KEIMAH, THINGTLANG NULA (FINAL SEASON) 23

KEIMAH, THINGTLANG NULA (FINAL SEASON) 23

'Min chhang duh lo vel a, i inla ngaihawm emai' u Zirbawnga bawkin a rawn ti leh a, "A rui leh tawh a ni chiang" ka tih hnuah, 'Mu mai mai teh, chhiat in tawk a nih loh chuan min rawn be tawh suh, ka block leh daih mai tur che a sin' tiin ka chhang let a, Zorama chu a online ve tawh lo. 

'I ngaihawm em alawm Remsial' u Zirbawngan a rawn tih chuan, 'Min hmuh leh thut vang a nih kha. Min be reng lo la a reh em em ang' ka ti a, a reh zui ang chu tih nak laiin, 'Ka hmuh leh thut hma che pawh khan ka ngai ziah che' a rawn ti a, 'Tuktin leh zantin mai bakah chhun pachangah pawh ka ngai ţhin che Remsial. Thiam ila chu i sam tawi lai aţang tawh khan hla ka phuah tawh ang' a rawn ti leh duah a, 'I la inngaihdam ve loh vang a nih kha min theihnghilh thei lo, keichuan ka ngaidam thlap che a, hmalam ka pan mai hi' tiin ka hrilh a, ka khawngaih ve deuh a ni. 

'Ka inngaihdam theih lohna aiin ka inchhirna a la nasa zawk reng' a rawn tih chuan, 'A inang reng alawm. Midang min ngaihdam rualin mahni kan inngaihdam tel ve a ngai a, chutiang a nih loh chuan hmalam a pan theih loh. Ruihhlo ah i tlan a, i ngaihtuahna i ti fim duh lo a, meng mang loin nupui i ru a i inchhir leh a' ka ti a, ka duhthaw bawk a message chu ka type zawt zawt mai a ni. Ani lahin, 'Min hau hrep rawh, min biak zeuh zeuh duhna a nih chuan min hau ziah mah la pawi ka ti lo' a la rawn ti a, ka bialpa hmasaber a ni a, theihnghilh chu a har ve...mahse engti kawng zawng mahin a rem tawh lo. 'Di zawng zingah, aw, a hmasaber chuan, thinlung an luah an ral ve ngai lo' an tih kha. A hmasaber a nihna laiah hian pawimawhna a nei ve tlat a, amah avanga na tawpkhawk ka tawn hnu leh ka mualpho hak hnuah pawh ka la zilh lawm lawm tho a nih hi. 

'Ka be zeuh zeuh dawn lo che Zirbawng, insiamţha ve rawh. I nupui leh i fapa tan khan a ţha thei ang bera nun i hman a ngai tawh. I nau thi ta pawh, 'pa ţha ber nih a tum laiin a boral a' i ti ziah a ni lo'm ni? A aiawhin pa ţha ber ni ta che' ka ti a, min rawn call ta nge nge a, ka lak rualin, "Ka type peih tawh lo, inchung zawlah ka awm, ti ti ang" a rawn ti a, "A tawp nan" ka tih veleh, "A tawp nan" a ti ve sup a, keipawh ţhu leh rihin tukverh ka hawng a, thlifim chuan boruak a ti nuam tawkin lungleng mi chu ni ila ka lung a leng viau ang. 

"Min ngaidam tawh sia ngaihdam ka dil nawn tawh lo mai ang che. Mahse, a chang chuan min la ngaidam lo la ka ti ţhin, 'ngaihdam tal ka dil duh' ka tia nga, biak chhan tur che chhuanlam ka nei thei dawn a" a rawn ti duah a, "I awmdanin zir se chu chhuanlam tur zawng buai loin min be reng thei mai tur a nia" ka tih zet tawh hnuah, "Hun liam tawh chu sawi tawh lo vang" ka ti leh a, bul min ţanpuitu, hmangaih leh hmangaihtu neih hlimawmzia leh phatsan leh bum nih natzia min hriattirtu a ni a, ka chhel phah a, ka fin phah rualin lawmthu em chu ka hrilh thei lo. 

"Ka inthiam lo takzet ka tih hian min ring thlap ţhin em?" a tih chuan, "Ring thlap e...ring lo che ila ka ngaidam lo ang che. I inthiam loh takzet vang khan a nia thil i ti sual tih ka pawm thlap, inţhen hlen ka duh chhan pawh a ni" ka lo ti a, sawi dun a mamawh a nih hi. Sawi pui ila a inngaidam ve thei ang a, ka rilru a let takzet tawh tih leh a hnenah ka kir tawh dawn lo a ni tih a pawm ve mai ang. 

"Ka ngaih chang che a inkhawngaih ka tum hian nangmah ka khawngaih zawk zel che a, ka ngaidam che ti chunga min kalsan tho hnuah pawh i tluk palh hlauin ka la ngaihven che a, biak pawh ngaihna che ka hriat loh lai pawhin i aw ang deuh ka hre tho ţhin. Hmangaihna ti dawn ila keimah vangin i na a, ngaihdamna pawhin a chelh zo lo che chu a nia. Hun hi her let leh thei ila chuan ka hma ka sial lutuk tawh hauh lo vang" tiin a rawn phun sup sup a, a ti tak tak aniang a ţawng ring lo nain a aw chu a nghet charh a, hun rei tak chhung sawi a lo chak tawh a sawi chhuak ta a nih ka ring. 

"Hmalam ka pan zel a, nangin nupui i nei tawh a, a ţha a ni mai lo mi? Kan tih danglam theih loh thil chu pawm thiam kan zir a ngai a ni mai a" ka tih chuan, "Pawm thiam ka zir tawh ang. Vani te nufa hi ka unauten an ngaihven tho rualin ka kutah an dah zual emaw tih tur a nia, an hmangaih viau a, a zawng zawngin an ngaihven phak lo thung a, an bul hnaia awm chhun chu keimah ka ni mai. I sawi ang khan ka nau ai ka awh a ngai a, a fanu hian pa neih loh hrehawmzia hre lo se, rualawt miah lohin ţhang lian se ka duh a" a rawn ti dap dap a, "Rinhlua hian sawipui a ching a, 'i pa khan i pian hma aţangin a hmangaih tawh che a, a lawm che a, a intithei nasa ţhin, i lo theihnghilh hlauh ange' tih angreng. Ka hauh lahin, 'kan enkawl thei a, a retheih dawn loh rualin a pa hrereng se ka duh' a tia, unau pawh rilru a inang lo thei khawp mai, keiin ngaihtuah lo hram hram se, a pa vangin hrehawm ti lo se ka duh a, Rinhlua chet chut hi chu a" tiin a nui hawk a, an chhungkua a thil thleng ţhenkhatte hi ka bulah chuan a sawi ve mual mual zel. 

