KEIMAH, THINGTLANG NULA (FINAL SEASON) 25

KEIMAH, THINGTLANG NULA (FINAL SEASON) 25

"Kan pahnih chauhin kan va awmdun khat ve le" ka ti hluai a, kawngkhar a inkhar a, tukverh zawng zawng a inhawng huau thung. "Nia, an muhil vek ngai si lo a" a ti fiamthu a, "U Zoram, i bialnu hlui kha i la ngaihtuah ngai em?" ka ti thut chu min rawn en rang nasa. Phawk deuha min enin min kuahna pawh chu a nghet sawtin ka hria. 

"Ngaihtuah ve ngai tho e" a ti ban charh a, "I tleirawl chhuahpui kha a ni ve a tiraw?" ka tih chuan, "A thih vang zawk leh keimah ka indem vang zawk aniang" tiin tlang deuhin min lo hrilh a, "Amah aiin zirlai ka thlang a, BD ka zir duh luatah a nunna a chan a nih kha. Amah kha a nundanin a zir loh vangin a hrehawm zual ve deuh bawk a" tih zawm lehin, "Keipawh ka bialpa hlui a thi ve tawh a sin" ka ti a, "Maski-a a nia, ani phei chu a tualthi alawm. Kan ngaihzawng hluite an thi ve ve tawh a kan inang chiah, keipawhin ka la theihnghilh bik lo, damchhungin an awm reng tawh dawn a nih hi tiraw?" ka tih leh chuan, "Awm reng tawh ang, mitthi tawh an theihnghilh ngawt theih loh" a lo ti ve a, kan in ţhut hnaih tawhin, "A chanchin han sawi teh, a hmelţha em?" ka tih chuan, "Hmelţha e" tiin a nui deuh a, "Nangmah letling thawk a ni mai" a ti chu mak ka ti angreng. Mi chu an ngaihzawngte hian in anna lai eng emaw tak an nei ţhin a nia, duhzawng bik te an nei a, keimah letling thawk a nih chuan a mak viau ang. 

"I dangdai thei bik e...duhzawng bik pawh han neih loh" ka ti hlut a, ngunthluk deuha min lo en vang vang hnua, "Nangmah hi ka duhzawng" a tih chuan sawi tur ka hre mai lo, "Hnathawh hreh neih loh hi a sexy ka tih kha" a ti leh a, "Awii...i ti ang lo e" tih pahin a malchunga a kut dahah chuan ka beng thawk a, "Mi ţhenkhatin a min sawi dan a mak thei si dawt i sawi aniang" ka ti leh a, a bul hnaiha awm te hi fiamthu leh fiamthu lo a ka hming lam reng peih ho an nia, bakah min awm hnaih lutuk a ka lai ve deuh, Sangbollywoodi ang mai ka ni tawh. 

"Dawt a ni lo" tih pahin a lu a thing a, "Nangmah tawp hi ka duhzawng, duh chhan che ka nei hran lo a, chuvang chuan miin engpawh sawi se ka duh lohna chhan tur che sawi tur an nei lo" a tih zawm leh a, "Ka uang mai mai a nih kha, fiamthuin kan inkap vak vak zel alawm. Kan in ang e....kan ngaihzawng hluiten min thihsan ve ve a, kan la hausa lo ve ve bawk a" ka tih chuan, "Pathianin inpui tawn turin min duh aniang" tiin a lo nui suk a, "I bialnu hlui kha a fel em?" ka ti leh a, ka zawh chakna a rei tawh em a, kan inngaihzawn hmaa a chanchin a sawi thuak aţang khan ka la hre chak ngar ngar. 

"Ama tawkah chuan fel ve e...kan la naupang leh zual a, keimah zawk ka ţawng hmasak zel a ngai ţhin a" a tih chuan, "In reh dun awm mange...in awmdun reng lai pawn in reh dawn a nih chu" tiin ka lo nui hak hak a, ka lam lo hawi ran rengin ka sam a khawih leh zeuh ţhin a, "A zia a zawi a, rik bawrh bawrh chang chu a nei ve ţhin. Nangmah letling thawk tih hian a hrilhfiah chiang ber ang" a tih hnu chuan ka zawt zui ta lo a, ama tan pawh sawi a nuam lo ang. 

"Nih leh pastor nih i la tum tlat em?" ka tih chuan, "Tum tlat e...mah se ka nih theih hma chu tuna ka hna hi ţha deuhin ka thawk rih ang" a ti a, ka sam a khawih ruala ka lu ka lo thin chuan a nuih a za a, "In khuaah hian i awm tih chu hria ila ka lo kal vat ang" a ti vel a, sawi tur kan hre lo dun si, "Lo kal ringawt la engmah thawh tur a awm hleinem" ka tih chuan, "Aieng ka zuar mai ang" tiin a nui zui hawk a, "Awii...i over vel e...i zuar thiam dawn lo ropui si" ka ti a, a kut awl lam chuan ka kut rawn vuanin, "I awm naah chuan a rem rem ka thawk tawh mai aniang chu, i awm naah zel ka awm dawn" a ti chu a nuam lutuk a pangpar hlir ka hmuin ka hria. 

"Kan inpuitawn zel ang a, kan la hausa dun dawn nia ka tih kha" tiin ka kut a vawn lai a la kang a, chutah min rawn awm hnaihin a hmuiin ka hmui a rawn ti si zeuh a, inla hrang leh thuaiin ka mitah min en a, phalna hmu niin a inhria aniang ka hmuiah bawk min rawn fawp lehin ka kut chu a awmah a dah a, dim deuhin a rawn vuan leh a, bialpa pahnih lai ka nei ve tawh a, an bulah khan ka thlamuang lo tihna ni loin Zorama bulah hian ka thlamuang riau a, inanna lai kan ngah em avang leh min duh chhan a neih loh vang te pawh a nih ka ring. "I hmelţha e" a tih vang vang awm ka la hre lo a, ka hnathawk nasa hi min fak daih zawk zel a, hnathawh hreh ka nei lo hi a ţhat zia a sawi ngun hle bawk. Hnathawk tur ngawr ngawrin min duh tihna a ni lo a, ka dinhmun a hria a, ka thawk zel dawn tih a hria a, ka zah loh nan min ti phur a ni ber. Chuvang chuan min han fawh te hian ka chhang let vat ţhin, a inla hrang a, muangchanga ka mit ka men rualin tawi tein a lo nui a, rawn kun hniam a rang deuha min fawh leh zauh hnuah a nui chhuak ta hawk thung a, "I ngaihawm si" tiin min pawt hnai a, min han kuah leh hlu hlu a, min thlakhlelh zia tun ang hian a lantir ve fo a, thlamuan loh theih a ni ţhin lo. 

