CHHANGCHHENU REMKALAMI-1

CHHANGCHHENU REMKALAMI-1

“Anu, i ketin ah hian mail polish ka lo hnawih aw pwease” ka fanu in fiah lo tawka tiin nail polish a rawn la chhuak a, “Hey hey…kha kha mail polish a ni lo, a ro har chi a nih kha. Ka nulat laia ka buaipui ber kha ‘ngah nge i lo lakchhuah ni?” vin zeta ka tih chuan insut hraihin, “Pwease” a ti leh a, please a tih ve na aniang chu ka ti mai. “Mail polish pawh a ni lo, nail polish ti ta che” ka tih laiin, “Nu, hei ka sam ka tan a” tiin ka fanu thoin a beng chung daihah rual lo nuaiin a sam a lo tan a, “Awii…what a very not good, kan nawr kawlh ngei ngei a ngai dawn a nih kha. Ngati nge in harh em em a?” ka tih pang pang laiin ka fapain, “Nu, i phone ah hian tumah an zai ve thei lo, an rap zel” a ti ve thung a, “In khalh chhe zo tawh a nih kha. Ṭhiante pawh ka be thei reng reng hleinem mi harh ho” ka tih laiin harsa tih hmel tawkin Zochhura a rawn pen lut a, a ke ah kan fa naupang berin a uai tlat vang a ni. A ke rekah a uai ṭung chung pawhin a rawn pen lut lui a, a fapa a hnuk a nih ber chu.

“Tu nge mahni fate hnuk ngai?” ka tih chuan, “Min thlah duh si lo a ka hnuh mai lohin” a lo ti then a, “Awii…pastor ve si fate duat nachang pawh hre lo” ka tih chuan, “An harh em a ni. Tu berin nge ṭhenawmte tuizem herh haw? Saw, tui an nei reng reng hleinem” khauh zet hian a ti a, “Khawi, apa mail polish hnawih ang” tiin kan fanu te bawkin Zochhura kutah a vuan nghal chat a, “Ka leng darh vek dawn cheu em mawni le? Keipawhin ṭhenawmte pawi ka sawi tawh loh laia in lo va tihbuai sek le?” ka ti hlak hlak a, “Nangpawn an ngei tur tawka an in lama tui chhia i leih buak ziah kha, i fate entawn turin awm rawh” Zochhuran min tih chuan ka ṭhutna aṭanga thoin, “Mai mai a, chutiang te a min tih, kan bathlar bulah kher thleng an rawn sil a, chawmal a awm ṭeuh zel a nih kha. Ṭhenawmnu saw i duh leh nei rawh ka tlan dawn” ka tih rualin an pafain an vaiin min chelh ṭhap a, “Anu aiin kan tlan chak vek” tiin kan fa u ber chu a nui var var a, “Apa te nen a kan um paw’n kan man vat kha” a upa ber dawttuin a lo ti ve bawk a, “Min ti buai reng suh u, in u Dawnfuha pawh an class ah star a nei a chhangthawp a nghei phah kha, ka tlan in duh loh chuan fel deuhin awm ta che u. I pa liau luau lah hi, kei aiin ṭhenawmnuin a mit a la zawk a” ka ti bawrh bawrh a, “Ri hlut ṭhin suh u. Kan khuaah pastor chhungkua an bengchheng ber an tih kha. A zahthlak a sin” Zochhuran a tih veleh, “Fa kan nei zawt zawt a bengchheng lo chi kan ni hleinem. Kumtin an piang a nih hi, engtin nge ka tih vak chuan ang a” ka tih pang pang laiin tu emaw hian, “Remkalam” tiin min sawi dat dat a, ka harh chiang ngang mai.

Hlauthawng deuha ka ṭhut chhuah hluai rualin hnai deuha min bih tu Zochhura chu ka tauh dak awrh a, a hnar hupin a dak rei em em mai lehnghal. “A thi em ni? Ka duh thei lo khawimaw ka lo en” tih pahin a kut ka lakthlak sak a, a thi lo hrim hrim.

