KEIMAH, THINGTLANG NULA (FINAL SEASON) 17

KEIMAH, THINGTLANG NULA (FINAL SEASON) 17

"My friend, tuman i lem an la ziak sak ngai lo che tiraw?" tiin phur deuhin zing thawh hlim aţangin ka zawt nghal a, zan pawh ka mutui khawp mai. "Ngai nang...kan khuaah milem ziak thiam deuh an awm loh kha" a tih chuan a chaw silna bulah ka va ding ve a, "Zochhuran ka lem a ziak a sin" zawi te a ka ti chiah chu min rawn en rang nasa, "Engtin nge i hriat? I rawn zin daih hi" a ti he haw a, "Min lo thawn alawm...min ngai lutuk ang a ka lem a ziah tawh sa a en nawn leh vel aniang" ka ti a, ka ţawng zawi tawh lem lo bawk a dawhkan kil a ţhu u Zirbawnga nupui chuan nui sangin, "I va vannei ve" a lo ti ve a, "Ka vannei ţhaks, mipa rintlak deuhin in lem ziah se in lawm ve tho ang" ka tih chuan kan nui hak hak hlawm a, "U Zirbawnga nupui hi Em-i/M-i ti tawp rawh u aw...ka koh ţhin dan a nia, tunah chuan midang pawn an ko ve vek tawh" tih siam siam pahin Kalvari chuan gas ah cooker a chhuang kai a, "U Rinchuta ţawngţai inkhawm kal a lo la haw lo a, tuia a tlak aţang khan ţawngţai inkhawm kal a peih lehzual" tiin a sawisa zui a, "Ka sam min tan rawh" ka lo ti chu min en ha a, mak pawh a tih hmel loh. "Chhe deuh khan i pu chhup peih ka ti reng a ni, Emi hi tan tir rawh, kei aiin a thiam zawk" a tih chuan, "Khawi bakcheh leh samkhuih" ka ti nghal a, ka tan tir anga Zochhura ka video call ang, school a kal hma a tan zawh hman ngei ngei a ngai. Ka tih dum leh hnuah chuan ka khawih danglam tawh lo ang a, a ţhat ve hunah sei deuhin ka zuah char char tawh ang. Zochhuran, "I inhmeh zawk" a tih pawhin ka tan nawn tawh dawn lo reng reng. 

"Bawihte, i nau hi ka mut ang a lo veng rawh aw" a tih te te hnuah Emi chuan Kalvari bakcheh leh samkhuih dah chhuah chu a la a, pawn a kan chhuah rualin, "Ka sam tan tawi tawpna ber tur final last a nih hi" ka ti nghal a, Kalvari pawh lo chhuak vein an puan min bah tir lah chu a pan em em mai lehnghal, "Ni e...ui duh suh, chhe deuh sei deuh kha a mawi lo zawk. Kan tan tawi ang a, a sei deuhin a hmawr i paih zel ang a, a chhe chin i paih zo vat mai ang" tih siam siam paha Emin ka sam khuih a tum chu ka dak awrh mai. Min la nuih vak zui.

"Khuih a har tehmai a nia, muangchangin khuih rawh, a nih loh chuan a na ang" ka tih tak hnuah chuan muang leh dim deuhin a khuih a, "My friend, sam tawi pu rual ka ni tawh lo em?" ka tih leh chuan, "Nang aia upa sam tawi deuh deuh an tam emai, pasal i neih hmaa a sei hman chuan a tawk chiah" a lo ti a, pasal neih vat ka duh chuan sam sei hun nghah kher a chi loh ang, boruak ţha lo a awm hma a neih vat vat a nia ka duh tawh ni. 

"Khawiah nge kekawr thar ka ken ve kha?" u Zirbawngan a rawn ti a, a sam thur chhur a, a ro rapthlak si, kawtlai chu ni a sa a ti deuh aniang a ner nang lehnghal a, zu rim a la nam bawk, a khabe velah te pawh tam si lo vin hmul a ţo a, inzuah buk chhup si lo vin tun hma ang a ni tawh lo, tun hma kha chuan a inmet fai thlap zel a, 'pa ka ni tawh tho' a tia nga a in uluk tawh lo aniang. "Kan thawmhnaw ken ang ang chu chhuarah khan ka thlep chhuak vek" Emin a tih chuan, "Thlep la ka hmu ang chu" a ti deuh nghut a, Kalvari in min rawn kheuh zeuh a, engtia awm tur nge ka hre bik lo. Nupui te vin khur khur ching a nih phei chuan ka nei lo hi lawm tak a ni...khuanu han hmelţhat zia hi aw. 

"Ka va en sak lawk ang aw" a tih rualin Emi chuan bakcheh leh samkhuih min pe a, annu a luh hnuah pawh u Zirbawnga chu a la lut ve mai lo, "I va induh ve Remsial?" ti a min zawh pahin min rawn thlek a, "Hmm..mahni leh mahni inhuat ngawt thu awm suh, ka induh mai lohin" fiamthu ti tak deuh hian ka lo ti a, "Ka zin veleh i lo zin ve a, min umzui chiang" a ti fiamthu ve a, a ze ngai te te a chhuah leh dawn a nih hmel. "Intawhkhawmna barakhaih a nih hi" ka tih halh hnuah, "I awm tih chu hria ila ka rawn kal awm lo emai" ka ti leh a, inchhung aţangin Emin, "U Zir, hei i kekawr chu aw" a rawn ti hlauh a, ka thaw suai suai mai. "Ka va inbual ang e...mihrang ang a awm a ngai kher lo Remsial, ţang ţung reng suh, i duk vek mai tur a sin" a ti kher a, kekawr kenga Emi lo chhuak chu, "Bawihtei saw chaw ei hma tir rawh, nepnawi a ei ve vak lo a a ril a ţam ţhin. Ngaihven deuh rawh" tiin a lo hrilh leh a, a nupui nih a va han hahthlak dawn tak aw. Ka ngaihtuahna ringawt pawhin min ti weight loss alawm le. 

"Khawi, tan thuai thuai ang Zir zu-a a tho tawh" tih paha bakcheh min rawn laksak lehin Emi chu a nui hak hak a, "A sim tawh in ti emaw ka tia" ka tih chuan, "A sim lo chu a nih hi" a ti a, a sawi zui chuang lo. U Rinchuta rawn hawin min hmu chu, "I sam rawng a lar si a, kha i tan tawi lehnghal, i krismas ruih mai" min ti a, Kalvari bulah ding vein, "I sam i tan peih, i sam hian midang an ngai ngawt ang" a lo ti leh ţhin a, a faten an auh pawhin kan bulah a ding lui ve tlat a, "Pa uithin i va ang dawn ve" te a lo tia, han ngaih viau dawn pawhin u Rinchuta hi chu a ngeiawm leh thut zel. 