"Miin ka nupui neih hun tur min zawt reng zel a, ka chhungte pawn" a tih chuan, "Kan inngaihzawnna a la rei lo e" ka lo ti a, kan la in vuan ran reng a, awmdun mah ila kan in ngai khawp mai. "Ka la sawi zo lo" a tih hnuah, "Hmeichhe dang an ţha lo e ka tihna ni loin, an ţhain an fel vek, mahse nangmah chiahin nupui neih min ti chak. Miin ka nupui neih hun tur min zawh pawhin ka chhang thei tawh ang" a ti leh a, "Engtik hunah?" ka tih chuan, "Ka sawi duh lo" tiin nui chung hian a lu a thing a, Kalvari sawi ang khan a nui hmel hian pawi a sawi lo tak tak a ni. "Miin min zawh chuan ka sawi thei ang i ti ve sia" ka tih chuan, "Mi i ni ve lo a" a ti a, zawitein a chalin ka chal a rawn tauh dat a, a na ang ti ni awm takin a fawp zui leh vang vang a, "I nuten an lo ngai tawh che angem?" ti a min zawh chuan, "Kei aiin pa Hmuna an ngai zawk" ka ti a, a nuih a za viau mai. 

Kan ţhut dan ngaia kan ţhut leh hnuah pawh ka darah a la kuah tlat a, keiin a kut awl lam ka khal ve thung a, a kutzungţang sei sang mai leh fai sar mai te chu hmuh a nawm mai bakah khawih a nuam a, mipa in uluk leh fai hi ka ngaina ţhin a, hnathawhin a zir loh chuan kut leh ke a fai reng thei lo tih chu ka hria, Zochhura te ang hi chuan kut hna an thawk lo a, hei vang hian a fai reng zel. Kut hnathawk nih a, mipa nih bawk phei chuan taksa fai mah se kuttin thlenga tih fai sar reng a harsa maithei, ka hrethiam vek. Duh dan leh ngainat zawng nei mah ila rilru zau tak ka pu tho a ni. 

Ţawng ka tum lai takin ka phone a ri a, ka kut lehlama Zochhura kut vuan reng chungin lehlamin phone ka phawrh a, Kalvari a lo ni. "My friend" ka tih rualin, "Hei kan thleng chiah aw, midang pawh kha lo hrilh mai rawh. Ka pite chu u Rinchutan a phone dawn a, ka chau lutuk ka na ţhem ţhum mai" a rawn ti duah a, "In tluang em?" ka tih chuan, "Tluang e...tengtere den te ka ţhut palh a, ka kekawr mawng a berh khir luai mai. U Rinchutan 'i kekawr mawngah luak a bet' a lo ti mawle. A fate ho a buaipui a, a buai khawp mai. Eng nge i tih? Ka pite eng nge an an?" a rawn ti zung zung a, "Kau Zoa bulah ka awm. Dawr an hawng lo nileng a, nakinah ka hrilh chiang ang che, ka pui thei ang" ka tih chuan, "Aw le...a va nuam awm bik ve...u Zorama kha lo duat viau la, min lo biak mawlh mawlh rawh aw, zanah kan inbe leh dawn nia u Rinchuta a buai emai ka'n pui ve ange" a rawn ti a, a dah zui nghal a, "Kalvari in 'min lo biak rawh' a ti" Zochhura hnena ka tih chuan, "Min hrilh tlai emai, min biak ve rawh ka tih hmain phone i dah daih a" a lo ti a, ka nuih a za ru hle. 

"U Zoram, engmah zep leh thup i nei lo tiraw? Ka hriat hlaua thup ang te, nakina hriatchhuah leh tho tur zep tlat ang te" ka ti mawlh mawlh a, ka zawh nachhan a hre kher lo ang. "Nei nang ka hriat chin chu ka sawi vek tawh" pawisawi lo hmel pu deuh chung hian a lo ti a, "Ka hriat hlaua thup engmah i neih loh chuan a ţhat chu" ka ti a, u Zirbawnga nena kan chungchang, kan inneih leh lo dan te hi chipchiarin a la hre miah lo a, mi kâ aţanga a hriat ho chu a inang lo nuai dawn a, awih ber tur a hre lo ang. Keimah zawk hian sawi thuak tawh mah ila chipchiarin engmah ka la hrilh lo. Kan inngaihzawn hma a ka sawi chin kha a ni maiin ka hria a, tunah chuan a zawng zawngin engmah ka la hrilh duh lo, nakinah muangchangin engkim, kan inneih loh hnua thil awmdan te, Kalvari te pem dawn thlenga thil awmdan, kan chhungkua leh mi tlemte chauhin an hriat hi ka la hrilh vek tho ang. Lo inţhen leh pawh ni ila Zochhura berkher hi chuan tu hnenah mah a sawi dawn chuang lo. Kalvari te kha keimah vangin an khak fak fak tawh mai a ni. A thinrimthlak a, Kalvari hian, "Ngaidam rawh, engkim hi Pathian kutah dah rawh" a ti ţhin a, kan boruak kha a alh ve nasa bet bet ţhin a ni. 

Pa Hmuna leh Huma rawn haw chu an phur dunin Huma lahin Zochhura a zuan chung chung a, pa Hmuna pawhin, "Hei, ka bestfriend Mawisachekin sachek min suah ţeuh mai" tiin a polythene khai chu dawhkanah a dah a, "I lo leng elo Remkalam?" ti a min zawh paha kan hmaa a rawn ţhut chuan, "Aw...ka nu'n zanah lo leng leh rawh se a tih che kha aw" ka ti a, a lo nui hawk hawk a, "Mawisacheki lahin zanriah eikham veleh lo kal leh rawh a ti bawk a" keipawh ţhu muang rei tawh loin ka tho a, ka leng rei mah mah tawh. Tun ang hun hi nula len hun pawh a ni tawh lo. U Bawihan min lo hau dawn chiang khawp mai. 

"Ngati nge i din nghal hluai a? Ka lo haw ve chauh a" pa Hmunan a tih chuan, "A tlai tawh emai ka chhungten chaw ei an duh tawh ang" ka ti a, dawhkan lama ka phei chu Zochhuran min zuiin carrot chu amah zawhin a la a, pa Hmuna pawhin min chelh rih a tum viau nain haw ka tum tak tlatah chuan, "A nih leh chaw eitui aw" a ti ve ta nge nge a, "Chaw ei tui le" ti a ka hawi let chu no deuhin a kut a lo vai leh a, a rukin ka nui leh vur vur tawh. 

Zochhura nen inzui chhuakin pawn kan thlen hnuah carrot min khaisak chu min pe a, chutah ka hnungah dimtea dawmin, "Kal rawh ka lo en liam ang che, inkhawm zan a ni si, zanin chu ka lo kal lo ang" a ti a, zan a a lo len dawn loh vang chuan keipawhin ka bye bye uluk ve khawp mai. 

In lam panin phur deuhin ka haw a, zanah ka pu Binladari te va tlawh ka tum bawk. Inchhunga ka lut chu u Bawihan, "I va leng rei ve" a lo ti chiah reng a, "Ka leng hla chuang hleinem" ka tih chuan, "Chawhmeh chhuang lum rawh" a ti ta daih a, ka lawm a sin aw...kei hi chu leng ţhang ka nia, Kalvari pasal neih hma phei kha chuan ka leng reng mai a ni. 

