KEIMAH, THINGTLANG NULA (FINAL SEASON) 4

KEIMAH, THINGTLANG NULA (FINAL SEASON) 4

"Eheu...Remkalami te ţhianho an lo awm ve a nih hi" u Buangan a ipte lakthlak pahin a ti hlut a, park a kan grape juice in lai min phawk tu ngei mai kha a ni. Lui nui hak hak chung hian, "Nia...kan leng a" ka ti a, ka eu kual vel a, Fawnvela leh Sangkhuma ten min ngaihsak duh mang si lo, tih tur a vang tak tak a ni. U Buanga chu an en ngam bik lo tih a hriat reng a, kan grape juice in kha kan rui a, kan lo tihbuai chiam vang a ni. Tlema kan upat ve hnuah pawh mahni aia ute nge nge chu an lo hlauhawm tho a nih hi. 

"Kha, in inkhawm ve em ni a?" kan ţhian ho ţhup ţhapna ep chiaha ţhut paha a tih chuan, "Aw...khawm ve e" ka ti leh sap a, Sangkhuma ka sik zeuh a, na tawkin min rawn sik let ve a, principal erawh chuan, "Ţhu hahdam rawh u thingpui ka lo lum ang" a ti a, nu Partei lah pindanah a lut daih a, awmdan tur ber hriat a har khawp mai. 

"Sangkhum, pheikhawk i siam tluang zel em?" u Buangan a tih takah chuan ka thaw huai a, "Aw, Pathian zarah ka siam ve zel e" tiin a lo chhang a, u Buanga kan tihdan kha chu sawi pawh ka sawi peih tawh lo, kan tan chuan han ngam hawrh chi a ni tawh lo hrim hrim. Ani lah a ţawng peih si, min be reng hlawm a, nuam kan tih loh zia hria a min be lui a ang zawk mah. 

"Fawnvel, tunlai eng nge i tih ţhin?" a ti ve thung a, a sir tawn tawn a ţhu u Liana leh u Tuaia te chu an lo nui vur vur a, u Buanga ţawngtheih zia ka ngaihtuah a, kha thil kha a rei tawh deuh nain an hre ve vek ang. Fawnvela leh Sangkhuma ten an âwmin u Buanga âwmah an lo tauh vel a, a hrereng hi a thiamawm lutuk tlat a ni. 

"Sachek ka siam loh leh ka feh a, chutiang vel chu" kun ngul chunga Fawnvelan a tih chuan, "I youtube channel lam te a hlawk ve tawh em? Kum khatah maktaduai vel lai i hlawh tawh ang a" a ti vel a, a kum a kum kan hel ngat ngat tawh a, kan inthiam lo khan ngaihdam te pawh kan dil a, kan in a a nu a lo kal pawhin ka nu'n hriatthiam a lo ngen tawh bawk a, kan sual ve deuh lai a mi daih tawh a ni a, hrereng pawh nise Fawnvela a ţawngkhum dan chu ngaithei loin, "Inkhawm bang sawi chi a nih loh tawp chu" ka lo ti hlak a, kum a liam nual tawh a, kan tih zah dan te, kan chhaih kual nasat zia te ngaihtuah chuan a la hrereng hi a mak lem lo. Kan hel ngat ngat chung pawh a inhmuh apianga a ţawng fek fek reng hi a ninawm tawh. Keichu min ti se ka tuar thei mai, thiam lo tho mah se ka ţhiante a ţawngkhum tel ve hian ka ngaithei ţhin lo. Fawnvela leh Sangkhuma te inthiam lo an kun ngar laiin kei chuan ka melh ran ngam tawh a, "Thinurna an pai reng ngai lo. Kum engzat nge liam tawh? Kan zah vang chein kan la hel char char zel che a, ngaihdam kan dil vek tawh che kha, kan tleirawl laia thil thleng vanga tun thlenga la inkher ngat ngat a inţawngkhum fek fek reng te chu a mipa hna lo emai, duh leh kum khatah cheng10 pawh a la lut ang, i sawi tur a awm lo" ka ti leh ta piap piap a, "Inkhawm bang i nih ve tho kha" nui sawng chunga a lo tih chuan, "Bul i ţan hmasa a nih kha. Keini aiin i u daih, tlangval senior, rilru ngil purh tawh tur si hi i rilru a kawi ngel ngul emai, ka zah peih tawh bik lo che" ka ti a, Sangkhuman min rawn sik leh vâwt a, ţha deuhin min bia se chu ka zah viau zawk ang a, zak lutuk a kan siam avang khan kan la inthiam bik lo nain a ţawngdan leh a thusawi duh zawng khan ka zahna a ti bo leh vek tawh. 

"Insum rawh Remkalam, a fiamthu a nih kha" tiin u Liana a lo nui hak hak a, "Remkalami hi chu cho sual a hlauhawm a nia, kan khaw nula ah a nuchang ber" u Buangan fiamthu ti taka a lo tih chuan, "Ka pawisawi tute ka haw reng ngai ve lo thung alawm" ka tih hnuah, "Mipa chu mipa takin awm rawh se, tlangval senior phei chu" a awki ang chiaha ti vein ka nui lui duai a, a ngei tawk a tling viau ang. Ka ţhiante hi chu tihbuai thiang an ni lo. An tihbuai luih vaih chuan a kaw tawp thleng râtin ka nawr let duh mai zel. 

"A ţha e Remakalami ţhin hi chu...kan khaw ti nuam tu i ni ve a, pasal nei suh aw" tiin u Tuaia a lo nui ve suk suk reng a, "A neih ve ţep kha" fiamthu a u Buangan a lo tih chuan, "Awii...what a funny thing, u Buanga han ţawngtheihzia em em hi, mi ţhatna aiin an ţhat lohna i hre rei zawk a, fai deuhin va inbual rawh" ka ti chiah chu principal in, "In thawm a va ring ve" a rawn ti thum ve dut a, a sir bera ţhu ka ni bawk a kan ţhutna bulah a lo ding reng a, kan inhnaih hle tihna a ni. 

Dak vaha principal en chung hian, "Kan aw rawl a ring ve hrim hrim a" tiin chhuanlam ka lo siam a, ka ţhiante lam ka hawi zui a, anni pawh an lo hawichhuak ve ngam tawh. Principal hian a chhan dawn der si lo. "What a funny thing chu eng nge?" a tih leh chuan u Liana leh u Tuaia te an lo nui bâwk bâwk a, anni hi chu an felin an lung tih awi lohna ka la nei ve lem lo a, lo nei pawh ni ila tun thlengin an thin a rim ve reng lo ang. 

"Ka letling thiam chiah lo" a lam hawi a dak vah chung hian ka ti leh a, tawitein a nui a, "I dangdai hle mai" a ti sup a, gas awmna lam a pan ta daih a. "Pindanah Huma a zung leh pek alawm mawle" ti chungin nu Partei pawh a rawn lang ve leh hlawl a, an inah hian pindan pahnih a awm ve ngei a, choka leh ţhutkhawmna hi engmahin a daidang lo thung, a kaw huau mai a ni. 