“Awm pangngaiin awm mai mai teh i hnar pawh a thi loh tawp kha. Mangchhia ka nei leh tawh, awii keichu ngati nge ka mumangah naupang tam deuh ka hmu ziah a,  an harh thei em em mai lehnghal ka duh thei lo awii ka thi ṭhaks” ka ti mawlh mawlh reng a, Zochhura te inah kan la awm a, a awmna hmunah kan kal ve ṭep tawh. Heta awm reng theih ni hek lo, kan awm chhung na na na chu tiin ka ṭhiante pawh an la cham ve ṭhap a ni.

“Naupang ringawt i ngaihtuah vang a nih kha” a tih chuan, “Ni reng e…fa harh deuh deuh neih ka hlau alawm. Nangmah ang hlir kan neih theih nan ṭawngṭai ve tawp teh. Keimah ang hlir kan neih chuan kan awmna apiangah huat kan hlawh dawn a nia aw” tih paha sana ka en chu dar8 a lo ri tawh.

“Awii…ka thi ṭhaks…ngati nge Kolasib ah hian thawh ka hai reng le?” tih leh thawh ka rual a, khuma ṭhu chunga Zochhuran, “Ka bula i mut vang a nih kha” fiamthua a a lo tih chuan, “Ve tak che hian, pangtilum pawh nei lo, mipa zawk kuah lum i ngai ziah lehnghal” ka ti a, ka inphih fai hnuah tho chhuakin Zochhura chhungte chu an lo tho vek tawh. Inthlahrunawm duh tak a ni.

“Thawh i hai pek a ni maw?” Zochhura pa, (ka pa ti ve tawh mai teh ang) in a lo tih chuan, “Keiman thawh ka phal lo a nih kha” hnunglam aṭangin Zochhuran a lo ti a, a chhungte nen hian kan inngeih chiah loh vangin min zui a, min la veng reng zel.

“I duh ber bawng ruh kawl ka chhum kha” hlim sangin nu Partein a lo ti thung a, “Ka phit tir a a hmin hma khawp mai” a tih leh chuan, “Hmarcha tal ka lo rawt dawn mi?” inthlahrung dek hian ka ti a, “Kan rawt vek tawh. In awmna hmunah i tho har thei dawn lo a, kan bula i awm chhung na na na chu i duh chen chen mu rawh” Sisitein a lo ti ve mial a, “A dik chiah, in awmna hmunah in han kal ang a, inleng in nei zut reng dawn a nia. Zorama lahin ‘ar vulh ka duh’ a tia, in buai khawp ang” Nu Partein a lo ti a, ka mumanga ka hmuh ang chiah chiah fa kan neih phawt chuan kan in leh a velah eng ran mah an dam khawchhuak zo lo vang. Ar mawng an kawm nitin lo ang tih pawh a sawi theih loh.

A chhungte hriatah engmah ka sawi duh lo nain vulh lo turin ka ti khawp ang. Amah pawh hi enkawl ngai a nia, a ar zawng zawng nen phei chuan ka enkawl tel peih teuh lo. “Chaw ei in peih chuan ei ang, office ka tlai ang e” tih pahin ka pa, khawvela pa nelawm loh ber, vai police ai pawha hmel rorum zawk chu a tho ṭuah ṭuah a, a ṭhutnain a zir lo nge a thawh pah chuan vawih ang mai hian ṭhutthleng chu a ri ṭuah ṭuah lehnghal a, ka tih tur a nih miau avangin chaw ei ka siampui a, nu Partein bawng ruh hmin ṭha a tih chu hmin ṭha a ang pawh ka ti ve lo. An nau Zochhuana lah kha chaw ei dawnah chiah a pindan aṭanga rawn chhuak lehin chaw a ei lai hian a meng ngai lo hrim hrim a, nu Partein, “Tui a ti thei lutuk a a meng phal ngai lo” a ti. Game a khelh laia thil tui pek miah loh chi tihna a nih chu. A meng phal lo ang a, a chak lo reng mai ang.