Dawnfuha a rawn chhuah ve lahin, "Enrawh hei, i nu Remkalamin satel helmet permanent a khum leh dawn a nih hi" a lo ti a, "Awii...u Rinchuta ţawngtheih sawt zia hi...mawi i tih loh i mit chhing mai rawh i ninawm" ka ti hlak hlak a, "A mawi lo ka tih loh kha" lo ti ban charhin Dawnfuha kaihna lam lamah a kal kual a, "Ka puanpho kha i tai thlak vaih chuan nangmahni'n in su ve tawh ang aw" Kalvari in lo ti ve khar kharin ka sam pawh kan tan zo a, ka darthlalang te ken laia ka in en chiah chu, "Awii...what a very sam tanted...a mawi lutuk ringawt, Zochhuran nitin ka lem a ziak peih dawn a nih hi" tiin ka nui har har a, ka sam chu ka tuai thuak thuak a, a hma aiin a put pawh a nuam, suk leh enkawl a nuam zawk dawn bawk. 

"U Rinchut, Remkalami bialpa thar hian lem ziah a thiam rapthlak mawle...Remkalami lem te a ziah sak a, a romantic e..." Kalvari in a ti vang vang a, "Thiamthil ngah deuh hi an thi hma duh an tih kha Remkalam, a romantic rei thei lo ange aw" tiin u Rinchutan min sawi ţhaih ve thung a, "Hmh...i thiam ve loh vang a nih kha. Wa nuam dawn em wa nuam dawn em ti a zai paha suk zuk zuk bak thiam lo" ka tih chuan, "Kha hla kha a hla thu a chen veng veng a har a, sak nalh har deuh a sin. I bialpa thar chu principal maw a nih a?" a ti a, Kalvari leh Emi chuan kan sam tanna vel an ti fai a, "Ka lo ti mai ang" ka tih pawhin an phal lo, u Rinchuta chu ka ngaihven ta zawk a, "Principal ni e...thawm dim thiam deuh chi, ze zawi deuh mai, kan biakinah pawh thu a sawi tawh. Naupangin an ngai teh mai a nia aw" intithei deuh hian ka ti a, "Umm...a lawmawm" ti nghut pahin a bu tel zeuh a, a ngawih vang vang hnuah, "A nei duh che em ni a?" a ti chhuak phawng mai. 

"Tunah hian sawi lawkna engmah awm lo vin kan inngaizawng thut a, 'ka duh che' kan ti lo hrim hrim, inneih nghal chi a ni hleinem. U Rinchut, mipa in hmeichhe lem in ziah vel te hian in duh lutuk tawh vang tihna a ni em?" ka tih chuan, "Hmeichhe lem ka la ziak lo" a ti a, zawh man a awm lo thei si. "Nih leh in ngaihsaka an taksa tana ţha tur in leisak te hian" ka tih leh chuan, "Chutiang ka la lei lo, Kalvari hi a hrisel a, eitur hrisel lo pawh a ngeih vek" a lo ti a, a nui mang bawk si lo, "Eng nge awmzia?" ka ti deuh ha a, "A nihna ang angin ka pawm mai. A duh tak tak che chuan a malchunga ţhuttir reng kher lo chein i nihna ang angin a pawm mai ang che. 'Ka malchungah ţhu reng rawh' ti chi a nih chuan i taksa chiah a pawm duh tihna. I nihna ang anga pawm tu che chuan a hunah tak a malchungah a ţhuttir che ang a, a hunah a paw nawlh ang che. I taksa leh thlarau thlengin a pawmin a paw vek tihna. I hrethiam em Remkalam? Lamlamte" tiin a nui vur vur a, "Kalvari pawh hi a nihna ang angin ka pawm a, 'i hmelchhia' a tih pawn 'Aw le' ka ti. Hei hi chu a dik chiah lo" a tih veleh, "Ni reng e...inzahtawn tur a nia, i duat leh lutuk a, kawppuite han hlauh lutuk hi chuan a dik thei lo, love overacting hi awm lo hram hram se" ka lo ti a, "Ka hlau lutuk hleinem, Kalvari chu a puitlin tawh em hi. Ka zirtir ţhin alawm, zirtirtu zawk chu a tirah kan dawhtheih zawk ngei ngei a ngai, Kalvari hi ka zirtir nasa a, a thiam ţeuh tawh" a tih chuan, "Zochhura chu a ţawngtam vak lo a, mahse min ngaihsak teh mai a nia aw...ka thin a na zawk a damdawiinah min hruai nghal" ka lo ti a, "I duh viau a ni maw?" a ti ban charh a, a nuih a za viau bawk. "Awi...he mihring ka duh zia hi chu maw...miin min vawm dawn chuan amah hi min vawm nan hmang se ka ti" tiin ka nui uar uar a, "I va ho e aw...tunlai chu hmangaihna hahahai a ni maw?" a ti a, kan nui dun hak hak reng mai. 

"A ţha Remkalam, hmangaihna hahahai chu a nuam alawm...ţawngţai ţha la a dik vek mai ang. Pasal nei la fa nei thur thur rawh" a tih chuan, "Nangmah hian min inkutsuih tir thei la ţha tur a nia" ka ti nghal ringawt a, "Ti ringawt suh...bul kan ţan ek ek chauh i tih kha, fel leh ţawngţai chiah i mamawh rih" a ti a, a dik ve tho mai. 

Chaw ei laiin u Zirbawnga a awm lo va, amah zawk a biru char char a a zia phian. "Emi a awm tho bawk a vawiin chu Remkalami te hi tlangah ka han lenpui ve ange. An chamrei thei si lo, vawiin a kan kal loh chuan kalna hun a awm tawh lo vang" Kalvari in a ti zung zung a, "In han lum der vak ang e...kal ve an awm reng a nia" u Rinchutan a tih chuan, "Ngah nge kan lum der ngawt ang ni? Naupangchhia kan ni tawh hleinem" Kalvari in a lo ti vat nain, "Mawiah...kan hlim lutuk chuan kan lum hrim hrim...kan khuaah tlang lumna tur a awm ve hleinem eng nge?" Sangkhuman a lo ti ve thung a, "Engtik thleng nge in cham ang?" u Rinchutan a tih veleh a, "Zanin bak kan riak tawh lo ang" ka ti chu min en ţhap mai. "Zochhura ka ngai tawh alawm eng nge?" ka tih chuan, "A mawl mawl nen" Sangkhuman a lo ti hluk a, a la cham chak tih ka hre reng mah se u Zirbawnga nunphung kan ti buai vekin ka hria. 

"Krismas dawnah kan zin leh dawn nia a nuam zawk ang, tunah chuan a lum emai, tuivawt a ka inleih lai reng pawhin ka thlan" ka tih chuan Fawnvelan, "Kan khua a lum fe zawk" a lo ti ve leh a, "In cham rei dawn lo e...min ti vir tawk lekin in rawn kal a, ka chaw ei pawh a tui lo" Kalvari in a lo ti niah niah bawk a, "I vir chuan ei bawrh bawrh te che" tiin ka nui hak hak na a tumah an nui ve duh ţhak lo. 