"Va ţhu ve rawh Zoram, thingpui chu ka lo lum ang. Remmawii te ka sawm ve laklawh si a, ka lumsak ngei ngei a ngai" zangkhai vah hian a ti a, an pindan bang hi plywood chauh a ni a, u Buanga nena kan inhnialna kha an hriat phak vek ka ring. Nu Partein min duhsak emai ka lam a ţang tho ang. 

Thingpuite kan han in zo a, ka nu'n ka haw tlai a hlauh em avangin kan ţhianho chuan kan inlamah kan phei a, inchhung kan luh rualin, "U Buanga kha hlau tawh reng reng suh u" ka ti nghal a, "Ka hlau pawh a ni lo, kan chetdan kha a mawi lo ve em a, tun thleng hian ka la inchhir. In tan a ţha lo a rawn ti ringawt a, keini lah lo thinrim chiamin mi tam tak hmuhah zak deuhin kan siam a" Sangkhuman a ti bul bul a, "Chupawh nise kum a liam tam tawh e. Kan hmuh apiangin ngaihdam kan la dil zui a nia, kan hel reng hi kan hlauh vang emaw a ti aniang. Tlangval senior ve si a ţawng duh dan a mak e..a ţawngtheih chu thuhran, a rilru a te a nih kha" ka ti bawrh bawrh a, Nutei phei chu awm se na deuhin a chhanglet ang mawle. 

"Pasal neih ţep vel kha principal khan a hre pha angem?" Fawnvelan a ti thung a, ka khumah a rem dan angin kan ţhu ţhap a, an ngui bur laiin, "Hre pha pawh nise a ho emai. Ţawng duh deuh deuh an tam a, kan inkawm tih an hriat chuan hrilh duh tawk an awm dawn tho tho. Pasal ka nei teuh miau a, dawt a ni chuang lo, a ho emai" tih pahin Fawnvela meizial phawrh chhuah rual chuan ka lo ban vat a, ka ţan zui nghal a, "Meizial i zu leh tawh maw?" Sangkhuman a lo tih chuan, "Ka lung a awi loh deuh hian ka zu leh ţhin. Ka zu tam lo ang Fawnvel, a dang ţan duh suh" ti zung zungin, "Pasal i nei ţep tawh em ni an tih leh ka neih loh chhan ka hrilh mai ang" ka ti leh a, Fawnvela a rawn tawlh hnai nghal hawrh a, phawk zeta ka lo en laiin nui vur vur chung hian, "Insawifiah duh khawpin principal i ngaihven tawh tihna mi?" a ti leh tawh a, a hmaiah na zeta lo namin, "Khatiang rilru kha pu reng lo teh, biak hmasak loh chuan min biak pawh a tum loh hi" awki sang deuh hian ka ti a, ka nute an awm lo bawk a thawm dim a ngai hran lo. 

"Fawnvel, principal bulah a nihna bakin Remkalami i fak ţhin em ni a?" Sangkhuman a ti ta chiah a, "A teuh nang aw...ka ţhiannu nen ni daih rawh u ka ti ţhin, thil dang ka sawi lo" pawr zet hian a ti a, "I lo fak vaih chuan a tan a nuam dawn lo a nia aw engmah a ni mang si lo" Sangkhuman a tih chuan ka thlavang a hauh nge min sawichhia tih ka hrethiam lo. "Ni e...engmah ka ni lo, arek pawh ka tluk lo" ka ti chiah chu Sangkhuman, "Khati zawngin ka sawi lo. I lo ngaikawi ange aw, i nihna baka a fak che chuan a beisei sang che ang a, i tan a zahthlak dawn sin. Mahse amah pawh kha engmah a ni loh kha, what a funny thing awmzia pawh a hre lo a tiraw?" a ti sawk sawk a, "Lehkhathiam tam takin an hriatthiam ve loh tur sap ţawng in hmang ţhin miau alawm" Fawnvelan a lo tih chuan, "Ve che hian...i zu ruih changa sap ţawng thumal i hmuhchhuah thar nasat theih nen" Sangkhuman a ti a, kan inhnial zui laih laih hnuah Fawnvelan, "Tak takin principal hi a fel a nia aw...kan inţhenawm a, nitin ka hmu a, rilru kawi a nei lo reng reng, dawt ka hrilh pawn 'aw le' a ti thei zel a, engtik zan nge ka hre tawh lo, 'tihtur a awm lo emai' a tia sachek te min siampui a, a lerh lo aniang phone a en ngai lo reng reng. Chawhmeh kan neih ţhat chuan ka suah ve ziah, ka vaipaden phei chu tui a ti teh a nia" a ti duah a, an lo va han inpawh bik em em ve mawle. 

"I sawi si loh chuan ka zai ve tih te engtin nge a hriat? Idol emaw icon a tel ve turah min ngai lehnghal a, kan khuaah mai mai pawh a tawp berna ka ni a nia" ka tih chuan, "Ka hre bik nang...miin an hrilh aniang chu" a la ti tlat a, "Enteh Remkalam" tih pahin ka banah a rawn vuan a, ka lo en ve vat bawk. "Nei la i inchhir lo viau ang, a ngam lo ang che. Nu Partei pawn, 'Zoram nupui ni thei chu an vannei ngawt ang, amah hi a dam thluam reng a' a ti a nia aw. Thinchhia leh zaidam chu ngaituah la, thil reng reng inmil thlap tur chuan in ang lo a ngai, in in ang lo mai ni lo vin in hrang hlak a, in inmil dawn chiang sa. Ka nu meuh paw'n 'kan principal chu i u Rinchuta ai pawhin hmelţha ka ti' a ti a nia aw. I duh loh chuan i inchhir viau ang" a ti pung pung a, "Ka duh leh duh lo a pawimawh lo, amah hian min duh dawn lo chiang sa. Zaninah pawh what a funny thing vang mai mai a min nuihzat em kha. Tuman min la nuihzat ngai hleinem" ka tih chuan, "A nuihzatthlak alawm...a nuih chuan a haw lo che tihna a ni mai a, lawm zawk ta che. What a funny thing han nuihzat loh te chu a, a atthlak lutuk" a ti a, min sawi rem a tum nasa khawp mai. 

"Han be chhin teh" Sangkhuman a lo ti ve khauh a, "Thut thut a che...message a en ngai lo" ti mah ila, "Ni e...kan awmlai hian han be ve chhin reng reng teh" Fawnvelan a lo ti bawk a, "Ka duh lo e a" ka tih chuan, "A fel em kha...ngaihzawng en a a en theih loh che leh i biak chhan chhuanlam tur a tam emai" Sangkhuman a lo ti vat a, "Midang thu a awm mai mai rual ka ni tawh lo, ka be dawn lo" ka ti tlat chung pawhin, "Midang kan ni hleinem, i ţhiante alawm kan nih" aw dam deuh hian Fawnvelan a lo ti a, min thlem ngat ngat takah chuan phone ka phawrh ta nge nge a. "Eng nge ka sawi ang a?" ti a ka zawh veleh, "Eng nge i tih ti rawh, i phone number a hre tawh tho a, insawi chawp i ngai tawh lo" phur zeta Fawnvelan a tih chuan, 'Eng nge i tih?' ka ti ve mai a, phone chu khaikhup zawngin khum bula dawhkanah ka dah chawrh a, min chhanlet ka beisei lo va, ka nghakhlel lo bawk. Sangkhuma erawh in phone chu a kuai zangthal a, min rawn chhanlet hun an ngaichang ran a, ka nuih a za zawk. Ka nat leh khawhar hlau reng rengin an awm ţhin tih chu hria ila ka duh vak loh pawh ka kawp mai tur a nia. Principal a rawn awm hnu hian ka khawhar an hlauh zia ka hre ve chauh a ni. 

