KEIMAH, THINGTLANG NULA (FINAL SEASON) 21

KEIMAH, THINGTLANG NULA (FINAL SEASON) 21 

"My sis u Remkalam, Msa ţhat dan hi a famkim e ka ti, ţhatna zawng zawng hi amahah a awm kim vek, a all in one tawp" Sangbollywoodin a ti siam siam a, ka pi Binladari dawra ţhut pahin Kalvari te kan ngaichang ran a, ka pu a ţha lo tial tial tak tak a, Zochhura pawh ka ngaihven em em hman rih lo. Ka pi Binladari te tan kan inpe tawp rih vek mai a ni.

"U Zochhura sikul a kal daih a a reh vek. Kan vur hralhna hi a bulah char char ka chhung dawn tak tak a nia, pawisaah chuan tumah ka ring lo che u, u Zochhuran min sem thlap rawh se" kuhva thel mawlh mawlh chung hian a ti leh a, keichu ka hlauthawng lutuk a, Sangbollywoodi hnenah sawi duh lo mah ila inchhung lam a thawm a awm deuh chuan ka ding leh hluai zel a, Sangkhuman min sawi ţhaih nasa a, ka pu thih thut ka hlau vek tawh. 

"U Lalhuma leh u Kulhi te an inngaizawng a, u Kulhi a insawithei rapthlak a nia aw" tih leh pahin a kiuin min rawn nghawk zeuh a, "Nizanah pawh an inah ka kal a, 'bialpa nei ve lo ho hi ka ngei' a lo ti" tiin a nui awr awr reng a, vei a nei lo bik si, ka pu vangin ţhenawmte pawh an feh loh ţhak phah a nia, engmah a hrethiam lo. 

"Kalvari te hi an lo va thleng har ve" Sangkhuma leh Fawnvela ten an rawn ti lut a, Nutei leh Msa chiah dawrah an awm tihna a ni mai. "Ka phone tlang thei tawh lo, u Rinchuta zawk kha han phone teh u" ka tih rualin Fawnvelan a phone a phawrh a, "Hello" a rawn tih rualin, "Kalvari te hi khawilai nge an lo thlen tawh?" a ti nghal tawl a, u Rinchuta lahin, "Ka hre nang, ka hmu pha tawh bik hleinem" a rawn ti mawl tawp a, a ngaihtuah lo pawh a ni lo ang, a ngaihtuah ang a a sawi thiam lehpek tawh lo zawk aniang. 

"Phone han tum ve teh, kan nghak char char tawh, an lo thleng har emai" Sangkhuman a lo tih ve chuan, "Ka phone thei lo, signal a nei lo aniang" a rawn ti dam thlup a, u Rinchuta ber a mangan loh chuan ngaihtuahawmah ka ngai lo, kan hmuh chak lutuk tawh vang zawk aniang. 

"Awi ha Fawnvel, phone kha dah mai mai teh an lo thleng ve mai ang" ka tih chu u Rinchutan a lo hre pha aniang, "Dawnfuha kha a venin lo veng ang che u, dilah te a lo tla ang e, engpawh a ei thei nain a ngeih vek bik lo a nia, an cham chhung na na na chu Remkalami khan lo awm tawp rawh se" a rawn ti duah a, "In fapa harh lutuk hi ka thiam loh em ni? Ka kutah berkher i la dah zui, harh si, rit si, ngati nge nangmahni ang lo deuh fa in neih kher ni?" ka ti hrep a, ka fiamthu tih a hre bawk a, "A letling zawnga ding thei fa i la nei lo ang tih tu nge sawi thei?" a rawn ti ve ngei a, Sangkhuma leh Fawnvela te an lo nui huk huk mai. 

Kan inbiak zawh hnuah Sangbollywood in, "U Rinchuta hi ka nu'n hmelţha a tia, keichu u Zochhura hmelţha ka ti zawk, u Zirbawnga chu a pâ ka ti, kan bula a din te hian a awm ve tih a hriat theih bik e..amah hi a langsar" a lo ti zung zung a, panhnah chehna bakcheh a kawk chung meuh a Fawnvelan, "U Zirbawnga chiah fak bik suh" a tih chuan, "Ka fak bik loh kha. U Zochhura a hmelţha ka tih mawlh mawlh kha. A fai vung a, a lian ropui sia, a sam dum hlap te hi midang aiin a inhmeh ka ti. A fai thei si, kan khuaa awm ve pawh a ang lo" a lo ti leh zat zat a, "Remkalami a hmelţha em a hmelţha deuh a phu alawm" tih pahin Sangkhuman min kheuh zeuh a, u Zirbawnga an khawngaih leh deuh tawh vangin ka hriatah an sawi chhe bawng bawng tawh ngai lo a, mipa na na na chu ka bula an awm chuan ka thla a muang a, inchhung lam thawm pawn min ti buai nep ta deuh bawk. "Ka nute pawn, 'Remkalami hi a hmelţha mah se a mawl' an ti" Sangbollywoodi bawkin a tih leh chuan, "A mawl tawh bik loh hi" Fawnvelan a lo ti vat a, Zochhura a lo lut ve chiah bawk nen, ka ţhu ţha sawk sawk mai. 

"I lo chau em?" tih paha ka chhip rawn tuai zeuhin stool awl pakhat chu ka ţhutna lamah a pawt hnai zui a, ka ţhiante ţhutthleng hniama ţhu ţhap ho lahin awmze nei deuhin min melh ralh ralh hlawm a, an awm ve hian ka lai zo vek zel. "I chau zawk em?" ka tih ve chuan nui deuh suk chung hian a lu a thing a, chutah ka sam rawn beng phe leh vâwkin, "Siam chawp i ang" min ti a, min en reng bawk si, ka lai lutuk chu ka hahchhiau dawn ten ka hria. 

"U Zochhur, zanah kan vur hralhna ka rawn dah leh dawn a nia aw, dawr lamah Msa leh Nutei ten an zuar bawk a, ka chhiar thlap a nia" Sangbollywoodin a lo ti hlauh a, min va han chhanhim chiang tak em. "I bialpa kha a va vung nasa ber bur ve" Zochhuran a tih chuan ka ţhiante an hawi â huih hlawm a, "A zurui a lum anih kha. He pa ve hi chu ka hman chang bakin ka ngaizawng peih lo" Sangbollywoodin a ti then a, engmah min la hrilh lo. "Han sawichiang deuh teh" ka tih chuan, "Zu a rui a step ah a lum alawm. Ka awm ve reng, pa Hruaia te sarep pek ka tum lai takin a nia, step ah a lum thla bawp bawp a, puih tumin ka tlan thla ve em em a bro min lo ti vel. 'Lei tur a awm chhung chu ka in dawn' a tih kha, mahni bialnu te bro ti daih pawh ka hre ngai lo, min ko duat lo emai a" a ti bawrh bawrh a, Zochhura lahin, "A nih chu" a lo ti boh a, Sangbollywoodi a beidawn hmel ngang mai. "U Zochhura te hi chu ngaithla tawp chi in nia, mi in hnem thiam lo reng reng" a tih laiin ka hma chiah sweet bawm bula ka phone chu a nghawr dat dat a, Kalvari aniang ti rilru chungin hmanhmawh deuhin ka en thuai a, u Zirbawnga message zawk a lo ni. 

