ngang zel" Zochhura hmel mitthla chung hian ka ti a, mittui tla phunga ka'n nuih chu le. "A ţhat hlauh chu....pasal neih a ngai lo a ho mai mai i tih liam mai mai hmain nei ang che. Nausen ka pawm tawh lo a, ka rai lo bawk a, ţhianah ka ţang duh a nia" a ti nghal ringawt a, rei deuh kan inbiak leh hnuah kan duhtawk ve thei hram a, zin kan tum thu ka zep tlat bawk. 

Ei ka rel fel hnuah ka inbual a, ka pa leh Zochhura leh ka nute pawh an rawn haw har lo, kan inah rei awm lo vin intifai turin a phei a, a haw hmain, "In phal chuan Remkalami nen park ah kan kal mai mai ang, ka la kal ve lo a" a ti thlap bawk a, ka nute pawn an lo remti ve mai, rei lo turin min chah ve ve thung. "Zoraman vangvat kai a hlau lutuk a engmah a tih pui tak tak theih loh, thingpui sen a in reng ringawt a, thawm ri hlekah 'eng nge?' a ti zel bawk si, ram hna thawk chi a ni lo reng reng. Haw lamah lah a hah em em a, kan chawl ngun alawm" tih malh malh pahin ka nu'n a hnathawh kawr a hlip a, a kekawr a beng fai zui leh thuak thuak a, "Ram a kal ngai lo a a awm ve tho alawm, kan hruai kan hruai a nga a zia ve mai ang, nuam a tih em kha maw" ka pa'n a lo ti ve charh charh a, thingpuite ka lum a, ka pek hnua, "Ka insiam dawn" ka tih chuan ka nu'n, "Lalremmawi, i sam kha dum teh, dum lul teh, a pheng buk si, chaw nawi vawm khawm a ang emai" a lo ti bawrh bawrh a, "Khatiangin fate ti vak vak zel suh, ka zin haw ah ka dum dawn reng" ka ti a, pindanah ka lut daih a, ka thawmhnaw hak tur ka thlang ulukin thingkung hnuaia kan ţhut tak hlauhah tiin a bal lang lo tur ka ha a, pheikhawk ka zawnna lamah u Zirbawnga min leisak kha ka hmu chhuak a, ka bun ta lo hmak kha a nia, ka dah rei lutuk a mei a hem phawt loh chuan a savun a che thei tawh lo. Chapal hnuai pan deuh, ka nu min leisak bunin ipte ka ak duh em lo a, ba ka ţhing pah ang ka ti tak nain kan inhnial leh ngei awm si a, nakinah keimahin ka kal zawk ang. Ka pawisa batute hian min zah lo leh lutuk a, ba ka ţhin apiangin min lo hau hrep zel, ka chhang let char char zel bawk. A ţhenin min fak chiam zel thung a, aieng vang hian tawnhriat ka ngah phah khawp mai. 

Ka insiam zawh vek tawh hnuah Zochhuran min rawn phone in, "Ka rawn lam kher dawn che em? A ngai angem?" a rawn ti a, hetianga miin min la zawh ngai loh vangin, "Ka hre nang" ka lo ti hu a, "Ka rawn lam ang che" tih leh phone dah a rual a, a taimak thlak e...a tihdan hi a khirh thei tak tak a ni. Sana ka en a, kal chhung leh haw leh chhung nen, park ah darkar chanve vel bak kan awm hman dawn lo chiang sa. 

Min rawn sawm thlap hnuah kan chhuak a, hun kan neih tlem sa nak laiin u Lalhuma kan la tawk zui, "Taipuia nupui ka hmu chiang ve chauh a" tiin a hmui hupin a nui kur kur a, "Awihawm loh e...Lalhuman a rukpui aniang an tih vek kha" ka tih chuan, "Ka inrawlh lo aw Lalremmawi, ka accident vel kha, tunlai chu Taipuia te inah ka kal ngai hleinem. Nichin khan a hmai phih zo hlim ka hmu a, ka hai alawm" a ti a, mahni hmel landan hre lo a ni mang si lo, za deuh hian a nui khur leh chur chur a, Zochhuran, "A ru sual em ni?" a lo tih chuan, "Duhtaka a ruk chu ni ve e...a inchei reng ka ti reng a ni. Taipuia nu hnawihsen pawh a kawm kaw dûk tawh" uar zet hian a ti a, kawngsira ding kan ni bawk si, "Kan kal dawn" ka tihin, "A la ngai lo" a ti tlat a, "I hmu zo ve lo min ti min tia, Taipuia nupui ang neih ai chuan neih loh ka duh zawk. Lungphu ţha lo nei tan phei chuan en chi a ni lo reng reng" a ti a, nui vak vak chung hian a lu a thing a, "Hmuihmul a nei Remkalam" tiin za deuha nui chung hian ka darah min rawn beng a, "Mipa em ni?" Zochhuran a lo tih chuan, "A ni lo chu a tia lawm" a ti a, u Lalhuma leh pu Taipuia hi chu an insawisa peih ve hrim hrim a, ka hmuh phawt loh chuan ka awih lo. "Mipa ang em em ni si lo vin hmuihmul a nei, a dum kulh mai, a la sek em em zui, ka hmeichhe hmuh tawhah chuan a la sek ber ang. Ţhu sek ţung chungin 'Taibawih' a ti hlawi hlawi mai" a ti a, a pum dawm chung meuh hian a nui a, a la hmu lo tak tak em mawni le. "Ka zin haw veleh ka en ve dawn khawp. Nangpawn u Kulhi i ngaihzawn ve tho kha" ka tih chuan, "Taipuia nupui lakah chuan Kulhi chu princess Diana ang vel a ni. Taipuia nupui kha chu a...a man zat em em lo deuh hian i lei dawn nia ti mah se ka duh lo" a ti ve khanglang a, "A hrawl emai a mit a khap ri khup khup zel ang ka ring, a nei ngam zawk e...Taipuia hi ka khawngaih lutuk" a ti a, u Chiangan a rawn ko ta hlauh zawk a, u Lalhuma kan kal pel chiah tihah Zochhuran, "Sek deuha piang an awm ve ţhin a" a ti ban charh a, "Sek deuh, chet zawnga ri ţuah ţuah thei tihna mi?" fiamthu a ka tih chuan, "Chutiang ka la tawng lo" a ti daih a, ka sawi kha, fiamthu a hrethiam lo reng reng. 