Chawhmeh ka chhuan lum laiin Sangkhuma a rawn lut a, "Remkalam, zanin chu aw" a la rawn ti, pheikhawk chhia pahnih khaiin pheikhawk charna rim a la nam a, dawr aţangin a rawn tlang aniang. "Pi Zioni fanu chu a inkhawm daih ang chu" ka tih chuan, "Kan kohhran an nih loh hi...an biakin a hla, zanah a inkhawm ngai lo ka hre vek tawh" a ti nghal pung pung a, "Vin nghal ringawt zel suh C. Sangkhum, nula ka rimpui duh mah che chuan lawm rawh aw" ka tih chuan, "In chawhmeh kha a va tui hmel ve, ka eitur chiah min lo suah ve teh" a ti daih a, "Awii awi awi...what a very zak lo-ted. I rimchhe ropui si, Msa phei chu awm se luhaiin a tlu tawh ang" ka tih chuan, "Hepa hi a mak tak tak a ni, hrawl viau si hian a kawchhung a no a, a rawn len laia pheikhawk ka siamin a thinrim ziah lehnghal. A sual vanga an rawn dah chu a ni ve sia, shikhar a rui ţhin aniang" a ti a, a nui lui tel kher a, plate tereuhteah chawhmeh chu suak chhuakin ka pe a, "Vawiinah Sangbollywoodi leh nu Ţhuami an inhauh kha, nu Ţhuami khan a ti ang lo ve bawk a ni" plate lak paha a lo tih leh chuan, "Ngati nge a?" ka lo ti thuai a, vawiin chu ka bialpa bulah ka awm nuam sa lutuk a chanchin engmah ka hre ve reng reng hleinem, Kalvari chanchin pawh group ah ka dah a, ka duh tawk der. Anmahni zawk hian a nin khawpin an phone leh tawh ang. 

"Sangbollywoodi thil zuar a lo khak a, ani lah mi â, 'Nu Ţhuam, chow ka siam tui thiam teh mai a nia aw' a tia, nu Ţhuami a thinrim a nih kha, chhungkuaah buaina an nei leh tawh aniang vawiin chu a thin a chhe emai" a ti a, chumi hnuah, "Nu Ţhuami khan 'chow i lo siam ve a ngai lo, i ţawp hnek hnuk ţhin nen chuti khati' a ti kual a, a hau nasa, a thlavang ka va hauhsak dawn em mawni ka tih rilruk lai takin Sangbollywoodin, 'In ui ek pawnchhia a i hruk zawh a kut sil lo a chhangban i kan leh te kha ka hre ve vek' a ti hlauh a, nu Ţhuami ţawp zia a sawi chhoh hnuah, 'ka nu ai pawn i upa a, engkim ka sawi vek lo zawk ang' a tih ve ngei kha. Nu Ţhuami hi chu miin an dawr nasa a, induh tlat chang a nei a, a chang leh a nui huau huau a" a ti leh duah a, Sangbotei chu ka lo ţan ru ve em em mai a ni, a tirah khan ka ngaithei lo viau nain tunah chuan ka inti nau ţan riau tawh. 

"Awiii...Sangbotei chu ka duh ţhaks, a tawk chiahin a chhang a nih chu, nu Ţhuami pawh naupang han khin" ka tih chuan, "Vawiin chu nilengin a vin hrim hrim zana kan len dawn chuan chaw te lo ei hma ve ula, ka haw dawn" a ti leh daih a, "Inbual te i la ngaih kha, a hmanhmawhthlak loh" ka tih chuan, "Hmanhmawhthlak..mipa inbual chhung a rei lo, Fawnvela lo kal ve a tum tlat a, kan kal chak thei dawn miah lo a nia" a tih hnuah, "U Bawih, six pack nei ho hi in thil ei in lem rual hian in six pack ah a sawt thla bik dawt dawt zel em?" a ti leh a, chawhmeh leh pheikhawk chhia kengin fimkhur deuhin a chhuak nghal daih a, "In ţhianho hmasawn mawh dan em em hi chu" tiin u Bawiha pawh a nui ve tawp. 

Chaw ei khamah ka nu'n, "Pi Zioni te inah in va ţhu ngawi reng dawn a ni mai. An lo en ţhap cheu nga, pi Zioni te in a leng chu an ngawi tlat zel an tih kha, keipawh ka ngawi reng" a ti a, ka nuih a za angreng, ka nu ber pawh a ngawi a nia, kei taknghial pawhin aieng ka la zuar miah hleinem. "Sangkhuma a leng chak miau sia lawm...a sawi ngun bawk a ka'n lenpui tak tak ange" ka ti a, ka insiam zui nghal a, ka insiam zawh hmain Fawnvela nen an lo thleng der tawh. 

"A na emai Sangkhuma phur lutukin a hnuhin min rawn hnuk a" Fawnvelan a ti ri chu pindan aţangin ka hre thei a, "Lo kal ve suh kan ti kan tia lawm...kawng herhah i chhuak peih ber" Sangkhuma lahin a ti nek a, "An inah ka leng ve chhin chak tho alawm mawle" pakhatin a ti bawk, "Meilingah sawn va ţhu la i dam nghal a ni mai" u Bawihan a tih ve chuan, "Min bawl suh aw u Bawih, kan naupanlai a pi Kawli theihai min lawhruk tir te khan pi Kawlin keimah chiah ka mawngah min vuak hrep kha, in a ka hawin ka nu ka hrilh a, ka mawng a hlim pawp a, 'Fawnvel, i mawng dum lutuk hi a nat hmel sa, a na lai ber pawh ka hmu thei lo' a la ti zui, a sualthiam ve thei a nia" tiin Fawnvela a nui huk huk a, "Keichu nangmah tawp ka en che hian i mawng rawng tur ka hre nghal thei" Sangkhuman lo ti vein ka nu'n, "In ţhing...khatiang an sawi an sawi ngai lo, tlangval ve uai tawh si hi nula chu va rim mai mai rawh u kha, Lalremmawii a hman tawh kha" a lo ti hlak hlak a, "Awii...ka nu hi tlangval zingah min chhiar tel ve suh aw" ka ti a, ka ţhiante chu ka chhuahpui nghal a, bathlar kan thleng chauh a ka phone a ri nghal bawk a, Kalvari a lo ni hlauh, min rawn video call a lo ni. 

"My friend" a rawn lan rualin ka ti nghal a, a nui ţha mai. "Ka ngai cheu a ka rawn bia cheu a nih hi. Ka pite in tlawh em?" a rawn ti a, "Vawiin chu ka tlawh hman lo reng reng" ka tih laiin Sangkhuman, "Keimah ka kal, I am here" tih pahin tawitein a ban a phar a, "A lo ţha lutuk ringawt, ka va sawi a a nghing eih lo, naktukah inhrui zuan puiah kan awm dawn" a tih leh chuan Kalvari pawh uar deuh hian a rawn nui a, "Tu emaw ber in lo va kal chuan a ţha a ni mai. Naupang chu an chau bawk aniang an mu leh vek tawh" a tih chuan Fawnvelan, "An chau awm emai kalkawng a thui alawm. Tikhan in nupa chauhin inkuah nui har har mai rawh u" a lo ti a, "In nupa in bed of roses ti mai rawh u" Sangkhuman lo ti ve bawkin Fawnvela nen chuan an han in nuih vel a, "My friend, hei Sangkhuma nula kan rimpui dawn a" ka tih chuan u Rinchutan, "An lo duh leh chuang lo ang" a rawn ti ve ngei a, kan lo nui ham ham mai. 