'Ka pu chu eng nge a an?' tih te, 'Eng nge i tih?' tih te, 'I va pui em?' tih te a ni duah a, vawikhatah min rawn thawn hnem em a, chhan vek sen pawh a ni lo. Zochhura a awm ve vangin ka chhang lo reng bawk a, engmah phei chu a hrethiam chuang lo, ka bula ţhu hle hle chungin Sangbollywoodi kuhva thel lai a en a, Fawnvela leh Sangkhuma ten an hriatthiam hmel hle thung. Zochhura hian min ring viau nge ka hre lo a, phone ka en hian ka hmuh tir a nih loh chuan engmah min en pui ngai lo, a rawn bih zuk zuk ngai lo a, ka bula a awmin a phone a en reng ngai lo bawk. Keini chu kan kut a awl hlekin phone kan phawrh a, thil dang kan khawih tel nasa si, kan phone a paw phuk a, ani phone ve hi chu a thianghlim sar bikin ka hre ţhin. 

Ka pu kan tuma kal te leh haw tur ten dawr an rawn kal pel zut zut reng a, dawr lam rawn thlek ţhenkhatin Zochhura an rawn be zeuh zeuh a, ani'n a rul tawkin a lo chhang zel a, "Remmawi, panhnah kha lo roll rawh aw zanah kan buai ange" ka pi Binladarin a rawn tih chuan, "Ka pu damloh lai laiin" ka lo ti a, min chhang loin a kal daih. Ka pu damlo a ngaihsak loh vang ni lo vin a damlo hi a pawm duh lo zawkin ka hria. A hma ang renga awm a tum a, hrehawm ti reng si a thup tum tlat a ang zawk mah, a khawngaihthlak zawk. 

"Ka lo pui ang che" Zochhuran a tih chuan, "Panhnah i roll thiam em ni?" ka ti a, a thiam lo aniang min en vang vang hnuah, "Ka tih theih chi a awm em?" a ti ban charh a, Sangkhuma leh Fawnvela lahin, "Inchhungah tih tur a tam ang, Sangbollywood, kuhva rah kha dah rih la thingpui va lum rawh, ka pi Binladari a buai ang" tiin Sangbollywoodi an pawt chhuak nawk nawk a, ka pi Binladari khan min tir na a dawr lam a ngaihven tawh miah lo tih an hre ve kar a, in lam an pan pawn ka hre lo, Zochhura nen hun min pe a ni mah zawk. 

Panhnah chehsa awmna chawhtawlh lain roll mai theiha ka siam rem lai vel chuan ka chetna tur dal lo tawk velin a lo insiamrem ve zel a, "Chinai lo tat mai rawh" ka tih veleh chinai a la a, chawhtawlh chu a malchungah a dah zui bawk a, inhmatawnin kan ţhu ran mai. "Kalvari te an lo thleng har si, ka pu lah damlo na deuh buaipui angin an buaipui a" ka tih veleh ka kut rawn vuanin a hmer zeuh a, "Pi Binladari rilru a hah hmel em kha, a hriatah ţawng fimkhur rawh" min ti ve ngei a, "A sawi ang khan ti rawh" a tih leh takah chuan panhnah a a chinai tah sa chu ka lo roll zel a, a ţuan a muang si, kan in vin reng mai. Buai lai laiin, "Hmelţha i inti em?" te min tia, ATC product ho hi an inhmuam up vek bik lo reng reng. Hmeichhia an chhai hmasak phawt loh chuan nupui an nei ngawt thei bik lo, insawirem tawp a ni leh tawp mai. 

"Kalvari te an lo thleng" Fawnvelan a tih lung lung chuan panhnah cheh sa ka roll zo ve chiah a, Zochhura nen dawr aţanga chhuak vein an rawn chhuk thla chu kan lo thlir a, pui tu an tam vangin kan han pui ve lem lo. Sangbollywoodi pawhin ip puar deuh a rawn ak thla ţuih ţuih mai. Dawnfuha nau phir te lah an men pur pur a, anmahni kai tute chu an ngainat lem loh hmel khawp mai. Kalvari pawh ipte ak puar luah chungin phone a hmang a, "Kan thleng chiah a, nakinah chanchin ka rawn hrilh ang che hei kan bawr lutuk kan buai rih" a ti lang lang chu ka hre pha a, u Rinchuta a bia a nih hmel. Phone a ah ţhat leh sawk sawk hnuah a fate a kai leh a, Dawnfuha thung chu Sangkhuman a pawm a, an rawn thleng thla tawh. U Rinchutan ka kutah a dah hmak mai bawk sia, a harh zia ka hre si, lo melh ringawt pawh ka hreh. 

Biak pawh kan biak ve hmain Kalvari chu nutling leh patling ka pu rawn kan tute hoin an lo bia a, ţhenkhatin an chibai bawk a, tunhma nen chuan inthlau tak a ni. Kan khawtlang hruai tu ni ţhin, Nunoin a puh hmingchhiat laia vin hrep hrep tu pu Hruaia pawhin lo chibai lawp lawpin a lo lawm thiam leh bik khawp a, inchhunga lut hmasa loin kan lam a rawn pan a, mi an awm nual vangin dawr kalsan chi ni hek lo, keini chu dawr hnaihah kan ding ran reng a, Dawnfuha thil ngen Sangkhuman a hruai hrang daih bawk. 

"My friend, i chau em?" ka lo ti thuai a, "Chau rapthlak lutuk, naupang pathum nen ka lo kal a nia ngaihtuah ta che, a hla rapthlak bawk si. Aizawlah Puipuiin min lo buaipui hlauh zawk a, ni lo phei se chu ka chau viau ang. Kan khua aţangin zingkar ah kan lo chhuak a, Aizawl a riak loin kan lo tlang lehnghal a nia" a ti hlak hlak a, "Ka mawng kham zia chu a, khawimaw mawng inthleng lawk teh ang" a tih leh chuan kan nui duai duai a, midang awm ve kan ngaihven tawh lo. Khua a thim lek lek tawh a, nilenga motor chuang ang an ni a, a fate ţap pur reng pawh hi a awm lutuk tlat. Ngui bur lo a hlim hmel pu sanga a lo kal thei hi ka lawm ru viau bawk. 

"U Zorama i ni chiang mai, ka hria che a nia aw" awmze nei zeta a tih chuan, "I hah em?" ti a zawh pahin Zochhuran a kut a pe a, an han in chibai ang lawp lawp a, "Nilenga motor chuan chu a hahthlak ve reng. Ka pi pawn i chanchin a sawi ţhin a nia aw, awii...Remkalami vanneih zia hi" a ti a, a zak si lo, kei ka zak si, "Hawr hawr che hian, fa pathum lai i neih tawh kha nui hawr hawr reng suh" ti mah ila, "Phir an nia, pakhat angin a chhiar theih aw" a tih hnuah, "Inchhungah ka lut hreh e" a ti ta chiah reng a, a pi leh pute hi a nu leh pa ang chiah an ni a, a lut hreh khawp ang. 