"Hei a rawn chhanglet che, message pahnih lai a rawn thawn" min pawh sawk paha Fawnvelan a tih chuan ka en thuai a, 'Lehkhabu ka chhiar' a tih hnuah a lehkhabu chhiar lai thla chu lain a rawn thawn tel a, "Chhang let rawh" ka ţhianten an tih laiin 'typing' a inti kalh a, "A message dang lo thleng leh law law rawh se" ka ti a, kan nghak ţhap mai. Hria se chu a zak viau ang. 'I dangdai angreng e' a rawn ti chu ka ţhiante an phur khawp mai a, kei erawh chuan han phur hluai chhan tur ka hre lo. "Ngaihsak deuh anga i awm loh nan chawl la, nakin deuhah chhang chauh rawh" Fawnvelan a lo ti leh a, "In mak emai" ka tih chuan, "Kan mangang hman a, kan khaw tlangval te lah i hriatchian sa vek an nia, tumah i duh mang si lo. Kan khua i chhuahsan ngai loh vang hian 'a nei tawh dawn lo a nih hi' kan tih loh leh, 'a khua a har angem le' kan tia, engpawh ti ila bet lo deuhin kan ti zel a, principal a rawn awm chiah kha chu, 'Remkalami ka biak tir dawn khawp, a khawhar hnemtu atan pawh a ţha hrim hrim' kan tia, hmelţha lo mah se biak tir che ka tum lawk sa. Mahse i hmelţha tih zawng a lo ni hlauh a, hmuh ngai ngawr ngawr lo, mi hran daih han biak vel te hi a nuam ve a, eng mi pawh nise, hmelţha emaw hmelţha vak lo pawh, kan duh emaw duh lo emaw, mi thar biak chu a nawmna chin a awm ve hrim hrim. In induh tawn hlauh phei chuan kan rilru a nuam ve tawh ang a" a tih dap dap hnuah Fawnvela chuan min kuah thak a, "In inkawp ngei dawn e tihna a ni lo, principal i biak ve hrim hrim hi i tan a ţangkai dawn, i duh loh viau leh zirtirtu lo awm thar a awm tho a, chu chu i bia ang a, rilru lak pen nan hmang rawh. U Zirbawnga i la ngaihtuah tih kan hrereng" a tih leh chuan, "A awihawm loh emai" ka lo ti vat a, "Inhmuh thut hun te a awm thei a, nangmah chauh chuan hrehawm i ti ang. Kan thu awih la a ţha a ni mai. Hmelţha i tih em kha, mahse ka sawi tawh ang khan bialnu a neih chuan be lui suh, mi pawt ţhentu i lo ni hlauh ange" Sangkhuma zawkin a lo ti a, "Nu Partei sawi hmangah chuan a neih loh hmel. U Rinchuta ang chi tho a ni, a chut ve kher lo a, a chhaw thung a" tiin Fawnvela a nui hawk hawk a, min ngaihtuah em em tu ţhian ka nei hi ka vannei takzet a ni. Hei vang hian alawm an thlavang ka hauh hlur ţhin ni. 

Kalvari kan ngaih deuh vangin kan video call a, a rawn lan rualin, "Enteh my friend, u Buanga khan Dawnfuha nausen laia kan grape juice in ţuma kan tih zah vak ţum kha a la hria mawle. Zaninah min ţawngkhum leh hlak kha" ka ti nghal a, "A va'n hre rei em em. U Buanga kha chu ngaih khatah ngai rawh u, a damchhungin a ţawngkhum reng ang che u" a tih laiin u Rinchuta a rawn lang ve a, kan ri nghal hlut mai. 

"Yo yo my friend Chut, ţha maw?" Fawnvelan a kut thing chung meuha a tih chuan, "Ţha lawm my friend Fawn" a rawn ti a, Kalvari in, "In hria maw? A chut tawh bik lo, in biak dan a zir zelin a chhang let nghal thei tawh che u" a ti a, a intithei nasa. "A hminga youtuber nih ve chuan kan han ti leh hlut ţhin" Fawnvelan a tih laiin Kalvari chuan, "Principal chu eng nge chanchin?" a rawn ti leh a, an ina thingpui kan in thu te kan sawi chuan, "A va ţha ve aw..amah hmu tur hrim hrim a rawn zin ka chak" a ti chiah chu a dak awrh a, Dawnfuha rawn lang vuaiin Kalvari in a ban a vai rualin a tlanchhe nghal a, "A na thei lutuk Dawnfuh" a tih laiin u Rinchutan, "I nu samah kek lo la, a hmaiah beng tawh lo bawk rawh ka tih kha" khauh zet hian a ti a, Dawnfuha nui ri kan hriat chu u Rinchutan, "Ka hrem dawn che" a tih rualin a tawp ve hmak a, keimahni min rawn en a, "Muttui u...yo" a tih hnuah a kalsawn nghal a, Dawnfuha a rak zui teng tung mai. 

