KEIMAH, THINGTLANG NULA (FINAL SEASON) 19

KEIMAH, THINGTLANG NULA (FINAL SEASON) 19 

"Isss...Remkalam, dawra kal pahin in inchu kha vel a ni maw? Khawthim i ngaina sawt lutuk a i thu vek tawh kha, khawthim ang chiah hian i la dum thim hlup mai tur a sin" Sangkhuman a ti fiamthu a, min chhaih zui reng bawk a, ka zah lutuk avangin boruak a tawt vek. Boruakin min phuar bet tlat ka ti mai, "Awii...what a very boruak tight" tih hluai pahin ka kutphahin ka hmai ka zap a, boruakin min phuar ţang rengin ka hria. 

"I sapţawng hi a chal thei fawk fawk e" ti a Zochhuran min lo fiam ve chuan, "Chal mai mai rawh se, sapţawng lam dan chal a tar thi ve thei chuang hleinem" ka ti a, "Thingpui ka lo lum ang" Zochhuran a tih leh lai takin pawnlam aţangin hmeichhe aw hian, "Ka duh duh naah ka kal ang, ka kein in kal hleinem, ka lengchhuak leh khawlaia ka vak vel hi ngaithei lo viau suh u, khawlaia ka kal mai mai avang hian in lo hah ve lo, keimah chiah ka hah, keimah chiah ka rawl, ka ke chiah a kham. In chawn tha ringa vak kual vel ka ni lo, keimah vangin in chawn tha a chat ngai lo" a ti tuar tuar a, "Sangbollywoodi" kan lo ti rual dual mai. 

Sangkhuma nen pawnah kan chhuak vat a, Sangbollywoodi a ni ngei a, Zochhura in kawtah lo ding teuin a hmazawnah a nu leh a nutei an ding a, u Valdiki a awm ve bawk. "Khati'n au vak vak zel suh, kan rualin lo haw tlang ve nghal la mu hma rawh ka ti, naktuk hmarcha zawrh i ngai" Sangbollywoodi nuin a tih chuan, "Ka len kawi vangin ka hmarcha zawrh a thak loh phah dawn lo, naktuka ka hmarcha zawrh tur ka vil zankhua peih bik hleinem" a lo ti hlak hlak a, a nu chu kan dinna lamah a rawn hawi phei zawk a, kan chhuah hlima min lo hmuh nghal vek vangin pawi ka ti lem lo.

"Zana hmeichhe chhuah reng a mawi lo, zanin bak i chhuak tawh lo ang. I rawn haw tlai vaih chuan ka beng tawh ngei ngei dawn che a nia" a tih hnuah Sangbollywoodi nu chu kan lam rawn hawi lehin, "Sangkhum, rawn thlah thlap ang che aw" a ti a, a nau leh u Valdiki te nen chuan an kalsawn zui nghal a, Sangbollywoodi lahin phur zeta ka bana rawn kuah pahin, "Vur siamna tur hairep tlem ka lei tawh a nia aw, sarang chu i tum ve thei" a ti nghal a, inchhungah ka hruai lut hmasa te te a, "Khawlaiah au vak vak tawh suh" ka tih chuan, "Hmanah nangpawh i au ve ţhin tho kha" a ti daih, ka lo va han entawntlak awm lo ţhin em em. 

Dawhkan kila kan ţhut bial laih laiin Sangbollywoodi bawkin a phone en a nui var var pahin, "Ramnghinglova hi ka duh thei vel chiang e...a damlo ve hi ka awihsak duh ngang si lo a, 'ka nunna hming chhalin ka khua a sik' a rawn ti" a ti a, a ke a per dat dat a, "A nunna hming a chhal chuan a damlo tak tak tihna a ni mai, dawt a sawi chuan a thi dawn tihna a nia" a ti leh a, "'Damdawi mum a dawlh thei si lo a, a khua a sik apiangin nachhawkna a inhnawih tawp ţhin' an tih kha" ka tih chuan an lo nui dar dar a, "In ni leh tawh mi Sangbollywood? U Nobawihi a ngaizawng a ni lo'm ni?" Sangkhuman a lo ti ve khauh a, Sangbollywoodin, "A fiamthu mai mai a nih kha, Ramnghinglova chu a fiamthu a sang emai" a ti fel then nain ka awih chiah lo, an inţhut hnaih dan khan inhiptawnna rau a keng tel. Midang hriat ve loh tura thup an tum nain an inkarah khan mit a hmuh theih loh feelings a awm tlat. 

"Kha, thingpui in phawt rawh u" tih pahin Zochhuran an thingpui tur ţheuh a rawn pe diat diat a, keichu thingpui min intir tumna no a lian lutuk a min rawn pe ţuih ţuih bikin ka hria. Sangbollywoodi pawhin, "U Remkalami thingpui no chu a lian ei, nausen tlak hlum theihna lawih alawm le" a ti hluai a, he no a ka in lai hi min hmu tawh reng sia, "Thingpui paw thlum pai kawh haw leh lung ila a ni mai alawm. Ka kawchhungah thingpui a lal ber leh dawn a nih hi" ka ti kher a, Zochhura lahin he no a in hi ka duh tawh lo tih a hrethiam der lo, kei lahin ka sawi dawt hreh ve deuh bawk si, a nih nih ka ni tawh anga a ni mai. 

"Vur kan la siam hman angem? Engtikah nge Nutei a lo kal leh dawn?" Sangbollywoodin a tih chuan, "Ka la hrechiang lo, helama thawh tur a neih chuan a pa'n in luah mah se pawi a ti lo a, mahse a hranpain dawr a hawng ve daih ang tih ka hlau. Kan inah awm se min pui se ka duh daih zawk. Kolasib khua ve si Kolasib nuam han tih loh, Nutei pawh hi a" ka ti duah a, Kolasib ah dawr hawng se, a thiam chhun chhun khawih se a hlawk zawk dawn tehreng nen. 

"Keichu ka ţhiante in a awm chawt tur pawh ni ila ka nuten an tello a khaw danga awm an phal teuh lo, Nutei chhungte hi an fel e...kan khuaa a cham reng an phal a" Sangbollywoodin a tih chuan Sangkhuman, "An dang thei lo a nih hi, dang thei se, thunun thei se an phal bik tawp nang" a lo ti a, a rukin dawhkan hnuaiah ka tlawh zeuh a, Nutei hi an hmu dik lo laklawh zo tawhin ka hria. "A hma kha chuan a tihtauh vangin a lo kal a, tunah chuan Msa vangin a lo kal tawh ang...ehhhh" tiin Sangbollywoodi a nui pherh duai a, tumah kan nuih a za ve der si lo. 

Zochhura a ţhut hman ve veleh Sangkhuman ţhutna lo kianin ka bulah an ţhuttir a, kan zin chau bawk a ka mut a chhuak der, ka bula ţhu chiah Zochhura zunzam pawhin min chhem harh zo ngang lo a ni. "Hawh u, in vat vat ila haw ang u ka mut a chhuak" ka tih chuan, "I zahzel a nih kha, kan chhaih che u i hlauh vang" Sangbollywoodin a lo ti daih a, ka ngei lutuk chu a ţhutna lamah na tawkin ka hawi phei a, ka sam inthen leng suau chuan min vaw na lek lek hial a ni. 

