KEIMAH, THINGTLANG NULA (FINAL SEASON) 9

KEIMAH, THINGTLANG NULA (FINAL SEASON) 9

"Ka pawisawi si loah chuan min van ti beidawng ţhin em" ka ti hap a, ka ep a pawisawi loh hmel taka a ţhu ka en vang vang lai chuan, "Thil ţul a an nu leh pa lo kal te, a te lampang an rawn thlah a an rawn hruai leh ţhin te hi ka en reng zel a, engkim tih sak thei lo mah ila chhawk theihna ka neih takin ka ti mawle. Ka ţawng huat thu suhah, rin phak baka harsa te an awm a, a mamawh zual tana pencil leh a zumna tih vel lo leisak ve zeuh zeuh chu ka mawhphurhna niin ka hria. Zirtirtu hian eiruk tur kan nei ve lo a, zirlaite puih a thiang lo tih dan inzam a awm lo bawk a" a ti dap dap a, a thutakin a ţawng ve duah a, a ngaipawimawh hle a ni tih a hriat mai. 

"Inrinniah kawnah ka kalpui ang che, ti ila bazar an tam dawn a, thil ka zuar duh maithei a" ka tih hnuah ka kut ka beng thak a, min rawn en rang hle bawk, "Tih dan ka hria, inrinniah zawrh tur a tam chuan bazarah ka ţhu duh maithei a, ka ţhut tak leh lo kal tawp la, naupang mamawh zual thil tur chu ka leipui dawn che nia, i pawisain thil min eipui ve thung ang" ka ti zung zung a, a lu lo bu nghat nghatin, "Fawnvela te sachek kan ei dawn nia" a ti a, a nui ve thei ta nge nge a, a zirlaite a veiin ţanpui a inpeih reng a, an vannei khawp mai. 

"Ka haw dawn" tih leh din ka rual a, ani pawh a ţhutna aţanga tho chhuak ve nghalin, "I fel emai ka hman tak leh zanah ka lo leng ang" a ti ve ngei a, "Eh...naktuk tlaia thingpui lum leh tura min duh vang" tih pahin a nakah ka kheuh zeuh a, a er zawk mai. "Aw haw wow...dek i va haw ve, pulpit a i din chhuah leh veleh khuangpu hnung aţangin dek ka rawn ti ang" tih paha ka kutzungchal ka tih kawm veleh ka banrekah rawn dawmin, "A za" zawi te hian a ti a, "Ka khawih lo chung che hian a za tho maw?" nui kar kar chunga ka tih chuan, "Za e...ti tawh suh, ka nui vak zel" a ti a, "Ţek pawh do dai thei hmel i put laiin dek i hua a nia, Zoram, i awmdan hian min ţhawng thei ţhaks" ka tih rualin ka banrek a hmerna a thlah a, "Ka hminga min koh takah chuan" a ti a, a ngawi daih a, "Zorama i nia, Zoram ka ti mai che alawm. Eng nge pawi vak?" ka tih chuan, "Ka hmingah hian khua a tam hmel i ti em?" a ti a, ka nui uar uar mai. "Ti e...zoram chhunga khua zawng zawng hi i hmingah a bet vek. Lungngai suh, hming mai mai alawm, vairam em a bet tel hleinem" ka tih hnuah, "Ka haw phawt dawn, zana i lo len loh chuan ka lungawi lo viau ang, palai ka rawn tir duh mai dawn a nia aw keichu" ti lehin a darah ka beng thak thak a, ka chhuak zui nghal a thui pawh ka kal hma a, "Remkalam" a rawn tih chuan ka ding chawt a, hnunglam ka hawi chu apple kengin ka lam panin a rawn kal hlawk hlawk mai. 

"I tana ţha tur ber i theihnghilh a" tih paha min pek lai chuan, "Ka tana ţha i duh chuan ngawng lutuk tawh suh" a mitmeng uk fiah zeta en chung hian ka ti a, a hrethiam lehpek tawp nang. "Ngawng lo e...zanah ka lo leng ang" tih leh inher a rual a, a kal ta chu thlir zui rengin a landan ai mah chuan a rilru ţhatnain min hip tawh zawkin ka hria. Pawi a sawi loin a rilru a thianghlim a, thil ti sual nawn duh lo chi a nih hmel bawk. Ka thin a na dek dek a carrot leh apple min pe nghal a, a nupui phei chu ni ila ka khua a sik apiangin vawk min talh sak ang ka ring. 

In a ka haw chu ka nu'n, "I va han rei em em ve, fel viau mah se mipa a ni a, amah chiahin a awm a, len chintawk hre rawh ka tih ziah kha. Thil ţha lo a thleng mai tur a sin" a lo ti nghal a, "Awi...what a very inrinlohnaness, principal berkher hi chu e...kan innei a nih ngawt loh chuan thawmhnaw pan deuh ha mah ila a hmulthi takngial pawh a din phah eih lo vang, hmeichhiain mipa te an hip theihna lai a hmu lo der thiam lutuk tlat" ka ti tan tan a, naupang ho a ngaihsak zia leh puih a chak zia te ka sawi leh a, "A va fel em em ve...an zirlai chauh lo pawh a ngaihtuah tel vek a nih chu" a tih hnuah, "Principal pawh hi a fel a fel kan tia nga, kan fak chamchi ang a, reiloteah mi makpa a ni leh daih ang a" awmze nei fein, min melh pah ralh chung hian a ti deuh kher a, "Nu, principal ah kher kher hi chuan mi fate pawh an beidawng ang" ka ti hap a, min han hmuh thut chang te hian danglamna a nei lo, a phu zawk a a ni mai. 

"Khum bul bangrelah pum damdawi ka dah a min va lak teh, rilţam laiin ka lo ei teh ang. Makpa nei ve lo ho chuan pum damdawi ei tluk tluk ila a ni mai" a ti leh kher a, bangrelah damdawi pakhat chiah a dah a, a mum chu a mak ka tih deuh avangin a hming ka chhiar a, kawţha lo damdawi zawk a lo ni, mum li lai a ei tawh. 

"Hei hi em ni i tih?" pindan aţanga chhuah paha ka tih chuan, "Ni e...in lo ei ţhen tawh a, i pa'n, 'dah tawp aiah ei daih rawh' a tia ka ei ta mai a nih kha. Mum thum ka ei tawh" a ti a, mum 1 chu ka ei a ni maithei. "Kawţhalo damdawi a nih hi...awii ka thi ţhaks, kawţhalo damdawi i pum damdawi ei hmiah hmiah a" ka ti a, ka nuih a za ngei mai. Ka nu chuan min en vung vungin, "I pa nikhua loh a nih chu, a thawk lo ka ti reng a ni. Patling pui si pum damdawi leh kawţha lo damdawi pawh han hriat hran loh te chu" a ti hlak hlak a, ka damdawi ken lai chu min laksakin a mit a ti zim a, uluk deuh hian a bih a, "Kawţha lo damdawi kha pum damdawi emaw tiin i ei tluk tluk mai si a, i ek a khal duh awm mange aw" ka lo ti vang vang a, "I pa mai mai chu aw..sawi miah suh u, kawţha lo damdawi hi ni hnih ni thum tal ei ve rawh se" tih pahin a ak hmak a, ka pa fimkhur loh ve na lam tak a nia, ka nu damdawi pawh a lo ei pui char char tawh. 