"A hrem tak tak dawn em ni a?" nui chunga Sangkhuman a tih chuan, "Hrem dawn e..nu te sama keh te chu a dik hleinem. Ka hmaiah te a beng thut zel a, fiamthu thawh emaw a in tia, mi tih dan a zir mawle. Naupang hian an hmuh apiang an entawn a, hrem lohin a sim thei nang. U Rinchuta hian a hrem zen zen lo a, a hrem tawh chuan ka inrawlh ngai lo" a ti a, an in hruai hrang ta aniang a reh dûk tawh. "A ţhat chu..hrem rawh se. I sama a keh leh chuan beng fawk tawh rawh. I en liam mai mai chuan a sim thei lo vang. Mi tihdan ţha lo thlenga a entawn zel chuan khuahkhirh deuh rawh" ka lo ti ve a, "Mi hian an lawm a, an hruai chhuak leh ţhin a, u Rinchuta pawn min hau fo mai. Fa enkawl harsatzia chu in neih ve hunah in hre mai ang. Dawnfuha piancham a hnai a, lo zin ula, u Rinchuta hnenah 'sumo chuan man tum sak rawh' ka lo ti ang. Nutei leh Puipuii kan hrilh ve bawk ang a a nuam dawn a sin. Kumin bak kan lawm tawh kher lo ang a, u Rinchuta hian kumtin a lawm ţul a ti lo a, 'kan inren thiam leh naupang tan vek a nia, zirna ţhaah te kan zirtir ve duh ang a' a ti deuh tlat zel a, ţul lo a pawisa hman a phal vak lo. 'I la thawk chhuak thei a' ka tih pawhin, 'ka la pension dawn' a ti tlat zel a" a ti duah a, kan chhan hma hmain, "A kawm reuh lutuk mah se a fel ve na chu ka pite hi thla tin a thawn ţhin a, ka pite mai bakah keima'n 'a ţul lo thawn reng a ngai lo' kan tih pawhin a thawn tho zel. Nitin a be bawk a, hetiang kawngah chuan ka tluk lo. A chhungte, a bikin a nu te lam nen hian kan inpawh tak tak thei lo a, han pawh viau tum pawh hian an inla hrang tlat zel. U Mama leh u Mala phei chu Kolasib a kan haw ţum pawhin ka be mang ngai lo, biak hian a rul tawk chiahin min chhang a, an awmdan hi ka hrethiam lo. Sensiari leh Vani an fel em em thung a, u Zirbawnga nupui--" a ti a, sawi zawm loin a ngawi daih a, nui hak hak chunga, "Sawi mai mai rawh" kan lo tih takah chuan, "U Zirbawnga nupui hi a fel reuh a, an nupa chanchin hi sawi tur a tam. U Mala nupui leh u Mama nupui hi an inkawmngeih a, an inla senior deuh tawh bawk a, an hnenah a vui ngam lo aniang ka hnenah a rawn vui ţhin a, u Zirbawnga hian zu a nghei tawh nain inngaizawng mang lo a inhruai ve ringawt chu an la inpawh tak tak lo aniang hrehawm a tih thu a sawi nasa ţhin" a ti malh malh a, u Rinchutan, "Riri" a rawn tih tak vangin a ngawi daih a, chu chu hrethiamin, "In chhangchhe ta lutuk a nangni chu in ri lung lung reng mai. Nakinah kan inbe leh dawn nia, i fate kha buaipui rawh" ka ti ta daih a, "Nia...chanchin min lo hrilh ve zel rawh u aw kan lo phur ve tehmai a nia. Dawnfuha piancham chu lo kal tum ru aw, u Rinchuta pawh ka hrilh nghal dawn" a ti a, kan inmangţha ta thuai a, phone ka dah chiah chu Fawnvelan, "U Rinchuta nu hi a fel vak lo aniang" a ti halh a, Kalvari pawh kan ngaihtuah ve ţhin khawp mai. 

"Nakinah an la insiamrem ve mai ang" ka ti liam puat a, "Zu in nasat lai, rilru mumal loh laiin nupui a nei ve ringawt a, u Zirbawnga chu a inchhir tawh khawp ang" Sangkhuman a lo ti thung a, "Inchhir ang, 'nupui a nei dawn' an tih khan mak ka ti reng a, inthup ţit ţet chi a ni ve si lo va, a nupui chuan hrehawm a ti khawp ang" ka tih chuan Fawnvelan, "An inneih rei pawh ka ring lo" a lo ti ve bawk a, "Kalvari chu lehlamah chuan a vannei, hmun dangah an awm daih a, u Rinchuta a fel nen an mak ngawt alawm. Chhungkua leh mimal pawh, ţha famkim kan lo awm lo a nih hi. Principal chu maw?" a ti leh tawh a, "Thu pangngai i sawi dawn emaw tia" ka tih chuan, "Be ţha rawh aw...Kalvari te nupa hlim zia ngaihtuah la, i duh hlawl loh leh midang, mi fel tho a ni mai" a ti a, nui vur vur chung hian a tho a, Sangkhuma chu kaitho ve nghalin thingpui in tawh lo vin an haw a, Kalvari ka biak hi chuan kan han inbe zo hi a reh zual riauin ka hre ţhin. 

Muthmunah principal message chu ka en nawn leh a, 'Engti zawnga dangdaiin?' tiin ka chhanglet a, phone ka khawih khat, whatsapp ka en ngai lo ti ve si ka message chu a en nghal a, 'I letling' tih zawngin min rawn chhang let a, biak a nawm rualin han biak vak a har tak tak a ni. Mi a be bo vek zel a, a thusawi hi ka hreţhiam ţhin lo. 'I huai hmel' a rawn ti leh a, zanin a thil thleng vangah khan ngaiin, 'U Buanga thiam loh a nih kha' ka ti ve ngat a, mittui tla pur a nui lem min rawn thawn hnuah, 'Muttui le' a rawn ti a, a duh hun hunah muttui a tia, kan inbiak leh veleh keiman muttui ka ti ve tawh ang. 

Zingah nu Partein min rawn phone ve thung a, "Vawiinah lo leng phei la, facial te min tih sak ang a, i lo len loh chuan a reh" a rawn ti a, keimah chiah an in a leng ţhin ka ni si lo va, mi a ngai bik lutuk hi mak ka ti ţhin. "Chhunah ka buai dawn a, tlaiah ka lo kal ang" ka tih chuan, "Aw...i hman hun hunah a ni mai. Thil tui deuh ka siam a nia" a rawn ti leh tawh a, chhunah engmah ei loh a ngai a ni mai. 

Tih tur awm ang ang ka ti zung zung a, aieng siam sa fridge a ka rem tlar ţhât chu ka chhiar a, bazar niah Sangkhuma pheikhawk siam nen ţhutpui leh tawh a ngai a ni. Ka nu vaihlo zial sa ka ţawn leh hnuah chhuat ka nawt a, ni a sa ţha bawk a zinga ka insuk pawh a ro hman vek. Tih tur ţul zual ka ti zo ta maw tihah ka nu hnenah, "Nu Partei facial ka tih sak dawn a nia" ka ti a, "Min tihsak ve rawh, ka sawi apiangin i peih lo a, ka hmai duk te hi a nasa leh dawn" a lo ti ve nghal zat a, "Hmai duk rehna Aizawl a mi ka chahsak che kha hnawih ţha rawh" ka tih chuan, "Ka hnawih reng alawm. Facial chu min tih sak ve ang che, naktuk zan kohhran hmeichhe inkhawmah ka ţan dawn a nia" a ti a, ka remti ve ta nge nge a, a phur khawp mai. 

Nu Partei te in lama phei pahin Lady Dianas Inn ka bia a, "Aieng in hralh thei em?" ka tih veleh, "Aw..kan hralh ve zel. Thawmhnaw a lo thleng a, Instagram ah khan lo en ve rawh" a rawn ti a, a duh apiang hmuh theihin alawm le an dah le tiin, "Ka lo en dawn a nia, in thleng thar reng bik mai, a mawi thei si, rual min ti awt" ka ti a, ka nui pah har har a, "Duh i neih chuan kan thawn thei vek a nia aw" a tih chuan, "Aw...ka lo enchhin ang" ka ti a, aieng min zawrh sak char char bawk a ka chah ve reng reng ang. Indawrh tawn te hi a ţha ve a nia. An thawmhnaw a mawiin a tlo bawk a, ka inchhir ngai lo. U Zirbawnga leh Maski te khan keimah vangin an hre bel ve a, ka tel lo a Aizawl an kal pawhin an dawr ve ngat zel. 