"Mi inngaizawng mai mai chhaih ziah kher kha a ţhing, miin min chhaih hian ka bialpa te ka ten daih zel a nia" fiamthu titak deuh hian ka ti a, Zochhura lam ka hawi zui a, min hlau ni awm taka min lo en ka hmuh rualin ka nui na a a nui ve duh hauh lo. "Ehh...Remkalami leh Zochhura an in en vel, a kausauti ţiah ţiah" Fawnvelan uangthuang zeta a tih chuan, "Min chhaih tawh suh u" Zochhura zawkin a lo ti a, ten chu a hlau ve khawp mai. 

"In awm em? Ka haw lehnghal mai aw" tih lung lung pahin u Lalhuma a lo lut a, "Remkalami te zin an lo haw an tia, in inah ka rawn kal a i lo awm reng reng lo. Eng nge min lo hawn a? Ka nupui tur min hawn nachang te hre ta che u" a tih duah hnuah, "Eheeee....i sam chu le(h)" a ti per duai a, "Helmel tuiek khum i ang, Abdul Kalam fans te zingah Remkalami ang em em a ruhkawl ka hre ngai lo, khatiang sam tan dan sam hair style kha i bansan hleithei lo a nih kha" ti lehin a nui huk huk a, a dar a ti che tel kher lehnghal, zu rim a nam huam bawk a, "Hmh...what a not funny thing, ka sam chhiat vang mai mai a tan ka nih hi aw, nalh ka ti bik ţhaks lo, khatia fiam rual pawh ka ni tawh lo" ti hmak hmak mah ila, "I upa tial tial a i â tial tial, mikhual tlangval lah hi i rim ziah a, Zoram, Remkalami hi ring suh aw mipa duhzawng a ngah poh leh bialpa a ngah a ni mai, thei cher cher tak a ni" a ti a, pawn aţanga, "Lalhum, i va rei ve, once in a sana i tih kha, hei minute khat a liam tawh rawn hmanhmawh rawh" an rawn tih tak lung lungah chuan, "Ka'n kal leh phawt mai ange min ngai viau mah ula" a ti deuh kher a, a chhuak tur, "Naktukah chaw nawi min khawnpui rawh aw" ti a ka lo au chu, "In khatah cheng50 zel ka inchhiar dawn a nia, i ţham chhuah peih loh rimchhe ho ţham chhuak tuah bak min hmang leh lo ang" a ti a, a kal nghal daih a, zu a heh lutuk a u Lalhuma pawh hi a â chhulh tawhin ka hria. 

"Haw ang u mut a chhuak" thingpui in zawh hnuah ka ti leh a, ka in hnem bik em avangin kei phei chu ka puar tel lehnghal. Sangkhuma te pawh an chau ve aniang kan vaiin kan inzui chhuak a, Zochhura chu min thlah lo mai turin ka hrilh a, kalkawnga kan khawtlai ka hlau a ni. Sangkhuman Sangbollywoodi a thlah a, Fawnvelan min thlah thung a, thingpui puara ka puar miau avanga ka ka dul ka zut leh ţhin chu, "Eng ngati nge khatia i pum i khawih leh ţhin a?" min ngaihtuah hmel deuha a tih chuan, "Fawnvel, ka puar lutuk" ka ti chuai raih a, "Ka thingpui no a lian lutuk a, ka pum a puar ţung mai" ka tih leh hnua, "Pum puar a nawm loh hi chuan kan pum hnawh tu hi hnarkhuchhuah hluah hluah thei ila ţha tur a nia" ka ti leh chu, "Sawi reng reng suh, mizo pa ekin rim kan nam rum rum vek dawn a sin, khawvel hi a uih ngawt ang" a lo ti vin hlur a, kan han nui dun leh ţhin, "Kan thil pai ţawih kan thawk chhuah zel chuan kan thaw khu uih rum rum mai ang" a ti leh a, kan thusawi mak deuh deuh kan nuih pui hak hak laia, "Fithangi hi engtin nge?" ka tih chuan a nui tawp hmak mai. "I ngai miah lo mi?" ka tih leh chuan, "Ngai ve tho e...aaaa hmeichhia zawkin ngaihzawng min neihsan a, neih leh chi a ni tawh hleinem. A nu pawh hi ka dem ve, zilh a ngaih naah zilh lo vin a fuihpawrh zel a, kan inah a rawn lawi lut nain keimah zawk hi makpa chhungkhung ka ang. A vuina a ho thei bawk si, inţhen rih ila a bialpa hi a nei dawn chuang lo a, a tih dik loh hre ve rawh se. Ka nu leh pate hi nu leh pa angin a en ve thei lo, a en hrang ru tlat a, ka ngaihsak deuh te hian a thin a rim zel. Ka nu neih ang apiang neih ve a tum bawk a" a ti deuh duah a, "Chuti chu i nu ha a bal hunah an pahnihin ha lem leisak la" ka lo ti a, pahnih chauh mah ni ila kan thawm a ring nasa, "Tak takin Fawnvel, hlim deuhin rawh rawh, i pathlawi vang hian inthlahrung lo la zu in tawh kher lo bawk la, i tlangval lai ang khan khawvel hi rawt leh nawk nawk rawh, i khawharna kha han nuai chimit vek teh, pa deuha zurui chunga ţah kha chu pa lo ka ti tho tho" ka ti a, kan in lam panin ka chhuk san zui nghal a, Fithangi pawhin thiamthu sawi tur a hre tho ang, nupa buai chu thiamthu sawi tur an hre ve ve zel. 

Dar10 vel a rik tawh hial laiin nu Zonuni kan inchhungah a lo la ţhu khar a, a kut kuangkuahin rum deuhin an in lam a melh a, an inhau leh tawh a ni khawp ang. Kan zin hma thleng kha chu chhung inkhawm an neih dawn apiangin an chhungkuain an la zai ho kha a nia, anni chhung hi chu an chin a hriat loh. An fanu lah 'mipa hian min chul mai a ni lo, min tuai min tuai zel' a tih avanga tun thlenga Tuaisiali an la tih ţhin a nia, kan khuaah hian kei aia lerh an tam lutuk. An fapa zu heh lutuk Vunga pawh mi zawng zawngin Zuvunga an tia, an zaithiam chhungkua em em thung. Fapa fel deuh pahnih an nei tel a, anni chu Aizawlah awmin pakhat hi college ah a thawk a, pakhatin lehkha a la zir thung. An fa upa ber leh tlum ber Aizawlah an awm tihna a nih chu. 

