KEIMAH, THINGTLANG NULA (FINAL SEASON) 7

KEIMAH, THINGTLANG NULA (FINAL SEASON) 7

"Remkalam, vawk chaw zawnpui i ngai em? Vawiin chu tihtur ka nei lo" ti a pawn aţanga Fawnvela rawn au lung lung chu ka chhawn buai peih lo, a rawn lut dawn tho. "Nu Nempachangin vawk chaw chhum a ngai dawn a tih tak kha" bualin aţangin Nutein a rawn ti ve bawk a, "Ngawi mai mai teh u ka hlep zat tur ka chhut. Tun ţum a ka aieng lak chu ţum dang aiin a chhuak tlem" ka ti a, ka hlep hnem loh vaih chuan a ho viau ang. 

"Remkalam, i phur ve viau ang" Fawnvelan a rawn ti lut a, ka inchhutna lehkhabu khup hmakin ka lo en ha a, pawisa chet vel dan a hriat ve chuan pukah min dil leh char char dawn. "Eng nge ka phur viauna tur chu?" ka lo tih chuan, "Principal hi i chhai i chhai a a awm mai mai pawh amahin a nui leh vur vur zel a nia aw" a ti a, ka dar a min rawn kuahin ka bulah a rawn ţhu ve nghal a, "Ka chhai nasat em em bik loh kha, a thlawnin dawr ka luah theih phah dawn tih hre ta che" ka lo ti a, Sangkhuma pawhin a thutiam kha ziakin a dah thlap tawh. 

Kan ţhenawm lawk a principal a rawn awm ve aţangin thla hnih a liam leh tawh a, ka be sawm peih bawk a min nel ve tawh tak a ni. Ka thingpui no lian lutuk avang khan a inah ka leng lut peih vak lo nain Fawnvela nen an rawn leng zeuh zeuh a, phone in kan inbe reng bawk. Ka la chhaih zuk zuk ţhin a, ka han duat der vel te hian a aw a thian kharh a, a nui ngai lo nain a rukin a lawm ţhin tih ka hre tho. Ka zah tawh lem lo va, ka be bawrh bawrh reng tawh. Ani pawh khawlaia kan intawh te hian biak hmasak a ngai tawh lo va, min nel tawh zia chu ka message min chhanlet ţhin danah hian a hriat mai. Tunah tak phei chuan a nuam lo a, "Ruah a sur lo ang" tiin Fawnvelan an loah a feh pui a, ruah a sur leh ta si a, kawng nalah tluin a insawh na ve deuh a ni. 

"Tukţhuan eikham a pickup a kan thing phur tur khan ka hmu a, a bathlarah a lo ţhu chhuak ve mial a, Huma chul paha a nui leh ruh ruh ţhin kha a a chhan ka zawt mawle" min ngheng ar ar paha Fawnvelan a tih chuan, "Engtin nge a tih?" ka lo ti vat a, "Remkalami hian min duhin ka hria a ti" a ti chiah chu, "Awii...ban pha ila chu ka beng ang, a va huaisen pap pap ve le ka thi ţhaks" ka ti hluai a, chhaw viau mah se hetiang em em tur chu a ni lo mawle. 

"Athuhrimah, bialnu neih ţul a ti lo a ni lo'm ni?" ka ti leh a, "Ti lo e...a chhan a sawi lo nain bialnu neih ţul a ti lo khawp mai" tiin Fawnvela meuh pawh beidawn hmel deuhin a thaw halh a, "Mahse maw, tukinah chuan 'Remkalami hi a lawmawm reuh' a ti, chuvanga nui te pawh a ni maithei a, i ngaizawng emaw a tih vang ngawr ngawr a ni lo maithei" a tih zawm leh a, bualin aţanga Nutei rawn chhuak chuan a ke tah nawk nawk pahin, "Han khawsathei fal tak an ni lo a ni lo'm ni? A chhungte a chawm rih duh aniang chu" a ti ve ngei a, keichu ka ngawi mai mai, Sangkhuman min fuih phur viau lo phei se chu ui ru deuh chungin ka be lo lui ve ngat ang. 

"Keini ai ngawt chuan zia tak a ni. A pa sawrkar hnathawk a nia, nu Partei kha chu tikhan a awm ve tawp, pangpar ka hralh ţhin a tia, a hralhna zat ka zawt lo" Fawnvelan a ti zung zung a, kei aiin principal thlavang a hauh na tawh zawkin ka hria. "Engpawh sawi se beidawng reng reng suh aw Remkalam, pasal mamawh zawk i nih kha" min la ti zui a, pen a hawlh zawt zawt pah a, "Pasal mamawh zawk pawh ni ila bialnu neih ţul ti lo chu engtin nge ka neih ang a? Mawh? Mawh?" ka tih mawlh mawlh takah chuan hawi vual vual chungin a tawlh hla a, amah vang hian ka zak tam lutuk tawh. "Vawk chaw zawn pui i ngai em?" a ti leh tawh a, "Chei...a hawlh a hawlh nawk nawk takah chuan vawk chaw a ti tham ţiak mai alawm" tiin Nutei a lo nui kar kar mai. "Naktuk zingah ka zawng mai ang" ka tih veleh, "Chawhmeh te i va suah ţhin a ni maw?" nui vur vur chunga lo ti lehin Fawnvela a tho nghal uai a, Sangkhuma leh Nutei chiahin an hria a sin mawle. 

"Inpawm mai mai rawh Remkalam, i star a nih kha" tih leh tlanchhuah a rual a, pawisa inchhut buai viau lo ila chu ka um ang. "Fawnvela hi chu a, an thing phur an rawn haw hma ţum hi chuan awmchintawk a hre ţhin lo" ka tih hnuah Nutei hnenah, "Balu an lak ţhin lai phei chuan a rawn haw thap hrup a, bal deuhin a rawn leng ţhin. A ţhutna hnu a ngap thei lutuk a, ka pa'n hnung thak hiah nan a hmang ţhin" nui kar kar chung hian ka ti a, "Ka awih lo e a" a lo ti leh tawh a, kan naupanlai hun ka sawi hian a awih ngai lo reng reng. 

"Sangthanpuii hi a va reh ve, tui lum a hun tawh sia thing hi ka tuah belh dawn a nia aw, i lo ngaihven miah lo a ni maw hei a rem lek lek alawm" Nutein a tih chuan ka thlek zawk a, "Chhuan tur a awm chuang hleinem. Sangthanpuii chu a nu hian inkawm a phal vak lo a" ka tih lai takin, "U Remkalam" a rawn ti lut lauh a, ka phu nasa em em mai lehnghal. 

"Min ko thut thut zel suh Sangthanpui" ka ti vin tuar chu ngaipawimawh lo zetin, "U Nobawihi leh u Lalhuma an accident kha in hria em? U Nobawihi ka rawn hmu alawm, a biang a belkang vek a, a hmai a vung ul mai. Ka nuih chak zia chu e...an accident hnuah tuman u Lalhuma an la hmu lo" a ti phawr phawr a, ka bulah rawn ţhuin a nui hawr hawr reng a, Ramnghinglova vang a ni pek ang chu. 