Park kan thleng chu nuam a'n ti khawp a, "Remkalam, ngati nge min hruai vat loh?" tiin min chhuahchhal nghal ringawt a, "Kan kal vak tawh ngai lo a, kan tleirawl lai te chuan tlai tin kan kal ţhin. Nu leh paten min la phut em em lo a, hunawl kan ngah bawk a, kan kal ngei ngei zel, tunhma ka ram ţuanna a nih hi" ka tih chuan, "I sawi mak thei si" tiin a nui hawk a, rin ang ngei ngeiin thingkung hnuaiah kan ţhu hahdam a, han awm mai mai takah chuan sawi tur a vang lehpek khawp mai. 

Ka sawi tur hre loin, "Ka lo haw veleh pu Taipuia nupui ka en ve ang" ka tih chuan, "Min hruai ve rawh" a lo ti vat a, "Naa...mipa zawkin khati khan ti zel lo la" ka ti nang nang a, amah hian min hruai zawk tur a nia. "Ka hre ve ngai si lo a" ti a a insawi thiam pawhin, "Zawng chawp la min hruai zawk rawh" ka ti hmak a, thing nghengin ka ţhu ngawi hle hle a, hmalam ka en tlat nain ka bula ţhu Zochhura chuan min en char charin ka hria, hmu kher lo mah ila ka feel thei. Ka rilrua number chhiarin a lam ka hawi phei thut chu nui deuh hlek chung hian min lo en reng tak tak a, "Eng nge?" ka tih chuan, "I khabe a khuavang kha ka hmu?" tih pahin ka khabe a khuavang awmna lai a rawn khawih a, "A hmuh theih alawm" ti a lai deuha nui lui hak hak chung hian hnuailam ka melh a, eng kan ang dawn lo a ang riau. A kut a lak sawn rualin, "Kan awmdan hi han sawifiah teh" ka ti a, a ngawi daih a, "Fawnvelan Zirbawnga tih hming a sawi em?" ka tih leh chuan thawk hawk pah hian a bu nghat a, "Engtin?" ka ti vat a, Fawnvela mai mai chu engkim a hre ve vek sia, a sawi vek chuan a chak lo khawp ang. "Ka hre tawh lo" a ti daih a, ka awih lo ve chiang e..."Nih leh kan awmdan chu han sawifiah teh" ka ti nawn leh ngat a, hmalam a en daih a, a ngawih vang vang hnuah, "Bialnu neih ţul ka ti tawh" tiin a nui a, engmah kan sawi zui tawh rih lo va, bialpa neiah ka in ngai hmak thung. 

"Naupang pawimawhna hria ka duh" a tih lai mekin ka phone a ri a, a hun lo thei si, inah khan ka lo dah daih lo a ni. Nutei a nih vangin ka la vat a, "Remkalam, Msan i chanchin min zawt a ka fak teh mai che a nia aw, 'a fel hmel e' a tia a kawm ve chak che a, nau angin en tawp rawh ani paw'n 'ka cham chhung chu u angin ka en ang' a ti che a, in ngaih anga sual a ni miah lo a nia aw a rawn ti bawrh bawrh a, ka hrilhhai letling zawk e a. "Msa ve kha a ri phawr phawr a a ngainatawm loh emai" ka tih chuan, "In inang chiah a nih chu...nangpawh i ri phawr phawr alawm" a ti daih a, Nutei chuan min fak ka ring sa hrim hrim, Msa zawk kha ka ring hlawl lo. "Aw in lungawina tur a nih chuan u angin min en mai rawh se, u Valdiki ang em em chu ka la ni chuang lo a nia" tiin ka nui hak hak a, "Chungte chu kan hre vek, zanah a lo leng maithei a nia aw, lo hau tawh miah suh, Sangkhuman hian a lo tir kual char char a, ka ngei tak tak a ni. Khawiah nge i awm? Park ah i kal tawh em?" a rawn ti leh zung zung a, "Aw ka awm mek, nakinah ka lo bia ang che" ka tih rualin phone ka dah nghal a, Zochhuran a sawi duh a sawi zo hman reng reng hleinem. 

"Khawia naupang nge ngaihpawimawh tur?" ti a ka zawh chuan, "School naupang" a lo ti mai a, a ţhut dan chu siamremin a hma aiin min ţhut hnaih zawk a, sawi tur a hriat loh em avangin, "Pro pastor a dil theih hunah i dil leh angem?" tiin keimah zawkin ka zawt a, "Ka hre lo le...chan a har a" a ti ban charh a, a huphurh ve hmel khawp mai. "Aw..dil leh la, an lak ve hlauh che leh i vannei ang a, an lak loh che leh school ah i thawh zawm leh ang a" ka ti ve ngial na a, "Ka hre lo" a ti deuh tlat a, "Sawi tur a vang e...Msa chanchin te min zawt mai mai rawh, Nutei ţhianpa kha" ka ti ta vel mai mai a, a lo la nui zui a, "A pawimawh a awm chuan sawi la" a ti daih a, la upa vak bik lo mah se mipa zawk a nih naah zei ve tal tur a nia. 

"Kolasib nula an hmelţha awm hlawm sia, melh ber tur i hre lo ţhin ang a" fiamthua ka tih chuan, "Nula ka melh ngai lo, melh loh theih loh a an awm a nih loh chuan" tih pahin min rawn en kher a, ka ding uai lek lek a ni. "Kan venga i rawn awm hlimah kha chuan nu Partei vang chauhin ka lo kal ţhin aw, min melh phut a lo kal ka ni lo, mipa zawk rim chi ka ni ve lo" ka tih uk tawh hnuah zawitein, "Ka ni ve tho" ka ti leh a, tleirawl at laiin ţhianten min fuihpawrh a, phur thut changin doctor te ka lo rim ve ţhin tingtang tawh si a, miin an lo hrechiang ve bawk nen, dawt sawi chi a ni lo. 