Chaw kan han ei chu bawng ruh chu ka khel ta ngei a, tui pawh ka ti. Bawng sa hi chu engtin pawn siam se ka duh vek. Rin ang ngei ngeiin a hmin ṭha lo a, kei lahin ei hnem loh ka hlau si, mo mah ni ila puar lo a chaw ei ka tum ngai miah lo. Ka khel ngang ngang lai chuan ka dawmna a pelh thut a, ka hma zawn ni chiah lo, pa ber ṭhutna tura kan duan a inti thu taka ṭhu ka pa chalah tak a va fuh lehnghal a, Sisitei nuih a zain, Zochhura pawhin, “I va khel thlawk nasa ve” a lo ti a, kei lahin, “Awii…ka duh thei lo, ka pa a na em?” ka ti chul a, “Na fawk fawk e mawle” tiin a saruh ken chu nghet deuhin a hum a, kei aiin a khel lian bawk si, min vawm let ve ka hlau khawp mai.

“A hmin ṭha chiah lo aniang a, a hmin lai lai kha ei rawh, ren a ngai lo ka chhum hnem a nia” nu Partein a tih laiin ka pa chuan, “Chhum hmin ta che” a lo ti hmuk a, a chal chu tuilum a a sil ngei a ngai ang. Zochhura nau Zochhuana lah chu chawhmeh a suah dawn chiahin a meng a, tu hmeichhia mahin an hmuh taih ka ring lo. An hausakna an duh vanga an nei a nih ngawt loh chuan an tan chuan neih a huphurhawm ve e…a dul lah secondhand bale lian tiat lawih a nia, a lu a lian si, a nghawng phei chu keu ngang ngang loh chuan a hmuh theih loh. Ka fate hian ka pa leh Zochhuana an chhun ka hlau ber.

Emi lahin leng turin min rawn sawm sek a, bialpa hluite in a len chu ka chak hlawl lo, mawi pawh a mawi lo. U Zirbawnga te inah han mo ngat ila chu aw…Fithangi te nufa ka runluih nasa thei teh ang chu, an huat deuh tur, khin let theih si loh a awmdan ka thiam viau ang.

Chhunah ka ṭhiante lo kalin chaw ei laia thil thleng ka sawi chu an nui huau huau hlawm a, “A aia lian khel la, let tawp se ṭha tur a nia” Sangkhuman a tih laiin keiin ka mumang ka la hriat ang ang ka lo sawi a, “Ka mumanga fa ka ngah thei lutuk hi ka rilru a hah” ka tih chuan Sangbotein, “My sis, engtin nge naute in siam?” a lo ti a, a hre ve awm reng si. “I ninawm, kan in wrestling a kan rai mai” ka ti hlak a, Kalvari in, “Keipawh kan inneih hlim khan ka mumangah naute harh deuh ka hmu ṭhin a, ka lawm thei lutuk a, Dawnfuha ka nei chiah chu hahthlak tak a ni” a lo ti a, min hnem lo hlawm ngei mai.