Kan buai deuh nuai avangin chaw ei khamah Zochhura ka video call hman hlauh a, "School ah ka awm tawh" a rawn ti nak nain a lak chuan inbiak a rem tho aniang chu ka ti mai. "Ka sam thar hi i hmu em?" ka ti a, ka sam then suau suau khawpa nasain ka lu ka ti che kual a, ka sam hmasa aiin put a nuam daih zawk. "Keimah vangin ti danglam suh ka tih kha. Ka tan inchei suh nangma tan, nalh i tih dan apiangin inchei zawk rawh" a rawn ti duah a, min en char char tho. "I tan pawh a ni chuang lo, duh ila chu i inchhungah ka thlalak lianpui ka tar thei" ka tih chuan a nui a, "I duh duh rawn tar rawh" a ti liam mai a, "Naktuk tuk lehah kan khua ka lo thleng thei maithei a nia aw" ka tih leh chuan, "A ţhat chu...ka lo hmuak ang che" a ti leh tawp a, ka lungawi lo hman viau dawn a mah se, "Pi Binladari dawr ka nghahpui zeuh zeuh a, 'min ngaihtuah suh se' a ti a nih chu" a rawn tih takah chuan ka thinrim tumna kha a bo leh duak a, kan ai a lo awh zo em a ni.

"Eng nge ka lo hawn ang che?" ka ti a, min en tawh lo vin hnuailam a bih a, zirlaibu a en daih a ni maithei. "I lo haw chuan a tawk, ka nu pawh lo zin a tum kha" tiin min rawn en leh a, "I aieng ka hralh bawk a" nui deuh chung hian a la ti zui a, 'i thawhpui ten an duh leh takin' tiin a bulah tlem te ka dah a, a lo zuar ve ngei a nih hmel. "I awm lo a Huma pawh a boh peih lo" a rawn tih leh chuan, "Awii...what a funny thing, romantic tek tuk pa" ka ti hlut a, "Ka haw hmain Kalvari leh u Rinchuta ka lo biak leh che ang a, Aizawl a kan riak leh ang a, ka ute pahnih ka lo biak bawk ang che. Kan chamrei tawh dawn lo emai ţhian kan kawm ange" tih leh phone dah ka rual a, min rawn call leh rang nasa mai, "Eng nge?" ka tih veleh, "A nih aw ka tih hmain i dah daih a, a nih aw" a ti a, amah zawkin a dah ve thung a, hlim chem chem tak ka ni. 

Inpui lama ka va phei ve chuan Dawnfuhan, "Mawh apa..tui ka cheng ve duh ka tih chu" a lo ti ngang ngang a, chhuata dingin u Rinchuta malah a bawk a, a luin a dul a nawr ngar ngar bawk a, "A ţul lo...i rit si, i tlak vaih chuan i pil rang lutuk ang" u Rinchutan a tih rualin rang tawkin a ke a per zawt zawt a, "U Duhsaka ten min veng vek dawn" ti mah se, "Cheng lo ang" a ti bur tho a, Kalvari pawhin, "Aw ti rawh, i ban te hi en ta che, nisa hnuaiah i vak den den peih lutuk a i vun rawng pawh a in an tawh loh hi" lo ti vein Dawnfuha kawrah a pawt a, pawnlam aţangin, "Dawnfuh" an rawn ti lauh a, kei lah tukverhah dak nghalin naupang chiah ka hmu a, school an kal dawn lo em mawni. Dawnfuha a din ngil nghal at rualin u Rinchutan, "A ţul lo ka tih kha aw" khauh zet hian a ti a, "Wadi kal ţha peih mang si lo nang aia lian, school kal peih lo ve tho i zui ziah ringawt. U Rinchut, a kal luih chuan hrem ngei ngei rawh" Kalvari in a lo ti ve khar khar a, Dawnfuha chu a men pur pur a, "Ţap suh" an tih ruala a ţap chiah mai chu a ring ţha a sin, a khek tuar tuar a ni ber. 

"Hmangaih lo tu tana ngeiawm tak tur i nih hi mawle...i ţap sin nasa mai sia" tih nang nang pahin Sangkhuman a beng a hup a, "Hmangaihtu tan pawh a ţap hi chu a ring tho" u Rinchutan lo ti ve bohin Dawnfuha chu a pawm a, rit a tih hmel em em mai lehnghal. "Nitin kg1 in a pun belh zel emaw tih tur a ni" tiin a nui vur vur a, Kalvari in phir te a buaipui ve thung a, ka nu leh ka pite hmuh tur atan an thla ka la a, "Kan chhangchhe lutuk hi e...keimahni pawh hian diaper kan hreng ve lo chauh a ni. Ţap tawh suh khua a lum si awi keichu ka â dawnin ka hre ţhin" a ti hlak hlak a, u Rinchuta a nuih ruh ruh laiin Dawnfuha a ţap uar sauh a, Kalvari in na vak lo a a ben hram kha. 

Dawnfuha a ţap bang chiah chu huai a ni mai. A reh nghal duk a, khawlum pawh a reh duakin ka hria. Emin a rawn hruai takah chuan Kalvari in, "Ri ve nghal ţhak ţhin ta che...miin ka ngei an ti leh dawn a sin" a ti nghal a, "A nazawnga naupang vin leh kutthlak a ţha hleinem" u Rinchutan a ti dam thlup a, kan indaih turin thei tui a siam zui nghal mawlh mawlh bawk. 

"U Rinchuta chu i ar vulh i talh phal ngai si lo a an upa tawh hlawm viau lo maw?" dawhkana bawh zawn zawn paha Fawnvelan a tih chuan, "Upa deuh vek...an lerh peih tawh hlawm lo" a lo ti fiamthu a, "Kan rawn zin manah pakhat tal te chu i talh ka ring a nia" vui awka deuha Sangkhuman a tih ve chuan, "Sa dang in hmeh a in ei ţeuh tho kha. In sumdawnna lam te in tluang maw?" a ti ta daih a, "Tluang a ni mai, keichu ka inhralh loh pawhin pheikhawk chhe siam tur ka hmu reng a, Remkalami hi a inhralh thei lo. U Zochhuran 'tihdan ka ngaihtuahpui mai ang' a tih tawp kha" Sangkhuman a tih chuan, "A ni maw?" keimah zawkin ka lo ti a, "Sangkhuma thuruk zep theih loh zia hi" Fawnvelan a lo ti ve bawk a, "I ţawngthei e...thuruk chu zep ve mai tur, i ţawngtheih zia hi...i pianhlimah pawh i nuin a pai lai chea a thil eiruk zawng zawng i sawi chhuak vek ang ka ring" tih zawm leh bawrh bawrhin a lungawi lo khawp mai. 

"Aw...ka thusawi lai nen a inzawm em a ka sawichhuak palh a nih kha. Chutianga han puih chiam dan a hriat chuan loh kha" Sangkhuman a tih chuan, "Surpriseted a tih mawlh mawlh kha mawle. I â emai awmze nei loin i dam ve reng ang ka ring" Fawnvelan a ti a, kan lo nui hak hak tawh hlawm a, "Tlangah chuan tlai daiah kal chauh ang u aw" Kalvari in a rawn ti hlauh a, an sawi tawh dawn lo emaw ka tih nen, "U Zochhura hi chuan Remkalami hi chu a thiam dan dan a puih a tum ve ţhin alawm. In nih hma khan a duh che tih ka hre daih tawh" Fawnvelan a ti ţha leh a, "Nitin deuhthaw Remkalami chanchin min zawt a, u Buanga te pawn an sawichhiat ngam tawh miah loh danah hian i hrethiam em Sangkhum?" tiin pakhat lah a bu nghat nghat a, an inmil leh viau tawh. 