"Keimah hian ka duh lo zawk zel aw u Rinchut. Tuna ka rim tur chu hmu la e..pastor pawh ni la i chil i lem ve khalh tho ang" Sangkhuman a tih chu, "Mihring chil lem ngai lo kan awm hleinem" muang fan raih hian a lo ti a, "Ka nupui fanaute in lo duat a in fel. Dawnfuha phei chu a rawn thau haw vek" fiamthu hian a ti leh a, kan lo nui hak hak hlawm a, "U Rinhlua hi maw...a lo damlo a, kan lo hre miah lo a, zanin pawh kan haw vang ni loin a khawsik vangin a inkhawm thei lo a nih hi, hei puan lum a bah ţup hi" Kalvari in a tih hnuah a puan sin kan hmu chiang ve chiah a, kan hmu reng tawh nain a hma khan engahmah kan ngai lem lo. "A va zia lo ve" kan ti liam liam a, "Nia...nachhawknain a chhawk lai takin kan rawn bia che u" Kalvari in a tih laiin u Rinchutan, "Pastor damlo ka nih hi" a lo ti ve charh a, ani hi chu a fiamthu leh fiamthu loh pawh kan hre thei lo, a uan ve pawhin a hmel awmdan a ngai reng a, Zochhura nen an inang chiah. 

"Ka pite kha ka ngaihtuah tehmai a nia, kan awmna a hla ropui si, in lo ngaihven zeuh zeuh loh phei chuan ka rilru a nuam lo lehzual dawn a nia aw. Ka piin a vawk tih ral a duh tawh a, a tih ral hma reilote chhung chu vawk chaw te kha lo va pek sak zeuh zeuh mai rawh u, a khat tawkin lo va enreng rawh u" a rawn ti duah a, a bulah u Rinchuta a awm mai mai a, engmah a sawi ve lo. "Lungngai suh my friend, thil tum eng emaw ka nei alawm, ka pi te vil reng theih dan a nia, mahse ka pa ka sawipui hnuah chauh ka rawn hrilh ang che" ka tih chuan, "Aw...i vil reng theih chuan a ţha, i hna a buai phah chu ka hlau tho a" a rawn ti a, "Buai dawn nang...ka hna ti buai thei thil ka tih duh ring lo phawt teh kau Zo-a nen hausak kan tum ropui si, USA a school ţha ber a kan fate kal tir kan tum a, an zirna man tur tuak ka ngai, Aieng ka siam chae char a ngai" ka tih chuan ka fiamthu tih a hre bawk a a lo nui uar uar a, Sangkhuma leh Fawnvela ten Kalvari hmel hmu ve thei lo lêkin min nam bu lawp lawp mai. 

"A nih chuan a ţhat chu" a tih lai te chuan ka sam ka la tuai mam a, a hmel hmu tawh mah ila Kalvari chuan sam bak a hmuh ka ring lo, sam chhia hi chu a mam har bik a nia aw. Zochhura min kawhhmuh Tetei Jovasaha makeover ah khan Aizawl zin veleh kal ve tawp ila a ţha ang, tih dan dan an hre deuh ang. "Dah tawh teh aw Kalvari tlang, nula ka rim duh, i duh leh in pa kha in rim tir ve rawh, in ninawm tawh dah teh u" Sangkhuman a ti veleh a, "Aw, ka dah dawn...va rim la, a fel viau chuan nupuiah la nei ngei ngei ang che. 'Ka duh leh lo' i tih kawi leh vel chuan ka rawn vua ang che" a ti a, a dah nghal daih a, "Amah zawkin min duh dawn em mawni tih laia i duh loh leh vaih intih te chu, ka ţhiante hi chuan hmeichhia zawng zawngin min duh in ring vek mai a" tiin Sangkhuma a nui hawk hawk a, nuih paha ka sam a rawn beng phe leuh leuh te chu ninawm tak a ni. 

Phone ka dah chiah chu, "Kal u" tih leh ka bana kuah a rual a, keiin Fawnvela ka kai ve thung a, Sangkhuma a hmanhmawh si, Fawnvela a kal chak thei bawk si lo, an inhau an inhau a, an inkarah kal lo phei ila chu an in nam nawk nawk tawh ang. Pi Zioni hlauhawmzia ka sawi ta daih a, "A ho e...fanu a nei hmelţha tho alawm" Sangkhuman a tih laiin Fawnvelan, "Pi Zioni te chu, 'kan rethei rei a ka fate hi chu an rethei dawn lo reng reng' ti tlat tu kha a nia, gold um-mer chhungkua an nih hi aw Sangkhum" a ti ve thung a, "Va kal phawt ila a hriat mai ang, an kawngka lu chungah no smoking tih an tar ve thlap a nia aw Fawnvel, meizial zu reng reng suh" ka tih chuan, "Ka hria ka hria, naupang ho pawn 'pi Zioni no smoking' an tih ziah hi, an tarna hmunin dik hek lo, no smoking hi pi Zioni te hnam hming emaw an ti" a lo ti a, kan han nui leh rih ţhin, Sangkhuma lahin min kaih loh leh a sam a siam ţha a, tun ţum chu a zam ve riauin ka hria, a duh ve tak tak aniang. 

Pi Zioni te in kawt kan han thleng chiah chu kalkawnga a a pawr ve tehreng nen Sangkhuma a ding chawt a, "Lut nghal ang u, ngati nge i din daih Sangkhum?" ti a zawh pahin ka pawt a, a che eih lo reng reng. "Ka lut dawn reng alawm ka sawi tur ka ngaihtuah lawk" a ti a, Fawnvelan, "Luh hlimah chuan keimah ka ţawng mai ang lungngai suh, a fanu kha a lo awm ngei ang a, a bulah ţhu nghal suh ang che" a tih pawhin, "Kan ţhut huna ka sawi tur ka'n ngaihtuah leh lawk" a ti a, pi Zioni te kawmchhak a tlangval zu rui ho thawm a ţha ngang mai bawk. 

"Lut vat ang C. Sangkhum" ka tih veleh, "Ka sawi tur kha eng nge kha aw" a ti leh daih a, Fawnvela nen inenin a kawrah a rualin kan pawt a, an kawngkapui bul thleng pawt thei mah ila kawngkapui bulah a ding leh a, kan pawt che zo tawh lo. "Ka sawi tur ka ngaihtuah chhung te chu min nghak ve ula" a tih chuan, "Awii...ka ning ţhaks, i lut ngam lo a ni maw?" ka tih chuan, "Ngam e...engti zawng pawn ka lut ngam, bawk vak lut rawh pawh ti se ka vak lut ngam" a la ti pang pang tho a, "Nih leh lut rawh" ka tih veleh, "Kan lo leng ve lawk a ka tih hnuah 'i va chhuak ngai lo ve' ka ti leh ang a, 'Aizawlah i chho leh dawn em?' te ka tia nga" a ti daih a, Fawnvela nen chuan a lut hreh tih kan hrethiam ve ve tawh. 