"Engtik a accident nge an nih a? An va sawi lo ve" ka tih chuan, "An pilh nasa nian nuan em a an sawi duh lo aniang chu. Nimin emaw nimin piah aniang, u Nobawihi hmai en khan vawiin chu a ni thei lo, scooter in kan accident a ti" a ti a, "U Lalhuma chu ngaihven a ngai a nih chu" ka ti ve bawk tak nain a inah kal mah ila min hmuh duh loh chuan kawngka a hawng duh leh chuang lo ang. 

"Principal ka sawm ang a zaninah u Lalhuma ka va kan teh ang, nakinah sachek ka va lei ang e" ka tih chuan Nutei nen awmze nei deuhin min lo nuih a, anni pahnih hi an inmil lo viau dawn emaw tih laiin an inkawmngeih ta phian a, ka buai lutuk loh phah. "Va kan rawh u, kan rawn tibuai lo ang che u, mahse in hnungah tal kan lo kal ve" Sangthanpuiin a tih chuan, "In ruala kal duh ni ila ka sawm ang che u chu, ka kalpui duh ber ka sawm dawn" ka ti a, min ngei hmel khawp mai. 

"Miin an hmuh vaih cheu chuan an sawi ni leh daih dawn cheu nia aw" Sangthanpuiin a tih leh chuan, "A ho ve chiang e...min chhaih ni zawk se ka tih nak laia, hlep hlang a ni mai" Sangkhuma intiamna lehkha mitthla rauh rauh chung hian ka ti a, Fawnvela te lo a a tluk sualna a rei leh deuh tawh bawk a zanin chu u Lalhuma inah ka'n hruai ang e. Ka nu rawn haw veleh u Lalhuma chanchin lo hrilhin, "A kan na tur sachek ka va lei lawk ang e" tih leh chhuah ka rual a, Nutei a awm tho bawk a min chhan hun pawh ka nghak lo. 

Ka chhuak chu principal te in kawtah tawp chatin kawngkhar ka kik a, Huma bauh ri ka hriat hnu lawkah a rawn hawng a, min hmuh a inbeisei vak lo aniang, "Nangmah maw?" a ti ve hlut mai. "Ni e mawle...zanah eng nge i tih dawn?" ka ti nghal a, "Lo lut rawh" a ti nain, "Lut lo ang, thingpui ka in hman lo. Zanah eng nge i tih dawn sawi vat vat teh?" ka ti leh a, "Inkhawm zan a nia" ban charha a tih chuan, "Inkhawm banah" ka ti ve nghal zat a, "Tih tur a awm hran lo" a ti chiah chu, "A ţhat nasat chu, u Lalhuma damlo min kanpui rawh aw. A nih leh chaw eitui le, inkhawm banah ka rawn sawm ang che" ti zung zungin ka kal nghal daih a, mi tih tur kan hrilh hian min hnialna hun kan pek loh chuan min hnial thei lo a, an remti tihna a ni mai. 

Fawnvela te inah, "Sachek" ka ti lut a, nu Mawisacheki leh Fithangi ten ei an lo rel buai ve nasa. "Nu Mawisachek, sachek ka duh" ka tih nawn leh chuan, "Ka hria ka hria, min nghak lawk rawh ka indaih lo a nih hi, khatianga intur chung chung tur em ni? Ka awl leh awl loh te ngaihven ta che" min ti deuh hrep a, sachek a chawk nawk nawk a, a tui perin a per aniang a biang hup thawkin, "A siiii...Remkalami pher phawr vang vek" a ti daih a, "Customer i hauh hrep hnuah ni lo deuhin i puh leh a, i sachek factory hi a lian har viau ang" tih leh Fithangi bula ţhut ka rual a, "Hmarcha hi min lo malpui teh" a lo ti ve nghal zat a, tuman ka kut awl an hmu thei lo. "Inah pawh um tur thlangra khat hnur mal tur a awm alawm, peih ila ka mal zo vek tawh ang chu. Ka mal peih lo" ka tih hnua rum zeta min melh lai chuan ka kut ka kuangkuah a, Fawnvela pawh ţhutthlengah a mu zawn zawn a, tir ve mai rawh se. 

"Sachek lei tur chuan plate lo ken tur che alawm, kha, polythene hian hawn mai rawh" tih pahin nu Mawisachekin ka hmaah polythene in ka sachek lei chu a rawn dah a, "Polythene dangah no2 vel min lo belh teh" ka tih chuan, "Pawna tui va khai lut phawt rawh, tuichhun a mi zawk saw" a lo ti a, ngawi renga ka sachek lei sa ka lak hnuah ka chhuak nal nal a, kan inah mai ni lo, ka ţhiante inah takngial pawh hian hunawl a neih ve theih loh. Buai chung chungin bialnu neih ţul ti miah lo kherh thluk ka la tum zui a nia, thingtlang nula nun hi harsa deuh a sin. 

In a ka haw chu ka nu'n chanchin min lo zawt chiang a, "U Nobawihi hmai belkang chiah ka hrechiang" ka tih chuan, "Nobawihi lah hi, a rui phur phurin an phur a, an accident lo zawk ngawt alawm. Scooter buk theiah mihring buk thei an chuang a, an la phel rem rum ang. Anni ho hi chu motor lem khalh tur paw'n ka ring zo lo, lukham dup tawk nen a min phuar belhbawm a nih loh chuan an motor khalhah ka chuang dawn lo reng reng" a ti tan tan a, u Nobawihi pawlte ho hi chu ring lo ve tak a ni. 

Zanriah ei laiin ka pa'n, "Nute, vawiin i nu nen kan inbia a" a ti dek dek a, "Ka haw dawn lo" a lo ti nghal hlar a, "An ngaihtuah khawp mai che a" ka pa'n a tih chuan, "A chaw ei a tui ti la a tawk. Palai tir rawh u ka tih lahin in duh mang si lo a, kan inah hian awm ve ula nuam in ti bik awm lo emai" a ti hlak hlak a, lianpuiin chaw a bar zui a, ka pa zawk a ngawi dak mai. "U Bawiha kan hrilhin a thin a rim em kha, 'court ah ka khing duh mai ang' a tih che kha" ka tih ve chuan, "Min khing tak tak awm lo emai, neih tur dang ka zawng dawn ka tih tawh kha, ka lungawi hma chu ka haw dawn lo" a ti tlat a, ka nawrlui zui duh ta lo. Ka nu pawhin, "Ni e, an lo phone leh hunah keiman ka lo chhang ang e, a lungawi hunah haw mai rawh se. Naktukah ka feh ve dawn a buh lo thlei ang che u, leilet buh hi pawlh hnem lutuk tawh suh u ei a har" a ti a, Nutei a hahdam hmel huaiin ka hria. 

Ka insiam laiin khumah a lo mu zawn zawn a, ka hak apiang, "Kha chu a nalh lo" a lo ti zel bawk a, "Eng nge nalh i tih?" ka tih chuan, "Lady dianas inn a i lei kha ha rawh, nichina a hring i rawn lak chhuak, keimah nen a kan lei ka thlansak che kha" a ti kher a, "He thil hi ka neihna a rei tawh nen a ţhing thei lo" tih pahin ka inbel a, Nutei pawh a lungawi tawh aniang engmah a sawi tawh lo. 