"Ka nau fanu hi zakzum leh inthlahrung deuh chi a nia, dawhkana a eichak zawng kan dah pawhin mi an tam chuan a ban ngam lo, Sensiari naupanlai ang chiah a ni. Hei vang hian ka ngaihtuah lehzual a, nangmah chauhin i chhaih harh thei ang ka ring" a rawn ti a, "Awii...em em che hian, zakzum chhaih harh thei khawpa ho ka nih bik loh hi. Nangmah kha insiamţha a, rui bual reng lo la a ni mai. U Lalhuma te ang chiah i ni tawh" ka tih chuan, "Karkhat vel chu ka rui tawh lo. Ka duh chuan ka nghei thei alawm, ka rui tawh lo ang" a ti ve mai a, "Rui suh, Emi pawh a khawngaihthlak, eng nge a an zel?" ka tih leh chuan, "A ţha...a zia a la ngai reng, a taima a a fel bawk a, Bawihtei pawh a thiam dan danin min duat pui ve" a ti a, nupui fel deuh a nei ka lawmpui thei ta te chu lawm tak ka ni. Hmeichhe dang a fak laia ka lo na veng veng lo te chu hmasawnna nasa tak a ni. 

"I fapa eng nge a an?" ka tih chuan, "A nui thei a" tiin amah zawk a nui hawk hawk a, "A pianna a la rei lo emai sawi vak tur a awm lo. Min ti hlim a, a muhil mai mai pawh hmuhnawm ka ti. A rawn en apiangin hmelţha an ti bawk a, 'a pa a ang zawk' an ti zel. A fel reuh a, Emi pawh a hah vak lo ang. Ka fapa hi sawi bo ka phal lo viau nain nupui ka lo nei hi ka la inchhir reng mai" a rawn ti leh tawh a, "Engvangin maw?" ka tih chuan, "Hmangaih miah loh chenpui harsatzia i hre lo a nih kha. Ka fapa hringtu nu a nih angin hrehawm a tih chu ka duh lo, mah se ka hmangaih lo a, ka hmangaih theih ka ring lo bawk" a rawn ti bawl bawl a, "I ti ang lo e...damchhunga i chenpui tur a nih chuan hmangaih tum mai ta che. A fel em kha, i fak mawlh mawlh a, hmangaih lo tih leh daih te chu" ka tih chuan, "Tum vang ringawtin tumah a hmangaih theih loh. Inhip tawnna a awm ve te a ngai a, rilru a buai a nih hi Remsial" a ti a, a thaw zui hak a, a rilru a hah leh pek tawh aniang. 

"Damchhungin incheng dun tawh dawn, i inlak hran reng chuan nangmah bakin hrehawm i ti dawn lo a nia. Zilh bik reng ngai suh" ka tih chuan, "Min tih dan ka nuih liam pui mai mai ţhin ang hian Emin min ti ve se ka haw viau ang, chutiang chu a ni mai. Tum loh deuhin ka khaikhin leh ţhin cheu a mah se pawm thiam kan tum tawh dawn kha" a ti a, keipawh hian mipa dang nen ka khaikhin ziah a, hei chu thil awm dan tur pangngaiah ka ngai. 

"Pawm thiam i tum dawn a, keichuan ka pawm thiam tawh. I nupui leh i fapa kha hmangaih la, chhungkua i nei tawh a hlim viau zawk ta che" ka tih chuan, "Ka tum ang ka tih kha. Nangpawh hlim zel la, chhungkua din ve vat rawh" a ti a, ka lo nui hak mai. "I sawi duh zawng apiang ka sawipui che a, ka ngaithla vek bawk a, ţul lo a inbiak reng kha sim tawh ang che" ka tih chuan, "Tikhan ka hrechiang lehzual che a, awmdan ka thiam tawh ang. Thil thleng zawng zawngah hian thiam lo zawk ka nih miau vangin pawm tawp loh chu tih theih ka nei lo, Emi pawh ka thiam loh tho a ni a, hmangaih lo mah ila ka ţhen lo ang" a ti charh charh a, ka lawm viau mai.

"Mikhual anga min en loh chuan a tawk mai. Ka ngaih chang che pawhin biak loh che ka tum ang a, kum tlemte liamta ah khan kan nunhlui chu a awm daih tih hi pawm tlat ka tum ve tawh ang" a ti leh a, a sawi dik chiah, u Zirbawnga nena kan nunhlui chu kum tlemte liamtaah khan a awm a, kan kalsan tawh. "Inhmuh changin inbia ila a ţha mai, kan inhaw lo ringawt pawh hi a lawmawm tawk lutuk alawm" ka tih chuan, "Ni e...min haw lo hi a lawmawm. I rilru ka hrechiang lehzual tawh a, awmdan ka thiam tawh ang ka tih kha ring tawp rawh" a ti a, ka tan a mi pawimawh tak mah ni se, "Tun hi kan inkar sawia kan inbiak tawpna a ni ang" ka ti leh a, "Sawipui tawh loh che ka tum ang. I lo nat tawhna kha thar thawh sak reng che ka duh bik lo" a tih chuan, "A tawpna tak tak" ka ti a, "A tawpna tak tak" lo ti ve supin kan in mangţha a, phone ka dah chiah chu ngaihtuah tur ber pawh ka hre lo, ka khawngaih a, khawngaihnaah hian a tawp zel tawh, a hnu lam zel ka ngaihtuah tel thei tawh ngai lo. Nupui a ruk hnu ngat phei kha chuan ka ta tur a nih loh zia ka hrechiang lehzual a, chelh reng ka tum lohna hian hmalam min pantir ni berin ka hria. Kalvari tih dan takah Pathianin Zorama min pe bawk a, khawhar hnemtuah chauh ka hmang lo hi hmalam ka pan zia lantir nasa zual tu a ni bawk. Sawisel ţhin mah ila a nihna ang ang hian ka pawm a, min ti hlim tu leh ka nun ti nuam tu a ni bawk. Theihtawp a chhuah ve na te hi ka hmuh hmaih ngai lo. 

Zinga ka harh rualin u Bawiha leh Dawnfuha te inchhaih ri ka hre nghal a, ka nu'n, "Lalremmawi, tho ve tawh em em rawh buh ka pho fel vek tawh" a rawn ti lang lang bawk a, ka phone enin u Zirbawnga nen kan inbiakna bik chu ka paih vek a, ka tho zui nghal a, pindan aţanga ka chhuak te chu tuk dang aiin ka zangkhai zawkin ka hria. 

"Ka va'n tho tlai em em dar7 a pel tawh mawle" banga sana intar en chunga ka tih chuan ka nu'n, "I hah ve em a ka tia ka kaitho hma duh lo che a nih kha. I u Bawihan chaw a chhuang tawh a, inphih fai la chawhmeh chhuang lum rawh. Sangha rep kha siam bawk a" a ti zung zung a, ka u te fel ve na pakhat a nia, an pahnih a in an luah hran hma vang nge pawh ka hre lo, mipa hna leh hmeichhe hna an thliar hrang ve vak lo a, hmeichhe hna bika kan ngaih te hi a ţul chuan an ti vek zel, ka awm hian min ring ve deuh ţhin thung. 