Huma chhuah a hlau leh tawh aniang nu Partein kawngkhar a lo khar phui leh ţhap tawh a, "Nu Parte" tih paha ka kik chuan, "Ka lo hawng nghal" a ti a, a rawn hawng vat reng bawk a, "Facial chu i ti duh tak tak maw?" ka tih chuan, "Duh e...ka thil siam hi lo en lawk teh" tih leh min kaih a rual a, dawhkan lamah min kai pheiin dekchi chhin a hawng a, a intihtheih ve nen ka nuih a za angreng. Chaw hlawm hi artuiin a plaster a, ka hre ngai lo emaw a ti a ni ngei ang. "Leilet buh hlir kan ei a, a tui si a, ka paih ui a" a tih chuan, "Keini pawn kan siam ţhin alawm, tui kan ti lutuk" ka lo ti ve a, "A ţhat hlauh chu, thingpui ka'n lum nghal ange" a ti a, keipawh dawhkan kila ţhuin pawn lam ka thlir pah a, kan upa tial tial a, kan khua hi a reh tial tialin ka hre mai. 

Thingpui min rawn chhawp sakin nu Partei chuan, "Nizana in inhnial ri kha kan hre pha" a ti a, ka rindan vel a ni. Kan ţawng ring a, hre pha lo se chu a mak viau zawk ang. "Ka pindan aţangin Zorama message ka thawn alawm" a tih chuan, "Ngati nge a?" ka lo ti a, "Aw..ka ngaihtuah che u. Buanga a ţawng lung lung a, nuam lo in tih ka hlau. Zorama hnenah message in 'chhuak vat la thu dang va sawi daih rawh' ka ti a nih kha. Ih e...tunlai mipa ţhenkhat hi an mak tawh lutuk a, fel tak tak an tam tehreng nen fel lo leh ţawngtam deuh deuh hi an langsar si a, a buaithlak tak tak a ni. Liana leh Tuaia chu an nih ve chuan miah loh kha" a ti sar sar a, ka pawm zawng tak a ni. 

"Engahmah ka ngai tawh lo, nizan aţang khan ka hlauhna leh zahna a bo tawh. A duh duh a sawi ngam tawh lo ang" ka tih chuan a lo bu nghat nghat a, pasal chungchang kha min zawh ka rin nen engmah a sawi tawh lo. An pindan ve ve aţanga an nufa a a ruka message an lo inthawn ve char char chuan nuih a ti za, nu Partei hi chu a fel ngawt mai. 

"Fanu ka awt ve ţhin a sin aw. Ka hrisel lo a, fa pahnih bak ka nei thei si lo a, nangni ang rual hi ka kawm tam lem lo. In rawn tlangnelin Fawnvela phei chu nitin deuhthaw a lo kal a, ka ngainat zawng tak in ni bawk a, Sangkhuma pawh tukinah ka hmu a, 'lo leng ziah rawh' ka tih kha. Pheikhawk siam te a lo thiam a, a changkang tak tak a ni" mak tih hmel deuha a tih hnuah, "Thiam thil in nei vek a a lawmawm. Fawnvela youtube channel pawh ka subscribe thlap kha aw. A video te kha ka en vek tawh a nia, nangpawh ka hmu che" phur zet hian a ti a, a nui har har a, nu ţawng duh ve tak tih takah, "Ţul lem lo mah se nangmahni vanga ka lo zin fo ka ring. In lamah min mamawh ve si a, ka haw har tawh lo ang a, in ngaihawm viau ang. Ka awm loh pawhin Zorama hi lo tlawh ve zeuh zeuh rawh u aw, nangni ho in awm hnai hlauh a thla a muang, hmun dangah a awm fo nain mi han nel bawrh bawrh chi a nih loh vang hian ka ngaihtuah ţhin a, ţhiannu Mawi sacheki pawh ka chah uluk teh a nia" a ti leh zung zung a, principal chu nu a nei ţha khawp alawm. 

"Rawn ngaihtuah reng reng suh kan awm hi. Rawng a bawl mang lo maithei a ni" fiamthu a ka tih chuan, "A va vannei dawn ve, in ti pangchang vek ange aw, a nuar vel ange" a ti a, kan nui dun bâwk bâwk a, "Tak taka, in awm a kan thla a muang tak tak a nia. Hmuh phak loh a fate an han awm hi chu ngaiah a neih theih tak tak loh. Zorama phei chuna chhaw angreng si" a ti mauh mai a, mak ka ti tih a hria aniang chu, "A chhaw han tihah a awm mual mual a, a ngaihven loh lam zawng ngaihven luih tir a har a, chutiang chu" a ti a, za vak lo a a nuih takah chuan ka lo nui lui ve hak hak a, min ngaina der ve hi a ni aiin ka lawm daih zawk.

Facial chu ka tih sak ta ngei a, mi aia thiam fal bik si lo hian ka ti thei ve zul a, ka pa phei chuan min fiam min fiam ţhin. Nu Partei lah chu, "Ţawng rih suh" tih reng a ngai a, nau awm te pawh ka ang alawm le. Ka tih zawh dawn lamah kawngkhar ri rakin principal a rawn lut hlawl a, rin loh deuha min hmu chu a ding ve chawt mai. Min be lem lo va muangchanga rawn kal hnaiin kan thil tih a rawn en a, nu Partei lah a mu zan a, keiin uluk em emin a hmai ka nuai bawk a, kan thil tih a hmuh vek tawh hnuah, "Eng nge in tih?" a ti leh hnuhnawh a, a ngaihven loh zawng chu a hre lo hle tak tak mai. 

"Ka hmai kan facial a nih hi" nu Partei zawkin a lo tih chuan, "In va peih mai mai e aw" a ti a, chutah ka hminga min ko mai lo vin ka darah a rawn kheuh zeuh a, nu Partei hmai nuai reng chunga dak vaha ka lo en chuan, "Thingpui i in tawh em?" a ti ve ngei a, a awmdan chuan nuih a ti za angreng hle. "In tawh e...ka awmna a rei tawh alawm" ka lo ti mai a, min chhan tak lohah chuan nu Partei hmai bawk ka en leh a, ka ţhutna bul lawka ding a nih avangin principal pawh ka en zeuh zeuh a, a hmel tak erawh dak lo chuan ka hmu thei lo. Ka en rei ngam hauh lo nain a kutzungţang nalh leh fai sar mai te chu ka hmu hman a, a sana bun nen te chuan a inremin mipa kutzungţang nalh deuh hi chu a hmuhnawm bik. 

Ka hming a hre lo nge ni ka darah bawk min rawn kheuh leh chuan a hmel en tumin ka dak leh vah a, min biak loh tawp a hreh aniang chu inthlahrun hmel deuh hian, "Thingpui i duh leh em?" a ti a, nu Partei a awm ve bawk si, keimah zawk ka zak viau a ni. "Ka duh tawh rih lo" ka tih chuan a nui suk a, pindan lamah kalin a lut ta daih a, a zak pek aniang chu. 