Ka pa a rawn haw veleh, "Pa, inbual la chaw ei ang u, zanah principal a lo leng dawn a ka che zung zung duh" ka lo ti nghal a, ka ngaihtuah ringawt pawhin ka phur, a duh duh naah a ţhu ang a, a rilru a awm awm a sawi leh mai dawn a ni. "Tunlai chu principal i ti deuh rawt a, a fel viau a ni phawt ang" ka pa chuan a ti vel a, principal nen kan inbiak a a lo an zau theih huau huau nen hian. "Ti hian phur deuhin bul a ţan ang a, a rei hnuah a chhuah leh tho ang, tu fa mah a man tang ve thei lo" ka nu'n a tih chuan, "Mi fate man tu ka nih loh hi. Mi fate zawng zawng huikhawm a man tang vek turin min beisei suh aw" ka ti kha kha a, "I senior mai dawn, miin an iai hma chein tihdan ngaihtuah vat rawh, dawr hawn hi thupui berah nei suh, aieng te hian pasal a pe dawn lo che a nia" ka nu'n a tih hlak hlak laiin ka pa'n, "Tur vak vak ţhin suh, amah a inchawm theih a a hlim te chuan chu aia lawmawm a awm chuang lo" a ti ve thung a, mi inang lo lutuk an nia, ka nu hi chu a ţhiante faten nupui pasal an neih tawh laia ka la neih ve loh vang hian min tur leh chiam zel. 

Zanriah eikhama pindan a kan luh chuan Nutein, "Remkalam, thil ka hrilh ang che" tih leh khum a min pawh ţhut a rual a, "Eng nge a?" ngaihţha lo ru deuh a ka tih chuan, "Ih maw...i hmel hi thlak rawh" a ti hem mai a, "Hmm...a nihna tur anga pian vek tawh hnua hmel thlak danglam leh chu a har awm e" ka tih chuan, "Chutiang lam ka sawi lo" tih pahin a kutin ka biang tawn tawnah a dawm a, "I awm mai mai pawh hi i meng kul zel a, sim rawh. Principal bula i awm te hian meng no ve deuh la ka ti ţhin, i nuih lah hian tihtakzetin i nui bik a, hmeichhe nuihin nui ve ta che. Mak i tih deuh leh i meng nghal rulh zel a, principal nen a in awm te chuan i nuih hian i hmui te hup la, nui huau huau bik zel suh mak a tih theih em che hi. Hmanni a an in a kan len pawh khan i nuih thut chuan a phu zuk zel, aaa...ka lo ip chawi chawi ţhin. Hmeichhe pangngai rim awlsam deuh tur ang ten awm ve la" tih pahin ka biang dawmna chu a thlah a, ka banah a beng sawk thung a, "I awmdan hi i tawh a khirh hmel alawm. Nui chunga i en te hian a chang chuan i rapawm a nia aw, i inhre lo mai mai a nih kha" a ti leh a, a ţawng zawi khawp mai. "Min rap lo aniang chu ka bulah a awm reng peih alawm. Hetiang lam chu nang aiin ka hre zawk aw" ka tih chuan, "A hlauh vang chein a ti thinrim ngam lo che aniang chu. Kei aiin hrechiang zawk mahla mipa bula i awm laia i hmel awmdan ka hmu chiang zawk alawm mawle. I che reng reng i khawng tlat bawk sia, ka en che hian ka lo hah ţhin" a ti deuh hap a, "Chet zei loh vanga indem ngawt chi a ni hleinem, ka pian dan a ni ve mai a, ka che reng reng lo khawng tlat pawh nise ka taksa a nat phah lo chiang e...thinlung hi zei hiam se a tawk der" ka tih chuan, "Chei...thinlung zei ka hre ngai lo, principal hi a che chu a zei lo vak miah lo a nia aw, biakin a hla kan sak hian ka en ţhin, a inthen mawi thei rapthlak" a ti a, nuih duai pahin a awmah ka lo nam sawk a, "Awii...ka duh thei ţhaks, lo en reng rawh aw Nuchuk, kan tlangram par vulna mai ni lo, love song pangngaiah pawh min hrechhuak vat ang" ka ti a, min ei loh hmel poh leh ka hlim, damchhung reiloteah rilru ka ti hah peih tawh lo. 

"Remmawi, Zorama a lo kal" ka nu'n a tih tak lauhah chuan steel almirah inhunna lamah phei vatin darthlalang hmaah ka ding a, ka hmai leh ka sam tuai thuak thuakin Nutei lamah phur zetin ka inher leh a, "I sam kha i colour chhe leh vek tawh a, a chul mam theih hlawl loh a nih kha" lo ti mah se pindan aţanga ka chhuak chu min zui chhuak tho a, ka nu leh pate ţhutna lo lamah principal chu lo ţhuin min hmuh rual chuan, "Ka lo leng" a ti a, zah hmel deuh hian a nui pah bawk a, "Aw...ka hmuh reng che hi" tih pahin a bulah ka ţhu a, a rimtui emai a inbual zo chiah aniang. 

"U Zoram, Kolasib khua ve tho ka nih hi aw" choka aţanga Nutein a rawn tih rualin a lam a hawi phei vat a, "Kolasib chu hmelţha tamna khua an ti" principal in a tih chuan, "Kolasib hi kan khua angah ka ngai a, ka rilru hian kolasib a ti reng zel, kolasib khaw chhuak kan nih ka ring" ka lo ti fiamthu a, ka nu'n rum tawkin min rawn melh a, fiamthu a hrethiam lehpek lo aniang chu. 

"Kolasib hnaiha awm pawh an hmelţha ang, ka hre lo le" principal chuan a ti bah nawk a, "Kolasib ah awm lo mah la i chhe hleinem" a ti leh a, nui chungin ka pa ka en ru a, tv en angin a awm na a principal thusawi avang chuan a ţhu reng reng te chu a beh tawh loh hmel khawp mai. "Hman zana kan kalna nu kha ka rawn hmu a, 'aiwa' a ti" a tih chuan, "U Nobawihi maw?" ka lo ti hluai a, "In kal a maw?" ka nu'n a rawn ti ve bawk. 

"Aw...Remka---" a ti hman chauh tihah principal chu ka kheuh zeuh a, ani dek hua lah a eu zawk a, a aw a thian zui kharh a, "U Lalhuma in bulah kan hmu a, u Nobawihi in ka kawhhmuh a nih kha, kan zuk kal thleng lo" ka tih chuan ka nu'n rinhlelh hmel deuhin min en a, principal lehzel chu ka hruai sual theih an ring em lo ang chu. "Umm...ih" principal in a lo tih ve chuan nui lui hak hak chungin a hnungzangah ka kheuh leh a, u Nobawihi inah ka la kal fo tih an hriat chuan zana aieng zawrh chhuah an phal tawh lo ang. 