"Nu Zonun, i lo leng elo?" ka ti mawi ve a, a tum lian em a min chhan ka rin loh nen, "Leng lo thei lo a min siamtu an awm alawm. Arbawm leh thlangra a hralh hnem apiangin buaina a siam, ar zuar ho lah hian an dawr ve sek a, tu nge maw Khawtea berkher lo kawhhmuh ţhin ni?" a tih hlak hlak hnuah, "'Chaw min khawrh lian lutuk chhuak rawh' min ti leh tawh a nih hi" tih leh pahin an in lamah a hawi tau leh hmak a, ka nu'n, "Khawtea hi chu a mak ve bawk alawm, a chang leh woofer aiin a zai ring a, ka sawi thiam dan ber chuan a hlimin ţhenawmte tan a hnawksak a, a thin a rimin a nupui fanaute tan a hnawksak" a lo ti ve chiah phei chu, "Ni tehreng e...a hlim zai phei chu a ring lutuk, film ah chuan chang se khawpui riah an hmang ang. Rawng a bawl ţhin laia a santen pawhin a chawhmeh siam a puh lo, ka chaw chhum a puh" nu Zonunin a lo ti tan tan a, pa Khawtea chu aw...kan facial ve dek dek a a sual phah daih emaw tih turin alawm a awm le. 

Ka chauh ve em avangin ka mut san a, muthmunah phone ka khawih peih tawh lo. Zingah pawh ka nu'n min kaitho hma duh lo aniang ka harh meuh chuan dar7 a ri tawh a, kan khua angah hian nula ve si zing dar7 a tho chauh chu an vang ţhin angreng. Sangbollywoodi leh ţhenawm Tuaisiali te hi an duh hun hunah an tho a, thlasik lai a nih loh chuan midang chu an tho har ngai lem lo thung. Inchhung a che tu ber kan ni a, nu leh pate school a kal ngai te, office kal ngai te leh ram kal ngaite vek an ni a, nula te ber kan thawh tlai chuan kan nu leh pate an tlai a ni mai. Kan nu ten kan tih ai an tihin ţhenawmten an hre hma thei si, mi bulah an sawi leh ţhin bawk si, kan mualpho hluai a ni mai. 

Tho chhuak lawk lo a phone en hmasa ka ni bawk a, Zochhura message pawh a lo lang kalh a, 'I mutui em? School kal hma a ngai a, a nih aw' tih zawng a ni a, chhan let vak ngaihna awm lo deuh chi hian min rawn be ziah. Thikthu chhe chi chu ni ila 'a nih aw' a rawn tih nghal vang hian, 'Min kawp' ka ti ngei ngei ang. 

Pindan aţanga ka chhuak chu ka nu'n, "Tukin chu i pu a tho chhuak peih lo a, i pa pawh a phei daih, a lo la haw lo. Kalvari chu i hrilh tawh em?" a lo ti leh tawh a, vur bawm kengin Sangbollywoodi a lo lut ve chiah bawk. "'U Kalvari pu a thi dawn' an ti a nia aw...'a thaw tawh lo a amah chiah an en tawh' an ti" a rawn ti nghal a, "Thil ni lo lo sawi ziah suh, a thawk tawh loh chuan a thi tihna a nia, a la thi hleinem. I hre ţhelh thei si" ka nu'n a lo ti zek a, "Damdawiinah te kalpui mai awm" Sangbollywoodin a tih chuan, "Duh miau hek lo, 'ka thi a nih pawhin kan inchhung ngeia thih ka duh' a tia lawm, damdawiin a thih a duh lo. Damdawiin a a awm ţuma hrehawm a tih zia te kha hre ta che u" ka nu'n lo ti leh hlak hlakin meia a bai chhuan lai chu a chawk zui nawk nawk a, a sawm ţha duh viau ang. 

Kurtai ka zai laiin Sangkhuma leh Fawnvela te pawr deuhin an lo lut ve bawk a, "Ka pu damlo a zual deuh em ni? Kurtai i zai mai mai sia phei i tum nange?" Sangkhuman a rawn ti a, "Ka pa a phei a ka nu nen an inbe reng, chutianga ngaihtuahawm em em a ni hleinem, nizana kan kal pawhin a la ti ti char char peih alawm" ka tih chuan, "Thih dawna ngawih kher tur tihna a ni hleinem, film velah pawh an ţawng hlum ţhak zel hi, ngaihţha deuha i awm lai khan a lo ti ti hlum ve ţhak maithei a sin" Fawnvelan a ti a, thingpui lum sa kan dah ţhinna ketli chu va sawi nawk nawkin thingpui a la awm tih a hriat veleh no a ban nghal a, "Ka pu chu thi turin in va duh awm ve, a tho chhuak peih lo tih a ni mai a, tlai lamah a zia leh mai ang" ka tih chuan, "Kalvari hrilh a ngai tawh a ni" an ti a, ka ngawi hmak tawh, keichuan ka hrilh duh lo reng reng. 

"Fawnvel, nangmah chiah in thlit mah ta che, khawi, chhangte kha ka duh ve" Sangkhuman a tih chuan, "Kha, hrawk hrawl lianpa" tih kher pahin Fawnvelan a pe ve a, "I pite inah chuan ka va phei ve lawk ange khi a tlai tawh chaw ei a hun dawn" sana en zawk paha ka nu'n a tih hnuah, "I pu chu ka va ngaihven ve ange" a ti a, a chhuak zui nghal a, ţhenawmte pawh an inhau zui bik lo aniang thawm an nei lo emai. 

"U Remkalam, vur hi engtin nge kan tih dawn?" Sangbollywoodin a lo ti leh tawh a, "Zanah ka tih mawlh mawlh kha, vur pack na tur bik sarang sei zet chi kha kan lei ang a, sei deuh cheng10 kan ti dawn nia" ka tih chuan, "Fridge ah a leng nang, kan tung ţhap thei awm si lo a, a khal hmaa kan hnawh luihin a kawi vek awm sia" a kut elh neuh neuh pah hian a ti a, ka ngaihtuah chiang a, a ni ve tho mai. "Tawi te tein pathum cheng5 in kan zuar mai dawn nia, vur lian pui pui chu ka siam peih tawh lo" ka ti a, Fawnvelan, "Kalvari" a ti chiah chu ka ngaihven rang nasa. A bengah a phone chuktuahin a ngaithla hmasa leh te te a, chumi hnuah, "I pu a damlo nasa a lo haw rawh" a ti bawl mai. 

"Mawi hnai deuh hlekin sawi ve ta che mawle" a tukhuma ben paha ka tih chuan rawn hawi letin, "Damlo chau tawh sawi mawi hnai vak dan i hria mi?" a ti vin hlur a, chutah Kalvari zawk hnenah, "Kan awm a ngaihtuah lutuk chuang lo la, mahse u Rinchuta nen lo sawi dun ula lo haw vat tum rawh ka pi Binladari pawh a thlaphang lo deuh ang" nem deuh zawkin a ti leh a, a phone chu Sangkhuman chhuhsakin, "Kalvari, a thi ngei ngei dawn tihna a ni lo a, damlo chau deuh hi an fei duh zek a, kan rawn biak chhan che chu maw, a kum upat leh a damloh a inrual a, a ngai ve ang che u" a ti a, "Hei, mawi hnai deuha a sawi theih reng hi, Sangkhuman chanchin a hrilh dan chu i ngaithla em?" Fawnvela hnena ka tih chuan, "Ka ngaihtuah chhuak ve thei hleinem" a ti a, Sangkhuma phone bia kan nghah vang vang hnua, "Kalvari in 'lo haw vat dan ka ngaihtuah ang' a ti" a ti chu kan thaw huai hlawm ang ka ring. 