“Fa nei ṭeuh lo turin indanna te i ei mai dawn alawm” Kalvari chuan a ti leh ta hlauh zawk a, “Lungngai mah ta che, Dawnfuha aia naupang harh an awm lo. Dawnfuha aia harh i neih phawt chuan in hmuh lai ngeiin ka lu hi ka ei ang” tiin Sangkhuman min lo hnem ve bawk a, “Ei ei ei….i lu ei loin i eagle shoe an sawisel dan hi ngaihven zawk rawh. Kan bun chiah hi kan su luih a, kan hniam suai suai zel an tih kha” Sangbotein a lo tih chuan, “Dup deuha siam ka duh vang mawle. Remkalamin pasal a neih vangin ka rilru ka la pe tak tak thei lo a nih kha. Nakinah chuan hmeichhe pheikhawk sang te pawh ka la siam ang” a ti chu, “Ka bun lo chiang viau ang” hmeichhe hoin kan lo ti nghal a, “Fithangin min rawn len chilh mawle. Lapaw chini te min lo ken a, a hmuh lai ngei a ka’n hmeh thep vek kha. ‘Lapaw chini ka hmeh thep ang chiah hian ka thinlung hi i tan a thep tawh, i leng ve tawh lo” hmaichhanah ka ti siah siah a, ka nu leh pate pawh zah lo chu ka duh bik reng reng lo, keiin a chhungte ka zahthiam tehreng nen” Fawnvelan a ti bawrh bawrh a, “A dik chiah my friend, inzahtawn thiam a, kan chhungte ve ve inngaihsak tawn thiam sak hi a pawimawh teh mai a nia aw. Tlawm vawng vawng a ngaih chang a awm a, inrintawk a ngaih chang a awm bawk a, pasal neih hi a awlsam lo teh mai a nia, pastor neih vang ngawtin kan hlim reng kher lo a nia aw”Kalvari in a lo ti a, “Mi fate hian engtin nge pasal hi an hmuh mai theih ṭhin le” Sangbotei lahin a lo ti ve sek a, ṭhianho a bazar kal tumna pawh kan nei lo. U Zirbawnga hmuh kan hlau.

“Ka pa hi hrawn a hrehawm lutuk amaw awii keichu tukin te khan ka thi ṭhaks. Nu Partei leh Sisitei te lah hi ka la hmu dik tak tak thei si lo a, Zodini lah a ṭawngthei si, ṭawngtheih lama world championship a ni ringawt. A inla fel der thiam si, lalnu cheiin an chei a” ka tih laia Zochhura a lo luh chuan, “Zingah te hian min kaitho ngai lo reng reng, kan khuaa kan awmlai aiin ka mu rei zawk. Eirawng te an lo bawl peih sa diam zel a, han hrawn chiah hian rin aiin an fel” tiin ka thusawi ka thlak daih a, ka ṭhiante ho nui put put lah chu rum zet hian ka melh kual a, “Hmarcha rawt thleng hian min awl vek zel mai a ni. Kei lah hian tuktin thawh ka hai a, tlai lamah hi chuan eireltu nih hram hram ka duh ṭhin” ka ti leh vel a, “A fel lutuk a nia, lo ngaihtuah reng reng suh u. Ka ngaihah chuan a bu ang thlap a ni mai” Zochhuran a tih chuan ka ṭhian te chu hul deuh hian an lo nui hak hak a, a chhungte ka rel ri kha a hre pha lo turah ka ngai. Tumah han tih nat a tihchhiat tumna ka nei chuang lo, ka ṭhiante bulah ka ngaihdan ka sawi ve mai a ni.

“Awii keichu u Rinchutan tukinah min ti zak lutuk a ka la ngei” Kalvari in a tih hlut takah chuan, “A haw a ni lo’m ni?” ka lo ti a, “A haw hma lawkin mawle…ka period thut a, ‘U Rinchut, stayfree min va lei lawk teh’ ka tia, a kal ve mai a, rei tawk hnuah dawr neitunuin u Rinchuta phone in min lo phone a, ‘Kan nu ta tur chawlhna leh hahdamna ka duh a tia eng nge awmzia?’ a rawn tia, ‘Stayfree lo pe rawh’ ka ti a nih kha. Vawikhatmah ka lei tir ngai lo a a zak aniang” a tih hlak hlak chuan kan lo nui dar dar a, kei phei chu ka nuih a za zual, Zochhura hi lei tir ve ta ila engtin nge a tih ve ang aw ka ti.