"A ţhat viau kha, a ngaihtuahawm loh" Zochhuran lo ti thuaiin, "Va lut ila" a tih zawm leh a, "Khawiah nge Sangbollywoodi te kha an awm? Dawrah hian lo awm se la kan lut ho dawn nia" hawi kual ruai chunga ka tih chuan Kalvari in, "Sangthanpui" a ti nghal lauh a, vawihnih thum vel a koh hnuah inchhung aţanga rawn chhuakin, "In bungrua ka dah ţha alawm mawle...a tam rapthlak si" a ti a, dawr chu kan nghah tir thei tho a, Kalvarin a fate pahnih kai chunga in lam a pan chu ka zui a, Zochhuran a ipte a ah sak bawk a, inchhunga kan lut chu ka pu mutna lam pan ding nghalin, "Damdawiinah kal rawh u ka tih ziah kha, i duh lo tlat zel a, Aizawla in kal ţum a damdawiina i awm kan lawm nen i awm rei duh lo a" a ti hlaih hlaih a, a ţawng hi a nem bik lo hrim hrim a, a rilru a hah vang a ni bawk ang. 

"In lo kal duh kher a nih kha mawle, in pa amah chiahin a awm dawn a sin" ka pu'n a la ti hram a, "Mi an fel a, inleng kan nei reng a, thla an ti muang khawp mai" ka pi'n a lo ti mawi ve bawk a, ipte a dah ţhat hnuah ka pu mutna bula ţhutna awlah Zochhura nen kan ţhu dun ve ran a, Dawnfuha nau phirte lahin ţap pur chungin, "Anuuuu" an ti deuh reng tawh. "I fate kha buaipui phawt rawh an chau dawn lutuk an khawngaihthlak, Dawnfuha kha chu a chhah tul a, Sangkhuma leh Fawnvela ten an buaipui kha" ka piin a ti leh sawk sawk a, "Naupang thawm i ngaihtheih loh chuan Remkalami te inah pawh kan riak thei a nia aw. Inbual te ka duh keimah hi ka ngap vekin ka hria, ka sam te hi a khawng vek" tih pahin Kalvari chuan a fate chu a hruai hrang a, tih ve theih a tlem bawk nen, "Pi, dawr ka khar ang a ka haw lawk dawn" ka ti ta ringawt a, zanriah ei a hun tawh vangin inleng pawh an ţin tawh, pahnih thum vel lek bak an awm tawh lo. 

'Zanah dawr rawn nghak leh ang che, i nu ka hrilh tawh kha" ka piin a tih hnuah Zochhura nen bawk inzui chhuakin dawra kan luh veleh Sangbollywoodi rilţam a haw a, dawr kan khar hnuah kan haw ve nghal daih bawk. Kan inah pawh rawn peng kawi loin, "Ka hman leh zanah dawr ka nghahpui ang che" a ti a, in ka thleng chu Dawnfuhan chaw a lo bar puk puk mai. 

"Ehe....Sangkhuman a hruai haw emaw tia" ka tih hluai rualin ka nu'n min rawn enin, "Hetah a rawn dah alawm, a ril a ţam a chaw ka siam sak a nih hi" a ti a, Dawnfuha hnungah a chul leh ţhin a, ka en ringawt pawh hian ka huphurh, a harh turu em a ni. "Motor chuan chauh vanga chaw ei tui lo pawh a nei ve lo, Rinhlua hi a vannei tak tak a ni" ka nu'n a la ti zui a, "Zanin tlaiah tui deuha chaw a ei chuan naktukah phei chuan a eitui khawp ang" ka pa'n a ti a, thlakhlelh hmel deuha Dawnfuha an en laiin hrukpuan leh inthlakna ka la a, ka inbual ta daih a, u Rinchuta a khua a har ruk ruk khawp ang. 

Ka inbual zawhah zanriah kan ei ve a, kan eikhama thleng te ka sil hnuah ka phone enin u Zirbawnga chu, 'Ka pu chu a ţha' tiin ka chhang let a, 'Nangmah i ţha em?' a rawn ti leh thuai a, ka chhang let tawh lo. "I piin i pu hriata pangngai deuha awm a duh a, dawr va nghahsak leh rawh. Dawnfuha chu ka bulah awm rawh se, a chau a a muhil thuai ang, tih tur engmah i nei lo" ka nu'n a tih chuan chhang let lo mah ila ka peih bik vak lo. A la ţawng peih chhung chu tumah hlauthawng lo se ka duh a, ka hlauthawng ru em em thung. 

"Lalremmawi, kun ngul suh" a ti leh kher a, ka hawichhuak rang nasa, "Ka kun mai mai thlengin min hau kher zel suh, phone te ka en ve alawm" ka tih chuan, "Dawr va nghak rawh, Nutei hi a nuin min lo phone leh tawh a nia, a chhungten an phal loh chuan haw mai rawh se, kan tan pawh a nuam lo" a ti leh chu Nutei ka hrechhuak chiah. "Ehe...khawiah nge a awm?" ka ti he haw a, "Dawrah a niang chu, nichinah pawh Rang ruaia nen an inzui kha" a ti a, Msa hian tattoo a ngah ve em a, ka nu'n Rangruaia a ti hi a awm ve tho. 

"'Ka pa'n a phal' a tia nih kha. Kan khuaah star a nei a nuam a ti ve rih a nih hi" ka tih chuan, "A nuin min rawn phone in nangmah hlirin lo chhang tawh ang che" a ti hmak a, Nutei a luhlul si, a haw duh pawh ka ring lo. 

Zochhuran min rawn phone in, "Dawr nghahpui i ngai em?" a rawn ti dut dut a, inkhawm zan a ni lo bawk a a hman ve a nih ka ring. "I peih leh peih loh a ni mai alawm, Nutei ka be lawk dawn" ka tih chuan, "I kal hunah lo sawi rawh" a ti mawl tawp a, a dah zui nghal a, ka nu'n, "Zorama hian a duh che chuan duh ve ang che, Zirthianghlima be tawh reng reng suh, i lo be leh ang e" a ti khar khar mai. "Pasal nei rual i ni tawh, Valdiki takngial pawn fa a nei tawh" a tih laiin Nutei ka phone daih a, "Msa nen kan awm min ngaihtuah suh, dawr kan la hawng" a rawn ti lang lang a, dawr hi nei ve chi ka ni lo aniang ka neih apiangin buaina ka tawk a, ka nghak hman lo ziah. 

"I nu'n ka nu a be leh tawh a nia" ka tih chuan, "A ninawm ve sek, min hrethiam mang si lo, fate chu hriatthiam tum ve tur a nia min hau reng ringawt a" a ti hlaih hlaih a, Msa lahin, "Tunlai chu in boruak a heavy e...ka lo kal peih lo e a, ka kuhva khehna ka kut a durh vek tawh, ka pu a dam har si" a lo ti ve sek a, tawng pawh ka ţawng ve hman lo reng reng. "U Remkalam, i love you chuk" a rawn tih leh rualin ka dah daih a, Nutein a dah ring a ni ngei ngei ang. 