"U Nobawihi inah Sangthanpuii nen kan leng dawn, ka'n insiam ve ange. Aaa...insiam vak pawh a ngai ve lo" tih pahin a tho ţuah ţuah a, "Ramnghinglova a ruih vak loh chuan veng deuh rawh aw. Sangthanpuii hian kut a thlak ţhin a, a lo sual let palh ang. A ruih viau chuan ven a ngai lo, Sangthanpuiin a sawisa hneh lutuk" tiin ka chah thlap a, u Nobawihi leh a bialpa hlui induat vel a hmuh chuan kut a thlak leh dawn chiang sa. 

Ka chhuak tur chu ka nu'n, "Lalhuma in a fal angreng si a, mahni chauh chuan i va ngaihtuahawm ve" a lo ti a, ka pa inkhawm bang a lo la haw lo hlauh a, a lo haw hma a chhuah hman tum ka ni bawk. "Principal nen kan kal dawn" ka ti a, nui chunga mit ka siai chuan ka rin loh deuhin mak ti hmel pu tak chung hian mit a lo siai ve a, chu chu remchangah lain min hauh hmain ka chhuak nal nal a, ka haw hunah min hau tho ang. 

Principal te kawngkhar a lo la inkalh a, bathlar a eng tho bawk a tiin bathlarah ka lo nghak a, "Huma" ti a a uite ka ko chiah chu a bauh nasa mai. A khat tawkin, "Huma" ka ti leh ţhin a, a chhuah theih loh lai tak hian sa rim hnim tir tur awm se aw, inchhungah a zuar nasa tawr tawr ang chu. Kawngkharah ka hmui nawr si ran chunga, "Huma" ka tih leh chuan hnunglam aţangin, "Eiah" a rawn ti a, principal aw ngei a ni tih hre mah ila ka phu nasa lutuk chu ka zuang deuh zawkin ka hria. "Awii...i may die..thawm nei hmasa ta che" ti vakin ka awm ka dawm vang vang a, hmangaihna vang ni miah lo va thin a lo phut nasat theih zia hi. 

"Khatin mi kawngkhar an nawr ngawng ngawng ngai lo" a tih hnuah, "Awmsawn rawh ka hawng dawn" bul zet hian a ti leh a, a thinrim emaw tih mai tur a ni ţhin. A ţawngkam a nem lo ve si, a ţawngkam thlum ber pawh, "Thingpui thlum lo in rawh" tih a ni mai. "Min nghahna a rei tawh em te ti ve la" fiamthu deuh reuh a ka tih chuan, "Min hauh hunah i sawi leh vek dawn tho" a lo ti a, a dik ve reng, a chhaw em avang hian ka lo vin leh chiam ţhin. 

Inchhung kan lut chu Human min lo lawm tawn zak zak a, ţhu meuh a principal in a lawm a, a chul laiin keichu ka ding reng a, ka sachek khai lai chu a rawn hap hlauin ka veng ran bawk. "Thingpui i in hmasa duh em?" a tih chuan, "Aih, u Lalhuma inah in ang, ka lum sak ang che u" lo ti vatin ţhutthleng seiah ka ţhu tharh a, "Hmanhmawh rawh kan leng rei hman lo ang. Huma kha chu kan hruai mai dawn alawm" ka ti leh a, amaha awm tir reng a phal dawn lo hrim hrim. 

Inthlak tura a luh hlanin Human min rawn hnaih a, keiin ka sachek bawk ka lo veng thung a, "U Lalhuma accident hlawh tur a nih hi, rawn seh reng reng suh aw" ti ve ngial mah ila a hriatthiam loh hmel khawp mai. Principal lo chhuah rual chuan, "Kal ang" tih leh din ka rual a, dek pawh a tih hman hmain pawnah ka chhuak nghal a, ka nghah vang vang hnuah Huma rawn kai chhuakin kawng a kalh a, u Lalhuma te in lam panin kan kal a, a lo rui leh bual tho maithei. 

"A va thim ve" tih paha phone a phawrh chuan, "Kal hmasa rawh" ka lo ti thuai a, a mit hi thimah a hman tlak vak loh a, mit chhe deuh a ni lo nain thimah a buai ţhin. Current awm loh ţuma ka tlak thlak laia phone aia tv remote a ban daih nachhan pawh a chiai vangah ka ngai, a hunlai khan ka nuih a, a awmdan diktak hriat hnuah erawh a nuihzatthlak vak tawh loh. Ka hmaah kalin phone a ti eng a, hnunglam aţangin ka en bawk a, "Khalaiah khan peng rawh" ka tih rualin a peng ve mai a, Huma lahin, "Ka hmingpui kan hmu dawn a" ti ni awm takin a phur a, principal pawh, "I kal thei em? I hlau em?" ti tur ringawtin a rawn hawi let zeuh zeuh reng mai. 

U Lalhuma in kan thlen chu keimah zawkin kawngkhar ka kik a, a chhungte an haw rih aniang a reh emai. "Tu nge?" a rawn ti ve lauh tak nain ka ngawi reng a, min hriat chuan a rawn hawng duh lo palh ang. "Thirchhia a va ngah ve" bathlara u Lalhuma thil dah vel enkual paha principal in a tih chuan, "Bengchheng suh" tiin ka lo khap vat a, u Lalhuman kawngkhar a rawn hawng chiah bawk. 

"Aw haw wow...tu nge hampuar che? Inchelh bet tlat rawh i thlawk daih ange" ka ti lang lang a, helmet a khum lo pek aniang ani pawh a hmai a vung nasa. "Rawn len a ngai lo" tih hmuk paha kawngka khar a tum chuan lo dang vatin ka inzep lut a, u Lalhuma chu nek sawn rawk rawkin, "Zoram, lo lut rawh" tiin principal leh a uite Huma ka hruai lut leh a, rin ang ngei ngeiin zu a lo inchhawp leh ran tawh. U Lalhuma zu in nasat ang hian in ve char char ta ila chu ka thi daih tawh maithei a ni. 

"Huma, ţhutthlengah hian rawn zuangkai tharh rawh le" ti a ka ţhutna bul awl lai ka ben thak rualin, "Hmh" tih pahin u Lalhuma a hawisawn hmak a, principal te uite Huma hi a hre daih tawh a, a lawm lo hle bawk. Huma mai bakah principal pawh ka bulah lo ţhuin kan hmazawna chaw ei dawhkan bulah u Lalhuma a ţhu thung a, "Hei sachek ka lo ken che a nia aw, tih lum viau a ngai tawh ang. Nu Mawisacheki siam thar a nih hi" ka tih chuan, "Nobawihin eng nge a sawi? Min puh vek em?" a lo ti a, a hnar hmawr belkang pawh a duk kulh a, a lungawi loh hmel hle bawk. 

"Sawi nang...kan inhmu lo hrim hrim. In inţhen tawh sia engati nge in in phurh leh a?" ka tih chuan, "Aiiii....min mamawh chuan e...mi a tih lawm thiam chu, duh ngat se chu principal pawh kha a chhai thlu thei ang" uar zet hian a lo ti a, "Duh suh se..a ho mai mai" principal in a lo tih chuan, "Inhmuh tir lo la a ni mai. A hmuh vaih che chuan nitin zantin a rawn kal ang a, rawng a bawl sak che ang a, a insu bawk ang a, i thingpui in turah zu a pawlh ang a, a zunah i uai vat mai ang" tiin u Lalhuman a sawi ţhaih a, vung bur chung pawn dawt a sawi zuah zuah tho. 