"Tunhmain a nia tlangval zawk ka rim ţhin tleirawl at laiin, tunah chuan ka peih tawh lo, ka ţhansan tawh" ka tih chuan, "Chutiangah buai suh, nimin, vawiin leh naktuk awm chhan ngaihtuah ta che. Niminah thil i ti sual thei a, vawiin hi insiam ţhat nan i hmang thei, naktukah i ti sual tawh lo ang" a ti ve duah a, a thil thlir dan hi a dik thei riau, a chhaw kan ti tak nain u Rinchuta aiin a zia fe zawk. "Nula hi melh loh theih loha an awm a nih loh chuan ka melh ngai lo i ti a nih kha" ka ti chu, "Melh duh zawng an awm ve ka tihna a nih kha" a lo ti a, ka au vak chak leh tawh. A zei ve em em lo nain a fel a, a dam thlup a, a bula awm a hahdamthlak bawk. 

"Huiham" ka tih tap takah chuan tawlh hmain min rawn thlek a, "Ngati ham ham nge?" a la ti kher zui, "What a very low oxygen...mahse ka thaw chiang ţhaks" tih pahin ka kutphahin ka inzap a, nui chung hian a hawisawn a, kan boruak a ţang leh at tawh. Sawi tur awm tawh hek lo, a ţhutna aţanga thoin, "Haw ang an ngaihtuah ang che" tih pahin a kut min pe a, ka lo vawn ruala min kaitho vein ka darah a kuah zui nghal a, park aţanga kan let leh lamah pawh min kuah char charin kawngpui kan thlen hnuah a inla hrang chauh a ni. 

"In inah ka dah leh thlap ang che" a tih miau avangin kan in kan pan ding nghal a, kan thlenin khua a la thim lo. Inchhung kan luh hmain, "Zanin chu ka lo leng hman lo ang, inkhawm banah ţhalai hruaitute lo len an tum a" a ti a, a pawi loh thu ka hrilh ve thlap hnuah inchhungah min luhpuiin thingpuite a in leh a, ka nu'n, "Park chu a nuam em?" a tih chuan, "A zia angreng, pipu awm se ţha tur ka uai thiam a sin i hre tawh em Remkalam?" a ti a, chutah nuihza aw zet hian, "Pipu uai chungin ka invawrh vir thiam" a ti fiamthu leh a, a tlaw zia hre tu vek kan ni bawk a kan lo nui dar dar mai. 

A haw dawnah ka pa'n, "Zanriah ei ve nghal la ţha tur. Chawlh i neih leh hunah kan pahnih chauhin kan kal tawh ang a, kan haw hma lutuk tawh lo bawk a" a ti a, Zochhura pawh a phur ve khawpin ka hria. Vawiin chu an lo haw hma lutuk tak tak a, ka pa chauh ni se chu tun ang hun velah hian a lo haw chauh ang. 

Nutei rawn haw rualin zanriah kan ei nghal a, kan inkhawm ve lem lo. Zan lam inkhawm hi ka ti lo laklawh a, Kalvari pawh kha a ni tho, phur thut changin kan inkhawm ve a a ni mai. Kalvari khan mipui tamna hmuna awm a hreh ţhin a, chuti na na na chu tiin hreh ve lem lo mah ila in lamah kan ţhianhoin kan inkawm khawm mai mai zel a, zan kan inkhawm lo laklawh a ni ber. Pastor nupui tih takah Kalvari chu zanah pawh a inkhawm ziah tawh a, nilai zan thlengin a chhangchhiat hma kha chuan a inkhawm ţhin. U Rinchuta nen an inneih hmaa miin an en dan leh an inneih hnua an endan chu inthlau tak a ni, pastor nupui a nih vang a nih tho rualin kohhran a inhmang leh inkhawm peih tak tak ho hi chu zah loh luih an har ve hrim hrim. 

Ka nu leh pate inkhawm tura an chhuah hnu lawkah Msa a rawn lang hlawl a, "E...nang i ni maw? Lo leng rawh" ka ti ve peih lo, ngawi rengin ka aieng chhiar lai ka chhiar zawm mawlh mawlh a, ka hmazawnah rawn ţhuin dawhkanah a bawk a, "Chhiar pui i ngaih chuan ka lo chhiar pui ang che u Remkalam" inthlahrung awm taka a tih chuan ka khawngaih leh deuh a, "A ngai lo...ka chhiar zo anga thingpui kan in dawn nia, ka chhiar zo ţep" tiin ka chhiar zawm leh a, Kalvari te awm naah tlem ka keng ang a, in lama ka nu lo hralh tur ka dah bawk ang ka ti a ni. 

"Msa hian a ngaisang tehmai che a nia aw Remkalam, sam siam leh kuttin hnawih kan zirlai te kha ka sawi a, i thiam chak bik zia te kha" tih pahin Msa bulah Nutei a rawn ţhu ve a, anni chu inngam deuhin an awm dun nghal bawrh bawrh mai. Keichu ka lai ţut zel a, bialpa ka ngah tawh tehreng nen ka la awm thiam chuang lo, ţhiante ka chhaih thiam em em a a ni mai. 

"Nih leh Ms, ngati nge kan khuaah an rawn thawn thlak che?" ka ti ve ta nge nge a, zinna ka ken tur leh ka nu hralh tur ka dah hrang fel chiah a ni. "Ka u nen kan inngeih lo a, sawi chi a ni lo" tiin pawisawi lo awm tak hian a nui a, "Ruihhlo i ti em?" ka ti chu lu a thing rang nasa mai. "Ka ti lo a, ka la ti chhin lo bawk" a ti deuh hmak a, a taksa rang riai ruai hmuh chuan a awihawm loh rum rum alawm le. "In pahnih hian in inngaizawng tawh a ni maw? Mithmul in ti kheng ve ve lehnghal a, couple matches mithmul kheng tihna mi? Nge 'the mithmul kheng' zawk?" tiin ka nui uar uar a, en reng reng pawn an sual dun hmel ngawih ngawih mai a ni. 

"Ka ţhianpa a nih hi" Msa zawkin lo tiin Nutei hnungah a beng thlawp a, "Hmeichhia ka chhaih ţhin a, bialnu tak chu ka la nei chiah lo" min en kiau chung hian a ti leh a, a mitmeng a fiahin pawi a sawi lo si, ka lo hau hrep ţhin kha a inchhirawm rum rum alawm le. "Nutei a awm chuan i lo leng ziah dawn nia" ka ti leh ta vel a, mi ka khawngaih zel a, ka khawngaih sual vaih chuan a na thei ang berin ka nu ka inţham tir ang. 