"Nobawihi in a kal fo a ţha lo, mi zawng zawng zu a zuar tih an hria a, a in a kal chu an hmu khaw lo nghal zel. Hmeichhia phei chu kal loh tawp tur a ni, a inchhungah an in luk luk lo nain kalkawngah zu rui sual tawn a hlauhawm" ka nu'n tih veleh principal sawi tur hre lo chuan, "A dik nu Nemte, aiwa" a ti a, ka nu a hawi phawk khawp mai. "Aiwa te chu kawppui la nei lo ho infiam nan a sin kan hman ni, engati nge ka nu hnenah aiwa i tih daih?" ka ti a, "A nih aiwo" a ti a, Nutei a nuih vak vak laiin principal chu a kun deuh a, "Ţawngkam ţhaah ka ngai" a ti chu keimah bakin ka hriat phak ka ring lo. "In khaw ho hi in thil sawi dan a mak thei e" a ti leh bul bul a, a zah hmel hle bawk. 

"Niang chu, an duh duh an sawi a, kan khuaa awm tam lo ho chu an buai nak zel. I awm rei ang a i hre chhawm ve zel mai ang. An intih hmuh laklawh a, a ţha lo tak tak a ni" ka pa'n a lo ti charh charh a, "U Remkalam" ti lauh chungin Sangthanpuii a rawn zuang lut thauh a, principal a hmuh chuan nui chung hian, "Ei ei ei...u Remkalami love at every eyesight pa a lo awm a nih hi" a ti a, kawrfual serthlum rawng fan thei chi, a taksa phuar ţang mai a ha a, a ban leh a tlang a arh mai bakah a phelh hnuah chuan a dulin a tawn puar luahna lai chu a arh tel tawh ka ring. A ngo vak lo nain, "Ka nu'n 'thawmhnaw lar hian mi a kap eng' a ti" a ti a, lar deuh deuh a ha ţhin a, amah ber hian inhmeh a inti a, kan sawisel ngai lem lo. 

"Sanglari chu kha khawiah nge i kal dawn?" ka pa'n a lo tih chuan, "U Remkalami thil ka dil lawk dawn" tih pahin min hui zauh a, a sam a eng ţha bawk si, a kawr hak rawng zawng zawng nen hmuh a hahthlak lam hret chu a ni. A bula ka va kal phei chuan min lo hrilhruin, "Ka cheng 100 kha" a ti a, min dil har ka ti reng a ni. "Min nghak lawk rawh" ka tih hnuah pindanah lutin a cheng 100 min kawl tir nen ka chhuak leh thuai a, ka pek veleh, "Pa Dite, naktukah sangha rep ka zuar dawn a min chan sak ve ru aw, rawt thakin a tui lutuk, a uih lo nain a hang, nghathu chu dah nil tak a ni. Keini pawn zanin tlaiah kan hmeh a, sa leh thlai aiin kan duh zawk, ka pa damlo pawn 'ka awm a nawm phah sawt' a tih kha. Nang phei chu i hah thei si, vawihnih khat ei la i tlangval lai tha ang kha i nei let leh mai ang" a ti nghal zung zung a, ka pa a nuih hawk hawk laiin ka nu a tum bur thung. 

"Sangha rep kan hne tawh, kan ei nasa lutuk a kan ei peih tawh lo" ka nu'n a tih chuan, "Damdawi pawh peih vangin kan ei hleinem. Pa Ditea hian chak nan a mamawh a, i leisak ve ang chu. Chawlhniah paw deuha i hmai i hnawih laiin pa Ditea chu a thu thak bik zel a, ka khawngaih a nia. U Remkalami aiengin amahah hna a thawk ve lo aniang, ka sangha rep zawrh chu ei se a kawchhung a insiamţha anga a ngo phuk mai ang" a lo ti phawr phawr a, ka pa nuih a za viau a ni. "Meizial i hralh theih em kha lei sak ve rawh aw nu Nemte, naktukah ka rawn dah dawn a nia, sarep te pawh ka chah a, ka zuar leh dawn. Bawng kam bawl te ka nei dawn a nia, ka tlai dawn, sangha rep duh kan zawng kual teh ang. Sir, nangpawn min dawr ve rawh aw, i rawt thiam loh leh ka rawt sak ang che" a tih hnuah bathlarah chhuakin, "Pa Khawte" a ti lauh a, ka nu'n, "Sangthanpuii tak hi chu a" a tih laiin ka chhuak ve a, pa Khawtea pawh vawi hnih vel a koh hnuah a rawn eih lauh a, "Sangha rep ka zuar a, ka rawt sak nghal thei bawk, rawt man free aw, ka rawn kal dawn a nia..ka lawm e bula hmangaihna aw pa Khawte" a ti zung zung a, a phur khawp mai. 

"I va inchei ve" tih pahin a sam chu ka hui man sak a, "A sak lutuk ka sam kha hui buai duh suh. U Remkalam, principal saw min dawr turin lo hrilh ve rawh aw, a in ka rawn kal pel a, a uite a bauh nasa teh mai a nia" a tih chuan, "Mi duh lo chung engtin nge ka lei luih tir theih bik ang a?" ka tih chuan, "Ka duh lo a tih loh kha, min zawrhpui ngei ngei ang che ka pasal fanaute chawmna tur ka tuak dawn" a ti a, a kawr a pawh ţhat sauh sauh laia, "Nimbu in hmai hnawih ka siam dawn i tih kha" ka tih chuan, "Ka siam chhin a, ka inhnawih a hmai a thip duh lutuk ka hralh thei lo ang. Sarep zuar ila a fuh zawk dawn. Principal chu lo hrilh ang che, lawmna bula mittui aw...ka kal" tih leh kal a rual a, min nelin hnar mah ila ka bulah a awm tlat zel a, tunah chuan keimah zawk hian ka ngai viau tawh. Kan zia a inan avangin a bula awm nuam ka ti bawk. 

Inchhunga ka luh chuan principal in a lehkha zir hunlai vel a a chanchin ka nu leh pa a lo hrilh a, "Pawl 12 ka nihin ka piangthar a" a tih chuan, "Ka awih lo, i pian hlimah bak i piang thar lo" a bula ţhut pah hian ka ti a, nui vur vur chunga ka en laiin ka lam a lo hawi a, tlema a hmui ti kau deuh chunga min en vang vang hnuah ka sawi dik a ti aniang a nui chhuak hawk a, "Kekawrte leina tur chu i hre tawh em?" a ti ta daih a, a thusawi lai nen a inrem lo khawp mai. Ka nuin a lo ngai dik lo hman pek aniang chu, "Lalremmawi, kekawrte lei i dil em ni?" a ti bak hlar a, ka thlavang hauh tuma principal in, "Ka dil lo" a tih chuan Nutei a lo nui leh hak hak a, "Min dil lo ka tihna, a tlawmna i hria em nu Nemte?" a ti a, a thutak bawk si, ka pa'n, "In thusawi kan va hrethiam ve tawh lo ve" a ti ban charh a, Nutein thingpui a rawn dah avangin kan sawi zawm tawh lo va, principal ka la melh ram ram thung. 