Chhunah Kalvari in naupang ho a bual a, keini pawh inbual faiin kei phei chuan Lady Dianas Inn a mi bawk kawrfual tho ka ha leh a, an thawmhnaw hi ka lei nasa in kawrfual phei chu ka ring rei ţhin a, ka nu pawhin nalh a ti ţhin aniang 'Lady Dianas Inn chu thawmhnaw specialist' a ti fo mai, Kalvari ta tur ka chahsak ve bawk a, ka haw dawnah chauh a rukin ka pe ang ka ti thung a, Emi lo awm ve lo se chu ka pe daih tawh ang. Pial tawka ka sam ka khuih hnuah pindan aţanga chhuakin min lo fak sap sap hlawm a, "Kal ang u" Kalvari in a lo ti nghal a, u Zirbawnga pawh ka hmu, ka be lo thung.

Pawna kan chhuah ruala Kalvari chu kuahin, "My friend, kan khua ni zawk se tiraw? I duh hun hunah leng ve thei bawk a, awii vawk chaw pek bak hna dang i neih loh lai kha ka ngai" ka ti nghal zung zung a, hman lutuk vanga thil sual ti reng ţhin kha kan ni ve a, kan naupanlai phei chuan insual tur ringawtin park ah kan kal ţhin, chak si lo vin kan hah haw em em zel kha a nia, ţap lek lekin ka haw a, inah ka nu'n min lo vel ţap nge nge zel.

"Keichu Fawnvela te thil sawi vang khan nuam ka ti e" tiin Kalvari a nui har har a, "Eng ber kha?" ka tih chuan, "Zochhuran a langah leh a lang lo ruam aţanga a buaipui char char che u. Naupanlai aţang tawhin nangmah hian min veng char char a, thla tlemte chauhin kei aiin u mahla ka u daih angin i awm a, keimah vanga i ngam miah loh sualpui chang te i nei ţhin a, min hum tlat zel a, min buaipui ţhin ang chiaha buaipuitu i nei ve tawh hi ka lawm alawm. A ruka puih dan che a zawng char char a, i hmuh a lanmawi tum kher lo vin i tana ţha ber tur a duh reng zawk tihna a ni mai" a ti bawrh bawrh a, a nui sang reng lehnghal. "My friend, ka vannei ţhaks tiraw? What a very vanneihnaness a ni ringawt, ka vannei lutuk a van khi ka ta neih deuh tawp rih" tih pahin van ka kawk a, "Tunlai chu ka hlim lutuk a ei theih loh pawh ka nei lo, changkha pawh a kha thei tak tak lo, ankhapui te hi thlum ka ti tlat mawle" ti lehin kan nui dar dar hlawm a, tunlai chu hmangaihna hahahai a ni tak tak a, ka thinrim pawn ka nui daih zel. 

Tlang kan thlen veleh mi lo kal lohna lai tur ni a Kalvari in a sawiah kan ţhu bial laih a, Fawnvelan intur phawrh lehnghalin Kalvari in a hau a, mahse, "Tunlai chu Fawnvela hi a rilru a hah mai bakah a na a, hrethiam rih mai ang. Zuin rilru na a chhawk loh zia te pawh hre rawh se" ka lo ti a, khap lo ila chu a hau hrep tak tak ang. "Min sawisa hrep mah ula ka in dawn tho tho" ti sauh sauhin awmze nei lo va insehruh ţeuh chungin Fawnvelan a chhin a hawng a, "I inzawh theih loh leh ka inpui dawn che nia, ka tan thil har a ni hleinem" Sangkhuman a tih ve te chuan kan ngawi mai mai tawh a, no khat vel an in tawh ang tihah thil hrechhuak thutin Fawnvela hnungah ka beng dawm a, a eu ngang ngang mai.

"Nizanah khan u Zirbawnga nen min awmdun tir in tum, 'ka ngei..u Zirbawnga ai ţha nei rawh' in ti vak vak a, in ngei tak tak lo a nih kha" ka ti hlak hlak lai chu tim daiin min lo en a, Kalvari in, "A dik chiah" a lo ti ve bawk nen, nuam lo tih hmel deuh hian, "Nia" a ti lawi rut a, "Ngei chu ngei tehreng mai" Sangkhuman a tih takah chuan, "Nia kan ngei alawm mah se nizana a hmel kha a khawngaihthlak em kha, sawi tur ngah deuh a ang si, sawi fel law law se kan ti a nih kha tiraw Sangkhum?" pawr deuh hian a ti leh si a, "A dik reng" Sangkhuman a tih veleh, "Kan inţhen tawh a romantically in engmah a thleng thei tawh lo" ka lo ti a, "Chuvang tak chuan alawm u Zirbawnga khan hmana a sawi hman loh sawi zo law law se kan tih. A hmel kha in hmu lo mi? A hmel ka en ka en khan ka khawngaih tlat alawm..zanin chiah chu insawifiah ve rawh se kan ti a nih kha. Ni leh ru kan tihna pawh a ni lo a, khatianga a rawn lang hlawl kha a khawngaihthlak em a" Fawnvelan a ti duah a, "Mahse, mi pasal a ni tawh a, pindanah a nupui a awm bawk a, Remkalami nen chiaha an awm chuan a dik thei nang. In mawl emai...khawngaih mah ula khati khan ti tawh suh u" Kalvari in a lo ti ve thung. "Remkalami love story han thui leh kikawi zia hi...hmangaihna lamah i vanduai emai i bialpa te hmangaih kher tawh lo mai rawh" Sangkhuman a ti a, "Ni chiah...hmangaihna lamah a vanduai thei lutuk a a ngaihzawngte a hmangaih lo der ţhin a, a vanduai zui lo an ti mai dawn che a" Fawnvelan a tih chuan, "I vanduai ve tho kha...Fithangin phone a a biak ţhin pa chu i hmu lo dawn lo mi?" ka lo ti a, midang pawn lo ngaichang ve ţhapin Fawnvela ber a ngawi daih a, "Zu te i in leh phah a, i harsatna engmah a chhawk awm si lo" Kalvari in a tih takah chuan, "Ka hmu awm lo e...khapa hmuh kha ka ba mi? A bialnu pawh ka ni lo a ngah nge ka hmuh ngawt ang? Amah hmu turin ka zin lo, tlawmah ka la ve a, ka hmu lo chiangkuang ang" a ti tun tun a, "Aw i hmu dawn lo a nih chu. Zu kha kan khua a kan haw hnuah in zawm suh ang che u. Naktukah kan haw ang" ka ti chu an hawi phawk hlawm khawp mai. 