Bualin aţanga ka chhuah veleh ka nu'n, "I puin ziaawm lam a pan zel bawk a naktukah Kalvari te an haw dawn a, an hawn tur eng eng emaw lam khawm ka duh. 'Inthlahna kan siam dawn' in tia nga i buai leh daih ang a, chawhmeh kha tlai lam daihin siam law law rawh, a tlem deuh kha siam belh mai rawh" a lo ti leh zung zung a, ka pi Binladari te inah pawh a lo va kal leh vek tawh aniang chu. Kalvari te chu Pathianni an cham ka ring lo hrim hrim a, u Rinchutan phal pawh nise aman a duh lo ang, vin vak vak chang nei mah se a inthlahrung ve thei lutuk tlat. 

"Dawnfuha chu kan bulah a awm daih dawn tiraw?" u Bawihan a tih veleh Dawnfuhan, "Aih" a lo ti lauh a, a zuang tel kher lehnghal. "I lo awm dawn reng kha, kan duat dawn tehmai che a nia aw" u Bawihan a tih leh pawhin, "A ni lo" a ti ve tlat a, an in chhaih fiam dan vel chu chawhmeh hawn lawr dan dan pahin ka lo nuih a, tukţhuan kan ei leh chuan chawhmeh mumal a awm tawh dawn lo. 

"Sangha rep ka chhum tawp phawt ang a thil dang chu tukţhuan eikhamah law law ka siam mai ang" ka ti ta ringawt a, "Sangha rep i chhum chuan thingremah kalh hnan rawh ka nu'n a ei ru zo leh vek ang" u Bawihan fiamthu a a tih chuan, "Engatanmah ka ti lo, sangha rep na na na chu a cheimawi thlengin kan nei vek ang chu. I pa'n a buaipui lutuk ka hne tak tak pawh 'sangha rep hi krismas ah inchhung chei nan kan hmang dawn nia' ka tih kha" ka nu'n a lo ti a, Zorama te pafa leh tlai lam ngaihtuah ran chungin ka chhum hnuk a, a hang tui ang chu aw. Ka kalsan hnua ka nu'n a en ve pawhin, "Kan ţhenawm ni ve mual mual-a kan tih kep leh tawh a ni maw? A in kawtah kan chawhmeh rim ang a nam ziah" a ti kher a, Zorama a sawina tih hriain, "A awihawm loh e...zana kan ţhianho eitur ka hisap tel a nih kha" ti mah ila, "Ţhenawm ni mual mual-a bak a ni lo ang. A patea a awm lehnghal a ni lawm ni? Chawhmeh i suah ziah chuan a patea uihlit nasa lutuk hi a sawrbawk haw vek ang tih a hlauhawm" a la ti tlat a, a awki a ngeiawm si, a nuihdan lahin awmzia a nei bawk si, keichuan u Bawiha ka hmaizah ve deuh a, hre vek pawh nise u te hriat laia sawi lang lang reng chu a nuam miah lo. 

"Tukin hi i va hlim hawr hawr ve a? Dawnfuha i ngai dawn lo tawp a nih hi" ka tih chuan, "Hlim ang chu, i pu pawhin thil tlem a ei ve thei a, Holrick pawh a in ve kha" a ti a, ka lo ner nang nang mai. "Horlicks ti ve mai ta che. A vankai chaw te a lo ni ange aw" ka tih veleh, "Lalremmawi, thil ni lo lo sawi ziah suh. Vankai chaw tih tur a la ni lo reng reng" a ti nghal a, "Aww...damlo thil ei ţha thei loin an ei ve ţeuh a an thih leh si hian vankai chaw an ti" ka tih chuan, "A vankai chaw a ni lo ka tia lawm. Ka pa te chu a chhel emai, i pi a ngaihtuah vang ringawt pawhin a thi mai mai lo ang" a ti pang pang a, "Sangha chhumah khan in chil a per lut ţeuh tawh ang" lo tiin u Bawiha a nui hawk hawk a, Dawnfuha chu chhaih zawm lehin ka nu'n, "Nimin tlaia i hmarcha rawtah khan purun var telh rawh, hmarcha hlang tawp ai chuan a tui hrim hrim" a ti leh daih a, a thu lo zawk na na na chuan purun var ka kheh ve leh mai a, tum bura Sangkhuma rawn lut pawh chu ka lo uksak teh chiam lo. 

"Remkalam" tih pahin ka purun var khehna bulah a rawn ţhu a, "Ka kheh sa kha lo rawt teh" ka tih chuan, "I va ninawm e aw...thil hrilh ve dawn che pawhin tih tur min hrilh hmasa ve ziah. Kalvari leh Remmawii hi chu min chhawr dan phet an ngaihtuah a, chau mah ila chau lo ah min ngai bik zel" a ti a, a phun hrep a, a rawt tho sia. A zawh hnuah, "Kha la rawh, Fawnvela a inherh" tih pahin ka bulah bawk a rawn ţhu leh a, "Awii...what a very crack a ni maw?" fiamthu a ka tih chuan, "Nizanah a kawng a herh alawm. Pi Zioni fanu kan rim har awm e" a ti nang nang a, "Nizanah kawng herh khawp khawpin ka awm ve loh laiin eng nge in tih? Amah Fawnvela ber chu duh lam lam hawi zawngin in tuai vir kual em ni?" ka tih chuan, "Kei aia a len daih hi, ka tuai vir zo lo rapthlak. Ka pi Binladari dawr aţangin pangngai deuhin kan haw a, tukin a an in a ka kal chu 'ka kawng ka herh' a lo ti, a kal ţuang ţuang mai, nau nei zo hlim a ang lutuk" a ti a, a nui deuh chu ka en veleh a tum leh hmuk a, "A mu herh nge rit a chawi herh pawh a hre lo. Ka kal lai khan a chhungte an awm vek a, a ţawng ţha thei lo lui vel a, mitmeng chau deuh chungin varak kalin a kal" a tih leh te te hnuah zawitein, "Pi Zioni fanu chu nangman min rimpui mai rawh aw" a ti a, ka beng bulah a rawn phun sur sur bawk si a, ka nu'n, "C. Sangkhum, thil ţha lo te kha i lo sawipui ang e aw, mipa leh hmeichhia in in ang lo tih hrereng rawh" a lo ti nghal a, "Kan ţhianho chu kan inang tlang vek. Hmeichhia leh mipa nih kan fawm vek aw...bakah thil ţha lo ka hrilh lo, ka hmalam hun tur ka relpui anih hi. Nu Nempachang, mo i nei hnai lo ang tih a sawi theih miah lo a nia aw...Remkalami nen a kan zei viau chuan nupui ka nei vat dawn" Sangkhuman a ti duah a, "Bialnu i neih dawn apiangin 'nupui ka nei dawn' i tia, i duh leh lo zel. Mipa lerh zia a nia, bialnu neih duah, lawr kual duah kha. Nang hi chu a hrechiang tu che apiangin makpa atan an awt lo ang che" ka nu'n a lo ti daih a, "Chutiang vel ka sim theih dan tur chu a rukin kan sawi mek. Min lo tibuai tawh suh nu Nempachang, mawza uih hmingthang nu" Sangkhuman a tih chuan keimah zawk ka lo nui duai a, "I mawza uih hi chu a lar ve ngawt mai. Indonaah te khan lo hmang tak tak se chu zirlaibuah i hming a chuang ve kalh mai tur a nia. I thlalak an edit ang a, i mawza khawng deuh chungah khan an din tir va va che ang a" ka ti fiamthu a, ka nu nui ţha duh lo thinrim der vel hmel chu hmuhnawm tak a ni. 