A haw tur chu bathlar thlengin ka zui chhuak a, kal ta mai lo vin a ding rih a, midang hriat loh tur hian, "Leina tur chu ngaihtuah rawh aw" a ti dut dut a, "I va ninawm sek e. I vei tawh hi mi aiin vei bik ziah suh" ka tih chuan, "Khawvel a chhiat tawh hi, an himna tur ka duh vang mai a ni" a ti a, naupang ţhenkhat te chhungkaw chanchin ka hrilh hnu aţang khan ngaihţha deuhin a awm thei tawh lo. "Lei pawh ni ila nangman i sem kual dawn tihna mi? Mi ţhenkhatin mak an ti daih ang che aw" ka tih chuan, "Miss te ka tih tir ang, nangman min lei pui ang a, ka kal aw...aiwa" tih pahin ka hnungah dimtein a dawm zawk a, a hmeh ên rawn ken chu ti engin a kal zui nghal a, "Aiwa te chu in mangţha na a ni hleinem" tiin ka au zui a, rawn hawi let chung meuh a, "Nula leh tlangval hman chi i tih kha" a tih chuan, "Khatiang lo deuhah khan an hmang ţhin" ti mah ila, "Hriatthiam dan danin hmang mai ang, ka hmu chiang tawh lo che, aiwa aw" ti lehin a inher leh vut a, nula leh tlangval inchhaihna ţawngkam lerh a ni reng sia, ţhalai inkhawmah te a lo hman palh vaih chuan a chhe lamin a lar hluai a ni mai. 

Mut hmuna Nutei nen a kan ti ti laiin lukham bula ka phone dah chu a nghawr dat a, Kalvari a nih ringa ka en laiin principal zawk a lo ni. Whatsapp ah message min lo thawnin, 'Flying kiss lem ka siam' a ti a, hmui lem a thla a vuah chawp chu min rawn thawn a, ka nui leh var var tawh. "Awii...Nute, principal hi rin aiin a zei dawn riau. Flying kiss siam chawp min rawn thawn der tawh, a tih dan vel hi ka duh ţhaks" tiin ka nui uar uar a, 'I siam thiam ţhaks, nakinah ka siam sak ve ang che' ti a chhangletin Nutei ka khan chawrh a, ka lawm hman tehreng nen Fawnvelan, 'Principal hi eng nge a hriat le? Zanreiah flying kiss min rawn thawn a' a rawn ti a, ka hnuai nghal vek alawm le. 

Nutei ka hrilh ve chuan, "Flying kiss a pek duh vang che ni lo vin a thil siam chhuah a intihtheihpui vang mai maiin a thawn che a nih chu" a ti a, ka thinrim chuan, 'Zochhurbur' tih ka thawn a, data ka off nghal hmak a, principal hi 'ka duh' chu ka ti lo, mahse mi fate ta bik turin ka ui a ni. 

Principal ka ngaihtuah ţan avangin ka inthiam lo nge ka hre lo ka mumangah Maski ka hmu a, phul hring dup hmunah kan lo leng dun a, a hmel a êngin min nuih sang reng a, "Lo haw tawh rawh" ka tih chuan nghet deuha min kuah chung hian, "Ka awmna hmun turah ka haw tawh" a ti a, lunglen hmel deuhin kan piah lam ral hla deuh chu a thlir a, chutah muangchanga tho chhuakin pialral lam a pan leh dawn tih hriat takin Maski chuan, "Remkalam, pialralah forever aw" a ti a, Maski kal tur phal lo a ka lo ţah vak vak laia sava in, "Ak ak" a rawn tih rual chuan Maski kuttin chu a ţhang vak a, a kut a tih rik keuh rualin a tinah chuan rawng dum a rawn inhnawih nghal bawk a, ka hlau ţan hle. "Remkalam" ti a a ka aţanga aw chi thum vel a rawn chhuah rual chuan, "Awii...i may die" tiin ka ţe chhuak rawng rawng a, ka aw chu kan awmnaah chuan a thangkhawk nasain kan dinna laia, "Zahngai" ka tih tawh hnuah pawh thlang lamah chuan, "Die...die...die" ka la ti kual char char a, ka au ri kha a la thangkhawk kual vel a ni. "Min phatsan a" Maski chuan aw chi thum velin a ti leh a, ngaihdam dil ka tum lai chuan ka hmuh lai rengin a taksa chu a ţhang leh vak a, ţhu mah se a hmel ka hmu pha tawh lo ang. A san a san zia chu inrulpuiludin chungin ka chalah a pen keuh thei a, bungbu chungin ka chhipah a khabe a nghat thei bawk. Kawng chi tinreng a min tih ţhaih hnuah, "Ka uang a nih kha" tiin a khur chur chur a, Maski pangngai kha ni lehin, "Hlim reng rawh aw...inthiam lohna leh indemna rilru i put ţhin te kha dah bo vek la, Remkalami ka hriat ţhin kha ni leh rawh. Kei chuan ka nei thei tawh lo che a, min theihnghilh ngai lo hi ka lawm tawk em em tih hria la nuam i tih dan danin nun hmang rawh" ti sup sup chung hian ka bekah dawmin ka biang chu a kutzungpuiin a nul a, "Beisei phak loh beisei luih tlat chu natna mai a ni. I kianga awm thei ngai lo tur chu thlah zalen la, nangpawh i zalen tel ve ang. Suangtuahna dik lo hi tanin ah a chang thei a, mi tam tak an tang ţhin. I tang ve a nih chuan in chhuah zalen la, suangtuahna pik deuha cheng reng lo vin khawvel tak tak thlir kual la, hlimna tur i hmu hnem zawk ang" a ti leh a, "Han sawifiah deuh teh" ka tih chuan, "Haw tawh rawh" a ti daih a, a bana vuan bet nghalin, "Ka haw san dawn lo che" ka ti tak na a, "I haw awm emai" tih leh insiamchhiat a rual a, na zeta min ben chuan ka vir nawk a, ka harh chiang hle bawk. 

"Awii...mumang mak deuh ka nei leh tawh" tih pahin ka ţhu chhuak a, ka awm ka dawm a, ka hah vek thei alawm le. Parda ka keu leh a, khua a la var lo. Ka chal dawm chung hian ka phone a sana chu ka en a, thawh a la hun lo hrim hrim. "Ngati nge ka mumang hi a awihawm loh theih bik em em le?" ka ti a, Maski ka ngaihtuah a, ka ngaihtuah dan ai bak bak a nasain ka mumangah ka hmu a, a thih hlimah pawh Maski hi ka la hran tir chhin ngai lo hrim hrim. Tuman, "Thawm a nei" tih te, "A thla ka hmu" ti te a sawi tur an hre lo a, a thi a, a thihdan a mak thu bak sawi zui a awm lo. A taka a hran loh ang bawkin ka mumangah pawh a hrang ngai lo a, ka ngaihtuah ve zan takah uchuak tawkin ka mumangah ka hmu zui a, a lungawi thlak loh hle a ni. 