Sangkhuman min rawn sawm vangin dawr nghak turin ka chhuak a, "Vengthlang tlangval zu rui sual hoin min cho ve khanglang a, khawiah nge Msa?" a ti khur khur a, a huai ve viau dawn emaw tih laiin, "Engtinmah ka ti lo chungin min rawn pawt vak a, Msa kha a taksa a rang nasa a ka hmuh tir duh. En ringawt chuan a hlauhawm hmel em kha, han be teh" pawr deuh hian a ti a, ka kawr pawt ţung chungin ka hnungah hlir a la kal zui. "Msa kha kawr phelhin rawn kal rawh se, a rul tur nei tattoo kha hmuh tir ila an rui a reh vek mai ang" a ti a, a chang leh min pawtin a chang leh min nam a, a va han dawih tak. "Awi..ka ning lutuk Sangkhum, awm hle hle la chuan tu zu rui mahin an cho lo ang che, i vak chhuak leh dawk dawk aniang chu" vin zeta ka tih chuan, "Pi Zioni fanu dawr kal ka en mai mai aw" a ti a, ka pi Binladari dawr kan thlen hma chu min thlah lo reng reng. 

Dawr lo inhawng tawhin Kalvari leh Fawnvela te an lo awm a, Sangkhuman chanchin a sawi chuan Fawnvelan, "Zu chhia an in a nih chu" lo tiin a nui huk huk a, "Mi ding mai mai lai min pawt ringawt a, han ti leh teh se, Msa ka thawh tawh ang" Sangkhuman a tih chuan kan lo nuih hak hak hlawm a, "Ţhenawmnuin min lo phone a, 'Rinchuta lungleng a tei ruk ruk reng mai' a rawn ti, 'I khua a har em?' ka han tih lahin, 'Har lo e..i pu kha rilru nuam deuhin awmpui rawh' a rawn ti tho bawk sia" Kalvari in lo ti vein, "Kan inneih hnuah hla deuhah ka la kalsan ngai si lo a, ka khawngaih reuh tak tak a ni" a ti leh a, dawrah kan ţhu ţhap a, naupang motor chuang chau an muhil nghal daih bawk si, tih tur a vang khawp mai. 

"Ka pu hi a thi angem le?" Kalvari in a ti leh thut a, "I mawl...Chut-a nupui Chut-i" amah nghawk sawk chunga Fawnvelan a tih chuan, "Ka ngaihtuahna a kal thui ve alawm mawle...a hrisel lohna a rei tawh a ka khawngaih a nih hi, khatin min vin thut thut suh" a ti hlak hlak a, Fawnvela lahin, "Kei aiin i vin zawk" lo tiin kan han nui leh rih ţhin, "Ka pu dam hun chu pi Zioni fanu ka rim dawn khawp, ka pheikhawk siam thar ka bun ang a, engpawh huamin ka rim ang" Sangkhuman a ti pang pang a, Kalvari in, "Nang hi chu a, lerh viau si hian ngaihzawng i nei thei lo, an duh lo zel che. Fawnvela lah nupui ţhen bawk, in lak tlak loh dun e...mi star rawn luih luih ţhian neih kan chak ve aw" a lo tih fiamthu ve meuh chuan Sangkhuma leh Fawnvela te an tep chap chap mai a sin. 

"Kalvari hi a chhangchhe tawh sia, ni lo se chu naktukah kan loah kal ila ţha tur a nia, a nuam tawh teh mai a sin" Fawnvelan a tih chuan, "Ka hman lo vur ka siam dawn" ka lo ti a, "Dawr hi ka luah leh lo mai dawn mawni, min rawn pan an vang si, luah man pek a ngai tho bawk si" ka ti zui niah niah a, vur man lah mi pathumin kan insem dawn a, hna ka nei bawk si lo, rilru hahna hlir a ni mai. "Ka nu lahin 'i pi dawr va nghahsak rawh' a tih loh leh 'i pi vawk chaw va pek sak rawh' a tia, dawr luah man pek a hun dawnah 'i luah vei rawk a nih kha' a ti leh ang a" ka ti hlak hlak a, ka thin a rim ve tehreng nen Fawnvelan, "Dawr neituten an la hnawtchhuak zui che ang a" a lo ti kher a, a ho leh vek. Zochhuran dawr kawngka aţanga inthlahrung deuha, "A lo tel ve theih em?" a rawn tih phei chuan kan nui leh vek a, a rawn kal thawm pawh kan lo hre lo, a uite Huma a la pawm zui. 

"Engmah kan lo ngaihtuah lo reng reng, lo ţhu ve rawh, Remkalami a lo ang hrep a" nui ţha chunga Kalvari in a lo tih takah chuan ka bulah ţhutthleng hniamah tho a ţhu ve kuk a, a lian bik bawk si, Sangkhuman, "U Zorama hi chuan min chhem hlum thei ang mawle" a ti a, a nui kur kur reng a, "Khawmaw kuhva" u Lalhuman a la rawn ti zui, "Huma rimchhiat zia hi a, nghathu hing rim a nam" Fawnvelan a ti chu u Lalhuma a meng rum nghal ul a, "Zoram, i uite kha a hming thlak ang che" thupe aw zet hian a ti a, a la sehchilh em em zui. "Huma" Sangkhuman a tih rualin u Lalhuma leh Zochhura uite chuan Sangkhuma an en ve ve a, Zochhura tihngaihna hre lo lahin a uite hmai a hup a, za lo deuhin a nui a nui ringawt a, u Lalhuman, "Kir ker mai, i hmelchhe reuh si, Huma an tihin miin 'uite nge mihring?' an ti zel tawh" uar zeta a tih phei chuan kan lo nui duai a, a thin a rim em a, nuih loh theih pawh a ni lo. 

"Kulhi nu lahin makpa atan min duh lo nasa rapthlak si, 'a ngam leh ka fanu hi rawn nei rawh se, sap ram thleng ka beng dawn' a tih loh leh, 'makpa atana Lalhuma neih ai chuan bawng ek hlir hmeh pawh ka duh zawk' a tia, 'I lo len leh chuan thang ka kam tawh ang' a ti phei kha chu tha a na ve duh a sin, a fanu saw hmeichhia a ang lo si, a hrawl hrawl nen, a thin a rim a meialh a rap hlum hmak mai a nia" a ti duah a, kuhva ei tur siamin a ei pah tuam tuam bawk si, "Han sawi zel teh" lo tiin kan ngaichang ţhap a, "Kulhi thinrimin meialh a rap hlum, ţekin na tawka a den pawn a vual ringawt mawle. Current in a man pawn ni thum vel a chaw ei a tui lo a, chuzawng chu. A fanu saw hmeichhia a an loh nen a ui ve em em a, 'kawngkapuiah thang ka kam dawn' te a ti mai mai, ramsa pawh ka ni lo" a ti a, Kalvari pawh a nui ve hawk hawk reng a, a rilru hah lutuk tur a zia deuh ka ring. 

"Makpa atan a duh lo awm mai mai a sin, a fanu a rim leh chuan kawngkapuia thangkam a tum" Fawnvelan a ti a, u Lalhuma pawh nui ve vur vurin, "I pu chu eng nge a an a?" a ti ve ngei a, a ţhat thu kan hrilh chuan, "A dam leh mai ang, ka lo len ngun nen a ke na bak ka hre reng reng hleinem, Mawisacheki lah hi min hmuh apiangin ba min ţhing a, a sachek plate khat ka hawp ve khan a hlawk loh phah lo" a ti bual bual a, rin aiin a ding rei peih a, min rawn dawr tu apiang a lo fiam bawk a, Zochhura pawh a inthlahdul ta deuhin ka hria. 