"Nangmah chiahin em ni i awm u Lalhum?" principal chuan a ti ta zawk a, "Ni lo e...ka chhungte awm loh lai a nih hi. Kolasib ah maw in awm ve tho?" u Lalhuma pawhin pangngai takin a lo ti a, principal in an awmna veng hming te a sawi chuan, "Ka awm lohna a rei tawh a, kan venga mi lo chu ka hre vak lo. In uite hi engati nge Huma in tih kher a? Hming dang in hre hlawl lo em ni?" a ti a, a vin deuh vang nge a ţhen zui chawk chawk a, a insawh na ve viau a nih hmel. "Sap hminga kan kohin a hrethiam lo a" principal in a tih chuan ka lo nui hak hak a, u Lalhuma a tum vuau thung. 

"Thingpui ka'n lum ange aw" tih leh thawh ka rual a, "Lum lo vang, chini ka nei lo a thingpuife a hmuar tawh. Ka chhungte rawn let hunah lo in mai rawh u" u Lalhuman a lo ti hmuk hmuk a, thingpui aia zu duh a ni bawk a a awm ve tho mai. Ka ţhut leh ruala ketahna lama Huma tlan phei chu, "Huma, ketahnaah khan i zung leh ringawt ange aw" tiin ka au zui a, principal lahin tumah tihchhan lem lo vin, "Huma hi mi inah a ţawp tlat zel" a lo ti ve bawk si a, u Lalhuma chu indawm kun lup chungin a thaw hulh a, amah kan sawina ni lo mah se a lungawi lo hle a ni tih a lang reng mai. 

"Huma, hei chu i pa Lalhuma in a nih hi aw, zun reng reng loh tur" u Lalhuma melh ru ralh chunga ka tih chuan, "Haw mai teh u, min rawn kan damlo zual, in ri lung lung bawk si, dam ţhat var a lenchhuah leh te ka chak tawh, haw phawt teh u" tih pahin u Lalhuma chuan min pawt tho a, "Kan la leng duh alawm" ti mah ila, "Inleng ka nei peih lo, mi damloh lai remchangah hmang ţhin suh, ka chau ve tak tak a nia" ţha deuha ti chung hian principal leh Huma te nen chuan min nam chhuak a, "Haw vang vang rawh u" tiin kawngka a kalh hmak bawk. 

"Haw mai a ngai a nih chu" principal in a tih veleh, "Kalkawngah kan ţhu dawn nia, lo kal rawh, ruahsur loh ve lai a nih hi" tih leh a kawra pawh ka rual a, "Remkalam, ka mit" a tih ruala thlahin phone a phawrh hun ka nghak a, a tih en rualin ka hmaah bawk ka kal tir leh a, kawngpui pawh phei hma deuha lung lianpui chungah ka ţhutpui a, a hnawng deuh dup lehnghal. 

"Zanah hian engkim a mawi a, hmu chiang ve vek thei la ţha tur a nia, Fawnvela te ina chaw kan ei ţuma phone i rawn tih ên chhuah va va chhan kha ka hre mai" ka tih chuan min chhang lem lo hian a nui ringawt a, "A hrehawm em?" tih paha a lam ka hawi chuan, "Ngaiah ka nei tawh" a ti a, hmalam a melh reng nain a tan chuan a thim dawn tho a, eng vak a hmuh theih ka ring chuang lo. "Chhunah i mit a ţha vek tho sia" ka ti leh a, a lu lo bu nghatin, "Chhunah buaina ka nei lo" a ti leh tawp a, kei ang a zan len leh thil zawrh ching chu ni ve se hrehawm a ti khawp ang. 

"Bialnu pakhat chiah i la nei a, keichu pahnih ka nei tawh, nang aiin tawnhriat ka ngah tihna a nih chu" ka tih laia, "I ni har alawm" a tih chuan ka lo nui duai a, "Miin i bulah pasal a nei ţep an ti ţhin em?" ka tih chuan a ngawi vang vang a, a sawi hreh ve deuh a nih hmel. "Lo ti mah se pawi ka ti lo---" ka ti chiah tihah min lo pawt chat a, "Umm..nunhlui a nih kha" a lo ti mai a, a hre ve nual tawh a nih hmel a, a chhan diktak erawh a hre hauh lo ang. "Ka bialpa pakhat chu mak deuhin a thi a, a ruang an chhar a" ka tih chuan min hmu chiang thei awm ang ziazangin ka lam a lo hawi a, "Engtia thi nge?" a ti a, a ngaihven ve khawp mai. 

"Mi kâ aţanga i hriat nual tawh tho ka ring. An sawisa hlum an ti mai a, Aizawla a kal kha a han thi ringawt a" ka tih chuan, "An chhui chiang em?" a lo ti leh a, "Chhui nang aw...a nu'n phal hek lo. Postmortem takngial pawh a phal lo. Tun thleng hian tuman a thih chhan diktak kan la hre lo, han chhui tir se chu an lo sawisa hlum tak tak a nih chuan amah thattu te pawh an chhuichhuak maithei a" ka tih hlak hlak laiin ka darah dimtein a rawn dawm a, "A pawi hle---" a ti hman chauh tihah, "Hran khum hrep se ka ti a nia, keichu min han sawisa hlum ve vaih teh se, zantin ka hran khum ang, thlahrang te chuan hran bak tih tur an nei chuang hleinem, ka ngei hlawm a nia, a chhe thei ang berin in lan se la, khum aţangin pawt thla zawt zawt hlawm se la" ka lo ti tan tan a, "N-nia..." a ti ban charh a, ka dara a kut dah chu a la sawn nghal bawk. 

"An ngam chuan min han that ve teh se, zan mai ni lo chhunah pawh an hmuh turin ka in lar ang a, nuam deuhin ka nun tir dawn lo reng reng. Police in an chhui chhuak thei lo a nih pawhin film a mi ang hian ka inpuan tir tho ang. Thlahrang ho pawh hi an mak ve bawk alawm, pawisawi lo hran khum a mahni inchhunga thawm nei reng lo hian an damlaia an pawisawi ţhin te kha nasa thei ang ber a hran khum zawk tur a nia. An zei lo ţet ţut emai" ka la ti hlak hlak reng a, ka inbengdaih hnuah, "Nang ve, i bialnu hlui pakhat lek chuan pasal a nei tawh em?" ka ti deuh kher a, a ngawih vang vang hnuah, "A thi tawh" a ti a, ka mur uaiin ka hria, thlahrang ka sawi nasat vang a hlau deuh reuh niin ka inhria. "Engtin nge a thih?" ka ti tho a, "Keimah vang aniang" tih zawngin min chhang a, ka ngawi hmak thung. 'An pawisawi tute hran khum hrep se' ka ti chiam chiam a, amah vanga thi a lo nih tak tak phei chuan principal ka sawi ţhaih a ni ringawt tawh a, sawi tur vak ka hre tawh lo. 