Zingah Nutei ka hrilh a, "In inbia em?" a tih chuan, "Bia e...mahse kan thusawi ka hre tawh lo, tlemte bak hriat ka nei lo, aaa...ka harh hlimah khan ka lo ziak chhuak nghal vek lo a ni" ka ti a, ka lungawi loh em vangin ka insawh nghawng nghawng a, khatianga Maski hmuh ka duh ngai lo, ka phal lo bawk. "Mumang chu a zawng zawnga hriat theih a ni tawh ngai hleinem, i hmu khat ka ti reng a ni. Keichu ka hmu zeuh zeuh zel, nizan berkherah i hmu a, principal be tura a signal na che a ni thei angem?" a tih chuan, "Ka hre lo...principal ve hi a chhaw emai, flying kiss te chu mi zawng zawng an thawn ngai hleinem, thlan bik tan alawm" tih paha tukverh bulah ţhuin ka indawm ngawih a, ka mumang kha ka ngaihtuah zui a, ka hrechhuak vek thei tawh lo chu ka thin a rim hlur mai. 

"Maski hi a thi tawh a, a awm ve tawh lo nain mumang kaltlang hian la inkawm thei ila ka ti. Ţhian ang tal pawhin kawm thei ila, zantin ka mumangah rawn inlar se, zinga ka harh hma zawng min ti ti pui ţhin bawk se a nuam ang chu aw" ka tih vang vang laiin pa Khawtea kel a rawn be a, ngaihtuahna a ti buai vek. 

"Remkalam... ka tih Nuchuk" Sangkhuman a rawn ti lut a, Nutei nen an insu chiangin an inhmachhawn ran a, an inkarah u Valdiki chhangthawp ur sawi deuh bak a awm lo. "Ka'n sut che chu le" tiin Sangkhuma a nui hak hak a, Nutei ve thung chuan, "Engati nge tunlai hi maksak deuh deuh a i awm a? Nitin chhangthawp min rawn pe a, mumang ka neih leh neih loh min zawt ziah bawk si, nangmah vangin Fawnvela leh Remkalami ten Nuchuk min tih phah ziah lehnghal" a ti hlak hlak a, a mumanga Nutei a hmuh hnu khan a awmdan a dik thei tawh lo. "Ka hmu nawn leh tawh" a ti ziah a, a hmuh dan sawi chiang duh mang si lo vin a hmu nawn tluk tluk a ni ber. 

"Kha, chhang zawng zawng a nunnem ber chhangthawp hi ei rawh" tih pahin chhangthawp a pe leh tawh a, "Sangkhum, chhangthawp hi ka nute pawn an hne vek tawh. I rawn dah dawn rau rau chuan chhang dang te rawn dah ve la" ka ti dek dek a, "I ei tur a ni lo" a ti hmuk a, ngawi rengin ka en leh ta zawk a, "Kan ur sual loh chuan chhangthawp hi chhang zawng zawng zinga nunnem ber a nia, damreina a nih hi. Puar a awlsam rualin puar chhung a rei lo a, taksa tan a ţha" a ti vel a, kei aiin Nutein a ngei hmel zawk. 

"Taksa tan a ţhat leh nangman ei vek la a ni mai alawm. Mi hne chung chung chhangthawp inpek char char te chu a" a tih hnuah Nutei chuan, "Sangkhum, chhang min pek dawn rau rau chuan chhangthawp lo deuh, cake te min pe zawk la" a tih zawm leh a, "A ngai lo, i no emai i hak ang" a tih rualin Sangkhuma taksa rem lai lai chu Nutein a beng pawp pawp a, ani lah chhangthawpin a lo indang ţawk ţawk a, a chang leh a hnek a, a pet thul, Sangthanpuii leh Ramnghinglova te lah an insual ziah a, Nutein Sangkhuma a hnek a, a pet vel lai en pah chuan, "Everybody was kung fu fighting" tiin ka lo zai a, ka hla sak leh an chet dan inrem tak a ni. 

"Hai-ya" ti a Nute in a tawp kharin a ding kak ţha a, a la inhumruh hle bawk. Sangkhuma chuan, "Remkalam, buainaah hian inrawlh ve ziah suh" a ti daih a, "Ka inrawlh hleinem...ka ţhut mai mai hi" ka tih chuan, "Nuchuki chawk phur thei hla i lo sak bui bui kha" a ti vin hlur a, a hmai lah chu a sen vek a, chhangthawp pawh a nawi vek tawh. 

"Ka zai mai mai pawh in huat tawk a tling zel a nia, ka lo piang ve kher kher a ni" ka tih chuan, "Khatiang khan ti vel suh, mi insual hmuh i chak ve hrim hrim a nih kha" Sangkhuman a lo la ti hlur a, principal in min rawn be chiah bawk. "Ve tehmial che chuan tehmial a" phur zet hian ka ti a, "Tlaiah rawn kal a ngai lo ang aw" a ti a, min sawm vek tawh sia, ka inrin ve tawh tehreng nen hian. "Engati nge?" ka tih chuan, "Miss in min pui thei dawn a" pangngai tak hian a ti a, ka kal awm tho emai. "Miss ai chuan naupang ho khan min hrechiang daih zawk, ka lo kal awm tho e...miss kha aieng ka rawn zawrh dawn" tih leh phone dah ka rual a, a hrilhhai leh viau ang, a duh leh hawi hu hu rawh se. 

"Enge a?" Sangkhuma leh Nutei ten an lo ti rual ţhat a, thil awmdan ka sawi chuan, "I rilru a na palh ange...i thik vel ang a?" min fiam ti tih hian Nutei chuan a ti a, "Lo na pawh nise aieng ka hralh chuan a ţha tho alawm" ka ti a, a inleng chu tu pawh nise ka kal dawn a ni ringawt. "Thawhţanah dawr kan luah lut thei dawn a nia aw, ţan la nasa rawh" awmze nei fe hian Sangkhuman a rawn ti ve bawk a, principal ka hip beh theih chuan a thlawnin thla thum chhung ka awm dawn tak alawm. "Lungngai suh...dawr luah man tur kha tuak ţauh ţauh la a ni mai" ka ti a, tlaia principal hmuh tumin rilru ka siam sauh sauh a, hmeichhia te chu lo ţhu ţhup mah se a ho, ka inhralh hnem ting a ni mai. 

Ka nu rawn haw hmain ka insiam a, school an bang har em em ngai lo va, naupang ho pawh an inthlak ang a thingpui leh chhang beiseiin an kal leh vat ang. Sangthanpuiin, "Ka rawn kal dawn a nia" a tih avangin a rawn kal hmain aieng khaiin ka chhuak a, thingphurh kan ngai leh ţep tawh a, dawr kan luah luh dawn phei chuan hun thawl ka nei tam tawh lo. 

Kawngkhar an khar loh apiangin ka kik kauh hnuah ka lut tlang nghal a, principal hmuh tur a awm loh laiin nula pakhat a lo awm a, miss a tih chu aniang, keimah tak chuan ka la hmu ngai lo, school a rawn thawk thar, veng danga inluah te pawh aniang. "Khawiah nge Zorama?" ring leng lawnga ka tih chuan, "A inbual lawk a, lo ţhu rawh" ţha deuh hian a ti a, a no ang surh lehnghal a, anni anga vun no chuan ka vun ang chu in nawh nan an it viau maithei a ni. 