"Ţhianpa angin min en tlat a a mawl tak tak a ni. Ka duh lo ka tih pawhin ţhianpa min ti lui zel, ka ngei a nia" Nutein a ti niah niah a, an pahnihin awm se ka tih vangin, "Thingpui ka va lum ang" tiin keimah ka tho a, mahni ai naupang a duh bawk a Nutei hian han chhai tak tak teh se, keichuan ka duh ber ka chhai chhuak tawh. Zochhura hi tunah la zei lo chet chut viau mah se a flow a dik chho ve zel mai ang. "Thingpui inzawhah ka insiamsan daih dawn che u a nia aw, keichu chawpchilh deuha ka insiam chuan theihnghilh ka nei phung zel" thingpui vil paha ka tih laiin Nutein Msa hnenah, "Remkalami zin tur chu a bawr thei tehmai a nia aw. Flask leh tui no te a pai ţhin" a lo ti ve zat a, "Khatiang ât lai a nih kha" ti hlak mah ila zin dawn chuan ka mangang ziah. Eng emaw kan tawh palh ka hlau tlat zel a, ka lo inkeng leh chiam ţhin. 

Thingpui kan in pawhin inpui lamah ka ţhu phei daih a, "Sangbollywoodin i phone number a dil che a i pe ve duh lo a ni maw Ms?" fiamthu a ka tih chuan, "Sangbollywoodi kha a hlauhawm, kan in a thil a rawn zawrhin min kheuh kher zel" tiin a ner nak a, "Engangin nge i hmuh hrim hrim?" ka tihin, "A hmelţha hang ngaihnobei" a ti tho bawk si, "Hepa hi a lerh tak tak a ni" kawk va chungin Nutein a lo ti ve bawk a, "U Remkalami hmelţha ka ti ber tho" Msan a lo la ti zui, hei pawh mimawl, Nutein a ngaizawng tih a hre awm reng sia. 

"Nutei nen khan in in hmeh ber 'the mithmul kheng' in nih kha, in pahnih khan inzui det det reng ula a ni mai" ka tih chuan, "Lo tel ve rawh. Ngati nge dawrah i lo kal ngai loh a? Ka lo kal ziah a, ka hmu ve ngai lo che, keimahin in inah ka lo kal ngam tawh si lo a" a ti bui bui a, ka va han ngei tak. "Kei aiin Nutein a thiam daih zawk, dawr sawn min mamawh lo" ka tih veleh, "Nutein i thiam zawk a ti" a lo ti ve nghal a, "I ti tiraw?" ti a zawh pahin Nutei chu a darin a nawk zauh a, "Ti e...Afaki beauty studio ah khan kan zir dun char char a, ani chu kan zir apiang a thiam zel alawm" tiin Nutei a nui var var a, ka thaw huai mai. 

Ka nute rawn haw pawhin Msa chu mak an ti deuh tih ka hre reng, engmah an sawi lo nain ka nu chuan a en leh dauh dauh zel a, Msa lahin, "School i tlanbo ve ţhin maw ţhianpa? Keipawh ka tlanbo ngun, hostel a min dah leh ka tlanchhuak a, ka hnehsawh lutuk. Sap ramah chuan awm ila bank ka rawk ang" phur zet hian Nutei hnenah a lo la ti sauh sauh reng a, "Ka nu phei chuan ram lianpuiah chuan awm la tual i that tawh ang min ti" ti lehin a intithei zawk a, "Mahse misual bak ka thah duh ka ring lo" a ti a, ka nu'n an hmuh loh turin min rawn tlawh a, a tang hra reng mai. 

Msa leh Nutei an inzui chhuak chiah chu ka nu'n, "Kan inleng chu a va han pui em em ve mawle. Lalremmawi, hmelhriat mak deuh deuh in nei a, kha kha tu nge ni riai ruai a?" a ti kher a, "Msa a nih kha, pu Lungmuana te mikhual" ka tih chuan, "Pawi a khawih hmaa haw tir vat chi a nih kha. Bank ka rawk ang te a ti mai mai, nangni pawh tih tawh nak laiin nangni aia ropui inkawm nel leh tawh a" a ti hlak hlak a, chhang lem lo vin pindanah ka lut a, Msa awmlai khan insiam ka tum a, ka nute an rawn haw tak vangin ka ţhu ve ta reng kha a nia, a la naupang â ve aniang, a sual lo tawp ang. 

Pindana Nutei rawn lut ve chuan, "Ka lawm lo" a ti nghal a, khumah ţhu hnawkin phone a phawrh a, chhuata ka ipte dah chhuah chu a tlawh kher bawk. "Engati nge?" ka lo ti nghal a, "Kei aiin Sangbollywoodi hmelţha a ti zawk, ţhianpa min tih laiin ani chu ţhahang ngaihnobei a tia, Sangbollywoodi hnenah Msa phone number pe miah suh" a tih hlak hlak hnuah, "Fawnvelan a hrilh tawh che em?" a ti leh a, "Engmaw?" ka tih veleh a, "Thawhţanah ka haw dawn, sumo ticket ka hauh tir?" a ti chu a ţhutna lam ka hawi nghal a, "Min va ţhawng deuh ve" ka tih chuan, "Ka lo kal leh dawn tho alawm. Ka nu ka ngaihtuah ve a, ka haw zuai anga ka lo kal leh ang, ka pa paw'n a phal vek, 'i duh phawt chuan i kal leh dawn nia' a ti" a lo ti zung zung a, Zochhuran message min rawn thawn ve sek bawk avangin ka insiam hleithei lo. 

"Zochhura hi ka tello a awm thei lo a ang vel e...'i ngaihawm dawn e' a rawn ti leh tawh awii ka hmuam thawih mai dawn em mawni" tiin ka nui har har a, nitin deuhthaw kan inhmu a, ka zin daih chuan hrehawm a ti ve khawp ang. "Engtin nge i tih bik? Msa aiin a lerh lo daih zawk a, mahse i induh tir thei tho a, tihdan min hrilh ve rawh" Nutein a tih chuan, "Keini aiin in tluang daih zawk emaw ka tia, 'min be ţha' i tih ziah kha. Bakah Msa a lerh lo emai, bialnu ka la nei lo a tih kha i hre lo mi?" ka lo ti a, lerh hmel viau siin a lerh lem lo a, inngaizawng duh pawh nise ka dodal tawh lo ang. 