"College kan kal lai khan ka chhungte hmuh a chak ţhin a, keiin ţul ka ti lo a" a tih chuan, "Ţul i ti lo ţhin hi alawm ţul lo chu. Miin an duh na na na chuan ţul ka ti lo ti tlat zel lo la, bialnu neih lah ţul ka ti lo i tia, ţul i tih lohna hian mi tam tak a la ti na ang" awmze nei zet hian ka ti a, ka sawi ţhaih pah bawk. "Remkalam, mental illness hi eng nge i ngaihdan?" thutak fe a a tih chuan, "Ka hre lo, ka nei ve ngai lo a ka hrethiam lo, a nei te hi nep ka ti ve ngai lo bawk a, an khawngaihthlak ka ti" ka lo ti a, a ngawih tak daihah chuan, "Rilru lama harsatna a tawh lai takin nangin i lo belhchhah a, a thi ta tihna em ni?" keimah zawkin ka ti a, "Ka belhchhah aniang, BD zir ka duh ber ţhin a, ka zir dawn khan zirlaia rilru ka pek theih loh hlauin ka ţhen. A tal khaw lo zui a, hre reng mah ila a ţhat leh mai ringin ka haider a, zirlai chiah ka ngaihtuah a" a ti chiah chu, "Chuvang a nih chu synod in pro pastor atan an lak ve loh che" ka ti hluai a, BD an zawh hian an dil tlangpui zel a, an tam em avangin an la seng ţhin lo. Lak loh zinga a tel hi mak pawh ka ti tawh lo, a bialnu hlui a ti duhdah emai. 

"Pathianthu chauh ka buaipui ţhin a" dam deuha a tih chuan, "I sawi thiam chuang hleinem, kohhranin thusawina hun an pek che paw'n 'ih ih ih' te i tih kha" ka lo ti a, a ning ve ta deuh aniang a ding hluai a, a tana a thim em avangin rang deuhin a ţhu leh a, "Ka inzir mek, vawilehkhatah thusawi a thiam thut theih loh" a tih hmuk hnuah, "Khuangpui hnungah i ţhu lui a, mi thusawi mai mai keh huiin min en a" lungawi lo deuhin a ti ve ngei a, thu a sawi dawn khan dar hmasa rik ruala biakin thlengin khuangpu hnungah ka ţhu ngei a, a zam lutuk kha ka nuih a za ngei bawk a, min hmu reng tih ka hre lo thung. 

"I bialnu hlui chu a inti hlum tihna a ni maw?" ka ti ta daih a, "Umm" tih zawngin min chhang a, a tih dik loh a hriatchhuah meuh chuan a tlai tawh dawn si a, a khawngaihthlak ve tho. "Inţhen vang ngawr ngawr a ni lo, depression kha a ni pakhat ang a, keiin ka belhchhah bawk a" a ti zuai ve raih a, bialnu neih ţul a ti tawh lo pawh hi a awm ve khawp alawm. Boruak tih zangkhai nan, "Hrankhum tur list ah i tel ve a nih chu. Depression ka neih laiin ka bialpain min ţhen se, hlimna ka zawn fe hnuah ka natna tuar zo lo vin intihlum ta ila, ka thiam loh pawh nise ka bialpa hlui chu ka hrankhum loh a tikah, zantin a mut bu chawpin ka zial ang a, kawngka bulah ka tung ziah ang" ka ti tan tan a, ngawi rengin ka lam a lo hawi a, ka khawngaih lo chiang khawp mai. Thim thamah chuan a inphawrh ve duh viau hi a, hriat duh neih chuan hruai chhuah ziah chi a nih hi. 

Han chhaih kual vel ka tum laiin ka phone a ri hlauh a, Nutei a lo ni. "I haw tawh mi?" ka tih laiin, "U Nobawihi inah lo kal teh, luh a ngai tawh lo ka tih pawhin Sangthanpuii hi luh leh a tum tlat a, Ramnghinglo a ti reng a" mangan hmel zetin a rawn ti a, phone a dah ruala tho nghal nalhin, "U Nobawihi te inah i lo kal ve duh em? I duh loh chuan lo va haw mai rawh keichu ka kal lawk dawn" ka ti zung zung a, Sangthanpuii hi chuan min va ti buai ţhin tak em. 

"Ka lo kal ve ang" a ti ve mial a, phone a tih en veleh a kawrah ţhamin ka pawt dawr dawr a, kawngpui va pawh hmasa kher lo vin u Lalhuma in lam aţangin ka kal pui a, Huma kan hruai bawk si, hmanhmawh deuh chunga kal fimkhur ngai tho bawk si, kan chhangchhe khawp mai. "Remkalam, ka hmu thei lo" a tih rualin ka ding nghal a, kan hmanhmawh lutukna lamah a phone êng a lo hmet thim palh a nih hmel. A tih ên leh rual ka kal pui leh a, kan kal muang deuh tawh thung. "Sangthanpuii a kawlh lutuk a, Ramnghinglova a ruih vak loh phei chuan a lo khawih hrep ang" ka ti a, min zui ve mai hi kan kalna tur a hriat loh vang nge ka tih rilruk laiin, "Buaina an tawk a ni lo mi?" a lo ti hu mai. 

"Buaina em em chu a ni lo, buaina lian deuh pawh nise nang berkher chu i thlamuanpuiawm loh e" tiin ka nui hak hak a, u Nobawihi in kan thleng a, a kawtah Nutei leh Sangthanpuii te an lo ding ran a, Sangthanpuii sam phei chu a buk chhup mai, an lo insual tawh ni ngei tur a ni. Principal an hmuh chuan Nutein, "Ngati nge a lo kal ve a?" a lo ti he haw a, "Buaina in tawk emaw a tia, min zui ve a nih hi. Haw ang u, Sangthanpui, lut tawh suh" ka tih rualin, "Ka lut awm emai, min khawih nat dawn chuan min chhan ang che u" tih leh kawngka hawn a rual a, duhthlan tur dang awm hek lo, kan lut ve dial a, Ramnghinglova chu a lo ruih leh pek hmel khawp mai. 

"Tah khan ţhu rawh" ti a principal ka en chuan a mit a lo chhing vang vang a, bathlar a eng hnuaia kan awm lah khan a banin a mit a hliah leh ţhin a, thimthama kan awm rei vang a nih ka ring. Principal a ţhut rualin a bulah ka ţhu ve a, Ramnghinglova lam pana Sangthanpuii kal chu Nutein a zui thung. 

"Mi zawng zawng kawmthlangah ka awm chung pawhin 'ngah nge min rawn tih buai fo a?" u Nobawihi rui chuan a ti lawi rût a, "Ramnghinglova hi lo sawm hrang ziah suh. Kan khuaah nangmah chiahin zu i zuar" Sangthanpuiin a tih chuan, "A awihawm loh e...pangngai deuh anga lang zu kawl ru ka hre hnem lutuk" pakhatin pawr zetin a lo ti ve a, "Enteh u Remkalam, ka ten zia chu, nichina inchhunga kan luh hmasakin Ramnghinglova hian u Nobawihi hmai belkang a lo chhem sak vel mawle" tih pahin Sangthanpuii chuan Ramnghinglova samah a ţham leh tawh a, "Engtia tih chi nge?" tiin principal in min rawn hrilh ru a, a aw a thum lutuk a, min hrilhruk hian a vibrate ziah. 