Ka ţhiante haw hnuah ka nu leh pate rawn hawin, "Ngaihtuahawm em em a ni hleinem, zingkara dawr kal hoin na deuh, thi lek lek angin an sawi na a a fel khawp alawm" ka pa'n a ti charh charh a, ka nu ve thung chuan, "Chaw ei ila Remmawiin dawr va nghah sak rawh se. An eizawnna a ni ve si a, i pu damdawi man Aizawl lam leh Kalvari ten an tum thei nain an mamawh zawng zawng an dil hreh ve bawk si, dawr an khar tawp chuan i pi a thlaphang ang, panhnah leh kuhva chhe thei a tam bawk si" a ti thung a, "Dawr va nghak la, vawk chaw pek sak bawk la, i pi chuan i pu awmpui chawt tawh rawh se. Dawr leh vawkah insawrbing rih mai rawh" a tih leh chuan, "Buai tawh sa nak laia vawk lehzel a insawrbing ngai chu a peihawm loh e" ka ti niah niah a, ka pi Binladari vawk vulh reng hi chu a ninawm ve ngawt mai. 

Chaw eikhamah u Lalhuma lo kalin, "Chaw nawi chu khawn vat ang, in khatah 50 zel ka tih kha aw. Ka pi Binladari te vawk chaw thlenga khawn sak ka ngai a nia" a rawn ti lut a, ka nu hnenah, "Nu Nemte, ka pi saw a khawngaihthlak ngawt mai tiraw? Ka pu a damloh zual deuh chang phei chuan peih lo viau mah ila ka pui leh nge nge ţhin" a tih zawm zat a, ka nu'n, "Chaw nawi chu khawn tak teh u, bathlarah an dah chhuak fur tho ang. Remmawii pawh chaw nawi in khawn zawh veleh a pi te in lamah phei nghal rawh se" a lo ti zung zung lehnghal a, ka pa te rual daih u Lalhuma ka zui reng mai, a puihna ka mamawh miau bawk si. 

"Kal vat ang...tunlai chu vitamin ka tlachham a ka chak lo tehmai a nia, a zang zawk ka khai ang" u Lalhuman a ti nghal ringawt a, ka khai peih loh vangin emah bucket ka dah a, u Lalhuman a khai ve thung a, kan in aţanga kan han inzui chhuak chu ni a sa si, zu vanga u Lalhuma hmai sen hlar te chu ni aiin a eng zawkin ka hria a, thui deuh zui pawh a peihawm loh. 

Ka zin tih hre vek hlawm si, "Chaw nawi kan khawl sak hram hram cheu a rawn la vat zel ta che u, a rimchhe hman vek zel" an lo ti zel a, ngawih tawp aiah, "Rawn la ţhin lo phei ila chu in in hi bawlhhlawh paihna emaw an ti tawh ang" ka ti hram zel a, miin min ţawngkhum hrep laia ngawih bik daih chu zahthlak ka ti ţhin, mi ţawng thlawn bat hi ka hreh ve hrim hrim bawk. 

Chaw nawi kan khawn zo kan let leh chiah chu u Lalhuma a thaw hluam hluam a, pen thum vel lek kan pen dek dek a a chawl nghal zel bawk a, a va han nep tak. "U Lalhuma chu chawl nghal zel lo la, vitamin pawh nghei la hetiang em em tur a ni lo, vitamin ei ngai lo pawhin a rit zawk ka phurh hi" ka tih chuan, "Ka hah a nih hi, tharum hmanga mi puih chu chak a ngai emai puih fo chi pawh a ni lo, pawisa hmangin pui dawn ila ka nei bawk si lo, mi ţanpui ka phu ve lo a nih hi" a ti duah a, bucket khaina a vuan leh tur te chu a kut a khur dar dar mai. "Thil hlimawm deuh ngaihtuah chungin khai la a rit lo ber ang" ka tih chuan, "Ngaihtuahna leh tha a inzawm lo

 Taipuia nupui pawh ngaihtuah ila a rit tho ang" a ti tlat bawk si, ka kalsan chuan chaw nawi min khawnpui duh tawh dawn bawk si lo, "Aaa...u Lalhum, chhipchhuan mai rawh" ka ti ta ringawt a, thinrim hmel tak a ni. 

"Chaw nawi khawn pawh tih tawh nak laia chhipchhuan mai rawh intih te chu a" a tih laiin Kikia a lo kal hlauh a, u Lalhuma vekin, "Kiki, min lo khaipui teh, thlahrang a rawn inpuang dawn tih te ka lo hria a" a ti a, Kiki-an min rawn hnaih rang dun nasa. "Ka peih lo, ka thlahrang hmuh apiang nangmah i ni ziah" uar zeta tiin min kalsan leh nal nal a, "Thlahrang hling nei pawh kha nangmah i ni chiang mai" ka tih chuan a lo nui huk huk a, "A sual lutuk a tih ţhaih loh chuan pawi a khawih zel, thlamuanga awm tir chi a ni lo" tih pahin a khai leh ţuih ţuih a, a kal ve chhunah rang deuhin a pen dat dat a a chawl leh ţhin a, kan in kan va han thleng har tak. Ka pi Binladari te vawk chaw tur pawh kan vawk chaw tur kan dah hnuah keimah zawkin ka phur leh ta ringawt a, "I thil ei zawng zawng kha chaknaah a kal ve nange?" ka tih chuan, "Acid bak ka liak ngai hleinem, acid in chakna a pai ring suh" a ti daih a, "Awiii...what a very phakarity, u Lalhuma han ţawngtheih zia em em hi chu aw...ka thi ţhaks" ka ti a, ka pi Binladari te in lam pana ka kal pawh min zui ve zel a, vur siamna hmanrua engmah ka keng lo, Sangbollywoodin min rawn zawng ngei dawn a, ka tir kual char char mai ang. 

"Remmawi, chaw nawi kha vawkinah zuk dah thla la Lalhuma khan lo chhum rawh se, nangchu kuhva siam pahin dawr kha nghak rawh, i pu buaipui a ngai vawiin chu dawr ka nghak hman lo" ka pi Binladarin a lo ti zung zung a, hnial buai lo vin ka dah thla ve mai, an kawmthlang kalkawng te hi tunhma aţang tawhin fimkhur a ngai thei si, nghet deuha invawn kher a ngai zel. Ka phone lah chu a ri ve sek a, invawn beh tlat a ngai bawk, lak pawh ka la thei rih lo. 

"Khati'n thil ti zai ruai ruai reng suh Lalremmawi, i pu'n bengchheng a ngaithei lo" tukverh a rawn dak chung meuh a ka pi Binladarin a tih chuan, "Ka phone ri a nih chu, em ka phur bawk si ka la thei rih hleinem, ka tluk vaih chuan chaw nawi loss a ni mai aw, kan pui ve hram hram che a min hau vak vak tho zel. I tih ai ka tih chang hi chuan lawmthu i sawi kher loh pawhin min hau dim ve deuh ţhin la, ka hriat theih chinah lawmthu i la sawi lo reng reng" ka lo let erh a, hah leh tluk hlauh lai taka min hau hi chu ninawm ve tak a ni. An loh pawh tum ila a an loh theih loh. 