"A mak ngei e, Ţhiana,

Zan dang iang lo reng a;

Hlim zai i vawr tak mai, 

I di i tawng em ni,

Perhkhuang ţingţang nena,

Hlim zai vawr chu" tiin kawmchhak a zu rui ho chu an zai ta nge nge a, an thawm bengchheng satliah ai chuan ngaihthlak a nuam. 

"Chu, tlangval zu rui ho...an va han rui hma ve, an zai thiam lo mai bawk sia, an zai chiah kha min rawn cho emaw ka ti lawm le...an zai pawr mai mai a sin" tiin Sangkhuma chuan chhak lam a hawi a, a nuih ve ngei bawk a, "Khatiangin han nuih vel suh, nula pawh i rim ngam loh kha, an inah i lut ngam lo, kan ding rei lutuk tawh" ka tih chuan tui tawp hmakin min rawn en a, chutah Fawnvela enin a meng rual rulh rulh a, tim daia kawngkhar chu hnaih zualin a beng a dawh a, meng rual ralh ralh reng chungin a ngaithla kar mai.

Kawmchhak tlangvalte lah chu pawr deuhin,

"Di zawng kan tawng mawlh lo,

Suihlungleng vala te hian;

Awmhar lunglen dam nan,

Chawlhtui ning zu dawnin,

Lunglen a dam mahna tiin;

A riang vala te hian,

Awmhar lunglen dam nan,

Di tawng lo val kan rui" tiin an han zai leh a, ţingţang an perh ve ngei awm sia, a ri kan hre lo, ţingţang ri aiin kut beng ri a ring zawk. 

"An luck loh hmel a sin...ngaihzawn tur an hmu zo ve lo a an rui tawp, lenna tur an nei ve lo aniang" Sangkhuma bawkin a lo ti leh a, amah pawh nula in a a luh ngam loh laia midang a nuih sawh kher chu kan ngeiin Fawnvela phei chu a meng dur khup tawh a, amah a hang ve bawk nen, a mitmu kan hmu thei lo lek lek tawh a ni. 

"Lut mai mai rawh C. Sangkhum, awi ha..what a very ning, ka haw san daih dawn che em mawni" ka tih chuan, "Ka'n insiamţha leh lawk" tih pahin a ding ţha sawk sawk a, pi Zioni te pawh hi kan thawm an hre daih tawh awm sia rawn hawn ve mai awm. "I luh loh chuan kan haw san che anga nangmahin i leng ang aw, ka kawng herh hi engahmah i ngai lo reng reng mai a, a na lutuk ka ding khur ţan tawh a nia aw" Fawnvelan a tih khur khur lai chuan a sam a tuai mam a, a tuai mam zawhah a tuai thur leh a, a kawr a pawt thla a, a kekawr a pawt chho leh a, "Sangkhum, i luh loh chuan ka au vak dawn a nia" Fawnvelan a tih chuan, "Ka sam ka'n tuai mam leh lawk" a lo ti a, a lut hreh ngang mai. 

"Khawimaw kalsawn teh, an fanu hi ka duh ve lo a, ka zak ve hleinem, keimah ka'n lut hmasa ange" thinrim hmel deuha tih pahin Fawnvela chuan Sangkhuma a nek sawn a, "I kawng i herh kha" ka tih chuan, "Ka nek sawn loh chuan kan ding reng anga ka na zual zawk ang" lo tiin kawngkhar chu a kik ta karh karh a, "Lo lut rawh" an ti ri pawh chiang deuhin kan hre thei a nia, kan thawm kha an hre dawn hrim hrim. 

"E...in awm maw? Kan lo leng dawn a" kawngka pawh hawn paha Fawnvelan a tih chuan min lo en ţhap a, "Kan lo leng ve deuh dawn a" Fawnvelan a tih leh chuan pi Zion in, "Lo leng ru" a ti ram hmak a, Fawnvela pawh a zam tih a ţawngkamah a hriat reng. 

"In va tam angreng ve" tiin Fawnvela chu a nui hul hak a, dawhkan kilin pi Zioni a ţhu a, rem lo deuhin la a lo phiar a, an inpui lamah a fate, mipa pahnih leh hmeichhe pakhat an ţhu a, kan kohhran a in an loh vang te, an chhuah khat vang leh an in a kan len luh ngai loh avangin khawlaiah inhmu zeuh mah ila kan inbe ngai lo. Mikhual an ni lo nain mikhual ang chiahin an awm, hnatlan naah te, khawhar inah te hian hmuh tur an awm ngai lo. Loh theih lohin dawrah an kal a a ni mai. 

"In awm maw?" Sangkhuman a ti ţha ve leh a, a zamawm lutuk chu tam lo mah se an tam hmel riau a ni. Pi Zioni fanu ber chuan, "Lo ţhu ru, in va fel ve in lo len a" a lo ti hlauh a, kan ţhu rang hlawm khawp mai. Hetiang a nih chuan keimah ber hian ka ning leh dawn. An mipa pahnih lah chuan inkuangkuah tlat chungin tv an en a, pakhat zawk phei chu a thau mai bakah a sang bawk tih ka hre tawh. Min melh run reng a, a melh a na ropui si. "Siama, pindana ka phiarfung dah kha min la vak lawh" pi Zionin a tih chuan, "Aw le...a vaiin em ni ka lak dawn?" a ti dam thluam tho bawk si, khawlaiah ka hmu fuh ve deuh reng a, a ţawng ri ka vawikhat hriatna. A ding chiah phei chu a lian turu, mihring hi sang tho si a kan thau tel hian lang len a lo awl a nih dawn hi. Ngo deuh se chu Big show a ang viau ang. Hremhmun tlak aiin pi Zioni fapa Siama melh a hlauhawm zawk dawn a nih hi. 

"Tharte, i chhungte hi an hlauhawm em?" Sangkhuman a ti ru sur sur a, Thartei chu lo nui seihin, "Hlauhawm nang...an ţawngtlem mai mai alawm" a lo ti mai a, Thartei hnaih berah ka ţhu a, ka bulah Fawnvela ţhuin Sangkhuma a ni leh a, thuawih hmel deuhin kan ţhu tlar ve ţhap mai. Siama phiar fung la pawh pindan aţangin a rawn chhuah leh ţuang ţuang a, a dul chu kg engzat nge niang aw ka tih rilruk laiin, "Kha lem..nu, a dang a la ngai em?" a ti a, a fel hmel viau hi, pakhat erawh ţawng loin a la ţhu reng a, a la kuangkuah at a, lukhum hma thlawk khumin a khap fak fak reng a, a thau ve lo nain dul chu a kiar ve deuh thoin ka hria. Pi Zioni fapa te an sek ti ţhin ho khan dawt an sawi chiang, tunlai tak hi ka hmu khat deuh a, ka hmuh loh chhungin an lo sek hman vek emaw ka ti alawm le. An chhungkua hi rin aiin an hlauhawm loh. 

