MODERN PASALṬHA-1

MODERN PASALṬHA-1

Ka hna bang in lam pana ka hawin, “Khapa kha ka lo man rawh u..kan umpha lo, a remchang lai apianga ding khan lo man teh u” ti a ring leng lung a Lalmalsawma au ri ka hriat chuan kawng sirah ka ding chawt a, a rawn tlan thla hlawk hlawk a, a chapal bun lawk zet avang chuan tlan chak a harsat deuh niin a lang.  A phone awrh lai rawng sen no leh a var a inṭial chu a inthen lawp lawp bawk a, a um lai chu nichina min rawn tlan pel fua tu kha niin ka hria. Ka dinna lam kawk chung hian, “In mak ka ti…man ta che u, rukru a nih kha, sapui kha chhuah reng reng suh u” ring zet hian a ti leh a, a hnungah lah a ṭhianpa, pianphung, chetphung leh aw pawh nem deuh duai chi hi ban phar kak ṭha chungin a rawn tlan ve bek bek bawk a, a khup a tuah emaw tih mai turin tlan no a tum luatah a ke pawh a kak ṭha a, misual um ka hriat ve tawhah a la tlan muang ber ang. A la chawl ngun em em zui. A ṭhian pakhat leh thung chu hmeichhia si pa deuh thung chi a ni thung a, “’Kan umphak hun hunah a vun kan lip ang” tiin a piah thirhrui ban chu kungfu style in a tlawh zeuh a, a um zui ve leh nghal a. “Awii…keichu ka nu’n min hrin hnuah sapui ka la um ang tih ngaihna reng reng ka hre lo. Ka nu phei chuan min hmu se Lalmalsawma kawm tawh lo turin min ti tawh ang” an zinga a nu ber Kapa chuan ka zawn a rawn thlen rualin a ti a, tlan pawh a tlan ṭha ve peih tawh lo. Lalmalsawma leh an ṭhiannu chuan min tlan pel daih tawh. 

Lalmalsawma chapal khing lah chu khawlaiah a let ngût a, misual a um te chuan chapal mai mai te chu a tan a ṭangkai lo ang. Ka hna kal hawin an ni ho ka hmuh takah chuan kawngsirah ka ding ringawt ka tih tawh kha, min tlansan daih tawh mah se an man ta nge man ta lo hriat tumin kawngsirah tho dingin ka lo ngaichang ve reng tho.

“La la, eng nge awmzia ni a?” ka pa hnathawk haw ve thoin a rawn tih chuan, “Ka hre lo…misual an awm aniang Lalmalsawma te ṭhianhoin an um a” an kalna lam thlek vang vang chung hian ka ti a, ka pa lahin pawi tih hmel fein, “Aww…amah kha um zawk se ṭha tur, lock up ah zankhat tal han riak ve se ka ti a nia, ‘thil a ti sual ve aniang chu’ tih nak laiin a ṭha lam bawk a lo ti leh a” a ti vang vang mai. A bike ti ding meuhin ka bulah chanchin ngaichangin a awm ve chu a nia, Lalmalsawma hi a ngaithei lo mai a ni lo, chaw ei laia Lalmalsawma tih dek dek tawh chuan chaw a helh zel, chutiang vel chu a ni. 

An reh vang vang hnuah an misual man chu rawn nam chhoin an zinga nu ve deuh ber Kapa chuan a kawr hmawrah hmel dawih du chungin a lo pawt ve a, a sik a ang mah zawk. “Ehiau…helai a hi police a awm reng alawm. An duty loh lai mah nise police fanu nei hmelṭha deuh bulah misual chu hlan hmak tur. Anmahni bakah an fanu te kan hmu reng thei dawn a” tih phawr phawr pahin ka lam hawiin mit a rawn siai vel a, an mi man a tal chiah chu, “Tal reng suh” tih pahin a luah a pawisa bag ruk ngei chuan a khawng chawrh a, an mi man lah a lu a lo kawlh si, pawisa bag zawi deuha a khawng chu a ri thlawp mai. “In eng thil nge a ruk?” ka pa’n a tih chuan, “Pawisa bag hlui a ru. A chhungah cheng10 chiah a awm tih a hre lo a nih kha” ngaihnep hmel zeta Lalmalsawman a tih chuan, “Cheng10 chauh chu ngaidam ve mai ta che” ka pa’n a lo ti a, “’Pathian ngaiah chuan cheng 1 leh cheng 10 a in ang reng, rukrukna vek a ni’ ti a biakin a sawi dum dum tu kha tu nge?” tiin ka pa thusawi a sawi chhawng leh vel  a, ka pa tan hian tihngaihna a vang thei viau ang.

“Aw…a nih leh nangmahni ho kha kalsawn ula, ani hi chu hetah awm rawh se” tih pahin ka pa’n an mi man pa darah chuan a chelh a, “Awii keichu ka rawl vek…ka kekawrte in a hren chin loh zawng hi a rawl” Kap’n a lo tih chuan, “I ninawm sek Kaplian, i taksa pum khan i kekawrte chu ha la a ni mai alawm. Thui pawh i tlan ve peih loh kha. Kapa ve si water pistol bak kap ngam bawk si lo. Parmawii ang hian huai ve ta che” a ti nghut nghut a, Parmawii lah ding kak ṭhá chungin kuangkuahin a lo bu nghat a, “Kal ang u people….kha kan misual pawh ka pa Rualseia bula a awm tawh kha” ngaihsam hmel fahrana tiin a hote chu a hui a, ka pa hi Rualchhinga a nia, a san em avang hian Lalmalsawma chuan Rualseia a ti kher zel. Ka pa tan chuan Lalmalsawma hi ngei loh har deuh tur a sin.