"Aieng hmanga ka hmai hnawih siam hi min dawr ve la" ka tih chuan, "Keimah maw?" tih ha pahin a awmah a kawk a, "Ni e...kan pahnih chiahin kan awm hi" nui hak hak chungin ka ti tak na a ka nuih a za vak lo. Kalvari chu awm ve se ka chhaih buai chiam ang mawle. Dr Balunga vanga u Valdiki ka ngei theih zia te kha aw. 

"Aieng berkher chu ka inhnawih ngai lo a, ka hmai ka enkawl peih lo lutuk" a tih chuan, "Nangmah vang liau liauin ka lo keng a sin" pawi ti awm tak hian ka ti a, a ţawngkam a dam thluam a, a chezia leh engkim a hmeichhia bik hliah hliah bawk si, principal duh chi tak a ni maithei. "Khawimaw ka lo enchhin" inthlahrun hmel deuh hian a ti a, a kut lah chu a fai sar a, an pahnih hian inngaizawng zawk se an inhmeh phian ang. 

Aieng bur chu lain a chhiar a, ka hming leh ka phone number leh aieng lem bak han en vak tur a awm bawk si lo, khawih neuh neuh chungin a tuai a tuai a, chutianga rei mawi tawk a awm hnuah chuan, "Dawrah ka hmu ţhin a, pakhat hi ka lo lei ve chhin ang" a ti ta nge nge a, ka inthiam lo leh deuh chuan, "I duh vak loh chuan a ngai lo" ka ti leh hnuhnawh a, "Ka lo lei chhin ang, sir pawh hian a neiin ka hria, nichinah fridge ah sawn ka hmu" tih leh fridge kawh a rual a, a lo en kim hman hle mai. 

"Lei rawh...i inchhir lo ang, principal pawh hian a hmang char char alawm. Kolasib a an hman tur nen 10 chuang an lei tawh" uar zeta ka tih laiin principal chu bualin aţangin a rawn chhuak a, a lu hru nawk nawk chung hian, "I lo sumdawng a?" a ti a, a nui hmel te chu mawi ka va han ti thar tak, miss awm vang a ni ngei ngei ang. "Aieng min lo zawrh a nih hi" tiin miss chu a nui hak hak a, "Lei sak ve rawh a ţha phian a sin" principal in a tih chuan, "Engtia ţha nge? Hman a nuam em? Phih fai a har em?" miss in a lo ti nghal zung zung a, ka bula a ţawng duh loh nen. Principal in min lo en chuan maimitchhing lek lek hian ka lo en let a, hei bak hian ka meng no thiam lo. Miss zawhna chu chhan tumin a ang zuau a, engmah sawi lo vin a ngawi leh daih a, "I hrethiam nange?" miss in nui chunga a tih leh chuan, "A ţha...hmai a bo thei" rang deuh hian a lo ti a, ka au vak chak ţhin a sin aw.

"Hmai a bo thei a?" miss lahin mak tih hmel deuhin a lo ti a, chawp leh chilh a thil a sawi dawn hian a buai ve ziah. "Remkalami aieng kha leisak rawh, a ţha lutuk, inhnawih hnuah hmai a feel theih loh" min en chunga principal in a tih chuan rum deuhin ka lo melh a, "Hmai a nem a, hmai nei lo ang kan ni" ti lehin keimah bawk min rawn en a, min fak sak a duh ve si, a thiam hlawl lo a ni ber. "Hmai vun a ti nem i tihna mi?" miss in a tih chuan a lo bu nghat a, "Tunlaia number 1 a nih kha" a ti chiah chu nui chung hian a rukin ka kutzungpui ka hmuh a, ka tih ang chiaha rawn ti vein hmui phunin, "Aiwa" a ti a, ka lawm em avangin, "Aiwa" ka ti let ve a, miss in mak min tih hmel khawp mai. 

"Phone ka va hmang lawk" ti a miss a chhuah rualin ka ţhutna aţangin ka tho sawk sawk a, principal chu a nakah ka kheuh zeuh a, a lo eu zawk rual chuan, "Hmai a bo thei, hmai engmah a feel theih loh tih kher a ngai em ni?" ka ti a, a eu ngaia a la eu reng avang chuan ka pawt sawk a, "Remkalam, dawt ka sawi thiam lo" a ti ta mai, "Dawt sawi turin ka tih loh che kha" ka tih chuan, "I hmai hnawih siam ka hnawih khan engmah ka feel lo tak tak, ka danglam lo, a ţhatna sawi tur ka la hre vak lo" a lo ti thum dut dut a, miin an fak tehreng nen. 

"I la hman tlem vang a nih kha. I hman rei hunah i hmai vun a nem thep mai ang" ka tih chuan, "Nitin ka hmang" tih leh ka kut lak a rual a, a hmai chu min khawih tir ta mai a, mipa hmai ka khawih lohna a rei tawh si, ka phu nasa kher mai. Ani lahin, "A danglamna i hre bik lo mi?" pawisawi loh hmel tak hian a lo la ti zui a, ka kut chu a biangah a dawm bet ran a, ka lai ve deuh chuan ka aw thian kharh kharhin, "Mipa vun chu hmeichhia nen a inang lo a, a ţhatna hre tur chuan i hman rei deuh a ngai alawm. Miin an zawh che chuan lo fak zel rawh, Aizawl leh Kolasib ah pawh an hralh chur chur reng a nia" ka ti sawk sawk a, chutianga lai deuha kan awm lai tak chuan miss a lo lut lehnghal. 

Miss in min en reng chunga a awm ngaia a la awm reng avangin keimah zawkin ka kut chu ka la thla a, min rawn hmu chu pawi ka tih em em loh laiin kan miss ber chu a laih hmel khawp mai. Naupang ho an lo lut ta hlauh zawk a, miss in pawisa min pek hnuah pawh ka la ţhu reng a, principal in, "Remkalam, hei carrot ka lo lei che" a tih te chuan miss zawk a lai daih a, min rawn khawih zeuhin ka beng bulah, "Eng nge in awmzia ni a?" a ti sar sar a, thik chi vak a nih loh hmel. 

Pindan a principal a luh hlan a, "Ţhian kan nia, tunlai tak phei chu kan inkawm nasa a" ka tih chuan, "Chupawh nise mi han ngaihsak vak chi a nih loh nen, a ţhat ţhatin a ţha ve tawp a, zirtirtu dang pawn rawn hmu se mak an ti viau ang" a ti leh sar sar a, ka bula a ţhu te chu a rimtui chem chem reng a, a kutphah pawh nem tak a ni. "A thawhpuite a ngaihsak vak lo tihna mi?" ka tih chuan, "Ngaihsak e..a fel lutuk, tuman sawiselna tur kan hre lo. Naupang a ngaihsak a, kan chungah a fel bawk a, mahse mi a ngaihsakna lantir thiam vak lo chi a nih dawn hi kan ti ţhin a, kei phei chuan ka nel har a, ka thawh hlimah te khan a ţulah bak ka be ngai lo. Chetzia a engmah lanchhuah tir thiam lo chiah ka ngai a, a mak reuh e" tiin a nui har har reng a, "School ah ka sawi dawn khawp" a la ti zui, sawi mai mai rawh se, ka inhralh theih phah phian maithei a sin. 