"Nu Parte, principal hi kum engzat nge a nih tawh? Ţawng rih suh aw" tiin a beng zawnah ka phun sar sar a, zawi tea nu Partein a kum zat min hrilh chuan mak ka ti ngei mai. Kei aia a upatna a tam hauh lo. Fawnvela sawi kha a dik chiah a nih hi. Maski nen an inrual vel ang. A la puitling khup bik lo ka ti reng a, u Rinchuta nen kan tehkhin fo tak nain landanah te, ţawngkam leh thil dangah pawh u Rinchuta a puitling daih zawk. A ngaihven loh zawng hrethiam hleithei lo chi a nih phei chuan lo ngaizawng mah ila chiang kel kawl a ka hrilh a nih loh chuan a hre tawp nang. 

Kan zawh fel hnuah pindan aţanga lo chhuakin bualin a pan ding nghal a, nu Partei chuan a hmai tuai chung hian, "Vun thar hlak ang vel a ni. Engzat tur nge?" a ti a, a man zat ka hrilh veleh, "A va tlawm ve...inţhenawm reng ila ţha tur. I thiam e...a tlawm bawk si. Ka fanu chu ni la ka nalh kumtluan zel dawn a nih hi. Hmun danga ka tih tir aiin nuam ka ti daih zawk. Hmai nei lo ang vel ka ni" a ti a, uar mah mah mah se a lawmawm tho tho. "Aaa...nu Parte, hmai chu kan pianpui alawm" ka tih chuan, "I thiam zia ka sawina a nih kha, a thiang kâk mai" a lo ti vel a, principal in hria se chu a nuih a za leh ang chu. 

"Thingpui in leh phawt ila haw chauh rawh" a ti leh tawh a, an thingpui duh dan hi mak ka ti. An inzawm zat rengin ka hre mai. "Ka in chak tawh vak lo" ti mah ila, "In chak ang, min tlawm nasa si, thingpui chu i phu ve hrim hrim" a ti tlat a, a lum nghal mai dawn emaw tih laiin inchhunga a pangpar dah chu min kawhhmuh a, hmu tawh tho mah ila, "A va mawi ve" ka ti tho a, "Keichu ka uar amaw...Kolasib a i lo zin hunah kan inah lo leng la, ka hmuh tir ang che. Inchung zawlah a khat dul mai a ni" a ti a, rei deuh a ti ti hnuah principal inbual zo pawh bualin aţangin a lo chhuak a, "E...ka theihnghilh, thingpui chu ka'n lum ange" a ti leh chauh a, "Ţhu rawh Remmawi, a rei lo ang" a tih chuan principal in, "Ka duh lo a tih kha" a lo ti ve khauh a, hmai kan facial lai khan min zawt tak alawm. "Tu nge ka duh ti ngai?" pawr deuha nu Partein a tih chuan, "Ka duh ti ziah rawh" a ti a, pindana reilote a luh hnuah rawn chhuak lehin dawhkan a rawn kil ve a, "Zanin i inkhawm dawn em?" a ti ve ngei bawk a, "Khawm lo ang" ka tih chuan, "I eng nge na?" a lo ti vat a, min be bo leh dawn e, a mak thei tak tak a ni. 

"Eng nge awmzia?" ka tih chuan, "Damloh lai baka inkhawm ţhulh ngai lo angin ka hria che a, i va fel ve" a ti a, ka mitthlaah Fawnvela bak a lang lo. "Chutiang a ni lo" ka tih chuan, "Ka ti tawh lo ang a ti" a la ti tak deuh deuh a, "Tuin maw?" ka tih veleh, "Buanga" a lo ti a, a hau ve ngei em mawni le?

"A mawl em a nih kha" nu Partein a lo ti ve zeuh a, ani hian min hrilh loh a nei chiang a ni. "Tunlai chu ka inkhawm khat" tiin principal chu ka hrilh a, "Rin aiin i lo fel a, hmelţha bawk, fel bawk" a tih chuan kâ hau hian a lam ka hawi a, a nui mang bawk si lo, nu Partei ka en leh a, zai rât rât chung hian thingpui a siam daih a, "Tuin nge fel min ti a?" ka tih chuan, "Miin" a lo ti mai a, Fawnvela bak a ni lo ang. Sawi lo turin an lo inhrilh ve ngei a nih hmel, ka man thiam ve vek sia, Fawnvela ţang ulh leh lutuk hi chu aw. Min fak nasa lutuk a principal pawn min hmu hmelţha vek tawh. 

Nu Partein lengah min sawm ngun bawk a karkhat a liam leh meuh chuan principal nen pawh kan in nel viau tawh a, fel min ti a, fel ka tih ve tho vang aniang kei pawhin ka hmu hmelţha zual a, kan khuaa awm ve tawh lo Kalvari leh Puipuii an phur hle bawk. Nu Partei leh Fawnvela te nufa an inkawmngeih em em bawk a, ka ngaihbel nge nu Partei hi Fawnvela te lamah ţangin a zei sawt riauin ka hria. U Buangan pasal neih chungchang a sawi kha min la zawtfiah hauh lo bawk. 

Ka mu hle hle lai ka ţhianten min rawn tur chiam avangin principal chu biak ka tum a, amah zawkin muttui a rawn tih leh ka hlau chuan, 'Eng nge i tih? Muttui le' ka va ti nghal a, vanneihthlak deuhin, 'Ka la mu lo' a rawn ti. "Eng nge i la tih?' ka tih chuan, 'Lehkhabu ka chhiar' a ti a, a lehkhabu chhiar lai bawk min rawn thawn lehin, 'I chhiar ve ngai em?' a ti a, hmelhriat ţha satliah ang chauhin min ngai a, nu Partei zarah min kawm nel viau tawh bawk a, ka ţhiante an phur em em thung. 'Ka chhiar ngai lo' ka tih chuan a reh vang vang a, min chhang tawh dawn lo emaw ka tih hnuah, 'I va ti ang lo ve' a rawn ti a, peih lo chung chunga min chhang let a ang ber tawh. 'Muttui le' ka tih leh, 'Ka la mu lo' a rawn ti zel bawk si. 'Min fiam kual mai mai a ni maw?' ka va tih chuan, 'Muttui le' a rawn ti a, keima hriat tham lekin, "A tihdan mai mai chu le" ka ti a, ka nui ve var var mai. 

Zinga ka harh rualin ka nu tv en ri ka hre hmasaber a, zana kan inbiak vang nge ka mumangah principal ka hmu hlawl mai! A zawng zawngin ka hre tawh lo na a tlangah kan lo lawn dun tih ka hria a, kan thusawi phei chu hriat ka nei tawh lo. Ka thawh chhuah hmain, 'Tlangah i lawn ngai em?' tiin message ka thawn a, a en lawk lo bawk a tho chhuakin thingpui te ka in a, ei ka rel zawh hnua phone ka en chuan a message lo awmin, 'Hmun sang ka hlau' tih zawng a ni a, mumang awmze nei lo tak a ni. 