"Remkalam, pi Zioni fanu chu min rimpui rawh, ka hel ka hel chhung hian bialpa dang a lo nei daih ange aw, Msa te an keu ve vung a, an vak tam si, 'u Remkalami theihngilh nan a nula rim tur awm se aw' a tih a tih kha" Sangkhuman a tih leh takah chuan, "Ka hman lo, naktukah Kalvari te an haw dawn a zanin chu inthlahna te kan siam ve ang chu. Zingkarah kan khua aţangin an chhuak leh daih dawn a sin" ka ti hlak hlak a, "Zanin kha chu ka hria, nizanah kan sawi vek tawh. Eitur siamtuah Sangbollywoodi kan ruat. Naktuk zan a nia ka sawi, Fawnvela hner hnur saw nak zanah pawh a kawng herh a la dam mai dawn lo. Min rimpui mai loh chu duhthlan tur i nei lo. Ka ring ang che aw...aw Remkalam" a ti tet tet a, Sangkhuma vei nei hi chu a va han ninawm tak. 

"Pi Zioni hlauhawmzia i sawi chamchi a ni lo'm ni?" ka tih chuan, "Hlau viau mah ila a fanu ka duh tho sia lawm. Ngaihtuah la, nupui pasal neih lam in awn vek tawh hnu, rilru na deuh deuh a in awm hnua in neih leh tawh zawk hnuah pawh ngaihzawng mumal ka la neih ve miah loh hi. In rualin ka kum a upa ve zel tho tih hre ta che u. Pi Zioni fanu hi ka bialnu nghet atan ka hual hmak, a chhungte saw chu tihdan ka ngaihtuah mai ang. U Lalhuma pawh u Kulhi nuin 'lo len a tum leh chuan kawngkapuiah thang ka kam ang' a tia a leng lui tho alawm. Hmeichhia in tel vein a zia dawn bawk a, Fawnvela in herh chhung chu nangman min rim pui tlauh tlauh ang che" a ti duah a, ka chhan hma hmain, "Naktuk zan a hma lamah" tih leh thawh a rual a, a tlan chhuak zui nghal daih bawk a, han hnial buaina hun a awm tawh lo reng reng. Hei hi a nia Sangkhuma phakharna, a duhzawngah chuan a ngaihtuahawm loh, pi Zioni fanu erawh kei pawhin ka huphurhpui, 'a dawr kal pawh a uten an veng lo chauh' an tih ţhin kha a nia, kan khaw mi chu an neih tir duh ka ring lo. Amah hi tupawn a ţhat zia an sawi a, a chhungte phei chuan ţha an ti lehzual an ti. Va leng ve ngawt ta ila, min lo thehchhuak daih lo ang tih a sawi theih loh. A ute ho hian min zawnchhuak vel ang tih te a hlauhawm. Kan khuaa doctor leh officer lo awm te hi an neih tir duh zawk ngei ngei dawn a, Fawnvelan inherh chunga min zui ngat phei chuan kan chan a chau viau ang. Zorama hi tawk tarh a hman an tum te ka hlau a, ka phal dawn ţhak lo a nia. Pi Zioni fanu, nula khal nalh lutuk tak mai hian a lo ngaihzawn daih ka hlau. Mahse, Zorama hi chu ka ţhiante hian, "Hmeichhe dangin ngaihzawn tum se chu 'ka peih lo' a ti zel ang" an ti ţhin a, a ngaihţhatthlak ve hrim hrim. 

"Sangkhuma ţawng chhungin i u Bawihan Dawnfuha a lo hruaichhuak leh hman a, i pa lo haw se chaw ei tawh ila ka ti a sin le" ka nu'n a ti nang nang a, ka pa chu a lo haw thuai reng a, ani pawhin, "Khawiah nge Dawnfuha?" a rawn ti ve nghal a, u Rinchuta inthlahrungin ka kutah bik a dah nain midangin an lawm hlauh a, ka buai ve a ngaih loh phah a, a zia tak tak a ni. 

Tukţhuan te kan ei fel hnuah u Bawiha bawkin Dawnfuha a hruai chhuak leh a, ka rilruah sangha rep chhum ringawt a awm ve thung. Ka nu te awm laia va suah ka hreh zo vek tawh lehnghal a, a tawpah Zorama ka be ta ringawt a, ani lahin, "Sangha rep ka chhum a" ka tih rualin, "A va tui dawn ve" a rawn ti nghal ringawt bawk. "I rawn haw hun kher nghak loin tunah inah ka lo va dah phei mai ang aw, tlaia mi tur chawhmeh dang siam leh ka la ngai" ka ti nghal zung zung a, ka nu ten min chhaih loh nan an awm loh laia suah ka duh vang a ni reng sia, min rawn rim hi chu a zia, thildang lehzel chu hre lo se, chawhmeh pawh an hriatah chuan ka nu'n min tirh hian suah lang ila, a dang chu a rukin, an hriat vek hian nula tan chuan a zahthlak ve duh ţhin emai. 

"Umm...ka patea a awm. Mahse, ngati nge? Min lo nghak la" a rawn tih chuan, "Zanah inthlahna kan nei dawn a ka hmanhmawh alawm" ka ti daih a, a la hma viau nain a awih tho aniang, "Aw le...ka rawn be leh ang che" a ti a, a dah daih a, a buai deuh a ni maithei. 

Sangha rep chhum khai ru ţat ţat chungin a in lamah ka phei a, ka chhungte tumah ka tawk lo. Kawngka ka kik karh karh hnuah pa Hmunan a rawn hawng a, a thawhna a la rei loh hmel viau nain ka hmel a hmu chiah chu a nui hmel hmuh tur a awm nghal a, "Ehe...ka lo beisei reng reng hleinem che. Eng nge ni ta? Lo lut teh lo lut teh" a ti nghal luam a, ka luh lai te chuan ka darah lo dawmin a khua a har viau tak tak aniang a lo lawm thiam lehpek emai. 

"Sangha rep chhum ka rawn suah dawn cheu a, tlai lama in hmeh atan a ni mai" ka ti tlang nghal a, chaw a lo la ei loh palh takin Zorama ei ve hmaa a lo ei ka hlau. "I va ti lawmawm ţhin ve...nang hi chu thla i ti muang mange aw. Thingpui ka'n lumsak ang che aw" a lo ti ve zung zung a, ka hnial hmain bel a ban bawk si, "Aw...a pawi lo" ti ve maiin bel lian vak lo ka la a, sangha ka ruah fel hnuah dawhkana kiu nghatin ka ţhu a, "Partein, 'Zorama awmna khua chu a nuam tak tak a ni' a ti fo a, a lo nuam viau mai bawk a, chhunah a khawharthlak e tih a ni mai" a ti a, a nui huk huk a, "A reh tawh lo zawk a nih hi. Kan naupanlai phei chuan chhunah nu leh pate an feh vek zel a, sikul chawlhin naupangin in kan nghak a, kan infiam lah khan nin chin kan nei a, tunah chuan khawdang aţanga lo pem te an tam ve tawh a, a la thingtlan tho rualin kan khua hi a thingtlang lutuk tawh bik lo" ka ti duah a, kan khua hi chu miin an sawichhiat ka hlau thei a nia, thingtlang nula thlavang ka hauh na ţhin hle bawk. 