"Hmm...i ţawngthei, phone zaitir pawhin kha aia zawi khan a zaitir theih. Tuna i phone zai kha yma information tlangau mic ai pawn a ring zawk" a ti kher a, a rawn dahna lamah ka hawi chho vah a, tum hmak chung hian min lo en a, tukverh a thing pakhat inkham phei laiah a vuan a, a bawh pah deuh bawk a, a sam kir pawh a ngil ţep tawh. "Ka phone a nia duh leh bomb pawh ka puah tir ţhuai ţhuai ang, puih chakawm lo rawih khawp hian min hau ziah suh. Lawmna i nei lo emai nakinah lawmna ka la zawnpui ang che, kan hmuh hma chu kan zawng ang, a ţul chuan lei pawh kan lai mai ang" ka tih chuan, "I va han chhe zet zawt tak" a lo ti hlak a, "Hah...what a very zet zawt, mi puih a hahthlak tehreng nen lawm a hnekin min la hau zui, where is the lawmna? Awii...ka thi nawn ţhaks ţhaks" ti mawlh mawlh chungin ka chhuk thla a, ka pi Binladari ka en tawh lo mai pawh a min melh rum zui viau ang.

U Lalhuma lah khawnvartui leh lighter kengin ka thlen thlak hnu feah a rawn chhuk ve chauh a, gallon lianpui a khai a khawnvartui tlem te chauh a awm thung a, "Khawnvartui an sem veleh lak ngei ngei a ngai dawn..aaa...ka pi Binladari te tih tur ngah zia hi, patling a pumpa a kawhna lamah ka kal dawr dawr zel bawk si, puih lohin an khawngaihthlak bawk si huiham heiham huihei hamham" a ti deuh duah a, a va han ţul lo tak. "Lalrinhlua pawh hi a hlawh a tam a ni lo'm ni? Awmpui te laksak mai tur alawm...Kalvari pasal nei hma lutuk kan tuar a nih hi" a tih loh leh, "A pasal nen oh my darling yes pa pa an tih laiin keini'n vawk chaw kan chhum ţuih ţuih a" a ti a, "Khu si, chaw nawi lah hi hing si" a tih laiin ka chhoh san daih a, amaha a awm hunah a ngawi chauh ang. U Lalhuma leh pu Taipuia hi chu midang awm laiin an phun kher zel a, anmahni chiaha an awm chuan an ngawi mai mai zel. 

Dawr ka hawn hnu lawkah kuhva an rawn lam nghal a, u Buanga a la ni zui. Lukhum parh lian tawk khumin ipte pui a ak a, a feh dawn aniang. "I lukhum chu mut nan i hmang nghal dawn a ni maw?" ka lo ti fiamthu a, ka thusawi hre lo der hmakin, "Meizial kha min pe teh rawh, Tuaia ten an duh ţhin" a ti daih a, ka pek hnuah pawisa min pek pahin, "Mipa ho hi i tana siam bik an ang ka ti ţhin" a ti leh hram bawk. "I ti awm ang lo e a, mipa ho hi ka tana siam bik chu nise pasal mai bakah bialpa ka nei ruih ang chu, pakhat aiin an tam dawn sia pasals leh bialpas a ni zawk ang" ka ti lui ve kher a, u Buanga nen hi chuan kan inchhang tawk ve ţhin hrim hrim. 

"Buh seng hun chu Zorama nen min pui ngei ngei ang che u, a la hla deuh naa ka phut tlat dawn che u a nia" a la ti zui a, "Ka pa te pawh puih an ngai ve tho alawm" ka tih chuan, "Inpuih tawn dan kan ngaihtuah dawn nia" a ti a, min nuih ve mial a, a kal ta daih pawh chu ka en zui ve vang vang mai, Zochhura hian a kawm piangthar chiang lutuk. 

"Hello to you my sis u Remkalam" Sangbollywoodin a rawn ti duai a, Zochhuran message min lo thawn chiah bawk a, ka awmna vel leh kan buaina neuh neuh ka hrilh thlap hnuah Sangbollywoodi hnenah, "Kan inah phei la vur siamna hmanrua va la rawh. Pi Hmangaihi dawrah sarang rawn lei nghal la" ti lehin pawisa ka pe a, ka pi Binladari dawra kan siam mai loh chuan tihngaihna a awm lo, kan hralh chhuak thei har lutuk dawn. 

Msa lah a rawn lang ve hlawl a, hmuh ka inbeisei loh tehreng nen, "U Remkalam, good morning near afternoon" a rawn ti fiamthu a, a awmzia ka hrethiam der lo. "Eng nge awmzia?" ka lo ti he haw a, "Aw..zing lam a nia, chawhnu a ni ţep tawh a, chuvang chuan good morning near afternoon aw" a ti ţha leh a, a va han ho mai mai tak. 

"Eng ngati nge duh hun hunah i lo lan tawp zel a?" ka ti leh tawh a, a lungawi vak lo aniang a nur nang mai. "Ka pi Binladari chiah ka dawr zel tawh a, nangmah zawk i lo awm a nih kha, Zochhura bialnu" min ti deuh kher a, "Ka ngaihzawn ve chein bialpa i nei duh lo a, midangin an ngaihzawn chein i nei duh tho si, hmelţha ka tih ve na che kha eng ngahmah i ngai lo, dawt a ni lo ka tih pawn dawt i ti tlat zel" a ti leh nuah nuah a, a va han chhangchhiat theih ţhin ve le. 

"Awii...khawlum nak laiin khaw ti lum zual thei hlirin min rawn pan a, Sangbollywoodi nen hian vur siamna tur hmanrua va lam khawm rawh u, theihnghilh in neih chuan in tel ve lo ang, keimah chiahin vur ka siam ang" ka tih takah chuan an kal nghal dawr dawr a, Nutei hian engtin nge a atchilh bur theih zawk le ka ti ţhin, a la â si, â ve tho ţhin mah ila amah ai naupang a nih bakah Msa hian a la duh em em lo zui, lo nei lui ta bawk ni se an inlerh san zak zak reng ang ka ring. 

Vur siamna hmanrua an rawn lak khawm takah ka pi Binlari rasna zawrh lai te, bawnghnute leh tengtere te, vur sen siamna tur bik te kan la khawm leh a, Sangbollywoodi nen chiaha pawisa inthawh ţawm kan tum laiin Msa tel ve loh hlauin a rawn thawh ve ţalh a, lehkhapuanah kan ziak thlap bawk. Siam awlsam ber tur rasna leh chini kan chawk hmasa a, kan in lam khawm chhung nen, kan zawh meuh chuan Zochhura pawhin ka pi Binladari dawr a rawn thleng ve der tawh a, midang an hnawk leh tlat tawh. 

"Inthlak loin ka lo tlang" tih pahin ka hmaah vur tui chi, a kuang nei chi, pi Hmangaihi chiahin a zawrh ţhin a rawn dah a, ka lo en hau laiin min ngaihsak zui ve lem lo a a kawrban thleh pahin, "Ka pu chu eng nge a an?" a ti a, leiah min phun te te a, tui min pe zui leh si lo va, chutiang vel chu a ni. 