"Taka, kuttin, ketin leh sam te ka khawih thei vek a nia aw, duh an awm chuan min hrilh ţhin ula, ka pan thei a, bazar vengah dawr ka luah dawn bawk a" ţhut hnaih sauh chung hian ka ti a, chunglam a melh ralh a, a ngaihtuah vang vang hnuah, "An awm maithei, keipawn langsar vak lo chiin ka duh ve zeuh zeuh ţhin. Hawh, phone number inpe ila" a ti ta mai a, thik ru deuh, a huat tura chhaih kual tum ranin ka kal a, kan han inhmuh meuh chuan phone number inpein kan nui dun kar kar reng thung a, misual tak a ni lo tih a hriat reng mai. 

An ngaihtuahawm loh bawk a tiin principal in naupang ho lehkhabu a phawrh tir lai chuan, "Ka haw dawn nia" ka ti lauh a, miss Partei chu, "Nakinah lo la leng ve rawh aw" ka ti bawk a, ka chhuah dawn ţepah principal chuan, "I carrot i theihnghilh dawn" a lo ti ve thung a, ka let hun nghak lo va amah zawkin min lo pek lai chuan, "Min pek sa pawh kha tlem a la awm a, ka ei zawh hunah ka hrilh che ang a min lei leh chauh rawh. I lei reng chuan a chhe mai mai ang" ka tih mawlh mawlh laiin, "Nizan khan Zochhurbur min tia" a lo ti ban charh a, "I phu ve reng a nih kha" ka tih hnuah ka hui zauh a, tlema a lo kun hniam deuh takah chuan a beng bulah, "Flying kiss chu thlan bik hnenah bak an thawn ngai lo. I ngaizawng a nih loh chuan Fawnvela thawn tawh suh, keimah chiah min thawn ang che" ka ti a, chutah din hlat vatin, "I hria maw?" ka ti leh a, bangbo tih hriat deuha min en laiin uangthuang zeta inthin nawk pahin ka hmui sir ka seh zeuh a, nui awr awr chungin rang deuhin ka chhuak zui nghal a, a rilru a buai leh viau ang. 

Zanah a rawn leng lo nain whatsapp ah min rawn bia a, 'Flying kiss kha han sawifiah deuh teh' a rawn ti. Ka bula mu Nutei bawk chu ka nghawk leh sawk a, "Flying kiss thlengin a hrethiam chak tawh mawle" ka tih chuan, "I hlim hawr hawr nen hian ţhian ang bakin a en mang si lo che a" a lo ti nang nang a, Sangthanpuii meuh pawhin, "Ka beidawng tawh" a tih ve ngei kha. 

'I duh deuh bulah lo chuan thawn tawh suh, i bialnu ka tihna a nih chu' ka va tih chuan, 'Min rawn thawn let leh mai rawh' a rawn ti a, ka va han ngei ţhin tak em. 'Bialnu neih i duh tawh lo tak tak em ni?' ka ti ngat a, ka khawhar a hnem ve tak tak a sin mawle. Ka nun kha a ruak tlat zel a, u Zirbawnga nen kan inţhenna a rei ve tawh nain ka dik thei tak tak ngai lo. Principal ka bia a, ka han chhaih fiam kual vel te hian nuam ka ti a, ka hlim phah tih pawh ka pawm thlap. 'Bialnu neih ţul ka ti tawh lo' a rawn ti leh tawh a, Fawnvela ka biak a ngai leh nge nge dawn a nih hi. 'I khirh vel vek a nih hi' ka va tih chuan, 'Na i nei em?' a rawn ti daih a, 'Hei hi alawm ka ngei ţhin nachhan che. Min ngaihtuah vak a, i inla hrang leh daih a, pulpit ah ih ih ih ti leh la a nih chu' ka ti a, ka uang emaw a ti aniang nui lem min rawn thawn ţeuhin, 'Hmeichhia ka hnaih leh ngaihsak awmchhun i nih kha. Min hau min hau suh' a ti a, a nawm dan hi a hrehawm ka ti. 

💛💛💛💛💛💛💛

Dawr kan luah luh ni tur a ni tawh a, buai tak tein kan buai a, ka nu lahin, "Luah ve lo mahla a pawi lo mawle" a ti deuh sek a, hna ţhulh ţhakin ka pa'n min buaipui thung. Bungrua kan thiar luh mawlh mawlh laia min rawn phone in principal chuan, "Tlaiah ka rawn kal kawi ang, ka tih tur lo dah rawh" a rawn ti a, "Engmah tih a ngai lo" ka tih chuan, "Puih loh tawp che ka duh lo" a ti deuh tlat a, naupangin, "Sir, hei pangpar" a tih ri ka hriat rualin, "A nih leh ka dah phawt" tih leh phone dah a rual a, u Zirbawnga angin pangpar a lawm ve tho em mawni le. 

"Tui khai chawp ngai ţhin hi a buaithlak e...Aizawl ah chuan khaichawp ngai lo vin an herh haw par par zel a, dawr hi tv ah pawh fak tir duh ila thlalak ngam a ni lo e...Aizawl a dawr te chu a thianghlimin a lang fai sar reng a, hei aia ţha deuh te a awm lo mi?" Nutein a ti hlak hlak a, dawr chhung chu a enkual ţhin, a lungawi thei hlawl lo a ni. "Aizawl a nih loh hi, lungawi deuhin awm ve mai mai rawh. Ka nu'n thlangra leh em te a la rawn chhawp lut leh dawn chauh, meizial nen kan ni leh nuai ang" ka ti a, kan piahah Sangkhuma awmin ani chuan hmun zau a mamawh ve lem lo va, a pheikhawk charna rim erawh a ninawm dawn khawp mai. 

Ka nu leh pate awm loh veleh Fawnvela chuan min rawn panin, "Remkalam, ngatinge i inngaihtuah vung vung zel a?" a ti a, ngaihţhat loh hmel deuh a min en takah chuan, "Principal hi alawm" ka ti deuh hluai a, Sangkhuma pawhin min rawn hnaih rang khawp mai. "Ngati nge a?" Fawnvelan a tih leh chuan, "Min duh lo a, bialnu neih ţul a ti lo hle chung hian min ngaihsak em em reng tho a, hetiang a nih chuan keimah zawkin ka duh phah zel alawm, min ngaihsak lo mai se, a har viau em mawni" ka ti nang nang a, Fawnvela hi thil zawh chian tir ka duh a, 'chu chu min zawh sak rawh' tih tawp ka hreh ve tho si, ka ngaihtuahna hria niawm takin, "Tihdan ka hria" a ti hlut a, "Eng nge a?" rang deuha ka tih chuan, "Nakinah a hmuh dan che ka zawt chhin ang" a ti ta chiah a, Sangkhuma a phur viau bawk. 