"Lo la thingtlang deuh pawh ni se a mi chengte in tuai purh tho alawm tiraw?" ti a nui pah hawk hawk chung hian ka hnungah a beng thuk a, rang deuhin a kut a la sawn leh nghal a, "Kan khua hi a boruak a ţha lo an ti ţhin a, mahse ngeih leh ngeih lo aniang, naupanlai aţangin kan awm a, hrehawm ka la ti chhin ngai lo" lo ti vein kan nui dun hak hak a, "Thingpui ka va siam lawk ange" tih leh thawh a rual a, a kal chiah chu ka thaw huai mai. A mi uap a nain tlang taka sawi chuan a bula awm nuam ka ti lem lo, Zorama patea a nih vang chauh a ţhat chhuah ka ni. Thil a inti hre si, nin chin a thlen hnuah Zorama awm loh hlan hian kan lo la inhau thinrim ang tih te a hlauhawm. 

"Kurtai a awm tho bawk a ka thlum lo mai" tiin thingpui min pek rualin kurtai min chhawp sak tel a, "I hman veleh khawchhung chu min fanpui ang che aw" a ti leh tawh. "Nia...ka pu a damlo a ka buai rih a" ka lo ti mai a, ka kurtai lak sa ka thlauh leh chuan, "Thingpui kha a la sa ang" tiin ka chhar hmain min chhar sak a, hmeichhia a ngaihsak dan hi amah engahmah ngai lo tu tan chuan a tenawm duh dawn a nih hi. "Nupui i nei tawh em?" ka ti ta tawp a, "Nei ve tawh ţhin e...min boralsan tawh a" a ti a, sawi nuam a ni dawn lo tih hriain ka sawi zui pui lo. A chanchin erawh ka zawh hma hian ka hre nual tawh tho. 

"Vawiin chu leng ve reng la, Huma nen tlawnga awm chu mut a chhuak duh emai" a ti leh hlut a, "Ngawi rawh ka hman lo, zanah inthlahna kan nei dawn a, tlaia buai ngai loin chawhmeh siam lawk ka duh" ka ti a, thingpui ka inzawh hnuah a inzawh ve hun ka nghak a, thingpui inna em han sil loh chu nuam ka ti lo. A inzawh rualin a no ka ban nghal a, "Keiman ka lo ti ang e" tih paha a rawn ban ve chuan ka kut zawk a hum daih a, "Khawi, keiman ka lo sil zung zung ang, ka haw nghal duh sia" ka ti a, na deuhin ka pawt zui nghal a, no ka sil lai te chuan min lo be rengin a rul tawk bakin ka chhang lo thung. 

Ka haw dawnah, "Duh leh zanah Zorama ka lo zui ve dawn nia, kei tak phei chuan i nu leh pate ka kawmngeih zawk ngei ang a" a ti a, Zorama a lo len dawn leh dawn loh hre lo mah ila, "Lo kal ve rawh, naktuka kan ţhiannu haw tur kan thlah dawn a, kan in hriat nan a ni mai" ka ti mawi ve a, "A nih aw" ti a a kut a han vei chiah chu a no riauin ka hria a, a din kawihsawih dan te lah chu hmeichhia ang mai a ni. "Eng nge awmzia?" ka tih ruala, "Engmaw?" a lo tih chuan chhang lem loin ka lu ka thing a, "Zanin chu aw" ka ti leh a, a bu nghat a, a tep zui chap a, a ţawng vel a no mang si lo a, ka haw tur min thlah hian a no riau zel. Rinhlelh tur tingin kan lam panin tlangval pahnih an lo kal a, hnathawh kawr an ha bawk. Kan zawn an thlen ruala pa Hmuna ding danglam, a bawp lehlam zawk a rawn dah chhuak te chu ka hmu ru reng a, "I nu leh pate hi an fel nen thil pek tur kan nei mang bawk si lo a, Zorama an ngaihtuah bawk si, ka haw hunah Kolasib aţangin thil ţha deuh ka lo thawn dawn nia" mipa aw diktak, no miah lo a a tih leh te chuan chhang lo vin ka lu ka bu zeuh zeuh reng ringawt a, hmanni khan ka lo chik em em hran lo a, a aw leh a chezia hi a in supported lo reng reng. 

"A nih aw pa Hmun" ka tih veleh a hma ang bawk khan a kut a vai leh a, nuihzatthlak lamah a kal tawh zawk. A palianin a sa a ţha bawk si, a khat nulh lehnghal a, no deuha a ban a han vai chiah chu nuih loh har tak a ni. Nupuite a lo nei ve tawh a a ţha tho alawm ti rilruin ka inher rualin ka nui vur vur a, tlangval pahnih a hmuh laia a awmdan te kha a dik lo reng reng, chaw helh a ang. 

Inchhung ka luh veleh ka sangha rep chhum suahna bur ka sil nghal a, Kalvari lo lut ve chu biak pawh be hmasa lo vin ka lo nui duai a, "Awii..my friend, what a funny thing" ka tih chuan a hawi â nasa khawp mai. "Ka hmai a mang em ni?" tih pahin a hmai a dap a, banga darthlalang intar lam pan nghalin a in en nasa viau bawk. "Ka hmaiah engmah a kai loh hi" a tih chuan, "I hmaia thil kai lam a ni lo, u Zorama patea kha a lerh kan ring ve em em a a no lutuk, a hma khan min khawih thuak thuak kha mak ka tia min thlah khan ka enchiang duh lo a, nichin lawka ka haw tur min thlah chu e...a no lutuk kha aw haw wow a ni ringawt" ka ti bawrh bawrh a, ka nui pah reng bawk a, mitthlaah a cham reng mai. 

"Ehe...a va mak ve" a ti ban charh a, tlangval pahnih a hmuh laia a awmdan ka sawi phei chu a nui uar uar mai. "Mahse i ţawngkam fimkhur rawh aw, eng mi pawh nise u Zorama patea tho a nia, a hmangaih dawn tih hrereng rawh. U Rinchuta ang chi tho a nia, u Rinchuta pawh a ţawngtam lo a chut kan ti kan tia, a bulah thil kan sawi bawrh bawrh a engkim a hrethiam vek tho. U Zorama pawh hian a hrethiam dawn lutuk, a patea phei chu naupanlai aţanga a hriat tawh a nia, hre turin a duh rih lo che a a sawi lo a ni mai. Thil sawi nuam tak a ni dawn lo bawk a" a ti ve bawrh bawrh a, "U Bawihan kan in lamah naupang a buaipui a ka lo phei zuai a nih hi. Fawnvelan ka kawng ka herh a ti lehnghal a, engtik laiin nge maw a lo inherh ni? Ka pi Binladarin 'sawi deuhin mu mum tul se a ni mai alawm' a tih kha. Fithangin min rawn bia a, chhan pawh ka chhang ţha mai lo, amah a insawithiamna bak a ni ngai lo, Fawnvela hi laktlak loh viau mah se an inneih lai kha chuan theihtawpin hna a thawk a, eizawnna tur a dap ve ruai tho a, laktlak loh tawp anga a chhuah hi ka duh miah lo" a tih leh chuan, "Laktlak loh tawp angin a chhuah maw?" ti a zawh pahin a ţhutna lamah ka phei a, a bulah ka ţhu chat bawk. 