"A mu reng a, thil chu tlem te te a ei peih. A upat tawh bakah a hrisel loh sa vangin thosi seh pawh a la na bik a, miin an sawi ang em em a ni lo, ţullo ah an buai vek a nih kha, ka pu sawn an sawi dan hi a hre reu reu ange" ka lo ti hlak hlak a, pawna stool inhung ran chu va la in ka bulah a rawn hung a, a ţhu nghal chat bawk a, Msa lahin min rawn melh leh ralh ţhin, Zochhura aiin a thikthu a chhiat hmel zawk. 

"Keichu rilru na tur venna vaccine te, thikthu chhe venna vaccine te hi lak theih se ka ti" Msan a tih chuan, "Ui â inseh tir la chutiang vaccine chu lak i ngai miah lo ang" Sangbollywoodin a lo ti zeuh a, Zochhura pawh a nui ve ruh ruh mai. "Hei raw...bialpa dang nei ho tan pawh hian a lo rinawm theih khawp mai" Msa zawk chuan a ti leh ţhin a, "Dawr chhung uap zia hi, Ms, lo kal rawh u Remkalami te inah vur sen tur leh bawnghnute vur tur bik hi va chhuang lawk ang, ka pi Binladari chuan an gas leh an thing hman a phal dawn lo chiang sa. My sis, u Zochhura nen hian rasna vur tur hi lo pack ru aw" Sangbollywoodin a ti zung zung a, Msa chu ţang nasa teh mah se pawt tho luiin a chhuahpui zui nghal a, ka my sis-i hi a inla zei ve tlat. 

An chhuah rual rualin ka hmazawnah Zochhura insawnin, "Tih dan tur min hrilh la ka lo pui ang che" a tih a, chumi hnuah zawitein, "Nu-i" a ti leh sup a, min ko fuh intih hmel zeta a nuih vur vur laiin, "Awii...what a very inla zei, Nui i tih chiah khan ka ha a ţim vek, a hrehawm zia hi ka thi ţhaks, ţim ngar ngar tak a ni" ka ti hluai a, a zah ve hmel viau tawh. "Ka bialpa lo neih tawh te hian nupui cheiin min la chei ngai lo, ka tleirawl lai kha chu nise ka zak viau ang, tunah chuan 'ka bawihnoduat' pawh min ti la ka palzam vek thei tawh, ka senior tawh lutuk a ţawngkam thlumin min ti thlum zo ve tawh lo" ka ti leh bawng bawng a, a hrilh a hai hmel leh viau tawh a, "Ka hminga min koh leh min koh duat vel kha ka tan chuan a inang vek ka tihna a nih chu. In koh duatna hian min dek za pha tawh lo" ka tih takah chuan lo bu nghatin, "Nih leh Remkalam, tih tur min hrilh la" a ti a, Nui tih ai chuan ka duh fe zawk. "A ţha, khatiang ţhak ţhak khan min ko rawh, a nih loh chuan i tawnah ka ha a ţim mai dawn a sin" ka ti a, ka nui zui hak hak a, "Nutei a rawn kal leh dawn em?" a ti daih a, "Kal leh ang, ngati nge?" ka tih chuan thui deuh a sawi dawn emaw ka tih nen, "Eng nge a an?" a ti ringawt a, a ţhat thu ka sawi hnuah, "A ţhat chu, a lawmawm e" a ti leh leh ringawt a, vur pack dan te ka hrilh hnuah ani'n a lo thun a, keiin ka char zel a, kan kut a inkhak leh zeuh ţhin tih lohah chuan kan inbe tam lo. 

"Ka patea a rawn zin dawn a" a tih takah chuan amah ka en veleh chauh a, "Eng nge a lo tih dawn?" ka ti a, tlangval a ni a, chhungte tello pawha awm thei ni a ka hriat vang a ni. "Ka pate unau zinga naupang ber, a nupui ţhen lungleng vel a ni maithei" tiin a nui a, "A fel em?" ka tih chuan, "Aw...fel e, i kawmngeih ang" a ti a, ka ngaih a ţha ve nghal tawp a, a nu, nu Partei pawh a fel emai a patea pawh kawm a nuam leh khawp ang. "Fa a nei tawh em?" ka tih leh chuan, "Pathum an nei, nikum hmasa khan an inţhen a, tun thlengin a khawhar a la tei kual ruk ruk reng mai, u Lalhuma te rual a nih loh pawhin anni aia a naupanna a tam lo ang" a ti ve duah a, nupa inţhen hi chu faten an tuar ber zel, an fate ka lo ngaihtuah tel daih. "Engtikah nge a lo kal dawn?" ka ti leh a, "Karleh lamah aniang, an la sawi chiang lo, i duh hun hunah thingpui i lo in thei tho a nia" a ti a, ka ngaih a ţha em em tho, thingpui in ngam lohna khawp a sual a mikhual lo tawp ang. "Zu a in em?" ka tih chuan, "In zeuh zeuh...tunlai tak chu a nghei an ti. A in pawhin a in tam ngai lo, a zakzum ve tho a, a mikhualnaah a rui lo tawp ang" a ti a, ka bu nghat nghat a, nu Partei a lo thleng der tawh ang chu tih nak laiin midang daih an lo kal dawn a, ka phur tehchiam lo. 

"Ka dawr saw ka ti tawp leh si mai dawn em mawni? Vur hi ka zuar rih ang a ka hlawk zawk ang. Kan khuaa lerh ve deuh leh nalh duh ho lah hi fuihpawrh an nuam si, u Valdiki leh Sangbollywoodi nu te lah hian mi fuihpawrh an hrat ropui si, ka dawra lo kal an tum pawn Tlangmawii bula kal zawk turin an ti zel" ka ti hlak hlak a, dawr ka hawn hmasak ţum a min pan ve reng ţhin si tun ţuma an reh em em chhan ka hre tawh, Sangbollywoodin a sawi vek. U Valdiki hi chuan dr. Balunga hunlai aţang khan min ngei tawh, mi a ngei nghet cher cher khawp mai. 

"Tu nge Tlangmawii?" a lo tih chuan, "Hetiang lam thiam ve tho hi a nia, dawr a hawng ve lo nain a duh apiang a pan thei a, kan zirna hmun pawh a inang chiah, Afaki beauty studio ah tho a zir ve, kei aiin a thiam zawk maithei a ni" ka ti leh mawlh mawlh a, u Valdiki lawmah a tla a, a mithmul thar pawh a status leh tawh kha. Kawmngeih tum pawn kumtin min ngei theihna tur thil thar a hre zel a, "U Valdiki hi chu a, ka awm mai mai pawh mi a ngei em em reng a, hremhmunah kan tla dun palh ang tih te a nia ka hlauh, mei hlawm min barh tun tun reng ang a, ka ngaihtuah ringawt pawn ka peih lo" ka tih chuan, "Fuihpawrh let ve mai rawh" a lo ti a, a thil tih lai a tih zawm mawlh mawlh reng tho a, "Tu te maw?" ti a ka zawh chuan, "An fuihpawrh ho chu fuihpawrh let ve mai rawh. Dawr khar tawp aiah fuihpawrh let rawh ka ti" a ti ve ngei a, a thusawi dan hi a inhmeh hlawl lo. 