"Zanin boruak chu a nuam hle mai" a ti leh hluai a, a nuam tak tak a, inleng an tam lem lo va, "Thla a eng vak lo nain zan dang aiin boruak a nuam" a ti leh a, dawr chhung leh kawt a bulb kan vuah ve chuan a en thui lutuk lo nain kan ţhianhoin kan awm khawm thei a, a nuam ka ti tho tho. Zochhura chuan a tih dan ngaiin hmehen a pai leh a, rin loh deuhin current a thim thut lehnghal, ţhenawm a tlangval leh naupangte an au dual rualin Zochhuran ka ban a rawn vuan chawt a, "A va hun lo ve mawle" ring zeta u Lalhuman a tih rualin ka pi Binladarin, "Kalvari, lalţin hi a eng nep emai mombati pahnih vel han la rawh" a rawn ti lauh lauh bawk a, dawra bati kan chhit en hnuah Zochhura pawhin min thlah chauh a, Kalvari inchhung aţanga rawn chhuak leh lahin, "Ka pu hmuh ringawt pawh hi hrehawm ka ti, a tar bawihin ka hria" a rawn ti lut a, "Keini pawh kan la tar dawn lawm" Zochhuran a lo ti dam thlup a, "Lo ţhu leh rawh" tiin a ţhutna bul awl lai a beng zui a, a hmuh chian ka lo ring chiah lo thung. 

"Dawr hi ka ti tawp daih dawn. Sangkhum, i duh leh nangmahin luah rawh, kan khua angah chuan sam siamna dawr hawn hluai hian awmzia a nei lo emai ka sum dawng zawk dawn" ka ti duah a, ka pu chanchin sawi loh dan ka ngaihtuah pah bawk. "I va beidawng hma ve" Sangkhuman a tih chuan, "Tumruh deuha ka pawisa a ral duak duak ka hlau alawm. Thil inrem te hi a ngai ve, duh an awm chuan ka pan mai ang, ka hlawk zawk ang" ka ti a, an lo bu tliar tliar hlawm a, "Supported, keipawn i chawi belh ka hlau" Fawnvelan a ti nghat a, "U Zoram, eng nge i ngaihdan?" ka ti chiah chu min en phawk khawp mai. 

Kan hma lawka stool ah mombati kan chhi a, midang chuan min ngaihsak lem lo aniang dawr kawta ding u Lalhuma ti ti ngaithlain an nui dar dar a, ţuan muang chi a ni bawk nen, "Ngati nge i ngawih reng a?" ka tih leh chuan, "U Zoram min tia" a ti ban charh a, a hmelah chuan a lawm zia ka hmu thei. "U Zoram tih i duh em ni?" ka tih chuan a bu nghat a, "Zochhura kha ka hming a ni lo a" a tih ve ngei hnuah, "Mahse ka haw chuang lo" a ti a, a lawm bawk aniang zawitein a luin ka lu a rawn tauh dat a, ka ţhiante ţhutna lam en lehnghalin a nui ruh ruh reng a, min hmuchiang ve vak thei dawn si lo va tiin a ţhutna lamah ka tawlh hnai a, a bana ka han kuah chiah chu Sangkhuma zawkin, "Eiiisss" a ti hluai a, min lo en ru kar a nih hmel. 

"I ho Sangkhum, naupangchhia deuha inchhaih rual pawh kan nih tawh loh hi" Kalvari in a lo ti hlak a, Zorama ban kuah reng chungin ka hawi vah a, thla eng en dun ang vel kan ni, kan tan chuan dawr kawta ding u Lalhuma lu lianpui chu thla eng deuh a ni ringawt. 

"Kan cham rei thei dawn mang si lo a, ka pu hi a ţha zel ang chu maw" Kalvari in a ti vang vang a, "Ka pu chu a vanduai a, i nu a thi hma si, i putea a tlaw bakah a nupui a damlo ve bawk si, keichu ka pi Binladarin dawr hawn a ti ziah hi ka dem miah lo, makpa pastor pawh nei se pawisa an rawn dil miah lo ang che u, a tawpkhawkah chuan anmahni pawisa in damdawiinah an kal mai ang. Kalvari, miin ka pu damlo an rawn kan a ni mai a, damdawiin kal ngaia a awm loh chhung chu thlaphang suh" Fawnvelan a ti nghat nghat a, "A dam leh mai ang, hlau lo la" Zoraman a lo ti ve bawk a, zanin chu a ţawng hnem ve phian. 

Current a rawn awm chiah chu ka chhing deuh sawk a, ţhenawmah hlim au chuah chuah thawm a awm bawk a, reilote current awm lo pawh hrehawm kan ti tlang a ni. U Lalhuma kal hnu lawkah Sangkhuman, "Tih theih a awm chuang lo haw ang u, naktuk hnathawh a ngai, Kalvari, nangpawh mu rawh i chau ang" tih leh thawh a rual a, chhuatah a ţhu em lo nain a kekawr mawng a beng fai zui thak thak a, a chhuak chu Fawnvelan zuiin min mangţha a, Kalvari ho a dawr kan khar hnuah kawngpui lamah Zorama nen kan inkai chho a, mi an mu hma ţhin bawk a tumah hmuh tur an awm tawh lo.

"Naktukah ka patea a lo thleng ang" a tih ruala ka din dat takah chuan ani pawh a ding ve a, "Dawr chu eng nge i ngaihdan?" ka ti mawl leh tawp a, "I tih dan dan a ni mai" a ti ringawt a, ka tum bur chu min hmu kher lo nain, "A hlawk lo i tih leh khar la" a ti leh a, "Sumdawn i thiam kha" a tih phei chuan a banah bawk ka kuah leh a, "Min thlawp tlat dawn chuan dawr ka khar ang a, kuttin chei vel duh an awmin ka pan ang a, ka sumdawng pah ang a" ka ti chiah chu, "Supported" a lo ti thum dût a, ka nui chhuak duai mai. 

"Nui suh" a tih veleh, "Ka nui ang" tih leh kal ka rual a, ani pawh ka ruala kal ve zelin a chang leh a banah chuan ka uai a, kan hlim dun lutuk chu ngaih a ţha lo zawk. A kut lehlamin Huma a kai tel zel si a, engmah hrethiam ve lo mah se a kal ve terh terh a, keini ai mahin a hlim hmel zawk. Kan in zawn kan thlen veleh, "Ka patea lo thlen hunah i rawn hmu ve dawn nia" a ti a, "Ka haw anga lehkhabu ka chhiar ang" a tih hnuah keipawh kan in lam panin ka kal a, min hmu chiang thei awm hrimin inchhung ka luh dawn thlengin min thlir a, ka luh veleh, "Kal tawh rawh" ka ti lauh a, pa Khawtea te nupain min en thla em lo vang chu maw. 