"Ramnghinglova a rui tawh emai en tawp ang" ka tih rualin Ramnghinglova chu thei leh thei lo vin a tho a, ding bu luk luk chung hian, "Sangthanpui, i awmdan hi ka duh lo aw. Ka nupui pawh i la ni em lo va, phur chang changin mi rawn sawisa suh, na ka hre ve, na ka ti ve ţhin" a ti ţawk ţawk a, principal lo nui chhuak hawk chu a malah chum vatin, "Ngawi reng rawh" ka ti hlak a, a buai phili ka rin nen hmuhnawm a ti phian a, "Duh leh ka sawisa ang che, i nu leh paten phalna min pe vek. U Nobawihi in a i len an phal tawh lo" Sangthanpuiin a tih chuan, "Ka leng ve ang chu, hetianga min rawn tih hian a na ka ti aw. Zu hian eng na mah a veng lo, na hre lo ah min ngai a nih chuan sorry, i have pain Sangthanpui" a ti ţuau a, a ţap dawn ta mai, Sangthanpuii lahin, "Ţiau ţuau che hian, ka rawn ko ziah peih che hi lawm hle rawh. Han ţap vaih teh, ka velh belhchhah dawn che a nia, ka vel ngam lo che a i ngai a nih chuan maw, sorry, i have huaisenna" a ti kha kha a, Nutei chuan melh tawn zak zakin a mangang hmel chu a hmu aniang principal a tho ve ta che che a, "Umm...zanin atan chuan tawk phawt rawh se, an mu duh tawh ang" a va ti a, Nutein min rawn en ha mai. 

"An mut ka remtih loh vang alawm Ramnghinglova hruai haw ka tum. Min ţhelh hma khan ngaihtuah chiang ve ta che. Kalsawn rawh, khapa kha ka velh belh dawn khawp, min dan beh theih i rin chuan maw, sorry, i thei lo" tih leh principal nam a rual a, vanneihthlak taka lo inveng hman hlauhin, "An mu duh leh lo ang" a ti a, Sangthanpuii chu pawh sawn a tum a, ani lah a lo ţang ve si, an inchai velna lamah Ramnghinglova zawk an nghawk thlu tawp a, a tep chap chap a, ka nuten an hriat vaih chuan min hau nasa khawp ang. 

"Sangthanpui, haw phawt ang u. Nutei nen khan Ramnghinglova hi hruai chhuak ula, u Nobawihi chuan min dang teuh lo mai tiraw u Nobawih? Min dan a kan bengchhen vaih chuan jail a ni leh mai a" tih paha u Nobawihi lam ka hawi chuan, "Hruai haw ula rawn kal tir tawh reng reng suh u, naupangchhia deuh deuhin in rawn khawsa a, ka inchhung hi nau awmna hmun a ni hleinem. Mawl si, Sangthanpuii lah hi a ât huai a" a ti hlak hlak a, Huma ka kaichhuak chu principal in min rawn zuiin, "Kan kalna chu a va mak ve" a ti hap a, a hawikual vel a, in a lo tlem bakah bathlar eng lai chin lo chu a hmu thei bawk si lo, "Kal fo a ţul lo ang Remkalam" ti lehin Huma a pawm a, nuam a tih loh zia a lang reng mai. "Ka kal reng ngai hleinem, Sangthanpuii vang a nih kha" ka tih laiin an rawn chhuak ve a, Ramnghinglova chu ben ve hrep mai a nia ka duh ni. 

"Engtin nge kan tih dawn? Keichu ka ning tawh e...card den tuma kal kan nia, an insual daih alawm" Nutein a tih laiin Ramnghinglova samah ka ţham a, "I nuten an phal loh chuan leng lo ve mai ta che. In insualin chhan i ngai ve ziah lehnghal" tih paha sawi nawk nawkin Sangthanpuii ka en leh a, "Nangpawh, i kal leh chuan zu rui hoin an lo khawih hrep che pawn ka chhan tawh dawn lo che. Hetianga buai buai ve rual pawh ka ni tawh lo" principal hriat ngei tur chuan ka tiin a banah ka dawm chat a, "Ka mut a chhuak, ka haw dawn...min dan theih in ring maw...sorry, i have goodnight" tih leh kalpui ka rual a, êng nen a inring thlap a ni bawk a kan buai lem lo. 

"Maw maw..sorry sorry chu eng nge? Ngati nge maw in tih hnuah sorry in tih zel a?" min zui chung hian a ti pah nawk nawk a, "Kan khuaah awm rei la i hrethiam chhawm mai ang" tih zawnga chhangin kawngpui kan pawh chhoh hnuah chiah ka dinpui a, in fit hmel viau si a thaw hlawi hlawi mai. 

"Haw ang...ka hah lutuk zanin chu chhaih pawh ka chhaih peih tawh lo che" ka tih chuan a aw a lo thian kharhin, "Zanin kan leng chu kawng a bumboh hle mai" a ti ban charh a, a tawn ngai loh a tawng hnem em bawk a ni. "Kan leng leh dawn nia" phur fe a ka tih chuan, "Ka kal ve a ţul ka ti tawh lo" a ti a, Huma chu leiah nghatin a kai a, a kal nghal nul nul a, "Min lo nghak rawh kan in i kal pel dawn tho alawm" ti mah ila, "I ţhiante kha lo nghak rawh an insual leh ang" a ti tlat a, "Ka um dawn che" ka tih phei chuan kal chak tak a ni. Um ta em lo vin ka ţhiante ka lo nghak a, an lo thleng chu biak pawh ka be peih lo. Sangthanpuii beisei nei ni awm taka min en pawhin, "Hmh..i bialpa zu heh heh nen" ka ti a, Nutei kaiin ka kalpui daih a, ţhianten nupui pasal an neih tawh laiin naute rual lek insual ka la ţhelh mai mai a, ngaihtuah ngaiin a awm ziah lehnghal a, ka lungawi loh zia hre ve reng reng rawh se. 

Nutei nen a thawm dim deuha kan lut chu ka pa'n, "Lalremmawi" a rawn ti a, inchhung a thim ţhiap tawh a, an pindan aţanga min rawn ko mah nise a hmel hmu ang tho ka ni. "Eiah..pa, eng nge ni ta? I muhil thei na nge a va pawi ve" ka ti nem hlawi a, "I va lo haw har ve" a awki ngai renga a tih chuan, "Nia...tunlai chu ruah a sur reng sia, ruah sur loh zan kan lawm a pa, i duh leh min rawn hnim rawh, zan par rim bak ka nam lo" dam deuh hian ka ti leh a, Nutei nui put put chu ka piai hlak bawk. "Khawiah nge i kal?" a rawn ti leh a, a lo chhuak lo nain ding zum zat chung hian, "U Lalhuma sachek ka pe kual" ka ti a, u Nobawihi hming ka sawi ngam ţhak lo. "Kan khuaah Hum zu-a leh Hum ui-a bak an awm lo. Pek kual tur eng nge awm? I leng kual em ni?" a ti a, "Leng kual nang aw..u Lalhuma sachek ka pe kual, ka rawn haw lamah ka kal muang a, thingpui i in duh em? Tlai tawh mah se ka lum peih reng a nia aw, thingpui i duh phawt chuan hnar bawrh bawrh mah ila min kai tho ziah dawn a nia" ka tih chuan, "Duh lo e..nangmah khan in rawh. Mu hma la zingah i tho hma leh awm si" a ti ve ta nge nge a, ka nu ngaihdan a ni lo aniang chu, "Engpawh sawi se thinrim reng rawh ka tih kha" ti bak hlarin, "Lalremmawi, nula i nih kha len chintawk hre ta che. Mu nghal rawh, khawvar hmain ka kaitho dawn che" a tih zawm leh a, pasal te aia pachang nu ka nei miau a, mut nghal loh ngamna chi a ni lo. 