A dawr lam pana an kal ṭham ṭham te chu ka pa’n thlir zui vang vangin, “Engtin nge mize inang lo lutuk pathum hi an inkawm reng theih zawk ni aw? Lalmalsawma hi an ning ve em em lo em mawni?” a ti zui nang nang a, “A hnai tawh tho ka kal dawn” tih leh kan in lam pan ka rual a, rukru kha chu ka pa’n lo buaipui teh se.

Lalmalsawma te nen hian kan inchhung hnai deuh nge ka hre lo a, gate pakhat inṭawmin kawt zawl pawh kan nei ṭha, kan in lah a inhnaihin a insi lo chauh a, kan nute phei chu ‘unaunu’ tih kherin an inko zel. “Kan inchhung hnai em ni?” ka tih leh ka pa’n, “Chhung lo” a tih laiin ka nu’n, “Chhung e…kan la inhnaih alawm” a ti thung ṭhin a, a nau hi ka ṭhiannu ber a ni a, ani nen pawh unau ang chiahin kan awm. Inchhung lo ila chu ka pa hian Lalmalsawma hi a hau hrep hrep ngam kher lo ang tih tein ka ngaihtuah ve fo mai. 

Inchhung a ka luh rualin ka nu’n, “I va hma ve…i pa pawh a lo haw hma dawn kha” a lo ti nghal a, ka nau mipa, Lalmalsawma ngaisang em em tu chu rawn tlan lutin, “U Malsawma te hoin misual an man leh tawh. Intih chak nan ors an in leh mek. The three ORS drinker association..aaaa…ka van ngaisang tak” ṭhutthleng a leh tual pah hian a ti a, “Anni ang saw i nih ve vaih chuan i school fee ka pe tawh lo ang. A theih chen chen lehkha zir ang che” ka bag a vuak pah hian ka ti a, ka hrisel loh vangin lehkha ka zir rei thei lo a, lehkhabu chhiar nuam ka ti bawk si. Ka class kal tur te hi khawlaia tluk tawp changte ka nei a, hei vang hian lehkhabu dawr ka siam a, lei theih chi leh coffee vel in a hahchawlh paha an rawn chhiar theih chi ka dah tel vek. Mi hip ka thiam lo viau nain ka dawr awmna hmunin a zir bawk a rawn chawl lut chu an awm ve reng tho. Lehkhabu pawh ka hralh ve reng a, ka pa thawhchhuah chiah ringa khawsa kan nih vangin ka nau school fee hi chu keiman ka pek sak ṭhin.

“Lalmalsawma ti reng loin lehkha zir la a tawk.I school fee leh pocket money ka pek sak duh loh che chuan i buai viau ang, ka pa’n a pe dawn miah lo che a nia” tih leh pindan lam pan ka rual a, Lallawmkimi ka nih laiin tu pawn La la min ti vek a, Lalmalsawma ṭhenawmnu min ti tu an tam zawk. Ka pindan ka hawn rual hian Lalmalsawma pindan ka hmu thei nghal a, ninawm ve duh tak a ni. Kan in a insi lek lek ka tih tawh kha, duh ngat se chu Lalmalsawma te ang chu ka pindanah hian a rawn lut awlsam viau ang, chutiang vel chu a ni.  Hmeichhia lah hian an han star ve thei khawp a, “Kuhva ka lo thel ang” tih chhuanlama a dawr a leng lut reng peih an tam mai. Kan veng a mi chauh lo pawh ngaizawngtu a nei ve reng tih a nau hnen aṭangin ka hre ṭhin. A mit lak tuma phi buai sek pawl hi an awm ve reng a ni.

Vengchhung tlangval lar ber mit la tu nih chu tu paw'n an duh ang, keimah tiam lohin. Lalmalsawma maw? Kan vengah ani aia lar an awm lo, tunhma chuan a chhungte hian keh thei dawmin an dawm ţhin a, tunah chuan hriam hrei dawmin an dawm tawh. A zawng zawngin a ni lo na a a lar dan hi a chhe zawng deuh hlirin a nia, jail tang lo tawk velin pawi a khawih ţhin. Ka pawi a khawih nasa bik lehzual. Ka pa hmuh laia ka lam hawia mit a rawn siai zeuh te kha ka huat tawk a tling em em mai a ni. 

Ka ţhianţhaber hi a nau a nih avangin min nau chei ve khanglang a, kei aia a upatna a tam loh nen ka naupanlai a ka berh chip chep zia a sawi reng zel. Ka pa phei chuan police a nihna angin a thil ti sual lai tak han man a jail a khung bo hmak a duh ţhin nain kan ţhenawm tlangval hian jail a hel thiam a, inchâng reng siin an inman hleithei lo. Lungte pakhat vang lek pawhin ka pa nen hian tuk pum an inhnial peih ţhin. Nichin a rukru an man paw’n an inhnial leh tawh kha. Ka pa hi a hnial thla thiam si a, sermon te hi a ngaithla lo emaw tih pawhin a ngaithla uluk bik aniang ka pa thusawi pawh a rawn sawi nawn leh vek kha. A nu leh pa mai bakah ka pa meuh pawhin an ngam lo chu a ni. 