"Zin chhuah a harsat tehreng nen naktukah kan haw dawn maw?" Sangkhuman a lo ti pawr hlar a, "Haw dawn e...u Zirbawnga te awm kan ti nuam lo mai mai alawm. Keini chu duh leh Krismas dawnah pawh kan zin leh thei. Bakah kan khuaah zu in in lo a a nuam zawk" ka ti hlak hlak a, an bu nghat nghat nain an hreh hmel viau thung. "Nia...Emi a khawngaihthlak ve tho sia, u Zirbawnga te awm loh hunah in lo zin leh dawn nia, ka chelh lui lo mai ang che u" hrethiam tak hian Kalvari chuan a ti a, kan khuaah Zochhura nen inzui leh det det ila a nuam rih zawk ang. 

"Inngaihzawn laia han inhmuh a nawm theih nen inţhen hnua inhmuh a hrehawm tlat zel hi ka hrethiam lo. Ngaihzawng hluite hi haters deuh vek an nih hi" Sangkhuman lo tiin a rui leh phual tawh a, an zu in vang hian nakinah anmahni bawk an inchhir leh ang a, ka hnem tawh dawn lo reng reng. "Kan ngaihzawng hluite hi kan tan haters an nia, midang tan lovers an ni leh a, hei vang hian alawm hmangaihna leh huatna a inkawp tlat ni" ti a Fawnvela nui kur kur chu rum deuh hian ka melh a, Kalvari pawh a ngaihven peih tawh lo. 

"Sangkhuma bialnu hlui pakhat phei kha chu" fiah lo deuha Fawnvelan a tih hnuah, "Khanu khan ngaihzawng a ngah tawh lutuk a, a bialpa hluiten secondhand an ti tawh ngai lo, jumble sale an ti sup sup tawh" tih zawm lehin hniam deuhah a kun a, a nui kur kur reng a, "Awi...hemite pahnih zu rui hi ka hne lutuk my friend, khawtlang lunglen an hnawt bo vek. Thli rawn thaw pawh hi ka feel thei lo" ti hlak hlakin Kalvari nui ve ţha reng chu ka melh a, a ang ve vak dawn emaw ka tih nen, "Ka ngai cheu e...kan awm ho lai reng pawhin ka ngai che u" a ti daih. 

"Nupui pasal in neih ve hunah phei chuan fate in han nei ang a, inhmu lova kum hnih kum thum kan awm te a ngai ang a ka peih lo lawk sa, Fawnvela pawh nupui dang a hmu leh vat ang a, Fithangi a nei leh thei bawk a, kum hnih vel a liam leh meuh chuan inhmuh chu sawi loh, biak pawh kan inbe reng hman tawh lo vang" Kalvari in a ti sap sap a, Fawnvela ngaihdan a ni vak lo aniang, "Mood fuh lai takin light rawn off hmak zel suh" a ti pawr hlur mai. 

"Light ka off pawh a ni lo a, thil lo la thleng tur ka sawi mai alawm. Fawnvela hi i thinchhe thut zel" a ti nang nang a, an la inhnial zui. "Fithangi nen an inţhen vang a nih hi hrethiam ve ula, nangni chu in duhzawng in tawng ve ve a in hlim alawm tiraw Fawnvel? Mi rilru na hrethiam lo tur khawpin in duh ber ten an ngaihsak che u alawm tiraw Fawnvel?" Sangkhuman a lo ti zuah zuah a, "Dik chiah" Fawnvelan a ti ţuau a, a zu rui a inngaihtuah lungpuam aniang a men pur mai. 

"Ţap reng reng suh ang che i lian ropui si, kan thlem dawn miah lo che a nia" ka tih rualin a insut hruih a, "Awii...i should die...Fawnvel, chhe per pur viau suh mipa i nih kha" ti mah ila, "Mipa in mittui kan nei lo mi? Mipa mittui hi a tla ve thei lo mi?" a ti ţuau a, a va han hmelchhe tak. "Fithangi i ngaih viau leh kan ko leh dawn nia, a ţul chuan u Rinchuta nen kan rawn kal mai ang" Kalvari in a tih lahin, "Ka ko bawk lo vang" pawr zetin a lo ti bawk si, "Ţap mai mai rawh se my friend, miin bawng a bû emaw an ti tho ang, chhe per pur emai mipa ve si" ka tih chuan, "A man thei ang ber a ka ţah ve tho hi Remkalam" a ti a, Kalvari in an zu in bang a thukru zal zal lai chu ka hmu ru reng a, zu in eng natna mah a chhawk lo chunga buaina nei ţhenkhatin zu in an thlang mai zel hi ka hrethiam lo, a zuar tute duhdan pawh a ni bik lo ang. 

"A dik chiah...man deuha a ţah hi en ta che u" tiin Sangkhuman a lo bawl leh a, "Man deuh a i ţah rau rau chuan ţap chung khan inti sek la, i mittui te kha hnek thla rawh Fawnvel" ka lo ti a, Kalvari nen a kan nui uar uar chu rum zetin min rawn melh a, "I zuin lai kha hak lui vel la, mipa i nih tak tak chuan thi la tho lehnghal rawh" ti a ka chhaih fiam leh chuan Kalvari in nui bawk bawk chungin ka malah a rawn beng a, "Fawnvela hmel saw a sek vek" a ti a, Sangkhuma pawh a rukin a nui ve vur vur mai. 

"Umm....in duh tawkin min nuih rawh u, ka ţap tho ang" tiin Fawnvela lah chu thlang lam a hawi tlat tawh a, "Ka ţah hian in pawisa a hek lo" a ti thul, Fithangi biak mai ka duh tawh a, rilru na lo ang deuhin a awm a, a na reng tho si. Fithangi aiin a tuar na daih zawkin ka hria, Fithangi chu status ah a hmui a rawn ti kawh pût pût a, "I pasal i ţhen a i va hlim hmel tho ve...i hmangaih ve viau emaw ka tia" ka va ti nghe nghe, ani lahin, "Sap thlah kan nia, an thinlung nghet lo lai ka chhawm a" a rawn tia, kan hmuh turin hlim deuh angin a awm lui mai mai pawh a ni thei tho a, Fawnvela phei chu kan inbiak dan kha hrilh chi a ni lo nasa. 

"Fawnvel, i ţap tawh lo tiraw? I duh tawk tawh em?" Kalvari in a la ti lauh lauh a, a aw a nuihzatna lang chhuak chu hriat loh der theih a ni lo. "Ka duhtawk rih a, nakinah ka ţap leh lo ang tih ka sawi thei lo. Khawiah nge kan thil in bang kha?" tiin ţhu sawp nuai chungin a hawi kual vut vut a, a hnaih bera ţhu Sangkhuma chu enin, "Thlang lam ka hawi hlan khan i lo in zo leh vek tawh a ni maw?" a ti vin hlur a, Sangkhuma lahin, "Tlemte bak ka in loh kha, thingpui no khat pawh a tling lo" a lo ti then a, "I in a nih kha...vir leh lutuk, a khâk tehreng nen engtin nge thlang lam ka hawi chhung lek a i lo inzawh hman a? Ka khawhar hnem tu ber a nih kha" a ti tun tun a, a dinhmun hrethiamin Sangkhuman a chhang let duh lo hlauh a, "Fawnvel, calm down" a ti ringawt a, "Calm down pawh ti la a in up zel tho a nih hi Sangpawnchhia" a ti a, an inhauh nasat hmain kan haw pui daih a, tlang bak han len vakna tur awm hek lo, inchhungah kan tawm zui kuk reng a, Emi lah a taimain a che reng bawk si, tih tur em em kan nei ve lo. 