Zingah ka nu thingpui lum thawmah harhin min kaihthawh hmain ka tho sawk sawk a, tih phut tum rana pindan aţanga ka chhuak chuan ka pa zawk ka hmu daih a, makti deuh taka, "Khawiah nge ka nu?" ka tih chuan, "A nuamsam lo a, mu leh turin ka ti a nih kha. Vawiin chu i buai deuh dawn a ang hle mai" a lo ti a, ka nu hian na a sawi ngai mak lo va, a thawh peih loh chuan a na viau tihna a ni ţhin. 

Chaw ka chhuan hnuah Nutei kaithoin, "Ei lo rel rawh vawk chaw ka zawng dawn

..vawiinah chhum ngei ngei a ngai leh tawh" ka ti a, kan khuaah hian vawk vulh an tam a, chaw nawi khawn tur a tlem thung a, vawk chaw zawn ţauh ţauh a ngai ţhin. Ka nu hian vulh ve kher lo se ka tih nen ţul a ti miau si a, hna min pek belh a ni ringawt. Nula mah ni ila a no viau theih loh a ni. 

Ka vawk chaw zawng haw lamin principal ka la tawk zui a, "I va tho hma awm ve" ti ve ngeiin em a ka thil phurh chu a en a, "Chaw nawi ka nei rawn la rawh" amah vek chuan a ti leh a, "I chhuah daih kha" ka tih chuan, "Ka exer la haw lam a nih hi" a ti a, a inthuam dan chu ka en a, chapal leh kekawrbul hain tshirt dum a ha bawk a, a mit a nawm loh changa a vuah ziah ţhin tarmit bial kulh kha vuah lehin exer la pawh a ang lo. "Eng nge i tih?" ringhlel ru deuh a ka tih chuan, "Exer ka la" a lo ti then a, "Khatiang chiap chuapin exer an la ngai em ni?" ka tih leh chuan, "Thawmhnawah exer a bet hleinem" a ti a, a dik viau tho mai. 

"Ka nu a damlo a, bathlarah lo dah chhuak la school i kal hlanin ka lo la mai ang" ti a kal mai ka tum chu, "Thingpui i in duh em?" a lo ti a, an in a ka thingpui inna no kha ngaihtuahin, "Nangman lo in zawk rawh, tukin chu thingpui ka lo in hman lo. Lo kal rawh, keini chuan lum sa kan nei reng alawm" ka tih takah chuan, "Umm...phurh chhawk i ngai em?" a ti ta vel a, "Ngai lo ve...a zang lutuk, kal ang" tih pahin ka hui zauh a, zan lama min tlanchhiatsan dawr dawr si zingah min zui leh dawr dawr a, chhe lo viau lo se chu ka sawm kher lo maithei a ni. 

Principal nena kan inzui lut chu ka pa'n, "E..Zorama chu, lo leng ţhu rawh" a lo ti thuai a, "Zorama hi thingpui han siam sak ve rawh u" a ti leh bawk a, "Nu Nemtei chu a eng nge na?" a ti ve mial a, ka pa'n ka nu awmdan a sawi lai chuan thil ka ngaihtuah chhuak a, 'ani pawhin thingpui no lian tawk min chhawp sak ziah alawm le' tiin kan thingpui no neih ber chu ka phawrh a, ka silfai diam hnuah thingpui ka thli zui a, Nutein, "A la lian lo mah mah a nih kha" a ti tak nain thingtlangpa pawhin lian an ti ang. Ka thli khat lung a, a thlum hle bawk ang. 

Principal chu nui vur vur chung hian ka pe a, ka inleng a ni bawk a ka pa bulah ţhuin a thingpui in hun ka lo nghak ran a, a in chiah chu a meng deuh kawkin ka hria. Ka pa lah a ti ti suam suam reng a, "Lo leng ziah rawh aw, mahni chiaha awm chu a khawharthlak duh teh a nia" ka pain a tih lai te chuan thingpui chu a en ţhin a, a tam si, a thlum bawk si, a in huphurh hmel khawp mai. 

"Min duhsak a, ka lo len apiangin in thingpui no lian ber hlirin thingpui min pe a, ka duhsak ve che a nih kha" nui var var chunga ka tih chuan tawite a lo nuiin thingpui chu a in leh a, ka pa hmuh loh tura lei a chhuah leh zeuh zel te chu ka lo hmu ru reng a, an thingpui lakah chuan nep tak a la ni. A inzawh veleh a no a dah thlak rual chuan, "A hahdamthlak huai e" a ti a, ka nui chhuak ta nge nge a. "Chaw lo ei nghal daih la" ka tih chuan, "I thlum leh vak ang" a ti a, a hrethiam ve ngei a nih hmel. Ka nuih reng vangin ka pa lah chuan kan fiamthuah ngaiin a nui ve hawk hawk a, "Tu nge chaw thlum ngai?" ka tih chuan, "Tih theih loh i nei ve lo ang" a ti a, ka chanchin a hriat dan leh ka nundan inmil loh a tih thu a sawi fo ţhin a, fexy min ti bawk. A haw tur chuan, "Chaw nawi ka lo dah chhuak ang" a ti thlap a, ka tih der mai mai, a chaw nawi a tlem thei si, chhunah vawk chaw chhum dawn mah ila tlaiah amah hmuh pahin ka lam daih ang.

A khua a sik hluah nain ka nu chu tukţhuan eiturin a rawn tho chhuak peih a, "Vawiin chu meizial sem kual lo mai rawh, i hah lutuk a i taksain a zo lo a nih kha" ka pain a tih chuan, "Hritlang khawsik mai mai a nih hi" a lo ti a, "Chuvang alawm chhuak suh ka tih. Nihnih khat hahdam la i thawk leh thei hma zawk ang" ka pa'n a ti deuh tlat a, Nutei lo inrawlh vatin, "Ni e...chawl rawh, meizial chu sem tura i siam sa saw keiman ka lo sem kual ang, Remkalamin vawk chaw a chhum dawn a, i pek ţhin ho chu ka hre ve vek tawh" a ti zung zung a, ka nu a lawm khawp mai. 

Aieng buaipui hman lo lekin ka buai leh a, ka nu damlo en zeuh zeuh reng a ngai bawk si, vawk chaw chhum laiin zai ka ngaithla ve hman a tih a ni mai. Nutein meizial a sem kual laiin ka lo insu leh a, khawchin a hriat loh avangin bathlar, ruahin a theh phak lohna chinah bak ka zar chhuak ngam lo thung. 