A nu leh a pa a chawimawi lo an tih fo vang te pawh aniang a nu leh pate mawi deuh a an inchei lai hi a chawi nawlh zel a, chawimawi ah a in ngai ve tho. A nu leh pate inchei lai tak a chawi lai hi thla a lak tir kher zel bawk. A dawr bangah a tar nghe nghe. Inţhenawm tih takah kan pindan hi a inzawn chiah a, a thawhfuh loh chang a tukverh ah ka dak chhuak a nih chuan hmuh hrehawm khawp a nasa in min chhiatkhum ţhin, kei ang a hmeichhe zakzum leh ţawngtam lem lo, ţhian ngamtlak te bulah chauh ri bawrh bawrh ngam tan chuan a chet phung hi a ngainatawm hlawl loh. Ka ţhianţha ber, tette aţanga ka kawm a nau hian ţan tlat lo se chu ka pa bula sawi tur ka hre hnem mai. Ka ṭhiante bulah hi chuan phusa berin bengchheng ber zel mah ila inkhawm naah te, hnatlan naah te hi chuan ka ngawi dâk zel. Keimah ang hi tam tak an awm ve tho ang, ka ṭhiante nen hian veng khat, naupanlai aṭanga inkawm tawh kan nih bawk avangin kan awm khawm tawh chuan ṭawng kan inchuh bawrh bawrh zel. 

Lalmalsawma bawk sawi leh ila, a phu tawk ngaihzawng hi a nei ve reng a, a pindan a hruai luh a ching hi tuman an hau sim thei lo. Ka hmuh fuh ve rualin parda pawt phui hmak ţhin mah ila, "Ţhenawmnu" a rawn ti tho zel a, hetianga min koh kher ţhin vang hian alawm mi zawng zawngin Lalmalsawma ţhenawmnu min tih ziah ni. Ka duh loh em avangin min chhaih fiam nan tak an hmang a, ‘Lalmalsawma ṭhenawmnu’ min tih tawh chuan ka ling hlar zel. A hnungah tattoo a chhu ve ngei a, en chian loh chuan nalh pawh a nalh ve, a hming lam tawi LMS tih tlawng hi a ni a, miin school hming emaw an tih zel avangin kawr ha lovin a awm ngam lo, zahna tlem a nei ve tlat. LMS tih inziak lang thei miah lo a chei mawi dan an ṭhianhoin an ngaihtuah a, an zinga talent nei ṭha ve ber Kapa pawn a la ngaihtuah chhuak thei rih lo. Duh deuhin tattoo a chhut tir ve a, miin school logo emaw an tih sak zel, vanduai ve tak chu a ni. 

Ka pian hlim aţanga kan ţhenawmpa a ni a, nikhua ka hriat theih tirh aţanga min ti buai ngat ngat tawh tu a ni. Min han chhaih buai vel hi a nuam tih zawng a ni tlat a, lehkhabu ka chhiar lahin ring deuhin zai a ngaithla a, lehkhazir peih tawh lo na na na chu inti pa deuhin eichawp dawr a nghak ţhin. Cctv a dah deuh thlap a, sweet an lei te hian a leituin a chhiar hnuah ama’n a chhiar leh thlap a, nula chhe lo deuhin an dawr ve chuan an thil lei a en muang lui a, a man zat te chhut sual derin a chhut nawn reng zel. Ka pa hian, “Lehkha zir ṭha peih lo mah se lerh lamah chuan doctorate degree a nei” a ti ṭhin a, a nih duh hmel fu a ni.

Police in jail a khung an chak a, ‘kohhran pawh hian an phuar chak ngawt ang’ amah haw tuten an tih laiin mi tlawmngai tak a ni ve thung a, Lalmalsawma tlawmngaih zia an sawiin tuman an lo hnial kalh ngai lo. Pitar/putar te chungah ţhat a chhuah nasa lehzual a, an inkhai bawr deuh te hian a chhawk a, hna dang kalsanin a thlah thleng ţhap ţhin. Khawtlangin chhiat kan tawh chang te, bo zawn ngai te, tui tla zawn ngaite an awm chuan a chhuak hmasa pawl a ni ziah a, a mawia kal ve mai mai a nih loh zia an sawi ţhin, hei vang hi alawm ka pa pawn a man theih miah loh. Pitar leh putar te phei chuan an fak lutuk ringawt. “Ka tunu nen innei rawh u, doctor a nia” an tih loh leh, “Zirtirtu a nia” an ti a, ani lah a lo induh kual vel a, “A…keini ang mi chhe fa, lehkha pawh zir sang lo hian chutiang kan phu lo” a lo ti vel ṭhin a, a nu leh pate thin a rim thei teh a sin.

A tlawmngaih em em chhan an zawh te hian, "Ral do tur leh sa kah tur awm hek lo, mi ka ţanpui mai loh nakah, modern pasalţha alawm ka nih" a ti then zel a, inti pa deuh chunga a nghah ţhin, eichawp dawr chungah pawh lian deuhin modern pasalţha tih a intar kuau reng a ni. A ngei tute chuan, “A inla pasalṭha emai hmanlai huna thawn bo daih ka chak, a ṭhiante lah saw a” an ti ziah a, hetianga sawi tu hi mipa deuh hlir an ni ṭhin. Tunlaiah chuan mipa ṭhenkhat hi hmeichhia aiin an ṭawngtam tawh zawk tlat.

Ka ṭhiante pahnih hian class kal pahin an thiam zawng an ti pah a, pakhatin puan a ṭhui a, pakhatin mi kuttin leh ke te a chei sak a, nitin a chhuak mah nise an chhungte hnenah pawisa an dil ngai lo, an intodelh ve tlat zel. Scooty an neih ve ve laiin keichu midang phurh a chuan nuam ka ti zawk. An rawn bang ang a, zanah kan inah bawk an lo kal leh mai ang.