"I ko duh lo a, i ţap tho si a eng nge awmzia?" u Rinchutan a ti charh charh a, Fawnvela chu hawi vual vualin, "Tu nge u Rinchuta hrilh ve?" a ti a, Emi hrethiam lo hmel chu hmuin, "Keini ho chu min en liam mai mai rawh, boruak ah min ngai la engahmah min ngai lo mai ang" tiin ka hrilh ru a, a nui mai mai nain a ngaihtuah zui ve nasa viau ang. "Patling pui tlanga han ţah pur pur tur em ni?" ban charhin u Rinchuta bawkin a ti leh a, "Ka ţap pur pur kher lo" Fawnvelan a tih chuan, "I ţap pur pur ang" a lo ti ve thuai a, a rukin kan lo nui kan lo nui a, "Engpawh tawk ula zu in tawh suh u, mahni intih mualphona a nih kha. Rulin min chuk pawhin mipa chuan a helin kan tuar mai" u Rinchut bawkin a tih leh chuan, "U Rinchuta hi chu a pa a nia, rul pawn a chuk hlum zo lo" Kalvari in a lo ti zeuh a, kan nuih dar dar laiin Fawnvela a la tum kawh luau a, u Zirbawnga rawn haw ve rualin kan nui tawp hmang thung. Sawi tur a vang leh viau tawh. 

"Kan zu bel pawh a rawn haw hi. Fawnvel, zu in kher loin Zira hi hnim ula in rui pha tho ang" u Rinchutan a lo ti fiamthu a, "Pindanah Bawihtei te an awm a va awmpui rawh chaw ei kan la peih lo" Emin a lo ti bawk a, keichuan en pawh ka en duh lo hrim hrim. U Rinchuta zawkin tlang aţanga kan haw aţangin an naute a la pawm sak char char a, thiam lo deuhin a awi ve reng a, pindanah Bawihtei leh Dawnfuha te unau an awm thung. 

"I fapa hi pawm lut tel ve law law rawh" u Rinchutan a tih chuan, "A nu a awm kha" a ti a, pindanah a luh zui daih ka ring, a sual thiam khawp mai. "Zir thianghlima chu a va thianghlim lo sawt ve aw" Sangkhuman a lo ti fiamthu a, "En liam mai mai rawh u tikhan a titau lungawi leh mai ang, kei ai pawn a naupangchhia zawk" tiin Emi a nui hak hak na a an boruak a rih ruk hmel riau. U Zirbawnga nen kan inngaizawng tawh tih hi a hre lo der nge a hre lo tak tak ka hre lo a, Kalvari lahin engmah a sawi bawk si lo, Emi hi rinhlelh turin a awm ngai lo va, ka awm nawm lohna turin ţawngkam a nei ngai lo bawk. 

Tlaiah pawh kan rualin u Zirbawngan chaw a ei leh pek lo a, Bawihtein Emi hnenah, "Zu a in leh tawh" tiin a rawn hrilh ru ve tak na a kan hre pha vek tho a, Emi lahin, "A thi vat anga a ni mai alawm" a ti hmak tawh mai si a, den tak a ni. Bawihtei chu a nu chanchin ka lo zawt daih a, Kalvari in, "Vani chu pasal dang neih leh a tum lo aniang mipa a ngaihsak tawh lo, Bawihtei hi a atchilh bur a a ni mai, a la ţulpui nge nge ang" a ti ţhin a, Bawihtei lah hi a hmelţha reuhin pa tel loin a seilian a, a pain a pian hlimah a boralsan a, duat hlawm viau mah se a lainatawm tho tho. 

Zanah Fawnvela leh Sangkhuma te an mu hma a, dar9 velah an hnar bawrh bawrh tawh. Kalvari nen rei deuh kan ti ti thung a, min mut san hnuah, "A lum emai" tiin bathlarah ka chhuak a, a reh tawh bawk a Zochhura ka call a, "Kalvari nen kan ti ti chhung lo meng reng rawh" ka ti miau a, ka call hmasak ngei ngei a ngai.

"Hello" a rawn ti thum deuh dut a, pulpit ah country road a tih luah luah duh hmel ka tih tawh kha, "Naktuk zanah Aizawlah kan riak ang a naktuk tuklehah khua kan lo thleng ang" ka ti a, vawi thum vel ka hrilh tawh. "Lo haw vat rawh Sangbollywood in a ngai tawh che" a tih hmasak te te hnuah, "Keipawh" a ti leh zeuh a, "Min ngai sup sup a ka rilru a hah daih, pali panga vel ni thei ila ka ti, in khua a har lo vek ang a" ti fiamthuin ka nui vel har har a, "Pali panga vel pawh nila a lian ber ka chang tho ang" a rawn ti a, hei hi a nia Zochhura makna chu, phone ah a zei tehreng nen kan inhmuh chiah hian a zei lo tlat zel. 

"U Lianpuiin thil ţha deuh min hrilh a, Aizawl a mi zawrh tur ka rawn la haw dawn, zanah pawh an inhawng reng a, ka la ang a ka dawrah ka kawl ve ang, parlour ti parlour tu tur" ka ti zung zung a, "Zawrh tur i la vak vak ang a dawr luahman i ba daih ange" a tih chuan, "Sangkhuman min pek sak dawn alawm" ka ti a, a thutiam kha ka hria mai ni lo vin ziakin ka nei thlap a, Sangkhuma hi a tlanchhe thei lo tawp ang.

"Rin aiin i lun lo a Remkalam, pasal neih i ngaihtuah tawh ngai em?" a rawn ti daih a, "Ngaihtuah mai ni lo vin ka tum a, ka ţhulh leh tawh zawk" tiin dik takin ka chhang a, a hriat ruk reng ka ring. "I va'n pa em em" a ti a, a nui hawk a, sawi tur a vang leh tawh. "Ka pa em em vang pawh a ni bik lo" ka ti zawi sap a, nakinah neih tlak ni a ka ngaih hunah a chhan diktak ka hrilh chauh ang ka ti a ni. "I ţhulh tawh loh a ngai a nih chu...naktuk a Aizawl in pan dawn chuan mu hma rawh, i chauh deuhin ka tuar ber zel a tiraw?" a rawn ti a, Zochhura vang hian lawmthu sawi ţawngţaina neih hluai ka chak ţhin, hmelţha si, fel bawk si. 

"Ka rawn haw veleh pu Taipuia te inah kan len dawn kha aw" ka tih ţhat leh chuan, "Umm...ka be fel tawh. Annu sek deuh khan i aieng siam te min dawr a" nuihzat hmel deuh hian a rawn ti a, "Awii...hmangaihna hahahai...hmangaih loh har pa" ka ti a, phone ka off nghal daih a, a hawi rulh rulh ang chu. Reivak lo hnuah message rawn thawnin, 'Hmangaih loh har pa min tih duai duai reng dawn chuan zunthlum leh thisen sang damdawi min rawn hawn rawh. Ka la mamawh ang" a ti a, 'All go...doctor ka rawn hawn tel ang' ti a chhangletin nui var var chunga a message rawn thawn ho ka chhiar laia tu emawin ka dara a rawn dawm thut chu phu nasa tak ka ni. Ka vir zawk ni berin ka hria, u Zirbawnga hmel ka hmu chu, "Awii...i may die...ka thlawk lo chauh a nih kha" ka ti vin hlar a, a la nui suk zuk, ka phu nasa lutuk chu ka thin a phu dut dut thei alawm le.