"Zantin lo len theih a chakawm rualin a va huphurhawm angreng ve, gate duty pahnih hi an rintlak hmel e" Thartei lama rawn kun phei du chungin Sangkhuma chuan a ti leh sur sur a, gate duty a tih kha Thartei ute pahnih a sawina a ni. "Lo leng ziah rawh u...kawm tur an awm lo a ka khua a har theih nak laia" tiin Thartei chu a nui var var a, Sangkhuma en chunga zawite a, "Aw haw wow" ka tih chuan a awm dawm chungin, "Oh my guys" a lo ti ve a, Fawnvela rawn khuh deuh thut chu a la puak zui. "Ka khuh awmchhun a puak" a ti a, Thartei u inkuangkuah ât reng pawh kha a phu nasa aniang a inkuangkuah tawh lo. 

Kun ngar ngar chungin kan han nui a, kan insi ţhap bawk si, lam tur intintuah mekte pawh kan ang maithei. "Ka inrin loh lai takin a puak sia keipawh ka phu. Aiah...a na lutuk" tiin Fawnvela chu a nui leh a, a ţawng ring viau tawh bawk. "In nuih in nuih te chuan ka la phiar laiah ka rilru ka pe thei nang" tiin pi Zionin min rawn khak a, nuih a za zual sauh bawk si. "Ka insum nasa lutuk ka hnap a tawlh dawn" Fawnvelan a tih chuan, "Sut suh aw i hnap kha..i sut puak leh ang" Sangkhuman a lo ti a, "Zaninah rilru pe deuha phiar zawh ka duh" pi Zionin a ti leh bawk nen, ka nui nasa lutuk tawh, a za tial tial lehnghal a, ka pum na lutuk chu ka dawm ngâih reng mai a ni. 

"I va'n khuh puak ring em em...zak duh suh" pawisawi loh hmel taka Thartein a rawn tih leh chuan kan insum nasat ve nen kan nui leh a, kan nui ring ngam bawk si, "Awi..in mak e...in nui reng a, in ning tawh em em lo'm ni? A hunah chauh nuih tur" in la thunei taka pi Zionin a lo tih te chuan kan hlau thei tawh lo, hlauhna in a daih seng lo aniang kan nui chhuak ta nge nge a, "Awii...what a very crack chiang...ka nui hlum thei mai dawn alawm le...Fawnvel" ka ti a, Sangkhuman min rawn kheuh zeuhin, "Ka hming sawi tel ve rawh" a tih chuan uar deuhin kan han nui leh a, nuihza a reh thei lo a ni ber. Kan nula rim hi a hrilhhai tawh viau ang. A ute lahin ngawi rengin min en a, min khak ve lo bawk a an fel viau turah ngai ang. 

"Thingpui in in duh em?" Thartein a tih chuan, "Duh ve tho e" Sangkhuman a lo ti a, zawi tea, "Fawnvel, inţhut thleng ang" a tih te chuan ka nuih a la za, "Zan khatna a nih hi, tikhan ţhu mai mai rawh, huam huam che hian" tiin Fawnvelan a la khak zui, ka pum na lutuk tawh chu a hrehawm ber. 

"Kan nula rim ve hi nula rim pawh kan ang lo, kan hmaa mite lah sawn min en reng ringawt a, nuih ve tal awm" Sangkhuman a tih hluk hluk laiin rin loh deuhin Fawnvelan, "Ka pi Zion" a ti leh thut a, zawitea kan ţawng char char reng vangin ring deuha pi Zioni a au thut chuan min ti phu leh a, "Enge ni?" pi Zioninna tih ringawt te chuan kan lo nui leh tawh. "Eng la nge i phiar?" Fawnvelan a tih chuan, "Eng la nge ka hre bik nang..wool aniang chu" pi Zionin a lo ti a, "Eng tur nge i phiar ka tihna?" a ti leh hnuhnawh a, "Kawrlum tur ka phiar" a tih hnuah pi Zioni chuan, "I ţhiante lah chu an nui reng mai sia aw...in rawn rui em mawni?" a ti vang vang a, a beidawn hmel khawp mai. 

"Remkalam, ka nula rim berin rui emaw min tih ve ka duh lo a nia" nui chungin Sangkhuma chuan rawn tiin, "Ka nuih za a reh thei lo min lo ti thinrim lui tawp mai teh" a ti thul, "Awi ha" tiin ka ţhu ngil a, kan in nise ka ti rum rum tawh. Thartein thingpui a rawn sem lai te chuan, "Thingpui in chi pawh in nih loh kha in hak ang" pi Zionin a lo ti a, lo ban ve a inthlahrunawm zo vek. 

"Pi Zioni chu i talented reuh hle mai kawrlum phiar te i thiam a" Fawnvelan a tih chuan, "Nangmah ang pawh ka phiar thiam ang chu min fak der vel suh" a lo ti let erh a, kan ngawi leh ţhap tawh. "Tharte" ring angreng takin Sangkhuman a ti ve ta nge nge a, "Ka dawrah lo kal la chapal mawi deuh ka lo siam ang che" zawite hian a ti leh a, "Nia...ka lo tum dawn nia, engzatin nge i siam ang?" a tih chuan, "Nangchu a thlawnin ka siam ang che" a ti a, Thartei chu a nui ve sak mai. An pahnihin ka en tawn zak zak reng bawk a, ka sam phe vawk vawk reng chuan ka thingpui kenlai chu a chhem dai zoin ka hria, Fawnvela pawn, "Remkalam, hmalam hawi rawh" tiin min rawn hrilh a, "Pi Zion" a ti zui leh zat bawk, pakhat lahin, "Enge ni?" ram hmakin a lo ti leh a, "I kawrlum phiar ang kha i zuar ngai em?" a tih chuan, "Zuar ngai nang, ka zuar phal hleinem" pi Zionin a lo ti a, "Zuar rawh kan ti ziah a a phal tlat lo. La a lei char char tho sia, ti hian a phiar a, a khai ţha vek a, min phiarsak a nih loh chuan a ta chu kan haksak ve pawh a phal lo" Thartei pawhin lo ti ve bawrh bawrhin a felin a hmelţha reuh khawp mai. A sam a sei hnalh a, a inhmehin a ti lang nu zual a, a sang ţha reuh bawk si, a cher lem lo a, a khal mawi nalh hle thung a, Sangkhuman a lo duh em em hi a awm lo hran lo, a fel tel lehzel bawk nen, pi Zioni lah Fawnvelan a be lui thei em em a, a fapa ten an farnu uchuak taka an ven tlat awm ka hre bawk si lo, ka hriatchhuah zawk chu, mi sawi dan leh kan belhchian hnua thil nih dan tak tak lo in an loh ţhin zia hi. Miin an sawichhiat bawih bawih pawh belhchian chuan an lo felin an lo ţha phian zel. 

"Pi Zioni chu in pa boral hnuah in nuam deuh i sa thei a nia, i ropui khawp mai" Fawnvelan a tih chuan, "Ka ute sak a nih hi" a lo ti daih a, mi sawidan bawk a ni a, Fawnvela pawh a hawi â nasa hu hu khawp mai. "Thartei thingpui lum chu a va tui ve...a thlum dan pawh a tawk chiah. Zunthlum neih phah hlauhawm loh tawk chiahin chini i telh" Sangkhuman a ti vel a, a rawn kun nasa lutuk dawn a a hriat veleh Fawnvelan a nam sawn ta ţhin a, an in veng nasa khawp mai. 