“Lala, i nauin lehkha a zir sia, dawrah hmahmawh deuhin soda va lei teh” ka inthlak zawh ruala ka nu’n a tih chuan peih lo deuhin pawisa ka la a, Lalmalsawma dawr hi kan in aṭanga dawr hnai ber a nia, kan gate inṭawm chhungah a ni miau a, ka kal hreh ngawih ngawih zel. Engtin tin emaw min lo tih leh phei chuan dawr hlaah ka kal hmak ang.

“Soda” tih mawl tawp pahin ṭhelret bur chungah pawisa ka dah a, a bialnu nghet ve ber, Felfeli a lo awm ve bawk. “Lalmalsawma ṭhenawmnu chu i va tum nasa bar bar ve, kha i tum phui vek a nia aw” Kapa’n a lo tih chuan, “Khatiang khan min ko ziah suh u” ka ti deuh hmak a, Lalmalsawma lahin, “Vui reng reng suh. Lala-i tih ai chuan a nalh fe. La la tih te chu solfa a ang e” min nuih chung hian a lo ti a, “Ka hming hi solfa ang mah se i ṭhenawmnu nih ai chuan ka duh tho tho” ka tih chuan, “Khawvel hriatin i duh loh zia auchhuahpui mahla i pasal neih hma chu ka ṭhenawmnu i ni dawn tho tho. Kha soda chu aw ṭhenawmnu” ngeiawm fahran a nui suk chung hian a ti a, Lalmalsawma te ang hi chu ka hlau zawk e a. Hmeichhia a kawp kual nasa si, hri ṭha lo te ka hlau, hetiang kawngah kher kher chuan a pasalṭha lo ve khawp mai.

Zanah ka ṭhiante pahnih, Veni leh Lanfeli te an lo leng ta ngei a, chhun lama an thil tawn an sawi nasa mai. Kei lahin Lalmalsawma ka huat zia ngawt ka lo sawi a, “Kan ṭhenawm pitarin a fak nak laiin aw…’khawvelah hian Lalmalsawma ang hlir hi awm se ka ti’ a ti. Hmeithai a ni bawk sia, a ngaizawng a ang ka ti” Venin a tih chuan phawk deuhin ka lo en a, “Awii…staap it, hausa chiam lo mah ila mo atan tar kan duh hleinem” Lalmalsawma nau Lanfelin a lo ti nghal a, ‘stop it’ a tih ve na a nia, fiamthu nan ‘staap’ tih hi chu kan hmang vel mai mai zel.

“Misual a um pahin phone lem a sen no leh a var a ṭial a awrh a” ei lo deuha ka tih chuan, “Kan cousin fanu in a pek a nih kha, a ro ve zia chu aw. Ka u hi chu thil pek te hian a lawm thiam ṭhin a nia” Lanfelin a tih chuan Veni nen kan inmelh ralh a, a u chanchin zawng zawng, a lerh zia thlenga a hriat hnuah engtin nge a la ṭan theih zawk le? “Ka duh theih dan hi a ni lo reng reng. I u hi i chhuang lutuk a, a sual phah vek a nih hi” Veni chuan a ti ta nge nge a, “Chhungten an chhuan miah loh sual an tam emai” Lanfelin a tih chuan mu zangthal thawkin lukhamin ka hmai ka hup a, Lalmalsawma pindan aṭangin hla ring tawkin a in play leh tawh.

“I hmelṭha ka ti, ka bialnu ni rawh” tih vel ring tawka a play lai chuan tho lawkin parda ka keu a, ani pawh a pindan lo la éng vain tukverhah a lo dak ve reng a, “Kan mu duh Lalmalsawm, ka nu leh pate pawh i ti mu thei ngai lo” vin zeta ka tih chuan a hla play chu off in, “I rawn lan chiah khan ka ngaihthlak tuina a bo vek, i hmel leh a hla thu a inmil lo. ‘I hmelchhia ka ti, hmaikawr vuah rawh’ te ni zawk se” a ti a, ka nur nang a hmuh rualin keimah ang chiahin a nur ve nang a, ka hmui ka peh leh a pet ve a, ngeiawm tak a ni. “Naktuk zan hla zir naah solfa an zir dawn, zir ve ngei ngei ang che. I hming i hmu hnem viau ang Lala” thle deuh chung hian a ti a, engtinpawn awm se ka ngei tho tho.

“I rawn chhuah changin ka dawrah vawikhatmah lo kal tawh suh” ka ti thla rawk a,  “Ka awm chuan nuam i tih theih em kha” tiin a kiai suk a, parda ka pawt phui leh ta nge nge a, ka thinrim chuan eng kaw sawi set set lo vin Lanfeli ka kek ve ringawt a, “Awii…ka duh thei lo” tiin Veni nen a rak ring zawkah kan ṭang leh ang lawi a, Lalmalsawma chunga ka thinrim em vangin ka tih fo angin Lanfeli keh vak ka tum a, a sam ka pawt thla daih, ka phu nasa lutuk ringawt. Veni pawh a mutna aṭanga tho sawk sawkin min rawn kuah a, Lanfeli lah a nuih a za em em a, “Kan inkek leh dawn tih ka hriat vang alawm sam lem ka vuah. Mi te hi enchiang ve ṭhin ta che u” a ti a, invenna a rawn pai thlap tihna a nih ber chu.

“Lalmalsawm” ti tuar ri kan hriat chuan hmanhmawh deuha tukverh parda keuin kan dak ṭhap a,  a nu nen an lo in din chilh ran mai. Hetiang hmu thei vek khawp hian a nia kan inhnaih ni. “Bawlhhlawh bawma zu bur saw tu ta nge?” a nu’n ring zeta a tih chuan, “A tak a awm lai kha chuan ka ta a nia, a bur ruak chauh chu ka ta a ni tawh lo” Lalmalsawma chuan tiin a nu a hlauh loh zia kan hre na a Lanfeli pawh a rawn dak ve tawh.