"I la hre nange? Kolasib ah u Rinchuta te nen an inţhenawm kha. Fithangin a sawi dan chu hre tak ka ni, a pasal hlui a nih vang maiin a sawichhe vak vak tur a ni kher lo a, ţhenawm khawvengte chuan laktlak loh deuh angin an hre vek. Hei vang hian alawm Fithangi ka biak ţhat peih miah loh, an inneih rei ve tehreng nen" a ti hlak hlak a, "Ngati nge chutianga a lo sawi ve ngawt? Keimah zawk hian ka be dawn mawni? A tlan hlimah pawh koh leh a beisei a, ngaihzawng a neih avangin Fawnvelan a duh tawh lo a nih kha. Kolasib a in ţhenawm khawvengte bulah chuan sawi ve vek thei ila ka va ti tak, nangmah hian sawi ve vek teh" duhthaw zeta ka tih chuan, "Ka tan chutiang a sawi a mawi hleinem, a hmingin pastor nupui ka nih ve hi. U Rinchuta mualpho hlau lo ila chu ka sawi vek tawh ang" a ti a, a thin a rim hmel tak tak khawp mai. "Sangkhuma leh Fawnvela te chu an puitling lo a, an naupangchhia sa mai bakah an ti lui tel ţhin a, thutak em em an pai lo chung hian laktlak loh ti a sawi tur an ni hlawl lo. Sangkhuman pheikhawk a siam char char a, Fawnvela te phei chuan thing hralh tur an phurh loh leh sachek an zuar a, a youtube channel aţangin pawisa a la lut tawh bawk a, an laktlak ve ve chiang emai" ka ti hlaih hlaih a, ka thusawi chu min pawmpui zia tih lan nan, "A dik a dik" tih pahin a bu nghat nghat reng a, sawi ve na hun a neih veleh, "Fithangi zawk hi ka hmuh dan a dik tawh lo. A inthiam lo nge pawh ka hre lo min rawn be ziah a ka chhang ţha peih ngai lo. Hna an thawh nasatzia hriatpuitu kan nia, laktlak loh a ti kha chu ka rilru a na tak tak alawm. Hna lo thawk nasa vak lo pawh nise laktlak loh tih tur an ni chuang lo tiraw?" a tih chuan, "Ni chuang nang...keimahni hian an bulah 'i laktlak loh si' ti ila a tawk chiah. Hetianga kan tih pawh hian rilru tak takin kan ti ngai lo a nia, laktlak loh deuh anga a lo chhuah chu ka ngei hle mai. Diktak chuan an fel lutuk zawk" ka ti a, "Ţhianţha hi chu ralthuam engmah nei lo mah ila kan thlavang inhauh tawn sak tlat ila, hei hi kan chakna leh mawina ber a ni mai" a tih chuan, "What a very supported" ka lo ti a. 

Kan ţhianho hi chuan mi neih ang apiang kan nei thei ve lo a, mi hausa fa tumah kan awm loh laiin kan nun a hausa thung a, keini ho chu inhauin insawisel bawi bawi ţhin mah ila midangin kan ţhian zinga pakhat lek pawh a sawisel chuan kan thlavang kan inhauh tawn sak a, kan vaiin kan ţang khawm ţhin. Kan insawisel ţhinna ţawngkam hi midangin an hman ve kan remti lo a, kan innuihsawh ţhin naah midangin min nuihsawh ve a thiang lo. Lunghlu man tam tak tak nei pha ve lo mah ila kan inţhianţhatna hi lunghlu aiin a hlu kan ti zawk. 

"Kan haw phawt ang a, ka pu hi a zual leh deuh chuan keimahin ka lo kal tawh ang. Naupang nen chuan a buaithlak a, Sensiari te an rawn haw ang a Kolasib ah an awm rih dawn a, ka lo kal leh a nih chuan Kolasib ah Sensiari bulah ka dah vek ang" Kalvari in a tih leh takah chuan, "Lo kal leh la ka ti, mah se i pu a zual vang ni lo se la, pastor nupui i nih vang hian zin chhuah i harsat a a buaithlak tak tak a ni" ka ti a, Zorama bawk sawi lehin, "Nizan a lo leng chu a haw dawnah a mit a siai vel a nia aw, a nui hmel hi a dam bik e tiraw? Heti ang tak a duh hi ka neih leh theih ka ring lo reng reng" phur zeta ka tih chuan, "A nuih hian a zaidam hmel lehzual alawm. Tupawn hmu se zaidam hmel an ti vek ang, pawi a sawi loh hmel ngawih ngawih a, pastor ni ve thei ngat se chu u Rinchuta ai pawhin a inhmeh ka ti zawk ang" a ti chho ţan a, "'U Rinchutan sakramen a hak' an tih kha tak tak em ni?" ka ti ve thung a, "Teuh lo mai...chutiang em em a che zei lo a ni bik lo. Biakin chhungah chuan eng programme pawh nise a bu ang thlap a ni mai. U Zorama pawh hi a ni tho ang, 'nula an chhai zei lo deuh e' tih a ni mai" a ti a, kan nui dun har har reng a, "Ka thin ka tih nat der luih ţum te khan min paw ve ringawt a, rit min ti leh sia, kawng laklawhah min chhuk tir" ka ti a, kan thawm chu ţha tak a ni. 

"U Bawihan 'zanah pawh naupang chu ka awmpui thei ang' a ti bawk a keimahin ka lo phei leh ang. Naupang tel loin inthlahna kan nei ham ham dawn nia, u Bawiha bula an awm chu ka ngaihtuah lo" a ti a, a haw hmaa vawk chaw chhum lawk a duh vangin min phei san a, zai rat rat chung hian chawhmeh ka siam a, chow pack tam deuh nen a Sangbollywoodi lo lut chu ka lo en tawp. Pawisa min dil ka rin nen dawhkana a dah hnuk hnuah, "Ka nu lei sa vek a nih hi" a ti a, a kawr banah chuan lace invet kualin a uai hnuang bawk a, vai ho hian an film engemaw berah chantir ve se ka ti ţhin. 

"I nu'n a hrechhuak anga ba min ţhing leh si ange aw" ka tih chuan, "A hrechhuak lo chiang viau ang ka nau damdawiinah a awmpui. Purun leh tel chu nangmahni'n thawh ve tawh ru. U Kalvari fate ngun tur ka lei a, u Bawiha bulah an awm bawk a ka va pe teh ang" tih pahin phur deuhin a sam a tuai thuak thuak a, a hmai lah chu tle sep sepin amah chu a par chheng a ni tawp mai. 