"Nangmahni a biak ang tho che u in alawm min biak. Danglamna a awm lo emai, ka phur ve vak a, mahse hmelţha ka ti bawk si" a ti chuai raih a, "A la duh ve mai ang che" ka ti ta ringawt a, Zochhura chu biak zawmin ka insiam pah bawk a, zanin chu Sangbollywoodi a rawn lang lo hrim hrim a, ka hmuh chak nen. 

"Awii...keichu ken duh ka ngah lutuk a ka buai, lenchhuah vel kan duh ve dawn a sampawhna ka ken ngei ngei a ngai, ka sam hi chhe deuh mah se ka pawt ngil tho ang. Zochhura chu message min lo thawn leh tawh" tih pahin phone ka en a, 'I zin dawn a ka damlo Remkalam, ka khawharna khua a sik' a rawn ti ve ngei, nui lem min thawn tel ţeuh a, 'Awii...love story hi ka haw phal lo' tiin ka thawn let a, nui kar kar chung hian khumah ka ţhu ve a, Nutei lah a lo buai, "Insiam vat vat ta che nu Nempachangi a rawn hau mai tur che a sin" a tih loh leh, "I vannei thei bik si" a ti a, "Hmelţha an ti zel bik che a" a ti thul, "In khaw tui tlan hi a ţha bik aniang" te a tia, Msa vangin a insawh tau nghawng nghawng reng mai. 

"Thingtlang nula hmelţha tawh vek vek chu an chhiatna lai kan zawn kan zawn pawhin an ţhatna kan hmuh belhchhah zel an tih kha" tiin ka nui uar uar a, Zochhura message chu hmet langin intithei deuhin a hmai zawnah phone ka lek thuak thuak a, ka kut lo ben a tum apiangin rang deuhin ka dah sawn zel a, a nin tawpah min pawm betin nula ve uai tawh si khumah kan inbuan tual tual mai. 

"Lalremmawi" ka nu'n a ti vin hlar a, "I thawm dim ţhin rawh ţhenawmte i ti thlabar ang" a ti leh kher a, Zochhura nena kan han inzui chiah chu ka nu hian min hau ngai miah lo a, thil dangah min hau tho mah se Zochhura vangin min hau ngai lo, a mit ka tlun loh a hlauin fimkhur turin min hrilh reng a, chuzawng chu a ni mai. Sangbollywoodin min rawn phone veleh Nutei a tum hmak a, inngeih lo ve tak an ni. Ka lak rualin, "U Remkalam, my sis, vawiin nilengin savun ka pho a, u Kalvari te ka lo thawn ve ang. Ka nu leh pate hriat chi a ni lo a nia aw, naktukah a rukin ţhenawmte inbulah ka pho leh ang a, in han thlen chhoh hunah in kang dawn nia, ka fel i ti em?" a rawn ti zung zung a, "Aw...savun chu Kalvari in a duh lutuk alawm" ka tih chuan, "Chuvang chuan alawm ka thawn dawn. Polythene par khat lawih a nih hi aw, ka khawlna a rei tawh bawk a a tam teh mai a nia, ka hralh ai zawng zawng ka thawn vek dawn. Inchhunga ka dah lan chuan ka nu'n a hmu dawn a, naktuk tlaiah ka rawn pe ang che" a ti a, min mangţha loin a dah nghal a, "Ama tawkah a bengvar ve thei a nia" ka ti chu Nutein, "A tlawn che a nih kha" a lo ti hmak a, "My friend, keichu Sangbollywoodi hi ka ngei laklawh, a hmel hi ka ngei chi" ti lehin ka lo nuih liam vel mai mai a, Msa vang bak a ni leh tawp nang. 

Pathianni tuk a nih avangin ka tho hma lem lo a, Zochhura pawh a inthlahdah ve deuh aniang min rawn be lo. Inkhawm tur tak hian kan kal rual vak ngai lo a, u Buanga te ho nen an kal tlangpui vangin an rualin ka kal peih lo. Nutei a inkhawm peih si lo, Sangbollywoodin min rawn sawm hlauh a, inkhawm banah Zochhura chu ka hmu ve chiah. 

U Buanga te ho nen bawk lo dingin Sangkhuma leh Fawnvela te an awm ve a, ka va phei ve chuan Zochhuran, "Buanga te inah kan chawl haw dawn a" lo tiin u Buanga chu a kawk pah a, ani lah lo nui sawngin, "In duh leh lo kal ve rawh u" a ti vel a, ka kal peih lo. Kan awm rei ang a ka ngei tur deuhin a ţawng leh tho ang. "Kan haw tlang zawk dawn chawhnu kan inkhawm dawn chuang lo" ka tih chuan Zochhura bawkin, "Zanah" a lo ti leh a, "Ka inkhawm dawn lo" ka tih veleh, "Thil dang mawle. Thingpui rawn in rawh u" a tih hnuah u Buanga te dinna piah deuhah min pawt pheiin, "Naktuk i zin dawn kha, wai wai kan chhum dawn nia" a ti ve ngei a, "Ka lo inngaihtuah ang" ka tih chuan, "Rei suh ang che" a ti a, inţhendarhin kan ţhianhoin kan haw a, Sangbollywoodin Msa leh Ramnghinglova a khaikhin nasa, tuman kan sawi pui lo thung. 

Inkhawm loin zanah ka insiam leh a, Kalvari nen kan la inbe leh lo. Dawnfuha te unau chu nepnawi mai mai ka hawnsak ang ka tia, Sangkhuma leh Fawnvela ten toys an ti thung a, kei chuan toys an ngah dawn tih hriain ka phal ve lo. Tunlai phei chu hna a vang si, toys mana pawisa ka sen ţeuh chuan keimah bawkin ka tuar leh dawn. 