“In ṭawng ring thei lutuk a ṭhenawmten in ṭawng an hre vek zel a nia aw” a tih chuan, “Vengchhung pawn hria se eng nge pawi? Zu in suh  kan ti ngun lutuk tawh” a nu’n kan lam rawn hawi chunga a tih chuan, “Zu in suh in tih lai tak khan ka in ngai hleinem. In sawi hnu daihah chiah ka in ṭhin” Lalmalsawman a lo ti leh a, a nu chu a din hlat deuh tawh avangin ka hmu chiang thei tawh lo a, Lalmalsawma erawh tukverh bulah a la ding reng.

“Naktukah Kapa leh Parmawii te bulah kawm tawh lo tur chein ka ti ang” a nu’n a tih veleh, “Nangni aiin keimah min hlau zawk” a ti a, a nu tihngaihna hre lo chuan a chhuahsan ta nge nge a, “I u nihna chu hetiang hi a nia” ka tih chuan, “Zu a ruihin buaina a siam ngai chuang hleinem” Lanfeli chuan a la ti tlat a, Venin, “I duh leh ṭan rawh, kan ngei tho tho” a tih pawhin, “Ka ṭan reng ang Ven ke kual, i ke kha merry go round a nih kha” Lanfelin a tih chuan kan nui hak hak a, Veni hi a ke a kual chuang miah lo.

“Lalmalsawma chu ka sawi peih tawh lo Lanfelin a ṭan zel. Thil dang hrilh tur cheu ka nei” Venin a tih chuan khumah bawk kan ṭhu leh a, Lalmalsawma pindan lam pawh a reh tawh. “Ka star pa kha in hriat vek kha. Kan venga mi kher hi ni lo se ka ti” tiin a tal tawp tawp a, “Ngati nge? Kan venga mi a nih chuan a nuam zawk daih ang chu” ka tih chuan, “Hreh chung chungin ‘ka duh che u Thawm’ ka tia, ‘min prank’ a ti tlat. Hmeichhia zawkin ka hrilh lehnghal a nia engtin nge prank ah a ngaih theih? ‘Mistiri ka nih hi, min prank leh chuan mak deuhin ka siam ang che. Mi tui herh hawnaah pawh ka vuah daih thei che a nia’ a la ti zui a, Lalmalsawma te ṭhianho vang bak a ni leh lo ang.  Parmawiin, ‘Kekawrte par min hak tir a ka thiam lo, a sir zawng hlirin ka kal’ a tih ni khan Lalmalsawma hian u Thawma hi a bem der tir a ni lo maw?” Veni chuan a ti duah a, “A ni maithei…kekawrte par ha thiam lo khawp a inla pa kha a ni ve tlat Parmawii chu” ka tih veleh, “An ni thei lo hrim hrim, in finfiah theih phawt chuan in mutthilh hma in beng chhung ka hawlh zat sak ang che u” Lanfelin a lo ti a, kan cho khawp mai. Beng hawlh zat te chu a nuam e. “Kan chhui chiang khawp ang” ka tih chuan kan remti tlang ṭhap.

Thil chhui chian ka ngaih avangin ṭul em em loah dawrah ka kal a, Kapa’n, “Naa..kan zu in dan hi chu once in a lifetime a ni hleinem” a tih nem duai hnuah, “Keini zu in ve dan chu once in everyday a nia, ka nu phei chuan ‘i puanṭhui thiamna talent hi zuin a laksak dawn che’ min ti” Kap’n ngui bara a tih leh chuan, “Engtin nge i tih?” Lalmalsawman a lo ti vat a, “Ka zai mai ang ka ti” zawi sap hian a ti a, Lalmalsawma chuan kut beng hlutin, “A ṭha lutuk Kapte, Kaplian, mi zawng zawng aia Kaplian pa” Kapa aw phawi hian a ti a, ka nui ve chiah chu, “Nang nu kha..ngati nge i din ve reng” a ti vin hluk a, “Hmanniah Parmawii leh Thawma an inhmu em?” ka tih takah chuan, “Hnai teah an awm a, kan inhmu ve bawk ang chu, eng nge i buaina?” in la pa fein Parmawii chuan a ti kha kha a, “In prank em ni?” ka tih leh chuan, “Awii…keini aia hmanraw nei ṭha zawk kan prank ngam i ring em ni?” Kapan a lo ti veleh a, “Kan prank alawm..ngati nge?” Lalmalsawman a lo ti a, dawt a sawi ngai tlat loh avangin ka ring hmiah.

“Nangmahni vangin Veni a rin loh phah” ka ti tak nain zana bengchhung hawlh zat ka chak tawh zawk. Thawma pawh hi a den ve hrim hrim, mistiri a nih vanga amah duh em em tu mak deuha siam danglam a lo vau te chu a. “Lalmalsawm, Thawma chungah engmah ti tawh suh ang che” ka tih chuan, “Duat ti phawt la” nui chung hian a lo ti a, Kapa lah a phurin a zuang deuh zawk a, “Duat i tih chuan Thawma kan prank ni a Parmawii kekawrte hak ka release ang” a ti a, phur tak a ni.

“Ka damchhungin duat ka ti ngai lo vang che” tih leh inher ka rual a, “Eissss…a inher dan kha min duat chak hmel” Lalmalsawma chuan a la ti hram a, an ṭhianho nui ri te chu ka kham hluah hluah. Ka dawra a rawn kal ve lahin coffee a in sek a, kei aiin customer te chungah lo ṭha zawkin ka pasal emaw ti tawk te pawh an awm. “In chhe lo dun e…in in hmeh lutuk ringawt. In hmelte pawh a in ang alawm” ti tawk te an awm a, Lalmalsawma berkher chu ka kawppui turin ka beisei ngai lo a, bialpa ka nei ve ṭat bawk.