Nu Partein, "Ka haw ţep tawh si a lo leng phei rawh" a ti a, inrinni a nih avangin ka buai ve deuh a, ka nu puiin a ţul ang ang ka ti ve a, puan ka pho laiin nu Partei bawkin min rawn phone lehin, "Aieng kha ka hawn ve duh a, ka lo dawr ang che. I lo keng dawn nia" a rawn ti leh a, "Aw..ka buai lawk a, ka lo phei ang" phur deuh a tiin ka pho sawk sawk a, ka nu lahin, "Ngah nge i ţhen ţhaw reng a?" lo ti hmukin a hnathawh kawr bik chu a thing ţhat ţhat a, "Nu Partein aieng min dawr dawn a, thawhţanah a haw tawh dawn a nih chu" ka tih chuan, "Meizial te duh ve se ţha tur, an zuk loh hmel si a, i len hian eng nge i va tih ţhin a?" a ti ta nge nge a, min zawt har ka ti reng a ni. 

"Nu Partei nen kan inkawm ţhin" ka tih laiin ţhenawmpa, ka pa Khawtea chu a zai ţial ruai ruai a, amah kan hmu phak lo nain an in lam hawi chung hian ka nu chuan, "Saw riai ruai lah saw...chhun pachang aţanga a beih hi chuan ka ni nghulh zel, woofer ai pawn a zai ring zawk" a ti hlak hlak a, a thusawi hre phak chuang hauh si lo hian pa Khawtea chu a zai uar sauh a, ka nu thin a rim kher mai, "Mi zai mai mai lo huat viau tur a awm em ni?" ka tih chuan, "Ţhenawmte beng tikham khawpin zai kher lo se la" pawr zeta a tih hnuah inchhungah a lut a, ka luh ve rualin facial a lo ngen leh tawh. "Kan tih tawh kha, tih ngun lutuk a ţha hleinem" ka tih veleh a hmai tuai nauh nauh chung hian, "Ka hmai a la thap hrup tho, i nuaina kha a ţha lo bik aniang" a lo ti a, "Nu Partei hmai leh i hmai khaikhin mah ta che, hna in inthawh nasat hleih lutuk. Nangchu ni sa hnuaiah nitin i chhuak a, a chang leh i feh a, a la ţha ve mai ang" ka ti a, min hnialna chu ka ngaithla peih tawh lo. 

Tih tur zualpui ka tih zawh hnuah aieng ka khai chhuak a, Sangthanpuii ka la tawk zui. "Khawiah nge i kal dawn?" a ti lauh a, amah vekin, "Lo len ka tum a" a tih leh chuan, "Principal te inah ka kal dawn nu Partein aieng a duh a" ka lo ti vat a, min tlawh ngun lutuk a ka ho leh zo vek dawnin ka hria. "Ka lo kal ve dawn" tih leh ka bana kuah a rual a, "A ngai hleinem" ti mah ila, "Aaa...kalpui i phu ve alawm" a ti deuh tlat a, tlawmngai viau mah se ka lenpui chak tlat lo a ni. 

Nu Partein kawngkhar a rawn hawn ruala Sangthanpuii nen a min hmu chu, "Lo leng rawh u, in ngaihawm dawn hle mai" nui var var chung hian a ti nghal ngawt a, principal pawh tv hmaah a lo ţhu a, lehkhabu a chhiar thung. Kan thawm a hriat ruala lo hawichhuakin min be lem lo vin zaizirin ţhutna tur min kawhhmuh a, Sangthanpuii lahin nghet deuhin min kuah a, loh theih lohin ka ţhutpui a, "Min thlah tawh rawh" ka ti sap a, kan ţhu fel tawh chung pawhin min kuah nghet lutuk a ka che hleithei chuang lo. 

"Remmawi, ka haw hunah pawh lo va leng phei ţhin rawh aw. Engemaw thutah a ţangkai takin Zorama nen hian phone number te inpe ula" phur sarh a nu Partein a tih chuan, "Nia...a phone number ka la nei lo a, nei mah ila biak nachhan tur vak a awm chuang lo, kan inhnaih a ka au vak zel mai ang" ka lo ti sawk sawk a, nu Partein ka polythene khai min laksak laiin principal chuan mak tih hmel deuhin min lo en a, "In pe ngei ngei rawh u, thil thleng palh a awm thei, phone ţangkhaina a ni ve a" nu Partein a tih leh chuan, "Aw, kan lo inpe ang, ngaihtuah reng reng suh, min mamawhna a neih vak ka ring lo, Fawnvela te pawh an awm a, mahse ka number ka lo pe hrim hrim ang" ka ti leh zung zung a, principal ka va en leh chuan mak tih hmel deuh hian min lo la en a, a bangbo tih ka hre mai, kan inbe reng a, muttui le kan ti chamchi a, a phone number nei lo anga ka insawi chu mak a ti ni hmiang ka ti mai. Nu Partei lah hian a hre lo der nge a hre lo tak tak tih pawh ka hre lo. Fawnvela nen hian a rukin an fing kar a, min sawi zawm an tum ngat ngat mai a ni. 

"Aieng chu ka'n enchiang leh ang e" tiin nu Partei a kalsawn a, polythene chu dawhkanah dahin min hnungchhawn zawngin a ţhu kher a, Sangthanpuii chuan, "Phone number ka pek che kha i ti bo em ni?" a ti a, min rawn hrilh ru sar sar a, "Ngawi mai mai rawh" ka tih laiin nu Partein, "Remmawi" a rawn ti thut a, "I ţhiannu kha a lo kal khat bik a, tu nge a hming kha?" tih leh pahin a rawn hawi a, "Sangthanpuii" Sangthanpuii zawkin a lo tih chuan nui var varin, "Lo kal rawh aieng hi min thlan pui rawh" a ti a, a hui zauh rualin Sangthanpuii a tho nalh a, principal hmuh loh tura a kutzungpui min hmuh zauhin a mit a la siai zui a, nu Partei lah hi aieng inang vekah han thlan vak tur a awm loh nen, tu pawh mai hian min vei ni berin ka hria. 

Ka bula ţhu si lo vin principal chu a tawlh hrut hrut a, ka ţhutna hnaih deuh a a rawn tawlh thlen hnuah ţhutthleng bana a ban nghatin a rawn kun hnai a, "I va dawheh reuh" zawi sup a a tih chuan, "An hriat a ngai rih hleinem" ka ti liam satliah a, a chek tlak tlak mai. "Thudik ţan tlat mi i nih kha" min ti a, ka nuih a za zawk. "I lo awmna a la rei loh nen min van hrechiang hman ve" ka tih chuan, "Thil ka hresual ngai lo" a ti ve ngial a, a la hresual vek tih a hre der si lo.