Inkhawm ban awm velah Zochhuran min rawn phone a, "Ka nuten inkhawm banah i pite kan tlawh kawi dawn an tia, kan inah lo kal zawk mai rawh innghak tur an awm lo" ka tih chuan a remti ve mai a, "Pi Binladari dawrah ka kal hmasa ang" a ti thung. Ka cham rei dawn loh nen min thlah vak a tum a, ka ngaih a ţha lo zawk. 

Ka ţhiante pawh lo kalin ka nute an rawn haw leh ang lawi a, "I pite inah kan kal dawn i tih kha" ka lo ti nghal hluai a, "I pa a nuam lo deuh a kan kal ta lo mai. Naktukah in zin dawn a ni lo'm ni? Mu hma ta che u" ka nu'n a tih chuan Fawnvelan, "Wai wai chhum kan ei hmasa phawt dawn, u Zochhuran a rawn lei dawn a" a ti a, nui vur vur chunga min rawn enin, "In chhungkaw tan hi chuan ka hlu mawle" a ti leh kher a, Nutein, "Msa pawh a lo leng ve dawn, naktukah ka haw ve dawn sia" a tih chuan keimah chauhin ka remti a, Sangbollywoodi a phur viau bawk. 

Ka nute awm a ring lo bawk a Zochhura chu eitur khai chunga rawn lut tlangin, "I ei puar loh chuan ka ţap ang" fiamthu a a tih zet tawh hnuah ka nute a hmu leh si a, han biak ve mai awm bathlarah va chhuak lehin, "In awm em?" kawngkhar inhawng huau tawh kik chung hian a ti leh kher a, "Awii...bet but a che..ka nute i hmuh vanga chhuah leh kher a ngai hleinem, rawn lut mai mai rawh" ka tih hnuah a rawn lut a, ka nute lam hawiin za lo tih hriat deuh hian a nui a, "Ka theihnghilh palh a" a tih chuan ka nu'n, "I pa Ditea a nuam sam lo a, kan len tum naah kan leng leh lo a nih hi" tiin ţha deuhin a lo hrilh a, rawn lut ve uk tawh si, ka nute a hmuh tak vang maia luh in dil ţhat leh vel kha a ţullo, Zochhura a ni miau alawm. 

Msa a rawn thlen ve chuan Sangbollywoodin, "I phone number min pe tawh rawh. Whatsapp ah group kan nei a, i awm ve duh lo mi?" a lo ti nghal a, Msa bulah pheiin a nui keh hui a, "Ka phone a chhia" tih pahin ani lahin Sangbollywoodi chu a lo nam sawn a, a ding nghal uai bawk. Ţhutna tur melh a a hawi a hawi laiin Zochhuran, "Ka bulah hian rawn ţhu rawh" a lo ti hlauh a, midang chuan an ngaihsak lem lo. Nutein, "Phone number a pek duh loh che chuan a be duh lo che tihna a ni mai alawm, dil tlat kher lo la" a ti nang nang a, Sangbollywoodi chu hrehawm ti ang pawn a awm lo, mi thusawi apiang lo zawm vein a hlim em em tho. Hei hi kan in anna lai tak a nia, keipawh doctor hoin min duh loh sup sup lai te khan ka hlim tho zel. 

Sangbollywoodi nena wai wai kan chhum laiin Zochhuran, "Sangbotei chu savun a va ngah ve" a lo ti ve ngei a, "Ka zuar lo a nia, ka chhiar thlap a nia aw tuman khawih suh u, u Rinchuta te nupa ei tur a nih kha, a kim lo ka hre chat thei a nia aw" a ti khar khar a, Msan, "U Remkalam, thil min lo hawn rawh aw, ei chi ni lo, damchhunga kawl reng theih chi" a lo ti ve bawk a, "Ei ei ei...Msa sawn a ngaizawng chiang lutuk che" ti sar sarin Sangbollywoodi a nui kar kar mai. "U Zochhura nen sawn han inthik tawn vel se an hmuhnawm awm" a tih leh chuan, "Sawi rih suh" ka ti vat a, Nutei rilru kan tihnat palh te pawh a hlauhawm alawm le, tunlai phei chu ani leh ni lo angin a derthawng ve ropui si. 

Zing thawh hma kan ngai lehzual si a, wai wai te kan han ei zawh chuan haw tumin an intintuah a, midang an kal vel hnuah Zochhura nen inzui vein bathlarah kan ding a, ţhenawm pa Khawtea te bathlar a rawn eng leh tawh. Nu Zonuni spy thei lutuk hi chu North Korea a thawn daih ka chak ţhin. 

"Naktukah eng nge a thlen i hlauh ber?" Zochhuran a tih chuan, "Accident ka hlau ber, khawkar kawngah eitur nei lo a tan te ka hlau" ka ti a, "Min han zawt ve teh" a tih vangin, "Naktukah eng nge a thlen i hlauh ber?" ka ti ve a, "Thawhhai" lo ti vatin kan han nui dun leh rih a, "Hma tawkah ka tho ang a ka rawn thlah ang che. Ka kal dawn" tiin a hmehen pai a phawrh chhuak a, "Ka lo be lo ang che mu hma rawh" a ti a, reilote ka kut a vawn leh hnuah a haw ve ta nge nge a, min ngaih hmel viau si engtin nge phone ah min biak loh theih ţhin le ka ti. 

Mu nghal mai loin ka insiam nawn leh a, kalkawnga ka thawmhnaw hak tur pawh vawithum vel ka thlak kual tawh. "Earphone leh power bank hi ka ken ngei ngei a ngai, kalkawnga kan awm laiin Zochhuran min lo be duh ta se battery ka neih loh chuan a pawi dawn lutuk" tiin ka ipte ah turah ka khung nghal a, "He savun pheikhawk hi ka bun khat lutuk a mei a hem nem phawt loh chuan a pawh kau theih loh, a sak tlat" tih pahin u Zirbawnga pheikhawk min pek kha Nutei ka hmuh ve a, "U Zirbawnga hian a la duh che i ring em?" a ti daih. "Min la duh dawn chiang sa, I am sure, mahse ka duh tawh lo. Mahni inhmangaih leh lutuk ho hi chu ka ngei tlat, a nupui nen hlim deuhin awm rawh se ka lawmpui zawk" ka ti bawrh bawrh a, "Zochhura nen hi chuan tluang deuhin inkawp char char thei ula ka ti, pui tawkin innei ula, fa 10 vel nei bawk ula, a bum ve che chuan Kolasib a an in ka zawngchhuak ang a, ka phin darh vek ang" a lo ti ve khar khar a, ka rilru put hmang inang lawm nan kutzungpui kan insual tir zuai a, ka insiam zui leh nghal a, ip pahnih khat ţana ka inkhung pawhin a leng lo chin a la awm tho. 