Kan in inhnaih lutuk hi ka chhungte hnenah a chhan ka zawt fo a, kan veng angah te chuan hmun ruak a tam tho si. Lalmalsawma pindan leh ka pindana kan thusawi chu kan phun sep sep a nih loh chuan kan hre vek thei tihna a nia, thuruk sawi dawn chuan ri mang lo a ṭawng a ngai.

Dawr ka thlen rualin ka bialpain min lo phone a, “Hello” ka tih rual rualin, “Pawisa ka lo puk leh lawk. Nizanah kan ṭhianpa a accident a, chhungte a neih loh vangin kan buaipui a” a rawn ti leh tawh a, pawisa puk min dil reng mai a ni. “Tunkarah vawithum pawisa puk min dil tawh. Ka chhungte hnenah pawh ka sawi ngam hleinem. I neih ngang loh leh i taksa peng kha hralh mai rawh” tih leh phone dah ka rual a, kan inbiakṭhat lai kha chu nise ka puk tir leh tawh ang a, mah se leng tura ka sawm apiangin tunlai chu min hnial ziah. Min ngaipawimawh lo tu na na na chu ka pui peih tawh rih bik lo.

Dawra a lo kal ka rin nen a lo kal hauh lo a, ka bialpa hi chu bike lawm lutuk, tlan fua fua chi a ni. Ka pa pawhin a bike khalh a chuang lo turin min hrilh nasa ṭhin. Ka chhungten an duh lo viau nain keiman ka duh miau vanga la inṭhen lo chauh kan ni. Ka ṭhiante hian an fak chamchi bawk a, pawisa puk vel kha chu ka sawi ngam lo. Veni phei chuan hria se duh lo mah ila ka phone in ka ṭhen thu a va hrilh tho ang. Veni tak hi chu a nasa ve a, Lanfeli pawh a ni tho, tun thleng hian an ngei zawngte insualpui an la ching. Kawlh tak an ni, hei vang hi a nia keini ho pawh han inkeh mai kan hreh loh em em nachhan.

Dawr aṭanga ka bang chu kan inbulah ka bialpa, Dawngan min lo changin, “Ka khalhah i chuang duh si lo a hetah hian ka lo nghak che” nui sang hian a ti a, a helmet chu bike hmaah dahin a inkuangkuah a, “Ka sawi kha a dik tak tak a nia aw…ka nu leh pate rawn zin veleh ka pe leh ang che” a ti a, khawdang aṭanga lehkhazir tura rawn awm a nia, lehkha a zir ngai awm pawh ka hre lo.

“Ka nau school fee pek a ngai, pawisa ka nei lo” ka tih chuan, “Tlemte pawh a pawi hleinem” a tih laiin Lalmawlsawman, “Dawng ul, Dawng pawisa nei lo pa” a rawn ti leh tawh. A lo inrawlh lehpek ang chu. Lalmalsawma ka dawra a awm lai taka Dawngan pawisa puk min dil vang vek.  “Kan venga i lo kal chuan pawisa i nei lo tihna” ti zui zatin wai wai case khat a pu a, Kapa leh Partei ten buhfai bag te chi an zawn bawk. Lalmalsawma hian a ringhlel zo vek tawh chu a nih hi.

“I dam maw Lalmalsawm?” Dawngan a tih chuan, “Damlo dawr bungraw la i hre ngai mi? Min pui la hlawh ka pe ang che” Lalmalsawman a tih chuan, “Nanga eichawp dawrah eng nge tih tur awm” Dawngan a tih chuan, “A tam mai…kuhva rah te i chep ang chu. I duh loh leh pawisa i nei lo a ni mai” a tih hnuah, “A nih pawh Dawngul pawisa neilopa muah” ngeiawm fahran hian a ti leh hram a, Lalmalsawma hi hmeichhe duh chi tak chu ni lo se ngaizawng tu an awm ka ring hauh lo.

“Inṭhenawmpa hi chu khawi hmunah pawh awm se a inhai kaw thei ang” a tih hnuah Dawnga chuan ka banrek a rawn man thutin, “Pawisa chu min pe rawh, a let hnihin ka rul ang che” hriam hrak hian a ti a, pek ka tum lo nasa. “Cheng1 hi cheng1000 pawn min rul dawn la ka pe dawn chuang lo che” ka ti ve tlat a, a jacket ban tuaiin a insehruh nasa mai.

Veni class bang a lo haw hlauh a, “E…hei a lo haw alawm. Vawiin chu scooty a keng lo a nih hi” tih leh Veni kuah ka rual a, “Ka rawn kal leh ang” a tih hnuah chak deuhin a tlan chhuak a, Dawnga takngial pawhin Veni hi chu a hlau, a nasat a chhuah tak tak chuan mipa leh hmeichhia a sawi tawh lo, Parmawii pawhin a hneh dawn lo chiang sa. Kapa hian a mipa tha chhuah se chu a hneh maithei, chutiang vel chu a ni. Thil awmzia min zawh chuan, “Nakinah” ka ti ringawt a, zana ka pindana kan inhmuh khawm leh hunah ka hrilh ve vek tawh ang.