"Nih leh pi Zion, man chawiin an luahtir cheu nge a thlawnin in awm?" Fawnvelan a tih leh chuan, "A va mak fo e aw...ka u ten kan in tur min sak sak, mi in anga nuam pawh a nih ve loh hi" pi Zionin a lo ti a, an inhmeh tak tak a ni. "Vengthlang a in awm lai kha ka la hria, in in bulah khan kan rawn kal ziah" ka tih ve chuan pi Zioni chu a ngawi reng a, Fawnvelan, "Pi Zion tih tel kher a ngai aniang" ti a min rawn hrilh ruk veleh, "Pi Zion" ka ti nghal a, ka thusawi hmasak kha min chhang dawn emaw tih laiin, "Eng nge?" a lo ti daih a, sawi mai tur ka hre tawh lo chuan, "Aieng i inhnawih ngai em?" ka ti ta ringawt a, "I zuar tak tiraw?" Thartein a tih laiin pi Zionin, "Hnawih ngai lo, ka eng vek mai tur a sin, thin lian ka ang dawn emai" a ti a, chhang tawh lem loin Thartei hnenah, "I lei ve duh em?" ka ti ru zeuh thung a, pi Zioni pawh ka la zawrh lui tho ang. "I hriat kher lohin dawra an zawrh ka lei alawm, ka la hmang zo lo a, fridge ah sawn ka dah" a lo ti a, "A van lawmawm tak, i ngeih viau chuan ka aieng faktuah ka hmang ang che" ka ti fiamthu a, a lo bu ve nghat nghat mai. 

Kan haw dawnah Fawnvela a la tho lawk thei lo zui a, pi Zioni fapa te lahin puih an tum der lo, pi Zioni zawkin, "Thil charna i lo ţhut pek em ni?" a ti a, a rawn ngaihven zawk a, "Ka inherh alawm mawle" tiin Fawnvela chu min kuai ţang reng chunginna tho a, keipawh ka ding ngil ve thei chiah. "Inherh an leng an leng ngai em ni? Va haw rawh u" pi Zioni chuan ti lehin muangchangin kan chhuak a, a chhungte hriaf laia Thartein, "Lo leng ziah ru in bula awm a nuam si" a ti ngam leh an hau miah lo te kha a nuam ka lo ti. Fawnvela lahin, "Sangkhuma ka ven nasat vang vek" a ti deuh reng a, Sangkhuma chu a ţawng duh lohna a rei tawh. 

Pi Zioni te in kan pel chiah chu Sangkhuman, "Ka nula rim ve kha nula rim pawh ka ang lo. Hla tawkah ka ţhu a, min hliah vek a, ka biak leh kei ai aiin amah in lo en nasa. Thartei ka be ve a in lu chiah alawm ka hmuh, in lu a lian dun ropui si, inţhut thleng ang ka tih te khan duh mai ta che u" a ti ta hluk hluk a, a ţawng duh lo kan tia a lo ti tau leh pek tawh zawk a nih dawn hi. 

"Vawikhat len naah nula bulah an ţhu nghal ngai lo. Phun reng reng suh aw nangmah vangin pi Zioni ning chung chung ka be lui char char, mi ţawng peih lo biak luih tlat kha a nuam miah lo aw" Fawnvelan a ti ve thung a, "Chupawh nise ka biak lai tal kha chuan amah kha lo thlek ve ţhin lo ula, a ţhut hnaih zawkin in thlek nasa zawk a, amah hmu miah loin asin ka biak char char. A ute lah khan min en char char a" Sangkhuman a tih leh chuan, "Luh pawh i lut ngam lo a nangmah ai ka lut hmasaber aw" Fawnvelan a lo ti a, chutah chiah chuan, "A dik chiah...kan luh dan kha ngaihtuah la, i lut hnuhnung ber a, i ţhut hnaih ber thei lo hrim hrim" ka ti ve ta a, a ngawi leh hmak tawh. 

In ka thlen veleh ka nuin, "In va ngawi reng em?" a lo ti a, uang thuang zet a, "Awi...what a very not ngawi reng" ka tih hnuah, "Kan ngawi lo reng reng, Fawnvela leh pi Zioni an inbe char char a, keini pawh Thartei te nen kan inkawm loh leh pumna vekin kan nui a, a fapa te pahnih zawk kha alawm ngawi reng, keini chu ngawi lo tak kan ni" ka ti leh zung zung a, "In ţhianho in nih vang a nih chiah chu in ngawih reng loh. Pi Zioni te in a kal ngawi reng lo nangmahni chiah in awm. In va ti ho zo leh vek aniang chu" a tih laiin, "Khawiah nge ka pa?" ka ti ve thung a, "Pindanah a awm" a tih takah chuan, "Thil pawimawh deuh ka hrilh ang che" tiin ka ko chhuak a, "Eng nge ni ta? Tuina thar i nei leh tawh em ni?" nui chunga a tih chuan, "Teuh nang...ka pu saw a khua a hae ve ţhin a, mu tawp chung chuan tih theih a tlem a, upa lam an ni tawh bawk nen khawhar a zual duh bik dawn a, ka pi Binladari sawn awmpui tawp se keiman an dawr saw ka nghahsak deuh reng rih mai ang. Inchhung enkawl pah thoin, eirel a hun awm velah ka khar zel ang a, aieng leh vur ka siam pah bawk ang a, kuttin leh mithmul lem vuah duh an awm leh ka pan zel ang a, a nih loh chuan rilru a nuam thei chuang lo. Hah deuh mah ila a pawi lo, ka pi Binladari saw kingkong pawh lo nise ka pu a khawngaihthlak emai...khawhar deuha a thih te a hlauhawm alawm" ka ti duah a, "I dawr ve kha? I khar tak tak dawn tihna em ni?" ka pa'n a tih leh chuan, "Aw a hlawk lo emai, dawr ka neih chuan ka chawi belh char char zel. Nutein lu mehna dawr a hawng dawn aniang. Ka bungrua tlem ka dah tel ang a, lu met hoin an hmuh reng kha a ţha ve a, facial te pawh an duh chuan ka va tihsak zuai ţhin ang a, ţhutthleng sei velah ka muttir chawt chawt anga a ni mai. Ka pi Binladari te hi a vil a vil an ngai rih a nih hi" ka ti a, a remti aniang a bu nghat nghat mai. "I pi te chu puih an ngai khawp mai. Thil dang chu ti tel rih lo mah la a pawi lo, i hah em a kan khawngaih ve ţhin tho che a" a ti a, a ni ve tho, leng ve ţhin mah ila hna pawh ka thawk nasa tho. "A ho emai...ka chauh deuh leh ka chawl mai ang" ka ti a, lungawi deuhin mu turin ka kal a, u Bawihan, "A chang leh nula a rim a" a ti ri chu ka hre tho. 

Zochhura message a lo awm leh vang tawh a, 'Inkhawm kan bang tawh a, vengthlang lamah damlo kan han kan ve thung ang e' tih zawng a ni. A ţul chin chiah a rawn sawi nain chanchin min rawn hrilh duh ringawt pawh hi a lawmawm hrim hrim. 