"In monu ka ni lo ang tih pawh a sawi theih loh a nia aw u Remkalam, mipa chu hmeichhe zei zei zunah an uai an tih ţhin kha, monu enin min en tawp ru" a tih hnuah, "A nih aw...Msa tan love you chuk" ti leh lang langin nui har har chungin a tlanchhuak a, "U Bawiha hi a rin ang a ni dawn mang si lo a aw" ti vang vangin kawngka biang ngheng chung meuhin ka thlir zui vang vang a, hringnun nawm lai tak a hmang ve mek a, a hman sual loh nan veng tlat ila a ţha ang. 

Zanah u Bawiha hnenah, "Sangbollywoodin chhunah khan a rawn hmu che em?" ka ti a, a ngawih vang vang hnua, "Jalebi min ei luih tir ţeuh" a tih chuan ka nu pawh a nui ve nasa. "Duh tawh loh hnuah pawh 'ei rawh ei rawh' a tia, a barhin min barh a, hahthlak bet bet tak a ni" tiin u Bawiha pawh za lo deuhin a nui ve suk suk a, "Nutei a lo haw tawh em?" a tih leh takah chuan, "Lo la haw lo, kan inbe ringawt. Chhunah khan Sangkhuma pheikhawk a siampui a, a lo haw ţep ang" ka ti a, "An unau hi mi fate aiin an luhlul a" a ti ve a, tihngaihna vak a hre bik lo. 

Kalvari fate buaipui tura u Bawiha chhuah hnu lawkah ka ţhiante lo kal khawmin Nutei pawh a lo haw. U Lianpuiin thil a thawn chu ka lo pe nghal a, tshirt lianpui pahnih niin a mawi zia sawiin kan lo fak liam liam a, Msa chu Kalvari nen an la in nel ve vak lo nain an inbe ve reng tho. 

"U Bawiha awm ve se ţha tur, Msa hi chu a ţha nghahna extra class mai mai a nia" a chow chhum vil chungin Sangbollywoodin a ti leh tawh a, Zorama pawhin, "In awm em?" a rawn ti ve dut mai. Pa Hmuna pawhin rawn zui vein ka nu leh pate nen an phul hlut a, an inchibai lawp lawp bawk a, an hriat ka hlauh tehreng nen Zoraman inti bengvar tawkin, "Nu Nemte, in sangha rep chhum min suah kha a hang tui khawp mai" a ti heu mai. Rum deuha ka melh laiin nui chungin ka lam a rawn hawi a, ka nu leh pate phei chu ka en ngam lo hrim hrim. "Remkalami hian chawhmeh min suah a peih a a fel a nia" a la ti zui a, ka nu lahin, "Ani hi chu a beng a var ve a" awmze nei deuhin a ti vel a, ka bula Zorama rawn ţhu chu lo hauh hrep mai ka duh rum rum hial a ni. 

"Kalvari, engtikah nge i lo zin leh theih ang?" tih pahin dawhkanah a hmehen a dah a, "Ka hre lo le...ka pu dinhmun a zir a ni tawh mai" a tih chuan, "Umm...lo zin lo vang vang tawh la a ţha ang" a ti mawl leh tawp a, pawisawi loh hmel deuhin min la en kher zui. "I ti ang lo e...a lo zin ve bawk ang chu mawle. Khati lo deuh te khan chhang ve ta che" ka tih chuan, "Engtin?" a lo ti he haw a, "Awi ha my friend, kau Zoa hi ka paih daih chak" ka ti chu an nui dar dar mai. 

"U Zoram, ka kawng ka herh tih i hria em?" Fawnvelan a tih chuan, "Hre lem lo...i kal ţuang ţuang kha chu ka hmu che" a ti ban charh a, "Na tak a ni ringawt, ka nu lahin a awih lo a tui min khai luih tir vel a, 'i sachek hawp beisei' te min ti mawle" a tih laiin u Lalhuma leh pu Taipuia te pawh an rawn inzui lut ve a, ser an keng ve ve. 

"I pi te in lamah i awm si lo a, naktuk i haw dawn sia kan tia ser rawn pek ve che kan tum a" pu Taipuia zawkin a ti a, Zorama an hmuh chuan, "Kan principal pawh a lo awm a nih hi. Miin fel an ti emai che fa kan neih thlengin thawk la a ţha ang, kan fate ho pawh zirtir vek la" a ti leh luam a, "Nau in pai tawh em ni? A va lawmawm ve" Zoraman a tih chuan, "A la pai ţeng ţung lo" pu Taipuian a ti hmuk a, "Nau an pai emaw an tia damdawiinah an kal a, doctor in 'chaw hlir a la awm rih' a lo ti" tiin u Lalhuma a nui hawk hawk a, anni pahnih pawh hi inhau reng, insawichhe tawn reng, inthlah thei miah lo an nia, an upat tawh nen an hahthlak tak tak a ni. 

"In la pai ve mai ang, in fate pawh ka zirtir hman maithei a sin" tiin a dam zawngin a lo laksak a, a la upat bik loh nen fel ka ti ţhin. "In lamah Remkalamin zirtir ve thung se" tiin ka sam a rawn beng phe leh vawk a, "Awi awi awi...what a very tih bak an thiam lo ang" pu Taipuian ti ve ngeiin Fawnvela inherh an buaipui zui a, midang hmuh loh laiin Zoraman min ţhut hnaih sauh ve thung a, "Nu upa lam tawhin hei hi a rawn zuar a" tiin a rukin thil min pe a, ka kutah a hmeh bel chawt chawt a ni ber, "Ka patea nen kan lo kal si, inpekna hun a awm loh takin" a ti leh a, ka en chiang chu bengbeh a lo ni, pi Phali zawrh a nih ka ring nghal. 

"A rawn zuar tu pi Phali kha a uikawm teh mai a nia, a hming a pu zo lo lutuk" tih pahin dawhkan hnuaia a ruka min pek si kha dawhkanah ka dah chhuak a, "A nalh ţhaks, Pathianni ah bak ka beh lo ang, awmhmun a beh atan chuan a uiawm emai" ka ti a, rangkachak rawng a ni lo hlauh a, rangkachak rawng hi chu a tak tak a nih loh phei chuan a rawng a tlakin a buaithlak. Tuna mi pawh hi silver a ni a, silver tak tak ni lo mah se ka duhzawng ang lo lei ve nachang a hria chu ka lawm em em tho. 

"Hna ka thawk ţan chauh a, hlawh tam deuh ka neih hunah kartluana a indawt a beh turin kan lei dawn nia" a ti ve duah a, nu leh pa ti buai duh lo chi a nia, vawikhat chu ka zawt tawh, 'ka zir chhung zawngin min chawm tawh a' a ti ve tlat a, a hausak hun hi kan nghakhlel dun em em mai a ni. 

"U Remkalam, in ţhu mai mai bik a, u Zochhura nen khan purun leh hmarcha hi bathlarah va deng rawh u...ehem" Sangbollywoodin a tih rualin bengbeh chu ka hum bo a, midang chuan min ngaihven hran lo. Ka nu leh pate leh pa Hmuna lah tv enin an ti ti a, kan ri bawrh bawrh hlawm tawp mai a ni. Hmarcha rawt thleng tung ut leh suk min pein, hmarcha mal sa leh purun zai sa min pe tel bawk a, kan chhuak tur Kalvari in, "Puih in ngai em?" a rawn tih chuan, "Ngai lo" ka ti vat a, ka chhang rang nasa. 