“In inhau em ni a? Dawngbawiha kha a va thinrim hmel ve” a tih leh chuan, “Hau chiah pawh a ni lo. Mahse, min ngaihsak lo lutuk a, min duh miah lo tu Lalmalsawman min zarbuai ang hian min zarbuai ve se ka ti” ka ti a, Veni nen kan inṭhen hran hnuah pawh Lalmalsawma dawr bulah ka ding dat a, an lo inrem ṭha nasa ang chu ti rilruin a piah deuhah dingin a rukin ka en a, ṭhian ṭha an inti ve si a, kan hmuh phak lohah engtin nge an awm ka hre chak. Kapa chuan a kut ṭang pahnih ti kak ṭhain Lalmalsawma hmaiah a ham pawp pawp a, a ruka en ka nih miau vangin ka hmu chiang thei lo. Parmawii zu bur nen an inkarah a lo ding ve sek bawk a, mi in ang lo lutuk pathum inkawm an ni a, mi hmuhah ṭang ho ṭham mah se an buai luih luih reng ṭhin ka ring reng a ni.

“Kan zingah i hming a chal ber a, mahse i mawng a no ber” Lalmalsawman a tih chuan Kapa’n, “Kapliana tih hi ka duh vanga pu ka ni lo aw” ṭap lek lek hian a ti a, “You two is the horror movie. Ka hne che u…horror movie in nih kha. Ti thuai thuai ila zu in ang u. Come on let’s zu” Parmawiin lo tiin a inla hrang a, “Hahai…keini ṭhian ho zu heh zia hi, alcoholism kan ni ringawt. Lala-i nau Soso-a lah sawn ors kan in emaw a ti ziah a” Kapa chuan a ti leh duai duai tawh a, “Pasalṭha alawm kan nih le…hna kan thawk ṭha a, lawmman ah zu kan in ve bawk ang chu” Lalmalsawman a lo ti a, ka enthla reng tih an la hre miah lo. Thawmhnaw dum hlang ka ha a, ka sam a dum bawk si, hmuh ka har ve viau ang.

“Hmanlai ang kha chu nise Kapa hi chu ralin a lu an la daih tawh ang” Parmawiin a tih chuan, “Nangpawh khaw dangah pasal i nei daih tawh ang” Kapan a lo ti ve zat a, an ṭhianho chu an inngeih lo hle mai. Midangin an tihbuaiin an inṭan ṭham tho bawk sia, kan ṭhian ho ang vel a ni.

“Ka ṭhenawmnu te unau hi chu an hming hi solfa a ang a nia, Lala leh Soso” Lalmalsawman a ti chiah chu, “Lalmalsawm” ka va ti a, dawr hmaah ka ding ve ta nge nge a, “Kan hmuhna che a rei tawh, i biru thiam lo emai. Enge i duh a ka duat?” pawisawi lo hmel tak, min elsen zet si hian a lo ti a, “Gate chhunga zu in in leh chuan ka pa ka hrilh tawh dawn nia” ti mah ila, “ORS kan pawlh chhung chu taksa chakna a ni tho tho” lo tiin an ṭhianho chuan min nuih sawh vel a, ka inhumruh nasa ngang mai. Lalmalsawma hi chu ka pa tihdan takah zankhat tal chu lockup ah riak ve se a ṭha ang.

“I bialpa ve lah kha Dawng ba ngah-a, Dawng pawisa nei lo a” Parmawiin a lo ti a, an va han naupangchhia tak em. “Kawmthlangte vawk chhuak um leh mai mai ula a nih chu” tih leh inher ka rual a, Lalmalsawma hi a sual viau nachungin zu a in hi ka ngei lehzualna a nia, nitin hian ka ngei deuh deuh a ni tawp mai. Ka nu’n a ṭawngṭaipuite hian ka pa pawh a zuai rawih zelin ka hria.

Zanah Dawngan min ko chhuak leh pek a, pawisa puk min dil leh dawn aniang chu tih laiin, “Min ngaidam rawh, nang aiin ka ṭhiante ka lo ngaipawimawh ṭhin a” a ti daih. Ka ṭhiante hnena engkim sawi ka tum apiang hian hetiang hian ngaihdam min dil ziah a, tunah pawh Veni a hlauh vang nge a inchhir hrim hrim ka hre lo.

“Keini pahnih hi chu mei leh vur tlang awm dun ang vel kan ni, kan inhmuh hi chuan kan tuiral leh nge nge zel” a la ti ham ham zui. Ka kawnga min kuah ruala inla hrang nghalin, “Keichu ka zak, miin an sawidan che leh an hmuh dan che hi hria la i zak ve tho ang. Hetianga i awm reng dawn chuan inṭhen ka duh” ka ti chiah chu, “Kan inṭhen lo vang” ram hmuka tiin ka biangah a dawm a, a la na em em zui. Kawt kai maia awm kan nih vangin thim tawh viau mah se miin min hmuh ka hlau bawk si, “Thlah nghal rawh ka ṭhenawmnu kha Dawng-ul” Lalmalsawma ngei maiin rawn tiin emergency light eng ṭha pep pupin min rawn en a, ka mit ka chhing nghal sawk mai. Ani hi chu thim thama ṭhut a mei zuk te a hrat a, kawt kai maia awm kan nih bawk avangin a rukin a dawr bul velah a lo awm leh reng tawh aniang chu, hetiang hian ‘misual ka chang e’ a tia, inchhungah awm khat tak a ni.

“I thu lo ve emai Lalmalsawm. Mi inkarah inrawlh sek suh, i hneawm zozai lutuk” Dawngan a tih veleh Lalmalsawma chuan na zeta min pawtin Dawnga bike chu a tlawh pawp a, bike leh Dawnga tlu chu hlauin kei lah ka lo au leh hman bawk si, a thim tawh viau nain ṭhenawm khawveng la mu lo ho chu lo tlanchhuakin, “Eng nge awmzia?” an rawn ti sap sap a, Dawnga pui pawl an awm bawk a, ka pa phei chu kekawrte leh tawnzau nen chiah a rawn tlanchhuak, ka zak tak tak a ni.