“Keipawh kan inneih tuk tukleh vel kha niin ka hria, ka kekawrte kawngah hrui a rawn lawr a, ka pawt ka pawt a, a tawp thei mai si lo a, ka kekawrte ka pawt ral vek lo chauh alawm” ka ti a, Sangbotei chu a nui uar berah ṭangin, “Awii…i pawh thui viau phei chuan a thawl huau huau dawn a nih chu” a ti a, Zochhura lah a nui ṭha duh lo, “Bawlhhlawh bawm a khat lo chauh a nih kha” a lo ti a, “I zak em? Sarangin ka tuam a a rukin ka paih, nangmah chiah ka hrilh che aw” ka lo ti a, “In inneih ve chiah hi…kekawrte case vang mai maiin inhau suh u” Sangkhuman a tih chuan, “Sangkhuma hi inzir fe a la ngai. A eagle shoe siam hi miin an lei nasa viau nain thla an lakpui chuan an pheikhawk bik an pawt sei emaw an ti zel” thutak deuhin Fawnvelan a ti ta nge nge a, “Kan kohhran upa phei chuan ‘Sangkhuma eagle shoe bun chuan a hmawr lam hi lapaw tam deuha hnawh puar chawp a ngai, a hmar a thawl huau a, a hnung a tawt leh a’ a tih kha. Chhiarkawp i thiam loh vang a nih kha i siam dik theih miah loh” Fawnvela vek chuan a ti leh a, “Ka pa pawn a lei a, ‘a hmawr lam kan hnawh loh chuan kalkawngah kan thlauh zel’ a tih kha, u Remkalami pasal neih dawn vang mai khan i phi chung a” tiin Sangbotein a lo hau ve bawrh bawrh bawk a, “Ka fimkhur tawh ang ka tih ka tih kha. Ngah nge maw in phun phun le? U Zochhur, i lei ve duh em?” a tih chuan, “I thiam tak tak hunah bak ka duh lo. Tuna i siam mek hi chu pheikhawk a la ang lo emai. Motor lem a ang ka ti” a ti a, a rukin nghawk zeih mah ila, “Naupang in school a an pai ṭhin box, motor lem ang hi a ang rih emai” a la ti tho a, Sangkhuma chu hnar arh hawk khawpa tumin a hawi sawn hmak a, “Keiin ka eizawnna ka’n hnehsawh nen. Artui kheh chung pawn bial deuhin atta ka nuai thiam a nia” Sangbotein a lo ti ve zeuh bawk a, an inmelh no leh tawh lo khawp mai.

“In duh duhin min sawisel rawh u, ka eagle shoe hi ka siam fuh hunah a thlawnin beisei reng reng suh u” a ti a, Sangkhuma a thinrim chuan ngawih a ngai tih hriain kan ngawi kar vek a, chutah Zodini lo lutin, “Ka chau lutuk ka ril a ṭam, u Remkalam thingpui a awm em?” a rawn tih chuan, “Lum chawp tur chu awm e” ka lo ti hmak a, kan inneih zana min tihdan kha ka lungawi thei lo. “In khuaah shower te a awm ve si lo a i lo buai palh ang tiin shower hman dan te, tui herh hawn dan thlengin inti fel tawkin inleng awm laiin min hrilh a, “Tui sa leh tui dai herh hawna bikte a awm a” te a tia, inlengte ngaihah khan ka mawl hmel ngawih ngawih, chuvang chuan Zodini hi chu runluih ve sak sak ka duh. Midang chungah chuan ka sual chuang lo, min khei min khei a nih loh chuan sual pawh ka tum lem lo.

“Min lo lum teh ka chhuak nileng a ka chau” ka tih chuan, “Tih lum tur a awm, gas bulah khan va ding tawp la a lum a ni mai” ka ti leh a, Zochhuran a ṭan zawk ngai miah loh chhan pawh hi min tihdanin a zir loh em vang a ni. Kalvari rilru hah hmel ka hmuhin, “Khatiang hmel kha pu suh my friend, khaw dangah awm dawn lo phei ila chu Zodini hi ka hrual zal hnawk thei ang” Zodini kal tau nghawng nghawng en pah hian ka ti a, “Awm dun reng ula chu in insual ziah ang a” Sangbotein a tih chuan, “Insual te mai mai a har lo emai. Ka hneh loh tur chiang sa an nih loh chuan ka sual mai ang” ka ti a, ka ṭhiante ho chu inthlahrun hmel deuh hian an nui a, Zochhura hmai an zah ve deuh a nih hmel. Sangbotei erawh a nui uar khawp mai.