"Principal hi i rawn awm hlim khan patling deuh turah ka ngai che a, i la naupang hle sia, rin ai daihin i hmelţha bawk a" ka tih tak daihah a ţhut ngil auh pahin a tukhum a tuai a, "Kan khuaa zirtirtu lo awm tawh te anga chhe ve deuh turah ka lo ngai char char che a" ti a ka nuih luih hak hak laiin a aw a thian kharh a, "Hmelţha vak lo" ti supin a kut pahnih a malchungah a dah leh a, tlem a kun deuh chung hian a kut chu a khal a, "Awii...i ţha alawm" ka tih chuan a nui deuh ni maiin ka hmu. A lawm ve hle a ni ngei ang.

"Hmeichhia ve si i mak reuh e" tih pahin min rawn en a, ka lo en ve reng vangin a mit a la sawn lehnghal a, mipa zawk a zak em mawni? Nui paha a mal a kheuh zeuh chung hian, "Bialnu i nei ve tawh em?" ka ti a, a lama kun phei da chungin ka ngaichang ran a, min chhang duh lo ngei bawk a, "I tihdanah khan i nei tawh chiang mai" ka ti leh a, a zakzum tih han hriat takah chuan chhaih kual vel a nuam dawn riau. "Kei aiin i dangdai daih zawk. I hmelţha i tia, hmelţha ka tih ve chein i zak daih a" ka ti a, ka nui kar kar a, ka duh em em vang pawh ni lo vin a nuam a ni. 

"I zakzum ve thoin ka lo hria a" a ti tawi tak tawh a, ka chanchin a hriat loh dan hlirin ka awm si a, mak a ti ve viau ang. "Zakzum vak nang, a hun leh hmun a zir te aniang chu. Hmeichhe chhaih laih theihin awm tawh reng reng suh" ka ti vel a, "Inrin loh laia hmelţha intih thut te chu" a ti a, a hmui a liah zauh hnuah a nui ve ta nge nge a. "I inkhel ngai em?" ka tih leh takah chuan a lu a thing a, "Football te?" ka tih pawhin, "A en bak ka thiam lo" a ti leh a, u Rinchuta aiin a tlaw daih zawk a nih hi.

"Rawngbawlna lam i kalpui nasa em?" ka tih chuan, "A hranpain ka bei vak lo" a ti ve mai a, a awmna lamah ka la kun dâ reng a, a nihna ang anga thil sawi phawng phawng chi a nih vangin ka ngaina zual a, fing kara ngeiawm deuha thil ti ru chi a nih loh hmel bawk. "Kan inah lo leng ve rawh" ka tih chuan phawk deuhin min en a, zahzelah, "In nelna zel a nia, i nu a haw chuan i khua a har dawn a sin, mahnia tawm sen reng i peih em ni?" ka ti leh zaih zaih a, a hmai vun rawng lah chu a dik lo deuhin ka hmu a, "I hmai kha" ka tih veleh hmalam melh ran chungin a biang a tuai a, "Aieng i phih fai nange?" tiin ka nui duai mai. Ka aieng siam a lo inhnawih ve ngei a nih hmel. Keimah chiah ka ţawng char char chu dik lo deuhin hre mah ila nu Partei leh Sangthanpuii an rawn hawi duh si lo a, ka ţawng loh chuan principal hian min be lo tawp ang. A la zahzum hmel em em zui. 

"I siam tak mah mah a nih kha" a tih veleh, "Phih uluk ve la" ka lo ti a, "Vawi5 ka phih tawh" tih hmuk pahin a kutphah min hmuh a, "A ţha dawn awm em?" ka tih chuan, "A eng zualpui hi reh se a hriat ang" a ti duh lek chauh a, ka lo siam tak mah mah em mawni? 

Nu Partei pawhin, "Remmawi" a rawn ti ve ta nge nge a, thaw a pik rei tawh bawk a eih lauh pahin ka tho nalh a, an ţhutnaa ka va phei ve chuan, "Pa5 ka lo dawr ang che. Kolasib ah ka awm rei takin inthawn vel a buaithlak maithei a, a hing ang tih te a hlauhawm. Ka hman sa pawh ka hawn vek dawn a, Zorama sawn a duh ve leh a hranpain i zawrh mai dawn nia" awmze nei zet hian a ti zung zung a, pawisa te min pek fel hnuah kan chhuak a, pawn boruak ka hip chiah chu khua a lum viau nain ka dai sawng sawng mai.

"Principal phone number kha i ti bo em ni a?" Sangthanpuiin a ti ţha leh a, "Ti bo lo...a phone number nei anga insawi a zahthlak ve alawm" pawr zetin ka lo ti ve a, nu Partei khan lo hre lo der pawh ni se nei lo angin ka insawi char char dawn tho. "Eng nge in sawi sur sur a? Nu Partei khan min be char char a, in thusawi ka hre thei lo reng reng" a tih chuan, "I hriat tura sawi kan ni hleinem" ka ti a, "Hmm" tiin a tum zui hmân mai. 

Kan in peng kan thlen dawnah, "Mipa lerh tak a nih loh hmel a, kherhthluk a awl phian ang" a ti leh tawh a, "Vawk chaw min chanpui peih em?" ka lo ti thung. "Ramnghinglova min relpui dawn chuan ka peih" a ti a, phur deuhin min zui thla a, "Nu, vawk chaw tur chu" pawn aţangin ka ti lauh a, "Kawmthlangah ka dah thla vek tawh. Vawk chaw chan a ngai a rawn haw hma rawh ka tih ka tih kha. Kha, ka thingfak pho lah i pa Khawtean en mang lo vin tui a rawn theh ţhawt a, ka ngei tak tak a ni" kawngdawmin a rawn ti chhuak lang lang a, "I pi Binladarin aieng ka zuar leh duh tawh a tih bawk tak kha" a ti leh a, ner nakin kawmthlangah ka chhuk a, Sangthanpuiin min zui ve nghal a, a tih tauh hunah a hralh zawh loh ho min pe let leh vek ang a, awmzia a awm lo thei emai. 

Vawkchaw te chanin ka chhum leh a, zingah chaw nawi ka khawn vek bawk a, Pathianni chu ka awl ve thei ang. Sangthanpuii ka tir kual char char a, a nu ten an rawn phone pawhin, "U Remkalami ka pui" a ti hmak a, a ţha ve riau a ni. U Nobawihi te hnena aieng zawrhpui ka intiam ve bawk a, a phur khawp mai. 

Zanah ka ţhiante ka bia a, Fawnvela leh Sangkhuma ten Pathianni zana principal te ina len an rawt a, principal hi ka be dawn em mawni aw ka ti rilru tak nain zan hmasa lamah ka be leh ngei tawh a, zan zawna biak chu ka duh lo ve tlat. "Ka be lo ang" ti a rilru ka siam fel vek tawh hnuah message a lo thleng a, principal a ni. 'Muttui le' tih zawng a ni nain beisei loh deuha ani ang mi zakzum leh zei lo lutukin min rawn be hmasa chu a lawmawm ve hrim hrim. "Hma kan sawn ve deuh e" an tia nga, ka ţhiante an phur leh khawp ang. 

CONT...