Pawn a kan chhuah rualin Zorama hnenah, "Sangha kha i sawi kher a, min ti zak alawm" ka ti nghal a, a ruka ka suah kher chhan chu ka sawi chuang lo, suk hum ran chung hian, "A ho em kha..lawmthu ka sawi thiam lo zawk a" a ti ban charh a, ka hauh zawm ta lo mai. Hmarcha rawt thleng chu ka ke a chep betin suk chu ka chhuh sak a, "Keiman ka lo ti ang" tih leh min chhuh let a rual a, inchhung lam thawm lah a ţha dar darin a bula ţhut pah chuan, "Bengbeh hi i lo lei duh kher a, hlawh lak hun a la ni mang si lo" ka ti a, ka en ţhin, mawi ka tiin ka lawm tho bawk si. 

"Ka hausak hunah phei chuan thawhţan aţanga Pathianni thleng, ni indawt dana i beh tur ka leisak ang che" nui chung hian a ti a, naupang buaipui ngai chin an tam bawk nen a rethei ve rih em a ni. "Ka lei ve thei reng, Lady Dianas Inn te pawn min lo thawn ţhin alawm. Nei lo chung chung chuan lo lei tawh suh" ka ti nang nang a, "Mahse ka lawm teh mai a nia" a lam hawi pah hian ka ti a, min en lo mah se a nui a ni tih ka hmu thei tho. 

"Pathianniah bak ka beh dawn lo reng reng" ka tih leh chuan a thil tih lai chu chawlhsanin ka lam a lo hawi a, "I sumdawnna a tluang em? Dawr i ti tawp a, engtin nge ni zel dawn?" tiin thutak zet hian min zawt a, "Ka pu a ziaawm chho bawk a aieng ka siam leh tawh ang. Dawr hi ti tawp ila pawisa ka khawl thei zawk ang" ka tih chuan, "Puih che ka duh a, puih dan che ka hre si lo" zawi te hian a lo ti a, hrehawm a tih hmel ve deuhin ka hria, "Aieng min siampui la a tawk mai" nui chung hian ka ti ve thung a, "Hna kan thawk dun ang a, pawisa kan tuak dun ţauh ţauh ang a, kan la hausa dun dawn nia" a ti ringawt te chuan thla a ti muang a, duh duh kan la lei thei lo ringawt te hi lehlamah chuan a nuam letling a, kan lei theih ang ang hi kan hlut phah ţhin. Thil ho deuh deuh kan intih sak tawn a, kan dah ţha ve char char zel tho. Mi hausa lutuk a ni bik lo te hi kan in an lehna a nia, ani pawh a pa'n a thawk a, chuzawng chu a ni ve mai a, tunah chhungte tihbuai a duh tawh loh vangin a inren lehzual a, chuti chung chunga thil min leisak ang hi chu a chhiat hnuah pawh ka dah ţha zel tho ang ka ring. 

A nih tum leh chak ber a la ni thei lo a, keiin eizawnna fumfe tak ka la nei lo bawk a, ani pawhin, "Kan duh anga kan la awm thei lo te hi a ţha, kan infuih tawn thei a, thil chu a eng zawnga thlir zel tur" a ti ve chiah reng a, "Lerh design a mi kan biak loh chhung chu sawisel tur ka hre rih lo" a ti fiamthu a, kan han nui dun leh rih ţhin, thla eng te chu a tak tel loin min awrh tir nawlh ni maiin ka hria. 

Inchhung a kan lut chu ka nute pawh an lo la ti ti tuiin midang pawh an lo la ri bawrh bawrh hlawm a, Sangbollywoodi hnena rawt thleng leh suk kan pek let hnuah kan ţhutna ngai bawkah ţhu lehin midang chu kan ngaihven ve ta deuh a, "Sangkhum, pi Zioni fanu i ti reng ringawt mai ka kham lutuk. Pu Taipuia pawn nupui a nei a a sawi a sawi lo" Kalvari in vin zeta a tih chuan pu Taipuian, "Ka sawi peih tawh lo zawk a nih hi" ngui bur hian a lo ti a, "Chupawh nise naktukah kan haw dawn a min ngai lo. Fawnvela lah a lo inherh a" a tih leh chuan, "Ngai chung chung chein alawm ka inherh ni" Fawnvelan a lo ti ve thuai a, "Kan ti vat vat ang, Kalvari tel lo chuan a fate an mu thei lo ang" tiin Sangbollywoodi pawh thuk bulah ţhuin a buai ve khawp mai. 

"Pi Zioni fanu aiin ka ngai daih zawk che mah se rim kha a pawimawh ve a" Sangkhuman a tih chuan, "Sangkhuma hi a lerh ve maw" Nutein a lo ti leh tawh a, "Keichu ka hringnun hi a chuai rup, broken hearted te hringnun ah hian ni a sa ve thei ngai lo" Msan a tih ve chuan kan nui dar dar a, u Lalhuma ten amah hrim hrim chu an lawm phian lehnghal. 

"Pi Zioni fanuin Sangkhuma a duh ve chuan remchang hmasaber ah ka lo zin leh ang. Ka pi Binladari vawk a rukin kan talh dawn nia" Kalvari pawhin ti fiamthuin a haw peih loh zia a sawi zui a, "U Rinchuta ngai ve deuh tawh lo ila chu ka peih lo zual ngawt ang" a ti thul, "Nitin zantin ka pu bulah ka awm a tunah chuan ka rilru a nuam tawh. Ziaawm lam a pan tih ka hmu thei a, ngaihtuah viau mah ila ka thla a muang ve deuh" a tih leh chuan, "Ekhai...ngaihtuah reng reng suh, ngaihtuah tu tur kan tam em hi. Eng emaw a nih chuan kan rawn hrilh vat ang che. A nih lem loh chuan i tan pawh lo haw reng a buaithlak, a hla tham si" u Lalhuman a lo ti ve ngei a, u Lalhuma ten min chhaih lo a min ţawng thlamuan ve chuan min ngaihtuah tawpkhawk tihna a ni mai, an ti tak tak zel bawk. 

Sangbollywoodi chow rawn sem chu kan ei a, a sa viau nain zan boruak daiah chuan a tui tawk. Ani lah a intitheiin min vil deuh chawt a, ka bulah Zorama a awm ran bawk si, tupawh lo kal se ka hlau lo ang, chutiang khawp chuan ka thla a muang a ni. Hei hi a nia kan nun a nawm em em ţhinna chu, harsatna tawk mah ila kan inthlamuan tawn thei zel a, 'i tan ka awm reng' ti fo lo mah ila kan awm reng tho a ni tih chetzia in kan lantir mai ţhin. Ka han vui ve dawn te hian ka hnaiha awm te vang hian ka vanneih zia bawk ka hre thar leh ţhin. 

CONT...