"Remkalam, chhangthawp" ti lauhin Sangkhuma a rawn lut hlawl a, "Nunuin min rawn phone char char zel a, Nutei a ngai tawh" tih pahin ka bulah a rawn ţhu a, ka malchunga a chhangthawp dah chu la vatin, "I nuten an ngaihtuah che a haw rawh tih pawhin a duh hleinem. Nunui bulah eng nge i sawi?" ka tih chuan, "Amah be rawh ka ti, ih maw Remkalam, Nunui ka duh ve dawn chiah hian ka duh lo leh zel, keini pahnih hi nupui pasal nei lo tur chi kan ni a ni lo maw?" thutak fahran hian a ti a, "I ti rapthlak e a, kan dam ang a kan la nei ve ang chu" ka tih chuan, "I tluan loh em hi, principal nen eng nge in an? In la ti boh boh chauh em ni?" a ti a, ka lo thaw halh a, "Tum viau mah ila amah berin ţul a la tih loh chuan tih pur pur theih a ni lo. Mahse lo nghak rawh aw, a rei tawh dawn lo a nia" ka tih chuan, "Dawr kha a luah luh theih ţep aw, naktukah kan va en dawn nia" a ti chu ka phur khawp mai. "Luah luh inringin ka inrem fel vek tawh a nia" ka tih chuan, "Nunui ka duh leh loh tlat zel chhan hi han sawi teh" a ti mauh mai a, hetiang lam hi ka hre viau nain Sangkhuma hi chuan min ring mah mah zel deuh chu a ni. 

"Engtin nge ka hriat ang? Nunui lah nang angin ka hrechiang bawk si lo" ka tih chuan, "A rilru a ţha lo aniang a" zawite hian a ti a, "Hmui thlawk thei te a chah sak che kha, i lawm viau a ni lo'm ni?" ka ti ve thung a, khami ţum pawh khan chhangthawp min leisak a, tun ţum chu chhapthawp min leisak nain a hlim lo riau. "Duh lohna ka nei tlat zel ka tih kha, nizanah Nutei zawk hi ka mumangah ka hmu a, ka la ngaihtuah char char" a ti chiah chu, "C. Sangkhum" ka ti tuar a, ka nu'n ka awki ang chiahin, "Lalremmawi" a rawn ti ve thung a, "Nu Nempachang, mi thusawi ngaithla reng mah ta che, i harh reng te chuan ka sawi thui hma khan i aw te thian ve la" Sangkhuman a ti bui bui a, ka nute pindan lam melh zeuh zeuhin a nur nang bawk. 

"I ţawng zawih sur sur em kha, mi ti phu zuk zuk reng suh Remmawi, ka damlo lehnghal" a ti a, Sangkhuman a chanchin a zawt ve ngial nain a chhang duh tawh lo. "Nunui ngaihtuah chungin ka mu a, ngati nge Nutei ka mumangah ka hmuh daih le?" a hma aia zawi zawk hian a ti a, kan biang a insi lo chauh tawh. "Ka hre bik nang, nangpawh ka mumangah ka hmu fo che alawm eng nge ni vak a?" ka tih chuan, "Nunui ka duh loh leh daih zel chhan hi a awm ang mawle" a ti leh daih a, a hui leh pap zel a, "Pheikhawk charna i rui a nih kha va mu rawh" ka tih lahin, "Nutein kan khua a ngainat tlat chhan te hi ka ngaihtuah kual a, eng emaw ti taka inzawmna kan lo nei reng em mawni le tih te" a la ti leh zel a, a hmel ka en ţhin, a chauh hmelin a tha a za lo riau a, "Pheikhawk charna i rui chiang mai" ka ti leh ringawt zel a, "Pheikhawk charna berkher chu ka rui lo. Aaa....ka rilru a buai, Kolasib mi hlir an ni lehnghal a, khuanu hian sum a suih pawhin a harsa lo zawnga suih tur a nia, hetiang te chuan pheikhawk siam nachang pawh ka hre dawn hleinem. Aizawl nula hmelhriat i nei em? Ka check it out dawn" a ti chiah chu, "Awii...what a funny thing, pheikhawk siam i thiam dek dek a kolasib nula hmu nepin Aizawl nula check it out i tum nghal ringawt a" ka ti hlut a, ka nuih a za ngang mai. 

"Kolasib tih ţuah hum reng a ninawm tawh. Laldy dianas inn ah aieng i la dah tiraw? Ka pheikhawk siam hi zawrh tir ve teh, thawmhnaw dawr lianah te chuan ba ţhin paha bem mak tur an tam ang chu. Nunui nen kan laklawh lohna tur han ngaihtuah teh" a ti chung chung a, hei hi a nia Sangkhuma duh nei ka nin ţhin em em nachhan, min nawr chung zel. "I pheikhawk siam hi hil bul, rawlh thuih chi vek a nia an duh lo sa. A chung te chei par la, a dum leh a uk lo deuh te siam ve phawt rawh" ka tih chuan, "Min pui hreh hle mai maw...sorry, i am pheikhawk siamna khawl" tiin a insehruh a, "Pheikhawk dangdai tawk ka la siam chhuak dawn khawp mai. Korean film pheikhawk an siamna kha a hming min lo zawn sak ang che. Ka la siam ang, mipa chuan korean film kan en a nih pawhin chhan neiin, pa tak leh tumruh takin kan en tur a ni" tih leh thawh a rual a, "Awii...vawiin chu i rawn khawkherh riau mai, pheikhawk charna chu i rui lo tak tak maw?" ka lo ti leh a, "Rui lo rui lo, min en apianga i mitmeng lian zual ziah hi sim rawh" a tih hnuah, "Mipa mit la tur tawk leka i meng duh anih chuan maimitchhing zeuh zeuh rawh, mipa hmaa i ţhut apiangin nui chungin slow motion in i mit chhing zeuh zeuh la, an theihnghilh tawh lo ang che. Film ah pawh an inhmangaih ţan dawn lai vel an tih slow motion ziah hi, principal bulah hmang ţangkai ngei ngei rawh" a ti leh sur sur a, Sangkhuma sawi chu ni lo se ka awih maithei a ni. 

Nutei rawn haw chu ka en zeuh zeuh reng a, Nunui nen an danglamna a tam lem lo va, Sangkhuma lahin ka mumangah ka hmu a ti mauh mai bawk si, hunin a la hril ang chu. 

Tlaiah chauh principal te inah pheiin, "Ka buai nileng ţhak a" tiin chhuanlam ka siam a, "Chaw nawi kha ka dahchhuah theihnghilh" a lo ti ve bawk a, "Thingpui in rawh" a ti chiah chu chhuanlam ka siam nghal char char a, min chelh lui ve tlat bawk a. Huphurh deuha thingpui min pek hun ka nghah laiin an thingpui no pangngaiin min rawn pe hlawl a, ka hmazawnah ţhuin engmah a sawi lo na a a nui deuh a, kan ina thingpui tam leh thlum deuh in leh a hlau anih ka ring. Rin aia thil a man chak ve chu ka lawmin remchang phei se chu slow motion in mit ka siai ang mawle. 

CONT...