Ka mut fel hnuah, 'Pangngai deuh a rawn len ve ka chak' tiin message a rawn thawn a, 'I rawn leng lo mi? Kan len kha' ti a ka chhan chuan, 'In inah mawle...pangngai deuha nula rim ka chak' a rawn ti a, a awm ve tho. A nihna nen pawh a inrem deuh ang chu. A puitlingin Pathianthu a zir a, pastor nih tum ran, a la nih theih rih loh vanga school principal a rawn awm a ni a, mi in leh dawr te, khawlai tih vela nula han hmuh reng mai chu nuam a ti lo a ni maithei, sawisep kai a hlauh tel bawk ka ring. Amah hi a fimkhur a, ka ţhiante chauh an awm chuan min kai a, min hnaih ve surh surh nain midang an awm ve chuan an mit ti kham tur zawngin a awm ngai lo, mawi hnai deuhin min bia a a ni mai. Inkhawm a ţhulh ngai lo a, kan han inkhawm a, kan inhmuh a, biakin kawta kan din ho chang te hian ka tana hrehawm chuang miah si loin mi mitmei a veng thiam ţhin. Hrang deuh bikin min dah ngai lo va, a nupui ka la nih miau loh vangin midang aia min ngaihtuah fal bik zia a lantir ngai lo bawk. 

'Ka pi Binladari te an buai rih em a, ka nu hian nu leh pa tak tak angin a en a, a ngaihtuah lutuk hian pui rawh min ti ţhin a' ka ti a, ka inthiam lo ve reng. 'A pawi lo' a rawn tih hnuah, 'A dam leh mai ang, thi ţep emaw kan tih ho hi an fei duh' a rawn ti hem mai. 'Fei dawn mah se hetianga han sawi kher' ka tih chuan, 'Dawnfuha kha a mu ve mai mi? A va fel ve, Kalvari an in lamah a awm daih sia' a rawn ti leh daih a, 'Ka nu nen an in awi mu aniang thawm an nei lo. Dawnfuha chu a fel lutuk, a harh hi a ni mai. Miin an lawm a, a sen lai aţangin an la hrang ţhang a, Kolasib a an haw pawhin a pi bulah alawm a mut' tiin Dawnfuha fel zia te ka hrilh leh a, a naute hi an khirh a, Dawnfuha chu a harsa lem lo. 

'I hman hunah ka la rim ang che' a rawn tih rualin u Zirbawnga message a lo thleng ve chiah a, 'Dawnfuha te unau engtin nge an awm?' a rawn ti a, a ngaihtuah viau nain Kalvari phone number a nei a, fa a nei ve tho bawk tih hriain ka chhang let lo. Zorama zawk chu, 'Ka hman ţep tawh ang, dawr ka nei tawh dawn hleinem' ti a chhangin u Zirbawngan, 'Remsial' a rawn ti leh a, ka nu'n, "Lalremmawi, khawiah nge Nutei?" an pindan aţanga a rawn tih chuan Nutei a awm lo tih ka hre chiah bawk. 

"Ka hre nang...khawiah nge?" tih pahin ka inbengkang uai a, ka buai lutuk a thil zawng zawng ka ngaihtuah kim biai thei bik lo, rilru a phir a, a hah bawk a, engkim ka hre vek seng lo. "Ngaihven rawh, Rangruaia nen te khan an lo awm dun ange" mutchhuak aw deuh hian a rawn ti leh a, Zorama hrilh chi niin ka hre bawk si lo, a mualpho ka hlau chuan Sangkhuma ka phone a, a lo la meng hlauh. Nutei chanchin ka hrilh chu, "A va han buaithlak tak. Ani hi tunlai a dik lo reng reng, a mizia a inthlak hlawk alawm" a rawn ti khur khur a, a buai rukna chu ka sawi chuang lo. Amah kan phone a, a lak theih miau loh avangin Sangkhuman a ruka zawn a rawt a, a tawpah beidawn nan tal tiin Msa ka phone a, "Amah a awm a duh a dawrah a riak, in ho" a rawn ti pawr chhar mai. Sangkhuma ka hrilh chu, "Fawnvela nena kan haw khan kan en kawi a, pawnah a inkalh thlap sia" a rawn ti a, "Msa chahbi a pe pek aniang chu, mawl lutuk" ka ti hlak hlak a, bo thei a tam si, Sangkhuma lahin, "Keimah chiahin chahbi ka kawl tawh ang, ka pu a damlo a kan buai vek a, chahbi pakhat chiah neih a ngai, ka pheikhawk siam lai mek te kha a lo bo ange, amah Nutei tak te kha a bo ange" a rawn ti a, tunlai chu a mizia a inthlak hlawk tak tak a, tu thu mah a awih duh bawk si lo, a manganthlak tak tak a ni, Rangruaian a hre ber ang. 

Dawrah a awm bawk a tiin ngaihţha deuhin ka mut san a, zingah Dawnfuhan ka hnar a rawn kawm vangin ka harh a, a la nui kur kur zui, khawhar nachang pawh a hre lo, a â tak tak a ni. "I nu te ngai ve ta che" ka tih vin hlar rualin kei aia vinin ka nu'n, "Lalremmawi, hau reng reng suh" a rawn ti a, ka melh rum em em ringawt mai a ni. 

Pindan aţanga ka chhuah hnuah inphih faiin thingpui bel ka ban a, ka nu'n, "Nutei hi a zia a va dang ve, a haw duh bawk si lo, inah a rawn haw ţha duh bawk si lo, ngaihven rawh" a lo ti leh tawh a, keipawn ngaihven a ngai tawhin ka hria. Dawnfuha a tlan kawi zawr zawr reng a, Zorama pawhin school a kal dawnah min rawn hrilh thlap. Ka pu a ngai reng a, kei ka buai em em thung. 

Tuk ţhuan eikhamah Sangkhuma kal hmain dawrah ka phei a, rin ang ngeiin a lo inhawng tawh. A chhunga ka lut chu Nutei a lo mu zawi nguai a, thawhphan hmel deuhin Msa a lo ţhu thung a, "Eng nge awmzia?" ka ti lut hluai nain min ngaihven lo ve ve. "Nizanah eng nge in tih?" ka tih leh chuan Msa zawkin, "Engmah" a ti bung nghut a, chutah Nutei chu kawkin, "Henu hi ka nin zia, a chang leh haw rawh a tia, a chang leh min awmpui rawh a tia, rilru mumal a pu lo, Sangkhuma pheikhawk siam a rimchhe ropui si" a ti nuah nuah a, a hmai a tuai pah a, a nin hmel tak tak khawp mai. 

"C. Sangkhuma pheikhawk siam ve saw a original pawh a ni lo ang, a rimchhe emai a origical zawk aniang, ding lam ka hawiin Sangkhuma pheikhawk siam rim a nam a, vei lam ka hawiin sam dye na rim a nam a, nizan chu hawi ngaihna a awm reng reng hleinem, haw rawh a tih rualin ka kalh hnan a ka haw nghal" Msa bawkin a ti leh hluk hluk a, ka chhan hma hmain, "Ka haw dawn ka ril a ţam..ka rui ngai hlek lo a nia aw u Remkalam" tih leh thawh a rual a, kawngka lama inherin a chhuak nghal vut a, a kal vung lutuk a koh let chi pawh a ni lo. 