“Insual hi chu va han hahthlak tak e aw. Thinrim phei chuan thinphu a rang duh si. U Zochhur, nang insual i thiam em?” a tih chuan, “Zawt lo mai teh, miim a ngalah pawh pet se a kawng a herh daih ang chu. U Rinchuta chiah chiah a nih hi en ta che” ka tih hnuah,  “Mahse, ka pasal hi chu ka hmangaih a nia, hetiang khawpa mihring kan hmangaih theih chuan Pathian hmangaihna phei chu a va nasa dawn em” ka tih leh vel takah chuan Zochhura chuan lai deuhin a aw a thian a, “Rai hma chi i nih vaih chuan miin ‘an inneih hmain a rai lawk’ an ti leh ngei ngei ang che” Sangbotein a tih chuan, “Lo ti vel mai mai teh se. Zochhura nen kan inngaihzawn dan a thianghlim emai. Sahbawn lian ṭha nelh nawlhin min su mah se bal engmah a awm lo vang” ka ti a, a ni tak tak a, ngaihzawng neih chuan thianghlim taka neih duh tlat chi ka nia, ngaihtuahna sual a lo kal changa go away ti hmak chi ka ni.

“Keichu a ruala fa pali vel neih ṭhawt a awl zui vang vang ka duh. A hran te te a neih a peihawm loh ka ti. Kumtin deuhthaw a chhangchhiat ka peih lo” ka ti bawrh bawrh a, “Kumtin deuhthaw fa neih i tum em ni? Kan ngah lutuk anga sin” Zochhuran a lo ti hlauh a, ka hahdam huai mai. Diktak chuan ka mumang khan min kap ṭun reng a, fa neih ṭeuh a duh ka hlau ber.

“Remkalamin fa a neih chuan a nuam ang chu. A hming ka sa ang” an ti sap sap a, ka pa office bang rawn haw hnuah chiah an haw. Chawhmeh siam thar a ngaih vak loh avangin kei lahin eirel ka hmanhmawh vak lo a, thingpui chu ka lo lum sak nghal. Nu Partei lah pawnah pangpar buaipuiin a awm a, Sisitei erawh a lo la haw ve lo.

Chaw ka chhuan hnua inthlak tura pindana ka lut chu kawngkhar an rawn kik a, “Aw” ka tih veleh Sisitei rawn lutin, “Duhlaia ka hne zia hi. Han block tawp chu ka khawngaih ve deuh bawk si. Min rawn phone a, ‘tun thleng hian i kehniak ka la zawng’ a rawn ti. Ṭawngkam te lah hi a thiam. Engtia han tih chi nge pawh ka hre tawh lo e a” a rawn ti bawrh bawrh a, chaw ei a la hun lo bawk a khumah a ṭhu hnawk a, office bana gym a kal ṭhin avangin ka pa aiin a lo haw tlai ṭhin.

“In in upat hleih viau em ni?” ka tih chuan, “Upat hleih e…a pian chuan ngaihzawng nei rual ka ni tawh. ‘Ka fawh vaih che chuan Duhlai i ti reng mai ang’ a ti ka ten lutuk” tih pahin phone chu kan khumah a vawm a, “Min va’n nel sawt em em” fiamthu a ka lo tih chuan, “Kan ṭawng phawng phawng a, ka haw hran lo che, sual ka ti lo che ka tih ka tih kha. Nakinah, in awmna tur lam in pan hmain kan la ti ti dawn nia, ka u hi chu hrethiam rawh, nakinah a la ngaina ve mai ang che” tih leh thawh a rual a, “Zorama mualpho theihna tur zawngin i awm lo hram hram dawn nia” a ti leh hram bawk.