"Naktukah i haw dawn maw?" zawi sup hian a ti a, "Haw dawn e...ka nu te hnenah phei chuan zan khat lek riak tur angin kan insawi a, zanin hi zanhnih kan riahna tur a ni tawh" ka lo ti zung zung a, "Sawlai ah sawn ţhu lawk ang" tih pahin far thing hnuaia ţhutna an siam chawp chu a kawk a, tuna an awmna quarter hi kan khaw pastor quarter aiin a zau zawk a, kawt zawl a awm bawk nen, a nuam reuh tak tak a ni. Mahse, "Ka duh lo, zanah ka ţhu ngai lo ka mu ţhin. Bakah ţhu pawh ni ila pangang te a lo tla ang a, sava ek te kan ţhut palh ang" ka ti leh zung zung a, "Sawlai lawk a ţhu tur mai maiin chutiang an ngaihtuah kual duah ngai lo" a ti nain, "Ka ngaihtuah lohin i ngaihtuah dawn bawk si lo alawm" ka ti a, a lo nui hawk a, "Naktukah i haw daih dawn kha Remsial, hrilh tur che ka nei" a tih pawhin, "Mahse...." tih fan raih pahin inchhung lam ka thlek a, ka ngaihtuahna a hria aniang, "An mu vek tawh" a ti a, ka kal hun pawh nghak lo vin ka banah a dawm a, ţhutna lamah chuan min phei pui a, "Sawi zung zung rawh" tih leh ţhut ka rual a, ka bul hnaih deuha a rawn ţhut rualin ka tawlh hla vat bawk. 

"Sawi tur vak ka nei lo" a ti leh ang lawi a, "Awii...khatiang phakarity kha ka duh lo" ka tih rual deuhthawin, "Ka ngai ţhin che" zawi te tak tak hian a lo ti ve a, "Zep ka nei kha ka la inchhir reng a, rilru mumal ka put loh laia nupui ka ru kha ka inchhir bawk. Siamţhat theih a ni tawh mang si lo a" a tih chuan, "Inchhir nan pawh a tlai tawh, mi nupa pawh ţhen ka duh lo reng reng" ka ti a, ka tho uk tawh chu min pawt ţhuin, "Hlau vak zel suh, ka nupui ţhen ka tum hleinem" a ti dam ve thlup a, "Ka inchhir zia hria la ka duh mai a ni. Fa kan nei tawh a, ka nupui ka ţhen dawn lo. Han ţhen leh ta ila chu ngaihtuah la, vai ramah fa ka nei a, Aizawlah fa ka nei leh bawk tihna a ni dawn a, hmun tina fa ka neih thluah chuan scientist ten min zirchiang duh mai dawn a sin, ka ruang an inchuh ang a, ka thlarau a hahdam thei nang" a ti fiamthu a, a nupui ţhen a tum lo chu hahdam huaiin ka nui ve leh hak hak tawh a, "I nupui ţhen i tum loh rau rau te chuan zu in tawh mah ta che, rui sual chi i ang ropui si" ka tih chuan, "Ka sual kher lo a, ka ning ţhin. Ka nupui ţhen ka tum lo mah se ka theihnghilh ngai lo che" a ti a, kan mûk lutuk hlauin, "I memories ah ka cham reng a nih chu" uangthuang zet hian ka lo ti a, "Umm...ka ngai vek. Ring deuh a i nui duai duai ri te, i pawisa chhiar thutak hmel leh i vin hlak hlak ri te, i sapţawng hman tlabal leh inzawm lo phuahchawp kual vel te, i aieng siam lai te leh engkim ka ngai vek. 'Ka duh che' ka tih laia i lo meng please ţhin te" a tih chuan ka nghawk sawk a, ani lah a lo nui hawk hawk a, "Ka meng please kher lo aw...i ngaih ho kha a mak si, tu nge bialnu hluite pawisa chhiar lai hmel ngai ngai?" ka ti kha kha a, "Aww...i pawisa chhiar lai hi i thutak ve lai ber a nia, ka bula i awmin thutak ve ţhin la ka ti alawm" a ti a, ka thutak ve theih tehreng nen. "Thutak hmanin min siam lo, thil dang kha chu ka hrethiam ang a, meng please tih kher kha ka hrethiam lo, mipain min duh vang ringawtin ka meng please ngai lo aw" ka la ti kha kha tho a, "Ka nupui ka ţhen dawn chuang lo a, i phone number thar min pe la, biak theihin awm leh bawk la, nau angin ka en tawh ang che...naute angin" a tih chuan rum deuhin ka lo melh a, "Tunu angin ka en leh si ang che, i duh leh i pi angin min en dawn nia, ka biak ve theihin awm leh hram rawh" a ti ngang ngang a, "Ka pi tih hlirin ka ko dawn che a nia, romantically in min be lo bawk la" ka tih chuan, "Aw...i pi leh pu angin min en la, i duh duh danin min ko rawh, romantically lam chu a tel tawh lo ang, khawi i phone number" tih leh phone phawrh a rual a, ka lo pe ve mai bawk. 