Ţhutna pawt hnaia Nutei bula ka ţhu chu, "Ruih chhum hmawk ka chak ber a ka rui a nih kha, i duh leh min hau rawh. Tunlai chu ka rilru te hi a tê, keimah tak hian ka ning lutuk" a lo ti hlak hlak a, "Dawr hi ka ti tawp daih dawn, ka dawr nei ve hi ka hlawk lo, pawisa a hek lutuk, vur chiah ka hralh thei" ka tih chuan, "Rilruin mihring a lo hruai kawi nasat theih zia hi tiraw? Taksa na ai pawn a hrehawm zawk, ka bing mup mup reng mai, ka huat a ho si, reilote a reh ang a, a rawn in mung leh ang a" a lo ti daih a, "Awii...i awmdan chu ka hrethiam lo e" zawite a ka tih chuan, "I hrethiam reng nang, a tuartu tan pawh hriatthiam a har alawm. Ka ruih vang hian zankhat te lek chauh pawh ti bo ila ka lawm ngawt ang, zankhat lek engmah hre lo a awm te ka thlahlel, a chhan sawi fak tur awm si lo vin khawvel hi ka ning hle ringawt a a ni mai" a ti nghat nghat a, thawh pawh a tum chuang lo, a sam a hnawk nuai a, a hmai te chu ka phih sak chak. 

"Hetiang hian engtik aţangin nge i awm a? Khawvel nuam i tih theih hawr hawr nen" ka ti a, min rawn melh zauhin a mit a nuai zui a, "Ka hre bik lo, zawi zawiin ka awm chho aniang, Nunui thil tih ka huat ngai loh te ka hua lawm, ka nu te'n 'a puitling chauh a nih hi' min tia, puitlin vang pawh a ni lo, natna a nih hi, ka hne a nia" a ti hlak hlak a, sawi vak tur pawh ka hre lo, "A zia lo e" ka tihin min melh rum a, "I dam leh mai ang" ka tihin min en duh bawk si lo a, "Ka awm reng alawm" ka ti ve a, "I awm lo" min ti tlat bawk si, a chang leh sawi tur ka nei lo a tia, a chang leh ka sawi seng lo a ti bawk a, a natna hi a kikawiin a khawlhkham reuh tak tak a ni. 

"Dawr hi keiman ka lo luah ang" a ti deuh thut lehnghal a, "Pawisa i nei mi? Thla tin luah man pek a ngaih bakah kawn lai tak a nih hi, motor an tlan reng a, a khu si" ti mah ila, "Pawi lo..pawisa chu ka pa a awm alawm. U Lianpuii hlawh nei zawk in luah man pawh an pek sak char char alawm" a ti tlat a, nui chunga min rawn enin a tho ve ta nge nge a, "Msa kha a rui ngai lo tak tak a nia aw a tlaw lutuk, a chhungten in khuaa rawn dah duh hial khawpa sual an tih chhan hi ka hre chak tak tak a ni" a ti a, a nui zui hak hak a, chutah zik mar ar ar pahin, "Awii...ka lu a na lutuk, Kalvari te pawh ka la hmu ve lo reng reng" a ti a, "Haw ang...ka nu'n a ngaihtuah che. Dawr i luah dawn phei chuan a hu ho a i nute biak a ngai, kei chuan ka luah duh tawh lo reng reng" tih leh thawh ka rual a, ka hui pah bawk a, "Min hau mah se ka haw awm lo e" a ti a, a luhlul nasa mai bawk si, "Hauh ka tawrh ve loh chuan a pawi lo, hauh hauh rual pawh ka ni tawh lo kei chu" ka ti a, dawr chu khar sawk sawkin ka haw pui a, ni a sa si, ka inhmu uk khuk mai. 

Inchhung a kan lut chu ka nu'n a lo hau chiah reng a, min hau ve dawn lo emaw ka tih nen, "Lalremmawii lah hi" a ti tel leh tawh. "Awii...i mak ve chiang e...ka hming sawi tel loin i phun thei lo reng reng. I mumangah hrang vak thei ila ka ti" ka tih chuan a hmui petin a nui put put a, keipawh ka nui tho, ka nu nen hi chuan kan inhmeh ve thlawt a ni. 

Nutei pawh a inbual zawh hnuah ka pi Binladari te in lamah ka phei pui a, Kalvari nen an inhmu chu an ri chul mai. Ka nu'n Dawnfuha a awm hlauh a, a vaihlo dah ţhat a tih darh vek pawn a hau phal lo. Kalvari hi a fanu a ni ve miau a, Dawnfuha te unau hi a tute ah a ngai miau a ni. 

"Nizan te khan i reh hmak a ka lawm lo, kan cham rei dawn loh nen" Kalvari in a tih laiin dawrah ka lut a, kuhva kawrpui khehna a lo awm rum mai. "Remkalam, keichu dawrah ka kal tawh dawn a nia, pheikhawk ka siam loh chuan pawisa ka nei dawn lo" a tih hnuah Sangkhuma vekin, "Inhralh a har si, pheikhawk chhe siam tur tal awm se aw...ka pheikhawk siam hi a tlo lutuk a a lei ho hian an bun chhe thei lo" a ti tawh a, Fawnvela te pawh pickup in thing phur turin an kal daih. Khawchhung a reh leh tawh viau a, "Chhe hma deuh hlek turin ka'n siam tawh teh ang. Phun phun mah se ka siam loh chu vai ho zawrh bak lei tur an hmu dawn chuang lo" ti a Sangkhuma a kal leh takah phei chuan a reh lehzual a, Nutein thil a sawi dawn emaw ka tih laiin a ngawi tlat a, Kalvari in, "Fawnvela ten 'Msa a ti reng' an ti che a nia aw" a ti zeuh zawk a, a fanu pakhatin a bawh ar ar a, pakhatin a nghawngah a uai bawk a, chhangchhe tak a ni. 

"Hmu ve mah la chhe lo i ti ve tho ang, mahse u Rinchuta leh u principal ang chi chu a ni lo, a hmel chu a ţha" Nutein a lo ti a, nuih har har pahin Kalvari in a fate a buaipui a, phone ka en san daih. U Zirbawnga message a lo awm leh tawh a, 'Eng nge in an?' tih zawng a ni. 'Keimahni ngei kan la ang ber e' tih mai te ka duh tawh a, block leh nge nge a ngai dawn a nih hi. Zorama'n, 'Ka patea a lo kal dawn si a, vawiin chu dawr ka nghahpui hman lo ang che, zan inkhawm nen' a ti ve thung a, ka ngaih ve tehreng khawvel hi a aw haw wow lo a ni. U Zirbawnga lah rilruah a awm ve reng a, ka my first love kha a ni ve a, hriatchhuah chang a awm lo thei bik lo a ni. 'Remsial' min ti kher zel te hi ka sial hmel bik a, thil te tham deuhah pawh ka hrechhuak ve reng mai. 