Zinga ka inphihfai hnu lawkah Fawnvela leh Zochhura an lo lut a, ţhutthleng seia ka ip pahnih dahchhuah chu kawkin Fawnvelan, "Hei hi Nutei nena in thawmhnaw a ni em?" a tih chuan, "Ni lo, keimah chiah, pindanah ip pakhat ka la dah ka rawn la ang" ka ti a, a lungawi loh hmel ngang mai. "Eng em em nge i ken leh tawh a? I ruala zin chu ţullo ah kan hah vak zel, lo kal ve lo mai rawh" a ti nghal pung pung a, "Ka insiam vek tawh hi, lo kal ve lo mai rawh intihna chi pawh a ni tawh lo. Kalkawnga mamawh in neih hunah min ban buai miah suh u keimahin ka keng vek ang" tih pahin pindanah ka lut a, Nutei ip chu a lian lo mah se ani chuan Kolasib ah thawmhnaw tam zawk a dah a, keichu zin tur ka ni. Kalvari nen lah thawmhnaw kan inhak ţawm thei der lo a, inken tam loh theih a ni lo. 

Ka insiam zawh hnuah pindan aţanga chhuakin Sangkhuma pawh a lo awm tawh. "Zawrh tur ka ken bakah Sangbolltwoodin savun min thawn kha. Fawnvela hi i mak pung pung thei lutuk, min kenpui lo tawp rawh keiman ka ak vek anga a ni mai alawm, a ho teih teih, rit mah se ka ak zo" ka ti leh hlak hlak a, Zochhura lo inrawlh vatin ka ip dahna bulah a rawn kal hnai a, "Keiman ka lo kenpui ang che, a thinrimthlak loh" a ti dam leh thlup tawh a, kan ţhianho inhau hi chu ngaia neih a tum ve a ngai, naupanlai aţanga kan tih ţhan a nia, kan sim thei tawh lo. 

Sumo dinna lam kan pan laiin Sangkhuman, "U Lalhuma kan lo hrilh ve lo a ni. Kan zin tur u Lalhuman min thlah loh chuan a kim lo" a ti nuah nuah a, ka hawi kual a, ka pi Binladari chiah a lo awm. A dinna bulah rambo polythene inhungin a khat ţun lehnghal. Sangbollywoodi leh Zochhura ten ka ip min ahpuiin ka pi Binladari dinna zawn kan va thlen chuan, "Kalvari te thil tur ka dah a, inti bo ţhen hlauh ange. Dawnfuha te unau ei tur pawh ka thun tel aw. I pu lahin ka thun hnem loh a hlau a ka hriat loh laiin a lo thun belh a, 'Kalvari khan min ngaihtuah suh se' a ti a nih chu" a ti a, an in lam ka hawi thla a, ka pu hmuh tur a awm lo. A lo tho chhuak peih lo aniang. 

"Kan lo pe thlap dawn nia pi, ka pu chu eng nge a an a?" Fawnvelan a lo ti ve a, "Hma a sawn vak lo, tiang nen lo chuan chhuat dungah pawh a kal kual thei tawh lo a, Kalvari hrilh suh u aw a rilru a lo hah phah lutuk ang e" a ti charh charh a, "Ka pite chu ka lo ngaihven ang, lut tawh rawh u" Zochhuran lo ti vein driver pawhin kan bungrua a hlang fel vek tawh a, "Ka hmuh ve chak nen han zin chi ka ni si lo a, i pu dam ţhat veleh kan lo zin ang a ti in ti dawn a nia, Dawnfuha te unau thil tur kha ei ţhen sak lo ula, ka thil thawn an hmuh veleh min lo phone rawh se aw" ka pi chuan a ti lawm lawm a, sumo a kan luh tawh avangin Zochhuran a lo kuah vat a, kan ai a awh zo dawn khawp mai. 

"Kan lo hrilh ang ka pi, i haw vat loh chuan Kiki-an i dawr a lo rawk leh ange aw. Zochhur, ka pi kha lo duat viau ang che" ka tih chuan lo nui sukin, "All go" a ti a, ka pi Binladari pawh a nui ve hak hak a, "Nangmah zawk khan min rawn biak theihnghilh suh" a ti a, sumo lah a tawlh riai riai tawh bawk si, "Awii...ka zin leh peih lo e" ti a tukverh a ka dakchhuak chu ka kawrah ka ţhianten an lo pawt a, "Lalremmawii hi phurh a nuam ber mai a ni" driver lah chuan a lo ti ve sek a, "Zochhur, i lerh vaih chuan synod ah ka hek ang che" tiin ka au vak a, ka la au lai em em zui, nui chung hian a ban a vai a, sumo a ka ţhu lut chiah chu min lo fiam sap sap hlawm mai. "I â min ti ve ziah suh u, mi fiamthu thawh chu in nuih pui a, fiamthu ka thawh ve hian 'a â phuang' min ti bik ziah mai" ka ti hlak hlak a, keichu ka uang peih a, Zochhura pawh ka fiam reng zel a nia, midang phei chu fiam nasa thei tak ka ni. 

"Eng nge kan ei hmasak ber ang?" Nutei hnenah ka ti nghal a, "Eng nge i ken a?" a tih chuan, "Nimin tlaia kan lei ho kha ka keng vek. Nihawichi nge chana i duh? Fawnvela chu a phun peih emai engmah ei ve suh se. Sangkhum, theitui nge tui i duh?" ka ti nghal zung zung a, an phun ziah a ka thil pai an ring char char zel tho a, Fawnvela pawhin ka eitur ken lai a rawn ban leh zuk zuk tawh. 