"Thla hnih thum leka i beidawn nghal zelin i dingchhuak thei nang, keipawh pawl10 ka fail a ka beinawn" a tih chuan, "Tak tak maw?" ka lo ti vat a, "Ni e" tih pahin nui chung hian a bu nghat a, "Ngati nge i fail?" ka ti leh a, "Tumah ţha famkim an awm lo" a ti daih a, ka en vang vang hnua, "I sual ve tihna maw?" ka tih chuan, "Ruihhlo lamah ni lo, intih pa hunlai a nia, ka inti pa a, lehkhazir kha ka ten ţhin" ti fiamthuin a nui zui hawk hawk a, "Hostel ah kan awm a, thuawih loh kha a pa emaw kan ti tlat a, ka fail daih mai a sin" a ti leh a, sarang a rasna a thun sa chu min pek pahin min rawn en a, "Ka fail khan beidawng daih ila tunah hian ka thawh awm chi zawngin ka buai viau ang, ka mizia en hian ka thawh theih a vang dawn si, dawr hi ti tawp ta la hlawkna i nei dawn chuang miah lo a" a ti leh charh charh a, keipawh hi ka tum a ruh ţhin nen a chang hian ka tum a nem leh tlat zel. "Dawr luahman tur ngawr ngawr tuak ringawt pawha theihtawp i chhuahna kha a hlu, hmasawnna zel, i thawhrim ţhan chuan i inthlahdah mai mai tawh lo ang" a tih leh chuan, "Nih leh nang, pro pastor nih i la tum em?" ka lo ti khauh a, min chhang ţha duh ngai lo kha a ni a, tun ţum chu kan rilru inpawh lai aniang, "Tum e...pastor nih tuma BD zir ka nia, ka tling mai lo a nih pawhin tlin hun a la awm ang" a tih hnuah, "Nupui nei chung pawhin a dil zel theih tho a, khalamah kha chuan buai lo la" a ti tel zeuh a, zanin tlai zet chu chhunah school ah an lo hrai rui emaw tih mai tur a ni. 

"Lady Dianas Inn ang khan ti ve la, tunlaiah miin social media an hman nasat tawh hi, Lady Dianas Inn ang chiah hian instagram ah page siam ve la, anni angin thawmhnaw thawn chhuak ve chur chur lo mahla i mithmul lem vuah sak te kha mi en theihin i dah ang a" a ti a, a nachang ka hre miah lo a, a sawi dik ve fu mai. "Tetei jovasha makeover tih te kha i hria em? An hnathawh ang ang instagram ah an dah kha, khang te kha ka hmelhriatte an nih kha. I thiam loh chuan ka tihpui ang che" a ti a, a phur khawp mai. "Mi dawr hming i sawi zuah zuah a ka dawr hming tur ngaihtuah a ngai, Lady Dianas inn hming chawia tih ka tum leh Sangkhuma ten an phal lo a, zan khuain ka dawr hming tur lo ngaihtuah ve ang che" ka tih kha kha lai chuan a lo bu nghat nghat a, "Remkalami beauty hospital care ti la" tiin a la nui hawk hawk zui, mi hi a fiam ve ngei zel a, a fiamthu a ho thei si. 

"Mahse, thawn chhuah chi engmah ka nei si lo a, aaa...thawn chhuah chi ka la ve ang a ka zuar tel mai ang, bakah friendship derdêp group ka siam ang a, ka ţhian tak tak ni lo, fuihpawrh tur ho ka add khawm dawn" ka ti chu a nuih a za viau mai. "Ruihhlo i zawrh dawn loh phawt chuan ka thlawp vek che" a tih laiin ka pi Binladari a lo lut a, hei lah hi mi boruak ţha lai tihbuai a hrat, a meng ling leh hlar tawh. 

"Chhuatah khan in ti far ange fanghmir a awm duh si, in tih far pawhin nawt fai leh vek rawh Remmawi, khawmaw thingpuife inkhai kha han pawtthla teh, Zoram, thingpui in rawh aw" a ti zung zung a, thingpuife pawh thlak paha ka pu chanchin ka zawh chuan, "A hnung lamah rizaiin ka kam a, a ţhu peih, a fel khawp mai. A harh lai takin thingpui ka'n siam sak ang e, chhang hi ei nuam deuh tur ka zawn sak ang a" tih pahin chhang a en kual a, "Duh bik a nei em? Hoslicks te an in ţhin kha" Zochhura pawhin a ti ve tak na a ka piin, "Ka zawt vek, thingpui leh chhang bak a duh lo" a ti miau si a, tih vak ngaihna a awm lo. 

Vur kan pack zawh vek hnu, thingpui no hnih lai kan in hnuah Zochhuran min hawsanin keipawhin ka pi Binladari vawk chaw ka pek sak leh a, u Lalhuma chu a pil bo lai pawh ka hre lo. A ţawng duh viau nain thil tih peih loh deuh a neih a, kan hmuh a hlauh chuan min be lo thei lutuk. Veng mawng u Nobawihi in a thleng thla leh daih tawh maithei a ni. 

Vawk chaw ka pek fel hnuah dawr kharin, "Zanah ka rawn hawng leh ang" ka ti a, kawngka bula chahbi ka khai thlap hnuah reilote ka pu ke ka hmet a, chaw ei turin ka haw zui nghal a, Kalvari lahin min rawn phone tlut tlutin sawi tur vak a awm si lo, ka hne hlur tawh. Kan inah lah ka nu leh pate bak an lo awm tawh lo a, "Sangbollywoodin zanah ka lo kal ang a ti" an ti thung a, fridge ka hawng chu freezer ah vur an lo dah khat ţan a, chawhtawlhah an dah ban tlem a awm bawk. "Siam vak a ngaih tawh rih dawn loh hi a" ka tih chuan, "Ngai e...school naupang an sport dawn, i hralh theih hunlai tak tur a nih hi. An sport naah zuar ngei ngei rawh, kan fridge a leng lo chu i pi Binladarite fridge ah i dah mai dawn alawm" ka nu'n a lo ti a, school naupang sport a vur zawrh hi ka chak tawh lo, naupang te te chhe lo deuh deuh an tam thei si, bialpa te kan hmu phur lo vek zel. 

"Zana i pi Binladari dawr i nghahsak leh dawn chuan chaw ei ang u, keipawh ka lo phei leh zuai ang, khuaah thisen zawmpui chhungte an nei ve si lo, keini talin kan buaipui loh chuan an baihvai emai an khawngaihthlak" ka pa'n a tih chuan, "Kalvari pu hi a luhlul lutuk , damdawiinah te awm duh se chu a tan pawh a nuam zawk ang a, nikhaw hre lo a a awm te a nih loh chuan kan hruai lui thei dawn der lo a" ka nu'n a lo ti hlak hlak a, "Mizo pa diktak a ni a, hetiang chu buaipui an har ţhin, a duhdan a kan awm rih a ngai a nih hi" ka pa'n a ti dam leh thluam bawk a, chaw eikham hnuah chauh ka inbual a, ka inbual zo a lum ka ti leh nghal. 