“Misual, hmeichhe kutthlak tum ka man a nih hi. A bike ri hi ninawm in tih deuh kha a nia, ri ṭeng chuai, door bell ri modify ang deuh kha” tiin Lalmalsawma chuan a sawichhe hneh thiam khawp mai. Dawnga lahin, “Thim tham aṭangin a rawn chhuak thut a, bike a ka ṭhu hle hle lai min rawn tlawh alawm mawle, khawiah nge ka helmet?” a ti a, a ke chu a na ve deuh aniang a bai uih uih mai.

“Lo va mut san rawh u, ka fate leh an ṭhiante an nia, a zia lo khawp mai. Keiman ka lo chingfel ange, Dawnga pawh a nat em em loh hi” tiin ka pa chuan kekawrte chauh hain thupha chawi pahin ro a rel a, keichu ka ngawi reng tawh. Tunah tak chuan Lalmalsawma aiin Dawnga ka ngei zawk.

“Thil pawi a thleng em lo ang maw?” tiin an in aṭanga rawn tlanchhuak ho chu an la tawi hrut hrut hlawm a, zingah min sawi leh nuai nuai hlawm dawn a nih hi. “Thim zingah eng nge i tih reng reng a Lalmalsawm?” tiin ka pa chuan Lalmalsawma samah a ṭham a, “A na bawk leu” a tih hnuah, “Misual ka chang ka tih kha. Tunlaia rukrukna tam zia chu police i nihna angin hre zawk ta che. Zaninah pawh awm lo ila chu Dawngula hian i fanu hi a sawisa hrep ang chu” a ti leh pung pung a, Dawnga hmaiah a emergency light ken eng deuh chuan a chhun leh kher a, tukverh parda phen aṭanga a ruka min lo la en pawh an awm maithei a ni.

“Lala, inchhungah lut rawh” ka pa’n a tih tak avangin rang deuhin ka tlan lut a, ka nu lahin thil awmzia min lo zawtin, “Dawnga pawh hi pangngai deuha lo len ve mai tur a nia, a zia lo thei emai. Lalmalsawma lah hmun tinah a awm a, vai ho ai pawn a daihzai zawk an tih kha. Dawnga chu a na em?” a lo ti chul a, ka nu lah hi hlauthawng hma chi a nia, Lalmalsawma nu nen chuan in ang lo tak an ni.

Darkar chanve vel zet hnuah ka pa rawn lut vein, “Khaia, kekawr ka ha nange?” a ti ve chauh a, nichin aṭang khan keichu ka lo zak daih tawh. “Hei vang hi a nih hi Lalmalsawman ‘Lut rawh i malpui bik kha a hritlang hahchhiau nasa lutuk ang’ a tih a tih ni. Min chhaih nawmnah naah ngaiin ka thin a rim em em a, Lala, nangpawh i mipa kawpah fimkhur tawh la ka ti khawp mai. Dawnga hi kan vengah a awm lo nain Lalmalsawma te ṭhian ho vangin hria an tam tawh zawk a, bike a khalh chak theih zia leh a bengchhen zia hlir a nih hi an sawi. Mipa khaw lo i kawp chuan mipa pangngaiin an duh tawh lo ang che” tiin min zilh phah daih a, Dawnga nena kan inlaichinna hi chu ngaihtuah ṭhat leh a ngai a ni.

Zingkar a parda ka hawn rualin sam pawr phungin tukverhah Lalmalsawma a lo dak ve chiah a, min la melh rum em em zui. “Khatiang mitmeng kha ka phu mi?” ka ti thla rawk a, “Power nei ila chu Dawngula bike door bell modify ah ka chantir ang che” naupangchhia zet hian a ti a, “A ho e…i naupangchhia emai a, ‘nang aiin ka upa’ ti ve ziah si hi rilru puitling thei reng reng lo mai” ka tih chuan, “Rilru puitling thei lo min tih leh ka rilru hi height plus rawn leisak la” a ti a, ka ngawi mai mai tawh. Ani lahin rum tawkin min la en a, in melh hlum theih chu nise ka thi daih tawh ang chu mawle.

“I bialpain a duh dan dan leh a remchan dan dan anga sawiin i hmai a ṭham kual a, i dawh mai mai a nia, mawl emai” a ti leh hram a, “Chu chu ‘ngah nge i lo lak nat viau?” ka tih chuan, “I hmai a ṭhâm sawih kual lai vel khan i hmelchhe bei bui em alawm. I hmelchhiatnain min enkhalh a, ka rawn che chhuak lo thei lo a nih kha” a ti a, dawt vek. Naupanlai pawh min vel a, midangin min velh ve chuan min chhan ziah, min chhan ve duh hrim hrim a nih kha.

“Min chhanchhuah chakin i phe zawk zawk a nih zawk kha..emergency light nen i rawn rik rup kha” ka tih chuan, “I ngaih ngaihin ngai teh. Ka bialnu chu a sam zai khat a tlak pawn ka hnem ṭhin. Dawngula angin an hmaiah ka ṭhâm ve ngai lo” tih leh parda pawh phui a rual a, eng nge a chhan pawh ka hre lo, Dawnga hi a haw em em ringawt mai a ni. Kapa leh Parmawii te lahin lo huatpuiin Dawnga chanchin chhe tawk tawkin an sawi kual a, Lalmalsawma dawrah Dawngan thil a lei ve thei lo bawk. Modern pasalṭha inti ve si hi a chang chuan a pasalṭha lo ve thei khawp mai.

CONT….