Ka duh ang tak chuan ka awm a, ni pawh a vei ve zel, ka pite ka puih nasat vangin miin min fak luai luai a, Zochhura pawhin, "Hmangaihna i ngah emai hmangaihna i la dawng let ve ang" min ti a, ngaihtuah a ti thui, amah hian min la hmangaih lo em mawni te ka tia, kei ngei pawh hian ka hmangaih leh hmangaih loh ka la hre bik lo. Bialnu te hnena hmangaihna i la dawng let ang tih kha chu a mak ve em a, min hmangaih miah lo angah a ngaih theih a ni. Min hmangaih thu a la sawi miah lo bawk a, keipawhin ka la sawi bik lo. Kan inzui ve mawp mawp tawp a a ni mai. 'Min hmangaih em?' ka ti duh bik lo a, mipa zawkin an sawi hmasak loh chuan a zahthlak ka ti ve deuh. Min hmangaih se chu 'hmangaihna i dawng let daih tawh' min tih ka ring a, a dawih duh lo nge min hmangaih lo ka hre rih lo hrim hrim. 

Dawra ka awm laiin ka nu'n min lo biain, "I pa Hmunan bai ka siam ve e a tia, min rawn phone a, lo va suak lawk rawh hetah ka la awm, meizial ka la sem zo lo" a rawn ti a, ka chhan hma hmain midangin an lo be buai ve sek bawk a, "Kuhva siam sa a awm lo, tlemte ka siam anga ka va suak ang" ka ti a, ka awm loh pawn khaw en lai chuan dawr hi kan khar vak lo, thil lei duh an awmin ka pi Binladari an ko mai zel a, ka pi pawhin, "Midang chu ka vengthawng lo, Kiki-a mawlh mai hi a lo kal ka hlau a ni" a ti ţhin a, ka awm loh chuan ka pu awm chungin dawr hmu phak turin a ţhu ţhin. Kiki-a hi chuan midang angin a au ve dawn lo tih a chiang ve em. 

Kuhva ka phel zung zung a, Zochhura chu school ah a la awm daih ang. Pa Hmuna hi nutling ho hian an kawmngeihin an nuih pui tlawrh tlawrh reng a, 'cham reng rawh' an ti deuh vek bawk. Keipawh ka hmuh tur hian a ban te hi a'n vai no lui vel ţhin a, ka nui ka nui zel. Ka bula a awm laia mipa a hmuh te hian ka dara vuan chungin ka hnungah a'n biru der vel a, a bula awm a nuam tak tak a ni. Keipawhin awm ve reng se ka ti ve tho, Zochhura a khawhar loh phah a, a la upat bik loh vangin a nu emaw a patea an awm ve hian a thla a muang tih a hriat ţhin. 

Sangbollywoodin, "U Remkalam" a rawn tih pawhin, "Ka kawm hman lo che bai suah lawk ka ngai, kuhva rah sa sarang ah khan lo thun zung zung la dawrah hian lo awm lawk rawh aw i hman em?" ka ti nghal mawlh mawlh a, "Hman tho e...vawksa ka rep ve dawn mawni ka tia, mahse ka nu'n a phal lo. Youtube aţangin ei siam ka zir bawk a, ka nu'n bawl hlo a ui tlat a, ka la ti chhin thei lo. Dawr kawtah hian mix ka lo zuar ve dawn" a ti a, min pui ve nghal bawk a, "Lo zuar rawh, Msa kha hrilh la, ka pi Binladari dawrah hlir vur kan siam tawh dawn nia, mahse Nutein kawm tur a nei awm lo" ka tih chuan, "Sangkhuma a awm alawm. Msa ve hi chu sawm mah ila a duh duh naah a awm tho. Pu Lungmuanan a hau a 'i hawi harh leh lutuk hi a buaithlak, mu nileng la kan lawm zawk ang' a tih kha. A lawm lo nasa a nia aw" tiin a nui uar uar a, kan tih zawh hnuah ka tho nghal nalh a, ka ti fai leh sawk sawk a, dawr chhung hnawk nuai hi ka ngaithei lo ţhin. Zochhura pawh hi a rawn lut chiah a, thil a awmna hmuna awm lo ni a a hriat chu ka ngaithei lo tih hriain a dah ţha nghal ţhin. "Ka va kal lawk ange" ka ti a, kan in a kawi a buaithlak takin tiin ka pi Binladari te bur ka keng a, pa Hmuna bai suak turin Zochhura in lam ka pan a, ni a sa si, thui lo te pawh kal ila a hahthlak bik ţhin. 

Kawngkhar a lo khar leh tawh a, anni hi chu khua a lum pawn kawng an hawng rei thei lo. A buaithlak a ni. Pa Hmunan min rawn hawnsakin inchhung ka lut chu a uap leh mup tawh a, "I va'n hah hmel em em" a lo tih laiin, "Ka nu'n 'bai va suak rawh' a tia" ka ti ve thung a, "Aw...thlai ka bai pawlh ţeuh a, a tui em a ei ve ula ka ti" a ti a, a nui deuh reng a, a sam a tuai pial ţhain ţhutthleng seiah chuan hmeichhe thawmhnaw tlem a zawng a awm a, ka nu leh nu Mawisacheki kawr ang deuh pawh ka hmu a, ka nu te hian a nihna diktak an hre tawh ang a, a rukin an pe em mawni ka ti, a sawi loh chuan han inzawh a nuam mang bawk si lo a, pheikhawk sang, a savun khawk ţeuh tawh pakhat a awm bawk a, tu ta nge ka hre lo thung. Sangkhuman siam ngaihna a hriat tawh loh a pe ti dawn ila pe se chu a sawi ngei awm bawk sia. Pawnfen pakhat a awm tel bawk a, ka kal hma khan hmeichhe incheiin a lo inchei a nih ka ring ber, sawi lo mah ila a nihna ka hria tih a hria a, keichu min zah pah vak lo ang, ka awm lai pawn hmeichhia angin a inchei ngam ang. 

"Bai hi va en la" a rawn tih takah chuan, "Thawmhnaw hi ngati nge a?" ka lo ti a, "Ka ha anga min hmu chhin chak em?" nui chung hian a rawn ti a, "A ngai kher lo" tih pahin ka pan hnai a, gas bula a dekchi hawn lai chu ka va bih ve a, ka bulah min si chet a rawn dingin, "A tui hmel em?" a tih chuan, "Tui viau ang, i van thiam em em, hetiang a nih chuan chawhmeh suah reng in ngai tawh dawn lo a nih hi" ka ti fiamthu a, ka nui pah hak hak a, "Nangni berin min suah lohin" tih pahin ka darah a rawn vuan a, "Ka va ha chhin ang aw..nangmah chiahin i hria a nia, mi bulah sawi miah suh" a ti a, a nui ri chu a makin ka dar a hmer vak lehnghal a, "Hmeichhia i ni sia, min hlau palh ang, thawmhnaw phelh loin hetah hian ka'n ha chhin ang e" a ti a, tlemin ka hlau deuh tawh. "Ka suak ang a ka haw zawk ang" ka ti chu a phal lo nasa, ka kut a rawn vuanin, "Haw lo ang" a ti hmuk a, a hmui ti pawrh chung hian min rawn en a, ka hlauh mai bakah ka ten a ni. 

CONT...