“Zorama hi an ti ṭuah hum reng a, an hmangaih a a awm ve tho mai” ti a phun nuah nuah chungin ka inthlak a, kan pindan pawn lama puan pho chu seng lehin ka hawi vang vang a, “Fithangi te in han hmu pha ila aw…an hmuh lai ngeiin an in lam a chil chhak tur angin ka awm der vel ang mawle” ka ti leh a, Zochhura kekawr ro lo ho chu dah hrangin a ro ho chu thleh mai theih turin khumah ka dah hrang a, kan nupa thawmhnaw hi ka su hrang bik pawh a ni lo, midang thawmhnaw pawh ka su vek, inchung lamah ka zar daih vang zawk a ni. Ka pa phei chu a thau si, a tshirt phei chu keini ang tak chuan sin tham lawih a ni. A kekawr phei chu ka sawi peih lo zawk, buk sak nan a hman theih ang. A hmuihmul te hi a zuah a, a khawbe hmul a zuah leh der bawk si lo, hei vang hi a nia vai police a ang ka tih em em ni. Hnar hmul mehna leh hmuihmul mehna a nei hrang thlap bawk.

Aizawla Zochhura pi leh pute chu rin aiin an fel a, keipawh min duat thiam. A pi phei chuan ka hnung a chul heuh heuh reng mai a ni. A puin Zochhura a zui peih viau laiin a pi chu nu Partei bulah a awm hnem a, pawi ka ti lo nasa, keiin ṭhian ka kawm theih phah a, leng chhuak thei lo mah ila ka ṭhiante an rawn len theih chhung chu a nuam a ni mai.

Zanriah eikhamah ka nu’n min lo biain, “Naktuk chhunah kan lo leng ang. Chawlh te a ni bawk a, i nu chu ka hrilh tawh. Tlai lamah kan khuaah kan haw ang. Ka ṭhiannuin min char tlat si a, duh aiin kan cham rei ta mah mah zawk a nih hi” a rawn ti a, “Lo leng ngei ngei rawh u, ka pa hi hriatthiam chin nei ula aw” ka tih chuan, “Kha pa liau luau kha chu be mah ila a thaw sut ringawt a, kan ti ti kara a lo thawk ve chuan a tawk mai” a ti a, ka nuih a lo za, “A pa rem rem a sin, miin an bia a a thaw sut ringawt awii what a funny thing” tiin ka nui duai a, ka pa hi chu ṭhenawmte pawhin an nel lo tih Zochhura hnen aṭangin ka hre tawh. “Biakinah zirtirtu a nia, thawhlawm hlan tur te pawhin an sawm ve ṭhin” a tih chuan mak ka ti a nia aw, kohhran hi sawisel chi a ni hauh lo nain tumah famkim kan awm lo a, kohhran pawh a famkim thei lo, a hmu duh tan chuan dik lo lai chu a awm zel zawng a nih hi. Mizoram, Krisrian hlang awmna ram ngeiah pawh hian rethei leh hausa kar a hla tial tial ang a, rin loh deuh deuh hi mi pawimawh deuh deuh an la ni mai ang. Zochhura chuan, “Ka chhungte chuan phal ngat se chu missionary a ka kalna a rei tawh ang” a la ti ve ṭang ṭang reng a, rawngbawlna thuk zawk neih a duh a ni.

Kan mu chiah hi, ‘Kan inchhung hi hrehawm i ti em?’ tiin min zawt ziah a, tunah pawh min zawt leh tawh. “Ti nang aw…an fel em hi. Ka pa’n, ‘Naktukah sam min dum rawh’ a ti ve mial leh nghal a, thaw sut ringawt lo a a thusawi hi chu zawm hram hram a ngai. Mahse, ka ngaihdan lo chin a awm chuan ka sawi ve dawn tho a nia” ka tih chuan, “I sawi dawn nia, chhungkua kan ni tawh a, engkim kan sawi ho zel ang” a ti a, min kuah ran chung hian a muhil a, Zochhura hi chu a chut viau e tih lohah chuan a hmelṭha a ni. A mithmul te hi hmeichhe mithmul chu nise khawih danglam emaw, a lem vuah chawp a ngai miah lo ang. Ka hmuh hlima ka sawi ang khan amah hi uluk deuha ker chawp a ang, a dik vel mai a ni. Ka hmelṭha aniang bialpa ka nei hmelṭha thei emai, pasal ka nei hmelṭha bawk si. Mi pasal pawh nise Zochhura hi chu hmelṭha ka ti tho ang. U Rinchuta stayfree lei tum dan te kha ngaihtuahin ka muhil thei lo chu ka nui leh ṭhin a, ka nute leh ka ṭhiante an la awm bawk a ka khua a la har lo. Kei hi chu khawi hmunah pawh awm ila ka tlei thei hrim hrim a, kan awmna tur hmunah pawh ṭhian ka siam leh vat tho ang, hmelma pawh ka siam leh tho maithei a ni.