Darkar khat vel kan tlan leh hnu chuan, "Keichu ka beng a phui leh vek tawh, motor ka chuan hian ka beng a phui ziah, ka ţawng ri pawh ka hre thei lo" ka ti a, Sangkhuman, "Hmui chip tlatin ham rawh" a rawn ti a, ka ti ti rei peih lo, reilote ah ka muhil leh daih a, zanah ka mu tlem bawk a Kolasib kan thlenin ka harh chauh a ni. 

Kan sumo chuanna hi kan khua leh kolasib service a ni lo a, a full loh vangin Nutei a lo tel ve thei mai mai a, diakkawnah dingin Nutei a chhuk rualin ka chhuk ve a, a lunglenthlak khawp mai. "U Zirbawnga leh Remkalami tello in tashi delek ah thil kan ei ţeuh ange" Nutein a ti fiamthu a, Kolasib kan kal apianga kan chawlhna a nih mai bakah diakkawn hrim hrim chuan lung a ti leng ve. "Hman ila chu u Zirbawnga kan va tlawh tur a nia" Sangkhuman a tih veleh Fawnvelan, "Het" a lo ti nghal a, "Riak dawn mah ila ka tlawh lo ang" a ti hmuk a, Nutei kan mangţha hnuah sumo ah chuan lut lehin kan tlan leh chiah chu u Zirbawnga dawr hmuh tumin ka ţhutna lam tukverhah an rawn dak leh tho sia. 

Ke a kal kan nih miau loh avangin kan hmu chiang lo a, Sangkhuman, "Hawn chu a inhawngin ka hria" a ti thei chauh a, amah phei chu hmuh hman ngaihna a awm lo. "A dawr piahah khan a nauin bike siamna a nei ţhin a, a part vel a zuar tel ţhin bawkin ka hria, kha kha engtin nge a tih zel le?" ka tih chuan, "A siam pum vek a ni lo'm ni? A dawr nen a inzawm vek tawh kha" Sangkhuman ţha deuha a tih laiin Fawnvelan, "Chutiang a ho...Kolasib hi pel vat ila a ţha a ni mai" a ti hmuk a, "Remkalami bialpa hlui kha Kolasib khua a ni tak e...pastor Rinhlua u kha" driver in a lo tih ve chuan, "Khalh mai mai teh, kan zuanthlaksan vek mai tur che a sin" ka ti vin hlar a, kan inngamtlak ve hrim hrim a, thinrim a ka hauh pawhin a nui liam vel mai mai zel.

"Fawnvel, Kolasib hi chu a boruak hrim hrim hian lung a ti leng tiraw?" nghen ar ar pahin ka ti sar sar a, khuangpuilam kan la thleng lo deuh a, Kolasib boruakin min zem nasat nen Fawnvelan, "Chhete mahin ka lung a ti leng lo, a lum lum nen" a lo ti leh daih a, "Fithangi i hriatchhuah vang a nih kha" ti a ka fiam chuan, "Kolasib ho hi chu a" a ti hap a, "Hmelţha nunrawng an nih hi" Sangkhuman lo ti vein kan nui hak hak hlawm a, "Aizawl kan thlen hunah kan lunglenna a bo vek mai ang" ka ti a, kolasib kan pelh hma zawng chu pawnlam ka thlir char char a, eng emaw riau hi a awm ve a, a boruak hian tun thlengin ken tel a la nei. U Zirbawnga, u Rinchuta leh Sensiari ka hrechhuak ngei ngei a, Fawnvelan Fithangi a hrechhuak ngei ngei bawk a, Sangkhuman Nutei te unau. 

"Sensiari te kha Kolasib ah an awm nghet ve ta em mawni le?" ka tih chuan, "Kan hre lo ngawi mai mai teh. Fithangi mai bakah an ţhenawmte chanchin pawh ka hre peih lo" Fawnvelan a lo ti bak leh hlur a, "U Zirbawnga i ngai a nih kha, Kolasib kan thlen aţangin Zochhura i la ti lo reng reng" Sangkhuman lo ti vein ka ngaihtuah a, u Zirbawnga tak chu ka ngaih awm pawh ka hre lo, ka hrechhuak ringawt a, ka ngai em em hran lo. Kolasib boruak hian ken tel a nei a, chuzawng chu a ni mai. 

Aizawl kan thleng chu boruak a dang leh daih a, a ngaihtuah fel vek tawh ang chu tih nak laiin Fawnvelan, "Khawiah zawk nge kan thlen dawn?" a ti heu mai. "I ute bulah i ti a ni lo'm ni?" ka tih chuan, "Thil ka nei a, nizanah u Nobawihi ka dil a" a ti sur sur a, ka hre nghal mai. "Fawnvel, i pianthar tawh kha" ka tih chuan, "Khawhar leh chauh a inpawlh a, nakinah ngaihdam ka dil leh mai ang" a ti a, a dinhmun hriain ka hau zui duh ta lo. 

Ka ute inluah kan han thleng chu min lo huphurh hmelin u Bawiha phei chuan, "Eng nge in lo tih dawn?" a ti kher a, "Kan lo riak dawn, eng dang nge kan tih vak ang a? In chaw ei a tui loh hlauin buai chung chungin buh ka pho a ka her tir leh thlap zel a, thil kan thawn dawn cheu lahin mawng hung hman lo lekin ka buaipui ziah a, min huphurh vaih chuan supply a tawp a ni mai. Chaw in chhum tawh em?" ka tih chuan an lu an thing a, pindan aţanga hmeichhiain, "Tu nge a?" a rawn ti chiah chu ka ding ngil nghal auh mai. "Ehe...hmeichhia in kawl, ka nu ka phone nghal dawn a nia aw" ka tih rualin an ding nghal uai a, "Awii...what a funny thing, pahnih aia tam eitur ka rawn thawn char char zel a ni maw?" tih leh pindan lama phei ka rual a, ka nuten an buaipui tehreng nen hmeichhia an lo kawl mai mai a, ka ute hi an puitling thei hlawl lo, "Remkalam" Fawnvelan a rawn tih chuan, "Not now" ti hmakin ka phone ka phawrh a, ka nute ka hrilh khawp ang, ka u te han tih hlauhthawn vel hi chu a nuam ve hrim hrim, anni pawn grape juice ka in vang mai maiin biakin thleng wheelchair in min nawr peih alawm le. 

CONT...