"Ka lawm e aw Remsial, min block tawh miah suh" a tih chuan, "Romantically a min biak chuan permanent in ka block ang che. Kan thih ve ve hnuah pawh ka hre lo der tho dawn che a nia" tiin ka vau lawk a, rem a ti aniang a bu nghat nghat a, "Zu in ve si i va rui lo" ka tih chuan, "Ka in ţhang tawh alawm" a lo ti mai a, "I dose a va han sang em em...Fawnvela ten tlemte an in pawhin an ţap bui bui a nia, zu chhia pawh in la i ner suk ringawt dawn a nih kha i pumpui a ţha emai" ka ti bawrh bawrh a, a hma ang thoin engtin pawn fiam ila a haw lem lo va, "Remchangah in khuaah ka lo la zin leh ang" a tih veleh a, "Eng nge i lo tih dawn?" ka tih chuan a ngawi vung vung a, chhuanlam tur a ngaihtuah kual ni awm tak a ni. A ngawih reng hnuah, "Maski-a thlan tlawh te pawh ka duh a, setanic Nicky lah kha a â daih an tia, a ât hnuah ka la hmu leh miah lo a, u Lalhuma leh pu Taipuia te pawn min ngai tawh ang" a ti duah a, "Kan in a i lo kal vaih chuan ka nu a in sangmar ang a, damin i chhuak lo ang aw" ka tih chuan, "Kha chu ka hria, ka pi Binladari khuh puak ringawt pawh ka hlau, lungngai suh, mahse, an dam tlang em? Eng nge an tih ţhin? Kalvari engmah ka zawt ngai lo a, kan inbe ngai mang lo zawk" inthlahrun hmel deuh hian a ti a, "Aw....an dam vek. Ka pa pawh a hriselna a ţha chho zel a, ka pi Binladarin dawr a la kai a, a uikawm lutuk kuhva uih thlengin a chhiar vek" ka tih laiin a lo nui a, "Huiham" ti hulh chung hian a vanvadak a, a khua a har ve deuh em mawni ka ti. "Sawi zel rawh" van lam en reng chunga a tih chuan, "Tunah hian pu Taipuian nupui a ru ve mek a, u Lalhuman sek a ti lutuk" ka ti chu a lo nui leh hawk hawk a, "U Lalhuma pawh a chhungte tu emaw berin an rawn awmpui ve reng tawh a, a la rui reng tho. Zu leh pumpui chakna a la heh reng a, pu Taipuia pawh a la rui tho. A nupui sek deuh nen an rui dun ţhin an tia mah se ka la hrechiang lo. Setanic Nicky kha Kiki kan ti vek tawh a, a â tak tak bawk. A ât dan kawng a thui a, ruihhlo vang aniang ti tu an awm a, a ât der ring an awm bawk a, kuhva leh meizial hlawhin ka pi Binladari a pui zeuh zeuh ţhin. Ka pi chu vawk a la vulh a, a dam ţhatin kingkong a in tia, a dam lohin min phut leh a, hmanni deuh khan a tlu sual a, a dam tawh. Ka pu zawk hi a hriselna a tla hniam zel a, ka nu leh pate pawhin an ngaihven zeuh zeuh ţhin, a thaw te a hah leh ţhin a, tiang hawla a kal ve pawhin a kut a khur der der zel, Kalvari ka hrilh duh rih lo a" ka tih chuan min rawn en a, "Damdawi a ei reng kha, a ngeih lo mi? Ka hmuh hnuhnun ber ai khan a chhe tawh mi?" a ti a, a ngaihtuah tak tak a nih hmel. "I hmuh hnuhnun berna a rei tawh e...khami ţum ai khan a tar daih tawh zawk, a hrisel lo zual bawk. A cher a, a lang tar zual, damdawi chu Puipuii te nupa in an la rawn thawn ziah tho" tiin chipchiar takin ka hrilh leh a, "Aizawl ah te in entir se, kolasib ah te pawh" a lo ti a, "Kan sawi ţhin a, a duh lo tlat zel alawm. Kal chu an kal ve zeuh zeuh reng tho a, inah a tawm tlawk tlawk a ni ber. Bathlarah a ţhu chhuak ve zeuh zeuh tih lohah chuan khawiahmah a kal ngai lo, ţhenawmte pawh a tlawh peih tawh lo" ka tih chuan, "A va ţha lo ve" a lo ti sup a, kan ngawih dun vang vang hnuah, "Engvakmah a la danglam lo a ni maw?" a ti leh a, "Danglam vak lo, dawr ka nei leh tawh a, kawn lai takah a ni tawh thung a, thil dang danglam a la awm lo, aieng ka la zuar reng a, Lady dianas inn pawn min la zawrh sak reng. Lawmthu sawi nan an thawmhnaw zawrh te ka dawr ve ţhin a, inhralh an ti nuam lutuk" ka ti siam siam a, "Ka va lawmpui che ve" a ti ban charh a, van lam hawiin a dak leh daih tawh. 

"Naktukah ka haw dawn sia ka mu dawn, Fawnvela leh Sangkhuma an hnar ring si, ka va phuar bet teh ang an thlawk daih ang tih ka hlau" fiamthu a tih pahin ka ding uai a, "Dar engzat sumo ah nge haw in tum?" ti a min zawtin min rawn en leh a, "Chaw ei kham lamah aniang, hma deuhah chuan a peihawm loh Aizawl ah kan riak dawn tho" ka ti a, kal mai ka tum chu ka banah rawn dawmin, "In khuaah chuan damdawiin te a la awm em?" a ti ţha leh a, "Awi...chutiang mai mai han inzawh i ti mak thei e u Zirbawnga chu ka thi ţhaks" tiin ka nui hak hak a, ani pawh a lo nui veleh mai a, "Tak taka va mu rawh, naktukah in haw dawn sia, in rualin chaw ka lo ei ve tawh ang" a ti a, ka kal zet tawh hnuah, "Remsial" rawn ti lehin ka hawi let veleh, "Min block tawh suh ang che" a ti a, chhan pawh ka chhang tawh lo, a nupui dinhmun ti derthawng thei zawnga min rawn biak chuan ka block leh tho ang. 

Kan pindan a ka lut chu Sangkhuma a lo ţhu luau a, tui bottle lianpui a lo pawm run bawk a, "Remkalam, zu ka in tawh dawn lo, ka lu a na lutuk ka sim vang vang" a en ngai en reng chunga a tih hnuah tui a in khawlh khawlh a, "Fawnvela rilru na ka inpui e ka tia keimah ka na zawk, ka luak te a chhuak, theithur min la zawn teh" a ti leh a, a lu a bukin a thur bawk si, a luah hian sava an thlamuan duh hmel bik. 

"I va ninawm tak e aw...in zu in ve hi chu ka buai ber zel. I in leh vaih chuan u Nobawihi ka tihpui tawh ang che" ti hlak hlak chungin ka chhuak a, fridge hawngin ka hai rak rak a, sunhlu ka hmu hlauh a, ka khar leh rualin u Zirbawnga a lo lut ve ziah a, sunhlu leh chi chawpna ka keng a hmu chu, "Fawnvela te ei tur a ni maw?" nui chung hian a ti nghal a, "Ni e mawle...zu aiin a sehhmeh an heh zawk a ka ning a nia" ka ti a, dimtea kawngka a kalh hnuah, "Muttui aw" zawite hian ka ti a, ka bu nghat a, kan mutna tur lam ve ve kan pan zui a, Sangkhuman, "Remkalami hi i hnianghnar ka ti" a lo la ti zui. 

"Eng nge ka hnianghnar na? Sunhlu pawh kha Kalvari te ta a nih kha" ka tih chuan, "I zinnaah i bialpa hlui a lo awm a, kan haw hunah i bialpa in a lo hmuak leh bawk che ang a, kan naupanlai khan i luck bik dawn tih chu hria ila ka ngaisang viau ang che" a ti a, sunhlu chu chi tel lo a sehin ner vak chungin a chhing duar duar a, "Mu mai mai rawh, zu in tawh lo la, Fawnvela pawh kha in tawh lo turin hrilh ang che. Ka mu dawn" ti a khuma ka lawn chuan, "Keini'n bialnu pakhat nei tur pawn kan bei rei a nia, nangchu i nei zung zung a, hmeichhia ah chuan a ti thei pawl tak i niang tiraw?" lo ti lehin a nui vur vur a, a hmuh lai renga puana ka inkhuh hmak kha. U Zirbawnga hi chu ka hmu nawn tawh kher lo ang, kan khuaa a rawn kal tak tak ka ring lo bawk. Ngaihtuah zui loh hram hram ka duh a, han memories vel ka peih lo, naktukah kan haw ang a a dik leh vek mai ang. 

CONT....