"Fawnvelan zawt se la, awmzia a awm loh leh kan inngaizawng der dawn nia, a awmdanah a rilru a hriat mai ang. Remkalam, principal nen in inzui tam hnu hian i hmel hmuh a nuam teh mai a nia aw, i meng chawhnu ruih tawh ngai lo, i parh leh hak tawh" a ti duah a, "Dikchiah, sawi lo mah la i hlim tih kan hrereng. Nizanah u Rinchuta ka hrilh ve a, a titau a min be ţha duh lo" Fawnvelan a tih chuan Nutein, "Engvangin?" a lo ti vat a, "Dawnfuha pianchamah tumah kan lang lo a, a lungawi lo. Kalvari lungawi loin a fuihpawrh aniang 'in dam, a ţha, kan dam, a tawk' a ti hmuk hmuk a phone a dah daih. Kalvari in 'ka fate thlalak pawh ka thawn tawh dawn lo cheu' a ti. Ka youtube channel pawh a unsubscribe hmak alawm" a tih chuan kan nui dar dar a, anni nupa titau mai mai chu kan thengthawngah a thawk lo. Thla khat pawh a daih leh tawp nang. 

"My friend, ti zung zung ang u, principal lo kal hmain ţhutna hi tifai deuh ang, amah a fai leh awm sia, awii keichu hmangaihnain min hrut leh tawh" tiin pawnchhia keng va chungin ka nui duai a, "Hmangaihnain leih leh burh burh che rawh se" ti a Sangkhuma lo nui ve chu ka kuah thuak thuak a, pawnchhia ka ken vangin min hnaih ţha duh lo vel a, tunlai chu Nutei a awm ve hian a fimkhur tlat zel. 

"Dawr hmingah eng nge kan tih ang?" Sangkhuman a tih chuan, "Sangkhuma shoe rack and Remkalami beauty parlour ti rawh u" Fawnvelan a lo ti lauh a, "Ka pheikhawk siamna dawr hi shoe rack a ni hlawl lo aw Fawnvel" pakhatin a ti bak hlur thung a, "Remkalami and Sangkhuma beauty shoe store a ni mai" Fawnvelan a tih chuan kan nui leh dar dar a, kan ri chel chul mai. Ţhian dang ka kawm mang lo a, ka ţhian neihsa teah ka lungawi em vang a ni. 

Tlai lamah kut hnung suihin principal a lo lut a, apron a awrh bawk. "Aw haw wow...apron nen i rawn luh hluai a" ka tih chuan Fawnvela nuih a za a, kan dawr awmna a hriat loh vangin school ban dawnah Fawnvela hian a va hruai a ni. "Ka pui dawn che ka tih kha" tiin a nui ruh ruh a, dawr chhung chu enkualin, "Sangkhuma chu a va pachhe bik ve aw" a ti a, mitmeiin lo khap vat mah ila Sangkhuma chuan a hre pha tho aniang, "Bungraw lian pui pui ka mamawh ve hleinem, chhuata ţhut hi nuam ka ti bawk" a ti vin hlur a, principal hrilhhai chuan a hmui liak zeuhin ka bungrua bawk chu a en leh a, chutah a kuthnungsuih chu phelhin pangpar a rawn lek chhuak a, "Ka lawmpui che" tih paha min han pe chiah chu, "Awii..what a very love story" ka ti duai a, phur deuh hian ka la a, ka hlim khawp mai. Pangpar lah chu a mawiin a lem a la ni lo zui a, mawi rei dawn lo viau mah se a ro rak thlengin ka kawl tho ang. 

"Ka tih tur chu?" a tih takah chuan, "Tih tur vak a awm tawh lo. Ka aieng hralhna in sam colour na tlem ka chah a, heng ho rem fel hi a ni tawh mai" ka ti zung zung a, apron nen meuh a rawn kal si a, awm awl tir tawp chi a ni bik lo. Ka sawina laia sam colour na a rem lai te chu uluk deuhin ka lo thlir a, what a love story a ni tawp mai, thil dang vak a awm lo. "Zoram, i school ban apiangin lo kal kawi la, kan haw rual ţhin ang a" ka ti a, chil a lem zawnga a hrawk bawk che ralh chu ka lo hmu fuh lehpek, "A mawi zia kha" ka tih leh chuan, "Engmaw?" a ti hu a, sam colour na chu hru faiin a rem zel a, a che muang viau nain pawi ka ti lo, tlaivar ţhak pawhin rem se ka nghak tho ang. 

"School ban apiangin lo peng kawi rawh" ka ti ţha leh a, "Naupang ho engtin nge an awm ang?" tiin a nui a, tlangval lai aţangin a chhangchhe nghal em em mai a ni. "Hmelţha a ti che a nia, i hmel kha a hmuh phakah dah reng rawh" tiin ka beng bulah Fawnvela a rawn phun sur sur a, principal in a hriat phak hlauin ka nghawk sawk a, "Ka zo ta" ti a intihtheih hmel fahran a min rawn en chuan uar zetin kut ka lo beng a, an reh em avangin ka hawi kual a, principal a hrilhhai hmel a, ka ţhianten min ngei hmel hle bawk. 

"Zoram, lo kal rawh dawr thar neih manah thla la ang, nakinah kan la en zui reng duh dawn a sin" tih leh a bana pawh ka rual a, ţhutthleng sei awmchhunah ţhutpuiin ka phone in thla kan la nual a, rin aiin a awm ţha duh. "Ehe...a takah i hmelţhat rualin thlalakah i ţha zual" ka ti a, insi lek lek khawp a inhnaih chunga phone a kan thlalak kan en laiin, "Intauh bawp" tih pahin Sangthanpuiin principal nen chuan min intauh tir pawp a, a ri bawp a, a na lutuk lo nain a nuam lo a ni. 

"Thawm nei ţhin ta che" vin zeta ka tih chuan, "Vawiin chu kan feh daih a, ka rawn kal hman ve chiah" a ti daih a, rum deuhin melh mah ila, "A nat loh kha, ka fiam ve mai mai che u a nih kha. Sir, u Remkalami dream ah i tel ve a nia aw" a tih chuan ka tlawh chawrh a, a nui uar sauh lehnghal. "Ehe...pangpar hi a va mawi ve, kuang khat hi ka hawn ve dawn" a tih leh chuan principal zawk a ding hluai a, Sangthanpuii pangpar lak sa chu chhuh let leh ngatin a dahna ngaiah a dah a, kan en ţhap tih a hria aniang chu, "La tawh suh, ka chhiar thlap" a ti a, kan lo nui dar dar mai. 

"I uikawm ve chiang e" Sangthanpuiin a tih chuan, "Keiman ka ui fe zawk, i lak leh chuan 100 kha ka sawi dawn a nia aw" ka lo ti a, Sangthanpuii a kalsawn chiah chu principal a thaw huaiin ka hria. Pangpar bulah kan ţhu dun ran a, kan hawi kan hawi a, a chang leh kan in nuih a, sawi tur leh awmdan tur kan hriat vak loh laiin ka ţhiante hoin hlim hmel deuhin min lo en thung a, Sangthanpuii phei chuan a ri loin kut a beng zeuh zeuh a, atthlak deuh deuh a ka che ţhin chung te, ţhian mak mak deuh deuh ka nei tih hre chungte a min la pan ve hram hram zel hi mak ve tak a ni. Pan hmasa ngun zawk mah ila a mak tho tho. Tuna a awmdan en ngat phei chuan min ngaizawng ta mai emaw a tih rum rum theih alawm le. 

CONT..