"Sangbollywoodi a rawn kal hunah ka ken loh ho zawng hi in rawn thawn phei dawn nia, dawr ka hawn leh vat loh chuan kuhva ka hralh zo hman lo palh ang" tih leh chhuah ka rual a, hmanhmawh deuhin ka pi Binladari te in lamah ka phei ve tak nain inchhungah Sangkhuma leh fawnvela te an lo awm der tawh. "Chaw in ei nange?" ka ti nghal a, dawr chahbi lah tawh mah ila anni hmuh hi chuan a din loh theih loh. 

"Ka pu kan awmpui ve rih a nih hi, hetah kan ei ang, Kalvari kan bia a, karlehah an nufain an lo haw dawn. U Rinchuta a lo tel ve thei rih dawn lo" Fawnvelan a lo ti zung zung a, "A fate an harh si, 'i pu an rawn ching chau zual mai mai zawk ang' tih mawlh mawlh pawhin an ti lui ţalh a, dam ţha ver vawr lo chuan Dawnfuha mikhual a peihawm loh a sin" ka pi Binladarin a ti hlak hlak nain, "Naa..pi, Kalvari in a ngai ve cheu lawm, zinna hun ţha a neih hi bawh pelh tir reng reng suh, Puipuii pawh rawn tel ve nghe nghe teh se, henu hi a reh lutuk emai, Kalvari nen hian kum zawnin fa an nei kher lehnghal a, kan ngaih zia an hre lo der hmak" Sangkhuman a ti ve bul bul bawk a, "Puipuii a hman lo, an pa chhungte nen an la awm ho vek a, a zin mai mai thei lo. Mo a ni tawh a, a thu thuin a awm thei tawh hleinem" ka pi Binladarin a tih hlak hlak laiin ka chhuak a, dawr ka hawng zui a, kuhva pawh an rawn lam ve nak nak a, Sangbollywoodi nghah paha phone ka en mai mai laiin u Zirbawnga message ka dawng leh hlawl mai. Kan haw hnuah vawi khat min rawn be tawh a, 'in thleng tluang em?' a rawn ti kha kan tluan thuin ka chhang a, tun ţum chu link min lo thawn.

Lalnunsanga hla 'D hlui' tih kha a ni a, nawr liam mai ka tum zet tawh hnuah link min lo thawn chu ka hawng a, kan inngaihzawn lai ngaihtuah tel chunga ngaihthlak chuan lung a leng duh khawp mai. Ngaithla zo loin ka dah leh rih a, mut hmuna ngaihthlakah ka khek a ni. U Zirbawnga laka ka rilru put hmang hi a hma ang kha a ni tawh lo nachungin Zochhura tih loh mipa dang zawng ai chuan a la danglam bik tho a, kan lo duh ţhin deuhte nen hi chuan engtiang pawhin inţhen ila, a chhan chu engpawh nise, kan ngei a, kan haw reng thei lo chu a nih hi. U Zirbawnga pawh hi ngei ţhin viau mah ila a huat tak tak theih loh, ka beisei tawh hauh lo thung, aman min lo beisei pawh nise ka lo chhem bo hmak ang tih vel a ni. 

"Hello to you" rawn tiin Sangbollywoodi a nui har har a, "Enteh, i duh ngawt ang, Ramnghinglova nen kan inhmu a, 'khuaiin kan luah a zuk chuan sam a ţuak duh' an tih kha a lo hre ve aniang, a hmuiah khuaiin a zuk a 'ka hmuihmul a ţuak mai ang a' a ti, a hmui hmul a ţuak phak loh nan a hmui a pawt fan char char, a lu a len nen a â tak tak a ni" a ti a, a nui leh bâwk bâwk a, "Ramnghinglova hi inbum tir reng reng suh, a â a â kan ti na a ngaihzawngte bum kawngah chuan pro player a nih hi. U Nobawihi te ina a kal phei chuan en zui zel rawh, a zei teh mai a nia aw, mipa a bem tawh an tlu lo ngai lo" ka ti a, ka hrilh lawk thlap a, mipa in min han bum hi chu a na ve duh e...a pain dan hi a painted a ni tawp mai. 

"Lungkham nei loin vur siam ila a ni mai" a tih veleh, "Nutei lo kal tawh se aw...school naupang sport naa vur zawrh ka duh a, dawr ngaihven ka duh bawk si, ka indaih lo, kan be nghe nghe teh ang" tih leh phone phawrh ka rual a, Zochhura lo lut pawh ka lo hui zauh ringawt a, "Ka pu ka han kan hmasa ang" a ti a, a chhuak leh nghal a, Nutein phone a la chiah chu, "My friend, what a very ngai tawh che" ka ti nghal chul mai, buai leh indaih loh lai hian min chhawk thei tu hi an ngaihawm zual bik. 

"Min mamawhna i nei chiang" a rawn ti nghal thawr a, "Lo chhuk tawh rawh i va rei em em ve" ka tih chuan, "Ka nute hian an phal uk a, 'a inthlahrunawm' an tia an phal lo leh ţhin a a buaithlak alawm" a ti hlak hlak a, "Lo chhuk rawh a inthlahrunawm loh, school naupang an sport dawn a ka indaih lo dawn teh mai a nia aw. Bakah maw...Kalvari te an lo haw dawn i hmu chak lo mi?" ka ti zung zung a, "Hmu chak e...vawiin pawh 'ka chhuk dawn' ka tia ka nu'n a phal lo lawm. Ka lo dil ţha leh anga naktuka lo chhuk ka tum ang" a tih chuan, "Hlen aw...ka pu a damlo a, hei tunah pawh ka pi Binladari dawr ka nghah sak mek, vur te kan siam pah a" ka ti chu ka pu chanchin min rawn zawt ve chul a, group a kan sawi loh vangin min dem hle bawk. "A serious vak hleinem" ka tih lahin, "Ka pi Binladari meuhin dawr a khar chuan a serious a ni mai" a ti deuh tlat a, kan inbiak zawh hnuah Sangbollywoodin, "Msa phone number ka nei ve chiah a Nutei a lo chhuk nghal dawn a, a hauh bik ropui si, ka be ve hman leh dawn lo a nih hi" a lo ti ve niah niah a, an atchilh pa ve lah hi a taksa a rang ruai mai bawk si a, keichu Zochhura ah hian ka lungawi, a nghet tlet tlet emai, nula dangin rawn nek nawk nawk mah se a nghing dawn lo reng reng. 

"Nutei dawr kan nghah tir anga keini'n vur kan zuar ang a, ka pi Binladari te fridge a leng lo ho hi hawn la in fridge ah dah ve rawh aw, kan zawrh hunah meuh chuan kan siam seng dawn miah lo a nia, a thlawnin tumah ei tir suh" ka ti zung zung a, "Tu ei mah ka phal dawn lo, a siam mah a hautak nak laia keipawn ka ei phal lo ang, mahse hlawh hi engtin nge kan tih ang? Pathumin kan insem a ngai dawn a, tu nge hlawh sem dawn?" a ti nghal ringawt a, chhan pawh ka chhan hmain, "U Zochhura kutah kan dah ang, thlei bik nei loin a sem thiam ber dawn" a ti leh a, ka bialpa hi chu a rinawm em, nghing ve ngai lo Zochhura a ni miau a ni. 

CONT...