Tukṭhuan eikhamah ka pa’n, “Remmawi, ka sam chu dum rawh. Hetiang lam hi i zir sil ve awng a ni lo’m ni?” a ti kher a, dum sak a chakawm hran loh a nia. Bathlarah ṭhuin kei ka ding thung a, a sam lah a hraw ṭha. “I sam chu a hraw hle mai ka pa, kutzungṭang tiat deuh ṭhah a nih hi” tih nuih tum a ka tih chuan a thaw sut ringawt a, sam hraw na na na chu a dumna pawh ka hnawih chhah. A pherh hlau em em hian a bek vel chu awmze nei deuhin ka dum bawk a, uluk deuha milem ziah ang vel a ni.

“Remmawii nute lo kal hmaa i suk hman a ngai ang” Nu Partein lo tiin ka pi pawhin, “Keipawh min la dum sak ve rawh aw” a ti a, ka pu thung chuan, “Ka sam ṭuak hi a thawk a pawh a ngai” a ti a, chhangchhe deuhin kan zin ang tih a hlauhawm hle mai, mamawh an ngah emai. “Kan ti vek ang lungngai reng reng suh u. Aieng hmai hnawih te kan siam dawn mi? In duh em? In thar sar mai ang” ka ti chu an phur nasa mai. Kan awm rei tawh lo tur ber chu an huphurh a, “Zorama chiah kal mai rawh se” an ti thul. Ka tan chuan lawmawm ve duh tak a ni.

“Ka u Roi chu lo chhuk a ngai kher lo asin mawle. Anpa a damṭha lo leh nghal a” Sisitein a lo ti leh ṭhin a, chhungte lah hi an ngah sia, Roi an tih chu inneihna an rawn hmang ve a, zanah an haw lehnghal.  Biak pawh kan inbe lo.

“Zorama te kal hmaa lo kal ve zuai a duh a nih kha” ka piin a lo ti a, ka nute meuh an lo len dawn avangin ka pa chuan a hmaizah ve deuh aniang a lu a su a, hrukpuan var, sam dumna kai luai hi rawn keng thla in, “I sam dum mai mai chu” a rawn ti hmuk a, ka uluk lutuk na lamah helmet angah ka chhuahsak daih alawm le. Chalsam a ti chho lo bawk nen helmet khum ang chiah chiah a ni tak tak a, “Ka uluk lutuk a” ka tih veleh, “I mawi loh a hlau a nih kha” Zochhuran a lo ti ve a, “I hnunglamah khan a varin ISI chhinchhiahna chu ziak ila helmet khum lo mahla an man miah lo ang che” fiamthu hian ka ti a, a nuih ka rin nen, “Vawi tam tak suk nawn a ngai dawn a nih hi” a ti a, ka pa diktak chu hetiang hian fiam ila a nui leh hawk hawk tawh ang.

Ka nu te an lo thleng chiah chu Zochhura nen kan lo lawm ber a, ka pa chu lukhum khumin a ṭhu tum vuau mai. Kan khuaa kan in leh Zochhura te in inthlauh zia an hre tawh a, engmah pawh an lo keng lem lo. An zum deuh duk chu khawngaihin ṭhutna nuam laiah ka pa ka kai phei a, ka nu erawh nu Partei nen an ri leh bawrh bawrh tawh. Anni angin inchei mawi ve loin, an vun te pawh thim bik mah se ka nu leh pate hi ka zahpui lo reng reng.