"U Rinchuta pawh a famkim bik hleinem, mahse a famkim lohna zawng zawng nen a pawmin a tlin lohna lai thlengin ka nei tel a, hei hi hmangaihna a nia" Kalvari in a tih chuan melh hrak paha ner nangin, "Hmm..." ka lo ti uang a, "Khatin min en vel lo teh Remkalam, pastor a nih vangin a famkim bik kher hleinem, bakah kan kum a inthlau a, insiamrem a harsat ve zia aw" tiin min rawn tlawh chawrh a, "Kolasib a kan haw hian thawh ka hai ziah lehnghal a, u Rinchuta hnena 'min kaitho lo a' ka tih leh, 'I muhil alawm' a ti sam et zel a, an chhung an rual sia, thawh hai tuka sa hrang lian ţha nelh nawlh min han suah phei chuan ka zak lutuk hi ka hawi lawl lawl zel mai a ni" a tih leh chuan, "I zah loh kha a, i zak der. Kan khuaa a rawn awm hlimah i rim ţhin" uangthuang deuhin ka lo ti a, insawichhe tawnin kan nui kan nui mai. 

"Nangin doctor i rim a, keiin pastor, nang chu tun thlengin i la singular" min kawk va va chunga a tih chuan, "Ka aim in life ka thlak ka tih kha. K'u Zorama hi pastor a ni ve thut thei a nia aw intithei viau suh" ka lo ti a, "Rawn pastor ve mah se u Rinchuta a senior zawk dawn tho tho" a fanu pawm pah hian a ti a, kan naupanchhiatna lai a chhuak laklawh bawk a, "Hmh..a tar hmasa zawk dawn a nih chu" ka ti a, Kalvari pawhin, "Awii...kan naupangchhia e...a nuam tho bawk si, whatsapp group a inhnial fiamah ka in ngai" a ti hluai a, Nutei pawh a nui a nui ve mai. 

"Sangkhuma lah 'ka pheikhawk siam a ţha bik' a tia a infak vak vak a, duh aiin an bun tlo a, a inhralh thei lo a mangang leh a" ka tih laiin ka pi Binladari a rawn kal a, "Kalvari, inleng awm loh lai tak hian naupang kha hrai puar rawh" a rawn ti a, a kal lehnghal daih a, ka pu pawh miin an la tlawh ve reng a, ngaihtuahawm lutuk chu a ni tawh lo. A ţha a, a ţha lo leh a, chutiang reng chu a ni mai. Kalvari pawhin ral aţang ringawt a chanchin hre lo va a rawn hmuh ve takah chuan a hahdam deuh huai zawkin ka hria a, Sangbollywoodi leh Msa erawh an reh vang vang a, vur an siam a nih ka ring, buaipui tur dang a tam em a, ka ngaihven hman ve lo a ni. 

Kalvari in a fate a hruai chhuah hnuah Nutein, "In naupangchhia si..Kalvari phei chu nu a ni tawh, kei ai pawn in â, ka ning" a ti leh hlak hlak tawh a, "Ţhianţha te bulah chuan tupawh kan naupangchhia vek, ţhianţha te bula thutak run reng ka hre ngai lo" ka ti let erh a, ner nang chunga a hawi sawn hmak chu ka be zui lo. 

Tlaiah Zorama bawkin min rawn biain, "Awii...kau Zo" fiamthu a ka lo tih veleh, "Ka patea a lo thleng tawh a, i chau em?" a rawn ti a, ka pi Binladari dawra sana bial tereuhte, paw deuh phuk, banga intar chu ka en vat a, school ban a hun daih tawh a lo ni. "Chau nang, hei Kalvari te nufa nen kan awm a" ka ti a, tlai lam a ni tawh bawk a u Rinchuta video call in an hlim nufa ve khawp mai. 

"Vawiin lam in leng in ngah em?" a rawn tih chuan, "Ngah lutuk lo, vawiin phei chu ka pu pawh a zia deuh a, Kalvari a nui har har reng mai" ka ti a, Zorama pawh lo nui ve hawkin, "A ţha lawm...ka rim ve thei ţep tawh che a nih chu" a ti a, kan in a a rawn len kher loh chuan min rim angah a in ngai thei lo. 

"I patea a lo zin sia nakinah ka lo leng ve ang, ka u pakhat zawk, mit var tawk a lo haw dawn bawk a, i hman leh lo kal la, keichu ka lo kal hman rih lo" ka ti zung zung a, haw inringin ka ipteah ka hmui hnawih leh ţhialret vel ka khung khawm sawk sawk bawk a, ka nu ten Dawnfuha an rawn hruai haw dawn a, ka tlanchhiatsan daih dawn. 

"Ka hman rih lo ang, dawr chu engtin nge ni dawn?" a rawn tih chuan, "Nutei a phei leh daih tawh, a thiam ve vek tho a, awm mai mai rawh se, tun thla bak ka luah tawh dawn lo" ka ti a, ka din rualin ka kawr ka beng fai thuak thuak a, "Ka haw dawn" ka tih veleh, "Min be pah rawh" a rawn ti a, ho ti viau mah ila phone chu ka dah bik chuang lo. 

"My friend, ka nu a lo kal dawn sia rawng ka va bawl ve thung ange aw...dawr hi lo ngaihven pah rawh u" ka ti lang lang a, "Zanriah eikham veleh rawn phei leh rawh aw" a tih chuan chhang lem lo vin ka kut ka vai a, ka kal nghal nal nal bawk. 

"Awii...kawng chho hi tawi te pawh ka ning, what a very hah" ka tih chuan Zochhura a lo nui hawk a, phone ka la dah miau lo a, ka thaw ri thlengin a hre vek ang. "Muangchangin kal rawh" a rawn ti chiah reng a, "I leng chhuak hman lo a min be hman tho si, principal pawh ni la inhmuam up kher suh" ka ti hlak hlak a, "I ţawng hmain thaw zo phawt rawh" a rawn ti a, ka hah bawk em a ni. 

"Awii...what a very low oxygen, ka thaw seng lo, ka hah zia chu, ka pi Binladari dawra kal chuan hah deuha haw a ngai ziah" ka ti leh tho a, midang nena kan haw chuan kan ti ti pah a, kan chawl kan chawl zel bawk a, ka hah vak ngai lo, mahnia hmanhmawh deuha kal chuan hah thei tak ka ni. 

"Kawngpui i thleng tawh em?" a rawn ti leh daih a, "Thleng ve tawh e...kan in lamah ka phei leh nghal" ka ti a, hah chung chungin tumah ka la be ngai lo. Kan in lamah ka phei zel a, ka hah zualpui chu a reh tawh. Beisei loh deuhin kan in peng bulah a lo ding a, ka hmu thut chu phu chiang tak ka ni, nui chunga lo dingin a phone min rawn hmuh zeuh a, a hmet tawp nghal bawk a, min lo en reng laia a lam pana ka kal chu lai chhe tak ka ni. A hma zawn ka thlen veleh zahzelah, "I inlak zei dan hi a universal" ka ti fiamthu a, kan inpeng meuh a min lo nghak chu eng emaw pawimawh deuh sawi tur a nei aniang ka tih rilruk laiin, "Kal rawh ka lo enliam ang che" a ti daih. "En liam turin maw min lo nghah a?" ka ti ve kher a, "Ka buai deuh a, ka enliam hram tho ang che" thutak deuh hian a ti a, lawm tur nge lawm loh tur ni ang le...ka hrethiam tawh bik lo reng reng. 

CONT